အခန်း ၂၉၄

အခန်း (၂၉၄) - လျှို့ဝှက်သဘာဝနယ်မြေလည်း ဖြစ်နိုင်ပေသည်

ထိုတောင်တန်းများကို မြူခိုးများပမာ ရစ်သိုင်းနေသည့် ကြောက်ရွံ့မှုနှင့် စိတ်ပျက်အားငယ်မှု အငွေ့အသက်များကို သူ အထင်အရှား ခံစားမိနေ၏။ ထိုအရာများအပြင် မည်သည့်အရာမှန်း တပ်အပ်မပြောနိုင်သော ခံစားချက်တစ်ခုနှင့်အတူ အစီအရင်များကိုပါ သူ အာရုံခံမိနေလေသည်။

တောင်တန်းတိုင်းသည် သူ၏တည်ရှိမှုကို မျက်တောင်တစ်ခတ်အတွင်း ဖျက်ဆီးပစ်နိုင်စွမ်းရှိပေသည်။ သူ၏လက်ထဲတွင် သူတော်စင်အဆင့် ရတနာသုံးခု ရှိနေလျှင်ပင် အသက်ရှင်နိုင်မည်လားဆိုသည်ကို သူ အလွန်အမင်း သံသယဝင်မိချေ၏။

'သူတို့တွေ ဒီနေရာမှာ တစ်နှစ်ပတ်လုံး ဘယ်လိုများ အလုပ်လုပ်နေကြပါလိမ့်။'

ယန်ချင်း တွေးလိုက်မိလေ၏။ ထို့နောက် သူသည် စိတ်ကိုတင်းကာ ပွင့်နေသော အာကာသဥမင်လှိုဏ်ခေါင်းအတွင်းသို့ ချက်ချင်း ခြေလှမ်းလိုက်၏။

"ကံကောင်းပါစေ လူငယ်တရားသူကြီးလေး"

အကြီးအကဲတစ်ဦးက ပြောလိုက်လေ၏။ သူတို့တစ်ဦးချင်းစီထံမှ အားပေးနေသော အကြည့်များကို ခံစားမိသဖြင့် ယန်ချင်းက ကျေးဇူးတင်စွာဖြင့် ခေါင်းညိတ်ပြလိုက်၏။

ဥမင်လှိုဏ်ခေါင်းထဲသို့ သူ ခြေချလိုက်သည်နှင့် အနောက်ဘက်ရှိ အပေါက်မှာ ပိတ်သွားပြီး သူ၏ဘဝတစ်လျှောက်လုံး မြင်ဖူးသမျှထဲတွင် အကြီးမားဆုံးသော တောင်ကြီးဆယ့်နှစ်လုံးကိုသာ မြင်တွေ့လိုက်ရလေသည်။ အာကာသဥမင်လှိုဏ်ခေါင်းထဲသို့ ယန်ချင်း မဝင်ရောက်မီက ထိုတောင်ဆယ့်နှစ်လုံးမှာ တိုက်ကြီးပေါ်ရှိ မည်သည့်နေရာတွင်မဆို တွေ့နိုင်သော သာမန်တောင်များကဲ့သို့ပင် ရိုးရှင်းနေခဲ့၏။

အရွယ်အစားဖြစ်စေ၊ ယေဘုယျအသွင်အပြင်ဖြစ်စေ ထိုတောင်များသည် သာမန်မျှသာဖြစ်ပုံရပြီး ၎င်းတို့ကို ရစ်သိုင်းနေသော စိတ်ပျက်အားငယ်ဖွယ် အငွေ့အသက်များနှင့် အတွင်းစိတ်ထိတိုင် ခံစားလိုက်ရသည့် ထိတ်လန့်ဖွယ် ခံစားချက်မျိုးမှလွဲ၍ မည်သည့်အရာကမျှ ထူးခြားနေခြင်း မရှိပေ။ သို့သော်လည်း သူ၏ခြေဖဝါးက တစ်ဖက်သို့ ထိမိသွားပြီး အနောက်ဘက်အပေါက် ပိတ်သွားသည့် အခိုက်အတန့်တွင်မူ သူမြင်တွေ့ရသော မြင်ကွင်းမှာ ကြီးမားလှသော အပြောင်းအလဲကြီးတစ်ခု ဖြစ်သွားချေ၏။

