အခန်း ၂၂၀

220

ဒုတိယထပ်မှာ တည်ခင်းဧည့်ခံပွဲခန်းမနှင့် ဘားကောင်တာတို့ရှိရာနေရာဖြစ်သည်။ ဝမ်မိသားစုသည် ထိုအထပ်သို့ ပတ်ကြည့်ကြရာ တည်ခင်းဧည့်ခံပွဲခန်းမ၏ ပင်လယ်စာကဏ္ဍတွင် အသက်ရှင်လျက် လူးလွန့်နေသော ငါးများစွာကို တွေ့ရ၏။ ပေါင်ပေါင်သည် လူထူထပ်သည်ကို မနှစ်သက်သော်လည်း တိရစ္ဆာန်များကိုမူ အလွန်ခင်တွယ်သူဖြစ်သည်။ သူသည် ငါးကန်ထဲမှ ငါးများကို စိုက်ကြည့်နေရင်း ငါးများနှင့်အပြိုင် ပါးစပ်မှ ပူဖောင်းလေးများ မှုတ်ထုတ်နေလေသည်။ တတိယထပ်မှာမူ ကြံ့ခိုင်ရေးနှင့် ဂိမ်းကစားရာ နေရာဖြစ်၏။ ကြံ့ခိုင်ရေးဧရိယာတွင် အိမ်တွင်းနှင့် အပြင်ဘက်ကို ဆက်သွယ်ထားသည့် အပူချိန်ညှိပေးနိုင်သော ရေကူးကန်ကြီးတစ်ခု ပါဝင်သည်။ အိမ်တွင်းအပိုင်း၌ ရေကူးလမ်းကြောင်း ရှစ်ခုရှိပြီး အပြင်ဘက်အပိုင်းတွင်လည်း ရေကစားကွင်းတစ်ခု ပါရှိသည်။ ရေကူးကန်၏ အပြင်ဘက်တွင်မူ ဘက်စုံလေ့ကျင့်ခန်းသုံး ပစ္စည်းကိရိယာများ ရှိနေပြီး အားလုံးမှာ နာမည်ကြီး တံဆိပ်များသာ ဖြစ်ကြသည်။

အုပ်စုလိုက် လေ့ကျင့်ခန်းလုပ်သည့် နေရာမှာလည်း အလွန်ကျယ်ဝန်းကာ နံရံများတွင် မှန်အပြည့် တပ်ဆင်ထားသည်။ စင်မြင့်မှာလည်း မြင့်မြင့်လေး လုပ်ထားသဖြင့် သင်တန်းဆရာများ အနေဖြင့် လှုပ်ရှားမှုများကို သရုပ်ပြရန် အလွန်အဆင်ပြေလှသည်။ အခြားတစ်ဖက်တွင်လည်း ဖျာပေါ်လေ့ကျင့်ခန်းလုပ်ခြင်း နှင့် ယောဂကျင့်ရန် နေရာများရှိပြီး လေ့ကျင့်ခန်းသုံး ပစ္စည်းကိရိယာများမှာလည်း အစုံအလင်ပင်။ ဂိမ်းကစားရာနေရာမှာမူ ပို၍ပင် စုံလင်လှသေးသည်။ E-sports နှင့် ဖျော်ဖြေရေးဇုန်၊ KTV ခန်းများ၊ ဘီလီယံခုံများနှင့် ဖဲနှင့် စစ်တုရင်ကစားရာ နေရာများလည်း ပါဝင်သည်။ တတိယထပ်မှာတင် တစ်နေကုန် အချိန်ဖြုန်းမည်ဆိုလျှင်ပင် ပြဿနာမရှိနိုင်ပေ။

