အခန်း (၁၉၂၃-၁၉၂၄)

အခန်း (၁၉၂၃) - စစ်ပွဲလား... ငါက သဘောတူလို့လား

ဖန့်ချန်သည် ရင်ထဲမှ တိုးတိုးလေး သက်ပြင်းချလိုက်မိသည်။ သူ ထင်ထားသည့်အတိုင်းပင် ဖြစ်နေသည်။ ထိုစဉ်က နတ်ဆိုးမျိုးနွယ်၏ ကောင်းကင်ဘုံလမ်းစဉ်က မိစ္ဆာမျိုးနွယ်ကို လူသားမျိုးနွယ်ထံ လာရောက်တိုက်ခိုက်ရန် လမ်းပြခဲ့ခြင်းမှာ အဘိုးကြီးနှင့် ဆရာယွမ်ဟယ် တို့က တမင်တကာ ထောင်ချောက်ဆင်ခဲ့ခြင်း ဖြစ်နိုင်ခြေ အလွန်များနေသည်။

မင်ရွှီခေတ်ကာလကတည်းက ဤသူတော်စင် များသည် သူတို့မျိုးနွယ်စု၏ နောက်မျိုးဆက်များအတွက် နောက်ဆုတ်လမ်းကြောင်းကို အဆက်မပြတ် ကြံစည်နေခဲ့ကြခြင်း ဖြစ်သည်။ ဤနောက်ဆုတ်လမ်းကြောင်းမှာ နှစ်ပေါင်း သောင်းချီ၊ သို့မဟုတ် နှစ်ပေါင်း သိန်းချီ ကြာမြင့်မှသာ အသုံးချခွင့် ရနိုင်မည် ဖြစ်သော်လည်း ထိုသို့ ကြိုတင်ပြင်ဆင်ခဲ့ခြင်းမှာ အမှန်တကယ်ပင် ထိရောက်မှု ရှိခဲ့သည်။

မဟုတ်လျှင် လူသားမျိုးနွယ်သည် နယ်မြေကိုးခုသို့ ရောက်ရှိလာစရာ အကြောင်းမရှိချေ။ မင်ရွှီခေတ်ကာလတွင် ဤသူတော်စင်များသည် နတ်ဆိုးမျိုးနွယ်၏ ပါးစပ်မှတစ်ဆင့် နယ်မြေကိုးခု၏ တည်နေရာကို လဲလှယ် ရယူနိုင်ခဲ့ခြင်းကြောင့်သာ ဖြစ်ပေလိမ့်မည်။ မိစ္ဆာမျိုးနွယ်ကို ကြံစည်ခဲ့ခြင်းမှာလည်း လူသားမျိုးနွယ်၏ နောက်ဆုတ်လမ်းကြောင်းအတွက် ဖြစ်နိုင်ပေသည်။

"ဒါဆိုရင်လည်း..."

ဖန့်ချန်၏ မျက်လုံးများ လှုပ်ရှားသွားသည်။

နတ်ဆိုးမျိုးနွယ်၏ ကောင်းကင်ဘုံလမ်းစဉ်သည်လည်း ဤအစီအစဉ်ကြောင့်ပင် သေဆုံးသွားခဲ့ရခြင်းလား ကောင်းကင်ဘုံလမ်းစဉ် မရှိတော့ခြင်းကြောင့်သာ နယ်မြေကိုးခု၏ မသေမျိုးစွမ်းအင်များမှာ ထိုမျှအထိ အရှိန်အဟုန်ဖြင့် ကုန်ဆုံးမသွားဘဲ ယခု ဒီနေရာရှိ လူတိုင်းသည်လည်း ယနေ့တိုင် အဆင့် ၉ ထိပ်သီးပညာရှင်များအဖြစ် ရပ်တည်နိုင်ခွင့် ရနေကြခြင်းလား။

"နည်းလမ်းတစ်ခုက ရလဒ်ပေါင်းများစွာ ထွက်ပေါ်စေတယ်။ ဒါပေမဲ့ ဒီရလဒ်တွေထဲမှာ အဘိုးကြီးတို့ မျှော်လင့်မထားတာတွေလည်း ရှိနိုင်သလို၊ သူတို့ ကြိုတင်သိနေပေမဲ့လည်း မဖြစ်မနေ လောင်းကစားခဲ့ရတာတွေလည်း ရှိမှာပဲ"

"တစ်ခုတော့ သေချာတယ်။ မင်ရွှီခေတ်ကို ဖြတ်သန်းခဲ့တဲ့ လူသားမျိုးနွယ်ဟာ နယ်မြေကိုးခုမှာပဲ ငြိမ်ငြိမ်လေး နေနေကြမှာ မဟုတ်ဘူး။ သူတို့တွေဟာ သူတော်စင်ကျမ်းစာလမ်းစဉ် ကို ပြန်လည်လျှောက်လှမ်းပြီး လူသားမျိုးနွယ်ရဲ့ သာမန်လူသားတွေမှာ အထွတ်အထိပ်အရိုး တွေ ပြန်လည် ပေါက်ဖွားလာအောင် နည်းလမ်းမျိုးစုံနဲ့ ကြံစည်နေကြမှာပဲ"

"ဖန့်ငရဲမင်း... တကယ်တော့ ဒီနေ့ အခြေအနေကို မင်းမှာ ပြောင်းလဲနိုင်တဲ့ စွမ်းအား မရှိပါဘူး။ မင်းက နယ်မြေကိုးခုရဲ့ ထိပ်သီးခေါင်းဆောင်တွေနဲ့ ဒီမှာ ရင်ပေါင်တန်း စကားပြောနိုင်နေတာက မင်းရဲ့ နောက်ကွယ်က ယန်နတ်ဘုရားက မင်းကို ငရဲမင်းတံဆိပ် အပ်နှင်းထားခဲ့လို့ပဲ"

ရှီးရှင်းဟိုင်က တည်ငြိမ်စွာ ဆိုသည်

"အကယ်၍ မင်းသာ ဟေးရီဧကရာဇ်လိုမျိုး ဖြစ်ခဲ့ရင် ငါတို့ဘက်မှာ ရပ်တည်တာကသာ နယ်မြေကိုးခုအတွက်ရော၊ မင်းအတွက်ပါ အကောင်းဆုံး ရွေးချယ်မှုဆိုတာ သိလာလိမ့်မယ်။ ကူးချင်ယွဲ့ကို ငါ့ဆီ အပ်လိုက်စမ်းပါ၊ မင်းအတွက် ငါ့ကိုယ်ပိုင် အခွင့်အရေးဖြစ်တဲ့ လူပေါင်း တစ်သိန်းစာနေရာ ကို ထပ်ပေးမယ်"

