အခန်း (၈၉၀-၈၉၂)

အခန်း (၈၉၀) ကောင်းကင်နဂါး၏ ကြည်လင်သော မျက်လုံး

နဂါးစွယ်တောင်တန်း၏ အထွတ်အထိပ်တွင်..,

နောက်တစ်နေ့တွင် ပင်မတောင်ထွတ်ရှိ တိတ်ဆိတ်သော ခြံဝင်းသို့ လီလော့ ရောက်ရှိလာသောအခါ၊ လီရုန်ယွင့်၊ လီလင်းကျင်းနှင့် လီဖုန်းတို့ ထိုနေရာတွင် စောင့်ဆိုင်းနေကြပြီဖြစ်သည်။

"လီလော့…"

လီလော့ လျှောက်လာသည်ကို မြင်သောအခါ လီရုန်ယွင့်က အလျင်အမြန် ရှေ့သို့ တိုးလာသည်။ သူမ၏ မျက်နှာပေါ်တွင် ဖုံးကွယ်၍မရနိုင်သော စိုးရိမ်ပူပန်မှုနှင့် ထိတ်လန့်မှုများကို သူ မြင်တွေ့နိုင်သည်။

လီလင်းကျင်း၏ ပြဿနာသစ်အကြောင်းကို သူမ ကြားသိထားပြီးဖြစ်ကြောင်း ထင်ရှားသည်။

လီလော့က သူမကို အနည်းငယ် နှစ်သိမ့်ပေးရန် ကြိုးစားလိုက်သည်။

"စိတ်မပူပါနဲ့ အဒေါ်ယွင့်… အကြီးအကဲကို အရင်ကြည့်ခိုင်းလိုက်ကြရအောင်…

ဘာပဲဖြစ်ဖြစ် သူက ဘုရင်တစ်ပါးပဲလေ…ဝမ်းကွဲအစ်မ လင်းကျင်းဆီကနေ ဝိညာဉ်စား အစစ်အမှန်နတ်ဆိုးကို ဖယ်ရှားပေးနိုင်မယ့် နည်းလမ်းတစ်ခု သူ့ဆီမှာ ရှိကောင်းရှိနိုင်ပါတယ်…”

"မနေ့က ငါ စမ်းကြည့်သေးတယ်၊ ဒါပေမယ့် လုံးဝ အသုံးမဝင်ခဲ့ဘူး… ဝိညာဉ်စား အစစ်အမှန်နတ်ဆိုးရဲ့ အရိပ်အယောင်ကိုတောင် ငါ ရှာမတွေ့နိုင်ဘူး…"

ထိုစကားကို ကြားသောအခါ လီလော့ အနည်းငယ် မျက်မှောင်ကြုတ်သွားသည်။

လီရုန်ယွင့်သည် ဆဋ္ဌမအဆင့် မြို့စား တစ်ဦးဖြစ်ပြီး လီဖုန်းထက် များစွာ အဆင့်မြင့်သော်လည်း၊ သူမ၏ ကြိုးစားအားထုတ်မှုများမှာ အသုံးမဝင်သေးပေ။ ဝိညာဉ်စား အစစ်အမှန်နတ်ဆိုး ရောထွေးနေမှုသည် သူ မျှော်လင့်ထားသည်ထက် များစွာ ပို၍ ရှုပ်ထွေးလှပုံရသည်။

တစ်ချိန်တည်းမှာပင်၊ ဝိညာဉ်စား အစစ်အမှန်နတ်ဆိုးသည် သူ ထင်ထားသလောက် ရိုးရှင်းမည်မဟုတ်ကြောင်း ခံစားလိုက်ရသည်။ ၎င်း၏ စွမ်းအားကို အခြေခံ၍ ကြည့်လျှင် ၎င်းသည် တတိယအဆင့် အစစ်အမှန်နတ်ဆိုး တစ်ကောင်မျှသာ ဖြစ်သော်လည်း၊ လီရုန်ယွင့်လို ဆဋ္ဌမအဆင့် မြို့စား တစ်ဦးပင် ၎င်းကို မဖယ်ရှားနိုင်ပေ။

ဒါက တကယ်ကို ထူးဆန်းလှသည်။

လီရုန်ယွင့်က လီလော့ကို ကြည့်ကာ ဝမ်းနည်းသော အသံဖြင့် ဆက်ပြောပြန်သည်။

"ဝိညာဉ်စား အစစ်အမှန်နတ်ဆိုးက တကယ်ကို ထူးဆန်းတယ်… အခု လင်းကျင်းက သူနဲ့ ရောထွေးနေပြီဆိုတော့၊ သူတို့ကို အောင်မြင်စွာ မခွဲခြားနိုင်ဘူးဆိုရင် အခြားသူတွေက နှစ်ယောက်စလုံးကို ရှင်းလင်းပစ်ဖို့ အကြံပြုကြမှာကို ငါ စိုးရိမ်တယ်… "

လူအများက ကမ္ဘာခြားသက်ရှိများကို မည်သို့ ရှုမြင်ကြသည်ကို သူမ သိရှိထားသည်။ လူသားတို့သည် ၎င်းတို့အပေါ် အမြဲတမ်း သတိထားပြီး ရန်လိုကြကာ၊ လူ့အဖွဲ့အစည်းရှိ အင်အားစု အသီးသီးက ၎င်းတို့ကို ကြီးမားသည့် ဘေးအန္တရာယ်တစ်ခုအဖြစ် သတ်မှတ်ကြသည်။

ယခု လီလင်းကျင်းက ကမ္ဘာခြားသက်ရှိ တစ်ကောင်နှင့် ပတ်သက်နေပြီဖြစ်ရာ၊ ဤအကြောင်းအရာမှာ အချိန်မရွေး ပေါက်ကွဲနိုင်သော အချိန်ကိုက် ဗုံးတစ်လုံး ဖြစ်နေသည်။

လုံခြုံရေးရှုထောင့်မှ ကြည့်မည်ဆိုလျှင်၊ သူမနှင့်ရောထွေးနေသော ကမ္ဘာခြားသက်ရှိကို မသန့်စင်နိုင်ပါက နှစ်ဦးစလုံးကို ရှင်းလင်းပစ်ခြင်းက အကောင်းဆုံးဖြစ်ပေမည်။

သို့သော်လည်း လီရုန်ယွင့်အဖို့ ဤအရာကို လက်ခံရန် အသင့်မဖြစ်သေးပေ။ သူမသည် လီလင်းကျင်းကို သမီးတစ်ယောက်လို ဆက်ဆံခဲ့ပြီး၊ သူမ၏ ဝိညာဉ်တစ်ဝက် စားသုံးခံရပြီးကတည်းက ရောက်ရှိနေသော ရက်စက်သည့် သေလုမြောပါး အခြေအနေမှ ဤမိန်းကလေးမှာ နောက်ဆုံးတော့ ပြန်လည်ကျန်းမာလာခဲ့ပြီဖြစ်သည်။

လီလင်းကျင်း အသတ်ခံရသည်ကို မြင်တွေ့ရခြင်းက သူမအတွက် ကြီးမားလွန်းသော ထိုးနှက်ချက်တစ်ခု ဖြစ်လာပေလိမ့်မည်။

"ဝမ်းကွဲအစ်မ လင်းကျင်းက သူမရဲ့ အသိစိတ်နဲ့ ခန္ဓာကိုယ်အပေါ် ထိန်းချုပ်မှုကို ထိန်းသိမ်းထားနိုင်သရွေ့၊ သူမကို ရှင်းလင်းပစ်ဖို့ မလိုဘူးလို့ ကျွန်တော် ခံစားရတယ်… သူမကို ကာကွယ်ပေးဖို့ ကျွန်တော် အကောင်းဆုံး ကြိုးစားပါ့မယ်လို့ သူမကို ကတိပေးထားပါတယ်… ကျွန်တော့်ကတိကို ကျွန်တော် သေချာပေါက် တည်အောင် လုပ်မှာပါ…ဒါပေမယ့်၊ ဒီအရာအားလုံးက ဝမ်းကွဲအစ်မ လင်းကျင်း သူမရဲ့ အသိစိတ်ကို ထိန်းသိမ်းနိုင်မှပဲ ဖြစ်မှာပါ…အကယ်လို့ သူမသာ ဝိညာဉ်စား အစစ်အမှန်နတ်ဆိုးကို မထိန်းချုပ်နိုင်တော့ဘူးဆိုရင်၊ ဒါမှမဟုတ် သူမကို လွှမ်းမိုးသွားတယ်ဆိုရင်... အဒေါ်ယွင့် သူမကို ဆုံးရှုံးဖို့ ပြင်ဆင်ထားရလိမ့်မယ်…”

လီလော့ ပြောလိုက်သော နောက်ဆုံးစကားမှာ တကယ်ကို ရက်စက်လှသည်။ မည်သို့ပင်ဆိုစေ၊ ၎င်းမှာ ပြောရန် လိုအပ်သော စကားတစ်ခွန်းဖြစ်သည်။ ထိုသို့သော အခြေအနေမျိုး ဖြစ်လာနိုင်ခြေသည် လုံးဝ မရှိသည်တော့ မဟုတ်ပေ။ ထိုသို့ ဖြစ်လာပါက၊ လီလင်းကျင်းသည် ဝိညာဉ်စား အစစ်အမှန်နတ်ဆိုး၏ အပြည့်အဝ ဝါးမြိုခြင်းကို ခံရနိုင်ပြီး သူမသည် သူမကိုယ်တိုင် ဖြစ်တော့မည် မဟုတ်ပေ။

"ငါ နားလည်ပါတယ်.."

အကယ်၍ ထိုအခြေအနေအထိ ရောက်သွားပြီဆိုရင်၊ သူမရဲ့ နှလုံးသား ဘယ်လောက်ပဲ ကွဲကြေနေပါစေ လီလင်းကျင်းကို ဆက်ပြီး ကာကွယ်ပေးနိုင်တော့မည်မဟုတ်ပေ။

လောလောဆယ်တော့၊ အဲဒီအချိန်မတိုင်ခင် သူမရဲ့ တူမလေးကို ကာကွယ်ဖို့ပဲ အာရုံစိုက်ထားနိုင်ပေမည်။

"သွားကြစို့… အကြီးအကဲဆီ သွားပြီး သူ ဘာပြောမလဲဆိုတာ ကြည့်ကြတာပေါ့…"

ထို့နောက်၊ သူ ကိုယ်တိုင် တံခါးများကို ဖွင့်ကာ ဦးစွာ ဝင်ရောက်သွားလေသည်။ဤသည်ကို မြင်တွေ့လိုက်ရသောအခါ လီရုန်ယွင့်၊ လီဖုန်းနှင့် လီလင်းကျင်းတို့လည်း အချင်းချင်း စိုးရိမ်တကြီး အကြည့်များ ဖလှယ်လိုက်ကြသည်။

သူတို့၏ အမြင်တွင်၊ လီကျင်းဇယ်သည် နဂါးစွယ်ကလန်၏ ခေါင်းဆောင်ဖြစ်သည်။ သူသည် အမြဲတမ်း စိတ်သဘောထား

တင်းမာပြီး လေးနက်သူဖြစ်သည်။

လီရုန်ယွင့်အတွက်ပင် သူ့ကို တွေ့ဆုံရခြင်းသည် အမြဲတမ်း စိတ်ဖိစီးစရာ အတွေ့အကြုံတစ်ခု ဖြစ်သည်။ အချိန်အများစုတွင်၊ လီကျင်းဇယ်က မည်သည့်ကန့်ကွက်သံမျှ မပါဘဲ သဘောတူသည့်အနေဖြင့် ခေါင်းညိတ်ရုံသာ ပြုလုပ်လေ့ရှိသည်။

လီဖုန်းအတွက်မူ ပို၍ပင် ဆိုးရွားသေးသည်၊ အဘယ်ကြောင့်ဆိုသော် သူသည် အနောက်ဘက်မြို့တော်၏ မြို့တော်ဝန် တစ်ဦးမျှသာ ဖြစ်သည်။ထို အဆင့်အတန်းမျိုးရှိသူ တစ်ဦးအတွက် လီကျင်းဇယ်ကို တွေ့ဆုံခွင့်ရရန်မှာ အလွန် ရှားပါးလှသည်။

သူတို့သုံးဦး လီလော့နောက်မှ ခြံဝင်းထဲသို့ ဝင်ရောက်လာပြီး၊ သစ်ပင်များစီတန်းနေသော လမ်းကလေးတစ်လျှောက် အချိန်အနည်းငယ် လျှောက်သွားပြီးနောက် မှန်တစ်ချပ်ကဲ့သို့ ကြည်လင်နေသော ရေကန်တစ်ခုရှေ့သို့ ရောက်ရှိသွားကြသည်။

ရေကန်ဘေးတွင် ကျောက်သားနားနေဆောင်တခု ရှိပြီး၊ အဖိုးအိုတစ်ဦးက ထိုနေရာတွင် ထိုင်ကာ ငါးမျှားနေသည်။

လီလော့က သူတို့သုံးဦးကို နားနေဆောင်သို့ ခေါ်သွားပြီးနောက် အနည်းငယ် ဦးညွှတ်ကာ အဖိုးအိုကို ယဉ်ကျေးစွာ နှုတ်ဆက်လိုက်သည်။

"အဘိုး…"

လီကျင်းဇယ်က တဖက်လှည့်ကြည့်ကာ လီလော့ကို အလျင်အမြန် တစ်ချက် ကြည့်လိုက်သည်။ ဤအခိုက်အတန့်တွင်၊ အေးစက်ပြီး လေးနက်သော မျက်နှာပေါ်တွင် ပျော်ရွှင်မှု အရိပ်အယောင်လေးတစ်ခု ပေါ်လာပြီး ….

