အခန်း (၂၂၃-၂၂၄)

အခန်း (၂၂၃)

မိုက်ကယ်ရဲ့ ခေါင်းထဲကို အကြံတစ်ခု ဖျတ်ခနဲ ဝင်လာခဲ့တယ်။ ကိုယ့်ဘာသာ ဝန်ခံရရင်တော့ ဒါက နည်းနည်း ရူးကြောင်ကြောင်နိုင်တဲ့ ကိစ္စမျိုးပါ၊ ဒါပေမဲ့ ဒါကနေ ဖြစ်လာနိုင်မယ့် အလားအလာတွေကို သူ မတွေးဘဲ မနေနိုင်ခဲ့ဘူး။

အရိုးစုကြီးရဲ့ အသိဉာဏ်ရှိပုံရတဲ့ မျက်လုံးတွေကို ကြည့်ရတာ တကယ့် လူသားတစ်ယောက်ကို ကြည့်နေရသလိုမျိုး ခံစားရစေတယ်။ အနည်းဆုံးတော့ လူသားတစ်ဦးရဲ့ ပုံရိပ်ယောင်မျိုးပေါ့။

ဒီအရိုးစုကြီးဟာ တစ်ချိန်တုန်းက ကိုယ်ပိုင်အလိုဆန္ဒတွေ၊ တောင့်တမှုတွေနဲ့ ယှဉ်တွဲ ရှင်သန်ခဲ့ဖူးတဲ့ သာမန် သက်ရှိသတ္တဝါတစ်ယောက် ဖြစ်ခဲ့ဖူးတာလေ၊ ဒါတင်မကသေးဘဲ ပထမဆုံး လူသားဧကရာဇ်ရဲ့ ဂုဏ်သိက္ခာရှိတဲ့ စစ်သူကြီးတစ်ဦး ဖြစ်လာတဲ့အထိ သူ့ရဲ့ အိပ်မက်တွေကို အကောင်အထည်ဖော်နိုင်ခဲ့သူလည်း ဖြစ်ပါတယ်။

သူ့ရဲ့ ရိုးရှင်းလှတဲ့ အရိုးစုသက်သက်၊ တိုက်ခိုက်ရေး ဗီဇမှတ်ဉာဏ်တစ်ခုတည်းတင်နဲ့တင် တန်နဲ့ချီတဲ့ မာကျောလှတဲ့ ကျောက်အုတ်နံရံကြီးတွေကို ကိတ်မုန့်တစ်ခုလိုမျိုး အလွယ်တကူ ဖြတ်တောက်နိုင်ခဲ့တယ်ဆိုတဲ့ အချက်ကပဲ တစ်ချိန်တုန်းက သူ့မှာ ရှိခဲ့ဖူးတဲ့ ကြီးမားလှတဲ့ စွမ်းအားတွေကို သက်သေပြနေတာပဲ။

မိုက်ကယ်အနေနဲ့ သူ သက်ရှိထင်ရှား ရှိစဉ်တုန်းက ဘယ်လောက်တောင် အင်အားကြီးမားခဲ့မလဲဆိုတာကိုပဲ တအံ့တဩ တွေးတောနေမိတော့တယ်။

အခုတော့ သူဟာ အဲဒီအစွမ်းအစတွေရဲ့ ပုံရိပ်ယောင်အချို့ကို ဒီအရိုးစုကြီးဆီမှာ မြင်တွေ့နေရပြီ ဖြစ်ပါတယ်။ မိုက်ကယ်က ၎င်းရဲ့ အပြာရောင်သန်းနေတဲ့ အစိမ်းရောင် အလင်းပွင့် မျက်လုံးကြီးတွေထဲမှာ ဒါကို အတိုင်းသား မြင်နေရတာကိုး။

"နိုဗာ၊ ငါ့ကို ခဏလောက် လွှဲပေးဦး"

သူ့ရဲ့ ကိုယ်ပိုင် အေအိုင် အကူက သူ့စကားကို ပြန်မပြောပေမဲ့ အရိုးစုကြီးရဲ့ ခန္ဓာကိုယ်ကနေ ထွက်ပေါ်နေတဲ့ အမှောင်ဒြပ်စင်နဲ့ အဆိပ်ဒြပ်စင် မှော်စွမ်းအင်တွေအပေါ် အပြည့်အဝ ထိန်းချုပ်နိုင်စွမ်းရှိမယ့် ဝန်ထုပ်ဝန်ပိုးကြီးကိုတော့ သူ့ဆီကို လွှဲအပ်ပေးလိုက်ပါတော့တယ်။

မိုက်ကယ်က လေထုထဲမှာ ရှိနေတဲ့ သန်းပေါင်းများစွာသော မှော်စွမ်းအင်တွေအားလုံးကို အတိုင်းသား ခံစားလိုက်ရမိတယ်။ သူက အဲဒီစွမ်းအင် တစ်ခုချင်းစီနဲ့ ချိတ်ဆက်မိသွားသလို ခံစားလိုက်ရပြီး ပတ်ဝန်းကျင် နေရာအနှံ့မှာ လွင့်ပျံနေတဲ့ ဝိုးတိုးဝါးတား မှော်စွမ်းအင် အမှုန်အမွှားလေးတွေ အားလုံးကို လိုက်လံငုံ့လျှိုးပေးနေတဲ့ ဓာတ်ငွေ့ဆန်တဲ့ ဖြစ်တည်မှုတစ်ခုအဖြစ် ကိုယ့်ကိုယ်ကိုယ် ပြောင်းလဲသွားသလိုမျိုး ခံစားလိုက်ရမိတာပေါ့။

မူလအစီအစဉ်အရဆိုရင်တော့ သူက အမှောင်ဒြပ်စင် မှော်စွမ်းအင်တွေကို သူ့ရဲ့ ကိုယ်ပိုင် အလင်းဒြပ်စင် မှော်စွမ်းအင်တွေနဲ့ ရိုက်ခတ်ရမှာဖြစ်ပြီး သူ့ရဲ့ လျှပ်စီးဒြပ်စင် မှော်စွမ်းအင်တွေကိုတော့ အဆိပ်ဒြပ်စင် မှော်စွမ်းအင်တွေဆီကို ပစ်လွှတ်ရမှာ ဖြစ်ပါတယ်၊ အဲဒီလိုမျိုး အရိုးစုကြီးကို ပြန်လည်နိုးထလာစေတဲ့ တန်ခိုး အရင်းအမြစ်တစ်ခုလုံးကို အမြစ်ပြတ် ဖျက်ဆီးပစ်ရမှာပါ။ သူက ဒီမသေမျိုးမိစ္ဆာကြီးကို အပြီးတိုင် သတ်ပစ်ရမှာလေ။

ဒါပေမဲ့လည်း မိုက်ကယ်ရဲ့ စိတ်ထဲမှာ အတွေးတစ်ခု ဝင်လာခဲ့ပြန်တယ်။

အကယ်၍ ဒါကို ဖျက်ဆီးပစ်မယ့်အစား စွမ်းအားတွေ ပိုပြီး တိုးတက်လာအောင် လုပ်ပေးလိုက်ရင် ဘာဖြစ်သွားမလဲ။

အခုအချိန်မှာတော့ မိုက်ကယ် သိထားတာက ကြယ်ကိုးပွင့်အဆင့်ရှိတဲ့ အရိုးစုကြီးရဲ့ အစွမ်းအစ အပြည့်အဝက သူ့ရှေ့မှာ တွေ့သမျှ လူမှန်သမျှကို မျက်စိနဲ့မမြင်နိုင်တဲ့ ဓားနဲ့ လိုက်လံဝှေ့ယမ်းခုတ်သတ်နေမယ့် အသိဉာဏ်မရှိတဲ့ မိစ္ဆာကောင်သက်သက်မျှသာ ဖြစ်တယ်ဆိုတာပါပဲ။

ဒါပေမဲ့ ဒါက အဲဒီလိုမျိုး မဟုတ်ခဲ့ရင်ကော။ အကယ်၍ ၎င်းမှာ သူ သက်ရှိထင်ရှား ရှိစဉ်တုန်းကလိုမျိုး အတိတ်က မှတ်ဉာဏ်တွေ ရှိနေခဲ့ရင် ဘာဖြစ်မလဲ။

