အခန်း (၂၃၁-၂၃၂)

အခန်း ၂၃၁: ဒီအရှင်က မင်းကို အသိအမှတ်ပြုတယ်

လျှိုရူယန်၏အသံတွင် သရော်တော်တော် အရိပ်အယောင်တစ်ခု ပါဝင်နေပြီး ယွဲ့ယီနှင့် သူမ၏ တိတ်ဆိတ်သော အပြန်အလှန်ဆက်သွယ်မှုကို ကြားဖြတ်ရန် စူးချန်ကဲ၏ အစောပိုင်းက စိတ်အားထက်သန်မှုကို သူမ မြင်ယောင်သွားသည့်အလားပင်။

စူးချန်ကဲသည် အမူအရာ မပြောင်းလဲဘဲ ဆက်လက်၍ လျှောက်လှမ်းသွားကာ သူ၏ ပခုံးများကို တွန့်ပြီး တည်ငြိမ်သော လေသံဖြင့် ပြောလိုက်သည်။

"ငါ အဲ့ဒီလို မဖြစ်ပါဘူး..."

"ဟုတ်ရဲ့လား...."

လျှိုရူယန်က သူမ၏ခေါင်းကို အနည်းငယ် တိမ်းစောင်းလိုက်ရာ သူမ၏လှပသော မျက်လုံးများတွင် ပို၍နက်ရှိုင်းသော သံသယများဖြင့် ပြည့်နှက်နေပြီး အပြစ်အနာအဆာတစ်ခုကို ရှာဖွေရန် ကြိုးစားနေသည့်အလား သူ၏မျက်နှာကို စစ်ဆေးနေလေ၏။

စူးချန်ကဲသည် သူမ၏အကြည့်အောက်တွင် အနည်းငယ် နေရခက်သကဲ့သို့ ခံစားလိုက်ရသည်။ သူသည် စကားအကြောင်းအရာကို ပြောင်းရန် တစ်ခုခု ပြောတော့မည့် အချိန်မှာပင် သူ၏ခါးတဝိုက်တွင် တင်းကြပ်မှုတစ်ခုကို ရုတ်တရက် ခံစားလိုက်ရသည်။

အေးမြပြီး ချောမွေ့သော ကျောက်စိမ်းအလား လက်တစ်ဖက်က သူ၏ဝတ်ရုံအောက်သို့ ရဲတင်းစွာနှင့် တိတ်ဆိတ်စွာ ဝင်ရောက်လာပြီး သူ၏အတွင်းခံ အဝတ်အစားများမှတစ်ဆင့် သူ၏ဝမ်းဗိုက်အောက်ပိုင်းကို ညင်သာစွာ ဖိထားခဲ့သည်။

ထိုလက်သည် ဂဏာမငြိမ်ဘဲ အနည်းငယ် ပွတ်သပ်နေပေ၏။

စူးချန်ကဲ၏ခန္ဓာကိုယ် ချက်ချင်းတောင့်တင်းသွားပြီး သူ၏ခြေလှမ်းများ ရပ်တန့်သွားသည်။ သူ၏မျက်လုံးများ ပြူးကျယ်သွားပြီး သူ၏နံဘေးရှိ လျှိုရူယန် ကို မယုံကြည်နိုင်စွာ ကြည့်လိုက်သည်။

"မင်း... မင်း ဘာလုပ်နေတာလဲ"

သောက်ကျိုးနည်း..

ဒီကောင်မလေးက ဘယ်အချိန်ကစပြီး ဒီလောက်ထိ ရဲတင်းလာရတာလဲ...

နေခင်းကြောင်တောင်ဖြစ်ပြီး ကောင်းကင်တက်လှမ်းခြင်း လှေကားပေါ်၌ အချိန်မရွေး လူများ ကြည့်နေနိုင်သောနေရာတွင် သူမသည်...

ဒီမိန်းကလေးက တကယ့်ကို ရဲတင်းနေတယ်... သူ တကယ်ကြီး ကြီးပြင်းလာပြီပဲ...

လျှိုရူယန်သည် သူ၏အံ့အားသင့်နေသော အကြည့်ကို ရင်ဆိုင်ရချိန်၌ သူမ၏ လှပသော မျက်နှာပေါ်တွင် ဆွဲဆောင်မှုရှိသော အနီရောင်သမ်းမှုတစ်ခု ထွက်ပေါ်လာခဲ့လေသည်။ သို့သော် သူမ၏ မျက်လုံးများတွင် မကျေနပ်မှု အရိပ်အယောင်တစ်ခု ပါဝင်နေပြီး သူမကလည်း ပြန်လည်၍ အသံပေးပို့လိုက်၏။

"ကျွန်မ စစ်ဆေးတာ ဘာမှားလို့လဲ... စီနီယာအစ်ကိုက အပြင်မှာ တိတ်တိတ်လေး ပျော်ပါးနေပြီး အပြစ်ရှိသလို ခံစားနေရလားဆိုတာ စစ်ဆေးကြည့်ရတာပေါ့..."

စူးချန်ကဲသည် စကားမပြောနိုင်ဖြစ်သွားပြီး သူ၏နဖူးပေါ်တွင် ဖျော့တော့သော အနက်ရောင် အရေးအကြောင်းများ ထွက်ပေါ်လာသည်။

ဒါက ဘာအကြောင်းပြချက်ကြီးလဲ...

ဒီကောင်မလေးရဲ့အတွေးတွေက အရမ်းမြန်နေတာလား....

ပြီးတော့ ဒီစစ်ဆေးတဲ့ နည်းလမ်းက...

သူသည် ဖြောင့်မတ်ဟန်ဖြင့် ငြင်းဆိုပြီး ထို အဆော့မက်သော လက်လေး၏ အထိအတွေ့ကို ခံစားတော့မည့် အချိန်မှာပင် ရုတ်တရက်...

"ဘုန်း"

ကောင်းကင်ယံအမြင့်မှ လောကကြီးကို တုန်ခါစေသော ဆူညံသံကြီးတစ်သံ ထွက်ပေါ်လာသည်။

ဤသည်မှာ လောင်ကျွမ်းနေသော ရှေးဟောင်းကြယ် နှစ်စင်း ပြင်းထန်စွာ တိုက်မိသွားသည့်အလားပင်။

ပြင်းထန်ပြီး လောင်ကျွမ်းနေသော စွမ်းအင်မုန်တိုင်း တစ်ခုက တလိမ့်လိမ့်ထနေသော လှိုင်းလုံးများအလား တိုက်ခတ်သွားသည်။ ကြီးမားသော အကွာအဝေးနှင့် ကောင်းကင်တက်လှမ်းခြင်း လှေကား၏ အတားအဆီးကို ဖြတ်ကျော်၍ပင် လူအများသည် နှလုံးတုန်စရာကောင်းသော အပူချိန်မြင့်မားမှုနှင့် ဖျက်ဆီးနိုင်သော လှိုင်းဂယက်များကို ခံစားရနိုင်သည်။