"မင်း သုံးရောင်ခြယ် ဖန်သားနတ်ဆိုးအဆင့်ကို ရောက်သွားပြီပဲ "

"အမှောင်နယ်မြေထဲ သွားတုန်းက ရှားပါးတဲ့ အခွင့်အရေးတစ်ခုနဲ့ မတော်တဆ ကြုံခဲ့လို့ပါ…”

"မဆိုးဘူး…အခုဆိုရင် မကြာခင် ကျင်းပမယ့် နဂါးခေါင်းဆောင် ရွေးချယ်ပွဲ မှာ မင်း နိုင်ဖို့ အခွင့်အရေး ပိုများသွားပြီ"

ထို့နောက် သူ့ မျက်လုံးများက အခြားသုံးဦးဆီသို့ ရွေ့သွားခဲ့သည်။

"ကလန်ခေါင်းဆောင်…"

လီကျင်းဇယ်၏ အကြည့်များ ရောက်ရှိလာသည်ကို သတိပြုမိသည်နှင့်တပြိုင်နက် လီရုန်ယွင့်က စိုးရိမ်တကြီး နှုတ်ဆက်လိုက်သည်။ တစ်ချိန်တည်းမှာပင်၊ လီဖုန်းနှင့် လီလင်းကျင်းတို့ကလည်း အလျင်အမြန် ဦးညွှတ်လိုက်ကြသည်။

လီကျင်းဇယ်က အခြေခံ ယဉ်ကျေးမှုအတွက် လက်များကို ဝှေ့ယမ်းလိုက်ပြီးနောက်၊ သူ့ အကြည့်များက လီဖုန်းထံတွင် ရပ်တန့်သွားသည်။

"အနောက်ဘက်ဒေသ လီမိသားစုက ငါတို့ရဲ့ ဆွေမျိုးတွေပဲ…အတိတ်ကဆိုရင်၊ မင်းတို့ရဲ့ အကြီးအကဲ တစ်ယောက်က ငါနဲ့အတူ ကျင့်ကြံဖူးတယ်…"

"မှန်ပါတယ်… ဒီအကြောင်းကို ကျွန်တော်တို့ မိသားစုရဲ့ မှတ်တမ်းတွေထဲမှာ မှတ်တမ်းတင်ထားပါတယ်… အနောက်ဘက်ဒေသ လီမိသားစုက အကြီးအကဲတွေက ကလန်ခေါင်းဆောင်ရဲ့ ဦးဆောင်မှုကို လိုက်နာဖို့ ကျွန်တော်တို့ကို ညွှန်ကြားထားပါတယ်….”

သို့သော်လည်း၊ လီကျင်းဇယ်သည် လီဖုန်း၏ မြှောက်ပင့်ပြောဆိုမှုကို သိပ်ပြီး ဂရုမစိုက်ပေ။ ယင်းအစား၊ သူက လီလင်းကျင်းဘက်သို့ လှည့်ကာ မေးလိုက်သည်။

"ဒီကောင်မလေးက အစစ်အမှန်နတ်ဆိုး ကမ္ဘာခြားသက်ရှိ ဝါးမျိုခံရတဲ့ တစ်ယောက်လား…"

လီကျင်းဇယ်၏ အကြည့်များ သူမဆီသို့ ရွေ့လာသည်ကို သတိပြုမိလိုက်သောအခါ လီလင်းကျင်းအပေါ် ရုတ်တရက် ကြီးမားလှသော ဖိအားတစ်ခု ကျရောက်လာပြီး သူမ၏ နှလုံးသားထဲတွင် ဖော်ပြ၍မရနိုင်သော အကြောက်တရားတစ်ခု ပေါ်ပေါက်လာသည်။

အဘယ်ကြောင့်ဆိုသော် လီကျင်းဇယ်သာ အလိုရှိပါက လျှပ်တစ်ပြက်အတွင်းမှာပင် သူမကို အရိပ်အယောင်မရှိ ပျောက်ကွယ်သွားအောင် လုပ်နိုင်စွမ်းရှိကြောင်း သူမ သိထားသောကြောင့်ဖြစ်သည်။

ဤဖိနှိပ်နိုင်သော ဖိအားအောက်တွင်၊ ပုံမှန်အားဖြင့် တည်ငြိမ်နေသော စိတ်နေသဘောထား ရှိလင့်ကစား သူမ၏ လက်သီးများကို မဆုပ်ဘဲ မနေနိုင်တော့ပေ။ သူမ၏ ခန္ဓာကိုယ်ပင် အနည်းငယ် စတင်တုန်ယင်လာသည်။

ဤအခိုက်အတန့်တွင် လီလော့က စကားဝင်ပြောလိုက်သည်။

"ဟုတ်တယ် အဘိုး… ကျွန်တော် သုံးရောင်ခြယ် ဖန်သားနတ်ဆိုးအဆင့်ကို ရောက်ဖို့ ကူညီပေးခဲ့တဲ့ ရှားပါးတဲ့ အခွင့်အရေးကို ရဖို့ဆိုတာ ဝမ်းကွဲအစ်မ လင်းကျင်းရဲ့ အကူအညီကြောင့်ပါ… ဒါကြောင့်မလို့၊ သူမကို ကူညီဖို့ နည်းလမ်းတစ်ခုခုများ ရှိမလားဆိုပြီး ကျွန်တော် ခေါ်လာခဲ့တာပါ…"

သူ စကားပြောပြီးသည်နှင့်တပြိုင်နက်၊ လီလင်းကျင်းအပေါ် ကျရောက်နေသော ကြောက်မက်ဖွယ်ကောင်းသည့် ဖိအားများ တဖြည်းဖြည်း မှေးမှိန်သွားသည်။ထိုအခါမှသာ သူမ၏ နှလုံးသားထဲတွင် သက်ပြင်းတစ်ချက်ချလိုက်ပြီး လီလော့ကို ရိုးသားစွာ ကျေးဇူးတင်လိုက်သည်။

သူ ဘာကြောင့် ဤစကားများကို ပြောခဲ့ရသည်ကို သူမ နားလည်ပါသည်။

"အစီရင်ခံစာတွေကို ငါ ဖတ်ပြီးပြီ… မင်းတို့ ကြုံခဲ့ရတဲ့ ဝိညာဉ်စား အစစ်အမှန်နတ်ဆိုးက တကယ်ကို ထူးဆန်းတယ်နော်…"

ဤနေရာအရောက်တွင် လီကျင်းဇယ်က လီဖုန်းဘက်သို့ လှည့်ကာ မေးလိုက်သည်။

"အရင်တုန်းက အနောက်ဘက်ဒေသက ဝိညာဉ်စား အစစ်အမှန်နတ်ဆိုးနဲ့ ပတ်သက်ပြီး ဘာမှ သတင်းမပို့ခဲ့ဘူး မဟုတ်လား…”

" အကြီးအကဲ၊ ကျွန်တော့်ရဲ့ အရည်အချင်းမရှိမှုအတွက် တောင်းပန်ပါတယ်…အတိတ်က အနောက်ဘက်ဒေသရဲ့ အမှောင်နယ်မြေကို ကျွန်တော်တို့ အကြိမ်ကြိမ် ကင်းလှည့်စစ်ဆေးခဲ့ပေမယ့်၊ ဒီသတ္တဝါရဲ့ အရိပ်အယောင်ကို လုံးဝ ရှာမတွေ့ခဲ့ပါဘူး…”

လီကျင်းဇယ်က ခေါင်းညိတ်လိုက်ပြီးနောက်….

"တကယ်ကို သဘာဝအလျောက် ပါရမီပါတဲ့ ကောင်မလေးပဲ.. အဲဒီ ကံဆိုးတဲ့ အဖြစ်အပျက်သာ မရှိခဲ့ရင်၊ သူမဟာ အခုချိန်မှာ နဂါးစွယ်ကလန်ရဲ့ ပါရမီရှင်တစ်ယောက် သေချာပေါက် ဖြစ်နေမှာပဲ…”

ထိုသို့ပြောပြီး လက်ချောင်းကို ခေါက်လိုက်ရာ၊ ရေကန်ထဲမှ ရေတစ်စက် အထက်သို့ တက်လာသည်။ ရေစက်လေးသည် လွင့်မျောလာပြီး သူ့ အရှေ့ရှိ လေထဲတွင် ဝဲပျံနေသည်။

ထို့နောက်၊ သူ့ လက်ချောင်းထိပ်မှ ပဲ့တင်ထပ်သံစွမ်းအင် အမျှင်လေးတစ်ခု ထွက်ပေါ်လာသည်။ ၎င်းသည် မြင်နိုင်ရန်ပင် ခက်ခဲသော အလွန်သေးငယ်သည့် အမျှင်လေးတစ်ခု ဖြစ်သည်။ သို့သော်လည်း၊ လီလော့ အပါအဝင် လူတိုင်းသည် ၎င်း ပေါ်လာသည်နှင့်တစ်ပြိုင်နက် သူတို့၏ ကိုယ်ပိုင် ခန္ဓာကိုယ်များအတွင်းရှိ ပဲ့တင်ထပ်သံစွမ်းအင်များ စတင်တုန်ခါလာသည်ကို ခံစားလိုက်ရသည်။ သူတို့၏ ပဲ့တင်ထပ်သံစွမ်းအင်များက တောဘုရင်၏ အရှေ့တွင် တောရိုင်းတိရစ္ဆာန်တစ်ကောင် တုန်ယင်သွားသကဲ့သို့ အကြောက်တရားဖြင့် တုန်ယင်နေကြပြီး၊ ၎င်း၏ အရှေ့တွင် တစ်ခဏတာမျှပင် အနားမယူရဲကြပေ။

ကြောက်မက်ဖွယ်ကောင်းသော ပဲ့တင်ထပ်သံစွမ်းအင် အမျှင်လေးသည် ရေစက်လေးထဲသို့ ဝင်ရောက်သွားပြီးနောက်၊ ရေစက်လေး စတင်လည်ပတ်လာသည်။ အချိန်အနည်းငယ် အကြာတွင်၊ ရေစက်သည် မီတာငါးဆယ်ခန့် ကျယ်ဝန်းသော နက်ရှိုင်းသည့် အပြာရောင် နဂါးမျက်လုံး တစ်လုံးအဖြစ် ပြောင်းလဲသွားသည်။

နဂါး၏ မျက်လုံးများမှာ နက်ရှိုင်းပြီး မှန်းဆ၍မရနိုင်လောက်အောင် ဖြစ်နေကာ၊ ၎င်းထံမှ ကြောက်မက်ဖွယ်ကောင်းသော နဂါးအရှိန်အဝါ တစ်ခု စိမ့်ထွက်နေသည်။ ၎င်းထုတ်လွှတ်သော ပြင်းထန်သည့် ဖိအားကြောင့် ပတ်ဝန်းကျင်ရှိ လေထုပင် တုန်ခါသွားသည်။

