အခန်း ၆၅၇

အနာဂတ်ရဲ့ အစားပုပ်ကလေးကို ချုပ်ချယ်ခြင်း

အပိုင်း ၆၅၇

ဉာဏ်ပညာတိမ်တိုက် ဂလက်ဆီသည် ယခင်က ဈေးနှုန်းလျှော့ချသည့် မဟာဗျူဟာကို အသုံးပြုကာ မော့ချူး၏ လုပ်ငန်းများကို သွယ်ဝိုက်၍ ဖိနှိပ်ခဲ့သဖြင့် သူမ၏ အရောင်းအဝယ်များမှာ ထိုးဆင်းသွားခဲ့သည်။ ထို့နောက် ဉာဏ်ပညာတိမ်တိုက် ဂလက်ဆီ ပြည်သူများ၏ ၉၀ ရာခိုင်နှုန်းခန့်မှာ ဝူ မိသားစုမှ ထုတ်လုပ်သော စိတ်ဝိဉာဉ်အစားအစာများကို ဝယ်ယူခဲ့ကြသည်။

မထင်မှတ်ဘဲ သူတို့ ဝယ်ယူစားသုံးလိုက်သည်နှင့် ပြဿနာတက်တော့သည်! ပြည်သူအများအပြားမှာ ဆေးရုံသို့ အစုလိုက်အပြုံလိုက် ပို့ဆောင်ခံလိုက်ရသည်! ဤကိစ္စကို တွေးမိတိုင်း သူတို့မှာ သွေးအန်မတတ် ဖြစ်နေရတော့သည်။

"... အဲဒီမုန့်တွေကို ရောင်းနေတုန်းပဲလား"

ခဏမျှ တိတ်ဆိတ်သွားပြီးနောက် ညွှန်ကြားရေးမှူး လန်က တည်ငြိမ်သောအသံဖြင့် မေးလိုက်သည်။

"ဟုတ်ကဲ့။" ဝန်ထမ်းက ခေါင်းညိတ်ပြကာ ဖြေသည်။ "စစ်ဆေးမှုရလဒ်တွေက အခုလေးတင် ထွက်လာတာပါ။ ကျွန်တော်တို့ အရေးယူဖို့ အချိန်မရသေးပါဘူး"

"သင့်တော်တဲ့ အကြောင်းပြချက်တစ်ခုခုပေးပြီး အဲဒီမုန့်တွေကို အမြန်ဆုံး ပြန်သိမ်းခိုင်းလိုက်!"

ညွှန်ကြားရေးမှူးလန်က သူ၏ လက်ချောင်းများကို ပွတ်သပ်ရင်း ခပ်လေးလေး ပြောလိုက်သည်။"ဒါတွေကြောင့် သူတို့ နေမကောင်းဖြစ်တာလို့ လူထုကို လုံးဝ အသိမပေးစေနဲ့! နားလည်လား"

"ဟုတ်ကဲ့!"

ညွှန်ကြားရေးမှူးလန်၏ စူးရှသော အကြည့်များကို ထပ်၍ မရင်ဆိုင်ရဲတော့သဖြင့် ဝန်ထမ်းမှာ ခေါင်းကို အနည်းငယ် ငုံ့ကာ သဘောတူလိုက်သည်။ ထို့နောက် သူသည် ချက်ချင်းပင် လှည့်ထွက်သွားကာ အလုပ်စတော့သည်...

ဉာဏ်ပညာတိမ်တိုက် ဂလက်ဆီဘက်က အခြေအနေကို ဖုံးဖုံးဖိဖိ လုပ်ချင်နေသော်လည်း အခြား ဂလက်ဆီများက သူတို့ကို ထိုအတိုင်း လွှတ်ပေးပါမည်လော။ ဤကဲ့သို့ အားနည်းချက်မျိုးကို ဖမ်းမိရန်မှာ မလွယ်ကူပေ။ အကယ်၍ ကောင်းကောင်း အသုံးမချနိုင်ပါက မိမိကိုယ်ကိုယ် အားနာစရာ ဖြစ်ပေလိမ့်မည်။

မည်သူက နောက်ကွယ်က ကြိုးကိုင်နေမှန်း မသိသော်လည်း ဉာဏ်ပညာတိမ်တိုက် ဂလက်ဆီ ပြည်သူများကြားတွင် ကောလာဟလများ တဖြည်းဖြည်း ပျံ့နှံ့လာတော့သည်...

