အခန်း ၁၂၀

အပိုင်း (၁၂၀.၁)

မိဖုရားခေါင်အဖြစ်မှ ရာထူးချထားပေးရန် တောင်းဆိုထားသော ဝိန်းယွီ၏ စာချွန်လွှာက နောက်တစ်နေ့ နန်းတွင်းညီလာခံတွင် သိသာထင်ရှားသည့် ရုတ်ရုတ်သဲသဲကိစ္စများကို အမှန်ပင် ဖြစ်ပေါ်စေခဲ့၏။

ယခင်က ကန့်ကွက်မှုများလုပ်ရန်အတွက် တိုင်များကိုပင် ဝင်ဆောင့်လုမတတ် ဖြစ်တတ်ကြသော ဝါရင့်အမတ်ကြီးများက ချန်ဝမ်ကို လုံးဝ အရှက်ရသွားသည်အထိ ကျိန်ဆဲလုနီးပါးပင် ဖြစ်သွားကြသည်။ သို့သော် ချန်ဝမ်၏ အပြုအမူက မည်မျှပင် အဓိပ္ပါယ်မဲ့နေပါစေ သူ့လက်အောက်ငယ်သားများဖြစ်သည့်အတွက် သူတို့က နောက်ဆုံးတွင် သူ့အတွက် ဖုံးကွယ်ပေးရန် ကူညီရလိမ့်မည်။ ထို့ကြောင့် ဤကပ်ဘေးအတွက် အကြီးလေးဆုံးသော ပြစ်ဒဏ်က ရှင်းယွီနန်းဆောင်မှ ကိုယ်လုပ်တော်လီအပေါ်သို့ ကျရောက်သွားခဲ့၏။

နန်းတွင်းအရာရှိများက သူမသည် အလှအပများဖြင့် အရှင်သခင်ကို ဖြားယောင်းသွေးဆောင်ခဲ့သည်ဟု စွပ်စွဲကာ ကိုယ်လုပ်တော်လီကို အကျယ်ချုပ် ၆လ ချမှတ်လိုက်လေသည်။

ထိုသတင်းက အတွင်းရေးဌာနမှ ပေးပို့လိုက်သော ရှားပါးရတနာ သေတ္တာကြီးများစွာနှင့်အတူ ကျောက်ဟွာနန်းဆောင်ဆီသို့ ရောက်လာချိန်တွင် ဌာန၏ စီမံခန့်ခွဲရေး မိန်းမစိုးအတော်များများကို မျက်နှာသစ်များဖြင့် အစားထိုးလိုက်ခြင်းက အံ့ဩစရာ မဟုတ်ခဲ့ပေ။

ဝိန်းယွီနှင့် တွေ့ဆုံချိန်တွင် ယခင်စီမံခန့်ခွဲရေး မိန်းမစိုးများက ဆောင်းဦးလယ် နန်းတွင်းညစာစားပွဲအတွက် ပြင်ဆင်မှုများကို ကူညီရာတွင် အရည်အချင်းမပြည့်မီဘဲ ပေါ့ဆခဲ့ကြသည့်အတွက် မယ်တော်ကြီးကို ဒေါသထွက်စေခဲ့သည်ဟု ပြောဆိုခဲ့ကြသည်။ မယ်တော်ကြီးက ဝိန်းယွီ မတရားခံခဲ့ရကြောင်းကို သိရှိသွားသည့်အတွက် အတွင်းရေးဌာနမှ ဝန်ထမ်းအားလုံးကို အစားထိုးလိုက်ခြင်း ဖြစ်၏။ ယနေ့ သူတို့သည် လက်ဆောင်များ လာပို့ခြင်းကလည်း ဝိန်းယွီကို ချန်ဝမ်က တောင်းပန်သည့် သဘောဖြစ်သည်။

အတွင်းရေးဌာနမှ ဝန်ထမ်းများ ထွက်သွားသည်နှင့်တပြိုင်နက် ထုန်ချွဲမှာ သည်းမခံနိုင်တော့ဘဲ တအံ့တဩ ပြောဆိုတော့သည်။ "အဲ့ဒီ မယ်တော်ကြီးကျန်းက တကယ်ကို ဘုရားစကားပြောပြီး မြွေဟောက်စိတ်ရှိတာပဲ။ သူက နားဝင်ချိုတဲ့ စကားတွေ အကုန်ပြောသွားတာပဲ။ မင်းသမီးက သမားတော်ဖန်းကို ကာကွယ်ပေးလိုက်ပြီးတဲ့နောက် အဲ့ဒီ စီမံခန့်ခွဲရေးမိန်းမစိုးတွေ မင်းသမီးဘက်ကို လုံးဝ ပါသွားမှာ စိုးရိမ်လို့ အတွင်းရေးဌာနက ဝန်ထမ်းတွေကို အစားထိုးတာက သူကိုယ်တိုင် ကြိုတင်ကာကွယ်တဲ့ လုပ်ရပ် မဟုတ်ဘူးလား။ မင်းသမီးကို သူ့ရဲ့ အကြောင်းပြချက်အဖြစ် သုံးဖို့ သူ့မှာ ဘာလုပ်ပိုင်ခွင့် ရှိလို့လဲ"

ဝိန်းယွီက ဇာပြတင်းပေါက်နားက စားပွဲငယ်လေးဘေးတွင် ထိုင်နေပြီး သူမရှေ့တွင် စစ်တုရင်ခုံတစ်ခု ရှိနေသည်။ လျန်နယ်မြေတွင် ပျောက်ဆုံးသွားခဲ့သော ယခင်မင်းဆက်မှ စစ်တုရင်လမ်းညွှန်စာလိပ်တစ်ခုကို ကိုင်ဆောင်ထားကာ သူမ၏ ကျယ်ဝန်းသော အင်္ကျီလက်များက ကျက်သရေရှိစွာ တွဲကျလို့နေသည်။ သူမသည် စစ်တုရင်ကျမ်းကို လေ့လာရင်း စစ်တုရင်ခုံပေါ်တွင် နယ်ရုပ်များကို လိုက်ချနေလေသည်။ "အရေးမကြီးပါဘူး။ ကျောင်းပိုင်က အဲ့ဒီ စီမံခန့်ခွဲရေးမိန်းမစိုးတွေ 'မတော်တဆ' သေဆုံးမသွားစေဖို့ အနီးကပ် စောင့်ကြည့်နေပါတယ်"

ကျောင်းပိုင်က ခေါင်းညိတ်ပြလိုက်၏။ "ချင်းယွင်ကိုယ်ရံတော်တွေက သူတို့ကို တိတ်တိတ်လေး စောင့်ကြည့်နေပါတယ်။ လောလောဆယ် သူတို့ကို ရာထူးကနေ ထုတ်ပယ်ပြီး စွန့်ပစ်နန်းဆောင်ဆီ ပြောင်းရွှေ့လိုက်တယ်၊ သူတို့အသက်အန္တရာယ်အတွက် ချက်ချင်းတော့ ခြိမ်းခြောက်လာနိုင်တာ မရှိသေးပါဘူး"

စွန့်ပစ်နန်းဆောင်က စွန့်ပစ်ခံထားရသည်မှာ ကြာမြင့်နေပြီဖြစ်ကာ ယခုအခါ တော်ဝင်အဝတ်လျှော်ရုံအဖြစ် အသုံးပြုထားသည်။ ထိုနေရာတွင် တာဝန်ချထားခံရသော နန်းတွင်းဝန်ထမ်းများက အမြင့်သို့ ပြန်တက်ရန် အခွင့်အရေး အလွန်နည်းပါးလှ၏။

ဤအကြောင်းကို သတင်းပို့ပြီးနောက် ကျောင်းပိုင်က မေးလိုက်လေသည်။ "သူတို့နဲ့ လျှို့ဝှက်ဆက်သွယ်ဖို့ လူတစ်ယောက်လောက် လွှတ်လိုက်ရမလား"

ဝိန်းယွီက စစ်တုရင်ခုံပေါ်သို့ နောက်ထပ် နယ်ရုပ်တစ်ခုကို ချထားလိုက်သည်။ "ဟန်ပြလောက်ပဲ လုပ်လိုက်ပါ"

ကျောင်းပိုင်က အံ့ဩသွားပုံရသော်လည်း ဝိန်းယွီကို တစ်ချက်ကြည့်ပြီးနောက် ဘာမှဆက်မပြောတော့ချေ။

သို့သော် ထုန်ချွဲက သူမ၏ ရှုပ်ထွေးမှုများကို မထိန်းချုပ်နိုင်ခဲ့ချေ။ "ဘာဖြစ်လို့လဲ” သူမက ချက်ချင်း မေးလိုက်သည်။ “မင်းသမီး၊ ဒါက သူတို့ကို စည်းရုံးဖို့ အကောင်းဆုံး အခွင့်အရေး မဟုတ်ဘူးလား"

ဝိန်းယွီက တည်ငြိမ်စွာ ပြန်ပြောလိုက်၏။ "ရာထူးမြင့်တဲ့နေရာက အခွင့်အရေးသမားတွေက ယာယီ ယိမ်းယိုင်သွားနိုင်ပေမယ့် စွန့်ပစ်နန်းဆောင်ဆီ နှင်ထုတ်ခံလိုက်ရတဲ့ အပြစ်သား မိန်းမစိုးတွေက ဘာအသုံးကျမှာလဲ"

ထုန်ချွဲက အံ့ဩသွားသော်လည်း ဆက်ပြောလိုက်၏။ "သူတို့က အရင်တုန်းက မယ်တော်ကြီးလက်အောက်မှာ အမှုထမ်းခဲ့ပြီး သူနဲ့ ကျန်းမိသားစုအကြောင်း လျှို့ဝှက်ချက် အများကြီးကို သိထားကြတာပဲ..."

