တကယ်ပဲ သူတို့ဖြစ်နေတာလား

ထိုအင်မော်တယ်ဘုရင်နှစ်ပါး ပြောလိုက်သည့်စကားကြောင့် အစ်ကိုကြီးချန်ဆွံ့အသွားသည်။

ဝူကျီဂူဗိမာန်ကိုဖျက်ဆီးပြီး ဧကရာဇ်တစ်ပိုင်း အနည်းငယ်ကို သတ်လိုက်တာပဲ မဟုတ်ဘူးလား...

ဒီလောက်အထိ ဒေါသတကြီးဖြစ်နေဖို့ လိုလို့လား...

ဘာလဲ... သူတို့က အဲဒီ အင်မော်တယ် ဧကရာဇ်တွေနဲ့ အင်မော်တယ် ဂိုဏ်းတွေရဲ့ သဘောထားကိုသုံးပြီး ဖိအားလာပေးမလို့လား...

ဘယ်သူက ဂရုစိုက်မှာလဲ...

ခက်တာက... တကယ်ကြီး ဂရုစိုက်သူရှိနေ၏။

သူသည် မိမိနှင့် မျက်နှာချင်းဆိုင်တွင်ရှိနေပြီး အလွန်အမင်း ဝမ်းနည်းပူဆွေးသော မျက်နှာပေးများဖြင့် ခေါင်းညိတ်ပြနေကြသည့် ချီလင်မျိုးနွယ်စုမှ ဧကရာဇ်တစ်ပိုင်းနှစ်ပါးကို ကြည့်လိုက်မိသည်။

မင်းတို့က ဘယ်ဘက်ကလဲကွ...

မိုးပြာနဂါးချိုင့်ဝှမ်းမှ လူတိုင်းမှာမူ ဤသတင်းကြောင့် ထိတ်လန့်အံ့အားသင့်သွားကြသည်။ မကြာသေးခင်ကမှ ချိုင့်ဝှမ်းသို့ ပြန်ရောက်လာကြခြင်းဖြစ်သဖြင့် ဝူကျီဂူဗိမာန် ပျက်စီးသွားခဲ့သည့်ကိစ္စကို သူတို့မသိကြသေးချေ။

"ဘာ... ဝူကျီဂူဗိမာန်က တကယ်ပဲ အဖျက်ဆီးခံလိုက်ရတာလား"

"ဘယ်သူလုပ်တာလဲ"

ထိတ်လန့်တုန်လှုပ်သွားပြီးနောက် နဂါးမျိုးနွယ်စုဝင်များသည် ဝမ်းသာအားရ ကြွေးကြော်လိုက်ကြတော့သည်။

"ဟားဟား... တော်တော်လေး ကောင်းကောင်းမွန်မွန် လုပ်ဆောင်ခဲ့တာပဲ၊ ဘယ်သူရဲကောင်းက လုပ်ခဲ့တာလဲ မသိဘူး"

"လှပတယ်"

"ဝူကျီဂူဗိမာန်က အဲဒီတုန်းက ငါတို့ မိုးပြာနဂါးချိုင့်ဝှမ်းကိုလည်း တိုက်ခိုက်ခဲ့သေးတာ။ တကယ်ပဲ ကောင်းကင်မှာ မျက်စိရှိတယ်... ဟားဟားဟားဟား"

"ဒါက သူတို့ကို အမြစ်ပြတ်သုတ်သင်လိုက်တာနဲ့ အတူတူပဲမဟုတ်ဘူးလား"

"သေချာတာပေါ့... အင်မော်တယ်ဧကရာဇ်သုံးပါး ကျန်ရစ်ခဲ့ရင်တောင်မှ သူတို့အနေနဲ့ ဂိုဏ်းကို ပြန်တည်ထောင်နိုင်တော့မှာ မဟုတ်ဘူး"

ဆန်းကျိ၊ ဆန်းချုံး၊ ယီခုန်း သို့မဟုတ် နဂါးဘုရင်များနှင့် နဂါးအရှင်သခင်အားလုံးသည် မျက်နှာများဝင်းပနေကြပြီး ချီးမွမ်းစကားများ တဖွဖွပြောဆိုနေကြတော့သည်။ အခြေအနေကို မသိသောသူသာမြင်လျှင် သူတို့ တစ်ခုခုကို အောင်ပွဲခံနေကြသည်ဟု အထင်မှားစရာပင်။ သူတို့သည် မိမိတို့ရှေ့တည့်တည့်တွင်ရှိနေသော လူသားမျိုးနွယ်စုမှ အင်မော်တယ်ဘုရင်နှစ်ပါးကို လုံးဝထည့်မတွက်ကြချေ။ ထိုမြင်ကွင်းက ချီမုန်းကို ဒေါသထွက်စေခဲ့သည်။

"မင်းတို့ မိုးပြာနဂါးမျိုးနွယ်စုကတော့ သတိထားရင်ပိုကောင်းမယ်... အဲဒီလို လူသတ်သမားဘက်ကနေပြီးတော့ ဘယ်လိုတောင် ရဲရဲတင်းတင်း စကားပြောရဲရတာလဲ"

ဆန်းကျိက သူ၏ မှုန်ဝါးဝါးမျက်လုံးများကို ပင့်ကြည့်လိုက်သည်...