တောင်များမှာ ဆယ့်နှစ်လုံးပင် ဖြစ်သော်လည်း ယခုအခါ အလွန်အမင်း ကွဲပြားသွားပုံရလေသည်။ ၎င်းတို့သည် အလွန်တရာ ကြီးမားလှသဖြင့် ယန်ချင်းမှာ လည်ပင်းကိုမော့၍ ကြည့်လိုက်ရာ ထိုသို့ကြည့်လျှင်ပင် မြူခိုးဖြူများ ရစ်သိုင်းနေသော တောင်ထိပ်များကို မမြင်နိုင်ပေ။ ထိုမြူခိုးဖြူများကို သေချာဂရုစိုက် နားထောင်ကြည့်မည်ဆိုပါက လူများနှင့် သားရဲများ၏ ညည်းတွားငိုကြွေးသံများကိုပါ ကြားနိုင်ပေသည်။

ဧရာမအရွယ်အစားများအပြင် တောင်ဆယ့်နှစ်လုံးသည် တစ်ခုနှင့်တစ်ခု မတူညီဘဲ ကွဲပြားနေကြပြီး ၎င်းတို့၏ သာမန်တောင်အသွင်အပြင်ကို လုံးဝပြောင်းပြန်လှန်ပစ်လိုက်လေ၏။ တောင်တစ်လုံးမှာ အရောင်အသွေးစုံလင်သော လျှပ်စီးမိုးများ ရွာသွန်းနေပြီး နောက်တစ်လုံးမှာမူ လုံးဝအမှောင်ထုဖြင့် ဖုံးလွှမ်းနေ၏။

အခြားတစ်လုံးမှာမူ ထိုအရာနှင့် လုံးဝဆန့်ကျင်ဘက်ဖြစ်ကာ မျက်စိကျိန်းမတတ် စူးရှသော အလင်းဖြူများဖြင့် လွှမ်းခြုံထားပြီး နောက်ထပ်တစ်လုံးမှာ အနီ၊ လိမ္မော်နှင့် အပြာရောင်မီးတောက်များဖြင့် ဖုံးလွှမ်းနေလေသည်။ အခြားတောင်တစ်လုံးမှာမူ အဆက်မပြတ် ပြောင်းလဲမှုများ ဖြစ်ပေါ်နေပြီး တစ်မိနစ်တွင် ရေကြီးနေကာ နောက်တစ်မိနစ်တွင် ပူပြင်းခြောက်သွေ့သော ကန္တာရကြီးဖြစ်သွားပြီး အခြားတစ်ချိန်တွင် မိုးသီးမုန်တိုင်းများ တိုက်ခတ်နေကာ နောက်ထပ်တစ်ချိန်တွင် နှင်းမုန်တိုင်းကြီးများ လွှမ်းခြုံသွားလေ၏။

တောင်တိုင်းမှာ ထိတ်လန့်ဖွယ်ရာ ဘေးအန္တရာယ်များအား ပုံဖော်နေခြင်းတော့ မဟုတ်ပေ။ ပြီးပြည့်စုံမှု၏ ပြယုဂ်တစ်ခုဟု ထင်ရသော တောင်တစ်လုံးလည်း ရှိသေး၏။ ထိုတောင်တွင် စိမ်းလန်းစိုပြည်သော အပင်များ၊ ဖြတ်သန်းစီးဆင်းနေသော သန့်စင်သည့် မြစ်တစ်စင်းနှင့် နေထိုင်ကျက်စားနေကြသော တိရစ္ဆာန်များ ရှိကြလေသည်။ ၎င်းသည် လုံးဝပြီးပြည့်စုံသော ဂေဟစနစ်တစ်ခု ဖြစ်ပေသည်။

