အခန်း (၁၉၅၁-၁၉၅၂)
Vol. 196 Ch. 1951-1952
အခန်း (၁၉၅၁) - မသေမျိုးဧကရာဇ်၏ အနွယ်တော်များ
နတ်လမ်းစဉ်ဂိုဏ်းချုပ်သည် နဂါးနတ်ဘုရား၏ မျက်ဝန်းထဲမှ အထင်အမြင်သေးသည့် အရိပ်အယောင်ကို မြင်လိုက်ရသောအခါ စက္ကန့်အနည်းငယ်မျှ တိတ်ဆိတ်သွားပြီးနောက် ခပ်အေးအေးပင် ဆိုလိုက်သည်။
“နဂါးနတ်ဘုရားက နတ်ဘုရားဘုရင်နယ်မြေရဲ့ နံပါတ်တစ်လို့ ကောလာဟလတွေ ကြားဖူးတယ်၊ ငါလည်း နဂါးနတ်ဘုရားရဲ့ မြင့်မြတ်တဲ့ ပညာရပ်တွေကို နည်းနည်းလောက် ပညာတောင်းခံချင်ပါတယ်... ကြွပါ”
သူသည် မိမိလက်ထဲရှိ တုတ်တိုကို ဖြည်းညှင်းစွာ မြှောက်ကာ ရင်ဘတ်ရှေ့တွင် ကန့်လန့်ဖြတ် အနေအထားဖြင့် ထားလိုက်သည်။
အနားရှိ ကျင့်ကြံသူအားလုံး၏ မျက်နှာထားများ လှုပ်ခတ်သွားကြပြီး မျက်ဝန်းထဲတွင် အံ့သြတုန်လှုပ်မှုများ ဖြတ်ပြေးသွားကြသည်။ နတ်လမ်းစဉ်ဂိုဏ်းချုပ်က နဂါးနတ်ဘုရားကို တစ်ယောက်တည်း ရင်ဆိုင်ဖို့ ဒီလောက်ထိ ယုံကြည်ချက် ရှိနေတာလား။
“ဒါလည်း ကောင်းတာပဲ၊ မင်းနဲ့ ခဏလောက် ကစားပေးရတာပေါ့”
နဂါးနတ်ဘုရားက ခေါင်းကို သာသာညိတ်လိုက်ပြီး နဂါးအုပ်စုထဲမှ တိုက်ရိုက် ပျံသန်းထွက်ခွာကာ နဂါးနတ်ဘုရား စစ်ကြောင်းကြီးမှ ခွဲထွက်လိုက်သည်။ ရှေးဟောင်းနဂါးနတ်ဘုရားနန်းတော် မှ နဂါးမျိုးနွယ်စု ကျင့်ကြံသူများသည်လည်း ဘာမှ ဝင်မပြောကြချေ။
နဂါးနတ်ဘုရားနှင့် နတ်လမ်းစဉ်ဂိုဏ်းချုပ်တို့သည် တစ်ယောက်ကိုတစ်ယောက် စိုက်ကြည့်လိုက်ကြပြီးနောက် အလွန် နားလည်မှုရှိစွာဖြင့် အလင်းတန်းနှစ်ခုအဖြစ် ပြောင်းလဲကာ ကောင်းကင်ယံထံသို့ တိုက်ရိုက် ပျံတက်သွားကြတော့သည်။
လူသားတို့၏ မျက်စိဖြင့် မမြင်နိုင်သော တိမ်မြူများ ထူထပ်ရာ ကောင်းကင်ယံထဲမှ ပြင်းထန်လှသော ပေါက်ကွဲသံကြီးများ တရစပ် မြည်ဟည်းလာတော့သည်။ ထိုကဲ့သို့သော လှုပ်ခတ်မှုကြီးသည် နာရီဝက်ခန့်ကြာသည်အထိ အရှုံးအနိုင် မပေါ်သေးချေ။
“နဂါးနတ်ဘုရားရဲ့ စွမ်းအားနဲ့ဆိုရင်တော့ နတ်လမ်းစဉ်ဂိုဏ်းချုပ်ရဲ့ လက်ထဲမှာ ရှုံးနိမ့်သွားတာမျိုး မဖြစ်နိုင်ပါဘူးနော်”
လနန်းတော် မှ အဆင့် ၉ မသေမျိုးတစ်ဦးက ကျန်ရှိသောသူများကို ထူးဆန်းသော မျက်နှာထားဖြင့် လှမ်းကြည့်ကာ မေးလိုက်သည်။
“မဖြစ်နိုင်တာ”
ထိုနေရာရှိ အဆင့် ၉ မသေမျိုးအားလုံးက ခေါင်းကို အနည်းငယ် ခါယမ်းလိုက်ကြသည်။
“တိုက်ပွဲက စနေပြီလား ငါတို့ နောက်မကျလောက်ဘူးလို့ မျှော်လင့်ရတာပဲ”
မသေမျိုးလှေတစ်စင်းသည် ဖြည်းညှင်းစွာ မောင်းနှင်လာပြီး လန်တောက်ချွန်းနှင့် ရှောက်မုန့်ယွမ်တို့က လှေဦးတွင် ရပ်လျက် ဟင်းလင်ပြင်ထဲမှ တိုက်ပွဲအရှိန်အဝါများကို မော့ကြည့်လိုက်ကြသည်။
“မိတ်ဆွေနှစ်ဦး နောက်မကျပါဘူး၊ အခုမှ စတာပါ။ ဒါပေမဲ့ နတ်လမ်းစဉ်ဂိုဏ်းရဲ့ အမာခံတွေကတော့ ဆုတ်ခွာသွားကြပြီ”
အဆင့် ၉ မသေမျိုးတစ်ဦးက ပြန်လည် ဖြေကြားလိုက်သည်။
“ခန့်မှန်းထားပြီးသားပါ၊ ဒီလို ရှေးဟောင်းအမွေအနှစ်တွေ ရှိတဲ့ ဂိုဏ်းကို တစ်ခါတည်းနဲ့ အမြစ်ပြတ် ချေမှုန်းဖို့ဆိုတာ ဘယ်လိုလုပ် လွယ်ပါ့မလဲ”
လန်တောက်ချွန်းက ပြုံးလိုက်သည်။
စကားဆုံးသည်နှင့် ကောင်းကင်ယံထံမှ သွေးမိုးများ တဖြောဖြော သွန်းဖြိုးကျလာတော့သည်။ ထိုသွေးမိုးထဲတွင် ပါရှိသော အားကောင်းလှသည့် သွေးစွမ်းအင် ကြောင့် လူတိုင်း ရင်သပ်ရှုမော ဖြစ်သွားကြရသည်။ သွေးစက်တိုင်း သွေးစက်တိုင်းသည် ရှေးဟောင်း သားရဲကြီးတစ်ကောင်ကို သိုလှောင်ထားသည့်အလား ထင်မှတ်ရသည်။
