အခန်း (၁၄၃-၁၄၄)

🍋 Chapter 143

သူ ထွက်ခွာသွားသည်ကို မြင်လိုက်ရသော် ကျိုးထျန်းမှာ အားမလိုအားမရ ဖြစ်မိသည်။

ဟွမ်ရှီ ဤသို့ ပြုလုပ်လိမ့်မည်ဟု သူ ကြိုတင် ခန့်မှန်းထားပြီး ဖြစ်သည်။ သူ၏ စိတ်နေစိတ်ထားအတိုင်းဆိုလျှင် ရဲကို ဖုန်းဆက်ကာ ချက်ချင်းပင် ဖမ်းဆီးခိုင်းလိုက်မည် ဖြစ်သည်။

သို့သော် သူ ကိုယ်တိုင် ဆုံးဖြတ်ချက် မချခဲ့ပေ။ သူသည် လျိုထျန်းအန်ကို အရင်ဆုံး အကြောင်းကြားခဲ့ခြင်း ဖြစ်သည်။

အချိန်တစ်ဝက်ခန့် ကြာပြီးနောက် အကြိမ်ကြိမ် စဉ်းစားပြီးသည့်နောက်တွင် ကျိုးထျန်းမှာ လျိုထျန်းအန်ကို အရင်ဆုံး အသိပေးရန် ဆုံးဖြတ်လိုက်သည်။ သူ့တွန့်ဆုတ်မှုမှာ လျိုမုယန်ကြောင့် ဖြစ်သည်။

မူရန်၏ ပြောပြချက်အရ ဟွမ်ရှီမှာ မိသားစုဝင်တစ်ယောက်နှင့် တူသည်။ သာမန် ဆွေမျိုးများထက်ပင် ပိုမိုရင်းနှီးသည်။

မူရန် မကြာသေးမီက သူမ ဇာတိဟန်ကျိုးသို့ ပြန်သွားခဲ့စဉ်က ထိုဆွေမျိုးများမှာ သူမကို စိတ်အနှောင့်အယှက် ဖြစ်စေခဲ့သည်။ သို့သော် ဟွမ်ရှီမှာ မတူပေ။

မူရန် သူ့ကို မြင်တိုင်း သူမ၏ မျက်ဝန်းထဲတွင် မိဘများကို ကြည့်သကဲ့သို့ မိသားစု အငွေ့အသက်များ ပြည့်နှက်နေတတ်သည်။

သူမသည်လည်း သူ့ကို "အစ်ကိုရှောင်ပေါင်" ဟုသာ ခေါ်ဆိုလေ့ရှိသည်။

သူမရှေ့တွင် ဟွမ်ရှီအကြောင်း ပြောသည့်အခါတိုင်း အစ်ကိုကြီးတစ်ယောက်ကို ရိုသေလေးစားသည့် အမူအရာမျိုး ပြသလေ့ရှိသည်။

သူမမှာ တစ်ဦးတည်းသော သမီးဖြစ်သည့်အတွက် အစ်ကိုအရင်းလိုလူမျိုးကို တောင့်တနေခြင်းဖြစ်နိုင်ပြီး ဟွမ်ရှီက ထိုနေရာကို ဖြည့်ဆည်းပေးခဲ့သည်။

နှစ်ကူးပွဲတော်၊ မွေးနေ့၊ ဒုံးပျံပွဲတော်နှင့် လမင်းပွဲတော်များတွင် ဟွမ်ရှီမှာ လျိုမိသားစု၏ ပွဲလမ်းသဘင်များတွင် အမြဲ ရှိနေတတ်သည်။

လျိုထျန်းအန်၏အသက် ၄၀ ပြည့် မွေးနေ့တွင် ဧည့်ခံစားပွဲ ၅၊ ၆ ခု ရှိပြီး လျိုထျန်းအန်၏ ဆွေမျိုးသားချင်းများ ရှိနေသည့်တိုင် ဟွမ်ရှီကို သူ့ဘေးတွင်သာ ထိုင်စေခဲ့သည်။ ၎င်းမှာ လျိုမိသားစုအတွက် ဟွမ်ရှီ၏နေရာကို ပြသနေသည်။

ထို့အပြင် မူရန်က ငယ်စဉ်က သူမအဖေမှာ အလုပ်အရမ်းများပြီး အလုပ်ပြီးလျှင်လည်း လူမှုရေးကိစ္စများဖြင့် အချိန် ကုန်လေ့ရှိကြောင်း ပြောပြဖူးသည်။

သို့သော် ဟွမ်ရှီကို မခေါ်သွားရသည့်အခါတိုင်း သူ့တပည့်ကို သမီးဖြစ်သူနှင့် အတူကစားရန်စေလွှတ်လေ့ရှိသည်။ လျိုမုယန်၏ငယ်ဘဝ အမှတ်တရ အများစုမှာ ဟွမ်ရှီနှင့် ဆက်စပ်နေသည်။

ထို့ကြောင့် အကြိမ်ကြိမ် စဉ်းစားပြီးနောက် တရားဝင်လမ်း ကြောင်းအတိုင်း ရဲကို တိုင်ကြားမည့်အစား လျိုထျန်းအန်ကို အရင်ဆုံး ဆက်သွယ်ရန် ဆုံးဖြတ်လိုက်သည်။