တစ်ခုတည်းသော ထူးဆန်းသည့်အချက်မှာ ထိုနေရာတွင် ပြေးလွှားနေသော တိရစ္ဆာန်များထဲမှ မည်သည့်အကောင်မှ နန်းတော်အဆင့်အောက် မနိမ့်သကဲ့သို့ အပင်များသည်လည်း ဘုရင်အဆင့်များ ဖြစ်နေကြခြင်းပင်။ ၎င်းသည် မည်သည့်အရာနှင့်ပင် ယှဉ်ပါစေ၊ ကောင်းချီးမင်္ဂလာ ကျရောက်နေသော နယ်မြေတစ်ခုနှင့်သာ ပိုတူနေလေသည်။

သူရောက်နေသည်မှာ ရီကွီယမ်ဖြစ်ကြောင်း သေချာစေရန် ယန်ချင်းသည် သူ၏မျက်လုံးများကို အကြိမ်အနည်းငယ်ပင် ပွတ်သပ်ကြည့်လိုက်ရ၏။ အခြားသော ထိတ်လန့်ဖွယ်ရာ တောင်ကြီးများမှာ သတိပေးချက်တစ်ခု ဖြစ်နေသည်။ အထူးသဖြင့် အဆိပ်ရှိသော အပင်များနှင့် ပိုးကောင်များသာ ဖုံးလွှမ်းနေသည့် တောင်ကြီးပင် ဖြစ်သည်။

ထိုတောင်ပတ်ဝန်းကျင်ရှိ လေထုသည်ပင် ခရမ်းရောင်သန်းသော အနက်ရောင်မြူအဖြစ်သို့ ပြောင်းလဲသွားပြီး ထိတ်လန့်ဖွယ် သဘာဝအဆိပ်၏ လက္ခဏာရပ်များ ပါဝင်နေလေသည်။ ၎င်းသည် ချိုမြိန်သောရနံ့ရှိပြီး အန္တရာယ်များလှသော အလှတရားတစ်ခု ရှိနေပေသည်။

တောင်ဆယ့်နှစ်လုံးစီတိုင်းတွင် ၎င်းတို့ကို အချင်းချင်း ကွဲပြားသွားစေသည့် ထူးခြားချက်တစ်ခုစီ ရှိနေလေသည်။ ယန်ချင်းသည် တစ်စုံတစ်ဦးက သူ့အား လမ်းပြခေါ်ဆောင်သွားမည့်အချိန်ကို စောင့်ဆိုင်းနေရင်း ထိုနေရာ၏ ထိတ်လန့်ဖွယ် ခမ်းနားမှုထဲတွင် နစ်မြောနေမိတော့၏။

လက်ရှိ သူရပ်နေသော နေရာသည် အောက်ဘက်တွင် အောက်ခြေမရှိသော တွင်းနက်ကြီးတစ်ခုရှိသည့် ကမ်းပါးစွန်းတစ်ခုဖြစ်ပုံရလေသည်။ သူ၏ရှေ့တွင် မြင်နေရသော တောင်ဆယ့်နှစ်လုံးမှာ ထိုတွင်းနက်ကြီး၏ အောက်ဘက်တွင် အခြေတည်ထားပြီး အထက်သို့ မြင့်မားစွာ ထိုးထွက်နေပုံရကာ ၎င်းတို့၏ ဧရာမအရွယ်အစားကို ပိုမိုသိသာထင်ရှားစေပေသည်။