လုဖုန်းရှန်က မျက်မှောင်အနည်းငယ် ကြုတ်ကာ ရှီးရှင်းဟိုင်ကို တစ်ချက် ကြည့်လိုက်သော်လည်း ဘာမှတော့ ဝင်မပြောချေ။ သို့သော် သူမ၏ အမူအရာကို ကြည့်ခြင်းအားဖြင့် ဖန့်ချန်သည် နောက်ထပ် လူတစ်သိန်းစာ နေရာကို ရယူရန် မထိုက်တန်ဟု ယူဆနေကြောင်း သိသာလှသည်။

"ကူးချင်ယွဲ့က မင်းတို့ ပြင်ပအင်အားစုတွေနဲ့ ဆက်သွယ်ဖို့အတွက် အဓိကသော့ချက်ပဲ။ ဒါကြောင့် ကူးချင်ယွဲ့ မရှိရင် ပြင်ပအင်အားစုတွေ ရောက်လာမယ့် အချိန်ဟာ အများကြီး ကြန့်ကြာသွားလိမ့်မယ်။ အဲဒီအချိန်အတောအတွင်းမှာ မင်းတို့တွေဟာ နယ်မြေကိုးခုရဲ့ အဖွဲ့အစည်းအသီးသီးက ပေါင်းပြီး နှိမ်နင်းတာကို ခံရနိုင်သလို၊ မျိုးနွယ်စုလိုက် ပျက်စီးသွားတာမျိုးတောင် ဖြစ်နိုင်တယ်"

ဖန့်ချန်က ပြုံးလျက်

"ဒါကြောင့် မင်းတို့မျက်လုံးထဲမှာ ကျုပ်က အရေးမကြီးဘူး၊ အရေးကြီးတာက ကူးချင်ယွဲ့ပဲ"

"ဒါပေါ့..."

လုဖုန်းရှန်၏ မျက်လုံးထဲတွင် စိတ်မရှည်သည့် အရိပ်အယောင်များ ပေါ်လာသည်။

"မင်း ဒီအချက်ကို နားလည်တယ်ဆိုရင်လည်း ရခဲလှတဲ့ ဒီအခွင့်အရေးကို တန်ဖိုးထားသင့်တယ်"

"မိတ်ဆွေလု... သူတို့နဲ့ စကားအများကြီး ပြောမနေပါနဲ့တော့၊ တိုက်ရိုက်ပဲ လက်တုံ့ပြန်ကြစို့။ ဒီနေ့ အခြေအနေမှာ ဟဲ့စစ်မှန်သောမသေမျိုး ရောက်မလာရင်တောင် သူတို့မှာ ဘာအခွင့်အရေးမှ မရှိတော့ဘူး"

ဟေးရီဧကရာဇ်က ထူးဆန်းသော အသံဖြင့် ရယ်မောလိုက်သည်။

"နေဦး... မတိုက်ကြနဲ့ဦး"

ချန်ဖေးဖေးက ရုတ်တရက် လက်ကာပြလိုက်ပြီး ဖန့်ချန်ကို လေးနက်သော အကြည့်ဖြင့် ကြည့်လိုက်သည်။

"ဖန့်ငရဲမင်း... မင်း အခုနက ရှီးရှင်းဟိုင် တွက်ချက်တာ မှားနေတယ်လို့ ပြောခဲ့တယ်။ လူသားမျိုးနွယ် ပြန်လည် နိုးထလာမယ့်လမ်းက အဲဒီလောက် မကြာဘူးလို့ ပြောခဲ့တာ ဘာကြောင့်လဲ"

"ဟုတ်တယ်... အဲဒါ ဘာကြောင့်လဲ"

အဘက်ဘက်မှ အဆင့် ၉ မသေမျိုးများသည် ဖန့်ချန်ကို ဝိုင်းကြည့်လိုက်ကြသည်။

အမှန်စင်စစ် ရှီးရှင်းဟိုင် ပြောခဲ့သော နည်းလမ်းနှစ်ခုလုံးကို သူတို့ ဘာကြောင့် မစဉ်းစားမိဘဲ နေပါ့မည်နည်း။ သို့သော် သူတို့သည် မိမိတို့၏ အသက်နှင့် ဘဝကို နတ်ဆိုးမျိုးနွယ်၏ လက်ထဲတွင် အပ်နှံပြီး သူတစ်ပါး လက်အောက်တွင် အောက်ကျနောက်ကျ မနေလိုကြခြင်း ဖြစ်သည်။ သေရမည်ဆိုလျှင်ပင် ဂုဏ်သိက္ခာရှိရှိ သေလိုကြသည်။ ယခုအခါ ဖန့်ချန်က မည်သည့် အကြောင်းပြချက်ကြောင့် ထိုကဲ့သို့ ရဲရဲဝံ့ဝံ့ ပြောရဲသည်ကို သူတို့ အားလုံး သိချင်နေကြသည်။

'ဒီလူတွေက ၁၈ ထပ် ငရဲမျှော်စင်ထဲမှာ ချုပ်နှောင်ထားတဲ့ ယင်စစ်သည် တွေထဲမှာ ကန့်သတ်ချက်ကျော်လွန်သူ တွေ ပါနေတာကို မသိကြသေးဘူး။ သူတို့ရဲ့ သတင်းအချက်အလက်တွေက အစောပိုင်း အဆင့်မှာပဲ ရှိနေသေးတာပဲ'

'ဒီကန့်သတ်ချက်ကျော်လွန်တဲ့ ပညာရှင်တွေ ရှိနေရင် လူသားမျိုးနွယ်ရဲ့ ခက်ခဲတဲ့ အခြေအနေက အများကြီး သက်သာသွားလိမ့်မယ်။ သူတော်စင် တစ်ပါး ထပ်မံ ပေါ်ထွက်လာဖို့အတွက်တောင် လုံလောက်တဲ့ အချိန်နဲ့ အခွင့်အရေး ရသွားနိုင်တယ်'