ဤအခိုက်အတန့်တွင်၊ နဂါးမျက်လုံးက လီလင်းကျင်းကို တိုက်ရိုက် စိုက်ကြည့်နေသည်။

လီလင်းကျင်းသည် ၎င်း၏ရှေ့တွင် သူမ ဖုံးကွယ်ထားနိုင်သည့်အရာ ဘာမှမရှိကြောင်း ခံစားလိုက်ရသည်။

နဂါးမျက်လုံးက သူမ၏ ဝိညာဉ်နှင့် စိတ်ပိုင်းဆိုင်ရာ အစိတ်အပိုင်းများကိုပါ မြင်တွေ့နိုင်လောက်အောင် သူမကို ထိုးဖောက်ကြည့်ရှုနေသည်။ ၎င်းသည် အရာအားလုံးကို ထိုးဖောက်ကြည့်ရှုနိုင်သည့် တကယ်ကို ပဟေဠိဆန်သော စွမ်းအားတစ်ခုဖြစ်သည်။

"အဲဒီအတွက် စိတ်မပူပါနဲ့… ဒါက ကောင်းကင်နဂါးရဲ့ ကြည်လင်သော မျက်လုံးလို့ ခေါ်တယ်….ဒီအရာက လောကသဘာဝစွမ်းအင် အားလုံးရဲ့ စီးဆင်းမှုကို မြင်နိုင်ပြီး ဘယ်လို အတားအဆီးမျိုးကိုမဆို ထိုးဖောက်နိုင်စွမ်း ရှိတယ်…ယိုယွင်းပျက်စီးခြင်းစွမ်းအင်တွေတောင် ပုန်းအောင်းဖို့ မျှော်လင့်လို့ မရဘူး" ဟု လီကျင်းဇယ်က တိုးညှင်းသော လေသံဖြင့် ရှင်းပြလိုက်သည်။

ထိုစကားကို ကြားသောအခါ လီလင်းကျင်း သိပ်ပြီး စိုးရိမ်မနေတော့ပေ။

နောက်တစ်ခဏတွင်၊ ကောင်းကင်နဂါး၏ ကြည်လင်သော မျက်လုံးမှ အပြာရင့်ရောင် အလင်းတန်းများ တစ်ခုပြီးတစ်ခု ထွက်လာပြီး လီလင်းကျင်း၏ သေးငယ်သော ခန္ဓာကိုယ်ကို စစ်ဆေးလေတော့သည်။

အချိန်အနည်းငယ် အကြာတွင်၊ လီလော့သည် အံ့မခန်းကောင်းသော အရာတစ်ခုကို သတိပြုမိလိုက်သည်။ ရောင်ခြည်များက ၎င်းကို အကြိမ်ကြိမ် စစ်ဆေးသောအခါ လီလင်းကျင်း၏ ခန္ဓာကိုယ်သည် အလင်းဖောက်ထွင်းမြင်နိုင်လုနီးပါး စတင်ဖြစ်ပေါ်လာသည်။

ခဏအကြာတွင်၊ သူမ၏ ခန္ဓာကိုယ်သည် လုံးဝ ပျောက်ကွယ်သွားပုံရပြီး၊ သူမ၏ မူလနေရာတွင် ပဟေဠိဆန်သော အလင်းခန္ဓာကိုယ် တစ်ခုသာ ကျန်ရစ်ခဲ့သည်။

"ဒါက သူမရဲ့ ဝိညာဉ်၊ ဒါမှမဟုတ် ဝိညာဉ်ခန္ဓာကိုယ်ပေါ့..." ဟု လီကျင်းဇယ်က ရှင်းပြလိုက်သည်။

ထို့နောက် လက်ကို ဝှေ့ယမ်းလိုက်ရာ၊ လေဟာနယ် စတင်တုန်ခါလာသည်။ အလင်းတန်းတစ်ခုသည် ကောင်းကင်နဂါး၏ ကြည်လင်သော မျက်လုံးပေါ်သို့ ကျရောက်သွားပြီးနောက်၊ နဂါးမျက်လုံး ရုတ်တရက် အလျင်အမြန် စတင် ကြီးထွားလာသည်။

ထိုအခါ လီလင်းကျင်း၏ ဝိညာဉ်ကို စစ်ဆေးနေသော အလင်းတန်းများ ပို၍ပင် အားကောင်းလာသည်။

လီလင်းကျင်း၏ ဝိညာဉ်ကို ဖုံးကွယ်ထားသော အနက်ရောင် မြူခိုးတစ်ခုကို သူတို့ သတိပြုမိလိုက်သောအခါ လီလော့၊ လီရုန်ယွင့်နှင့် လီဖုန်းတို့၏ မျက်နှာထားများ ပြောင်းလဲသွားသည်။

အနက်ရောင် မြူခိုးပတ်လည်တွင် မကောင်းဆိုးဝါးဆန်ပြီး အေးစိမ့်သော လေထုတစ်ခု ရှိနေသည်။ တစ်ချိန်တည်းမှာပင်၊ ၎င်းထံမှ တိုးညှင်းပြီး ကောက်ကျစ်သော တီးတိုးပြောသံများကို အဆက်မပြတ် ကြားနေရသည်။ ၎င်းသည် တကယ်ကို နှောင့်ယှက်စရာကောင်းပြီး လူတစ်ယောက်၏ ကိုယ်ပိုင်အသိစိတ်ကို အလွယ်တကူ ဆုံးရှုံးသွားစေနိုင်သည်။

အထူးသဖြင့်၊ လီလော့သည် ၎င်းထံမှ ရင်းနှီးသော ခံစားချက်တစ်ခုကိုပင် ခံစားလိုက်ရသည်။ ၎င်းမှာ ဝိညာဉ်စား အစစ်အမှန်နတ်ဆိုး ပင်ဖြစ်သည်။

လီကျင်းဇယ်၏ အကူအညီဖြင့်၊ လီလင်းကျင်း၏ နက်ရှိုင်းသော အတွင်းပိုင်းတွင် ပုန်းအောင်းနေသော ကောက်ကျစ်သည့် ဝိညာဉ်စား အစစ်အမှန်နတ်ဆိုးကို နောက်ဆုံးတော့ ရှာတွေ့သွားခဲ့ပြီဖြစ်သည်။

သို့သော်လည်း၊ မြူခိုးသည် လီလင်းကျင်း၏ ဝိညာဉ်နှင့် နက်ရှိုင်းစွာ ရောယှက်နေသည်။

မည်သည့် အမူအရာမျှ မပြဘဲ၊ လီကျင်းဇယ်က ၎င်းကို ကြည့်ကာ မေးလိုက်သည်။

"ဒါက ဝိညာဉ်စား အစစ်အမှန်နတ်ဆိုးလား… စိတ်ဝင်စားစရာပဲ…ဒီကောင်က ရိုးရှင်းတဲ့ 'ကမ္ဘာခြားသက်ရှိ' တစ်ကောင် မဟုတ်ဘူး… တခြားတစ်ခုခုနဲ့ ရောနှောထားတဲ့ပုံပဲ…ဒီကောင်က သဘာဝအတိုင်း ဖြစ်လာတဲ့ 'ကမ္ဘာခြားသက်ရှိ' မဟုတ်ဘူး ဖန်တီးထားတာ.."

ထိုစကားကို ကြားသောအခါ လီလော့၏ မျက်လုံးအိမ်များ ရုတ်တရက် ကျဉ်းမြောင်းသွားသည်။ သူ့ မျက်နှာပေါ်တွင် ထိတ်လန့်ဖွယ်ကောင်းသော အမူအရာတစ်ခု ပေါ်လာပြီး တိုးညှင်းသော လေသံဖြင့် မေးလိုက်သည်။

"ဒီ ဝိညာဉ်စား အစစ်အမှန်နတ်ဆိုးက လူတွေ ဖန်တီးထားတာလား… မဖြစ်နိုင်ဘူး…ကမ္ဘာခြားသက်ရှိတွေကို ဖန်တီးလို့ရလို့လား… ဘယ်သူက ဒီလောက် ရူးသွပ်တဲ့ အလုပ်မျိုးကို လုပ်မှာလဲ….”

"ကမ္ဘာခြားသက်ရှိတွေက ပုံမှန်အားဖြင့် လူသားတွေဆီက အပျက်သဘောဆောင်တဲ့ ခံစားချက်တွေ စုစည်းပြီး မွေးဖွားလာကြတာ။ ဒါပေမယ့် ဒီ ကမ္ဘာခြားသက်ရှိဆီမှာ ရင်းနှီးတဲ့ လက္ခဏာတချို့ကို ငါ အာရုံခံလို့ရတယ်….

ဒီလိုအရာမျိုးကို ဖန်တီးနိုင်တဲ့ ကမ္ဘာပေါ်က တစ်ခုတည်းသော လူတွေက သူတို့ပဲ ဖြစ်လိမ့်မယ်…"

"သူတို့က ဘယ်သူတွေလဲ…”

လီလော့ မနေနိုင်တော့ဘဲ လွှတ်ခနဲမေးလိုက်လေသည်။

သို့သော်လည်း၊ ဤအချိန်တွင် သူ့ နှလုံးသားထဲ၌ အဖြေတစ်ခု ရှိနေပြီးဖြစ်သည်။

" စုယွမ်အဖွဲ့အစည်း "

ထိုနာမည်ကို ကြားသောအခါ လီလော့၏ နှလုံးသားထဲတွင် အေးစိမ့်သွားသည်။

မျှော်လင့်ထားတဲ့အတိုင်းပဲ...

ဒါက ပဟေဠိဆန်တဲ့ စုယွမ်အဖွဲ့အစည်း လက်ချက်ပဲ ထပ်ဖြစ်နေပြန်ပြီ….

အခန်း (၈၉၁) - ထိတ်လန့်ဖွယ်ကောင်းသော စုယွမ် အဖွဲ့အစည်း……

လီကျင်းဇယ်က စုယွမ်အဖွဲ့အစည်း အကြောင်း ပြောလိုက်သည်နှင့်တစ်ပြိုင်နက် အားလုံး မျက်စ်မျက်နှာပျက်သွားကြသည်။

လီရုန်ယွင့်နှင့်လီဖုန်းတို့သည် အတွင်းပိုင်းနတ်ဘုရားတိုက်ကြီးတွင်တွင် နေထိုင်ခဲ့ကြသူများဖြစ်ရာ၊ သဘာဝကျကျ ၎င်းနှင့်ပတ်သက်ပြီး သတင်းအချက်အလက် ပိုမိုရရှိထားကြသည်။ ထို့ကြောင့်၊ စုယွမ်အဖွဲ့အစည်း မည်မျှ ကြောက်မက်ဖွယ်ကောင်းကြောင်းကို သူတို့ သိရှိကြသည်။ လီလော့အတွက်မူ၊ ထိုအဖွဲ့အစည်းကြောင့် ရှပြည်ထောင်စုနှင့် မဟူရာလေပြင်းအင်ပါယာတို့ မည်သို့ ပျက်စီးသွားခဲ့ရသည်ကို ကိုယ်တိုင်ကိုယ်ကျ မြင်တွေ့ခဲ့ရသည်။

ရှန်ကျင်းရှောင်ပင်လျှင် သူတို့အတွက် နယ်ရုပ်တစ်ခုမျှသာ ဖြစ်သည်။

"စုယွမ်အဖွဲ့အစည်းက အတွင်းပိုင်းနတ်ဘုရားတိုက်ကြီးမှာ နာမည်ကြီးလား….”

