အကြီးစား စနက်တံ (၃)

ယခုအခိုက်အတန့်တွင် လင်းရှန်၏ နှလုံးသားမှာ ပြင်းထန်စွာ ခုန်ပေါက်နေသည်၊၊ အထူးအဆင့်၏ တိုက်ခိုက်မှုစွမ်းအားမှာ အမှန်ပင် လျှော့တွက်၍မရချေ။ ဤကဲ့သို့ တစ်ခါမျှမကြုံဖူးသော တိုက်ခိုက်မှုနည်းလမ်းက သူ့ကို ကြီးမားသော ထိုးနှက်ချက်တစ်ခုပေးခဲ့သည်။ အနန္တရထားကြီးထဲတွင် ပုန်းအောင်းနေလျှင်ပင် AT ဒိုင်းကာမရှိပါက တောင့်ခံနိုင်မည်မဟုတ်ချေ၊ ယခုတွင်မူ လင်းရှန်သည် မီးတောက်နှင့် ရူဂျီတို့ကို မခေါ်လာခဲ့မိခြင်းကို နောင်တရနေမိသော်လည်း နောက်ကျသွားခဲ့ပြီဖြစ်သည်။

“ဖာ့ခ်... ဒရုန်းတွေ...”

ကီကီသည် ချက်ချင်းရင်ထိတ်သွားသည်၊၊ သူမ၌ VK လျှပ်စစ်ဓားများမရှိသဖြင့် အောက်ဘက်ရှိ ပွက်ပွက်ဆူနေသော ချော်ရည်များကို လှမ်းကြည့်ကာ အသံခပ်တိုးတိုးဖြင့် အော်ဟစ်လိုက်ပြီး လှုပ်ရှားနေသော ကမ္ဘာမြေအပူပေးတွင်းထဲမှ တောက်လောင်နေသော ချော်ရည်တုံးကြီးတစ်ခုကို စိတ်စွမ်းအင်ဖြင့် အပေါ်သို့ ဆွဲတင်လိုက်သည်။ ဤနေမင်းအလား ချော်ရည်လုံးကြီးသည် ကမ္ဘာမြေအပူပေးတွင်းတစ်ခုလုံးကို စူးရှသော အလင်းရောင်ဖြင့် လင်းထိန်သွားစေပြီး အပူလှိုင်းများကို ထွက်ပေါ်စေသည်၊ ကီကီသည် သွားကို တင်းတင်းကြိတ်ကာ သူမ၏ ညာလက်သီးကို မြှောက်၍ စိတ်စွမ်းအင်ဖြင့် ထိုချော်ရည်လုံးကြီးကို ပြင်းထန်စွာ ထုရိုက်လိုက်တော့သည်။

အုန်းး

တန်ချိန်တစ်သောင်းခန့်ရှိသော စွမ်းအားပါသည့် စိတ်စွမ်းအင်လက်သီးချက်သည် ချော်ရည်လုံးကြီးကို ထိမှန်သွားပြီး မီးရှူးမီးပန်းတစ်ခုပေါက်ကွဲသွားသကဲ့သို့ မြင့်မားသော အပူချိန်ရှိသည့် ချော်ရည်များကို အမိုးခုံးနှင့် ကျောက်နံရံများပေါ်သို့ ချက်ချင်း ကျယ်ပြန့်စွာ လွင့်စင်သွားစေသည်။

ဝူး

နောက်တစ်စက္ကန့်တွင် ချော်ရည်များသည် မုန်တိုင်းတစ်ခုကဲ့သို့ ရွာကျလာပြီး ကျောက်နံရံအမိုးခုံးတွင် ကပ်တွယ်နေသော ပိုးကောင်မြွေအများစုကို ဖုံးလွှမ်းသွားသည်။ ရုတ်ခြည်းပင် အစိမ်းရောင်ဇီဝစွမ်းအင် ဒိုင်းကာသည် ရူးသွပ်စွာ လင်းလက်သွားပြီး ကျောက်နံရံတစ်ခုလုံးကို မီးစွဲလောင်သွားစေသည်၊ ပိုးကောင်မြွေများစွာသည် မီးလောင်ကျွမ်းကာ မိုးစက်မိုးပေါက်များကဲ့သို့ ကျဆင်းလာပြီး လေထုထဲတွင် တွန့်လိမ်ရုန်းကန်ရင်း အောက်ဘက်ရှိ ချော်ရည်များထဲသို့ ပြုတ်ကျကုန်ကြသည်။

