သူက အဲဒီလောက်အထိ စိတ်ကောင်းရှိတာလား

"လူတိုင်း စိတ်အေးအေးထားကြပါ၊ အမှန်တော့ ဒီကိစ္စမှာ အကြောင်းပြချက်ရှိပါတယ်"

အင်မော်တယ်မိုသည် သူတို့ထဲတွင် တကယ်ပင် စကားပြောအကောင်းဆုံးသူဖြစ်သဖြင့် ချက်ချင်းပင် ဆင်ခြေတစ်ခုကို ဖန်တီးလိုက်သည်။

"ဘာအကြောင်းပြချက်လဲ"

"ဘာပဲဖြစ်ဖြစ် တစ်ဖက်လူက အဆင့်ရှစ် အင်မော်တယ်လက်နက်တွေကို ဒီအတိုင်း စုပုံပေးလိုက်ဖို့ဆိုတာ ဘယ်လိုမှမဖြစ်နိုင်ဘူး"

"ဘာလို့မဖြစ်နိုင်ရမှာလဲ"

မိုချန်က ခိုးရယ်လိုက်သည်

"မိုးပြာနဂါးမျိုးနွယ်စုက ငါတို့နဲ့ပူးပေါင်းချင်နေတာ။ သူတို့က ငါတို့ရဲ့ အင်အားကို အသိအမှတ်ပြုတာကြောင့် ဒီအင်မော်တယ်လက်နက်တွေက သူတို့ရဲ့ ပူးပေါင်းဆောင်ရွက်မှုအတွက် ရိုးသားမှုကိုပြသတဲ့ အထိမ်းအမှတ်လက်ဆောင်ပဲ"

"ပူးပေါင်းဆောင်ရွက်မှု"

လူတိုင်း ဝေခွဲမရဖြစ်သွားသည်။

"ဘယ်လိုမျိုး ပူးပေါင်းဆောင်ရွက်မှုလဲ"

"ငါ မှတ်မိသလောက်တော့ မိုးပြာနဂါးမျိုးနွယ်စုက ငါတို့နဲ့ တစ်ခါမှမဆက်ဆံဖူးပါဘူး"

"ဒါကဒီလိုရှိတယ်... မိုးပြာနဂါးမျိုးနွယ်စုရဲ့ ပုံစံကိုးမျိုး မိုးပြာနဂါးက..."

မိုချန်သည် သူလိမ်ညာဖန်တီးထားခဲ့သော ဆင်ခြေကိုသာ ဆက်ပြောလိုက်တော့သည်။ အခြားလူများကလည်း အံ့ဩတကြီးဖြင့် နားထောင်နေကြ၏။

ကျိလင်းဟန်ပင် ၎င်းကို အလွန်အမင်း မယုံနိုင်စရာကောင်းသည်ဟု ခံစားလိုက်ရသည်

"ပြောချင်တာက မိုးပြာနဂါးဧကရာဇ်အသစ်က ငါတို့အပေါ် အလွန်မြင့်မားတဲ့ အထင်အမြင်ရှိတယ်လို့ ဆိုလိုတာလား"

မိုချန်က ခေါင်းညိတ်လိုက်ပြီး သူ၏စည်းရုံးမှုကို ဆက်လက် လုပ်ဆောင်လိုက်သည်

"မှန်ပါတယ်၊ ဒီအဖိုးကြီး ခံစားရတာကတော့ ဒီပူးပေါင်းဆောင်ရွက်မှုက အလွန်တရာတန်ဖိုးရှိပါတယ်။ ဘာပဲဖြစ်ဖြစ် ရွှေနဂါးချိုင့်ဝှမ်းမှာ ငါတို့ရရှိခဲ့တဲ့ဆက်ဆံမှုက သိပ်ပြီးတော့မကောင်းလှပါဘူး"

"မိုးပြာနဂါးဘက်က ငါတို့ကို ချိုင့်ဝှမ်းထဲ ဝင်ခွင့်ပေးတဲ့အပြင်၊ တန်းတူမဟာမိတ်တွေအဖြစ် သတ်မှတ်ပေးထားတာ။ ဒီထက်မက အခြေအနေတွေက ဒီနေရာထက် အဆပေါင်းများစွာ ပိုပြီးကောင်းမွန်ပါတယ်"

ကျိလင်းဟန်သည် သူမ၏ လှပသောမျက်ခုံးများကို တွန့်လိုက်မိပြီး တစ်စုံတစ်ခုမှားယွင်းနေသကဲ့သို့ ခံစားလိုက်ရသည်

