အခန်း (၂၀၃-၂၀၄)

အခန်း(၂၀၃)

မိုက်ကယ်က မျိုးနွယ်စုခေါင်းဆောင် နှစ်ယောက်ကို သူတို့ရဲ့ မျိုးနွယ်စုဝင်တွေဟာ တစ်ဖက်နဲ့တစ်ဖက် ပေါင်းစည်းမှုကို စတင်လက်ခံနေကြပြီ ဖြစ်ကြောင်း ပြသလိုက်တယ်။

သူတို့တွေက အဖွဲ့တစ်ခုတည်းအနေနဲ့ ဘေ့စ်ဘောကို အတူတူ ပျော်ပျော်ပါးပါး ဆော့ကစားနေကြပြီး ချောကလက်ကို မက်မောတဲ့ စိတ်တစ်ခုတည်းနဲ့တင် စိတ်ဝမ်းကွဲပြားမှုတွေ ပျောက်ဆုံးသွားကြတာပေါ့။

ဒါတင်မကသေးဘဲ လိပ်ပြာဆူးအော့ခ်တွေနဲ့ ဝံပုလွေအော့ခ်တွေဟာ သူတို့ကြားက ထူးခြားတဲ့ တုံ့ပြန်မှုတွေကတစ်ဆင့် ရီနေးတား ပြည်သူပြည်သားတွေရဲ့ ကျင့်ကြံခြင်းကဏ္ဍနဲ့ ခွန်အားတွေကို ပိုမိုတိုးတက်လာအောင် ဘယ်လိုမျိုး လက်တွဲလုပ်ဆောင်နေကြလဲဆိုတာကိုပါ သူတို့ရှေ့မှာ သက်သေပြခဲ့ပါသေးတယ်။

ဒီမျိုးနွယ်စုနှစ်စု အတူတူလက်တွဲလုပ်ဆောင်ရင် ဘယ်လောက်အထိ စွမ်းဆောင်နိုင်မလဲဆိုတဲ့ ပြကွက်လေးကပဲ ခေါင်းဆောင် နှစ်ယောက်စလုံးကို သူတို့ရဲ့ လမ်းစဉ်တွေ ဘယ်လောက်အထိ မှားယွင်းခဲ့လဲဆိုတာ နောက်ဆုံးမှာ သဘောပေါက်သွားစေဖို့အတွက် လုံလောက်တဲ့ တွန်းအားတစ်ခု ဖြစ်ခဲ့တာပေါ့။

"တို့တွေရဲ့ တုံ့ပြန်မှုတွေ ပျောက်ဆုံးသွားတာဟာ အဖိုးတန်ရတနာ ဆုံးရှုံးသွားလို့ပဲလို့ တို့ တွေးခဲ့သင့်တာ" လို့ ဝံပုလွေအော့ခ် မျိုးနွယ်စုခေါင်းဆောင်က စိုးရိမ်တကြီးနဲ့ သူ့ရဲ့လည်ဆံမွှေးတွေကို ပွတ်သပ်ရင်း ပြောလိုက်တယ်။

"ဒါပေမဲ့ တကယ်တမ်းကျတော့ တို့နှစ်ယောက်ကြားက အပြိုင်အဆိုင်စိတ်တွေကြောင့်ပဲ ဖြစ်နေခဲ့တာကိုး"

"တို့ဘိုးဘွားတွေ ပြောခဲ့တာ တကယ်မှန်တာပဲ။ အော့ခ်တွေက အတူတူ လက်တွဲလုပ်ဆောင်မှသာ ပိုပြီး အင်အားတောင့်တင်းမှာ"

မိုက်ကယ်က မျိုးနွယ်စုခေါင်းဆောင် နှစ်ယောက်ကို ဒီအချက်အပေါ်မှာ တစ်ညလုံး စဉ်းစားတွေးတောခွင့် ပေးလိုက်တယ်။ ခေါင်းဆောင် နှစ်ယောက်စလုံး တောအုပ်ထဲကနေ သူတို့ရဲ့ ရွာဆီကို ပြန်သွားကြတာကို သူ စောင့်ကြည့်နေခဲ့တာပေါ့။

နောက်တစ်နေ့မှာတော့ မျိုးနွယ်စုနှစ်စုလုံးဟာ နီယိုအော်ကပ်စ်ရဲ့ တံခါးဝဆီကို ရောက်ရှိလာခဲ့ကြတယ်။ အဲဒါက မျိုးနွယ်စုခေါင်းဆောင်တွေတင် မဟုတ်ဘဲ တစ်ရွာလုံး၊ တစ်မျိုးနွယ်စုလုံး ရောက်လာကြတာပါ။

"ဝံပုလွေအော့ခ် မျိုးနွယ်စုတစ်ခုလုံးက မင်းရဲ့ အမိန့်ပေးမှုအောက်မှာ အလုပ်အကျွေးပြုဖို့ အသင့်ပါပဲ"

"ကျွန်တော့်ရဲ့ လိပ်ပြာဆူးအော့ခ် မျိုးနွယ်စုလည်း အတူတူပါပဲ"

ကျန်တဲ့ အော့ခ်တွေကလည်း သူတို့ရဲ့ ဒူးတွေကို ရိုက်ခတ်ပြီး ဆူးတွေကို စည်းချက်ညီညီ တီးခတ်ရင်း ခေါင်းဆောင် နှစ်ယောက်ရဲ့ နောက်ကနေ သွေးစည်းကြောင်း ပြသလိုက်ကြတယ်။

"မင်းရဲ့ အလံတော်အောက်မှာ တို့တွေ တစ်စုတစ်စည်းတည်း အလုပ်အကျွေးပြုမယ့် အစီအစဉ်တွေကို တို့ရဲ့ လူတွေအကုန်လုံးကို ပြောပြပြီးပါပြီ။ တို့ရဲ့ ဆုံးဖြတ်ချက်မှာ ပါဝင်ဖို့အတွက် ကျန်တဲ့ မျိုးနွယ်စုဝင်တွေကို အတင်းအကျပ် ဆွဲဆောင်နေစရာတောင် မလိုခဲ့ပါဘူး" လို့ ဝံပုလွေအော့ခ် မျိုးနွယ်စုခေါင်းဆောင်က ဆိုတယ်။

