အခန်း ၈၆

အခန်း (၈၆) စနိုက်ပါရိုင်ဖယ်နှင့် မိုးကြိုးမြွေ

"ကျွိ..."

အပြာရောင်မြွေကြီး ၎င်းထံသို့ ပြေးဝင်လာသည်ကို မြင်လိုက်ရသောအခါ ကြွက်လေးက စိုးရိမ်တကြီး အော်ဟစ်လိုက်၏။

ဤမြွေကြီးသည် ကြွက်‌လေး၏ မဟာရန်သူ ဖြစ်ကြောင်း ကျောက်လင် ချက်ချင်း သိလိုက်သည်။

ကြွက်ငယ်သည် အလွန်မြန်ဆန်လှသော်လည်း ဤမြွေကြီးကို ကြောက်ရွံ့နေခြင်းက အပြာရောင် မြွေကြီး၌ ကြောက်မက်ဖွယ်ကောင်းသော တိုက်ခိုက်နိုင်စွမ်း ရှိနေကြောင်း သေချာပေါက် အဓိပ္ပာယ်သက်ရောက်နေ၏။

"စနိုက်ပါ ရိုင်ဖယ်ရဲ့ စွမ်းရည်ကို ပြသရမယ့် အချိန်ပဲ..."

မီတာနှစ်ထောင်ခန့် ကွာဝေးသေးရာ မြွေကြီး၏ တိုက်ခိုက်နိုင်သည့် အကွာအဝေးသည် ထိုမျှအထိ ကြောက်မက်ဖွယ်ကောင်းသော အဆင့်သို့ ရောက်နိုင်မည်ဟု ကျောက်လင် မယုံကြည်ပေ။ ထို့ကြောင့် ၎င်းကို သတ်ဖြတ်ရန် သူ ဆုံးဖြတ်လိုက်သည်။

ဘားရတ် စနိုက်ပါ ရိုင်ဖယ်ကို ကျောက်တုံးပေါ်တွင်တင်ကာ ကျောက်လင်က အပြာရောင်မြွေကြီး၏ ခေါင်းကို ချက်ချင်း ချိန်ရွယ်လိုက်၏။

"ဒိုင်း..."

စနိုက်ပါ ကျည်ဆန်က ချက်ချင်း ထွက်ပေါ်သွား၏။

ကျောက်လင်က မှန်ပြောင်းထဲမှ ဆက်လက် ကြည့်ရှုနေသည်။

ပစ်ခတ်လိုက်သော ကျည်ဆန်သည် လေထုကို ခွဲထုတ်သွား၏။ ၎င်းကို မမြင်နိုင်သော်လည်း ပြင်းထန်သော လေပြင်းတစ်ရပ်ကို ဖန်တီးသွားသေးသည်။

အပြာရောင် မြွေကြီးက ထိုလေပြင်းကို အာရုံခံမိလိုက်၏။

အပြာရောင် မြွေကြီးက အလွန်တရာ သတိဝီရိယ ကြီးမားလှသည်။

ထို့နောက် အပြာရောင် မြွေကြီးက ပါးစပ်ကို ဟကာ မရေမတွက်နိုင်သော လျှပ်စစ်စီးကြောင်းများ စုစည်းထားသည့်အလား အပြာရောင် အလင်းတန်းတစ်ခုကို ပစ်လွှတ်လိုက်၏။

အပြာရောင် အလင်းတန်းသည် ပျံသန်းလာသော ကျည်ဆန်ကို ထိမှန်သွားသည်။

ကျည်ဆန်သည် လေထဲတွင်ပင် အရည်ပျော်သွားပြီး အပြာရောင် မီးခိုးငွေ့တန်းတစ်ခု ထွက်ပေါ်လာ၏။

“သောက်ကျိုးနည်း."

"ဒါက ဘယ်လိုစွမ်းရည်မျိုးလဲ..."

