အခန်း ၆၀

အခန်း (၆၀) - ကွန်ဖြူးရှပ်၊ သိုင်း၊ တာအိုနှင့် နတ်ဘုရား။ လမ်းစဉ်လေးသွယ်ကို တစ်ပြိုင်နက်တည်း ကျင့်ကြံခြင်း

ကျိုးရီ ဤကဲ့သို့သော ကိစ္စများကို ဂရုမစိုက်ပေ။ တည်ငြိမ်အေးဆေးသော မျက်နှာအမူအရာဖြင့် ပခုံးတွန့်ပြလိုက်သည်။

“မင်း အဆင့်တက်သွားပြီလား ကောင်လေး”

စစ်သူကြီးကျောက် အံ့အားသင့်သွားသည်။ သူ ကျိုးရီကို သေချာစိုက်ကြည့်လိုက်ရာ တကယ်ပင် အဆင့်ကျော်ဖြတ်သွားပြီဖြစ်ကြောင်း တွေ့လိုက်ရသည်။

“တော်လိုက်တဲ့ ကောင်လေး၊ မင်း မွေးရာပါအဆင့်ကို ရောက်ဖို့ အနည်းဆုံး ဆယ်နှစ်၊ အနှစ်နှစ်ဆယ်လောက် ကြာလိမ့်မယ်လို့ ငါ ထင်ထားခဲ့တာ၊ အချိန်တိုအတွင်းမှာ မွေးရာပါအဆင့်ကို ဝင်ရောက်သွားလိမ့်မယ်လို့ ငါ မထင်ထားခဲ့ဘူး"

“မင်း တကယ်ကို ပါရမီနည်းနည်း ပါတာပဲ။ ငါ့မှာ မြေးမလေး တစ်ယောက်ရှိတယ်...”

“ရပ်... ရပ်လိုက်ပါတော့, စီနီယာ့ရဲ့ မြေးမလေးက တကယ်ကို ဟဲဗီးဝိတ် ချန်ပီယံကြီးပါ၊ ဒီလိုလူမျိုးကို ကျွန်တော် မကိုင်တွယ်နိုင်ဘူး”

ထိုအချိန်မှာပင် ကွပ်မျက်သူများက ထိုနေ့အတွက် နတ်ဆိုးရုပ်အလောင်းများကို လာရောက်ပို့ဆောင်ပေးလာသည်။ ကျိုးရီ အလျင်အမြန် ဆင်ခြေရှာကာ ထွက်ပြေးသွားတော့သည်။

“ဟေ့... ခွေးကောင်လေး၊ ငါတို့ မိသားစုထဲက လူတိုင်း ရုပ်ဆိုးနေတာ မဟုတ်ဘူးကွ”

စစ်သူကြီးကျောက်က အနောက်မှလှမ်း၍ လှမ်းအော်နေသော်လည်း ကျိုးရီမှာ အလုပ်လုပ်သည့် ခြံဝင်းအတွင်းသို့ ရောက်ရှိနေပြီဖြစ်သည်။

သူတို့ ရုပ်ဆိုးသည်ဖြစ်စေ၊ မဆိုးသည်ဖြစ်စေ သူ့အတွက် အရေးမကြီးပေ။ သူ ယခုအချိန်တွင် အမျိုးသမီးတစ်ဦးကို အမှန်တကယ် မရှာဖွေလိုသေးချေ။

ယခုအခါ သူသည် မြေကမ္ဘာအင်မော်တယ်အဆင့် အထွတ်အထိပ်သို့ ရောက်ရှိနေပြီ ဆိုသော်ငြား လောကကြီးတွင် အစွမ်းအထက်ဆုံး ပြိုင်ဘက်ကင်းကျင့်ကြံသူတစ်ဦး မဟုတ်သေးပေ။