ဝိန်းယွီက ပြန်လည်ချေပလိုက်၏။ "ရာထူးကနေ မထုတ်ပယ်ခင် စွန့်ပစ်နန်းဆောင်ကို ပြောင်းရွှေ့တာက မုန်တိုင်းကို ကျော်ဖြတ်ဖို့ ခဏလောက်ပဲ နေရမှာလို့ မယ်တော်ကြီးက သူတို့ကို ကတိပေးထားခဲ့ရင်ကော"

ထုန်ချွဲက ဘာမှပြန်မပြောနိုင်ဘဲ နှုတ်ဆိတ်သွားခဲ့၏။

ဝိန်းယွီက သူမ၏ လက်ချောင်းများကြားရှိ ချောမွေ့သော ကျောက်စိမ်းကဲ့သို့ အဖြူရောင် နယ်ရုပ်လေးကို ပွတ်သပ်လိုက်ပြီး "အတွင်းရေးဌာနမှာ ရာထူးတက်လာတဲ့သူတွေက အကျိုးအမြတ်ရှာဖို့နဲ့ အန္တရာယ်ကို ရှောင်ရှားဖို့ကို အကောင်းဆုံး နားလည်ထားကြတယ်။ သမားတော်ဖန်းနဲ့ ပတ်သက်ပြီး မယ်တော်ကြီးရဲ့ လှုပ်ရှားမှုက အပြည့်အဝ မအောင်မြင်ခဲ့ပေမယ့် သူ့ရည်ရွယ်ချက်ကိုတော့ ပြည့်မြောက်စေခဲ့တယ်။ အဲ့ဒီ မိန်းမစိုးတွေက စာရင်းစာအုပ်တွေကို ပြောင်းရွှေ့ဖို့ အချိန်ဆွဲပေးခဲ့တဲ့ အချိန်ကစပြီး သူတို့က ငါ့ဆီကို ဘက်ပြောင်းဖို့ အရာအားလုံးကို ပုံအောလို့ မရတော့ဘူး။ မယ်တော်ကြီးရဲ့ ကတိကို ရရှိထားလို့ ငါက အခု သူတို့ကို စည်းရုံးမယ်ဆိုရင်တောင် သူတို့က ရွေးချယ်စရာ လမ်းကြောင်းတွေ ဆက်ပွင့်နေအောင် နှစ်ဖက်စလုံးကို စကားချိုချိုတွေပဲ ပြောနေကြလိမ့်မယ်"

သမားတော်ဖန်းကို ကယ်တင်နိုင်ခဲ့သည်ဖြစ်စေ၊ မကယ်တင်နိုင်ခဲ့သည်ဖြစ်စေ ထိုစီမံခန့်ခွဲရေးမိန်းမစိုးများက ထိတ်လန့်တကြားဖြင့် စာရင်းစာအုပ်များကို ပြောင်းရွှေ့ရန် ကူညီခဲ့သည့် အချက်က ဝိန်းယွီအပေါ် "သစ္စာမဲ့မှု"အဖြစ် သတ်မှတ်နိုင်ပေသည်။ ဝိန်းယွီအပေါ် "သစ္စာမဲ့မှု" လုပ်ရပ်များကို ကျူးလွန်ခဲ့ပြီးဖြစ်သည့် အချက်နှင့် နှိုင်းယှဉ်ပါက မယ်တော်ကြီးကျန်းကို ဆက်လက်အမှုထမ်းခြင်းက ပိုမိုတောက်ပသော အနာဂတ်အလားအလာများကို ပေးစွမ်းနိုင်ကြောင်း သူတို့နှလုံးသားထဲတွင် ကောင်းကောင်း သဘောပေါက်ထားကြ၏။

မည်သို့ပင်ဖြစ်စေ ကျောက်ဟွာနန်းဆောင်တွင် ထိတ်လန့်တကြားဖြင့် ဝိန်းယွီအပေါ် သူတို့ ပြုလုပ်ခဲ့သော သစ္စာရှိကြောင်း ကတိသစ္စာပြုမှုများကို မယ်တော်ကြီးက ဘယ်တော့မှ သိလာမည် မဟုတ်သော်လည်း မယ်တော်ကြီး၏ လူများ စာရင်းစာအုပ်များကို ပြောင်းရွှေ့ရာတွင် ကူညီပေးခဲ့ခြင်းက ငြင်းဆိုမရသော အမှန်တရားတစ်ခု ဖြစ်လေသည်။

မယ်တော်ကြီးကျန်းက သူတို့ကို ကာကွယ်ပေးရန် ဆန္ဒရှိနေသရွေ့ ဝိန်းယွီက သူတို့အပေါ် အသုံးချခဲ့သော စာရင်းအတုများအတွက် အပြစ်ခံရန် ရှေ့သို့တွန်းပို့ခံရမည့် လူအများကြီး ရှိနေနိုင်ပြီး ၎င်းက ခြိမ်းခြောက်မှုတစ်ခု မဟုတ်တော့ပေ။

ဤအကြောင်းကို ကြားပြီးနောက် ထုန်ချွဲက ပိုပိုပြီး ဇဝေဇဝါ ဖြစ်လာခဲ့၏။ "မယ်တော်ကြီးက အဲ့ဒီမိန်းမစိုးတွေ ကျွန်မတို့ဘက်ကို ပြန်မပါလာတော့ဘူးဆိုတာ သေချာနေမှတော့ ဘာလို့ သူတို့ကို သတ်ပစ်ဖို့ လုပ်နေသေးတာလဲ"

ဝိန်းယွီ၏ အာရုံက စစ်တုရင်ခုံပေါ်ရှိ မပြီးဆုံးသေးသော ကစားပွဲပေါ်တွင်သာ အာရုံစိုက်ထားဆဲဖြစ်ပြီး သူမ၏ လက်ချောင်းများကြားတွင် ကိုင်ထားသော နယ်ရုပ်လေးကို မချရသေးချေ။ သူမက ပြောလိုက်၏။ "မယ်တော်ကြီးက သူတို့ရဲ့ စရိုက်ကို မသိဘူးလို့ မင်း ထင်နေတာလား"

ထုန်ချွဲက အေးခဲသွားပြီး ဒါက ဝိန်းယွီနှင့် မယ်တော်ကြီးကျန်းတို့ကြားက နောက်ထပ် ဗျူဟာကစားပွဲတစ်ခု ဖြစ်ကြောင်း ရုတ်တရက် သဘောပေါက်သွားခဲ့၏။ ထိုမိန်းမစိုးများအတွက်တော့ သူတို့က အကျိုးအမြတ်အရှိဆုံး အနေအထားကိုသာ ရှာဖွေနေကြခြင်း ဖြစ်သဖြင့် မယ်တော်ကြီးအပေါ် သစ္စာရှိကြောင်း ပြသခဲ့ကြသော်လည်း နောက်ကွယ်တွင်လည်း ဝိန်းယွီ၏ ကမ်းလှမ်းမှုများကိုလည်း သူတို့ ငြင်းပယ်ကြလိမ့်မည် မဟုတ်ချေ။

သို့သော် ဝိန်းယွီနှင့် မယ်တော်ကြီးကျန်းတို့အတွက်မူ ဝိန်းယွီက ထိုမိန်းမစိုးများကို အပြည့်အဝ စည်းရုံးရန် ပျက်ကွက်ခဲ့လျှင်ပင် ဘာမှ ဆုံးရှုံးစရာ မရှိသော်လည်း မယ်တော်ကြီးကျန်းကတော့ သူမကိုယ်တိုင်နှင့် ကျန်းမိသားစု၏ လျှို့ဝှက်ချက်များက တခြားသူများလက်ထဲသို့ ကျရောက်သွားမည့် အန္တရာယ်နှင့် ရင်ဆိုင်ရလိမ့်မည်။

ထို့ကြောင့် မယ်တော်ကြီးကျန်းက ထိုမိန်းမစိုးများကို သည်အတိုင်း အသက်ရှင်ခွင့်ပေးထားလို့ မဖြစ်နိုင်ပေ။

ဤအချက်ကို သဘောပေါက်သွားသောအခါ ထုန်ချွဲသည် သူမ၏ ကျောရိုးတစ်လျှောက် စိမ့်တက်သွားသည်ကို ခံစားလိုက်ရ၏။ ဝိန်းယွီသည် အစကတည်းက ထိုမိန်းမစိုးများကို စည်းရုံးရန် တကယ် ရည်ရွယ်ထားခဲ့ခြင်း မဟုတ်ချေ။

မယ်တော်ကြီး ကိုယ်တိုင်ကိုယ်ကျ သူတို့ကို ဖယ်ရှားပစ်ရန် သူမက အတင်းအကျပ် ဖိအားပေးနေခြင်းသာ ဖြစ်ပြီး မိန်းမစိုးများကို သူမ၏ သတ်ဖြတ်လိုသော ရည်ရွယ်ချက်ကို မျက်မြင်ကိုယ်တွေ့ ကြုံစေကာ သူတို့၏ ခွထိုင်နေသော ရပ်တည်ချက်ကို စွန့်လွှတ်အောင် လုပ်ခြင်းဖြစ်လေသည်။ အသက်ရှင်သန်ရန်အတွက် သူတို့တွင် မယ်တော်ကြီးနှင့် ကျန်းမိသားစုကို ဆန့်ကျင်ခြင်းမှလွဲ၍ အခြားရွေးချယ်စရာ ရှိတော့မည် မဟုတ်ချေ။

ထို့အပြင် မိန်းမစိုး တစ်ယောက်၊ နှစ်ယောက် သေဆုံးသွားသည်နှင့် တပြိုင်နက် ထိုအမှုကို နန်းတွင်းသို့ တင်ပြလာလျှင်ပင် ကျန်းမိသားစုက မည်မျှပင် အင်အားကြီးမားနေပါစေ မိန်းမစိုးများကသာ စာရင်းများကို လိမ်လည်ပြီး နန်းတွင်းရန်ပုံငွေများကို အလွဲသုံးစားလုပ်ခဲ့သည်ဟု ဆက်ပြီး အခိုင်အမာ ပြောဆိုနိုင်တော့မည် မဟုတ်ချေ။

သူတို့၏ မူလအစီအစဉ်က မယ်တော်ကြီးနှင့် ကျန်းမိသားစု၏ လျှို့ဝှက်စာရင်းစာအုပ်များကို ရရှိပြီးနောက် ပြင်းထန်သော ထိုးနှက်ချက်တစ်ခု ပေးရန် ဖြစ်သည်။ သို့သော် စာရင်းများကို ပြောင်းရွှေ့ရန် သမားတော်ဖန်းအပေါ် မယ်တော်ကြီး၏ လှုပ်ရှားမှုမှသည် ကျန်းဟွာနန်းဆောင်တွင် ဝိန်းယွီ၏ ရုတ်ရုတ်သဲသဲဖြစ်မှုအထိ ခဏတာ အချိန်အတွင်းမှာပင် ဝိန်းယွီက မယ်တော်ကြီးနှင့် ကျန်းမိသားစုကို နောက်တစ်ကြိမ် လမ်းပိတ်သွားအောင် ထောင်ချောက်ဆင်လိုက်ခြင်းပင်။