ပြင်းထန်သော ရွှေရောင်ရင့်ရင့် မီးတောက်များ လောင်ကျွမ်းနေသည့် ပုံရိပ်တစ်ခုက သေးငယ်သော လူသားနေမင်းတစ်စင်းနှင့် တူညီနေပြီး မြင့်မားသော ကောင်းကင်ယံမှ ကြယ်ကြွေတစ်စင်းအလား လျှင်မြန်စွာ ပြုတ်ကျလာသည်။ ထိုအရာသည် ဟင်းလင်းပြင်အလွှာပေါင်းများစွာကို ပြင်းထန်စွာ ဝင်တိုက်မိပြီး မီးခိုးများနှင့် ကျောက်စကျောက်နများ မိုးကောင်းကင်ယံသို့ မြင့်တက်သွားကာ ခပ်အုပ်အုပ်အသံတစ်သံကို ထုတ်လွှတ်လိုက်သည်။

ထိုလူမှာ အခြားသူမဟုတ်ဘဲ ရှေးဟောင်းကျန်း မိသားစု၏ လူငယ်ခေါင်းဆောင်ဖြစ်ပြီး နေမင်းနတ်ဘုရား ရုပ်ခန္ဓာကိုယ်ပိုင်ရှင်ဖြစ်သည့် ကျန်းချီလီပင်။

ဤအခိုက်အတန့်တွင် သူ၏အခြေအနေမှာ အလွန် ဆိုးရွားနေသည်။ သူ၏ ရွှေရောင်ရင့်ရင့် တိုက်ပွဲဝင် ဝတ်ရုံသည် စုတ်ပြဲနေပြီဖြစ်ပြီး မီးလောင်ကျွမ်းထားသော အမာရွတ်များနှင့် ကြောက်မက်ဖွယ်ကောင်းသော အက်ကွဲကြောင်းများ ဖုံးလွှမ်းနေသည့် သူ၏ကြံ့ခိုင်သော ခန္ဓာကိုယ်ကို ဖော်ပြနေခဲ့သည်။

ဖျော့တော့သော ရွှေရောင်သွေးများက သူ၏ဒဏ်ရာများမှ အဆက်မပြတ် ယိုစိမ့်ထွက်နေပြီး သူ၏ ခန္ဓာကိုယ်ပေါ်ရှိ ကျန်ရှိနေသော လောင်ကျွမ်းနေသည့် မီးတောက်များနှင့် ထိတွေ့ချိန်၌ တရှဲရှဲမြည်ကာ သွေး မြူခိုးများအဖြစ် အငွေ့ပျံသွားသည်။

သူ၏ဆံပင်များက ရှုပ်ပွနေပြီး နှုတ်ခမ်းထောင့်တွင် သွေးများ စွန်းထင်းနေသော်လည်း သူ၏ မျက်လုံးများက လောင်ကျွမ်းနေသော သေးငယ်သည့် နေနှစ်စင်းအလား ဖြစ်နေဆဲပင်။ သူသည် မိုးကောင်းကင်ယံကို စူးစိုက်ကြည့်နေစဉ် သူ၏မျက်လုံးများမှ အာခံမှုနှင့် ဒေါသမီးတောက်များ ဖြာထွက်နေပေ၏။

သူ၏အရှိန်အဝါသည် ပုံမှန်မဟုတ်ဘဲ လှုပ်ခတ်နေပြီး ပြင်းထန်သော အတွင်းဒဏ်ရာများရထားကြောင်း ရှင်းလင်းစွာ ညွှန်ပြနေသည်။

သို့ရာတွင် သူ၏ တိုက်ခိုက်လိုခြင်း စိတ်ဆန္ဒသည် လျော့နည်းသွားမည့် လက္ခဏာများ မပြသခဲ့ပေ။ ထိုအစား ကျဥ်းထဲကျပ်ထဲရောက်နေသော ရက်စက်ကြမ်းကြုတ်သားရဲ တစ်ကောင်အလား ထိုအရာက ပို၍ပင် ပြင်းထန်လာသည်။

"ဟွမ်ကျင်း..."

ကျန်းချီလီက မိုးကောင်းကင်သို့ ဦးတည်ပြီး ဟိန်းဟောက်လိုက်ရာ သူ၏အသံမှာ မိုးကြိုးပစ်ခတ်သံအလား ဖြစ်နေပြီး ပတ်ဝန်းကျင်ရှိ မြေပြင်ကို အနည်းငယ် တုန်ခါသွားစေပေ၏။

"မီးတောက် နတ်ဘုရား မျိုးနွယ်စုရဲ့ တိရစ္ဆာန်... မင်းမှာ ဒါပဲ ရှိတာလား...နောက်တစ်ခေါက် ထပ်လာခဲ့စမ်း"

ကောင်းကင်ယံအမြင့်တွင် မူလဘူတမြူခိုးများသည် ပြင်းထန်သော မီးတောက်စွမ်းအားများကြောင့် ဖယ်ရှားခြင်းခံလိုက်ရသည်။

အနီရောင် နတ်ဘုရားသံချပ်ကာကို ဝတ်ဆင်ထားပြီး မီးအလား ဆံပင်များနှင့် မျက်ခုံးများကြားတွင် မှိတ်တုတ်မှိတ်တုတ် ဖြစ်နေသော မီးတောက် နတ်ဘုရား မှော်စာလုံး ပါရှိသည့် ပုံရိပ်တစ်ခုက လေထဲတွင် မတ်တတ်ရပ်နေသည်။ ထိုသူမှာ ဟွမ်ကျင်းပင်။

ကျန်းချီလီ၏ ဖရိုဖရဲ ဖြစ်နေသော အခြေအနေနှင့် နှိုင်းယှဉ်လျှင် ဟွမ်ကျင်း၏အခြေအနေမှာ များစွာပို၍ ကောင်းမွန်သည်။

သန့်စင်ပြီး အစွန်းရောက်သော ရွှေရောင်ရင့်ရင့် နတ်ဘုရား မီးတောက်များ၊ အရာအားလုံးကို ပြာကျစေနိုင်သော မီးတောက်များက သူ့ကို ဝန်းရံပြီး လောင်ကျွမ်းနေသည်။ သူ၏အရှိန်အဝါသည် မီးတောင်တစ်လုံးအလား ကြီးမားကျယ်ပြန့်နေပြီး အထက်စီးမှနေ၍ ကျန်းချီလီကို ငုံ့ကြည့်နေကာ သူ၏ ချောမောပြီး ရိုင်းစိုင်းသော မျက်နှာပေါ်တွင် ကြောင်က ကြွက်ကို ကစားနေသည့်အလား လှောင်ပြောင်သော ပျော်ရွှင်မှု နှင့် ဖုံးကွယ်ထား၍မရသော တည်ကြည်လေးနက်မှု အရိပ်အယောင်တစ်ခု ရှိနေလေ၏။

"နေမင်း နတ်ဘုရား ရုပ်ခန္ဓာကိုယ်...တကယ့်ကို နာမည်နဲ့ လိုက်ဖက်ပါတယ်..."

