အခန်း (၁၉၂၉-၁၉၃၀)
Vol. 193 Ch. 1929-1930
အခန်း (၁၉၂၉) - ကောင်းကင်ဘုံလမ်းစဉ်၏ ရာထူးကို သတ်မှတ်ခြင်း
“ထွက်ခွာမယ် ဟုတ်လား”
လူအုပ်ကြီး၏ မျက်လုံးများ လှုပ်ရှားသွားကြသည်။ ထို့နောက် ဝမ်ချွမ်မြစ် ကို တစ်ချက် လှမ်းကြည့်လိုက်ကြရာ စိတ်ထဲတွင် ချက်ချင်း သဘောပေါက်သွားကြတော့သည်။ ငရဲမင်းသည် ဝမ်ချွမ်မြစ်ကို အသုံးပြု၍ ယင်လောကအတွင်း လျင်မြန်စွာ ရွှေ့လျားနိုင်သည်ဆိုသည်ကို သူတို့ ခပ်ဝါးဝါး သိထားကြသည် မဟုတ်ပါလား။
“ငါတို့တွေ သူတို့ကို မယှဉ်နိုင်ရင်တောင် ထွက်ပြေးလို့တော့ ရတာပဲ။ လွတ်အောင် ပြေးပြီးမှ နောက်မှ အေးအေးဆေးဆေး ပြန်ပြီး ကြံစည်လို့ ရတာပဲ”
တစ်စုံတစ်ယောက်က မျက်လုံးများ တောက်ပလျက် ပြောလိုက်သည်။
“အဘိုး... အဘိုး ဆိုလိုတာက...” ဖန့်ချန်၏ စိတ်ထဲတွင် တစ်ခုခုကို ရိပ်မိသွားသည်။
“အခုထိ နားမလည်သေးဘူးလား ငါတို့မှာ ဒီဓာတ်တော် ရှိနေရင်တောင် သူတို့ကို ခဏတဖြုတ်ပဲ တားထားနိုင်မှာ။ မင်း ၁၈ ထပ် ငရဲမျှော်စင်ကို ရပြီးတာနဲ့ အရင်ဆုံး လွတ်အောင် ပြေးဖို့ပဲ လိုတယ်။”
ဖန့်ကျန့်ထျန်းက သက်ပြင်းချလျက် ပြောသည်
“မင်းက ဘာလို့ နားမလည်နိုင်ရတာလဲ သူတို့နဲ့ အသေအလဲ တိုက်ဖို့များ စိတ်ကူးနေတာလား နိုင်ခြေက တစ်ပုံတောင် မရှိဘူး။”
“ကိုယ့်အိမ်က ကလေးအကြောင်း ကိုယ်မသိဘူးလား ဖန့်ချန်က သူတို့နဲ့ အသေအလဲ တိုက်မယ့်လူမျိုး မဟုတ်ပါဘူး။ အကယ်၍ သူက အဲဒီလို စိတ်ဓာတ်မျိုး ရှိခဲ့ရင် ဒီနေ့အထိ အသက်ရှင်နေမှာ မဟုတ်ဘူး”
ယွမ်ဟယ်က အေးဆေးစွာ ဝင်ပြောလိုက်သည်။
“ဒါကို ခင်ဗျားက ပြောနေရသေးတယ်၊ ငါက သတိပေးတဲ့ အနေနဲ့ ပြောပြတာ”
ဖန့်ကျန့်ထျန်းက ပြန်လည် တုံ့ပြန်လိုက်သည်။
လူအုပ်ကြီးသည်လည်း အခြေအနေကို သဘောပေါက်သွားကြပြီး မိမိတို့ဘက်တွင် ဆုတ်လမ်းရှိသည်ကို သိလိုက်ရသဖြင့် စိတ်ထဲမှ တင်းကြပ်မှုများ လျော့ပါးသွားကာ ကျင်းရန်သူတော်စင်တို့ အဖွဲ့ကို စတင် အကဲခတ်ကြည့်ကြတော့သည်။
ကျင်းရန်သူတော်စင်၏ မျက်နှာမှာ ကြည့်ရဆိုးနေသည်။
“ဝမ်သောက်... ဖန့်လဲ့... မင်းတို့က ဆက်ပြီး ပုန်းနေဦးမလို့လား ငါတို့တွေ တောင်ပေါ်က ဆင်းလာပြီဆိုမှတော့ အိပ်စက်ဖို့ ပြန်သွားစရာ အကြောင်းမရှိဘူးဆိုတာ မင်းတို့ သိသင့်တယ်။ အကယ်၍ မင်းတို့ ပုန်းနေမယ်ဆိုရင် ငါတို့က လူသားလောက နယ်မြေကိုးခုကို အလွယ်တကူပဲ ဖျက်ဆီးပစ်မယ်။ မင်းတို့ ပုန်းစရာ နေရာမရှိအောင် လုပ်ပစ်မယ် ”
လူအုပ်ကြီး စိတ်ပူပန်သွားကြသည်။ ဤလူများက လူသားလောက နယ်မြေကိုးခုကို အသုံးချပြီး ခြိမ်းခြောက်နေကြခြင်းလား။
“အဲဒီအချိန်ကျရင် ဘယ်သူ့နည်းလမ်းက ပိုအစွမ်းထက်မလဲ ဆိုတာ ကြည့်ကြတာပေါ့”
ဖန့်ကျန့်ထျန်းက အေးအေးဆေးဆေး ပြုံးလိုက်သည်။
“ဒီနေ့က မင်းတို့အတွက် ငါတို့ကို အမြစ်ပြတ် သတ်နိုင်မယ့် အကောင်းဆုံး အခွင့်အရေးပဲ။ ဒီနေ့သာ ကုန်ဆုံးသွားရင် မင်းတို့မှာ ဘယ်တော့မှ ဒီလို အခွင့်အရေးမျိုး ထပ်ရမှာ မဟုတ်တော့ဘူး။”
ကျင်းရန်သူတော်စင် ခဏမျှ တိတ်ဆိတ်သွားပြီး
“ပြင်ပလမ်းစဉ် တွေက မကြာခင် ဒီနေရာကို ရောက်လာတော့မယ်။ မင်းတို့က ဘာနဲ့ ခုခံမှာလဲ”
စကားအဆုံးတွင် သူက မော်ထျန်းတီကျန့် ကို တစ်ချက် ကြည့်လိုက်သည်။
“ဒီလို ကိုယ့်ကိုယ်ကိုယ် နိမ့်ကျအောင် လုပ်နေတဲ့ ငရဲကြင်ယာတော် နဲ့လား ဒါမှမဟုတ်...”
