အခန်း (၁၅၁-၁၅၂)

🍋 Chapter 151

ထိုစုံတွဲကို တစ်ချက်ကြည့်လိုက်သည်။

အမျိုးသမီးမှာ ခန္ဓာကိုယ်အချိုးအစားပြေပြစ်ပြီး အသား အရေ စိုပြေလှသည်။ သူမနှင့် အမျိုးသားမှာ ရေကူးကန်ထဲတွင် ပျော်ပါးနေကြသည်။

သို့သော် အမျိုးသားမှာ သိသိသာသာကို ဝဝလုံးလုံး ဖြစ်နေပြီး ထိုအမျိုးသမီးထက် အသက်ငယ်ပုံရသည်။

သူတို့မှာ အတော်လေး ဝေးနေကြသဖြင့် တစ်ဦးနှင့်တစ်ဦး မသိကျွမ်းကြသောကြောင့် နှုတ်ဆက်ခြင်းမရှိကြပေ။

တကယ်တော့လည်း နှုတ်ဆက်စရာမလိုပါ၊ ကိုယ့်ကိစ္စကိုယ်သာ ဂရုစိုက်နေကြခြင်းက ပိုကောင်းသည်။

ကျိုးထျန်းမှာ ဤနေရာသို့ မကြာခဏ မလာဖြစ်ပေ။

မန်ဘာဖြစ်လာကြသော လူအများစုမှာ လူမှုအဆင့်အတန်း တူညီသူများ သို့မဟုတ် ပိုမိုမြင့်မားသူများကို သိကျွမ်းရန်၊ အဆက်အသွယ်များ တည်ဆောက်ရန်၊ အရက်သောက်ရင်း စကားပြောရန်၊ လုပ်ငန်းကိစ္စကြီးကြီးမားမားများကို အဆုံး အဖြတ်ပေးရန်အတွက် လာကြခြင်းဖြစ်သည်။

သို့သော် ကျိုးထျန်းအတွက်မူ ထိုအရာများမလိုအပ်ပေ။ သူသည် ပျော်ပါးရန်သာ လာခြင်းဖြစ်သည်။

တခြားလူတွေ ရှိနေသဖြင့် သူ၏ ဂုဏ်ယူရသော ရေကူးနည်းဖြစ်သည့် "ဟာ့စ်-စတိုင် ခွေးကူးနည်း" ကို မသုံးရဲပေ။

သို့သော် အခြားရေကူးနည်းမျိုးစုံကိုတော့ စမ်းသပ်ကြည့်လိုက်သည်။

ထိုစုံတွဲမှာမူ တစ်ချိန်လုံး အီစီကလီလုပ်နေကြပြီး အလေးအနက် ရေမကူးကြပေ။

သူ မနာလိုသည့်အကြည့်ဖြင့်သာ ကြည့်နေမိသည်။

"ကျောက်ရှင်းကို မခေါ်လာခဲ့သင့်ဘူး၊ မဟုတ်ရင် အခုဆို မုယန်နဲ့အတူ ရေကူးနေရပြီ"

နောက်ထပ် အနည်းငယ် ထပ်ကူးပြီးနောက် သူသည် ရေကူး ကန်နားတွင် ထိုင်နားရင်း ရေခဲစိမ်ထားသော ဆိုဒါဘူးတစ်ဘူး မှာလိုက်သည်။ အေးဆေးပင်။

လေ့ကျင့်ခန်းလုပ်ပြီးနောက် ရေခဲစိမ်ထားသော ကိုလာသောက်ရခြင်းက တကယ့်ကို အကောင်းဆုံးပင်။

သူ သောက်နေတုန်းမှာပင် မုတ်ဆိတ်မွေး ထူထပ်သော လူမိုက်တစ်ယောက် ရေကူးကန်ထဲသို့ လျှောက်ဝင်လာသည်။

ထိုသူမှာ ကျိုးထျန်းထက် ပိုရှည်ပြီး ၁ ဒသမ ၉ မီတာကျော်လောက် ရှိမည်။

သူ့ ခြေလှမ်းများမှာ အလျင်စလို ဖြစ်နေပြီး မျက်နှာပေါ်တွင် ဒေါသအငွေ့အသက်များ ပြည့်နှက်နေသည်။

ကျိုးထျန်းမှာ သူ ဝင်လာကတည်းက သတိပြုမိလိုက်သည်။

ဤမျှ ကြီးမားသော လူတစ်ယောက်က ဒေါသထွက်နေသည်ကို မြင်ရသည်မှာ သူ့ကို အနည်းငယ် ကြောက်လန့်စေသည်။

"ဒီလူက ဒီကို ဘာလာလုပ်တာလဲ? ပျော်ပါးဖို့ လာတဲ့ပုံ မပေါက်ဘူး"

သူ့ မေးခွန်းမှာ မကြာမီ အဖြေရသွားသည်။

"ဟွမ်ယွဲ့၊ မင်း ဘာလုပ်နေတာလဲ!!"

ထိုမုတ်ဆိတ်မွေးနှင့် လူက ထိုစုံတွဲကို အော်ဟစ်လိုက်သည်။

အသံမှာ အလွန်ကျယ်လောင်သဖြင့် ကျိုးထျန်းပင် နားအူသွားရသည်၊ ထိုသူ၏အသံအားကို သိသာစေသည်။

ထိုစုံတွဲမှာ ထိုအော်သံကြောင့် အလွန်တုန်လှုပ်သွားကြသည်။ အထူးသဖြင့် အမျိုးသမီးမှာ အမျိုးသားကို တွန်းဖယ်လိုက်ပြီး ရေကူးကန်နံရံကိုကိုင်ကာ အမြန်တက်ရန် ကြိုးစား သည်။

ထိုလူမိုက်က အမြန်ပြေးလာပြီး အမျိုးသမီးကိုဆွဲကာ မျက် နှာကိုလက်ဖြင့် တစ်ချက်ဖြန်းကနဲ ရိုက်လိုက်သည်။

ဖြန်း!