ဟွမ်ကျင်း၏အသံက တလိမ့်လိမ့်ဆင်းသက်လာသော ချော်ရည်များကဲ့သို့ဖြစ်နေပြီး လောင်ကျွမ်းကာ ဖိနှိပ်ချုပ်ကိုင်နိုင်သည်။

"ဒီအရှင်က မင်းကို အသိအမှတ်ပြုတယ်"

"ဒီမူလဘူတ စကြဝဠာထဲမှာ မင်း ကျန်းချီလီက ဒီအရှင်နဲ့ ယှဉ်တွဲပြီး ပြောဆိုခံရဖို့ အရည်အချင်း ပြည့်မီတယ်...နေမင်းဆိုတဲ့ ဘွဲ့နာမည်ကို ခံယူဖို့ အရည်အချင်း ပြည့်မီတယ်"

ရုတ်တရက် သူ၏လေသံက ရုတ်တရက်ပြောင်းလဲသွားပြီး သူ၏မျက်လုံးများ အေးစက်တင်းမာသွားသည်။

"ဒါပေမဲ့ ကစားပွဲက ဒီနေရာမှာပဲ အဆုံးသတ်ပြီ...မင်းက ဒီအရှင်ရဲ့ နောက်ကို လိုက်ဖို့ ငြင်းဆန်ခဲ့မှတော့ မင်းရဲ့ နေမင်း မူလအစကလည်း ငါ့ရဲ့အပိုင် ဖြစ်ရမယ်"

ထိုစကားများ မဆုံးမီမှာပင် ဟွမ်ကျင်းက သူ၏ ရင်ဘတ်ရှေ့တွင် လက်များကို ရုတ်တရက် ပူးလိုက်ရာ သူ၏မျက်ခုံးများကြားရှိ မီးတောက်နတ်ဘုရား မှော်စာလုံးမှ တောက်ပသော အလင်းတန်းများ ပေါက်ကွဲထွက်လာပေ၏။

"မီးတောက် နတ်ဘုရား ဥပဒေသ ... မီးတောက်အသင်္ချေ မူလအစသို့ ပြန်လည်ရောက်ရှိခြင်း"

" ဝုန်း ဝုန်း ဝုန်း..."

ဟွမ်ကျင်းကို ဗဟိုပြု၍ ပတ်ဝန်းကျင် ကျန်းတစ်ထောင် အတွင်းရှိ မီးဒြပ်စင် စိတ်ဝိညာဉ်ချီများ ချက်ချင်းဆိုသလိုပင် ပြင်းထန်စွာ လှိုင်းထလာသည်။

အမျိုးမျိုးသော အရောင်များနှင့်ဂုဏ်သတ္တိများရှိသည့် ကြက်သွေးရောင် သေမျိုး မီးတောက်များ၊ စိမ်းပြာရောင် စိတ်ဝိညာဉ် မီးတောက်များ၊ ထူးဆန်းသော အစိမ်းရောင် တစ္ဆေ မီးတောက်များ၊ ရွှေရောင် အစစ်အမှန် နေမင်း မီးတောက် ပုံရိပ်ယောင်များနှင့် ဟင်းလင်းပြင်တွင် အလိုအလျောက် လောင်ကျွမ်းနေသော အလင်းပေါက် နှလုံးသား မီးတောက်များ....

မရေမတွက်နိုင်သည့် မီးတောက်များအားလုံးသည် ဘုရင်တစ်ပါး၏ ဆင့်ခေါ်ခြင်းကို ခံရသည့်အလား သူ့ဆီသို့ စုစည်းလာကြ၏။

ဤမီးတောက်များက ယှက်နွယ်ကာ ဖိနှိပ်ခံရပြီး သူ၏ ရှေ့တွင် ပေါင်းစပ်မှုကို ဖြတ်သန်းကာ နောက်ဆုံးတွင် လက်သီးဆုပ်တစ်ခုထက် မကြီးသော အနီရောင်ရင့်ရင့် မူလအစ မီးတောက်အမြုတေတစ်ခုအဖြစ် ဖွဲ့စည်းသွားသည်။ ထိုအရာမှ ဟင်းလင်းပြင်ကို ပုံပျက်သွားစေပြီး အရည်ပျော်စေသော ကြောက်မက်ဖွယ်ကောင်းသည့် လှိုင်းဂယက်များ ဖြာထွက်နေသည်။

ဤမူလအစ မီးတောက်အမြုတေသည် မီးတောက်များအားလုံး၏ အမြင့်ဆုံးအရင်းအမြစ် ဖြစ်ပုံရပြီး ကြယ်များကို ပြာကျစေကာ မြေ၊ လေ၊ ရေ နှင့် မီးတို့ကို ပြန်လည်ပုံဖော်နိုင်စွမ်းရှိသော အမြင့်မြတ်ဆုံး မီးတောက်စွမ်းအား ပါဝင်နေသည်။

ထိုအရာ ထွက်ပေါ်လာသည့် အချိန်အခိုက်အတန့်တွင် ကောင်းကင်တက်လှမ်းခြင်းလှေကားရှိနေသော နေရာတဝိုက်လုံး၏ အပူချိန်က ကြောက်မက်ဖွယ်ကောင်းသော အတိုင်းအတာအထိ ရုတ်တရက် မြင့်တက်သွားသည်။ မဖျက်ဆီးနိုင်သော ရှေးဟောင်း ကျောက်တုံး လှေကားထစ်များ၏ မျက်နှာပြင်များပင်လျှင် အနီရောင်ဖျော့ဖျော့ လင်းလက်လာပေ၏။

အောက်ဘက်တွင်ရှိနေသော ကျန်းချီလီ၏ မျက်လုံးသူငယ်အိမ်များ ပြင်းထန်စွာ ကျုံ့ဝင်သွားပြီး သေစေနိုင်သော ခြိမ်းခြောက်မှုတစ်ခုကို သူ အာရုံခံမိသည်။

သူက ဟိန်းဟောက်လိုက်ပြီး သူ၏ဒဏ်ရာများကို ဂရုမစိုက်တော့ဘဲ သူ၏ နေမင်း နတ်ဘုရား ရုပ်ခန္ဓာကိုယ် ၏ မူလအစကို ကန့်သတ်ချက်အထိ တွန်းအားပေးလိုက်သည်။

ဧကရာဇ် ကျမ်းစာ...ကောင်းကင်လောင်ကျွမ်း မဟာနေမင်း

သူ၏ခန္ဓာကိုယ် နံဘေးပတ်လည်ရှိ မဟာနေမင်းကိုးစင်း၏ ပုံရိပ်ယောင်များက ယခင်က မရှိခဲ့ဖူးသော အရှိန်အဟုန်ဖြင့် လည်ပတ်ပြီး ပြန့်ကားလာကာ ပေါင်းစပ်သွားပေ၏။