"တို့မျိုးနွယ်စုတွေကြားက အပြိုင်အဆိုင်ဖြစ်ခဲ့ရတဲ့ သမိုင်းကြောင်းတွေကို တို့ သူတို့ကို သေသေချာချာ ရှင်းပြခဲ့သလို... အဲဒါတွေက မာနနဲ့ အတ္တတွေကလွဲလို့ ဘာမှမဟုတ်ဘူးဆိုတာကိုလည်း ဝန်ခံခဲ့ကြပါတယ်။

တို့မျိုးနွယ်စုကို လမ်းမှားပေါ်ကို အချိန်အတော်ကြာအောင် ဦးဆောင်ခဲ့မိတယ်ဆိုတာကိုလည်း တို့ ဖွင့်ဟခဲ့တာကိုး။ ဒါကြောင့် အဲဒီအမှားကို ပြန်ပြင်ဖို့က တို့ရဲ့ တာဝန်ပဲ ဖြစ်ပါတယ်။

တို့အနေနဲ့ ဝံပုလွေအော့ခ် မျိုးနွယ်စုရဲ့ ခေါင်းဆောင်နေရာကနေ နှုတ်ထွက်ပြီး အဲဒီတာဝန်တွေကို မြေဒြပ်စင်နတ်ဘုရားမရဲ့ ရွေးချယ်ခြင်းခံရသူဖြစ်တဲ့ လူသား... မင်းဆီကိုပဲ အပ်နှင်းလိုက်ပါတယ်"

လိပ်ပြာဆူးအော့ခ် မျိုးနွယ်စုခေါင်းဆောင်ကလည်း ဝံပုလွေအော့ခ် ခေါင်းဆောင်ရဲ့ နောက်မှာ ချက်ချင်းပဲ အရှေ့ကို တက်လာပြီး မိုက်ကယ်ရဲ့ အရှေ့မှာ ဒူးထောက်လိုက်တယ်။

"ကျွန်တော်လည်း မင်းရဲ့ လမ်းညွှန်မှုအောက်မှာ အရာရာကို လွှဲအပ်ပါတယ်"

ကျန်တဲ့ အော့ခ်တွေကလည်း မျှော်လင့်ချက်တွေ ပြည့်နှက်နေတဲ့ မျက်ဝန်းတွေနဲ့ မိုက်ကယ်ကို မော့ကြည့်လိုက်ကြတာပေါ့။ သူတို့ရဲ့ မျက်လုံးတွေထဲမှာ ဒရာဂွန်ဘွန်းတွေနဲ့အတူ နီယိုအော်ကပ်စ်ရဲ့ ပြည်သူပြည်သားတွေ သူ့နောက်မှာ မတ်တတ်ရပ်နေတဲ့ ပုံရိပ်တွေက ထင်ဟပ်လို့ နေခဲ့တယ်။ သူတို့တွေဟာလည်း မိုက်ကယ်ရဲ့ လူမှုအသိုင်းအဝိုင်းထဲမှာ ပါဝင်ခွင့်ရဖို့အတွက် အလွန်အမင်း တောင့်တနေခဲ့ကြတာကိုး။

"ကဲ... ဒါဆိုရင် တို့တွေ ဒီဖြစ်ရပ်ကို ဂုဏ်ပြုတဲ့အနေနဲ့ ပွဲတော်ကို စတင်ကျင်းပလိုက်ကြရင် အကောင်းဆုံး ဖြစ်လိမ့်မယ် မဟုတ်လား"

ရှီနာက လက်ခုပ်စတင်တီးလိုက်ပြီးတာနဲ့ ကျန်တဲ့ ဒရာဂွန်ဘွန်းတွေနဲ့ နီယိုအော်ကပ်စ်ရဲ့ ပြည်သူတွေကလည်း လိုက်ပြီး လက်ခုပ်တီးကြတော့တယ်။ ဒါက တကယ့်ကို အောင်ပွဲခံ အခမ်းအနားတစ်ခုပါပဲ။

ဒီနေ့ဟာ အော့ခ်တွေအနေနဲ့ ရီနေးတား နိုင်ငံတော်ရဲ့ ပြည်သူပြည်သားတွေအဖြစ် တရားဝင် ဖြစ်လာခဲ့တဲ့ နေ့ရက်တစ်ရက် ဖြစ်ခဲ့တာပေါ့။

အော့ခ်တွေကို ပေါင်းစည်းရတဲ့ ကိစ္စက မိုက်ကယ် ထင်ထားတာထက် အများကြီး ပိုပြီး လွယ်ကူခဲ့တယ်။ နှစ်ပေါင်းများစွာ ရန်သူတွေ ဖြစ်ခဲ့ကြပြီးမှ အခုလိုမျိုး ချက်ချင်း လက်တွဲလုပ်ဆောင်ဖို့ ဆွဲဆောင်ရတာ တကယ်ကို ခက်ခဲလိမ့်မယ်လို့ သူ တွေးခဲ့တာဖြစ်ပေမဲ့ ဝံပုလွေအော့ခ်တွေနဲ့ လိပ်ပြာဆူးအော့ခ်တွေ အတူတူ ဘေ့စ်ဘော ကစားနေကြတာ၊ လူပုဘီယာကို အတူတူ သောက်နေကြတာတွေကို ကိုယ်တိုင် မြင်တွေ့လိုက်ရတာနဲ့တင် သူတို့ရဲ့ အရင်က အတွေးအမြင်တွေအကုန်လုံး လွင့်ပါးသွားဖို့အတွက် လုံလောက်ခဲ့ပါတယ်။

ဒါပေါ့... သူတို့တွေက ပြည်သူတွေ ဖြစ်လာကြပြီဆိုတော့ မိုက်ကယ်အနေနဲ့ ပထမဆုံးနဲ့ အရေးကြီးဆုံးအနေနဲ့ သူတို့ရဲ့ ပါရမီတွေကို အရင်ဆုံး နှိုးဆွပေးရမှာကိုး။

သူက အစကတော့ အရင် ဝံပုလွေအော့ခ် မျိုးနွယ်စုခေါင်းဆောင်ကနေ စတင်ခဲ့တယ်။

[ဆင့်ကဲပြောင်းလဲနိုင်သော လမ်းစဉ်များ]