သူသည် လျိုထျန်းအန်ကို ဆက်သွယ်ပြီး သူတည်းခိုသည့် ဟိုတယ်အနီးတွင် တွေ့ဆုံရန် ချိန်းဆိုလိုက်သည်။

လျိုထျန်းအန်မှာ ပထမတွင် ထူးဆန်းသည်ဟု ခံစားရသည်။ သူတို့မှာ ရင်းနှီးသူများ မဟုတ်၊ ခေါင်းငြိမ့် နှုတ်ဆက်ရုံသာ ရှိသည်။

သမီးဖြစ်သူက သူ့အကြောင်း ရံဖန်ရံခါ ပြောပြတတ်သော်လည်း သမီးတစ်ယောက်အနေဖြင့် သူမ၏ လျှို့ဝှက်ချက်များကို ဖခင်ဖြစ်သူအား အကုန်မပြောပြတတ်ပေ။

သူသည် မူရန်ကို ယုံကြည်ပြီး သမီးဖြစ်သူမှာ သူမ ဘဝကို သူမ ထိန်းချုပ်နိုင်သည်ဟု ယူဆသောကြောင့် မေးခွန်းများစွာ မမေးခဲ့ပေ။ သို့သော် ဒီကောင်လေးက သူ့ဆီ အခုလို ရောက်လာသည်မှာ ထူးဆန်းနေသည်။

သို့သော် ကုမ္ပဏီ၏အကြီးတန်း မန်နေဂျာတစ်ယောက်အနေ ဖြင့် အရာရာကို ကြုံတွေ့ခဲ့ဖူးသူဖြစ်၍ ကောင်လေးတစ်ယောက်နှင့် တွေ့ဆုံခြင်းကို လက်ခံလိုက်သည်။

သူတို့သည် ဟိုတယ်အနီးရှိ ကော်ဖီဆိုင်တွင် တွေ့ဆုံကြသည်။ ကျိုးထျန်းမှာ ထုံးစံအတိုင်း အနည်းငယ်စောရောက်နေသည်။ လျိုထျန်းအန်သည် ဆိုင်ထဲဝင်လာသည်နှင့် သူ့ကို မြင်လိုက်ရသော်လည်း အံ့ဩသွားသည်။

"အင်း? ဒီကောင်လေးရဲ့ အမူအရာက ဒီနေ့ ဘာလို့ ပြောင်းလဲနေတာလဲ?"

ယခင်က တွေ့ဆုံမှုများတွင် ကျိုးထျန်းမှာ သာမန် လူငယ်လေးတစ်ယောက်သာဖြစ်သည်။ အသက် ၂၀ မပြည့်သေးသည့် လူငယ်တစ်ယောက်၏ရိုးအသော အမူအရာများမှာ သိသာနေသည်။

သို့သော် ယနေ့မူ ကွာခြားသည်။ အဝေးကပင် ကျိုးထျန်း၏ ကိုယ်ဟန်အနေအထားနှင့် အမူအရာမှာ ပိုမိုတည်ငြိမ်နေသည်။

"တစ်ခုခု ဖြစ်နေတာ သေချာတယ်"

သူ ရောက်နေပြီ ဖြစ်သည့်အတွက် လျိုထျန်းအန်က တုံ့ဆိုင်းမနေဘဲ သူ့ဆီ တည့်တည့် လျှောက်သွားလိုက်သည်။ ကျိုးထျန်းက မတ်တပ်ရပ်ကာ နှုတ်ဆက်သည်။

"မစ္စတာလျို၊ ဘာသောက်မလဲဗျ"

လျိုထျန်းအန်မှာ ထပ်မံ အံ့ဩသွားသည်။

'ဒီကောင်လေးက ငါ့ကို ခေါ်ပုံခေါ်နည်းပါ ပြောင်းသွားပါလား၊ ဘာတွေ ကြံစည်နေတာလဲ?'

သူသည် စိတ်ပျက်စွာ ပြုံးလိုက်ပြီး ထိုင်လိုက်သည်။

"အီတလီ ကော်ဖီ တစ်ခွက်ပေးပါ"

ကျိုးထျန်း ဝန်ထမ်းကို မှာကြားပြီးနောက် ဆိုဖာပေါ်တွင် စိတ်အေးလက်အေး ထိုင်လိုက်သည်။

"ငါ့ကို အပြင် ခေါ်ထုတ်တာ ဘာကိစ္စရှိလို့လဲ"

အခြား လူကြီးများကဲ့သို့ ကျိုးထျန်းကို မခေါ်သည့်အတွက် ဒေါသထွက်ခြင်းမရှိဘဲ တည်ငြိမ်နေဆဲပင်။

ဤသည်မှာ နှစ်ပေါင်းများစွာ လေ့ကျင့်ထားသည့် ကျွမ်းကျင်မှု ဖြစ်သည်။

"မစ္စတာလျို၊ ကျွန်တော် ခင်ဗျားကို ဒီနေ့ ဖိတ်တာက မူရန်ရဲ့ အတန်းဖော်အနေနဲ့လည်း မဟုတ်သလို၊ ခင်ဗျားရဲ့ နောက် လိုက်ငယ်သားအနေနဲ့လည်း မဟုတ်ပါဘူး"