ချက်ချင်းဆိုသလိုပင် နဂါးနတ်ဘုရားနှင့် နတ်လမ်းစဉ်ဂိုဏ်းချုပ်တို့သည် မူလနေရာသို့ တပြိုင်နက်တည်း ပြန်လည် ရောက်ရှိလာကြသည်။ သူတို့ ဘယ်တုန်းကမှ ထွက်မသွားခဲ့သည့်အလားပင်။
နတ်လမ်းစဉ်ဂိုဏ်းချုပ်၏ အသက်ရှူသံမှာ တည်ငြိမ်နေပြီး ခန္ဓာကိုယ်ပေါ်တွင် ဒဏ်ရာ အနာတရ လုံးဝမရှိချေ။ ဆံပင်တစ်ပင်ပင် ရှုပ်ပွမနေသလို အဝတ်အစားများလည်း တွန့်ကြေခြင်း မရှိပေ။ ထူးခြားသည်မှာ သူ၏ လက်ထဲက တုတ်တိုထံမှ သွေးစက်များမှာမူ ခြေဖျားနားသို့ တစက်စက် ကျဆင်းနေခြင်းပင်။
နဂါးနတ်ဘုရားကို ပြန်ကြည့်လိုက်သောအခါမူ သူ၏ ခန္ဓာကိုယ်ပေါ်တွင် အလွန်နက်ရှိုင်းသော ဒဏ်ရာကြီးတစ်ခု ရှိနေပြီး ထိုဒဏ်ရာထဲမှ သွေးများမှာ တရဟော ပန်းထွက်နေဆဲ ဖြစ်သည်။ ဒဏ်ရာကို ပြန်လည်ကုသနည်းကို တားဆီးနေသည့် စွမ်းအားတစ်ခု ရှိနေပုံရပြီး သွေးများမှာ မရပ်မနား စီးကျနေတော့သည်။
လူတိုင်း တစ်ယောက်ကိုတစ်ယောက် ကြည့်လိုက်ကြရာ အားလုံး၏ မျက်ဝန်းအိမ် အနက်ရှိုင်းဆုံးတွင် တုန်လှုပ်ချောက်ချားသွားသည့် အရိပ်အယောင်များကို မြင်လိုက်ကြရသည်။ သူတို့သည် နတ်လမ်းစဉ်ဂိုဏ်းချုပ်ကို ပြန်ကြည့်လိုက်သည့်အခါ မျက်နှာထားများမှာ အထင်အမြင်သေးမှုများ လုံးဝ ပျောက်ကွယ်သွားပြီး လေးနက်တည်ကြည်မှုများဖြင့် အစားထိုးသွားကြပြီ ဖြစ်သည်။
“နတ်ဘုရားဘုရင်နယ်မြေရဲ့ နံပါတ်တစ်ဆိုတဲ့ ဘွဲ့အမည်ကတော့ အရှင်သခင် ပြောင်းတော့မယ် ထင်တယ်”
“နတ်လမ်းစဉ်ဂိုဏ်းချုပ်ရဲ့ နည်းလမ်းတွေက ဒီလောက်တောင် အစွမ်းထက်နေတာလား နဂါးနတ်ဘုရားတောင် သူ့ရဲ့ ပြိုင်ဘက် မဟုတ်ဘူးပေါ့”
“ကောင်းကင်ဘုံလမ်းစဉ်တစ်ပိုင်း အဆင့်ကို ရောက်နေတာတော့ မဟုတ်ပါဘူးနော်”
လူတိုင်း၏ ရင်ထဲတွင် တိတ်တဆိတ် တွေးတောလိုက်ကြပြီး ပတ်ဝန်းကျင် လေထုတစ်ခုလုံးမှာ ခဏတာ ငြိမ်သက်အေးစက်သွားတော့သည်။
“ကောင်းတဲ့ နည်းလမ်းပဲ... စောစောက စွမ်းအားတစ်ခုက မင်းရဲ့ စွမ်းအားမဟုတ်ဘူး။ မင်းက အတွင်းနယ်မြေရဲ့ စွမ်းအားကို သုံးနိုင်ပေမဲ့ မင်းက အတွင်းနယ်မြေကိုလည်း စုစည်းထားတာ မဟုတ်ဘူး၊ ကန့်သတ်ချက်အဆင့်ကိုလည်း ကျော်လွန်ထားတာ မဟုတ်ဘူး”
နဂါးနတ်ဘုရားက နတ်လမ်းစဉ်ဂိုဏ်းချုပ်ကို စိုက်ကြည့်လိုက်သည်။ သူ၏ မျက်ဝန်းထဲတွင် ဒေါသအမျက် လုံးဝမရှိဘဲ စပ်စုလိုစိတ်နှင့် စူးစမ်းလိုစိတ်များသာ ပြည့်နှက်နေသည်။
“ငါတို့ မျိုးနွယ်စုရဲ့ သားစဉ်မြေးဆက်မှာ အစွမ်းထက် ပုဂ္ဂိုလ်တွေ အမြောက်အမြား ထွက်ပေါ်ခဲ့ဖူးတယ်။ ငါ့ရဲ့ ဘိုးဘေးက နတ်ဆိုးမျိုးနွယ်ရဲ့ ပထမဆုံးမျိုးဆက် မသေမျိုးဧကရာဇ် ဖြစ်ခဲ့တာကြောင့် သူ့ရဲ့ အနွယ်တော်တစ်ဦး အနေနဲ့ ငါဟာ နတ်ဆိုးသုဿန်ထဲက စွမ်းအားအချို့ကို ချေးယူသုံးစွဲနိုင်တာပါ”
နတ်လမ်းစဉ်ဂိုဏ်းချုပ်က ခေါင်းကို အနည်းငယ် ညိတ်လိုက်ပြီး
“မင်းကို အနိုင်တိုက်ခဲ့တာ ငါမဟုတ်လို့ ရှက်မိပါတယ်” ဟု ဆိုသည်။
နတ်ဆိုးသုဿန်ရဲ့ စွမ်းအား
နတ်ဘုရားလောကရဲ့ အမာခံစွမ်းအားလား
နတ်လမ်းစဉ်ဂိုဏ်းချုပ်၏ အကြည့်သည် ယခုအခါ ရှောက်မုန့်ယွမ်နှင့် လန်တောက်ချွန်းတို့ထံသို့ ကျရောက်သွားသည်။ သူသည် ထိုနှစ်ဦးကို ခဏမျှ အကဲခတ်ကြည့်ပြီးနောက် လန်တောက်ချွန်းကို လှမ်းပြောလိုက်သည်။
“မိတ်ဆွေလန်... နတ်ဘုရားမှန် ရဲ့ တာဝန်က ကျဆုံးမသေမျိုးတွေ လူ့ပြည်ကို ဆင်းလာမယ့် လမ်းကြောင်းကို ပိတ်ဆို့ဖို့ပဲ။ ငါတို့က ကျဆုံးမသေမျိုးတွေကို အသုံးချခဲ့ဖူးပေမဲ့ သူတို့ နယ်မြေကိုးခုထဲကို ခြေလှမ်းလှမ်းလာတာကိုတော့ မလိုလားပါဘူး။ ဒါကြောင့် ဒီမှန် ကို မသေမျိုးလောကငယ် ဆီ ပြန်ပေးဖို့ တောင်းဆိုချင်ပါတယ်”
