အခန်း ၁၂၁

အခန်း (၁၂၁) ရှရွှယ်ချန်တောင်သို့ ညဉ့်အချိန် စူးစမ်းခြင်း

ရှရွှယ်ချန်တောင်၏ အလယ်ဗဟို၌ အင်အားကြီးမားသော ဓားချက်ဖြင့် ခုတ်ပိုင်းထားသကဲ့သို့ ထင်ရသော ညီညာသည့် မြေနေရာကျယ်ကြီးတစ်ခု ရှိနေ၏။ ဤကုန်းပြင်မြင့်၏ အစွန်းတစ်ဖက်တွင်မူ ကျောက်တံတိုင်းမြင့်ကြီးတစ်ခုကို ဆောက်လုပ်ထားသည်။ ထိုကျောက်တံတိုင်းအတွင်း၌ အိမ်ခြေ နှစ်ရာခန့်ကို ဆောက်လုပ်ထားကြ၏။ ဟေးလုံစခန်းရှိ ဓားပြအင်အားမှာ ငါးရာအထိ ရှိသဖြင့် ရှရွှယ်ချန်တောင် တဝိုက်ရှိ ဓားပြဂိုဏ်းကြီး ဆယ်ခုအနက် အင်အားအကြီးဆုံးအဖြစ် ကျော်ကြားသည်မှာ မလွန်ပေ။

ကုန်းပြင်မြင့်၏ တောင်စောင်းတွင် ကျယ်ဝန်းသော ဂူပေါက်တစ်ခု ရှိနေ၏။ အတွင်းဘက်သို့ လျှောက်သွားလျှင် သဘာဝအတိုင်းဖြစ်ပေါ်နေသော တောင်ကွဲကြောင်းတစ်ခုက တောင်ခြေအထိ ရှည်လျားစွာ တည်ရှိနေသည်။

ဟေးလုံစခန်း၏ တောင်ကုန်းထူထပ်သော မြေအနေအထားကြောင့် စစ်တပ်ကြီးများ လာရောက်တိုက်ခိုက်ပါက ခုခံနိုင်စွမ်းရှိနေပေသည်။ ကျောက်တံတိုင်းသာ ပြိုကျသွားပါကလည်း ဓားပြအားလုံးက တောင်ကြားလမ်းများထဲတွင် ပုန်းအောင်းကာ ဆက်လက်၍ မလျှော့သောဇွဲဖြင့် ခုခံနိုင်ပြီး အချိန်မရွေး ပြန်လည်တိုက်ခိုက်နိုင်ရန် အသင့်ရှိနေကြသည်။

ညဉ့်ဦးယံအချိန်၌ ဟေးလုံစခန်း၏ အစည်းအဝေးခန်းမကြီးအတွင်း... တစ္ဆေမျက်နှာချောက်၏ ခေါင်းဆောင်မှလွဲ၍ ကျန်ရှိသော ဓားပြဂိုဏ်းကိုးခုမှ ခေါင်းဆောင်များ အားလုံးစုဝေးရောက်ရှိနေကြ၏။

"ခေါင်းဆောင် တန်ထိုက်... ယွီရွှေတပ်စခန်းရဲ့ အကြီးအကျယ် နယ်မြေရှင်းလင်းမှုနဲ့ ချီလင်အကယ်ဒမီက နည်းပြတွေရဲ့ ကူညီမှုကြောင့် ကျွန်တော်တို့ရဲ့ ဓားပြဂိုဏ်း ဘယ်တစ်ခုမှ သူတို့ကို ခုခံနိုင်မှာ မဟုတ်ဘူး..."

"အခု ငါတို့ရဲ့ ဓားပြစခန်း ကိုးခုလုံး စုစည်းမိကြပြီဆိုတော့... ယွီရွှေတပ်စခန်းရဲ့ စစ်တပ်ကို ဘယ်လိုချေမှုန်းရမလဲဆိုတာ ခေါင်းဆောင်ဆီကပဲ အမိန့်ပေးဖို့ လိုတော့တယ်..."