ထုန်ချွဲတစ်ယောက် ဤကဲ့သို့သော ခေါင်းနပန်းကြီးစရာ ခံစားချက်မျိုးကို ယခင်က တစ်ခါမှ မခံစားခဲ့ရဖူးချေ။ ထိုအခိုက်အတန့်တွင် ဤလောက၌ မည်သည့်အရာကမှ ဝိန်းယွီ၏ တွက်ချက်မှုများကို မကျော်လွန်နိုင်ကြောင်း သူမ တကယ်ကို ယုံကြည်သွားခဲ့သည်။

သူမ၏ စိတ်လှုပ်ရှားနေသော အခြေအနေက သိသာလွန်းနေသောကြောင့် ဖြစ်မည်။ ကျောင်းပိုင်က သူမ၏ တံတောင်ဆစ်ကို မသိမသာ လှမ်းတွတ်လိုက်ပြီးနောက် ဝိန်းယွီကို ပြောလိုက်သည်။ "မယ်တော်ကြီးက အဲ့ဒီမိန်းမစိုးတွေကို ဖြေရှင်းဖို့ မယ်မယ်ရဲ့ နာမည်ကို သုံးခဲ့တာက သူတို့ သေသွားပြီးတဲ့နောက်ပိုင်း သူတို့ကို ဖယ်ရှားတာရဲ့ နောက်ကွယ်မှာ မယ်မယ် ရှိနေတယ်လို့ လူတွေကို ထင်သွားစေချင်လို့ ဖြစ်လိမ့်မယ်"

ပြတင်းပေါက်မှတဆင့် လေတစ်ချက် တိုက်ခတ်သွားပြီး အဝါရောင် သစ်ရွက်တစ်ရွက်ကို သယ်ဆောင်လာကာ စစ်တုရင်ခုံပေါ်သို့ လွင့်ကာ ကျလာစေသည်။

ဝိန်းယွီသည် သူမ၏ လက်ထဲက အဖြူရောင် နယ်ရုပ်လေးကို အနက်ရောင်နှင့် အဖြူရောင် နယ်ရုပ်များ ပြင်းထန်စွာ အားပြိုင်နေသော ဆုံမှတ်တွင် ချထားလိုက်ပြီး အနက်ရောင် နယ်ရုပ်အစုအဝေးကြီး၏ လွတ်မြောက်ရာလမ်းကို ဖြတ်တောက်လိုက်ကာ ဖြည်းညှင်းစွာ ပြောလိုက်၏။

"နန်းတွင်း အခြေအနေကို စမ်းသပ်ပြီးသွားပြီ။ လောလောဆယ်တော့ ငါတို့က ပုစဉ်းရင်ကွဲအဖြစ် ဟန်ဆောင်ပြီး ဓားခုတ်ကောင် ထွက်ပေါ်လာတာကို စောင့်ကြတာပေါ့"

မိဖုရားခေါင်အဖြစ်မှ ရာထူးချထားပေးရန် တောင်းဆိုခဲ့သော သူမ၏ စာချွန်လွှာက ဒေါသဖွင့်ချခြင်း သက်သက်မဟုတ်သလို ချန်နိုင်ငံ၏ တော်ဝင်မိသားစုကို အရှုံးပေးရန် အတင်းအကျပ် ဖိအားပေးခြင်းသက်သက်လည်း မဟုတ်ခဲ့ဘဲ ၎င်းက စမ်းသပ်သည့် ကျောက်ခဲတစ်လုံးလည်း ဖြစ်ခဲ့၏။ ကျောင်းပိုင်က "ဟန်ပြလုပ်ရန်"နှင့် ပတ်သက်သော ဝိန်းယွီ၏ အစောပိုင်းစကားများကို ပြန်လည်အမှတ်ရသွားပြီး လက်နှစ်ဖက်ကို ယှက်ကာ ပြောလိုက်သည်။ "ကျွန်တော်မျိုးမ နားလည်ပါပြီ"

ထုန်ချွဲသည် သူတို့၏ လျှို့ဝှက်ဆန်းကြယ်သော အပြန်အလှန်ပြောဆိုမှုကို အပြည့်အဝ နားမလည်ခဲ့သော်လည်း မယ်တော်ကြီးနှင့် ကျန်းမိသားစုကို စိန်ခေါ်ရန် အတွင်းရေးဌာန၏ စာရင်းအတုများကို အသုံးပြုခြင်းနှင့် ပတ်သက်၍ ဝိန်းယွီက နန်းတွင်းတွင် သင့်တော်သော မဟာမိတ်များကို ရှာတွေ့ထားပြီးဖြစ်ကြောင်း သူမက ဝေဝါးစွာ ခံစားသိရှိလိုက်သည်။

စစ်တုရင်နယ်ရုပ်ကို ကိုင်ထားသော ဝိန်းယွီ၏ ဘေးတိုက်မျက်နှာသွင်ပြင်ကို ငေးကြည့်ရင်း စစ်တုရင်ခုံက ခုံတစ်ခုသက်သက် မဟုတ်တော့ဘဲ ချန်နိုင်ငံတစ်ခုလုံး၊ ထို့အပြင် တာ့လျန်၏ မြစ်များနှင့် တောင်တန်းများပင် ဖြစ်လာခဲ့ကြောင်း ထုန်ချွဲတစ်ယောက် ရုတ်တရက် ခံစားလိုက်ရလေသည်။

ဆောင်းဦးလယ် နန်းတွင်းညစာစားပွဲက မျက်တောင်တစ်ခတ်အတွင်းမှာပင် ရောက်ရှိလာခဲ့၏။

မိဖုရားခေါင်အဖြစ်မှ ရာထူးချထားပေးရန် ဝိန်းယွီ၏ ဆန္ဒအလျောက် တောင်းဆိုမှုက ချန်ဝမ်နှင့် ချန်နန်းတွင်းရှိ နန်းတွင်းအရာရှိများ အားလုံးအပေါ် ကြီးမားစွာ ဖိစီးနေခဲ့ပြီး သူတို့ကို ငြိမ်သက်သွားစေခဲ့သည်။ ထို့ပြင် မယ်တော်ကြီးက ထိုနေ့နံနက်အစောပိုင်းတွင် သတင်းစကား ပါးလိုက်သောကြောင့် ဝိန်းယွီက တက်ရောက်ရန် ဆက်ပြီး ငြင်းပယ်လို့ မရတော့ချေ။

ညစာစားပွဲကို ထိုက်ကျီနန်းဆောင်တွင် ကျင်းပခဲ့သည်။ နန်းတွင်းအရာရှိများကို ဧည့်ခံရမည်ဖြစ်သောကြောင့် စည်းကမ်းချက်များအရ ချန်ဝမ်၏ ကိုယ်လုပ်တော်များကို တက်ရောက်ခွင့် မပြုခဲ့ချေ။ နာမည်ခံ မိဖုရားခေါင်ဖြစ်သော ဝိန်းယွီ တစ်ဦးတည်းသာ ချန်ဝမ်နှင့်အတူ အရာရှိများ၏ အခမ်းအနား နှုတ်ခွန်းဆက်သမှုများကို အတူတကွ ခံယူနိုင်ခဲ့သည်။

ဝိန်းယွီ ရောက်ရှိလာချိန်တွင် ညစာစားပွဲက မစတင်သေးသော်လည်း အရာရှိများအားလုံးက နေရာယူထားကြပြီး ချန်ဝမ်က အထက်ရှိ ပလ္လင်ပေါ်တွင် နေရာယူထားလေပြီ။ သူမ၏ နေရာနှင့် မယ်တော်ကြီး၏ နေရာသာ လွတ်နေခဲ့သည်။

ပင်မခန်းမဆောင် အပြင်ဘက်ရှိ မိန်းမစိုးငယ်လေးက ဝိန်းယွီ ရောက်ရှိလာကြောင်း ကြေညာပြီးနောက်တွင် ခွက်ချင်းတိုက်သံများနှင့် စည်ကားနေသော ခန်းမဆောင်က ချက်ချင်း တိတ်ဆိတ်သွားခဲ့၏။ အရာရှိများအားလုံးက သူတို့၏ အကြည့်များကို — တချို့က စူးစမ်းလိုစိတ်ဖြင့်၊ တချို့က အကဲခတ်သည့် အကြည့်များဖြင့် — အဝင်ပေါက်ဆီသို့ လှည့်ကြည့်လိုက်ကြသည်။

ဝိန်းယွီက ရွှေလိမ္မော်ရောင် နန်းတွင်းဝတ်ရုံကို ဝတ်ဆင်ထားပြီး ရွှေနီရောင် ပိတ်ပါး အပေါ်ဝတ်ရုံကို လွှမ်းခြုံထားသည်။ သူမ၏ စကတ်နှင့် လွင့်မျောနေသော ဖဲကြိုးများက သူမ၏ နောက်တွင် ကျန်တစ်ဝက်ခန့်အထိ တွဲလောင်းကျနေခဲ့၏။ အနီရောင် ကြာပန်းတစ်ပွင့်က သူမ၏ နဖူးကို အလှဆင်ထားပြီး သူမ၏ မိတ်ကပ်က တောက်ပနေသော်လည်း ၎င်းက သူမ၏ မျက်နှာအမူအရာရှိ အေးစက်ပြီး ခပ်တန်းတန်းဖြစ်နေသည့် အသွင်အပြင်ကိုသာ ပိုမို ထင်ရှားစေခဲ့သည်။ သူမ၏ အနောက်တွင် ကျောင်းပိုင်နှင့် ထုန်ချွဲတို့ ဦးဆောင်သော နန်းတွင်းအစေခံမလေးများအဖြစ် ဝတ်ဆင်ထားသည့် ချင်းယွင်ကိုယ်ရံတော် ၁၂ယောက် လိုက်ပါလာခဲ့သည်။ ထိုအခိုက်အတန့်တွင် သူမက လူ့လောကသို့ ဆင်းသက်လာသော နတ်သမီးတစ်ပါးအလား တကယ်ကို ဆင်တူနေတော့သည်။ ခန်းမဆောင်ထဲရှိ အရာရှိများစွာက သူမကို ကြည့်ရင်း အသက်ရှူရန်ပင် မေ့လုနီးပါး ဖြစ်သွားခဲ့ကြသည်။

ဝိန်းယွီနှင့် သူမ၏နောက်တော်ပါများ ဖြတ်သွားပြီးနောက်မှသာ ခန်းမဆောင်၏ တစ်ဖက်တစ်ချက်စီမှ အံ့သြမှင်သက်စွာ သက်ပြင်းချသံများ ဆက်တိုက် ထွက်ပေါ်လာခဲ့လေသည်။ အဝင်ပေါက်အနီး ပင်မခန်းမဆောင်နှင့် အလှမ်းဝေးသော နေရာတွင် ထိုင်နေကြသော ရာထူးနိမ့် အရာရှိများမှာ မနေနိုင်တော့ဘဲ အချင်းချင်း တီးတိုးပြောဆိုနေကြတော့သည်။

"ဒီလို နတ်သမီးလို အလှတရားမျိုးနဲ့တောင် အရှင်မင်းကြီးက ဘယ်လိုလုပ်ပြီး ပြည့်တန်ဆာတစ်ယောက်ရဲ့ ပြုစားတာကို ခံရသေးတာလဲ..."