သူက ဖန့်ချန်ဘက်သို့ လှည့်ကြည့်ကာ
“အဆင့် ၇ ကျင့်ကြံသူပဲ ရှိသေးတဲ့ ငရဲမင်းနဲ့လား သူတို့ထဲက ဘယ်သူက သူတော်စင်အဖြစ် အောင်မြင်နိုင်မှာလဲ ”
မော်ထျန်းတီကျန့် မျက်နှာပျက်သွားသည်။ သူမ သိထားသည့် ယင်လောက အခြေအနေအရ ဖန့်ချန်၏ အကူအညီဖြင့် ၁၈ ထပ် ငရဲမျှော်စင်ကို ရရှိခဲ့လျှင်ပင် အချိန်တိုအတွင်း ယင်လောကကို တစ်စည်းတစ်လုံးတည်း ဖြစ်အောင် လုပ်ရန်မှာ အလွန်ခက်ခဲပေလိမ့်မည်။ ယင်လောကကို မစည်းလုံးနိုင်လျှင် သူမအတွက် သူတော်စင် ဖြစ်လာရန် အခြေခံအုတ်မြစ် မရှိနိုင်ပေ။
“ကျန်းဝူ နောက်ကွယ်က ဒီအဆင့် ၉ မဟာယင်မိစ္ဆာ ရုပ်သေးစစ်တပ်က ယင်လောကရဲ့ နတ်ဘုရားတွေ သူတော်စင် မဖြစ်လာနိုင်အောင် ငါတို့ တားဆီးထားမယ့် အဓိက သော့ချက်ပဲ”
ကျင်းရန်သူတော်စင်က ခပ်ပြုံးပြုံး ပြောလိုက်သည်
“မင်းတို့က တွက်ချက်ရတာ ဝါသနာပါလှချည်းလား၊ ဒါကိုရော မတွက်မိဘူးလား ”
ဟေးရီဧကရာဇ် ၏ မျက်လုံးထဲတွင်လည်း ကျေနပ်သည့် အရိပ်အယောင်များ ပေါ်လာသည်။ သူနှင့် သူ၏ စစ်တပ်မှာ ဤကစားပွဲ၏ အဆုံးအဖြတ်ပင် ဖြစ်သည်။
“ဘယ်အရာမဆို အကုန်လုံး တွက်ချက်လို့ ရပါ့မလား”
ယွမ်ဟယ်က ခေါင်းကို အသာအယာ ခါယမ်းလိုက်သည်။
“ငါတို့ အများဆုံး တွက်နိုင်တာက ၁၈ ထပ် ငရဲမျှော်စင် ထွက်ပေါ်လာမယ့် အချိန်ပဲ။ ဒီပစ္စည်း ရှိနေသရွေ့တော့ ယင်လောကကို ပြန်လည် စည်းလုံးဖို့ အခွင့်အရေး အမြဲရှိနေမှာပဲ။”
“အကယ်၍ ပြင်ပလမ်းစဉ်တွေ ရောက်လာချိန်အထိ သူမ သူတော်စင် မဖြစ်သေးရင်ကော ”
ကျင်းရန်သူတော်စင်က အေးစက်စွာ မေးလိုက်သည်။
“ဒါဆိုရင်တော့ ငါတို့ ရှုံးတာပေါ့။ အဲဒီအချိန်ကျမှပဲ ကျန်တာ ဆက်ပြောကြတာပေါ့”
ယွမ်ဟယ်က ရယ်မောလျက် ဆိုသည်။
“ဝမ်သောက်... မင်းရဲ့ စရိုက်အရဆိုရင် မင်းမှာ ဆုတ်လမ်းတွေ အများကြီး ရှိနေဦးမှာပဲ။ အစီအစဉ်တွေတောင် အကုန် လုပ်ထားပြီးလောက်ပြီ”
လော့ရွှယ်သူတော်စင်က ရုတ်တရက် ဝင်ပြောသည်
“ဒါပေမဲ့ ဟိုပုဂ္ဂိုလ် သာ သိသွားရင်၊ မင်းတို့လို ရှေးဟောင်းအရှင်သခင် မျိုးနွယ်ရဲ့ သစ္စာခံတွေ လုံးဝ မပျက်သုဉ်းသေးဘူးဆိုတာ သိသွားရင်၊ မင်းရဲ့ ဆုတ်လမ်းတွေ အားလုံး ပိတ်ဆို့ခံရမှာပဲ။”
“မင်းကိုယ်တိုင်လည်း ရှေးဟောင်းအရှင်သခင် မျိုးနွယ်ရဲ့ သစ္စာခံ မဟုတ်သလို ပြောနေလိုက်တာ”
ယွမ်ဟယ်က အေးအေးဆေးဆေး တုံ့ပြန်သည်
“မင်းတို့တွေ သူ့ဆီ ပြန်သွားပြီး ခိုလှုံရင်တောင် သူက မင်းတို့ကို အမျိုးအနွယ်တူတွေလို တကယ် ဆက်ဆံမှာ မဟုတ်ဘူး။ အကယ်၍ ငါတို့ကို ကိုင်တွယ်ဖို့အတွက် သူကိုယ်တိုင် ထွက်လာရမယ်ဆိုရင် သူ့မျက်လုံးထဲမှာ မင်းတို့က အသုံးမကျတဲ့ အမှိုက်တွေပဲ။ မင်းတို့ရဲ့ အဆုံးသတ်က ငါတို့ထက်တောင် ပိုပြီး သနားစရာ ကောင်းလိမ့်မယ်။”
လော့ရွှယ်သူတော်စင်၏ မျက်နှာမှာ တစ်ချက် ပျက်သွားသည်။ ယွမ်ဟယ်၏ စကားက သူမကိုသာမက ကျန်သူတော်စင်များကိုလည်း တိတ်တဆိတ် စဉ်းစားခန်း ဝင်သွားစေသည်။
