အခန်း ၅၂၄
Vol. 38 Ch. 524
အခန်း ( ၅၂၄ ) - အသက်ရှင်နေရသည်က ပိုကောင်းခြင်း၊ ရှူလောင် ဟူသော အမည်နှင့် ကြက်သီးမွေးညင်းထဖွယ်ရာ
အဘိုးအို၏အသံတွင် မျှော်လင့်ချက်များ ပြည့်နှက်နေလေသည်။
ယခင်က သူသည် ကိုယ့်ကိုယ်ကိုယ် အိပ်စက်ခြင်းအခြေအနေသို့ ဝင်ရောက်စေကာ အသက်စွမ်းအင်အနည်းငယ်ကိုသာ စားသုံး၍ အရောင်ငါးမျိုး ဝိညာဉ်အရည် ကုန်ဆုံးမှုကိုများစွာ နှေးကွေးစေရန် လုပ်နိုင်၏။ ထို့မှသာ သူ၏သက်တမ်းကို သိသိသာသာ ဆွဲဆန့်ပေးနိုင်မည်ဖြစ်သည်။
သို့သော် ဤကဲ့သို့ အိပ်စက်ခြင်းအခြေအနေသို့ ဝင်ရောက်သွားပါက အသိစိတ်လွတ်ကာ ဝေဝါးသော အခြေအနေဖြင့်သာ ရှင်သန်ရမည်ဖြစ်သောကြောင့် သူ မလုပ်ဆောင်ခဲ့ခြင်း ဖြစ်သည်။
ထိုသို့သာဆိုလျှင် ဤမျှ အချိန်ကြာမြင့်စွာ အသက်ရှင်နေရခြင်းက ဘာအဓိပ္ပာယ် ရှိမည်နည်း။
နောက်ဆုံးတွင် အရောင်ငါးမျိုး ဝိညာဉ်အရည်များ ကုန်ခမ်းသွားချိန်၌ သူ သေဆုံးရမည်သာ ဖြစ်သည်။
ဝေဝါးသောအသိဖြင့် အချိန်ကြာမြင့်စွာ ရှင်သန်ပြီးမှ သေဆုံးရမည့်အစား ရှင်းလင်းသော အသိစိတ်ဖြင့် စောစောစီးစီး သေဆုံးလိုက်ရသည်က ပိုကောင်းပေလိမ့်မည်။
ဤသည်မှာ အဘိုးအို ယခင်က တွေးတောခဲ့သော အတွေးဖြစ်သည်။ သို့သော် ယခုအခါ ကုချန်တွင် သူ့အတွက် အသက်စွမ်းအင်အသစ်များ ထည့်သွင်းပေးနိုင်စွမ်း ရှိကြောင်း သိလိုက်ရသောအခါ အဘိုးအို၏အတွေးများမှာ ချက်ချင်း ပြောင်းလဲသွားခဲ့လေသည်။
သေရမယ်? သူ လုံးဝ သေမှာ မဟုတ်တော့ဘူး။
သေလူတစ်ယောက်ထက်စာလျှင် အသက်ရှင်နေရသည်က ပိုကောင်း၏။ အသက်ရှင်နေသရွေ့ မျှော်လင့်ချက်ဆိုတာ ရှိနေသေးသည် မဟုတ်ပါလော။
အဘိုးအို၏ ဤမျှ ပြင်းထန်သော အပြောင်းအလဲကို မြင်သောအခါ ကုချန်မှာ ရယ်ချင်စိတ်ကို အနည်းငယ် မထိန်းနိုင်ဖြစ်သွားရ၏။
သို့သော် အဘိုးအို၏ခံစားချက်များကို သူ နားလည်နိုင်သည်။