- - - အမှောင်ရိပ်အော့ခ်

- - - ဒီအော့ခ်မျိုးနွယ်စုကတော့ အရိပ်တွေကို သူတို့ရဲ့ အဓိက တိုက်ခိုက်ရေးပုံစံအဖြစ် အသုံးပြုကြပါတယ်။ သူတို့တွေက ရန်သူတွေ မမြင်နိုင်၊ မခံစားနိုင်တဲ့ နေရာကနေ ဝင်ရောက်တိုက်ခိုက်တတ်ကြတာ ဖြစ်လို့ အဲဒီတိုက်ခိုက်မှုကို ခံရတဲ့သူတွေအနေနဲ့ ကံမကောင်း အကြောင်းမလှရင် ခန္ဓာကိုယ်ပါ လှုပ်ရှားလို့မရတော့တဲ့အထိ ပြင်းထန်လှတဲ့ ဒဏ်ရာတွေကို ရရှိစေမှာ ဖြစ်ပါတယ်။

- - - ဒီအော့ခ်မျိုးနွယ်စုခွဲကတော့ အသုံးပြုသူရဲ့ စိတ်ကူးစိတ်သန်းအပေါ် မူတည်ပြီး သူတို့ရဲ့ အရိပ်တွေကို ပုံစံအမျိုးမျိုးရှိတဲ့ လက်နက်တွေ၊ ကိရိယာတွေအဖြစ် ပြောင်းလဲနိုင်စွမ်း ရှိကြပါတယ်။ သူတို့ရဲ့ စိတ်ထဲမှာ ပုံရိပ်ကို ပိုပြီး ပြတ်ပြတ်သားသား ပုံဖော်နိုင်လေ၊ အဲဒီအရိပ်က ပိုပြီး အစွမ်းထက်လာမှာဖြစ်သလို ပိုပြီးတော့လည်း အနုစိတ်လာမှာ ဖြစ်ပါတယ်။

- - - ဒီအော့ခ်မျိုးနွယ်စုကတော့ မြေကမ္ဘာနဲ့ သူတို့ကြားမှာရှိတဲ့ ပင်ကိုယ်ချိတ်ဆက်မှုကို အသုံးချပြီး မြေဒြပ်စင်နတ်ဘုရားမရဲ့ အလိုဆန္ဒတွေ၊ လမ်းစဉ်တွေနဲ့ ကိုက်ညီမယ့် ပါဝါတွေကို ငှားရမ်းအသုံးပြုနိုင်စွမ်း ရှိကြပါတယ်။

အော့ခ် မျိုးနွယ်စုခေါင်းဆောင်က မြေကမ္ဘာရဲ့ အမှောင်ရိပ်အော့ခ် သွေးမျိုးဆက် ဆက်နွှယ်မှုကို ရွေးချယ်လိုက်တဲ့အခါ မိုက်ကယ်အနေနဲ့ သိပ်ပြီးတော့ အံ့သြမနေတော့ပါဘူး။

"ထင်ထားတဲ့အတိုင်းပါပဲ။ ဒါက တကယ်ကို သူမကို စိတ်ကျေနပ်မှု ပေးနိုင်မယ့် တစ်ခုတည်းသော လမ်းစဉ်ပဲဗျာ" လို့ ဝံပုလွေအော့ခ် မျိုးနွယ်စုခေါင်းဆောင်က ဆိုတယ်။

"ကျေးဇူးပြုပြီး ကျွန်တော့်ကို သူမရဲ့ အရိပ်တစ်ခု ဖြစ်လာအောင် ခွင့်ပြုပေးပါ"

မိုက်ကယ်က တတိယရွေးချယ်မှုကို ရွေးချယ်ပေးလိုက်တဲ့ အချိန်မှာပဲ မျက်စိစူးလောက်မယ့် အလင်းတန်းတစ်ခုက အော့ခ်ရဲ့ ခန္ဓာကိုယ်တစ်ခုလုံးကို စက္ကန့်အနည်းငယ်လောက်အထိ ဖုံးလွှမ်းသွားခဲ့တာပေါ့။

အဲဒီနောက်မှာတော့ အလင်းတန်းတွေက တဖြည်းဖြည်း မှိန်ဖျော့သွားခဲ့ပြီး ဝံပုလွေအော့ခ်ရဲ့ ပုံစံအသစ်ကို မြင်တွေ့လိုက်ရတော့တယ်။

သူ့အနေနဲ့ အော့ခ်ရဲ့ ခန္ဓာကိုယ် တည်ဆောက်ပုံမှာတော့ သိပ်ပြီး ကွာခြားသွားတာကို မတွေ့ရပါဘူး။ အော့ခ်နဲ့ ဝံပုလွေ ဗီဇတွေ ရောနှောနေတဲ့ ပုံစံကတော့ အရင်အတိုင်းပါပဲ။ ဒါပေမဲ့ အခုတော့ အဲဒီအော့ခ်ရဲ့ ခန္ဓာကိုယ်ပေါ်ကနေ တဖျတ်ဖျတ် လင်းလက်နေတဲ့ အရိပ်မီးလျှံလေးတွေ ထွက်ပေါ်နေခဲ့တာကိုး။

ဝံပုလွေအော့ခ်က သူ့ရဲ့ ပါဝါအသစ်တွေကို စမ်းသပ်ကြည့်လိုက်တဲ့အချိန်မှာ မိုက်ကယ်က အကဲခတ်ကြည့်နေခဲ့တယ်။ အဲဒီအော့ခ်ရဲ့ ခန္ဓာကိုယ်ပေါ်မှာ အရိပ်မီးလျှံတွေရဲ့ ပြင်းအား ပိုပြီး ကောင်းလာလေ၊ သူ့ရဲ့ တည်ရှိမှုကို အာရုံခံဖို့က ပိုပြီး ခက်ခဲလာလေ ဖြစ်နေတာကို သူ သတိထားမိလိုက်တယ်။ အဲဒါက သူက ပတ်ဝန်းကျင်ထဲကို၊ အဲဒီ မြေကမ္ဘာကြီးထဲကိုပဲ တစ်သားတည်း စိမ့်ဝင်ပျောက်ကွယ်သွားသလိုမျိုးပါပဲ။

အရင် ဝံပုလွေအော့ခ် မျိုးနွယ်စုခေါင်းဆောင်ကို ဆင့်ကဲပြောင်းလဲပေးပြီးတဲ့နောက်မှာတော့ သူ့ရဲ့ ပြိုင်ဘက်က အလှည့် ရောက်လာခဲ့ပြန်တာပေါ့။