"အခုပြောလိုက်တဲ့အတိုင်းဆိုရင် မိုးပြာနဂါးမျိုးနွယ်စုနဲ့ နဂါးမျိုးနွယ်စုတို့က ကွဲပြားသွားကြပြီ။ အဲဒီနေရာကရေက အလွန်နက်တယ်၊ ဝင်ရောက်ပတ်သက်ဖို့အတွက် မသင့်တော်ပါဘူး"

သူမသည် စီနီယာအစ်မကြီးတစ်ဦးအနေဖြင့် သေချာပေါက် အလကားလူမဟုတ်။ အဖွဲ့အစည်းကြီး ပြိုကွဲမသွားစေဘဲ လူပေါင်းများစွာကို အတူတကွထိန်းသိမ်းထားနိုင်ခဲ့သည့် သူမ၏ စွမ်းဆောင်ရည်မှာ အထင်အရှားပင် ဖြစ်သည်။ အစ်ကိုကြီးချန်ရှိစဉ်တုန်းက သူမ၏စွမ်းဆောင်ရည်များက ထင်ထင်ရှားရှား ပေါ်ထွက်မလာခဲ့ခြင်းသာ။

မိုချန်၊ ရှန်ထိုက်နှင့် ဝေမြောင်တို့မှာ ခေါင်းကိုက်သွားကြသည်။ သူတို့က စိတ်ထဲမှနေ၍ စီနီယာအစ်မသာ အဲ့ဒီမိုးပြာနဂါးဧကရာဇ်က ဘယ်သူလဲဆိုတာသိရင် အားလုံးထက်ပိုပြီး အပြေးအလွှားသွားမိလိမ့်မယ်ဟု တွေးလိုက်ကြမိသည်။

"အောက်ကမ္ဘာက ငါတို့ရဲ့ဂိုဏ်းဝင်တပည့်တွေက အခုအဲဒီနေရာမှာ ရောက်နေကြပြီ။ ငါတို့ သေချာပေါက်သွားရမယ်"

"အောက်ကမ္ဘာက ဂိုဏ်းဝင်တပည့်တွေ ဟုတ်လား"

ရှန်ထိုက်က ခေါင်းညိတ်လိုက်သည်

"ဟုတ်ပါတယ်၊ စုစုပေါင်း လူပေါင်း တစ်သိန်းလေးသောင်းပါ။ သူတို့အားလုံး အင်မော်တယ်လောကကို တက်လှမ်းလာနိုင်ခဲ့ကြပါပြီ"

"ဘာ..."

လူတိုင်း အံ့ဩတကြီး အော်ဟစ်လိုက်ကြပြီး အထူးသဖြင့် ကျိလင်းဟန်မှာ အံ့အားသင့်ကာ ဝမ်းသာသွားသည်။ ထိုဂိုဏ်းမှာ သူမကိုယ်တိုင် စတင်တည်ထောင်ခဲ့ခြင်းဖြစ်ပြီး သူမ ထိုနေရာသို့ မရောက်ရှိခဲ့သည်မှာ နှစ်ပေါင်းများစွာကြာမြင့်ခဲ့ပြီဖြစ်သော်လည်း ၎င်းကို သူမ၏ နှလုံးသားထဲတွင် အမြဲတမ်းသိမ်းဆည်းထား၏။ ယွမ်ကျန့်၊ ယွမ်ရှန့်နှင့် အခြားလူများသည် သူမနှင့် မျိုးဆက်များစွာ ကွာခြားလှပြီး တစ်ခါမျှမဆုံတွေ့ခဲ့ဖူးသော်လည်း တူညီသော ဂိုဏ်းသားများဖြစ်ကြသည့် သံယောဇဉ်မှာမူ တည်ရှိနေဆဲ။

အခြားလူများကလည်း ထိုနည်းတူ ခံစားလိုက်ကြရသည်။ ယောင်နယ်မြေတွင် နှစ်ပေါင်းများစွာ အထီးကျန်စွာ နေထိုင်ခဲ့ကြရသဖြင့် သူတို့သည် အောက်ကမ္ဘာမှ မိမိတို့၏ လူအုပ်စုကြီး ရောက်ရှိလာသည့်သတင်းကို ကြားလိုက်ရသဖြင့် အလွန်တရာ စိတ်လှုပ်ရှားသွားကြ၏။

သို့သော်လည်း ခေတ္တမျှ စိတ်လှုပ်ရှားပြီးနောက် နောက်ထပ်မေးခွန်းများစွာ ထွက်ပေါ်လာခဲ့ပြန်သည်။