အကယ်၍ ယခုအချိန်တွင် အမျိုးသမီးတစ်ဦးကို ရှာဖွေလိုက်ပါက သူမက တစ်နေ့နေ့တွင် သူ့ကို နောက်ကျော ဓားထိုးမည်၊ မထိုးမည်ကို မည်သူက သိနိုင်မည်နည်း။

သူသည် အခက်အခဲများကြားမှ ဤအဆင့်သို့ ရောက်ရှိလာခဲ့ခြင်းဖြစ်သည်။ အမျိုးသမီးတစ်ဦးကြောင့် သေဆုံးသွားရမည်ဆိုပါက ဟာသကြီးတစ်ခု ဖြစ်သွားပေမည်။

ယနေ့ ရရှိလာသည်မှာ မြေခွေးနတ်ဆိုးအချို့ဖြစ်သည်။ ကျိုးရီ ရုပ်အလောင်းများကို ထိတွေ့လိုက်သည်နှင့် မှတ်ဉာဏ်များက သူ့ဦးနှောက်ထဲသို့ လျင်မြန်စွာ စီးဆင်းဝင်ရောက်လာတော့သည်။

[စာပေပညာရှင်ရဲ့ အကူအညီသာ မပါခဲ့ရင် ငါ ဒီနေ့ သေချာပေါက်သေရမှာပဲ။ မြေခွေးမျိုးနွယ်စုရဲ့ ဘိုးဘွားစဉ်ဆက် အဆုံးအမက ကျေးဇူးကို ကျေးဇူးနဲ့တုံ့ပြန်ပြီး ရန်ငြိုးကို ရန်ငြိုးနဲ့တုံ့ပြန်ရမယ်တဲ့]

[ငါ ဘာလုပ်ရမလဲ။ သူ ငါ့ကို ချစ်ခွင့်ပန်လာပြီ၊ ငါ လက်ခံလိုက်ရမလား]

[အဖွားကပြောတယ်၊ လူသားတွေနဲ့ နတ်ဆိုးတွေက အချစ်ရေးမှာ ပတ်သက်လို့ မရဘူးတဲ့၊ ဒါပေမဲ့... ဒါပေမဲ့ သူက ငါ့ကို အရမ်းသဘောကျတယ်လို့ ပြောနေတာပဲဟာ]

[ရွှေတုံးတစ်ထောင် ရှာရတာ လွယ်ကူပေမယ့် မေတ္တာစစ်မှန်တဲ့ ယောကျ်ားတစ်ယောက်ကို ရှာရတာ ခက်ခဲတယ်]

[ကျိုးလန်... ရှင်က ကျွန်မကို တစ်သက်လုံးချစ်မယ်လို့ ပြောခဲ့တယ်လေ၊ ဘာလို့ ကျွန်မကို အစိုးရရုံးမှာ သွားတိုင်ရတာလဲ၊ ရှင်က ကျွန်မရဲ့ မျိုးနွယ်စုတစ်ခုလုံးကို ဖျက်ဆီးပစ်လိုက်တာပဲ၊ ဘာဖြစ်လို့လဲ]

‘အင်း... နောက်ထပ် လူနဲ့နတ်ဆိုးကြားက ပြင်းရှရှချစ်ဇာတ်လမ်းတစ်ပုဒ်ပါလား'

ဤလူသားများနှင့် နတ်ဆိုးများမှာ အဘယ်ကြောင့် ဤမျှလောက် မိုက်မဲကြသနည်းဆိုသည်ကို ကျိုးရီ တစ်ခါတစ်ရံ နားမလည်နိုင်အောင် ဖြစ်ရသည်။

‘နတ်ဆိုးမျိုးနွယ်စုထဲမှာ လက်ထပ်ဖို့ သင့်တော်တဲ့သူ မရှိတော့လို့များလား'

‘လူသားမျိုးနွယ်ထဲမှာ ချစ်ကြိုးသွယ်ဖို့ရာ လူမရှိတော့လို့များလား'