ယခုကဲ့သို့ အကြီးအကျယ် ရောဂါဖြစ်ပွားရခြင်းမှာ ဉာဏ်ပညာတိမ်တိုက် ဂလက်ဆီ အစိုးရသည် မော့ချူး၏ စိတ်ဝိဉာဉ်အစားအစာကို အတင်းအဓမ္မ လုယူခဲ့သော်လည်း ၎င်း၏ နက်နဲသော နည်းပညာကို နားမလည်သောကြောင့် ဖြစ်သည်။ ရလဒ်အနေဖြင့် တစ်ခုခု မှားယွင်းသွားကာ စားမိသူတိုင်း ဒုက္ခရောက်ကုန်ခြင်း ဖြစ်သည်ဟူ၍ပင်။

...

အစပိုင်းတွင် လူတိုင်းမှာ ဤစကားကို မယုံကြည်ဘဲ မထီမဲ့မြင် ပြုခဲ့ကြသည်။ ဝူမိသားစု၏ လုပ်ငန်းမှာ ဉာဏ်ပညာတိမ်တိုက် ဂလက်ဆီ အစိုးရ၏ တိတ်တဆိတ် ပံ့ပိုးမှုကို ရရှိထားသည် မဟုတ်ပါလား။ သူတို့က ကိုယ့်ပြည်သူကို ကိုယ်ပြန်လိမ်ပါမည်လော။ ရန်တိုက်ပေးချင်လျှင်ပင် ယုံရလွယ်သည့် ဆင်ခြေတစ်ခုခု ရှာသင့်သည်ဟု ထင်ခဲ့ကြသည်။

သို့သော် နောက်ဆုံးတွင် ထိုစကားမှာ ပို၍ပင် ရေပန်းစားလာခဲ့သည်။ ထို့ပြင် အသေးစိတ် အချက်အလက်များဖြင့် ပြောဆိုသူများ ရှိလာရာ လူအချို့မှာ စိတ်ထဲတွင် သံသယများ စတင်ဝင်လာကြသည်။

ထိုသို့ဖြင့် တစ်စုံတစ်ဦးသည် သူဝယ်ထားသော စိတ်ဝိဉာဉ်အစားအစာကို အိမ်မွေးတိရစ္ဆာန်အား ကျွေးကြည့်လိုက်သည်။ သူသည် ဤနည်းဖြင့် အဓိပ္ပာယ်မရှိသော ကောလာဟလများကို ချေဖျက်လိုခြင်း ဖြစ်သည်။ မထင်မှတ်ဘဲ ရက်အနည်းငယ်အကြာတွင် ပုံမှန်အတိုင်း ကောင်းမွန်နေသော အိမ်မွေးတိရစ္ဆာန်မှာလည်း ထိုလက္ခဏာများအတိုင်း ပြလာတော့သည်!

တောက်!

ထိုသူမှာ အလွန်ထိတ်လန့်သွားပြီး အိမ်ရှိ စိတ်ဝိဉာဉ်အစားအစာအားလုံးကို အိမ်အပြင်သို့ ချက်ချင်း လွှင့်ပစ်လိုက်တော့သည်! သူ၏ ရင်ထဲတွင် တုန်လှုပ်နေမိသည်။ 'ဟမ့်! ဝူမိသားစုဆီက ဝယ်တဲ့ ဈေးပေါတဲ့ စိတ်ဝိဉာဉ်စားအစာမှာ တကယ်ပဲ ပြဿနာရှိနေတာပဲ!'

မကြာမီ ထိုသတင်းမှာ တောမီးကဲ့သို့ ပျံ့နှံ့သွားတော့သည်...

အစပိုင်းတွင် လူတိုင်းက မယုံကြည်ကြသော်လည်း ဤကဲ့သို့ လက်တွေ့သာဓက ရှိလာသည့်အခါတွင်မူ မသင်္ကာ ဖြစ်လာကြသည်။ 'ဤသတင်းက အမှန်တကယ် ဖြစ်နိုင်မလား။'

ထိုအချိန်မှာပင် ဝူမိသားစုမှာလည်း သတင်းကို ရရှိသွားပြီး အလွန်ပင် စိုးရိမ်ပူပန်နေကြရသည်! သူတို့ လက်ထဲရှိ ရွှေဥဥပေးသော ကြက်မကြီးမှာ မျက်တောင်တစ်ခတ်အတွင်း ပူလောင်လှသော မီးခဲကြီး ဖြစ်သွားလိမ့်မည်ဟု သူတို့ ဘယ်သောအခါမှ ထင်မှတ်မထားခဲ့ပေ!