နောက်ဆုံးတွင် အချင်းဆယ်ကျန်းကျော်ရှိပြီး မျက်စိကျိန်းလောက်အောင် တောက်ပသော ရွှေရောင် အလင်းတန်းများ ဖြာထွက်လာသည်။ ထို့နောက် အရာအားလုံးကို သန့်စင်ပေးပြီး ကောင်းကင်အားလုံးကို လင်းထိန်စေသော ကျယ်ပြန့်ပြီး ခမ်းနားသည့် စွမ်းအားများ ဖြာထွက်နေသည့် ခမ်းနားသော မဟာ နေမင်းတစ်စင်းက သူ၏နောက်တွင် ကြီးကျယ်ခမ်းနားစွာ ထွက်ပေါ်လာသည်။

ထိုမဟာနေမင်းအတွင်းတွင် ဧကရာဇ်ဝတ်ရုံကို ဝတ်ဆင်ထားပြီး သရဖူဆောင်းထားသော ရှေးဟောင်းပုံရိပ်ယောင်တစ်ခုက ဝေဝါးစွာ ထွက်ပေါ်လာသည်။ ထိုအရာမှာ ကျန်းမိသားစုမှ ရှေးဟောင်းဘိုးဘေး၏ အကြွင်းအကျန်စိတ်ဝိညာဥ် တစွန်းတစပင်။

ဧကရာဇ်အရှိန်အဝါက ပျံ့နှံ့သွားပြီး အစစ်အမှန် နေမင်းစွမ်းအားနှင့် ပေါင်းစပ်ကာ ထိုအရာ၏အရှိန်အဝါက ကောင်းကင်ယံကို တုန်ခါစေခဲ့သည်။

"သွားစမ်း..."

ကျန်းချီလီက သူ၏ လက်များကို မြှောက်ကာ သူ၏ စွမ်းအားနှင့် သွေးမျိုးဆက်စွမ်းအားများအားလုံးကို စုစည်းထားသော မဟာနေမင်းကို ကောင်းကင်ယံရှိ အနီရောင်ရင့်ရင့် မူလအစ မီးတောက်အမြုတေဆီသို့ ပြင်းထန်စွာ တွန်းပို့လိုက်၏။

တစ်ဖက်တွင် နေမင်းနတ်ဘုရား ရုပ်ခန္ဓာကိုယ်မှ အသက်သွင်းထားသော ရှေးဟောင်းဧကရာဇ် ကျမ်းစာသည် အလွန်အမင်း ယန်ဆန်ပြီး အလျော့မပေးသော ခမ်းနားသည့် မဟာနေမင်းကို သရုပ်သကန်ထင်ဟပ်လာစေသည်။

တခြားတစ်ဖက်တွင် မီးတောက်နတ်ဘုရားသားတော် မှ ကိုင်တွယ်ထားသော မီးတောက်တစ်သောင်း ဥပဒေသသည် အရာအားလုံးကို ပြာကျစေသော မူလအစ မီးတောက်အမြုတေကို စုစည်းထားသည်။

မီးဒြပ်စင်တာအို၏ မတူညီသော အထွတ်အထိပ်များကို ကိုယ်စားပြုသည့် ကြောက်မက်ဖွယ်ကောင်းသော စွမ်းအားနှစ်ခုက ကောင်းကင်တက်လှမ်းခြင်း လှေကား၏ အထက်တွင် ပြင်းထန်စွာ တိုက်မိသွားကြသည်။

"ဘုန်း..."

ကောင်းကင်နှင့်မြေကြီး ဖန်တီးစဉ်က ပထမဆုံး မိုးကြိုးသံအလား ဖော်ပြ၍မရနိုင်လောက်အောင် ကျယ်လောင်သော နားကွဲလုမတတ် အသံတစ်သံ ထွက်ပေါ်လာသည်။

ပြင်းထန်စွာ လောင်ကျွမ်းနေသော အလင်းရောင်က အရာအားလုံးကို ချက်ချင်းဝါးမျိုချသွားတော့သည်။

အစစ်အမှန် နေမင်းမီးတောက်များနှင့် ရွှေရောင်ရင့်ရင့် မူလအစ မီးတောက်စွမ်းအားများက ပြင်းထန်စွာ ယှက်နွယ်ပြီး ပေါက်ကွဲထွက်သွားလေ၏။

ကြောက်မက်ဖွယ်ကောင်းသော အပူချိန်မြင့်မားမှုနှင့် လှိုင်းဂယက်များက အရပ်မျက်နှာအဘက်ဘက်သို့ အလင်းကွင်းများပုံစံဖြင့် တိုက်ခတ်သွားသည်။ ထိုအရာများ ဖြတ်သန်းသွားသော နေရာတိုင်းတွင် ဟင်းလင်းပြင်သည် တစ်လက်မချင်းစီ ကွဲအက်သွားပြီး ချော်ရည်များ စီးဆင်းနေသော လေဟာနယ်အဖြစ်သို့ ပြောင်းလဲသွားတော့သည်။

အောက်ဘက်ရှိ လှေကားထစ်များပေါ်တွင် တက်လှမ်းနေသော ကျင့်ကြံသူတချို့သည် အချိန်မီ မတုံ့ပြန်နိုင်ဘဲ တိုက်ပွဲမှ လွတ်မြောက်လာသော နောက်ဆက်တွဲလှိုင်းဂယက်များ၏ သက်ရောက်ခြင်းကို ခံလိုက်ရသည်။ ဖရိုဖရဲချီများ ရုတ်တရက် ထွက်ပေါ်မလာပါက သူတို့မှာ ချက်ချင်းဆိုသလိုပင် ပြာများအဖြစ်သို့ ပြောင်းလဲသွားပေလိမ့်မည်။

အခန်း ၂၃၁: အရင်လို ခေါင်းမာတုန်းပဲ

ဤတိုက်ခိုက်မှု အပြီးတွင်...

ဘုန်း...

ကျန်းချီလီ နောက်တစ်ကြိမ် ပြုတ်ကျသွားသည်။

ဖုန်မှုန့်များနှင့်မီးခိုးများက လေဆင်နှာမောင်းတစ်ခုအလား ကောင်းကင်ယံသို့ ဝေ့ဝိုက်၍ မြင့်တက်သွားပေ၏။

ထိုက်ကူနတ်ဘုရားကျောက်တုံးဖြင့် သွန်းလုပ်ထားပြီး ထာဝရခေတ်ကာလများကို ဖြတ်သန်းကာ ခံနိုင်ရည်ရှိခဲ့သော ကောင်းကင်တက်လှမ်းခြင်းလှေကား၏ မျက်နှာပြင်ပင်လျှင် ဟင်းလင်းပြင် လှိုင်းဂယက်တစ်ခုထွက်ပေါ်လာသည်အထိ ပြင်းထန်စွာ ရိုက်ခတ်ခံလိုက်ရလေသည်။

