ပင်လယ်ရေအောက် ချောက်ကမ်းပါး (၁)

ဝုန်းခနဲ မြည်သံနှင့်အတူ။

ဧရာမ ဟိုင်ပိုလုံပဲ့ထိန်းစွမ်းအင်အမြောက်ကြီးသည် ကြယ်နက်ပန်းပဲဖိုထဲမှ ပြုတ်ကျလာခဲ့၏။ ရှင်းဂျီထံမှ ရရှိပြီးနောက် လင်းရှန်အနေဖြင့် ဤအာကာသအခြေစိုက်လက်နက်ကို ပထမဆုံးအကြိမ်ထုတ်သုံးခြင်းဖြစ်သည်။ ယခုလုပ်ဆောင်ရမည့်အလုပ်မှာ ယခင်က အဖြူရောင်မြို့တော်၌ တိတ်ဆိတ်မြို့တော်၏ အစိတ်အပိုင်းတစ်ခုကို ဖောက်ခွဲရန် ရှင်းဂျီ ကြိုးစားခဲ့သည့် ရည်ရွယ်ချက်နှင့်ထပ်တူပင်ဖြစ်၏။

ဝီဝီ။

ကျောက်သားအမိုးခုံးမျက်နှာပြင်သည် ရုတ်တရက် ကွာကျလာပြီး အမည်းရောင်မြွေကဲ့သို့ သတ္တဝါပေါင်း ရာနှင့်ချီ၍ ဝဲကတော့ပုံစံ စုစည်းကာ ဧရာမလွန်ပူကြီးတစ်ခုအသွင်ဖြင့် ပြင်းထန်စွာ ထိုးဆင်းလာခဲ့သည်။ ကီကီသည် လက်နှစ်ဖက်ကို ဆန့်ထုတ်ကာ စိတ်စွမ်းအင်မုန်တိုင်းတစ်ခုကို ချက်ချင်း ထုတ်လွှတ်လိုက်၏။ လွန်ပူ၏အရှေ့ဖျားပိုင်းသည် ပေါက်ကွဲထွက်သွားသော်လည်း လွင့်စင်သွားသော အကောင်အုပ်ကြီးသည် ငွေမှင်ရောင်သန်းသည့် အစိမ်းရောင်အမျှင်ကွန်ရက်တစ်ခုကို အလျင်အမြန် ထုတ်လွှတ်ကာ သူတို့နှစ်ဦးကို ဝန်းရံပိတ်ဆို့လိုက်သည်။

ယခုတစ်ကြိမ်တွင်မူ ကီကီသည် ထိုအမျှင်များ၏ စွမ်းအားကို သိသွားသဖြင့် တိုက်ရိုက်ရင်မဆိုင်ရဲတော့ပေ။ ထို့ကြောင့် သူသည် လက်ကိုမြှောက်ကာ အပူစွမ်းအင်တွင်းနံရံမှ ဧရာမကျောက်တုံးကြီးတစ်ခုကို စိတ်စွမ်းအင်ဖြင့် ဆွဲထုတ်ပြီး အကာအကွယ်အဖြစ် အသုံးပြုလိုက်သည်။ ဖြန်းခနဲ ကျရောက်လာသော အမျှင်များသည် ကျောက်တုံးကြီးကို ကတ္တရာစေးလို အရည်ပျော်စေကာ ဖုန်မှုန့်များနှင့် ကျောက်မှုန့်များ လွင့်စင်သွားစေ၏။

တစ်ဖက်တွင်မူ ဗိုင်အိုလာ၏အနား၌ ထောင်နှင့်ချီသောဒရုန်းများသည် အင်းဆက်အုပ်ကြီးပမာပျံသန်းလာပြီး အပူစွမ်းအင်တွင်း၏ ကောင်းကင်ယံထက်တွင် လျင်မြန်စွာ ကူးလူးနေကြသည်။ စုစည်းထားသော လေဆာတန်းများနှင့် စွမ်းအင်မြင့်ရိုက်ခတ်မှုများဖြင့် ထိုမြွေလိုသတ္တဝါများကို ရက်ရက်စက်စက်ချေမှုန်းနေကြ၏။

“လင်းရှန်”

“အကုန်အဆင်သင့်ပဲ”

