အခန်း (၈၇၅-၈၇၆)

အပိုင်း(၈၇၅) အကြောင်းအကျိုးကို ပြောင်းလဲခြင်း

လင်းယွမ်၏ မျက်ဝန်းအောက်ခြေတွင် အေးစက်သော လှောင်ပြုံးတစ်ခု ဖြတ်ပြေးသွား၏။

"မင်းကို စောင့်နေတာ ကြာပြီ"

သို့သော် သူ၏ ခန္ဓာကိုယ်က ရုတ်တရက် လှုပ်ရှားသွားပြီး မျက်တောင်တစ်ခတ်အတွင်းမှာပင် လေဟာနယ်ထဲမှနေ၍ အောက်ဘက်သို့ အရှိန်ပြင်းပြင်းဖြင့် ထိုးဆင်းသွားလေသည်။

စက္ကန့်အနည်းငယ်မျှ ကြာပြီးနောက် သူက ထိုစွမ်းအင်လှိုင်းများ ဖုံးလွှမ်းနေသည့် အတိုင်းအတာထဲမှ ရုန်းထွက်သွားနိုင်ခဲ့သည်။

ခန္ဓာကိုယ်တစ်ဝိုက်ရှိ သန္ဓေပြောင်းစွမ်းအင်များ ပြန်လည် နိုးကြားလာပြီး သူ၏ ခန္ဓာကိုယ်တွင်းရှိ သန္ဓေပြောင်းစွမ်းအင်များကို ပြန်လည် အသုံးပြုနိုင်ပြီဖြစ်ကြောင်း လင်းယွမ် ခံစားလိုက်ရသည်။

သူ လေဟာနယ်ထဲတွင် ရှိနေစဉ် ခန္ဓာကိုယ်တစ်ခုလုံး သွေးမြူခိုးများ ဖုံးလွှမ်းသွားပြီး မျိုးရိုးဗီဇများက တစ်ဖန် ပြန်လည် ဖွဲ့စည်းသွားကြ၏။

ခဏချင်းမှာပင် သူသည် အရပ် ၂၉၅ ပေခန့် မြင့်မားသော ဧရာမ လင်းဆွဲဖြူကြီး တစ်ကောင်အဖြစ်သို့ ပြောင်းလဲသွားတော့သည်။

"ဝုန်း" လင်းဆွဲတောင်ပံကြီး နှစ်ဖက် ဖြန့်ကားသွားပြီးနောက် လေထဲတွင် အလျင်အမြန် ပျံသန်းကာ ဦးတည်ရာကို ပြောင်းလဲလိုက်ပြီး သူ၏ မျက်ဝန်းအိမ်ထဲတွင် ထူးဆန်းသော သင်္ကေတပေါင်းများစွာ ပေါ်ထွက်လာသည်။

ပတ်ဝန်းကျင်ရှိ ကောင်းကင်၊ မြေကြီးနှင့် သက်ရှိအားလုံးမှာ သူ၏ မျက်လုံးထဲတွင် အခြားသော မြင်ကွင်းတစ်ရပ်အဖြစ် ထင်ဟပ်လာလေသည်။

အကြောင်းအကျိုး ကြိုးမျှင်ပေါင်းများစွာက လေထဲတွင် လွင့်မျောနေပြီး လူတိုင်း၏ ခန္ဓာကိုယ်ပေါ်တွင် မရေမတွက်နိုင်သော အကြောင်းအကျိုး ကြိုးမျှင်များ ရစ်ပတ်နေကြ၏။

လင်းယွမ်က သာမန် အကြောင်းအကျိုး ကြိုးမျှင်များကို ကျော်လွန်ကြည့်ရှုလိုက်ပြီး လေဟာနယ်ထဲမှနေ၍ သူ့ထံသို့ အရှိန်ပြင်းပြင်းဖြင့် တိုးဝင်လာသော အကြောင်းအကျိုး ကြိုးမျှင်တစ်ခုကိုသာ အဓိကထား၍ အာရုံစိုက်လိုက်သည်။

ယုံမှားသံသယဖြစ်ဖွယ် မရှိဘဲ ဤသို့ ပြင်းထန်စွာ တိုးဝင်လာသော အကြောင်းအကျိုး ကြိုးမျှင်၏ နောက်ကွယ်ရှိ အကြောင်းတရားသည် ဂျိမ်းစ်၏ ချိတ်ပိတ်အစွမ်းပင် ဖြစ်ရပေမည်။

အကယ်၍ ဤအကြောင်းအကျိုး ကြိုးမျှင်က သူ့ကိုယ်ပေါ်သို့ ရစ်ပတ်သွားမည်ဆိုပါက သူသည် ချိတ်ပိတ်အစွမ်း၏ လွှမ်းမိုးမှုကို တစ်ဖန် ပြန်လည် ခံရတော့မည် ဖြစ်သည်။

သို့သော် ယခုအချိန်တွင် လင်းယွမ်က ဆက်လက် ရှောင်တိမ်းနေခြင်း မရှိတော့ဘဲ ခပ်ဖွဖွ လှောင်ပြုံးတစ်ခုကိုပင် ပြုံးလိုက်သေး၏။

သူ၏ လင်းဆွဲတောင်ပံကြီးများ တုန်ခါသွားပြီး လက်ဖဝါးတစ်စုံဖြင့် လေဟာနယ်ထဲသို့ လှမ်း၍ ခပ်ကြမ်းကြမ်း ပွတ်ဆွဲလိုက်သည်။

ထိုခဏမှာပင် အရှိန်အဟုန်ဖြင့် ပျံသန်းလာသော ထိုအကြောင်းအကျိုး ကြိုးမျှင်က လေထဲတွင် ရုတ်တရက် ရပ်တန့်သွားလေသည်။

နောက်တစ်ခဏတွင် လင်းယွမ်က ပါးစပ်ကို ဟလိုက်ရာ စိတ်ပင်လယ်ထဲမှ စိတ်စွမ်းအင်များဖြင့် ဖွဲ့စည်းထားသော ဖောက်ထွင်းမြင်နိုင်သည့် လင်းဆွဲတစ်ကောင် ရုတ်တရက် ပျံသန်းထွက်ပေါ်လာတော့သည်။

"ကျွိ"

ထိုဖောက်ထွင်းမြင်နိုင်သော လင်းဆွဲလေးက ကြွက်တစ်ကောင်ကဲ့သို့ အော်မြည်လိုက်ပြီး ထိုအကြောင်းအကျိုး ကြိုးမျှင်ကို အားကုန် ကိုက်ချလိုက်သည်။

၎င်းက ထိုကြိုးမျှင်ကို ကိုက်မိသွားသည်နှင့် တစ်ပြိုင်နက် ချက်ကနေ၍ အသစ်စက်စက် အကြောင်းအကျိုး ကြိုးမျှင်တစ်ခုက အရှိန်ပြင်းပြင်းဖြင့် ပစ်လွှတ်ထွက်ပေါ်လာ၏။

ဤကြိုးမျှင်ကမူ ဂျိမ်းစ်၏ ထိန်းချုပ်မှုအောက်တွင် မရှိတော့ဘဲ လင်းယွမ်၏ လက်ချောင်းထိပ်ဖျားတွင် ခုန်ပေါက် ရစ်ပတ်နေလေသည်။

ဤအခြေအနေသို့ ရောက်သောအခါ လင်းယွမ်က ဤအကြောင်းအကျိုး ကြိုးမျှင်ကို အလုံးစုံ ပြောင်းလဲပစ်လိုက်ပြီး သူ၏ ထိန်းချုပ်မှုအောက်သို့ အပြည့်အဝ ယူဆောင်နိုင်ခဲ့ပြီ ဖြစ်သည်။

အကြောင်းအကျိုးကို ဝါးမျိုခြင်း... အကျိုးဆက်ကို ပြောင်းလဲခြင်း... ၎င်းက အကြောင်းအကျိုးမျို နဂါးလင်းဆွဲ၏ ပင်ကိုယ်အစွမ်း ဖြစ်သော"အကြောင်းတရားကို မျိုချ၍ အကျိုးတရားကို ပြောင်းလဲခြင်း" ပင် ဖြစ်လေသည်။

သူ၏ တောင်ပံနှစ်ဖက် တုန်ခါသွားပြီးနောက် ကောင်းကင်ပေါ်သို့ ပြောင်းပြန် အရှိန်ပြင်းပြင်းဖြင့် ပျံတက်သွားသည်ကို မြင်လိုက်ရ၏။

ထိုအချိန်မှာပင် ကောင်းကင်ထက်မှ ဂျက်ခ် သည်လည်း အရှိန်အဟုန်ဖြင့် ထိုးဆင်းလာနေပြီ ဖြစ်သည်။

"သူ့ကို ဖမ်းထား... သူ့ကို ငါ့ရဲ့ သွေးကျွန် အဖြစ် ပြောင်းပစ်ရမယ်"

ဂျက်ခ် က စိတ်လှုပ်ရှားစွာဖြင့် အော်ဟစ်လိုက်သည်။ လင်းယွမ်ကိုသာ ထိန်းချုပ်နိုင်လိုက်ပါက ထိုက်ယန်တောင် တစ်ခုလုံးသည်လည်း ခိုက်ရီ နည်းပညာအဖွဲ့ ၏ လက်အောက်ခံ အင်အားစုတစ်ခု ဖြစ်လာတော့မည် မဟုတ်ပါလော။

စုန်းမ မော်လီ ကလည်း စိတ်လှုပ်ရှားနေသော အမူအရာဖြင့် အရှိန်ပြင်းပြင်း လိုက်ပါလာ၏။

"အတူတူ ဝင်တိုက်ကြမယ်... လင်းယွမ်... ငါ့ရဲ့ အစွမ်းတွေကို နင် ကောင်းကောင်း သိစေရမယ်"

သို့သော် သူမ၏ အလျင်ကမူ ဂျက်ခ် ကို မမီနိုင်ခဲ့ပေ။

သို့သော် ဤအချက်ကြောင့်ပင် သူမကို ကယ်တင်လိုက်သလို ဖြစ်သွားခဲ့သည်။

ဂျက်ခ် က အရှိန်အဟုန်ဖြင့် ထိုးဆင်းလာပြီး မျက်တောင်တစ်ခတ်အတွင်းမှာပင် လင်းယွမ်နှင့် မျက်နှာချင်းဆိုင် ရင်ဆိုင်မိသွားသည်။