"ဒီမြွေကြီးဆီမှာ ဒီလောက်များပြားတဲ့ လျှပ်စစ်စွမ်းအင်တွေ ဘယ်လိုလုပ် ရှိနေနိုင်ရတာလဲ..."

ကျောက်လင်မှာ အံ့သြတုန်လှုပ်သွား၏။

ယခုမူ ကြွက်လေးက အပြာရောင် မြွေကြီးကို အဘယ်ကြောင့် ထိုမျှလောက် ကြောက်ရွံ့နေရသည်ကို ကျောက်လင် နားလည်သွားပြီ ဖြစ်သည်။

ကြွက်တစ်ကောင် မည်မျှပင် မြန်ဆန်စေကာမူ လျှပ်စစ်ပြက်ခြင်းကို မကျော်လွန်နိုင်ပေ။

ကြွက်လေးသာ အပြာရောင်မြွေကြီး၏ တိုက်ခိုက်မှု အကွာအဝေးအတွင်းသို့ ရောက်ရှိသွားပါက စောစောက အလင်းတန်းသည် ၎င်းအား အလွယ်တကူ တိုက်ခိုက်သွားမည် ဖြစ်ပြီး ကြွက်လေးမှာ ပုန်းရှောင်စရာ နေရာမရှိတော့ဘဲ ခန္ဓာကိုယ်ပါ မီးခိုးငွေ့အဖြစ် လောင်ကျွမ်းသွားမည်သာ ဖြစ်၏။

ထိုအခိုက်တွင် အပြာရောင် မြွေကြီးသည် စနိုက်ပါ ကျည်ဆန်၏ အန္တရာယ်ကို အာရုံခံမိသွားသည်။ ၎င်းက ပါးစပ်ကို ဟကာ ဒေါသတကြီး အသံပြုလိုက်၏။

ဤကျည်ဆန်သည် အပြာရောင် မြွေကြီးကို ဒေါသထွက်စေခဲ့သည်မှာ ရှင်းလင်းလှသည်။

မြွေကြီးသည် ကျည်ဆန်လာရာ လမ်းကြောင်းကို မှတ်သားလိုက်ပြီးနောက် ထိုဘက်သို့ အလျင်အမြန် လာခဲ့ပြန်၏။

“သေစမ်း... တောက်..."

"မင်းဆီက လျှပ်စစ်စွမ်းအင်တွေက ကုန်ခန်းမသွားနိုင်ဘူးဆိုတာကို ငါ မယုံဘူး..."

သိချင်စိတ် ပြင်းပြမှုကြောင့် ကျောက်လင်သည် ချက်ချင်း ထွက်မပြေးဘဲ နောက်ထပ် စနိုက်ပါ ကျည်ဆန်များကို ထုတ်ယူလိုက်သည်။

"ဒိုင်း..."

နောက်ထပ် ကျည်ဆန်တစ်တောင့်ကို ပစ်ခတ်လိုက်ပြန်၏။

အပြာရောင် မြွေကြီးက ကျည်ဆန်၏ လမ်းကြောင်းကို ထပ်မံ အာရုံခံမိပြန်သည်။ ၎င်း၏ ခန္ဓာကိုယ်ဖြင့် ဝင်ရောက်ခုခံရန် မဝံ့ရဲဘဲ ပါးစပ်ကို ထပ်ဟကာ အပြာရောင် အလင်းတန်းတစ်ခုကို ထပ်မံ ပစ်လွှတ်လိုက်၏။

ကျည်ဆန်က လေထဲတွင် မီးခိုးငွေ့တန်းတစ်ခု ချန်ရစ်ခဲ့သည်။

"ဒိုင်း..."