ခေတ္တမျှ စဉ်းစားပြီးနောက် လီလော့က မေးလိုက်သည်။

"နာမည်ကြီးရုံတင် မကဘူး၊ သူတို့က နာမည်ဆိုးနဲ့ ကျော်ကြားတာ" ဟု လီရုန်ယွင့်က အသံနိမ့်နိမ့်ဖြင့် ပြန်ဖြေသည်။

"သူတို့က ကမ္ဘာပေါ်မှာ ပဟေဠိအဆန်ဆုံး အင်အားစုတွေထဲက တစ်ခုဖြစ်ပြီး၊ တကယ်ကို အချိန်အကြာကြီး ကတည်းက တည်ရှိနေခဲ့တာ… ကျောက်ကောင်းကင်ဧကရာဇ် လီကလန်ကို မဆိုထားနဲ့၊ သမိုင်းအရှည်ကြာဆုံးဖြစ်တဲ့ ချင်ကောင်းကင်ဧကရာဇ် ကလန်တောင်မှ သူတို့နဲ့ ယှဉ်ရင် ဘာမှ မဟုတ်တော့သလို ဖြစ်သွားတယ်" ဟု လီဖုန်းက ခါးသီးသော အပြုံးဖြင့် ဖြည့်စွက်ပြောကြားလိုက်သည်။

"ဒါ့အပြင်၊ သူတို့က အလွန်တရာ ထိတ်လန့်ဖွယ်ကောင်းတဲ့ အင်အားစုတစ်ခုပဲ… သူတို့ရဲ့ အရိပ်အယောင်တွေကို အတွင်းပိုင်းနတ်ဘုရားတိုက်ကြီးရဲ့ နေရာတိုင်းလိုလိုမှာ တွေ့နိုင်တယ်…အဲဒါက ကောင်းကင်ဧကရာဇ် အင်အားစု အသီးသီးက သတိထားစောင့်ကြည့်နေရတဲ့ အဓိကအချက်တွေထဲက တစ်ခုပဲ၊ ဘာလို့လဲဆိုတော့ ကောင်းကင်ဧကရာဇ် အင်အားစုတစ်ခုကို သူတို့က တစ်ခါ ဖျက်ဆီးပစ်ခဲ့ဖူးလို့ပဲ" ဟု လီဖုန်းက ဆက်ပြောသည်။

ဤနေရာအရောက်တွင်၊ လီလော့က အံ့အားသင့်စွာဖြင့်… .

"သူတို့က ကောင်းကင်ဧကရာဇ် အင်အားစုတစ်ခုကို ဖျက်ဆီးပစ်ခဲ့တယ်….”

သူတို့၏ အမည်က ညွှန်ပြနေသည့်အတိုင်း၊ ကောင်းကင်ဧကရာဇ် အင်အားစုတိုင်းကို ကောင်းကင်ဧကရာဇ်တစ်ပါးက ဦးဆောင်နေပြီး၊ သူ့ရဲ့ ဘေးဘိုးဖြစ်သူ ကောင်းကင်ဧကရာဇ် လီနှင့် တန်းတူဖြစ်သည်။ သူတို့သည် ကမ္ဘာ၏ ထိပ်တန်းတွင် ရပ်တည်နေပြီး၊ အခြေခံအားဖြင့် ပြိုင်ဘက်ကင်းသူများ ဖြစ်ကြသည်။ သို့သော် ထိုသို့သော စွမ်းအားကြီးမားသည့် ပုဂ္ဂိုလ်တစ်ဦးက စုယွမ်အဖွဲ့အစည်း၏ အနိုင်ယူခြင်းကို ခံခဲ့ရသည်တဲ့လား။

"အဲဒီ ကောင်းကင်ဧကရာဇ် အင်အားစု ပျက်စီးရတာက အဓိကအားဖြင့် သူတို့ရဲ့ ကောင်းကင်ဧကရာဇ်ကျဆုံးသွားလို့ပဲ…

ပြီးတော့ ဒါက စုယွမ်အဖွဲ့အစည်းရဲ့ ကြားဝင်နှောင့်ယှက်မှုကြောင့် ဖြစ်ခဲ့တာ။ သူတို့နဲ့ ပတ်သက်ပြီး အကြောက်စရာအကောင်းဆုံး အပိုင်းက သူတို့ရဲ့ သီးသန့် စွမ်းအား တစ်ခုတည်း မဟုတ်ဘူး၊ အဲဒါက သူတို့ဟာ ကမ္ဘာ့နေရာအနှံ့အပြားမှာ အရမ်းကို နက်ရှိုင်းစွာ လျှို့ဝှက်ပုန်းအောင်းနေတဲ့အတွက် ဘယ်သူကမှ သူတို့အားလုံးကို အမြစ်ပြတ် မချေမှုန်းနိုင်ဘူး ဆိုတဲ့အချက်ပဲ…. ဖြစ်ရပ်ဖြစ်ပွားပြီးမှပဲ အဲဒီနောက်ကွယ်မှာ ဘယ်သူရှိလဲဆိုတာကို ငါတို့ ကောက်ချက်ချနိုင်ခဲ့တာ… ကောင်းကင်ဧကရာဇ်ကျဆုံးရတဲ့ အကြောင်းရင်းက…သူ့ရဲ့ ယုံကြည်ရတဲ့ လက်ထောက်တွေထဲက တစ်ယောက်က စုယွမ်အဖွဲ့အစည်းကို ဝင်ရောက်သွားပြီး၊ သူ့ကို တိုက်ခိုက်ဖို့ အခွင့်အရေးကို ဆယ်စုနှစ်ပေါင်းများစွာ စောင့်ဆိုင်းနေခဲ့လို့ပဲ… ဒီအရာက နောက်ဆုံးမှာ ကောင်းကင်ဧကရာဇ် အင်အားစု တစ်ခုလုံးကို ပျက်စီးသွားစေခဲ့တာပါပဲ" ဟု လီကျင်းဇယ်က ဖြည်းညှင်းစွာ ရှင်းပြလိုက်သည်။

ဤအကြောင်းကို ပြောပြနေစဉ် သူ့ရဲ့ အိုမင်းနေသော မျက်နှာသည် ပို၍ အေးစက်ပြီး လေးနက်လာသည်။တည်ကြည်လေးနက်သော

အကြည့်များအရ၊ စုယွမ်အဖွဲ့အစည်း ပေါ်လာသည့် ဤကိစ္စကို သူ ပို၍ အလေးအနက်ထားနေကြောင်း လီလော့ ခံစားလိုက်ရသည်။

ဤအခိုက်အတန့်တွင်၊ လီလော့မှာ ချွေးစေးများပြန်လာသည်။

ယခုမှသာ စုယွမ်အဖွဲ့အစည်း မည်မျှ ကြောက်မက်ဖွယ်ကောင်းကြောင်း သူ သဘောပေါက်သွားသည်။ ရှပြည်ထောင်စုနှင့် မဟူရာလေပြင်းအင်ပါယာတို့ ပြိုလဲသွားခြင်းမှာ စုယွမ်အဖွဲ့အစည်းအတွက် အလွန် သေးငယ်သော ကိစ္စရပ်များသာ ဖြစ်ပုံရသည်။ မည်သို့ပင်ဆိုစေ၊ သူတို့သည် ကောင်းကင်ဧကရာဇ် အင်အားစုများနှင့်ပင် ရောနှောပတ်သက်ရန်ပင် အစွမ်းထက်ကြသည်။

ပြင်ပနတ်ဘုရားတိုက်ကြီးရှိ သနားစရာကောင်းပြီး သေးငယ်လှသော နိုင်ငံတစ်ခုက သူတို့အတွက် ဘာများဖြစ်မည်နည်း။

လီရုန်ယွင့်က …..

" စုယွမ်အဖွဲ့အစည်းက အလွန်တရာ ထူးဆန်းတယ်… သူတို့လုပ်တဲ့ အရာတွေက ရူးသွပ်လွန်းတယ်… သူတို့က ကမ္ဘာခြားသက်ရှိတွေနဲ့ လိုလိုလားလား နီးနီးကပ်ကပ် နေထိုင်ပြီး သူတို့နဲ့တောင် လက်တွဲလုပ်ကိုင်တဲ့ တစ်ခုတည်းသော လူတွေ ဖြစ်လိမ့်မယ်… ပြီးခဲ့တဲ့ နှစ်အနည်းငယ်အတွင်း၊ အတွင်းပိုင်းနတ်ဘုရားတိုက်ကြီးမှာ ကမ္ဘာခြားသက်ရှိကြောင့် ဖြစ်ပွားခဲ့တဲ့ ဘေးအန္တရာယ် အများအပြားဟာ အဓိကအားဖြင့် သူတို့ကြောင့်ပါပဲ….သူတို့က ကောင်းမှုနဲ့ ဆိုးယုတ်မှုတွေရဲ့ ပေါင်းစည်းခြင်းဆိုတဲ့ အရာကို အမြဲယုံကြည်ကြတယ်… ဒါကြောင့်မလို့ သူတို့က လက်တွေ့ကမ္ဘာနဲ့ အရိပ်ကမ္ဘာပေါင်းစပ်ဖို့ အမြဲ တွန်းအားပေးနေကြတာ…အဲဒီလူတွေက လုံးဝ အရူးတွေပဲ…"

စုယွမ်အဖွဲ့အစည်းအပေါ် သူမ၏ နက်ရှိုင်းသော ရွံရှာမှုနှင့် မုန်းတီးမှုကို သူမ၏ လေသံတွင် ရှင်းလင်းစွာ သိနိုင်သည်။

သေချာသည်ကတော့၊ ကမ္ဘာပေါ်ရှိ လူအများစုသည်လည်း သူတို့အပေါ် ဤသို့ပင် ခံစားရပေလိမ့်မည်။

ကမ္ဘာခြားသက်ရှိများသည် အလွန်တရာ စိတ်အနှောင့်အယှက်ဖြစ်စေသော သတ္တဝါများ ဖြစ်ကြသည်။ သာမန်လူသားတစ်ဦးအတွက်၊ ၎င်းတို့သည် သဘာဝဘေးအန္တရာယ်များထက်ပင် ပို၍ ကြောက်မက်ဖွယ်ကောင်းသည်။ကမ္ဘာခြားသက်ရှိ ဘေးအန္တရာယ်တစ်ခု ကျရောက်လာသည်နှင့်၊ နိုင်ငံတစ်ခုပင်လျှင် ၎င်း၏အရှေ့တွင် စွမ်းအားမဲ့သွားပြီး ပျက်စီးသွားရမည်ဖြစ်သည်။ ၎င်းသည် လူအများစု စိတ်ကူးယဉ်၍ပင် မရနိုင်သော အလွန်တရာ ထိတ်လန့်ဖွယ်ကောင်းသည့် အခြေအနေတစ်ခုဖြစ်သည်။

ဤအခိုက်အတန့်တွင်၊ လီလော့စိတ်ထဲ၌ မသက်မသာဖြစ်သွားပြီး….

"အတွင်းပိုင်းနတ်ဘုရားတိုက်ကြီးမှာ ကောင်းကင်ဧကရာဇ် အင်အားစုတွေ အများကြီး ရှိနေတာကို၊ ဘာလို့ အားလုံး ပူးပေါင်းပြီး ဒီလို တည်ရှိနေမှုကို မဖယ်ရှားပစ်တာလဲ…”

ထိုအမေးကို လီကျင်းဇယ်က ပေါ့ပေါ့ပါးပါးပင် ပြန်ဖြေလိုက်သည်။

"သေချာတာပေါ့ ငါတို့ ကြိုးစားခဲ့ဖူးတယ်… ဒါပေမဲ့၊ သူတို့ကို ငါတို့ လုံးဝ အမြစ်ပြတ် မချေမှုန်းနိုင်ခဲ့ဘူး….စုယွမ်အဖွဲ့အစည်းမှာ ကောလိပ်သမဂ္ဂနဲ့ တန်းတူရှိတဲ့ အလွန်ရှည်လျားတဲ့ သမိုင်းကြောင်းရှိတယ်၊ ဖြစ်နိုင်တာက ကမ္ဘာကြီးရဲ့ အစကနဦးအထိတောင် နောက်ကြောင်းပြန်သွားနိုင်တယ်….ကောလိပ်သမဂ္ဂက ဒီနှစ်တွေ တစ်လျှောက်လုံး သူတို့ကို ရှာဖွေနေခဲ့ပြီး ကောင်းကင်ဧကရာဇ် အင်အားစုတစ်ခုနဲ့တောင် မဟာမိတ်ဖွဲ့ခဲ့တယ်…. ဝမ်းနည်းစရာက၊ စုယွမ်အဖွဲ့အစည်းက ခဏတာမျှ ငြိမ်သက်သွားပြီးနောက်ပိုင်း အခြေအနေတွေ အေးချမ်းသွားတဲ့အခါ နောက်တစ်ကြိမ် ပြဿနာထပ်ရှာတဲ့အတွက် ရလဒ် သိပ်မကောင်းခဲ့ဘူး….”