ထိုစဉ် သွေးဓားဂူ၏ ခေါင်းဆောင် ဟွမ်ပိုင်ချိုက ဒေါသတကြီး ပြောလိုက်သည်။ နှစ်ရက်အတွင်းမှာပင် ယွီရွှေတပ်စခန်းက ဝံပုလွေတောင်ထွတ်၊ သွေးဓားဂူ၊ သွေးကင်းမြီးကောက်တောင်တန်းနှင့် တစ္ဆေမျက်နှာချောက်တို့ကို ချေမှုန်းလိုက်သဖြင့် ဓားပြဂိုဏ်းခေါင်းဆောင်များမှာ အလွန်ပင် ထိတ်လန့်နေကြသည်။ ၎င်းတို့အနေဖြင့် မိမိတို့ ဂိုဏ်းတစ်ခုတည်းဖြင့် ယွီရွှေတပ်စခန်းကို တိုက်ခိုက်ပါက အပြီးအပိုင် ချေမှုန်းခံရမည်ကို ကောင်းစွာ သိရှိနေကြသည်။ ဓားပြစခန်းအားလုံး၏ အင်အားကို စုစည်းပြီး အသက်ကို ပဓာနမထားဘဲ တိုက်မှသာ စစ်ရေးအလှည့်အပြောင်းကို ဖန်တီးနိုင်မည်ဖြစ်သည်။

"လူကြီးမင်းတို့... ငါတို့ ရှရွှယ်ချန်တောင်က ဓားပြတွေဟာ ရန်သူကို အမြဲတမ်း စည်းလုံးညီညွတ်စွာ မုန်းတီးခဲ့ကြတယ်..."

"ယွီရွှေတပ်စခန်းက ငါတို့ကို လမ်းမပေးတော့ဘူးဆိုရင်... သူတို့ကို ဘယ်တော့မှ မမေ့နိုင်အောင် သင်ခန်းစာ ပေးရမှာပေါ့..."

"ငါတို့ ဒီတိုက်ပွဲမှာ မဖြစ်မနေ အနိုင်ယူရမယ်..."

"အနိုင်ရမှသာ ငါတို့ ဓားပြစခန်းကိုးခုဟာ နန်းတော်နဲ့ ညှိနှိုင်းခွင့်ရပြီး ငါတို့ လိုချင်တဲ့ အခြေအနေတွေကို ရရှိမှာ..."

"ယွီရွှေတပ်စခန်းရဲ့ တပ်သားအားလုံး ရှရွှယ်ချန်တောင်ခြေကို ရောက်ရှိလာပြီး ငါတို့ တောင်ပေါ်က ဆင်းတဲ့လမ်းကို ပိတ်ဆို့ထားတယ်ဆိုတဲ့ သတင်းကို ငါ ရထားတယ်..."

“ငါ့ရဲ့ ခန့်မှန်းချက်အရ ယွီရွှေတပ်စခန်းရဲ့ အဓိကတပ်မကြီးက မနက်ဖြန်မှာ တောင်ပေါ်ကို တက်လာလိမ့်မယ်..."

"ငါတို့ ဓားပြဂိုဏ်းကြီးကိုးခုက မြေအနေအထားကို အခွင့်ကောင်းယူပြီး ယွီရွှေတပ်စခန်းရဲ့ တိုက်ခိုက်မှုကို လွယ်လွယ်ကူကူပဲ ပြန်လည် ခုခံနိုင်မှာပါ..."

“ငါ အခု စိုးရိမ်နေတာက ချီလင်အကယ်ဒမီရဲ့ နည်းပြငါးယောက်လုံးက ရွှေခန္ဓာနယ်ပယ်ကို ရောက်နေကြတာပဲ..."

"ငါတို့ ဓားပြဂိုဏ်းကိုးခုရဲ့ ခေါင်းဆောင် စုစုပေါင်း ၁၉ ယောက်ကလည်း ရွှေခန္ဓာနယ်ပယ်ကို ရောက်နေကြတာမို့ သူတို့ထက် ပိုများပါတယ်..."

"ဒါပေမဲ့ ချီလင်အကယ်ဒမီက သင်ကြားပေးတဲ့ ကျင့်စဉ်တွေက ငါတို့လို တစ်ကိုယ်တော် ကျင့်ကြံသူတွေထက် အများကြီး သာလွန်နေတာ..."