လင်းရှန်သည် ယန္တရားလက်တံတစ်ခုကို ထိန်းချုပ်ကာ ဓာတ်ပြုကန်၏ အအေးခံပြားများထဲသို့ မြှုပ်နှံလိုက်ပြီး ဧရာမသတ္တုတည်ဆောက်ပုံကြီးကို ကီကီ၏ စိတ်စွမ်းအင်နယ်ပယ်ဖြင့် ဆူပွက်နေသော ချော်ရည်ကန်အထက်တွင် ပျံဝဲစေခဲ့သည်။ သူတို့သည် ဆက်တိုက်ဓာတ်ပြုမှုစနစ်ကို ဓာတ်ပြုကန်၏ ဗဟိုချက်ဆီသို့ ရိုက်သွင်းလိုက်ပြီးနောက် ဟိုင်ပိုလုံပဲ့ထိန်းစွမ်းအင်အမြောက်ကြီးကို ဓာတ်ပြုကန်၏အပေါ်တည့်တည့်တွင် တပ်ဆင်ကာ ယာယီလှုံ့ဆော်ကိရိယာတစ်ခုအဖြစ် ဖန်တီးလိုက်ကြသည်။

[သတ္တဝါများ၏ စွမ်းအင်ထုတ်လွှတ်မှုသည် ပတ်ဝန်းကျင်နှင့် သတ္တုတည်ဆောက်ပုံများကို ကျယ်ပြန့်စွာ ပျက်စီးစေနိုင်ပါသည်။ အစီအစဉ်အောင်မြင်ရန်အတွက် ဤကိရိယာ၏ လုံခြုံရေးကို မဖြစ်မနေကာကွယ်ရပါမည်]

ဗိုင်အိုလာက ထိုအချိန်တွင် သတိပေးလိုက်သည်။

“သေချာတာပေါ့။ သူတို့ကို အဝေးကို ဆွဲခေါ်သွားကြရအောင်”

လင်းရှန်က ယန္တရားလက်တံကို ထိန်းချုပ်ကာ ဓာတ်ပြုကန်ကို ကမ္ဘာ့အူတိုင်အပူပေးကိရိယာ၏ ကြက်ခြေခတ်အောက်ခြေတွင် မြဲမြံစွာ တပ်ဆင်လိုက်ပြီးနောက် ကီကီကို လှမ်းခေါ်လိုက်သည်။ သူတို့၏ ခြေထောက်တွန်းကန်စနစ်များကို အရှိန်ကုန်မြှင့်တင်ကာ လိုဏ်ခေါင်းလမ်းကြောင်းဘက်သို့ ချက်ချင်းပင် ဆုတ်ခွာခဲ့ကြ၏။

ထိုအချိန်တွင် အမိုးခုံးတစ်ခုလုံးကို ဖုံးလွှမ်းထားသော အမည်းရောင်မြွေသတ္တဝါများသည် လင်းရှန်နှင့် ကီကီတို့ဆီသို့ ရူးသွပ်စွာ စုပြုံတိုးဝှေ့လာကြရာ လေထုထဲတွင် ကူးခတ်နေသော အမည်းရောင်ရေလှိုင်းကြီးတစ်ခုအလား ထင်မှတ်ရပြီး နံရံပေါ်တွင် တွားသွားနေသော အကောင်များကိုပါ အလျင်စလိုဆွဲခေါ်ကာ ကြီးမားသောဖိအားဖြင့် ရှေ့သို့ လိမ့်ဆင်းလာခဲ့သည်။

ဗိုင်အိုလာသည် သူတို့နောက်မှ လိုက်ပါရင်း အကာအကွယ်ပေးခဲ့သည်။ သက်ရှိများပမာ လှုပ်ရှားနေသော ထောင်နှင့်ချီသော ဒရုန်းများက နောက်မှ ထက်ကြပ်မကွာလိုက်ပါလာပြီး တိုက်ခိုက်ရင်း ကာကွယ်ပေးနေကြ၏။ ဗိုင်အိုလာ၏ ထူးခြားလှသော တွက်ချက်မှုစွမ်းရည်အောက်တွင် ဒရုန်းအားလုံး၌ ကိုယ်ပိုင်အသိစိတ်ရှိနေသကဲ့သို့ပင် ပစ်မှတ်ပေါင်းသောင်းနှင့်ချီကို စောင့်ကြည့်နိုင်ပြီး ရန်သူများကြားထဲသို့ ပျံ့နှံ့သွားကြသည်။ ဤကဲ့သို့သော မြင်ကွင်းမျိုးမှာ လင်းရှန်အနေဖြင့် မိမိ၏ဒရုန်းတပ်ဖွဲ့ဖြင့် ဖန်တီးလိုသော်လည်း မလုပ်ဆောင်နိုင်ခဲ့သည့်အခြေအနေမျိုးဖြစ်၏။