ဝမ်မိသားစု စတုတ္ထထပ်သို့ လှမ်းတက်လိုက်ချိန်တွင်မူ မှင်ရနံ့များ သင်းပျံ့နေသော ကမ္ဘာတစ်ခုထဲသို့ ရောက်ရှိသွားသလို ခံစားလိုက်ရသည်။ စတုတ္ထထပ်၏ စင်္ကြံလမ်းမှာ ကျယ်ဝန်းတောက်ပပြီး နံရံများပေါ်တွင် လက်ရေးလှပန်းချီ လက်ရာများကို ချိတ်ဆွဲထား၏။ ထိုလက်ရာများမှာ စုတ်ချက်ပြင်းပြင်းနှင့် သက်ဝင်လှပလှသဖြင့် ရှောင်ယန်မှာ မရပ်ဘဲ မနေနိုင်အောင် ငေးမောမိသွားသည်။ စုတ်ချက်တိုင်းတွင် ကိန်းအောင်းနေသော နက်ရှိုင်းသည့် ယဉ်ကျေးမှုအမွေအနှစ်များကို သူ ခံစားနေမိသည်။ လက်ရေးလှလက်ရာများအပြင် စတုတ္ထထပ်၏ ထောင့်တိုင်းတွင် တရုတ်ရိုးရာ အလှဆင်ပစ္စည်းများကိုလည်း ထားရှိထား၏။ နူးညံ့လှပသော အပြာနှင့်အဖြူရောင် ကြွေပန်းအိုးများ၊ ရှေးဟောင်း သစ်သားပန်းပုများနှင့် တိုင်းရင်းသားရိုးရာ အငွေ့အသက်ပါသော လက်မှုပစ္စည်းများ ရှိနေသည်။ တရုတ်ရိုးရာ အလှဆင်ပစ္စည်းတစ်ခုစီ၏ ဘေးတွင် သီးသန့် အစုအဝေးခန်းတစ်ခုစီ ရှိနေပြီး စင်္ကြံလမ်း၏ ဘေးတစ်ဖက်တစ်ချက်တွင် စနစ်တကျ ရှိနေကြသည်။ အစုအဝေးခန်းတိုင်းမှာလည်း လုံလောက်သော သီးသန့်နေရာ များ ရှိကြသည်။ ထိုအစုအဝေးခန်း တံဆိပ်ပြားများပေါ်တွင် သစ်သားပန်းပုဖြင့် ထွင်းထုထားသော ဆိုင်းဘုတ်များ ချိတ်ဆွဲထားပြီး၊ အခန်းအမည်များကို လက်ရေးလှစုတ်ချက်များဖြင့် ရေးသားထားရာ အရှေ့တိုင်းယဉ်ကျေးမှု၏ ဆွဲဆောင်မှုကို ဖော်ပြနေသည်။ ရှောင်ယန်သည် ဖွင့်ထားသော အစုအဝေးခန်းတစ်ခုအတွင်းသို့ ချောင်းကြည့်လိုက်၏။ အခန်းတွင်း အပြင်အဆင်မှာလည်း တရုတ်ရိုးရာ ဒီဇိုင်းကိုပင် အခြေခံထားသည်။ နံရံများတွင် နက်ရှိုင်းသော အနုပညာရသရှိသည့် ရှုခင်းပန်းချီကားအချို့ ချိတ်ဆွဲထားပြီး ခေတ်မီ အသံနှင့် ဗီဒီယိုစနစ်များလည်း တပ်ဆင်ထားရာ ရိုးရာနှင့် ခေတ်မီမှုကို အချိုးကျကျ ပေါင်းစပ်ထားသည်။ အစုအဝေးခန်းတစ်ခု၏ အဝင်ဝတွင် လက်ရေးလှလက်ရာ အကြီးစားတစ်ခု ချိတ်ဆွဲထားပြီး တံခါးပေါ်က ဆိုင်းဘုတ်တွင် "ဝေဖုန်းယီလက်ရေးလှစတူဒီယို" ဟု ရေးထားသည်။ ၎င်းမှာ လူတစ်ရာခန့် ဆံ့သော အစုအဝေးခန်းမကြီး ဖြစ်သည်။ တံခါးဘေးတွင်လည်း အသိပေးချက်တစ်ခု ကပ်ထား၏။