ဒီလိုမျိုး ဖြစ်နိုင်ခြေက မိုက်ကယ်အနေနဲ့ အရိုးစုကြီးရဲ့ မသေမျိုးဖြစ်တည်မှုကို အပြီးတိုင် ချေဖျက်ပေးဖို့ ပြင်လိုက်တဲ့ အချိန်ကျမှပဲ သိသာထင်ရှားလာခဲ့ရတာ ဖြစ်ပါတယ်။

၎င်းက သာမန် ကြယ်တစ်ပွင့်အဆင့်ရှိတဲ့ မသေမျိုးသတ္တဝါလေးတစ်ခုအဖြစ်ပဲ ရှိနေတော့တဲ့ အချိန်မှာတင်၊ ပြင်းထန်လှပြီး ကူးစက်တတ်တဲ့ သေဆုံးခြင်းစွမ်းအင်တွေက ၎င်းရဲ့ အတိတ်က မှတ်ဉာဏ်တွေ ခဏတာမျှ ပြန်လည်နိုးထလာစေဖို့အတွက် လုံလောက်အောင်အထိ ပျယ်ဖျော့သွားခဲ့တာလေ။

ဒါက မိုက်ကယ်ကို မှော်ကျင့်စဉ်သီအိုရီတစ်ခု ရရှိစေခဲ့ပါတယ်။ အမှောင်ဒြပ်စင်နဲ့ အဆိပ်ဒြပ်စင် မှော်စွမ်းအင်တွေဟာ သေဆုံးသွားတဲ့သူတွေကို ပြန်လည်နိုးထလာစေပြီး လှုပ်ရှားနိုင်စွမ်းတွေ ပေးအပ်နိုင်လောက်အောင် စွမ်းအားကြီးမားလှတယ်ဆိုပေမဲ့လည်း၊ အဲဒီအငွေ့အသက်တွေ ကူးစက်ခံရတဲ့သူတွေကိုတော့ သက်သက်မဲ့ ဖျက်ဆီးခြင်းနဲ့ ရုတ်ရုတ်သဲသဲ ဖြစ်စေခြင်းတွေကိုပဲ လုပ်ဆောင်တတ်တဲ့ သတ္တဝါကြီးတစ်ကောင်အဖြစ် ပြောင်းလဲပစ်တတ်ကြတာကိုး။

ဘာပဲဖြစ်ဖြစ် အဲဒီ မှော်စွမ်းအင်နှစ်မျိုးက ဒြပ်စင်အားလုံးထဲမှာ အမှောင်ဆုံးဒြပ်စင်တွေ ဖြစ်ကြပြီး သေဆုံးခြင်းနဲ့ ပျက်စီးယိုယွင်းခြင်းတွေကို ကိုယ်စားပြုနေကြတာ ဖြစ်လို့ပါပဲ။

ဒါဆိုရင် သက်ရှိသတ္တဝါတစ်ယောက်နဲ့ သေဆုံးသွားတဲ့သူတစ်ယောက်ကြားက ခြားနားချက်က ဘာလဲ။

သူ့ရဲ့ အမြင်အရဆိုရင်တော့ ၎င်းတို့ရဲ့ ခန္ဓာကိုယ်ထဲမှာ ရှိနေတဲ့ မှော်စွမ်းအင်တွေ ပြောင်းလဲသွားတာတစ်ခုပဲ ရှိပါတယ်။

သက်ရှိသတ္တဝါတစ်ယောက်က သေဆုံးသွားတဲ့အခါ၊ သူ့ခန္ဓာကိုယ်ထဲမှာ ရှိတဲ့ အလင်းဒြပ်စင် မှော်စွမ်းအင်တွေရဲ့ နေရာမှာ အမှောင်ဒြပ်စင် မှော်စွမ်းအင်တွေက အစားထိုး ဝင်ရောက်သွားကြတာပါ။

ဒါပေမဲ့ ထူးဆန်းတာတစ်ခုကတော့ အမှောင်ဒြပ်စင်နဲ့ အဆိပ်ဒြပ်စင် မှော်စွမ်းအင်တွေက အလင်းဒြပ်စင် မှော်စွမ်းအင်တွေကို အသုံးမပြုဘဲနဲ့လည်း တစ်ခုခုကို အသက်ရှင်နေသလိုမျိုး လုပ်ဆောင်ပေးနိုင်တာပါပဲ။

ဒါပေမဲ့ အကယ်၍ သူသာ အဲဒီ သေဆုံးခြင်းစွမ်းအင်တွေထဲကို အလင်းဒြပ်စင် မှော်စွမ်းအင်တွေကို ထပ်ပြီး ဖြည့်စွက်ပေးလိုက်ရင် ဘာဖြစ်သွားမလဲ။

အကယ်၍ သူသာ အမှောင်ဒြပ်စင်နဲ့ အဆိပ်ဒြပ်စင် မှော်စွမ်းအင်တွေရဲ့ အရောအနှောထဲကို အလင်းဒြပ်စင် မှော်စွမ်းအင်တွေကို ထည့်သွင်းပေးလိုက်ရင် ဘာဖြစ်မလဲ။

မိုက်ကယ်က လက်ကို မြှောက်လိုက်ပြီး သူ့ရဲ့ ကိုယ်ပိုင် ဒြပ်စင်အမြုတေတွေဆီကနေ စွမ်းအင်တွေကို ဆွဲထုတ်လိုက်တယ်၊

စင်ကြယ်တဲ့ အလင်းဒြပ်စင် မှော်စွမ်းအင် အလင်းပွင့်လေး တစ်ပွင့်ပေါ့။

ဝိုးတိုးဝါးတား လင်းထိန်နေတဲ့ အဲဒီအလင်းလုံးလေးက အရိုးစုကြီးရဲ့ ဦးခေါင်းခွံကို ပတ်ပတ်လည် ဝိုင်းအုံနေတဲ့ အပြာရောင်သန်းနေတဲ့ အစိမ်းရောင် အလင်းတန်းလေးတစ်ခုဆီကို ဖြည်းဖြည်းချင်း လွင့်ပျံလို့ သွားခဲ့ပါတော့တယ်။

မိုက်ကယ်ရဲ့ အဆင့်မြင့်စွမ်းရည်ကြောင့်၊ သူက မှော်စွမ်းအင်တွေရဲ့ စစ်မှန်လှတဲ့ ပကတိအခြေအနေကို ရှင်းရှင်းလင်းလင်း မြင်တွေ့နိုင်ခဲ့တာ ဖြစ်ပါတယ်။

သူက အလင်းဒြပ်စင် မှော်စွမ်းအင်တွေကို အမှောင်ဒြပ်စင်နဲ့ အဆိပ်ဒြပ်စင် မှော်စွမ်းအင်တွေရဲ့ ဆင့်ကဲပတ်လမ်းထဲကို ဝင်ရောက်သွားဖို့အတွက် အမိန့်ပေးလိုက်တယ်။

သူက ဒါကို ပိုပြီးတော့တောင် တွန်းပို့လိုက်ပြီး သေဆုံးခြင်းစွမ်းအင်တွေရဲ့ ပတ်လမ်းထဲအထိ လှည့်ပတ် ဝင်ရောက်သွားစေခဲ့တာပါ။ အဲဒီလိုမျိုး လည်ပတ်မှုထဲကို ဝင်ရောက်သွားတဲ့ အချိန်မှာတင်၊ အမှောင်ဒြပ်စင် မှော်စွမ်းအင်တွေက မူလလမ်းကြောင်းကနေ ရုတ်တရက် ဆတ်ခနဲ လွဲချော်သွားခဲ့ပြီး အလင်းဒြပ်စင် မှော်စွမ်းအင်တွေဆီကို ဦးတည်သွားခဲ့ကြတယ်၊ အဲဒီအရာနှစ်ခုက သံလိုက်တွေလိုမျိုး တစ်ခုနဲ့တစ်ခု ပြင်းထန်စွာ ဆွဲငင်မိသွားကြတာကိုး။