[အထက်အဆင့်က အာရုံခံကိရိယာများရဲ့ မှတ်တမ်းအရ သက်ရှိအမြောက်အမြား ချဉ်းကပ်လာနေပါသည်။ နောက်ထပ် ၄ မိနစ်အတွင်း ရောက်ရှိလာမည်ဟု ခန့်မှန်းရပါသည်]

နောက်မှ လိုက်ပါလာသော အမည်းရောင်အင်းဆက်များကိုပင် မလွတ်မြောက်နိုင်သေးမီ ဗိုင်အိုလာက ပို၍ စိတ်ပျက်ဖွယ်ကောင်းသောသတင်းကို ထပ်ပြောလာသည်။ လင်းရှန်သည် သွားကို အသာကြိတ်ကာ ယန္တရားစွမ်းအင်အမြောက်ဖြင့် ပြိုကျနေသော လိုဏ်ခေါင်းလမ်းကြောင်း၏ တစ်ဝက်ကို ပစ်ခတ်ဖောက်ခွဲလိုက်ပြီးနောက် ကီကီက စိတ်စွမ်းအင်ကာကွယ်ရေးဒိုင်းကို ဖြန့်ကျက်ကာ အထဲသို့ တည့်တည့်တိုးဝင်သွားခဲ့ကြသည်။

ဝုန်းဝုန်း။

ရေနက်ဆိပ်ကမ်းတွင် ရေလှိုင်းများမှာ ပြင်းထန်စွာ ဟိန်းဟောက်နေသည်။

အနန္တရထားနှင့် နျူကလီးယားရေငုပ်သင်္ဘောတို့သည် မှင်ရေအလား မည်းမှောင်နေသော ပင်လယ်ပြင်တွင် တစ်ဝက်ခန့် ပေါ်မျောနေကြ၏။ ပြတင်းပေါက်၏ အပြင်ဘက်တွင်မူ ဖော့စဖရပ်အလင်းလွှတ် သတ္တဝါငယ်များက ထူးဆန်းစွာ မျောပါနေကြသည်။ ချန်ဆီရွှမ်သည် အနန္တရထား၏ အတွင်း၌ ရပ်နေရင်း ကင်းစောင့်စနစ်ကို စူးစိုက်ကြည့်ရှုနေ၏။

ရေငုပ်သင်္ဘော၏ ကွပ်ကဲအခန်းထဲတွင်မူ ရိုင်ယန်သည် ရေဒါစခရင်ကို သတိအပြည့်ဖြင့် ကြည့်နေပြီး သူတို့၏အောက်တည့်တည့်တွင် ဧရာမအနီရောင်အစက်ကြီးတစ်ခု လင်းလက်နေသည်ကို မြင်လိုက်ရသဖြင့် နားကြပ်ကို နှိပ်ရန် လက်ကို အသင့်ပြင်ထားလိုက်သည်။ သူ့နောက်ရှိ အဖွဲ့ဝင်အားလုံးသည် အသက်ပင် မရှူရဲကြဘဲ တစ်ဦး၏နှလုံးခုန်သံကို တစ်ဦးကြားနိုင်လောက်အောင် လေထုက တင်းမာနေခဲ့သည်။

“လင်းရှန်... လင်းရှန်...” ချန်ဆီရွှမ်သည် လင်းရှန်ကို ဆက်သွယ်ရန် ဆက်တိုက်ကြိုးစားနေသည်။

“ဘူမိအပူတွင်းက အချက်ပြစနစ်က တော်တော်လေး ပြတ်တောက်နေတယ်”

တွဲ ၅တွင် တာလို့တို့နှင့်အတူ စောင့်ကြည့်နေသော နန်ကျင်း၏ အသံထွက်ပေါ်လာသည်၊၊

“လောလောဆယ် မစွန့်စားဖို့ ကျွန်မအကြံပြုချင်တယ်”

“အဲဒီအရာက ရေအောက်မှာ ရှိနေတယ်။ ငါတို့ ဘာကောင်လဲဆိုတာ ခွဲခြားလို့မရဘူး”

ရေငုပ်သင်္ဘောပေါ်ရှိ ရိုင်ယန်ကလည်း စိတ်ပျက်လက်ပျက်လေသံဖြင့် ပြောလိုက်သည်။

“အနည်းဆုံးတော့ A-Class ဒါမှမဟုတ် အထူးအဆင့်ပဲဖြစ်ရမယ်။ ဝိညာဉ်လှိုင်းတုန်ခါမှု တန်ဖိုးရှာဖွေစနစ်အရ အရမ်းပြင်းထန်တဲ့ အမှောင်စွမ်းအင်အတက်အကျတွေကို တွေ့နေရတယ်”

