အခန်း ၈၄၉

အပိုင်း (၈၄၉) မောက်မာလွန်းသော ကျင်းရှီရုံ

"ဘုန်း... ဘုန်း... ဘုန်း"

ပြင်းထန်သော ပေါက်ကွဲသံကြီးများက တိုက်ရိုက် ထွက်ပေါ်လာပြီး ပုရွက်ဆိတ်ဘီလူးကျွန်းပေါ်ရှိ အချိန်မီ မထွက်ခွာနိုင်ခဲ့သော လေယာဉ်ပျံအားလုံးမှာ ထိုကြောက်မက်ဖွယ် အင်အားကြီးမားလှသော ဖိအားကြောင့် ချက်ချင်းပင် လိမ်ကောက် ပေါက်ကွဲသွားတော့သည်။

ထိုမျက်စိဖြင့်မမြင်နိုင်သော ကြောက်မက်ဖွယ် စွမ်းအင်စက်ကွင်းကြီးသည် လိပ်ကြီး၏ ပါးစပ်ထဲမှ အသံလှိုင်းများအလား ပန်းထွက်လာသည်ကိုသာ မြင်လိုက်ရ၏။

အရှေ့ဘက်တွင် အလွန်တရာ ကြောက်မက်ဖွယ်ကောင်းသော ဆွဲငင်အားလှိုင်းကြီးတစ်ခု ဖြစ်ပေါ်လာသည်။

မျက်တောင်တစ်ခတ်စာ အချိန်လေးအတွင်းမှာပင် ပုရွက်ဆိတ်ဘီလူးကျွန်း တစ်ခုလုံးမှာ လိမ်ကောက်ပြီး ပုံပန်းသဏ္ဍာန် ပျက်ယွင်းသွားတော့သည်။

ပုရွက်ဆိတ်ဘီလူး ရေပေါ်ကျွန်း တစ်ကျွန်းလုံးသည် ထိုဆွဲငင်အားစက်ကွင်း၏ လိမ်ချိုးမှုကြောင့် ပြိုကျပျက်စီးနေပြီ ဖြစ်သည်။

ကျွန်းပေါ်ရှိ သစ်ပင်များ ကျိုးပဲ့ကုန်ပြီး စခန်းပေါ်ရှိ အဆောက်အအုံများမှာလည်း အဆက်မပြတ် ပြိုကျလာသည်။

စက္ကန့်အနည်းငယ်မျှ အချိန်အတွင်းမှာပင် ပုရွက်ဆိတ်ဘီလူးကျွန်း တစ်ခုလုံးမှာ ပုံစံလုံးဝ ပျက်ယွင်းသွားပြီး ဖုန်လုံးကြီးများ ထောင်းထောင်းထကာ တစ်တုံးတစ်ခဲတည်း လိမ်ကောက်သွားလေသည်။

အဝေးမှ လှမ်းကြည့်လိုက်ပါက မျက်စိဖြင့် မမြင်နိုင်သော လက်ကြီးတစ်ဖက်ဖြင့် ဆုပ်ချေခံလိုက်ရသည့် ရွှံ့စေးတုံးလေးတစ်တုံးအလား မူလပုံစံ လုံးဝ ပျောက်ကွယ်သွားတော့သည်။

ပြင်းထန်သော ပေါက်ကွဲသံကြီးများကြားတွင် အထဲမှ ထွက်ပေါ်လာသော နာကျင်စွာ အော်ဟစ်သံများကိုပင် မကြားနိုင်တော့ပေ။

လိပ်ကြီး၏ ခန္ဓာကိုယ်မှာ လျင်မြန်စွာ သေးငယ်သွားပြီး မကြာမီမှာပင် လူလတ်ပိုင်းအရွယ် လူဝကြီးတစ်ဦး၏ ပုံစံသို့ ပြန်လည် ရောက်ရှိသွားသည်။