မိုက်ကယ်က သူတို့တွေက မတူညီတဲ့ မျိုးနွယ်စုခွဲတွေ ဖြစ်ကြပေမဲ့လည်း အော့ခ်ခေါင်းဆောင် နှစ်ယောက်စလုံးရဲ့ ပါရမီတွေက တစ်ပုံစံတည်း တူညီနေတာကို တွေ့လိုက်ရလို့ တကယ်ကို အံ့သြသွားမိတယ်။

သူကလည်း မြေကမ္ဘာရဲ့ အမှောင်ရိပ်အော့ခ် တစ်ယောက် ဖြစ်လာဖို့အတွက်ပဲ ရွေးချယ်ခဲ့တာကိုး။

မိုက်ကယ်က ဒါက သူတို့ ငယ်ငယ်တုန်းက သွေးသောက်ညီအစ်ကိုတွေ ဖြစ်ခဲ့ကြလို့ အကျိုးသက်ရောက်မှု ရှိနေတာ ဖြစ်ရမယ်လို့ တွေးလိုက်မိပေမဲ့ ကျန်တဲ့ အော့ခ်တွေရဲ့ ပါရမီတွေကို လိုက်ပြီး နှိုးဆွပေးတဲ့ အချိန်မှာတော့ သူတို့အားလုံးက အရိပ်မှော်ပညာတွေမှာ ပါရမီ ပါနေကြတာကို တွေ့လိုက်ရလို့ အကြီးအကျယ် အံ့သြသွားရပြန်တယ်။

ဖတ်ချ် ပြောခဲ့တာ တကယ်မှန်တာပဲ။ အော့ခ်တွေက တကယ်ပဲ သူ့လိုမျိုး အရိပ်နင်ဂျာတွေ ဖြစ်လာဖို့အတွက် ပါရမီ ပါနေကြတာကိုး။

ဒါကို မြင်လိုက်ရတာက မိုက်ကယ်ကို ပိုပြီး စူးစမ်းချင်စိတ် ဖြစ်ပေါ်စေခဲ့တယ်။ မျိုးနွယ်စုတစ်ခုရဲ့ ပါရမီဆိုတာ မွေးရာပါ ပါလာတာမျိုးလား၊ ဒါမှမဟုတ် သူတို့ရဲ့ ကလေးဘဝ ဖြတ်သန်းမှုတွေအပေါ်မှာ မူတည်ပြီး ဖြစ်ပေါ်လာတာမျိုးလား။

သူတို့တွေ မြေဒြပ်စင်နတ်ဘုရားမအပေါ်မှာ ရူးရူးမူးမူး ကိုးကွယ်ကြတဲ့ ပင်ကိုယ်စရိုက်တွေကလည်း သူတို့ရဲ့ သွေးမျိုးဆက် ဆင့်ကဲပြောင်းလဲခြင်း လမ်းစဉ်တွေမှာ အရိပ်အယောင်တစ်ခုအနေနဲ့ ပေါ်ထွက်လာဖို့အတွက် တစ်နည်းနည်းနဲ့ လွှမ်းမိုးမှု ရှိနေခဲ့တာ နေမှာပါ

[မင်းရဲ့ တွေးဆချက်က ခိုင်လုံမှု ရှိပါတယ်။ သက်သေအထောက်အထားတွေအရ လူတစ်ယောက်ရဲ့ ပါရမီပေါ်မှာ မွေးရာပါ ဗီဇရော၊ ပတ်ဝန်းကျင် ပြုစုပျိုးထောင်မှုပါ နှစ်ခုစလုံးက အကျိုးသက်ရောက်မှု ရှိနေတယ်ဆိုတာကို ပြသနေပါတယ်]

နိုဗာ ရဲ့ စကားတွေကြောင့် မိုက်ကယ်က သူ့ရဲ့ ခန့်မှန်းချက်ကို ပိုပြီးတော့တောင် သေချာသွားခဲ့တယ်။ ဒါပေမဲ့ အဲဒါကို သက်သေပြဖို့ နည်းလမ်းတော့ သူ့မှာ မရှိသေးဘူးလေ။

သူက အချက်အလက်တွေ ပိုပြီး ရရှိဖို့အတွက် လူတွေကို ပိုပြီးတော့ပဲ ပါရမီ နှိုးဆွပေးရုံ ရှိတာပေါ့။

ဘာပဲဖြစ်ဖြစ်၊ မိုက်ကယ်အနေနဲ့ မျိုးနွယ်စုနှစ်စုလုံးက အော့ခ်တွေအကုန်လုံးကို သုံးရက်တိုင်တိုင် ကြိုးစားပမ်းစား ပါရမီ နှိုးဆွပေးပြီးတဲ့နောက်မှာတော့ ဖတ်ချ်က သူ့ရဲ့ အရိပ်ထဲကနေ ရုတ်တရက် ထွက်ပေါ်လာပြီး မိုက်ကယ်ကို သနားစရာကောင်းတဲ့ မျက်လုံးလေးတွေနဲ့ ချက်ချင်းပဲ ကြည့်နေပါတော့တယ်။

"ဟို... သခင်... ကျွန်တော် အလုပ်တွေ သေချာ လုပ်ခဲ့တာဆိုတော့... ကျွန်တော့်အတွက် အကူအညီအသေးစားလေးတစ်ခုလောက် ခွင့်ပြုပေးလို့ ရမလားခင်ဗျာ"

မိုက်ကယ်က စလိုင်းမ်ကို ကြည့်လိုက်တာနဲ့ အဲဒီကောင်လေး ဘာလိုချင်နေလဲဆိုတာကို ကောင်းကောင်းသိလိုက်တယ်။

"ကောင်းပြီလေ... အဲဒီ အော့ခ်တွေကို မင်း စိတ်ကြိုက် စီမံလို့ ရပါတယ်"

ဖတ်ချ်က အချိန်ဆွဲမနေတော့ဘဲ သူ့ရဲ့ အရိပ်ထဲကနေ ချက်ချင်း လျှောခနဲ ထွက်သွားပြီး အော့ခ်တွေနဲ့ သွားပြီး ဆုံတွေ့ကြတော့တာပေါ့။