ပင်လယ်လင်းယုန်အုပ်စုမှ အဲရစ်ကာက ဝင်ပြော၏။

“အဲဒါက ငါတို့ကို မတွေ့သေးတဲ့ပုံပဲ။ ဇွတ်မလုပ်တာ အကောင်းဆုံးပဲ။ ငါတို့သာ အမှတ်အသားခံလိုက်ရရင် ဒုက္ခရောက်လိမ့်မယ်” ဂေဒီက ပြောသည်၊၊

“အမှတ်အသားခံရရုံတင် မကတော့ဘူး”

အနန္တရထား၏ ထိန်းချုပ်ခန်းထဲတွင် မိုနီကာသည် ပြတင်းပေါက်မှတစ်ဆင့် မည်းမှောင်နေသော ရေပြင်ကို ငုံ့ကြည့်လိုက်သည်။ ထူးဆန်းသော အမည်းရောင်နှင့် အဖြူရောင်ကွင်းများ ပါရှိသည့် လက်တံကြီးတစ်ခုသည် ရေမျက်နှာပြင်ပေါ်တွင် ဖြည်းညှင်းစွာ လျှောတိုက်သွား၏။ သူမက တည်ငြိမ်စွာဖြင့် ဆက်ပြောလိုက်သည်၊၊

“ဒီအကောင်က ငါတို့ရဲ့ ရေငုပ်လမ်းကြောင်းကို ပိတ်ဆို့ထားတယ်”

ဤစကားကြောင့် ဆက်သွယ်ရေးလှိုင်းလိုင်းပေါ်ရှိ အဓိကအဖွဲ့ဝင်များအားလုံး အသက်ရှူမှားမတတ် တိတ်ဆိတ်သွားကြသည်။

ချန်ဆီရွှမ်က ထိုအချိန်တွင် ဝင်ပြောလိုက်၏။

“မိုနီကာ၊ ရိုင်ယန်၊ အားလုံး လှုပ်ရှားဖို့ ပြင်ထားကြ။ အခုတော့ နည်းလမ်းတစ်ခုပဲ ကျန်တော့တယ်”

အနန္တရထားသည် ရေနက်ပိုင်းငုပ်လျှိုးရန်အတွက် ပြုပြင်မွမ်းမံမှုများကို ပြုလုပ်ထားခါစ ဖြစ်သည်။ ရထားပေါ်ရှိ လက်နက်အားလုံးမှာ အသုံးမပြုနိုင်သေးသဖြင့် ရှေ့တွင်ရှိသော အခက်အခဲများကို ရင်ဆိုင်ရန် စွမ်းအားရှင်များအပေါ်တွင်သာ အားကိုးရတော့မည်ဖြစ်၏။

တင်းမာမှုများ အထွတ်အထိပ်သို့ ရောက်ရှိနေစဉ် အထက်မှ ရုတ်တရက် ပြင်းထန်သော ပေါက်ကွဲမှုကြီးတစ်ခုဖြစ်ပွားခဲ့ပြီး ရေနက်ဆိပ်ကမ်း၏ ရေမျက်နှာပြင်သည် ပြင်းထန်စွာ ဆူပွက်လာခဲ့သည်။ ရေအောက်မှ မွန်းစတားကြီးသည် တစ်ခုခုကို ပစ်မှတ်ထားလိုက်သည့်အလား မည်းမှောင်နေသော ပင်လယ်ပြင်ကြီးမှာ ရုတ်တရက် ငြိမ်သက်သွား၏။ မျောပါနေသော ဖော့စဖရပ်အလင်းလွှတ် အဏုဇီဝသက်ရှိများသည် တစ်ပြိုင်နက်တည်း မှောင်ကျသွားပြီး နျူကလီးယားရေငုပ်သင်္ဘော၏ ဆိုနာစခရင်ပေါ်တွင် သွေးရောင်အလား နီရဲသော လှိုင်းတွန့်များ ပေါက်ကွဲထွက်ပေါ်လာသည်။ ပင်လယ်လင်းယုန်အုပ်စုနှင့် အနန္တရထားအတွင်း၌ အချက်ပေးသံများ တစ်ပြိုင်နက်တည်း ကျယ်လောင်စွာ မြည်ဟည်းသွားခဲ့၏။

“လာပြီ”

