အခန်း ၅၈၄

အခန်း (၅၈၄) - လမ်းကြောင်းကို ဖွင့်လှစ်ခြင်းနှင့် ဘိုးဘေးနှစ်ဦး၏ ဆိုက်ရောက်လာခြင်း

~လော့ရှားမြို့တော်၏ လေထုက ယခင်ကထက် ပိုမိုသက်ဝင်လှုပ်ရှားနေသလို ရှိ၏။ ကုန်းချင်းချိုးသည် ယဲ့ဖုန်း၏ မှာကြားချက်များကို အနက်ရောင်လော့ရှား အဖွဲ့ဝင်များထံသို့ တစ်ဆင့်စကားဖြင့် အသိပေးလိုက်သည်။

သူမတို့အားလုံးမှာ လော့ရှားခန်းမ၏ အဖွဲ့ဝင်များအဖြစ် အလိုအလျောက် သတ်မှတ်ခြင်းခံရပြီး မြူခိုးဂိုဏ်း၏ ပြင်ပအင်အားစုဝင်များ ဖြစ်လာကြပြီဟု သိလိုက်ရသည့်အခါ အတိုင်းမသိ ဝမ်းသာသွားကြတော့၏။

မိန်းကလေးများသည် တန်းစီစောင့်ဆိုင်းကာ တစ်ဦးပြီးတစ်ဦး မိမိတို့၏ လက်ချောင်းများကို ဓားဖြင့်အသာအယာခြစ်လျက် လော့ရှားတံဆိပ်ပြားအတွင်းသို့ သွေးတစ်စက်စီကို စိမ့်ဝင်စေလိုက်ကြသည်။

ထိုဖြစ်စဉ်အတွင်းမှာပင်...

ကုန်းချင်းချိုးမှာမူ သူမ၏ ခန္ဓာကိုယ်အတွင်းရှိ ခွန်အားများမှာ တဖြည်းဖြည်းနှင့် တိုးတက်လာသည်ကို အံ့ဩတကြီး သတိပြုမိလိုက်၏။ ၎င်းခွန်အားမှာ အဆင့်တူ ကျင့်ကြံသူများထက်ပင် များစွာ သာလွန်နေသည် မဟုတ်ပါလော။

“ဒါဟာ အမုန်းတရား မျှဝေခြင်း’ မန္တန်နဲ့ ဆင်တူတဲ့ ထူးခြားတဲ့ ဝင်္ကပါတစ်ခု ပါဝင်နေတာပဲ ဖြစ်ရမယ်”

သူမသည် တီးတိုးရေရွတ်လိုက်မိ၏။ ကုန်းချင်းချိုး၏ အမြင်တွင်မူ ဤကဲ့သို့သော ဝင်္ကပါမျိုးကြောင့်သာလျှင် သောင်းနှင့်ချီသော အဖွဲ့ဝင်များ၏ ခွန်အားအချို့ကို စုစည်းပေးနိုင်ခြင်း ဖြစ်သည်ဟု ယူဆနေမိပါသည်။

“တကယ့်ကို ဆန်းကြယ်လိုက်တာ”

ကုန်းချင်းချိုးမှာ မချီးကျူးဘဲ မနေနိုင်တော့ပါချေ။

မြူခိုးတောင်ထိပ်ထက်၌မူ... ယဲ့ဖုန်းသည်လည်း သူ၏ ခန္ဓာကိုယ်အတွင်းသို့ အားသစ်လောင်းသလို တိုးဝင်လာသော ခွန်အားများကို ခံစားနေရသည်။

“ကောင်းပြီ... လောကရှာတံဆိပ်ပြားက အာနိသင် ပြနေပြီပဲ”

သူသည် ဝမ်းမြောက်ဝမ်းသာ ဖြစ်သွားကာ ကုလားထိုင်ပေါ်တွင် ဇိမ်ကျကျ လဲလျောင်းလိုက်ရင်း၊ ပျော်ရွှင်ခြင်းရေကို တစ်ငုံကြီး သောက်လိုက်မိ၏။ ဘေးနားရှိ မင်းသမီးလေး၏ ပုခုံးနှိပ်ပေးမှုကို ခံယူနေရသည်မှာလည်း တစ်ကိုယ်လုံး ပေါ့ပါးလန်းဆန်းသွားသလိုပင် ဖြစ်သည်။