ကီကီက ဤကဲ့သို့သော လှည့်ကွက်တစ်ခုကို ထုတ်သုံးနိုင်လိမ့်မည်ဟု လင်းရှန် မထင်မှတ်ထားခဲ့ချေ၊ ၎င်းက ထိုအချိန်တွင် အတော်လေးထိရောက်မှုရှိပုံရသည်။ သို့သော် သူ မော့ကြည့်လိုက်သည့်အခါ ကျောက်နံရံပေါ်တွင် မရေတွက်နိုင်သော ပိုးကောင်မြွေများစွာ ကပ်တွယ်နေဆဲဖြစ်ပြီး ထူးဆန်းသည်မှာ ထိုမျှများပြားသော ပိုးကောင်မြွေများကို သတ်ပစ်ခဲ့သော်လည်း သူနှင့် ကီကီတို့၏ စွမ်းအားဝတ်စုံရှိ အမှောင်အမှတ်အသား စုံစမ်းထောက်လှမ်းကိရိယာမှာမူ အဆင့် ၄ အမှတ်အသား အလင်းရောင်ဖြင့် လင်းလက်နေဆဲပင်၊၊

ထိုအခိုက်အတန့်တွင် လင်းရှန်သည် မိမိရှေ့၌ရှိနေသောအရာသည် တစ်သီးပုဂ္ဂလဆန်သောသက်ရှိပုံစံတစ်မျိုးဖြစ်နိုင်ကြောင်း သဘောပေါက်လိုက်သည်၊၊ ၎င်းကို လုံးဝ ခြေမှုန်းပစ်ရန် လိုအပ်သည် သို့မဟုတ် သီးခြားပင်မခန္ဓာကိုယ်တစ်ခု ရှိနေနိုင်ပေသည်။

“လင်း... လင်းရှန်... ဂျစ်”

ကမ္ဘာ့အူတိုင်အပူစွမ်းအင််တွင်းကြောင့် အချက်ပြစနစ်က ထိခိုက်နေသဖြင့် ချန်ဆီရွှမ်၏ အသံက ပြတ်တောင်းပြတ်တောင်းဖြင့် ထွက်ပေါ်လာသည်၊၊

“ဒီဘက်မှာ... အခြေအနေတစ်ခု ရှိနေတယ်၊၊ ကျွန်မတို့ တွေ့ထားတာ...”

“ဆရာမချန်”

ချန်ဆီရွှမ်၏ အသံကြောင့် လင်းရှန်၏ နှလုံးသား တင်းကျပ်သွားသည်၊၊ သူသည် ခေါင်းပေါ်တွင် ထူထပ်စွာ စုစည်းနေသော ပိုးကောင်မြွေများကို ကြည့်ရင်း ရေအောက်နှင့် အပြင်ဘက်နှစ်ခုလုံးတွင် အန္တရာယ်တစ်ခုဖြစ်ပွားနေကြောင်း သဘောပေါက်လိုက်သည်။ ဤအရာက ဘာပဲဖြစ်ဖြစ် အလျင်အမြန်ဖြေရှင်းရန် လိုအပ်သည်။

“လင်းရှန်… ကျွန်မတို့ ဘာလုပ်ကြမလဲ”

အခြေအနေကို ကြည့်ပြီး ကီကီသည်လည်း ဘာလုပ်ရမှန်းမသိဖြစ်လာကာ သူမ၏ အမူအရာ ပြောင်းလဲသွားသည်။

[ကျွန်မအနေနဲ့ ဒရုန်းအားလုံးကို သုံးပြီး အလင်းစကင်ဖတ်မှုတွေကို လုပ်ဆောင်ခဲ့ပြီးပါပြီ၊၊ ဖယ်ရှင်းပြီးသားအရာတွေနဲ့ စင်္ကြံလမ်းထဲမှာ ရှိနေနိုင်တဲ့ မပေါ်ထွက်လာသေးတဲ့ သက်ရှိတွေကို မရေတွက်ရင် ၃၁၆,၅၀၈ ကောင်နဲ့ ညီမျှတဲ့ သက်ရှိရုပ်အဖွဲ့အစည်းတွေကို စကင်ဖတ်မိပါတယ်]