ဘန်း။

အနန္တရထားကြီးနှင့် ရေငုပ်သင်္ဘောကြားရှိ ရေပြင်သည် ရုတ်တရက် ဆူပွက်တက်လာပြီး အချင်း မီတာ ၃၀ ကျော်ရှိသော ဂျယ်လီကဲ့သို့ အစိတ်အပိုင်းတစ်ခုသည် ရေမျက်နှာပြင်ကို ခွဲကာ အရှိန်ဟုန်ဖြင့် ရုန်းထွက်လာခဲ့သည်။ တန်ချိန်ပေါင်း ထောင်နှင့်ချီသော ရေစီးကြောင်းများသည် ရေငုပ်သင်္ဘော၏ ဖိအားဒဏ်ခံ အပြင်ခွံပေါ်သို့ ပြင်းထန်စွာ ရိုက်ခတ်သွားသဖြင့် သင်္ဘောကြီးမှာ လမ်းကြောင်းလွဲသွားပြီး အရုပ်တစ်ခုကဲ့သို့ ကျောက်ဆောင်နံရံကို သွားရောက်ဆောင့်မိကာ တိုက်တေနီယမ်သတ္တုစပ်ကိုယ်ထည်ကြီးမှ စူးရှသော မြည်သံကြီး ထွက်ပေါ်လာခဲ့သည်။

ထိုအချိန်နှင့် တစ်ပြိုင်နက်တည်းမှာပင် အရိုးဆူးများပါရှိသော ဖြူဖျော့ဖျော့လက်တံကြီး ၅ခုသည် အနန္တရထား၏ တတိယမြောက်ရထားတွဲကို ရစ်ပတ်ကာ ရေပြင်အထက်သို့ တည့်တည့်မတ်မတ် ဆွဲတင်လိုက်လေတော့သည်။

“လှုပ်ရှားကြ”

ထိုမွန်းစတားကြီး ရေပြင်ကို ခွဲထွက်ကာ ၎င်း၏ စစ်မှန်သော ပုံသဏ္ဌာန်မပေါ်လာမီ စက္ကန့်ပိုင်းအလိုကတည်းက နှစ်ဖက်စလုံးက တုံ့ပြန်လိုက်ကြပြီး ဖြစ်၏။ နျူကလီးယားရေငုပ်သင်္ဘော၏ အထက်တွင် အေးစက်သောလေထုတစ်ခု လင်းလက်သွားပြီး ဆူပွက်နေသော ရေနက်ဆိပ်ကမ်း၏ ရေပြင်ကို ရုတ်တရက် အလျင်အမြန် ခဲသွားစေသည်။ ထို့နောက် မွန်းစတားကြီး၏ ရိုက်ခတ်မှုကြောင့် ရေခဲပြင်ကြီး ပျက်စီးသွားသော်လည်း အပိုင်းအစများသည် တစ်ဖက်တွင် ပြန်လည်အေးခဲကာ ဧရာမ ရေခဲပြင်ချပ်ကြီးများအဖြစ် ကွဲအက်သွားပြန်သည်။

အနန္တရထားဆီမှ ရူဂျီက ရထားတွဲတံခါးမှ ပျံသန်းထွက်ခွက်လာပြီး ဝေဟင်မှနေ၍ တိုက်ခိုက်ကာ ရထားတွဲကို ရစ်ပတ်ထားသည့် လက်တံများကို ဖြတ်တောက်ပစ်လိုက်၏။ တစ်ပြိုင်နက်တည်းမှာပင် နျူကလီးယားရေငုပ်သင်္ဘောနှင့် အနန္တရထားနှစ်ခုစလုံးကို စိတ်စွမ်းအင်လှိုင်းဖြင့် အကာအကွယ်ပေးထားလိုက်သည်၊၊ ရထားတွဲ၏ ဖိအားဒဏ်ခံအပြင်ခွံအပေါ်၌ လူသုံးဦး ပေါ်လာခဲ့သည်။ သူတို့မှာ အံ့ဩစရာကောင်းလောက်အောင်ပင် တာဝေး တိုက်ခိုက်မှုစွမ်းရည်ရှိသည့် စွမ်းအားရှင်သုံးဦးဖြစ်သော လုရှင်းချန်၊ မိုနီကာနှင့် အားဖေးတို့ ဖြစ်ကြ၏။ တောက်လောင်နေသော မီးလျှံဓား၊ လေဆာတန်းနှင့် မမြင်နိုင်သော အသံလှိုင်းဓားတို့သည် ချက်ချင်းပင် တစ်ပြိုင်နက်တည်း ထွက်ပေါ်သွားခဲ့သည်။