အသံမှာ တစ်နေရာလုံး ပဲ့တင်ထပ်သွားပြီး အမျိုးသမီးမှာ ခဏတာ မူးဝေသွားသည်။

ရေထဲရှိ ဝဝလုံးလုံးကောင်လေးမှာ ပို၍ ထိတ်လန့်သွားကာ ထိုလူမိုက်နှင့် ဝေးရာသို့ အမြန်ရေကူးသွားသည်။

"ခွေးကောင်၊ မင်း ပြေးလို့ရမယ် ထင်နေလား? ငါ မင်းကို သတ်ပစ်မယ်!"

ထိုလူမိုက်မှာ ရေထဲသို့ ခုန်ချလိုက်ပြီး ဝဝလုံးလုံး ကောင်လေးဆီသို့ အမြန်ရေကူးသွားသည်။

၎င်းတို့ခွန်အားမှာ ကွာခြားလွန်းသည်။ စက္ကန့်ပိုင်းအတွင်းမှာပင် ဝဝလုံးလုံး ကောင်လေး၏ခြေကျင်းဝတ်ကို ဆွဲမိပြီး သူ့ရှေ့သို့ ဆွဲခေါ်လာသည်။

"ငါ့မိန်းမနဲ့ ဖောက်ပြန်ရဲတယ်ပေါ့!"

ဒုန်း!

လက်သီးတစ်ချက်မှာ ရင်ဘတ်ကို တည့်တည့်ထိမှန်လိုက်ရာ ဝဝလုံးလုံး ကောင်လေး၏မျက်နှာမှာ ချက်ချင်း ခရမ်းရောင် ဖြစ်သွားသည်။

ဆိုဒါဘူးကို ကိုင်ထားသော ကျိုးထျန်းမှာ စိတ်ဝင်တစား ကြည့်နေသည်။

"ဟေး၊ ရေကူးတာကနေ မိသားစု ဒရမ်မာဖြစ်သွားပြီ၊ တကယ် စိတ်လှုပ်ရှားဖို့ ကောင်းလိုက်တာ!"

ရေကူးကန်ကယ်ဆယ်ရေးဝန်ထမ်း တစ်ယောက်က အမြန်ပြေးလာပြီး ရန်ပွဲကို တားဆီးရန် ကြိုးစားသည်။

ဤနေရာရှိ လူတိုင်းမှာ ချမ်းသာပြီး ဩဇာကြီးမားသူများ ဖြစ်ကြသည်။ တစ်ယောက်ယောက် ဒဏ်ရာရသွားရင် သူတို့ တာဝန်ယူနိုင်မှာ မဟုတ်ပေ။

သို့သော် ရေကူးသမားတစ်ယောက်ဖြစ်သော ထိုကယ်ဆယ်ရေးဝန်ထမ်းမှာ ထိုလူမိုက်ကို မတားနိုင်ပေ။

ဒုန်း! ဒုန်း!

ဒုန်း! ဖြန်း!

လက်သီးသုံးချက်နှင့် ပါးရိုက်တစ်ချက် ထပ်ရိုက်ခံရပြီးနောက် ဝဝလုံးလုံး ကောင်လေး၏ မျက်နှာမှာ ခရမ်းရောင်မှ ပြာနှမ်းသွားသည်။

ဤမြင်ကွင်းကို ကြည့်နေသော ကျိုးထျန်းမှာ လုကျိရှန်းက ကျန်းကွမ်ရှီးအားရိုက်နှက်သည့် ဇာတ်လမ်းကို သတိရသွားသည်။

သို့သော် သူ ဆက်မကြည့်နိုင်တော့ပေ။

ကျန်းကွမ်ရှီး သေတော့မည်!

သူသည် ရေကူးကန်ထဲသို့ ခုန်ဆင်းလိုက်ပြီး ကယ်ဆယ်ရေးဝန်ထမ်းနှင့်အတူ ထိုလူကို ဆွဲခွာရန် ကြိုးစားသည်။

ခြောက်ပေကျော်မြင့်သည့် လူနှစ်ယောက်ပင် သူ့ကို မနိုင်ကြပေ။

"ဒီလူ တကယ် ရူးသွားပြီ။ ဒါပေမဲ့လည်း ကိုယ့်မိန်းမ ဖောက်ပြန်တာကို ဘယ်ယောင်္ကျားကမှ သည်းခံနိုင်မှာ မဟုတ်ဘူးလေ!"

အသံဗလံများ ကျယ်လောင်လာသည်နှင့် အပြင်ဘက်မှ လုံခြုံရေးဝန်ထမ်းများ ရောက်လာကြသည်။

လူငါးယောက်၊ ခြောက်ယောက်လောက် ဝိုင်းဖမ်းမှသာ ထိုလူကို ထိန်းနိုင်ခဲ့သည်။

ထို့နောက် နောက်ထပ် နှစ်ယောက်က ရေထဲတွင် အသက်ရှူရခက်နေသော ဝဝလုံးလုံး ကောင်လေးကို ဆွဲထုတ်လိုက်သည်။

CPR တစ် round လုပ်ပြီးနောက် ဝဝလုံးလုံး ကောင်လေးမှာ မျက်လုံး ပြန်ပွင့်လာသည်။

သူက ဝနေပြီးသား ဖြစ်သော်လည်း အခုတော့ ဝက်ဝံပုကဲ့သို့ ရောင်ကိုင်းနေသည်။

ဝန်ထမ်းတွေ ရောက်နေပြီဖြစ်၍ ကျိုးထျန်းလည်း ဆက်မပါဝင်တော့ဘဲ တိတ်တဆိတ် ထွက်ခွာခဲ့သည်။

