နဂါးပြာမျိုးနွယ်စု လာရောက်ရန်စခြင်း

"ဒါဆိုရင်တော့ မင်းက ကယ်တင်လို့မရတော့တဲ့ အခြေအနေပဲ"

အစ်ကိုကြီးချန်သည် လက်ရှိတွင် မိမိပိုင်ဆိုင်ထားသော စွမ်းရည်မျိုးစုံကို ရေတွက်ကြည့်လိုက်သော်လည်း မိုးပြာနဂါးဧကရီကို ပြန်လည်ကုစားပေးနိုင်မည့် စွမ်းရည်မျိုး အမှန်တကယ်ပင် တစ်ခုမှမရှိချေ။

မိုးပြာနဂါးဧကရီက "လုံးဝကြီးတော့ မဟုတ်သေးပါဘူး" ဟု ဆိုသည်။

"ဪ"

"အကယ်၍ မင်းအနေနဲ့ နောင်တစ်ချိန်မှာ လျင်မြန်ခြင်းနိယာမရဲ့ အရှင်သခင် ဖြစ်လာနိုင်ရင် မင်းရဲ့ပူးပေါင်းမှုနဲ့အတူ ငါလည်း တစ်နေ့မှာ နေ့အလင်းရောင်ကို ပြန်မြင်ရနိုင်ကောင်းပါရဲ့"

အစ်ကိုကြီးချန်၏ နှုတ်ခမ်းထောင့်များ တွန့်သွားသည်။

"ဒါက အဝေးကြီးလိုသေးတာပဲ"

လျင်မြန်ခြင်းနိယာမကို အပိုင်စီးနိုင်ရန်အတွက် ပထမဆုံးခြေလှမ်းမှာ ဧကရာဇ်တစ်ပိုင်း အဆင့်နှောင်းပိုင်းသို့ ရောက်ရှိအောင် ကျင့်ကြံရမည်။ သို့မှသာ နိယာမအရှင်သခင်နေရာအတွက် အရည်အချင်းပြည့်မီမည်ဖြစ်သည်။ ဒုတိယခြေလှမ်းမှာ ကောင်းကင်ခွဲ မိစ္ဆာဧကရာဇ်ကို ဖြုတ်ချရမည်ဖြစ်ပြီး လျင်မြန်ခြင်းနိယာမ၏ အရှင်သခင်နေရာကို လစ်လပ်သွားစေရန် လုပ်ဆောင်ရမည်။ ဒုတိယအချက်မှာ လွယ်ကူလှသော်လည်း ပထမအချက်အတွက်မူ အချိန်မည်မျှကြာမြင့်မည်ကို မည်သူမျှမသိနိုင်ချေ။

ထိုစဉ်မှာပင် အဝေးဆီမှ ပြင်းထန်သော လေတိုးသံတစ်ခု ပဲ့တင်ထပ်လာပြီး မကြာမီတွင် နောက်ထပ် လူတစ်စုမှာ သူတို့ထံ အပြေးအလွှားရောက်ရှိလာကြသည်။ အစ်ကိုကြီးချန် အနီးကပ်ကြည့်လိုက်ရာ ဦးဆောင်လာသူမှာ အခြားသူမဟုတ်ဘဲ ကျိလင်းဟန်ဖြစ်၏။ သူမ၏နောက်တွင် မိုချန်၊ ရှန်ထိုက်နှင့် အခြားသူများက သူ့ကို စိုးရိမ်မှုအပြည့်ရှိသော မျက်နှာများဖြင့် အဆက်မပြတ် မျက်စိမှိတ်ပြနေကြသည်။

သူ့ကိုမြင်သည်နှင့် ကျိလင်းဟန်သည် မျှော်လင့်ချက်များနှင့် အံ့သြဝမ်းသာမှု အမူအရာများဖြင့် ချဉ်းကပ်လာခဲ့သည်။

"ဂိုဏ်းချုပ်ကျန်း... ရှင်က ဂိုဏ်းချုပ်ကျန်းမလား"

အစ်ကိုကြီးချန်သည် မိမိကိုယ်မိမိ မိုးပြာနဂါး၏ စစ်မှန်သောခန္ဓာကိုယ်အဖြစ် ရှိနေသေး၍သာ တော်တော့သည်ဟု တွေးမိသွားသည်။ သို့မဟုတ်ပါက သူ၏လှည့်ကွက်မှာ ချက်ချင်းပင် ပေါ်သွားတော့မည်။