"သူတို့ ဘယ်လိုလုပ်ပြီး ဒီကိုတက်လာနိုင်ကြတာလဲ"

"တပည့်ပေါင်း တစ်သိန်းလေးသောင်းတောင်ရှိတာ၊ သူတို့တွေ အင်မော်တယ်ကံကြမ္မာတိုကင်တွေကို ဒီလောက်အထိ အများကြီး ဝယ်ယူနိုင်ခဲ့ရင်တောင်မှ ကာကွယ်နိုင်စွမ်းရှိကြမှာမဟုတ်ဘူး”

မိုချန်ကမူ သူ၏ ဇာတ်လမ်းကို ဆက်လက်၍သာ ဖာထေးလိုက်ရတော့သည်

"ဒီကိစ္စအတွက်တော့၊ ငါတို့ ပုံစံကိုးမျိုး မိုးပြာနဂါးကို ကျေးဇူးတင်ရမှာပါ"

"အာ... သူ့ကိုကျေးဇူးတင်ရမယ် ဟုတ်လား"

"မှန်ပါတယ်၊ ဒီမိုးပြာနဂါးဧကရာဇ်က အောက်ကမ္ဘာမှာ ရှောင်ခွန်း၊ ကျီယွန်းနဲ့ အခြားလူတွေနဲ့ ဆုံတွေ့ခဲ့ပြီးနောက် ဖေးရှန်ဂိုဏ်းနဲ့တွေ့ဆုံလို့ ကံကြမ္မာအကျိုးပေးဆက်နွယ်မှု ရှိခဲ့တာပါ"

"သူ့ရဲ့အင်အားက အောက်ကမ္ဘာမှာ ပြိုင်ဘက်ကင်းပတာကြောင့် သူက ငါတို့ ဖေးရှန်ဂိုဏ်းက လူတိုင်းကို ကာကွယ်ပေးခဲ့ပြီး အတူခေါ်ဆောင်လာခဲ့တာ"

ဒါက...

လူတိုင်း လုံးဝ ဆွံ့အ...

ဒါက တကယ့်ကို မယုံနိုင်စရာကောင်းလွန်းသည်...

ပုံစံကိုးမျိုး မိုးပြာနဂါးက တကယ်ပဲ အဲဒီလောက်အထိ စိတ်ကောင်းရှိတာလား...

သူက အင်မော်တယ်လောကရဲ့ ကိုယ်ကျင့်တရားအရာမှာ စံပြပုဂ္ဂိုလ်ကြီးများလား...

ကျိလင်းဟန်က ခေါင်းခါရင်း မပြောဘဲမနေနိုင်တော့ပေ

"ငါတို့တပည့်တွေရဲ့ ကျင့်ကြံခြင်းအဆင့်က အတော်လေးနိမ့်ကျနေဦးမှာ သေချာပါတယ်။ ပုံစံကိုးမျိုး မိုးပြာနဂါးက ဒီလောက်အင်အားကြီးမားတာကို သူက ဘာလို့ သူတို့ကို စိတ်ဝင်စားရတာလဲ။ သူက ဘာလို့ သူတို့ကို ဒီလောက်အထိ ကူညီပေးရတာလဲ"

"အဲဒါက သူက ဖေးရှန်ဂိုဏ်းရဲ့သမိုင်းမှာ အင်မော်တယ်ဘုရင် အမြောက်အမြား အင်မော်တယ်လောကကို တက်လှမ်းခဲ့ကြဖူးတာကို ကြားသိခဲ့ရလို့ပါ။ သူက အထက်အင်မော်တယ်လောက ရောက်ရှိလာတဲ့အခါ ငါတို့နဲ့ မဟာမိတ်ဖွဲ့နိုင်ဖို့ မျှော်လင့်ချက်နဲ့ မျက်နှာသာပေးခဲ့တာပါ"

လူတိုင်း သဘောပေါက်သွားကြ၏။

"ဪ... ဒါဆို ဒါက ဒီလိုကိုး..."