ယခင်က ရှင်သန်ရန် မျှော်လင့်ချက် လုံးဝ မတွေ့ခဲ့ရသဖြင့် သူသည် သေရန်သာ ရည်ရွယ်ထားခဲ့၏။ အသက်ကို ခဲယဉ်းစွာ ဖက်တွယ်ထားမည့်အစား စောစောစီးစီး သေဆုံးပြီး အရာအားလုံး အဆုံးသတ်လိုက်ခြင်းက ပိုကောင်းသည်ဟု ယူဆခဲ့ခြင်းဖြစ်သည်။
ယခုမူ ရှင်သန်ရန် မျှော်လင့်ချက်ကို တွေ့ရှိသွားပြီဖြစ်ရာ အချိန်ကာလတစ်ခုအထိ ဝေဝါးသောအသိဖြင့် ရှင်သန်ရမည် ဆိုလျှင်တောင် အဘိုးအိုအတွက် သည်းမခံနိုင်စရာ မရှိတော့ပေ။
မည်သို့ပင်ဆိုစေ ယခင်ကပ်စက်ဝန်းမှ ဤအဘိုးအိုကို ဤအတိုင်း သေဆုံးသွားစေရန် ကုချန် အမှန်တကယ် ဆန္ဒမရှိခဲ့ပေ။
အနည်းဆုံးတော့ သူသည် ကုချန်မသိသော ကောင်းကင်ဘုံ၏ လျှို့ဝှက်ချက်များစွာကို သိရှိထား၏။ လျှို့ဝှက်ချက်အချို့ကို ကြိုတင်သိရှိထားခြင်းက လမ်းလွဲအချို့ကို ရှောင်ရှားနိုင်စေမည်ဖြစ်ရာ ကုချန်၏ အဆင့်ရှိ တည်ရှိမှုတစ်ခုအတွက် ဤသည်မှာ အလွန်တရာ အဓိပ္ပာယ်ရှိလှပေသည်။
အိမ်တစ်အိမ်၌ သက်ကြီးရွယ်အိုတစ်ယောက် ရှိနေခြင်းက ရတနာတစ်ခု ပိုင်ဆိုင်ထားသလိုပဲ ဆိုသည့် စကားမှာ အမှန်ပင်။
" အခုကစပြီး ခင်ဗျားကို ရှူလောင်လို့ပဲ ခေါ်တော့မယ်"
ကုချန်သည် အရောင်ငါးမျိုး ဝိညာဉ်အရည်တွင် အမြစ်တွယ်နေသော သစ်ပင်ငယ်လေးကို ကြည့်ကာ ပြုံးလျက် ပြောဆိုလိုက်၏။
" ရှူလောင်? ရပါတယ်လေ... ဘယ်လိုပဲဖြစ်ဖြစ် ငါ့နာမည်ကို မေ့နေတာလည်း ကြာပြီဆိုတော့ "
ကုချန် ပေးသော အမည်ကို ကြားသောအခါ ရှူလောင်၏ အသံတွင် လွမ်းဆွတ်မှု အနည်းငယ် ပါဝင်နေသကဲ့သို့ ဝမ်းမြောက်မှု အနည်းငယ်လည်း စွက်နေလေသည်။
သူ၏အတိတ်မှတ်ဉာဏ် အများစုကိုပင် မေ့လျော့နေပြီဖြစ်၍ သူ အနည်းငယ် လွမ်းဆွတ်မိခြင်းပင်။
ထို့ပြင် ကုချန်မှ သူ့အား ယခုမှစ၍ ရှူလောင်ဟု ခေါ်ရန် ရည်ရွယ်ထားခြင်းက သူ့ကို ကူညီကယ်တင်ပေးရန် စီစဉ်ထားကြောင်း အဓိပ္ပာယ်ရနေသဖြင့် သူ ဝမ်းမြောက်မိလေသည်။
" ငါ မကြာခင် လျှို့ဝှက်နည်းစနစ်တစ်ခုကို သုံးပြီး အိပ်စက်တဲ့အခြေအနေကို ဝင်ရောက်တော့မယ်... အသက်အငွေ့အသက်လေးကိုပဲ ထိန်းသိမ်းထားနိုင်တော့မှာ....