"မိန်းကလေး... မင်း ဘာတွေပြောနေတာလဲ"

"ငါက မိုးပြာနဂါးဧကရာဇ်ပဲ"

ကျိလင်းဟန်က ခေါင်းကို အမြန်ခါလိုက်သည်။ သူမသည် အစ်ကိုကြီးချန်၏ နဂါးလက်သည်းတစ်ခုကို လှမ်းကိုင်လိုက်ပြီး ပြန်မလွှတ်တော့ပေ။

"မဟုတ်ဘူး... ရှင်ပဲ"

"ရှင်ကလွဲရင် ဘယ်သူကမှ ကျွန်မတို့အပေါ် ဒီလောက်မကောင်းနိုင်ဘူး၊ ပြီးတော့ ရတနာတွေအများကြီးလည်း ပေးမှာမဟုတ်ဘူး"

"ပြီးတော့ ရှင်ကလွဲရင် အခြားဘယ်သူမှလည်း လူတွေကို အသက်ပြန်ရှင်အောင် မလုပ်နိုင်ဘူး"

"ဒါက ရှင်ပဲဖြစ်ရမယ်၊ ဟုတ်တယ်မလား"

အစ်ကိုကြီးချန် အကျပ်ရိုက်သွားသည်။ ရက်အနည်းငယ်မျှသာ ရှိသေးသော်လည်း သူ့လျှို့ဝှက်ချက်မှာ ပေါ်သွားပြီလား... သို့သော် ဤကဲ့သို့ အခြေအနေမျိုးတွင် အမှန်အတိုင်း အသိအမှတ်ပြုလိုက်ပါက သူ၏သိက္ခာ လုံးဝကျဆင်းသွားပေလိမ့်မည်။ ထို့ကြောင့် သူက ခေါင်းမာမာဖြင့်ပင် ဆက်လက်ဟန်ဆောင်ရန် ဆုံးဖြတ်လိုက်သည်။

"မိန်းကလေး... သေချာကြည့်စမ်းပါ။ ငါက ပုံစံကိုးမျိုး မိုးပြာနဂါးတစ်ကောင်ပါ"

"အသက်ပြန်ရှင်အောင်လုပ်တယ်ဆိုတာ ငါလည်းတတ်နိုင်တဲ့အရာပဲ"

"မင်းတို့ရဲ့ ဂိုဏ်းချုပ်ကျန်းအကြောင်းကို ငါကြားဖူးပါတယ်။ သူက အင်မော်တယ်ဧကရာဇ်ကျိုရန်ကို တိုက်ခိုက်သတ်ဖြတ်ခဲ့ဖူးပြီး သူ့ရဲ့အစွမ်းက ကောင်းကင်အထိရောက်ပြီး အင်မော်တယ်လောကတစ်ခုလုံးကို တုန်လှုပ်စေခဲ့တာ"

"ဒါ့အပြင် သူက မရေမတွက်နိုင်တဲ့ အံ့ဖွယ်အင်မော်တယ်ပညာရပ်တွေကိုလည်း ကျွမ်းကျင်သေးတယ်။ သူက တကယ့်ကို စကြဝဠာတစ်ခုလုံးမှာ ပြီးပြည့်စုံတဲ့လူပဲ"

"အဲဒီလိုမျိုး လူတစ်ယောက်ကိုတော့ ငါလည်း ဟန်ဆောင်ဖို့ မဝံ့ရဲပါဘူး"

သူသည် မိမိကိုယ်မိမိ ရှက်ရွံ့ခြင်းမရှိဘဲ ကောင်းကင်ထိအောင် ချီးမွမ်းခန်းဖွင့်ပြီးနောက် နှိမ့်ချသော အမူအရာဖြင့် ထပ်လောင်းပြောဆိုလိုက်သည်

"သူနဲ့နှိုင်းယှဉ်ရင် ငါက လပြည့်ဝန်းကြီးဘေးက ပိုးစုန်းကြူးလေးတစ်ကောင်လိုပါပဲ။ ငါက ဘယ်လိုလုပ်ပြီး သူနဲ့ယှဉ်နိုင်မှာလဲ"

"အမှန်အတိုင်းပြောရရင် ငါ ဖေးရှန်ဂိုဏ်းကို အကြိမ်ကြိမ်ကူညီပေးခဲ့ပြီး မင်းတို့ကိုလုပ်ဖော်ကိုင်ဖက်အဖြစ် ရွေးချယ်ခဲ့တာကလည်း သူ့ကို အထင်ကြီးလေးစားမိလို့ပါ"

"ဟူး... အဲဒီလို ခေတ်တစ်ခေတ်ကို ပြောင်းလဲစေနိုင်တဲ့ ပုဂ္ဂိုလ်ကြီးနဲ့ မဆုံတွေ့နိုင်ခဲ့တာက ငါ့ရဲ့နဂါးဘဝတစ်ခုလုံးမှာ အကြီးမားဆုံးနောင်တပါပဲ"

အာ...