“ဒါက ငါတို့ရဲ့ တူညီတဲ့ သဘောထားပဲ၊ ဒါကြောင့် ငါ လူလွှတ်ပြီး မှန်ကို မသေမျိုးလောကငယ်ဆီ ပို့ခိုင်းလိုက်ပြီ။ ဒါပေမဲ့ အဲဒီမှန်ရဲ့ စိတ်ဝိညာဉ်ကိုတော့ ငါ အပြီးတိုင် ဖျက်ဆီးလိုက်ပြီ၊ ဒီအချက်ကိုတော့ မင်း စိုးရိမ်စရာ မလိုပါဘူး”
လန်တောက်ချွန်းက ပြုံးလျက် ဆိုလိုက်သည်။
နတ်လမ်းစဉ်ဂိုဏ်းချုပ်သည် စက္ကန့်အနည်းငယ်မျှ တိတ်ဆိတ်သွားပြီးနောက် အနားရှိ ကျင့်ကြံသူအားလုံးကို တစ်ချက် ဝေ့ကြည့်လိုက်သည်။
“အဲဒီ ဖန့်ငရဲမင်းကလည်း ရောက်မလာသေးဘူးဆိုတော့ အားလုံး ဒီအတိုင်း အလကား ထိုင်စောင့်နေရတာ ပျင်းစရာကောင်းနေလိမ့်မယ်... အဲဒီတော့... အားလုံးပဲ တူတူ တက်လာခဲ့ကြပါ”
“တူတူ တက်လာခဲ့ကြပါ ဟုတ်လား”
“ဒီလောက်တောင် မောက်မာတာလား”
ရှောက်မုန့်ယွမ်၏ မျက်နှာထားမှာ ထူးဆန်းသွားပြီး သူ၏ လက်ထဲတွင် ရှန်ပိဓား ပေါ်လာတော့သည်။ ဤဓား၏ ပံ့ပိုးမှုကြောင့် သူ၏ အရှိန်အဝါသည် အဆင့် ၉ ထိပ်ဆုံးအဆင့်ကို တိုက်ရိုက် ကျော်လွန်သွားခဲ့သည်။
“တိုက်ခိုက်ဖို့ မလောပါနဲ့ဦး”
နဂါးနတ်ဘုရားက ဖြည်းညှင်းစွာ စကားဆိုလိုက်သည်။
ရှောက်မုန့်ယွမ်က ချက်ချင်း ပြုံးလိုက်ပြီး
“နဂါးသူတော်စင် ပြောတဲ့အတိုင်းပေါ့” ဟု ဆိုကာ ငြိမ်သွားသည်။
လှုပ်လှုပ်ရှားရှား ဖြစ်နေကြသော ကျင့်ကြံသူအားလုံးလည်း သတိပြန်ဝင်လာကြပြီး နတ်လမ်းစဉ်ဂိုဏ်းချုပ်တွင် အခြား ရည်ရွယ်ချက်တစ်ခု ရှိနေလိမ့်မည်ဟု ခံစားလိုက်ရသည်။
“မင်း ဖန့်ငရဲမင်းကို စောင့်နေတယ်လို့ ပြောတယ်၊ သူ့ကို စောင့်ပြီး ဘာလုပ်မလို့လဲ ”
နဂါးနတ်ဘုရားက နတ်လမ်းစဉ်ဂိုဏ်းချုပ်၏ မျက်နှာပေါ်မှ အရိပ်အယောင်တစ်ခုခုကို ရှာဖွေရန် ကြိုးစားရင်း စိုက်ကြည့်ကာ မေးလိုက်သည်။
နတ်လမ်းစဉ်ဂိုဏ်းချုပ်က အေးဆေးစွာ ပြုံးလိုက်ပြီး
“ယန်နတ်ဘုရားတွေ အားလုံးက ရှေ့တန်းကို တွန်းထုတ်ပေးထားပြီး ငါတို့ နတ်လမ်းစဉ်ဂိုဏ်းရဲ့ အစီအစဉ်တွေကို ဦးဆောင် ဖျက်ဆီးခဲ့တဲ့သူက ဘယ်လောက်တောင် ထူးခြားနေလဲဆိုတာ ငါ မြင်ချင်လို့ပါ”
“ဖန့်ငရဲမင်းရဲ့ ကိုယ်ပိုင်ကျင့်ကြံမှုက မမြင့်ပါဘူး၊ အဆင့် ၇ ရှေးဟောင်းမသေမျိုး အဆင့်ပဲ ရှိတာ။ သူက အဓိကကတော့ အဆင့်အတန်း ထူးခြားပြီး ဆယ့်ရှစ်ထပ် ငရဲမျှော်စင် ကို ပိုင်ဆိုင်ထားလို့သာ ရှေးဟောင်းမိစ္ဆာကို မောင်းထုတ်နိုင်ပြီး အခြေအနေကို ထိန်းသိမ်းနိုင်ခဲ့တာ”
နဂါးနတ်ဘုရားက အေးစက်စွာ ဆိုလိုက်သည်
“မင်း သူ့ကို စောင့်မနေပါနဲ့တော့၊ မင်းမှာ ဘာလျှို့ဝှက်လက်နက်တွေ ရှိရှိ အကုန်ထုတ်ပြလိုက်စမ်းပါ။ နတ်လမ်းစဉ်ဂိုဏ်းကနေ ထွက်မသွားချင်တဲ့ အဘိုးကြီး အနည်းငယ် ရှိသေးတယ် မဟုတ်လား သူတို့ကိုလည်း တောင်ပေါ်က ဆင်းခိုင်းလိုက်၊ ဖုံးဖုံးဖိဖိ လုပ်မနေနဲ့”
“ငါတို့လို အဘိုးကြီးတွေကို တောင်ပေါ်က ဆင်းခိုင်းဖို့ မင်းလိုကောင်က အဆင့်မီလို့လား ”
နတ်လမ်းစဉ်ဂိုဏ်း၏ အနက်ရှိုင်းဆုံးနေရာမှ ခန့်ညားထည်ဝါလှသော နတ်ဘုရားအသံကြီးတစ်ခု ထွက်ပေါ်လာတော့သည်။ ထိုအသံကြောင့် အဆင့် ၉ မသေမျိုးများပင်လျှင် မရှောင်လွှဲနိုင်ဘဲ အားလုံး ရင်ထဲတွင် မူးဝေ သွားကြရသည်။
“ဒါလည်း ကန့်သတ်ချက်အဆင့်ကျော်လွန်တဲ့ စွမ်းအားပဲ၊ သူတို့ကလည်း နတ်လမ်းစဉ်ဂိုဏ်းချုပ်လိုပဲ နတ်ဆိုးသုဿန်ထဲက စွမ်းအားတွေကို ချေးယူနိုင်ကြတာလား ”
ရှောက်မုန့်ယွမ်က လန်တောက်ချွန်းကို ကြည့်ကာ စုံစမ်းသည့် မျက်ဝန်းများဖြင့် မေးလိုက်သည်။