ဤသို့တွေးကြည့်လိုက်သည့်အခါ ၎င်းက အတော်လေး ကျိုးကြောင်းဆီလျော်နေသကဲ့သို့ ခံစားရစေသည်။ ယောင်နယ်မြေတစ်ခုလုံးတွင် ကျော်ကြားလှသော ပုံစံကိုးမျိုး မိုးပြာနဂါးသည် ဖေးရှန်ဂိုဏ်းနှင့် ဤမျှနက်နဲသော သံယောဇဉ်ရှိနေလိမ့်မည်ဟု မည်သူကထင်မှတ်မည်နည်း။

မိုချန်သည် စိတ်ထဲမှနေ၍ ချွေးများကို တိတ်တဆိတ်သုတ်လိုက်ရသည်။ လိမ်ညာ ဖန်တီးရခြင်းက တကယ်ကို မလွယ်ကူလှပေ။ သူလည်း အခြားရွေးချယ်စရာမရှိ...

အစ်ကိုကြီးချန်က စိတ်ကူးပေါက်သလို လုပ်ဆောင်တတ်ပြီး သူ၏တည်ရှိမှုကို ဇာတ်လမ်းထဲမှ ပယ်ဖျက်ပစ်ခဲ့သဖြင့် ၎င်းက ဟာကွက်များနှင့် ချို့ယွင်းချက်ပေါင်းများစွာကို ချန်ထားခဲ့ခြင်းပင်။ ၎င်းကို ဤကဲ့သို့ အတင်းအကျပ် ဖာထေးပေးနိုင်သည်မှာ အင်မော်တယ်မို တစ်ယောက်တည်းသာ ရှိပေလိမ့်မည်။

သူသည် အခွင့်ကောင်းကို အမိအရယူကာ ဆက်ပြောလိုက်သည်

"ငါတို့ရဲ့ ဂျူနီယာတပည့်တွေအတွက် ပိုမိုကောင်းမွန်တဲ့ ကျင့်ကြံခြင်းပတ်ဝန်းကျင်တစ်ခု ပေးဆောင်ဖို့အတွက်ပဲဖြစ်ဖြစ် ဒီမဟာမိတ်ဖွဲ့ခြင်းကို မဖြစ်မနေလုပ်ဆောင်ရပါမယ်"

"ငါတို့ လူပေါင်း တစ်သိန်းလေးသောင်းကို ရွှေနဂါးချိုင့်ဝှမ်းအပြင်ဘက်မှာ ဒီအတိုင်း ပစ်ထားလို့မရဘူးလေ"

"ဘာပဲဖြစ်ဖြစ် အပြင်ဘက်က ယောင်မျိုးနွယ်စုတွေက ရောထွေးနေတာမို့ ဘယ်လိုမှ စိတ်မချရပါဘူး"

ကျိလင်းဟန်နှင့် အခြားလူများမှာလည်း သဘောတူညီစွာဖြင့် ခေါင်းညိတ်လိုက်ကြမိသည်။ ကြီးမြတ်လှသော နဂါးချိုင့်ဝှမ်းကြီးသုံးခုဆိုသည်မှာ အင်မော်တယ်လောက အစပြုစဉ်ကတည်းက ဖြစ်ပေါ်လာခဲ့သော သဘာဝရတနာမြေများဖြစ်ကြပြီး အတွင်းပိုင်းရှိ ပတ်ဝန်းကျင်မှာ အပြင်ဘက်နှင့် လုံးဝနှိုင်းယှဉ်၍မရနိုင်ပေ။

"မဟာမိတ်ဖွဲ့ဖို့ကို စဉ်းစားလို့ရပါတယ်"

သူမသည် ထိုသုံးဦးဝတ်ဆင်ထားသော အလွန်အမင်း တောက်ပလွန်းလှသည့် အင်မော်တယ်လက်နက်များနှင့် ရတနာများကို နောက်တစ်ကြိမ်ကြည့်လိုက်ပြီး သံသယစိတ်များဖြင့် မေးမြန်းလိုက်သည်

"ဒါပေမဲ့ ငါတို့ ဘာမှမလုပ်ရသေးတာကို တစ်ဖက်လူက ငါတို့ကို နယ်မြေတွေ ပေးတယ်၊ ငါတို့ လူတွေကို အင်မော်တယ်လောကသို့ တက်လှမ်းဖို့ ကူညီပေးတယ်၊ ရတနာတွေအများကြီးကိုပါ လက်ဆောင်ပေးတယ်ဆိုတာ... ဒါက တကယ်ပဲ ဖြစ်နိုင်ပါ့မလား"

မိုချန်က စိတ်မသက်မသာဖြင့် ရှင်းပြလိုက်ရသည်

"အဲဒါက ငါတို့သုံးယောက်က သတင်းစကားပါးသူတွေအဖြစ် လက်ဆောင်တွေ သွားရောက်ပေးအပ်ပြီး ဂုဏ်ပြုခဲ့ကြလို့ပါ"