“ဝမ်သောက် ပြောတာလည်း မမှားဘူး။ ငါတို့ ဒီကိစ္စကို သေချာ မလုပ်နိုင်ရင် ဟိုပုဂ္ဂိုလ်က ငါတို့ကို ဘယ်လိုလုပ် အထင်ကြီးမှာလဲ ”
တစ်ဦးက ကျင်းရန်သူတော်စင်ကို ကြည့်ကာ ပြောလိုက်သည်။
“အားလုံးပဲ... အကယ်၍ ရှင်တို့ ကျွန်မတို့မျိုးနွယ်ရဲ့ ဧကရာဇ် ဓာတ်တော်ကို ပြန်လုပေးနိုင်မယ်ဆိုရင်၊ ကျွန်မတို့ရဲ့ ကျင့်ကြံခြင်းလမ်းစဉ် ရှာဖွေသူတွေ က ရှင်တို့ကို သင့်တော်တဲ့ နေရာတစ်ခု ပေးလိမ့်မယ်လို့ ယုံကြည်လိုက်ပါ”
လုဖုန်းရှန်က ရုတ်တရက် ဝင်ပြောလိုက်သည်။
ကျင်းရန်သူတော်စင်တို့ အဖွဲ့သည် တစ်ဦးကိုတစ်ဦး ကြည့်ကာ ဆုံးဖြတ်ချက် တစ်ခုခု ချလိုက်ပုံရပြီး ကိုယ်ရောင်ဖျောက်ကာ ရွှေရောင်အလင်းတန်း ရှေ့သို့ ချက်ချင်း ရောက်ရှိလာကြသည်။ သူတို့အားလုံးသည် လက်ဖဝါးများကို ညီညာစွာ ဆန့်ထုတ်ပြီး ရွှေရောင်အလင်းဒိုင်းပေါ်သို့ ဖိကပ်လိုက်ကြသည်။
နောက်တစ်ခဏတွင်မူ သူတို့၏ လက်ဖဝါးများမှ မည်းနက်သော အခိုးအငွေ့များ တိုးထွက်လာပြီး ရွှေရောင်အလင်းတန်းကို ဝါးမြိုရန် ကြိုးစားနေသည်ကို လူတိုင်း မြင်တွေ့လိုက်ရသည်။ လုဖုန်းရှန်သည်လည်း သူမ၏ နတ်ဘုရားစာရင်းမှ အစွမ်းထက်သူများကို ခေါ်ဆောင်ကာ အလင်းဒိုင်းကို စတင် တိုက်ခိုက်တော့သည်။
“ရှီးရှင်းဟိုင်... မင်းတို့လည်း အပျင်းမကြီးနဲ့ဦး”
ဟေးရီဧကရာဇ်က ရှီးရှင်းဟိုင်ကို တစ်ချက်ကြည့်ကာ ရယ်မောလိုက်သည်။
ရှီးရှင်းဟိုင်သည် တိတ်ဆိတ်စွာ ခေါင်းညိတ်လိုက်ပြီး သူ၏နောက်ကွယ်မှ မြူခိုးများ လွင့်ပျံလာကာ အဆင့် ၉ ကျင့်ကြံသူ လေးဦးနှင့်အတူ ထောင်ဂဏန်းရှိသော နတ်ဘုရားအဆင့် ကျင့်ကြံသူများ ထွက်ပေါ်လာပြီး အလင်းဒိုင်းကို ဝိုင်းဝန်း တိုက်ခိုက်ကြတော့သည်။
“ဒီလေးယောက်က နတ်ဘုရားလောကရဲ့ အဓိက လမ်းစဉ်လေးခုက အဆင့် ၉ ကျင့်ကြံသူတွေပဲ”
အလင်းဒိုင်းအတွင်းရှိ လူများ၏ အကြည့်များ လေးနက်သွားကြသည်။
နတ်ဘုရားလောကသည် အဓိက လမ်းစဉ် ၅ ခုကို ပိုင်ဆိုင်ထားသည် စစ်မှန်သောမသေမျိုး၊ မြေမသေမျိုး၊ ကောင်းကင်မသေမျိုး ၊ ခန္ဓာစွန့်မသေမျိုး နှင့် လက်နက်စွန့်မသေမျိုး တို့ ဖြစ်ကြသည်။ အချို့မှာ နတ်လမ်းစဥ်ဂိုဏ်း သို့မဟုတ် မိစ္ဆာမျိုးနွယ်များနှင့် ဆက်နွှယ်မှု ရှိနေသော်လည်း ယေဘုယျအားဖြင့် အဆင့် ၉ ကျင့်ကြံသူများသည် အင်အား ၉၀ ရာခိုင်နှုန်းကို ချုပ်ကိုင်ထားကြသူများ ဖြစ်သည်။
ဖန့်ချန်သည် ထိုအထဲတွင် ရင်းနှီးသော ပုံရိပ်အချို့ကို မြင်တွေ့လိုက်ရသည်။ ဥပမာအားဖြင့် သွေးတံခါးနယ်စပ်တွင် စောင့်ကြပ်နေခဲ့သော အစစ်မှန်မေသမျိုး မျိုးနွယ်မှ အဘွားအိုနှင့် ရှဲ့အာမန်က အစ်မရှီး ဟု ခေါ်ခဲ့သော အဆင့် ၈ မသေမျိုး တို့ ဖြစ်သည်။ ထို့ပြင် ကောင်းကင်မသေမျိုး မျိုးနွယ်မှကလေးမျက်နှာရှိသော ဆဋ္ဌမမြောက် ကြယ်တာရာလည်း ပါဝင်နေသည်။ သို့သော် ယခုအခါတွင်မူ သူတို့မှာ တစ်ဖက်စီ ဖြစ်နေကြပြီ ဖြစ်သည်။