သွေးစုပ်လင်းဆွဲကြီးက လင်းယွမ်ဆီသို့ အားကုန် လှမ်းဖမ်းလိုက်သော်လည်း လင်းယွမ်က ထူးဆန်းစွာ ပြုံးလိုက်ပြီး သူ၏ လက်ချောင်းကို ရုတ်တရက် ခေါက်ချလိုက်သည်။

သူ၏ လက်ချောင်းထိပ်တွင် ရစ်ပတ်နေသော အကြောင်းအကျိုး ကြိုးမျှင်က ရုတ်တရက် လည်ပတ်သွားပြီး ဂျက်ခ် ၏ ခန္ဓာကိုယ်ထဲသို့ တိုက်ရိုက် ထိုးဖောက်ဝင်ရောက်သွားလေသည်။

ထိုခဏမှာပင် ဂျက်ခ် ၏ ခန္ဓာကိုယ်က ပြင်းထန်စွာ တုန်ခါသွားပြီး ခန္ဓာကိုယ်တွင်းရှိ သန္ဓေပြောင်းစွမ်းအင်များ ချက်ချင်း ခဲသွားကာ အသုံးပြု၍ မရတော့ကြောင်း ခံစားလိုက်ရ၏။

သူ ထိတ်လန့်တုန်လှုပ်သွားပြီး အော်ဟစ်လိုက်သည်။ "ဂျိမ်းစ်... မင်း ဘာတွေ လုပ်နေတာလဲ"

ကောင်းကင်ထက်တွင် ဂျိမ်းစ်၏ ဧရာမ ခန္ဓာကိုယ်ကြီး ထွက်ပေါ်လာပြီး ဦးချိုတစ်ချောင်းတည်းမှ ထွက်ပေါ်နေသော ချိတ်ပိတ်စွမ်းအင်လှိုင်းများက ပတ်ဝန်းကျင်သို့ ရိုက်ခတ်နေဆဲပင်။

ဂျက်ခ် ၏ ဒေါသတကြီး အော်ဟစ်သံကို ကြားလိုက်ရသောအခါ သူ နားမလည်နိုင်ဖြစ်သွားပြီး "ဘာဖြစ်လို့လဲ"

သူ သတိမဝင်လာခင်မှာပင် လင်းယွမ်က ဂျက်ခ် ၏ ခေါင်းကို အားပါးတရ ဖမ်းဆုပ်လိုက်သည်ကို မြင်လိုက်ရသည်။

ယခုအချိန်တွင် ဂျက်ခ် မှာ သန္ဓေပြောင်းစွမ်းအင်များ၏ အထောက်အပံ့ မရှိတော့သဖြင့် ခွန်အားနှင့် အလျင်က လင်းယွမ်နှင့် ယှဉ်နိုင်ရန် အဆင့်တစ်ခုတည်းတွင် မရှိတော့ပေ။

လင်းယွမ်က သူ့ကို လွယ်ကူစွာ ဖမ်းဆုပ်လိုက်ပြီး တစ်ချိန်တည်းမှာပင် လက်ဖဝါးထဲတွင် ကြိုတင် ပြင်ဆင်ထားသော ဝိညာဉ် ချုပ်နှောင်ခြင်း သင်္ကေတ ကို ဂျက်ခ် ၏ ခေါင်းထဲသို့ အားကုန် ရိုက်သွင်းလိုက်လေသည်။

"ဝီ"

"အား"

တုန်ခါသံ တစ်ချက်နှင့်အတူ ဝိညာဉ် ချုပ်နှောင်ခြင်း သင်္ကေတ က ရူးသွပ်စွာ တုန်ခါသွားပြီး သူ၏ စိတ်ပင်လယ်ကို ဆွဲဖြဲကာ စိတ်ဝိညာဉ်ထဲသို့ ထိုးဖောက် ဝင်ရောက်သွားတော့သည်။

ဂျက်ခ် မှာ ချက်ချင်းပင် နာကျင်စွာ အော်ဟစ် ညည်းတွားတော့၏။

"ဂျိမ်းစ်... ဂျိမ်းစ်... သူ့ကို ချိတ်ပိတ်လိုက်... မြန်မြန် ချိတ်ပိတ်လိုက်စမ်းပါ"

ဂျက်ခ် က သူ၏ ဝိညာဉ် နက်ရှိုင်းရာမှ ထွက်ပေါ်လာသော ထိတ်လန့်ကြောက်ရွံ့မှုကို ခံစားလိုက်ရပြီး အသည်းကွဲမတတ် စူးစူးဝါးဝါး အော်ဟစ်လိုက်သည်။

ဂျိမ်းစ် သည်လည်း ပြာယာခတ်သွားပြီး သန္ဓေပြောင်းစွမ်းအင်များကို အဆက်မပြတ် ထုတ်လွှတ်ကာ မနေနိုင်ဘဲ ကျိန်ဆဲလိုက်သည်။ "ငါ သူ့ကို ချိတ်ပိတ်နေတာပဲလေကွာ... ဘာလို့ အလုပ်မဖြစ်ရတာလဲ... ဒါ... ဒါ ဘယ်လိုဖြစ်ရတာလဲ"

"မင်း ချိတ်ပိတ်နေတာ ငါ့ကိုကွ... အခု ငါ့အစွမ်းတွေ သုံးလို့မရတော့ဘူး" ဂျက်ခ် က ဒေါသတကြီး အော်ဟစ်လိုက်သည်။

အကြောင်းအကျိုး ကြိုးမျှင်ကို ပြောင်းလဲပစ်နိုင်သည့် ဤလျှို့ဝှက်ချက်ကို ဂျိမ်းစ် ကိုယ်တိုင်ပင်လျှင် နားလည်နိုင်စွမ်း မရှိခဲ့ပေ။

လင်းယွမ်က ခပ်ဖွဖွ ပြုံးလိုက်ပြီး စိတ်စွမ်းအင်များကို အားကုန် မြှင့်တင်လိုက်ရာ ဝိညာဉ် ချုပ်နှောင်ခြင်း သင်္ကေတ က ဂျက်ခ် ၏ စိတ်စွမ်းအင် ခံစစ်မျဉ်းကို ချက်ချင်း ဆွဲဖြဲပစ်လိုက်ပြီး စိတ်ပင်လယ်ထဲသို့ တိုက်ရိုက် ဝင်ရောက်သွားလေသည်။

"ဝီ" နောက်တစ်ခဏတွင် ဝိညာဉ် ချုပ်နှောင်ခြင်း သင်္ကေတ က ရဲရဲနီနေသော သံပူခဲကြီးတစ်ခုကဲ့သို့ ဂျက်ခ် ၏ ဝိညာဉ်ပေါ်သို့ အားပါးတရ ခတ်နှိပ်သွားတော့သည်။

ထိုခဏမှာပင် ဂျက်ခ် မှာ အသံကုန် အော်ဟစ် ညည်းတွားတော့ပြီး ဝိညာဉ်တစ်ခုလုံး တုန်ယင်သွားကာ လင်းယွမ်အပေါ် သခင်အဖြစ် သစ္စာခံလိုသော စိတ်ဆန္ဒတစ်ခု ပေါ်ပေါက်လာလေသည်။

"မလုပ်ပါနဲ့... မလုပ်ပါနဲ့"

သူ ကြောက်လန့်တကြား အော်ဟစ်လိုက်သော်လည်း အသက်ရှူကြိမ် အနည်းငယ်မျှ ကြာပြီးနောက် သူ၏ ညည်းတွားသံများ ရပ်တန့်သွားပြီး ခုခံမှုကို လက်လျှော့လိုက်တော့သည်။ သူ အသက်ပြင်းပြင်း ရှူနေပြီး လင်းယွမ်ကို ကြည့်သော သူ၏ မျက်ဝန်းများထဲတွင် ကြောက်ရွံ့မှုနှင့် နာခံလိုစိတ်များ အပြည့်အဝ ရှိနေ၏။

"သခင်... သခင်"

သူက လင်းယွမ်ကို တိုးညင်းသော အသံဖြင့် ခေါ်လိုက်သည်။

လင်းယွမ်က ရယ်မောလိုက်ပြီး သူ၏ လက်ဖဝါးကို ပြန်ရုပ်သိမ်းလိုက်ကာ သူ့ထံမှ ပေ ၁၆၄၀ အကွာအဝေးပင် မရှိတော့သော ဦးချိုတစ်ချောင်း၊ လက်တံများစွာ ပါရှိသည့် မျိုးရိုးဗီဇ သားရဲကြီးဆီသို့ လှမ်းကြည့်လိုက်သည်။

"ကြည့်ရတာ မင်းက ဂျိမ်းစ် ဆိုတဲ့ကောင် ဖြစ်ရမယ်"

ဂျိမ်းစ်က လင်းယွမ်ကို မယုံကြည်နိုင်စွာ ကြည့်လိုက်ပြီး ဂျက်ခ် ကိုလည်း လှမ်းကြည့်လိုက်သည်။

သူ အသက်ပြင်းပြင်း တစ်ချက် ရှိုက်သွင်းလိုက်ပြီး မျက်ဝန်းအောက်ခြေတွင် သံသယများ ပြည့်နှက်နေ၏။

ဤမျှ နီးကပ်သော အကွာအဝေးတွင် သူ၏ ချိတ်ပိတ်အစွမ်းက မျက်မှောက်ရှိ လူအပေါ် အဘယ်ကြောင့် အကျိုးသက်ရောက်မှု မရှိရသနည်း။

"ဂျက်ခ်... မင်း"

သူက လင်းယွမ်ကို ဂရုမစိုက်တော့ဘဲ သူ၏ အကြည့်များကို ဂျက်ခ် ဆီသို့ ပို့လွှတ်လိုက်သည်။

ဂျက်ခ် မှာ ခေါင်းငုံ့ထားပြီး စကားတစ်ခွန်းမျှ မဆိုပေ။

စုန်းမ မော်လီ ပျံသန်းရောက်ရှိလာပြီး လင်းယွမ်၏ အနောက်တွင် နာခံမှုအပြည့်ဖြင့် ရပ်နေသော ဂျက်ခ် ၏ ပုံစံကို မြင်လိုက်ရချိန်တွင် သူမ၏ မျက်နှာအမူအရာ ပြင်းထန်စွာ ပျက်ယွင်းသွားတော့သည်။

