အခန်း ၄၄၈

အခန်း (၄၄၈) သန့်စင်သော ယန် စံအိမ် အပိုင်း (၂)

"အကယ်၍ ခေါင်းဆောင် ရဲ့ ကိစ္စကိုသာ ဒီလူက ဖွင့်ဟပြောဆိုသွားမယ် ဆိုရင်၊ နောက်ဆက်တွဲ ဆိုးကျိုးတွေက အလွန်တရာ ကြီးမားသွားနိုင်တယ်"

"ကံကောင်းတာက ဒီလူ ကံဆိုးပြီး မင်းရဲ့ လက်ထဲကို တိုက်ရိုက် ရောက်လာခဲ့တာပဲ"

"ဒီလိုကိုး"

ဆုမို က ခေါင်းညိတ်လိုက်သော်လည်း မနေနိုင်တော့ဘဲ မေးလိုက်သည်။

"ဆရာအဘိုး ရဲ့ ဒဏ်ရာ အခြေအနေက ဘယ်လိုနေလဲ ဗျ"

"အခုချိန်မှာတော့ ပြောရခက်တယ်"

သွမ့်ဆုန် ၏ မျက်မှောင်များ အနည်းငယ် တွန့်ကွေးသွား၏။

"ညသခင် ကျင့်ကြံထားတဲ့ အကန့်အသတ်မဲ့ နတ်ဆိုး မှတ်တမ်း ထဲမှာ ဖော်ပြထားတဲ့ ကောက်ကျစ်စဉ်းလဲတဲ့ နည်းစနစ်တွေက မရေမတွက်နိုင်အောင် များပြားတယ်... မင်းရဲ့ ဆရာအဘိုး က နတ်ဆိုးတစ္ဆေငါးပါး ချီ ရဲ့ ထိုးနှက်မှုကို ခံလိုက်ရတာ သေချာတယ်... သူ့ခန္ဓာကိုယ် ထဲမှာ ပြင်ပက စစ်မှန်သော ချီတွေ အများကြီး ပိတ်မိနေတော့ ဖြေရှင်းဖို့ အရမ်းကို ခက်ခဲနေတာ"

"အကယ်၍သာ သူ့ရဲ့ ခန္ဓာကိုယ်ကို သန့်စင်သော ယန် အတွင်းအား နဲ့ ကာကွယ်မထားနိုင်ခဲ့ဘူး ဆိုရင်... သူ့ရဲ့ သွေးကြောတွေ အားလုံး အဲဒီ နတ်ဆိုးတစ္ဆေငါးပါး ချီ ရဲ့ အဟုန်ပြင်းစွာ ဆုတ်ဖြဲခံလိုက်ရတာ ကြာလောက်ပြီ"

"လောလောဆယ်တော့... သန့်စင်သော ယန် ကောင်းကင်ဘုံ ရေကန် ထဲက သန့်စင်သော ယန် ချီ တွေကို အသုံးချပြီး အတွင်းနဲ့ အပြင် စွမ်းအားတွေကို ပေါင်းစပ်ကာ ဒီ နတ်ဆိုးတစ္ဆေငါးပါး ချီ တွေကို လုံးဝ ချေဖျက်ပစ်ဖို့ သူ ကြိုးစားနေတယ်... ဒါပေမဲ့ လက်ရှိ အခြေအနေအရ ကြည့်ရင်တော့ ရလဒ် က သိပ်မထူးခြားသေးဘူး"

"ဒါက..."