ကျင်းရှီရုံက လက်နှစ်ဖက်ကို နောက်ပစ်ကာ သူ၏ မျက်စိရှေ့တွင် လုံးဝ လိမ်ကောက် ပြိုကျနေသော ကျွန်းကြီးကို ကြည့်ရင်း အပြုံးတစ်ခု ပေါ်လာပြီး တိုးတိုးလေး ရယ်မောလိုက်သည်။

ထို့နောက် သူက ခေါင်းလှည့်လိုက်ပြီး မလှမ်းမကမ်းတွင် အကာအကွယ်ဒိုင်းကို အလျင်အမြန် ဖွင့်လှစ်ထားလိုက်ပြီဖြစ်သော လေဟုန်စီး ငါးလိပ်စွန်ကျွန်းဆီသို့ အကြည့်ရောက်သွားပြန်သည်။

...

လွန်ခဲ့သော (၁၀) မိနစ်ခန့်က... လင်းယွမ်သည် မည်းမှောင်နေသော တိမ်တိုက်များကို ဖြတ်သန်းကာ ကြောက်မက်ဖွယ်ရာ မိုးကြိုးပစ်ခတ်မှုများကို ကျော်ဖြတ်ပြီးနောက် တိမ်လွှာများကို ဖောက်ထွက်၍ ထိုက်ယန်တောင် ကျွန်းပတ်လမ်းဆီသို့ ပျံသန်းလာခဲ့သည်။

မလှမ်းမကမ်းရှိ ထိုက်ယန်တောင် ကျွန်းပတ်လမ်းဆီမှ ပေါက်ကွဲသံကြီးများ အဆက်မပြတ် ထွက်ပေါ်နေသည်ကို သူ မြင်လိုက်ရသည်။

လင်းယွမ်၏ မျက်နှာအမူအရာမှာ ချက်ချင်းပင် အံ့သြထိတ်လန့်သွား၏။

"ဘာတွေဖြစ်နေတာလဲ"

သူက အရှိန်ကို ချက်ချင်း တင်လိုက်ပြီး မျက်တောင်တစ်ခတ်စာ အချိန်အတွင်းမှာပင် ထိုက်ယန်တောင် ကျွန်းပတ်လမ်းသို့ ရောက်ရှိသွားသည်။

သို့သော် မြေဝါနတ်ဘုရားကျွန်း ဘက်တွင်မူ ပြင်းထန်သော ပေါက်ကွဲသံကြီးများ ထွက်ပေါ်နေပြီး အကာအကွယ်ဒိုင်းမှာလည်း ပျက်စီးနေပြီ ဖြစ်သည်ကို တွေ့လိုက်ရသည်။

ပင်လယ်ထဲတွင်လည်း လေယာဉ်ပျက် အပိုင်းအစများစွာ ပြုတ်ကျနေလေသည်။

ယခုအချိန်တွင် ကျွန်း၏ ဝေဟင်၌ ဒိုင်နိုဆောပုံစံ သတ္တဝါကြီးတစ်ကောင်ကို အရပ်ပေ (၂၆၀) ကျော် မြင့်မားသော လူပုံစံ ဘီလူးကြီးတစ်ကောင်က လက်ထဲတွင် ဆုပ်ကိုင်ထားသည်ကို တွေ့လိုက်ရသည်။

ထို ဒိုင်နိုဆောပုံစံ သတ္တဝါကြီး၏ အရွယ်အစားမှာလည်း သေးငယ်လှသည်တော့ မဟုတ်ပေ။ ခန့်မှန်းခြေအားဖြင့် ပေ (၁၀၀) မှ (၁၃၀) ခန့်အထိ ရှိမည်ဖြစ်သည်။

သို့သော် ထိုမျှ ကြီးမားသော သတ္တဝါကြီးသည် ပေ (၂၆၀) ကျော်မြင့်သော လူပုံစံ ဘီလူးကြီး၏ ရှေ့တွင်တော့ လေတိုက်လျှင်ပင် လွင့်စဉ်သွားမည့်အလား အားနည်းလှပေသည်။