ခုနက လင်းယွမ် သူမ၏ ဝိညာဉ်ကို ထိန်းချုပ်လုနီးပါး ဖြစ်ခဲ့ရသော မြင်ကွင်းကို သူမ ရုတ်တရက် ပြန်လည် သတိရသွား၏။

သူမက အလျင်စလို ပြောလိုက်သည်။ "သတိထား ဂျိမ်းစ်... ဂျက်ခ် ကို သူ ထိန်းချုပ်နိုင်သွားတဲ့ပုံပဲ"

"ဘာ" ဂျိမ်းစ် အလွန် အံ့အားသင့်သွားသည်။

နောက်တစ်ခဏတွင် လင်းယွမ်က ရုတ်တရက် အမိန့်ပေးလိုက်သည်ကို မြင်လိုက်ရ၏။ "ဂျက်ခ်... အဲဒီ စုန်းမ ကို ဖမ်းစမ်း"

"ဝှစ်"

ဂျက်ခ် ၏ ခန္ဓာကိုယ်က ချက်ချင်း ပျောက်ကွယ်သွားပြီး လေထဲတွင် အရိပ်တစ်ခုသာ ချန်ရစ်ခဲ့သည်။

ထိုအချိန်ရောက်မှသာ အသံက ထွက်ပေါ်လာ၏။ "ဟုတ်ကဲ့ပါ"

စုန်းမ မော်လီ မျက်နှာပျက်သွားပြီး အလျင်အမြန် ကိုယ်ကိုရွှေ့ကာ ကိုယ့်ကိုယ်ကိုယ် ကာကွယ်ရန်အတွက် အရိပ်များထဲသို့ ချက်ချင်း ဝင်ရောက် ပုန်းအောင်းလိုက်သည်။

ဂျိမ်းစ်က ရုတ်တရက် ခန္ဓာကိုယ်ကို ရွှေ့ကာ ဂျက်ခ် ၏ အရှေ့တွင် အလျင်အမြန် ဝင်ရောက် ပိတ်ဆို့လိုက်ပြီး အော်ဟစ်လိုက်သည်။ "ရပ်လိုက်စမ်း ဂျက်ခ်... မင်း ရူးသွားပြီလား"

သူက လက်တစ်ဖက်ဖြင့် ဂျက်ခ် ဆီသို့ အားကုန် ဖိချလိုက်သည်။

ချိတ်ပိတ်အစွမ်းကို အသုံးပြုလိုက်သည်နှင့် တစ်ပြိုင်နက် ဂျက်ခ် တစ်ကိုယ်လုံး တုန်ခါသွားပြီး လင်းယွမ် ခုနလေးတင်မှ ဖြေလျှော့ပေးလိုက်သော သန္ဓေပြောင်းစွမ်းအင်များက တစ်ဖန် ပြန်လည် ခဲသွားပြန်သည်။

ဤမြင်ကွင်းကို မြင်လိုက်ရသောအခါ လင်းယွမ်က ရုတ်တရက် လျှို့ဝှက်ဆန်းကြယ်စွာ ပြုံးလိုက်၏။

သို့သော် သူ၏ ခန္ဓာကိုယ်က လှုပ်ရှားသွားပြီး မျက်တောင်တစ်ခတ်အတွင်းမှာပင် စုန်းမ မော်လီ ၏ အရိပ်အနီးသို့ ရောက်ရှိသွားသည်ကို မြင်လိုက်ရသည်။

စုန်းမ က အလောတကြီး အော်ဟစ်လိုက်သည်။ "ဂျိမ်းစ်"

ဂျိမ်းစ် က အလျင်စလို လှည့်ကြည့်လိုက်ပြီး လှုပ်ရှားရန် ပြင်လိုက်သော်လည်း ဂျက်ခ် က သူ့ကိုယ်ပေါ်သို့ အားကုန် ခုန်အုပ်လိုက်သည်ကို မြင်လိုက်ရ၏။

နောက်တစ်ခဏတွင် ဂျိမ်းစ်၏ လည်ပင်းကို တစ်ချက်တည်းဖြင့် ကိုက်ချလိုက်တော့သည်။

ဂျိမ်းစ် ဒေါသထွက်သွားပြီး မော်လီ ကို ဂရုမစိုက်နိုင်တော့ဘဲ ဂျက်ခ် ၏ ဧရာမ ခန္ဓာကိုယ်ကြီးကို လက်သီးဖြင့် ပြင်းပြင်းထန်ထန် ထိုးချလိုက်သည်။

"ဘုန်း"

သန္ဓေပြောင်းစွမ်းအင်များကို ချိတ်ပိတ်ခံထားရသဖြင့် ဂျက်ခ် မှာ ဂျိမ်းစ်၏ သာမန် လက်သီးချက်ကိုပင် လုံးဝ မကာကွယ်နိုင်ခဲ့ပေ။

သွေးစုပ်လင်းဆွဲ တစ်ကောင်လုံး၏ ခန္ဓာကိုယ်ကြီးမှာ အရိုက်ခံရပြီး အနောက်သို့ လွင့်စင်ထွက်သွားတော့သည်။

ဂျိမ်းစ် က မော်လီ ကို ကယ်တင်ရန် အလျင်စလို လှည့်ထွက်သွားသည်။

သို့သော် ထိုသို့ ခေါင်းလှည့်လိုက်ချိန်တွင်ပင် သူ၏ မျက်နှာအမူအရာ ပြင်းထန်စွာ ပြောင်းလဲသွား၏။

မည်သည့်အချိန်ကတည်းကန်း မသိရသော်လည်း မော်လီ ကို လင်းယွမ်က အရိပ်ထဲမှနေ၍ အပြင်သို့ ဆွဲထုတ်လာသည်ကို မြင်လိုက်ရသည်။

ယခုအချိန်တွင် လင်းယွမ်၏ အကြောင်းအကျိုးမျို နဂါးလင်းဆွဲ ခြေသည်းများက စုန်းမ မော်လီ ၏ နဖူးပေါ်သို့ ဖိနှိပ်ထားပြီး ဖြစ်လေသည်။

သင်္ကေတတစ်ခုက မော်လီ ၏ ခေါင်းထဲသို့ တစ်ဝက်ကျော်ခန့် ထိုးဖောက် ဝင်ရောက်နေပြီ ဖြစ်သည်။

မော်လီ က ကြောက်လန့်တကြား အော်ဟစ်လိုက်သည်။ "လွှတ်... ငါ့ကို လွှတ်စမ်း"

"ဂျိမ်းစ်... နင် ရူးနေပြီလား... ဘာလို့ ငါ့အစွမ်းတွေကို ချိတ်ပိတ်လိုက်ရတာလဲ"

ခုနက လင်းယွမ် စတင် တိုက်ခိုက်လိုက်သည့် အခိုက်အတန့်တွင် သူမ၏ သန္ဓေပြောင်းစွမ်းအင်များ ချက်ချင်း ချိတ်ပိတ်ခံလိုက်ရကြောင်း မော်လီ သတိထားမိလိုက်သည်။

ထို့နောက် သူမသည် ထိန်းချုပ်၍ မရနိုင်တော့ဘဲ အရိပ်များထဲမှ ထွက်ပေါ်လာခဲ့ရပြီး လင်းယွမ်၏ ချက်ချင်း ချဉ်းကပ်မှုကို ခံလိုက်ရကာ ခေါင်းကို အဖိခံလိုက်ရခြင်း ဖြစ်သည်။

ထိုကြောက်မက်ဖွယ်ရာ ဝိညာဉ် သင်္ကေတက သူမ၏ ခေါင်းကို အတင်းအဓမ္မ ဆွဲဖြဲနေပြန်သဖြင့် သူမမှာ ပြောမပြတတ်အောင် ထိတ်လန့်နေမိ၏။

ယခုအချိန်တွင် သူမသည် အရိပ်ထဲသို့ ပြန်လည် ဝင်ရောက်ပြီး အလျင်အမြန် ထွက်ပြေး လွတ်မြောက်ချင်စိတ်သာ ရှိတော့သည်။

သို့သော် သူမ၏ သန္ဓေပြောင်းစွမ်းအင်များက အမှန်တကယ်ပင် ချိတ်ပိတ်ခံထားရသည်။

သူမ အလွန် အံ့အားသင့်နေပြီး လုံးဝ မယုံကြည်နိုင် ဖြစ်နေ၏။

ဤနေရာတွင် သူမကို ချိတ်ပိတ်နိုင်စွမ်းရှိသူဟူ၍ ဂျိမ်းစ် တစ်ယောက်တည်းသာ ရှိသည် မဟုတ်ပါလော။

သို့သော် ဂျိမ်းစ် က အဘယ်ကြောင့် ဤသို့ လုပ်ဆောင်ရသနည်း။

ဂျိမ်းစ် သည်လည်း ကြောင်အမ်းအမ်း ဖြစ်သွားပြီး တစ်စုံတစ်ခု မှားယွင်းနေကြောင်း သတိထားမိလိုက်သည်။

"သူက ငါ့အစွမ်းရဲ့ အကျိုးသက်ရောက်မှုကို လွှဲပြောင်းပေးနိုင်တာလား"

လင်းယွမ် မည်သည့်စွမ်းရည်ကို အသုံးပြုလိုက်သည်ကို မသိရသော်လည်း လက်ရှိ ပြသနေသော ရလဒ်များအရ ဤအဓိပ္ပာယ်ပင် ဖြစ်နေသည်။

မျက်မှောက်ရှိ ဤ ထိုက်ယန်တောင် ခေါင်းဆောင်မှာ ဤကဲ့သို့သော စွမ်းရည်မျိုး ရှိနေမည်ဟု မည်သူ ထင်ထားမည်နည်း။

သူ၏ ရင်ထဲတွင် ချက်ချင်း အေးစက်သွားပြီး အတွေးများ အလျင်အမြန် လည်ပတ်သွားကာ ဖြေရှင်းရန် နည်းလမ်းတစ်ခုကို ချက်ချင်း ရရှိသွားလေသည်။