ယခင်က ကမ်းပါးအောက်မှ ခံစားခဲ့ရသည့် ထိတ်လန့်ဖွယ်အငွေ့အသက်မျိုးကို ထပ်မံခံစားနေရသဖြင့် ယန်ချင်းမှာ နောက်ထပ်တစ်လှမ်း ထပ်လှမ်းရန် မစွန့်စားရဲတော့ပေ။ ထိုဒေသသည် မှောင်မိုက်နေပြီး မှေးမှိန်သော မြူခိုးများ ရှိနေ၏။ အောက်ဘက်သို့ စိုက်ကြည့်ရန် ကြိုးစားလိုက်တိုင်း ယန်ချင်း၏ နှလုံးခုန်နှုန်းများ မြန်လာကာ သူ၏ချီစီးဆင်းမှုမှာလည်း ကစဉ့်ကလျား ဖြစ်သွားရလေသည်။ နှစ်ကြိမ်တိုင်တိုင် ကြိုးစားကြည့်ပြီးနောက် ထိုခံစားချက်မျိုးကိုပင် ပြန်လည်ရရှိလာသောအခါ ကံတရားကို ဆက်လက်မစမ်းသပ်တော့ရန် သူ ဆုံးဖြတ်လိုက်တော့၏။

မည်မျှကြာအောင် စောင့်ရမည်လဲဟု တွေးတောနေစဉ်မှာပင် အနီရောင်သန်းသော လိမ္မော်ရောင်သစ်ကိုင်းတစ်ခုသည် တောင်တစ်လုံးထံမှ ထွက်ပေါ်လာပြီး ယန်ချင်းရှိရာဘက်သို့ အလွန်တရာမြန်ဆန်သော အရှိန်ဖြင့် လာနေသည်ကို မြင်လိုက်ရလေသည်။

ဤနေရာသည် ရီကွီယမ်ဖြစ်ပြီး ထိုနေရာနှင့်ပတ်သက်၍ သူရရှိခဲ့သော အတွေ့အကြုံတိုလေးအပြီးတွင် သာမန်နှင့်မတူသော အရာတစ်ခုခု ဖြစ်လာလျှင်ပင် အံ့သြစရာမဟုတ်သဖြင့် ယန်ချင်းမှာ အစပိုင်းတွင် ထိတ်လန့်သွားခဲ့၏။ ထိုတောင်များထဲမှ တစ်ခုခု၏ တိုက်ခိုက်မှုမျိုးလည်း ဖြစ်နိုင်ရာ သူ့ထံဦးတည်လာနေသော သစ်ကိုင်းကို မြင်လိုက်ရချိန်တွင် သူ အတိအကျပင် ထိုသို့ထင်မှတ်လိုက်မိလေ၏။

ထိုသစ်ကိုင်းမှ ထုတ်လွှတ်နေသော ရင်းနှီးသည့် အငွေ့အသက်တစ်ခုကို သူ အာရုံခံမိလိုက်ချိန်မှသာ သူ၏အတွေးများနှင့် ကျရောက်လာတော့မည့် တိုက်ခိုက်မှုအတွက် ပြင်ဆင်နေမှုများကို ရပ်တန့်လိုက်လေသည်။

သစ်ကိုင်းမှာ ယန်ချင်း၏ရှေ့သို့ ရောက်သည်နှင့် ရပ်တန့်သွား၏။ ယန်ချင်းသည် ၎င်းထံမှ အလွန်သိပ်သည်းလှသော သက်စောင့်စွမ်းအင်နှင့် သန့်စင်မှုတို့ ပါဝင်နေသည့် ညင်သာသော အပူရှိန်တစ်ခုကို ခံစားလိုက်ရလေသည်။ သူ၏ စိမ်းလန်းသော မီးတောက်သစ်ပင်သည်ပင် ၎င်းနှင့်ယှဉ်လျှင် အရောင်မှိန်သွားရချေ၏။

'ဒါက ဘယ်လိုသစ်ပင်မျိုးပါလိမ့်။'