ဒါက ပြင်းထန်တဲ့ ရိုက်ခတ်မှုတစ်ခုကို ဖြစ်ပေါ်စေခဲ့ပြီး အလင်းဒြပ်စင် မှော်စွမ်းအင်တွေက အမှောင်ဒြပ်စင် မှော်စွမ်းအင်တွေကို ဖျက်ဆီးပစ်လိုက်သလို အပြန်အလှန်အားဖြင့်လည်း ဖြိုခွဲပစ်လိုက်ကြပြန်တယ်။ ဒါကြောင့် အဆိပ်ဒြပ်စင် မှော်စွမ်းအင်တွေပဲ လမ်းကြောင်းမရှိဘဲ ဟိုဟိုဒီဒီ လွင့်ပျံလို့ ကျန်ရစ်ခဲ့ရပါတော့တယ်။

သူ့ရဲ့ ပထမဆုံး စမ်းသပ်မှုကတော့ ကျရှုံးခြင်းနဲ့ပဲ အဆုံးသတ်သွားခဲ့ရတာမို့၊ မိုက်ကယ်က လက်ကို ထပ်မံမြှောက်လိုက်ပြီး သူ့ရဲ့ ဒြပ်စင် အမြုတေတွေဆီကနေ နောက်ထပ် ထောင်နဲ့ချီတဲ့ အလင်းဒြပ်စင် မှော်စွမ်းအင်တွေကို ထုတ်ယူလိုက်ပြန်တယ်။

ဒီတစ်ခါတော့ သူက အဲဒီ ဒြပ်စင် ၃ မျိုးလုံးရဲ့ ပေါင်းစပ်မှုကို စတင်ပြီး စမ်းသပ်ပါတော့တယ်။

ထောင်နဲ့ချီတဲ့ အလင်းဒြပ်စင် မှော်စွမ်းအင် တစ်ခုချင်းစီက အမှောင်ဒြပ်စင်နဲ့ အဆိပ်ဒြပ်စင် မှော်စွမ်းအင်တွေရဲ့ အတွဲအဖက်တွေထဲကို ဝင်ရောက်သွားခဲ့ကြတယ်။ အဲဒီနောက်မှာတော့ မိုက်ကယ်က မတူညီတဲ့ ရလဒ်တစ်ခု ထွက်ပေါ်လာလိမ့်နိုးနဲ့ မတူညီတဲ့ နည်းလမ်းပေါင်း တစ်ထောင်လောက်ကို သုံးပြီး ၎င်းတို့ရဲ့ ပတ်လမ်းထဲကို တွန်းပို့ဖို့အတွက် ညွှန်ကြားချက် ပေးလိုက်တာပါ။

ဒါပေမဲ့လည်း ဖြစ်ပျက်လာတာကတော့ အတူတူပါပဲ။ အလင်းဒြပ်စင် မှော်စွမ်းအင်တွေနဲ့ အမှောင်ဒြပ်စင် မှော်စွမ်းအင်တွေက နောက်ဆုံးမှာတော့ တစ်ခုနဲ့တစ်ခု အပြီးတိုင် ပျက်ပြယ်သွားအောင်ပဲ ချေဖျက်ပစ်လိုက်ကြပြန်တာကိုး။

မိုက်ကယ်ကတော့ အရှုံးမပေးဘဲ သူ့ခန္ဓာကိုယ်ထဲကနေ နောက်ထပ် သန်းနဲ့ချီတဲ့ အလင်းဒြပ်စင် မှော်စွမ်းအင်တွေကိုပါ ထပ်မံထုတ်လွှတ်လိုက်ပြန်ပါတယ်။

နိုဗာက သူ ဘာလုပ်နေလဲဆိုတာကို ရိပ်မိသွားပြီး သူ့ရဲ့ နည်းစနစ်တွေကို သိပ္ပံနည်းကျ စမ်းသပ်မှုတစ်ခုလိုမျိုး ပြောင်းလဲပေးလိုက်တယ်၊ မတူညီတဲ့ ကွဲပြားခြားနားတဲ့ အချက်အလက်တွေနဲ့ ကိန်းသေတွေကို တစ်ပြိုင်တည်း လိုက်လံစမ်းသပ်ပေးနေခဲ့တာ ဖြစ်ရမယ်။

မိုက်ကယ် အနေနဲ့ အချိန်ဘယ်လောက်တောင် ကုန်ဆုံးသွားခဲ့မှန်း မသိလိုက်ရဘဲ နောက်ဆုံးမှာတော့ မှန်ကန်တဲ့ လမ်းကြောင်းတစ်ခုကို ရှာဖွေတွေ့ရှိသွားခဲ့ပါပြီ။

အစောပိုင်းကတည်းက အမှောင်ဒြပ်စင်နဲ့ အဆိပ်ဒြပ်စင် မှော်စွမ်းအင်တွေကို ၎င်းတို့ရဲ့ ပတ်လမ်းကနေ သီးခြားစီ အရင်ဆုံး ခွဲထုတ်ပစ်လိုက်ခြင်းအားဖြင့်၊ သူက အမှောင်ဒြပ်စင် မှော်စွမ်းအင်တွေနဲ့ ဝေးရာမှာတင် အလင်းဒြပ်စင် မှော်စွမ်းအင်တွေကို အဲဒီအရောအနှောထဲကို ထည့်သွင်းပေးနိုင်ခဲ့တာ ဖြစ်ပါတယ်။

စောစောတုန်းက သူ သိရှိခဲ့ရသလိုမျိုးပဲ၊ အလင်းဒြပ်စင်နဲ့ အဆိပ်ဒြပ်စင် မှော်စွမ်းအင်တွေက တစ်ခုနဲ့တစ်ခု ကောင်းကောင်း အထောက်အကူပြုနိုင်ကြတာမို့၊ တစ်ခုချင်းစီရဲ့ မှော်အတတ် ဂုဏ်သတ္တိတွေကို ပိုမိုမြင့်မားလာစေမယ့် အားကောင်းလှတဲ့ ဆက်သွယ်မှုတစ်ခုကို ဖန်တီးပေးနိုင်ခဲ့ကြတာကိုး။

အဲဒီနောက်မှာတော့ မိုက်ကယ်က အမှောင်ဒြပ်စင် မှော်စွမ်းအင်တွေကိုပါ အဲဒီအရောအနှောထဲကို ထည့်သွင်းပေးလိုက်ပြန်တယ်။ ဒီတစ်ခါတော့ အလင်းဒြပ်စင်နဲ့ အဆိပ်ဒြပ်စင် မှော်စွမ်းအင်တွေကြားက ဆက်သွယ်မှုက အမှောင်ဒြပ်စင် မှော်စွမ်းအင်တွေကို ဟန့်တားပေးနိုင်လောက်အောင် အားကောင်းနေခဲ့တာကြောင့် အလင်းဒြပ်စင် မှော်စွမ်းအင်တွေနဲ့ ရိုက်ခတ်ပြီး တစ်ခုနဲ့တစ်ခု ပျက်ပြယ်သွားမယ့် ဘေးကနေ ကာကွယ်ပေးနိုင်ခဲ့ပြီ ဖြစ်ပါတယ်။

သူက သေဆုံးခြင်းစွမ်းအင်တွေထဲကို အလင်းဒြပ်စင် မှော်စွမ်းအင်တွေကို အောင်အောင်မြင်မြင် ထည့်သွင်းပေးနိုင်ခဲ့တာ ဖြစ်ပါတယ်။

ဒါပေမဲ့လည်း ... ပြဿနာအသစ်တစ်ခု ထပ်ပြီး ပေါ်လာခဲ့ပြန်တယ်။ အလင်းဒြပ်စင် မှော်စွမ်းအင်တွေက အဆမတန် အစွမ်းပြင်းလွန်းနေခဲ့တာကြောင့် အရိုးစုကြီးရဲ့ ကိုယ်ပိုင်တည်ဆောက်ပုံတစ်ခုလုံးကိုပါ စတင်ပြီး သန့်စင်ပေးနေခဲ့တာ ဖြစ်ပါတယ်။