"ချီလင်အကယ်ဒမီက နည်းပြတွေက တိုက်ရိုက်မတိုက်ခိုက်ဘဲ လျှို့ဝှက်တိုက်ခိုက်တဲ့ နည်းလမ်းတွေကိုပဲ ဆက်သုံးနေမယ်ဆိုရင်... ငါတို့ ၁၉ ယောက်လုံးရဲ့ ခုခံမှုက ဘယ်လောက်အထိ ခံနိုင်မလဲ... နောက်ဆုံးတော့ နည်းပြတွေရဲ့ လုပ်ကြံသတ်ဖြတ်တာကို တစ်ယောက်ပြီးတစ်ယောက် ခံရလိမ့်မယ်..."

"ဒါကြောင့် အခု လူကြီးမင်းတို့ကို မေးချင်ပါတယ်... ချီလင်အကယ်ဒမီက နည်းပြတွေ လျှို့ဝှက်တိုက်ခိုက်ပြီး လုပ်ကြံသတ်ဖြတ်တာကို ဘယ်လို ကာကွယ်ရမလဲဆိုတဲ့ ကောင်းတဲ့အကြံဉာဏ် ရှိကြသလား..."

တန်ထိုက်ရှုံ့ရင်က တည်ငြိမ်စွာဖြင့် မိန့်ခွန်းပြောကြားလိုက်သည်။ ဝံပုလွေတောင်ထွတ်၏ ဒုတိယခေါင်းဆောင် ဖန်ဖန်၊ သွေးဓားဂူမှ ဟွမ်ပိုင်ချိုနှင့် တုလျန်၊ သွေးကင်းမြီးကောက်တောင်တန်းမှ လင်းကျိကုန်း၊ မုကျူးနှင့် ရှန်ကွမ်းယန်တို့မှာ ချီလင်အကယ်ဒမီမှ နည်းပြများနှင့် တိုက်ခိုက်ဖူးကြသူများဖြစ်၍ သူတို့၏ ကြောက်မက်ဖွယ်ကောင်းပုံကို နက်နက်နဲနဲ ခံစားမိကြသည်။ အဆင့်တူသော်လည်း ထိုနည်းပြများက သူတို့ကို အလွယ်တကူ အနိုင်ယူနိုင်ကြသည်။ တန်ထိုက်ရှုံ့ရင်၏ စကားကို ကြားသောအခါ ခေါင်းဆောင်ခြောက်ဦးမှာ မျက်မှောင်ကြုတ်လျက် မည်သို့မျှ အဖြေရှာမရ ဖြစ်နေကြ၏။

ထိုစဉ် လင်းယုန်ပျံဂိုဏ်းမှ ခေါင်းဆောင်များဖြစ်ကြသော ကျန်းစုန်နှင့် ရှီထျဲ့ရှင်းတို့က ထရပ်လိုက်သည်။

"ငါတို့ လင်းယုန်ပျံဂိုဏ်းက ရွှေရောင်မျက်လုံးရှိတဲ့ လင်းယုန်အသိုက်တစ်ခုကို ဖမ်းမိထားတယ်... စုစုပေါင်း ရှစ်ကောင်ပေါ့... ငယ်ငယ်ကတည်းက ယဉ်ပါးအောင် မွေးထားတာမို့ အခုတော့ ညီအစ်ကိုနှစ်ယောက်ရဲ့ ထိန်းချုပ်မှုအောက်မှာပဲ ရှိတယ်..."

"ညဘက်ဆိုရင် ငါတို့ရဲ့ ရွှေရောင်မျက်လုံး လင်းယုန်တွေက အစောင့်အဖြစ် တာဝန်ယူပေးလိမ့်မယ်... အပြင်လူတွေ လျှို့ဝှက်ဝင်လာတာကို တွေ့တာနဲ့ သူတို့က ချက်ချင်း ပျံသန်းပြီး သတင်းပေးလိမ့်မယ်..."