“မင်း ဉာဏ်ကောင်းတယ်၊ ပြောကြည့်စမ်း... နတ်လမ်းစဉ်ဂိုဏ်းမှာ ဒီလောက် အစွမ်းထက်တဲ့ စွမ်းအားရှိနေတာကို ဘာလို့ ယင်လောကတုန်းက မျက်နှာမပြခဲ့ကြတာလဲ အဲဒီတုန်းကဆိုရင် သူတို့ တိုက်ပွဲအခြေအနေကို ပြောင်းပြန်လှန်ပစ်နိုင်တဲ့ အခွင့်အရေး ရှိခဲ့တာပဲ”
“အကြောင်းပြချက် တစ်ခုပဲ ရှိနိုင်တယ်”
လန်တောက်ချွန်း၏ မျက်နှာထားက လေးနက်သွားသည်။
“သူတို့က ဒီနေရာမှာ ရှိနေမှသာ နတ်ဆိုးသုဿန်ရဲ့ စွမ်းအားကို ချေးယူနိုင်တာ ဖြစ်လိမ့်မယ်။ နတ်ဘုရားနယ်မြေမှာဆိုရင် နတ်ဆိုးသုဿန်ဟာ ထိပ်သီး အတွင်းနယ်မြေတစ်ခု ဖြစ်နေလိမ့်မယ်။ ဒီလို အတွင်းနယ်မြေက ဘယ်လောက်အထိ အစွမ်းထက်မလဲဆိုတာ မင်း ခန့်မှန်းနိုင်မှာပါ”
ရှောက်မုန့်ယွမ်၏ မျက်နှာထား အနည်းငယ် ပြောင်းလဲသွားသည်။
အတွင်းနယ်မြေဆိုသည်မှာ သူတော်စင်များ၏ စွမ်းအားမြစ်ဖျားခံရာဖြစ်ပြီး သူတော်စင်ကျမ်းစာလမ်းစဉ်၏ ရလဒ်လည်း ဖြစ်ကာ ကျင့်ကြံခြင်းလမ်းစဉ်၏ တကယ့် အဓိက အမာခံ ဖြစ်သည်။ သူသည် နယ်မြေကိုးခုတွင် နှစ်ပေါင်းများစွာ နေထိုင်ခဲ့သဖြင့် နတ်ဆိုးသုဿန်က ဘယ်လောက်အထိ အစွမ်းထက်လဲဆိုတာ အသေအချာ မသိသော်လည်း နတ်ဘုရားလောကကြီးက ဘယ်လောက်အထိ ကျယ်ပြောလဲဆိုတာကိုမူ သိရှိလှသည်။ အတွင်းနယ်မြေကို ဤမျှအဆင့်အထိ ကျင့်ကြံနိုင်သော သူတော်စင်တစ်ဦးသည် ထိုစဉ်က နယ်မြေအရှင်သခင် အဆင့်မဟုတ်ခဲ့လျှင်ပင် ထိုအဆင့်နှင့် အလှမ်းမဝေးလှသော ပုဂ္ဂိုလ်ကြီး ဖြစ်ပေလိမ့်မည်။
“ငါ့ရှေ့မှာ လာပြီး ဘယ်သူက အသက်ပိုကြီးလဲလို့ ပြိုင်နေတာလား”
နဂါးနတ်ဘုရားက နတ်လမ်းစဉ်ဂိုဏ်း၏ အနက်ရှိုင်းဆုံးနေရာသို့ အေးစက်စက် လှမ်းကြည့်လိုက်သည်။
“ခေါင်းဝှက် အမြီးဝှက်လုပ်နေတဲ့ ကြွက်သူခိုးတွေ၊ အကုန်လုံး တောင်ပေါ်က လှိမ့်ဆင်းလာခဲ့ကြစမ်း။ မင်းတို့ရဲ့ နည်းလမ်းတွေက ဘယ်လောက်အထိ အစွမ်းထက်လဲဆိုတာ ငါကိုယ်တိုင် ကြည့်ရသေးတာပေါ့”
“နဂါးသူတော်စင်... အဲဒီအဘိုးကြီးတွေကလည်း ဒီဂိုဏ်းချုပ်လိုပဲ စွမ်းအားတွေကို တူတူ ထုတ်သုံးကြမယ်ဆိုရင် ငါတို့တွေ သူတို့ကို ယှဉ်နိုင်မှာ မဟုတ်ဘူး”
လန်တောက်ချွန်းက တိုးတိုးလေး အသံလွှင့်ကာ သတိပေးလိုက်သည်။
နဂါးနတ်ဘုရားက လန်တောက်ချွန်းကို တစ်ချက် စောင်းငဲ့ကြည့်လိုက်ပြီး
“သူတို့ပဲ အတွင်းနယ်မြေရဲ့ စွမ်းအားကို သုံးနိုင်ပြီး ငါကကျတော့ မသုံးနိုင်ဘူးလို့ မင်း ထင်နေတာလား”
ဟု ဆိုသည်။
လန်တောက်ချွန်းမှာ ခဏမျှ ဆွံ့အသွားပြီး ထူးဆန်းသော မျက်နှာထား ဖြစ်သွားတော့သည်။
“ဒီနေ့ ဘာပဲဖြစ်ဖြစ် ဒီကောင်တွေကို ဒီနေရာကနေ မောင်းထုတ်နိုင်မှသာ နယ်မြေကိုးခုက လုံးဝ အေးချမ်းသွားမှာ။ အကယ်၍ သူတို့က ထွက်မသွားဘဲ ဇွတ်ခိုအောင်းနေမယ်ဆိုရင် ငါတို့ အိပ်စက်တဲ့အခါ ခေါင်းပေါ်မှာ ဓားတစ်စင်း ဆွဲထားသလို ဖြစ်နေလိမ့်မယ်၊ မင်းကော ဒီလို အခြေအနေမျိုးကို မြင်ချင်လို့လား ”
“မင်းလည်း ခန့်မှန်းမိမှာပါ၊ နတ်လမ်းစဉ်ဂိုဏ်းမှာ ကျန်ခဲ့တဲ့သူတွေအကုန်လုံးက အဲဒီ နတ်ဆိုးမျိုးနွယ်ရဲ့ ပထမဆုံးမျိုးဆက် မသေမျိုးဧကရာဇ်ရဲ့ အနွယ်တော်တွေပဲ၊ သူတို့အားလုံးက နတ်ဆိုးသုဿန်ရဲ့ စွမ်းအားကို သုံးနိုင်ကြတယ်။ ဒီမှာ ကျန်နေခဲ့ရတဲ့ ရည်ရွယ်ချက်ကတော့ နောက်ဆုံးအနေနဲ့ ဆယ့်ရှစ်ထပ် ငရဲမျှော်စင်ထဲက ယင်စစ်သည်တွေကို အင်အားပြုန်းတီးအောင် လုပ်ဖို့ပဲ ဖြစ်လိမ့်မယ်။ ဒါမှ ငါတို့ နောက်ပိုင်း ပြင်ပရန်သူတွေ ကျူးကျော်လာတာကို ရင်ဆိုင်တဲ့အခါ တိုက်ခိုက်ရေးစွမ်းရည် အတော်များများ ဆုံးရှုံးသွားမှာလေ”
“ဒီလိုဆိုရင်တော့... ဒီနေ့တိုက်ပွဲက မတိုက်လို့ကို မရတော့ဘူးပေါ့...”