ဖန့်ချန်၏ စိတ်ထဲတွင် အတွေးများ လှုပ်ရှားနေသည်။

ယခုအခါ ဤသတင်းအချက်အလက် ကွာဟချက်ကို သူတစ်ဦးတည်းသာ သိထားခြင်း ဖြစ်သည်။ အဘိုးကြီး ကိုယ်တိုင်ပင်လျှင် သူနှင့် ပတ်သက်သည့် ဤကိစ္စများကို မှတ်မိလိမ့်မည် မဟုတ်သလို ၁၈ ထပ် ငရဲမျှော်စင်၏ တကယ့်အခြေအနေကိုလည်း သိလိမ့်မည် မဟုတ်ချေ။ သို့သော် ဤကိစ္စကို အထင်အရှား ပြောပြ၍ မဖြစ်ပါ၊ မဟုတ်လျှင် ၁၈ ထပ် ငရဲမျှော်စင်ကို လုယူလိုသူများ ပိုမို များပြားလာပေလိမ့်မည်။

'လုဖုန်းရှန်တို့ရဲ့ ရည်ရွယ်ချက်က မော်ထျန်းတီကျန့်ကို ဒီမျှော်စင် မရအောင် တားဆီးဖို့ပဲ။ အဲဒါကြောင့် သူတို့က လူသားကျင့်ကြံသူတွေကို သုံးပြီး မော်ထျန်းတီကျန့် ကို သွားတားခိုင်းထားတာ။ အဲဒီကနေမှ သူတို့က အားအင်ချန်ထားပြီး ဒီမျှော်စင်ကို လုဖို့ ကြံနေကြတာပဲ။ ဒါပေမဲ့ တကယ်တမ်းတော့ သူတို့က ဒီမျှော်စင်ကို အဲဒီလောက်ကြီး တန်ဖိုးထားနေတာ မဟုတ်ဘူး'

'သူတို့ လိုချင်တာက နယ်မြေကိုးခုမှာ ကောင်းကင်ဘုံလမ်းစဉ် ထပ်မပေါ်လာဖို့ပဲ။ ဒါဆိုရင် သူတို့ရဲ့ နောက်ဆက်တွဲ စီမံကိန်းတွေကို ဘယ်သူမှ မတားနိုင်တော့ဘူး။ နတ်ဆိုးမျိုးနွယ်ရဲ့ နယ်မြေရှာဖွေရေးဂိုဏ်းက သူတော်စင်တစ်ပိုင်း ၊ ဒါမှမဟုတ် သူတော်စင်တွေ ရောက်လာပြီး အကူအညီ ပေးလာတဲ့အခါ နယ်မြေကိုးခုရဲ့ ကိစ္စဟာ အပြီးသတ်သွားလိမ့်မယ်။ လူသားမျိုးနွယ်ဟာလည်း စဉ်းနှီတုံးပေါ်က ငါးလို ဖြစ်သွားမှာပဲ'

'နှမြောစရာကောင်းတာက...'

ဖန့်ချန်သည် စိတ်ထဲမှ သက်ပြင်းချလိုက်သည်။ သူသည်လည်း ၁၈ ထပ် ငရဲမျှော်စင်ကို အပြည့်အဝ မထိန်းချုပ်နိုင်သေးချေ။ မဟုတ်လျှင် ယခု အခြေအနေကို အလွယ်တကူ ဖြေရှင်းနိုင်မည် ဖြစ်သည်။

"သူ ပြောမထွက်ဘူး"

ရှီးရှင်းဟိုင်က ခေါင်းကို ညင်သာစွာ ခါယမ်းလိုက်သည်။

"သူက ခင်ဗျားတို့ကို စကားလုံးတွေနဲ့ ခြိမ်းခြောက်ပြီး ခင်ဗျားတို့ သူ့ဘက်မှာ ရပ်တည်လာအောင် လုပ်နေတာပါ။ သူ စဉ်းစားတာက အခုလက်ရှိ နယ်မြေကိုးခုရဲ့ အခြေအနေပဲ၊ အနာဂတ်အတွက် လမ်းခင်းဖို့ ဘာမှ မရှိဘူး။ အဆင့် ၇ မသေမျိုးဆိုတာ... တကယ်တော့ ငယ်လွန်းပါသေးတယ်"

အဘက်ဘက်မှ အဆင့် ၉ များသည် တစ်ဦးကိုတစ်ဦး ကြည့်လိုက်ကြပြီး သူတို့၏ မျက်လုံးထဲတွင် တွေးတောသည့် အရိပ်အယောင်များ ပေါ်လာကြသည်။

ရှောက်မုန့်ယွမ်သည် စိတ်ထဲမှ ‘မကောင်းတော့ဘူး’ ဟု ရေရွတ်လိုက်မိသည်။ လူသားမျိုးနွယ်သည် ဤအခြေအနေအတိုင်း ဆိုလျှင် ဟင်းလင်ပြင် အဆင့်မြင့်မဟာမိတ်အဖွဲ့ ထံသို့ ရောက်သွားခဲ့လျှင်တောင် သတိမထားမိဘဲ လျှို့ဝှက်စွာ ဖွံ့ဖြိုးတိုးတက်လာနိုင်သည့် အခွင့်အရေး ရှိနိုင်သည်။ သို့သော် မိစ္ဆာမျိုးနွယ်ကမူ လုံးဝ ခြားနားလှသည်။

အကယ်၍ သူတို့သာ ဟင်းလင်ပြင်အဆင့်မြင့်မဟာမိတ်အဖွဲ့၏ ရှာဖွေတွေ့ရှိမှုကို ခံရလျှင် မျိုးနွယ်စုလိုက် ပျက်သုဉ်းမည့် ဘေးနှင့် ကြုံရပေလိမ့်မည်။ ထို့ကြောင့် လူသားမျိုးနွယ်တွင် နောက်ဆုတ်လမ်း ရှိသော်လည်း သူတို့တွင် မရှိချေ သူတို့၏ တစ်ခုတည်းသော ရှင်သန်နိုင်မည့် အခွင့်အရေးမှာ နယ်မြေကိုးခုတွင် ကောင်းကင်ဘုံလမ်းစဉ် အသစ်တစ်ခု ပေါ်ထွက်လာခြင်း ရှိမရှိ အပေါ်မှာသာ မူတည်နေသည်။

ကောင်းကင်ဘုံလမ်းစဉ် တစ်ပါး ရှိနေလျှင် နယ်မြေကိုးခုသည် အလွန် လုံခြုံသွားပေလိမ့်မည်။ ဟင်းလင်ပြင် အဆင့်မြင့်မဟာမိတ်အဖွဲ့က သတ်မှတ်ထားသော စည်းမျဉ်းများကို မည်သူမှ ချိုးဖောက်ရဲမည် မဟုတ်ချေ။ တစ်ခါမှ လူလုံးမပြဖူးသော ထိပ်တန်း ခေါင်းဆောင်ကြီးများပင်လျှင် ဖြစ်သည်။