ဟေးရီဧကရာဇ်က ပြုံးလျက် သူ၏ အဆင့် ၉ မဟာယင်မိစ္ဆာ ရုပ်သေးစစ်တပ်ကို တိုက်ခိုက်ရန် အမိန့်ပေးလိုက်သည်။ ထိုမျှ ပြင်းထန်သော တိုက်ခိုက်မှုမျိုးကို ကျင့်ကြံသူအားလုံး တစ်ခါမျှ မမြင်ဖူးခဲ့ကြချေ။ သို့သော် ဤအစွမ်းထက်သူများ အားလုံး စုပေါင်း တိုက်ခိုက်နေသည့်တိုင် အလင်းဒိုင်းကို ထိခိုက်စေမှုမှာ ကျင်းရန်သူတော်စင်တို့ အဖွဲ့လောက် မပြင်းထန်ပေ။
သူတို့ လက်ထဲမှ မှောင်မိုက်သော အခိုးအငွေ့များက ရွှေရောင်အလင်းတန်းကို ဖြည်းဖြည်းချင်း ဝါးမြိုနေပြီ ဖြစ်ရာ အချိန်သာ ရမည်ဆိုပါက ဤအလင်းဒိုင်းမှာ အမှန်တကယ် ပျက်စီးသွားပေလိမ့်မည်။
ယွမ်ဟယ်သည် ရွှေရောင်ဓာတ်တော်ကို ကိုင်ဆောင်လျက် ထိုမြင်ကွင်းကို တည်ငြိမ်စွာ ကြည့်နေသည်။ သူ၏ မျက်နှာတွင် စိုးရိမ်မှု အရိပ်အယောင် လုံးဝ မရှိခြင်းကြောင့် ကျင့်ကြံသူများလည်း စိတ်အေးသွားကြပြီး ယနေ့ အခြေအနေမှာ အလှည့်အပြောင်း တစ်ခု ရှိလာတော့မည်ဟု ယုံကြည်လိုက်ကြသည်။
ထိုအချိန်တွင် ရှောက်ကွမ်းယင်း၏ ဘေးတွင် ရပ်နေသော ကျဆုံးနတ်ဘုရား လင်ချောင်က ရုတ်တရက် ရှောက်မုန့်ယွမ်ကို အော်ပြောလိုက်သည်။
“စစ်သူကြီးအကြီးကဲ ဒီအခွင့်အရေးကို သုံးပြီး ငါတို့မျိုးနွယ်ရဲ့ ဝါ့ထျန်းဧကရာဇ် ကို ဒီနေရာကို ဆင်းသက်လာအောင် ကူညီပေးပါ။ သူက စစ်တပ်ကြီးနဲ့အတူ လူသားမျိုးနွယ်၊ မိစ္ဆာမျိုးနွယ်တွေနဲ့ ပူးပေါင်းပြီး ဒီလူတွေကို အပြတ်အသတ် ချေမှုန်းပေးလိမ့်မယ် ”
“ထိပ်တန်းအင်ပါယာရဲ့ ဝါ့ထျန်းဧကရာဇ် ဟုတ်လား”
ဖန့်ကျန့်ထျန်းက ရယ်မောလိုက်သည်
“သူ့ကို ဒီနေရာကို ဆင်းလာခိုင်းပြီး နယ်မြေကိုးခုကမသေမျိုးတွေကို အကုန် ဝါးမြိုခိုင်းရမှာလား ”
“ဒီကျဆုံးမသေမျိုးက တကယ့်ကို ကလေးဆန်တာပဲ။”
“ကလေးဆန်တာ မဟုတ်ဘူး၊ သူတို့က မိစ္ဆာစစ်တပ် စစ်သူကြီးအကြီးကဲ ကို မယုံကြည်လို့ မရလို့ပဲ။”
“ငါတို့မှာ ဆုတ်လမ်းရှိနေတာပဲ၊ ဘာလို့ ကျဆုံးမသေမျိုးတွေရဲ့ အကူအညီကို ယူရမှာလဲ သူတို့က လမ်းခုလတ်မှာ ရန်သူ့ဘက် ပြောင်းသွားနိုင်တာပဲ။”
လူအုပ်ကြီးက တီးတိုး ဝေဖန်နေကြသည်။
ရှောက်မုန့်ယွမ်က သက်ပြင်းချလျက်
“မင်း ကြားလား ငါတို့မှာ ဆုတ်လမ်း ရှိနေတာ မပြောနဲ့၊ ဆုတ်လမ်း မရှိရင်တောင် ကျဆုံးမသေမျိုးတွေကို ငါ ဘယ်လိုလုပ် ခေါ်ချပေးမှာလဲ နတ်လမ်းစဉ်ဂိုဏ်းတောင် ဒီလိုမျိုး မလုပ်ဘူး၊ ငါက လုပ်ပါ့မလား ငါက မင်းတို့ကို သုံးပြီး သူတို့ကို ခြိမ်းခြောက်ရုံ သက်သက်ပဲ။”
လင်ချောင်၏ မျက်နှာမှာ ချက်ချင်းပင် မှောင်မိုက်သွားပြီး သူ၏ ပုံစံမှာ တဖြည်းဖြည်းနှင့် ကြောက်မက်ဖွယ် သဏ္ဌာန် ပြောင်းလဲလာတော့သည်။ သို့သော် ဤကျဆုံးမသေမျိုးမှာ အဆင့် ၈ အစွမ်း ရှိနေသည့်တိုင် မည်သူမျှ သူ့ကို ဂရုမစိုက်ကြချေ။ ဤနေရာရှိ အဆင့် ၉ ကျင့်ကြံသူများနှင့် ယှဉ်လျှင် သူက ဘာမှ မဟုတ်ပါလား။
“ဘက်ပေါင်းစုံက စကားပြောနိုင်သူတွေ ခဏလောက် လာခဲ့ကြပါ၊ ငါတို့ ကိစ္စတစ်ခု ဆွေးနွေးရအောင်။”
ယွမ်ချွဲ က ရုတ်တရက် စကားပြောလိုက်သည်။
“နောက်ပိုင်းမှာ နားလည်မှုလွဲတာတွေ၊ ပဋိပက္ခတွေ မဖြစ်အောင် အရင်ဆုံး ကောင်းကင်ဘုံလမ်းစဉ် ရဲ့ ရာထူးနေရာတွေကို အရင် သတ်မှတ်ထားကြရအောင် ”