မိုက်ကယ်က အဲဒီစွမ်းအင်တွေက အရိုးတွေကို စတင်ပြီး ဝါးမြိုဖျက်ဆီးနေတာကို မြင်တွေ့လိုက်ရမိပြီး၊ ၎င်းတို့ကို ဖြူဖွေးလှတဲ့ ပြာမှုန့်တွေအဖြစ် ပြောင်းလဲပစ်နေခဲ့တာကိုး။

သေဆုံးခြင်းစွမ်းအင်တွေကတော့ အမှောင်ဒြပ်စင် စွမ်းအင်တွေရဲ့ အမြောက်အမြား ပေါင်းစပ်မှုမျိုးကို မရှိမဖြစ် လိုအပ်နေတုန်းပါပဲ။

မိုက်ကယ် စဉ်းစားမိတဲ့ တစ်ခုတည်းသော အဖြေကတော့ အမှောင်ဒြပ်စင် မှော်စွမ်းအင်တွေထဲကို လျှပ်စီးဒြပ်စင် မှော်စွမ်းအင်တွေကိုပါ ထပ်ပြီး ဖြည့်စွက်ပေးလိုက်ဖို့ပါပဲ။ ဘာပဲဖြစ်ဖြစ် အဲဒီ မှော်စွမ်းအင်နှစ်မျိုးကလည်း အလင်းဒြပ်စင်နဲ့ အဆိပ်ဒြပ်စင်လိုမျိုးပဲ တစ်ခုနဲ့တစ်ခု အပြန်အလှန် အထောက်အကူပြုနိုင်တဲ့ ဆက်သွယ်မှုမျိုး ရှိကြတာကိုး။

မိုက်ကယ် အနေနဲ့ ဒါက အရိုးစုကြီးရဲ့ ခန္ဓာကိုယ် သန့်စင်ခံရမယ့် ပြဿနာကို သေချာပေါက် ဖြေရှင်းပေးနိုင်လိမ့်မယ်လို့ ယုံကြည်နေခဲ့ပါတယ်။

ဒါပေမဲ့လည်း ... သူက ကိုယ်တိုင် ကြုံတွေ့ခဲ့ရတဲ့ အတွေ့အကြုံတွေအရ အမှောင်၊ အဆိပ်၊ အလင်း နဲ့ လျှပ်စီး ဆိုတဲ့ ဒြပ်စင်မှော်စွမ်းအင် ၄ မျိုးစလုံးရဲ့ ပေါင်းစပ်မှုကတော့ ဟိုတစ်ခေါက်က ထိပ်သီးသားရဲကြီးလိုမျိုးပဲ ဗုံးအသေးစားလေးတစ်ခုလိုမျိုး ပေါက်ကွဲသွားစေနိုင်တယ်ဆိုတာကို ကောင်းကောင်း သတိပြုမိထားတာ ဖြစ်ပါတယ်။

ဒါက သူ စိုးရိမ်ပူပန်နေရတဲ့ ပြဿနာတစ်ခု ဖြစ်ခဲ့ရပေမဲ့၊ တကယ်တမ်းကျတော့ အဖြေအမှန်က သူ့ရဲ့ ရှေ့တည့်တည့်မှာတင် ရှိနေခဲ့မှန်း သူ နောက်မှ ရိပ်မိသွားခဲ့ရတာပါ။

သူကိုယ်တိုင်ကလည်း ဒြပ်စင်အားလုံးရဲ့ ပေါင်းစပ်မှုတစ်ခု မဟုတ်ဘူးလား။

သဟဇာတ ပေါင်းစည်းခြင်း မှော်စွမ်းအင်ဆိုတာကတော့ လက်ရှိ သိထားကြတဲ့ အခြေခံဒြပ်စင်ကြီး ၈ မျိုးစလုံးရဲ့ ပေါင်းစပ်မှုတစ်ခုပဲ ဖြစ်ပါတယ်။

ပြီးတော့ မိုက်ကယ်အနေနဲ့ အဲဒီ သဟဇာတ ပေါင်းစည်းခြင်း မှော်စွမ်းအင်တွေကို မီသရယ် မှော်ဝင်ပစ္စည်း တစ်ခုထဲကို ထည့်သွင်းဖို့ ကြိုးစားခဲ့တုန်းက၊ အဲဒီလိုမျိုး ပေါင်းစပ်မှုက အလွန်ကို မတည်ငြိမ်ဘဲ ပြင်းပြင်းထန်ထန် ပေါက်ကွဲထွက်သွားတတ်တာကို ရှာဖွေတွေ့ရှိခဲ့တာလေ။

ဒါဆိုရင် သူကိုယ်တိုင်ကျတော့ ဘာလို့ ပေါက်ကွဲထွက်မသွားခဲ့ရတာလဲ။ သူ နိုးထပေးခဲ့တဲ့ ရီနေးတားတွေထဲက ဘယ်သူတစ်ဦးတစ်ယောက်မှကော ၎င်းတို့ရဲ့ ဆင့်ကဲပြောင်းလဲမှု အခိုက်အတန့်မှာတင် ဘာလို့ အပိုင်းအစတွေအဖြစ် ပေါက်ကွဲပျက်စီးမသွားခဲ့ကြရတာလဲ။

အဖြေအမှန်ကတော့ သက်ရှိသတ္တဝါတစ်ယောက်ရဲ့ ဖြစ်တည်မှုက သက်မဲ့ပစ္စည်းတစ်ခုနဲ့ လုံးဝကို ကွဲပြားခြားနားနေလို့ပဲ ဖြစ်ရမယ်။

ပြီးတော့ ဒီအရိုးစုကြီးကလည်း၊ ခန္ဓာကိုယ်မှာ အရိုးတွေသက်သက်ပဲ ကျန်ရစ်ခဲ့တယ်ဆိုဦးတော့၊ တစ်နည်းအားဖြင့် ပြောရရင်တော့ အသက်ရှင်နေတုန်းပဲလေ။ ဆိုလိုတာကတော့ ၎င်းက အစိတ်စိတ်အမွှာမွှာ ပေါက်ကွဲပျက်စီးမသွားဘဲ သဟဇာတ ပေါင်းစည်းခြင်း မှော်စွမ်းအင်တွေရဲ့ ပေါင်းစပ်မှုကို သေချာပေါက် လက်ခံနိုင်စွမ်း ရှိနေမှာ ဖြစ်ပါတယ်။

ဒါဆိုရင် အဖြေကတော့ ရှင်းရှင်းလေးပါပဲ။

သူက ဒီမသေမျိုးမိစ္ဆာကြီးကို အပြည့်အဝ နိုးထပေးရမှာ ဖြစ်ပါတယ်။

မိုက်ကယ်က လက်ကို မြှောက်လိုက်ပြီး သူ့ရဲ့ နောက်ထပ် အဆင့်မြင့်စွမ်းရည်တစ်ခု ဖြစ်တဲ့ ဆုလာဘ် အပ်နှင်းခြင်းကို စတင်ပြီး အသုံးချလိုက်ပါတော့တယ်။

နိုဗာက ဂူသင်္ချိုင်းအတွင်းထဲမှာ ရှိနေတဲ့ အမှောင်ဒြပ်စင်နဲ့ အဆိပ်ဒြပ်စင် မှော်စွမ်းအင် တစ်ခုချင်းစီကို လိုက်လံထိန်းချုပ်လိုက်ပြီး အရိုးစုကြီးရဲ့ သေဆုံးခြင်းစွမ်းအင်တွေအဖြစ် ဖွဲ့စည်းပေးလိုက်တယ်။ အဲဒီနောက်မှာတော့ ၎င်းတို့ကို နေရာတစ်ခုတည်းမှာ လာပြီး စုစည်းစေခဲ့တာဖြစ်လို့၊ အဆင့်မြင့်စွမ်းရည်ကနေတစ်ဆင့် အပြည့်အဝ ဖမ်းဆုပ်နိုင်မယ့် ဖြစ်တည်မှုတစ်ခုအဖြစ် ပုံဖော်ပေးလိုက်တာ ဖြစ်ရမယ်။