တစ်ဖက်မှာလည်း မိုက်ကယ်ကတော့ ကုတင်ပေါ်မှာ ထိုင်ရင်း သူ့ရဲ့ စနစ်မျက်နှာပြင်ကို ကြည့်ပြီး မျက်နှာပေါ်မှာ အပြုံးတစ်ခု ဖြစ်ပေါ်နေခဲ့တယ်။ ထောင်နဲ့ချီတဲ့ အော့ခ်တွေကို ပါရမီ နှိုးဆွပေးပြီးတဲ့နောက်မှာတော့ သူက သူတို့ရဲ့ ပင်ကိုယ်စွမ်းရည် တစ်ခုကိုပါ ရရှိသွားခဲ့တာကိုး။

"ဒါက တကယ်ကောင်းတာပဲ။ ငါ ဒါကို ရီနေးတား ပြည်သူပြည်သားတွေအကုန်လုံးကို ပေးလို့ရမယ် ထင်လား"

[ရရှိနိုင်ပါတယ်။ ဘယ် ရီနေးတား ပြည်သူမဆို ဒီစွမ်းရည်ကို ရရှိနိုင်စွမ်း ရှိပါတယ်] လို့ နိုဗာ က ပြန်လည်ဖြေကြားခဲ့တယ်။

မိုက်ကယ်က သူ့ရဲ့ စနစ်မျက်နှာပြင်ကို ငေးကြည့်လိုက်တယ်။ အဲဒီပေါ်မှာတော့ ရေးထားတာက

[အဆင့်မြင့် အချိုဓါတ်အရှိန်အစွမ်း]

* * * * * * * * *

စာစဉ်(၁၇)

အခန်း(၂၀၄)

[အဆင့်မြင့် အချိုဓါတ်အရှိန်အစွမ်း]

- - - ဒီစွမ်းရည်ကတော့ အသုံးပြုသူအနေနဲ့ ချောကလက်ကို စားသုံးလိုက်တဲ့အခါမှာ သဟဇာတ ပေါင်းစည်းခြင်း ပါဝါတွေကို ပြင်းပြင်းထန်ထန် ပေါက်ကွဲထွက်လာစေပြီး သတ်မှတ်ထားတဲ့ အချိန်ကာလတစ်ခုအတွင်းမှာ သူတို့ရဲ့ လက်ရှိ တန်ခိုးတွေကို ကျော်လွန်သွားစေဖို့အတွက် ကူညီပေးနိုင်မှာ ဖြစ်ပါတယ်။ အသုံးပြုသူအနေနဲ့ တစ်ကြိမ်ကို တစ်ခုသာ စားသုံးနိုင်မှာဖြစ်ပြီး အဲဒီလို စားသုံးပြီးတဲ့နောက်မှာတော့ ထပ်မံစားသုံးဖို့အတွက် အချိန်ကန့်သတ်ချက် တစ်စုံတစ်ရာ ရှိမနေပါဘူး။

ဒါက ပါရမီရှင် အင်ဂျင်နီယာတွေပဲဖြစ်ဖြစ်၊ ရွှေလယ်ယာတွေပဲဖြစ်ဖြစ်... ဒါမှမဟုတ် မှော်ဝင်တူရိယာ တီးခတ်တဲ့သူတွေပဲဖြစ်ဖြစ် ဘယ် ရီနေးတားပြည်သူမဆို အသုံးပြုလို့ရမယ့် ဘက်စုံသုံး စွမ်းရည်တစ်ခု ဖြစ်ခဲ့တာပေါ့။

အဲဒါက အရေးကြီးတဲ့ အချိန်တွေမှာ သူတို့ကိုယ်သူတို့ ကာကွယ်နိုင်ဖို့အတွက် ခွန်အားတွေကို အဆမတန် မြှင့်တင်ပေးနိုင်မယ့် တကယ့် ဝှက်ဖဲတစ်ခု ဖြစ်လာမှာ သေချာပါတယ်။

ဒါကြောင့် အခုဆိုရင် ရီနေးတား ပြည်သူတွေအကုန်လုံးမှာ ခုခံရေးအတွက် အခြေခံအဆင့် သဟဇာတအကာအကွယ် ရှိနေကြပြီဖြစ်သလို တိုက်စစ်အတွက်လည်း အဆင့်မြင့် အချိုဓါတ်အရှိန်အစွမ်းကို ကိုယ်စီ ပိုင်ဆိုင်သွားကြပြီ ဖြစ်ပါတယ်။

သောင်းနဲ့ချီတဲ့ ရီနေးတား ပြည်သူပြည်သားတွေကို ဒီစွမ်းရည်အသစ် တပ်ဆင်ပေးဖို့အတွက် အချိန်နဲ့ လုပ်အားတွေ အများကြီး စိုက်ထုတ်ရဦးမှာ ဖြစ်ပေမဲ့လည်း မိုက်ကယ်ကတော့ သူ့ရဲ့ ပြည်သူတွေအတွက် ဝမ်းမြောက်ဝမ်းသာနဲ့ပဲ လုပ်ဆောင်ပေးသွားမှာပါ။ သူ ဘေးနားမှာ ရှိမနေတဲ့ အချိန်မျိုးမှာတောင် သူ့လူတွေ ဘေးအန္တရာယ်ကနေ ကင်းဝေးနေမယ်ဆိုတာကို သိထားရတာက သူ့စိတ်ကို အေးချမ်းစေမှာကိုး။

ပြီးတော့ သူတို့တွေ ကိုယ့်ကိုယ်ကိုယ် မကာကွယ်ရသေးခင်မှာတင် သူနဲ့ ဖတ်ချ်က အကြောင်းတစ်ခုခု မဖြစ်ခင် အချိန်မီ ရောက်လာမှာကတော့ သေချာပါတယ်။ ဒါကြောင့်လည်း သူနဲ့ နင်ဂျာစလိုင်းမ်လေးဟာ ပြည်သူပြည်သားတိုင်းရဲ့ အရိပ်ထဲမှာ သူတို့ရဲ့ အရိပ်ခွဲတွေကို ထည့်သွင်းထားကြတာ ဖြစ်လို့ ဘယ် ရီနေးတား ပြည်သူမဆို အရေးကြုံလာရင် မျက်စိတစ်မှိတ်အတွင်းမှာတင် သွားရောက်ကူညီနိုင်မှာ ဖြစ်ပါတယ်။