သူ့နောက်ကွယ်တွင်မူ မိုချန်၊ ရှန်ထိုက်၊ ယင်းရွှယ်အာနှင့် အခြားသူများအပြင် မှောင်ရိပ်ထဲမှ မိုးပြာနဂါးဧကရီပါ ဆွံ့အသွားကြသည်။

အစ်ကိုကြီးရာ... မင်းရဲ့အထောက်အထားကို ဖုံးကွယ်ချင်တယ်ဆိုရင်တောင် ကိုယ့်ကိုယ်ကိုယ် ဒီလောက်အထိ ချီးမွမ်းခန်းဖွင့်နေစရာ မလိုပါဘူး...

ဒါ့အပြင် မင်း အသက်ပြန်ရှင်အောင် လုပ်ပေးခဲ့တဲ့ လူပေါင်း ၈၇၆ ယောက်စလုံးက မင်းရဲ့အထောက်အထားကို သိနေကြပြီပဲဥစ္စာ...

ဆက်ပြီးဖုံးကွယ်နေလို့ ဘာအဓိပ္ပာယ်ရှိမှာလဲ...

သူတို့မသိသည်မှာ အစ်ကိုကြီးချန်၏အမြင်တွင်မူ ဤအရာက အလွန်အဓိပ္ပာယ်ရှိနေ၏။ ဘာပဲဖြစ်ဖြစ် ထိုအသက်ပြန်ရှင်လာသော တပည့်များမှာ ဧကရာဇ်တစ်ပိုင်းအဆင့်သို့ မရောက်သေးသဖြင့် သူတို့ရှေ့တွင် သူက ဖိအားလုံးဝမရှိချေ။

"မယုံဘူး"

ကျိလင်းဟန်၏ လှပသောမျက်ဝန်းများမှာ အစမှအဆုံးအထိ သူ့ထံမှ လုံးဝဖယ်ခွာမသွားခဲ့ချေ။

"ရှင်က သူပဲဖြစ်ရမယ်... စကားပြောတဲ့ပုံစံကအစ သူ့ပုံစံအတိုင်းပဲ"

သူမက သုံးနှစ်အရွယ် ကလေးငယ်မဟုတ်သဖြင့် ထိုမျှလောက်ဖြင့် လှည့်စားရန်မလွယ်ကူချေ။

အစ်ကိုကြီးချန်က သူသည် ဂိုဏ်းချုပ်ကျန်း၏ စကားပြောပုံကို တမင်တကာ အတုယူနေခြင်းဖြစ်ကြောင်း ဆက်လက်ပြောဆိုရန် ပြင်လိုက်စဉ်မှာပင် အဝေးမှ နဂါးအုပ်စုကြီးတစ်ခု ပျံသန်းလာခဲ့သည်။

"ဟင်"

သူတို့ကို ဦးဆောင်လာသူမှာ ဆန်းကျိဖြစ်သည်

"မင်းတို့အားလုံး ဘာလုပ်နေကြတာလဲ"

အစ်ကိုကြီးချန်သည် ထိုအဘိုးကြီး အချိန်ကိုက်ရောက်လာသည်ဟု စိတ်ထဲမှတွေးလိုက်ပြီး သူက အလျင်အမြန်ပင်ဆီးကြိုကာ

"အဟားဟား... တစ်ခုခု ထူးခြားလို့လား"

ဘေးနားမှ ယီခုန်းက လေးနက်သောအသံဖြင့်ဆိုသည်။

"ဟုတ်ပါတယ်၊ မိုးပြာနဂါးချိုင့်ဝှမ်းက ဧကရာဇ်တစ်ပိုင်း အနည်းငယ် ရောက်လာကြတယ်။ လတ်တလော ဖြစ်ပွားခဲ့တဲ့ သဘောထားကွဲလွဲမှုတွေကြောင့် ဖြစ်လိမ့်မယ်"

"ကောင်းပြီ... ငါ အခုချက်ချင်း သွားမယ်"