"အဲ့ဒီအခါကျမှ ငါတို့က အားလုံးကို နှိုးလိုက်မယ်... ရွှေခန္ဓာနယ်ပယ် ရောက်နေတဲ့ ငါတို့ ၁၉ ယောက်လုံး ပေါင်းပြီး တိုက်ခိုက်လိုက်ရင် ဘယ်သူပဲ ဝင်လာဝင်လာ အသားစိုင်ဖြစ်သွားအောင် အမှုန့်ချေပစ်လိုက်မှာ..."

ကျန်းစုန်က ဝင့်ဝါစွာ ပြောလိုက်သည်။ ဤစကားကို ကြားသောအခါ ခေါင်းဆောင်များအားလုံးက ထိုအကြံဉာဏ်မှာ ဖြစ်နိုင်ခြေရှိသည်ဟု သဘောတူလိုက်ကြသည်။ ချီလင်အကယ်ဒမီမှ နည်းပြများ ညဉ့်အခက် ဟေးလုံစခန်းထဲသို့ လျှို့ဝှက်ဝင်လာမည်ကို စိုးရိမ်စရာ မလိုတော့ပေ။

ခေါင်းဆောင်များ ဆွေးနွေးနေစဉ်မှာပင် လင်းယုန်တစ်ကောင်က အစည်းအဝေးခန်းမကြီး၏ အမိုးပေါ်သို့ ရုတ်တရက် ပျံသန်းလာပြီး သုံးကြိမ်တိုင်တိုင် အော်ဟစ်လိုက်၏။

"မကောင်းတော့ဘူး..."

"ရွှေရောင်မျက်လုံးလင်းယုန်က ရှရွှယ်ချန်တောင်ထဲကို တစ်ယောက်ယောက် ဝင်လာတာကို တွေ့သွားပြီ..."

လင်းယုန်ပျံဂိုဏ်း၏ ခေါင်းဆောင် ကျန်းစုန်က အော်ဟစ်လိုက်သည်။ ချက်ချင်းပင် ခေါင်းဆောင်များအားလုံး ကျန်းစုန်ထံသို့ ကြည့်လိုက်ကြ၏။

"လူကြီးမင်းတို့... တစ်ယောက်ယောက်က ညဉ့်အချိန်ကို အခွင့်ကောင်းယူပြီး လျှို့ဝှက်ဝင်လာဖို့ ကြိုးစားနေတာမို့ သူတို့ကို သင်ခန်းစာတစ်ခုလောက် ပေးလိုက်ကြရအောင်..."

"ဟွန်း... သူတို့က ငါတို့ ဓားပြတွေကို စိတ်ကြိုက် အနိုင်ကျင့်လို့ ရမယ်လို့ ထင်နေတာလား..."

ကျန်းစုန်က မထီတရီ ရယ်မောလိုက်သည်။

"ကောင်းပြီလေ..."

"ကျန်းခေါင်းဆောင်ပဲ ရှေ့ကနေ ဦးဆောင်ပေးပါ..."

ခေါင်းဆောင်များအားလုံးက လက်ယပ်ခေါ်လိုက်ကြသည်။ ကျန်းစုန်က ခေါင်းညိတ်ပြီး အစည်းအဝေးခန်းမကြီးမှ ခုန်ချကာ ရှေ့ကနေ ဦးဆောင်သွားလိုက်သည်။ ထို့နောက် ရွှေရောင်မျက်လုံး လင်းယုန်က ပျံသန်းရင်း တောင်အောက်သို့ ဦးတည်သွား၏။ ရွှေခန္ဓာနယ်ပယ်မှ ခေါင်းဆောင် ၁၉ ယောက်တို့သည် မိမိတို့၏ လက်နက်ကိုယ်စီကို ကိုင်စွဲလျက် ကျောက်တံတိုင်းတွင် စုဝေးပြီး တိတ်ဆိတ်စွာ စောင့်ဆိုင်းနေလိုက်ကြသည်။