နောက်ထပ် စနိုက်ပါ ကျည်ဆန်တစ်တောင့် ထွက်ပေါ်သွားပြန်၏။

ကျောက်လင် စဉ်းစားမိသည်မှာ သူသည် စနိုက်ပါ ကျည်ဆန်များကို ဆက်တိုက် ပစ်ခတ်ပြီး အပြာရောင် မြွေကြီးကို အနားမပေးဘဲ တိုက်ခိုက်သွားရန်ဖြစ်သည်။

ကူးပြောင်းလာသူ တစ်ယောက်အနေဖြင့် ကျောက်လင်သည် စွမ်းအင်တည်မြဲမှု နိယာမကို အခိုင်အမာ ယုံကြည်ထား၏။

ဤအပြာရောင် မြွေကြီးထံမှ လျှပ်စစ်အလင်းတန်းများသည် လေထဲမှ အလိုအလျောက် ထွက်ပေါ်လာနိုင်မည် မဟုတ်ပေ။ ၎င်းတို့သည် ခန္ဓာကိုယ်တွင်းရှိ စွမ်းအင်တစ်မျိုးမျိုးကို သုံးစွဲရန် လိုအပ်မည်သာ ဖြစ်သည်။

သဘာဝတရားအရ စနိုက်ပါ ကျည်ဆန်များဖြင့် တိုက်ခိုက်ခြင်းအားဖြင့် အပြာရောင် မြွေကြီးသည် လျှပ်စစ်အလင်းတန်းများကို ဆက်တိုက် ပစ်လွှတ်ရမည်ဖြစ်ရာ ၎င်း၏ စွမ်းအင်များကိုလည်း ဆက်တိုက် ကုန်ခန်းစေမည် ဖြစ်၏။

အပြာရောင် မြွေကြီးသည် စနိုက်ပါ ကျည်ဆန်တစ်တောင့်ကို ကာကွယ်ပြီးသည်နှင့် ၎င်းထံသို့ လာနေသော နောက်ထပ် ကျည်ဆန်တစ်တောင့်ကို အာရုံခံမိပြန်သည်။

အပြာရောင် မြွေကြီးသည် ငါးမီတာပင် ရှေ့သို့ မရောက်သေးခင် ခေါင်းကို ထပ်မော့ကာ ကျည်ဆန်ကို အရည်ပျော်စေမည့် လျှပ်စစ်အလင်းတန်းတစ်ခုကို ထပ်မံ ပစ်လွှတ်လိုက်ရ၏။

"ဒိုင်း..."

စနိုက်ပါ ကျည်ဆန်များကို ထပ်မံ ပစ်ခတ်လိုက်ပြန်သည်။

ကျောက်လင်သည် အပြာရောင် မြွေကြီးကို အသက်ရှူချိန်ပင် မပေးချေ။

ကျည်ဆန်များကို တစ်တောင့်ပြီးတစ်တောင့် ပစ်ခတ်နေ၏။

အပြာရောင် မြွေကြီးသည် ကျည်ဆန်များကို ဖျက်ဆီးရန် လျှပ်စစ်အလင်းတန်းများကို ပစ်လွှတ်နေစဉ် ၎င်း၏ ခန္ဓာကိုယ်ကလည်း ရှေ့သို့ ဆက်လက် ရွေ့လျားနေသည်။ ၎င်းမှာ လုံးဝ ရူးသွပ်နေပြီ ဖြစ်ပြီး ၎င်းအား ပစ်ခတ်ခဲ့သော စက်ဆုပ်ဖွယ်သတ္တဝါကို ရှာဖွေရမည် ဖြစ်၏။

"ကျွိ..."