ကျန်းချီလီသည် တွင်းနက်ကြီးတစ်ခု၏ အလယ်ဗဟိုတွင် ဒူးတစ်ဖက်ထောက်ထားပြီး သူ၏ရွှေရောင်ရင့်ရင့် တိုက်ပွဲဝင်ဝတ်ရုံသည် သူ၏ပိန်ပါးပြီး နဂါးတစ်ကောင်အလား အစွမ်းထက်သော ခန္ဓာကိုယ်ပေါ်၌ တွဲလောင်းကျနေသည့် စုတ်ပြဲနေသော အစအနများ အဖြစ်သို့ ရောက်ရှိနေလေပြီ။ သူ၏ကြေးနီရောင် အသားအရေသည် သူ၏အရိုးများကို လှစ်ဟပြနေသော ကြောက်မက်ဖွယ်ကောင်းသည့် အက်ကွဲကြောင်းများ မီးလောင်ကျွမ်းထားသော အမာရွတ်များဖြင့် ထူထပ်သိပ်သည်းစွာ ဖုံးလွှမ်းနေပေ၏။

ဖုန်မှုန့်များ အနည်းငယ် ပြယ်လွင့်သွားချိန်၌ သူ၏ သွေးများ စွန်းထင်းနေသောမျက်နှာ ပေါ်လွင်လာသည်။

သူ၏မျက်နှာအမူအရာသည် နာကျင်မှုမရှိ စိတ်ဓာတ်ကျမှုမရှိဘဲ လောင်ကျွမ်းနေပြီး ဆူပွက်နေလုနီးပါး ဖြစ်သည့် မောက်မာထောင်လွှားမှုသာ ရှိနေသည်။

သူက ခေါင်းမော့လိုက်ရာ သူ၏မျက်လုံးများက ကောင်းကင်ကိုးထပ်မှ နေမင်းကြီးထက် ပို၍တောက်ပပြီး လောင်ကျွမ်းနေပေ၏။ သူ၏မျက်လုံးသူငယ်အိမ်များမှ နက်ရှိုင်းသောနေရာတွင် အသေးစား နေမင်း နှစ်စင်း ရူးသွပ်စွာ လည်ပတ်နေပြီး ကောင်းကင်ယံရှိ ထိုအနီရောင်ပုံရိပ်ကို ချိတ်ပိတ်ထားသည့်အလားပင်။

"ဟွမ်ကျွင်း..."

ကျန်းချီလီက ပြုံးလိုက်ရာ သွေးများဖြင့် အနီရောင် ဆိုးထားသောသွားများ ပေါ်လွင်နေပြီး သူ၏အသံမှာ အက်ရှရှဖြစ်နေသော်လည်း မိုးကြိုးသံအလား ပေါက်ကွဲထွက်လာသည်။

"မင်းမှာ ဒါပဲ ရှိတာလား မင်းက ငါ့အတွက် အယားဖြေပေးနေတာလား"

သူ၏အသံ မပျောက်ကွယ်မီမှာပင် သူက မြေကြီးပေါ်သို့ သူ၏ခြေထောက်ကို နောက်တစ်ကြိမ် ပြင်းထန်စွာ ဆောင့်နင်းလိုက်သည်။

ဤသည်မှာ ခန္ဓာကိုယ်တစ်ခုလုံးမှ သံကြိုးများကို ချိုးဖျက်ပြီး ရေဆန်ကို ဆန့်ကျင်ကာ အထက်သို့ ပြေးတက်သွားသော ရှေးဟောင်းရက်စက်ကြမ်းကြုတ်သားရဲ တစ်ကောင်အလားပင်။

သူ၏စုတ်ပြဲနေသော ဝတ်ရုံများက လေထဲတွင် လူးလွန့်နေပြီး သူ၏ခန္ဓာကိုယ် နံဘေးပတ်လည်ရှိ ကျန်ရှိနေသော အစစ်အမှန် နေမင်းမီးတောက်များက ပေါက်ကွဲထွက်လာကာ သူ့ကိုရစ်ပတ်ထားသည့် ဟိန်းဟောက်နေသော ရွှေရောင်မီးနဂါးများအဖြစ် ပြောင်းလဲသွားသည်။ ဤသည်က သူ့ကို နေမင်း၏အမြုတေမှ ထွက်ပေါ်လာသော မီးတောက်များဖြင့် သွန်းလောင်းထားသည့် စစ်နတ်ဘုရားတစ်ပါးအလား ဖြစ်စေသည်။

ဟင်းလင်းပြင်တွင် သူ လျှောက်လှမ်းလိုက်သော ခြေလှမ်းတိုင်းက တောက်ပသော ရွှေရောင်လှိုင်းဂယက် စက်ဝန်းတစ်ခုကို ဖြစ်ပေါ်စေပြီး အပူချိန်က ဟင်းလင်းပြင်ကို ပုံပျက်သွားစေပေ၏။

"အဲ့ဒါက နေမင်းနတ်ဘုရား ရုပ်ခန္ဓာကိုယ်ပဲ.... ရှေးဟောင်း ကျန်းမိသားစုရဲ့ လူငယ်မျိုးနွယ်စု ခေါင်းဆောင် ကျန်းချီလီပဲ"

အောက်ဘက်ရှိ လှေကားထစ်များပေါ်တွင်ရှိနေသောအလယ်ပိုင်းဒေသမှ ရှေးဟောင်းဂိုဏ်းတစ်ခု၏ သူတော်စင်တစ်ဦးက ထိတ်လန့်စွာ အော်ဟစ်လိုက်ကာ သူ၏အသံသည် မယုံကြည်နိုင်လောက်အောင် အံ့အားသင့်မှုကြောင့် တုန်ယင်နေပေ၏။

"တကယ့်ကို သူပဲ...ငါက ကျန်းမိသားစုရဲ့ ဘိုးဘေး ယဇ်ပူဇော်ပွဲ အခမ်းအနားမှာ သူ့ကို အဝေးကနေ မြင်တွေ့နိုင်တဲ့ အခွင့်အရေး ရခဲ့ဖူးတယ်....သူ့ကို အဖော်ပြုနေတဲ့ နေမင်းကိုးစင်းရဲ့ သဘာဝလွန်ဖြစ်စဉ်က ကမ္ဘာအသင်္ချေနဲ့ ကောင်းကင်အသင်္ချေမှာ ပြိုင်ဘက်ကင်းပဲ"

"သူနဲ့ တိုက်ခိုက်နေတဲ့သူက နတ်ဘုရား မျိုးနွယ်စုဝင် တစ်ယောက်ပဲ.... အဲ့ဒီ ရွှေရောင်ရင့်ရင့် နတ်ဘုရား မီးတောက်နဲ့ အရာအားလုံးကို ပြာကျစေမယ့် အရှိန်အဝါ... အဲ့ဒါက မီးတောက် နတ်ဘုရား တော်ဝင် မိသားစုပဲ...သူက မီးတောက်နတ်ဘုရားသားတော် ဟွမ်ကျင်းပဲ..."