ဆုမို ၏ မျက်မှောင်များ အနည်းငယ် တွန့်ကွေးသွားတော့သည်။ ယခင်က ပြင်ပက စစ်မှန်သော ချီ များ အတင်းအကျပ် ထိုးသွင်းခံခဲ့ရသော သူ၏ အဖွဲ့ထဲမှ အမာရွတ်နှင့် လူစိမ်း ကို သူ ပြန်လည် သတိရသွား၏။

ခေါင်းဆောင် ခံစားနေရတဲ့ ဒဏ်ရာ အခြေအနေ က ဒီ အမာရွတ်နှင့် လူစိမ်း နဲ့ တော်တော်လေး ဆင်တူနေပုံ ရတယ် မဟုတ်လား။

သူ၏ စိုးရိမ်ပူပန်နေသော မျက်နှာအမူအရာကို မြင်သောအခါ၊ သွမ့်ဆုန် က သူသည် ခေါင်းဆောင် အတွက် စိုးရိမ်နေသည်ဟု ထင်မှတ်သွားပြီး သူ၏ ပခုံးကို ချက်ချင်း လှမ်းပုတ်ကာ ပြုံးလျက် ဆိုသည်။

"မင်း အရမ်းကြီး ဝမ်းနည်း ပူဆွေးနေစရာ မလိုပါဘူး... ခေါင်းဆောင် က အမြဲတမ်း ပြောတတ်တယ်... 'သိုင်းလောကသား တွေက သိုင်းလောက မှာပဲ အိုမင်းရင့်ရော် လာကြတာ... ကိုယ့် အချိန် ရောက်လာတဲ့ အခါ ကလေးတွေလို မပြုမူကြနဲ့' တဲ့လေ"

"ငါတို့ ဇီယန်ဂိုဏ်း က လောကကြီးမှာ ဂုဏ်ယူဝင့်ကြွားစွာ မတ်တတ်ရပ်တည်နေတာ... သဘာဝကျကျပဲ လွတ်လွတ်လပ်လပ် လာမယ်၊ လွတ်လွတ်လပ်လပ် သွားမယ် ပေါ့"

"ဒါပေမဲ့ မင်းကို မြင်လိုက်ရရင်တော့ သူ့အတွက် အားတက်စရာ ဖြစ်သွားနိုင်တယ်... အဲဒီ နတ်ဆိုးတစ္ဆေငါးပါး ချီ တွေကိုတောင် အမှုမထားလောက်တော့ဘူး လို့ မှတ်ယူသွားနိုင်တာပဲ"

"... အဲဒီလိုပဲ မျှော်လင့်ရတာပေါ့"

ဆုမို က အသာအယာ ခေါင်းညိတ်လိုက်ပြီးနောက်၊ ချီမေ တောအုပ် အကြောင်းကို ပေါ့ပေါ့ပါးပါး မေးမြန်းလိုက်သည်။

သွမ့်ဆုန် က သူ့အား အကြမ်းဖျင်း ရှင်းပြလိုက်၏။

ချီမေ တောအုပ် သည် ယူချွမ်ဂိုဏ်း ၏ သဘာဝ အတားအဆီး တစ်ခု ဖြစ်ပေသည်။

တောအုပ်၏ ပတ်ဝန်းကျင် အခြေအနေမှာ ရှုပ်ထွေးပြီး ပြောင်းလဲလွယ်ကာ၊ ယန္တရားများမြောက်မြားစွာ ရှိပြီး အန္တရာယ်များဖြင့် ပြည့်နှက်နေသည်။

ထိုမျှမက ထိုအထဲတွင် ယူချွမ်ဂိုဏ်း က အလံသုံးခု အမိန့်တော်ဖြင့် ဝင်္ကပါ အစီအရင်များကို တည်ဆောက်ထားရာ၊ အလောတကြီး ဝင်ရောက်သွားပါက သေချာပေါက် သေဆုံးနိုင်ချေ ရှိပေသည်။

"ချင်းရှို့တောင် နဲ့ မိုးအေး တောင်ကြား တို့ကို သိမ်းပိုက်ပြီးတဲ့ နောက်မှာ... ဂိုဏ်းကြီး (၇) ဂိုဏ်း က ထိပ်တန်း ကျွမ်းကျင်သူ တွေက မိုးစက်အေး တောင်ကြား မှာ တပ်စွဲထားကြပြီး အလံသုံးခု အမိန့်တော် နဲ့ အကြိမ်ပေါင်းများစွာ ရင်ဆိုင် တိုက်ခိုက်ခဲ့ကြတယ်... ဒါပေမဲ့ ငါတို့က ဝမ်လျန် ခြံဝင်းထဲကို အခုထိ တကယ် ထိုးဖောက် ဝင်ရောက်နိုင်ခြင်း မရှိသေးဘူး"