ထို လူပုံစံ ဘီလူးကြီးသည် တစ်ကိုယ်လုံးကို ရွှေဖြင့် သွန်းလုပ်ထားသည့်အလား တောက်ပနေပြီး လက်ခြောက်ဖက်၊ ခေါင်းတစ်လုံး မျက်နှာသုံးဖက် ပါရှိကာ ဘုရားဆင်းတုတော်တစ်ဆူနှင့် အလားသဏ္ဍာန် တူလှသည်။

ယခုအချိန်တွင် သူက လက်နှစ်ဖက်ဖြင့် ဒိုင်နိုဆော၏ ခေါင်းနှင့် အမြီးကို ဆုပ်ကိုင်ထားပြီး ပါးစပ်ကို ဟလိုက်သည်နှင့် ရွှေရောင် စွမ်းအင်လှိုင်းကြီးတစ်ခုက ပါးစပ်ထဲမှ တရှိန်ထိုး ပန်းထွက်လာတော့သည်။

"ဘုန်း"

ထို ရွှေရောင် စွမ်းအင်လှိုင်းကြီးသည် ဒိုင်နိုဆော၏ ဗိုက်ကို အနီးကပ်ကပ်လျက် တိုက်ရိုက် ပစ်ခတ်လိုက်ခြင်းပင် ဖြစ်သည်။

"ဒိုင်း" ဟူသော အသံတစ်ချက် ကြားလိုက်ရပြီး ထိုစွမ်းအင်လှိုင်းကြီးသည် ဒိုင်နိုဆော၏ ဗိုက်ကို ဖောက်ထွင်းသွားလေသည်။

သွေးများစွာ ပန်းထွက်လာပြီး ဒိုင်နိုဆောကြီးထံမှ စူးရှနာကျင်စွာ အော်ဟစ်သံကြီး ထွက်ပေါ်လာသည်။

လင်းယွမ်က ထိုဒိုင်နိုဆောကြီးကို မြင်လိုက်သည်နှင့် တစ်ပြိုင်နက် မည်သူဖြစ်ကြောင်း ချက်ချင်း သိလိုက်သည်။

သူကတော့ စစ်တပ်၏ နံပါတ်တစ် အစွမ်းပိုင်ရှင် ဖုန်းကျန့်ကုန်းပင် ဖြစ်ပေသည်။

၎င်းမှာ သူ၏ မျိုးရိုးဗီဇပုံစံဖြစ်သော အက်တမ်ဒိုင်နိုဆောပင် ဖြစ်၏။

ထိုအချိန်မှာပင် အနီးနားရှိ အခြားသော သတ္တဝါဆိုးကြီး အချို့ကလည်း လျင်မြန်စွာ ဝင်ရောက် တိုက်ခိုက်ကြသည်။

ဝေဟင်တွင် ပျံသန်းနေသော ရွှေရောင် လင်းယုန်ကြီးတစ်ကောင်က ပါးစပ်မှ ကြောက်မက်ဖွယ်ကောင်းသော ရွှေရောင် ရောင်ခြည်တန်းများကို ပန်းထုတ်ကာ ထိုလူပုံစံ ဘီလူးကြီးကို ဗုံးကြဲတိုက်ခိုက်လေသည်။

အခြား လိပ်ကြီးတစ်ကောင်ကလည်း ရေထဲမှ ထွက်လာပြီး ၎င်း၏ ပါးစပ်မှနေ၍ ကြောက်မက်ဖွယ်ကောင်းသော ရေခဲစွမ်းအင်များကို ပန်းထုတ်လိုက်သည်။

ကျောဘက်တွင် တောင်ပံတစ်စုံ ပါရှိသော အမျိုးသမီးပုံစံ သတ္တဝါတစ်ဦးကလည်း လေထဲတွင် ဝဲပျံနေပြီး လက်နှစ်ဖက်ဖြင့် ကြောက်မက်ဖွယ် စွမ်းအင်များကို စုစည်းကာ အားကုန် တွန်းထုတ်လိုက်သည်။