လီကျင်းဇယ်၏ ရှင်းပြချက်ကို နားထောင်နေစဉ် လီလော့ ခေတ္တမျှ မှင်သက်သွားသည်။

ဒီအကြမ်းဖက်သမားတွေက ကမ္ဘာပေါ်မှာ လွတ်လွတ်လပ်လပ် သွားလာနေကြပြီး သူတို့ကို ဘယ်သူမှ ဘာမှ မလုပ်နိုင်ဘူးတဲ့လား….

"ဒါ့အပြင်၊ စုယွမ်အဖွဲ့အစည်းနဲ့ ပတ်သက်ပြီး တကယ်ကို အကြောက်စရာအကောင်းဆုံးအရာက သူတို့ နောက်ကွယ်မှာ ဘာတွေလုပ်နေလဲ ဆိုတာပဲ.. ဘယ်သူက သူတို့အဖွဲ့ဝင်လဲ ဆိုတာကို မင်း ဘယ်တော့မှ အသေအချာ မသိနိုင်ဘူး၊ ပြီးတော့ လူသားတွေနဲ့ သူတို့ရဲ့ ခံစားချက်တွေကို ကြိုးကိုင်ခြယ်လှယ်နိုင်တဲ့ သူတို့ရဲ့ စွမ်းရည်က ကမ္ဘာခြားသက်ရှိတွေ ထက်ကို ပိုပြီး ကြောက်စရာကောင်းတယ်" ဟု လီကျင်းဇယ်က အေးစက်သော အသံဖြင့် ပြောလိုက်သည်။

"သူတို့က ကောင်းကင်ဧကရာဇ် အင်အားစုတွေ ဒါမှမဟုတ် ကောလိပ်သမဂ္ဂထဲကိုတောင် ထိုးဖောက်ဝင်ရောက်ထားခြင်း မရှိဘူးလို့ ဘယ်သူမှ အာမမခံနိုင်ဘူး…"

ဤအခိုက်အတန့်တွင်၊ လီလော့၏ ကျောရိုးတစ်လျှောက် အေးစိမ့်သွားသည်ကို ခံစားလိုက်ရသည်။ ရုတ်တရက် လေထုမှာ ထိတ်လန့်ဖွယ်ကောင်းလောက်အောင် အေးစက်သွားသကဲ့သို့ပင်။

"သူတို့က ရှုံးနိမ့်ခြင်းမရှိနိုင်ဘူးလို့ ထင်ရတယ်" ဟု လီလော့က မှတ်ချက်ချလိုက်သည်။

ထိုမှတ်ချက်ကို ကြားသောအခါ လီကျင်းဇယ်က ခေါင်းယမ်းလိုက်ပြီး….

"သူတို့က တကယ်ပဲ ရှုံးနိမ့်ခြင်းမရှိနိုင်ဘူးဆိုရင်၊ သူတို့ မှောင်မိုက်ထဲမှာ ပုန်းအောင်းနေဖို့ အကြောင်းမရှိဘူး…စုယွမ်အဖွဲ့အစည်းကို အထင်မသေးသင့်ပေမယ့်၊ သူတို့ရဲ့ ယုံကြည်ချက်က လူသားမျိုးနွယ်ရဲ့ အခြေခံအနှစ်သာရကို ဆန့်ကျင်နေတယ်… သူတို့ အမှောင်ထဲကနေ ထွက်လာတာနဲ့၊ သူတို့က ကမ္ဘာကြီးတစ်ခုလုံးရဲ့ ရန်သူ ဖြစ်သွားလိမ့်မယ်…."

လီလော့ သက်ပြင်းတစ်ချက် ချလိုက်မိသည်။ ဤမျှ ထိတ်လန့်ဖွယ်ကောင်းသော အင်အားစုမျိုးကို ယခုလောလောဆယ်တွင် သူ ဝေးဝေးရှောင်သင့်သည်။

"စောစောက အဘိုး ပြောသွားတယ်နော်၊ ဝမ်းကွဲအစ်မ လင်းကျင်းကိုယ်ထဲက ဝိညာဉ်စား အစစ်အမှန်နတ်ဆိုးကို စုယွမ်အဖွဲ့အစည်းက ဖန်တီးထားတာလို့…အဲဒီလိုလုပ်ရတဲ့ သူတို့ရဲ့ ရည်ရွယ်ချက်က ဘာလဲ…”

လီလော့က မေးခွန်းထုတ်လိုက်ပြီး၊ စကားဝိုင်း၏ အကြောင်းအရာကို ဝိညာဉ်စား အစစ်အမှန်နတ်ဆိုးဆီသို့ ပြန်ပြောင်းလိုက်သည်။

" စုယွမ်အဖွဲ့အစည်းက လူသားတွေနဲ့ ကမ္ဘာခြားသက်ရှိတွေကြားက ပေါင်းစပ်မှုနဲ့ ပတ်သက်ပြီး ရူးသွပ်တဲ့ စမ်းသပ်မှုတွေကို အမြဲလုပ်ဆောင်နေခဲ့တာ…နှစ်တွေတစ်လျှောက် သူတို့ဟာ အလွန်တရာ စိတ်အနှောင့်အယှက်ဖြစ်စေတဲ့ အရာများစွာကို ဖန်တီးခဲ့ကြတယ်… ဝိညာဉ်စား အစစ်အမှန်နတ်ဆိုးက အဲဒီ ကြောက်မက်ဖွယ် ဖန်တီးမှုတွေနဲ့ နှိုင်းယှဉ်ရင် အပျော့စားလို့ သတ်မှတ်လို့ရတယ်… ဒါပေမဲ့၊ ဒီကောင်က လူတစ်ယောက်ရဲ့ ဝိညာဉ်နဲ့ ပါရမီကို ဝါးမြိုနိုင်စွမ်း ရှိပုံပေါ်တယ်… ဒါက ယနေ့အထိ မကြားဖူးသေးတဲ့ ထူးခြားတဲ့ လက္ခဏာတစ်ခုပဲ…ဒါ့အပြင်..."

လီကျင်းဇယ်က ခေတ္တမျှ ရပ်တန့်လိုက်ပြီး လေသံကလည်း လေးနက်လာသည်။

"စုယွမ်အဖွဲ့အစည်းက ဒီအစစ်အမှန်နတ်ဆိုး ကမ္ဘာခြားသက်ရှိကို အနောက်ဘက်ဒေသရဲ့ အမှောင်နယ်မြေထဲမှာ မွေးထားတယ်ဆိုတော့ အမှောင်ထဲမှာ သူတို့ တကယ်ကို ဘာကြံစည်နေလဲဆိုတာ ဘယ်သူသိနိုင်မလဲ… သူတို့က နဂါးစွယ်ကလန်ကို မျက်စိကျနေတာများလား…”

"ဒါကို ကျွန်တော်တို့ သတိထား ကာကွယ်ရမယ်…"

ရှပြည်ထောင်စုနှင့်မဟူရာလေပြင်းအင်ပါယာတို့တွင် ဖြစ်ပျက်ခဲ့သည်များကို မြင်တွေ့ခဲ့ရပြီးနောက်၊ နဂါးစွယ်ကလန်အပေါ် ထိုကဲ့သို့သော အခြေအနေမျိုး ဖြစ်ပေါ်လာမည်ကို လီလော့ မမြင်တွေ့ချင်ပေ။ မည်သို့ပင်ဆိုစေ၊ ဤနေရာသည် သူ့အတွက် ဒုတိယအိမ်နှင့် တူသည်။

"သူတို့ရဲ့ အမှောင်နယ်မြေတွေကို သေချာစွာ စစ်ဆေးဖို့ ဒေသတစ်ခုစီတိုင်းကို နောက်မှ ငါ အမိန့်ပေးလိုက်မယ်…ဘေးအန္တရာယ် မဖြစ်ပွားအောင် တားဆီးဖို့ စစ်ဆေးမှုတွေကို ရှေ့တိုးလုပ်ရမယ့်ပုံပဲ" ဟု လီကျင်းဇယ်က ဖြည်းညှင်းစွာ ပြောလိုက်သည်။

လီလော့က သဘောတူသည့်အနေဖြင့် ခေါင်းညိတ်လိုက်ပြီးနောက်….

"ဒါဆို၊ အဘိုးက ဝမ်းကွဲအစ်မ လင်းကျင်း ကိုယ်ထဲက ဝိညာဉ်စား အစစ်အမှန်နတ်ဆိုးကို ဖယ်ရှားပေးနိုင်မလား….”

သူ ဤသို့ ပြောလိုက်သောအခါ၊ လီရုန်ယွင့်၊ လီလင်းကျင်းနှင့်လီဖုန်း တို့၏ မျက်နှာထားများ လေးနက်သွားပြီး၊ သူ့ အဖြေကို စိုးရိမ်တကြီး နားထောင်နေကြသည်။ ဤအဖြေသည် လီလင်းကျင်း၏ ကံကြမ္မာကို ဆုံးဖြတ်ပေးမည်ဖြစ်သည်။

လီကျင်းဇယ်က ခေတ္တမျှ စဉ်းစားပြီးနောက် လီလော့ကို ကြည့်ကာ ပြောလိုက်သည်။

"ဝိညာဉ်စား အစစ်အမှန်နတ်ဆိုးကို စုယွမ်အဖွဲ့အစည်းက ဖန်တီးထားတာဆိုတော့ တကယ်ကို ထူးခြားတယ်၊ ဒါပေမယ့် ငါ စမ်းကြည့်လို့ရပါတယ်…"

ထို့နောက်၊ သူ လက်ကို ဆန့်ထုတ်လိုက်တော့ လက်ဖဝါးအလယ်တွင် အနီရင့်ရောင် အလင်းတန်းတစ်ခု တောက်ပလာသည်။ ၎င်းသည် လက်ဖဝါးအရွယ်အစားခန့်ရှိသော အနီရင့်ရောင် မီးတောက်တစ်ခုအဖြစ် ကြီးထွားလာသည်ကို လူတိုင်း စောင့်ကြည့်နေကြသည်။

မီးတောက်၏ပတ်လည်တွင် မီးနဂါး ကိုးကောင် လှည့်ပတ်နေသည်။ ၎င်း၏ စွမ်းအား ကြီးမားလာသည်နှင့်အမျှ၊ ပတ်ဝန်းကျင်ရှိ လောကသဘာဝစွမ်းအင်များ ပြင်းထန်စွာ တုန်ခါလာသည်။

ရုတ်တရက်၊ လီလော့နှင့် ကျန်သူများသည် သူတို့၏ နှလုံးသား နက်ရှိုင်းသောနေရာမှ ဒေါသတကြီး လောင်ကျွမ်းနေသော မီးတောက်များကို ခံစားလိုက်ရသည်။ ဤခံစားချက်က သူတို့ ပြာအဖြစ် လောင်ကျွမ်းသွားတော့မည့်အလားပင်။

ဤအခိုက်အတန့်တွင်၊ မီးတောက်ထံမှ တကယ်ကို ဖိအားပေးနိုင်သော စွမ်းအားတစ်ခု ထွက်ပေါ်လာလေ၏။ ၎င်းသည် မြို့စားတစ်ပါး၏ စွမ်းအားထက်ပင် ပိုမို အားကောင်းပုံရသည်။

"နဂါးကိုးကောင် မီးဓားကန့်လန့်ကာ….”

လီရုန်ယွင့်က တိုးညှင်းစွာ အာမေဍိတ်သံ ပြုလိုက်သည်။

လီလော့၏ မျက်နှာပေါ်ရှိ ဇဝေဇဝါဖြစ်နေသော အမူအရာကို သူမ သတိပြုမိသွားသဖြင့် သူမက သူ့ကို တိုးတိုးလေး ရှင်းပြလိုက်သည်။

"ဒါက ငါတို့ ကလန်ခေါင်းဆောင်ရဲ့ နာမည်ကြီးတဲ့ ဘုရင်အဆင့်အဖိုးတန် ရတနာတစ်ခုပဲ..ဒီရတနာက အလွန်တရာ အစွမ်းထက်ပြီး၊ ကမ္ဘာပေါ်က ဘယ်အရာကိုမဆို လောင်ကျွမ်းပစ်နိုင်စွမ်း ရှိတယ်… တစ်ကြိမ် လွှတ်ပေးလိုက်တာနဲ့၊ ကီလိုမီတာ ထောင်ပေါင်းများစွာ ကျယ်ဝန်းတဲ့ မြေပြင်ကို လွှမ်းခြုံသွားပြီး အရာအားလုံးကို ပြာကျသွားစေနိုင်တယ်…."