"အခြေအနေ က ချီမေ တောအုပ် ရဲ့ အပြင်ဘက်မှာတင် လွန်ဆွဲပွဲ ကြီး တစ်ခုလို ဖြစ်နေတယ်"

ဆုမို ၏ မျက်ခုံးများ အနည်းငယ် ပင့်တက်သွားတော့၏။

"ဝမ်လျန် ခြံဝင်း"

'ချီ မေ ဝမ် လျန်... ကျိုယွဲ့ (စက်တင်ဘာလ (၉) ရက်)'

'ချီမေ တောအုပ်၊ ဝမ်လျန် ခြံဝင်း တဲ့လား'

ချီမေ တောအုပ် တစ်ခုတည်း သာဆိုလျှင် ဆုမို အနေဖြင့် တိုက်ဆိုင်မှု တစ်ခုအဖြစ် သတ်မှတ်နိုင်သေးသော်ငြားလည်း၊ ဝမ်လျန် ခြံဝင်း ပါ ထပ်မံ ပါဝင်လာသောအခါ ၎င်းသည် ရိုးရှင်းသော တိုက်ဆိုင်မှု တစ်ခု မဟုတ်တော့ကြောင်း အထင်အရှား ပေါ်လွင်နေပေသည်။

"ဟုတ်တယ်"

သွမ့်ဆုန် က ခေါင်းညိတ်လိုက်သည်။

"ဝမ်လျန် ခြံဝင်း က ချီမေ တောအုပ် ရဲ့ အချက်အချာကျတဲ့ နေရာတစ်ခုပဲ... အဲဒီမှာ အလံသုံးခု အမိန့်တော် နဲ့ သူတို့ရဲ့ လက်အောက်ငယ်သား တွေ ပုန်းအောင်းနေကြတာ... သေးငယ်တဲ့ လှုပ်ရှားမှုလေး တစ်ခု ရှိတာနဲ့ သူတို့က ချက်ချင်း တုံ့ပြန်ကြတယ်... မျက်တောင်တစ်ခတ် အတွင်းမှာပဲ သူတို့က အုံလိုက်ကျင်းလိုက် ထွက်လာပြီး တောအုပ် ရဲ့ ဝင်္ကပါ အစီအရင် တွေကို လှည့်စား ကစားကြတော့... အလွန်တရာ အန္တရာယ် များလွန်းတယ်"

"ဒါကြောင့်ကိုး... ဦးလေးသွမ့်... ဒီ အလံသုံးခု အမိန့်တော် တွေက ဘယ်သူတွေလဲ ဆိုတာ သိလား"

ဟု ဆုမို က ထပ်မံ မေးမြန်းလိုက်၏။

"မင်း တကယ့်ကို မေးသင့်တဲ့ မေးခွန်းကို မေးလိုက်တာပဲ"

သွမ့်ဆုန် က ပြုံးလိုက်သည်။

"ဂိုဏ်းကြီး (၇) ဂိုဏ်း နဲ့ မိစ္ဆာ ဂိုဏ်းကြီး (၃) ဂိုဏ်း တို့ ကြားမှာ... တိုက်ပွဲပေါင်း တစ်ထောင်မက ဖြစ်ပွားခဲ့ဖူးတယ်... ငါ... မင်းရဲ့ ဦးလေးသွမ့် ကိုယ်တိုင်လည်း တပည့်တွေကို ဦးဆောင်ပြီး ထျန်းချူမြို့ မှာ သူတို့နဲ့ ရင်ဆိုင်ခဲ့ဖူးတယ်... အဲဒီတုန်းက ချင်းရှို့တောင် က ယူချွမ်ဂိုဏ်း ရဲ့ ထိန်းချုပ်မှု အောက်မှာ ရှိနေသေးတယ်... ပြီးတော့ သူတို့ရဲ့ မိစ္ဆာ ဂိုဏ်း တပ်မကြီး တွေ ဖိအားပေး ဝင်ရောက်လာချိန်မှာ... ငါ ဒီ အလံသုံးခု အမိန့်တော် တွေနဲ့ တကယ်ပဲ အကြိမ်ကြိမ်အခါခါ ရင်ဆိုင် တိုက်ခိုက်ခဲ့ဖူးတယ်"

"ဒီ လူသုံးယောက် က ထူးဆန်းတဲ့ စရိုက်လက္ခဏာတွေ ရှိကြတယ်..."