ထို့ပြင် ပို၍ အရေးကြီးသည်မှာ အထက်လူကြီးများက သူတို့ကို အကြောင်းပြချက်တစ်ခု ရှာပြီး ထုတ်လုပ်ပြီးသမျှ စိတ်ဝိဉာဉ်အစားအစာ အားလုံးကို ပြန်သိမ်းရန် ခိုင်းစေခြင်းပင်။ ဤသည်မှာ သူတို့ကိုယ်တိုင် အမှားကို ဝန်ခံလိုက်သလို ဖြစ်မနေဘူးလား။

သို့သော် ပြဿနာမှာ... သူတို့က အမိန့်ကို မနာခံဘဲ နေရဲပါမည်လော။ အကယ်၍ စိတ်ဝိဉာဉ်အစားအစာများကို ပြန်မသိမ်းပါက နောက်ထပ် တစ်စုံတစ်ဦးက ဝယ်စားပြီး တစ်ခုခုဖြစ်သွားလျှင် မည်သို့လုပ်မည်နည်း။ အနည်းဆုံးတော့ ဤစိတ်ဝိဉာဉ်အစားအစာများ ရောင်းချနေသရွေ့ ၎င်းမှာ အထင်အရှား သက်သေ ဖြစ်နေပေလိမ့်မည်!

အမှန်စင်စစ် အစပိုင်းတွင် ဝူမိသားစုသည် မော့ချူး၏ စိတ်ဝိဉာဉ်အစားအစာများကို ဝယ်ယူကာ သူတို့၏ ထုတ်ကုန်များဖြင့် အစားထိုးရန် ကြံစည်ခဲ့သည်။ အကယ်၍ အနည်းငယ် ပြောင်းလဲနိုင်ပါက လက်ရှိ အကျပ်အတည်းကို ကျော်လွှားနိုင်မည်ဟု ယူဆခဲ့သည်။ အဆိပ်မိနေသော ပြည်သူများကိုမူ လိမ်ညာရန် ဆင်ခြေတစ်ခုခု ရှာလိုက်ရုံသာ! အလွန်လွယ်ကူသော ကိစ္စဟု ထင်ခဲ့ကြသည်။

ထို့ကြောင့် သူတို့သည် မော့ချူး၏ စိတ်ဝိဉာဉ်အစားအစာများကို အလုံးအရင်းဖြင့် ဝယ်ယူရန် လူလွှတ်ခဲ့သည်။ သို့သော် ထိုအချိန်မှသာ မော့ချူးသည် ပိုလျှံနေသော မုန့်အားလုံးကို အဖွဲ့ချုပ်သို့ ပြန်လည် သယ်ဆောင်သွားပြီ ဖြစ်ကြောင်း သူတို့ သိလိုက်ရသည်! သူတို့အတွက် ဘာမှမကျန်ခဲ့ပေ!

သူတို့၏ စိုးရိမ်မှုများကြားတွင် ရင်ထဲ၌ အနည်းငယ် တုန်လှုပ်သွားရသည်။ မော့ချူးသည် ဤကဲ့သို့သော အခြေအနေမျိုး ဖြစ်လာမည်ကို ကြိုတင်ခန့်မှန်းပြီး ပြင်ဆင်ထားခဲ့ခြင်းလော။ သူတို့ ပိုတွေးလေ ပို၍ ကြောက်လန့်လာလေ ဖြစ်သော်လည်း ရှေ့မှ ပြဿနာကိုတော့ လျစ်လျူရှု၍ မရပေ!

မော့ချူး၏ စိတ်ဝိဉာဉ်အစားအစာကို မရနိုင်သဖြင့် သူတို့သည် အခြားဂလက်ဆီများကို လှည့်ကြည့်ရသည်။ သို့သော် ပြဿနာမှာ အခြားဂလက်ဆီများက ဤမျှ များပြားသော စိတ်ဝိဉာဉ်အစားအစာကို တစ်ပြိုင်နက်တည်း မပံ့ပိုးနိုင်ခြင်းပင်!