သူက မိမိ၏ ချိတ်ပိတ်အစွမ်းကို တိုက်ရိုက် ပြန်လည် ရုပ်သိမ်းလိုက်သည်။

ထိုခဏမှာပင် လေဟာနယ်ထဲရှိ လင်းယွမ်၏ အကြောင်းအကျိုးမျို နဂါးလင်းဆွဲ ဝါးမျိုထားသော အကြောင်းအကျိုး ကြိုးမျှင်များ ချက်ချင်း ပျက်စီး ပျောက်ကွယ်သွားတော့သည်။

တစ်ချိန်တည်းမှာပင် လင်းယွမ် လက်ချောင်းကြားမှ ဖန်တီးထားသော ပြောင်းလဲထားသည့် အကြောင်းအကျိုး ကြိုးမျှင်များလည်း အတူတကွ ပျောက်ကွယ် သွားလေသည်။

မျက်တောင်တစ်ခတ်အတွင်းမှာပင် စုန်းမ မော်လီ ၏ သန္ဓေပြောင်းစွမ်းအင်များ ပြန်လည် ကောင်းမွန်လာခဲ့သည်။

မော်လီ ရင်ထဲတွင် အလွန် ဝမ်းသာသွားပြီး သန္ဓေပြောင်းစွမ်းအင်များကို အလျင်အမြန် အသက်သွင်းလိုက်ရာ အမှောင်ဓာတ် စွမ်းအင်များ အရှိန်အဟုန်ဖြင့် စီးဝင်လာပြီး သူမ တစ်ကိုယ်လုံး အရိပ်ထဲသို့ ဝင်ရောက် ပုန်းကွယ်သွားတော့မည် ဖြစ်သည်။

သို့သော် သူမ ဝမ်းသာနေဆဲ အချိန်လေးမှာပင် ရုတ်တရက် စိတ်စွမ်းအင် ကြိုးမျှင်များက သူမ၏ စိတ်ပင်လယ်ထဲသို့ အားကုန် ထိုးဖောက် ဝင်ရောက်လာလေတော့သည်။

"ဝီ"

တုန်ခါသံ ထွက်ပေါ်လာပြီးနောက် သူမ၏ ခန္ဓာကိုယ်မှာ ရပ်နေသည့် နေရာတွင်ပင် ချက်ချင်း တောင့်တင်းသွားတော့သည်။

သူမ၏ ဦးနှောက်ထဲတွင် ခန္ဓာကိုယ်ကို ရူးသွပ်စွာ အသက်သွင်းနေပြီး လှုပ်ရှားနိုင်ရန် ကြိုးစားနေ၏။

သို့သော် ခန္ဓာကိုယ်ကမူ လုံးဝ ထိန်းချုပ်၍ မရတော့ပေ။

သူမ၏ ဦးနှောက်နှင့် ခန္ဓာကိုယ်မှာ လုံးဝ ကင်းကွာသွားသည့်အလား ခံစားလိုက်ရသည်။

ဤခံစားချက်က သူမကိုယ်သူမ ရုပ်သေးရုပ် တစ်ရုပ်ဖြစ်နေသကဲ့သို့ပင်။

သူမ၏ ခံစားချက်က မမှားပေ။ ယခုအချိန်တွင် သူမသည် အမှန်တကယ်ပင် ရုပ်သေးရုပ် တစ်ရုပ်ကဲ့သို့ ဖြစ်နေပြီ ဖြစ်သည်။

လင်းယွမ်က ရုပ်သေးကြိုးမျှင်ကို အားကုန် ဆွဲလိုက်ရာ မော်လီ ၏ ခန္ဓာကိုယ်မှာ ချက်ချင်း ခုန်တက်သွားပြီး လင်းယွမ်၏ အရှေ့သို့ မျက်တောင်တစ်ခတ်အတွင်း ရောက်ရှိလာလေသည်။

စိုးရိမ်တကြီးဖြင့် အကူအညီပေးရန် ပြေးလာသော ဂျိမ်းစ် ၏ လက်သီးချက်ကလည်း ထိုးနှက်လာပြီ ဖြစ်သည်။

ရုတ်တရက် ထွက်ပေါ်လာသော စုန်းမ မော်လီ ကို ရင်ဆိုင်လိုက်ရသဖြင့် ဂျိမ်းစ် ၏ မျက်နှာအမူအရာ ချက်ချင်း ပြောင်းလဲသွားပြီး လက်ကို အလျင်အမြန် ပြန်ရုပ်သိမ်းလိုက်သည်။

ထိုအချိန်မှာပင် သူ၏ အနောက်တွင် အနက်ရောင် အရိပ်တစ်ခု ထွက်ပေါ်လာပြီး လေတိုးသံ တစ်ချက်နှင့်အတူ သူ့ကိုယ်ပေါ်သို့ တိုက်ရိုက် ခုန်အုပ်လာကာ ဂျိမ်းစ် ကို အားကုန် ကိုက်ချလိုက်လေသည်။

"ဂျက်ခ်... ဖယ်စမ်း"

ဂျိမ်းစ် က ဒေါသတကြီး အော်ဟစ်လိုက်ပြီး ဂျက်ခ် ကို ခြေထောက်ဖြင့် အားကုန် ကန်ထုတ်လိုက်သည်။

ဂျက်ခ် မှာ ချက်ချင်း နာကျင်စွာ ညည်းတွားလိုက်ရပြီး ခန္ဓာကိုယ်မှာ အနောက်သို့ လွင့်စင်ထွက်သွားတော့သည်။

သူ၏ သန္ဓေပြောင်းစွမ်းအင်များ ချိတ်ပိတ်ခံထားရသဖြင့် ဂျိမ်းစ် ၏ ပြိုင်ဘက် လုံးဝ မဖြစ်နိုင်တော့ပေ။

သို့သော် ဤသို့ အနည်းငယ် နှောင့်နှေးသွားမှုကြောင့်ပင် ယခုအချိန်တွင် မော်လီ သည် လင်းယွမ်၏ ဘေးတွင် လိမ္မာရေးခြားရှိစွာ ရပ်နေပြီ ဖြစ်သည်။

လင်းယွမ်က သူမ၏ ခေါင်းပေါ်တွင် ဖိထားသော လက်ဖဝါးကို ပြန်လည် ရုပ်သိမ်းလိုက်ပြီး ထို ရုပ်သေးကြိုးမျှင်များကိုပါ ဖယ်ရှားပေးလိုက်သည်။

သူ၏ မျက်ဝန်းများတွင် ခပ်ဖွဖွ အပြုံးတစ်ခု စွန်းထင်းနေပြီး ဂျိမ်းစ် ဆီသို့ လှည့်ကြည့်လိုက်၏။

"မင်း အလှည့်ပဲ"

ဂျိမ်းစ် ၏ မျက်နှာမှာ အလွန်တရာ အုံ့မှိုင်းသွားပြီး အဝေးမှ တစ်ဖန် ပြန်လည် ထိုးဆင်းလာသော သွေးစုပ်လင်းဆွဲ ကို ကြည့်လိုက်သလို စုန်းမ မော်လီ ကိုလည်း လှမ်းကြည့်လိုက်သည်။

သူ အသက်ပြင်းပြင်း တစ်ချက် ရှိုက်သွင်းလိုက်ပြီး ပြောလိုက်သည်။ "ထိုက်ယန်တောင် ခေါင်းဆောင်... ဒီကိစ္စကို ဒီမှာတင် အဆုံးသတ်လိုက်ရင် ဘယ်လိုလဲ"

"ငရဲကျွန်း နဲ့ နတ်သစ်ပင်ကျွန်း ကို ငါ ပေးပါ့မယ်... ခိုက်ရီ နည်းပညာအဖွဲ့ အနေနဲ့လည်း ဒီနေ့ကစပြီး မင်းတို့ရဲ့ လင်ကျန်းမြို့ ကို ထပ်မဝင်လာတော့ဘူးလို့ ငါ အာမခံနိုင်ပါတယ်"

"ငါ့ရဲ့ သူငယ်ချင်း နှစ်ယောက်ကို လွှတ်ပေးလိုက်ပါ... ငါ မင်းနဲ့ အပေးအယူ တစ်ခု လုပ်ချင်တယ်"

လင်းယွမ်က ထိုစကားကို ကြားလိုက်ရသောအခါ ခေါင်းခါယမ်းကာ မနေနိုင်ဘဲ ရယ်မောလိုက်တော့သည်။

သူက ခေါင်းကို ပုတ်ပြလိုက်ပြီး ပြောလိုက်၏။ "စကားမပြောခင် မင်းရဲ့ ဦးနှောက်ကို သေချာ သုံးပြီးမှ ပြောပေးလို့ ရမလား"

"အခုလို အခြေအနေမျိုးမှာ ငါက မင်းနဲ့ အလကား အပေးအယူစကားတွေ ပြောနေမယ်လို့ ထင်နေတာလား"

"ဒီမှာတင် အဆုံးသတ်မယ် ဟုတ်လား"

"ဘယ်ဟာအားကိုးနဲ့ ငါ့ကို လာပြီး ဒီစကားတွေ ပြောနေတာလဲ"

လင်းယွမ်၏ မျက်နှာပေါ်တွင် အေးစက်သော လှောင်ပြုံးတစ်ခု ပေါ်ပေါက်လာပြီး ဤစကားများက မျက်နှာချင်းဆိုင်ရှိ ဂျိမ်းစ် ၏ မျက်ဝန်းအောက်ခြေတွင် သတ်ဖြတ်လိုစိတ်များကို ထွက်ပေါ်လာစေတော့သည်။

ဆက်ရန်...