"ကျုပ်ကတော့ ဒီဖန့်ငရဲမင်းကို ယုံကြည်တယ်။ ခင်ဗျားတို့ အဆင့် ၉ မသေမျိုးတွေအနေနဲ့ ရှီးရှင်းဟိုင်ရဲ့ စကား နှစ်ခွန်း၊ သုံးခွန်းလောက်နဲ့ စိတ်ဓာတ်မယိုင်လဲကြပါနဲ့"

ရှောက်မုန့်ယွမ်က ပေါ့ပါးဟန်ဆောင်ကာ ရယ်မောလိုက်သည်။

"ခင်ဗျားတို့ ပြင်ပအင်အားစုတွေနဲ့ ပတ်သက်တဲ့ သတင်းအချက်အလက်တွေကို အနည်းငယ်လောက် သိထားမယ်ဆိုရင် နယ်မြေကိုးခုဟာ သူတို့လက်ထဲ ကျရောက်သွားမှာကို လုံးဝ လိုလားမှာ မဟုတ်ဘူး"

"တိုက်ကြစို့"

လုဖုန်းရှန်က ရှီးရှင်းဟိုင်ကို ကြည့်ကာ ခွင့်တောင်းသည့် အကြည့်ဖြင့် ကြည့်လိုက်သည်။

"တိုက်ကြစို့"

ရှီးရှင်းဟိုင်က ခေါင်းကို ညင်သာစွာ ညိတ်လိုက်သည်။

ဟေးရီဧကရာဇ်၏ မျက်လုံးထဲတွင် အငြိုးအတေး အရိပ်အယောင်တစ်ခု ဖြတ်ပြေးသွားသည်။ လုဖုန်းရှန်ရော၊ ရှီးရှင်းဟိုင်ပါ သူ့ကို ထည့်တွက်ပုံ မရချေ။

ပတ်ဝန်းကျင်၏ လေထုမှာ အစောပိုင်းကထက် ပိုမို တင်းမာလာပြီး စစ်ပွဲကြီးမှာ မကြာခင် စတင်တော့မည့်အလား ဖြစ်နေသည်။

"စစ်ပွဲလား... ငါက သဘောတူလို့လား"

ဘယ်အချိန်ကတည်းက ရောက်နေမှန်း မသိသည့် မိန်းကလေးငယ်တစ်ဦးမှာ ဖန့်ချန်၏ ဘေးတွင် ရုတ်တရက် ပေါ်လာသည်။ သူမ၏ ပါးပြင်ပေါ်တွင် သွေးစွန်းရာ အနည်းငယ် ရှိနေပြီး သူမ ဝတ်ဆင်ထားသော အဝတ်အစားများမှာလည်း အနည်းငယ် စုတ်ပြဲနေကာ အတော်လေး သနားစဖွယ် သို့မဟုတ် ပင်ပန်းနွမ်းနယ်နေဟန် ရှိသည်။ သို့သော် ထိုသို့သော အခြေအနေကပင် သူမ၏ အရုပ်လေးကဲ့သို့ လှပသော မျက်နှာလေးကို ဖုံးကွယ်ထားနိုင်ခြင်း မရှိချေ။

လုဖုန်းရှန်နှင့် ဟေးရီဧကရာဇ်တို့သည် ထိုမိန်းကလေးငယ်ကို မြင်လိုက်ရသောအခါ မျက်နှာများ ချက်ချင်း ပျက်သွားကြသည်။

"မင်းက ဘယ်သူလဲ "

ဖန့်ချန်က စူးစမ်းစွာ မေးလိုက်သည်။

"ဖန့်ငရဲမင်း... ငါတို့ နောက်ဆုံးတော့ တွေ့ကြပြီပေါ့။ ငါက မော်ထျန်းတီကျန့် ပါ"

မိန်းကလေးငယ်က ဖန့်ချန်ကို ချိုသာစွာ ပြုံးပြလိုက်သည်။

"ဘယ်သူက မင်းကို သွားတားတာလဲ"

ဖန့်ချန်က သက်ပြင်းချကာ မေးလိုက်သည်။

"လီတောက်ယဲ့ လို့ ခေါ်တဲ့ ကောင်တစ်ယောက်ပဲ"

မော်ထျန်းတီကျန့် က တည်ငြိမ်စွာ ပြုံးလျက် ဆိုသည်။

"သူ ဘယ်မှာလဲ"

ဖန့်ချန်က ထပ်မေးသည်။

"သေသွားပြီပေါ့"

မော်ထျန်းတီကျန့်က ရယ်မောကာ

"အကယ်၍ သူက ဟဲ့စစ်မှန်သောမသေမျိုးကိုဖြစ်ဖြစ်၊ လုဖုန်းရှန်ကိုဖြစ်ဖြစ် သွားတားမယ်ဆိုရင် သေမှာ မဟုတ်ဘူး။ ဒါပေမဲ့ သူက ငါ့လို ပြိုင်ဘက်ကင်းတဲ့ နတ်ဆိုးဘုရင်မကြီး ကို လာတားတာကိုး"

ချင်းဟယ်သီလရှင် က ရှေ့သို့ တိုးလာရန် ကြိုးစားသော်လည်း ဖန့်ချန်က လက်ဖြင့် တားလိုက်သည်။

"မော်ထျန်းတီကျန့်... မင်း ရောက်လာတာ ကောင်းတာပေါ့။ အခုဆိုရင် ငါတို့ နိုင်ခြေက တစ်ရာရာခိုင်နှုန်း ရှိသွားပြီ "

ဟေးရီဧကရာဇ်က အကျယ်ကြီး ရယ်မောလိုက်သည်။

"မဟုတ်ဘူး... မင်းတို့ရဲ့ နိုင်ခြေက သုညပဲ"

မော်ထျန်းတီကျန့် က အေးစက်စွာ ဆိုသည်

"နင်တို့က ငါ့ကို ၁၈ ထပ် ငရဲမျှော်စင် မရအောင် လုပ်ချင်ကြတာဆိုတော့၊ ငါကလည်း နင်တို့ကို ဘာအကျိုးအမြတ်မှ ရခွင့်ပေးမှာ မဟုတ်ဘူး"

"နင်နဲ့ ငါတို့က နတ်ဆိုးမျိုးနွယ်ချင်းပဲလေ။ ဘာပဲဖြစ်ဖြစ် အရင်ဆုံး ပြင်ပရန်သူကို အတူတူ နှိမ်နင်းပြီးမှ ပြည်တွင်းရေးကို ဖြေရှင်းကြတာပေါ့"

လုဖုန်းရှန်က မျက်မှောင်ကြုတ်ကာ ဆိုသည်။

"ငါက သူနဲ့ ပူးပေါင်းပြီး ပြင်ပရန်သူကို နှိမ်နင်းဖို့ စိတ်ကူးထားတာ"

မော်ထျန်းတီကျန့်က ဖန့်ချန်ကို ညွှန်ပြကာ၊ ဖန့်ချန်ကိုယ်တိုင်ပင် ကြက်သီးထသွားစေလောက်သည့် အပြုံးမျိုးဖြင့် ပြုံးလိုက်သည်။

သူမ၏ လက်ထဲတွင် တံဆိပ်ပြား တစ်ခု ပေါ်လာသည်။

"ငရဲမိဖုရားတံဆိပ်..."