‘သူတို့က ဒီလို အရှုပ်အထုတ်တွေကို တကူးတက ဖန်တီးနေကြတာပဲ'

ရမ္မက်နှင့် စတင်ခဲ့ပြီး သူတို့ကိုယ်သူတို့ ကောင်းကင်နှင့်မြေကြီးကိုပင် တုန်လှုပ်သွားစေနိုင်ပြီဟု ထင်မှတ်နေကြသော်လည်း အမှန်တကယ်တွင်မူ သူတို့ကိုယ်သူတို့သာ လှုပ်ရှားနေကြခြင်းဖြစ်သည်။

နောက်ဆုံးတွင် အပြစ်ကင်းမဲ့သော မိတ်ဆွေများနှင့် ဆွေမျိုးသားချင်းများကိုပါ ဆွဲချမိကာ အဖြစ်ဆိုးဖြင့် အဆုံးသတ်သွားကြသည်။

ဤကဲ့သို့သော ဦးနှောက်မရှိသည့် ကိစ္စရပ်များကို မြင်တွေ့ရသောအခါ တစ်စုံတစ်ယောက်ကို ခုတ်ပိုင်းပစ်ချင်စိတ်များပင် ပေါ်လာတော့သည်။

ဤအရူးမြေခွေးမလေးထံမှ အာရုံလှည့်စားခြင်းကျင့်စဉ် တစ်ခုသာ ရရှိခဲ့သည်။ သူ၏ အာရုံလှည့်စားခြင်းကျင့်စဉ်များက သူမထက် အဆပေါင်းများစွာ ပိုမိုအဆင့်မြင့်နေသောကြောင့် သွေးအနှစ်သာရအချို့ကိုသာ စုပ်ယူလိုက်တော့သည်။

သူ စတင်လုပ်ဆောင်နေပြီး မကြာမီမှာပင် အမှုထမ်းရေးရာ ဝန်ကြီးဌာနမှလူများ ရောက်ရှိလာကြသည်။

သူတို့ကို ဦးဆောင်လာသူမှာ အကျဉ်းထောင်မှူးဝမ်ဆန်း ဖြစ်သည်။

နှစ်ပေါင်းများစွာ အလုပ်ခွင်တွင် အချောင်ခိုခဲ့သော ဝါရင့်ဝန်ထမ်းတစ်ဦးဖြစ်သည့် သူသည် စံပြအဖြစ် အပြစ်ပေးခံရကာ ရာထူးမှ ထုတ်ပယ်ခံလိုက်ရသည်။

အခြားသော ကောင်းကင်အကျဉ်းထောင် အကျဉ်းထောင်မှူး၊ အကျဉ်းထောင်စောင့်များ၊ ကုန်ကြမ်းပစ္စည်းဌာနမှ အရာရှိများနှင့် အစောင့်အချို့၊ ထို့အပြင် ကွပ်မျက်ရေးဌာနမှ လူများပါမကျန် အားလုံး ရှင်းလင်းထုတ်ပယ်ခံလိုက်ရသည်။

ကျင့်ကြံမှု မလုံလောက်သူ သို့မဟုတ် အချောင်ခိုနေသူတိုင်း ရာထူးမှ ဖယ်ရှားခံခဲ့ရသည်။

ကျိုးရီသည် မွေးရာပါအဆင့်ကျင့်ကြံမှုကို ထုတ်ဖော်ပြသနိုင်ခဲ့သောကြောင့် ကုန်ကြမ်းပစ္စည်းဌာနကို ဆက်လက်စီမံခန့်ခွဲရန် အခွင့်အရေးရခဲ့သည်။