"ဘာလဲ... ငါတို့ရဲ့ရန်သူ ပျက်စီးသွားတာကို ငါတို့ကမပျော်ရဘူးလား"

ယီခုန်းက ထူးဆန်းစွာ ရယ်မောလိုက်သည်...

"ဘာ လူသတ်သမားလဲ... အဲဒါက သူရဲကောင်းကြီးကွ"

ချီမုန်းက အံကြိတ်လိုက်သည်...

"အင်မော်တယ်လောကက အခု ဒီကိစ္စကို တော်တော်လေး အလေးအနက်ထားနေတာ။ တရားခံကို မဖမ်းမိမချင်း သူတို့လက်လျှော့မှာမဟုတ်ဘူး။ ဒီတစ်ကြိမ်တော့ သူတို့ တကယ်အတည်ပြောနေတာ"

"မင်းတို့ မိုးပြာနဂါးမျိုးနွယ်စုက ကိုယ့်ပြဿနာကိုယ်ရှာချင်တယ်ဆိုရင်လည်း... ဆက်ပြီးပျော်နေကြပေါ့"

မော့ရန်က အေးစက်စွာ နှာခေါင်းရှုံ့လိုက်သည်...

"ငါတို့က ဘယ်တုန်းက သူတို့ကိုကြောက်ဖူးလို့လဲ"

အခြား နဂါးဘုရင်များကလည်း ဝိုင်းဝန်း အော်ဟစ်ကြတော့သည်။

"မှန်တယ်... ငါတို့က သူတို့ရဲ့ အင်မော်တယ်လောကနဲ့ အမြဲတမ်းစစ်ဖြစ်နေတာပဲဟာ"

"ဘာကို စိတ်ပူနေရမှာလဲ။ လူတိုင်းက မင်းတို့ ချီလင်မျိုးနွယ်စုလိုပဲ သူရဲဘောကြောင်တယ်လို့ ထင်နေလား"

"အင်မော်တယ်လောကက လူတွေကိုပါခေါ်ပြီး ငါတို့ကိုလာရှာခိုင်းနေတယ်... တကယ်ကို ပျော့ညံ့လာတာပဲ"

အင်မော်တယ်ဘုရင်နှစ်ပါးမှာ ဒေါသကြောင့် မျက်နှာများဖြူလျော်သွားသည်။

ချီမုန်းကလည်း အံကြိတ်ကာ ပြောလိုက်သည်...

"ကျေးဇူးကန်းလိုက်တာ... ဒီတစ်ကြိမ်မှာ မိစ္ဆာနန်းတော်တစ်သောင်းက အင်မော်တယ် မဟာမိတ်အဖွဲ့ကို ကူညီပြီး လာရောက်ရှာဖွေတာဟာ အခြေအနေတွေ ပိုပြီးမဆိုးရွားလာစေဖို့အတွက် တားဆီးပေးနေတာ"

"အင်မော်တယ်ဧကရာဇ်တွေကိုယ်တိုင်သာ ကိုယ်တိုင် လာရောက်စွက်ဖက်မယ်ဆိုရင် မင်းတို့ မိုးပြာနဂါးချိုင့်ဝှမ်းက သူတို့ကိုတားဆီးနိုင်မှာလား"

"ဒီတစ်ကြိမ်မှာ... အင်မော်တယ်ဧကရာဇ် လေကျိ၊ ဇီဒီယန်နဲ့ ချန်ယွမ်တို့က ကလဲ့စားချေဖို့အတွက် ဘာမဆိုလုပ်သွားနိုင်တယ်"

"မင်းတို့က ရှာဖွေရေးကို မပူးပေါင်းဘူးဆိုရင် မိစ္ဆာနန်းတော်တစ်သောင်းကလည်း မင်းတို့ဘက်ကနေ ကာကွယ်ပေးမှာမဟုတ်ဘူး"

ဤဖြစ်ရပ်သည် ယခင်က ကျိလင်းဟန်နှင့် မိုချန်တို့အုပ်စုဖြစ်ရပ်နှင့် မတူပေ။ ဖေးရှန်ဂိုဏ်းမှ လူများသည် အမှန်တကယ်ပင် သားကောင်များဖြစ်ခဲ့ကြပြီး အင်မော်တယ်လောကနှင့် နတ်ဆိုးလောကတို့၏ အကြောင်းပြချက်မရှိ ဝိုင်းရံသတ်ဖြတ်ခြင်းခံခဲ့ရသဖြင့် အထိအခိုက်အကျအဆုံး များပြားခဲ့ခြင်းဖြစ်သည်။