“ဘုန်း... ... ... “

ထိုအခိုက်အတန့်၌ ဝိညာဉ်သားရဲစင်မြင့် ရှိရာအရပ်မှ ပြင်းထန်လှသော အရှိန်အဝါတစ်ခုမှာ ဟိန်းထွက်လာခဲ့တော့၏။

“ဟားဟားဟား... နောက်ဆုံးတော့ စတုတ္ထအခန်းကို ငါ ရောက်ခဲ့ပြီဟေ့”

အော့ချွမ်းသည် ဟင်းလင်းပြင်ထက်၌ ပျံဝဲနေရင်း သူ၏ အရှိန်အဝါမှာ ပိုမိုနက်နဲလာခဲ့ကာ ၊ ‘နတ်ဆိုး ဧကရာဇ် ကျင့်စဉ်’ ၏ စတုတ္ထမြောက်ဖြစ်သော ‘နတ်ဆိုး ဧကရာဇ် အခန်း’ ကို အောင်မြင်စွာ ကျင့်ကြံနိုင်ခဲ့တော့သည်။

‘တကယ်ကို မြန်လှပေစွ။’ ယဲ့ဖုန်းက စိတ်ထဲမှ ချီးကျူးလိုက်မိ၏။

အော့ချွမ်းမှာ လက်ရှိတွင် တပိုင်း ဟင်းလင်းပြင်ဖြိုခွဲအဆင့်၌ ရှိနေသူဖြစ်ရာ၊ အမှန်တကယ်ဆိုလျှင် နတ်ဆိုး ဧကရာဇ်အဆင့်နှင့် ညီမျှနေသူပင် ဖြစ်သည်။

ယခုအခါ သူသည် ကျင့်စဉ်ကို စတုတ္ထအခန်းအထိ ကျင့်ကြံနိုင်ခဲ့ပြီ ဖြစ်ရာ၊ ဆက်လက် အားထုတ်မည်ဆိုပါက နတ်ဆိုး ဧကရာဇ် အထွတ်အထိပ်သို့ ရောက်ရှိနိုင်ရုံတင် မကဘဲ သူ၏ မူလ နဂါးမျိုးနွယ်ကျင့်စဉ်များကိုပါ အလုံးစုံ အစားထိုးနိုင်တော့မည်ပင်။

အော့ချွမ်းသည် သူ၏ နဂါးမျိုးနွယ် သွေးမျိုးဆက်မှာ ကျင့်စဉ်နှင့် သွေးကြောသန့်စင်ဆေးလုံးများ၏ အကူအညီကြောင့် ရာနှုန်းပြည့် သန့်စင်သွားမည်ဆိုပါက ၊ ဟင်းလင်းပြင်ဖြိုခွဲအဆင့်၏ အတားအဆီးကို ချိုးဖျက်ကာ စစ်မှန်သော နတ်ဆိုး ဧကရာဇ်အဖြစ်သို့ တက်လှမ်းနိုင်မည်ဟု ယုံကြည်နေမိတော့၏။

“နတ်ဆိုး ဧကရာဇ် ဖြစ်ဖို့ကတော့ နီးသထက် နီးလာပြီဟေ့”

သူသည် ဝမ်းသာအားရ အော်ဟစ်လိုက်မိသည်။

ယဲ့ဖုန်းသည် အော့ချွမ်း၏ တည်ကြည်လေးနက်လှသော အမူအရာကို ကြည့်ရင်း သူ၏ မေးစေ့ကို ပွတ်သပ်ကာ မှာကြားလိုက်၏။

“ကြည့်ရတာ ကလဲ့စားချေချင်စိတ်က တကယ်ကို ပြင်းထန်တာပဲ... အော့ချွမ်းအနေနဲ့ နတ်ဆိုး ဧကရာဇ်အဆင့်ကို အမြန်ဆုံး ရောက်ပါစေလို့ပဲ ဆုတောင်းပေးရမှာပေါ့။ အဲဒီအခါကျရင် ငါ့ရဲ့ အခြေခံခွန်အားတွေကလည်း ဒီအဆင့်ကို တရားဝင် တက်လှမ်းနိုင်မှာပဲလေ”

သူသည် ‘သန့်ရှင်းသော နတ်ဘုရားပုံစံ’ ကို တစ်ချက် အကြည့်ပို့လွှတ်လိုက်မိသည်။

(၁၀) ရက်ကျော်လောက်တော့ လိုသေးသည် မဟုတ်ပါလော။ ယဲ့ဖုန်းမှာမူ အချိန်တွေက နှေးကွေးလွန်းနေသည်ဟု ခံစားနေရရှာသည်။