လန်တောက်ချွန်းက တီးတိုး ရေရွတ်လိုက်တော့သည်။
အခန်း (၁၉၅၂) - ကြီးမားလှသော ပေးဆပ်မှု
နတ်လမ်းစဉ်ဂိုဏ်းချုပ်သည် နဂါးနတ်ဘုရားနှင့် ကျန်ရှိသောသူများ၏ အတွေးကို ရိပ်မိသွားပြီးဖြစ်၍ အားလုံးကို အလွန်တည်ငြိမ်အေးဆေးစွာ ပြုံးပြရင်း ဆိုလိုက်သည်။
“ငါနဲ့ တောင်ပေါ်က အဘိုးကြီးအချို့ကို ဒီနေရာကနေ မောင်းထုတ်ချင်တယ်ဆိုရင် မင်းတို့အင်အားစုလောက်နဲ့တော့ မရနိုင်ဘူး။ အဲဒီ ဖန့်ငရဲမင်းက ဆယ့်ရှစ်ထပ် ငရဲမျှော်စင် ကို ထုတ်သုံးမှ ဖြစ်လိမ့်မယ်။ ဒါပေမဲ့ ငါတို့ရဲ့ အစွမ်းနဲ့ဆိုရင် ဆယ့်ရှစ်ထပ် ငရဲမျှော်စင်ထဲက နှိမ်နင်းချုပ်နှောင်ထားတဲ့ ယင်စစ်သည်တွေကို အလဲအထပ်လုပ်ပြီး အပြတ်ရှင်းပစ်ဖို့ မခက်ခဲပါဘူး။ အဲဒီအချိန်ကျရင် ဖူထူလောက ရဲ့ အခြေအနေက မင်းတို့ဖြစ်ချင်တဲ့အတိုင်း ဖြစ်မလာတော့ဘူး။ မော်ထျန်တီကျန့်အနေနဲ့ ကောင်းကင်ဘုံလမ်းစဉ်ရဲ့ အရှင်သခင်နေရာကို ဆက်ခံဖို့ဆိုတာ အလွန်တရာကို ခက်ခဲသွားလိမ့်မယ်”
လူတိုင်း၏ မျက်နှာထားများ လေးနက်တည်ကြည်သွားကြသည်။ မူလက သူတို့သည် ယနေ့တွင် နတ်လမ်းစဉ်ဂိုဏ်းကို လာရောက်အပြတ်ရှင်းရုံသာ ဖြစ်ပြီး ပြင်းထန်သော ခုခံမှုမျိုးနှင့် ကြုံတွေ့ရလိမ့်မည်မဟုတ်ဟု ထင်မှတ်ထားခဲ့ကြရာမှ ယခုမူ ကောင်းကင်ဘုံလမ်းစဉ် လုပွဲကြီးတစ်ခုအဖြစ် ထပ်မံကူးပြောင်းသွားပြန်ပြီ မဟုတ်ပါလား။
တစ်ဖက်လူများက နယ်မြေကိုးခုတွင် ကောင်းကင်ဘုံလမ်းစဉ် ပေါ်ပေါက်လာမှာကို မလိုလားကြချေ။ အဘယ်ကြောင့်ဆိုသော် ပြင်ပရန်သူများ ကျူးကျော်လာပြီးနောက် နယ်မြေကိုးခုကို လွှဲပြောင်းရယူမည့် အစီအစဉ်အား ထိခိုက်မည်ကို စိုးရိမ်သောကြောင့် ဖြစ်သည်။ သို့သော်လည်း လူတိုင်းအတွက်မူ နယ်မြေကိုးခု၏ အခြေအနေကို ထိန်းသိမ်းရန်နှင့် သူတို့ကိုယ်တိုင် ကျွန်စစ်သည်များအဖြစ် ကျရောက်သွားခြင်းမှ ရှောင်လွှဲနိုင်ရန်အတွက် နယ်မြေကိုးခုတွင် ကောင်းကင်ဘုံလမ်းစဉ် ပေါ်ပေါက်လာရန် မဖြစ်မနေ လိုအပ်နေပြန်သည်။
ရှောက်မုန့်ယွမ်သည် လေးနက်သော မျက်နှာထားဖြင့် လက်ထဲရှိ ရှန်ပိဓားကို ဝှေ့ယမ်းလိုက်ရာ ဟင်းလင်ပြင်ကြီးမှာ အက်ကွဲကြောင်းတစ်ခု ပေါ်ထွက်လာပြီး ထိုအထဲမှ ရှန်ပိစစ်တပ် အင်အား သုံးသောင်း ချီတက်ထွက်ပေါ်လာကြသည်။
ရှောက်မုန့်ယွမ်တစ်ယောက် မိမိ၏ စွမ်းအားအားလုံးကို ထုတ်သုံးတော့မည်ဖြစ်ကြောင်း လူတိုင်း သိမြင်လိုက်ကြသည်။ သူသည်လည်း ဤအရေးကြီးသော အလှည့်အပြောင်းကို သိမြင်နားလည်သွားခြင်း ဖြစ်ကြောင်း ထင်ရှားလှသည်။ သို့သော်လည်း နတ်လမ်းစဉ်ဂိုဏ်းချုပ်သည် ထိုရှန်ပိစစ်တပ်ကို ကြည့်လိုက်သည့်အခါတွင်မူ သူ၏ မျက်ဝန်းများမှာ တည်ငြိမ်နေဆဲဖြစ်ပြီး အကြောက်တရား အနည်းငယ်မျှပင် ရှိမနေခဲ့ချေ။
“နတ်လမ်းစဉ်ဂိုဏ်းဘက်မှာ ရှေးဟောင်းမိစ္ဆာနဲ့ ရင်ဆိုင်ရတုန်းကထက် ပိုပြီး ခက်ခဲတဲ့ အခြေအနေမျိုးနဲ့ ကြုံရလိမ့်မယ်လို့ တကယ်ကို မထင်ထားခဲ့မိဘူး”
“အကယ်၍ တစ်ဖက်လူက အတွင်းနယ်မြေရဲ့ စွမ်းအားကို တကယ်ပဲ ထုတ်သုံးနိုင်တယ်ဆိုရင် အဲဒါ ရှေးဟောင်းမိစ္ဆာနဲ့ ဘာထူးမှာလဲ။ ပြီးတော့ တောင်ပေါ်မှာ ဒီလိုအဘိုးကြီးတွေ အများကြီး ရှိသေးတယ်ဆိုတော့ ဒီတိုက်ပွဲကို ဘယ်လိုလုပ်ပြီး တိုက်ရမှာလဲ ”
“မတိုက်ဘဲ နေလို့မရဘူးလား သူတို့ကို တိုက်ရိုက် လျစ်လျူရှုထားလိုက်ရင်ကော ”
“မရဘူး။ ဒီလိုပုဂ္ဂိုလ်မျိုးတွေက နတ်လမ်းစဉ်ဂိုဏ်းမှာ ရှိနေပြီး နောက်ကွယ်ကနေ ကြိုးကိုင်ညွှန်ကြားနေမယ်ဆိုရင် မော်ထျန်တီကျန့် ကောင်းကင်ဘုံလမ်းစဉ် အရှင်သခင်နေရာကို တက်လှမ်းမယ့် လမ်းကြောင်းက အဆပေါင်းများစွာ ပိုပြီး ကြန့်ကြာသွားလိမ့်မယ်။ အဲဒီအချိန်ကျရင် ပြင်ပရန်သူတွေ မကျူးကျော်ခင် ကောင်းကင်ဘုံလမ်းစဉ် နေရာကို ဆက်ခံဖို့ အချိန်မီတော့မှာ မဟုတ်ဘူး”
ရှေ့တိုးရခက် နောက်ဆုတ်ရခက်သည့် အခြေအနေ