နှစ်တစ်ရာကြာတိုင်း ငါ ခဏလောက် နိုးထလာလိမ့်မယ်... မင်းမှာ မေးစရာရှိရင် အဲဒီအချိန်ကျမှ မေးလို့ရတယ်.....
ဒီလက်တစ်ဆုပ်စာ အရောင်ငါးမျိုး ဝိညာဉ်အရည်လေးက... ငါ့ရဲ့ အိပ်စက်ခြင်းအခြေအနေကို နှစ်တစ်သိန်းလောက်တော့ ထိန်းသိမ်းထားပေးနိုင်ပါလိမ့်မယ်.....
ဒီနှစ်တစ်သိန်းအတွင်းမှာ မင်း တာအိုအရှင်သခင်အဆင့်ကို တက်လှမ်းနိုင်ဖို့ပဲ လိုတယ်... အော် ဟုတ်သားပဲ... အဲဒါကို မင်းတို့က အင်မော်တယ်ဧကရာဇ်အဆင့်လို့ ခေါ်တာပဲ.....
မင်း အင်မော်တယ်ဧကရာဇ်အဆင့်ကို ရောက်သွားတာနဲ့ အသက်စွမ်းအင်အချို့ကို သာမန်ကာလျှံကာ သန့်စင်လိုက်ရုံနဲ့တင်... ငါ့ရဲ့ ရှင်သန်မှု လိုအပ်ချက်တွေကို ထောက်ပံ့ဖို့ လုံလောက်သွားပါပြီ "
ရှူလောင်မှ ဖြည်းညင်းစွာ ပြောဆိုလေသည်။
အိပ်စက်ငြိမ်သက်ခြင်းအခြေအနေကို ဝင်ရောက်ပြီး နှစ်တစ်ရာကြာတိုင်း တစ်ခဏ နိုးထလာမယ်? နှစ်တစ်သိန်းဆိုရင် လုံလောက်သင့်ပါတယ်လေ။
ကုချန် တစ်ခု တွေးတောလိုက်၏။ နှစ်တစ်သိန်းအတွင်း အင်မော်တယ်ဧကရာဇ်အဆင့်ကို တက်လှမ်းရန်ဆိုသည်မှာ အခြားသော အင်မော်တယ်ဘုရင်တစ်ပါးသာဆိုလျှင် ဤကဲ့သို့ အာမခံရဲမည် မဟုတ်ပေ။
သို့သော် ကုချန်၏မျက်စိထဲတွင်မူ နှစ်တစ်သိန်းအတွင်း အင်မော်တယ်ဧကရာဇ် ဖြစ်လာရန်ဆိုသည်မှာ အလွန်တရာ နှေးကွေးသော တိုးတက်မှုဟုပင် ယူဆရမည်ဖြစ်သည်။ သူ့အတွက်မူ ဤသည်မှာ လုံးဝ ခက်ခဲသင့်သည့်အရာ မဟုတ်ပေ။
" ကောင်းပါပြီ "
ကုချန်သည် သဘောတူညီကြောင်း ခေါင်းညိတ်ပြလိုက်၏။
" ဒါဆို မင်းမှာ တခြား မေးစရာမေးခွန်းတွေ ရှိသေးလား... အေးအေးဆေးဆေး မေးပါ... ငါသိတာ မှန်သမျှ အကုန်ပြောပြပါ့မယ်... အခု မမေးရင် ငါ နိုးလာမယ့် နောက်ထပ် နှစ်တစ်ရာကို မင်း စောင့်နေရလိမ့်မယ် "
ရှူလောင်မှ အလျင်အမြန် ပြောဆိုလိုက်၏။
မေးစရာမေးခွန်းလား.....