"ဒါကြောင့် သူ စိတ်ခံစားချက် ကောင်းမွန်နေတာနဲ့ အကျိုးခံစားခွင့်အချို့ကို အထူးတလည် ပေးအပ်ခဲ့တာ"

"ဒီလောက်လေးအတွက်နဲ့လား"

"သုံးယောက်သားက အကြိုအပို့ လုပ်ပေးခဲ့ရုံသက်သက်ပဲလေ။ ဘာကောင်းမှုကုသိုလ်မှ မလုပ်ရသေးဘူး၊ ဟုတ်ပြီလား"

အခြားလူများမှာမူ နောက်တစ်ကြိမ် မတရားမှုကို ခံစားလိုက်ကြရပြန်သည်။

"ဒါက တကယ်ကို ဒေါသထွက်စရာကောင်းလွန်းတယ်"

"ငါသာ ကြိုသိခဲ့ရင်၊ ငါကိုယ်တိုင်သွားဖို့ စေတနာ့ဝန်ထမ်း လုပ်ခဲ့ပါတယ်"

"ဒါက တကယ့်ကို ကံကောင်းလွန်းတာပဲ။ ငါတော့ ဒါကို လက်မခံနိုင်ဘူး"

နှစ်ပေါင်းများစွာ ဆင်းရဲမွဲတေခဲ့ကြရသဖြင့် အဆင့်ရှစ် အင်မော်တယ်လက်နက်များ၏ ဆွဲဆောင်မှုမှာ သူတို့အတွက် အလွန်တရာ ကြီးမားလွန်းလှပေသည်။

"မဟာမိတ်ဖွဲ့တာက ငါတို့အားလုံးအတွက်ဖြစ်တာမို့ ဒီအင်မော်တယ်လက်နက်တွေက လူတိုင်းနဲ့ ဆိုင်သင့်တယ်လို့ ငါထင်တယ်။ ငါတို့ အလှည့်ကျဝတ်ဆင်ကြဖို့ အဆိုပြုတယ်"

"ဟုတ်တယ်၊ အမှန်ပဲ၊ အလှည့်ကျ ဝတ်ဆင်ရမယ်"

မိုချန်ကတော့ အဆင်ပြေပါသေးသည်၊ ဘာပဲဖြစ်ဖြစ် သူက ရောက်ရှိနေသော လူတိုင်းကို တစ်ချိန်က သင်ကြားပြသပေးခဲ့ဖူးပြီး လေးစားမှုကိုရရှိထားဆဲ ဖြစ်သောကြောင့်ပင်။ သို့သော်လည်း ရှန်ထိုက်နှင့် ဝေမြောင်တို့မှာမူ အခြေအနေချင်း လုံးဝမတူညီပေ။ သူတို့ ခုလေးတင် ဝတ်ဆင်ထားသော အင်မော်တယ်ဝတ်စုံများကို ချွတ်ယူခြင်းခံရတော့မည်ကို မြင်လိုက်ရသည့်အခါ ထိုနှစ်ယောက်မှာ ပျာယာခတ်သွား၏။ သူတို့သည် အာရုံစိုက်မှုများကို အခြားတစ်နေရာသို့ အလျင်အမြန်ပင် လွှဲပြောင်းလိုက်ကြတော့သည်။

"ငါတို့တင် ရှိတာမဟုတ်ပါဘူး၊ စီနီယာအစ်မကျိမှာလည်း ရှိပါတယ်"

"မှန်ပါတယ်... မင်းတို့တွေ ဒီလောက်အထိ အရည်အချင်းရှိရင်၊ သူမဆီကနေသွားပြီး လုယူကြည့်ကြပါလား"

"ငါ့မှာလည်းရှိတယ် ဟုတ်လား"

ကျိလင်းဟန် ဆွံ့အသွားသည်။ သူမသည် ထိုပုံစံကိုးမျိုး မိုးပြာနဂါးနှင့် မဆုံတွေ့ရသေးမီ သူမကို ရတနာများပေးနေလေပြီ။

မိုချန်က ခေါင်းညိတ်လိုက်သည်။

"မင်းက ငါတို့ ဖေးရှန်ဂိုဏ်းရဲ့ ဂိုဏ်းချုပ်ပဲလေ။ ခေါင်းဆောင်တစ်ယောက်အနေနဲ့၊ တစ်ဖက်လူက သူ့ရဲ့ ရိုသေလေးစားမှုကို ပြသရမှာပေါ့"