သူအနေဖြင့် ဘာမှ မတွေးပေ၊ ကြည့်ရှုခွင့်ရသည့်အတွက် ပိုက်ဆံပေးလိုက်တယ်လို့ပဲ သဘောထားလိုက်သည်။

မိန်းကလေးနှစ်ယောက်မှာ ရေပူစမ်းသို့ သွားကြပြီးနောက် ကုသမှု ခံယူကြကာ အားကစားစင်တာတွင် တင်းနစ်ပါကစားကြသည်။

ကျောက်ရှင်းဆိုသည့် ကောင်မလေးက သူမ၏ ဘီးတပ်ကုလားထိုင်ပေါ်တွင် ထိုင်လျက်ပင် တင်းနစ်ကစားနိုင်ကြောင်း ကြွားဝါနေသည်။

မုယန်လည်း သူမနှင့်အတူ လိုက်ကစားပေးသည်။ ကံကောင်းထောက်မစွာဖြင့် သူမတို့နှစ်ယောက်စလုံး တင်းနစ် ကောင်းကောင်း မကစားတတ်ကြသဖြင့် နောက်ဆုံးတွင် သရေကျသွားကြသည်။

နေ့လယ်စာစားချိန် ရောက်မှသာ မိန်းကလေးနှစ်ယောက်မှာ ရေချိုးလဲလှယ်ပြီး စားသောက်ဆိုင်သို့ သွားကြသည်။

ဤနေရာရှိ အစားအစာများမှာ ဟွမ်လုံ ချက်ပြုတ်ထားသည် Baoge စားသောက်ဆိုင်လောက် မကောင်းသော်လည်း တော်တော်လေး ကောင်းမွန်လှသည်။

ထို့အပြင် ကျန်းမာရေးအတွက် အာဟာရပြည့်ဝသော ဟင်းလျာများကို အဓိကထားပြီး မီနူးထဲတွင်လည်း အာဟာရဖြစ်ဖွယ် အစားအစာများ ပါဝင်နေသဖြင့် ခြေထောက်ဒဏ်ရာ ရထားသော ကျောက်ရှင်း အတွက် အဆင်ပြေသည်။

သူတို့ စားသောက်နေစဉ် ဝန်ထမ်းတစ်ယောက်က ကျိုးထျန်းထံသို့ ယဉ်ကျေးစွာ လာရောက်ပြီး စီးပွားရေးကတ်တစ်ခု ပေးအပ်လိုက်သည်။

"ဆာ... လူကြီးမင်းတစ်ယောက်က ဒီကတ်ကို ပေးလိုက်ခိုင်းတာပါ။ ဒီနေ့ညနေက သူ့အသက်ကို ကယ်တင်ပေးခဲ့တဲ့အတွက် ကျေးဇူးတင်ပါတယ်တဲ့"

သူသည် စီးပွားရေးကတ်ကို ယူကြည့်လိုက်သည်။

“ချောင်ကျွင်းကျဲ့”

“အို... ဒါက တခြားသူ့မိန်းမနဲ့ ပျော်ပါးနေတဲ့ ဝဝလုံးလုံး ကောင်လေးပဲ”

သူသည် ဝန်ထမ်းကို ပြန်မေးလိုက်သည်။

“သူ အခု ဘယ်မှာလဲ”

“သူ ထွက်သွားပါပြီ။ ဆေးရုံကို သွားတယ်လို့ ကြားပါတယ်”

ကျိုးထျန်း ခေါင်းညိတ်လိုက်သည်။

“ဆေးရုံကို သွားရမှာပေါ့။ လုကျိရှန်းရဲ့ လက်ချက်နဲ့ မသေတာတောင် ကံကောင်းလှပြီ”

ထို့နောက် သူက ထပ်မေးလိုက်သည်၊

“သူ ဒီမှာ မန်ဘာဝင်လား”

“မဟုတ်ပါဘူး၊ သူက အဲ့ဒီအမျိုးသမီးနဲ့ လာတာပါ။ အဲ့ဒီအမျိုးသမီးမှာ သူမ ခင်ပွန်းရဲ့ အပိုကတ် ပါပါတယ်”

ကျိုးထျန်း လျှာသပ်လိုက်သည်။

“ဒီကောင်က တကယ့်ကို ထူးဆန်းတယ်နော်။ တခြားသူ့မိန်းမနဲ့ အလကားပျော်ပါးရုံတင်မကဘဲ သူ့ခင်ပွန်းရဲ့ ကတ်ကိုပါ သုံးသွားသေးတယ်။ တော်တော် တော်တဲ့ကောင်ပဲ”

“ကောင်းပြီ၊ ကတ်ကို ငါယူထားလိုက်မယ်”

“ဟုတ်ကဲ့၊ တစ်ခုခု လိုအပ်ရင် ခေါ်လိုက်ပါ။ ကျွန်တော် ထွက်လိုက်ပါဦးမယ်”

ဝန်ထမ်းမှာ ယဉ်ကျေးစွာဖြင့် ၁၀ လှမ်းခန့် နောက်ဆုတ်သွားသည်။

“ကျိုးထျန်း၊ ဒါက ဘာလဲ” မုယန်က စိတ်ဝင်တစား မေးသည်။

သူသည် မိန်းကလေးနှစ်ယောက်ကို ထိုနေ့လည်မှ ဖြစ်ပျက်ခဲ့သမျှကို ပြုံးလျက် ပြောပြလိုက်သည်။

“ဒီကောင်က တကယ့်ကိုစက်ဆုပ်ဖို့ကောင်းတာပဲ၊ အရိုက်ခံရတာ ပိုတောင်နည်းသေးတယ်!”