၎င်းနောက်တွင်မူ သူသည် ဂိုဏ်း၏ အချက်အလက်များကို ကြည့်လိုက်ရာ သူ၏ မျက်လုံးများမှာ ဝင်းလက်သွားတော့၏။

ဂိုဏ်း ဂုဏ်သတင်း တန်ဖိုး - (၁၁၀,၁၀၄,၃၂၂)

“တစ်သန်းနဲ့ တစ်သိန်းကျော်တောင်လား”

ယဲ့ဖုန်း၏ မျက်လုံးများမှာ အံ့ဩလွန်းသဖြင့် ပြူးကျယ်သွားရတော့သည်။

“ဒါဆိုရင် ငါ့ရဲ့ သန့်ရှင်းသော နတ်ဘုရားပုံစံ က အခုဆိုရင် (၆) စက္ကန့်အထိ ကြာမြင့်နိုင်တော့မှာပေါ့... တကယ်ကို ဝမ်းသာလိုက်တာဗျာ... ငါဟာ နောက်ဆုံးတော့ ငါးစက္ကန့်တည်းနဲ့ ပြီးသွားတဲ့ ယောက်ျားတစ်ယောက် မဟုတ်တော့ဘူးပေါ့”

သူသည် အသံထွက်အောင်ပင် အော်ရယ်ပစ်ချင်နေမိသည်။

ယခုတလောတွင် စိတ်လှုပ်ရှားစရာ ကောင်းလှသော အံ့ဩဖွယ်ရာများမှာ အစီအရီ ဖြစ်ပေါ်နေသည် မဟုတ်ပါလော။

---

အချိန်များမှာ တရွေ့ရွေ့ ကုန်ဆုံးသွားခဲ့ပြီး ရက်အနည်းငယ် ကြာမြင့်ခဲ့တော့၏။

ရှေးဟောင်း ဝိညာဉ်မျိုးနွယ်စု။

ယပ်တောင်ကိုင် သခင်လေးသည် သူ၏ တွက်ချက်မှုများအရ ဤနေရာသို့ တိတ်တဆိတ် ဝင်ရောက်လာခဲ့ကာ ၊ နောက်ဆုံးတွင် မြေအောက်လမ်းကြောင်း၏ အဝင်ဝကို ရှာတွေ့သွားခဲ့တော့သည်။

“တကယ်ပဲ အပိတ်ခံထားရတာကိုး”

သူသည် ပတ်ဝန်းကျင်ကို ဝေ့ဝဲကြည့်လိုက်ရာ ၊ ရှေးဟောင်း ဝိညာဉ်မျိုးနွယ်စု၏ သူတော်စင်ကြီး မရှိသည်ကို မြင်လိုက်ရသဖြင့် စိတ်သက်သာရာ ရသွားတော့၏။ တိုက်ပွဲ ဖြစ်လာမည်ဆိုပါက သူသည် လုံးဝ ယှဉ်နိုင်မည် မဟုတ်သည်မှာ အမှန်ပင်။ ယခုအခါတွင်မူ သူသည် မိမိ တွက်ချက်ထားသော ပြင်ပလောက မိစ္ဆာဆိုးများကို လွှတ်ထုတ်ပေးရန်အတွက် ထိုစည်းတံဆိပ်ကို ဖျက်ဆီးကာ မြေအောက်လှိုဏ်ဂူကမ္ဘာအတွင်းသို့ ထိုးဖောက်ဝင်ရောက်ရန်သာ လိုအပ်တော့၏။

“ဪ... သိပြီ”

ယပ်တောင်ကိုင် သခင်လေးသည် သူ၏ ခေါင်းဆောင်းကို ချွတ်လိုက်ကာ ၊ သူ၏ တောက်ပြောင်နေသော ကတုံးခေါင်းကြီးကို အသာအယာ ပွတ်သပ်ရင်း ထူးကဲလှသော အကြံတစ်ခုကို ရရှိသွားတော့သည်။

သူသည် များပြားလှသော အရင်းအမြစ်များကို ထုတ်ယူကာ စည်းတံဆိပ်၏ အထက်၌ ထူးခြားသော ဝင်္ကပါတစ်ခုကို တည်ဆောက်လိုက်၏။

“စည်းတံဆိပ် ဖျက်ဆီးခြင်း ဝင်္ကပါ... ပွင့်စမ်း”

"ဝှစ်"