သူသည် မူရန်၏ရည်းစားဟု မပြောဘဲ အတန်းဖော်ဟု တမင် ပြောလိုက်ခြင်းမှာ ဖခင်တစ်ယောက်၏စိတ်ကို ပြေလျော့စေရန် ဖြစ်သည်။ ဘယ်သူမှ မိမိသမီးကို ခိုးယူမည့်သူကို မတွေ့ချင်ကြပေ။

ထို့ကြောင့် ခေါ်ဝေါ်ပုံမှာ အရေးကြီးသည်။

"အော်၊ ဒါဆို ဘယ်သူအနေနဲ့လဲ"

လျိုထျန်းအန်က ပြုံးကာ သူ့ကို ကြည့်သည်။

"ကျွန်တော် ထျန်းချိုင် နည်းပညာကုမ္ပဏီ ရဲ့ ပိုင်ရှင်အနေနဲ့ ခင်ဗျားနဲ့ ကိစ္စအချို့ ဆွေးနွေးဖို့လာတာပါ"

နှစ်ပေါင်းများစွာ စီးပွားရေးလောကတွင် ကျင်လည်ခဲ့သော လျိုထျန်းအန်ပင် ကျိုးထျန်း၏စကားကြောင့် တွေဝေသွားသည်။ သူသည် ကျိုးထျန်းကို ၁၀ စက္ကန့်ကျော်ကြာအောင် စိုက်ကြည့်နေသည်။

ထျန်းချိုင် ဆိုသည့် နာမည်ကို သူ ကောင်းကောင်းသိသည်။ ယင်းချိုင်၏လက်ရှိ ကုမ္ပဏီ ဖြစ်သည်။ လူငယ်တစ်ယောက်က ယင်းချိုင်ကို ဝယ်ယူလိုက်သည်ဟု ကြားသော်လည်း ထိုလူငယ်မှာ သူ့ အနီးအနားတွင် ရှိနေလိမ့်မည်ဟု မထင်ထားခဲ့ပေ။

"ယန်ယန်က ငါ့ကို ခေတ်နောက်ကျတယ်လို့ အမြဲ ပြောတတ်တယ်။ ငါ့ရဲ့ လုပ်ရပ်တွေ၊ စကားတွေက အိုဟောင်းနေတယ်တဲ့။ ငါက ငြင်းနေခဲ့တာ၊ အခုတော့ ငါ တကယ်ပဲ အိုသွားပြီ ထင်တယ်"

လျိုထျန်းအန် ပြုံးကာ ခေါင်းခါလိုက်သည်။

"မျိုးဆက်သစ်တွေက ပိုတော်လာကြတာပဲ!"

"မင်း အရွယ်တုန်းကဆိုရင် ငါ ကော်ဖီတောင် မသောက်ဖူးသေးဘူး။ ဟဲဟဲ၊ ဒီခေတ် လူငယ်တွေက တကယ်ပဲ ထူးချွန်ကြတာပဲ"

ထပ်ပြောစရာ မလိုတော့ဘဲ လျိုထျန်းအန် နားလည်သွားသည်။ ဒီကျိုးထျန်းက သမီးဖြစ်သူကိုတောင် ဒီကိစ္စကို လျှို့ဝှက်ထားခဲ့တာပဲ။

သူ့ရဲ့ သမီးမိုက်လေးက ဒီလောက်တော်တဲ့သူနဲ့ လက်ထပ်တော့မှာဆိုတော့ အနာဂတ်မှာ ပင်ပန်းရတော့မှာပဲ။

"ဒါဆိုရင် မင်းကို ဥက္ကဋ္ဌကျိုးလို့ ခေါ်ရမလား"

လျိုထျန်းအန်က အမြန်ပင် တည်ငြိမ်မှုကို ပြန်ယူကာ ကော်ဖီကို စိတ်အေးလက်အေး သောက်လိုက်သည်။

"မင်းက မင်းရဲ့ အထောက်အထားကို တိုက်ရိုက် ပြောပြတဲ့အတွက်၊ အကြောင်းရင်းကို ပြောပါ"

"ဟုတ်ကဲ့၊ မစ္စတာလျိုက ပွင့်လင်းတဲ့သူဆိုတော့ ကျွန်တော်လည်း အချက်ကျကျ ပြောပါ့မယ်"

ကျိုးထျန်းမှာ လျိုထျန်းအန်ကို မည်သို့ တင်ပြရမည်ကို စဉ်းစားရခက်နေခဲ့သည်။

တပည့်အနေနဲ့လား? သမီးကို ကြိုက်နေတဲ့ လူငယ်လေးအနေနဲ့လား?