ဖတ်ချ်အကြောင်း ပြောရရင်တော့ မိုက်ကယ်အနေနဲ့ အဲဒီ အကောင်းကြိုက်တဲ့ စုန်းပြူးလေးက သူ့ရဲ့ အော့ခ် စစ်တပ်အသစ်နဲ့ ဘာတွေ လျှောက်လုပ်နေလဲဆိုတာကို နည်းနည်းတော့ စူးစမ်းချင်စိတ် ဖြစ်ပေါ်လာခဲ့တာပေါ့။ ဒါကြောင့် သူတို့ရဲ့ ရွာရှိရာ တောအုပ်ဆီကို သူ သွားရောက်ကြည့်ရှုခဲ့တယ်။

သူက သစ်သားတံတိုင်းတွေနဲ့ ကာရံထားပြီး သက်ငယ်မိုးအိမ်လေးတွေ ရှိနေတဲ့ အော့ခ်ရွာရဲ့ အစွန်အဖျားဆီကို ရောက်ရှိလာခဲ့တာပါ။

ရွာရဲ့ ပုံစံကတော့ အရင်အတိုင်းပါပဲ။ ဒါပေမဲ့ အခုတော့ အဲဒီနေရာမှာ ရီနေးတားရဲ့ ပါရမီရှင် အင်ဂျင်နီယာတွေက ရွာကို ပြန်လည်အဆင့်မြှင့်တင်ဖို့အတွက် မြေပြင်အနေအထားတွေကို လာရောက်တိုင်းတာနေကြတာကို တွေ့လိုက်ရတယ်။ သူတို့တွေက ရီနေးတား နိုင်ငံတော်ရဲ့ ပြည်သူတွေ ဖြစ်လာကြပြီဆိုတော့ သူတို့ရဲ့ လူနေမှုအဆင့်အတန်းကိုလည်း အတော်လေး မြှင့်တင်ပေးဖို့ လိုအပ်တာကိုး။

ရွာထဲမှာ တခြား အော့ခ်တွေကို မတွေ့ရတာကြောင့် မိုက်ကယ်က သူတို့ရဲ့ နယ်မြေအတွင်းပိုင်းထဲအထိ ဆက်ပြီး လမ်းလျှောက်ဝင်လာခဲ့တဲ့ အချိန်မှာတော့ သူတို့ရဲ့ သန့်စင်မွန်မြတ်သောနယ်မြေ ရှေ့ကို ရောက်ရှိသွားခဲ့တယ်။

အခုမှပဲ သူက ဒီနေရာရဲ့ ကျယ်ဝန်းမှုနဲ့ ကြီးကျယ်ခမ်းနားမှုကို သေသေချာချာ အသိအမှတ်ပြုနိုင်တော့တာပါ။ သစ်ပင်တိုင်းမှာ ခူးဆွတ်ဖို့ အဆင်သင့်ဖြစ်နေတဲ့ ကိုကိုးစေ့တွေက ဝေဆာလို့ နေခဲ့တာကို။ ပြီးတော့ အော့ခ်တွေက သူ့ရဲ့ နယ်မြေထဲက ပြည်သူတွေ ဖြစ်လာကြပြီ ဖြစ်လို့ ဒီအရာအားလုံးက အခုဆိုရင် သူ့ပိုင်ဆိုင်မှုတွေ ဖြစ်လာခဲ့ပြီလေ။

သူက သူတို့ရဲ့ ချောကလက် လိုအပ်ချက်တွေကို ဖြည့်ဆည်းပေးနိုင်ဖို့အတွက် ဒီသန့်စင်မွန်မြတ်သောနယ်မြေကို ဒီထက်ပိုပြီး တိုးချဲ့သွားဖို့ စီစဉ်ထားပါတယ်။ အဲဒါတွေကို အရောင်းအဝယ် လုပ်ဖို့တင် မကဘဲ အရေးပေါ်အခြေအနေတွေအတွက် သူ့ရဲ့ ပြည်သူတွေအတွက်ပါ ချောကလက်တွေကို အမြောက်အမြား သိုလှောင်ထားရမှာကိုး။

"သေချာနားထောင်ကြစမ်း။ နင်ဂျာကောင်းတွေဖြစ်ဖို့ဆိုရင် ခြေရာဖျောက်တတ်ဖို့က အရေးကြီးဆုံးပဲ"

မိုက်ကယ်က တုန်ရင်နေတဲ့ အသံနဲ့ အရမ်းကို စိတ်လှုပ်ရှားနေတဲ့ စလိုင်းမ်ရဲ့ စကားသံကို ကြားလိုက်ရတယ်။ သူက သန့်စင်မွန်မြတ်သောနယ်မြေရဲ့ အတွင်းထဲအထိ တိုးဝင်ကြည့်လိုက်တဲ့အခါ မြွေအသွင် ပြောင်းလဲထားတဲ့ ဖတ်ချ်က အမြင့်ဆုံးသစ်ပင်ကြီးပေါ်မှာ ပတ်ခွေရင်း သူ့အောက်က လိပ်ပြာဆူးအော့ခ်တွေနဲ့ ဝံပုလွေအော့ခ်တွေကို ငုံ့ကြည့်ပြီး ဆရာလုပ်နေတာကို မြင်လိုက်ရတာပေါ့။

"ကျွန်တော်တို့တွေ မင်းရဲ့ လမ်းစဉ်တွေကို သေသေချာချာ သင်ယူပါ့မယ်... တမန်တော်မင်း" လို့ အရင် ဝံပုလွေအော့ခ် မျိုးနွယ်စုခေါင်းဆောင်က ကတိပြုလိုက်တယ်။

"ကျွန်တော်တို့ အားလုံး မင်းရဲ့ အမိန့်ပေးမှုအောက်မှာ ရှိနေပါတယ်" လို့ အရင် လိပ်ပြာဆူးအော့ခ် မျိုးနွယ်စုခေါင်းဆောင်ကလည်း ဆိုတယ်။