သူ၏ အောက်ရှိ ဝင်္ကပါမှာ ရုတ်တရက် အလင်းများ ဖြာထွက်လာကာ သူ့အား အတွင်းပိုင်းသို့ ဆွဲခေါ်သွားတော့သည်။ နောက်တစ်ခဏ၌မူ ယပ်တောင်ကိုင် သခင်လေးသည် မြေအောက်လှိုဏ်ဂူ

ကမ္ဘာအတွင်းသို့ ရောက်ရှိနေခဲ့တော့၏။

လမ်းညွှန် တစ်ခုကို လိုက်နာသည့်နှယ် သူ၏ နှလုံးသားအတွင်းမှ လမ်းညွှန်ချက်အတိုင်း လျှောက်လှမ်းသွားရာမှ ၊ အပိတ်ခံထားရသော နန်းဆောင်ကြီး တစ်ခုကို ရှာတွေ့သွားခဲ့တော့သည်။

ဤနေရာတွင် ကြယ်တာရာ ဟင်းလင်းပြင်သို့ သွားနိုင်သော ရှေးဟောင်း လမ်းကြောင်းတစ်ခု ရှိနေ၏။ သို့သော်ငြားလည်း သမိုင်းကြောင်းဆိုင်ရာ အကြောင်းရင်းများကြောင့် ဤနေရာမှာ အပိတ်ခံထားရသဖြင့် ကြယ်တာရာ ဟင်းလင်းပြင် နက်ရှိုင်းရာမှ လူများမှာ ဖြတ်သန်း မလာနိုင်ကြပါချေ။

“ခိခိ... နောက်ထပ် စည်းတံဆိပ် တစ်ခုပေါ့လေ... ဒါမျိုးဆိုရင်တော့ ငါက ကျွမ်းကျင်ပြီးသားပါ”

ယပ်တောင်ကိုင် သခင်လေးမှာ သူ၏ တွက်ချက်မှု စွမ်းရည်များကို အသုံးပြုကာ ဝင်္ကပါကို စတင်၍ ပြင်ဆင်တော့၏။

...

ကြယ်တာရာ ဟင်းလင်းပြင် နက်ရှိုင်းလှသော အရပ်၌မူ...

သစ်ပင်နတ်ဆိုး ဘိုးဘေးနှင့် ဦးချို မွှေးပွ မျိုးနွယ်စုမှ အကြီးအကဲကြီး တို့မှာ ဇဝေဇဝါ ဖြစ်နေသော ကြယ်တာရာ ဟင်းလင်းပြင် မြူထုများကြားတွင် လမ်းပျောက်နေသည့်အလား ရပ်နေကြသည်။

“အကြီးအကဲကြီး... ခင်ဗျား ပြောတော့ ဒါက မြေအောက်လှိုဏ်ဂူ ဘိုးဘေးရဲ့ ဂူဗိမာန်ဆီကို သွားတဲ့ လမ်းဆိုဗျာ”

“ဟုတ်ပါတယ်... ဒါပေမဲ့ ဟိုဘက်က လမ်းကြောင်းက အပိတ်ခံထားရပုံပဲ”

“ကျုပ်တို့ အတင်းအကြပ် ဖောက်ထွက်လို့ မရဘူးလား”

“နေပါဦး... ငါတို့ရဲ့ ခွန်အားတွေက အရမ်းကြီးလွန်းတော့... အတင်းလုပ်ရင် အဲဒီကမ္ဘာငယ်လေးက ပြိုကျသွားနိုင်တယ်လေ”

“ဒါဆို ကျုပ်တို့ ဘာလုပ်ကြမလဲ”

“ငါတို့ရဲ့ လက်အောက်ငယ်သားတွေကို ရှန်ကျိုးတိုက်ကြီးထဲကို အရင် လွှတ်ရမယ်... ပြီးမှ ဟိုဘက်ကနေ ဒီစည်းတံဆိပ်ကို ဖျက်ဆီးခိုင်းလိုက်ရင် ငါတို့ ဖြတ်သွားလို့ ရမှာပေါ့”

ဘိုးဘေးနှစ်ဦးမှာ တိုင်ပင်နေကြစဉ်မှာပင်...