စဉ်းစားပြီးနောက် စီးပွားရေး ပုဂ္ဂိုလ်တစ်ယောက်အနေဖြင့် တင်ပြရန် ဆုံးဖြတ်လိုက်သည်။

ဤအထောက်အထားဖြင့်သာ လျိုထျန်းအန်နှင့် တန်းတူ ဆွေးနွေးနိုင်မည် ဖြစ်သည်။ အခြား အထောက်အထားမျိုးဆိုလျှင် စတင်ချိန်ကတည်းက ၇၀ ရာခိုင်နှုန်း ရှုံးနိမ့်နေလိမ့်မည်။

ကျိုးထျန်းက သူ့အထောက်အထားကို သတ်မှတ်ပြီးနောက် စတင် ပြောဆိုလိုက်သည်။

"ကျွန်တော် ထျန်းချိုင်နည်းပညာ ကုမ္ပဏီရဲ့ ပိုင်ရှင်အနေနဲ့ ခင်ဗျားကို ကျွန်တော်တို့ ကုမ္ပဏီရဲ့အထွေထွေ မန်နေဂျာ အဖြစ် တာဝန်ယူပေးဖို့ ဖိတ်ခေါ်ချင်ပါတယ်"

လျိုထျန်းအန်မှာ ချက်ချင်းမဖြေဘဲ ခဏငြိမ်သက်နေသည်။ နားထင်ကို ပွတ်သပ်လိုက်ပြီးနောက် မေးလိုက်သည်။

"မင်းက ပိုင်ရှင်ဆိုတော့ ငါ့ရဲ့လက်ရှိ အခြေအနေကို သိမှာပေါ့"

"သိတာပေါ့။ ခင်ဗျားက အခု တာဝန်ရပ်ဆိုင်း ခံထားရပေမဲ့ တစ်ယောက်ယောက်ကတော့ ခင်ဗျားရဲ့ တာဝန်တွေကို ယူထားပြီးပြီလေ"

"ပြီးတော့ ခင်ဗျားရဲ့ အဖွဲ့သားအားလုံးလည်း စစ်ဆေးမှု ခံနေရပြီး အထီးကျန် ဖြစ်နေကြပြီ"

"CEO တစ်ယောက်အနေနဲ့ ခင်ဗျားမှာ လစာကောင်း၊ အခြေအနေကောင်းနဲ့ စုငွေတွေ ရှိပေမဲ့ ခင်ဗျားရဲ့ တပည့်ဟောင်းတွေကတော့ မိသားစုကို ကျွေးမွေးရဦးမှာ။ သူတို့ အခြေအနေက ခင်ဗျားထက် ပိုဆိုးတယ်"

ကျိုးထျန်းက လျိုထျန်းအန်၏ အချက်အချာကို ထိလိုက်သည်။ သူသည် သစ္စာရှိသူတစ်ယောက် ဖြစ်သည်။ တချို့က နှစ်အနည်းငယ်၊ တချို့က တစ်ဆယ်ကျော် အတူ လုပ်ခဲ့ကြသူများ ဖြစ်သည်။

လူတိုင်း အလုပ်လက်မဲ့ ဖြစ်တော့မည့် အခြေအနေတွင် ကိုယ်တိုင် ဘေးကင်းသည်ထက် အစ်ကိုရင်းများသဖွယ် တပည့်များကို အရင် စဉ်းစားရမည် ဖြစ်သည်။

"မင်း ငါတို့ အခြေအနေကို သိရင် ငါ အခု မထွက်နိုင်ဘူးဆိုတာပိုသိမှာပေါ့။ ပြီးတော့ ငါ မင်းရဲ့ ကုမ္ပဏီကို သွားဖို့လည်း စိတ်မချနိုင်ဘူး ထင်တယ်"

ဒါလုံ၏ စစ်ဆေးမှုမှာ ဘာမှ မထူးခြားသေးဘဲ သူ အပြစ် တင်ခံနေရဆဲ ဖြစ်သည်။

အချက်အလက်ပေါက်ကြားခဲ့တဲ့ မန်နေဂျာတစ်ယောက်ကို ဘယ်ကုမ္ပဏီက ခန့်မှာလဲ?

ကျိုးထျန်းက မျက်ခုံးပင့်လိုက်ပြီး ပေါ့ပေါ့ပါးပါး ပြောလိုက်သည်။

"ကျွန်တော်သာ ဒီအချက်တွေကို ဂရုစိုက်နေမယ်ဆိုရင် ဒီနေ့ ခင်ဗျားကို စီးပွားရေး ဆွေးနွေးဖို့ ဖိတ်ပါ့မလား"

"ခင်ဗျား ဘာတွေးနေလဲဆိုတာ ကျွန်တော် သိတယ်။ ခင်ဗျားတင် မဟုတ်ဘူး၊ ခင်ဗျားရဲ့ အဖွဲ့သား အားလုံးကို ကျွန်တော် လိုချင်တာ"

"လစာလည်း လျှော့မှာမဟုတ်ဘူး။ ဒါလုံ ပေးတာထက် ပိုတောင်ပေးဦးမယ်။ ခင်ဗျားတို့ ထျန်းချိုင်ကို မလာချင်ရင်လည်း ကျွန်တော် အတင်းမလုပ်ပါဘူး၊ ခင်ဗျားတို့ ဆန္ဒအတိုင်းပါ"

"ဒါပေမဲ့ ခင်ဗျားကတော့ လာကို လာရမယ်၊ အဲ့ဒါက တခြား အခြေအနေတွေ အားလုံးအတွက် ကြိုတင်သတ်မှတ်ချက်ပဲ"

🍋 Chapter 144

ကျိုးထျန်းမှာ ငွေကြေး မလိုအပ်ပေ၊ သူ လိုအပ်နေသည်မှာ အရည်အချင်းရှိသူများဖြစ်သည်။

လျိုထျန်းအန်နှင့် သူ၏ အဖွဲ့သားများမှာ ဤလုပ်ငန်းနယ် ပယ်တွင် အတွေ့အကြုံရင့်ကျက်သူ ပညာရှင်များ ဖြစ်ကြသည်။