မိုက်ကယ်က အရိုးစုကြီးရဲ့ အပြာရောင်သန်းနေတဲ့ အစိမ်းရောင် အလင်းပွင့် မျက်လုံးကြီးတွေကို စိုက်ကြည့်လိုက်ပြီး၊ အရိုးစုကြီးကလည်း သူ့ကို မျှော်လင့်ချက်တွေပြည့်နှက်နေတဲ့ မျက်ဝန်းတွေနဲ့ ပြန်လည်စိုက်ကြည့်နေခဲ့တာကြောင့်၊

သူက စကားလုံးတစ်လုံးတည်းကိုပဲ ပြတ်သားစွာ ပြောလိုက်ပါတော့တယ်။

* * * * * * * * *

စာစဉ်(၁၉)

အခန်း (၂၂၄)

ဖြူဖွေးလှတဲ့ အလင်းတန်းကြီးတစ်ခုက အရိုးစုကြီးရဲ့ ခန္ဓာကိုယ်တစ်ခုလုံးကို စတင်ပြီး ဖုံးလွှမ်းသွားခဲ့တယ်၊ အဆင့်မြင့်စွမ်းရည်ရဲ့ တန်ခိုးတွေနဲ့ ၎င်းကို ရေချိုးပေးလိုက်သလိုမျိုးပေါ့။

အဲဒီစွမ်းအင်တွေက မိုက်ကယ်ရဲ့ သွေးကြောတွေထဲကို လှိုင်းလုံးလို စီးဝင်လာခဲ့ပြီး ဒြပ်စင်မှော်စွမ်းအင် ၈ မျိုးစလုံးက တစ်ခုနဲ့တစ်ခု ပေါင်းစပ်သွားကြရာကနေ သဟဇာတ ပေါင်းစည်းခြင်း မှော်စွမ်းအင်အဖြစ် ပြောင်းလဲသွားခဲ့ရတယ်။

သူ့ရဲ့ နှုတ်ခမ်းဝကနေ စကားလုံးတွေ ထွက်ပေါ်လာတာနဲ့အမျှ၊ သူက အရိုးစုကြီးရဲ့ ခန္ဓာကိုယ်ထဲက သေဆုံးခြင်းစွမ်းအင်တွေနဲ့ တိုက်ရိုက် ထိတွေ့မိသွားခဲ့ပြီ ဖြစ်ပါတယ်။

ပြီးတော့ သာမန် သက်ရှိသတ္တဝါတစ်ယောက်လိုပဲ၊ သူ့ရဲ့ အဆင့်မြင့်စွမ်းရည်က အရိုးစုကြီးရဲ့ ကိုယ်ပိုင်မှော်စွမ်းအင် တည်ဆောက်ပုံကိုပါ စတင်ပြီး ပြောင်းလဲ ဆင့်ကဲတိုးတက်လာစေခဲ့တယ်၊ သဟဇာတ ပေါင်းစည်းခြင်း မှော်စွမ်းအင်တွေရဲ့ ဆန်းကြယ်မှုတွေကိုပါ ၎င်းရဲ့ ခန္ဓာကိုယ်ထဲကို စိမ့်ဝင်သွားစေခဲ့တာကိုး။

အရိုးစုကြီးရဲ့ ခန္ဓာကိုယ်ထဲမှာ ပင်ကိုယ်ကတည်းက ရှိနေခဲ့တဲ့ အမှောင်ဒြပ်စင်နဲ့ အဆိပ်ဒြပ်စင် မှော်စွမ်းအင်တွေက သဟဇာတ ပေါင်းစည်းခြင်း မှော်စွမ်းအင်တွေရဲ့ တရစပ် ရိုက်ခတ်မှုတွေကို ခံလိုက်ရပြီး၊ ဒြပ်စင်မှော်စွမ်းအင် အားလုံးရဲ့ ဖိအားကြောင့် အလင်းဒြပ်စင် မှော်စွမ်းအင်တွေကိုပါ သေဆုံးခြင်းစွမ်းအင်တွေရဲ့ ပတ်လမ်းထဲအထိ မရမက ဝင်ရောက်သွားစေခဲ့တာ ဖြစ်ပါတယ်။

တစ်ခုနဲ့တစ်ခု အပြီးတိုင် ပျက်ပြယ်သွားအောင် ချေဖျက်ပစ်ရမယ့် အမှောင်ဒြပ်စင်နဲ့ အလင်းဒြပ်စင် မှော်စွမ်းအင်တွေက၊ အခုတော့ ဖျက်ဆီးခြင်းလမ်းကြောင်း မဟုတ်ဘဲ တစ်ခုနဲ့တစ်ခု ဆက်သွယ်မှုအသစ်တစ်ခုကိုပါ စတင်ပြီး ဖန်တီးလိုက်ကြပြန်တယ်၊ သဟဇာတ ပေါင်းစည်းခြင်း မှော်စွမ်းအင်တွေရဲ့ ဆန်းကြယ်ပြီး ဆန့်ကျင်ဘက်ဖြစ်နေတဲ့ ဆက်ဆံရေးတွေက အဲဒီ ဒြပ်စင်နှစ်မျိုးလုံးကို တစ်ခုချင်းစီရဲ့ ပတ်လမ်းထဲမှာ အဆင်ပြေပြေ အတူတူ ယှဉ်တွဲ ရှင်သန်နိုင်စေခဲ့တာ ဖြစ်လို့ပါပဲ။

အရိုးစုကြီးကို စိုက်ကြည့်ရင်းနဲ့ ရရှိလာခဲ့တဲ့ ဗဟုသုတတွေ အားလုံးက ဒီအရိုးစုကြီးကို အောင်အောင်မြင်မြင် နိုးထပေးနိုင်ဖို့အတွက် အများကြီး အထောက်အကူ ဖြစ်စေခဲ့တာပါ။ မိုက်ကယ် အနေနဲ့ အကယ်၍သာ သေဆုံးခြင်းစွမ်းအင်တွေက ဘယ်လိုမျိုး အလုပ်လုပ်သလဲဆိုတာကို သေချာနားမလည်ခဲ့ဘူးဆိုရင်၊ သူ ဘယ်လောက်ပဲ ကြိုးစားကြိုးစား ဒီမသေမျိုးသတ္တဝါကြီးကို နိုးထပေးနိုင်ခဲ့မှာ မဟုတ်ဘူးဆိုတာကို တိတိကျကျ သိထားတာ ဖြစ်ပါတယ်။

ဖြည်းဖြည်းချင်းပဲ၊ သေဆုံးခြင်းစွမ်းအင်တွေရဲ့ ပျက်စီးယိုယွင်းစေတဲ့ စွမ်းအားတွေက စတင်ပြီး ငြိမ်သက်သွားခဲ့ရပြီး၊ ၎င်းက မသေမျိုးအရိုးစုကြီးရဲ့ အတွင်းထဲမှာ ရှိနေတဲ့ အကန့်အသတ်ရှိတဲ့ အသိစိတ်လေးကိုပါ ထပ်မံဖျက်ဆီးခြင်း လုံးဝ မရှိတော့ပါဘူး။

အရိုးစုကြီးရဲ့ ရင်ညွန့်ရိုးအတွင်းထဲက အင်အားအချက်အချာ တစ်ခုချင်းစီ၊ ၎င်းရဲ့ ကြယ်ကိုးပွင့်အဆင့်ရှိတဲ့ စွမ်းအင်အလင်းပွင့်တွေ အားလုံးဟာ အလင်းဒြပ်စင် မှော်စွမ်းအင်တွေ ခန္ဓာကိုယ်အနှံ့ကို အပြည့်အဝ စိမ့်ဝင်လာတာနဲ့အမျှ အခြေခံကစပြီး လုံးဝဥဿုံ ပြောင်းလဲသွားခဲ့ရပြီ ဖြစ်ပါတယ်။

လင်းထိန်လှတဲ့ အလင်းတန်း လှိုင်းလုံးကြီးတစ်ခုက အရိုးစုကြီးရဲ့ ခန္ဓာကိုယ်ကနေ ဝုန်းခနဲ ပေါက်ကွဲထွက်ပေါ်လာခဲ့တာကြောင့် မိုက်ကယ်ကို နောက်ဘက်ဆီကို ခြေတစ်လှမ်း ဆုတ်သွားစေခဲ့ရတယ်။