ချန်ဝမ်ကို ကာကွယ်ရန် တာဝန်ပေးအပ်ခံထားရသော တော်ဝင်နန်းတော်၏ ရင်းနှီးသော နန်းတွင်းအရာရှိတစ်ဦးအဖြစ် ကျန်းယွီသည် ချန်ဝမ်နှင့် အလွန်နီးကပ်စွာ ထိုင်နေခဲ့၏။ တော်ဝင်နန်းတွင်းမှ ဝါရင့်စစ်သူကြီး တစ်ဦးမှလွဲ၍ သူသည် ချန်နန်းတွင်းတစ်ခုလုံးတွင် အထွတ်အထိပ် စစ်ဘက်အရာရှိဆိုသည့် ဂုဏ်ပုဒ်ကို ပိုင်ဆိုင်ထားလေသည်။

ဝိန်းယွီ ဝင်လာချိန်တွင် သူက သူမကို တစ်ချက်သာ ကြည့်ပြီးနောက် အကြည့်လွှဲသွားခဲ့သည်။

ချန်ဝမ်က ကျန်းယွီကို မသိမသာ စောင့်ကြည့်နေခဲ့ပြီး ဤတုံ့ပြန်မှုကို မြင်သောအခါ အေးတိအေးစက် နှာခေါင်းရှုံ့လိုက်၏။

မကြာမီ ဝိန်းယွီက ပလ္လင်ဆီသို့ ချဉ်းကပ်လာခဲ့သည်။ ချန်ဝမ်သည် ကမ္ဘာမြေသို့ ဆင်းသက်လာသော နတ်သမီးတစ်ပါးနှင့် တူညီနေသည့် သူ့မိဖုရားကို ငေးကြည့်နေပြီး သူ၏ မျက်နှာအမူအရာက ယခင်ကထက် ပိုမည်းမှောင်သွားခဲ့သည်။ ဟန်လုပ်ထားသော အပြုံးတစ်ခုဖြင့် သူက ပြောလိုက်၏။ "ထိုင်ပါ၊ မိဖုရားခေါင်ကြီး"

ဝိန်းယွီ၏ နေရာက ချန်ဝမ်နှင့် အမြင့်တူသည့် စင်မြင့်ပေါ်တွင် ရှိနေသော်လည်း အရက်များ၊ သစ်သီးများ၊ မုန့်များနှင့် ပန်းအလှဆင်မှုများဖြင့် အပြည့်တင်ထားသော စားပွဲပုလေးတစ်ခုက သူတို့ကို ခြားထားပြီး ၎င်းက သူတို့ကြားတွင် ထိုင်ခုံ ၂ခုံစာ အကွာအဝေးကို ထိရောက်စွာ ဖန်တီးပေးထားသည်။

ဝိန်းယွီက ဂရုမစိုက်သော အမူအရာဖြင့် ထိုင်ချလိုက်ပြီး ချန်ဝမ်ကို ထိုနေရာတွင် မရှိနေသကဲ့သို့ တိုက်ရိုက် လျစ်လျူရှုထားလိုက်၏။ ကျောင်းပိုင်နှင့် ထုန်ချွဲတို့က သူမ၏ ဘယ်ဘက်နှင့် ညာဘက်၊ အနောက်တွင် အနည်းငယ် ဆုတ်ကာ နေရာယူလိုက်ကြပြီး ကျန်ရှိနေသော ချင်းယွင်ကိုယ်ရံတော်များက အနောက်တွင် ဆက်ရပ်ကာ တိတ်ဆိတ်စွာ စောင့်ဆိုင်းနေကြသည်။

စားပွဲပုလေးပေါ်ရှိ လက်ဖက်ရည်နှင့် သရေစာများက အေးစက်သွားသည်မှာ ကြာပြီဖြစ်သည်။ ဝိန်းယွီ ထိုင်လိုက်သည်နှင့် တပြိုင်နက် နန်းတွင်းအစေခံမလေးတစ်ယောက်က ၎င်းတို့ကို ဖယ်ရှားပြီး အသစ်များ ယူလာပေးရန် အနားသို့ချဉ်းကပ်လာခဲ့၏။ သို့သော် သူမ ထိုင်ခုံအနီးသို့ မရောက်ခင်မှာပင် ကျောင်းပိုင်က သူမကို တားဆီးလိုက်၏။ အစေခံမလေးက သူမ၏ ရည်ရွယ်ချက်ကို ရှင်းပြပြီးနောက်မှသာ ကျောင်းပိုင်နှင့် ထုန်ချွဲတို့က သူမသယ်ဆောင်လာသော ဗန်းပေါ်မှ လက်ဖက်ရည်နှင့် သရေစာများကို ဝိန်းယွီ ရှေ့တွင် ချထားပေးခဲ့ပြီး လုပ်ငန်းစဉ်တစ်လျှောက်လုံး ဝိန်းယွီနှင့် ခြေလှမ်း ၃လှမ်းအတွင်း ဘယ်သူမှ ဝင်မလာစေရန် သေချာစောင့်ကြပ်ထားလိုက်သည်။

အသစ်ချပေးသော လက်ဖက်ရည်၊ သရေစာများနှင့် ဟင်းလျာများကို ဝိန်းယွီနှင့် ချန်ဝမ်တို့၏ ရှေ့မှောက်တွင် အစားအသောက်တာဝန်ခံ မိန်းမစိုးက မြည်းစမ်းပြီးဖြစ်သော်လည်း ကျောင်းပိုင်နှင့် ထုန်ချွဲတို့က ဝိန်းယွီရှေ့တွင် မချထားခင် ဟင်းလျာတစ်ခုစီကို ငွေအပ်ဖြင့် ထပ်စမ်းသပ်နေကြဆဲပင်။

သူတို့၏ လုပ်ရပ်များကို စောင့်ကြည့်ရင်း ချန်ဝမ်က ဝိန်းယွီဘက်သို့ ခေါင်းလှည့်လာခဲ့သည်။ အပြစ်အနာအဆာ ကင်းလုနီးပါးဖြစ်သော သူမ၏ ဘေးတိုက်မျက်နှာသွင်ပြင်ကို ငေးကြည့်ရင်း သူ့မျက်လုံးများထဲတွင် မြင့်တက်လာသော လောဘနှင့် ဖုံးကွယ်ထားသော မည်းမှောင်သည့် မကျေနပ်ချက်များကို မထိန်းချုပ်နိုင်ခဲ့ချေ။ သူက သရော်ကာ ပြောလိုက်၏။ "မိဖုရားက ဒီတော်ဝင်နန်းတော်ကို တော်တော်လေး မယုံကြည်တဲ့ပုံပဲ"

ဝိန်းယွီက အောက်ဘက်ရှိ အရာရှိများကို တည်ငြိမ်စွာ ကြည့်လိုက်ပြီး သူမ၏ အသံက ရေခဲတမျှ အေးစက်နေ၏။ "ဒီတော်ဝင်အိမ်တော်က ဝိန်းဆိုတဲ့ မျိုးရိုးနာမည်ကို ခံယူမယ့်နေ့ ရောက်လာတဲ့အခါ ဒီမိဖုရားကလည်း သဘာဝကျကျ စိတ်အေးလက်အေး ဖြစ်သွားလိမ့်မယ်"

ဝိန်းယွီက သံတမန်ရေးရာ ဟန်ဆောင်မှု အနည်းငယ်ကိုပင် ထိန်းသိမ်းရန် ဂရုမစိုက်တော့ကြောင်း ကောင်းကောင်း သိထားသဖြင့် ချန်ဝမ်၏ မျက်လုံးများက ပိုမိုနက်ရှိုင်းသော မကျေနပ်ချက်များဖြင့် လောင်ကျွမ်းသွားခဲ့သည်။ သူမက သူတို့ တိုင်းပြည်နှစ်ခုကြားက လက်ထပ်မင်္ဂလာ မဟာမိတ်ဖွဲ့မှု၏ နောက်ကွယ်ရှိ ရည်မှန်းချက်များနှင့် ရည်ရွယ်ချက်များကို စားပွဲပေါ်တွင် ဗြောင်ကျကျ ဖွင့်ချလိုက်ခြင်းပင်။ ချန်ဝမ်သည် အရှက်ရပြီး ဒေါသထွက်သွားကာ အရက်ငဲ့ပေးနေသော နန်းတွင်းအစေခံမလေးတစ်ယောက်၏ လက်ကောက်ဝတ်ကို ဆုပ်ကိုင်လိုက်ပြီး သူမကို သူ့ရင်ခွင်ထဲသို့ ဆွဲသွင်းလိုက်၏။ သူမ၏ မေးစေ့ကို ဆုပ်ကိုင်ကာ သူက ဆိုးညစ်စွာဖြင့် လှောင်ပြောင်လိုက်သည်။ "မင်းနာမည် ဘယ်လိုခေါ်လဲ၊ အလှလေး"

ညစာစားပွဲသို့ ဝိန်းယွီ ရောက်ရှိလာကတည်းက နန်းတွင်းအရာရှိများစွာက သူတို့၏စားပွဲကို အနီးကပ် စောင့်ကြည့်နေခဲ့ကြသည်။ ချန်ဝမ်၏ ရုတ်တရက် မသင့်တော်သော အပြုအမူကို အားလုံးက သဘာဝကျစွာပင် မျက်မြင်ကိုယ်တွေ့ ကြုံလိုက်ရလေသည်။

အမတ်များက အတွင်းစိတ်ထဲတွင် မနေနိုင်ဘဲ သက်ပြင်းချလိုက်ကြပြီး ဝိန်းယွီ၏ မျက်နှာအမူအရာကို ခိုးကြည့်လိုက်ကြသည်။ သို့သော် သူမက ပြီးပြည့်စုံစွာ တည်ငြိမ်နေဆဲဖြစ်ပြီး ချန်ဝမ်က သူမ၏ အမြင်အာရုံထဲတွင် သည်အတိုင်းကို မရှိနေသည့်နှယ်။