အဖွဲ့လိုက်သာ ခေါ်လာနိုင်ပါက ထျန်းချိုင်၏ အနာဂတ်အတွက် များစွာ အကျိုးရှိပေလိမ့်မည်။

မိုဘိုင်းဂိမ်းလုပ်ငန်းမှာ တဟုန်ထိုး တိုးတက်နေပြီး ကျိုးထျန်းမှာလည်း ၎င်းကိုရေရှည်အတွက် ငွေရပေါက်ရလမ်းတစ်ခုဟု သတ်မှတ်ထားသည်။

သူသည် ကုမ္ပဏီ၏ အရွယ်အစားကို ချဲ့ထွင်ရန် ကြိုတင် စီစဉ်ထားပြီး ဖြစ်သည်။ ယင်းချိုင်ပြိုလဲတော့မည့် အခြေအ နေတွင် အခြေအနေမကောင်းမှန်း သိကြသည့် လူအများစုမှာ အခြား ကုမ္ပဏီများနှင့် လျှို့ဝှက် ချိတ်ဆက်ပြီး ထွက်ခွာသွားကြသည်။

တချို့ဆိုလျှင် ရှန်ဟိုင်းမှ ရှန်ကျန်းသို့ပင် ပြောင်းရွှေ့သွားကြသည်။ မိမိကုမ္ပဏီ ပြိုလဲလုနီးပါး ဖြစ်နေသည်ကို မြင်လျှင် ပြိုင်ဘက်များကလည်း လူခေါ်ရန် ကြိုးစားကြမည်မှာ သဘာဝပင်။

ကျိုးထျန်းသာ အချိန်မီ ဝင်ရောက်မစွက်ဖက်ဘဲ ငွေသား အမြောက်အမြား ရင်းနှီးမြှုပ်နှံကာ အစောပိုင်း ဘောနပ်စ်များ ပေးမည်ဟု ကတိမပေးခဲ့လျှင် ကုမ္ပဏီမှာ ယခုထက်တောင် လူနည်းသွားနိုင်ပေသည်။

စဉ်းစားပြီးနောက် သူသည် လျိုထျန်းအန်တစ်ဦးတည်းကိုသာ အာရုံစိုက်ရာမှ သူ၏ လက်အောက်ငယ်သားများအားလုံးကိုပါ သိမ်းပိုက်ရန် ဆုံးဖြတ်လိုက်သည်။

လျိုထျန်းအန်၏ တုံ့ပြန်မှုကိုလည်း သူ ခန့်မှန်းမိသည်။ မူရန်၏ ဖခင်တစ်ယောက်အနေဖြင့် သူသည် အလွန် ကျိုးကြောင်းဆီလျော်သူ ဖြစ်သည့်တိုင်၊ ကျိုးထျန်း၏ လက် အောက်တွင် အလုပ်လုပ်ရန်မှာ ငြင်းဆန်ရန်ခက်ခဲလိမ့်မည်ဟု သူ ထင်သည်။

အဘယ်ကြောင့်ဆိုသော် ၎င်းမှာ သူ့အတွက် နာကျင်စရာ ဖြစ်နေမည်မို့။ ခမည်းခမက်များမှာ သမက်ဖြစ်သူက မိမိကို ချော့မော့နေရသည်ကို အကျင့်ဖြစ်နေတတ်ပြီး သူတို့၏ အာဏာကို ပြချင်တတ်ကြသည်။

သို့သော် ကျိုးထျန်း၏ လက်အောက်တွင် အလုပ်လုပ်ရပြီဆိုလျှင် ခမည်းခမက်တစ်ယောက်အနေဖြင့် အာဏာကို မည်သို့ ထိန်းသိမ်းနိုင်မည်နည်း။

လျိုထျန်းအန်မှာ အတိတ်က လက်အောက်ငယ်သားများကို စိုးရိမ်ပြီး ဖိတ်ခေါ်မှုကို လက်ခံလာနိုင်အောင် သူသည် တစ်ဖွဲ့လုံးကို ခေါ်ဆောင်ရန် အဆိုပြုလိုက်ခြင်း ဖြစ်သည်။

ထို့အပြင် မူရန်နှင့် ဆက်သွယ်မှု ရှိနေသဖြင့် လျိုထျန်းအန်မှာ ထျန်းချိုင်အတွက် ကြိုးစားပေးမည်ကို သူ စိုးရိမ်စရာ မလိုပေ။

အဆုံး၌ သူ ပိုမိုငွေရှာနိုင်လေလေ၊ သမီးဖြစ်သူ ပိုကောင်း သော ဘဝကိုရရှိလေလေဖြစ်ရာ မိသားစုအတွက် ငွေရှာပေးနေသကဲ့သို့ပင်။

လျိုထျန်းအန်မှာ ခဏမျှ စဉ်းစားပြီးနောက် ၃၊ ၄ မိနစ်အတွင်း ဆုံးဖြတ်ချက် ချလိုက်သည်။

"မင်း ကမ်းလှမ်းတဲ့ အခြေအနေတွေက တကယ်ဆွဲဆောင်မှု ရှိတယ်၊ ဒါပေမဲ့ ငါ သတိပေးစရာ နှစ်ချက် ရှိတယ်"

"ပထမအချက်၊ ဒါလုံကို ဘယ်သူ သစ္စာဖောက်လဲဆိုတာ ငါ မသိဘူး"

"ဒုတိယအချက်၊ ဒါလုံက ဒီလောက် တော်တဲ့သူတွေကို ပြိုင်ဘက် ကုမ္ပဏီတစ်ခုဆီ သွားလုပ်ဖို့ လွယ်လွယ်နဲ့ လွှတ်ပေးပါ့မလား?"