ထိုစွမ်းအင်လှိုင်းများသည် ဧရာမ တုန်ခါလှိုင်းကြီးများအဖြစ် ပြောင်းလဲသွားပြီး ရွှေရောင် လူပုံစံ ဘီလူးကြီးကို ပြင်းထန်စွာ ဝင်ရောက် တိုက်ခိုက်တော့သည်။

သို့သော် ထိုသူများ၏ ပူးပေါင်းတိုက်ခိုက်မှုများကို ရွှေရောင် ဘီလူးကြီးက လုံးဝ အရေးမစိုက်ပေ။

ရွှေရောင် ဘီလူးကြီးသည် ၎င်း၏ လက်ထဲရှိ အက်တမ်ဒိုင်နိုဆောကို အလွယ်တကူ ပစ်ပေါက်လိုက်သည်ကိုသာ မြင်လိုက်ရပြီး ချက်ချင်းပင် ကျယ်လောင်သော ပေါက်ကွဲသံကြီး ထွက်ပေါ်လာသည်။

သူက အက်တမ်ဒိုင်နိုဆော၏ ခန္ဓာကိုယ်ကို ဒိုင်းသဖွယ် အသုံးပြုကာ သူ့ရှေ့တွင် ကာကွယ်လိုက်ခြင်း ဖြစ်သည်။

ထိုတိုက်ခိုက်မှုများ အားလုံး အက်တမ်ဒိုင်နိုဆော၏ ကိုယ်ပေါ်သို့ ကျရောက်သွားတော့မည်ဟု ထင်မှတ်ရချိန်တွင် လေဟာပြင်ထဲ၌ ဧရာမ ဟင်းလင်းပြင် အက်ကွဲကြောင်းကြီးတစ်ခု ရုတ်တရက် ပွင့်ဟလာသည်။

ထိုတိုက်ခိုက်မှုများသည် အက်ကွဲကြောင်းထဲသို့ ဝင်ရောက်သွားပြီး ချက်ချင်းပင် ပျောက်ကွယ်သွားတော့သည်။

တစ်ဖန် ပြန်လည် ထွက်ပေါ်လာချိန်တွင်မူ ရွှေရောင် လူပုံစံ ဘီလူးကြီး၏ ကျောဘက်သို့ ရောက်ရှိနေလေပြီ။

"ဘုန်း... ဘုန်း... ဘုန်း"

ပြင်းထန်သော ပေါက်ကွဲသံကြီးများ ထွက်ပေါ်လာပြီး ရွှေရောင် ဘီလူးကြီးမှာ ထိုတိုက်ခိုက်မှု သုံးခုကြောင့် အနည်းငယ် ယိမ်းယိုင်သွားသည်။

သို့သော် အနည်းငယ်မျှ ယိမ်းယိုင်သွားရုံသာ ဖြစ်ပြီး သူက ခေါင်းကို အနည်းငယ် မော့ကာ လေဟာပြင်ထဲရှိ အက်ကွဲကြောင်းကို အံ့သြဟန်ဖြင့် လှမ်းကြည့်လိုက်သည်။

"ဟင်းလင်းပြင် အမျိုးအစား အစွမ်းလား"

စောစောက တိုက်ခိုက်မှုများသည် သူ့အတွက် ယားကျိကျိ ဖြစ်သွားရုံသာ ရှိသကဲ့သို့ သူက လုံးဝ ဂရုမစိုက်ပေ။

သေလုမျောပါး ဖြစ်နေပြီဖြစ်သော အက်တမ်ဒိုင်နိုဆောကို အလွယ်တကူ လွှင့်ပစ်လိုက်ပြီးနောက် အနီးဆုံးတွင် ရှိနေသော အသူရာရေခဲလိပ်ကြီးဆီသို့ ခြေလှမ်းကျဲကြီးများဖြင့် တိုက်ရိုက် လျှောက်သွားလေသည်။