"ဘုရင်အဆင့် အဖိုးတန် ရတနာ..."

လီလော့က တိတ်တဆိတ် သက်ပြင်းချလိုက်မိသည်။ ဤသို့သော ရတနာမျိုးကို သူ တစ်ခါမှ မမြင်ဖူးပေ။ ၎င်းမှထုတ်လွှတ်သော ဖိအားကို အခြေခံ၍ ကြည့်လျှင်၊ အမျှင်တစ်မျှင်တည်းကပင် သူ့ကို ရှင်းလင်းပစ်ရန် လုံလောက်မည်ဖြစ်ကြောင်း သူ သိနိုင်သည်။

"နဂါးကိုးကောင် မီးဓားကန့်လန့်ကာ ထဲမှာ မီးနဂါးဓားစွမ်းအင်ပါဝင်တယ်…မင်းရဲ့ ခန္ဓာကိုယ်ထဲက ဝိညာဉ်စား အစစ်အမှန်နတ်ဆိုးကို သန့်စင်ချင်ရင်၊ မင်း ကန့်လန့်ကာထဲကို ဝင်ပြီး မီးနဂါးဓားစွမ်းအင်နဲ့ သူ့ကို ပြာကျသွားအောင်လုပ်ရမယ်…”

လီကျင်းဇယ်က ရှင်းပြချက်ကို ခေတ္တရပ်လိုက်ပြီး လီလင်းကျင်းကို ကြည့်လိုက်သည်။ ထို့နောက်…

" မီးနဂါးဓားစွမ်းအင်က အလွန်တရာ ရက်စက်ကြမ်းကြုတ်တယ်…. သူ့ထဲမှာ ဓားဆန္ဒနဲ့ မီးနဂါးရဲ့ အဆီအနှစ် နှစ်ခုစလုံး ပါဝင်တယ်…မင်းကိုယ်မင်း ဒီဓားဆန္ဒထဲမှာ စိမ်ထားလိုက်မယ်ဆိုရင်၊ ဝိညာဉ်စား အစစ်အမှန်နတ်ဆိုးဆီကနေ မင်းကိုယ်မင်း ခွဲခြားနိုင်ကောင်း ခွဲခြားနိုင်လိမ့်မယ်… ဒါပေမဲ့၊ ဒါက အလွန်တရာ အန္တရာယ်များတဲ့ နည်းလမ်းတစ်ခုပဲ… ဒီစွမ်းအင်တွေမှာ စိမ်လိုက်ရင် မင်း စိတ်ကူးနိုင်တာထက် ကျော်လွန်တဲ့ နာကျင်မှုတွေကို ယူဆောင်လာပေးလိမ့်မယ်…မင်းရဲ့ စိတ်က နည်းနည်းလေး တုန်လှုပ်သွားရင်တောင်၊ မင်းရဲ့ အသက်ကို အလွယ်တကူ ဆုံးရှုံးသွားနိုင်တယ်… စမ်းကြည့်ချင်လား…”

သူ စကားပြောပြီးသည်နှင့်တပြိုင်နက် လီရုန်ယွင့်နှင့် လီဖုန်းတို့၏ မျက်နှာများ ဖြူရော်သွားသည်။ သူတို့ကိုယ်တိုင်ပင် နဂါးကိုးကောင် မီးဓားကန့်လန့်ကာ ထဲတွင် အချိန်ကြာကြာ တောင့်ခံနိုင်မည် မဟုတ်ပေ။ ဝင်ရောက်ပြီး မကြာမီမှာပင် ပြာအဖြစ် လောင်ကျွမ်းသွားနိုင်သည်။ လီလင်းကျင်း ဝင်ရောက်သွားသောအခါ လီကျင်းဇယ်က ထိန်းချုပ်ထားမည်ဖြစ်သော်လည်း၊ ၎င်းမှာ အလွန်တရာ အန္တရာယ်များသော အဆိုပြုချက်တစ်ခု ဖြစ်နေဆဲပင်။

လီလင်းကျင်း၏ မျက်နှာသည်လည်း ဖြူရော်သွားသည်။ နဂါးကိုးကောင် မီးဓားကန့်လန့်ကာကို စိုက်ကြည့်နေစဉ် သူမ၏ မျက်လုံးများတွင် ဖုံးကွယ်၍မရနိုင်သော အကြောက်တရားများ ရှိနေသည်။ သူမ၏ မျက်လုံးများတွင် အတွင်းစိတ် ပဋိပက္ခတစ်ခု၏ လက္ခဏာများ ပေါ်ပေါက်လာသော်လည်း၊ မကြာမီမှာပင် ဆုံးဖြတ်ချက်တစ်ခုကို ချလိုက်သည်။

သူမက အသက်ပြင်းပြင်း တစ်ချက်ရှူလိုက်ပြီး အော်ပြောလိုက်သည်။

"ကလန်ခေါင်းဆောင်၊ ကျွန်မ လုပ်ပါ့မယ်…”

ဤသည်မှာ လီလော့ကြောင့်သာ သူမအတွက် ပေးအပ်လာသော ရွေးချယ်မှုတစ်ခုဖြစ်ကြောင်း သူမ သိသည်။ စုယွမ်အဖွဲ့အစည်းနှင့် သက်ဆိုင်သော ကိစ္စရပ်များနှင့် ပတ်သက်လာလျှင် လီကျင်းဇယ် မည်မျှ သတိရှိကြောင်းကို ကြည့်ခြင်းအားဖြင့်၊ သူမသာ ဒီအခွင့်အရေးကို ငြင်းပယ်လိုက်ပါက သူမအတွက် ရွေးချယ်စရာ နည်းပါးသွားမည်ဖြစ်သည်။

သူမ၏ ဘေးတွင် လီလော့က တိတ်တဆိတ် သက်ပြင်းချလိုက်သည်။ လီလင်းကျင်း၏ ဆုံးဖြတ်ချက်ပြတ်သားမှုနှင့် သတ္တိကို သူ တကယ်ပဲ လေးစားမိသည်။ မည်သို့ပင်ဆိုစေ၊ မီးနဂါး၏ လောင်ကျွမ်းမှုကို ခံယူရဲသူဆိုသည်မှာ သိပ်မရှိလှပေ။

သူမ၏ အဖြေကို ကြားသောအခါ လီကျင်းဇယ်၏ မျက်လုံးများတွင် အလင်းတစ်ချက် လင်းလက်သွားသည်။ ထို့နောက် သူက ခေါင်းညိတ်လိုက်ပြီး…

"တကယ်ကို ပြတ်သားပြီး စိတ်ပိုင်းဖြတ်ထားတဲ့ မိန်းကလေးပဲ… ဒါဆို မင်းရဲ့ ကံတရားက ဘယ်လောက်အထိ ခံနိုင်မလဲဆိုတာ ကြည့်ကြတာပေါ့…"

သူ စကားပြောပြီးသည်နှင့်တပြိုင်နက်၊ အင်္ကျီလက်ကို ဝှေ့ယမ်းလိုက်သည်။ထိုအခါ မမြင်ရသော စွမ်းအားတစ်ခုက လီလင်းကျင်း၏ သိမ်မွေ့လှပသော ခန္ဓာကိုယ်ကို ဆုပ်ကိုင်လိုက်သလို မျက်တောင်တစ်ခတ်အတွင်းမှာပင်၊ သူမသည် အလင်းတန်းတစ်ခုအဖြစ် ပြောင်းလဲသွားပြီး နဂါးကိုးကောင် မီးဓားကန့်လန့်ကာ ထဲသို့ ပျံသန်းဝင်ရောက်သွားသည်။

လီကျင်းဇယ်က မီးကန့်လန့်ကာကို လက်တစ်ဖက်ဖြင့် ကိုင်ထားပြီး အခြားလက်တစ်ဖက်ဖြင့် ၎င်းကို ညွှန်ပြလိုက်သည်။ နောက်တစ်ခဏတွင်၊ ၎င်းပတ်လည်ရှိ နဂါးကိုးကောင်က မှေးမှိန်သော နဂါးဟိန်းသံများကို ထုတ်လွှတ်လိုက်သည်။ ထို့နောက် ၎င်းတို့ထဲမှ တစ်ကောင်က မီးကန့်လန့်ကာဘက်သို့ လှည့်ကာ အလွန်ပူပြင်းပြီး အလွန်ထက်မြက်သည့် ရေတွက်၍မရနိုင်သော ဓားအလင်းတန်းများ ပါဝင်သော အနီရင့်ရောင် မီးတောက်ဘောလုံး တစ်ခုကို မှုတ်ထုတ်လိုက်သည်။

ထိုအခါမီးတောက်များသည် မိုးရွာသကဲ့သို့ ကျဆင်းလာပြီး တင်ပျဉ်ခွေ ထိုင်နေသော သွယ်လျသည့် လူရိပ်လေးတစ်ခုကို လွှမ်းခြုံသွားလေတော့သည်။

အခန်း (၈၉၂) လီလင်းကျင်း၏ အလားအလာ…..

အနီရင့်ရောင် မီးတောက်များ ဒေါသတကြီး လောင်ကျွမ်းလာသည်နှင့်အမျှ လီလော့နှင့် ကျန်သူများသည် မီးကန့်လန့်ကာ၏ အပြင်ဘက်တွင် ရပ်နေသော်လည်း၊ ထိုမီးတောက်များအတွင်းရှိ ကြီးမားလှသော စွမ်းအားကို သူတို့ ခံစားနေရဆဲပင်။

မီးတောက်များ လီလင်းကျင်းကို လွှမ်းခြုံသွားသောအခါ၊ သူမ၏ လှပပြီး နှင်းကဲ့သို့ ဖြူဖွေးသော အသားအရေများ အရည်ပျော်ကျသွားသည်ကို သူတို့သုံးဦး မြင်တွေ့လိုက်ရသည်။

အလွန်အမင်း နာကျင်မှုကို သူမ အတတ်နိုင်ဆုံး သည်းခံနေရသကဲ့သို့ သူမ ပြင်းပြင်းထန်ထန် တုန်ယင်နေသည်။ အနီရင့်ရောင် မီးတောက်များ လောင်ကျွမ်းနေစဉ်၊ ၎င်းတို့အတွင်းရှိ ထက်မြက်သော ဓားစွမ်းအင်များက သူမ၏ အသားများကို တစ်လက်မချင်း လှီးဖြတ်နေသည်။ ၎င်းမှာ သာမန်လူတစ်ယောက် ခံနိုင်ရည်မရှိနိုင်သော နှိပ်စက်ညှဉ်းပန်းမှုတစ်ခုပင် ဖြစ်သည်။

ဤမြင်ကွင်းကို မြင်တွေ့ရသောအခါ ကြည့်ရှုနေသူ သုံးဦး၏ မျက်နှာအမူအရာများ ပြောင်းလဲသွားသည်။

မီးကန့်လန့်ကာကို လက်တဖက်ဖြင့် ထိန်းချုပ်ထားရင်း၊ လီကျင်းဇယ်က ပေါ့ပေါ့ပါးပါး မှတ်ချက်ချလိုက်သည်၊

" မီးနဂါးဓားစွမ်းအင်ရဲ့ စွမ်းအားကို ငါ အနိမ့်ဆုံးအထိ လျှော့ချထားပေမယ့်၊ သူမအတွက်ကတော့ ဒါက အလွန်တရာ ကြောက်မက်ဖွယ်ကောင်းနေတုန်းပဲ… ဒါပေမဲ့၊ ဒီကောင်မလေးမှာ သန်မာတဲ့ နှလုံးသားတစ်ခု ရှိတယ်..အံကြိတ်ပြီး တောင့်ခံနိုင်တယ်…နှစ်ပေါင်းများစွာ ဝိညာဉ်စား အစစ်အမှန်နတ်ဆိုးရဲ့ ကျူးကျော်မှုကို ခံခဲ့ရပေမယ့် သူမရဲ့ ဝိညာဉ်ကို ဆက်လက်ထိန်းသိမ်းထားနိုင်တာ အံ့သြစရာ မဟုတ်တော့ဘူး… သူမက တကယ်ကို ပါရမီပါတယ်…ဒီဒုက္ခကနေ သူမ အသက်ရှင်လျက် လွတ်မြောက်နိုင်မယ်ဆိုရင်၊ အနောက်ဘက်ဒေသ လီမိသားစုရဲ့ အသန်မာဆုံးလူ ဖြစ်လာနိုင်တယ်.."