ကျောက်ရှင်းက သူမ လက်သီးကို ဝှေ့ယမ်းလိုက်သည်။

သူမ၏ ဘဝအတွေ့အကြုံများက ထိုကဲ့သို့ မိန်းမရှုပ်သည့် အမျိုးသားများကို မုန်းတီးစေသည်။

"သူ အရိုက်ခံရတာ ထိုက်တန်ပါတယ်၊ ဒါကြောင့်လည်း ဝက်ဝံပု ဖြစ်သွားတာပေါ့။ ဒါပေမဲ့ ဒီလူကတော့ ကောင်းပါတယ်၊ ကျေးဇူးတင်တတ်တယ်ဆိုတော့ သူမှာလည်း ယောက်ျားကောင်းစိတ်ဓာတ် အနည်းငယ်တော့ ရှိသေးတယ်"

"မုယန်၊ နင် သူ့ကို သေချာကြည့်ထား သူလည်း အဲ့ဒီလိုမျိုး မဖြစ်ပါစေနဲ့"

ကျောက်ရှင်း မုယန်ကို ဆွဲခေါ်လိုက်ပြီး သူ့ကို တစ်ချက် စောင်းကြည့်လိုက်သည်။

မုယန်မှာ ဘာမှ ပြန်မပြောဘဲ တိတ်တဆိတ် ပြုံးနေသည်။

"ဟင်းတွေ အများကြီးစားနေတာတောင် မင်း ပါးစပ်မပိတ်နိုင်ဘူးလား" ဟု သူ မကျေနပ်သလို ပြောလိုက်သော်လည်း တကယ်တော့ မဒေါသထွက်ပေ။

"ပြီးတော့ Planet House ရဲ့ ရုံတင်နှုန်းက အခု ဘယ်လိုလဲ? ပြောင်းလဲမှု ရှိဦးမလား?"

"ရှိမှာပေါ့! ၅ ရာခိုင်နှုန်းလောက် တိုးလာပြီး ၅၅ ရာခိုင်နှုန်း ဖြစ်သွားပြီ။ အထူးအခြေအနေ မရှိဘူးဆိုရင် ဒါက နောက်ဆုံး ရုံတင်နှုန်း ဖြစ်လိမ့်မယ်။

ထပ်ပြီး ပြောင်းလဲမှုတွေ ရှိမယ်ဆိုရင်တော့ ရုံတင်ပြီးနောက်ပိုင်း ပရိသတ်ကြည့်ရှုမှုနှုန်းပေါ် မူတည်ပြီး ရုံတွေကပဲ ကြိုတင်ပြင်ဆင်မှုတွေ လုပ်လိမ့်မယ်။ ဘယ်လိုပဲဖြစ်ဖြစ် သူတို့ကလည်း ပိုက်ဆံရဖို့ လိုတာပဲလေ"

ရုပ်ရှင်အကြောင်း ပြောလိုက်သည်နှင့် ကျောက်ရှင်း မျက်လုံးများမှာ လင်းလက်သွားသည်။

"ကောင်းလိုက်တာ! ၅၅ ရာခိုင်နှုန်းဆိုတာ တကယ့်ကို အားသာချက်ပဲ။ ဒီရုပ်ရှင်က Box Office မှာ အောင်မြင်မှာ သေချာတယ်"

ထိုစကားကို ကြားလိုက်ရသဖြင့် သူ စိတ်ဓာတ်တက်ကြွသွားသည်။ သူ၏ ရင်းနှီးမြှုပ်နှံမှုမှာ အောင်မြင်မှာ သေချာသလောက်ရှိနေပြီ ဖြစ်သည်။

စနစ်က ပေးထားတဲ့ Box Office အမြင့်ဆုံး ပမာဏကို ရောက်နိုင်မလားဆိုတာတော့ မသိသေးပေ။

"မင်းတို့နောက်ပိုင်းမှာ အထူးသတိထားရမယ်၊ အဆိုးမြင်သတင်းတွေ လုံးဝမထွက်ပါစေနဲ့"

"နားလည်ပြီ၊ ငါ သူတို့ကို ပြောပြီးသွားပါပြီ၊ အထူးသဖြင့် သရုပ်ဆောင်တွေကိုပေါ့။ သူတို့ကုမ္ပဏီရဲ့ အစီအစဉ်အတိုင်း ပူးပေါင်းဆောင်ရွက်ပေးလိမ့်မယ်။

ဘာပဲပြောပြော ရုပ်ရှင်ဝင်ငွေကောင်းရင် သူတို့ပဲ အကျိုးကျေးဇူး ခံစားရမှာလေ၊ အမြတ်ဝေစု မရရင်တောင် သူတို့ရဲ့ အနာဂတ် လစာတွေအပေါ် အပြုသဘောဆောင်တဲ့ သက်ရောက်မှု ရှိမှာပါ"

"အိုကေ၊ သတိထားကြပါ"

စားသောက်ပြီးနောက် သူတို့သုံးယောက်မှာ ရုပ်ရှင်ရုံသို့ တန်းသွားကြသည်။

ထိုနေရာမှာ လူကြီးပိုင်းတွေပိုများပုံရပြီး လူမှုဆက်ဆံရေးအတွက်လာကြခြင်းဖြစ်နိုင်သည်။ ၎င်းတို့ လူ ၅၀၊ ၆၀ လောက်ဆံ့သည့် သီးသန့်ရုပ်ရှင်ခန်းကို တစ်ခန်းလုံး ငှားထားလိုက်သည်။

🍋 Chapter 152

သီးသန့်ရုပ်ရှင်ရုံတွင် လူအနည်းငယ် ရုပ်ရှင်ကြည့်နေကြစဉ် ကျိုးထျန်း ဖုန်းမြည်လာသည်။