အသူရာရေခဲလိပ်ကြီးမှာ ကျောက်ခိုင်၏ မျိုးရိုးဗီဇပုံစံပင် ဖြစ်သည်။ သို့သော် ဤပုံစံဖြင့်ဆိုလျှင် သူ၏ အလျင်မှာ အလွန် နှေးကွေးလှ၏။

ထိုအချိန်တွင် သူ၏ မျက်လုံးအိမ်များ ကျဉ်းမြောင်းသွားပြီး ချက်ချင်း နောက်ဆုတ်လိုက်သည်။

သို့သော် ခြေလှမ်း အနည်းငယ်သာ နောက်ဆုတ်ရသေးချိန်မှာပင် ကျင်းရှီရုံ၏ မျိုးရိုးဗီဇပုံစံက သူ့ကို အမီလိုက်လာခဲ့ပြီ ဖြစ်သည်။

ကျင်းရှီရုံ၏ ရွှေရောင် ဘီလူးကြီးက အသူရာရေခဲလိပ်ကြီး၏ လည်ပင်းကို လှမ်းဆွဲလိုက်သည်ကိုသာ မြင်လိုက်ရသည်။

အသူရာရေခဲလိပ်ကြီးက ချက်ချင်း ခေါင်းမော့လိုက်ပြီး ကြောက်မက်ဖွယ် အအေးဒဏ်ပါသော တုန်ခါလှိုင်းများကို ပန်းထုတ်လိုက်သည်။

သို့သော် ကျင်းရှီရုံက လက်တစ်ဖက်ဖြင့် ရှေ့မှ ကာကွယ်လိုက်ရုံသာဖြစ်ပြီး တုန်ခါလှိုင်းများကို အလွယ်တကူ တောင့်ခံကာ အောက်သို့ ဖိချလိုက်သည်။

"ဂျစ်... ဂျစ်... ဂျစ်"

လေထုထဲတွင် ရေခဲမှုန်များ အမြောက်အမြား အေးခဲသွားပြီး ထူထဲသော ရေခဲလွှာကြီးတစ်ခု ဖြစ်ပေါ်လာသည်။

သို့သော် ထိုအရာအားလုံးမှာ ဧရာမ လက်ဝါးကြီး၏ အလွယ်တကူ ဆွဲဖြဲခြင်းကို ခံလိုက်ရလေသည်။

"ကွာဟချက်က အရမ်း ကြီးလွန်းတယ်"

ကျောက်ခိုင်၏ ရင်ထဲတွင် မျှော်လင့်ချက်မဲ့သွားသည်။ ဤအစွမ်းပိုင်ရှင်က ဘယ်နေရာမှ ပေါ်လာမှန်း သူ တကယ်ပင် မသိပေ။

ဘာကြောင့် ထိုက်ယန်တောင် ကျွန်းပတ်လမ်းကို ရုတ်တရက် လာရောက် တိုက်ခိုက်ရသနည်း။

ရွှေရောင် ဘီလူးကြီး၏ လက်က အသူရာရေခဲလိပ်ကြီး၏ လည်ပင်းကို ဆုပ်ကိုင်မိတော့မည့် အချိန်မှာပင် ထိုလက်ကြီးက ရုတ်တရက် ရပ်တန့်သွားသည်။

ထို့နောက် သူက နောက်သို့ လှည့်လိုက်ပြီး သူ၏ ကျောဘက်သို့ လက်သီးဖြင့် အားကုန် ထိုးချလိုက်သည်။

ပေ (၂၆၀) ကျော် မြင့်မားသော ဘီလူးကြီး၏ လက်သီးတစ်ချက်က မည်သို့သော ပုံစံမျိုး ဖြစ်မည်နည်း။

၎င်းမှာ အိမ်တစ်လုံး မျက်နှာချင်းဆိုင်မှ ဝင်တိုက်လာသည်နှင့် မခြားနားပေ။

ထိုလက်သီးကြီးနှင့် မျက်နှာချင်းဆိုင်တွင်လည်း ရွှေရောင် လက်သည်းကြီးတစ်ခုက လေထုကို ဆွဲဖြဲကာ ပြိုင်ဘက်ကင်းသော ကြောက်မက်ဖွယ် ခွန်အားများဖြင့် တိုက်ရိုက် ဝင်ရောက်လာလေသည်။