ဝမ်ဆန်းနှင့် အကျဉ်းထောင်စောင့်အချို့ ထွက်ခွာရန် ပစ္စည်းများ သိမ်းဆည်းနေချိန်တွင် ကျိုးရီ သူတို့ကို သွားရောက် နှုတ်ဆက်ခဲ့သည်။ မည်သို့ပင်ဆိုစေ သူတို့ကြားတွင် ဆယ်စုနှစ်များစွာ ကြာမြင့်ခဲ့သော ခင်မင်ရင်းနှီးမှုများ ရှိခဲ့သည် မဟုတ်လော။

ကျိုးရီ ကုန်ကြမ်းပစ္စည်းဌာန၏ အရာရှိဝတ်စုံ ဝတ်ဆင်ထားဆဲဖြစ်သည်ကို မြင်သောအခါ လူတိုင်း၏ ရင်ထဲတွင် ခံစားချက်မျိုးစုံ ဖြစ်ပေါ်သွားကြသည်။

“ငါတို့လို အသုံးမကျတဲ့ ကောင်တွေတော့ ဇာတ်သိမ်းသွားပြီ၊ ကောင်လေးကျိုး... မင်းက တကယ်ကို အရည်အချင်းရှိတဲ့သူပဲ၊ မွေးရာပါအဆင့်ကိုတောင် ရောက်သွားပြီကိုး”

“ငါတို့သာ အဲဒီတုန်းက သေသေချာချာ ကျင့်ကြံဖို့နဲ့ ပြည့်တန်ဆာရုံတွေကို လျှော့သွားဖို့ မင်းရဲ့ အသိဉာဏ် တစ်ဝက်လောက် ရှိခဲ့မယ်ဆိုရင် အခုလို မောင်းထုတ်ခံရမှာမဟုတ်ဘူး”

“ညီအစ်ကိုတို့... အရမ်းကြီးလည်း စိတ်မပျက်ပါနဲ့၊ လူ့ဘဝဆိုတာ နောက်ဆုံးကျရင် ဝါဝါဝင်းနေတဲ့ မြေကြီးတစ်ဆုပ် ဖြစ်သွားတာပဲ၊ ကျွန်တော်က ကံကောင်းလို့ မွေးရာပါအဆင့်ကို ရောက်သွားတာပါ”

“ဒါက ကျွန်တော့်ဘဝရဲ့ ကန့်သတ်ချက်လည်း ဖြစ်နိုင်တယ်၊ နောင်တစ်ချိန် ခင်ဗျားတို့ တစ်ခုခုလိုအပ်ရင် ကျွန်တော့်ဆီကို လာခဲ့ပါ၊ ငါ ကူညီနိုင်ရင် သေချာပေါက် ကူညီပေးပါ့မယ်”

လူတစ်ယောက် ထွက်ခွာသွားလျှင်ပင် သံယောဇဉ်ကတော့ ကျန်ရစ်နေဆဲဖြစ်သည်။

သူတို့သည် သာမန်အချိန်များတွင် တစ်ဦးနှင့်တစ်ဦး ကူညီရိုင်းပင်းခဲ့ကြပြီး ယခု ထွက်ခွာသွားကြရသော်လည်း ဤနှစ်များအတွင်း အကျိုးအမြတ်များစွာ စုဆောင်းနိုင်ခဲ့ကြသည်။

အတိုချုပ်ပြောရလျှင် လူဆိုးတစ်ယောက် လုက်နေမည့်အစား အခြားသူများအပေါ် ကြင်နာတတ်ခြင်းက ပို၍ ကောင်းမွန်ပေသည်။

အကယ်၍ ‘မြစ်အရှေ့ဘက်မှာ အနှစ်သုံးဆယ်၊ မြစ်အနောက်ဘက်မှာ အနှစ်သုံးဆယ်’ ဆိုသော အခြေအနေမျိုးနှင့် ကြုံတွေ့ရပါက သေးငယ်သော လုပ်ရပ်လေးတစ်ခုက ကြီးမားသော တုံ့ပြန်မှုတစ်ခုကို ရရှိနိုင်ပေသည်။