ကျိုးထျန်းက ခေါင်းညိတ်လိုက်သည်။ သူ လျိုထျန်းအန်ကို ပိုမို နားလည်လာသည်။

'ဒီလူက အမြော်အမြင် ရှိရုံတင်မကဘူး၊ ရိုးသားမှုလည်း ရှိတယ်။ ဒါက ရှားပါးတဲ့ အရည်အချင်းပဲ။ သူ ထောက်ပြတဲ့ အချက်နှစ်ချက်က လက်တွေ့ကျပြီး ငါ့အတွက် အခက်အခဲ ဖြစ်စေနိုင်ပေမဲ့ သူက ပွင့်ပွင့်လင်းလင်းပြောပြတယ်'

သူ ခဏ စဉ်းစားပြီးနောက် ပြန်ဖြေလိုက်သည်။

"ဒီအချက်နှစ်ချက်က ပြဿနာ မဟုတ်ပါဘူး၊ ကျွန်တော် ဖြေရှင်းပေးနိုင်ပါတယ်"

"ဒါလုံက ခင်ဗျားတို့ကိုလွှတ်ပေးဖို့ မဆန္ဒရှိတာ မှန်ပေမဲ့ ကျွန်တော် သူတို့ကို အမြင်ပြောင်းသွားအောင် လုပ်ပေးမယ်"

"သစ္စာဖောက်ကိစ္စနဲ့ ပတ်သက်လို့ကတော့ အဲ့ဒီလူက ဘယ်သူလဲဆိုတာ ကျွန်တော် သိပြီးသားပါ"

သူက ယုံကြည်မှုရှိရှိ ပြောလိုက်သည်။ လျိုထျန်းအန် မျက် လုံးများ ကျဉ်းမြောင်းသွားသည်။

'ဒီကောင်လေးက ဘာကြောင့် ဒီလောက် ယုံကြည်မှု ရှိနေတာလဲ? ဒါလုံရဲ့ ဒါရိုက်တာအဖွဲ့ကိုတောင် သူ ဘယ်လို လုပ်ပြီး အလျှော့ပေးအောင် လုပ်မှာလဲ? ငါ နားမလည်နိုင်ဘူး'

'ပြီးတော့ သစ္စာဖောက်ကိစ္စကိုရော သူ ဘယ်လို သိတာလဲ? ဒါကလည်း ထူးဆန်းတယ်'

'ဒီအရွယ်နဲ့ ယင်းချိုင်ကို ဝါးမြိုနိုင်ခဲ့တာပဲ အံ့ဩဖို့ ကောင်းနေပြီ၊ နောက်ထပ် ဘာများ လျှို့ဝှက်ချက် ရှိနေဦးမှာလဲ'

သူ အခု အစိုးရိမ်ဆုံးမှာ သစ္စာဖောက်၏အထောက်အထားပင်။

"ဒါဆိုရင် အရင်ဆုံး ပြောပြပါဦး၊ သစ္စာဖောက်က ဘယ်သူလဲ?"

ကျိုးထျန်းက တိုက်ရိုက် မဖြေဘဲ စာရွက်စာတမ်း အစုအဝေးကို ထုတ်လိုက်ကာ ပုံတစ်ပုံကို လျိုထျန်းအန်ရှေ့ ချပေးလိုက်သည်။

ဟွမ်ရှီကို ပြခဲ့သည့် ပုံအတိုင်းပင် သူတို့နှစ်ယောက်ကို တစ်ပုံတည်း ပြလိုက်ခြင်း ဖြစ်သည်။

ပုံထဲတွင် ဟောင်ကောင် ကုမ္ပဏီတစ်ခုတွင် ဖွင့်ထားသည့် အမေရိကန် စတော့ခ် အရောင်းအဝယ် အကောင့်တစ်ခုကို ပြထားသည်။

ဟွမ်ရှီ၏ နာမည်မှာ ထိပ်ဆုံးတွင် ထင်ထင်ရှားရှား ရေးထားသည်။

မြင်လိုက်ရသောအခါ လျိုထျန်းအန် မျက်မှောင်များမှာ တွန့်ချိုးလိုက်၊ ပြေလျော့လိုက် ဖြစ်နေပြီး အမူအရာမှာ တစ်မျိုးပြီး တစ်မျိုးပြောင်းလဲနေသည်။

မိနစ်အနည်းငယ်ကြာပြီးနောက် သူသည် ရှည်လျားစွာ သက်ပြင်းချလိုက်သည်။

"ဟူး..."