ညစာစားပွဲအတွင်း ဝါရင့်အမတ်အတော်များများက ရည်ရွယ်ချက်ရှိရှိဖြင့် အကြိမ်ကြိမ် ချောင်းဆိုးပြခဲ့ကြသော်လည်း ချန်ဝမ်က နန်းတွင်းအစေခံမလေးနှင့် ဆက်လက် ပရောပရည်လုပ်နေခဲ့ပြီး လုံးဝ တုန်လှုပ်မှု မရှိခဲ့ချေ။

အစပိုင်းတွင် သူ့ရင်ခွင်ထဲတွင် ပိတ်မိနေသော အစေခံမလေးက အနားက ဝိန်းယွီကို ဒေါသထွက်စေမည်ကို ကြောက်ရွံ့ကာ တုန်ယင်စွာ ပြန်ဖြေခဲ့သည်။ သူမ၏ မျက်လုံးများက ဘေးဘက်သို့ ဆက်တိုက် ရွေ့လျားနေခဲ့သော်လည်း ဝိန်းယွီက ကန့်ကွက်သည့်စကား တစ်ခွန်းမှ မပြောခဲ့သည်ကို — ချန်ဝမ်အပေါ် တကယ်ပဲ ဂရုမစိုက်တာလား သို့မဟုတ် အပေါ်ယံ ဟန်ဆောင်မှုကိုသာ ထိန်းသိမ်းထားတာလား ဆိုသည်ကို— သဘောပေါက်သွားသောအခါ အစေခံမလေးက ဘုရင်၏ ဆွဲဆောင်မှုများကို တုံ့ပြန်ရာတွင် တဖြည်းဖြည်း ပိုမို ရဲတင်းလာခဲ့၏။ သို့တိုင်အောင် သူမ၏ အကြည့်များက ဝိန်းယွီဆီသို့ မကြာခဏ လွင့်မျောသွားခဲ့ပြီး ကြောက်ရွံ့မှုနှင့် သူမ၏ အခြေအနေကို ကြွားဝါချင်နေသည့်နှယ် ရှင်းပြလို့မရသော မြင့်တက်လာသည့် မာနတို့ ရောယှက်လို့နေလေသည်။

သူမအတွက် ကံဆိုးချင်တော့ ဝိန်းယွီနှင့် သူမ၏ အစေခံများက သူမနှင့် ချန်ဝမ် နှစ်ယောက်စလုံးကို အဖတ်မတန်လိုသာ သဘောထားကြလေသည်။

...

အပိုင်း (၁၂၀.၂)

မြင်းကွင်းက အဓိပ္ပါယ်မဲ့နေပုံပေါ်သော်လည်း တက်ရောက်လာသော အမတ်များထဲမှ ဘယ်သူကမှ ဝိန်းယွီ မျက်နှာပျက်သွားသည်ဟု မခံစားခဲ့ရပေ။ ယင်းအစား သူတို့သည် မိမိတို့အရှင်သခင်၏ အရှက်ရဖွယ် အပြုအမူအတွက် နက်ရှိုင်းသော ရှက်ရွံ့မှုကိုသာ ခံစားခဲ့ကြရသည်။

ဝါရင့်အမတ်ကြီး အတော်များများသည် သူတို့၏ တည်ငြိမ်မှုကို ဆုံးရှုံးလုနီးပါး ဖြစ်လာကာ ညစာစားပွဲအတွင်း ချန်ဝမ်ကို ဗြောင်ကျကျ ဆုံးမရန် ပြင်ဆင်ရင်း သူတို့၏ မျက်နှာများက ဒေါသကြောင့် မည်းမှောင်သွားချိန်တွင် နန်းတွင်းအစေခံများက မယ်တော်ကြီးကျန်း ရောက်ရှိလာကြောင်း ကြေညာလိုက်လေသည်။ ထိုအခါမှသာ ချန်ဝမ်သည် အစေခံမလေးကို လွှတ်ပေးလိုက်တော့၏။

သူမ၏ ထက်မြက်သော အမြင်အာရုံဖြင့် မယ်တော်ကြီးကျန်းသည် ခန်းမဆောင်အတွင်းသို့ ဝင်ရောက်လာချိန်တွင် တစ်ချက်ဝေ့ကြည့်လိုက်ရုံဖြင့်— မျက်နှာအမူအရာ အမျိုးမျိုးဖြစ်နေသော အမတ်များ၊ ဒေါသထွက်နေသော ဝါရင့်အရာရှိကြီးများ၊ ချန်ဝမ်၏ ရှုပ်ပွနေသော ဝတ်ရုံများနှင့် သူ့ဘေးမှ မျက်နှာရဲနေသော အစေခံမလေးတို့ကို မြင်တွေ့လိုက်ရကာ— အရာအားလုံးကို နားလည်သွားခဲ့သည်။

စိတ်ထဲတွင် ဒေါသထွက်နေသော်လည်း မယ်တော်ကြီးသည် အခမ်းအနားအတွက် သူမ၏ တည်ငြိမ်မှုကို ထိန်းသိမ်းထားခဲ့၏။ သူမသည် နေရာယူပြီးနောက် ရိုးရှင်းစွာပင် ကြေညာလိုက်လေသည်။ "ညစာစားပွဲကို စတင်လိုက်ကြပါ"

အဓိကဟင်းလျာများကို သယ်ဆောင်လာသော နန်းတွင်းအစေခံမလေးများသည် နောက်ဆုံးတွင် တန်းစီကာ ဝင်ရောက်လာခဲ့ကြသည်။ သူတို့က ဝိန်းယွီထံသို့ ရောက်ရှိလာချိန်တွင် ကျောင်းပိုင်နှင့် ထုန်ချွဲတို့က နန်းတွင်းအစေခံမလေးများကို ယခင်အတိုင်း ၃လှမ်းအကွာတွင် တားဆီးလိုက်ကြပြီး ဝိန်းယွီကို ဟင်းလျာများကို ကိုယ်တိုင်ကိုယ်ကျ ချပေးခဲ့ကြ၏။

မယ်တော်ကြီးကျန်းသည် သည်အခြေအနေကို တစ်ချက်မျှသာ ကြည့်ရှုအကဲခတ်ခဲ့သော်လည်း မှတ်ချက်တစ်စုံတစ်ရာ မပေးခဲ့ချေ။

ဟင်းလျာချပေးသော အစေခံမလေးများ အားလုံး ဆုတ်ခွာသွားပြီးနောက် အမတ်များသည် ဝိန်းယွီ၊ မယ်တော်ကြီးကျန်းနှင့် ချန်ဝမ်တို့ကို အရက်ခွက်များ မြှောက်ကာ ဆုတောင်းပေးခဲ့ကြပြီး အရှင်သခင်နှင့် လက်အောက်ငယ်သားများကြားက သဟဇာတဖြစ်သော ဆက်ဆံရေးအကြောင်း ချိုသာသောစကားများကို အပြန်အလှန် ပြောဆိုခဲ့ကြသည်။ ညစာစားပွဲ၏ လေထုက ပိုသက်ဝင်လှုပ်ရှားလာခဲ့ပြီး ရင်းနှီးသော အရာရှိများက လွတ်လပ်စွာ သောက်စားကာ စကားပြောဆိုနေခဲ့ကြသည်။

စုပေါင်းဆုတောင်းပေးချိန်အတွင်း အရက်ပျော့တစ်ခွက်ကိုသာ သောက်ခဲ့ခြင်းမှလွဲ၍ ဝိန်းယွီသည် ညစာစားပွဲ တစ်လျှောက်လုံး သူမ၏ အစားအသောက်ကို လုံးဝ မထိသလောက်ပင်။

မယ်တော်ကြီးက ကြီးမှူးကျင်းပနေသဖြင့် ချန်ဝမ်သည် ကျန်ရှိနေသော ပွဲတော်အချိန်များအတွက် မိမိကိုယ်ကို ထိန်းချုပ်ထားခဲ့၏။ သူ့မျက်နှာအမူအရာက စိတ်မကြည်မလင် ဖြစ်နေဆဲဖြစ်သော်လည်း နောက်ထပ် အရှက်ရဖွယ် အပြုအမူများ ပြုလုပ်ခြင်းမှ ရှောင်ကြဉ်ခဲ့သည်။

ဂီတနှင့် အကဌာနမှ တေးဂီတပညာရှင်များနှင့် ကချေသည်များက ဖျော်ဖြေရန် ဝင်ရောက်လာချိန်တွင် နန်းတွင်းညစာစားပွဲသည် ၎င်း၏ အထွတ်အထိပ်သို့ ရောက်ရှိသွားခဲ့ပြီး ခွက်ချင်းတိုက်သံများနှင့် ရွှင်လန်းစွာ သောက်စားနေသံများဖြင့် ပြည့်နှက်နေခဲ့၏။

ချင်းယွင်အစောင့် အမျိုးသမီးတစ်ဦးက တိတ်ဆိတ်စွာ ချဉ်းကပ်လာပြီး ကျောင်းပိုင်၏ နားထဲသို့ တစ်စုံတစ်ရာကို တိုးတိုးလေး ပြောလိုက်သည်။ ကျောင်းပိုင်က ခေါင်းအနည်းငယ် ညိတ်ပြလိုက်ပြီးနောက် အစောင့် ဆုတ်ခွာသွားချိန်တွင် ဝိန်းယွီ၏ လက်ဖက်ရည်ကို ဖြည့်ပေးရင်း ကိုင်းညွှတ်လျက် သတင်းပို့လိုက်လေသည်။ "ဝူနန်းဆောင်မှာ လှုပ်ရှားမှု ရှိနေတယ်"

ဝိန်းယွီသည် မပြောင်းလဲသော မျက်နှာအမူအရာဖြင့် လက်ဖက်ရည်ပန်းကန်ကို လက်ခံယူလိုက်ပြီး သူတို့နှစ်ဦးသာ ကြားနိုင်သော အသံဖြင့် ညွှန်ကြားလိုက်၏။ "ဆက်လုပ်လိုက်"