သူတို့၏ မျိုးဆက်များက နောက်ပိုင်း‌တွင် ပြန်ခေါင်းထောင်လာလျှင် လာနိုင်ပေလိမ့်မည်။

၎င်းသည် အနာဂတ် စတော့ရှယ်ယာတစ်ခုကို ရွေးချယ်လိုက်သကဲ့သို့ပင်။

“ကျိုးရီက တကယ်ကို သစ္စာရှိတာပဲ၊ နောင်ဆိုရင် ရှင်းဟွာစားသောက်ဆိုင်မှာ ခဏခဏ သွားသောက်ကြတာပေါ့”

“ဒါပေါ့”

သူတို့ကို နှုတ်ဆက်ပြီးနောက် အကျဉ်းထောင်မှူးအသစ် ရောက်ရှိလာခဲ့သည်။

အသက်လေးဆယ်ခန့်ရှိပြီး အပြာရင့်ရောင်ဝတ်ရုံကို ၀တ်ဆင်ထားကာ အရပ်မြင့်မြင့် ပိန်ပိန်ပါးပါး ဖြစ်လေသည်။

စစ်သူကြီးကျောက်၏ စုတ်ပြတ်သတ်နေသော အသွင်အပြင်နှင့် မတူဘဲ သူ၏ ဟန်ပန်မှာ အနည်းငယ် အေးစက်ပြီး လူအများနှင့် ကင်းကွာနေပုံရသည်။

“သိုင်းသခင်အဆင့် အထွတ်အထိပ် ကျင့်ကြံသူတစ်ယောက် ဖြစ်နေတာပဲ”

ကျိုးရီ မျက်လုံးများကို အနည်းငယ် ကျဉ်းမြောင်းလိုက်၏။

တစ်ဖက်လူက သူ့ကို အကဲခတ်ရုံမျှသာ ကြည့်ပြီးနောက် တည့်တည့် လျှောက်သွားလေသည်။

မည်သို့ပင်ဆိုစေ အခြားသူများ၏ အမြင်တွင် ကျိုးရီသည် မွေးရာပါအဆင့် သာမန်ကျင့်ကြံသူတစ်ဦးမျှသာ။

သိုင်းသခင်တစ်ဦးအတွက် မွေးရာပါအဆင့် ဆိုသည်မှာ ပုရွက်ဆိတ်တစ်ကောင်မျှသာ ဖြစ်သည်။

ပြန်ရောက်ပြီးနောက် စစ်သူကြီးကျောက်ကို မေးမြန်းကြည့်ရာ ဤသူမှာ လီထျန်းဂိုဏ်း၏ အကြီးအကဲ တစ်ဦးဖြစ်ပြီး ချန်မုရှင်းဟု ခေါ်ကြောင်း သိလိုက်ရသည်။

သူ၏ အမည်မှာ အတော်လေး ကြီးကျယ်လွန်းလှပြီး သူကိုယ်တိုင်မှာလည်း အလွန် မောက်မာလွန်းလှသည်။ တစ်စုံတစ်ယောက်က သူ့ကို ချန်ပေ့ရွှမ်၏ ဆွေမျိုးတစ်ဦးဟုပင် ထင်မှတ်သွားနိုင်သည်။

ဤကဲ့သို့ ဟန်ရေးပြလွန်းသူများကို ကျိုးရီ မည်သည့်အခါမျှ သဘောမကျခဲ့ပေ။ အဘယ်ကြောင့်ဆိုသော် သူတို့၏ စွမ်းရည်များမှာ အတော်လေး ညံ့ဖျင်းသောကြောင့်ပင်။

ကျင်းဧကရာဇ်သည် အစိုးရအဖွဲ့ကို ရှင်းလင်းပြီးနောက် အရာအားလုံး ပြီးဆုံးသွားလိမ့်မည်ဟု သူ မူလက ထင်မှတ်ထားခဲ့သည်။