သူသည် မျက်နှာကို ဖုံးအုပ်လိုက်ပြီး အချိန်အတော်ကြာ တိတ်ဆိတ်နေသည်။ အမှန်တရားမှာ သူ့ရှေ့တွင် ရှိနေပြီး ဟွမ်ရှီ ဘာကြောင့် ဒီလိုလုပ်ရတာလဲဆိုတာကို သူ အကြမ်းဖျင်း သဘောပေါက်သွားသည်။

ငွေကြေးဆိုသည်မှာ ငွေကြေးပင်။ တရုတ် စတော့ခ်များနှင့် မတူဘဲ အမေရိကန် စတော့ခ်များတွင် နေ့စဉ် ဈေးနှုန်းကန့် သတ်ချက်မရှိပေ။

အတိုးအလျှော့ကို သုံးလိုက်လျှင် ဘီလျံနာတစ်ယောက်ပင် ချက်ချင်းဆိုသလို ဘာမှမကျန်ဖြစ်သွားနိုင်သည်။

"သူ ငွေ ဘယ်လောက် ဆုံးရှုံးသွားတာလဲ?"

"အမေရိကန် ဒေါ်လာ သန်း ၃ သန်းပါ။ ၁.၅ သန်းက ဟောင်ကောင် ငွေကြေးအဖွဲ့အစည်းတွေဆီက နှစ်စဉ်အတိုးနှုန်း ၃၀၀ ရာခိုင်နှုန်းနဲ့ ချေးထားတာပါ။ အဲ့ဒါက အတိုးကြီးတဲ့ ချေးငွေပါပဲ"

"ကျန်တဲ့ ၁.၅ သန်းထဲမှာ ၇ သိန်းက သူ့ပိုက်ဆံ၊ ကျန်တာတွေက တခြားသူတွေဆီက ချေးထားတာ၊ ဒါမှမဟုတ် တခြားသူတွေက စတော့ခ် အရောင်းအဝယ် လုပ်ဖို့ အပ်ထားတာတွေပါ"

"သူက ၁၀၀ ဆ အတိုးအလျှော့နဲ့ လုပ်ခဲ့တာ၊ တစ်ခါတည်းနဲ့ အကုန်လုံး ပြုတ်သွားတာ၊ တစ်ပြားမှ မကျန်တော့ဘူး"

ကျိုးထျန်းက သူ ရရှိထားသည့် အချက်အလက်များကို ထုတ်ပြောလိုက်သည်။ သို့သော် သူ ဖုံးကွယ်ထားသည့် အချက်အလက် အချို့တော့ ရှိသေးသည်။

ဤ ဟွမ်ရှီမှာ တကယ်ပင် ရဲတင်းလွန်းပြီး ရက်စက်သည်။ ၁၀၀ ဆ အတိုးအလျှော့ဖြင့် လျော့ရောင်းရဲသည်မှာ အများစု မလုပ်ရဲသည့် အလုပ်ပင်။

ကျိုးထျန်းသည် ဤအချက်အလက်ကို မြင်သောအခါ ဟွမ်ရှီကိုပင် လေးစားမိသွားသည်။ ဤလူကို ရှေးခေတ်ကာလသို့ ပစ်ချလိုက်ပါက တန်ခိုးကြီးသူ ဖြစ်လာနိုင်မည် ဖြစ်သည်။

သူ၏ ရဲတင်းမှုနှင့် သရုပ်ဆောင်မှုက တကယ်ကို ကောင်းသည်။

ထို့အပြင် ကျိုးထျန်းသည် သူ၏ ယခင် အရောင်းအဝယ် မှတ်တမ်းများကိုလည်း ကြည့်ဖူးသည်။

နှစ်နှစ်လောက်ကတည်းက စပြီး အရောင်းအဝယ်လုပ်ခဲ့ရာ သူ့ မူလ ရင်းနှီးငွေ ဒေါ်လာခြောက်သိန်းကျော်အထိ တိုးတက်လာခဲ့သည်။

သူသည် အရောင်းအဝယ်တွင် ပါရမီ ရှိသူတစ်ယောက် ဖြစ်သည်။ သို့သော် သူ၏ အကြီးမားဆုံး အားနည်းချက်မှာ ကံကြမ္မာ ဆိုးလွန်းခြင်းပင်။

အဘယ်ကြောင့်ဆိုသော် သူ၏ ဒေါ်လာ ၃ သန်းဖြင့် နောက် ဆုံး အားကုန်ထုတ်လိုက်သည့် အကြိမ်မှာ Ali ကို လျော့ ရောင်းလိုက်ခြင်းဖြစ်သောကြောင့်ပင်!

ထိုအချိန်တွင် ကျိုးထျန်းမှာ Ali ကို ဝယ်ယူ ထားသဖြင့် ဒေါ်လာ ၁၂၀ သန်း အမြတ်ရခဲ့သည်။

ဟွမ်ရှီမှာ လျော့ရောင်းလိုက်သဖြင့် အကုန်လုံး ဆုံးရှုံးသွားသည်။ အားလုံးမှာ ကံတရားပင်။

ကျိုးထျန်းသာ နောက်ကွယ်မှ စီစဉ်ပြီး ယင်းချိုင်နှင့် Ali ကို မဖျက်ဆီးခဲ့လျှင် ဟွမ်ရှီမှာ ဤသို့ လျော့ရောင်းမည် မဟုတ်ပေ။

ရက်သတ္တပတ် တစ်ပတ်ကျော်ကြာ အဆက်မပြတ်ကျဆင်းနေပြီးနောက် Ali မှာ ရုတ်တရက် မြင့်တက်လာမည်ကို သူ မည်သို့ သိနိုင်ပါမည်နည်း။

ကျိုးထျန်းလည်း အားမလိုအားမရ ဖြစ်မိသည်။ လုပ်လက်စ အလုပ်ကို ကောင်းကောင်း လုပ်ပါလား၊ ဘာလို့ အမေရိကန် စတော့ခ်ကို လိုက်လုပ်နေရတာလဲ?