ယန်ချင်းသည် သစ်ကိုင်းပေါ်သို့ ခြေတစ်လှမ်းလှမ်းလိုက်ရင်း တွေးလိုက်မိလေ၏။ သစ်ကိုင်းပင်ဖြစ်လင့်ကစား မီတာတစ်ရာခန့် ကျယ်ဝန်းပြီး ၎င်း၏အရှည်ကိုမူ ခန့်မှန်းရန် ယန်ချင်း လုံးဝ မကြိုးစားတော့ပေ။ တောင်ဆယ့်နှစ်လုံးသည် သူ၏ရှေ့တည့်တည့် ကီလိုမီတာ အနည်းငယ်မျှသာ ကွာဝေးသည်ဟု ထင်ရသော်လည်း ထိုသို့မဟုတ်ကြောင်းကို သူ ခံစားသိရှိနိုင်၏။ အာကာသနယ်မြေသည် အလွန်နီးကပ်နေသယောင် ထင်ရစေရန် ခေါက်ချိုးခံထားရသည့်ပုံပင် ဖြစ်ပေသည်။

ယန်ချင်း၏ ခြေနှစ်ဖက်လုံး သစ်ကိုင်းပေါ်တွင် ခိုင်မြဲစွာ ရပ်မိသည်နှင့် တစ်ပြိုင်နက် သစ်ကိုင်းမှာ ချက်ချင်း ရွေ့လျားသွားလေသည်။ သစ်ကိုင်းပေါ်သို့ ရောက်မှသာ မည်မျှမြန်ဆန်စွာ သွားလာနေကြောင်း ယန်ချင်း သဘောပေါက်သွား၏။ သူ၏အစွမ်းအားလုံးကို အဆတစ်ထောင်မျှ အသုံးပြုလျှင်ပင် ၎င်း၏အမြန်နှုန်းကို မီနိုင်မည် မဟုတ်ချေ။

သစ်ကိုင်းပေါ်တွင်ရပ်နေသော ယန်ချင်းသည် သစ်ကိုင်းမှ ကျပန်းအချိန်ပိုင်းများတွင် လေထဲ၌ မီးတောက်ပုံစံ အက္ခရာတစ်ခုကို ထုတ်လွှတ်လိုက်ပြီး တောက်တောက်ဟူသည့် အသံတစ်သံ ထွက်ပေါ်လာကြောင်း သတိပြုမိလိုက်လေသည်။ ယန်ချင်း သေချာမသိသော်လည်း ဤနေရာရှိ အာကာသနယ်မြေသည်ပင် ကန့်သတ်ချက်များဖြင့် ချိတ်ဆက်ထားပုံရကြောင်း သူ ခံစားလိုက်ရ၏။

'တောင်တွေက ဘယ်လောက်တောင် ဝေးနေတာလဲ။'

သူတို့ ခရီးနှင်လာသည့် အမြန်နှုန်းနှင့် အကွာအဝေးများရှိလင့်ကစား လွန်ခဲ့သည့် ငါးမိနစ်အတွင်း နေရာအပြောင်းအလဲ မရှိသကဲ့သို့ထင်ရသော တောင်ဆယ့်နှစ်လုံးကို စိုက်ကြည့်ရင်း ယန်ချင်း တွေးလိုက်မိလေ၏။

သူတို့ ခရီးနှင်နေသည့် အမြန်နှုန်းအရဆိုလျှင် ထိုအချိန်အတောအတွင်း ယန်ချင်းသည် ရုံးတော်၏ ပင်မဌာနချုပ်နှင့် ကီလိုမီတာ ငါးသောင်းခန့် ကွာဝေးသော မေပယ်နီအင်ပါယာသို့ပင် ရောက်ရှိသွားရမည် ဖြစ်သည်။ သို့သော်လည်း ရီကွီယမ်အတွင်း၌မူ သူ လုံးဝရွေ့လျားမနေသကဲ့သို့ ထင်ရပေသည်။

'ရီကွီယမ်က ဘယ်နေရာမှာပါလိမ့်။ ဌာနချုပ်နဲ့ တက္ကသိုလ်တွေနဲ့ တစ်နေရာတည်းမှာပဲ ရှိနေမလားဆိုတာ သိချင်မိသား'