"အိုး ဘုရားရေ...နေမင်း နတ်ဘုရား ရုပ်ခန္ဓာကိုယ်နဲ့ မီးတောက် နတ်ဘုရား သွေးမျိုးဆက် မီးတာအိုရဲ့ အထွတ်အထိပ် ထိပ်တိုက်တွေ့ဆုံမှုပဲ"

"လူငယ်မျိုးနွယ်စုခေါင်းဆောင်ကျန်းက ဒဏ်ရာအပြင်းအထန်ရထားပြီးတော့ သူ့ရဲ့ အရှိန်အဝါက မတည်ငြိမ်ဘူးဆိုတာ အသိသာကြီးလေ... ဒါတောင် သူက တိုက်ခိုက်ဖို့ အစပြုနေတုန်းပဲလား"

"ရူးနေတာပဲ... ဒါက လုံးဝကို ရူးသွပ်နေတာပဲ...အဲ့ဒါက နတ်ဘုရား မျိုးနွယ်စုရဲ့ တော်ဝင်မျိုးဆက်တစ်ယောက်လေ"

မရေမတွက်နိုင်သော အကြည့်များက ယခုအချိန်တွင် ဟင်းလင်းပြင် တိုက်ပွဲမြေပြင်ပေါ်၌ တင်းကြပ်စွာ အာရုံစိုက်နေကြကာ ထိတ်လန့်ပြီးအံ့အားသင့်စွာ အော်ဟစ်သံများနှင့် ဆွေးနွေးသံများက ကောင်းကင်တက်လှမ်းခြင်းလှေကား၏ လှေကားထစ်များတလျှောက် ဒီရေအလား တိုက်ခတ်သွားသည်။

စူးချန်ကဲသည် အဝေးတွင် မတ်တတ်ရပ်နေပြီး သူ၏ ခြေလှမ်းများသည် အလွန်တည်ငြိမ်အေးဆေးနေပေ၏။

သာမန် အစစ်အမှန်သူတော်စင်တစ်ပါး၏ အရိုးများကို အက်ကွဲသွားစေပြီး သူတို့၏ နတ်ဘုရားစိတ်ဝိညာဉ်ကို တုန်ယင်သွားစေရန် လုံလောက်သော တက်လှမ်းခြင်းဖိအားသည် သူထံတွင် လေပြေလေး တစ်ခုအလား ခံစားရပြီး သူ၏အဝတ်အစား ထောင့်စွန်းများကိုပင် မလှုပ်ခတ်စေနိုင်ခဲ့ပေ။

သူသည် ခုခံရန် သူ၏ကျင့်ကြံဆင့်စွမ်းအားကိုပင် အသုံးမပြုခဲ့ပေ။ သူ၏ အိပ်မောကျနေသော မွေးရာပါ ဖရိုဖရဲ ရုပ်ခန္ဓာကိုယ်က သဘာဝကျကျ လည်ပတ်နေပြီး ကမ္ဘာကြီး၏ မူလအစမှ ထွက်ပေါ်လာသော ဖိနှိပ်သည့်စွမ်းအားကို တိတ်တဆိတ် ပျက်ပြယ်သွားစေခဲ့သည်။

သူက ခေါင်းအနည်းငယ် မော့ကြည့်လိုက်ပြီး ကောင်းကင်ယံအမြင့်တွင် ပို၍ကြေကွဲဖွယ်ကောင်းပြီး ပူလောင်ပြင်းရှလာသော တိုက်ပွဲဆီသို့ ကြည့်လိုက်၏။

ကျန်းချီလီ၏ခန္ဓာကိုယ်ပေါ်တွင် သွေးများနှင့် အမာရွတ်များဖြင့် ဖုံးလွှမ်းနေသော်လည်း တိုးပွားလာသော ရူးသွပ်မှုများနှင့် တိုက်ခိုက်နေပြီး သူ၏မျက်လုံးများက ကြောက်မက်ဖွယ်ကောင်းလောက်အောင် တောက်ပနေသည်ကို မြင်တွေ့ချိန်၌ ပုံမှန်အားဖြင့် တည်ငြိမ်နေသော စူးချန်ကဲ၏မျက်နှာပေါ်တွင် မသိသာသော အပြုံးတစ်ခု ထွက်ပေါ်လာသည်။

သူ၏လူငယ်ဘဝမှ အချိန်ကြာမြင့်စွာ မြုပ်နှံထားသော မှတ်ဉာဏ်အပိုင်းအစတချို့က သူ၏ စိတ်ထဲတွင် တိတ်ဆိတ်စွာ ထွက်ပေါ်လာသည်။

ကျန်းချီလီ အသက် ရှစ်နှစ် ကိုးနှစ်အရွယ်သာ ရှိသေးချိန်တွင် စူးချန်ကဲက သူ့ကို ကျန်းမိသားစု တားမြစ်နယ်မြေ၏ ဆေးပင်ဥယျာဉ်တွင် စားလိုက်လျှင် နေမင်းအဖြစ် ပြောင်းလဲသွားစေနိုင်သော ထူးဆန်းသည့် အင်မော်တယ်ဆေးပင်တစ်ပင် ရှိသည်ဟု လှည့်စားခဲ့ဖူးလေ၏။ ကျန်းချီလီသည် အစောင့် အကြီးအကဲ အိပ်ပျော်နေစဉ် ထိုနေရာသို့ အမှန်တကယ် ခိုးဝင်သွားခဲ့သည်။

ရလဒ်အနေဖြင့် သူသည် အင်မော်တယ်ဆေးပင်ကို မတွေ့ခဲ့ရသော်လည်း ကျန်းမိသားစုခေါင်းဆောင်ဖြစ်သူ သူ၏ဖခင်က နေမင်းအနှစ်သာရဖြင့် ကျင့်ကြံရန် နှစ်သုံးရာ ကြိုးစားအားထုတ်ခဲ့ရသော ယန်ကိုးပါး စိတ်ဝိညာဉ်ပြန်လည်ခေါ်ဆောင်ခြင်းမြက် ဧကဝက်ခန့်ကို သာမန်ပေါင်းပင်များအလား ဆွဲနုတ်ပစ်ခဲ့သည်။

ဒေါသထွက်နေသော သူ၏ဖခင်က သူ့ကို လက်ပူးလက်ကြပ် မိသွားချိန်၌ ထိုကောင်လေးက ညှိုးနွမ်းနေသော စိတ်ဝိညာဉ်မြက်ပင်တစ်ဆုပ်ကို ကိုင်ထားဆဲဖြစ်ပြီး အပြစ်ကင်းသောမျက်နှာဖြင့် ငြင်းခုံခဲ့လေ၏။

"ဒီပေါင်းပင်တွေက ပုံပျက်ပြီး ကြည့်ရဆိုးအောင် ပေါက်နေတာ...ဒါက ရှုခင်းကို ဖျက်ဆီးနေတယ်... ကျွန်တော်က ဥယျာဉ်ကို ရှင်းလင်းဖို့ ကူညီပေးနေတာလေ... အဖေက ကျွန်တော့်ကို ကျေးဇူးတင်သင့်တာ မဟုတ်လား"