ယနေ့ညတွင် အရာရှိများအားလုံး နန်းတော်အတွင်း စုရုံးနေကြပြီး တော်ဝင်အစောင့်များက ထိုက်ကျီနန်းဆောင် ပတ်လည်တွင်သာ ကင်းလှည့်ရန် အာရုံစိုက်နေကြသဖြင့် အခြားနန်းဆောင်များကို စောင့်ကြည့်မှု ပိုပေါ့လျော့နေခဲ့သည်။ ဤသည်က မယ်တော်ကြီးကျန်းအတွက် ထိုမိန်းမစိုးများကို နှုတ်ပိတ်ရန် အကောင်းဆုံး အခွင့်အရေးပင်။

ကျောင်းပိုင်က တိတ်ဆိတ်စွာ ထွက်သွားခဲ့ပြီး သူမနှင့် ပုံစံတူ ဝတ်ဆင်ထားသော ချင်းယွင်မှ အစောင့်အမျိုးသမီးတစ်ဦးက ဝိန်းယွီ၏ဘေးတွင် သူမ၏နေရာကို အစားထိုး ယူလိုက်၏။ ဗုံသံများ၊ တေးဂီတများနှင့် ရယ်မောသံများ ပြည့်နှက်နေသော ခန်းမဆောင် အလယ်တွင် ဘယ်သူမှ သတိမထားမိခဲ့ကြပေ။

ကချေသည်အဖွဲ့ တစ်ဖွဲ့ ဆုတ်ခွာသွားပြီးနောက် နောက်တစ်ဖွဲ့က ဝင်ရောက်လာခဲ့သည်။ ဖီဖာ၏ သွက်လက်မြန်ဆန်သော တေးသွားများက အထူးတလည် ဆွဲဆောင်မှုရှိနေကာ ဝိန်းယွီ၏ အကြည့်ကိုပင် အသစ်ရောက်လာသော ကချေသည်များဆီသို့ ဆွဲဆောင်သွားခဲ့သည်။

ထိုအခါမှသာ ဤကချေသည်များက အနောက်တိုင်းဒေသမှ အမျိုးသမီးများ၏ ဝတ်စုံများကို ဝတ်ဆင်ထားပြီး သူတို့၏ လှုပ်ရှားမှုများက ထူးထူးခြားခြား ရဲတင်းနေကြောင်း သူမ သတိပြုမိလိုက်၏။

ခေါင်းဆောင်ကချေသည်သည် မြွေတစ်ကောင်ကဲ့သို့ ပျော့ပျောင်းသော ခါးကို ပိုင်ဆိုင်ထားလေသည်။ ဖီဖာကြိုးများကို ခတ်လိုက်တိုင်း ဇာပဝါအထက်မှ မြင်နေရသော သူမ၏ မျက်လုံးများက အရိုင်းဆန်ပြီး ချွဲနွဲ့နေကာ ချန်ဝမ်အပေါ်သို့သာ စူးစိုက်စွာ ကျရောက်နေခဲ့သည်။

ချန်ဝမ်သည် တကယ်ကို လုံးဝ ပြုစားခံလိုက်ရပုံ ပေါ်နေသည်။ သူ့မျက်နှာက အရက်ကြောင့် နီရဲနေပြီး တိုးညှင်းသော အသံဖြင့် "အလှလေး" ဟု ရေရွတ်နေကာ အရမ်းကို စွဲလန်းစွာ စိုက်ကြည့်နေသဖြင့် သူ့အရက်ခွက် ကြမ်းပြင်ပေါ်သို့ ပြုတ်ကျသွားသည်ကိုပင် သတိမထားမိခဲ့ချေ။

ကချေသည်က ထိုအာရုံစိုက်ခံရမှုကို သဘောတွေ့နေသည်မှာ သိသာသည်။ သူမ၏ ဖီဖာကို ကိုင်ဆောင်လျက် ကျက်သရေရှိစွာ လှည့်ပတ်ပြီး လှေကားထစ်များကို တက်လာခဲ့သည်။ ညစာစားပွဲ၏ ဤအချိန်တွင် အောက်ဘက်ရှိ ဘယ်အရာရှိများကမှ ချန်ဝမ် မျက်နှာသာပေးနေသူအပေါ် မှတ်ချက်မပေးဝံ့ကြချေ။

နန်းတွင်းအရာရှိများသည် ဤကဲ့သို့သော မြင်ကွင်းများကို အစောကြီးကတည်းက အသားကျနေနှင့်လေသည်။ ဝိန်းယွီ၏ အလှတရားကို အံ့သြချီးကျူးနေဆဲဖြစ်သော သူများသာ သူမ၏ မျက်နှာအမူအရာကို ခိုးကြည့်နေခဲ့ကြသည်။

သို့သော် ဝိန်းယွီ၏ အမူအရာက သူမ ညစာစားပွဲသို့ ပထမဆုံး ဝင်ရောက်လာချိန်ကဲ့သို့ပင် အေးစက်ပြီး ခပ်တန်းတန်းဖြစ်နေဆဲ။ မရေမတွက်နိုင်သော တောက်ပသည့် မီးအိမ်များ၏ အလင်းရောင်အောက်တွင် သူမသည် အေးမြသော လရောင်ကို ခံယူထားသည့် ကျောက်စိမ်းရုပ်တုတစ်ခုနှင့် တူညီနေပြီး ပျော်ပွဲရွှင်ပွဲများကြားတွင် လုံးဝကို သီးခြားဖြစ်နေခဲ့၏။

နန်းတွင်းအရာရှိ အများစုမှာ ကချေသည်၏ ရဲတင်းမှုကြောင့် ဖမ်းစားခံထားရသည်။ အောက်ဘက်တွင် ထိုင်နေသော ကျန်းယွီကမူ နိုးနိုးကြားကြား ရှိနေဆဲဖြစ်ပြီး သူ့ဘယ်ဘက်လက်က ဓားရိုးပေါ်တွင် သိမ်မွေ့စွာ တင်ထားကာ အနည်းငယ်မျှသော မကောင်းသည့် ရည်ရွယ်ချက် အရိပ်အယောင် ပေါ်လာသည်နှင့် တပြိုင်နက် သူ့ဓားကို ဆွဲထုတ်ရန် အသင့်ရှိနေခဲ့သည်။

ကံကောင်းထောက်မစွာဖြင့် ကချေသည်၏ ရည်ရွယ်ချက်က ချန်ဝမ်ကို ကျီစယ်ရန်အတွက်သာ အာရုံစိုက်ထားပုံပေါ်သည်။ သူ့အနီးသို့ လှည့်ပတ်သွားရင်း သူမက သူ့ရင်ခွင်ထဲသို့ လဲကျသွားတော့မည့်ပုံ ပေါ်နေသော်လည်း နောက်ဆုံးစက္ကန့်တွင် လှည့်ထွက်သွားခဲ့ပြီး သူမ၏ လက်တွင် ပတ်ထားသော ပါးလွှာသည့် ပိုးသားကိုသာ သူ့မျက်နှာပေါ်သို့ ပွတ်တိုက်သွားစေခဲ့သည်။

ချန်ဝမ်က လုံးဝကို သာယာသွားပြီး သူမကို ဖမ်းဆွဲရန် ထရပ်လိုက်၏။ ထိုင်ခုံများကြားရှိ ကျဉ်းမြောင်းသော နေရာလွတ်တွင် ကချေသည်က သူ့ကို ရှောင်တိမ်းနေစဉ် ခြေချော်သွားပြီး ယိမ်းယိုင်သွားကာ ဝိန်းယွီဆီသို့ လဲကျသွားခဲ့သည်။ ထုန်ချွဲက လျင်မြန်စွာ ကြားဝင်လိုက်ပြီး သူမ၏ လမ်းကြောင်းကို ပိတ်ဆို့လိုက်သော်လည်း ကချေသည်၏ ပိုးသားက စားပွဲပေါ်ရှိ ဝိုင်အိုးငယ်လေးကို မတော်တဆ တိုက်မိသွားခဲ့သည်။

စားပွဲဘေးတွင် ထိုင်နေသော ဝိန်းယွီသည် စပျစ်ဝိုင်များ ပက်ဖျန်းခံလိုက်ရပြီး သူမ၏ စကတ်ကို စွန်းထင်းသွားစေခဲ့သည်။

ထုန်ချွဲ၏ မျက်နှာက ချက်ချင်း မည်းမှောင်သွားခဲ့သည်။ "အတင့်ရဲလှချည်လား" သူမက ဒေါသတကြီး ပြောလိုက်၏။

မိမိ၏ ကြီးလေးသော အမှားကို သဘောပေါက်သွားကာ ကချေသည်က ဝိန်းယွီရှေ့တွင် ဒူးထောက်ချလိုက်၏။ "မယ်မယ်မိဖုရားခေါင်၊ ကျွန်တော်မျိုးမကို ချမ်းသာပေးပါ! ကျွန်တော်မျိုးမ တမင်သက်သက် လုပ်တာ မဟုတ်ရပါဘူး..."

ပျော်ရွှင်မှု အနှောင့်အယှက် ခံလိုက်ရသဖြင့် စိတ်အနှောင့်အယှက်ဖြစ်သွားသော ချန်ဝမ်က မျက်မှောင်ကြုတ်လိုက်သည်။ "ဒါက ဝတ်ရုံတစ်ထည်လေးပါပဲ။ မနက်ဖြန်ကျရင် အတွင်းရေးဌာနက မိဖုရားဆီကို အသစ် ၁၀ထည် ပို့ပေးလိမ့်မယ်!"