ဖန့်ချန်၏ မျက်နှာမှာ တစ်ခါတည်း ပြောင်းလဲသွားတော့သည်။

အခန်း (၁၉၂၄) - ပန်းသစ်တော်တစ်ခက်က ပန်းပုစွန်အလှကို ဖိနှိပ်ခြင်း

"ကောင်လေး... မင်းရဲ့ကံက ကောင်းသလား မကောင်းဘူးလားဆိုတာ ငါလည်း မပြောတတ်တော့ဘူး၊ အနည်းဆုံးတော့ ဒီမော်ထျန်းတီကျန့်က ယောကျ်ားကြီး မဟုတ်တာပဲ ကျေးဇူးတင်ရမှာပဲ"

ဝမ်ချုံစန်းသည် ငရဲမိဖုရားတံဆိပ်ကို မြင်လိုက်ရပြီးနောက် ဖန့်ချန်ထံသို့ စိတ်ချင်းဆက်သွယ်ကာ မနေနိုင်ဘဲ လှမ်းပြောလိုက်သည်။

သူတို့နှစ်ဦးသည် ယခင်ကတည်းက ငရဲမိဖုရားတံဆိပ်နှင့် ပတ်သက်ပြီး ဤပြဿနာကို ဆွေးနွေးခဲ့ဖူးကြသည်။ ယခုအခါ ပြဿနာက ရှေ့မှောက်သို့ ရောက်လာပြီဖြစ်ရာ မည်သို့မျှ ဖြေရှင်း၍ ရနိုင်တော့မည့်ပုံ မပေါ်ချေ။

လုဖုန်းရှန်နှင့် ကျန်ရှိနေသူများသည် မော်ထျန်းတီကျန့်က ငရဲမိဖုရားတံဆိပ်ကို ထုတ်ယူလိုက်သည်ကို မြင်သောအခါ ချက်ချင်းပင် ထိတ်လန့်ဒေါသထွက်သွားကြပြီး

"မော်ထျန်းတီကျန့်... နင် တကယ်ပဲ ငါတို့မျိုးနွယ်စုကို သစ္စာဖောက်တော့မှာလား "

"ငါက နတ်ဆိုးမျိုးနွယ်ကို သစ္စာဖောက်တာမဟုတ်ဘူး၊ နတ်ဆိုးမျိုးနွယ်ကသာ ငါ့ကို သစ္စာဖောက်ခဲ့တာ"

မော်ထျန်းတီကျန့်သည် ငရဲမိဖုရားတံဆိပ်ကို ဆုပ်ကိုင်ထားရင်း၊ သူမ၏ နုနယ်သော မျက်နှာလေးပေါ်တွင် ထိုအရွယ်နှင့် မလိုက်ဖက်သည့် လောကဓံကို နားလည်ပြီးသားဖြစ်သော အမူအရာမျိုးဖြင့်

"နတ်ဆိုးမျိုးနွယ် အင်အားချည့်နဲ့လာပြီး ပြင်ပအင်အားစုတွေရဲ့ နှိပ်စက်တာကို ခံရတဲ့အချိန်ကနေ လူသားမျိုးနွယ်တွေ ပြောင်းရွှေ့လာပြီး ပြင်ပအင်အားစုတွေကို မောင်းထုတ်တဲ့အထိ၊ ဒါပေမဲ့ သူတို့က နယ်မြေကိုးခုကို သိမ်းပိုက်လိုက်ရုံတင်မကဘဲ နတ်ဘုရားလောကနဲ့ ယင်လောကကိုပါ လူသားမျိုးနွယ်ရဲ့ နယ်မြေတွေ ဖြစ်စေခဲ့တယ်"

"ဒီအချိန်အတောအတွင်းမှာ ငါဟာ မော်ထျန်းဌာနက ကျင့်ကြံသူတွေကို ဦးဆောင်ပြီး နင်တို့လို နတ်ဆိုးမျိုးနွယ် အဖိုးကြီးတွေရဲ့ လမ်းညွှန်မှုအောက်မှာ နတ်ဆိုးမျိုးနွယ်အတွက် အကြိမ်ကြိမ် အစွမ်းကုန် အမှုထမ်းခဲ့တယ်"

"ရလဒ်ကတော့ အခု ငါ တရားထူးရပြီး ကောင်းကင်ဘုံလမ်းစဉ်ကို ဆက်ခံရမယ့်အချိန်ကျမှ နတ်ဆိုးမျိုးနွယ်က ငါ့ကို အရင်ဆုံး သစ္စာဖောက်လိုက်တာလား "

မော်ထျန်းတီကျန့်က အေးစက်စွာ ရယ်မောလိုက်ပြီး

"ဒါက ဘာသဘောလဲ"

"မိတ်ဆွေမော်ထျန်း... ဒါက နတ်ဆိုးမျိုးနွယ်က မင်းကို သစ္စာဖောက်တာ မဟုတ်ပါဘူး၊ မဖြစ်မနေမို့လို့ ဒီလို လုပ်ဆောင်ရတာပါ။ နယ်မြေကိုးခုရဲ့ စွမ်းအားတွေ ကုန်ဆုံးပျက်စီးနေတာကိုလည်း မင်း မြင်နေတာပဲ။ အကယ်၍ ကောင်းကင်ဘုံလမ်းစဉ် နောက်တစ်ခုသာ ထပ်ပေါ်လာမယ်ဆိုရင် နယ်မြေကိုးခုဟာ လုံးဝ ပျက်စီးသွားတဲ့ နယ်မြေဖြစ်သွားလိမ့်မယ်"