"ကောင်းတယ်... ကောင်းတယ်... ကောင်းတယ်။ ရီနေးတားရဲ့ အရိပ်အဖြစ် တို့တွေရဲ့ ပထမဆုံး တာဝန်အနေနဲ့ မင်းတို့တစ်ယောက်ချင်းစီကို ကာကွယ်ဖို့အတွက် ရီနေးတား ပြည်သူတစ်ယောက်စီ ခွဲဝေပေးမယ်။ ဝံပုလွေအော့ခ် တစ်ယောက်နဲ့ လိပ်ပြာဆူးအော့ခ် တစ်ယောက်။ မင်းတို့နှစ်ယောက်က သူတို့ရဲ့ အရိပ်ထဲမှာပဲ အချိန်ကုန်ရမှာဖြစ်ပြီး ဘေးအန္တရာယ်နဲ့ ကြုံရတဲ့အချိန်ကလွဲလို့ ဘယ်တော့မှ လူလုံးထွက်မပြရဘူး"

"မင်း အလိုရှိတဲ့အတိုင်းပါပဲ" လို့ သူတို့အားလုံးက တညီတညွတ်တည်း အော်ဟစ်လိုက်ကြတယ်။

ကြည့်ရတာ ဖတ်ချ်ကတော့ သူ့အလုပ်သူ သေချာ လုပ်နေတဲ့ ပုံပါပဲ။ မိုက်ကယ်က စလိုင်းမ်နဲ့ အော့ခ်တွေ သူတို့ရဲ့ အလေ့အထကျင့်စဉ်တွေ လုပ်နေတာကို ဝင်ပြီး မနှောင့်ယှက်တော့ဘဲ သူတို့ ဘာသာသူတို့ စိတ်ကြိုက် လုပ်ခွင့်ပေးလိုက်တယ်။

သူက နီယိုအော်ကပ်စ်ဆီကိုပဲ ပြန်လာခဲ့တာပေါ့။ အဲဒီနေရာမှာတော့ အော့ခ်မျိုးနွယ်စု တိုးချဲ့ရေးအတွက် လိုအပ်တဲ့ စာရွက်စာတမ်းတွေကို ပြင်ဆင်ရတာနဲ့ အလုပ်ရှုပ်နေကြတဲ့ ရှီနာနဲ့ ယူမီစုတို့က သူ့ကို ဆီးကြိုနှုတ်ဆက်ခဲ့ကြတယ်။

သူက အဲဒီအလုပ်တွေကို သူတို့ပဲ တာဝန်ယူ စီမံခန့်ခွဲခွင့် ပေးထားခဲ့တာ ဖြစ်လို့ သူ့အနေနဲ့ စာရွက်စာတမ်းအချို့မှာ လက်မှတ်ထိုးပေးဖို့ပဲ လိုအပ်တာပါ။ အဲဒီအထဲမှာ ချောကလက်စက်ရုံအသစ် တည်ဆောက်ဖို့၊ ကိုကိုး သန့်စင်မွန်မြတ်သောနယ်မြေကို ပြုစုပျိုးထောင်ဖို့အတွက် ရွှေလယ်ယာတွေကို စေလွှတ်ဖို့နဲ့ အခြားသော နိုင်ငံတော်ရဲ့ သာမန်ကိစ္စဝစ္စတွေ ပါဝင်တာပေါ့။

သူ့အနေနဲ့ ဘာမှမလုပ်ဘဲ ပျင်းရိပျင်းတွဲနဲ့ အချိန်ကုန်နေတတ်ကြတဲ့ ဂျာကူနဲ့ ဇိုင်ယွန်တို့ကိုတောင် နည်းနည်း မနာလို ဖြစ်မိသွားတယ်။

ရက်အနည်းငယ် ကြာပြီးတဲ့နောက်မှာတော့ ချောကလက် ကုန်သည်တွေဟာ နောက်ဆုံးမှာ ခရီးထွက်ဖို့ အဆင်သင့် ဖြစ်နေကြပါပြီ။ သူတို့ရဲ့ မြင်းရထားတွေပေါ်မှာတော့ အန်ဂိုရာမြို့မှာ သွားရောက်ရောင်းချဖို့အတွက် အသင့်ပြင်ထားတဲ့ ချောကလက် ထုတ်ကုန်တွေက အပြည့်အနှက် တင်ဆောင်ထားတာကိုး။

သူတို့တွေက ပိုပြီး မြန်မြန်ဆန်ဆန် သွားနိုင်ဖို့အတွက် မော်တော်ကားတွေကို အသုံးပြုချင်ကြပေမဲ့ ကွင်းစ်နယ်မြေထဲမှာတော့ ညီညာတဲ့ လမ်းမတွေနဲ့ ဆီဆိုင်တွေ တစ်ခုမှ ရှိမနေသေးဘူးလေ။

မျှော်လင့်ရတာကတော့ နောက်ထပ် လအနည်းငယ်အတွင်းမှာ အသစ်တည်ဆောက်နေတဲ့ ရွှေလမ်းမကြီးက သိသာထင်ရှားတဲ့ တိုးတက်မှုတွေ ရှိလာပြီး ကွင်းစ်နယ်မြေထဲမှာပါ မော်တော်ကားတွေကို အသုံးပြုနိုင်ခွင့် ပေးနိုင်တော့မှာပါပဲ။

"နောက်တစ်ကြိမ် ထပ်ပြီး ကျေးဇူးတင်ပါတယ်... မိုက်ကယ်"

"မဟုတ်တာပဲ... ရီနေးတားကုမ္ပဏီကပဲ မင်းတို့ကို ကျေးဇူးတင်ရမှာပါ" လို့ သူက သူတို့ကို ပြန်ပြောလိုက်တယ်။

အနည်းငယ် တွန့်ဆုတ်နေတဲ့ နှုတ်ဆက်စကားတွေ ပြီးဆုံးသွားပြီးတဲ့နောက်မှာတော့ ကုန်သည်အချို့က ကင်းစ်နယ်မြေနဲ့ နီယိုအော်ကပ်စ်ရဲ့ လူနေမှုပုံစံတွေကို အရမ်း သဘောကျသွားကြတာကြောင့် ဒီမှာပဲ အခြေချ နေထိုင်ချင်စိတ်တွေ ဖြစ်ပေါ်နေခဲ့ကြပေမယ့်လည်း တာဝန်အရ ချောကလက် ကုန်သည်တွေဟာ စတင် ထွက်ခွာသွားကြတော့တယ်။

ဒါပေမဲ့ သူတို့ မထွက်ခွာခင်မှာတင် မိုက်ကယ်က မြင်းရထားရဲ့ အရိပ်ထဲကို ဝင်ရောက်ပျောက်ကွယ်သွားတဲ့ အနက်ရောင် ပုံရိပ်အချို့ကို မြင်တွေ့လိုက်ရတာပေါ့။