ဗိုင်အိုလာက လင်းရှန်ကို တည်ငြိမ်စွာ အစီရင်ခံလိုက်သည်၊၊

[လျှပ်စီးလင်းယုန် ၂၀၀၀ လေဆာဒရုန်းတွေကတော့ လက်ရှိမှာ ၉၁၄ စီးပဲ ကျန်ပါတော့တယ်၊၊ ဇီဝစွမ်းအင်ဒိုင်းကာမရှိဘူးလို့ ယူဆရင် အားလုံးကို ရှင်းလင်းဖို့ ကျွန်မအနေနဲ့ အနည်းဆုံး ၁၇၃ စက္ကန့် ကြာပါလိမ့်မယ်]

ဘစ်ဇ် ဘစ်ဇ်

ဗိုင်အိုလာက တွက်ချက်နေစဉ်မှာပင် လျှပ်စီးလင်းယုန် ဒရုန်းအားလုံးသည် စတင်ပစ်ခတ်နေပြီး ပိုးကောင်မြွေတစ်ကောင်ချင်းစီကို တိကျစွာ ပစ်မှတ်ထားနေသည်။ ရဲရဲနီသော လေဆာအလင်းတန်းများ၏ တိုက်ခိုက်မှုအောက်တွင် ပိုးကောင်မြွေများစွာမှာ ဆက်တိုက်ပြုတ်ကျနေသည်။

ဗိုင်အိုလာသည် သူမ၏ တိုက်ခိုက်မှုများကို ပြင်ဆင်နေပြီး တစ်ပြိုင်နက်တည်းမှာပင် လင်းရှန်၏ ရှေ့တွင် ရပ်တန့်ကာ ပြောလိုက်သည်၊၊

[ရှင်းလင်းမှုနှုန်း ၄၅.၁ ရာခိုင်နှုန်းပါ၊ အချိန်ကို နှစ်ဆမြှင့်ဖို့ လိုအပ်ပါတယ်၊၊ သက်ရှိတွေရဲ့ စိတ်ဝိညာဉ်တုန်ခါမှုတန်ဖိုး လှိုင်းတွန့်မှုတွေကတစ်ဆင့် ကျွန်မရဲ့ ထိန်းချုပ်မှုဗဟိုချက်နဲ့ တူညီတဲ့ ထိန်းချုပ်ရေးဗဟိုချက်တစ်ခု ရှိနေနိုင်တယ်လို့ သံသယရှိပါတယ်၊၊ အစွမ်းကုန်ရှာဖွေနေပါတယ်]

“အချိန်မရှိတော့ဘူး”

လင်းရှန်က ပတ်ဝန်းကျင်ကို ဝေ့ကြည့်လိုက်ပြီး ပြတ်သားစွာ ပြောလိုက်သည်၊၊

“ငါတို့ ဒီအရာကို သတ်လို့ပြီးတဲ့အချိန်ဆိုရင် အပြင်ဘက်က သန္ဓေပြောင်းမွန်းစတားတွေက အထဲကို တဟုန်ထိုးဝင်လာလောက်ပြီ”

ထိုသို့ပြောပြီးနောက် သူက ကီကီကို လှည့်ကြည့်လိုက်သည်၊၊ “အချိန်မရှိတော့ဘူး၊၊၊ ဗိုင်အိုလာကို သူတို့ကို တားခိုင်းထားလိုက်…. ကီကီ၊ ဓာတ်ပြုကန်ကို တူးထုတ်လိုက်တော့”

“အမှတ်အသားကို ဂရုမစိုက်တော့ဘူးလား”

ကီကီ အံ့အားသင့်သွားသည်။

“လောင်းကြေးထပ်လိုက်မယ်”

လင်းရှန်က ကမ္ဘာ့အူတိုင်အပူစွမ်းအင်တွင်းကို ကြည့်ကာ ပြတ်သားစွာ ပြောလိုက်သည်၊၊

“ဒီနေရာကိုသာ ဖောက်ခွဲပစ်လိုက်ရင် ဘယ်လောက်ပဲ မွန်းစတားတွေ လာပါစေ… ငါတို့က သေအတူရှင်အတူပဲ၊၊ အဲဒါဆိုရင် အမှတ်အသားက လုံးဝပျောက်သွားလိမ့်မယ်”

“အဲဒါဆိုရင် ကျွန်မတို့လည်း သေသွားမှာပေါ့”

ကီကီ၏ မျက်လုံးများ ပြူးကျယ်သွားသည်။

လင်းရှန်က ကီကီကို ကြည့်လိုက်သည်၊၊

“ငါတို့ အဖြူရောင်မြို့တော်ကနေ ဘယ်လိုလွတ်မြောက်ခဲ့လဲဆိုတာ မေ့သွားပြီလား”

“ရှင်ပြောတာက...”