"လေးစားအပ်ပါသော ဧည့်သည်တော်များခင်ဗျာ ဆရာကြီး ဝေဖုန်းယီသည် နေ့စဉ်ညနေ (၇) နာရီမှ (၈) နာရီအထိ ဤစာသင်ခန်းအတွင်း အခမဲ့ လက်ရေးလှသင်တန်းများကို ပို့ချပေးသွားမည် ဖြစ်ပါသည်၊ ဤသင်တန်းသည် တရုတ်ရိုးရာယဉ်ကျေးမှုကို ထိန်းသိမ်းမြှင့်တင်ရန်နှင့် လက်ရေးလှ ဝါသနာရှင်များအတွက် လေ့လာဖလှယ်နိုင်မည့် ပလက်ဖောင်းတစ်ခု ဖြစ်စေရန် ရည်ရွယ်ပါသည်၊ သင်တန်းကို အွန်လိုင်းမှလည်း တိုက်ရိုက်ထုတ်လွှင့် သွားမည်ဖြစ်ပြီး အဓိကအားဖြင့် အွန်လိုင်းမှ ကြည့်ရှုသူများ၏ မေးခွန်းများကို ဖြေကြားပေးသွားမည် ဖြစ်ပါသည်၊ ထို့အပြင် လက်ရေးလှ ဝါသနာရှင်များကို ပိုမိုကောင်းမွန်စွာ ဝန်ဆောင်မှုပေးနိုင်ရန် နေ့စဉ် ညနေ (၄) နာရီမှ (၅) နာရီအထိ လူကိုယ်တိုင် လာရောက်သူများအတွက် မေးမြန်းဖြေကြားခြင်း ကဏ္ဍကိုလည်း စီစဉ်ထားပါသည်၊ ခန်းမကို တစ်နေကုန် ဖွင့်လှစ်ထားမည်ဖြစ်ရာ မည်သူမဆို လွတ်လပ်စွာ လာရောက်လေ့ကျင့်နိုင်ပါသည်၊ သို့သော် ကောင်းမွန်သော သင်ယူမှုပတ်ဝန်းကျင်ကို ထိန်းသိမ်းရန်အတွက် စာသင်ခန်းအတွင်း တိတ်ဆိတ်စွာ နေပေးကြပါရန် မေတ္တာရပ်ခံအပ်ပါသည်"

တည်းခိုခန်းမှာ အခမဲ့ လက်ရေးလှသင်တန်းတွေတောင် ရှိတာပဲ။ တည်းခိုခန်းရဲ့ လှုပ်ရှားမှုတွေက တကယ့်ကို များပြားလှတာပဲဟု ရှောင်ယန် ရေရွတ်လိုက်ပြီး ညနေပိုင်း လက်ရေးလှသင်တန်း အချိန်ကို မှတ်သားကာ ငါးထပ်သို့ ဆက်တက်ခဲ့သည်။ ငါးထပ်မှာ လှုပ်ရှားမှုခန်းမဖြစ်ပြီး လူတော်တော်များများ ရှိနေ၏။ အဘိုးကြီးဝမ် ဖျော်ဖြေပွဲအတွက် တန်းစီနေကြခြင်းဖြစ်မည်ဟု ထင်ကာ ရှေ့သို့ အပြေးအလွှား သွားလိုက်သည်။ ရှေ့သို့ရောက်မှ လူအားလုံးမှာ ရက်ကန်းရက်လုပ်ခြင်းအတွေ့အကြုံတွင် ပါဝင်ရန် တန်းစီနေကြခြင်းဖြစ်ကြောင်း သူ သိလိုက်ရ၏။ ကျယ်ဝန်းသော အခန်းအတွင်း၌ ရက်ကန်းစင်များ ရှိနေပြီး ရက်ကန်းစင်တစ်ခု၏ ရှေ့တွင် မျက်နှာပေါက် ခပ်ပြတ်ပြတ်နှင့် ခေါင်းပေါင်း,ပေါင်းထားသော အမျိုးသမီးတစ်ဦး ရက်ကန်းစင် အသုံးပြုပုံကို ရှင်းပြနေသည်။ အဘိုးကြီးဝမ် အသေအချာ ပြန်ကြည့်မိသည်။ ထိုအမျိုးသမီးမှာ နိုင်ငံခြားသူနှင့် တူနေသော်လည်း သူမ၏တရုတ်စကားမှာ အလွန်ပင် ကျွမ်းကျင်လှ၏။ အဘိုးကြီးဝမ် ခေတ္တစဉ်းစားပြီးမှ သိသွားသည်မှာ သူမသည် တိုင်းရင်းသူတစ်ဦး ဖြစ်မည်ဟူ၍ပင်။