"တစ်ယောက် က လက်သီး သိုင်းပညာ ကို ပိုသဘောကျတယ်... သူတို့က ယူချွမ်သိုင်းကျမ်းကနေ ဆင်းသက်လာတဲ့ သိုင်းပညာ တွေကို အသုံးပြုနေတုန်းပဲ ဆိုပေမဲ့၊ သူ့ရဲ့ စုစည်းထားတဲ့ လက်သီး စွမ်းအား တွေက အရမ်းကို ကြောက်စရာ ကောင်းတယ်"

"ဒါပေမဲ့... ဒီလူက ပင်ကိုယ် သဘာဝ အရ သွေးဆာနေတတ်ပြီး၊ အစိမ်းလိုက် အသားတွေ၊ သွေးတွေကို စားသုံးလေ့ ရှိတယ်... အဲဒါက အလွန်တရာ ရက်စက် ကြမ်းကြုတ်တယ် လို့ ပြောလို့ရတယ်"

"အငတ်ဘေးဂိုဏ်း က လူတွေကို စားသုံးတဲ့ အလေ့အကျင့် က သူတို့ရဲ့ သိုင်းပညာ ကနေ ဆင်းသက်လာတာလေ... သူတို့က ဒဏ်ရာတွေကို ကုသဖို့ အတွင်းအား တွေကို စုပ်ယူနိုင်တယ်"

"ဒါပေမဲ့ ဒီလူ ကတော့ သက်သက် သာယာမှု အတွက် ကိုပဲ အစိမ်းလိုက် အသားတွေကို စားပြီး သွေးတွေကို သောက်တာ"

"ငါ ဒီလူ နဲ့ အကြိမ်ကြိမ်အခါခါ ဆုံတွေ့ခဲ့ဖူးတယ်... ပြီးတော့ အကြိမ်တိုင်းမှာ အနိုင်အရှုံး မပေါ်ဘဲ သရေပွဲ အဖြစ်ပဲ အဆုံးသတ်ခဲ့တယ်... အဲဒါက ငါ့အတွက်တော့ တကယ့်ကို နောင်တရစရာ တစ်ခုပဲ"

‘သူ့ရဲ့ အကြီးမားဆုံး နောင်တ က ငါ့ရဲ့ ဆရာသခင် ရဲ့ အသားတွေကို မစားလိုက်ရတာ မဟုတ်ဘူးပဲ’

ဝေဇီယီ က သွမ့်ဆုန် ကို ခိုးကြောင်ခိုးဝှက် စောင်းကြည့်လိုက်ပြီး စိတ်ထဲမှ တိတ်တဆိတ် တွေးတောလိုက်သည်။

သေချာသည်ကတော့ ဤအခိုက်အတန့်၌ ထိုအတွေးမှာ အတွေးသက်သက်သာ ဖြစ်ပြီး၊ အသံထွက် ပြောဆိုရန်မှာ အလွန်တရာ အနေရခက်လွန်းလှပေသည်။

"နောက်ထပ် တစ်ယောက် ကတော့ ဓားသိုင်း တွေကို အလွန်အမင်း ဝါသနာပါပြီး သူ့ကိုယ်သူ ဓားသမား တစ်ယောက်လို့ အမြဲတမ်း ခံယူထားတယ်"

"သူက တကယ့်ကို ဖရိုဖရဲ ဖြစ်နေတဲ့ ကြားထဲက ဖြူစင်တဲ့ လူကြီးလူကောင်း တစ်ယောက်နဲ့ တူတယ်"