ကီကီသည် ချက်ချင်း သဘောပေါက်သွားပြီး တုံ့ဆိုင်းမနေဘဲ တိုက်ရိုက်ပျံသန်းထွက်သွားကာ ပွက်ပွက်ဆူနေသော ချော်ရည်ကန်၏ အထက်တွင် ရပ်တန့်၍ သူမ၏ လက်များကို ပြင်းထန်စွာ ဖိချလိုက်တော့သည်။

ဘွန်းးး

စိတ်စွမ်းအားသည် ဧရာမ လက်ကြီးများအဖြစ် ပြောင်းလဲသွားပြီး လှိုင်းထန်နေသော ချော်ရည်များထဲသို့ နစ်မြုပ်သွားသည်။ အောက်ဘက်ရှိ ချော်ရည်များကြားတွင် ကမ္ဘာ့အူတိုင်အပူစွမ်းအင်ဗဟိုချက်ဓာတ်ပြုကန်၏ တိုက်တေနီယမ်သတ္တုစပ် အပြင်ဘက်နံရံသည် စူးရှသော ညည်းတွားသံကို ထုတ်လွှတ်လိုက်ပြီး တန်ချိန်တစ်သောင်းခန့်ရှိသော တည်ဆောက်ပုံကြီးမှာ အတင်းအကျပ်ဆွဲတင်ခြင်း ခံလိုက်ရသည်၊၊ လျှံကျလာသော ချော်ရည်ရေတံခွန်ကြီးမှာ ပိုးကောင်မြွေအုပ်စုပေါ်သို့ သွေးမျက်ရည်များကဲ့သို့ စီးကျလာပြီး ပုပ်ဟောင်နေသော မြူခိုးနံရံကြီးအဖြစ် အငွေ့ပျံသွားတော့သည်။

“စက္ကန့် ၃၀ လောက် တောင့်ခံထားပေး”

လင်းရှန်က ဗိုင်အိုလာကို ညွှန်ကြားလိုက်ပြီးနောက် အောက်သို့ ခုန်ချလိုက်သည်၊၊ ယန္တရားနှလုံးသားက ဟိန်းဟောက်လာပြီး စူပါစထရင်း နူဓာတ်ပြုအဆင့်သက်တန့်ကွင်းမှာ လုံးဝ ပွင့်သွားခဲ့သည်၊၊ သူ၏ မျက်လုံးထဲမှ ဖြူ-ပြာရောင် အလင်းစီးကြောင်းများပန်းထွက်လာပြီး ကုဗတုံးဇယားကွက်များအဖြစ်ပြောင်းလဲကာ ဓာတ်ပြုကန်ကို ဖုံးအုပ်သွားပြီး နဂါးအမျိုးအစား သင်္ဘောသုံးဓာတ်ပြုကန်ပုံစံကို အပေါ်မှ တိုက်ရိုက်ဖုံးအုပ်လိုက်သည်၊၊

ထို့နောက် လင်းရှန်က လက်ဝှေ့ယမ်းလိုက်ရာ ကြယ်နက်ပန်းပဲဖိုအာကာသထဲမှ ယန္တရားလက်တစ်ခု ထွက်ပေါ်လာပြီး စွမ်းအင်မြင့်မားသော လေဆာအလင်းတန်းဖြင့် ဓာတ်ပြုကန်အခွံကို ဖြတ်တောက်လိုက်သည်၊၊ အတွင်းပိုင်းရှိ ပျားလပို့ပုံသဏ္ဌာန် လောင်စာတောင့်ဖွဲ့စည်းပုံက ပူပြင်းလှသော လေထုထဲတွင် ပေါ်ထွက်လာပြီး သူ၏ လက်ထိပ်က ဗဟိုထိန်းချုပ်မှုမော်ဂျူးကို ထိမိလိုက်သည့်အခါ ရွှေဝါရောင်လိုင်းများသည် သက်ရှိတစ်ကောင်ကဲ့သို့ ပြန့်နှံ့သွားကာ မူလကမ္ဘာ့အူတိုင်အပူစွမ်းအင်ပြောင်းလဲခြင်း ကန့်သတ်ကိရိယာကို ကွင်းဆက်ဓာတ်ပြုမှု ဓာတ်ကူပစ္စည်းအဖြစ် ပြောင်းလဲပစ်လိုက်သည်။