တစ်ချက်မှားတာနဲ့ သူ စတင်ခဲ့တဲ့ မုန်တိုင်းဒဏ်ကြောင့် ကြေမွသွားခဲ့ပြီ။ ဟွမ်ရှီမှာ သူ ရခဲ့သည့် ဒေါ်လာ ၁၂၀ သန်းထဲတွင် တစ်စိတ်တစ်ပိုင်း ပါဝင်နေခဲ့ပုံရသည်။

၎င်းမှာ မရည်ရွယ်စွာနှင့် ဆိုးကျိုး ဖြစ်သွားခြင်းဖြစ်သည်။ ဟွမ်ရှီမှာ အတင်းအဓမ္မ ငွေရှင်းခံလိုက်ရပြီး ဆံပင်တစ်မျှင်တောင် မကျန်တော့ပေ။

သို့သော် ဤအကြောင်းကို ပြောပြလို့ မဖြစ်၊ ထာဝရလျှို့ ဝှက်ထားရမည် ဖြစ်သည်။ ဟွမ်ရှီသာ သိသွားလျှင် သူ့ကို အရှင်လတ်လတ် ပြုတ်စားချင်နေမှာ အသေအချာပင်။

လျိုထျန်းအန်နှင့် မူရန်သာ သူတို့၏ရှောင်ပေါင်ကို ဒီလို ဒုက္ခပေးလိုက်မှန်း သိသွားလျှင် သူ့အသားအရေကို အရှင်လတ် လတ် ခွာပစ်ကြလိမ့်မည်။

ကျိုးထျန်းမှာ နောင်တရသော်လည်း မျက်နှာပေါ်တွင် မပြခဲ့ပေ။ ဟွမ်ရှီ ငွေအများကြီး အကြွေးတင်နေသည်ကိုကြား လိုက်ရသော် လျိုထျန်းအန်မှာ မျက်လုံးကို မှိတ်လိုက်သည်။

"ဒါဆို... သူ ပြန်ဆပ်ပြီးပြီလား?"

သူ့ သားအရင်းသဖွယ် သဘောထားသည့် တပည့်ဖြစ်သူက သူ့ကို ဒုက္ခပေးလိုက်ကြောင်း သိသော်လည်း သူ ဒေါသ မထွက်ပေ။

ယင်းအစား ဟွမ်ရှီ၏ပြဿနာကို ဖြေရှင်းနိုင်မလားဟုသာ စိုးရိမ်နေသည်။ ဖြစ်ပြီးသွားသည့် ကိစ္စမှာ ပြန်ပြင်မရတော့သလို ဝမ်ချောင်မှာလည်း အောင်မြင်သွားပြီ ဖြစ်သည်။

"မလုံလောက်သေးဘူး၊ သူ ဒေါ်လာ တစ်သန်းလောက် လိုနေသေးတယ်"

"အဲ့လောက်တောင် လိုနေတာလား?"

"သူက တစ်ပတ်တစ်ခါ အတိုးပေးရတဲ့ ချေးငွေ ဖြစ်နေလို့ ဆပ်ဖို့ မလွယ်ဘူး"

"ဒါဆို... ငါ့မှာ စုထားတာ နည်းနည်း ရှိသေးတယ်၊ သူ့ကိုများ ကူညီပေးနိုင်မလား..."

လျိုထျန်းအန်က ဟွမ်ရှီအတွက် လမ်းစ ရှာပေးနေဆဲ ဖြစ်သည်။

သို့သော် ကျိုးထျန်းက ပြုံးလိုက်သည်။

"ခင်ဗျား သူ့အတွက် စိတ်ပူစရာ မလိုပါဘူး။ သူ ပြန်ဆပ်ဖို့ နည်းလမ်း ရှာပြီးသွားပြီ"

သူ ကော်ဖီခွက်ကိုချလိုက်ပြီး မျက်လုံးများမှာ တည်ကြည်သွားသည်။ တစ်ချိန်တည်းမှာပင် သူ့ လက်ကောက်ဝတ်ကို ညွှန်ပြလိုက်သည်။

လျိုထျန်းအန်မှာ အစတွင် နားမလည်ခဲ့သော်လည်း စက္ကန့်အနည်းငယ် ကြာပြီးနောက် ရိပ်မိသွားသည်။

"လက်ကောက်ဝတ် ?"

"နာရီ ?"

"နာရီ... နာရီလား ?"

"နာရီ!"

"အဲ့ဒီ နာရီနှစ်လုံး!"

လျိုထျန်းအန် လက်မှာ အနည်းငယ်တုန်ရီသွားသည်။ သူ၏ ခိုင်မာသော စိတ်ဓာတ်ဖြင့်တောင် ဤသို့သော တုန်လှုပ်မှုမျိုးကိုရင်ဆိုင်ရချိန်တွင် လုံးဝထိတ်လန့်သွားရသည်။