ကုချန်သည် ခေတ္တမျှ စဉ်းစားလိုက်ပြီးနောက် တစ်စုံတစ်ခုကို တွေးမိသွားဟန်ဖြင့် မေးမြန်းလိုက်၏။
" တာအိုအရှင်သခင်အဆင့် တည်ရှိမှုတွေကပဲ ကောင်းကင်ဘုံ အဆုံးသတ်ပျက်သုဉ်းချိန်မှာ ဘေးကင်းကင်း ရှင်သန်နိုင်တယ်လို့ အရှင် ခုနက ပြောခဲ့တယ်နော်... အရှင်တို့ရဲ့ ကပ်စက်ဝန်းမှာကော တာအိုအရှင်သခင်အဆင့်ကို တက်လှမ်းနိုင်ခဲ့တဲ့သူ ရှိလား "
" ကျိန်းသေပေါက် ရှိခဲ့တာပေါ့ "
ရှူလောင်မှာ တုံ့ဆိုင်းခြင်းမရှိဘဲ ပြောဆိုလေသည်။
" ဒီအရောင်ငါးမျိုး ဝိညာဉ်အရည်လိုမျိုးပေါ့... ငါ တောင်းဆိုခဲ့တဲ့ တာအိုအရှင်သခင်တစ်ပါးက ဖန်တီးသန့်စင်ပေးခဲ့တာလေ... အဲဒါကလည်း အဲဒီအချိန်တုန်းက အဲဒီတာအိုအရှင်သခင်နဲ့ ငါ့ကြားမှာ ရင်းနှီးတဲ့ ခင်မင်မှု ရှိခဲ့လို့ပါ... ဒီအရောင်ငါးမျိုး ဝိညာဉ်ရေကန်ကို ဖန်တီးနိုင်ဖို့ ငါ့တစ်သက်တာ ရှာဖွေစုဆောင်းထားခဲ့သမျှ အင်မော်တယ်ပစ္စည်းတွေနဲ့ နတ်ဘုရားရတနာတွေ အားလုံးကို အကုန်အစင် သုံးစွဲခဲ့ရတယ်.....
တာအိုအရှင်သခင်တစ်ပါးကသာ ကိုယ်တိုင်ဝင်ပါပြီး သန့်စင်ပေးခဲ့တာ မဟုတ်ဘူးဆိုရင်... သာမန် အင်မော်တယ်ရတနာတွေနဲ့ နတ်ဘုရားပစ္စည်းတွေက ပျက်သုဉ်းခြင်းချီရဲ့ ဆေးကြောမှုကို ဘယ်လိုလုပ် ခံနိုင်ရည်ရှိပါ့မလဲ... သဲလွန်စလေးတောင် မကျန်ဘဲ မြေမှုန့်အဖြစ် ပျက်သုဉ်းသွားခဲ့တာ ကြာပြီပေါ့ "
အဘိုးအို၏ ရှင်းပြချက်ကို နားထောင်ရင်း ကုချန်မှာ ရုတ်တရက် သဘောပေါက်သွားလေသည်။
စင်စစ်တွင် သူ အစောပိုင်းက ထိုအချက်ကို မတွေးမိခဲ့ချေ။
ဤကွေ့ရွှီးနယ်မြေအတွင်းရှိ မရေမတွက်နိုင်သော ပျက်စီးနေသည့် စကြာဝဠာများကို ဖြတ်သန်းသွားလာစဉ်အတွင်း သူ မည်သည့်အရာကိုမျှ ရှာမတွေ့ခဲ့ပေ။
ပထမဆုံး စကြာဝဠာရှိ ရှေးဟောင်းအခေါင်းတဆာအတွင်းမှ မရေမတွက်နိုင်သော နတ်ဘုရားပစ္စည်းများနှင့် အင်မော်တယ်ပစ္စည်းများပင်လျှင် မြေမှုန့်အဖြစ် ပြောင်းလဲသွားခဲ့သည်မှာ ကြာမြင့်နေပြီဖြစ်ကာ အနည်းငယ် ထိလိုက်သည်နှင့် ကြေမွသွားခဲ့သည် မဟုတ်ပါလော။