ရှီးရှင်းဟိုင်က လေးနက်သော အသံဖြင့် ဆိုသည်။

"မျိုးဆက်သစ်လေး... ဒီနေရာမှာ မင်းစကားပြောဖို့ နေရာမရှိဘူး။ မင်းတို့တွေ နယ်မြေကိုးခုကနေ ထွက်သွားချင်ရင် ထွက်သွားလို့ရတယ်၊ နယ်မြေကိုးခုက ပျက်စီးနေပြီဆိုမှတော့ ငါ့လို ကောင်းကင်ဘုံလမ်းစဉ် တစ်ပါး ပေါ်လာတာနဲ့တင် ပိုပြီး ပျက်စီးသွားစရာ အကြောင်းရှိလို့လား "

မော်ထျန်းတီကျန့်က တည်ငြိမ်စွာ ဆက်ပြောသည်

"နင်တို့က အစကတည်းက နယ်မြေကိုးခုကို အသုံးချခံ အဖြစ်နဲ့၊ ဒါမှမဟုတ် မုန့်တစ်ခုလို သဘောထားပြီး ပြင်ပက အာဏာရှိသူတွေကို ဖားဖို့အတွက်ပဲ ကြံစည်နေကြတာ"

"ဒါမှသာ နင်နဲ့ ငါတို့ မျိုးနွယ်စုနှစ်ခုလုံး ပြင်ပနယ်မြေတွေမှာ အခြေချနိုင်ဖို့ အခြေခံအုတ်မြစ် ရမှာဖြစ်တယ်"

ရှီးရှင်းဟိုင်သည် ပါးစပ်ပိတ်မသွားဘဲ အကျိုးအကြောင်းပြကာ ဆက်လက် နားချရန် ကြိုးစားနေသည်။

"ရှီးရှင်းဟိုင်... မော်ထျန်းတီကျန့်ကို နားချမနေပါနဲ့တော့၊ သူမက ခင်ဗျားတို့ရဲ့ တစ်ကိုယ်ကောင်းဆန်မှုကို တစ်ချက်တည်းနဲ့ မြင်နေပြီးသား။ ခင်ဗျားတို့က ဒီနေရာမှာ ကောင်းကင်ဘုံလမ်းစဉ် ပေါ်လာမှာကို မလိုလားတာက နယ်မြေကိုးခုအတွက် စိုးရိမ်လို့မှ မဟုတ်တာ။

ကောင်းကင်ဘုံလမ်းစဉ် ပေါ်လာရင် ခင်ဗျားတို့ နောက်ပိုင်း လုပ်ဆောင်မယ့် စီမံကိန်းတွေကို ထိခိုက်မှာ စိုးရိမ်နေကြတာပဲ။ ကောင်းကင်ဘုံလမ်းစဉ် တစ်ပါးသာ ပေါ်ထွန်းလာရင် အရာရာဟာ ခင်ဗျားတို့ ပြောသမျှ ဖြစ်လာတော့မှာ မဟုတ်ဘူးလေ"

ရှောက်မုန့်ယွမ်က ပြုံးလျက် ဆိုသည်

"ဒီလိုဆိုမှတော့ နယ်မြေကိုးခုမှာ ကောင်းကင်ဘုံလမ်းစဉ် တစ်ပါး ရှိသင့်တယ်လို့ ကျုပ်ကတော့ သဘောတူတယ်၊ ကျန်တဲ့သူတွေကရော ဘယ်လိုသဘောရလဲ "

"ကျုပ်တို့လည်း သဘောတူပါတယ်"

ချန်ဖေးဖေးနှင့် ကျန်သူများက ပြုံးလျက် ဆိုကြသည်။

"ဒီလိုမှသာ မရှုံးနိမ့်မယ့် အခြေအနေကို အရင် တည်ဆောက်ထားနိုင်မှာ ဖြစ်သလို၊ ကျုပ်တို့ရဲ့ နောက်ထပ် လျှောက်လှမ်းရမယ့် လမ်းကြောင်းကို စဉ်းစားဖို့အတွက်လည်း လုံလောက်တဲ့ အချိန် ရမှာဖြစ်တယ်"

"မှန်တာပေါ့"

ယခုအခါ နှစ်ဖက်စလုံး၏ ရပ်တည်ချက်မှာ ရှင်းလင်းသွားပြီ ဖြစ်သည်။

နတ်ဆိုးမျိုးနွယ်၏ နောက်ဆုံးဝှက်ဖဲဟု ထင်ထားသော မော်ထျန်းဌာနသည် ယခုအခါ မိစ္ဆာမျိုးနွယ်နှင့် လူသားမျိုးနွယ်ဘက်တွင် ရပ်တည်နေပြီ ဖြစ်သည်။ အပြန်အလှန်အားဖြင့် လူသားမျိုးနွယ်ဘက်ကဟု ထင်ထားသော မသေမျိုးလောကငယ် မှာမူ နတ်ဆိုးမျိုးနွယ်ဘက်တွင် အခိုင်အမာ ရပ်တည်နေသည်။

"အခုတော့ မင်းတို့ဘက်မှာ ကောင်းကင်ဘုံလမ်းစဉ် တစ်ပိုင်းအဆင့်ရှိသလို၊ ငါတို့ဘက်မှာလည်း ရှိနေပြီ။ ဒီနေ့ ကိစ္စမှာ မင်းတို့ ဘာမှ ပြောင်းလဲနိုင်တော့မှာ မဟုတ်ဘူး။ အချင်းချင်း တိုက်ခိုက်ပြီး အင်အားမဖြုန်းတီးကြဘဲ၊ မကြာခင် ရောက်လာတော့မယ့် ပြင်ပအင်အားစုတွေကို ရင်ဆိုင်ဖို့အတွက်ပဲ အင်အားချန်ထားကြပါ"

နဂါးနတ်ဘုရား က ပြုံးလျက် ဆိုသည်။

လုဖုန်းရှန်၏ မျက်နှာမှာ အလွန်ပင် ညိုမှောင်သွားပြီး၊ သူမက မော်ထျန်းတီကျန့်ကို ဆက်လက် နားချရန် ကြိုးစားပြန်သည်။

"မော်ထျန်း... နင်က အခြေအနေအရပ်ရပ်ကို ငဲ့ညှာသင့်တယ်။ ကောင်းကင်ဘုံလမ်းစဉ် ရာထူးဆိုတာ နင်ထင်သလို မလှပဘူး၊ အဲဒါက တကယ်တော့ ထောင်ချောက်တစ်ခုပဲ၊ နင့်ကို နယ်မြေကိုးခုမှာပဲ အရှင်လတ်လတ် ပိတ်လှောင်ထားလိမ့်မယ် "