လူတိုင်းက စိတ်ထဲမှနေ၍ ဒါက ကောင်းတဲ့အရာမို့လို့လားဟု တွေးလိုက်ကြသည်။ သူတို့မသိသည်မှာ အစ်ကိုကြီးချန်ကမူ ဤနေရာမှထွက်ပြေးရန် အကြောင်းပြချက်တစ်ခုရရှိသွားသဖြင့် အလွန်ဝမ်းသာနေခြင်းဖြစ်သည်။ သူ့တွင် အရေးကြီးကိစ္စရပ်တစ်ခုရှိနေသည်ကို မြင်သောကြောင့် ကျိလင်းဟန်လည်း လက်လွှတ်ပေးလိုက်ရုံမှတစ်ပါး အခြားမရှိတော့ချေ။ သို့သော် သူမက လက်မလျှော့ဘဲ သူတို့နှင့်အတူ လိုက်ပါလာသည်။

လမ်းခရီးတွင် ဆန်းကျိက ယေဘုယျအခြေအနေကို အလျင်အမြန်ရှင်းပြ၏။ နဂါးပြာမျိုးနွယ်စုဘက်မှ ယင်နဂါးနှင့် တိမ်နဂါးမျိုးနွယ်တို့မှ ဧကရာဇ်တစ်ပိုင်း စုစုပေါင်း ၁၈ ပါးအထိ ရောက်ရှိလာကြပြီး ၎င်းတို့၏ အင်အားတစ်ခုလုံးနီးပါး ပါဝင်လာခြင်းဖြစ်သည်။ ၎င်းက ယခင်အကြိမ်က လာရောက်ဂုဏ်ပြုခဲ့သော အခြေအနေနှင့် လုံးဝကွာခြား၏။

သူတို့က မကောင်းသော ရည်ရွယ်ချက်ဖြင့် လာရောက်ခြင်းဖြစ်ကြောင်း ထင်ရှားသည်။ ရွှေနဂါးမျိုးနွယ်ဘက်မှမူ ယခင်အကြိမ်အတိုင်းပင် ဧကရာဇ်တစ်ပိုင်းသုံးပါး ရောက်ရှိလာ၏။ နဂါးပြာမျိုးနွယ်စုနှင့် မိုးပြာနဂါးချိုင့်ဝှမ်းတို့ သဘောထားကွဲလွဲထားကြသဖြင့် သူတို့သည် ချိုင့်ဝှမ်းအတွင်းသို့ ဝင်ရောက်ခွင့်မရှိဘဲ အပြင်ဘက်တွင်သာ စောင့်ဆိုင်းနေကြရသည်။

ဤအခြေအနေကို မြင်လိုက်ရသောအခါ အစ်ကိုကြီးချန် အလွန်ဝမ်းသာသွား၏။ ၎င်းက တကယ်ကို ကြီးမားသော ကိစ္စရပ်တစ်ခုပင်။ သူပေါ်လာသည်နှင့်တစ်ပြိုင်နက် နဂါးပြာမျိုးနွယ်စုမှ ဦးဆောင်လာသော ဧကရာဇ်တစ်ပိုင်းတစ်ပါးက ခက်ထန်စွာအော်ဟစ်လိုက်သည်။

"သူ့ကို ဖမ်းလိုက်စမ်း"

မိုးပြာနဂါးချိုင့်ဝှမ်းမှ ကျန်ရှိနေသော ဧကရာဇ်တစ်ပိုင်း ၁၇ ပါးသည်လည်း သူ့ကို ချက်ချင်းပင် ဝိုင်းရံလိုက်ကြတော့သည်။ ထိုဧကရာဇ်တစ်ပိုင်း ၁၈ ပါးသည် မတူညီသော နေရာအသီးသီးတွင် ရပ်တည်လိုက်ကြပြီး ဆုတ်ခွာမည့်လမ်းကြောင်းအားလုံးကို ပိတ်ဆို့လိုက်ကြ၏။ ရွှေနဂါးချိုင့်ဝှမ်းမှ ဧကရာဇ်တစ်ပိုင်းသုံးပါးပင်လျှင် ဤမျှလောက် ရုတ်တရက် တိုက်ခိုက်လာလိမ့်မည်ဟု မျှော်လင့်မထားသဖြင့် ခေတ္တမျှဆွံ့အသွားကြသည်။