သို့တိုင်အောင် ရှူလောင်၏အောက်ရှိ ဤအရောင်ငါးမျိုး ဝိညာဉ်အရည် လက်ဆုပ်စာမှာ ဆက်လက် တည်ရှိနေနိုင်ခဲ့ခြင်းကပင်လျှင် တစ်စုံတစ်ခုကို သက်သေပြနေလေသည်။
သာမန် နတ်ဘုရားပစ္စည်းများသည် မည်သို့လုပ် ရှင်သန်ကျန်ရစ်နိုင်မည်နည်း။ ပြာပင်မကျန်တော့ဘဲ ယခင်ကတည်းက ပျက်စီးသွားခဲ့ပေလိမ့်မည်။
ထို့ပြင် ဤအဘိုးအို အသက်ရှင်ကျန်ရစ်နိုင်ခဲ့ခြင်းမှာ ထိုအရောင်ငါးမျိုး ဝိညာဉ်အရည် တစ်ဆုပ်စာကြောင့်ပင် ဖြစ်သည်။
" အရင်ကပ်စက်ဝန်းက တာအိုအရှင်သခင်အဆင့် တည်ရှိမှုတစ်ခုကို အရှင် တွေ့ဖူးတယ်ပေါ့... ဆိုလိုတာက အရှင်တို့ရဲ့ ကပ်စက်ဝန်းမှာ တာအိုအရှင်သခင်အဆင့် တည်ရှိမှု တစ်ပါးထက်ပိုပြီး ရှိခဲ့တယ်ဆိုတဲ့ သဘောလား "
ကုချန်သည် တစ်စုံတစ်ခုကို တွေးမိသွားဟန်ဖြင့် ဆက်လက်မေးမြန်းလိုက်၏။
" အဲဒါကိုတော့ ငါ မသိဘူး "
သစ်ပင်ငယ်လေး၏ အကိုင်းအခက်များသည် ကုချန်အား ဖြေကြားသည့်အလား အနည်းငယ် လှုပ်ခတ်သွားလေသည်။
" အဲဒီတာအိုအရှင်သခင်နဲ့ ငါ ရင်းနှီးကျွမ်းဝင်ခဲ့တာက အတိတ်က ဆက်နွယ်မှုတစ်ခုကြောင့် သက်သက်ပါပဲ.....
တာအိုအရှင်သခင်အဆင့် တည်ရှိမှုတွေက အရမ်း လျှို့ဝှက်ဆန်းကြယ်ကြပြီး ကောင်းကင်ဘုံတွေမှာ ပေါ်လာခဲတယ်... တာအိုအရှင်သခင်အဆင့်ကို ရောက်ရှိသွားတဲ့အခါ ကိုယ်တိုင်က ကြီးကျယ်ခမ်းနားတဲ့ မဟာတာအိုတစ်ခုနဲ့ ညီမျှသွားပြီး... ဒီအဆုံးမဲ့ ကောင်းကင်ဘုံတွေနဲ့ ကမ္ဘာလောကတွေရဲ့ ကြီးမားလှတဲ့ ပမာဏကတောင် တာအိုအရှင်သခင်လို ကြီးမြတ်တဲ့ တည်ရှိမှုမျိုးတွေကို ဆက်လက် မထမ်းပိုးထားနိုင်တော့ဘူးလို့ ရှေးဟောင်းဒဏ္ဍာရီတစ်ခုမှာ ဆိုထားတယ်.....
ဒါကြောင့် တာအိုအရှင်သခင်အဆင့်ကို တက်လှမ်းနိုင်သူတိုင်းက ဒီအဆုံးမဲ့ စကြာဝဠာတွေထဲမှာ သူတို့ကိုယ်သူတို့ ထုတ်ဖော်ပြသလေ့ သိပ်မရှိကြဘူး "
ဒီလိုကိုး.....