အပိုင်း (၈၇၆) ဂျိမ်းစ်အား ချုပ်နှောင်ခြင်း

ဂျိမ်းစ်၏ ရင်ထဲတွင် ဒေါသများ ဟုန်းဟုန်းတောက်လောင်နေပြီး သတ်ဖြတ်လိုစိတ်များ ပေါက်ကွဲထွက်လာသည်။

သူသည် သူ၏ မျက်စိရှေ့မှ ထိုက်ယန်တောင်က လင်းယွမ်ကို ချက်ချင်းပင် အသေသတ်ပစ်ချင်စိတ်များ တဖွားဖွား ပေါ်ပေါက်နေခဲ့သည်။

သို့သော်လည်း သူသည် ရင်ထဲမှ ဒေါသမီးတောက်ကို အမြန်ပင် ပြန်လည် ဖိနှိပ်လိုက်သည်။

သူက သက်ပြင်းတစ်ချက်ကို ရှိုက်လိုက်ပြီး "လင်းယွမ်... မုန်ယာကုမ္ပဏီကလည်း မင်းတို့ကို စောင့်ကြည့်နေတယ်ဆိုတာ မင်း သိသင့်တယ်နော်" ဟု ပြောလိုက်သည်။

"မင်း ဘယ်လောက်ပဲ အစွမ်းထက်နေပါစေ... မုန်ယာကုမ္ပဏီနဲ့ ငါတို့ ခိုက်ရီနည်းပညာ နှစ်ခုလုံးကို တစ်ပြိုင်နက်တည်း ရန်စရဲလို့လား"

လင်းယွမ်က အေးစက်စက် ပြုံးလိုက်ပြီး "ဟက်... မင်းတို့ နှစ်ဖွဲ့လုံးက ငါ့အိမ်တံခါးဝအထိတောင် လာတိုက်နေကြပြီကို... အခုမှ လာပြီး ဒီစကားမျိုးပြောနေတာ ရယ်စရာမကောင်းလွန်းဘူးလား" ဟု ဆိုလိုက်သည်။

"နောက်ပြီး မင်းမှာ ငါ့ကို အနိုင်ယူနိုင်မယ့် ဘာလျှို့ဝှက်လက်နက်များ ကျန်နေသေးလို့လဲ ဆိုတာကိုလည်း ငါ တကယ် စဉ်းစားလို့ မရတော့ဘူး"

"မင်းရဲ့ တိတ်ဆိတ်ခြင်းအစွမ်းက အရမ်း အစွမ်းထက်တယ်... ဒါပေမဲ့ နှမြောစရာပဲ... ငါ့အတွက်တော့ အသုံးမဝင်တော့ဘူး"

"ဂျိမ်းစ်... မင်းမှာ တခြား ဘာအစွမ်းတွေ ကျန်သေးလဲ... ထုတ်သုံးလိုက်စမ်းပါ"

ထိုစကားကို ပြောပြီးသည်နှင့် သူက လက်တစ်ချက် ဝှေ့ယမ်းကာ "တိုက်ကြ" ဟု အော်ဟစ် အမိန့်ပေးလိုက်သည်။

ဘေးဘက်ရှိ စုန်းမ မော်လီမှာလည်း ချက်ချင်း အရိပ်တစ်ခုအဖြစ် ပြောင်းလဲသွားပြီး ဂျိမ်းစ်ရှိရာသို့ အရှိန်အဟုန်ဖြင့် ပြေးဝင်သွားတော့သည်။

တစ်ချိန်တည်းမှာပင် မလှမ်းမကမ်း၌ ရှိနေသော ဂျက်ခ်ကလည်း နောက်တစ်ကြိမ် ပျံသန်းဝင်ရောက်လာပြန်သည်။

ထိုမြင်ကွင်းကို မြင်လိုက်ရသောအခါ ဂျိမ်းစ်က အသက်ကို ဝဝရှူသွင်းလိုက်ပြီး သူ၏ ဦးချိုတစ်ခုတည်းပေါ်မှ စွမ်းအင်လှိုင်းများကို နောက်တစ်ကြိမ် ထပ်မံ ပေါက်ကွဲထွက်ပေါ်လာစေသည်။

ပုံသဏ္ဌာန်မဲ့သော တိတ်ဆိတ်ခြင်းအစွမ်းသည် တစ်ကွင်းလုံးကို လျင်မြန်စွာ လွှမ်းခြုံသွားပြီး မော်လီနှင့် ဂျက်ခ်တို့ကို တိုက်ရိုက်ပင် ချိတ်ပိတ်သွားလေသည်။

ဤလူနှစ်ယောက်သာ သန္ဓေပြောင်းအစွမ်းများ မရှိတော့ပါက ပူးပေါင်းတိုက်ခိုက်လျှင်တောင်မှ ဂျိမ်းစ်၏ ပြိုင်ဘက် လုံးဝ ဖြစ်လာမည် မဟုတ်ပေ။

သို့သော်လည်း လင်းယွမ်က ခပ်ဖွဖွ တစ်ချက်သာ ပြုံးလိုက်သည်။ ဤမျှကြာအောင် တိုက်ခိုက်ပြီးချိန်တွင် ထိုက်ယန်တောင် လေပေါ်ကျွန်းမှ ဝမ်ထျန်အန်း၊ ကျိုးဟောင်ရန်၊ ယွီဝမ်ထောင်နှင့် အခြားသူများသည်လည်း ထိုနေရာသို့ လျင်မြန်စွာ ရောက်ရှိလာကြပြီ ဖြစ်သည်။

ထိုမျှမကသေးဘဲ ကောင်းကင်ယံတွင်လည်း ယာဉ်ပျံများက လျင်မြန်စွာ ဝဲပျံရောက်ရှိလာကြပြီး လေထုထဲတွင် ဆူညံစွာ ဟိန်းဟောက်တုန်ခါနေကြသည်။

ယခုအချိန်တွင် ဤနေရာ၌ ပိုက်ကွန်သဖွယ် အသေအချာ ပိတ်ဆို့ဝိုင်းရံထားပြီးဖြစ်ရာ ဂျိမ်းစ်အနေဖြင့် ကောင်းကင်ဘုံသို့ တက်နိုင်သည့် အစွမ်းရှိနေပါစေ ထွက်ပြေးလွတ်မြောက်နိုင်မည် မဟုတ်ပေ။

"ဆရာလင်း... အစီအရင် ခင်းရတော့မလား" ဝမ်ထျန်အန်းက လင်းယွမ်၏ ဘေးသို့ လျင်မြန်စွာ ပျံသန်းလာပြီး မေးမြန်းလိုက်သည်။

လင်းယွမ်က "မျိုးရိုးဗီဇ ပြန်လည်ဖွဲ့စည်းခြင်း အဆင့်ရှိတဲ့သူ အားလုံးကို တက်သွားခိုင်းလိုက်... သူတို့ပြန်မဆုတ်နိုင်အောင် အရင် ပိတ်ထားကြ" ဟု ပြောလိုက်သည်။

"အဲဒီနောက်မှ အစီအရင် ခင်းပြီး သန္ဓေပြောင်းစွမ်းအင်ကို အပြီးတိုင် ချိတ်ပိတ်လိုက်မယ်"

"နားလည်ပါပြီ"

ဝမ်ထျန်အန်းက လျင်မြန်စွာ ခေါင်းညိတ်လိုက်ပြီးနောက် ပတ်ဝန်းကျင်ရှိ ယာဉ်ပျံများကို ချက်ချင်း ကွပ်ကဲကာ လျင်မြန်စွာ နေရာယူစေတော့သည်။

ယာဉ်ပျံများသည် အကွာအဝေးကို အဆက်မပြတ် ဖြန့်ခွဲလိုက်ကြရာ မကြာမီမှာပင် အနီးတစ်ဝိုက် (၃) မိုင် ပတ်လည်အတွင်း၌ ယာဉ်ပျံများ၏ ဟိန်းဟောက်သံများဖြင့် ပြည့်နှက်သွားလေသည်။

"မျိုးရိုးဗီဇ ပြန်လည်ဖွဲ့စည်းခြင်း အဆင့်ရှိတဲ့သူ အားလုံး... တက်ပြီး သူ့ကို ဝိုင်းထားကြ"

ဝမ်ထျန်အန်း၏ အမိန့်ပေးသံ ထွက်ပေါ်လာသည်နှင့် အခြားသူများအားလုံး တဟုန်ထိုး ပြေးဝင်သွားကြသည်။

ကောင်းကင်ယံတွင် လူဦးရေများ ပိုမို များပြားလာသော်လည်း ဂျိမ်းစ်အနီးသို့ ရောက်ရှိသွားသည်နှင့် သူ၏ တိတ်ဆိတ်ခြင်းအစွမ်း လွှမ်းမိုးမှုကို ချက်ချင်း ခံရပြီး သန္ဓေပြောင်းအစွမ်းများကို အသုံးပြု၍ မရတော့ပေ။

ထို့ကြောင့် ဂျိမ်းစ်သည် တစ်ယောက်တည်းဖြင့် လူအများကို ရင်ဆိုင်နေရသော်လည်း အသာစီးကို အပြည့်အဝ ရယူထားနိုင်ဆဲ ဖြစ်သည်။

သို့သော်လည်း သူသည် စစ်မြေပြင်မှ လွတ်မြောက်အောင်တော့ မစွမ်းဆောင်နိုင်ခဲ့ပေ။ အကြောင်းမှာ ယခင်က မိတ်ဆွေဟောင်း နှစ်ဦးဖြစ်သော ဂျက်ခ်နှင့် မော်လီတို့သည် အသက်ကို ပဓာနမထားဘဲ သူ့ကို အသေအလဲ တားဆီးနေကြသောကြောင့် ဖြစ်သည်။

အခြားသူများ၏ အနှောင့်အယှက်များလည်း ပေါင်းစပ်ပါဝင်နေသဖြင့် သူ့အတွက် ထွက်ပြေးရန် နည်းလမ်း လုံးဝ မရှိတော့ပေ။

"ပစ်"

"ဝုန်း"

"ဝုန်း"

"ဝုန်း"

အမြောက်သံများ တစ်ဆက်တည်း ပေါက်ကွဲထွက်ပေါ်လာပြီး ယာဉ်ပျံများသည် စွမ်းအင်ချိတ်ပိတ် ကျည်ဆန်များကို လျင်မြန်စွာ ပစ်ခတ်လိုက်ကြသည်။

မျက်စိတစ်မှိတ်အတွင်းမှာပင် အနီးတစ်ဝိုက် (၃) မိုင် ပတ်လည်အတွင်းရှိ ဧရိယာတစ်ခုလုံးသည် စွမ်းအင်ချိတ်ပိတ် အစီအရင်၏ လွှမ်းခြုံပိတ်လှောင်မှုကို ခံလိုက်ရတော့သည်။

ထိုအချိန်တွင် အစွမ်းပိုင်ရှင်များ အားလုံးသည် ၎င်းတို့၏ သန္ဓေပြောင်းအစွမ်းများကို ဆုံးရှုံးသွားကြလေသည်။