ကြွက်လေးသည် ကျောက်လင်အထက်ရှိ သစ်ကိုင်းပေါ်တွင် ရပ်နေပြီး အပြာရောင် မြွေကြီး ၎င်းထံသို့ ပြေးဝင်လာသည်ကို မြင်နေရပြီ ဖြစ်သည်။ ၎င်းက ကြောက်လန့်တကြား အော်ဟစ်နေ၏။

အပြာရောင် မြွေကြီးသည် တစ်ကီလိုမီတာခန့် ကွာဝေးသေးသော်လည်း ကျောက်လင်ကမူ လှုပ်ရှားမည့် အရိပ်အယောင် မပြသေးပေ။ သူသည် စနိုက်ပါကျည်ဆန်များကို ဆက်လက် ထုတ်ယူကာ ဆက်တိုက် ပစ်ခတ်နေသည်။

ဘားရတ်၏ သေနတ်ပြောင်းမှာ နီရဲပူလောင်နေ၏။

ကျည်ဆန်များ ထွက်ပေါ်လာသည်နှင့်အမျှ အပြာရောင် မြွေကြီးသည်လည်း လျှပ်စစ်အလင်းတန်းများကို ဆက်လက် ပစ်လွှတ်နေသည်။

သို့သော် ဤတစ်ကြိမ်တွင် လျှပ်စစ်အလင်းတန်းသည် သိသိသာသာ သေးငယ်သွားပြီး အားပျော့သွားသည်ကို ကျောက်လင် မြင်တွေ့လိုက်ရ၏။

ကျည်ဆန်သည် အလင်းတန်းကြောင့် အရည်ပျော်သွားသော်လည်း လေထဲတွင် မီးခိုးငွေ့တန်းရှည်ကြီးတစ်ခုကို ချန်ရစ်ခဲ့ရာ ကျည်ဆန်သည် လုံးဝ အရည်မပျော်ခင် အကွာအဝေးတစ်ခုအထိ သွားခဲ့ကြောင်း ဖော်ပြနေသည်။

ဤသည်မှာ လျှပ်စစ်အလင်းတန်း၏ စွမ်းအား ကျဆင်းသွားကြောင်းကိုလည်း ဖော်ပြနေ၏။

"ငါ ထင်တဲ့အတိုင်းပဲ... မင်းခန္ဓာကိုယ်ထဲက စွမ်းအင်တွေက ထာဝရတည်တံ့နေမှာ မဟုတ်ဘူး..."

"မင်းခန္ဓာကိုယ်ထဲက စွမ်းအင်တွေကို ကုန်ခန်းသွားဖို့ ကျည်ဆန် အတောင့်ငါးဆယ်တောင် သုံးလိုက်ရတယ်... မင်းက တကယ့်ကို အစွမ်းထက်တဲ့ ဝိညာဉ်မြွေတစ်ကောင်ပဲလို့ ပြောရမယ်..."

ကျောက်လင်က လှောင်ပြုံး ပြုံးလိုက်၏။

သစ်ကိုင်းပေါ်ရှိ ကြွက်လေးကလည်း ထိုအရာကို မြင်လိုက်ရပြီး ရုတ်တရက် ဝမ်းသာအားရ အသံပြုလိုက်သည်။

ရုတ်တရက် ကြွက်လေးသည် ကျောက်တုံးပေါ်သို့ ခုန်ဆင်းလာပြီး ကျောက်လင်ကို အမူအရာ ပြကာ တစ်ခါတစ်ရံတွင် ဘားရတ်ကို လက်ညှိုးထိုးပြပြီး တစ်ခါတစ်ရံတွင် မြွေကြီးရှိရာ လမ်းကြောင်းကို ညွှန်ပြနေ၏။

"ကြွက်လေး... မင်းပြောချင်တာက အဲ့တာကို ငါ သတ်ပစ်သင့်တယ်လို့ ဆိုလိုတာလား..."