မယ်တော်ကြီးကျန်းက အချိန်ကိုက် ဝင်ပြောလိုက်၏။ "အရှင်မင်းကြီး၊ အမတ်တွေရှေ့မှာ ဒီလို မသင့်တော်တဲ့ အပြုအမူမျိုးက မလုပ်သင့်ပါဘူး"

ထို့နောက် သူမက ဝိန်းယွီဘက်သို့ လှည့်လိုက်သည်။ "ဒီနေ့က ဆောင်းဦးလယ် ပွဲတော် ညစာစားပွဲဖြစ်ပြီး ပျော်ရွှင်စရာ အခါသမယပါပဲ။ သွေးထွက်သံယို ဖြစ်တာက နိမိတ်မကောင်းဘူး။ မိဖုရားကကော ဘယ်လို ထင်လဲ"

ဝိန်းယွီက သူမ၏ စကတ်ပေါ်ရှိ စွန်းသွားသည့်ဝိုင်များကို လက်ကိုင်ပဝါဖြင့် တည်ငြိမ်စွာ သုတ်ပစ်လိုက်၏။ "မယ်တော်ကြီး ပြောတာ မှန်ပါတယ်"

ကချေသည်က ချန်ဝမ်နှင့် ကျီစယ်နေစဉ် သူမ၏ ဝတ်ရုံကို စွန်းထင်းစေခဲ့ခြင်း ဖြစ်သောကြောင့် ဝိန်းယွီကသာ ပြစ်ဒဏ်တစ်ခုခု ပေးလိုက်လျှင် မနာလိုမှုအဖြစ် အထင်လွဲခံရနိုင်ပေသည်။ ဝိန်းယွီက ချန်ဝမ်ကို ဘယ်တုန်းကမှ အထင်ကြီးလေးစားမှု မရှိခဲ့သလို ထိုကဲ့သို့သော နာမည်ဆိုးကိုလည်း မခံယူလိုခဲ့ချေ။

မယ်တော်ကြီးကျန်း၏ ဘေးက အထိန်းတော်ကြီးက ကချေသည်ကို ပြောလိုက်သည်။ "မယ်မယ်မိဖုရားက သူ့ရဲ့ မေတ္တာကရုဏာနဲ့ နင့်ကို ချမ်းသာပေးလိုက်ပြီ။ မယ်မယ့်ကို ကျေးဇူးတင်စကား ပြောပြီး နင့်ရဲ့ ပြစ်ဒဏ်ကို ခံယူဖို့ ထွက်သွားတော့"

ကချေသည်က ကျေးဇူးတင်စွာဖြင့် အကြိမ်ကြိမ် ဦးတိုက်ပြီးနောက် ဆုတ်ခွာသွားခဲ့သည်။

ဤအနှောင့်အယှက်ပြီးနောက် တေးဂီတဖျော်ဖြေမှု ပြီးဆုံးသွားခဲ့၏။ ချန်ဝမ်သည် စိတ်ဝင်စားမှု ကင်းမဲ့နေလျက် သူ့ပလ္လင်သို့ ပြန်သွားခဲ့လေသည်။

ဝိန်းယွီက မယ်တော်ကြီးကို ပြောလိုက်၏။ "ကျွန်တော်မျိုးမ အဝတ်အစားလဲဖို့ ခဏလောက် အပြင်ထွက်ခွင့်ပြုပါဦး"

မယ်တော်ကြီးကျန်းက ခေါင်းညိတ်သဘောတူလိုက်ပြီး သူတို့ကို လမ်းပြပေးရန် နန်းတွင်းအစေခံတစ်ဦးကို ခေါ်လိုက်သည်။

အမျိုးသမီးများအတွက် အဝတ်အစားလဲလှယ်ရန် နေရာကို ထိုက်ကျီနန်းဆောင် ဘေးရှိ ကျန်းနဉ်နန်းဆောင်တွင် ပြင်ဆင်ထားသည်။ ဝိန်းယွီနှင့် သူမ၏ အဖွဲ့ကို ဘေးဘက်ခန်းမဆောင်သို့ ခေါ်ဆောင်သွားပြီးနောက် အစေခံက ရိုသေစွာ ဦးညွှတ်ပြီး ပြောလိုက်၏။ "အမျိုးသမီးတွေ လဲလှယ်ဖို့ ဝတ်ရုံတွေ အားလုံး ဒီမှာ ရှိပါတယ်။ မင်းသမီးက ဒါတွေကို သဘောမကျဘူးဆိုရင် ကျွန်တော်မျိုးမက ကျောက်ဟွာနန်းဆောင်ကနေ နောက်ထပ် တစ်စုံ သွားယူပေးလို့ ရပါတယ်"

ခန်းမဆောင်ထဲတွင် အမည်မသိ နံ့သာပေါင်းတစ်ခု လောင်ကျွမ်းနေပြီး ပေါ့ပါးကာ အနည်းငယ် ချိုမြိန်သော အနံ့ရှိနေသည်။ ဝိန်းယွီက နန်းတွင်းအစေခံမလေးကို ပြောလိုက်လေသည်။ " မလိုပါဘူး။ မင်း ထွက်သွားလို့ ရပြီ"

အစေခံမလေးက အရိုအသေပေးကာ ပြောလိုက်၏။ "ဒါဆိုရင် ကျွန်တော်မျိုးမ ခန်းမဆောင် အပြင်ဘက်မှာ စောင့်နေပါ့မယ်။ မင်းသမီး တစ်ခုခု လိုအပ်ရင် ခေါ်လိုက်ရုံပါပဲ"

အစေခံမလေး ဆုတ်ခွာသွားပြီးနောက် ဝိန်းယွီက နံ့သာပေါင်းဖိုထဲရှိ နံ့သာပေါင်းကို ငြှိမ်းသတ်ရန် အမိန့်ပေးလိုက်သည်။ ချင်းယွင်အစောင့်များသည် တံခါးများနှင့် ပြတင်းပေါက်များကို ပိတ်ပြီးနောက် ခေါင်မိုးတန်းများကိုပင် မချန်လှပ်ဘဲ ဘေးဘက်ခန်းမဆောင် တစ်ခုလုံးကို သတိထားကာ စစ်ဆေးခဲ့ကြ၏။ ပုန်းအောင်းနေသော သူလျှိုများ မရှိကြောင်း အတည်ပြုပြီးသည်နှင့် တပြိုင်နက် သူတို့က အပြင်ဘက် လှုပ်ရှားမှုများကို စောင့်ကြည့်ရန် တံခါးနှင့် ပြတင်းပေါက်တိုင်းတွင် အစောင့်များ ချထားလိုက်ပြီး ကျန်လူများက ဝိန်းယွီနောက်မှ အတွင်းခန်းမဆောင်သို့ လိုက်ပါသွားခဲ့ကြသည်။

မိမိတို့လူများက အပြင်ဘက်တွင် စောင့်ကြပ်နေကြောင်း သိထားသော ထုန်ချွဲက ဝိန်းယွီအတွက် ဝတ်ရုံများကို ရွေးချယ်နေရင်း ဒေါသထွက်နေတော့သည်။ "အဲ့ဒီ ချန်ဝမ်က တဏှာအိုး၊ အာဏာရှင် တစ်ယောက်ပဲ! အာဏာရှင် အစစ်ပဲ!"

သူတို့ ခန်းမဆောင်ထဲသို့ မဝင်ခင်ကတည်းက နံ့သာပေါင်းက ဘယ်လောက်ကြာကြာ လောင်ကျွမ်းနေခဲ့သည်ကို ဘယ်သူမှ မသိနိုင်ပေ။ ၎င်းကို ငြှိမ်းသတ်ရန် အမိန့်ပေးပြီးနောက်တွင်ပင် ဝိန်းယွီသည် လေထဲတွင် ခပ်ဖျော့ဖျော့ ရနံ့တစ်ခုကို ရနေဆဲဖြစ်ပြီး ရှင်းမပြတတ်အောင် ခေါင်းမူးနေသည်ကို ခံစားလိုက်ရ၏။ သူမက သတိပေးလိုက်လေသည်။ "ခိုးနားထောင်တဲ့သူတွေကို သတိထား" ပြီးနောက် သူမ၏ လက်ချောင်းများဖြင့် နားထင်များကို ဖိထားလိုက်သည်။

ထုန်ချွဲက ချန်ဝမ်အကြောင်း ပြောနေခြင်းကို ရပ်တန့်လိုက်သော်လည်း ချင်းယွင်အစောင့် အဖွဲ့ဝင် အတော်များများနှင့်အတူ အဝတ်အစားများကို ရွေးချယ်ရင်း သူမက မနေနိုင်ဘဲ ‌ရေရွတ်လိုက်၏။ "ဒီဝတ်ရုံတွေ အားလုံးက အရမ်းကို မွှေးနေတာပဲ..."

နားထင်များကို နှိပ်နယ်ရင်း ပျော့ပျောင်းသော ကုတင်ပေါ်တွင် အိပ်ချင်မူးတူးဖြင့် မှီနေသော ဝိန်းယွီက တစ်စုံတစ်ရာကို ရုတ်တရက် သဘောပေါက်သွားပြီး အော်ဟစ်လိုက်လေသည်။ "ပြတင်းပေါက်တွေကို ဖွင့်လိုက်!"

ချင်းယွင်အစောင့်များကလည်း တစ်ခုခု မှားယွင်းနေကြောင်း ခံစားမိလိုက်ကြသော်လည်း ပြတင်းပေါက်များဆီသို့ အပြေးအလွှား မသွားနိုင်ခင်မှာပင် သူတို့က တစ်ယောက်ပြီးတစ်ယောက် လဲကျသွားခဲ့ကြ၏။ ပြတင်းပေါက်များကို ဖွင့်ရန် တွားသွားဖို့ ရုန်းကန်နေရသူများမှာ သိပ်မဝေးခင်မှာပင် ပြတင်းပေါက် ဇာကာများမှတဆင့် ပြွန်ငယ်များ ဆန့်ထွက်လာပြီး မေ့ဆေးအခိုးအငွေ့ အမြောက်အမြားကို လွှတ်ထုတ်လိုက်လေသည်။

ဤတစ်ကြိမ်တွင်တော့ သတိကို ခဲယဉ်းစွာ ထိန်းထားနိုင်ခဲ့သော ချင်းယွင်အစောင့် အဖွဲ့ဝင်များ အားလုံး လုံးဝ သတိလစ်သွားခဲ့ကြသည်။

အချိန်အနည်းငယ် အကြာတွင် ခန်းမဆောင် တံခါးက ကျွီခနဲ ပွင့်လာပြီး မယ်တော်ကြီးကျန်း၏ ဘေးမှ သင်ကြားရေးအထိန်းတော်ကြီး ဝင်ရောက်လာခဲ့၏။

သူမ၏ နှာခေါင်းနှင့် ပါးစပ်ကို လက်ကိုင်ပဝါဖြင့် ဖုံးအုပ်လျက် ခန်းမဆောင်ထဲတွင် ကြိုတင်ရှိနေသော မေ့ဆေးနံ့သာပေါင်းကို ရှူရှိုက်မိပြီးနောက် တံခါးများနှင့် ပြတင်းပေါက်များအနီး လဲကျနေသော ချင်းယွင်အစောင့် အဖွဲ့ဝင်များကို သူမက တစ်ချက်ကြည့်လိုက်သည်။ သူမ၏ အနောက်က အစေခံများကို သူမက အချက်ပြလိုက်ရာ သူတို့က ပြန့်ကျဲနေသော ချင်းယွင်အစောင့် အဖွဲ့ဝင်များကို အပြင်သို့ သယ်ထုတ်သွားကြလေသည်။