ကုချန်မှာ အနည်းငယ် ခေါင်းညိတ်လိုက်သော်လည်း ရှာနာနတ်ဆိုးဧကရာဇ် သူ့အား အစောပိုင်းက ပြောခဲ့သည့်စကားကို ပြန်လည်သတိရသွားဟန် ပေါ်လေသည်။
အင်မော်တယ်ဧကရာဇ်အဆင့် အထက်သို့ တက်လှမ်းရန်မှာ အလွန်တရာ ခက်ခဲလှ၏။ မရေမတွက်နိုင်သော နှစ်ကာလများစွာ ကောင်းကင်ဘုံတစ်ခုလုံးကို ရှာဖွေလျှင်ပင် ထိုကဲ့သို့သော တည်ရှိမှု တစ်ပါး၊ နှစ်ပါးကို တွေ့ရှိရန် ခဲယဉ်းလှပေသည်။
ထို့ကြောင့်ပင် အင်မော်တယ်ဧကရာဇ်အဆင့် တည်ရှိမှုများအတွက် ရွေးချယ်စရာ မဟာတာအိုများစွာ ရှိနေပြီး သူတို့ ရွေးချယ်ထားသော မဟာတာအိုကို တာအိုအရှင်သခင် တစ်ပါးပါးမှ ပိတ်ဆို့နေမည်ကို စိုးရိမ်စရာမလိုကြောင်း ရှာနာနတ်ဆိုးဧကရာဇ်မှ ပြောဆိုခဲ့ခြင်း ဖြစ်သည်။
သို့သော် ရှာနာနတ်ဆိုးဧကရာဇ်၏ နားလည်မှုအရ အင်မော်တယ်ဧကရာဇ်အဆင့် အထက်ရှိ တည်ရှိမှုများမှာ အလွန်တရာ ရှားပါးလှသည်ဟုဆိုရာ ဤသည်မှာ ကောင်းကင်ဘုံများ လည်ပတ်ခြင်း၏ အမှန်တရားကို သူ မသိရှိထားကြောင်း ပြနေ၏။
တွေးကြည့်ပါလေ။ ကောင်းကင်ဘုံများသည် ကျယ်ပြောလှ၍ အဆုံးအစမရှိ၊ ရပ်တန့်ခြင်းမရှိ လည်ပတ်နေကာ ယခုအချိန်အထိ မရေမတွက်နိုင်သော ကပ်စက်ဝန်းများ ဖြတ်သန်းခဲ့ပြီးပြီ ဖြစ်သည်။
ထို့ပြင် ကပ်စက်ဝန်းတိုင်းတွင် တာအိုအရှင်သခင်အဆင့်သို့ အောင်မြင်စွာ တက်လှမ်းနိုင်သည့် တည်ရှိမှု တစ်ပါး၊ နှစ်ပါးခန့် ရှိနိုင်ပေသည်။
ထို့ပြင် ရှူလောင်၏စကားအရ တာအိုအရှင်သခင်အဆင့်ကို တက်လှမ်းနိုင်ပါက ကောင်းကင်ဘုံများ ပြိုကျပျက်စီးမှုကို သေဆုံးခြင်းမရှိဘဲ ဖြတ်ကျော်နိုင်မည် ဖြစ်သည်။
ကပ်စက်ဝန်းတစ်ခုလျှင် တာအိုအရှင်သခင် တစ်ပါး၊ နှစ်ပါးခန့်မျှတော့ မွေးဖွားလာခဲ့မည် ပင်။
ယခုအခါ ကောင်းကင်ဘုံများသည် အကြိမ်ပေါင်း မရေမတွက်နိုင်အောင် ပြောင်းလဲခဲ့ပြီး မရေမတွက်နိုင်သော ကပ်စက်ဝန်းများကို ဖြတ်သန်းခဲ့ပြီးပြီ ဖြစ်သည်။
ထို့အပြင်... တာအိုအရှင်သခင်အဆင့် တည်ရှိမှုများသည် ကောင်းကင်ဘုံများ ပြိုကျပျက်စီးမှုကို သေဆုံးခြင်းမရှိဘဲ ဖြတ်ကျော်နိုင်သည် ဆိုပါက.....
ထိုသဲလွန်စများ အားလုံး စုဆုံသွားသောအခါ ကုချန်သည် ကြက်သီးမွေးညင်းထဖွယ်ရာကောင်းသော ခန့်မှန်းချက်တစ်ခုကို ချက်ချင်း ရရှိသွားခဲ့လေတော့သည်။