[ကွင်းဆက်ဓာတ်ပြုမှု ဓာတ်ပြုပစ္စည်း ၉၉ ရာခိုင်နှုန်း... သတိပေးချက် ဇီဝစွမ်းအင်ဓာတ်ပြုမှုက ကန့်သတ်ချက်ကို ကျော်လွန်နေသည်]

ဗိုင်အိုလာ၏ သတိပေးသံသည် ကျောက်နံရံအမိုးခုံးမှ ဟိန်းဟောက်သံနှင့်အတူ တစ်ပြိုင်နက်တည်း ထွက်ပေါ်လာသည်၊၊ ကျန်ရှိနေသော ပိုးကောင်မြွေ သုံးသောင်းခန့်မှာ ရုတ်တရက် မီတာနှစ်ဆယ် အချင်းရှိသော လွန်ပူကြီးတစ်ခုအဖြစ် ဖွဲ့စည်းလိုက်ပြီး ငွေမှင်စိမ်းရောင် အဆိပ်ဆူးချွန်များကို သယ်ဆောင်ကာ အောက်သို့ တဟုန်ထိုး ထိုးဆင်းလာကြသည်။

“သွားစို့”

လင်းရှန်က ဓာတ်ပြုကန်ကို သတ္တုပစ္စည်းများဖြင့် လျင်မြန်စွာ ဖုံးအုပ်လိုက်ပြီးနောက် ကီကီကို လှမ်းအော်ပြောလိုက်သည်။

“ရှင် ဘယ်လိုဖောက်ခွဲဖို့ စီစဉ်ထားတာလဲ၊၊ အဲဒါက ပြင်းထန်တဲ့ ဓာတ်ပြုမှုတစ်ခု လိုအပ်တယ်မဟုတ်လား”

လင်းရှန်က ပြတ်သားသော အကြည့်ဖြင့် လှည့်ကြည့်လိုက်သည်၊၊

“ငါ့မှာ အကြီးစား စနက်တံတစ်ခုရှိတယ်၊၊ ကိုယ်တိုင်အချိန်ကိုက်တာက ငါတို့အတွက် အချိန်နည်းနည်းပိုရစေလိမ့်မယ်”

“စနက်တံ”

ဝူး ဝူး

ထိုစဉ် ကီကီ မော့ကြည့်လိုက်သည့်အခါ လင်းရှန်၏ ကြယ်နက်ပန်းပဲဖိုယန္တရားတံခါးကြီး၏ လျှပ်စီးမုန်တိုင်းထဲမှ ဖြူဖွေးသော ဧရာမ ကိရိယာကြီးတစ်ခု တဖြည်းဖြည်းပေါ်ထွက်လာသည်ကို မြင်လိုက်ရသဖြင့် သူမ၏ သူငယ်အိမ်များ ကျုံ့ဝင်သွားတော့သည်။

“ဟိုင်ပိုလုံ ပဲ့ထိန်းစွမ်းအင်အမြောက်လား”

“ဒါက ကွင်းဆက်ဓာတ်ပြုမှုကို ကျိန်းသေပေါက်ဖြစ်ပေါ်စေလိမ့်မယ်”

လင်းရှန်၏ အကြည့်များက ပြတ်သားစွာ လင်းလက်သွားသည်၊၊

“ဒီလောက်ကြီးမားတဲ့ ပေါက်ကွဲမှုပမာဏဆိုရင် ငါတို့ ပေါက်ကွဲနေတဲ့ မီးတောင်တစ်ခုထဲကနေ အပြင်ကို လွင့်ထွက်သွားမယ့်ပုံပဲ”