"အဲဒီအစား ငါတို့နဲ့အတူ ပိုပြီး ကျယ်ပြန့်တဲ့ ကမ္ဘာသစ်ဆီကို လိုက်ခဲ့ပါလား။ နတ်ဆိုးနယ်မြေရှာဖွေရေးဂိုဏ်းက အဲဒီမှာ အခြေချနေပြီ၊ နင့်ရဲ့ ကျင့်ကြံမှု အဆင့်အတန်းနဲ့ဆိုရင် အဲဒီမှာ ရာထူးကြီးကြီး ရနိုင်မှာ သေချာတယ် "

"ငါက ဒီကောင်းကင်ဘုံလမ်းစဉ် ရာထူးကိုပဲ လိုချင်တာ၊ ဒါကလည်း နတ်ဆိုးမျိုးနွယ်က ငါ့ကို အရင်က ကတိပေးခဲ့တာပဲလေ။ ငါ ဒီရာထူး ရအောင် နင်တို့ ဝန်းရံပေးမယ်လို့ ပြောခဲ့ကြတာ မဟုတ်လား"

မော်ထျန်းတီကျန့်က တည်ငြိမ်စွာ ဆိုသည်

"နင်တို့က ကတိဖျက်ပြီး ငါ့ကို လိမ်ခဲ့ကြတာဆိုတော့၊ နင်တို့ ဘယ်လောက်ပဲ စကားလုံးလှလှတွေနဲ့ ပြောပြော ငါ တစ်လုံးမှ မယုံတော့ဘူး"

"..."

"ကောင်းပြီ... နင် ကောင်းကင်ဘုံလမ်းစဉ် ဖြစ်ချင်တယ်ဆိုရင်လည်း ရပါတယ်၊ ငါတို့ ထောက်ခံပေးမယ်။ ဒါပေမဲ့ နင်က ဘာဖြစ်လို့ လူသားမျိုးနွယ်ဘက်မှာ ရပ်တည်နေရတာလဲ "

"ဒီငရဲမင်းလေးက နင့်မျက်လုံးထဲမှာ ပုရွက်ဆိတ်တစ်ကောင်လို သေးငယ်လွန်းပါတယ်။ ဘာဖြစ်လို့ ငရဲမိဖုရားတံဆိပ်ကို သုံးဖို့ ဆုံးဖြတ်ရတာလဲ ဒီယင်လောကရဲ့ အဖိုးတန်ရတနာက ဘယ်လို အကျိုးသက်ရောက်မှုမျိုး ရှိတယ်ဆိုတာ နင် သိရဲ့လား "

လုဖုန်းရှန်က ရုတ်တရက် စကားလမ်းကြောင်း ပြောင်းလိုက်သည်။

"ဒီလိုလုပ်ရအောင်၊ နင် ကောင်းကင်ဘုံလမ်းစဉ် ဖြစ်လာဖို့ ငါတို့ ထောက်ခံပေးမယ်။ နင် ကောင်းကင်ဘုံလမ်းစဉ် ဖြစ်လာပြီးတဲ့နောက်မှာ ငါတို့နဲ့ ပြင်ပအင်အားစုတွေကြား မိတ်ဆွေဖွဲ့ ဆက်ဆံတာကိုလည်း နင်က ကူညီပေးရမယ်၊ သူတို့ရဲ့ တောင်းဆိုချက်တွေကို တတ်နိုင်သမျှ လိုက်လျောပေးရမယ်"

"ဒါဆိုရင် အပြင်မှာရှိတဲ့ နတ်ဆိုးနယ်မြေရှာဖွေရေးဂိုဏ်းက ပိုပြီး ခိုင်မာတဲ့ အခြေအနေကို ရရှိမှာဖြစ်သလို၊ ငါတို့လည်း အကူအညီတွေ ပိုရလာမှာပေါ့"

"နောက်ကျသွားပြီ"

မော်ထျန်းတီကျန့်က အနည်းငယ် ပြုံးလိုက်ပြီးနောက် လူတိုင်း၏ ရှေ့မှောက်မှာတင် ငရဲမိဖုရားတံဆိပ်ကို မီးဖြင့် တိုက်ရိုက် အရည်ဖျော်လိုက်သည်။

ငရဲမိဖုရားတံဆိပ်သည် မီးခိုးငွေ့တစ်မျှင်အဖြစ် ပြောင်းလဲသွားပြီး သူမ၏ မျက်ခုံးအစပ်ဆီသို့ ခဏချင်းအတွင်း တိုးဝင်သွားလေသည်။

ထိုခဏ၌ ဖန့်ချန်သည် မိမိနှင့် သူမကြားတွင် ထူးခြားသော ဆက်နွှယ်မှုတစ်ခု ဖြစ်ပေါ်လာသည်ဟု ခံစားလိုက်ရသည်။

အခြေအနေများက သူ မျှော်လင့်ထားသည်ထက် ကျော်လွန်နေပြီ ဖြစ်သည်။

တစ်နေ့နေ့တွင် တစ်စုံတစ်ယောက်က ငရဲမိဖုရားတံဆိပ်ဖြင့် သူ့ကို ခြိမ်းခြောက်လာလျှင် မည်သို့ ဖြစ်လာမည်ကို သူ ကြိုတင် တွက်ဆထားခဲ့ဖူးသော်လည်း၊ ကောင်းကင်ဘုံလမ်းစဉ် တစ်ပိုင်းအဆင့်ရှိသော မော်ထျန်းတီကျန့်က ဤမျှ ပြတ်ပြတ်သားသား ငရဲမိဖုရားတံဆိပ်ကို အသုံးပြုလိမ့်မည်ဟု သူ မထင်ထားခဲ့မိချေ။

ဘာကြောင့်လဲ နတ်ဆိုးမျိုးနွယ်အပေါ် ဒေါသထွက်နေ၍ တမင် ကလဲ့စားချေချင်သောကြောင့်လား

"အစ်မကြီး... အဲဒီ ငရဲမိဖုရားတံဆိပ်ဆိုတာ ဘာလဲ ကျွန်မတို့ တစ်ခါမှ မကြားဖူးပါလား"

ချန်အင်းရွှယ် သည် ထူးဆန်းသော အမူအရာဖြင့် ရှဲ့အာမန်ကို ကြည့်ကာ မေးလိုက်သည်။

လုဖုန်းရှန်တို့အဖွဲ့သည် မော်ထျန်းတီကျန့် ငရဲမိဖုရားတံဆိပ် သုံးလိုက်မည်ကို ဤမျှအထိ ကြောက်ရွံ့နေခြင်းက ၎င်းသည် ယနေ့ အခြေအနေအပေါ် အဆုံးအဖြတ်ပေးနိုင်လောက်သည့် အရှိန်အဝါ ရှိကြောင်း သက်သေပြနေသည်။

"ကိုးယောက်မြောက်ကတော့ ပြဿနာတက်ပြီ... ပန်းသစ်တော်တစ်ခက်က ပန်းပုစွန်အလှကို ဖိနှိပ်လိုက်ပြီပဲ (အသက်ကြီးတဲ့နွားက မြက်နုလေးကို စားလိုက်ပြီ)..."