တိုင်းရင်းသူဟု အထင်ခံလိုက်ရသော မီနာ သည် ရှင်းပြပြီးနောက် လက်တွေ့သရုပ်ပြမှုကို စတင်လိုက်သည်။ မီနာသည် ရက်ကန်းစင်တွင် ထိုင်ကာ သူမ၏ လက်များကို ကျွမ်းကျင်စွာ လှုပ်ရှားရင်း ရက်လုပ်ခြင်း၏ အသေးစိတ်အချက်တိုင်းကို သရုပ်ပြနေ၏။ သူမ၏ လက်ချောင်းလေးများမှာညင်သာစွာ ခတ်လိုက်သည်နှင့် လွန်းသည် ချည်မျှင်တန်းများကြားတွင် ဟိုဘက်ဒီဘက် ကူးလူးသွားပြီး စည်းချက်ကျကျအသံလေး ထွက်ပေါ်လာသည်။ ရက်ကန်းစင်ပေါ်တွင် ရက်လုပ်ပြီးသား အထည်သားမှာ တဖြည်းဖြည်း ပေါ်ထွက်လာပြီး အရောင်အသွေးစုံလင်သော ပန်းပုံစံများ စတင်ပေါ်လာသည်။ ဘေးပတ်လည်မှ ပရိသတ်မှာ သူမ၏ ကျွမ်းကျင်မှုကြောင့် စိတ်ဝင်တစား ရှိနေကြပြီး မကြာခဏပင်ချီးကျူးသံများ ထွက်ပေါ်နေ၏။ မီနာ ထရပ်လိုက်ပြီး ဧည့်သည်များကို တစ်ယောက်ချင်းစီ လမ်းညွှန်ပေးသည်။ ဧည့်သည်များ၏ ရှေ့မှ ရက်ကန်းစင်များမှာ ခက်ခဲသော အဆင့်များကို ကြိုတင်ပြင်ဆင်ပြီးသား ဖြစ်သည်။ ချည်မျှင်များမှာ သေသပ်စွာ ရှိနေပြီး အလျားလိုက်ထည့်ရမည့် ချည်မျှင်များလည်း အဆင်သင့်ဖြစ်နေ၏။ ယခု ဧည့်သည်များ လုပ်ရမည်မှာ ရက်လုပ်ခြင်းလုပ်ငန်းစဉ်ထဲမှ စိတ်ဝင်စားစရာ အကောင်းဆုံးနဲ့ အလွယ်ကူဆုံးအပိုင်းပင်ဖြစ်သည်။

ဧည့်သည်များ လုပ်ရမည့်အလုပ်မှာ လွန်းကို ချည်မျှင်တန်းများကြားတွင် ဟိုဘက်ဒီဘက်ထိုးပေးရုံသာ ဖြစ်သည်။ အသာအယာ တွန်းလိုက်၊ ဆွဲလိုက် လုပ်လိုက်ရုံဖြင့် လွန်းမှ ခြည်မျှင်တန်းများကြား ကူးလူးသွားကာ အထည်သား ဖြစ်လာ၏။ ဤလုပ်ငန်းစဉ်မှာ ရိုးရှင်းသော်လည်း အောင်မြင်မှု အပြည့်အဝ ခံစားရစေသည်။ ဧည့်သည်များ၏ မျက်နှာတွင် စိတ်လှုပ်ရှားမှုနှင့် သိချင်စိတ်များ ပြည့်နှက်နေပြီး လွန်းကို ကိုင်တွယ်ရင်း သူတို့၏ ခံစားချက်များကို အချင်းချင်း ဖလှယ်နေကြသည်။ လွန်းမှာ ဟိုဘက်ဒီဘက် ကူးလူးနေသည်နှင့်အမျှ အထည်သားမှာ တဖြည်းဖြည်း ရှည်ထွက်လာပြီး လက်ကိုင်ပဝါငယ်လေး တစ်ထည် ဖြစ်လာသည်။ အရင်လူစုမှာ သူတို့ကိုယ်တိုင် ရက်ထားသော လက်ကိုင်ပဝါလေးများကို ကိုင်ကာ ထွက်ခွာသွားကြပြီး နောက်ထပ် ဧည့်သည်များမှာလည်း စတင်ရန် စိတ်အားထက်သန်စွာဖြင့် ရက်ကန်းစင်များတွင် ချက်ချင်း ဝင်ထိုင်ကြတော့သည်။ ကိုယ်တိုင် ရက်ထားတဲ့ လက်ကိုင်ပဝါလေး တစ်ထည် ရဖို့ဆိုသည်မှာ တကယ့်ကို ဆွဲဆောင်မှုရှိလွန်း၏။ လှုပ်ရှားမှုခန်းမ၏ အခြားတစ်ဖက်တွင် ဂီတခန်းမ ရှိသော်လည်း ဖျော်ဖြေပွဲ မစသေးသဖြင့် တံခါးပိတ်ထားဆဲ ဖြစ်သည်။ ထို့ကြောင့် ဝမ်မိသားစု ခြောက်ထပ်သို့ ဆက်လက် လှည့်လည်ကြည့်ရှုရန် တက်လာခဲ့ကြသည်။