အစ်ကိုကြီးချန်သည် ဤနဂါးများက သေတွင်းရှာနေကြခြင်းလားဟု တွေးမိသည်။ ယခင်က အောက်ရန်၏ ကူညီမှုနှင့်အတူ မိုးပြာနဂါးချိုင့်ဝှမ်းမှ ပံ့ပိုးမှုများကြောင့် သူသည် နဂါးမျိုးနွယ်စုအပေါ် တော်တော်လေး အမြင်ကောင်းရှိခဲ့၏။ မိုးပြာနဂါးချိုင့်ဝှမ်းနှင့် ပတ်သက်မှုဖြတ်တောက်ထားခဲ့သော်လည်း သူတို့ကို အမြစ်ပြတ်ချေမှုန်းရန် လုံးဝမတွေးဖူးချေ။

အဆိုးဆုံးဖြစ်လျှင်ပင် ကိုယ့်လမ်းကိုယ်သွားကြရုံသာ။ သို့သော် နဂါးပြာချိုင့်ဝှမ်းမှ လူများက လူမိုက်လုပ်၍ သူ့ကို ဆက်လက်တိုက်ခိုက်ရန် ကြိုးပမ်းလာမည်ဆိုပါက သူလည်း လက်နှေးနေတော့မည်မဟုတ်။ အစ်ကိုကြီးချန်အနေဖြင့် အကောင်းဆုံးသော အသက်ပြန်ရှင်ခြင်းစွမ်းရည်ကို အသုံးပြုလိုက်သည်နှင့် မည်သည့်ရန်သူကိုမျှ အသက်ရှင်လျှက်ချန်ထားလေ့မရှိချေ။

"ရွှမ်ဟိုင်း... မင်း ဘာလုပ်နေတာလဲ"

သူစကားမပြောရသေးမီ ဆန်းကျိက ရှေ့မှနေ၍ ကာကွယ်ပေးလိုက်သည်။

"မင်းတို့ ရူးနေကြတာလား"

"မိုးပြာနဂါးဧကရာဇ်က မင်းတို့ ထိတွေ့လို့ရတဲ့သူ ထင်နေလို့လား"

ဆန်းချုံး၊ ယီခုန်း၊ မော့ရန်နှင့် မိုးပြာနဂါးချိုင့်ဝှမ်းမှ အခြားသော အဆင့်မြင့်အကြီးအကဲကြီးများကလည်း တန်းစီရပ်လိုက်ကြပြီး အစ်ကိုကြီးချန်ကို ကာကွယ်ပေးလိုက်ကြသည်။

"မိုးပြာနဂါးဧကရာဇ်ကို တိုက်ခိုက်တာက ငါတို့ မိုးပြာနဂါးချိုင့်ဝှမ်းတစ်ခုလုံးကို တိုက်ခိုက်တာနဲ့ အတူတူပဲ"

"ငါတို့ရဲ့ မိုးပြာနဂါးချိုင့်ဝှမ်းက မင်းတို့ရဲ့နဂါးပြာချိုင့်ဝှမ်းနဲ့ အသက်လုပြီး တိုက်ခိုက်သွားမှာ ဖြစ်တယ်၊ အခုကစပြီး သွေးကြွေးတင်သွားပြီပဲ"

သူတို့သည် မူလကပင် အစ်ကိုကြီးချန်ကို မိုးပြာနဂါးမျိုးနွယ်စု ပြန်လည်နိုးထလာစေမည့် မျှော်လင့်ချက်အဖြစ် ရတနာတစ်ခုကဲ့သို့ သတ်မှတ်ထားကြခြင်းဖြစ်သည်။ ထို့ပြင် မကြာသေးမီကပင် ယခင် မိုးပြာနဂါးဧကရီကိုယ်တိုင်က သူ့ကိုအသိအမှတ်ပြုပေးခဲ့၏။ ၎င်းက နောက်ဆုံးအတည်ပြုချက်ကဲ့သို့ ဖြစ်နေသဖြင့် သံသယဝင်စရာ အကြောင်းမရှိချေ။

အစ်ကိုကြီးချန်သည် ယခုအခါ သူတို့၏ နှလုံးသားထဲတွင် မြင့်မြတ်လှသော စံပြပုံရိပ်အသစ် ဖြစ်နေခဲ့ပြီဟုပြောလျှင် မလွန်ချေ။ သူတို့၏ အမိန့်ပေးမှုနှင့်အတူ မိုးပြာနဂါးချိုင့်ဝှမ်းအတွင်းရှိ နဂါးဘုရင်အားလုံး ပျံသန်းထွက်ပေါ်လာကြသည်။ မိုးပြာနဂါးများအားလုံး ဘေးပတ်ပတ်လည်တွင် မိုးတိမ်များနှင့် မြူခိုးများ ဝန်းရံလျက် တိုက်ပွဲအတွက် အပြည့်အဝပြင်ဆင်လိုက်ကြ၏။