နောက်ဆုံးတွင် သူတို့မှာ အခြားရွေးချယ်စရာ မရှိတော့ပေ။ ဤတင်းမာလှသော အခြေအနေကို အောင့်အည်းသည်းခံကာ သင့်တော်သော အကြောင်းပြချက်တစ်ခု ရှာပြီး ကုန်ပစ္စည်း အားလုံးကို စင်ပေါ်မှ ဖယ်ရှားလိုက်ရတော့သည်။

သို့သော် ဉာဏ်ပညာတိမ်တိုက် ဂလက်ဆီ ပြည်သူများမှာ လူအများ မဟုတ်ကြပေ။ သူတို့က ဘယ်လိုလုပ် အလိမ်ခံပါမည်နည်း။ ဤအဖြစ်အပျက်များကို ပေါင်းစပ်ကြည့်လိုက်လျှင် သူတို့ မည်သို့ နားမလည်ဘဲ နေပါမည်နည်း။

အချို့လူများမှာမူ လက်မလျှော့ဘဲ ယခင်က ပိုလျှံနေသော စိတ်ဝိဉာဉ်အစားအစာများကို အခြားနေရာများသို့ ယူဆောင်သွားကာ ဘေးကင်းလုံခြုံမှု စစ်ဆေးခိုင်းကြသည်။ နောက်ဆုံးတွင် ၎င်းထဲ၌ အဆိပ်ပါနေသည်မှာ အမှန်ပင် ဖြစ်နေတော့သည်!

ဤသတင်း ပျံ့နှံ့သွားသည်နှင့် ဉာဏ်ပညာတိမ်တိုက် ဂလက်ဆီ ပြည်သူများမှာ ချက်ချင်းပင် ဆူညံပွက်လောရိုက်သွားပြီး သူတို့၏ ရင်ထဲတွင် ဒေါသများ ပေါက်ကွဲကုန်တော့သည်!

ဒါတွေက ဘာတွေလဲလို့ ပြောကြစမ်းပါဦး! ယခင်က မော့ချူး၏ စိတ်ဝိဉာဉ်အစားအစာများကို အကြာကြီး စားခဲ့စဉ်က ဘာမှမဖြစ်ခဲ့ပေ! သို့သော် ဉာဏ်ပညာတိမ်တိုက် ဂလက်ဆီ၏ ကိုယ်ပိုင် မှော်သားရဲစာက ဤမျှကြီးမားသော အမှားကို ကျူးလွန်ခဲ့ပြီး လူအများအပြားကို ဆေးရုံပို့လိုက်ရခြင်းမှာ တကယ့်ကို ဟာသကြီးပင်!

ဉာဏ်ပညာတိမ်တိုက် ဂလက်ဆီ၏ အထက်တန်းလွှာများမှာလည်း အလွန်ပင် စိတ်ရှုပ်နေကြရသည်! သူတို့ အတတ်နိုင်ဆုံး ဖုံးကွယ်ထားခဲ့သော အမှန်တရားမှာ ဤမျှလွယ်ကူစွာ ဖော်ထုတ်ခံလိုက်ရခြင်းမှာ မျက်နှာကို ဖြတ်ရိုက်ခံလိုက်ရသလိုပင်! လူထု၏ ဒေါသမှာ ပို၍ ပြင်းထန်လာရာ နောက်ဆုံးတွင် ဉာဏ်ပညာတိမ်တိုက် ဂလက်ဆီသည် လူသိရှင်ကြား တောင်းပန်ခဲ့ရတော့သည်။ ဝူမိသားစုမှာလည်း ဤဖြစ်ရပ်တစ်ခုလုံးအတွက် အထင်အရှား အပြစ်ပုံချခံရသူဖြစ်လာခဲ့ရသည်။

ဉာဏ်ပညာတိမ်တိုက် ဂလက်ဆီဘက်မှ အခြေအနေများကို အဘိုးနျဉ် တိုက်ရိုက်ပြောပြနေသည်ကို နားထောင်ရင်း မော့ချူးမှာ ရယ်မောလိုက်မိသည်။

'ဟွန့်! ငါ့ဆီက အမြတ်ထုတ်ချင်သေးတယ်ပေါ့? အိပ်မက်ပဲ မက်နေလိုက်!' ဒါက "ကြက်ခိုးဖို့ ကြံရင်း ဆန်ပါ ဆုံးသွားရတဲ့" သာဓက အစစ်ပဲ!