"Boss ကျိုး၊ ရှင်ကလည်း လူကြားထဲမှာ အရှက်မရှိလိုက်တာ! ရုပ်ရှင်ကြည့်နေတုန်း ဖုန်းပိတ်ထားရမှန်း မသိဘူးလား"

ကျောက်ရှင်းက အခွင့်အရေးကို အသုံးချကာ ပြန်ပြီးကလိလိုက်သည်။

"ဒါက သီးသန့်ရုပ်ရှင်ရုံလေ၊ အပြင်လူမှ မရှိတာ"

ကျိုးထျန်းက ဖုန်းမြည်သံကို တိုးအောင် ဖုံးထားပြီး အပြင်ဘက်သို့ တစ်ယောက်တည်း ထွက်သွားလိုက်သည်။

ဖုန်းဆက်လာသူမှာ ချန်ကွမ်ချီ ဖြစ်သည်။

ဒါလုံနှင့် ပတ်သက်သည့် သတင်းဆိုသည်ကို သူချက်ချင်း သိလိုက်သည်။

"ဟေး၊ လောင်ချန်၊ ဘာကိစ္စရှိလို့လဲ"

"ဥက္ကဋ္ဌကျိုး၊ ဝမ်ချောင် နဲ့ ဒါလုံ ဒီနေ့ တိုက်ပွဲဖြစ်ကြပြီခင်ဗျာ!" ချန်ကွမ်ချီက အလွန်စိတ်လှုပ်ရှားနေသည်။

ထိုကုမ္ပဏီနှစ်ခုမှာ သူ၏ကုမ္ပဏီ ပြိုင်ဘက်များ ဖြစ်သောကြောင့် သူတို့ချင်း ရန်ဖြစ်ကြသည်ကို သူ အင်မတန် သဘောကျသည်။

ဖြစ်နိုင်လျှင် အပြန်အလှန် ပျက်စီးသွားစေချင်သည်။

ကုမ္ပဏီအတွက် ကောင်းခြင်းမှာ သူ့အတွက်လည်း ကောင်းခြင်းပင်။

အဘယ်ကြောင့်ဆိုသော် သူသည် ကုမ္ပဏီမှ ဘောနပ်စ်များ ရနေသော အဆင့်မြင့် အမှုဆောင်တစ်ယောက်ပင်။

ကျိုးထျန်းကတော့ တည်ငြိမ်နေဆဲပင်။ ၎င်းမှာ သူကိုယ်တိုင် လုပ်ခိုင်းလိုက်သောကြောင့် ထိုအကြောင်းကို သူ သိနှင့်ပြီးသား ဖြစ်သည်။

"အခု လက်ရှိ အခြေအနေကို အသေးစိတ်ပြောပြစမ်း"

"ဟဲဟဲ၊ ဒါလုံကတော့ ဒေါသပေါက်ကွဲနေတာပေါ့။ ဝူယုံ က Weibo မှာ ပို့စ်တင်ပြီး သူတို့ကို စိန်ခေါ်လိုက်တယ်။ ဒါလုံဆီက ဝန်ထမ်းတွေကို ကြိုက်သလောက် ခေါ်ထုတ်သွားမှာတဲ့"

"ဒါက လူသိရှင်ကြား ကြေညာလိုက်တာ၊ တကယ့်ကို စစ်ကြေညာလိုက်သလိုပဲ!"

"ပုံမှန်ဆိုရင် ဝန်ထမ်းခိုးတာမျိုးကို လျှို့ဝှက်စွာပဲ လုပ်လေ့ရှိကြတာပါ။ ဒီလောက်တောင် ရိုင်းစိုင်းတဲ့သူ မရှိဘူး။ ဝူယုံ ဘာတွေ ဖြစ်နေလဲ မသိဘူး၊ ရုတ်တရက်ကြီး ဒီလိုလုပ်လိုက်တာ"

"ကျွန်တော် ကြားတာတော့ ဒါလုံရဲ့ ဥက္ကဋ္ဌ လီဟိုင်ဘို က ဒီပို့စ်ကို မြင်တာနဲ့ သူ့ရဲ့ ယွမ်သိန်းဂဏန်းတန်တဲ့ လက်ဖက်ရည်အိုးကို ခွဲပစ်လိုက်‌ရောတဲ့"

ချန်ကွမ်ချီ အသံမှာ အောင်ပွဲခံနေသည့်အတိုင်း ပျော်ရွှင်နေသည်။

ယင်းချိုင်ဒုက္ခရောက်စဉ်တုန်းကလည်း ဒါလုံမှာ အမြဲတမ်းလိုလို ဝင်ရောက် အနိုင်ကျင့်ကာ ရန်လိုနေခဲ့ခြင်းပင်။

အခုအခါ သူတို့ကိုယ်တိုင် ဒီလိုမျိုး ကြုံနေရသောကြောင့် ချန်ကွမ်ချီ အလွန်ပျော်ရွှင်နေသည်။

ကျိုးထျန်းလည်း စိတ်ကျေနပ်နေမိသည်။

၎င်းမှာ သူလိုချင်သော ရလဒ်ပင်၊

သူမျှော်မှန်းထားတာထက်တောင် ပိုကောင်းနေသေးသည်။

ယွမ်သိန်းဂဏန်းတန်တဲ့ လက်ဖက်ရည်အိုးကို ဝယ်ထားသူဆိုတာ အဲ့ဒီပစ္စည်းကို တကယ်မြတ်နိုးတာပဲ ဖြစ်ရမယ်။

သူ့အချစ်တော်ကို ခွဲပစ်လိုက်ရလောက်အောင်ကို ဒေါသထွက်နေတာဆိုတော့ သူ တကယ်ပဲ ရူးသွပ်နေတာ ဖြစ်ရမယ်။