မျိုးရိုးဗီဇ ပြန်လည်ဖွဲ့စည်းခြင်း အဆင့်ရှိသော အစွမ်းပိုင်ရှင်များသည် အခြေခံ မျိုးရိုးဗီဇ ပုံသဏ္ဌာန်ကိုသာ ထိန်းသိမ်းထားနိုင်တော့ပြီး ကိုယ်ကာယ ကြံ့ခိုင်မှုကိုသာ အားပြုကာ ကောင်းကင်ယံတွင် အဆက်မပြတ် သတ်ဖြတ်တိုက်ခိုက်နေကြရသည်။

ဂျိမ်းစ်သည်လည်း ဤအချိန်၌ သူ၏ အစွမ်းများကို ဆုံးရှုံးသွားခဲ့ပြီ ဖြစ်သည်။

သူသည်လည်း အခြားသော အစွမ်းပိုင်ရှင်များနည်းတူ အခြေခံအကျဆုံးသော ကိုယ်ကာယ ခွန်အားကိုသာ အသုံးပြုနိုင်တော့သည်။

ဤသို့ဖြင့် သူ၏ မျိုးရိုးဗီဇ ပြန်လည်ဖွဲ့စည်းခြင်း တိုးတက်မှုနှုန်းသည် (၈၅%) အထက်သို့ ရောက်ရှိနေသော်လည်း ထိုက်ယန်တောင်မှ မျိုးရိုးဗီဇ ပြန်လည်ဖွဲ့စည်းခြင်း အဆင့်ရှိ အစွမ်းပိုင်ရှင်များ၏ ဝိုင်းဝန်းတိုက်ခိုက်မှုကိုတော့ မခံနိုင်တော့ပေ။

သူ၏ ကျောဘက်တွင် လက်မောင်းများ မည်မျှပင် များပြားစွာ ရှိနေပါစေ ထိုက်ယန်တောင်ဘက်မှ တစ်ယောက်လျှင် လက်တစ်ဖက်စီကို ဖိနှိပ်ထားလိုက်ရုံဖြင့် သူ့ကို အသေအလဲ ချုပ်နှောင်ထားနိုင်ပြီ ဖြစ်သည်။

မျက်တောင်တစ်ခတ်အတွင်းမှာပင် ဂျိမ်းစ်သည် ကောင်းကင်ယံ၌ အတင်းအဓမ္မ ဖိချခံလိုက်ရလေသည်။

ဝမ်ထျန်အန်း၏ ဓားလက်တံက ရုတ်တရက် မြင့်တက်လာပြီး ဂျိမ်းစ်၏ လည်မျိုတွင် ထောက်ထားကာ "ရပ်လိုက်စမ်း... ထပ်ပြီး ခုခံရဲရင် မင်းကို ငါ အသေသတ်ပစ်မယ်" ဟု အော်ဟစ်လိုက်သည်။

ဂျိမ်းစ်မှာ အလွန်အမင်း ဒေါသထွက်နေပြီး ဝမ်ထျန်အန်းကို စိုက်ကြည့်ကာ "ခွေးကောင်... ဝမ်ထျန်အန်း... အရင်တုန်းက မင်းကို ရေကြီးနေတဲ့ထဲကနေ ဘယ်သူ ကယ်တင်ခဲ့လဲဆိုတာ မမေ့နဲ့... ငါတို့ ခိုက်ရီနည်းပညာကွ"

"အခုတော့ မင်းက ခိုက်ရီနည်းပညာကို သစ္စာဖောက်ရဲတယ်ပေါ့... ခွေးကောင်... အရှက်မရှိတဲ့ကောင်"

သူသည် ဒေါသလွန်ကဲကာ အဆက်မပြတ် ဆဲဆိုလိုက်သေးသည်။

ဝမ်ထျန်အန်း၏ မျက်နှာအမူအရာမှာ ပြောင်းလဲသွားခြင်း မရှိဘဲ လုံးဝ တုန်လှုပ်မှု မရှိပေ။ သူ၏ ဓားလက်တံဖြင့်သာ ခပ်ပြင်းပြင်း တစ်ချက် ဖိထောက်လိုက်သည်။

ချက်ချင်းပင် ဂျိမ်းစ်၏ လည်ပင်းအတွင်းသို့ ထိုးဖောက်ဝင်ရောက်သွားပြီး လက်မအနည်းငယ်ခန့် အနက်အထိ ရောက်ရှိသွားကာ အရေပြားနှင့် အသားများ ပြတ်ရှသွားပြီး သွေးများ စီးကျလာတော့သည်။

ဝမ်ထျန်အန်းက အေးစက်စက် ပြုံးလိုက်ပြီး "ထပ်ပြီး စကားများနေရင် မင်းခေါင်းကို ဖြတ်ပစ်မယ်" ဟု ပြောလိုက်သည်။

ဂျိမ်းစ်က အံကို ကျိတ်လိုက်ပြီး နောက်ဆုံးတွင်တော့ ငြိမ်ကျသွားလေသည်။

ဝမ်ထျန်အန်း၏ ခြိမ်းခြောက်မှုအောက်တွင် ဂျိမ်းစ်သည် လူသားပုံသဏ္ဌာန်သို့ ပြန်လည် ရောက်ရှိသွားသည်။

ထို့နောက် ဝမ်ထျန်အန်းက စွမ်းအင်ချိတ်ပိတ် လက်ထိပ်ကို သူ့အား တိုက်ရိုက် ခတ်လိုက်သည်။

ဤတစ်ကြိမ်တွင်တော့ ဂျိမ်းစ်သည် အပြည့်အဝ ချုပ်နှောင်ခံလိုက်ရပြီ ဖြစ်သည်။

ထို့နောက် ဂျိမ်းစ်ကို လင်းယွမ်၏ အရှေ့သို့ ခေါ်ဆောင်သွားကြပြီး သူက လင်းယွမ်ကို မော့ကြည့်လိုက်သည်။

လင်းယွမ်၏ မျက်နှာအမူအရာမှာ အေးစက်တည်ငြိမ်နေပြီး "မင်းတို့ ဒီလောက်မြန်မြန် ရောက်လာလိမ့်မယ်လို့ ငါ မထင်ထားဘူး... ကျင်းရှီရုံပဲ ထပ်ရောက်လာမယ်လို့ ငါ ထင်ထားခဲ့တာ" ဟု ပြောလိုက်သည်။

ဂျိမ်းစ်က လေးနက်သောအသံဖြင့် "ကျင်းရှီရုံ တကယ်ပဲ ရောက်လာခဲ့တာလား... ကြည့်ရတာ သူ့ရဲ့ စွမ်းအင်ချိတ်ပိတ် အစီအရင်ကလည်း မင်းတို့ဆီကနေ ရသွားတာပဲ ဖြစ်ရမယ်" ဟု ပြောလိုက်သည်။

လင်းယွမ် ချက်ချင်း မျက်မှောင်ကြုတ်သွားပြီး "ဟင်... မင်း ဘာပြောလိုက်တာလဲ... ကျင်းရှီရုံက စွမ်းအင်ချိတ်ပိတ် အစီအရင်ကို ရသွားပြီ ဟုတ်လား"

ဂျိမ်းစ်က လင်းယွမ်ကို ကြည့်ကာ "မင်း မသိသေးဘူးလား... ဟက်ဟက်... ကျင်းရှီရုံက မင်းတို့ ထိုက်ယန်တောင်က စွမ်းအင်ချိတ်ပိတ် အစီအရင်ကို ရသွားပြီ... ငါတို့နဲ့တောင် တိုက်ခိုက်ပြီးသွားပြီ"

"စွမ်းအင်ချိတ်ပိတ် အစီအရင်က အရမ်း အစွမ်းမထက်ဘူးဆိုရင် ငါလည်း စွမ်းအင်ချိတ်ပိတ် သင်္ကေတကို လာရှာဖို့ မင်းတို့ဆီကို လူတွေ ခေါ်လာမှာ မဟုတ်ဘူး"

သူ ဤသို့ ပြောလိုက်သောအခါမှသာ လင်းယွမ် နားလည်သွားတော့သည်။ လက်တွေ့တွင် ဤသူသည် ကျင်းရှီရုံနှင့် တိုက်ခိုက်ပြီးခဲ့ပြီ ဖြစ်သည်။

ကြည့်ရသည်မှာ သူ၏ သွေးခွဲခြင်း အကြံအစည်က အလုပ်ဖြစ်သွားပုံရသည်။ သို့သော် ကျင်းရှီရုံက မည်သည့်အချိန်တွင် ထိုက်ယန်တောင်သို့ ခိုးဝင်ပြီး စွမ်းအင်ချိတ်ပိတ် သင်္ကေတကို ရယူသွားခဲ့သနည်း။

လင်းယွမ်၏ ရင်ထဲတွင် အနည်းငယ် အေးစက်သွားသည်။ ကျင်းရှီရုံသည် ထိုက်ယန်တောင်၏ ဩဇာခံ နယ်မြေအတွင်းသို့ တစ္ဆေသရဲများအလား လျှို့ဝှက်စွာ ပေါ်လာနိုင်ရုံသာမက ထိုက်ယန်တောင်၏ လုံခြုံရေးအဆင့် အလွန်မြင့်မားသော စွမ်းအင်ချိတ်ပိတ် သင်္ကေတကိုပါ ရယူသွားနိုင်ခဲ့သည်။

ထိုသို့ဆိုလျှင် သူသာ ထိုက်ယန်တောင်သို့ လျှို့ဝှက်စွာ ခိုးဝင်ပြီး သူ၏သား (သို့မဟုတ်) အမမေ၊ လင်းယာ တို့ကို ဖမ်းဆီးချင်လျှင်လည်း လက်ဖဝါးလှန်သကဲ့သို့ လွယ်ကူနေမည် မဟုတ်ပါလား။

ဤအချက်ကို တွေးမိသည်နှင့် လင်းယွမ်၏ မျက်နှာမှာ များစွာ တည်ကြည်လေးနက်သွားတော့သည်။

ကြည့်ရသည်မှာ သူသည် ကျင်းရှီရုံကို အမြန်ဆုံး ရှင်းလင်းပစ်ရန် လိုအပ်နေပြီ ဖြစ်သည်။

ထိုသို့ တွေးပြီးနောက် လင်းယွမ်က ဂျိမ်းစ်ကို လှမ်းကြည့်လိုက်သည်။

ဤသူ၏ သန္ဓေပြောင်းအစွမ်းမှာ အလွန် ထူးခြားလှသည်။ တိတ်ဆိတ်ခြင်းအစွမ်းသည် စွမ်းအင်ချိတ်ပိတ် အစီအရင်နှင့်ပင် နှိုင်းယှဉ်၍ ရနိုင်သည်။