သူကိုယ်တိုင်တောင် အဲဒီမြင်ကွင်းကြောင့် မျက်စိတွေ ခေတ္တမျှ ကျိန်းစပ်သွားခဲ့ရမိတာပေါ့။ တကယ့် နေမင်းကြီးကို တည့်တည့် စိုက်ကြည့်နေရသလိုမျိုးတောင် ခံစားလိုက်ရမိတာ ဖြစ်ပါတယ်။ ဘာပဲဖြစ်ဖြစ် ဒါက သူ့ဘဝမှာ ဒီလောက်အထိ ပြင်းထန်လှတဲ့ အစွမ်းအစတွေ ရှိနေတဲ့ ဖြစ်တည်မှုတစ်ခုကို ပထမဆုံးအကြိမ်အဖြစ် နိုးထပေးခဲ့တာ ဖြစ်လို့ပါပဲ။

စက္ကန့်အနည်းငယ်မျှသာ ကြာလိုက်ပြီးတဲ့နောက်မှာတော့၊ အလင်းတန်းတွေက ဖြည်းဖြည်းချင်း ပျယ်ဖျော့သွားခဲ့ရပြီး ဂူဗိမာန်အတွင်းထဲမှာတော့ သာမန်အရိုးစုတစ်ခုလိုမျိုး မတ်တတ်ရပ်နေတဲ့ အရိုးစုကြီးတစ်စင်းသာ ကျန်ရစ်ခဲ့ပါတော့တယ်။

မသေမျိုးသတ္တဝါကြီးရဲ့ ပတ်ပတ်လည်မှာ အုပ်ဆိုင်းနေခဲ့တဲ့ သေဆုံးခြင်းစွမ်းအင် ကြိုးမျှင်လေးတွေက လုံးဝဥဿုံ ပျောက်ကွယ်သွားခဲ့ရပြီဖြစ်ကာ၊ ၎င်းရဲ့ အပြာရောင်သန်းနေတဲ့ အစိမ်းရောင် အလင်းပွင့် မျက်လုံးကြီးတွေသာ ကျန်ရစ်ခဲ့တာ ဖြစ်ပါတယ်။

မိုက်ကယ် အနေနဲ့ ကျောင်းက ဓာတ်ခွဲခန်းထဲမှာ မြင်တွေ့နေကျ သာမန်အရိုးစုတစ်ခုကို ကြည့်နေရသလိုမျိုးတောင် ထင်မှတ်လိုက်မိတာပေါ့။

အရိုးစုကြီးက သူ့ရဲ့ လက်မောင်းတွေကို ပြန်ပြီး စိုက်ကြည့်နေခဲ့မိတယ်။ မျက်နှာ အမူအရာ မရှိဘူးဆိုဦးတော့၊ ၎င်းရဲ့ စိတ်ထဲမှာ တအံ့တဩ ဇဝေဇဝါ ဖြစ်နေတဲ့ ပုံစံကတော့ အထင်သား သိသာလွန်းနေခဲ့ရပါတယ်။

၎င်းက မိုက်ကယ်ကို လှမ်းကြည့်လိုက်တယ်။

"ငါ ... သေသွားခဲ့တာလား"

သူကတော့ ကသိကအောက် နိုင်စွာနဲ့ပဲ ခေါင်းညိတ်ပြလိုက်မိတယ် "ဟုတ်တယ်၊ မင်း သေသွားခဲ့တာ။ မင်းက အခု မင်းရဲ့ ကိုယ်ပိုင် ဂူသင်္ချိုင်းပေါ်မှာ မတ်တတ်ရပ်နေတာလေ"

အရိုးစုကြီးက ပတ်ဝန်းကျင်ကို လှည့်ပတ်ကြည့်လိုက်ပြီး သူ့ရဲ့ ကိုယ်ပိုင်ဂူသင်္ချိုင်းရဲ့ ဗိသုကာလက်ရာတွေကို မြင်လိုက်ရပေမဲ့၊ ၎င်းရဲ့ မျက်လုံးတွေထဲမှာတော့ ဒါကို မှတ်မိတဲ့ အရိပ်အယောင်လေး တစ်ချက်မျှ ရှိမနေခဲ့ပါဘူး။

"ဒါဆိုရင် ... မင်းက ငါ့ကို သေခြင်းတရားကနေ ပြန်လည်နိုးထလာအောင် လုပ်ပေးခဲ့တဲ့ မှော်ဆရာတစ်ယောက်လို့ ငါ ယူဆလို့ရမလား"

"အတိအကျ ပြောရရင်တော့ မဟုတ်ဘူး။ ငါ မင်းကို ဒီဂူသင်္ချိုင်းထဲမှာ မသေမျိုးသတ္တဝါကြီးတစ်ကောင်အဖြစ် စတင်တွေ့ရှိခဲ့တာ၊ အဲဒီနောက်မှာတော့ ငါက မင်းကို ... နိုးထပေးခဲ့တာပေါ့။ မင်း အတိတ်က ဘယ်သူလဲဆိုတာကိုရော မှတ်မိသေးလား" သူက အရိုးစုကြီးကို မေးလိုက်မိတယ်။

အကယ်၍ ဆာဂျွန် ပြောခဲ့တဲ့ စကားတွေသာ မှန်ကန်မယ်ဆိုရင်၊ ဟောဒီ ဂူသင်္ချိုင်းက စစ်သူကြီးဂရီးဗပ်စ်ရဲ့ နောက်ဆုံး အနားယူရာ နေရာ ဖြစ်ရပါလိမ့်မယ်။ ဒါကြောင့် သူ့အနေနဲ့ ဒီအရိုးစုကြီးက ဂရီးဗပ်စ် ကိုယ်တိုင် ဖြစ်ရမယ်လို့ တိတိကျကျ ခန့်မှန်းလိုက်မိတာပါပဲ။

"ငါ ... မသိဘူး။ ငါ အတိတ်တုန်းက ဘယ်သူလဲ၊ ဘာလဲဆိုတာကို ဘာတစ်ခုမှ မှတ်မိခြင်း မရှိတော့ဘူး၊" အရိုးစုကြီးက ဆိုတယ် "ဒါပေမဲ့ ..."

အဲဒီနောက်မှာတော့ အရိုးစုကြီးက သူ့ရဲ့ အရိုးတွေကို ပြန်ကြည့်လိုက်မိပြန်တယ်။ ၎င်းက သူ့လက်ထဲမှာ မျက်စိနဲ့မမြင်နိုင်တဲ့ ဓားတစ်စင်းကို တင်းတင်းကြပ်ကြပ် ဆုပ်ကိုင်ထားဖို့အတွက် မရမက ကြိုးစားနေခဲ့မိတာကိုး။ အဲဒီအရာကို သူ့လက်ဖဝါးထဲမှာ ပုံဖော်ကြည့်လိုက်ရုံမျှနဲ့တင် ၎င်းကို ... နွေးထွေးတဲ့ ခံစားချက်တစ်ခု ရရှိစေခဲ့တာ ဖြစ်ရမယ်။

"ငါက အတိတ်ဘဝတုန်းက တကယ့်ကို ကြီးမြတ်တဲ့ စစ်သည်တော်တစ်ယောက် ဖြစ်ခဲ့ရမယ်၊" အရိုးစုကြီးက ဆိုတယ် "ငါ့ခန္ဓာကိုယ်က စစ်ပွဲတွေအတွက်ပဲ သီးသန့် တည်ဆောက်ထားတာ ဖြစ်မှန်း ငါ သိနေတယ်။ လက်ထဲမှာ လက်နက်တစ်ခုကို ကိုင်ဆောင်ထားရတာက ငါ့အတွက် အသက်ရှူရသလိုမျိုး သဘာဝကျလွန်းနေလို့ပဲ"