"ရှောင်ချူး၊ မင်းက ဒီအခြေအနေ ဖြစ်လာမယ်လို့ ကြိုသိနေတာလား"

ဉာဏ်ပညာတိမ်တိုက် ဂလက်ဆီ အကျပ်ရိုက်နေသည်ကို သိရသဖြင့် အဘိုး နျဉ်မှာ မျက်နှာပေါ်တွင် အရေးအကြောင်းများ ပေါ်လာသည်အထိ ပျော်ရွှင်နေသော်လည်း မော့ချူးကို စပ်စုချင်စိတ်ဖြင့် မေးလိုက်မိသည်။

"ဟုတ်ကဲ့"

မော့ချူးက ခေါင်းညိတ်ပြကာ လျှို့ဝှက်ချက်ကို ဖွင့်ဟလိုက်သည်။

"အမှန်ကတော့ စိတ်ဝိဉာဉ်အစားအစာမုန့်တွေရဲ့ ထုတ်လုပ်မှု လုပ်ငန်းစဉ်က တကယ်ကို လွယ်ကူပါတယ်။ ဒါပေမဲ့ ကုန်ကြမ်းတွေကို ပြုပြင်တဲ့အခါမှာ မြူခိုးတွေရဲ့ ပြင်းအားကို အထူးဂရုစိုက်ရတယ်။ မဟုတ်ရင် အထဲက အဆိပ်တွေကို သန့်စင်ဖို့ အရမ်းခက်သွားလိမ့်မယ်"

"ကျွန်မတို့ရဲ့ အခုစက်က တည်ငြိမ်မှု ကြာချိန် နှစ်ပတ်လောက် ရှိတယ်"

မော့ချူးက ဆက်ရှင်းပြခဲ့သည်။ "ဒါကြောင့် နှစ်ပတ်တစ်ကြိမ်မှာ မြူခိုးပြင်းအားကို ပြန်ညှိဖို့ ကျွန်မတို့ရဲ့ ကိုယ်ပိုင်လူတစ်ယောက် လိုအပ်တယ်။ ပြီးတော့ ဒီလုပ်ငန်းစဉ်က အရမ်း လျှို့ဝှက်လွန်းလို့ တခြားလူတွေ ဘယ်တော့မှ သိမှာ မဟုတ်ဘူး!"

"ဒါကြောင့် ဉာဏ်ပညာတိမ်တိုက် ဂလက်ဆီဘက်က သူတို့ စိတ်ဝိဉာဉ်အစားအစာ နည်းပညာကို ကျွမ်းကျင်သွားပြီလို့ ဂုဏ်ယူနေကြပေမဲ့ ဒီလိုမျိုး ဖြစ်လာမယ်လို့ ထင်မထားခဲ့ကြတာပေါ့!"

ထိုစကားကို ကြားသော် အဘိုးနျဉ်က လက်ခုပ်တီး၍ မော့ချူးကို ချီးကျူးလိုက်သည်။"မဆိုးဘူး၊ ဒီနည်းလမ်းက တကယ့်ကို ပြောင်မြောက်တယ်!"

ဘေးနားရှိ နျဉ်ယွိယွမ် ပင်လျှင် သူမ၏ ခေါင်းကို အသာအယာ ပွတ်သပ်ပေးလိုက်သည်။ သူ၏ မျက်လုံးထဲတွင် ဂုဏ်ယူရိပ်များ ပြည့်နှက်နေသည် — တွေ့လား။ ငါ့ဇနီးက တကယ်ကို တော်တာ!

ဝိုင်းဝိုင်းကမူ ၎င်း၏ လက်သည်းများဖြင့် မျက်လုံးကို အုပ်လိုက်သည်။ 'ကျွတ် ကျွတ်၊ ဒီလူသားရဲ့ မိုက်မဲတဲ့ ပုံစံကို ကြည့်စမ်းပါဦး။ ငါတော့ ဆက်မကြည့်နိုင်တော့ဘူး...'