ခြောက်ထပ်မှာ အလှအပနှင့် ခန္ဓာကိုယ် ထိန်းသိမ်းရေး စင်တာ ဖြစ်သည်။ ခြောက်ထပ်သို့ လှမ်းဝင်လိုက်သည်နှင့် မွှေးရနံ့သင်းသင်းလေးမှ သူတို့ကို ကြိုဆိုလိုက်၏။ ထိုရနံ့သည် ဧည့်သည်တိုင်းကို ညင်သာစွာ ဝန်းရံသွားပြီး စိတ်မောလူမော ဖြစ်နေမှုများကို ချက်ချင်းပင် ပြေပျောက်စေသည်။ အလှအပစင်တာ၏ အတွင်းပိုင်းကို လုပ်ဆောင်ချက်အလိုက် နေရာအမျိုးမျိုး ခွဲခြားထားသည်။ SPA ဧရိယာကို အပူပိုင်းဒေသမှ ကျွန်းလေးတစ်ခုကဲ့သို့ အလှဆင်ထားပြီး စိမ်းလန်းသော အပင်များ ဝန်းရံနေကာ အလယ်တွင် ကြည်လင်သော ရေကူးကန်ငယ်လေး ရှိ၏။ ရေမျက်နှာပြင်ပေါ်တွင် ပန်းပွင့်ချပ်လေးအချို့ ဝေ့ဝဲနေပြီး သဘာဝရနံ့များ သင်းပျံ့နေသည်။ နှိပ်နယ်သည့် ဧရိယာ တွင်မူ အနှိပ်ခုံများနှင့် ကုတင်များကို တပ်ဆင်ထားပြီး နံရံများတွင် အရှေ့တိုင်းအငွေ့အသက်ပါသော အလှဆင်ပစ္စည်းများကို ချိတ်ဆွဲထားကာ အေးချမ်းတင့်တယ်သော ပတ်ဝန်းကျင်ကို ဖန်တီးထားသည်။ ဤနေရာတွင် ကျွမ်းကျင်အနှိပ်သည်များမှာ ဧည့်သည်တစ်ဦးချင်းစီ၏ လိုအပ်ချက်အရ ဝန်ဆောင်မှု ပေးသွားမည်ဖြစ်သည်။ ထို့အပြင် အလှအပစင်တာတွင် သီးသန့် ကုသခန်းများလည်း ရှိပြီး အခန်းတိုင်းကို နွေးထွေးလုံခြုံအောင် ပြင်ဆင်ထားကာ ခေတ်မီ အလှအပသုံး ပစ္စည်းများနှင့် ထိန်းသိမ်းရေး ပစ္စည်းများလည်း အစုံအလင် ရှိ၏။ ပထမထပ်မှ ခြောက်ထပ်အထိ ဟဲယဲ့တည်းခိုခန်း၏ အထပ်တိုင်းတွင် စုံလင်လှသော လှုပ်ရှားမှုများ ရှိနေသဖြင့် ဝမ်မိသားစုမှာ ဘာကို အရင်ကြည့်ရမှန်း မသိအောင် စိတ်လှုပ်ရှားပျော်ရွှင်နေကြလေတော့သည်။