အခန်း (၁၉၃၀) - ကောင်းကင်ဘုံလမ်းစဉ်၏ ရာထူး၊ ငါနှင့်သာ ထိုက်တန်သည်
ကောင်းကင်ဘုံလမ်းစဉ်၏ ရာထူးကို သတ်မှတ်မည် ဟုတ်လား။
ဘက်ပေါင်းစုံမှ ကျင့်ကြံသူများသည် တစ်ဦးကိုတစ်ဦး ကြည့်ကာ အံ့အားသင့်နေကြသည်။ ကျန်းရန်သူတော်စင်တို့ အဖွဲ့သည်လည်း ယွမ်ချွဲ၏ စကားကို ကြားသောအခါ အထင်အမြင်သေးသော အပြုံးများဖြင့် လှောင်ပြောင်နေကြတော့သည်။
မကြာမီမှာပင် အင်အားစုအသီးသီးမှ စကားပြောပိုင်ခွင့်ရှိသူများသည် ယွမ်ချွဲ၏ အနီးသို့ စုရုံးရောက်ရှိလာကြသည်။
“ကောင်းကင်ဘုံလမ်းစဉ်ရဲ့ ရာထူးနေရာက ငါနဲ့ပဲ ထိုက်တန်တယ်”
မော်ထျန်းတီကျန့်သည် ဖန့်ချန်ကို ဆွဲခေါ်ကာ လူအုပ်ကြီး၏ ရှေ့သို့ ရောက်လာသည်။ သူမသည် မည်သူ့ကိုမျှ ကြောက်ရွံ့ခြင်းမရှိဘဲ လူအုပ်ကြီးကို ဝေ့ဝဲကြည့်ကာ တည်ငြိမ်အေးဆေးစွာ ပြောလိုက်ခြင်းဖြစ်သည်။
သူမသည် ဖန့်ချန်ကို မော့ကြည့်လိုက်သည်။ စကားတစ်လုံးမျှ မပြောသော်လည်း ဖန့်ချန်ကမူ သူမ၏ ဆိုလိုရင်းကို နားလည်သည်။
ဖန့်ချန်သည် နှုတ်ဆိတ်နေဆဲဖြစ်သော်လည်း လီတောက်ယဲ့ ရှိရာဘက်သို့ လှမ်းကြည့်လိုက်သည်။ သူတို့နှစ်ဦး အကြည့်ချင်း ဆုံလိုက်ကြရာ လီတောက်ယဲ့က ခေါင်းကို အသာအယာ ခါယမ်းပြပြီးနောက် မော်ထျန်းတီကျန့်ကို ပြုံးပြလိုက်သည်။ ထိုအခါမှ ဖန့်ချန်သည် လီတောက်ယဲ့၏ ဆန္ဒကို သဘောပေါက်သွားတော့သည်။
“ငါ့ရဲ့ ပုဂ္ဂိုလ်ရေး အမြင်အရတော့ ကောင်းကင်ဘုံလမ်းစဉ် ရာထူးကို ဒီလောက် လွယ်လွယ်ကူကူနဲ့ လက်လွှဲမပေးသင့်ဘူး။ အထူးသဖြင့် မိစ္ဆာမျိုးနွယ် တစ်ယောက်လက်ထဲကိုပေါ့”
ချင်းခုန်းတောင်မှ အဆင့် ၉ မသေမျိုးက ဖြည်းညှင်းစွာ စကားဆိုလာသည်။
“ဟန်မဆောင်နေစမ်းပါနဲ့၊ မင်းက မိစ္ဆာမျိုးနွယ် ထဲက လာတာပဲ။ အခု လူသားမျိုးနွယ်က ကောင်းကင်ဘုံလမ်းစဉ် ရာထူးသတ်မှတ်တာက မင်းတို့ မိစ္ဆာမျိုးနွယ်နဲ့ ဘာမှမဆိုင်ဘူး”
ချန်ဖေးဖေးက ရယ်မောလျက် လှောင်ပြောင်လိုက်သည်။
ချင်းခုန်းတောင် သခင်သည် ခဏမျှ ကြောင်အသွားပြီးနောက် ရှောက်မုန့်ယွမ်ကို ထူးဆန်းသောအကြည့်ဖြင့် လှမ်းကြည့်လိုက်သည်။
“ငါတို့က လူသားမျိုးနွယ်နဲ့ စာချုပ်ချုပ်ထားပြီးပြီ။ မိစ္ဆာမျိုးနွယ် သူလျှိုတွေအားလုံး ဆုတ်ခွာပေးရမယ်၊ ဆုတ်မခွာရင်လည်း မင်းတို့ရဲ့ အထောက်အထားကို ဖော်ပြရမယ်”
ရှောက်မုန့်ယွမ်က ခေါင်းကို အသာအယာ ညိတ်ပြသည်။
“ဒါကြောင့် ဒီနေရာမှာ ဘယ်သူက မိစ္ဆာမျိုးနွယ် ၊ ဘယ်သူက လူသားမျိုးနွယ်လဲဆိုတာ သူတို့ စိတ်ထဲမှာ သိပြီးသားပဲ။ ငါတို့ မိစ္ဆာမျိုးနွယ်တွေက ကောင်းကင်ဘုံလမ်းစဉ် ရာထူးကို မပြိုင်ဆိုင်ဘူး၊ လူသားမျိုးနွယ်ကိုပဲ ဆုံးဖြတ်ခွင့် ပေးလိုက်မယ်။”
ထိုစကားကို ကြားသောအခါ ရှိနေသည့် မိစ္ဆာမျိုးနွယ်များ အကြည့်ချင်း ဆုံလိုက်ကြသည်။ ရုတ်တရက် တစ်ခုခုကို တွေးမိသွားကြပြီးနောက် ခေါင်းညိတ်လိုက်ကြကာ ဤကောင်းကင်ဘုံလမ်းစဉ် ရာထူးကို မပြိုင်ဆိုင်ရန် ဆုံးဖြတ်လိုက်ကြတော့သည်။