"နောက်ပြီးတော့ရော? ဒီလောက်နဲ့တင် မပြီးသေးဘူးမလား"

"ဥက္ကဋ္ဌကျိုးက တကယ်ကို ထက်မြက်တာပဲ။ ရှိသေးတာပေါ့။ ဝမ်ချောင်နည်းပညာ က လုပ်ငန်းနယ်ပယ်မှာ ကြေညာချက်တစ်ခု ထုတ်လိုက်တယ်။ ဒါလုံက သူတို့ကို ဂိမ်းအတုလုပ်မှုနဲ့ တရားစွဲထားတာကို ရုပ်သိမ်းမပေးမချင်း၊ ဒါလုံ ထုတ်သမျှ ဂိမ်းတွေကို သူတို့က လိုက်ကူးမှာတဲ့"

"ဒါလုံရဲ့ တုံ့ပြန်မှုကရော ဘယ်လိုလဲ"

"ဟားဟား၊ လီဟိုင်ဘို က လက်ဖက်ရည်အိုး အပိုင်းအစတွေကို ရှင်းနေတုန်းမှာပဲ ဒီသတင်းကို ကြားလိုက်ရတာ။ ဒေါသထွက်လွန်းလို့ ဘေးနားက ညှိရောင်ထိုးထားတဲ့ ပန်းအိုးကိုပါ ခွဲပစ်လိုက်သတဲ့။ အဲ့ဒီ ပန်းအိုးကို လွန်ခဲ့တဲ့ နှစ်နှစ်က Christie's မှာ ယွမ် ၆ သန်းကျော်နဲ့ ဝယ်ထားတာလို့ ကြားတယ်"

"ဘယ်လိုပဲဖြစ်ဖြစ်၊ နောက်ပိုင်းမှာ သူ နောင်တရသွားမှာပါ။ သူ ဒေါသထွက်လွန်းလို့ သတိလစ်မလိုတောင် ဖြစ်သွားပြီး ဆေးတွေ အများကြီး သောက်လိုက်ရတယ်၊ ဆေးရုံတောင် သွားရမလို ဖြစ်သွားတယ်"

ချန်ကွမ်ချီ ဖုန်းထဲက အသံမှာ ရယ်ချင်စိတ်ကို အနိုင်နိုင် ထိန်းထားရသည့်အသံဖြစ်သည်။

"ကောင်းပြီ၊ ဆက်ပြီး စောင့်ကြည့်နေပါ။ ဒါပေမဲ့ သတိထား၊ ထျန်းချိုင်ကုမ္ပဏီက ဘယ်သူ့ကိုမှ ဒီကိစ္စနဲ့ ပတ်သက်ပြီး မှတ်ချက်ပေးခွင့်မရှိစေရဘူး။ ကုမ္ပဏီမှာပဲဖြစ်ဖြစ်၊ အပြင်မှာပဲဖြစ်ဖြစ် အားလုံး ပါးစပ်ပိတ်ထားကြဖို့မှာထားလိုက်၊ နားလည်လား?"

"နားလည်ပါပြီ!"

သူ့ဥက္ကဋ္ဌ ယခုကဲ့သို့ လေးနက်စွာ ပြောလိုက်ခြင်းမှာ ပထမဆုံးအကြိမ် ဖြစ်သဖြင့် ချန်ကွမ်ချီလည်း သတိဝင်လာသည်။

"ကျွန်တော် အခုချက်ချင်း အတွင်းရေး အစည်းအဝေးခေါ်ပြီး အလေးပေးပြောပြလိုက်ပါ့မယ်။ စိတ်မပူပါနဲ့ ဥက္ကဋ္ဌကျိုး၊ ဘယ်သူမှ မမှန်ကန်တဲ့ စကားတွေ ပြောမှာ မဟုတ်ပါဘူး"

သူ့ဥက္ကဋ္ဌ ဒီလိုလုပ်ခိုင်းတာက ဒီပဋိပက္ခထဲကို မပါဝင်ချင်လို့ပဲ ဖြစ်မယ်လို့ သူ တွေးလိုက်သည်။

သို့သော် ထိုသူမှာ ကျိုးထျန်းရဲ့ အတွေးကို ခန့်မှန်းနိုင်မည် မဟုတ်ပေ။

ဥက္ကဋ္ဌ ဘာတွေးနေမှန်း ခန့်မှန်း၍မရပေ၊

သူတို့ရဲ့စဉ်းစားပုံက ဝန်ထမ်းတွေနဲ့ မတူဘူးလေ၊ အထူးသဖြင့် ဥက္ကဋ္ဌကျိုးပင်။

ကျိုးထျန်း ဖုန်းကို ပျော်ရွှင်စွာချလိုက်သည်။

‘နောက်ထပ် ရက်နည်းနည်းလောက် စောင့်ပြီး ရလဒ်ကို ကြည့်လိုက်ဦးမယ်။ ဒီလီဟိုင်ပေါ်နဲ့ မကြာခင် စကားပြောရတော့မယ် ထင်တယ်’

သူ၏ ပထမအဆင့်မှာ အလွန်အောင်မြင်ပုံရပြီး သူမျှော်မှန်းထားတာထက်တောင် ပိုကောင်းနေသေးသည်။

တစ်ဖက်လူကလည်း ဒေါသကြီးပြီး အလွယ်တကူ စိတ်တိုတတ်တဲ့သူ ဖြစ်နေခြင်းမှာ ကွက်တိပင်။

ထိုအချက်မှာ သူ့ အစီအစဉ်ကို ပိုပြီးချောမွေ့စေသည်။

သူ နောက်တစ်ဆင့်ကို စီစဉ်နေတုန်းမှာပင် ကျောက်ရှင်းမှာ ရုပ်ရှင်ရုံထဲမှ တိတ်တဆိတ် ထွက်လာသည်။

