အခန်း ၉၃၂

အခန်း (၉၃၂) - အင်မော်တယ်နှင့် နီးစပ်သူ

ထိုက်ကျိမှ ယင်နှင့်ယန်ကို ဖြစ်ပေါ်စေပြီး ယင်နှင့်ယန်မှ သရုပ်လေးပါးကို ဖြစ်ပေါ်စေ၏။ ထိုက်ကျိ အခင်းအကျင်းမြေပုံတစ်ခုက ထိုအရာနှစ်ခုစလုံးကို လွှမ်းခြုံထား၏။ နင်ချီကိုယ်တိုင်က ထိုက်ယင်နေမင်း နတ်ဘုရားကျင့်စဉ်ကို ကျင့်ကြံထားသူဖြစ်ပြီး သူ၏ ကိုယ်တွင်းစွမ်းအင်များမှာ အချင်းချင်း အပြန်အလှန် ပံ့ပိုးပေးကာ အပြန်အလှန် ဖိနှိပ်ထိန်းချုပ်နိုင်စွမ်း ရှိ၏။ ဤမျှသေးငယ်သော ဝိညာဉ်အခင်းအကျင်းလေးကို ပယ်ဖျက်ရန်မှာ သူ့အတွက် ကလေးကစားသလို လွယ်ကူနေသည် မဟုတ်ပါလော။

နင်ချီက ခြေထောက်ဖြင့် အခင်းအကျင်းတစ်ခု ဖန်တီးကာ သူတို့၏ အခင်းအကျင်းများနှင့် ချက်ချင်း ချိတ်ဆက်လိုက်သည်ကို မြင်သောအခါ ကျောက်ယွီကျွင်းနှင့် ကုန်းထျန်းတောက်တို့ နှစ်ဦးစလုံးမှာ အံ့အားသင့်သွားပြီး မျက်လုံးများ ပြူးကျယ်သွားကြတော့သည်။ တစ်ခုနှင့်တစ်ခု ပဋိပက္ခဖြစ်ကာ တိုက်ခိုက်နေကြသော အခင်းအကျင်းများသည် ယခုအခါ နင်ချီ ထွင်းထုထားသော အခင်းအကျင်းကြီးအတိုင်း လိုက်ပါစီးဆင်းသွားကြပြီ ဖြစ်သည်။ စွမ်းအားနှစ်ရပ်မှာ ပြီးပြည့်စုံစွာ ပေါင်းစပ်သွားကြပြီး တိကျသော ပုံစံတစ်ခုဖြင့် စတင်လည်ပတ်လာလေတော့၏။

ထို့အပြင် နင်ချီသည် စွမ်းအားနှစ်ခုကြားတွင် မောင်းတံတစ်ခု ဖန်တီးလိုက်သလို ပြုမူလိုက်ရာ... အခင်းအကျင်း နှစ်ခုအတွင်းရှိ စွမ်းအားများကို အဆက်မပြတ် အတက်အကျ ဖြစ်ပေါ်စေပြီး အပြန်အလှန် ဖိနှိပ်နေခြင်းမှ အပြန်အလှန် ပံ့ပိုးပေးခြင်းသို့ အံ့မခန်း ပြောင်းလဲသွားစေတော့သည်။

“ဒါ... ဒါက...”

ကျောက်ယွီကျွင်း၏ ကြည်လင်သော အပြာရောင် မျက်ဝန်းအစုံမှာ နောက်တစ်ကြိမ် လှုပ်ခတ်သွားရပြန်၏။ နင်ချီက အမှန်တကယ်ပင် လုပ်နိုင်ခဲ့တော့၏။ သူမသည် လမင်းပင်လယ် အင်မော်တယ်ဂိုဏ်း၏ ဂိုဏ်းချုပ်တစ်ဦး ဖြစ်ပြီး ကာလကြာရှည်စွာ လေ့လာဆည်းပူးခဲ့မှုများကြောင့် ဝိညာဉ်အခင်းအကျင်း ပညာရပ်တွင် ဆရာတစ်ဆူ အဆင့်သို့ ရောက်ရှိနေသူ ဖြစ်သည်။ ထိုသို့သော နောက်ခံအခြေအနေမျိုး ရှိနေသော်ငြားလည်း၊ ကျောက်ယွီကျွင်းသည် နင်ချီ၏ ဖြစ်ကတတ်ဆန်း ချထားသယောင်ရှိသော အခင်းအကျင်းပုံစံကို လုံးဝ ဖောက်ထွင်းမမြင်နိုင်ဘဲ ဖြစ်နေရတော့၏။