ယန်ချင်း တွေးလိုက်မိလေ၏။

ထိုဒေသသည် အလွန်ထူးဆန်းလွန်းလှသဖြင့် ၎င်းတို့သည် နေရာတစ်ခုတည်းတွင် ရှိနေသလား သို့မဟုတ် လျှို့ဝှက်သဘာဝနယ်မြေတစ်ခုခုတွင် ရှိနေသလားဟူ၍ ယန်ချင်းအား သံသယဝင်စေလေသည်။ လုံခြုံရေး အကြောင်းပြချက်များကြောင့် နောက်ပိုင်းအချက်က ပိုဖြစ်နိုင်ချေရှိသည်ဟု ယန်ချင်း ခံစားရ၏။

လျှို့ဝှက်သဘာဝနယ်မြေများသည် လျှို့ဝှက်ဆန်းကြယ်နယ်မြေများနှင့် ဆင်တူသော်လည်း လျှို့ဝှက်သဘာဝနယ်မြေများသည် ယေဘုယျအားဖြင့် အရွယ်အစား ပိုမိုသေးငယ်ပြီး သဘာဝအလျောက် ဖြစ်ပေါ်လာခြင်း ဖြစ်ပေသည်။

လျှို့ဝှက်သဘာဝနယ်မြေများကို အများအားဖြင့် သဘာဝရတနာတစ်ခုခုမှတစ်ဆင့် သို့မဟုတ် လျှို့ဝှက်သဘာဝနယ်မြေ ဖြစ်ပေါ်လာစေနိုင်သည့် ကောင်းကင်ဘေးဒဏ်နှင့် ရောနှောသွားသော တာအိုပေါင်းစပ်ခြင်းကဲ့သို့ လုံးဝပုံတူကူးချ၍ မရနိုင်သော ရှင်းပြမရသည့် သဘာဝဖြစ်စဉ်များကြောင့် ဖန်တီးဖြစ်ပေါ်လာခြင်း ဖြစ်လေသည်။

ယနေ့ထက်တိုင် လျှို့ဝှက်သဘာဝနယ်မြေများ၏ လျှို့ဝှက်ချက်များကို ဖော်ထုတ်နိုင်ရန် နက်ရှိုင်းသော သုတေသနနှင့် လေ့လာမှုများအား ပြုလုပ်နေကြဆဲ ဖြစ်သည်။ လူလုပ်ဖန်တီးထားသော လျှို့ဝှက်ဆန်းကြယ်နယ်မြေများနှင့် ယှဉ်ပါက ၎င်းတို့တွင် သဘာဝအလျောက် ဖြစ်ပေါ်ခြင်းအပြင် ပိုမိုကောင်းမွန်စေသည့် အခြားသော ပြိုင်ဘက်ကင်း လုပ်ဆောင်ချက်များလည်း ပါရှိနေပေသည်။

ထိုထူးခြားချက်အချို့မှာ လျှို့ဝှက်သဘာဝနယ်မြေတစ်ခုတွင် ပိုင်ရှင် သို့မဟုတ် ထိန်းချုပ်သူ တစ်ဦးတည်းသာ ရှိနိုင်ပြီး ၎င်းတို့ အသက်ရှင်နေသရွေ့ ထိုအချက်မှာ အလွယ်တကူ ပြောင်းလဲသွားမည် မဟုတ်ချေ။ ဘိုးဘေးနဂါးကြောများက ၎င်းတို့၏ ကိုယ်ပိုင်စိတ်ဝိညာဉ်များကို ဖြစ်ပေါ်လာစေသကဲ့သို့ လျှို့ဝှက်သဘာဝနယ်မြေများတွင်လည်း ကိုယ်ပိုင်စိတ်ဝိညာဉ်များ ရှိသည်ဟု ကောလာဟလ ထွက်နေကြလေသည်။