"ဥက္ကဋ္ဌကျိုး၊ သူဌေးကြီး၊ အားလားခင်ဗျာ"

သူမက ကျိုးထျန်းကို ကြည့်ပြီးပြုံးကာ လက်ဝှေ့ယမ်းပြသည်။ သူမ မျက်နှာတွင် လှည့်ကွက်တစ်ခုခုပါနေသကဲ့သို့ပင်။

"ဘာလဲ? မင်းဆီကနေ ကိစ္စကောင်းတစ်ခုခု မပါလာဘဲနဲ့ ငါ့ကို လာရှာတယ်ဆိုတာ မဖြစ်နိုင်ဘူးလို့ ခံစားနေရတယ်"

"အဲ့ဒီလို မပြောပါနဲ့၊ ကျွန်မမှာ အရေးကြီးတဲ့ ကိစ္စတစ်ခု ပြောစရာ ရှိလို့ပါ"

သူမ လမ်းလျှောက်ရ ခက်နေသည်ကို မြင်သော ကျိုးထျန်းမှာ သူမဆီသို့ ဦးစွာ လျှောက်သွားလိုက်သည်။

"ဘာဖြစ်တာလဲ? ရုပ်ရှင်မကြည့်ဘဲ ငါ့ကို လာရှာနေတာလဲ"

"ဒါလေး ကြည့်လိုက်ပါဦး"

ကျောက်ရှင်း သူမ၏ ဖုန်းကို တိုက်ရိုက် ပြလိုက်သည်။

"နာမည်ကြီးမင်းသမီးနဲ့ အမျိုးသားတစ်ယောက် ညဘက် လျှို့ဝှက်တွေ့ဆုံ၊ နေရာက မင်းသမီးရဲ့ အိမ်မှာ!"

ကျိုးထျန်း မျက်မှောင်ကြုတ်လိုက်သည်။ ဓာတ်ပုံအချို့ ဖြစ်ပြီး ထောင့်ချိုးကို ကြည့်ရသလောက် CCTV မှ ရိုက်ကူးထားသည့် စခရင်ရှော့များ ဖြစ်သည်။

ဓာတ်ပုံထဲက အမျိုးသမီးမှာ ကျောက်ရှင်းဖြစ်ကြောင်း အထင်အရှား သိသာသည်။ ဓာတ်ပုံက မကြည်လင်သော် လည်း သူမ မျက်နှာပုံစံနှင့် ခန္ဓာကိုယ်ကို ကြည့်၍သိနိုင် သည်။

ထို့အပြင် ဓာတ်ပုံထဲရှိ အမျိုးသားမှာ သူနှင့် အလွန်ရင်းနှီးနေသည်။

ထိုလူမှာ အလကားလူ မာခွန်းဖြစ်နေသည်!

"ဒါ ဘာကိစ္စလဲ"

"ကျွန်မ အရင်က ပြောခဲ့ဖူးတာ မှတ်မိလား၊ မာခွန်းက ကျွန်မ အိမ်ရှေ့မှာ ရုန်းရင်းဆန်ခတ်လုပ်ခဲ့ဖူးတယ်လေ။ ဒါက အဲ့ဒီညက ပုံတွေပါ။ တစ်ယောက်ယောက်က ကျွန်မကို အသရေဖျက်ဖို့ ကြိုးစားနေတာဖြစ်မယ်"

"အော်" ကျိုးထျန်း ပြောပြီး ရုပ်ရှင်ရုံဘက်သို့ ပြန်လှည့်သွားသည်။

"ရှင်က 'အော်' တစ်လုံးတည်းနဲ့ ပြီးသွားပြီလား!"

"ငါ ဘာလုပ်ပေးရမှာလဲ"

"မင်း ကိစ္စလေ၊ မင်းကိုယ်တိုင် ဖြေရှင်းလိုက်ပေါ့။ မင်းရဲ့ နောက်တွဲကိစ္စတွေကို ရှင်းပေးဖို့ ငါ့မှာ အချိန်မရှိဘူး"

"ချစ်ရတဲ့ ဥက္ကဋ္ဌကျိုး၊ ကျေးဇူးပြုပြီး ကူညီပေးပါ! ရှင့်မှာ စိတ်ကူးတွေ အများကြီးရှိတာပဲ၊ ဒါလေးက ရှင့်အတွက် အေးဆေးပါ"

ကျောက်ရှင်း သူမ၏ ပေကပ်ကပ်လုပ်တတ်သည့် စွမ်းရည်ကို ထပ်သုံးပြန်သည်။ သူ့ လက်မောင်းကို ဆွဲကိုင်ကာ လွှတ်မပေးပေ။

"ပြီးတော့၊ 'Dispair World' နဲ့ 'Planetary Home' ပူးပေါင်းဆောင်ရွက်မှုမှာ ကျွန်မက ကြော်ငြာဗီဒီယို ရိုက်ပေးထားတာလေ။ ဒီဗီဒီယိုက မထွက်သေးဘူး။ အကယ်၍ ကျွန်မရဲ့ ပုံရိပ် ပျက်စီးသွားရင် ကြော်ငြာအကျိုးသက်ရောက်မှု ပိုဆိုးသွားမှာပေါ့"

ကျိုးထျန်း သူ့မေးစေ့ကို ပွတ်လိုက်သည်။

"မင်း မုယန်နဲ့ တွဲနေတာ များသွားလို့လား၊ ပိုပြီးဉာဏ် ကောင်းလာတယ်နော်။ မင်းပြောတာ တကယ် အဓိပ္ပာယ်ရှိတယ်လို့ ငါထင်မိတယ်"