လီကျင်းဇယ် တစ်စုံတစ်ယောက်ကို ယခုလိုမျိုး ချီးကျူးခဲလှသည်။ထိုစကားကို ကြားသောအခါ လီဖုန်းမှာ ပျော်ရွှင်သော အပြုံးတစ်ခုကို မပြသဘဲ မနေနိုင်တော့ပေ။ တစ်ချိန်တည်းမှာပင်၊ လီလင်းကျင်း ထိုနာကျင်မှုကို ခံနိုင်ရည်ရှိမရှိကိုလည်း သူ စိုးရိမ်နေခဲ့သည်။

နဂါးကိုးကောင် မီးဓားကန့်လန့်ကာက အလွန် ကြောက်မက်ဖွယ်ကောင်းလွန်းသဖြင့် သူပင်လျှင် ၎င်း၏ စွမ်းအားကို ခံစားသိရှိနိုင်သည်။ ထို့အပြင်၊ လီလင်းကျင်းသည် ယခုမှ ပြန်လည်ကျန်းမာလာခါစဖြစ်သည်။ ဤမီးတောက်များကို သူမ မည်မျှကြာအောင် တောင့်ခံနိုင်မည်ကို သူ မသိပေ။

လီရုန်ယွင့်က သွယ်လျသော သူ့တူမလေး မီးတောက်များထဲတွင် ဒုက္ခခံစားနေရသည်ကို ကြည့်ရင်း သူမ၏ နှလုံးသား ကွဲကြေနေခဲ့သည်။ သူမ၏ တူမလေး ဤအရာကို အန္တရာယ်ကင်းစွာ ဖြတ်ကျော်နိုင်ပါစေဟု ဆုတောင်းနေစဉ် သူမ၏ မျက်လုံးများ အနည်းငယ် နီရဲလာသည်။

"ဒါက နှစ်နာရီလောက်တော့ ကြာလိမ့်မယ်…မင်းတို့အားလုံး အပြင်မှာ စောင့်လို့ရပါတယ်" ဟု လီကျင်းဇယ်က သူတို့သုံးဦးကို ပြောလိုက်သည်။

ထိုအခါ လီရုန်ယွင့်နှင့် လီဖုန်းတို့က ယဉ်ကျေးစွာ ဦးညွှတ်ပြီး နားနေဆောင်ထဲမှ ထွက်ခွာသွားကြသည်။

သူတို့ ထွက်သွားပြီးနောက်၊ လီကျင်းဇယ်က လီလော့ကို နားလည်ရခက်သော အပြုံးတစ်ခု ပြုံးပြပြီး…

"မင်း သူမကို ကာကွယ်ပေးဖို့ ကြိုးစားနေတယ်လို့ ငါ ထင်တယ်….အစောပိုင်းက အစီရင်ခံစာတွေအရ၊ သူမက မင်းကို အသုံးချခဲ့တယ်ဆိုတာ ငါ မြင်နိုင်တယ်… ဒီကောင်မလေးက တကယ်ကို ကောက်ကျစ်တဲ့ စိတ်ရှိတယ်၊ သူမရဲ့ အခွင့်အလမ်းတွေကို အမြင့်ဆုံးဖြစ်အောင် နောက်ဆုံးအချိန်အထိ တောင့်ခံထားဖို့ ဆန္ဒရှိတယ်… အနာဂတ်မှာ သူမရဲ့ အောင်မြင်မှုတွေက အံ့မခန်း ဖြစ်လာလိမ့်မယ်…"

လီလော့က ခေတ္တမျှ စဉ်းစားကာ….

"ကံကြမ္မာက ကျွန်တော်တို့ကို ဆုံစည်းစေခဲ့လို့ ဒါကို ကျွန်တော် လျစ်လျူရှုပေးလိုက်တာပါ… ပြီးတော့ အရာအားလုံး ဖြစ်ပျက်ပြီးသွားတဲ့အခါ၊ သူမလို ပါရမီရှင်တစ်ယောက်ကို ဆုံးရှုံးလိုက်ရတာ နှမြောစရာကောင်းတယ်ဆိုတာ ကျွန်တော် သဘောပေါက်သွားတယ်… ဘာပဲဖြစ်ဖြစ်၊ သူမက နဂါးစွယ်ကလန်ရဲ့ အစိတ်အပိုင်းတစ်ခုဖြစ်ပြီး သေချာ ပြုစုပျိုးထောင်ပေးမယ်ဆိုရင် ကျွန်တော်တို့အတွက် ခွန်အားတစ်ခု သေချာပေါက် ဖြစ်လာမှာပါ… သူမ သေသွားရင် တကယ်ကို နှမြောစရာ ကောင်းလိမ့်မယ်…"

လီကျင်းဇယ်က သဘောတူသည့်အနေဖြင့် ခေါင်းညိတ်လိုက်ပြီးနောက် ….

"အမှန်ပဲ၊ သူမဆီမှာ အလားအလာတွေ အများကြီးရှိတယ်… သူမက အရင်က နဝမအဆင့်တပိုင်း ပဲ့တင်ထပ်သံကို ပိုင်ဆိုင်ခဲ့တယ်။ ဒါပေမဲ့၊ အစောပိုင်းက သူမရဲ့ ခန္ဓာကိုယ်ကို ငါ စစ်ဆေးကြည့်တော့ သူမက နဝမအဆင့် ကို ရောက်နေပြီဆိုတာ ငါ တွေ့လိုက်တယ်… အဲဒီဖြစ်ရပ်က အဆိုးထဲက အကောင်းတစ်ခု ဖြစ်လိမ့်မယ်လို့ ငါ ယုံကြည်တယ်…. သူမက ဝိညာဉ်စား အစစ်အမှန်နတ်ဆိုးကို စုပ်ယူပြီး သူ့ရဲ့ စွမ်းအားကို ကိုယ်ပိုင်အဖြစ် ပြောင်းလဲလိုက်တာ ဖြစ်ရမယ်… ဒီအရာက သူမကို နောက်တစ်ဆင့်တက်နိုင်ဖို့ ဦးတည်သွားစေတာပဲ…

"အဆင့်နိမ့် နဝမအဆင့် ချောက်နက်မြွေ ပဲ့တင်ထပ်သံပေါ့…”

"ဒီနှစ်တွေအားလုံး ပေးဆပ်လိုက်ရတာက အဆင့်နိမ့် နဝမအဆင့် တစ်ခုအတွက်လား… အဲဒါ မဆိုးပါဘူး…"

အစစ်အမှန် နဝမအဆင့် ပဲ့တင်ထပ်သံများသည် ရှားပါးလှသည်။ အတွင်းပိုင်းနတ်ဘုရားတိုက်ကြီးသို့ ရောက်ရှိလာကတည်းက သူကိုယ်တိုင်ပင် ယခုအချိန်အထိ တစ်ယောက်ကိုသာ တွေ့ဖူးသေးသည်။ ၎င်းမှာ ချင်ယီပိုင်ဆိုင်သော ပဲ့တင်ထပ်သံပင်ဖြစ်သည်။

"သူမရဲ့ စွမ်းရည်နဲ့ဆိုရင်၊ ဆုံးရှုံးသွားတဲ့ အချိန်တွေအားလုံးကို ပြန်လည်ဖြည့်ဆည်းဖို့ ခက်ခဲမှာ မဟုတ်ပါဘူး။ ကောင်းကင်နဂါး အစောင့်တပ်ငါးခုထဲမှာတောင် သူမကို တကယ်ယှဉ်နိုင်မယ့်သူ သိပ်မရှိဘူး" ဟု လီကျင်းဇယ်က မှတ်ချက်ချလိုက်သည်။

နောက်တစ်ခဏတွင်၊ လီကျင်းဇယ်၏ မျက်နှာပေါ်၌ အပြုံးတစ်ခု ရုတ်တရက် ပေါ်လာပြီး….

"ဒီကောင်မလေးက အတော်လေး ကောင်းမွန်ပြီး မင်းအပေါ် ကျေးဇူးတင်နေတာပဲ… သူ မင်းကို ချစ်မိသွားအောင် လုပ်နိုင်ရင် ကောင်းတဲ့ အဆုံးသတ်တစ်ခု ဖြစ်လာလိမ့်မယ်… သူမရဲ့ အလားအလာနဲ့ဆိုရင်၊ သူမက မင်းရဲ့ အဆင့်အတန်းနဲ့ အတော်လေး ထိုက်တန်ပါတယ်… အဲဒီလိုဆိုရင်၊ သူမကို ကူညီပေးဖို့ ငါ့အတွက် ပိုခိုင်လုံတဲ့ အကြောင်းပြချက်တွေ ရလာတာပေါ့ .."

"အဘိုး၊ အဘိုး အတွေးလွန်နေပြီ… ကျွန်တော့်မှာ အဲဒီလို အတွေးမျိုး လုံးဝ မရှိဘူး…ကျွန်တော့်မှာ စေ့စပ်ထားတဲ့သူ ရှိပြီးသား၊ ပြီးတော့ သူမက ရုပ်ရည်၊ စိတ်နေသဘောထား၊ အလားအလာ ဘယ်နေရာမှာမဆို လီလင်းကျင်းထက် အများကြီး ပိုကောင်းတယ်…"

"ပြင်ပနတ်ဘုရားတိုက်ကြီး လို နေရာမျိုးမှာ ဒီလိုလူမျိုး ရှိလို့လား…”

"တကယ်တော့ အဲဒီအရာတွေက အရေးမကြီးပါဘူး… အဓိကက ကျွန်တော်တို့ရဲ့ ခံစားချက်တွေပဲ…"

"မင်းက နဂါးစွယ်ကလန် ခေါင်းဆောင်ရဲ့ မြေးလေ…မင်းရဲ့ အဆင့်အတန်းက သာမန် မင်းဆက်တွေ ဒါမှမဟုတ် နိုင်ငံတွေက မင်းသားတွေထက် အများကြီး ပိုမြင့်တယ်… သူတို့ဆီမတောင် မိန်းမပေါင်း ထောင်ချီ ရှိကြသေးတာပဲ၊ မင်း မိန်းမ နည်းနည်းလောက် လက်ခံတာက လုံးဝကို ပုံမှန်ပါပဲ…"

ထိုစကား ကြားသောအခါ လီလော့မှာ ရယ်ရခက် ငိုရခက် ဖြစ်နေသည်။ သူသည် ဤကိစ္စကို ဆက်လက် မဆွေးနွေးလိုသဖြင့် နဂါးစွယ် ငါးချောင်းကို ထုတ်ယူကာ စကားလမ်းကြောင်း ပြောင်းလိုက်သည်။

"အဘိုး၊ အဘိုးကို ဒုက္ခပေးရမယ့် နောက်ထပ် တောင်းဆိုချက် သေးသေးလေး တစ်ခု ရှိပါသေးတယ်… ကျွန်တော့်ရဲ့ ခရီးစဉ်မှာ ဒီနဂါးစွယ်တွေကို ရခဲ့တယ်၊ ပြီးတော့ နဂါးစွယ်အဆီအနှစ် တစ်စက် ထုတ်ယူနိုင်ဖို့ အဘိုးဆီက အကူအညီ တောင်းချင်လို့ပါ…”

လီကျင်းဇယ်က မှေးမှိန်နေသော နဂါးစွယ် ငါးချောင်းကို တစ်ချက်ကြည့်ပြီး ….