ဖြစ်ပေါ်လာသော လျှို့ဝှက်သဘာဝနယ်မြေတိုင်းသည် ၎င်း၏ ဖန်တီးမှုအစမှတ်တွင် စိတ်ဝိညာဉ်တစ်ခု ဖြစ်ပေါ်လာသည်ဟု ကောလာဟလရှိပြီး လျှို့ဝှက်သဘာဝနယ်မြေ စိတ်ဝိညာဉ်၏ အသိအမှတ်ပြုမှုကို ရရှိထားသရွေ့ မိမိစိတ်ကြိုက် ထိန်းချုပ်နိုင်ပေသည်။ သို့သော် ဤအရာသည် အန္တရာယ်တစ်ခုနှင့်လည်း အတူယှဥ်တွဲလာပြီး လျှို့ဝှက်သဘာဝနယ်မြေ စိတ်ဝိညာဉ်၏ အမျက်ဒေါသကို ခံရပါက သေဆုံးသွားနိုင်လေ၏။

လျှို့ဝှက်သဘာဝနယ်မြေများသည် ထူးခြားစွာ ပုန်းကွယ်နေတတ်ပြီး လျှို့ဝှက်သဘာဝနယ်မြေတစ်ခု ရှိသည်ဟု ကောလာဟလထွက်နေသော အဖွဲ့အစည်းတိုင်းသည် အင်အားကြီးများ ဖြစ်နေသောကြောင့် ထိုသီအိုရီမှာ သက်သေမပြနိုင်သေးဘဲ ရှိနေသည်။ ယန်ချင်း လက်လှမ်းမီသော ထောက်လှမ်းရေးမှတ်တမ်းများအရ အဆင့်တစ်အောက်ရှိ မည်သည့်အဖွဲ့အစည်းမှ လျှို့ဝှက်သဘာဝနယ်မြေ မရှိကြပေ။

လျှို့ဝှက်သဘာဝနယ်မြေ စိတ်ဝိညာဉ်နှင့် ပတ်သက်သည့် သီအိုရီကို သက်သေမပြနိုင်သေးလျှင်ပင် လျှို့ဝှက်သဘာဝနယ်မြေတစ်ခု၏ တန်ဖိုးမှာမူ ငြင်းပယ်၍မရနိုင်ပေ။ ၎င်းတို့ဖြစ်ပေါ်လာပုံမှာထူးခြားမှုကြောင့် လျှို့ဝှက်သဘာဝနယ်မြေ တစ်ခုစီတွင် ၎င်းတို့အား ဖြစ်ပေါ်လာစေသည့် သဘာဝရတနာများအထိ ထူးခြားချက်များ ရှိနေလေသည်။

အရှားပါးဆုံးနှင့် မကြားဖူးသော ရတနာအချို့သည် လျှို့ဝှက်သဘာဝနယ်မြေများအတွင်း ဖြစ်ပေါ်လာပြီး အချို့မှာ ကျင့်ကြံခြင်းလောက၏ ယေဘုယျအသိတရားကို လုံးလုံးလျားလျား လှန်ပစ်နိုင်လောက်သည်အထိ ထူးခြားလှပေသည်။

၎င်း၏ ဥပမာတစ်ခုမှာ ကျင့်ကြံခြင်းပါရမီ အနည်းငယ်မျှပင် မရှိသော သာမန်လူတစ်ဦးအား သစ်၊ မြေနှင့် ရေစွမ်းအင်တို့တွင် အထူးပြုနိုင်သော တန်ထျန်သုံးခုပါရှိသည့် အထူးခန္ဓာကိုယ်နှင့် ပါရမီရှင်တစ်ဦးအဖြစ် ပြောင်းလဲပေးခဲ့သော အသီးတစ်လုံး ဖြစ်သည်။

ထိုလူသည် ကုသရေးအတွက် နံပါတ်တစ်နယ်မြေအဖြစ် နှစ်ပေါင်းများစွာ တည်ဆောက်ခဲ့သော အဆက်အသွယ်များစွာကြောင့် သန့်စင်နယ်မြေနှစ်ခုကဲ့သို့ အင်အားကြီးမားသော အဆင့်တစ်ဂိုဏ်းဖြစ်သည့် စကြဝဠာသူတော်စင်ဥယျာဉ် ဆေးကုသရေးချိုင့်ဝှမ်းကို ဆက်လက်တည်ထောင်ခဲ့လေသည်။