အဲဒါက တခြားသူ မဟုတ်ဘဲ သူတို့ရဲ့ ပထမဆုံး တာဝန်ကို စတင်ထမ်းဆောင်နေကြတဲ့ ဖတ်ချ်နဲ့ အမှောင်ရိပ်အော့ခ်အချို့ပဲ ဖြစ်နေတာကိုး။ သူတို့တွေက ကုန်သည်တွေကို ကာကွယ်ပေးဖို့အတွက် သူတို့ရဲ့ အရိပ်ခွဲတွေကို ထည့်သွင်းပေးလိုက်ကြတာ ဖြစ်ပါတယ်။

"သခင်... သူတို့တွေကလည်း အခု တို့နိုင်ငံတော်ရဲ့ ပြည်သူတွေ ဖြစ်လာကြပြီ မဟုတ်လား"

ဖတ်ချ်က မိုက်ကယ်ရဲ့ အရိပ်ထဲကနေ ပြုန်းခနဲ ထွက်လာခဲ့တယ်။

"ဟုတ်တာပေါ့... သူတို့က တို့ပြည်သူတွေပဲလေ။ ဒါနဲ့ နေပါဦး... ငါ မင်းရဲ့ အကြံအစည်ကို မသိဘူးလို့ ထင်နေတာလား။ မင်းက ကုန်သည်တွေကို ကာကွယ်ပေးချင်ရုံတင် မဟုတ်ပါဘူး။ မင်းက အန်ဂိုရာမြို့ထဲကို ခိုးဝင်ချင်နေတာ မဟုတ်လား"

စလိုင်းမ်က မလုံမလဲ အပြုံးလေး ပြုံးပြလိုက်တယ်။ "ဟီးဟီး... ဒါကတော့... အဲလိုလည်း ဖြစ်နိုင်တာပေါ့..."

မိုက်ကယ်လည်း ဝင်ပြီး မတားမြစ်တော့တာကြောင့် ဖတ်ချ်ကို ဘာမှ ထပ်မပြောတော့ပါဘူး။ သူကိုယ်တိုင်လည်း ကွင်းစ်နယ်မြေရဲ့ မြို့တော်ကြီးက ဘယ်လိုပုံစံမျိုး ရှိမလဲဆိုတာကို နည်းနည်းတော့ စူးစမ်းချင်စိတ် ဖြစ်ပေါ်နေတာကိုး။

'ဟင်း... တို့လည်း အဲဒီ မြင်းရထားရဲ့ အရိပ်ထဲကို တစ်ခါတလေ ဝင်ပြီး အခြေအနေတွေကို သွားသွား စစ်ဆေးကြည့်ရင် ကောင်းမလား...'

သူက လက်ညှိုးကို တောက်တစ်ချက် ခေါက်လိုက်ပြီး သူ့ရဲ့ အရိပ်တစ်ခုကို ကုန်သည်တွေဆီကို စေလွှတ်လိုက်တယ်။

မိုက်ကယ်က ရက်အနည်းငယ်လောက်အထိ ရီနေးတား ပြည်သူတွေအကုန်လုံးနဲ့ ဆုံတွေ့ပြီး အဆင့်မြင့် အချိုဓါတ်အရှိန်အစွမ်းစွမ်းရည်တွေကို လိုက်လံ အပ်နှင်းပေးနေခဲ့သလို အဲဒီအတောအတွင်းမှာလည်း သူတို့နဲ့ စကားတပြောပြောနဲ့ အချိန်ကုန်နေခဲ့တာပေါ့။

သူက တတိယမြောက်နေ့ ရောက်တဲ့အချိန်မှာတော့ အကြီးအကျယ်ကို ပျင်းရိလာခဲ့တာ ဖြစ်လို့ တခြား မြင်ကွင်းအသစ်အဆန်းတွေကို မြင်တွေ့ချင်စိတ် ဖြစ်ပေါ်လာခဲ့တယ်။

သူက ကင်းစ်ဘရစ်ချ်၊ ရီနေးတား နိုင်ငံတော်နဲ့ လူပုနိုင်ငံတော်တွေရဲ့ အခြေအနေတွေကို စစ်ဆေးကြည့်လိုက်ပေမဲ့ သူတို့တွေဆီမှာတော့ ထူးထူးခြားခြား ဘာမှ ဖြစ်ပျက်မနေခဲ့ပါဘူး။ နီယိုအော်ကပ်စ်ကလည်း ရွှေလမ်းမကြီး စီမံကိန်းနဲ့ အလုပ်ရှုပ်နေကြတာ ဖြစ်လို့ သူ့ကို လာပြီး အဖော်စပ်ပေးနိုင်မယ့်သူက သိပ်ရှိမနေဘူးလေ။

အဲဒီနောက်မှပဲ သူက စူးစမ်းချင်စိတ်နဲ့အတူ ချောကလက် ကုန်သည်တွေရဲ့ အရိပ်ထဲမှာ ထည့်ထားတဲ့ သူ့ရဲ့ အရိပ်ခွဲနဲ့ နေရာချင်း လဲလှယ်လိုက်ပါတော့တယ်။

ကုန်သည်တွေက သူ့ရဲ့ ရုတ်တရက် ပေါ်ထွက်လာမှုကြောင့် အံ့သြသွားကြပေမဲ့ သူ့ကို ဝမ်းမြောက်ဝမ်းသာပဲ ဆီးကြိုနှုတ်ဆက်ခဲ့ကြတာပေါ့။ လမ်းခရီးမှာလည်း သူတို့တွေက အန်ဂိုရာမြို့မှာ ရှိခဲ့တဲ့ သူတို့ရဲ့ ဘဝအခြေအနေတွေအကြောင်း မိုက်ကယ်ကို ပြန်လည်ပြောပြနေခဲ့ကြတယ်။

သူက ညဘက်ရောက်လို့ ညတာကုန်ဆုံးဖို့အတွက် တောရိုင်းမြေတစ်ခုထဲမှာ စခန်းချလိုက်တဲ့ အချိန်အထိ သူတို့နဲ့အတူတူ တစ်နေ့လုံး အချိန်ဖြုန်းနေခဲ့ပါတော့တယ်။

* * * * * * * * *