"ဒီအမှိုက်တွေကို မင်း ဘယ်က ကောက်လာတာလဲ…”

လီလော့မှာ တစ်ခဏမျှ မှင်သက်သွားသည်။ ကျောက်ကျင်းယွီထံမှ ဤနဂါးစွယ်များကို ရရှိရန် သူ အလွန် ကြိုးစားတိုက်ခိုက်ခဲ့ရသော်လည်း၊ လီကျင်းဇယ်၏ မျက်စိထဲတွင် ၎င်းတို့သည် အမှိုက်များနှင့် အတူတူပင် ဖြစ်နေသည်။

သို့သော်လည်း ၎င်းမှာ မျှော်လင့်ထားပြီးဖြစ်သည်။

လီကျင်းဇယ်၏ ဘဝတစ်သက်တာတွင် များစွာ ပို၍ တန်ဖိုးကြီးသော ရတနာပေါင်းများစွာကို ကြုံတွေ့ခဲ့ဖူးပေလိမ့်မည်။ ဤနဂါးစွယ်များသည် လီလော့အတွက် ဈေးကြီးသော်လည်း သူ့အဘိုး၏အမြင်တွင်မူ ဘာမှ မဟုတ်ပေ။

"နဂါးစွယ်တိုင်းကနေ နဂါးစွယ်အဆီအနှစ်ကို ထုတ်ယူနိုင်တာ မဟုတ်ဘူး…မင်းလက်ထဲက ဟာတွေနဲ့ဆိုရင် သိပ်မသေချာဘူး…" ဟု လီကျင်းဇယ်က သူ့ကို ပွင့်ပွင့်လင်းလင်း ပြောပြလိုက်သည်။

"အင်း၊ တကယ်တော့ ကျွန်တော့်မှာ လျှို့ဝှက်ကျင့်စဉ်တစ်ခု ရှိတယ်..."

လီလော့က စောစောက လီလင်းကျင်း ပေးထားသော ပေလိပ်ကို ထုတ်ယူရင်း ရှက်ရွံ့စွာ ပြောလိုက်သည်။

လီကျင်းဇယ်က ၎င်းကို ယူကာ ခဏတာ ဖတ်ရှုပြီးနောက် မှတ်ချက်ချလိုက်သည်။

"ဒီထုတ်ယူတဲ့ နည်းလမ်းက တကယ်ကို ထူးခြားတယ်၊ ဒါပေမဲ့ အဓိပ္ပာယ်မရှိဘူး…"

လီလော့ အလွန် ထိတ်လန့်သွားသည်။ ဤအရာအတွက်သာ လီလင်းကျင်းနှင့် သဘောတူညီမှု ရယူခဲ့ခြင်းဖြစ်သည်။

"ဘယ်…ဘယ်လို"

"အဲဒါကို လုပ်ဖို့ ဘုရင်တစ်ပါးရဲ့ အကူအညီ လိုအပ်တယ်ဆိုတဲ့ အချက်တင်ပဲ တန်ဖိုး လျော့ကျသွားစေတာ…နဂါးစွယ်အဆီအနှစ် တစ်စက်က ကောင်းကင်ရွှေ သန်းသုံးဆယ်ပဲ တန်တာ….ဘုရင်တစ်ပါးကို ကူညီပေးဖို့ တောင်းဆိုတာရဲ့ တန်ဖိုးက ဘယ်လောက်ဖြစ်မလဲဆိုတာ မင်း တွေးကြည့်ဖူးလား…"

လီလော့မှာ မှင်သက်သွားရပြန်သည်။

သူ့တွင် လီကျင်းဇယ် ဟူသော ယုံကြည်ရသည့် ကျောထောက်နောက်ခံ ဘုရင်တစ်ပါး ရှိနေသဖြင့် ဤအကြောင်းကို သူ သိပ်မတွေးခဲ့မိပေ။

သို့သော်လည်း၊ ကူညီရန် သာမန် ဘုရင်တစ်ပါးကို တောင်းဆိုခြင်းက...

လူ့အဖွဲ့အစည်းရှိ သူတို့၏ ရပ်တည်ချက်နှင့်ဆိုလျှင် ကောင်းကင်ရွှေ သန်းသုံးဆယ်ထက် သေချာပေါက် ပို၍ ကုန်ကျပေလိမ့်မည်။ ထို့အပြင်၊ မည်သည့် ဘုရင်အဆင့် ကျင့်ကြံသူက သန်းသုံးဆယ်လေးအတွက် သူ့ကိုယ်သူ အောက်ကျခံပြီး တစ်စုံတစ်ယောက်ကို ကူညီပေးမည်နည်း။

ထိုငွေပမာဏနှင့်ဆိုလျှင်၊ နဂါးစွယ်အဆီအနှစ်ကို တိုက်ရိုက် ဝယ်ယူလိုက်ခြင်းက ပို၍ လွယ်ကူပေလိမ့်မည်။

ထိုအကြောင်းကို တွေးမိသောအခါ၊ လီလော့က မီးကန့်လန့်ကာထဲရှိ လှပသော လူရိပ်လေးကို နာကြည်းသော မျက်လုံးများဖြင့် ချက်ချင်း စိုက်ကြည့်လိုက်သည်။

အခြားတစ်ဖက်လူ ပေးအပ်သော လျှို့ဝှက်ကျင့်စဉ်သည် သူ့အတွက် အထူးပြုလုပ်ထားသလို ဖြစ်နေသော်လည်း မည်သို့ပင် တွေးကြည့်စေကာမူ ၎င်းမှာ သေချာပေါက် ဆုံးရှုံးမှုကြီးသော အရောင်းအဝယ်တစ်ခု ဖြစ်နေသည်။

ထိုအခြေအနေမျိုးတွင်၊ လီကျင်းဇယ်က လျှို့ဝှက်ကျင့်စဉ်ကို အသုံးပြုသောအခါ၊ နဂါးစွယ်အဆီအနှစ် တစ်စက်ထက်ပို၍ ထုတ်ယူနိုင်ပါစေဟုသာ သူ ဆုတောင်းနိုင်တော့သည်။

သို့သော်လည်း၊ လီကျင်းဇယ်က သူ့ကို ရယ်မောနေသော်လည်း သူ့ကို ကူညီပေးရန် ဆန္ဒရှိနေဆဲပင်။ မည်သို့ပင်ဆိုစေ၊ ဤလျှို့ဝှက်ကျင့်စဉ်ကို လီလော့ ရရှိခဲ့ခြင်းဖြစ်ပြီး၊ ၎င်းသည် သူ့ ကိုယ်ပိုင် မူဝါဒများကို ချိုးဖောက်မည် မဟုတ်ပေ။ ဤသို့သော ကိစ္စမျိုးအတွက် မြေးဖြစ်သူကို ကူညီရန် ဆန္ဒရှိပေလိမ့်မည်။

"အဲဒါကို တတ်နိုင်သမျှ မြန်မြန် ထုတ်ယူဖို့ မင်းကို ငါ ကူညီပေးမယ်… ဘာပဲဖြစ်ဖြစ်၊ နဂါးခေါင်းဆောင် ပြိုင်ပွဲအတွက် မင်း ပြင်ဆင်ရမယ့် အချိန်ရောက်ပြီ… အခြား ကလန် လေးခုက တံခွန်ကိုင်တွေကလည်း အဲဒီအတွက် တကယ်ကို ကြိုးစားလေ့ကျင့်နေကြတယ်လို့ ငါ ကြားတယ် လီချင်းဖုန်းနဲ့လုချင်းမိန် တို့လို ပါရမီရှင်တွေက ကောင်းကင်ပုလဲအဆင့်ကိုရောက်ဖို့ ကြိုးစားနေကြတယ်" ဟု လီကျင်းဇယ် ပြောလိုက်တော့ လီလော့ အံ့အားသင့်သွားသည်။

လီချင်းဖုန်းနှင့် ကျန်သူများက ကောင်းကင်ပုလဲအဆင့်သို့ ခြေချရန် ပြင်ဆင်နေကြပြီလား…

သူ တိုးတက်နေချိန်တွင် အခြား ပြိုင်ဘက်များသည်လည်း လုံးဝ အရှိန်လျှော့မသွားခဲ့ပုံ ပေါ်သည်။

"ငါ ဆက်ပြီး အနားယူနေလို့ မရတော့တဲ့ပုံပဲ…” လီလော့က စိတ်ပျက်စွာ သက်ပြင်းချလိုက်မိသည်။ မူလက၊ လီချင်းဖုန်းတို့လို ပါရမီရှင်များနှင့်သူ့ကြားတွင် စွမ်းအားကွာဟချက် တစ်ခု ရှိနေပြီးဖြစ်သည်။ ယခုအခါ သူ အနည်းငယ် အမီလိုက်နိုင်ခဲ့သော်လည်း၊ သူတို့က သူ့အပေါ် အသာစီးရနေဆဲပင်။

မကြာမီ ကျင်းပမည့် ပြိုင်ပွဲသည် တကယ်ကို စိန်ခေါ်မှုတစ်ခု ဖြစ်လာမည်ပုံ ပေါ်သည်။

"အခု မင်း သုံးရောင်ခြယ် ဖန်သား ခန္ဓာကိုယ်ကို ရထားပြီဆိုတော့၊ နတ်ဆိုးခန္ဓာအဆင့်ရဲ့ အထွတ်အထိပ်မှာ ရပ်တည်နေပြီပဲ… နတ်ဆိုးကြယ်စွမ်းအင်ကို စုစည်းဖို့ မင်း စတင်စဉ်းစားလို့ ရပြီ…တကယ်တော့၊ အဲဒါနဲ့ ပတ်သက်ပြီး မင်းကို ကူညီဖို့ ငါ့မှာ အကြံဉာဏ်ကောင်း တစ်ခု ရှိတယ်"

လီကျင်းဇယ်က သူ၏ ပုံမှန်အားဖြင့် တည်ငြိမ်နေသော မျက်နှာပေါ်တွင် အပြုံးတစ်ခု ပေါ်လာရင်း ပြောလိုက်သည်။

"ဘာကို ဆိုလိုတာလဲ"

ဤအခိုက်အတန့်တွင် လီကျင်းဇယ်၏ မျက်လုံးများက လက်ထဲရှိ မီးကန့်လန့်ကာဆီသို့ ပြန်လည်ရောက်ရှိသွားသည်။

"လိုအပ်လို့လား…ကျွန်တော်က နတ်ဆိုးခန္ဓာအဆင့်မှာပဲ ရှိသေးတာ၊ ဝမ်းကွဲအစ်မ လင်းကျင်းရဲ့ အဆင့်နဲ့တောင် မနီးစပ်သေးဘူး…ဒါကို ကျွန်တော် ခံနိုင်ရည်ရှိမှာ မဟုတ်ဘူး.."

"မင်းပြောတာ မှန်ပါတယ်… မင်းက သာမန်လူတစ်ယောက်သာ ဆိုရင်၊ မင်းရဲ့ အဆင့်နဲ့ ဒီအရာကို မင်း ခံနိုင်ရည်ရှိမှာ မဟုတ်ဘူး… ဒါပေမဲ့ မင်းဆီမှာ သုံးရောင်ခြယ် ဖန်သား ခန္ဓာကိုယ် ရှိနေတာကြောင့် မင်း အဲဒါကို လုပ်နိုင်လိမ့်မယ်…"

"အဘိုး၊ နောက်တစ်ခါမှ လုပ်ကြတာပေါ့..”

လီလော့ ထွက်ပြေးရန် ကြိုးစားသည်ကို ကြည့်ရင်း လီကျင်းဇယ်က ပြုံးရုံသာ ပြုံးနေခဲ့သည်။ နောက်တစ်ခဏတွင်၊ မီးကန့်လန့်ကာ လင်းလက်သွားပြီး လီလော့၏ အထက်တည့်တည့်တွင် ပေါ်လာသည်။ လီလော့ လုပ်နိုင်သမျှမှာ အတွင်းသို့ ဆွဲသွင်းမခံရမီ အော်ဟစ်လိုက်ရုံသာ ဖြစ်သည်။

မီးကန့်လန့်ကာထဲသို့ ကြည့်ရင်း၊ လီကျင်းဇယ်က တိုးတိုးလေး ရေရွတ်လိုက်သည်။

"ဒါက တခြားသူတွေဆိုရင် သေချင်လောက်အောင် လိုချင်တဲ့ အခွင့်အရေးပဲကွ ဒီကောင်လေးရ ဒါပေမဲ့ မင်းက ထွက်ပြေးဖို့ ကြိုးစားနေတယ်... ပြီးတော့၊ အဲဒီကောင်မလေးနဲ့ အတူတူ ဒုက္ခခံရတာက ဆိုးတဲ့ကိစ္စမှ မဟုတ်တာ… အဲဒါက မင်းတို့ နှစ်ယောက်ကို ပိုပြီး နီးကပ်သွားစေလိမ့်မယ်၊ ဘာလို့ မလုပ်ရမှာလဲ…."