လူသားမျိုးနွယ်ဘက်တွင် အောင်မြင်ရန် အရည်အချင်း ပြည့်မီသူ မရှိသလောက် ဖြစ်နေသည်ကို သူတို့ တွေ့ရှိသွားကြသည်။ အကယ်၍ ကောင်းကင်ဘုံလမ်းစဉ် ရာထူးကို မိစ္ဆာမျိုးနွယ် လက်ထဲ အပ်နှင်းလိုက်ခြင်းကပင် ကောင်းမွန်သော ကိစ္စတစ်ခု ဖြစ်လာနိုင်ပေသည်။
“မော်ထျန်းတီကျန့်... ဒီကောင်းကင်ဘုံလမ်းစဉ် ရာထူးကို မင်းကို ပေးလိုက်လို့ ရပါတယ်၊ ဒါပေမဲ့ မင်း သိထားဖို့က နယ်မြေကိုးခုရဲ့ မသေမျိုးစွမ်းအင် တွေက ကုန်ခမ်းလုနီးပါး ဖြစ်နေပြီ။ မင်း ဒီရာထူးကို ယူလိုက်တာက နယ်မြေကိုးခုနဲ့အတူ အသက်ရှင်၊ အတူ သေရမယ်ဆိုတဲ့ အဓိပ္ပာယ်ပဲ”
ယွမ်ချွဲက တည်ငြိမ်စွာ ဆိုသည်
“နောက်ဆုံးမှာ မင်း ဘယ်လိုပုံစံ ဖြစ်သွားမလဲဆိုတာ ဘယ်သူမှ အာမမခံနိုင်ဘူး။”
စကားပြောနေစဉ် သူက ကျန်းရန်သူတော်စင်တို့ အဖွဲ့ကို လှမ်းကြည့်လိုက်သည်။ သူတို့သည် ဓာတ်တော်၏ ရွှေရောင်အလင်းကို ချိုးဖျက်ရန် အားသွန်ခွန်စိုက် ကြိုးစားနေကြသည်။ သူတို့ ကိုယ်ပေါ်မှ မှောင်မိုက်သော အခိုးအငွေ့များ တလိပ်လိပ် ထွက်ပေါ်နေပြီး ခန္ဓာကိုယ်များမှာလည်း ထူးဆန်းသော အသွင်ပြောင်းလဲမှုများ ဖြစ်ပေါ်နေပုံရသည်။
“အဲဒါတွေကို ငါ ဂရုမစိုက်ဘူး။ ဒီရာထူးက ငါနဲ့ပဲ ဆိုင်တယ်ဆိုတာ ငါ သိတယ်”
မော်ထျန်းတီကျန့်က လီတောက်ယဲ့ကို လက်ညှိုးထိုးပြကာ
“ဒီကို မလာခင်မှာ သူနဲ့ ငါ အသေအချာ ညှိနှိုင်းပြီးသား။ နင်တို့က ကတိဖျက်မလို့လား ”
“ကတိဖျက်ဖို့အထိတော့ မဟုတ်ပါဘူး”
လီတောက်ယဲ့က ပြုံးလျက်
“ယွမ်ချွဲက မင်းကို အကျိုးအပြစ်တွေကို ရှင်းပြရုံတင်ပါ။ နောက်မှ ငါတို့ကို အပြစ်တင်တာမျိုး မဖြစ်အောင်၊ ဒီလို အရှုပ်အထွေးကြီးကို မင်းလက်ထဲ အပ်လိုက်ရတာမျိုး မဖြစ်အောင်လို့ပါ”
“ရတယ်... အကျိုးအပြစ်တွေကို ငါ ကြိုသိပြီးသား။ မင်းတို့တွေ ငါ အောင်မြင်ဖို့အတွက် သဘောတူ ခေါင်းညိတ်ပေးဖို့ပဲ လိုတယ်”
မော်ထျန်းတီကျန့်က တည်ငြိမ်သော မျက်နှာထားဖြင့် ဆိုသည်။
“ငါ အောင်မြင်ပြီးရင် ငါ့လက်အောက်က မော်ထျန်းဌာန ဟာ ငရဲမင်းရဲ့ လက်အောက်ကို ရောက်သွားလိမ့်မယ်။ ငါက ယင်လောကကို အခြေခံပြီး အောင်မြင်မှာ ဖြစ်ပေမဲ့ လောကသုံးပါးရဲ့ ကိစ္စတွေကိုတော့ ဝင်ရောက် စွက်ဖက်မှာ မဟုတ်ဘူး။”
လူအုပ်ကြီး၏ စိတ်ထဲတွင် ထူးဆန်းသော ခံစားချက်တစ်ခု ပေါ်လာသည်။
တရားထိုင်အောင်မြင်ခြင်း ဆိုသည်မှာ ပိုမိုကြီးမားသော စွမ်းအားများကို ပိုင်ဆိုင်ရန်အတွက် ဖြစ်သည်ဟု သူတို့ နားလည်ထားကြသည်။ ကောင်းကင်ဘုံလမ်းစဉ် ကဲ့သို့သော နည်းလမ်းမျိုးကို မည်သူက မပိုင်ဆိုင်ချင်ဘဲ နေမည်နည်း။
သူတို့သည် သာမန်လူများထက် အဆပေါင်းများစွာ သာလွန်ပြီး နယ်မြေကိုးခု၏ ထိပ်သီးများ ဖြစ်ကြသော်လည်း ကောင်းကင်ဘုံလမ်းစဉ်နှင့် ယှဉ်လိုက်လျှင်မူ ပုရွက်ဆိတ်နှင့် လူဘီလူးကဲ့သို့ ကွာခြားလှသည်။
သို့သော် ကောင်းကင်ဘုံလမ်းစဉ် ဖြစ်လာပြီးနောက် ကြုံတွေ့ရမည့် ဘေးထွက်ဆိုးကျိုးများကြောင့် သူတို့သည် ဤလမ်းစဉ်သို့ တက်လှမ်းရန် မစဉ်းစားရဲကြခြင်းဖြစ်သည်။ ကောင်းကင်ဘုံလမ်းစဉ် တစ်ပိုင်း အဆင့်သို့ပင် အလွယ်တကူ မတက်လှမ်းရဲကြချေ။