နောက်ဆက်တွဲအနေဖြင့် သူသည် ဒေါသထွက်နေသော သူ့ဖခင်၏ဂုတ်မှဆွဲမခြင်းကို ခံလိုက်ရပြီး ခြံဝင်း တစ်ခုလုံးအနှံ့ ပြေးလွှားရသည်အထိ အရိုက်ခံခဲ့ရသည်။ သူ၏ငိုကြွေးသံများသည် ဘိုးဘေးနယ်မြေ ထက်ဝက်ခန့်ရှိ စိတ်ဝိညာဉ်ငှက်များနှင့် အင်မော်တယ် သားရဲများကို လန့်ဖျပ်သွားစေပေ၏။

နောက်ဆုံးတွင် စူးချန်ကဲက ရှေ့ထွက်၍ ဖျောင်းဖျသည့် စကားတချို့ ပြောဆိုခဲ့သဖြင့် ထိုကောင်လေးအတွက် ရိုက်ချက်အနည်းငယ် သက်သာသွားခဲ့သည်။

သေချာသည်မှာ စူးချန်ကဲသည်လည်း အိမ်ပြန်ရောက်ချိန်၌ ဒူးထောက်ခဲ့ရသည်။

သူတို့ နှစ်ယောက် အနည်းငယ် ကြီးပြင်းလာပြီး အသက် ဆယ့်နှစ်နှစ် ဆယ့်သုံးနှစ်ခန့်တွင် နောက်တစ်ကြိမ် ကိစ္စတစ်ခု ဖြစ်ပွားခဲ့သည်။

ကျန်းချီလီသည် ရှေးဟောင်းစာအုပ်တစ်အုပ်၏ အပိုင်းအစတစ်ခုတွင် စာကြောင်းတစ်ကြောင်းကို တွေ့ခဲ့သည်။

"နေမင်း နတ်ဘုရား ရုပ်ခန္ဓာကိုယ်အတွက် စစ်မှန်သော မီးတောက်၏သန့်စင်မှုကို ရရှိရန် အလွန်အမင်း အေးစက်သော သန့်စင်မှုကို ခံယူရမည်"

သူသည် ထိုအရာကို ရတနာတစ်ပါးအလား သဘောထားခဲ့ပြီး မြောက်ပိုင်းအမှောင်ထု နက်နဲသိမ်မွေ့ချီ အမြင့်ဆုံးသို့ ရောက်ရှိနေသည့် ဆောင်းရာသီ ညတစ်ညတွင် စူးချန်ကဲကို အတင်းဆွဲခေါ်ကာ မိသားစု၏ တားမြစ်နယ်မြေများထဲမှ တစ်ခုဖြစ်သော မြေအောက်ကမ္ဘာကိုးထပ် အေးစက်ရေကန် ထဲသို့ ခုန်ချခဲ့သည်။

ထိုအေးစက်ရေကန်အတွင်းရှိ ရေများသည် အရိုးထိအောင် အေးစက်ပြီး စိတ်ဝိညာဉ်ကိုပင် အေးခဲသွားစေနိုင်သည်။

သူတို့ ခုန်ချပြီးနောက် အသက်သုံးရှိုက်စာအချိန်အတွင်းတွင် သူတို့၏သွေးများ အေးခဲသွားပြီး သူတို့၏မရီဒါန်းများ လုံးဝတောင့်တင်းသွားကြောင်း သူတို့ ခံစားလိုက်ရသည်။

ကျန်းချီလီသည် အလွန်အေးလွန်းသဖြင့် နှုတ်ခမ်းများ ပြာနှမ်းနေပြီး သွားများ ခိုက်ခိုက်တုန်နေသော်လည်း သူသည် ရေကန်အစွန်းရှိ ရေခဲကျောက်တုံးများကို ဆုပ်ကိုင်ထားဆဲဖြစ်ပြီး ထွက်လာရန် ငြင်းဆန်ကာ တီးတိုးပြောဆိုခဲ့လေ၏။

"ခဏ... ခဏလောက်... နေမင်း မူလအစက... ဆူပွက်နေတယ်လို့ ငါ... ခံစားရတယ်..."

နောက်ဆုံးတွင် သူ၏ခိုင်မာသော အရင်းအမြစ်များကို အားကိုးကာ အအေးဒဏ်ကို ခုခံရန် သူတော်စင်လက်နက်တစ်ခုကို အသုံးပြုခဲ့သော စူးချန်ကဲက သတိတစ်ဝက်သာ ရှိတော့ပြီး ခေါင်းမာသော ဤကောင်စုတ်ကို ကမ်းစပ်သို့ ပြန်ဆွဲတင်ခဲ့ရသည်။

ထို့နောက် သူတို့ နှစ်ယောက်လုံး ပြင်းထန်စွာ ဖျားနာခဲ့ကြပြီး သူတို့၏ သက်ဆိုင်ရာ အကြီးအကဲများက နှစ်ဝက်ခန့် အပြင်မထွက်ရဟု အပြစ်ပေးခဲ့သည်။

"အရင်လို ခေါင်းမာတုန်းပဲ"

စူးချန်ကဲက ရယ်မောလိုက်ကာ ရှားပါးသော နွေးထွေးမှု တစ်ခုက သူ၏မျက်လုံးများတွင် ဖျတ်ခနဲ လင်းလက်သွားပေ၏။

"သူက မနိုင်ရင်တောင် တိုက်ခိုက်လိမ့်မယ်...သူ့ရဲ့ဒဏ်ရာတွေ ပိုပြင်းထန်လေလေ သူရဲ့ အရိုးတွေက ပိုမာကျောလာလေလေပဲ....ပြီးတော့ သူ့ရဲ့ တိုက်ခိုက်လိုခြင်းစိတ်ဆန္ဒက ပိုရူးသွပ်လာလိမ့်မယ်"

သူသည် ဤတိုက်ပွဲကို ချက်ချင်းဝင်ရောက် မစွက်ဖက်ခဲ့ပေ။

ပထမအချက်အနေဖြင့် ကလေးဘဝကတည်းက သူနှင့်အတူ ပြဿနာများ ဖန်တီးခဲ့ပြီး လောကကြီးကို တုန်လှုပ်စေသော ပါရမီကို ပိုင်ဆိုင်ထားသည့် ကျန်း မိသားစု၏ ဤလူငယ်မျိုးနွယ်စုခေါင်းဆောင်က ကောင်းကင်ဘုံအားလုံး၏စစ်မြေပြင်သို့ ဝင်ရောက်ပြီးနောက် နေမင်းနတ်ဘုရား ရုပ်ခန္ဓာကိုယ်အား မည်သည့် အတိုင်းအတာအထိ သန့်စင်ခဲ့သည်ကို သူ ကိုယ်တိုင် မြင်တွေ့လိုသည်။