အဲဒီနောက်မှာတော့ ၎င်းက သူ့ရဲ့ ခန္ဓာကိုယ်ကို ပြန်ကြည့်လိုက်မိပြီး၊ သူက ဘာဖြစ်လို့ ကိုယ်ပိုင်အလိုဆန္ဒတွေအတိုင်း လှုပ်ရှားနိုင်နေရတာလဲ၊ စကားတွေ ပြောနိုင်နေရတာလဲဆိုတာကို ဇဝေဇဝါ ဖြစ်နေခဲ့မိပြန်တာပေါ့။

"ငါ့ရဲ့ အတိတ်အကြောင်းကို ဘာမှမသိဘူးဆိုဦးတော့၊ မသေမျိုးသတ္တဝါ တစ်ကောင်မှာ ကိုယ်ပိုင် အသိဉာဏ်မှတ်ဉာဏ် ရှိမနေဘူးဆိုတာကိုတော့ ငါ ကောင်းကောင်း သိထားတယ်။ ၎င်းက အမိန့်ပေးတာတွေကို နားထောင်ဖို့နဲ့ ဖျက်ဆီးပစ်ဖို့တစ်ခုပဲ သိတာလေ"

အဲဒီနောက်မှာတော့ ၎င်းက မိုက်ကယ်ကို စိုက်ကြည့်လိုက်ပြန်တယ် "မင်းက နတ်ဘုရား တစ်ပါးလား"

"မဟုတ်ပါဘူး၊ မဟုတ်ပါဘူး၊" သူက လက်နှစ်ဖက်ကို အပြစ်ကင်းစင်စွာ ပြရင်း ပြန်လည်ဖြေကြားလိုက်မိတယ် "ငါ့မှာ ထူးခြားတဲ့ စွမ်းအားအချို့ ရှိနေရုံသက်သက်ပါပဲ"

"ဟင် ... ငါ သေဆုံးသွားခဲ့ပြီးကတည်းက အချိန်ဘယ်လောက်တောင် ကုန်ဆုံးသွားခဲ့မှန်း မသိရပေမဲ့၊ မှော်ပညာက ငါ ထင်ထားတာထက် အများကြီး ပိုပြီး ဆင့်ကဲတိုးတက်လာခဲ့ပုံရတယ်။ ဘာပဲဖြစ်ဖြစ် တို့ခေတ်တုန်းက အဆင့်မြင့်မှော်ဆရာကြီးတွေတောင် မင်း အခုလေးတင် လုပ်ပြသွားတဲ့ အရာမျိုးကို ဘယ်လိုမှ လုပ်နိုင်ကြမှာ မဟုတ်ဘူး။ အနည်းဆုံးတော့ ... ငါ အဲဒီလိုပဲ ထင်တာပဲ"

အရိုးစုကြီးက သူ့ရဲ့ စကားလုံးတွေအပေါ် ကိုယ်တိုင်တောင် ဇဝေဇဝါ ဖြစ်နေခဲ့မိပုံပါပဲ၊ သူက ဘာဖြစ်လို့ အဲဒီအချက်ကို ကွက်ကွက်ကွင်းကွင်း သိနေရသလဲဆိုတာကို မတွေးတတ်တော့သလိုမျိုးပေါ့။

စက္ကန့်အနည်းငယ်မျှ ကြာလိုက်ပြီးတဲ့နောက်မှာတော့၊ အရိုးစုကြီးက သူ့ရဲ့ ဇဝေဇဝါ ဖြစ်မှုတွေကို မေ့ပစ်လိုက်ပြီး မိုက်ကယ်ဘက်ကို လှည့်လာခဲ့ပါတော့တယ်။

"မင်းကြောင့်သာ မဟုတ်ရင် ငါ အခုလိုမျိုး အသက်ပြန်ရှင်လာနိုင်စရာ အကြောင်းမရှိဘူး၊" အရိုးစုကြီးက ဆိုတယ် "ငါ ဒါကို ခံစားမိလိုက်တယ်။ ငါ့ရဲ့ ဝိညာဉ်တစ်ခုလုံးက မင်းအပေါ်မှာ ကျေးဇူးကြွေး တင်ရှိသွားခဲ့ပြီ ဖြစ်ရမယ်"

"ရပါတယ်။ ငါက သေဆုံးခြင်းစွမ်းအင်တွေက ဘယ်လိုမျိုး အလုပ်လုပ်သလဲဆိုတာကို ကိုယ်တိုင် မျက်မြင်တွေ့ချင်လို့ စမ်းကြည့်လိုက်ရုံသက်သက်ပါ၊" သူက ဆိုတယ် "မင်း လုပ်ချင်တာမှန်သမျှကို စိတ်ကြိုက် လွတ်လွတ်လပ်လပ် သွားရောက်လုပ်ဆောင်နိုင်ပါတယ်"

"အဲဒီလိုဆိုရင်တော့၊ ကျေးဇူးပြုပြီး ငါ့ကို မင်းရဲ့ အဖော်တစ်ယောက်အနေနဲ့ ခေါ်ဆောင်သွားပေးပါဦး။ ငါ့မှာ အရိုးတွေသက်သက်ပဲ ကျန်ရစ်ခဲ့တယ်ဆိုဦးတော့၊ အဲဒါတွေကို ဘယ်လိုအသုံးချရမလဲဆိုတာကိုတော့ ငါ မှတ်မိနေတုန်းပါပဲ။ ငါ့ရဲ့ စိတ်ထဲမှာ၊ အကယ်၍ ငါ့မှာ စိတ်တစ်ခု ရှိနေဦးမယ်ဆိုရင်ပေါ့လေ၊ မင်းအတွက် အသုံးဝင်မယ့် အတိတ်က ဗဟုသုတတွေ အများကြီး ရှိနေဦးမှာပါ။

ငါ့မှာ တောင်းဆိုချက်တစ်ခုပဲ ရှိပါတယ်။ ငါ ဟောဒီ ကမ္ဘာကြီးရဲ့ လက်ရှိ အခြေအနေတွေကို ကိုယ်တိုင် မြင်တွေ့ချင်မိလို့ပါ။ ငါ သေဆုံးသွားပြီးတဲ့နောက်မှာ အရာရာတိုင်း ပြောင်းလဲသွားခဲ့ပြီဆိုဦးတော့၊ တစ်ခုခုက ငါ့ရဲ့ ဦးနှောက်ကို လာပြီး လှုပ်နှိုးပေးမလား၊ အတိတ်က ငါ ဘယ်သူလဲဆိုတာကို ပြန်လည်မှတ်မိလာအောင် ကူညီပေးမလားဆိုတဲ့ မျှော်လင့်ချက်လေးတစ်ခုကိုတော့ ငါ ဆက်ပြီး ဆုပ်ကိုင်ထားချင်ပါသေးတယ်"

အရိုးစုကြီးရဲ့ ရိုးသားလှတဲ့ တောင်းဆိုချက်က မိုက်ကယ်ကို စာနာစိတ်တွေ ဖြစ်ပေါ်လာစေခဲ့တယ်။ ဘာပဲဖြစ်ဖြစ်၊ အကယ်၍ နတ်ဘုရားမသာ သူ့ကို ပြန်လည်ဝင်စားလာတဲ့ အချိန်မှာ သူ့ရဲ့ အတိတ်က မှတ်ဉာဏ်တွေကို သိမ်းဆည်းထားခွင့် မပြုခဲ့ဘူးဆိုရင်၊ သူကိုယ်တိုင်လည်း သူ့ရဲ့ ဘဝတစ်ခုလုံး ပျောက်ဆုံးနေသလိုမျိုး ခံစားရပြီး တကယ့်ကို စိတ်ပျက်လက်ပျက် ဖြစ်နေမိမှာ သေချာတာကိုး။

"ရတာပေါ့၊ မင်း တို့နဲ့အတူ လိုက်ခဲ့လို့ ရပါတယ်"

မိုက်ကယ် အနေနဲ့ ရှေးဟောင်းခေတ်က ကြယ်ကိုးပွင့်အဆင့်ရှိတဲ့ စစ်သူကြီးတစ်ယောက်ကို ငြင်းပယ်စရာ အကြောင်းမရှိပါဘူး။ ပြီးတော့ အရိုးစုကြီး ပြောပြပုံအရဆိုရင်တော့၊ ၎င်းက အတိတ်က သူ့ရဲ့ စွမ်းအားအချို့ကိုတော့ အနည်းဆုံး ပြန်လည်မှတ်မိနေတုန်း ဖြစ်ပုံရတာပဲလေ။