ယခုအခါ နင်ချီသည် မဟာအခင်းအကျင်းကြီး၏ အလယ်ဗဟို၌ မတ်တတ်ရပ်နေပြီး သူ၏ ခြေအောက်တွင် အခင်းအကျင်း သုံးခုမှာ ရောယှက်စီးဆင်းနေကြသည်။

ယခင်က ထွင်းထုထားသော အခင်းအကျင်း နှစ်ခုနှင့် နှိုင်းယှဉ်ပါက နင်ချီ ခြေထောက်ဖြင့် ထွင်းထုထားသော အခင်းအကျင်းမှာ များစွာ ပိုမို သိမ်မွေ့လှပနေပြီး လျှို့ဝှက်ဆန်းကြယ်သော တာအိုအငွေ့အသက်များ အပြည့်အဝ ပါဝင်နေ၏။ ၎င်းနှင့် နှိုင်းယှဉ်လိုက်သည့်အခါ သူတို့နှစ်ဦး၏ အခင်းအကျင်းများမှာ ရုတ်တရက် ဖိုသီဖတ်သီနှင့် စုတ်ပြတ်နေသယောင် ဖြစ်သွားရလေတော့သည်။

ကုန်းထျန်းတောက်သည်လည်း သူ၏ မှားယွင်းနေသော အမြင်အာရုံများမှ ယခုလေးတင်မှ သတိပြန်ဝင်လာခဲ့သည်။ သူသည် မြေပြင်ပေါ်ရှိ အခင်းအကျင်းကို စိုက်ကြည့်ရင်း ပါးစပ်မှ အဆက်မပြတ် ရေရွတ်နေမိတော့၏။

“ဒါ... မဖြစ်နိုင်ဘူး... ဒါက တကယ့်အစစ်မှ မဟုတ်တာ...”

ကျောက်ယွီကျွင်းက လှောင်ပြောင်လိုက်လေသည်။

“အမှန်တရားက ရှင်ရဲ့ မျက်စိရှေ့မှာတင် ရှိနေတာလေ ကုန်းထျန်းတောက်... ရှင်က ဂိုဏ်းတစ်ဂိုဏ်းရဲ့ ခေါင်းဆောင်တစ်ယောက် ဖြစ်ပါလျက်နဲ့... တခြားလူတွေရဲ့ ထူးချွန်ပြောင်မြောက်မှုကို အသိအမှတ်ပြုဖို့ အဲဒီလောက်တောင် ဝန်လေးနေရသလား”

ကုန်းထျန်းတောက်၏ မျက်နှာအမူအရာမှာ အကြိမ်ကြိမ် ပြောင်းလဲသွားသော်လည်း... သူက လက်ခံယုံကြည်ရန် ငြင်းဆန်နေဆဲပင် ဖြစ်သည်။

“ဒါက ဝိညာဉ်အခင်းအကျင်း သေးသေးလေး တစ်ခုပါပဲ... အကယ်၍ ငါသာ စွမ်းအားတွေ ထပ်ထည့်လိုက်ရင်... ဒါက သေချာပေါက် ပြိုကျသွားမှာပဲ”

ကုန်းထျန်းတောက်က စကားပြောပြီးသည်နှင့် တစ်ပြိုင်နက် နင်ချီကို လျစ်လျူရှုလိုက်ကာ... လက်ချောင်းများကို နောက်တစ်ကြိမ် ဆုပ်ကိုင်လျက် သူ၏ ယခင် အခင်းအကျင်းအတွင်းသို့ စည်းမျဉ်းစွမ်းအား တစ်ချို့ကို ထိုးသွင်းလိုက်တော့၏။

“ဝှီး…”