ကျောက်လင် နားလည်သွားပြီး ပြုံးကာ မမေးဘဲ မနေနိုင်တော့ချေ။

ကြွက်လေးက ချက်ချင်း ခေါင်းညိတ်ပြ၏။

ထိုအခိုက်တွင် မြွေကြီးကို သတ်ဖြတ်ခြင်းက ကြွက်ငယ်အတွက် ကြီးမားသော အကျိုးကျေးဇူးရှိနိုင်ကြောင်း ကျောက်လင် သဘောပေါက်သွားသည်။

ထို့ကြောင့် ကျောက်လင်က ဆက်လက် ပစ်ခတ်ရန် ဆုံးဖြတ်လိုက်၏။

ဤဘားရတ် စနိုက်ပါ ရိုင်ဖယ် ပျက်စီးသွားမည်ဆိုလျှင်တောင်မှ ဤအပြာရောင် မြွေကြီးကို တိုက်ခိုက်ရာတွင် ကြွက်လေးကို သူ ကူညီပေးမည်ဖြစ်သည်။

အခြားတစ်ဖက်တွင် အပြာရောင် မြွေကြီးမှာ ဒေါသထွက်နေပြီး ကျောက်လင်ရှိရာသို့ ဆက်လက် ပြေးဝင်လာ၏။ ဤရှေးဟောင်းသစ်တောကြီး၏ အရှင်သခင် တစ်ကောင်အနေဖြင့် မည်သူတစ်ဦးတစ်ယောက်ကိုမျှ ၎င်း၏ အာဏာကို စော်ကားခွင့် ပြုမည်မဟုတ်ပေ။

"ဒိုင်း..."

နောက်ထပ် စနိုက်ပါ ကျည်ဆန်တစ်တောင့်ကို ပစ်ခတ်လိုက်ပြန်သည်။

အပြာရောင် မြွေကြီးသည် ယခုအခါ မီတာ ရှစ်ရာခန့်သာ ကွာဝေးတော့ပြီး ကျည်ဆန်များက ချက်ချင်းဆိုသလို ရောက်ရှိလာမည် ဖြစ်၏။

အပြာရောင် မြွေကြီးသည် ငါးမီတာမျှပင် မပြေးရသေးခင် ကျည်ဆန်တစ်တောင့်က ၎င်း၏ ခေါင်းကို ထိမှန်သွားသည်။

အခြားရွေးချယ်စရာ မရှိတော့သဖြင့် အပြာရောင် မြွေကြီးသည် ကျည်ဆန်၏ လမ်းကြောင်းကို အာရုံခံလိုက်ပြီး လျှပ်စစ်အလင်းတန်းတစ်ခုကို ချက်ချင်း ပစ်လွှတ်လိုက်၏။

ဤတစ်ကြိမ်တွင် ကျည်ဆန်သည် အလင်းတန်းကြောင့် အရည်ပျော်သွားဆဲ ဖြစ်သော်လည်း လေထဲတွင် နှစ်မီတာနီးပါး ရှည်လျားသော အပြာရောင် မီးခိုးငွေ့တန်းတစ်ခုကို ချန်ရစ်ခဲ့သည်။

ဤသည်မှာ မြွေကြီး ပစ်လွှတ်လိုက်သော လျှပ်စစ်အလင်းတန်း၏ စွမ်းအားသည် ထပ်မံ အားနည်းသွားကြောင်း ဖော်ပြနေ၏။

ဤအချိန်တွင် အပြာရောင် မြွေကြီးသည် အနီရောင် တောက်လောင်နေသော ဘားရတ် သေနတ်ပြောင်းကို နောက်ဆုံးတွင် မြင်တွေ့သွားပြီး သေနတ်နောက်တွင် လဲလျောင်းနေသော ကျောက်လင်ကိုပါ မြင်တွေ့လိုက်ရသည်။ အထူးသဖြင့် ကျောက်လင်၏ ခေါင်းပေါ်တွင် ရပ်နေသော ကြွက်လေးကို မြင်တွေ့လိုက်ရ၏။

"ရှဲ..."