ကျင့်ကြံသူတိုင်း၏ မျက်နှာထားမှာ အလွန်တရာ လေးနက်ဖြူဖျော့သွားကြသည်။
လူတိုင်း၏ စိတ်ခံစားမှု ပြောင်းလဲသွားသည်ကို သတိပြုမိသွား၍လားမသိ၊ မူလက လမ်းဆုံးသို့ ရောက်ရှိနေပြီး အခြေအနေ မဟန်တော့ဟု ထင်ရသော နတ်လမ်းစဉ်ဂိုဏ်းချုပ်၏ မျက်နှာပေါ်တွင် ခပ်ပါးပါး အပြုံးတစ်ခု ပေါ်ထွက်လာသည်။
“အားလုံးပဲ အဓိက အချက်ကို သဘောပေါက်သွားကြပြီ ထင်တယ်။ အကျိုးမရှိတဲ့ အသက်ပေးဆပ်မှုတွေကို လုပ်မလား၊ မလုပ်ဘူးလားဆိုတာကတော့ အားလုံးရဲ့ သဘောအတိုင်းပါပဲ”
သူက နဂါးနတ်ဘုရားကို လှမ်းကြည့်လိုက်သည်
“ငါကြားဖူးတာတော့ အရင်တုန်းက နဂါးနတ်ဘုရားရဲ့ အဆင့်အတန်းက အလွန်မြင့်မားပြီး မထိဝံ့စရာပဲတဲ့။ ဒါပေမဲ့ အခုလို အခြေအနေမျိုးမှာ နဂါးနတ်ဘုရားက တခြားမျိုးနွယ်စုတွေအတွက်နဲ့ တကယ်ပဲ အသက်စွန့်ပြီး အစွမ်းကုန် တိုက်ခိုက်ပေးတော့မှာလား”
“လောကမှာ အကျိုးမဲ့တဲ့ စွန့်လွှတ်အနစ်နာခံမှုဆိုတာ မရှိဘူး။ စွန့်လွှတ်မှုတွေရဲ့ နောက်ကွယ်မှာ မင်းတကယ် လိုချင်တဲ့ အရာတစ်ခုခု အမြဲတမ်း ရှိနေတတ်တာပဲ”
နဂါးနတ်ဘုရားက ခပ်ဖွဖွ ရယ်မောလိုက်ပြီး
“ငါက ယန်နတ်ဘုရား တွေနဲ့ အရောင်းအဝယ်တစ်ခု လုပ်ခဲ့တယ်။ ဒီအရောင်းအဝယ်က ရှေးဟောင်းနဂါးနတ်ဘုရားနန်းတော်ရဲ့ နောင်လာမယ့် လမ်းကြောင်းကို ဆုံးဖြတ်ပေးလိမ့်မယ်”
အင်
ရှောက်မုန့်ယွမ်နှင့် လန်တောက်ချွန်းတို့မှာ ခဏမျှ ကြောင်အသွားကြပြီး ထူးဆန်းသော မျက်နှာထားဖြင့် နဂါးနတ်ဘုရားကို လှမ်းကြည့်လိုက်ကြသည်။
“သူတို့က နဂါးနတ်ဘုရားကို အသက်စွန့်ပြီး အစွမ်းကုန် တိုက်ခိုက်ပေးရလောက်အောင် ဘယ်လိုအကျိုးအမြတ်မျိုးကို ထုတ်ပေးနိုင်လို့လဲ ”
နတ်လမ်းစဉ်ဂိုဏ်းချုပ်၏ မျက်ခုံးများ အနည်းငယ် တွန့်ကွေးသွားသည်။ သူသည် အတိတ်နှင့် ပစ္စုပ္ပန်ကို နှံ့စပ်အောင် သိထားသူ ဖြစ်သော်လည်း ထိုယန်နတ်ဘုရားများက နဂါးနတ်ဘုရားနှင့် ဤကဲ့သို့သော အရောင်းအဝယ်မျိုး လုပ်နိုင်ရန် မည်သည့် အကျိုးအမြတ်ကို ထုတ်ပေးခဲ့သည်ကိုမူ စဉ်းစား၍ မရနိုင်တော့ချေ။
“ရှေးဟောင်းနဂါးနတ်ဘုရားနန်းတော် ကျင့်ကြံသူများ အမိန့်နာခံစေ”
နဂါးနတ်ဘုရားက တည်ငြိမ်စွာ အမိန့်ပေးလိုက်သည်။
ရှေးဟောင်းနဂါးနတ်ဘုရားနန်းတော်မှ နဂါးမျိုးနွယ်စု ကျင့်ကြံသူတိုင်း၏ မျက်နှာတွင် ခန့်ညားတည်ကြည်သော အရိပ်အယောင်များ ပေါ်ထွက်လာပြီး သူတို့၏ ကြီးမားလှသော ခန္ဓာကိုယ်ပေါ်ရှိ နဂါးစကေးခွံများထံမှ တောက်ပသော အလင်းရောင်များ တဖျတ်ဖျတ် လင်းလက်လာတော့သည်။
“မင်းတို့အားလုံး နဂါးသူတော်စင်မြို့တော် ကို ပြန်မြင်ချင်ကြသေးရဲ့လား”
“မြင်ချင်ပါတယ်”
မြောက်မြားစွာသော ရှေးဟောင်းနဂါးနတ်ဘုရားနန်းတော် ကျင့်ကြံသူများသည် နားကွဲမတတ် ပြင်းထန်သော ဟိန်းဟောက်သံကြီးကို ပြိုင်တူ ထုတ်ဖော်လိုက်ကြသည်။
“နဂါးသူတော်စင်မြို့တော် ဟုတ်လား နဂါးသူတော်စင်က အဲဒီ အတွင်းနယ်မြေကို တကယ်ပဲ ပြန်ဖွင့်နိုင်တာလား ”
လန်တောက်ချွန်း၏ မျက်နှာတွင် အံ့အားသင့်ထိတ်လန့်မှုများ ပြည့်နှက်သွားသည်။
နတ်လမ်းစဉ်ဂိုဏ်းချုပ်၏ မျက်ဝန်းများလည်း အလွန်တရာ လေးနက်တည်ကြည်သွားတော့သည်။
“နဂါးနတ်ဘုရား... မင်းဒီလိုလုပ်ရင် အလွန်တရာ ကြီးမားလှတဲ့ ပေးဆပ်မှုကို ရင်ဆိုင်ရလိမ့်မယ်”
“ရလာမယ့် အကျိုးအမြတ်နဲ့ နှိုင်းယှဉ်ရင်တော့ ကြီးမားတယ်လို့ မပြောနိုင်ပါဘူး”
နဂါးနတ်ဘုရားက ကျယ်လောင်စွာ ရယ်မောလိုက်ပြီး သူနှင့် ရှေးဟောင်းနဂါးနတ်ဘုရားနန်းတော် ကျင့်ကြံသူများအကြားတွင် နဂါးနတ်ဘုရားစစ်ကြောင်း ထက် ပိုမိုခိုင်မာနက်ရှိုင်းသော ဆက်နွှယ်မှုတစ်ခု ဖြစ်ပေါ်လာတော့သည်။ ထိုရှေးဟောင်းနဂါးနတ်ဘုရားနန်းတော် ကျင့်ကြံသူများ၏ ခန္ဓာကိုယ်ထဲမှ စွမ်းအားများသည် နဂါးနတ်ဘုရား၏ ခန္ဓာကိုယ်ထဲသို့ ရူးသွပ်မတတ် အရှိန်အဟုန်ဖြင့် စီးဝင်သွားကြတော့သည်။
“ဒီလောက် မြန်ဆန်တဲ့ အရှိန်အဟုန်က...”