ကျောက်ရှင်း သူ သူမကို သွယ်ဝိုက်ပြီး လူမိုက်လို့ခေါ်နေမှန်း သိပေမယ့် သွားတွေကို စေ့ထားပြီး အပြုံးတစ်ခုကို အတင်းဖန်တီးလိုက်သည်။

"ဥက္ကဋ္ဌကျိုး၊ ကျွန်မပြောတာ အဓိပ္ပာယ်ရှိတယ်ဆိုရင်တော့ ရှင် ကူညီပေးရမှာပဲ"

"ကောင်းပြီ၊ ငါ့ကို ရက်နည်းနည်းလောက် အချိန်ပေး၊ ငါ စီစဉ်ပေးမယ်။ ငါ ဒီရက်ပိုင်း အတော်လေးအလုပ်ရှုပ်နေလို့"

"ဟုတ်ကဲ့၊ ဒါပေမဲ့ အမြန်ဆုံး ဖြစ်ပါစေနော်၊ အင်တာနက်ပေါ်က လူတွေရဲ့ တိုက်ခိုက်မှုခံရတဲ့သူ မဖြစ်ချင်ဘူး"

"ငါ သိပါတယ်၊ ဒါပေမဲ့ ငါ့အကူအညီ လိုချင်ရင် ငါပြောသမျှကို အကုန်နားထောင်ရမယ်၊ ဘာဖြစ်လာ ဖြစ်လာ စိတ်လှုပ် ရှားမနေနဲ့"

"ဟုတ်ကဲ့၊ နားလည်ပါတယ်"

သူသဘောတူလိုက်တာကို မြင်သည်နှင့် ကျောက်ရှင်း ချက်ချင်းလက်ကို လွှတ်လိုက်ပြီး နောက်သို့ နှစ်လှမ်းဆုတ်ကာ မျက်နှာကို ရှုံ့ပြလိုက်သည်။

"ရှင်ကမှ လူမိုက်!"

ထို့နောက် အဖမ်းခံရပြီးအရိုက်ခံရမှာ စိုးရိမ်သလိုနှင့် ခြေထောက်ကို ဆွဲ၍ အမြန်ပြေးသွားသည်။

"ဒီမိန်းကလေးတော့... ဟူး၊ လူမိုက်လို့ပဲ သဘောထားလိုက်ပါတော့မယ်"

သူ့ကို အကူအညီတောင်းခြင်းမှာ ကျောက်ရှင်းအတွက် မခက်ခဲပေ၊ အတော်လေး လွယ်ကူသည်။

သူတို့နှစ်ယောက် လေဆိပ်မှာ ဓာတ်ပုံရိုက်ခံရသည့် အဲ့ဒီကိစ္စမှာလည်း မရှင်းရသေးပေ။

‘အချိန်ကိုက်ပဲ၊ ဒီတစ်ခါတော့ အကုန်လုံးကို အပြီးရှင်းလိုက်တော့မယ်’

‘နောက်ပြီး ကျောက်ရှင်းရဲ့အတွင်းလူတွေထဲမှာ ရှိတဲ့ သူလျှိုကိစ္စကိုလည်း ရှင်းပစ်ရမယ်။ သူက ကြာပြီ မဟုတ်လား၊ အခုတော့ အရှုံးပေးချိန်တန်ပြီ!’

‘ဒီကိစ္စတစ်ခုလုံးက သူ့လက်ချက်ဆိုတာ သိသာနေတာပဲ၊ ဒါကြောင့် အကြွေးတွေကို အပြီးရှင်းဖို့ အခွင့်အရေးကောင်းပဲ’

ထို့နောက် သူသည် ခိုးရယ်နေဆဲဖြစ်သည့် ချန်ကွမ်ချီ ကို ဖုန်းဆက်ကာ ကျောက်ရှင်း ရိုက်ထားသည့် ကြော်ငြာဗီဒီယိုကို အချိန်မရွေး ထုတ်လွှင့်နိုင်အောင် ပြင်ဆင်ထားခိုင်းလိုက်သည်။

"နောက်တစ်ခုက၊ ဒီသူလျှိုနဲ့ စကားပြောဖို့လိုသေးတယ်"

ည ၁၀ နာရီခန့်တွင် အားလုံးပင်ပန်းနေကြပြီဖြစ်၍ ကျိုးထျန်း ၎င်းတို့အား ဟိုတယ်သို့ ကားဖြင့် ပို့ပေးလိုက်သည်။

ကံကောင်းစွာဖြင့် သူ မကြာသေးမီက Bentley ကားကို စီးနေသဖြင့် လေးယောက်စီး အဆင်ပြေသည်။

မဟုတ်လျှင် ဒဏ်ရာရနေတဲ့ ကျောက်ရှင်းမှာ တက္ကစီ ငှားစီးရတော့မည်။

ဟိုတယ်သို့ ရောက်သောအခါ သူ ထုံးစံအတိုင်း မပြန်ဘဲ သူတို့တည်းခိုသည့် အထပ်သို့ သွားလိုက်သည်။

ကျောက်ရှင်း၏လက်ထောက်ဖြစ်သူ ရှောင်မန်မှာ သူတို့နှင့် အတူရှိနေရမည်ဖြစ်သဖြင့် စျေးသက်သာသည့် အခန်းတွင် တည်းခိုနေသည်။

တံခါးခေါက်သံ ကြားသောအခါ ဝဝလုံးလုံး ရှောင်မန်မှာ ကျောက်ရှင်းမှ လာတွေ့သည်ဟု ထင်ခဲ့သော်လည်း တံခါးဖွင့်ကြည့်လိုက်သည့်အခါ ကျိုးထျန်း ဖြစ်နေသည်။

"ဟယ်လို ရှောင်မန်၊ မအံ့သြပါနဲ့၊ မင်းနဲ့ တစ်ခုပြောစရာရှိလို့ပါ"