အရွယ်အစားကို ကြည့်မည်ဆိုလျှင် ထိုရွှေရောင် လက်သည်းကြီးမှာ ရွှေရောင် လက်ဝါးကြီးထက်ပင် အနည်းငယ် ပို၍ ကြီးမားနေသေးသည်။

"ဘုန်း"

ဂြိုဟ်နှစ်လုံး ဝင်တိုက်မိသကဲ့သို့ ကျယ်လောင်သော ပေါက်ကွဲသံကြီး ထွက်ပေါ်လာသည်။

၎င်းတို့ နှစ်ဦး ထိပ်တိုက်တွေ့ဆုံရာ နေရာမှနေ၍ ဧရာမ တုန်ခါလှိုင်းကြီးက တိုက်ရိုက် ပေါက်ကွဲထွက်လာပြီး ကြီးမားသော လှိုင်းဂယက် အငွေ့အသက်များ ပြန့်ကျဲသွားတော့သည်။

ပေါက်ကွဲသံကြီးကြားတွင် ရွှေရောင် ဘီလူးကြီးမှာ သူ၏ ခန္ဓာကိုယ်ကို လုံးဝ ထိန်းမထားနိုင်တော့ဘဲ နောက်သို့ လွင့်စင်သွားလေသည်။

အခြားတစ်ဖက်ရှိ ရွှေရောင် ကြေးခွံများဖြင့် ဘီလူးကြီးမှာမူ တည်ငြိမ်စွာ ရပ်တည်နေပြီး သူ၏ တစ်ကိုယ်လုံးမှ ရွှေရောင် အလင်းတန်းများ ဖြာထွက်နေကာ ကြီးမားသော မျက်လုံးများထဲတွင် ကြောက်မက်ဖွယ် ဒေါသမီးများ တောက်လောင်နေလေသည်။

"ဆရာလင်း"

"အစ်ကိုလင်း"

သတ္တဝါဆိုးကြီးများထံမှ အံ့သြဝမ်းသာစွာ အော်ဟစ်သံများ ချက်ချင်း ထွက်ပေါ်လာသည်။

အသူရာရေခဲလိပ်ကြီး ကျောက်ခိုင်က ခေါင်းမော့လာပြီး စိတ်လှုပ်ရှားစွာဖြင့်... "အစ်ကိုလင်း... အစ်ကို... အစ်ကို ပြန်ရောက်လာပြီပဲ" ဟု အော်ပြောလိုက်သည်။

လင်းယွမ်က ပျံသန်းလာပြီး လေးနက်သော လေသံဖြင့်... "ဘာတွေဖြစ်နေတာလဲ... သူက ဘယ်သူလဲ" ဟု မေးလိုက်သည်။

သူက ဟန်ချက်ပြန်ထိန်းနိုင်သွားပြီဖြစ်သော ရွှေရောင် ဘီလူးကြီးကို လက်ညိုးထိုးပြကာ တည်ကြည်သော မျက်နှာဖြင့် မေးလိုက်ခြင်း ဖြစ်သည်။

တစ်ဖက်လူ၏ အရွယ်အစားကို ကြည့်ရုံဖြင့် ရန်သူမှာ အရပ်ပေ (၂၆၀) ကျော်အထိ ရှိနေပြီဖြစ်ရာ ဤအချက်တစ်ခုတည်းဖြင့်ပင် ထိုသူ၏ မျိုးရိုးဗီဇ ပြန်လည်ဖွဲ့စည်းခြင်း အဆင့်သည် ၈၀ ရာခိုင်နှုန်းအထက်သို့ ရောက်ရှိနေပြီဖြစ်ကြောင်း အကြမ်းဖျင်း ခန့်မှန်းနိုင်ပေသည်။