လူတိုင်း ရင်ထဲတွင် ထိတ်လန့်တုန်လှုပ်သွားကြသည်။ ထိုကဲ့သို့ စွမ်းအားများ စီးဆင်းလှုပ်ရှားနေသည့် အရှိန်အဟုန်မှာ ဘေးကင်းလုံခြုံစိတ်ချရသော ကန့်သတ်ချက်ဘောင်ကို ကျော်လွန်နေပြီ ဖြစ်သည်။ အနည်းငယ်မျှ အမှားအယွင်း ရှိသွားပါက မိမိကိုယ်ကို ပူဇော်ပသလိုက်ရသည်နှင့် အတူတူပင် ဖြစ်သွားလိမ့်မည်။
ခဏချင်းတွင်ပင် နဂါးနတ်ဘုရား၏ မျက်ဝန်းအစုံက ပြောင်းလဲသွားခဲ့ပြီး ဉာဏ်ပညာနှင့် နှစ်ပေါင်းများစွာ စုဆောင်းမှုများ ပြည့်နှက်နေသော မျက်ဝန်းအစုံ ဖြစ်လာတော့သည်။ သူ၏ အရှိန်အဝါသည်လည်း အဆပေါင်းများစွာ တိုးမြင့်လာနေသည်။ ဝေဝေဝါးဝါး အနေအထားဖြင့် သူ၏ ကျောပြင်နောက်ကွယ်တွင် ကြီးမားခန့်ညားလှသော မြို့တော်ကြီးတစ်ခု ရေးရေးမျှ ပေါ်ထွက်လာသည်ကို မြင်တွေ့လိုက်ရသည်။
“တကယ်ပဲ နဂါးသူတော်စင်မြို့တော်ပဲ...”
လန်တောက်ချွန်းက တီးတိုး ရေရွတ်လိုက်သည်။ သူသည် ဤမြို့တော်နှင့် အလွန် ရင်းနှီးကျွမ်းဝင်သူ ဖြစ်သည်။ ထိုစဉ်က ဤမြို့တော်၏ သူတော်စင်မျှော်စင် ထဲတွင် ကျင့်ကြံပြီးမှသာ နတ်ဘုရားနယ်မြေတစ်ခုလုံးကို အပေါ်စီးက ကြည့်နိုင်လောက်သည့် ရလဒ်ကောင်းများကို ရရှိခဲ့ခြင်း မဟုတ်ပါလား။
နဂါးနတ်ဘုရား၏ ကျင့်ကြံမှုအဆင့်မှာ ကျင့်ကြံခြင်းအဆင့် အဆင့်ဆင့်ကို တိုက်ရိုက် ကျော်ဖြတ်သွားပြီး သူတော်စင်တစ်ပိုင်းအဆင့် သို့ ရောက်ရှိလုနီးပါး ဖြစ်သွားသည်။ သို့သော်လည်း သူ၏ လက်အောက်ခံ ဖြစ်ကြသော ထိုရှေးဟောင်းနဂါးနတ်ဘုရားနန်းတော် ကျင့်ကြံသူများမှာမူ ယခုအခါ တစ်ကောင်ပြီးတစ်ကောင် သေဆုံးပျက်စီးသွားကြရရှာသည်။ သူတို့၏ ခန္ဓာကိုယ်များသည် ဟင်းလင်ပြင်ထဲတွင် မှေးမှိန်သော အလင်းမှုန်များအဖြစ် ပြောင်းလဲကာ ပျောက်ကွယ်သွားကြတော့သည်။
ဤကဲ့သို့ စွမ်းအားကို ရယူရန်အတွက် ပေးဆပ်ရသော တန်ဖိုးမှာ ကြီးမားလွန်းလှသည်။ ယခင် ယင်လောက တိုက်ပွဲတုန်းကပင် နဂါးနတ်ဘုရားသည် ဤတုက်ကွက်ကို ထုတ်မသုံးခဲ့သော်လည်း ယခုအချိန်၊ ယခုနေရာတွင်မူ အတွင်းနယ်မြေကို ဖွင့်လှစ်မည့် အရည်အချင်းကို ရရှိရန်အတွက် ဤမျှ ကြီးမားလှသော ပေးဆပ်မှုကို ပြုလုပ်လိုက်ခြင်း ဖြစ်သည်။
လူတိုင်းသည် နဂါးနတ်ဘုရား ယန်နတ်ဘုရားများထံမှ ရရှိမည့် အကျိုးအမြတ် ကို မတွေးဘဲ မနေနိုင်ကြတော့ချေ။ ဘယ်လိုအကျိုးအမြတ်မျိုးက နဂါးနတ်ဘုရားကို ဤကဲ့သို့ လုပ်ဆောင်စေရလောက်အောင် ထိုက်တန်စေသနည်း။
“ဘယ်လိုအကျိုးအမြတ်မျိုးက မင်းကို ဒီလိုလုပ်ခိုင်းနိုင်ရတာလဲ မင်း အတွင်းနယ်မြေကို မရမက ဖွင့်နိုင်ခဲ့ရင်တောင် ဒီနေရာ၊ ဒီနတ်လမ်းစဉ်ဂိုဏ်းရဲ့ နယ်မြေထဲမှာ မင်း ငါတို့ကို ဘယ်လိုမှ အနိုင်မတိုက်နိုင်ဘူး”
နတ်လမ်းစဉ်ဂိုဏ်းချုပ်က မျက်မှောင်ကြုတ်ရင်း ဆိုလိုက်သည်။
ရှေးဟောင်းနဂါးနတ်ဘုရားနန်းတော် ကျင့်ကြံသူများ အားလုံး သေဆုံးသွားကြပြီဖြစ်ရာ ကောင်းကင်ယံထက်တွင် ကောင်းကင်ကြီးတစ်ခုစာမျှ ကြီးမားလှသော နဂါးနတ်ဘုရား၏ ခန့်ညားလှသော ခန္ဓာကိုယ်ကြီးသာ ကျန်ရှိတော့သည်။ သူသည် ပိုးကောင်ငယ်လေးသဖွယ် ဖြစ်နေသော နတ်လမ်းစဉ်ဂိုဏ်းချုပ်ကို အပေါ်စီးမှ ငုံ့ကြည့်လိုက်ပြီး
“မင်းတို့ကို အနိုင်တိုက်နိုင်၊ မတိုက်နိုင်ဆိုတာ မင်းတို့ ပြောပိုင်ခွင့်မရှိဘူး... ငါပဲ ဆုံးဖြတ်မှာ”
အတွင်းနယ်မြေထဲမှ ကြောက်မက်ဖွယ်ကောင်းလှသော စွမ်းအားများမှာ တရဟော ပန်းထွက်လာပြီး နဂါးနတ်ဘုရား၏ ခန္ဓာကိုယ်ထဲသို့ ဆက်တိုက် စီးဝင်နေကာ ကမ္ဘာပျက်ကပ်ကြီးတစ်ခု ကျရောက်လာသည့်အလား ကြောက်စရာကောင်းသော စွမ်းအားလှိုင်းကြီးများသည် နတ်လမ်းစဉ်ဂိုဏ်းချုပ်နှင့် သူ၏ နောက်ကွယ်က နတ်လမ်းစဉ်ဂိုဏ်း နယ်မြေတစ်ခုလုံးဆီသို့ လိပ်တက်သွားတော့သည်။