နင်ချီက မြေပြင်ကို ခြေဖြင့် ဖွဖွလေး တစ်ချက် နင်းလိုက်ရာ... တစ်ခဏအတွင်းမှာပင် အခင်းအကျင်း တစ်ခုလုံး အသက်ဝင်လာတော့သည်။ အခင်းအကျင်းနှစ်ခုစလုံးမှ စည်းမျဉ်းစွမ်းအားများကို ပေါင်းစပ်ထားသော အခင်းအကျင်း၏ အကိုင်းအခက်တစ်ခုသည် ကုန်းထျန်းတောက် ပစ်လွှတ်လိုက်သော စည်းမျဉ်းစွမ်းအားများကို ဖမ်းယူလိုက်၏။

ဘောလုံးတစ်လုံးကို ဖမ်းကိုင်လိုက်သလို... ၎င်းသည် ထိုစွမ်းအားများကို ခွဲထုတ်ပစ်လိုက်ပြီး အခင်းအကျင်းအတွင်းသို့ ပြန်လည် စုပ်ယူသွားတော့သည်။

ကုန်းထျန်းတောက်၏ ဤတိုက်ခိုက်မှုတွင် ကျိုးရှန်း အင်မော်တယ်ဂိုဏ်း၏ အစွမ်းထက်သော လက်နက်တစ်ခုကို တိတ်တဆိတ် အသုံးပြုထားခြင်း ဖြစ်လေသည်။ "တောင်ရွှေ့ ကြယ်တာရာခိုင်ခံ့ခြင်း" ဟူသော သဘာဝလွန်စွမ်းရည်ကို အသုံးပြုထားသော်လည်း... နင်ချီက ဤမျှ လွယ်လွယ်ကူကူ ဖမ်းယူနိုင်ပြီး သူ၏ စွမ်းအားများကို ဝိညာဉ်အခင်းအကျင်းထဲသို့ ပေါင်းစပ်သွားနိုင်လိမ့်မည်ဟု မည်သူကမျှ ထင်မှတ်မထားခဲ့ကြချေ။

“မိတ်ဆွေနင်က အမှန်တကယ်ပဲ ထူးချွန်ပြောင်မြောက်လှပါတယ်... ကျွန်တော် လေးစားသွားပြီ”

ကုန်းထျန်းတောက်သည် လျင်မြန်စွာပင် တုံ့ပြန်လိုက်ပြီး... အခြေအနေနှင့် လိုက်လျောညီထွေဖြစ်အောင် နင်ချီကို ချက်ချင်းပင် မြှောက်ပင့်ပြောဆိုလိုက်၏။

နင်ချီက သူ့ကို ခပ်အေးအေးပင် တစ်ချက် လှမ်းကြည့်လိုက်၏။

“ဂိုဏ်းချုပ်ကုန်း... နောက်တစ်ခါ ထပ်စမ်းကြည့်ချင်သေးလား”

ကုန်းထျန်းတောက်က ကမန်းကတန်း ခေါင်းခါပြလိုက်လေသည်။ သူသည် အရပ်မြင့်ကာ ခွန်အားကြီးမားသော်လည်း သူ၏ စရိုက်လက္ခဏာမှာ သူ၏ အသွင်အပြင်နှင့် လုံးဝ ကွဲပြားခြားနားနေပြီး... လောကအကြောင်းကို ကောင်းစွာ သိမြင်နားလည်ကာ ပါးရည်နပ်ရည် ရှိလှသူ ဖြစ်သည်။

“မိတ်ဆွေနင် ဝင်ပါလာတာဆိုတော့... ဒီတိုက်ပွဲမှာ ကျွန်တော်တို့ သေချာပေါက် အနိုင်ရမှာပါ”

ကျောက်ယွီကျွင်းသည် ကုန်းထျန်းတောက်နှင့် နှစ်ပေါင်းများစွာ တိုက်ခိုက်လာခဲ့သူ ဖြစ်ရာ... သူ၏ စရိုက်ကို ကောင်းစွာ သိရှိထား၏။ သူသည် အသာစီးမရလျှင် ချက်ချင်း နောက်ဆုတ်သွားတတ်သူ ဖြစ်သည်။ သူမက တစ်ဖက်လူကို ဤအခြေအနေအထိ တွန်းပို့လိုက်ခြင်း ဖြစ်သလားဆိုသည်ကိုမူ သူမကိုယ်တိုင်လည်း မသိရှိပါချေ။