သို့ဆိုလျှင်... မော်ထျန်းတီကျန့် ကဲ့သို့သော ကမ္ဘာပေါ်ရှိ လျှို့ဝှက်ချက်များစွာကို သိထားသည့် ရှေးဟောင်း မိစ္ဆာမကြီးက အဘယ်ကြောင့် ဤမျှ ပင်ပန်းပြီး အကျိုးအမြတ်နည်းလှသည့် အလုပ်ကို လုပ်ချင်နေရသနည်း ဤနေရာတွင် တစ်စုံတစ်ရာသော လျှို့ဝှက်ချက် ရှိနေသလော။
“လူသားမျိုးနွယ် ကျင့်ကြံသူတွေ... ဆုံးဖြတ်ချက် ချကြပါ”
ယွမ်ချွဲက တည်ငြိမ်စွာ ဆိုလိုက်သည်။
ကျင့်ကြံသူများသည် တစ်ဦးပြီးတစ်ဦး ဆုံးဖြတ်ချက်များ ချလာကြသည်။ မော်ထျန်းတီကျန့် ကောင်းကင်ဘုံလမ်းစဉ် ဖြစ်လာသည်ကို သဘောတူကြသည်။ ဤသို့မှသာ မကြာမီ ရောက်ရှိလာတော့မည့် ပြင်ပလမ်းစဉ်များ၏ ကျူးကျော်မှုကို ခုခံနိုင်မည် မဟုတ်ပါလား။ သို့သော် အချို့မှာမူ နှုတ်ဆိတ်နေဆဲဖြစ်ပြီး တစ်ခုခုကို စောင့်ဆိုင်းနေပုံရသည်။
“သူမ တရားထိုင်အောင်မြင်တာကို ကျွန်တော် သဘောတူပါတယ်”
ဖန့်ချန်သည် လူအများက မိမိကို ကြည့်နေကြသည်ကို တွေ့သောအခါ ခေါင်းကို အသာအယာ ညိတ်၍ သဘောတူကြောင်း ဖော်ပြလိုက်သည်။
“ငရဲမင်းကိုယ်တိုင်က ငရဲကြင်ယာတော်ကို ကောင်းကင်ဘုံလမ်းစဉ် ရာထူးအတွက် သဘောတူတယ်ဆိုမှတော့ ငါတို့လည်း ဘာမှ ပြောစရာ မရှိတော့ပါဘူး။ ဒီလိုပဲ အတည်ပြုလိုက်ကြတာပေါ့”
ချန်ဖေးဖေးက ပြုံးလျက် မော်ထျန်းတီကျန့်ကို ကောင်းကင်ဘုံလမ်းစဉ် ရာထူးပေးရန် သဘောတူလိုက်သည်။
မကြာမီမှာပင် လူသားမျိုးနွယ်ဘက်မှ အားလုံးနီးပါး သဘောထား ဖော်ပြပြီးကြသည်။ အချို့က မဲမပေးဘဲ နေကြသော်လည်း ၈၀ ရာခိုင်နှုန်းခန့်က မော်ထျန်းတီကျန့်ကို တရားထိုင်အောင်မြင်သူအဖြစ် သဘောတူလိုက်ကြတော့သည်။
“ဒီကိစ္စ ပြေလည်သွားပြီဆိုတော့ ကျန်တာက အတူတူ ရန်သူကို ခုခံဖို့ပဲ ရှိတော့တယ်”
ယွမ်ဟယ်က ပြုံးလျက် ကျန်းရန်သူတော်စင်တို့ အဖွဲ့ကို လှည့်ကြည့်လိုက်သည်။
“သူတို့ရဲ့ အင်အားစုတွေက တကယ်တော့ လူသားလောက နယ်မြေကိုးခုလုံးမှာ ပျံ့နှံ့နေတာ။ ဒါပေမဲ့ အရမ်း ရှုပ်ထွေးလွန်းလို့ သာမန်အချိန်မှာ ခွဲခြားဖို့ မလွယ်ဘူး။ ဒီနေ့တော့ အကုန်လုံးကို အထူးတလည် သိလိုက်ရတော့မှာပဲ။”
လူအုပ်ကြီး၏ စိတ်များ လှုပ်ရှားသွားသည်။
သုံးရက်အကြာတွင် ပထမဆုံးသော စစ်တပ်ကြီး ရောက်ရှိလာသည်။ နတ်ဆိုးမျိုးနွယ် ပေါင်း တစ်သန်းခန့်သည် ယင်လောကထဲသို့ ဆင်းသက်လာကြသည်။ ဤမိစ္ဆာများ၏ အစိတ်အပိုင်းအချို့မှာ နတ်လမ်းစဉ်ဂိုဏ်း မှ ဖြစ်ပြီး၊ အချို့မှာ နယ်မြေအသီးသီးမှ ဖြစ်ကာ သာမန်အချိန်တွင် အေးဆေးစွာ နေထိုင်ကြသူများ ဖြစ်သည်။ အချို့မှာမူ ထိပ်သီးအင်အားစုများ၏ အမာခံများ ဖြစ်ကြပြီး ယခုအခါတွင်မူ သူတို့၏ စစ်မှန်သော ရပ်တည်ချက်ကို ဖော်ပြလိုက်ကြခြင်း ဖြစ်သည်။
ဤနတ်ဆိုးများက အလင်းဒိုင်းကို ဝိုင်းဝန်းတိုက်ခိုက်ရာတွင် ပါဝင်လာကြသောအခါ အလင်းဒိုင်း ခံနိုင်ရည်ရှိရမည့် ဖိအားမှာ သိသိသာသာ တိုးလာတော့သည်။
နောက်ထပ် ရက်အနည်းငယ် ကြာသောအခါ...