"ဝမ်းနည်းစရာ ကောင်းတာက... ဒီလူ က ကာရန် အခြေခံ တွေကိုတောင် နားမလည်ဘူး... အတင်းအကျပ် ရွတ်ဆိုနေတဲ့ အနေရခက်စရာ စာပိုဒ်တွေ က များသောအားဖြင့် သူ့ရဲ့ သိုင်းပညာ ထက်တောင် ပိုပြီး ဖျက်ဆီးနိုင်စွမ်း ကြီးမားနေတတ်တယ်"

"အဲဒါကြောင့် သူ့ကို တွေ့ရတဲ့ အကြိမ်တိုင်းမှာ သူ့ပါးစပ်ကို ပိတ်ပစ်လိုက်ချင်စိတ် တွေ ပေါက်လာတော့တာပဲ"

"သူ့ရဲ့ ဓားသိုင်းပညာ ကို ပြောရရင်တော့... အကယ်၍ သူက မင်းကို ဓားနဲ့ ယှဉ်ပြိုင်ဖို့ ရွေးချယ်တယ် ဆိုရင်၊ မင်း အနေနဲ့ အနှောင့်အယှက် တစ်ခုကို ဖယ်ရှားပစ်လိုက်သလိုမျိုး မိုးကြိုးပစ်ချ သလို ပြတ်ပြတ်သားသား နှိမ်နင်းပစ်လိုက်သင့်တယ်"

"ဝမ်းနည်းစရာ ကောင်းတာက... သူက ငါ့ရဲ့ စွမ်းရည်တွေကို အပြည့်အဝ သိနေတယ်လေ... ငါနဲ့ တိုက်ခိုက်တဲ့ အခါကျရင် သူက ဓားကို လုံးဝ မသုံးရဲတော့ဘူး"

ထိုသို့ ပြောဆိုပြီးနောက် သွမ့်ဆုန် က နောင်တရစွာဖြင့် ခေါင်းခါယမ်းလိုက်သည်။

"နောက်ဆုံး တစ်ယောက် ကတော့... သူက အလေးအနက်ဆုံး ပဲ... ယူချွမ် သိုင်းကျမ်းက သိုင်းပညာ တွေကို ရိုးရိုးသားသား အသုံးပြုတယ်... လက်သီး တွေ၊ ဓား တွေနဲ့ ကစားမနေဘူး... သိုင်းပညာ သက်သက်ပဲ..."

သူက ခပ်တိုးတိုး စဉ်းစားတွေးတောလိုက်ပြီးနောက် တည်ကြည်လေးနက် စွာဖြင့် ဆက်ပြော၏။

"ဒီလူ ရဲ့ သိုင်းပညာ တွေက အလွန်တရာ လှည့်စားမှု များပေမဲ့ တကယ့်ကို ကျွမ်းကျင် ပြောင်မြောက်တယ်... မရှက်မရွံ့ ပွင့်ပွင့်လင်းလင်း ပြောရရင် ငါ သူ့ကို သုံးကြိမ် ရင်ဆိုင်ခဲ့ဖူးတယ်... ပြီးတော့ အကြိမ်တိုင်းမှာ ငါ့အသက် ဆုံးရှုံးရမလို ဖြစ်ခဲ့ရတယ်"

"သူက အဲဒီလောက်တောင် အစွမ်းထက်တာလား"

ဝေဇီယီ တစ်ယောက် အံ့အားသင့်သွားတော့၏။

ဆုမို မှာ ပို၍ပင် အံ့အားသင့်သွားပြီး ဝေဇီယီ အား လှမ်းကြည့်လိုက်သည်။

"မင်း မသိဘူးလား"

"ယူချွမ်ဂိုဏ်း အကြောင်း အနည်းအကျဉ်း နားလည်ထားတယ် ဆိုပေမဲ့... ငါ သိထားတာတွေက ဂိုဏ်းကြီး (၇) ဂိုဏ်း စလုံး သိထားတဲ့ ကိစ္စတွေပါ”

--