နေမင်း နတ်ဘုရား ရုပ်ခန္ဓာကိုယ်ကို လူသား မျိုးနွယ်စု ၏ အစွမ်းထက်ဆုံး ရုပ်ခန္ဓာကိုယ်ဖွဲ့စည်းတည်ဆောက်ပုံများအနက်မှ တစ်ခုအဖြစ် လူသိများပြီး တိုက်ခိုက်ရာတွင် ပြိုင်ဘက်ကင်းကာ အလွန်အမင်း ယန်ဆန်သည်။ ကျန်းချီလီသည် နတ်ဘုရား မျိုးနွယ်စု၏ စစ်မှန်သော တော်ဝင်မျိုးဆက်တစ်ဦးနှင့် ရင်ဆိုင်ရချိန်၌ မည်ကဲ့သို့ တောက်ပသည့် အလင်းရောင် မျိုး ပေါက်ကွဲထွက်လာမည်ကို သူ မြင်တွေ့လိုပေ၏။

ဒုတိယအချက်အနေဖြင့် မူလအစကို မြင်တွေ့နိုင်စွမ်းရှိသော သူ၏မျက်လုံးများက ကျန်းချီလီ၏ခန္ဓာကိုယ်အတွင်းရှိ ကျယ်ပြန့်သော နေမင်းမူလအစသည် လက်ရှိတွင် နှစ်သန်းရာပေါင်းများစွာကြာအောင် ပေထောင်ပေါင်းများစွာ ထူထပ်သော ကျောက်တုံးများဖြင့် ဖိနှိပ်ထားသော မြေအောက်ချော်ရည်များအလား ဖြစ်နေသည်ကို ရှင်းလင်းစွာ မြင်တွေ့နေရသည်။ ပြင်းထန်သော ဒဏ်ရာများနှင့် အစွမ်းထက်သော ရန်သူ၏ အစွန်းရောက်ဖိအားအောက်တွင် ထိုအရာက ကျရှုံးနေခြင်း မဟုတ်ဘဲ အံ့အားသင့်စရာကောင်းသော နီဗားနားအလား အသွင်ပြောင်းမှုတစ်ခုကိုဖြတ်သန်းကာ တလိမ့်လိမ့်ထနေသည်။

ဤသည်မှာ သေခြင်းတရားအတွင်းမှ အသက်ကို ရှာဖွေသော အစွန်းရောက် ကျင့်ကြံနည်းစနစ်တစ်ခုပင်။ ထိုအရာမှာ မယုံနိုင်လောက်အောင် အန္တရာယ်များပြီး လူတစ်ယောက်သည် လွယ်လင့်တကူ သေဆုံးသွားနိုင်သော်လည်း သူ ခံနိုင်ရည်ရှိပါက အကျိုးကျေးဇူးများမှာ ကြီးမားပေမည်။

သေချာသည်မှာ ဤအရာအားလုံးက ကျန်းချီလီ သည် ဟွမ်ကျင်းကြောင့် ခြေမွှခံရပြီး သူ၏မူလအစကို ထုတ်ယူမခံရဘဲ အသွင်ပြောင်းမှု ပြီးဆုံးသည်အထိ တောင့်ခံနိုင်ခြင်းရှိမရှိအပေါ် မူတည်နေခြင်းပင်။

စူးချန်ကဲသည် တိတ်ဆိတ်ငြိမ်သက်စွာ မတ်တတ်ရပ်နေပြီး သူ၏အရှိန်အဝါက တိုက်ပွဲမြေပြင်ကို တိတ်တဆိတ် လွှမ်းခြုံထားပြီးဖြစ်သည်။

အကယ်၍ ကျန်းချီလီထံတွင် အသက်အန္တရာယ် အမှန်တကယ် ရှိလာပါက သူ လှုပ်ရှားရပေမည်။

အရာအားလုံးသည် သူ၏အကြွင်းမဲ့ ထိန်းချုပ်မှု အောက်တွင် ရှိနေလေ၏။

ကောင်းကင်သို့ မြင့်တက်နေသော နတ်ဘုရား မီးတောက်များ ဝန်းရံထားကာ လေထဲတွင် မတ်တတ်ရပ်နေသော ထိုမီးတောက် နတ်ဘုရားသားတော် ဟွမ်ကျင်းအတွက်ကမူ....

စူးချန်ကဲ၏အကြည့်က အနည်းငယ် ရွှေ့ပြောင်းသွားပြီး သူ၏ နတ်ဘုရား စိတ်အာရုံက လေပြေလေးတစ်ခုအလား တိုက်ခတ်သွားကာ ဟွမ်ကျင်း၏ခွန်အားနှင့် အခြေခံအုတ်မြစ်များကို ထိုးထွင်းသိမြင်သွားသည်။

"သူက ရှင်းချန်ယောင်ထက် အဆင့်တစ်ဆင့်မက ပိုပြီး အစွမ်းထက်တယ်"

သူက သူ၏စိတ်နှလုံးသားထဲတွင် တည်ငြိမ်စွာ အကဲဖြတ်လိုက်၏။

"သူ့ရဲ့ မီးတောက်နတ်ဘုရား သွေးမျိုးဆက်က ခုနစ်ဆယ်ရာခိုင်နှုန်းကျော် နိုးထလာပြီ... မီးမူလအစ အပေါ် သူ့ရဲ့ ထိန်းချုပ်မှုက ဥပဒေသအဆင့်ကို ထိတွေ့နေပြီ...ပြီးတော့ သူ ထိန်းချုပ်ထားတဲ့ နတ်ဘုရား မီးတောက်တွေရဲ့ သန့်စင်မှုက အရမ်းမြင့်မားတယ်..သူ့ရဲ့ တိုက်ပွဲ အသိအမြင်နဲ့ အတွေ့အကြုံတွေကလည်း ထိပ်တန်းအဆင့်ပဲ... သူက ကျန်းချီလီကို ဒီလိုအခြေအနေမျိုးရောက်အောင် တွန်းပို့နိုင်တာ အံ့အားသင့်စရာ မရှိတော့ဘူး"

"သခင်လေး... အဲ့ဒါ... အဲ့ဒါက ကျန်းမိသားစုရဲ့ နေမင်း နတ်ဘုရား ရုပ်ခန္ဓာကိုယ်ပဲ"

သူ၏နံဘေးတွင်ရှိနေသော ယွဲ့ယီက သူမ၏ခေါင်းကို တိမ်းစောင်းလိုက်ရာ သူမ၏ လှပသော မျက်လုံးများက အထက်ရှိ လောကကြီးကို တုန်လှုပ်စေသော တိုက်ပွဲပေါ်တွင် တင်းကြပ်စွာ အာရုံစိုက်နေပြီး အသက်ပြင်းပြင်းမရှူဘဲ မနေနိုင်ခဲ့ပေ။

သူမ၏အသံတွင် ဖိနှိပ်၍မရသော တုန်လှုပ်မှုနှင့် စိတ်လှုပ်ရှားမှုတို့ ပါဝင်နေသည်။

ကျန်းချီလီ....

သူသည် ကမ္ဘာအသင်္ချေနှင့် ကောင်းကင်ဘုံများအားလုံးတွင် နာမည်ကျော်ကြားသော ပြိုင်ဘက်ကင်း ပါရမီရှင်ဖြစ်ပြီး ဤမျိုးဆက်မှ ရှေးဟောင်းကျန်း မိသားစု၏ လူငယ်မျိုးနွယ်စုခေါင်းဆောင်ပင်။