ရှဲ့အာမန်က တိုးတိုးလေး ရေရွတ်လိုက်သည်။

ချန်အင်းရွှယ် : "......."

"မော်ထျန်းတီကျန့်က ငရဲမိဖုရားတံဆိပ်ကို သုံးလိုက်ပြီဆိုတော့၊ အခုကစပြီး သူမက ငရဲမင်းရဲ့ မိဖုရားပဲ၊ ယင်လောကရဲ့ ဒုတိယမြောက် အရှင်သခင်ပေါ့"

ရှဲ့အာမန်က မျက်မှောင်ကြုတ်ကာ ဆိုသည်။

ယခုမှ ချန်အင်းရွှယ် နားလည်သွားပြီး ချက်ချင်းပင် အံ့အားသင့်ကာ အသက်ရှူမှားသွားတော့သည်။ သူမသည် မော်ထျန်းတီကျန့်ကို တစ်ချက် ကြည့်လိုက်၊ ဖန့်ချန်ကို တစ်ချက် ကြည့်လိုက်နှင့် ဘာပြောရမှန်း မသိ ဖြစ်နေသည်။

မော်ထျန်းတီကျန့်သာ မိဖုရား ဖြစ်လာလျှင် ယင်လောက၏ အခြေအနေမှာ တည်ငြိမ်သွားမည် မဟုတ်ပါလား။

ဒါပေမဲ့...

ဒါက ဂုဏ်ပြုရမယ့် ကိစ္စလား

ကိုးယောက်မြောက်က သာမန်မဟုတ်ဘူးလို့ သူတို့ ယူဆထားကြပေမယ့်၊ ကိုးယောက်မြောက်က တကယ်ပဲ မော်ထျန်းတီကျန့်ကို ထိန်းချုပ်နိုင်ပါ့မလား။

"နင် စိတ်ချပါ၊ ဒီငရဲမိဖုရားတံဆိပ်ကို လီတောက်ယဲ့ကိုယ်တိုင်က ပြန်လည် သန့်စင်ထားတာဆိုတော့ အရင်တုန်းကလို အာနိသင်မျိုး ရှိတော့မှာ မဟုတ်ဘူး"

မော်ထျန်းတီကျန့်၏ အသံသည် ဖန့်ချန်၏ ဦးနှောက်ထဲတွင် ရုတ်တရက် ပေါ်ထွက်လာသည်။

ထို့နောက် သူမသည် မျက်လုံးများကို ဖွင့်လိုက်ပြီး အမူအရာ လုံးဝ မပျက်ဘဲ ဖန့်ချန်၏ လက်ကို ဆွဲကိုင်လိုက်ကာ လုဖုန်းရှန်ကို တည်ငြိမ်စွာ ကြည့်လိုက်သည်။

"အခု ငါနဲ့ သူက မိသားစုဝင်တွေ ဖြစ်သွားပြီ၊ နင်တို့ကတော့ ပြင်ပလူတွေပဲ။ အခုထိ မဆုတ်ခွာကြသေးဘူးလား "

"ငါတို့ မဆုတ်ခွာနိုင်ဘူး"

လုဖုန်းရှန်သည် ကိစ္စရပ်များမှာ ပြန်ပြင်၍ မရတော့ကြောင်း မြင်လိုက်ရသောအခါ သူမ၏ အကြည့်များက အလွန်အမင်း အေးစက်သွားသည်။

"ဒီတိုက်ပွဲကို ငါတို့ တိုက်ကို တိုက်ရမယ်။ ၁၈ ထပ် ငရဲမျှော်စင်က နင်တို့လက်ထဲ ရောက်သွားရင်တောင် နင်က အချိန်တိုအတွင်းမှာ ကောင်းကင်ဘုံလမ်းစဉ် ရာထူးကို ရနိုင်မှာ မဟုတ်ဘူး"

"အဲဒီမျှော်စင်က ဒီစစ်ပွဲရဲ့ ရလဒ်ကို မဆုံးဖြတ်နိုင်တော့ဘူး။ ဒီစစ်ပွဲကို ဆုံးဖြတ်နိုင်မှာက ငါတို့ပဲ"

"နင်တို့လား"

ရှောက်မုန့်ယွမ်က မျက်မှောင်ကြုတ်လျက်

"ကျုပ်က ဝါ့ထျန်းဧကရာဇ် ကိုလည်း ဒီမှာ လာကစားဖို့ ချက်ချင်း ခေါ်လိုက်လို့ရတယ်။ သူရယ်၊ မော်ထျန်းတီကျန့်ရယ်၊ နဂါးနတ်ဘုရား စစ်တပ်ရယ်၊ ကျုပ်ရဲ့ ရှန်ပိစစ်တပ် ရယ်၊ ပြီးတော့ အထက်နယ်မြေသုံးခုက ထိပ်တန်း အင်အားစုတွေ အားလုံးရယ်"

"နင်တို့ရဲ့ နတ်လမ်းစဥ်ဂိုဏ်း နဲ့ မသေမျိုးလောကငယ် ၊ ပြီးတော့ လူပြက်တစ်ယောက်လို ဖြစ်နေတဲ့ ဟေးရီဧကရာဇ် တို့နဲ့တင် ငါတို့ကို တကယ်ပဲ တိုက်ရဲလို့လား "

"နင် မြင်နေရတာက ရေခဲတောင်ရဲ့ ထိပ်ဖျားလေးတင် ရှိသေးတာပါ"

နောက်ထပ် လူရိပ်တစ်ခုမှာ ဟင်းလင်ပြင်ကို ဖောက်ထွက်ကာ ရောက်ရှိလာပြန်သည်။

ကျင်းရန်သူတော်စင်

ဖန့်ချန်၏ အမူအရာ လှုပ်ရှားသွားသည်။ လူသားလောက၏ သူတော်စင် ဆယ်ပါးမှာ အမှန်တကယ်ပင် သက်ရှိထင်ရှား ရှိနေကြသေးသည်ပဲ။