သို့သော် ဤအစွမ်းပိုင်ရှင်က ဘယ်နေရာမှ ထွက်လာရသနည်း။

ရွှေရောင် ဘီလူးကြီးက မတ်မတ်ရပ်လိုက်ပြီး လင်းယွမ်ကို အပေါ်အောက် အကဲခတ်လိုက်ကာ စုပ်သပ်ရင်း "မင်းက လင်းယွမ် ဆိုတာလား" ဟု မေးလိုက်သည်။

လင်းယွမ်၏ မျက်ဝန်းများ အေးစက်သွားပြီး "မင်းက ဘယ်သူလဲ" ဟု ပြန်မေးလိုက်သည်။

ရွှေရောင် ဘီလူးကြီးက လက်ပိုက်လိုက်ပြီး ရယ်မောလျက် "ဟားဟား... ငါလား... ငါ့နာမည်က ကျင်းရှီရုံ လို့ခေါ်တယ်... မင်း ငါ့နာမည်ကို ကြားဖူးလောက်မှာပါ" ဟု ပြောလိုက်သည်။

လင်းယွမ်၏ အကြည့်များ ချက်ချင်း စူးရှသွားပြီး သူ၏ရှေ့ရှိ ရွှေရောင် ဘီလူးကြီးကို အပေါ်အောက် အကဲခတ်လိုက်ကာ "မင်းက ကျင်းရှီရုံ ဆိုတာလား" ဟု မေးလိုက်သည်။

ကျင်းရှီရုံက ခေါင်းညိတ်လိုက်ပြီး "ဟုတ်တယ်... ငါပဲ... ဒီတစ်ခေါက် လာတာက မင်းရဲ့ အစွမ်းအစကို လာစမ်းသပ်ချင်လို့ပဲ" ဟု ဖြေလိုက်သည်။

"ငါ့ကို ရန်သူလို သဘောထားရဲမှတော့ မင်းဆီမှာ ဘယ်လောက်တောင် အစွမ်းအစတွေ ရှိနေလဲဆိုတာ ငါ ကြည့်ချင်သေးတယ်"

"စောစောက လက်သီးချက်က မဆိုးဘူး... နည်းနည်းတော့ စိတ်ဝင်စားဖို့ ကောင်းတယ်"

ကျင်းရှီရုံက ပြုံးလျက် နောက်ထပ် စကားဆက်လိုက်သည်။ "ဒါပေမဲ့ ဒီလောက် အဆင့်လေးနဲ့ဆိုရင်တော့... မင်းအတွက် သေလမ်းပဲရှိတယ်"

လူအားလုံး ချက်ချင်းပင် အမျက်ဒေါသ ထွက်သွားကြသည်။

လင်းယွမ်၏ အကြည့်များမှာ အေးစက်နေပြီး သူ့ရင်ထဲတွင်လည်း သတိဝီရိယများ ကြီးထွားလာခဲ့သည်။

မည်သို့ပင်ဖြစ်စေ ကျင်းရှီရုံ ဤမျှ မြန်မြန်ဆန်ဆန် ရောက်လာလိမ့်မည်ဟု သူ လုံးဝ ထင်မှတ်မထားခဲ့ပေ။

ထို့အပြင် တစ်ဖက်လူ ထုတ်ဖော်ပြသလိုက်သော အစွမ်းမှာလည်း သူ ထင်မှတ်ထားသည်ထက်ပင် ပို၍ ကြောက်မက်ဖွယ် ကောင်းနေသေးသည်။

ရန်သူသည် အလွန် ရှားပါးလှသော ပုံတူကူးချအစွမ်းကို ပိုင်ဆိုင်ထားရုံသာမက မျိုးရိုးဗီဇ ပြန်လည်ဖွဲ့စည်းခြင်း အဆင့်မှာလည်း ၈၀ ရာခိုင်နှုန်းအထက်သို့ ရောက်ရှိနေပြီ ဖြစ်သည်။

ဆက်ရန်...