သို့သော် စွမ်းအင်ချိတ်ပိတ် အစီအရင်သည် သူ၏ အစွမ်းလောက်တော့ လှုပ်ရှားရ မသွက်လက်ပေ။ သို့တိုင်အောင် သီးသန့်နယ်မြေတစ်ခုတွင် ချုံခိုတိုက်ခိုက်မည်ဆိုပါက သူ၏ တိတ်ဆိတ်ခြင်းအစွမ်းသည်လည်း စွမ်းအင်ချိတ်ပိတ် အစီအရင်၏ ပစ်မှတ်ထားခြင်းကို အလွယ်တကူ ခံရနိုင်သည်။

ထို့အပြင် အကြောင်းအကျိုး အမျိုးအစား အစွမ်းများကိုလည်း ဂျိမ်းစ် ဖြေရှင်းနိုင်စွမ်း မရှိပုံရသည်။

ပစ်မှတ်အပေါ် အသုံးပြုထားသော တိတ်ဆိတ်ခြင်းအစွမ်း၏ အကြောင်းအကျိုး ကြိုးမျှင်ကို ဖြတ်တောက်လိုက်သည်နှင့် တစ်ပြိုင်နက် သူ၏ တိတ်ဆိတ်ခြင်းအစွမ်းသည်လည်း အာနိသင် ပျက်ပြယ်သွားမည် ဖြစ်သည်။

သေချာသည်မှာ ထိုကဲ့သို့သော အကြောင်းအကျိုး ကြိုးမျှင်ကို ဖြတ်တောက်နိုင်သည့် အစွမ်းမျိုးကို မည်သူမဆို အသုံးပြုနိုင်သည်တော့ မဟုတ်ပေ။

တစ်စုံတစ်ယောက်၌ ထိုသို့သော သန္ဓေပြောင်းအစွမ်းမျိုး ရှိနေလျှင်ပင် ထိုအကြောင်းအကျိုး ကြိုးမျှင်ကို လှုပ်ခတ်နိုင်ရန် လုံလောက်သော စိတ်စွမ်းအင် ခွန်အားကို ပိုင်ဆိုင်ထားရန် လိုအပ်ပေသည်။

သူကိုယ်တိုင် ဤအချက်ကို လွယ်ကူစွာ လုပ်ဆောင်နိုင်ခဲ့ခြင်းမှာ သူ၏ စိတ်စွမ်းအင်သည် ဂျိမ်းစ်ထက် ပိုမို အစွမ်းထက်နေသောကြောင့်သာ ဖြစ်သည်။

"ဒီလူက အသုံးဝင်သေးတယ်... နောက်ထပ် ကျင်းရှီရုံကို ရင်ဆိုင်တဲ့နေရာမှာ သူက အားကိုးရတဲ့ အကူအညီ ဖြစ်လာနိုင်တယ်"

လင်းယွမ် ဤအချက်ကို တွေးမိသွားသည်။ မည်သို့ပင်ဆိုစေ ဤလူသည် မျိုးရိုးဗီဇ ပြန်လည်ဖွဲ့စည်းခြင်း တိုးတက်မှုနှုန်း (၈၅%) အထက်သို့ ရောက်ရှိနေသည့် အစွမ်းပိုင်ရှင်တစ်ယောက် ဖြစ်ရာ ဤအတိုင်း သတ်ပစ်လိုက်ရန်မှာ နှမြောစရာ ကောင်းလွန်းလှသည်။

ထိုသို့ တွေးပြီးသည်နှင့် လင်းယွမ်က ဝိညာဉ် ချုပ်နှောင်ခြင်း သင်္ကေတ တစ်ခုကို ဖန်တီးလိုက်ပြီးနောက် "ကျင်းရှီရုံ ကိစ္စကို ငါ့ဘာသာ ဖြေရှင်းဖို့ နည်းလမ်းရှာလိုက်မယ်... မင်းအကြောင်း အရင်ပြောကြတာပေါ့" ဟု ဆိုလိုက်သည်။

"အခု မင်းက ငါ့ရဲ့ အကျဉ်းသား ဖြစ်နေပြီ... မင်းကို ရွေးချယ်စရာ လမ်းနှစ်လမ်း ပေးမယ်"

"ပထမတစ်လမ်းက... မင်းခန္ဓာကိုယ်ထဲကို ဒီ ဝိညာဉ် ချုပ်နှောင်ခြင်း သင်္ကေတ ထည့်သွင်းတာကို လက်ခံပြီး နောက်ပိုင်း ငါ့အတွက် အလုပ်လုပ်ပေးရမယ်... ငါ ခိုင်းတာကို လုပ်ရမယ်"

"ဒုတိယတစ်လမ်းက... မင်းကို တိုက်ရိုက် သတ်ပစ်လိုက်မယ်... ကံကောင်းရင်တော့ မင်းခန္ဓာကိုယ်ထဲကနေ တိတ်ဆိတ်ခြင်းအစွမ်း ပါတဲ့ သင်္ကေတအရိုး ကို ရှာတွေ့နိုင်လောက်တယ်"

"မင်းဘာသာ ရွေးလိုက်ပါ"

ဂျိမ်းစ် ချက်ချင်းပင် တိတ်ဆိတ်သွားတော့သည်။

သူက သက်ပြင်းတစ်ချက်ကို ရှိုက်လိုက်ပြီး "တခြား ရွေးချယ်စရာ မရှိတော့ဘူးလား... ငါတို့ ပူးပေါင်းလို့ ရပါတယ်" ဟု မေးလိုက်သည်။

"ခိုက်ရီနည်းပညာရဲ့ သယံဇာတတွေ၊ လူဦးရေနဲ့ နည်းပညာတွေ အားလုံးကို မင်းဆီ ပေးအပ်ပါ့မယ်... ကျင်းရှီရုံကို ရင်ဆိုင်ဖို့လည်း မင်းကို ကူညီပေးနိုင်တယ်"

လင်းယွမ်က ဟက်ဟက်ပက်ပက် ရယ်မောလိုက်ပြီး "ငါနဲ့ မတိုက်ခိုက်ခင်တုန်းကသာ ဒီစကားတွေကို ပြောခဲ့ရင် ငါ စဉ်းစားပေးကောင်း စဉ်းစားပေးလိမ့်မယ်"

"အခု အချိန်မှာတော့... ဟက်... ငါ့ကို လာပြီး စည်းကမ်းချက်တွေ တောင်းဆိုဖို့ မင်းမှာ အရည်အချင်း ရှိသေးတယ်လို့ ထင်နေတုန်းပဲလား"

ဂျိမ်းစ်မှာ ပြန်လည် ချေပရန် မည်သည့် နည်းလမ်းမှ မရှိတော့ပေ။

လက်ရှိတွင် သူသည် အကျဉ်းသား တစ်ယောက် ဖြစ်နေပြီဖြစ်ရာ လင်းယွမ် ပြောခဲ့သလိုပင် သူ ရွေးချယ်စရာ မရှိတော့ပေ။

ထို့ကြောင့် သူက ခဏတာ စဉ်းစားလိုက်ပြီးနောက် "ပထမလမ်းကိုပဲ ရွေးပါ့မယ်" ဟု ပြောလိုက်သည်။

လင်းယွမ်က ပြုံးလိုက်ပြီး "ဉာဏ်ကောင်းတဲ့လူပဲ... စိတ်ပင်လယ် ကို ဖွင့်ထားလိုက်... မခုခံနဲ့... ဒုတိယတစ်ကြိမ် ထပ်မပြောချင်ဘူး"

သူက လက်လှမ်းလိုက်ပြီး ဝိညာဉ် ချုပ်နှောင်ခြင်း သင်္ကေတကို ဂျိမ်းစ်၏ ဝိညာဉ်ထဲသို့ ရိုက်သွင်းလိုက်သည်။

ဂျိမ်းစ်သည် ဝိညာဉ်၏ တုန်လှုပ်မှုကို အတင်းအကြိတ် ခံစားရင်း အံကို ကြိတ်ကာ လင်းယွမ်၏ ဝိညာဉ် ချုပ်နှောင်ခြင်း သင်္ကေတကို သူ၏ ဝိညာဉ်ထဲသို့ ဝင်ရောက် ပေါင်းစပ်ခွင့် ပြုလိုက်ရသည်။

တကယ်တမ်း၌ သူ ရွေးချယ်စရာ မရှိတော့ကြောင်း သူ့စိတ်ထဲတွင် ရှင်းလင်းစွာ သိနေသည်။

သို့သော် လင်းယွမ်၏ ဤစွမ်းရည်မျိုးဖြင့်ဆိုလျှင် အနှေးနဲ့အမြန် မျိုးရိုးဗီဇ ပြန်လည်ဖွဲ့စည်းခြင်း ပြည့်စုံမှုအဆင့် သို့ အောင်မြင်စွာ ရောက်ရှိလာမည် ဖြစ်ကြောင်းကိုလည်း သူ သိထားသည်။

ထိုအချိန်သို့ ရောက်လာပါက ကျင်းရှီရုံပင်လျှင် ဤသူ၏ အရှေ့တွင် ရိုရိုကျိုးကျိုး နေရနိုင်ချေ ရှိသည်။

လူကြီးသူမများ ပြောလေ့ရှိသည့်စကားအတိုင်း အသေဆိုးနဲ့ သေရတာထက် အသက်ရှင်နေရတာက ပိုကောင်းသေးသည်။ အသက်ရှင်နေသရွေ့ မျှော်လင့်ချက် ရှိနေသေးသည် မဟုတ်ပါလား။

ထိုကဲ့သို့သော အတွေးများကို ရင်ဝယ်ပိုက်ထားရင်း သူသည် ဝိညာဉ် ချုပ်နှောင်ခြင်း သင်္ကေတ၏ ပေါင်းစပ်မှုကို ခံယူလိုက်လေသည်။

ဝိညာဉ် ချုပ်နှောင်ခြင်း သင်္ကေတသည် သူ၏ ဝိညာဉ်ထဲသို့ အဆက်မပြတ် ပေါင်းစပ်ဝင်ရောက်လာသည်နှင့်အမျှ သူ၏ အတွေးအမျိုးမျိုးတို့မှာလည်း တဖြည်းဖြည်း ပျောက်ကွယ်သွားတော့သည်။