ထို့နောက်တွင် ကျိလင်းဟန်သည် သူမ၏မျက်စိရှေ့တွင် ရတနာသုံးခု လွင့်မျောနေသည်ကို မြင်တွေ့လိုက်ရသည်။ အဆင့်ရှစ် အင်မော်တယ်ဝတ်စုံ တစ်စုံ၊ ထိပ်တန်းအဆင့် အင်မော်တယ်ရတနာ တစ်ခုနှင့် အဆင့်ကိုး အင်မော်တယ်ဓား တစ်စင်း... ပထမနှစ်ခုကို သိပ်မအံ့ဩကြသော်ငြား အဆင့်ကိုး အင်မော်တယ်ဓားကတော့ လူအုပ်ကြီးကို ဆူညံပွက်လောရိုက်သွားစေသည်။

"ဒါက အဆင့်ကိုး အင်မော်တယ်ဓားကြီး မဟုတ်လား"

"ငါ မျက်စိမှားတာ မဟုတ်ပါဘူးနော်"

"ဒါက ဒဏ္ဍာရီလာ အင်မော်တယ်ဧကရာဇ်တစ်ပါးမှသာ အသုံးပြုဖို့ ထိုက်တန်တဲ့ အင်မော်တယ်လက်နက်ကြီးပဲ"

"ဒါက ဘယ်လိုလုပ် ဖြစ်နိုင်မှာလဲ... မိုးပြာနဂါးမျိုးနွယ်စုက တကယ်ကို ရက်ရောလွန်းလှတယ်"

"ဒါက တကယ့်ကို မယုံနိုင်စရာကောင်းလွန်းတယ်..."

"သူတို့ဆီမှာ ရတနာတွေ ဘယ်လိုလုပ် ဒီလောက်အများကြီး ရှိနေနိုင်ရတာလဲ"

"မိုးပြာနဂါးမျိုးနွယ်စုက နှစ်ပေါင်းများစွာ တည်ရှိလာခဲ့တာပဲလေ။ ဒါတွေက အတိတ်တုန်းက အင်မော်တယ်နယ်မြေနဲ့ မိစ္ဆာနယ်မြေတို့ဆီကနေ လုယူခဲ့တာများ ဖြစ်မလား"

ကျိလင်းဟန်သည် မည်မျှပင် တည်ငြိမ်အောင် ထိန်းထားပါစေ သူမစိတ်ထဲမှ ရင်ခုန်လှုပ်ရှားမှုများကိုမူ ဖုံးကွယ်ထားနိုင်ခြင်းမရှိပေ။ ၎င်းက အဆင့်ကိုး အင်မော်တယ်ဓား ဖြစ်သည်... ဤအရာမတိုင်မီအထိ သူမသည် အဆင့်ခုနစ် ဓားကိုသာ အသုံးပြုနေရသည်။ သူမ ဧကရာဇ်တစ်ပိုင်းများနှင့် တိုက်ခိုက်ရသည့် အကြိမ်တိုင်းတွင် သူမ၏ ပစ္စည်းကိရိယာများက အလွန်အမင်းနိမ့်ကျလွန်းလှသဖြင့် အသာစီးမရရှိခဲ့သည်မှာ မကြာခဏပင်။ အကယ်၍ သူမသာ ဤအဆင့်ကိုး အင်မော်တယ်ဓားကို ကိုင်စွဲကာ ထိုအင်မော်တယ်ဝတ်စုံကို ဝတ်ဆင်ပြီး ထိပ်တန်းအဆင့် အင်မော်တယ်ရတနာကို တပ်ဆင်လိုက်မည်ဆိုပါက...

ဧကရာဇ်တစ်ပိုင်းအဆင့်တွင်ဆိုလျှင် သူမကိုဖိနှိပ်နိုင်မည့်သူမှာ အနည်းငယ်မျှသာရှိတော့မည်။ သူမသည် ဆန်းကျိ သို့မဟုတ် ဆန်းချုံးကဲ့သို့သော နဂါးမျိုးနွယ်စု၏ အဆင့်မြင့်ပုဂ္ဂိုလ်ကြီးများနှင့်ပင် ယှဉ်ပြိုင်နိုင်စွမ်းရှိလာပေလိမ့်မည်။

နောက်ဆုံးတွင်၊ လူအုပ်ကြီး၏ မနာလိုမှုများနှင့် တောက်လောင်နေသော မျက်ဝန်းများအောက်တွင်၊ သူမသည် ဓားကို လှမ်းယူလိုက်သည်။