ဝင်ရောက်လာသူမှာ ကျောက်တံတိုင်းဆီ ရောက်လာသည်နှင့် လေထဲမှ စောင့်ကြည့်နေသော လင်းယုန်က ရုတ်တရက် အော်ဟစ်အချက်ပေးလိုက်မည်ဖြစ်ပြီး ထိုအခါမှ ဝင်ရောက်လာသူ၏ တည်နေရာကို ၁၉ ယောက်လုံး သိရှိသွားမည်ဖြစ်သည်။ ထိုအချိန်တွင် ၁၉ ယောက်လုံး ဝိုင်းဝန်းတိုက်ခိုက်ကြမည်ဖြစ်သည်။

တစ်ချိန်တည်းမှာပင် အနက်ရောင်ဝတ်စုံ ဝတ်ဆင်ထားသော ယွမ်ကော်ကော်မှာ ညဉ့်အမှောင်ထဲတွင် တစ်သားတည်း ပျောက်ကွယ်သွားပြီး ရှရွှယ်ချန်တောင်ထိပ်သို့ ယုံကြည်မှုအပြည့်ဖြင့် လျင်မြန်စွာ တက်လာနေ၏။ သူ့အပေါ်တွင် လင်းယုန်တစ်ကောင်က အသံမထွက်ဘဲ ပျံဝဲနေသည်။ ရွှေအနှစ်သာရဆေးလုံးကို သောက်သုံးပြီး ရွှေခန္ဓာနယ်ပယ်၏ အထွတ်အထိပ်သို့ ရောက်ရှိနေပြီဖြစ်သော ယွမ်ကော်ကော်မှာ မိမိ၏ စွမ်းအားအပေါ် အလွန်ပင် ယုံကြည်မှုရှိနေသည်။

ထို့ကြောင့် ယွမ်ကော်ကော်က ညဉ့်အမှောင်ကို အခွင့်ကောင်းယူကာ ဟေးလုံစခန်းထဲသို့ လျှို့ဝှက်ဝင်ရောက်ရန်၊ စခန်း၏ ရတနာဂိုဒေါင်ကို အမြန်ဆုံး ရှာဖွေရန်၊ ဂိုဒေါင်တံခါးကို ဖျက်ဆီးပြီး အရေးကြီးဆုံး ရတနာကို ခိုးယူရန် ဆုံးဖြတ်ထားပြီး ဖြစ်သည်။ သူသည် ဆန်နှင့် ငွေကြေးကဲ့သို့သော သာမန်ရိက္ခာများကို စိတ်မဝင်စားပေ။ ကျင့်ကြံသူများအတွက် တကယ့်ငွေကြေးစစ်စစ်ဖြစ်သည့် ဝိညာဉ်ဆေးပင်များနှင့် ဆေးလုံးများကိုသာ ခိုးယူလိုသည်။

မကြာမီပင် ယွမ်ကော်ကော်သည် ကျောက်တံတိုင်းအောက် ပေနှစ်ဆယ်ခန့်အကွာသို့ ရောက်ရှိလာသည်။ အပေါ်သို့ မော့ကြည့်လိုက်ရာ ကျောက်တံတိုင်းမှာ အလွန်မြင့်မားပြီး လရောင်အနည်းငယ်သာ ရှိသဖြင့် စောင့်ကြပ်နေသည့် ဓားပြတစ်ယောက်မျှ မတွေ့ရပေ။

"အရမ်းတိတ်ဆိတ်နေပါလား..."

"တစ်ခုခုတော့ လွဲနေပြီ..."

ကျောက်တံတိုင်းပေါ်တွင် အန္တရာယ်ရှိနေသည်ဟူသော ထူးဆန်းသည့် အာရုံတစ်မျိုး ယွမ်ကော်ကော်ထံ ရောက်လာသည်။

ကျီ..

ရုတ်တရက် အပေါ်မှ လင်းယုန်က အော်ဟစ်လိုက်၏။ ကျောက်တံတိုင်းပေါ်တွင် ပုန်းအောင်းနေကြသော ရွှေခန္ဓာနယ်ပယ် ခေါင်းဆောင် ၁၉ ယောက်အနက် ကျန်းစုန်မှာ ပထမဆုံး ထရပ်လိုက်ပြီး သူ၏ အရိပ်မှာ ကျောက်တံတိုင်းပေါ်တွင် ထင်ဟပ်လာသည်။

"မိတ်ဆွေ... ဒီနေရာကို ရောက်လာပြီဆိုတော့ ကိုယ့်ကိုယ်ကိုယ် ပြသလိုက်ပါဦး..."