၎င်းတို့၏ တည်ထောင်သူသည် ဆေးဘက်ဆိုင်ရာတာအိုတွင် ကြီးမားလှသော ရှာဖွေတွေ့ရှိမှုများ ပြုလုပ်ခဲ့ပြီး တိုက်ကြီးအတွင်း ကျင့်သုံးနေသော ဆေးပညာနည်းလမ်းများနှင့် ကုထုံးများ၏ သုံးပုံတစ်ပုံခန့်မှာ သူ၏လက်ထဲမှ ဆင်းသက်လာခြင်း ဖြစ်ပေသည်။

သင်၏ခန္ဓာကိုယ်နှင့် တန်ထျန် ကြေမွသွားပြီး အသက်တစ်ရှိုက်သာ ကျန်လျှင်ပင် သေမင်းထံမှလုယူသူ လင်းဖန်၏လက်ထဲသို့ ရောက်သွားသရွေ့ အပြည့်အဝ ပြန်လည်ကောင်းမွန်လာပြီး ယခင်ကထက် ပိုမိုအားကောင်းလာမည်မှာ သေချာသည်ဟုပင် ကောလာဟလတစ်ခု ထွက်ပေါ်နေခဲ့လေ၏။

မြောက်မြားစွာသော ကျင့်ကြံသူများကို သေဘေးမှ ပြန်လည်ကယ်တင်နိုင်ခဲ့ခြင်းကြောင့် သူသည် 'သေမင်းထံမှလုယူသူ' ဟူသော အမည်ပြောင်အား ရရှိခဲ့ပြီး ၎င်းသည်ပင် သူတော်စင်ဥယျာဉ် ဆေးကုသရေးချိုင့်ဝှမ်းအပေါ် အကာအကွယ်အလင်းအဝန်းတစ်ခု ဖြစ်လာခဲ့လေသည်။

အင်ပါယာဘုရင်များမှသည် ဓားပြခေါင်းဆောင်များအထိ၊ ရှေးရိုးရာဂိုဏ်းများ၏ ဂိုဏ်းချုပ်များမှသည် လုပ်ကြံသတ်ဖြတ်ရေး အဖွဲ့အစည်းများ၏ ခေါင်းဆောင်များအထိ သာမန်နှင့် နာမည်ကျော် ကျင့်ကြံသူများစွာကို လင်းဖန်မှ ကုသပေးခဲ့ပြီး လင်းဖန်သာ သူတို့၏ အကူအညီကို လိုအပ်ပါက ၎င်းတို့တစ်ဦးစီသည် အရာအားလုံးကို စွန့်ပစ်ကာ လာရောက်ကူညီကြမည် ဖြစ်ပေသည်။

သူသည် တိုက်ကြီးတွင် မျက်နှာသာအပေးခံရဆုံးနှင့် အန္တရာယ်အရှိဆုံးလူ ဖြစ်လာခဲ့ပြီး ထိုသို့သော ပြောင်းလဲမှုသည် လျှို့ဝှက်သဘာဝနယ်မြေတစ်ခုကြောင့် ဖြစ်ပေါ်လာခြင်း ဖြစ်လေသည်။

ရီကွီယမ်သည်လည်း လျှို့ဝှက်သဘာဝနယ်မြေတစ်ခု ဖြစ်နေနိုင်မည်လားဆိုသည်ကို ယန်ချင်း မတွေးဘဲ မနေနိုင်တော့ပေ။ ၎င်းသည် ထိုကဲ့သို့မဟုတ်ဟု ဆိုရန်အတွက် အလွန်ထူးဆန်းပြီး ပြိုင်ဘက်ကင်းနေပေ၏။ အကယ်၍ ဟုတ်ခဲ့မည်ဆိုလျှင်…

'ဘယ်သူက ပိုင်ရှင်များလဲ။’