ယခုအခါ နင်ချီသည် မိမိကိုယ်ကို သက်သေပြလိုက်ပြီ ဖြစ်ရာ... ကျောက်ယွီကျွင်းသည် စစ်မြေပြင်နယ်မြေအတွင်း၌ ကုန်းထျန်းတောက်နှင့် ဆက်လက် တိုက်ခိုက်ရန် ဆန္ဒမရှိတော့ပေ။

“ကောင်းပြီလေ... ကျွန်မတို့ အချိန်မဖြုန်းကြရအောင်... ကျွန်မတို့ကို စောင့်နေတဲ့ အင်အားကြီး ရန်သူတွေ ရှိနေသေးတယ်... ကျွန်မတို့ တပ်မတော်သုံးရပ်က အခင်းအကျင်း ကိစ္စကို အမြန်ဆုံး စတင်သင့်ပြီ... မိတ်ဆွေနင်က ဝိညာဉ်အခင်းအကျင်း တာအိုမှာ ဒီလောက်တောင် ကျွမ်းကျင်နေမှတော့... ဒီ အခင်းအကျင်း ပုံစံကို ရှင်ပဲ ဦးဆောင်လိုက်ပါလား”

နင်ချီကလည်း သဘာဝကျစွာပင် ဤသို့ ပြုလုပ်ရန် ဆန္ဒရှိနေခဲ့လေသည်။ ဤအချိန်တွင် ကျောက်ယွီကျွင်းက 'တပ်မတော်သုံးရပ်' ဟု ထည့်သွင်းပြောဆိုလိုက်ခြင်းမှာ... နင်ချီကို သူမ၏ လက်အောက်ခံအဖြစ် မသတ်မှတ်တော့ဘဲ နင်ချီ၏ တပ်ဖွဲ့ကို သီးခြား တပ်မတော်ကြီးတစ်ခုအဖြစ် အသိအမှတ်ပြုလိုက်ခြင်းကို ရှင်းလင်းစွာ ဖော်ပြနေခြင်း ပင်တည်း။ ထို အမျိုးသမီးမှာ အတော်လေး လက်တွေ့ကျသည်ဟု နင်ချီက တွေးတောလိုက်မိ၏။

နင်ချီက ကုန်းထျန်းတောက်ကို တစ်ချက် လှည့်ကြည့်လိုက်ရာ... ကုန်းထျန်းတောက်က ထူးထူးဆန်းဆန်းပင် ကန့်ကွက်ခြင်း မရှိခဲ့ပါချေ။

“ကျွန်တော် သဘောတူပါတယ်”

ထို့ကြောင့် နင်ချီသည် တပ်မတော်သုံးရပ်ကြားမှ ဝိညာဉ်အခင်းအကျင်း ထွင်းထုရာတွင် ကျွမ်းကျင်သော ကျင့်ကြံသူများကို ရွေးချယ်ကာ ကျောက်ယွီကျွင်း၊ ကုန်းထျန်းတောက်တို့နှင့်အတူ လက်တွဲလုပ်ဆောင်စေခဲ့၏။ သူတို့သည် ဗဟိုဒေသ၏ တောင်ဘက်ခြမ်းတွင် သူတို့၏ တပ်ဖွဲ့များကို လျင်မြန်စွာ ချထားလိုက်ကြတော့သည်။

သေချာသည်မှာ ကျင့်ကြံသူအားလုံးသည် ဤ ကြီးမားလှသော ဝိညာဉ်အခင်းအကျင်းကြီးကို ကြည့်ကာ မအံ့ဩဘဲ မနေနိုင်ခဲ့ကြပါချေ။ ကျောက်ယွီကျွင်း၊ ကုန်းထျန်းတောက်နှင့် အခြားသူများပင်လျှင် တဖြည်းဖြည်းနှင့် ဒေါသပြေပျောက်သွားကြ၏။