နယ်မြေကိုးခုအတွင်းရှိ ပထမတန်းစား အင်အားစုများ၊ ဒုတိယတန်းစား အင်အားစုများနှင့် မထင်မရှား ဂိုဏ်းငယ်လေးများစွာသည်လည်း ဤနေရာသို့ ရောက်ရှိလာကြသည်။ သူတို့သည် ကျန်းရန်သူတော်စင်တို့ကို အရိုအသေပေးပြီးနောက် အလင်းဒိုင်းကို ဖျက်ဆီးသည့် အလုပ်တွင် ပူးပေါင်း ပါဝင်လာကြသည်။
ထိုအခါမှသာ လင်ပုချိ တို့ကဲ့သို့သော လူငယ်မျိုးဆက် ကျင့်ကြံသူများသည် လူသားမျိုးနွယ်မှာလည်း အုပ်စုများစွာ ကွဲပြားနေပြီ ဖြစ်ကြောင်း ရိပ်မိလိုက်ကြတော့သည်။ ဤလူသားကျင့်ကြံသူ အများအပြားမှာ ဤနေရာရှိ လူများနှင့် ရင်းနှီးကျွမ်းဝင်သူများ ဖြစ်ကြပြီး အနည်းဆုံး တစ်ကြိမ်တစ်ခါဆုံဖူးသူများပင် ဖြစ်သည်။ သာမန်အချိန်တွင် သူတို့၏ မူလအစကို ဖုံးကွယ်ထားသော်လည်း ယနေ့တွင်မူ သူတို့၏ ထူးခြားသော နောက်ခံများကို ထုတ်ဖော်လိုက်ကြခြင်းဖြစ်သည်။
“တော်တော်များများက ငါတို့ရဲ့ ကျွယ်မင် ကြယ်စင်စု က ကျင့်ကြံသူတွေပဲ...”
လီရှမ်းဇီ က တိုးတိုးလေး ရေရွတ်လိုက်သည်။
ကျွယ်မင် အမာခံတပည့်များသည် တစ်ဦးကိုတစ်ဦး ကြည့်ကာ အံ့အားသင့်နေကြသည်။ ကျွယ်မင် အမာခံတပည့်များသာမက နောက်မှ ရောက်လာသော ကျင့်ကြံသူဦးရေမှာ သန်းနှင့်ချီရှိပြီး ၎င်းတို့မှာ နယ်မြေကိုးခု၏ အတော်ဆုံး ထိပ်သီးအုပ်စုလေး ဖြစ်သည်။ သူတို့ထဲမှ အချို့မှာ ကျွယ်မင်နန်းတော် ၏ စူးစမ်းရေး ကြယ်စင်စုမှ ဖြစ်ကြသလို၊ ထိုက်ယီမသေမျိုးဂိုဏ်း သို့မဟုတ် သွေးအသားနန်းတော် တို့၏ စူးစမ်းရေး ကြယ်စင်စုများမှလည်း ပါဝင်နေကြသည်။
ဤနေရာရှိ ထိပ်သီးအင်အားစု အားလုံးနီးပါးတွင် ကျန်းရန်သူတော်စင်၏ လူများ ပါဝင်ပတ်သက်နေကြသည်။
“ကျန်းရန် မဟာမိတ်၊ လော့ရွှယ် မဟာမိတ်၊ ဟေးဖူ မဟာမိတ်၊ ချန်ရှန်း မဟာမိတ်... ဒီမဟာမိတ်ကြီး လေးခုကနေ ကျန်ရစ်ခဲ့တဲ့ ကျင့်ကြံသူတွေက မနည်းလှဘူး။ နောက်မှ ပေါ်ပေါက်လာတဲ့ သူတော်စင်တွေ ချန်ထားခဲ့တဲ့ လူတွေလည်း ပါဦးမှာပဲ”
ဖန့်ချန်သည် ဤမြင်ကွင်းကို ကြည့်ရင်း စိတ်ထဲတွင် သံဝေဂရနေမိသည်။ ဤကျင့်ကြံသူများသည် ကျန်းရန်သူတော်စင်တို့ ပြန်လည် ပေါ်မလာခင်အထိ သူတို့တွင် ထူးခြားမှုရှိသည်ကို လုံးဝ မသိသာစေခဲ့ချေ။
အချို့သော ကျင့်ကြံသူများက မိစ္ဆာမျိုးနွယ်နှင့် ပူးပေါင်းရမည်ကို သိလိုက်ရသောအခါ သူတို့၏ မျက်နှာပေါ်တွင် ပေါ်လာသော အံ့အားသင့်မှုများကို ကြည့်ခြင်းအားဖြင့် ဤကျင့်ကြံသူများသည် မိမိတို့က မိစ္ဆာမျိုးနွယ်နှင့် လက်တွဲရမည်ကို ကြိုတင် မသိခဲ့ကြသည်မှာ သိသာလှသည်။ ထိုသို့သော အခြေအနေမျိုးတွင် သူတို့၏ စစ်မှန်သော အထောက်အထားကို မည်သူက သိနိုင်မည်နည်း။
“ဒီကျင့်ကြံသူတွေက သာမန်အချိန်မှာ နယ်မြေကိုးခုလုံးမှာ ပျံ့နှံ့နေကြတာ၊ အများစုက အထက်နယ်မြေ သုံးခုက ထိပ်သီးတွေရဲ့ လက်အောက်မှာ အမာခံတွေအဖြစ် ရှိနေကြတာပဲ။ အခု သူတို့က ကျန်းရန်သူတော်စင်တို့ရဲ့ လက်အောက်ခံတွေ ဖြစ်သွားပြီဆိုတော့ နယ်မြေကိုးခုရဲ့ လူသားမျိုးနွယ် အင်အားစုတွေဟာ အနည်းဆုံး တစ်ဝက်လောက် အတိအကျ ကွဲထွက်သွားပြီလို့ ပြောလို့ရတယ်”
ဖန့်ချန်သည် အဘိုးဖြစ်သူနှင့် ယွမ်ဟယ်ကို လှမ်းကြည့်လိုက်ရာ သူတို့နှစ်ဦးကလည်း သိရှိနားလည်သည့်ပုံစံဖြင့် ဖန့်ချန်ကို ပြုံးပြလိုက်ကြသည်။
ဖန့်ကျန့်ထျန်းက အေးဆေးစွာ ပြုံးလျက်
“မပြီးသေးဘူး... သူတို့နဲ့ ဆက်နွှယ်နေတဲ့ အင်အားစုတွေက အကုန်လုံး ပေါ်မလာသေးဘူး ”