“ဂျွတ်... ဂျွတ်... ဂျွတ်... ... …”

မြူထုများကြားမှ ထူးဆန်းလှသော အသံများမှာ ထွက်ပေါ်လာသဖြင့် သူတို့၏ အာရုံများကို ဖမ်းစားလိုက်တော့၏။

“တစ်စုံတစ်ယောက်က ဒီဘက်ကနေ စည်းတံဆိပ်ကို ဖျက်ဆီးနေတာပဲ”

“တကယ်လားဗျ”

“ဟုတ်တယ်... တကယ့်ကို ကောင်းကင်ဘုံက ကူညီတာပဲ”

ဘိုးဘေးနှစ်ဦးမှာ စိတ်လှုပ်ရှားစွာဖြင့် ထိုလမ်းကြောင်း ပွင့်လာမည့်အချိန်ကို စောင့်မျှော်နေကြတော့၏။

အခြားတစ်ဖက်တွင်မူ... ယပ်တောင်ကိုင် သခင်လေးမှာ အသည်းအသန် တွက်ချက်နေဆဲ ဖြစ်သည်။ သူသည် မြေအောက်လှိုဏ်ဂူ ဘိုးဘေး ချန်ထားခဲ့သော စည်းတံဆိပ်ကို တဖြည်းဖြည်းနှင့် ဖျက်ဆီးနေသဖြင့် မြူထုများမှာလည်း ပါးလွှာလာခဲ့တော့၏။

ကြယ်တာရာ ဟင်းလင်းပြင်အတွင်းမှ ဘိုးဘေးနှစ်ဦးမှာ မြူထုများကြားမှနေ၍ ဟိုဘက်ရှိ ကတုံးခေါင်းနှင့် လူရိပ်တစ်ခုကို မသဲမကွဲ မြင်တွေ့နေရတော့သည်။

“ရှေ့ဖြစ်ဟော မျိုးနွယ်စုက လူတစ်ယောက်များလား”

ဘိုးဘေးနှစ်ဦး၏ အကြည့်များမှာ စူးရှသွားခဲ့တော့၏။ ရှေ့ဖြစ်ဟော မျိုးနွယ်စုမှာ ကြယ်တာရာ ဟင်းလင်းပြင်အတွင်း၌ အင်အားကြီးမားသော မျိုးနွယ်တစ်ခု ဖြစ်စေဦးတော့၊ သူတို့မှာ ဟင်းလင်းပြင်ဖြိုခွဲအဆင့်ရှိသော ဘိုးဘေးများ ဖြစ်ကြသဖြင့် အနည်းငယ်မျှပင် တုန်လှုပ်ခြင်း မရှိပါချေ။

မျက်တောင်တစ်ခတ်အတွင်းမှာပင် ရက်အနည်းငယ်မှာ ကုန်ဆုံးသွားခဲ့တော့၏။

ယပ်တောင်ကိုင် သခင်လေးသည် နောက်ဆုံးသော ဝင်္ကပါ အမှတ်အသားကို ဖြည့်စွက်လိုက်သည့် တစ်ခဏ၌မူ ၊ သူ၏ ရှေ့မှ မြူထုများမှာ လုံးဝ ပျောက်ကွယ်သွားခဲ့တော့၏။ တစ်ဖက်တွင်မူ စွမ်းအားကြီး လူရိပ်နှစ်ခုမှာ ပေါ်ထွက်လာတော့သည်။

ဟင်းလင်းပြင်ဖြိုခွဲအဆင့်၏ ပြင်းထန်လှသော ဖိအားများက ယပ်တောင်ကိုင် သခင်လေးကို မြေပြင်ပေါ်၌ ပြားပြားဝပ်သွားစေကာ ၊ မျက်တောင်ပင် ခတ်ရန် ခက်ခဲသွားစေတော့၏။

‘ဟင်းလင်းပြင်ဖြိုခွဲအဆင့် တတိယအလွှာ (၃) ရှိတဲ့ ဘိုးဘေး နှစ်ယောက် တောင်မှလား’

‘ဟားဟား... မြူခိုးဂိုဏ်းတော့ သေချာပေါက် သွားပြီပဲ’

ယပ်တောင်ကိုင် သခင်လေးမှာ ရင်ထဲတွင် တိတ်တဆိတ် ဝမ်းသာနေမိတော့သည်။

“ဟေ... မင်းကလည်း မြူခိုးဂိုဏ်းနဲ့ ရန်ငြိုး ရှိတာလား”

သစ်ပင်နတ်ဆိုး ဘိုးဘေးက မြေပြင်ပေါ်၌ ပြားပြားဝပ်နေသော ယပ်တောင်ကိုင် သခင်လေးကို ကြည့်ကာ မေးမြန်းလိုက်၏။