ဤမြင်ကွင်းကြောင့် ရွှေနဂါးချိုင့်ဝှမ်းမှ ဧကရာဇ်တစ်ပိုင်းသုံးပါးမှာ ထိတ်လန့်တုန်လှုပ်သွားကြရသည်။ သူတို့သည် စေ့စပ်ညှိနှိုင်းပေးရန်အတွက် အလယ်ဗဟိုသို့ အလျင်အမြန် ပျံသန်းဝင်ရောက်လာခဲ့၏။

"ရွှမ်ဟိုင်း၊ ဆန်းကျိ... ငါတို့ စကားကောင်းကောင်း ပြောကြရအောင်"

သူတို့သည် နဂါးမျိုးနွယ်စုများအကြား ကြီးမားသော စစ်ပွဲကြီးတစ်ခု ဖြစ်ပွားသည်ကို မမြင်လိုကြချေ။ မဟာနဂါးမျိုးနွယ်စုသုံးခုမှာ နှစ်ပေါင်းများစွာကြာအောင် ဆုတ်ယုတ်လာခဲ့ရသည်ဖြစ်ရာ ယခုအချိန်တွင် ပြည်တွင်းစစ်ပွဲကြီးတစ်ခု ထပ်မံဖြစ်ပွားမည်ဆိုပါက မျိုးသုဉ်းမည့်အန္တရာယ်နှင့် ရင်ဆိုင်ရပေလိမ့်မည်။ ထိုအချိန်ကျရောက်လာလျှင် ရွှေနဂါးမျိုးနွယ်စုသည်လည်း ဘေးမှထိုင်ကြည့်နေနိုင်တော့မည်မဟုတ်ချေ။

နဂါးပြာမျိုးနွယ်စုမှ ဧကရာဇ်တစ်ပိုင်းရွှမ်ဟိုင်းသည် ကောင်းကင်ထက်မှနေ၍ အေးစက်စွာ လှောင်ပြုံးရင်း ငုံ့ကြည့်လိုက်သည်။

"ငါတို့က နဂါးပြာဧကရာဇ်ရဲ့ အမိန့်တော်အရ နဂါးမျိုးနွယ်စုထဲကို ခိုးဝင်လာတဲ့ သူလျှိုတစ်ယောက်ကို ဖမ်းဆီးဖို့ လုပ်ဆောင်နေတာပဲ။ ဘာအမှားရှိလို့လဲ"

"အကယ်၍ မင်းတို့ရဲ့ မိုးပြာနဂါးမျိုးနွယ်စုက ငါတို့ကိုတားဆီးဖို့ ကြိုးပမ်းမယ်ဆိုရင် မင်းတို့က သူလျှိုနဲ့ ပူးပေါင်းကြံစည်နေတာပဲ"

ဤစကားလုံးများကြောင့် ဆန်းကျိ အလွန်အမင်းဒေါသထွက်ကာ ရယ်မောလိုက်မိသည်။

"ရွှမ်ဟိုင်း... ငါတို့ မိုးပြာနဂါးချိုင့်ဝှမ်းရဲ့ နဂါးဧကရာဇ်ကို မင်းတို့ကစော်ကားဝံ့တာလား"

"ငါတို့ရဲ့ မိုးပြာနဂါးချိုင့်ဝှမ်းက မင်းတို့ရဲ့ နဂါးပြာချိုင့်ဝှမ်းနဲ့ ဆက်ဆံရေး ဖြတ်တောက်ပြီးသားပဲ။ မင်းတို့မှာ ဘာအစီအစဉ်ပဲရှိရှိ ငါတို့ရင်ဆိုင်သွားမယ်"

"ဒါပေမဲ့ ငါတို့မျိုးနွယ်စုရဲ့ နဂါးဧကရာဇ်ကို သူလျှိုအဖြစ်စွပ်စွဲပြီး နာမည်ဖျက်ဖို့ ကြိုးစားတာကတော့ တကယ့်ကို ရယ်စရာကောင်းလွန်းလှတယ်"

"မင်းတို့ရဲ့ နဂါးပြာဧကရာဇ် အဘိုးကြီးကတော့ တကယ့်ကို အမြင်ကျဉ်းမြောင်းလွန်းတာပဲ"