အပြာရောင် မြွေကြီးသည် ဒေါသတကြီး အသံပြုလိုက်ပြီး ကြွက်လေးက ၎င်းအား ဝိုင်းဝန်းတိုက်ခိုက်ရန် လူသား အပေါင်းအပါများကို ခေါ်ဆောင်လာခဲ့ကြောင်း ယခုအခါ အခိုင်အမာ ယုံကြည်သွားသည်။

ဤရှေးဟောင်းသစ်တောကြီးတွင် ဝိညာဉ်သားရဲတစ်ကောင်တည်းကိုသာ ရှင်သန်ခွင့် ပြုထားပြီး ထိုအကောင်မှာ မိုးကြိုးမြွေပင်ဖြစ်၏။

အတိတ်က ကြွက်လေးတစ်ကောင်သည် ခွင့်ပြုချက်မရှိဘဲ ရှေးဟောင်းသစ်တောကြီးထဲသို့ ဝင်ရောက်လာခဲ့ရာ မိုးကြိုးမြွေက မောင်းထုတ်ခဲ့သည်။ တစ်ကြိမ်တွင် ကြွက်လေးသည် လျှပ်စစ်မီးကြောင့် လောင်ကျွမ်းလုနီးပါး ဖြစ်ခဲ့ရ၏။

ထိုအချိန်မှစ၍ ကြွက်လေးသည် မိုးကြိုးမြွေ၏ တိုက်ခိုက်မှုကို ကြောက်ရွံ့သဖြင့် ရှေးဟောင်းသစ်တောကြီး၏ အတွင်းပိုင်းသို့ မချဉ်းကပ်ဝံ့တော့ချေ။

ယခုမူ မိုးကြိုးမြွေ၏ စွမ်းအင်များမှာ လုံးဝနီးပါး ကုန်ခန်းနေပြီ ဖြစ်သည်။ ကြွက်လေး၏ ကျေနပ်နေသော အမူအရာကို မြင်လိုက်ရသောအခါ ၎င်းက သည်းမခံနိုင်တော့ချေ။ စွမ်းအင်များများစားစား မကျန်တော့သော်လည်း မိုးကြိုးမြွေသည် ဤမျှ နီးကပ်သော အကွာအဝေးတွင် ပြေးဝင်ကာ ကြွက်လေးကို အရှင်လတ်လတ် မျိုချနိုင်သေးသည်ဟု ယုံကြည်ထား၏။

"ရှဲ..."

မိုးကြိုးမြွေက ဒေါသတကြီး ထပ်မံ အသံပြုလိုက်ပြီး ကျောက်လင်ရှိရာသို့ ဆက်လက် ပြေးဝင်လာသည်။

"ဒိုင်း..."

နောက်ထပ် စနိုက်ပါ ကျည်ဆန်တစ်တောင့် ထွက်ပေါ်သွားပြန်၏။

"ဗုန်း..."

နောက်ဆုံးတွင် သေနတ်ပြောင်းသည် ကျည်ဆန်၏ မြင့်မားသော အပူချိန်နှင့် ဖိအားကို မခံနိုင်တော့ဘဲ ပေါက်ကွဲသွားသည်။

ကျည်ဆန် ထွက်ပေါ်လာသည်နှင့် မိုးကြိုးမြွေသည် လျှပ်စစ်အလင်းတန်းတစ်ခုကို ပစ်လွှတ်ကာ ၎င်းကို လုံးဝ အရည်ပျော်စေခဲ့၏။

ဤအချိန်တွင် မိုးကြိုးမြွေသည် စနိုက်ပါ ရိုင်ဖယ် ပေါက်ကွဲသွားသည်ကို မြင်တွေ့လိုက်ရသည်။ ကျောက်လင်၏ ကျည်ဆန်တိုက်ခိုက်မှုများ ရပ်တန့်သွားမည် ဖြစ်ကြောင်းကို နားလည်သွားပြီး ယခုအခါ ၎င်းသည် ကြွက်လေးကို မမျိုချမီ ကျောက်လင်အား လွတ်လပ်စွာ နှိပ်စက်နိုင်ပြီ ဖြစ်၏။