ထိုအစား လင်းယွမ်အပေါ် အသေခံကာ သစ္စာစောင့်သိရမည် ဟူသော စိတ်ထားတစ်ရပ် ပြောင်းလဲ ဖြစ်ပေါ်လာလေသည်။

၎င်းကပင် ဝိညာဉ် ချုပ်နှောင်ခြင်း သင်္ကေတ၏ ကြောက်မက်ဖွယ်ရာ ကောင်းသော အချက် ဖြစ်သည်။

ဝိညာဉ် ချုပ်နှောင်ခြင်း သင်္ကေတ၏ ရိုက်သွင်းမှုကို ခံလိုက်ရသည်နှင့် တစ်ပြိုင်နက် အတွေးအမြင် အသိစိတ်များ အားလုံးသည် ကျေးကျွန်တစ်ယောက်၏ အသိစိတ်အဖြစ်သို့ ပြောင်းလဲသွားမည် ဖြစ်သည်။

အရာအားလုံးကို ဆရာလင်းဖြစ်သူ၏ အကျိုးစီးပွားအတွက်သာ စဉ်းစားပေးတော့မည် ဖြစ်သည်။

လင်းယွမ်က လက်ကို ပြန်ရုတ်လိုက်ပြီး ဂျိမ်းစ်ကို ကြည့်ကာ ကျေနပ်သော အမူအရာကို ပြသလိုက်သည်။

သူက လက်တစ်ချက် ဝှေ့ယမ်းကာ ဂျိမ်းစ်၏ လက်ပေါ်ရှိ လက်ထိပ်ကို တိုက်ရိုက် ဖွင့်ပေးလိုက်ပြီး "ကောင်းတယ် ဂျိမ်းစ်... အခု ငါ့ကို ပြောစမ်း... မင်းတို့နဲ့ ကျင်းရှီရုံ ဘာတွေ ဖြစ်ခဲ့ကြတာလဲ... မင်းတို့ တိုက်ခိုက်ခဲ့ကြတာလား" ဟု မေးလိုက်သည်။

ဂျိမ်းစ်က ရိုသေလေးစားစွာဖြင့် "ဆရာလင်း... ကျင်းရှီရုံရဲ့ လက်အောက်မှာ ဝူယောင်ပန်းလို့ ခေါ်တဲ့ ကိုယ်ပွားအစွမ်း ပိုင်ရှင် တစ်ယောက် ရှိပါတယ်... ပြီးခဲ့တဲ့ အကြိမ်က သူက စုန်းမ မော်လီကို ဆက်သွယ်ပြီး ဆရာလင်းကို အတူတူ လက်စားချေဖို့ ထိုက်ယန်တောင်ကို လာတိုက်ခိုက်ခဲ့ကြတာပါ" ဟု ပြန်လည် တင်ပြလေသည်။

"ဒါပေမဲ့ သူတို့ မဟာမိတ်အဖွဲ့ ကျရှုံးသွားပြီးတဲ့နောက်မှာ ဝူယောင်ပန်းက သူ့ကို သစ္စာဖောက်ခဲ့တယ်လို့ စုန်းမ မော်လီက ပြောပါတယ်... အသက်ရှင်ဖို့အတွက် ကိုယ်လွတ်ရုန်းပြီး သူ့ကို သတ်ဖို့တောင် ရွေးချယ်ခဲ့တယ် တဲ့"

"ကျွန်တော် သတင်းကြားကြားချင်းမှာပဲ မုန်ယာကုမ္ပဏီကို လူတွေခေါ်သွားပြီး ဝူယောင်ပန်းကို အပ်ဖို့ ကျင်းရှီရုံဆီကို သွားတောင်းဆိုခဲ့တယ်"

"မထင်မှတ်ထားဘဲ ကျင်းရှီရုံက ခေါင်းမာမာနဲ့ ကျွန်တော့်ကို ငြင်းဆန်ခဲ့လို့ အဲဒီကနေ ကျွန်တော်တို့ စတိုက်ဖြစ်ကြတာပါပဲ"

"အစတုန်းကတော့ သူ့မှာ စွမ်းအင်ချိတ်ပိတ် သင်္ကေတ လိုမျိုး လျှို့ဝှက်လက်နက် မရှိသေးပါဘူး... ကျွန်တော်က သူ့ရဲ့ ကိုယ်ပွားတစ်ခုကို သတ်ပစ်လိုက်ပြီးတဲ့နောက်မှာတော့ သူက ကျွန်တော်တို့ ခိုက်ရီနည်းပညာရဲ့ စခန်းကို ခြိမ်းခြောက်ပြီး ညှိနှိုင်းမှုတွေ လုပ်လာခဲ့တယ်"

"ကျွန်တော့်အနေနဲ့ သူ့ရဲ့ ကိုယ်ပွားတစ်ခုကို သတ်ပစ်နိုင်ခဲ့ပေမဲ့ သူ့ရဲ့ ပင်မခန္ဓာကိုယ်က ဘယ်မှာ ပုန်းနေလဲဆိုတာကိုတော့ မသိခဲ့ဘူး... ဒါကြောင့် သူ့ကို ညှိနှိုင်းဖို့ပဲ ရွေးချယ်ခဲ့ရပြီး သုံးရက်အတွင်း ဝူယောင်ပန်းကို လာအပ်ဖို့ ရာဇသံပေးခဲ့ပါတယ်... ကိုယ်ပွားတစ်ခုပဲ ဖြစ်ဖြစ်ပေါ့... အဲဒါက စုန်းမ မော်လီအတွက် ဒေါသဖြေဖို့ သက်သက်ပါပဲ"

"ဒီလောက် ရိုးရှင်းတဲ့ တောင်းဆိုမှုက မုန်ယာကုမ္ပဏီကို မျက်နှာသာပေးလိုက်တာ ဖြစ်ပြီး အားလုံး မျက်နှာပန်းလှအောင် လုပ်ပေးလိုက်တာလို့ ကျွန်တော် ထင်ခဲ့တာ... ဒါပေမဲ့ သူက ဒီ သုံးရက်အချိန်ကို အသုံးချပြီး စွမ်းအင်ချိတ်ပိတ် သင်္ကေတ ကို ရသွားလိမ့်မယ်လို့ ထင်မထားခဲ့ဘူး"

"မနေ့က မတိုင်ခင်မှာပဲ ကျွန်တော် သူ့ဆီကို နောက်တစ်ခေါက် ထပ်သွားပြီး တိုက်ခိုက်ခဲ့တာ... အဲဒီမှာ ကျွန်တော် အထိနာသွားခဲ့တယ်"

"နောက်ပိုင်းကျမှ စုန်းမ မော်လီက ဒီလို စွမ်းအင်ချိတ်ပိတ် အစီအရင် မျိုးက ထိုက်ယန်တောင်မှာပဲ ရှိတယ်လို့ သတိပေးလာတာနဲ့ ကျွန်တော်တို့ ဒီဘက်ကို ရောက်လာခဲ့ကြတာပါ"

ထိုအခါမှသာ လင်းယွမ်သည် ယွီကျိုးပြည်နယ် တွင် ဘာတွေ ဖြစ်ပျက်ခဲ့သလဲ ဆိုတာကို နားလည်သွားတော့သည်။

"ကျင်းရှီရုံရဲ့ ကိုယ်ပွားအစွမ်းက မူလကတည်းက လူအင်အား သုံးတဲ့ နည်းဗျူဟာကို ဖန်တီးနိုင်ပြီးသား... အခု စွမ်းအင်ချိတ်ပိတ် အစီအရင် ကိုပါ ထပ်ပေါင်းထည့်လိုက်တော့ ကျားကိုအတောင်ပံတပ်ပေးလိုက်သလို ဖြစ်သွားပြီပေါ့"

"ကြည့်ရတာ သူ့ကို အမြန်ဆုံး ဖမ်းမိမှ ဖြစ်တော့မယ်... အဲဒီလိုမှ မဟုတ်ဘဲ သူ့ကို ဒီအတိုင်း ဆက်လွှတ်ထားမယ်ဆိုရင် အနှေးနဲ့အမြန် ငါ့ရဲ့ ထိုက်ယန်တောင်ကို လာတိုက်ခိုက်လိမ့်မယ်"

ဂျိမ်းစ်က ချက်ချင်းပင် "အခုချိန်ဆိုရင် သူ ကျွန်တော်တို့ ခိုက်ရီနည်းပညာ ကို သွားတိုက်ခိုက်နေလောက်ပြီ" ဟု ပြောလိုက်သည်။

"ပြီးခဲ့တဲ့ အကြိမ်က ကျွန်တော်တို့ သုံးယောက် သူ့ကို တိုက်ခိုက်တာ ရှုံးနိမ့်ခဲ့ပြီး အဖမ်းခံရမလိုတောင် ဖြစ်သွားခဲ့သေးတယ်"

"အခု ကျွန်တော်တို့ ထွက်ပြေးလာကြပြီဆိုတော့ ကျင်းရှီရုံက ဒီအတိုင်း လွယ်လွယ်နဲ့ လက်လျှော့မှာ မဟုတ်ဘူး... သေချာပေါက် ကျွန်တော်တို့ကို ရှာဖို့ ခိုက်ရီနည်းပညာ ကုမ္ပဏီဘက်ကို သွားလိမ့်မယ်"

"ဒါကြောင့် လောလောဆယ်တော့ သူ ထိုက်ယန်တောင် ဘက်ကို လာထိမှာ မဟုတ်သေးဘူး"

"ဆရာလင်း... မုန်ယာကုမ္ပဏီ ကို ရင်ဆိုင်ချင်တယ်ဆိုရင် အခုအချိန်က အကောင်းဆုံး အချိန်ပါပဲ... ကျွန်တော် ပြန်သွားပြီး ခိုက်ရီနည်းပညာ က လူတွေကို ခေါ်ပြီး မုန်ယာကုမ္ပဏီ ရဲ့ အဓိက အင်အားစုတွေကို နှောင့်ယှက်ဟန့်တားထားပြီး သူတို့ရဲ့ အာရုံစိုက်မှုကို ဆွဲဆောင်ထားပေးနိုင်ပါတယ်"

ဆက်ရန်...