သို့သော် ကျိုးရီကို အံ့အားသင့်သွားစေသည်မှာ တစ်လမပြည့်မီမှာပင် ကျင်းဧကရာဇ်က ကြီးမားသော အမိန့်တစ်ရပ်ကို ထုတ်ပြန်ခဲ့ခြင်းပင်။

ယခုမှစ၍ တာ့ချန်သည် သိုင်းပညာကိုသာမက ကွန်ဖြူးရှပ်၊ တာအိုနှင့် နတ်ဘုရား လမ်းစဉ်သုံးသွယ်ကိုပါ ကျင့်ကြံနိုင်ပြီဖြစ်သည်။

ကွန်ဖြူးရှပ်လမ်းစဉ် ဆိုသည်မှာ လေ့လာသင်ယူခြင်းဖြင့် ကိုယ့်ဘဝကို တည်ဆောက်ပြီး လောကီရေးရာများကို ကျော်လွန်ကာ သူတော်စင်အဆင့်သို့ ရောက်ရှိနိုင်ရန် သန့်စင်သော ချီစွမ်းအင်ကို ပျိုးထောင်ခြင်းအပေါ် အခြေခံထားသည်။

တာအိုနည်းလမ်းများမှာမူ ပြောစရာပင် မလိုတော့ပေ။ တာအို လျှို့ဝှက်ဂိုဏ်းများ တည်ထောင်ခြင်းဖြစ်သည်။

နတ်ဘုရားလမ်းစဉ်မှာ အခြားသော မဟာတာအိုတစ်ခုဖြစ်ပြီး တာအို လျှို့ဝှက်ဂိုဏ်းများနှင့် အနည်းငယ် ဆင်တူသော်လည်း ရုပ်ထုများမှ ယုံကြည်မှုစွမ်းအား အပေါ်တွင် အဓိက အခြေခံထားသည်။

နန်းတွင်းသည် သေဆုံးသွားသော လူသားမျိုးနွယ်၏ သူရဲကောင်းဝိညာဉ်များ၊ တောင်တန်းများ၊ မြစ်များ၊ ပင်လယ်များမှ နတ်ဆိုးများနှင့် တစ္ဆေသရဲအချို့ကိုပင် စုဆောင်းကာ သူတို့အတွက် ရွှေရောင်ရုပ်တုများ ဖန်တီးပေးပြီး ပူဇော်ပသရန် နေရာများ တည်ဆောက်ပေးမည်ဖြစ်သည်။

သူတို့သည် ကျင့်ကြံရန်အတွက် ရုပ်ထုများမှ ယုံကြည်မှု စွမ်းအားကို အသုံးချနိုင်ပြီး အပြန်အလှန်အနေဖြင့် ဒေသကို ကာကွယ်ပေးရမည်ဖြစ်သည်။

နတ်ဆိုးများသည် ကောင်းကောင်းကျင့်ကြံပြီး လူသားမျိုးနွယ်ကို မနှောင့်ယှက်သရွေ့ တောရိုင်းဒေသများတွင် လွတ်လွတ်လပ်လပ် ကျင့်ကြံနိုင်ကြောင်းကိုပါ ဥပဒေအသစ်များတွင်လည်း တိကျစွာ ပြဋ္ဌာန်းထားသည်။

ဤမူဝါဒများကို ထုတ်ပြန်လိုက်သည်နှင့်တစ်ပြိုင်နက် တာ့ချန်၏ ဖိအားများ ချက်ချင်း လျော့ကျသွားပြီး တာ့ချန်၏ ကျင့်ကြံခြင်းလမ်းစဉ်ပါ သိသိသာသာ မြင့်တက်လာသည်။