လူတိုင်း ထိတ်လန့်တုန်လှုပ်သွားကြရသည်။ ဤစွမ်းအားကြီးမှာ ထိုစဉ်က ရှေးဟောင်းမိစ္ဆာနှင့် ယင်စစ်သည်များ သတ်ဖြတ်ကြစဉ်ကထက်ပင် ပိုမိုအားကောင်းနေပုံရသည်။ ၎င်းက လက်ရှိ နဂါးနတ်ဘုရားသည် ထိုအချိန်က ရှေးဟောင်းမိစ္ဆာထက် အနည်းဆုံး တစ်ဆင့်မက ပိုမိုအစွမ်းထက်နေပြီဖြစ်ကြောင်း သက်သေပြနေခြင်းပင်။
“ဂိုဏ်းချုပ်... ငါတို့ အဘိုးကြီးတွေလည်း မင်းကို ကူညီပါရစေ ”
ပုံရိပ်လေးခုမှာ တောင်ပေါ်မှ ဆင်းသက်လာပြီး နတ်လမ်းစဉ်ဂိုဏ်းချုပ်နှင့်အတူ ပူးပေါင်းရပ်တည်လိုက်ကြသည်။ ထိုငါးဦးစလုံး၏ ကျောပြင်နောက်ကွယ်တွင် ထူးခြားဆန်းပြားသော တံခါးဝကြီးတစ်ခုစီ ပေါ်ထွက်လာကြတော့သည်။ အလားတူပင် အတွင်းနယ်မြေ၏ ကြောက်မက်ဖွယ်ကောင်းသော စွမ်းအားများသည်လည်း လိပ်တက်ထွက်ပေါ်လာကြသည်။
စွမ်းအားငါးခု ပေါင်းစည်းသွားပြီးနောက် နဂါးနတ်ဘုရား၏ ကမ္ဘာပျက်ကပ် စွမ်းအားလှိုင်းကြီးနှင့် ထိပ်တိုက် ရင်ဆိုင်တွေ့ကြတော့သည်။ နှစ်ဖက်စလုံး၏ စွမ်းအားများသည် တစ်ဖက်နှင့်တစ်ဖက် ဝါးမြိုတိုက်စားနေကြပြီး လူတိုင်း ထင်မှတ်ထားသကဲ့သို့ ပြင်းထန်သော ပေါက်ကွဲမှုအရှိန်အဝါများ ပေါ်မလာသော်လည်း ၎င်းက ပြင်းထန်သော မုန်တိုင်းကြီး မလာမီ တိတ်ဆိတ်နေသည့် အခြေအနေနှင့် ပို၍ တူနေတော့သည်။
မည်သည့်ဖက်က စွမ်းအားမဆို အသာစီးရသွားသည်နှင့် တစ်ပြိုင်နက် ဤနေရာတစ်ခုလုံးသည် ခဏချင်းအတွင်း ပျက်စီးသွားပြီး ဟင်းလင်ပြင်အလွတ်ကြီးအဖြစ် တိုက်ရိုက် ပြောင်းလဲသွားနိုင်ချေ ရှိသည်။
လူတိုင်း၏ မျက်နှာထားများမှာ အလွန်တရာ လေးနက်တည်ကြည်သွားကြပြီး နှလုံးသားထဲတွင်လည်း အံ့သြတုန်လှုပ်မှုများနှင့်အတူ စိုးရိမ်ပူပန်မှုများ ဖြစ်ပေါ်နေကြသည်။ သူတို့ အံ့သြမိသည်မှာ နဂါးနတ်ဘုရား၏ လက်ရှိစွမ်းအားသည် ယခင်က နတ်လမ်းစဉ်ဂိုဏ်းချုပ်ကို မယှဉ်နိုင်ရာမှ ယခုအခါ နတ်လမ်းစဉ်ဂိုဏ်းချုပ်အပြင် အခြားသော နတ်လမ်းစဉ်ဂိုဏ်း ဘိုးဘေးလေးဦး၏ အင်အားကိုပါ တပြိုင်နက်တည်း အံတုနိုင်လောက်အောင် အစွမ်းထက်လာခြင်းကြောင့် ဖြစ်သည်။
သူတို့ စိုးရိမ်မိသည်မှာ နဂါးနတ်ဘုရား၏ ဤကဲ့သို့သော စွမ်းအားမှာ မည်မျှအထိ ကြာရှည်ခံမည်နည်းဟူ၍ ဖြစ်ပြီး၊ ယခင် ရှေးဟောင်းမိစ္ဆာ၏ ဖြစ်ရပ်မှာ သတိပြုစရာ သက်သေတစ်ခု ဖြစ်နေခြင်းကြောင့်ပင်။
အကယ်၍ နဂါးနတ်ဘုရားသာ ရှုံးနိမ့်သွားခဲ့ပါက နတ်လမ်းစဉ်ဂိုဏ်းကို ချေမှုန်းရန်အတွက် ပေးဆပ်ရမည့် တန်ဖိုးမှာ သူတို့ထင်မှတ်ထားသည်ထက် များစွာ ပိုမိုကြီးမားသွားပေလိမ့်မည်။
“ဒီလိုဆိုရင်တော့ မော်ထျန်တီကျန့်ရဲ့ လမ်းစဉ်က ထင်သလောက် ချောမွေ့မှာ မဟုတ်တော့ဘူး”
လန်တောက်ချွန်းက တီးတိုး ရေရွတ်လိုက်ရင်း နတ်လမ်းစဉ်ဂိုဏ်းချုပ်၏ နောက်ကွယ်က အဘိုးကြီးလေးဦးထံသို့ အကြည့်များ ပို့လိုက်သည်။
ထိုအဘိုးကြီးလေးဦး၏ ဆံပင်များမှာ ကျဲပါးနေပြီဖြစ်ပြီး မျက်နှာပေါ်တွင်လည်း အရေးအကြောင်းများ ပြည့်နှက်နေကာ ခန္ဓာကိုယ်ပေါ်တွင် မှေးမှိန်သော သေခြင်းအငွေ့အသက်များ သန်းနေတော့သည်။ သူတို့ မည်မျှအထိ အသက်ရှင်ခဲ့သည်ကို မသိနိုင်သော်လည်း ယခုအခါ အတွင်းနယ်မြေ၏ ထောက်ပံ့မှုအောက်တွင် နတ်လမ်းစဉ်ဂိုဏ်းချုပ်ထက် မနိမ့်သော စွမ်းအားများကို ထုတ်ဖော်နေကြခြင်း ဖြစ်သည်။
“အကယ်၍ နဂါးနတ်ဘုရားသာ မရှိခဲ့ရင် ဒီနေ့ဟာ ငါတို့တွေ ထွက်သွားချင်သလား၊ မသွားချင်ဘူးလားဆိုတဲ့ ပြဿနာမဟုတ်ဘဲ... ထွက်သွားလို့ရော ရပါ့မလားဆိုတဲ့ ပြဿနာ ဖြစ်နေလိမ့်မယ်...”
လန်တောက်ချွန်း၏ မျက်ဝန်းများမှာ ပိုမို၍ လေးနက်တည်ကြည်သွားတော့သည်။