သင်ကြားရေးအထိန်းတော်ကြီးက အတွင်းခန်းမဆောင်သို့ ဝင်ရောက်သွားပြီး ဝိန်းယွီက သူမ၏ မည်းနက်သော ဆံပင်များကို တစ်ဝက်မျှ ဖြန့်ကျက်လျက် ကုတင်ပေါ်တွင် လဲလျောင်းနေသည်ကို မြင်သောအခါ သူမနောက်မှ လိုက်လာသော အစေခံမလေးကို ညွှန်ကြားလိုက်၏။ "ပြန်သွားပြီး ကိစ္စပြီးပြီလို့ မယ်တော်ကြီးကို သတင်းပို့လိုက်"

ထိုက်ကျီနန်းဆောင် ညစာစားပွဲသို့ ပြန်ရောက်သောအခါ ဂီတနှင့် အက နောက်တစ်သုတ်က လက်ရည်ကျနေပြီဖြစ်သည့် တေးသွားကို ဆက်လက်တီးခတ်နေလေသည်။ အစေခံမလေးတစ်ယောက်သည် ဝင်ရောက်လာပြီး မယ်တော်ကြီးကျန်း၏ ဘေးက အထိန်းတော်ကြီးကို တစ်စုံတစ်ရာ တိုးတိုးလေး ပြောလိုက်ပြီးနောက် ဆုတ်ခွာသွားခဲ့သည်။

သိပ်မကြာမီတွင် အထိန်းတော်ကြီးက ဝိုင်အိုးတစ်လုံးဖြင့် ကျန်းယွီ၏ နေရာသို့ ချဉ်းကပ်လာပြီး တစ်ဝက်လွတ်နေသော သူ့ခွက်ကို ပြန်လည်ဖြည့်ပေးကာ ပြောလိုက်လေသည်။ "စစ်သူကြီးလေး၊ အရှင်မင်းကြီးကို သွားပြီး ဆုတောင်းစကားပြောဖို့ မယ်တော်ကြီးက မင်းကို တောင်းဆိုနေတယ်"

ကျန်းယွီက မယ်တော်ကြီးကျန်းကို မော့ကြည့်လိုက်ရာ သူမ၏ အကြည့်ထဲတွင် အပြစ်တင်သည့် အရိပ်အယောင်တစ်ခုကို မြင်တွေ့လိုက်ရ၏။

ကျန်းယွီက ပြောလိုက်လေသည်။ "ကျွန်တော် နားလည်ပါပြီ"

ထို့နောက် သူ့ခွက်ကို ကိုင်ကာ မတ်တတ်ရပ်လိုက်ပြီး အရက်မူးနေပုံပေါ်သော်လည်း စိတ်မကြည်မလင် ဖြစ်နေဆဲဖြစ်သော ချန်ဝမ်ကို ပြောလိုက်၏။ "ကျွန်တော်တို့ရဲ့ ကြီးမြတ်တဲ့ ချန်အမတ်တွေကို ပြည်မကြီးဆီကို မကြာခင် ပြန်လည်ဦးဆောင်သွားနိုင်တော့မယ့် အရှင်မင်းကြီးကို ဒီစစ်သူကြီးက ဂုဏ်ပြုပါတယ်!"

ထိုစကားနှင့်အတူ သူက ခွက်ကို တစ်ကျိုက်တည်း မော့သောက်လိုက်သည်။

အမတ်များက အားပေးအော်ဟစ်လိုက်ကြ၏။ အရက်ကြောင့် ပါးပြင်များ နီရဲနေသော ချန်ဝမ်က စူးစမ်းမှုနှင့် ရန်စမှုတို့ ရောယှက်နေလျက် ကျန်းယွီကို ဘေးတိုက် တစ်ချက်သာ ကြည့်လိုက်ပြီး သူ့ခွက်ကို မြှောက်ကာ သောက်လိုက်စဉ် အဓိပ္ပါယ်မရေရာစွာ ပြုံးလိုက်လေသည်။

ကျန်းယွီက သူ့အပေါ် ချန်ဝမ်၏ ရန်လိုမှုကို ကောင်းကောင်း သတိပြုမိသော်လည်း မသိသလိုသာ ဟန်ဆောင်နေလိုက်ပြီး သူ့နေရာတွင် ပြန်ထိုင်လိုက်၏။

ရုတ်တရက် အစောင့်တစ်ဦးက အလျင်အမြန် ဝင်လာပြီး သူ့နားထဲတွင် တိုးတိုးလေး ပြောလိုက်၏။ "တပ်မှူး၊ လုပ်ကြံသူတစ်ယောက် နန်းတော်ထဲ ခိုးဝင်လာပုံရတယ်!"

ကျန်းယွီ၏ မျက်နှာအမူအရာက အနည်းငယ် ပြောင်းလဲသွားခဲ့သည်။ အရက်ပြေစေရန် လေကောင်းလေသန့် ထွက်ခံဦးမည်ဟု အကြောင်းပြကာ သူသည် အစောင့်နှင့်အတူ ညစာစားပွဲမှ ထွက်ခွာသွားခဲ့လေသည်။

ခန်းမဆောင် အပြင်ဘက်တွင် ညလေက တိုက်ခတ်နေပြီး ညစာစားပွဲတွင် သိပ်အများကြီး မသောက်ခဲ့သော်လည်း မျက်စိရှေ့မှ မြင်ကွင်းက စတင်ဝေဝါးလာခဲ့၏။ တစ်ခုခု မှားယွင်းနေကြောင်း သဘောပေါက်သွားချိန်တွင် အမှောင်ထုက သူ့ကို လွှမ်းခြုံသွားပြီး လုံးဝ သတိလစ်မသွားခင် "အဒေါ်" ဟူသော စကားတစ်ခွန်းကိုသာ ခဲယဉ်းစွာ ပြောဆိုနိုင်ခဲ့သည်။

နန်းတွင်းညစာစားပွဲတွင် မယ်တော်ကြီးကျန်းက သူမ၏ ကိုယ်ပိုင်အစေခံ၏ အကူအညီဖြင့် မတ်တတ်ရပ်လိုက်ပြီး ပြောလိုက်လေသည်။ "လူတစ်ယောက်က အသက်ကြီးလာတဲ့အခါ အရင်တုန်းကနဲ့ တကယ်ကို နှိုင်းယှဉ်လို့ မရတော့ဘူးပဲ။ ငါ တော်တော်လေးကို ပင်ပန်းနေပြီ။ အရှင်မင်းကြီးနဲ့ ငါ့ရဲ့ လေးစားရတဲ့ အမတ်တွေ အားလုံး ဒီမှာ ဆက်ပြီး ပျော်ရွှင်စွာ နေခဲ့ကြပါ"

ချန်ဝမ်က နှုတ်ခမ်းထောင့်ကို ကွေးထားလိုက်ပြီး သူ၏ အပြုံးက အတတ်နိုင်ဆုံးဖြစ်အောင် လှောင်ပြောင်နေသော်လည်း အခြားအမတ်များနှင့်အတူ မတ်တတ်ရပ်လိုက်၏။ "မယ်တော်ကြီးကို နှုတ်ဆက်ပါတယ်" ဟူသော စုပေါင်းအော်ဟစ်သံများကြားတွင် သူက ထပ်ဖြည့်ပြောလိုက်သည်။ "မယ်တော်ကို နှုတ်ဆက်ပါတယ်"

မထွက်ခွာခင် မယ်တော်ကြီးကျန်းက ချန်ဝမ်၏ ဒူးဘေးတွင် ဒူးထောက်နေသော အလှမယ်များကို တစ်ချက် ကြည့်လိုက်ပြီး တစ်စုံတစ်ရာကို ပြောချင်နေသကဲ့သို့ ရှိသော်လည်း နောက်ဆုံးတွင် နှုတ်ဆိတ်ကာသာနေလိုက်တော့သည်။ သူမ၏ ဘေးက နန်းတွင်းအစေခံတစ်ဦး၏ လက်မောင်းကို မှီလျက် ခန်းမဆောင်ထဲမှ ဖြည်းညှင်းစွာ ထွက်ခွာသွားခဲ့၏။

ချန်ဝမ်သည် ခေါင်းမော့ကာ မယ်တော်ကြီးကျန်း၏ ဆုတ်ခွာသွားသော ပုံရိပ်ကို ကြည့်ရင်းက သူ့မျက်နှာတွင် အပျော်အပါးမက်ပြီး ပေါ့ပျက်ပျက်နိုင်သော အပြုံးတစ်ခုက ရှိနေဆဲ။ သို့သော် သူ၏ မကြည်မလင် ဖြစ်နေသော မျက်လုံးများထဲတွင် ထင်ရှားပေါ်လွင်နေသော မကျေနပ်မှုနှင့် ခါးသီးမှုတို့ ရှိနေခဲ့လေသည်။

သူ ပြန်ထိုင်လိုက်ပြီး သိပ်မကြာခင်မှာပင် မိန်းမစိုးငယ်တစ်ဦးက အလျင်အမြန် ဝင်ရောက်လာပြီး သူ့ကို တစ်စုံတစ်ရာ တိုးတိုးလေး ပြောလိုက်၏။

ချန်ဝမ်က စိတ်အနှောင့်အယှက်ဖြစ်ဖွယ် ပြုံးလိုက်ပြီး မတ်တတ်ရပ်ကာ အမတ်များကို ပြောလိုက်လေသည်။ "ငါကိုယ်တော်ရဲ့ လေးစားရတဲ့ အမတ်တို့၊ ပွဲတော်ကို ဆက်လုပ်ကြပါ။ ငါကိုယ်တော် အပေါ့အပါးသွားဖို့ ခွင့်ပြုပါဦး"

ထိုကဲ့သို့သော ကြမ်းတမ်းသည့် စကားလုံးများက အောက်ဘက်ရှိ ဝါရင့်အမတ်ကြီးများ၏ မျက်နှာများကို ဖြူဖျော့သွားစေခဲ့ပြီး နန်းတက်လာသည်မှာ ၂နှစ်သာရှိသေးသော ဤဘုရင်သစ်အပေါ် သူတို့၏ နှလုံးသားများက အေးစက်သွားတော့သည်။

ကျန်းအဖွဲ့မှ အမတ်များသာ သူတို့၏ အပြုံးများကို ထိန်းသိမ်းထားခဲ့သော်လည်း သူတို့၏ မျက်နှာအမူအရာများတွင်တော့ လှောင်ပြောင်မှု အရိပ်အယောင်တစ်ခုကို ခပ်ရေးရေး မြင်တွေ့နေရလေသည်။

...