ဉာဏ်ပညာတိမ်တိုက် ဂလက်ဆီမှာ ဒုက္ခရောက်နေပြီး ဤကိစ္စကြောင့်ပင် အဖွဲ့ချုပ်ဘက်မှ မော့ချူးကို တိုက်ခိုက်ရန် ကြံစည်နေသူများမှာလည်း သူတို့ကိုယ်သူတို့ ပြန်လည် ထိန်းချုပ်လာကြသည်။

အမလေး... မော့ချူးက ဘာလို့ အစောကြီး လှုပ်ရှားမှု မလုပ်ခဲ့တာလဲဆိုတာ အံ့သြစရာ မရှိတော့ဘူး! မူလက သူတို့ အနည်းငယ် ဇဝေဇဝါ ဖြစ်ခဲ့ကြပြီး ဤမိန်းကလေးမှာ ဉာဏ်ပညာတိမ်တိုက် ဂလက်ဆီ၏ အင်အားကြောင့် ကြောက်ပြီး ထုံအသွားပြီဟု ထင်ခဲ့ကြသည်။ သို့သော် ယခု ပြန်ကြည့်လိုက်သည့်အခါတွင်မူ သူမတွင် အစီအစဉ် ရှိပြီးသားဖြစ်ကြောင်း ရှင်းနေသည်!

'ဟင်း၊ ဒီရှောင်ချူးက မြင်ရသလို နူးညံ့တဲ့သူ မဟုတ်ဘူးပဲ! အကယ်၍ သူမကို သွားပြီး ရန်စမိရင် အမြတ်မရတဲ့အပြင် ကိုယ့်ခေါင်း ကိုယ် ပြန်ကွဲအောင် လုပ်မယ့်သူမျိုးပဲ!'

အဖွဲ့ချုပ် ပြည်သူများသည် ဤသတင်းကို အဘိုး နျဉ်တို့လောက် မမြန်သော်လည်း ကြားလိုက်ရသည့်အခါ သူတို့၏ ရင်ထဲတွင် ဝမ်းသာအားရ ဖြစ်သွားကြသည်!

အမလေး... တကယ့်ကို ကျေနပ်စရာပဲ! အခြေအနေက တကယ့်ကို ကောင်းမွန်သွားပြီ!

"ကြည့်စမ်း၊ ကံကောင်းခြင်းကြယ်လေးက တကယ်ကို ကံကောင်းတာပဲ! ခဏလေးအတွင်းမှာပဲ အရာအားလုံး ပြေလည်သွားတာ၊ ဘေးဒုက္ခတစ်ခု ကျော်လွှားလိုက်ရသလိုပဲ!"

"ဟုတ်တယ်၊ သူတို့ အရှုံးပေးလိုက်ရတာကိုပဲ ကြည့်တော့!"

"ဟားဟား၊ ဉာဏ်ပညာတိမ်တိုက် ဂလက်ဆီ အစိုးရရဲ့ မျက်နှာပျက်နေတဲ့ ပုံစံကို တွေးမိရင် ငါ ရယ်ချင်တယ်!"

"ဒီလို ဝမ်းသာစရာ ကိစ္စမျိုးကို ပုစွန်ဆိတ် တစ်ပွဲလောက် ထပ်စားပြီး အောင်ပွဲခံသင့်တယ်! သွားကြစို့၊ စိတ်ဝိဉာဥ်အစားအစာဆိုင်ကို သွားကြစို့!"

"ခဏလေး၊ ငါလည်း ခပ်စပ်စပ် ပုစွန်ဆိတ်ကြော်ရဲ့ ပရိသတ်ပဲ! လတ်လတ်ဆတ်ဆတ်နဲ့ စပ်တဲ့ အရသာကို တစ်ခါစားဖူးရင် ဘယ်တော့မှ မမေ့နိုင်တော့ဘူး!"

"အင်း၊ ငါကတော့ ကြက်စွပ်ပြုတ်ကို ပိုကြိုက်တယ်။ အနံ့ကလည်း မွှေးပြီး အရသာကလည်း တကယ့်ကို ထူးခြားတာ..."

...

အစပိုင်းတွင် လူတိုင်းမှာ ဉာဏ်ပညာတိမ်တိုက် ဂလက်ဆီအကြောင်း ပြောနေကြခြင်း ဖြစ်သည်! သို့သော် တစ်စုံတစ်ရာကြောင့် စကားဝိုင်းမှာ တဖြည်းဖြည်း လမ်းကြောင်းလွဲသွားပြီး အစားအစာ ကြိုက်နှစ်သက်မှုများအကြောင်း ပြောဆိုသည့်ပွဲ ဖြစ်သွားတော့သည်။