ကျန်းစုန်က အေးစက်စွာ အော်ပြောလိုက်သည်။ ထို့နောက် သူသည် ကျောက်တံတိုင်းပေါ်မှ ခုန်ချလိုက်ပြီး အပေါ်မှ လင်းယုန်၏ လမ်းပြမှုအတိုင်း ယွမ်ကော်ကော် ပုန်းအောင်းနေသည့် နေရာသို့ တန်းတန်းမတ်မတ် သွားလိုက်၏။ အခြားသော ခေါင်းဆောင်များကလည်း ကျန်းစုန်နောက်မှ လိုက်ပါလာကြပြီး ဝင်ရောက်လာသူကို အင်အားသုံး၍ ဝိုင်းဝန်းတိုက်ခိုက်ကြတော့သည်။

"ဒီဓားပြတွေက တော်တော်လေး လိမ္မာပါးနပ်တာပဲ..."

ရွှေခန္ဓာနယ်ပယ်မှ ကျွမ်းကျင်သူ ၁၉ ယောက် သူ့ဆီသို့ ပြေးလာသည်ကို မြင်သောအခါ ယွမ်ကော်ကော်မှာ ယုံကြည်မှုရှိသော်လည်း ဤသို့သော ဝိုင်းဝန်းတိုက်ခိုက်မှုကို မခံနိုင်ဟု တွေးမိလိုက်သည်။ ယွမ်ကော်ကော်လည်း ချက်ချင်းပင် တုံ့ဆိုင်းမနေဘဲ တောင်အောက်သို့ ပြန်လှည့်ပြေးလိုက်၏။ ခေါင်းဆောင် ၁၉ ယောက်တို့သည် ခဏတာ လိုက်လံဖမ်းဆီးသော်လည်း မဖမ်းမိသဖြင့် စိတ်ပျက်လက်ပျက်ဖြင့် ကျောက်တံတိုင်းဆီ ပြန်လှည့်လာကြသည်။

ရွှေခန္ဓာနယ်ပယ်မှ ထိုကျင့်ကြံသူများ မမျှော်လင့်ထားသည်မှာ ကျောက်တံတိုင်းအောက်ရှိ မြေကြီးတစ်နေရာ ရုတ်တရက် ပျောက်ကွယ်သွားပြီးနောက် ထိုအပေါက်ထဲမှ လူတစ်ယောက်၏ ခေါင်း ထွက်လာခြင်းပင် ဖြစ်သည်။

"ဒီဓားပြတွေက လေထဲမှာ လင်းယုန်တွေကို အစောင့်ချထားပြီး ဘက်ပေါင်းစုံက ဝင်လာမယ့်သူတွေကို စောင့်ကြည့်နေတာပဲ..."

ကျောက်လင်က တိုးတိုးလေး ရေရွတ်လိုက်သည်။ ညစာစားပြီးနောက်တွင် ကျောက်လင်က အကြောင်းပြချက် တစ်ခုခုပေးကာ ရှရွှယ်ချန်တောင်သို့ တစ်ယောက်တည်း လျှို့ဝှက်တက်လာခြင်းဖြစ်သည်။ ကျောက်လင်သည် စနစ်နေရာလွတ်၏ မြေကြီးစုဆောင်းနိုင်သော စွမ်းအားကို အသုံးပြု၍ ကျောက်တံတိုင်းအထိ ရောက်ရှိအောင် လျှို့ဝှက်သော တောင်လမ်းမြှောင်ကို တူးဖော်ထားခဲ့ခြင်းဖြစ်သည်။

ယခုပင် ကျောက်လင်သည် မြေအောက်မှနေ၍ ရွှေခန္ဓာနယ်ပယ် ခေါင်းဆောင် ၁၉ ယောက်တို့ ယွမ်ကော်ကော်ကို လိုက်လံတိုက်ခိုက်နေသည့် မြင်ကွင်းတစ်ခုလုံးကို သူ၏ စိတ်စွမ်းအားဖြင့် ထိုးထွင်းသိမြင်လိုက်ရ၏။