"ခဏလေးဦးနော်၊" လို့ ဖတ်ချ်က မိုက်ကယ်ရဲ့ အရိပ်ပုံသဏ္ဌာန်ထဲကနေ ဆတ်ခနဲ ခုန်ထွက်ရင်း အော်ပြောလိုက်ပါတော့တယ်။

"မင်းက ဘယ်သူလဲ၊ ဟောဒီ စလိုင်းမ်ကောင်လေး" အရိုးစုကြီးက မေးလိုက်မိတယ်။

"ငါက သခင်ကြီးရဲ့ အဖိုးတန် အိမ်မွေးတိရစ္ဆာန်လေးဖြစ်ပြီး၊ ပထမဆုံးနဲ့ တစ်ဦးတည်းသော အဖော်တစ်ယောက် ဖြစ်တယ်။ ဒါပေမဲ့လည်း၊ မင်းက တော်တော်လေး သန်မာတဲ့ပုံ ပေါက်နေတာကြောင့်၊ တို့တွေနဲ့အတူ လိုက်ခွင့်ပြုဖို့အတွက် ငါ သဘောတူပေးနိုင်ပါတယ် ... စည်းကမ်းချက်တစ်ခုတော့ ရှိတယ်နော်"

အရိုးစုကြီးက ဖတ်ချ်ရဲ့ ရှေ့မှာ ချက်ချင်းပဲ ဒူးထောက်ထိုင်ချလိုက်ပါတော့တယ်။ "ငါ မင်းကို ငါ့ရဲ့ စီနီယာတစ်ယောက်အနေနဲ့ တလေးတစား ဆက်ဆံပါ့မယ်" လို့ ၎င်းက ဆိုတယ်။

"ဟိုးဟိုးဟိုး။ မင်းက ဒီလောက်အထိ လူကောင်းတစ်ယောက် ဖြစ်နေလိမ့်မယ်လို့ ငါမထင်ထားဘူး။ အခုတော့ ငါ သဘောတူလိုက်ပြီ၊ ရတယ်မလား သခင်ကြီး"

ဖတ်ချ်က အရူးတစ်ယောက်လိုမျိုး တဟားဟား ရယ်မောလိုက်ပြီး အရိုးစုကြီးရဲ့ ဦးခေါင်းခွံအပေါ်ကို ဆတ်ခနဲ ခုန်တက်လိုက်ပါတော့တယ်။

မိုက်ကယ် အနေနဲ့ သူက ကြယ်ကိုးပွင့်နယ်ပယ်ထဲက စစ်သည်တော်ကြီးတစ်ယောက်ရဲ့ ခေါင်းကို တက်နင်းနေတာ ဖြစ်ကြောင်း ဖတ်ချ်ကို ထုတ်ပြောရမလားဆိုတာကို ဇဝေဇဝါ ဖြစ်သွားမိပေမဲ့ ... ဘာပဲဖြစ်ဖြစ်လေ။ သူကတော့ ပျော်ရွှင်နေပုံရသလို စစ်သူကြီးကလည်း ဒါကို သိပ်ပြီး စိတ်ထဲရှိနေပုံမရပါဘူး။

"ဒါနဲ့ နေပါဦး၊ မင်းကို ဘယ်လိုခေါ်စေချင်လဲ။ မင်းရဲ့ နာမည်က စစ်သူကြီးဂရီးဗပ်စ်လား ဘာလားဆိုပြီး ငါ ကြားခဲ့ရလို့ပါ"

"ဟင်း ... အဲဒီနာမည်က ငါ့အတွက်တော့ ဘာအဓိပ္ပာယ်မှ ရှိမနေတော့ပါဘူး၊" ၎င်းက ဆိုတယ် "ဒါကို မင်းရဲ့ စိတ်ကြိုက်ပဲ နာမည်ပေးလိုက်ပါတော့။ ဘာပဲဖြစ်ဖြစ် မင်းက ငါ့ကို ဒုတိယအကြိမ်အဖြစ် အသက်ပြန်ရှင်ခွင့် ပေးခဲ့တဲ့သူပဲလေ။ ဒါကြောင့် မင်းကပဲ ငါ့အတွက် ဒုတိယမြောက် နာမည်တစ်ခု ပေးအပ်လိုက်တာက ပိုပြီးတော့တောင် သင့်တော်ပါသေးတယ်"

"ဒါဆိုရင်တော့ မင်းရဲ့နာမည်က 'ဂရီးဗ်' ပဲ ဖြစ်ရမယ်၊" သူက ဆိုလိုက်မိတယ်။

အရိုးစုကြီးက ခေါင်းညိတ်ပြလိုက်ပြီး မိုက်ကယ် ပေးလိုက်တဲ့ နာမည်ကို ဝမ်းမြောက်စွာနဲ့ လက်ခံလိုက်ပါတော့တယ်။ ဖတ်ချ်ကလည်း သူ့ရဲ့ ဂျူနီယာလေးကို ချက်ချင်းပဲ ဂုဏ်ပြုလိုက်ပြီး ဂျူနီယာတစ်ယောက်အနေနဲ့ လိုက်နာရမယ့် စည်းကမ်းချက်တွေနဲ့ လုပ်ထုံးလုပ်နည်းတွေအကြောင်း၊ သခင်ကြီးကို ရိုရိုသေသေ ဆက်ဆံဖို့နဲ့ သခင်ကြီးက ခေါင်းလာပွတ်ပေးရင် စီနီယာဖြစ်တဲ့သူက အရင်ဆုံး အခွင့်အရေး ရရှိရမယ်ဆိုတာတွေအကြောင်းပါ တရစပ် လိုက်လံပြောဆိုနေခဲ့မိတာပေါ့။

"တို့တွေ အခု အပြင်ကို မြန်မြန် ထွက်သွားကြရအောင်။ ဒီအခန်းငယ်လေးက ပြိုကျတော့မယ့် အခြေအနေမျိုး ဖြစ်နေပြီ"

သေဆုံးခြင်းစွမ်းအင်တွေ အားလုံးကို ဂရီးဗ်က စုပ်ယူပစ်လိုက်တာကြောင့်၊ ဂူဗိမာန်အတွင်းထဲမှာတော့ ဟောဒီ အာကာသနယ်ပယ်ငယ်လေးရဲ့ သက်တမ်းကို ဆက်လက်ထိန်းသိမ်းထားနိုင်ဖို့အတွက် ဘာမှော်စွမ်းအားမှ ကျန်ရစ်ခဲ့ခြင်း မရှိတော့ပါဘူး။

စောစောတုန်းက အသိဉာဏ်မရှိသေးတဲ့ ဂရီးဗ်နဲ့ တိုက်ခိုက်ခဲ့စဉ်တုန်းက လမ်းလျှောက်လမ်းတစ်ခုလုံး ပြိုကျပျက်စီးသွားခဲ့တာဖြစ်လို့၊ အပြင်ကို ပြန်ထွက်မယ့် မှော်ကူးပြောင်းရေးတံခါးကလည်း ပိတ်ဆို့သွားခဲ့ရပြီ ဖြစ်ပါတယ်။

ကံကောင်းစွာနဲ့ပဲ၊ မိုက်ကယ် အနေနဲ့ အဲဒီကိစ္စအတွက် စိုးရိမ်နေစရာ မလိုခဲ့ပါဘူး။

ဖတ်ချ်က သူ့ရဲ့ ပုံတူစလိုင်းမ်ခွဲတစ်ခုကို ဂရီးဗ်ဆီကို လွှဲပေးလိုက်တာကြောင့်၊ သူတို့ ၃ ယောက်စလုံးက ဂူသင်္ချိုင်းအတွင်းထဲကနေ အပြင်ဘက်ဆီကို ဘေးကင်းလုံခြုံစွာနဲ့ ချက်ချင်းပဲ ရွှေ့ပြောင်း ထွက်ခွာသွားနိုင်ခဲ့ကြပါတော့တယ်။

* * * * * * * * *