“စီနီယာကြီးတို့ ခင်ဗျာ... ကျွန်တော်က ရှေ့ဖြစ်ဟောမျိုးနွယ်စုက ယပ်တောင်ကိုင် သခင်လေး ပါ။ မြူခိုးဂိုဏ်းကို အမြစ်ပြတ် သုတ်သင်ဖို့အတွက် ကျွန်တော် တမင်တကာ တွက်ချက်ခဲ့ပြီး... ဒီလမ်းကြောင်းကနေ အစွမ်းထက်တဲ့ ပုဂ္ဂိုလ်တွေ ပေါ်လာမယ်ဆိုတာ သိလို့ လာပြီး စည်းတံဆိပ်ကို ဖျက်ဆီးပေးတာပါ ခင်ဗျာ” သူသည် ခက်ခဲစွာဖြင့် ရှင်းလင်းပြောပြလိုက်ရရှာတော့သည်။

“ဪ... ဒီလိုကိုး”

“တကယ်ပဲ ရှေ့ဖြစ်ဟောမျိုးနွယ်စုကပဲ”

ဘိုးဘေးနှစ်ဦးမှာ တစ်ဦးကိုတစ်ဦး အကြည့်ပို့လွှတ်လိုက်ကြပြီးနောက် ဖိအားများကို လျှော့ချပေးလိုက်သဖြင့် ၊ ယပ်တောင်ကိုင် သခင်လေးမှာလည်း နောက်ဆုံးတွင်တော့ မတ်တတ်ပြန်ရပ်နိုင်ခဲ့တော့၏။

“စီနီယာကြီးတို့ ခင်ဗျာ... လမ်းကြောင်းကတော့ ပွင့်သွားပါပြီ။ အခုဆိုရင် အဲဒီ အကျိန်ခံရတဲ့ မြူခိုးဂိုဏ်းကို ဖျက်ဆီးဖို့ အချိန်တန်ပါပြီ”

သူသည် စိတ်လှုပ်ရှားစွာဖြင့် တိုက်တွန်းလိုက်သည်။

သို့သော်ငြားလည်း ဘိုးဘေးနှစ်ဦးမှာမူ သူ့အား အလေးအနက် မထားဘဲ ၊ မြေအောက်လှိုဏ်ဂူကမ္ဘာအတွင်းသို့ တိုက်ရိုက် လျှောက်လှမ်း ဝင်ရောက်သွားကြတော့၏။

“ခိခိခိ... နောက်ဆုံးတော့ ဝင်လာနိုင်ပြီပဲ”

“ဟေ... ရှန်ကျိုးတိုက်ကြီးဆီကို သွားတဲ့ လမ်းလည်း အပိတ်ခံထားရတာလား... စိုးရိမ်စရာ မလိုပါဘူး... လက်ညှစ်တစ်ချက် တီးရုံနဲ့ပဲ ဒါကို ဖျက်ဆီးပစ်လို့ ရတာပဲ”

ဘိုးဘေးနှစ်ဦးမှာ ယုတ်မာစွာဖြင့် မဲ့ပြုံးတစ်ချက် ပြုံးလိုက်ကြသည်။

ထိုသို့ ပြောဆိုပြီးနောက်တွင်မူ သူတို့သည် စတင် လှုပ်ရှားလိုက်ကြ၏။

“ဂျွတ်”

ရှေးဟောင်း ဝိညာဉ်မျိုးနွယ်စု၏ တောင်ကုန်းနောက်ကွယ်ရှိ မြေအောက်လမ်းကြောင်းမှ စည်းတံဆိပ်မှာ မျက်တောင်တစ်ခတ်အတွင်းမှာပင် အစိတ်စိတ်အမွှာမွှာ ကြေမွသွားခဲ့ကာ ၊ ပေါက်ကွဲမှုကြီးတစ်ခု ဖြစ်ပေါ်သွားတော့သည်။

မိုးကြိုးပစ်သံကဲ့သို့ ပြင်းထန်လှသော ပေါက်ကွဲသံကြီးနှင့်အတူ ၊ ရက်စက်ကြမ်းကြုတ်လှသော အရှိန်အဝါများမှာ ရှေးဟောင်း ဝိညာဉ်မျိုးနွယ်စု၏ အထက်မှနေ၍ အရပ်မျက်နှာ အသီးသီးသို့ ရူးသွပ်စွာဖြင့် ပျံ့နှံ့သွားတော့သည်။

ထိုအဖြစ်အပျက်က တစ်ကမ္ဘာလုံးကို တုံ့ခဲသွားစေသည်မှာ ယုံမှားဖွယ် မရှိတော့ပါချေ။

--