ယခင်က သိုင်းပညာလမ်းစဉ် တစ်ခုတည်းသာ ရှိခဲ့သည်။ ကွန်ဖြူးရှပ်နှင့် တာအိုတို့ ရှိခဲ့သော်လည်း သနားစရာကောင်းလောက်အောင် နည်းပါးလှပြီး နတ်ဘုရားလမ်းစဉ် ဆိုသည်မှာ လုံးဝ မရှိခဲ့ပေ။

ယခု ကျင့်ကြံခြင်းလမ်းစဉ်များနှင့် နည်းလမ်းများစွာကို ရုတ်တရက် ပေါင်းထည့်လိုက်ပြီး များပြားလှသော နတ်ဆိုးများနှင့် တစ္ဆေသရဲများကိုပါ စုဆောင်းလိုက်ခြင်းကြောင့် တာ့ချန်၏ စစ်ရေးအင်အားမှာ သိသိသာသာ တိုးတက်လာတော့သည်။

အနာဂတ်တွင် သာမန်ပြည်သူများအနေဖြင့် နေ့စဉ် ကြောက်ရွံ့ထိတ်လန့်စွာ နေထိုင်ရတော့မည်မဟုတ်ပေ။

တစ်ချိန်တည်းမှာပင် လက်ရှိ ကျန်းဝူတပ်ဖွဲ့နှင့် နတ်ဆိုးနှိမ်နင်းရေးတပ်ဖွဲ့တို့ကို အခြေခံကာ နတ်ဆိုးနှိမ်နင်းရေးဌာနအသစ်တစ်ခုကို တည်ထောင်ခဲ့သည်။

ဤသုံးခုကို ပေါင်းစပ်ကာ လောကကြီးကို ကြီးကြပ်ကွပ်ကဲရန် ဧကရာဇ်အာဏာအောက်တွင် တိုက်ရိုက်ထားရှိခဲ့သည်။

ကျိုးရီ ဤမူဝါဒများကို မြင်တွေ့ရသောအခါ အတော်လေး အထင်ကြီးသွားမိသည်။

ဤကျင်းဧကရာဇ်သည် အမှန်တကယ်ပင် ဧကရာဇ်ရာထူးနှင့် ထိုက်တန်သူတစ်ဦးဖြစ်သည်။ လုပ်ဆောင်ချက်တိုင်းက မှန်ကန်နေပြီး တာ့ချန်၏ လက်ရှိ လိုအပ်ချက်များကို တည့်မတ်စွာ ပြင်ဆင်နိုင်ခဲ့သည်။

သေချာ ကိုင်တွယ်ဖြေရှင်းနိုင်ပါက နှစ်အနည်းငယ်အတွင်း တာ့ချန်ဧကရာဇ်မျိုးနွယ်စုသည် သူတို့၏ အုပ်ချုပ်မှုကို ပြန်လည်ရယူနိုင်မည်ဖြစ်ပြီး နိုင်ငံတော်၏ အင်အားမှာလည်း ဆယ်ဆ၊ သို့မဟုတ် အဆတစ်ရာအထိ တိုးတက်လာကာ မဟာကမ္ဘာရှိ ဂိုဏ်းကြီးများနှင့်ပင် ယှဉ်ပြိုင်နိုင်စွမ်း ရှိလာပေလိမ့်မည်။

သို့သော် နန်းတွင်းမှ ထုတ်ပြန်လိုက်သော ကွန်ဖြူးရှပ်၊ နတ်ဘုရားနှင့် တာအိုကျင့်ကြံရေး နည်းလမ်းအချို့ကို မြင်တွေ့လိုက်ရသောအခါ သူ့မျက်နှာအမူအရာ ချက်ချင်းပြောင်းလဲသွားပြီး ရင်ထဲတွင် လေးလံသွားတော့သည်။

“ဒီကျင့်ကြံရေးလမ်းစဉ်သုံးခုရဲ့ နည်းလမ်းတွေက တကယ်တော့ မင်ဟွမ်ကျမ်းစာကနေ မှီငြမ်းပြီး ဆင်းသက်လာတာတွေပဲ”