အင်မော်တယ်လောကနှင့် နတ်ဆိုးလောကတို့သည် သူတို့ကို အမြစ်ပြတ်သုတ်သင်လိုကြသော်လည်း ခိုင်လုံသောအကြောင်းပြချက်မရှိသဖြင့် မိစ္ဆာလောကထဲသို့ လိုက်လံဖမ်းဆီးရန် ဆင်ခြေမရှိခဲ့ကြချေ။ သို့သော်လည်း ယခုတစ်ကြိမ်တွင် ဝူကျီဂူဗိမာန်သည် တကယ်ကို အမြစ်ပြတ်သုတ်သင်ခံခဲ့ရသည်။ အစ်ကိုကြီးချန်ကဲ့သို့ ဂိုဏ်းတစ်ခုလုံးကို ဖျက်ဆီးပစ်နိုင်သော ကျွမ်းကျင်သူတစ်ဦးနှင့် တွေ့ဆုံခဲ့ရသဖြင့် သူတို့သည် အကြောင်းရင်းကိုမသိဘဲ နာကျည်းစွာသေဆုံးခဲ့ကြ၏။

ထို့ကြောင့် သူတို့သည် မိမိတို့ကိုယ်မိမိ အနိုင်ကျင့်ခံရသူများဟုသတ်မှတ်ကာ ဒေါသတရားများဖြင့် ပြည့်နှက်နေကြလေသည်။

"သူတို့ လာချင်ရင် လာပါစေ..."

မိုးပြာနဂါးများက ထိုသို့ ပြောဆိုခဲ့ကြသော်လည်း သူတို့၏ရင်ထဲတွင် စိုးရိမ်ပူပန်နေကြသည်။

အင်မော်တယ်လောကနှင့် မိစ္ဆာလောကတို့အကြား လက်ရှိစစ်ပွဲသည် အထိအခိုက် အကျအဆုံးများပြားမှုကို ရှောင်ရှားရန်အတွက် မိစ္ဆာနန်းတော်တစ်သောင်းနှင့် အင်မော်တယ်မဟာမိတ်အဖွဲ့တို့အကြား သဘောတူညီချက်ကြောင့် ဧကရာဇ်တစ်ပိုင်းအောက်အဆင့်များသာ တိုက်ခိုက်ခြင်းဖြစ်သည်။

အကယ်၍ မိစ္ဆာနန်းတော်တစ်သောင်းက ဝင်ရောက်မစွက်ဖက်တော့ပါက မိုးပြာနဂါးချိုင့်ဝှမ်း တစ်ခုတည်းအနေဖြင့် အင်မော်တယ်ဧကရာဇ်သုံးပါး၏ ကျူးကျော်မှုကို ခုခံနိုင်မည်မဟုတ်။

"မကြာသေးခင်က... မင်းတို့ မိုးပြာနဂါးချိုင့်ဝှမ်းထဲကို လူသားကျင့်ကြံသူ အုပ်စုကြီးတစ်ခု ရောက်လာတယ်လို့ ငါတို့ကြားသိရတယ်"

"အဲဒီလူတွေက... လူသတ်သမားတွေနဲ့ ပတ်သက်နေတယ်လို့ သံသယရှိတယ်"

ဆန်းကျိ၊ ယီခုန်းနှင့် အခြားနဂါးများသည် တစ်ဦးကိုတစ်ဦး ကြည့်လိုက်ကြသည်။ အမှန်ပင် မိုးပြာနဂါးချိုင့်ဝှမ်းသည် မကြာသေးမီက လူအများအပြားကို လက်ခံထား၏။

သို့သော်လည်း နတ်ဆိုးလောကသို့ ရောက်ရှိနေပြီဖြစ်သော ကျိလင်းဟန်၊ လျိုယွမ်နှင့် အခြားသူများမှလွဲ၍ ကျန်ရှိနေသော အသန်မာဆုံးသူများမှာ မိစ္ဆာဘုရင် ၁၂ ပါးနှင့် ရှောင်ခွန်း၊ ကျီယွန်းတို့ကဲ့သို့ အင်မော်တယ်ဘုရင်များသာ ဖြစ်ကြပြီး ကျန်သူများမှာ မိစ္ဆာအရှင်သခင်၊ အင်မော်တယ် အရှင်သခင်၊ ရွှေရောင်အင်မော်တယ်များနှင့် မြင့်မြတ်အင်မော်တယ်များသာ ဖြစ်ကြသည်။ သူတို့၏ အင်အားကို အခြေခံ၍ ကြည့်မည်ဆိုလျှင် ဝူကျီဂူဗိမာန်ကို ဖျက်ဆီးရန် လုံးဝမဖြစ်နိုင်ပေ။

အစ်ကိုကြီးချန်က ရုတ်တရက် အဓိပ္ပာယ်ပါပါဖြင့် ပြောလိုက်သည်...

"သူတို့ကို ရှာတွေ့ပြီးရင်ကော... ဘာဆက်လုပ်မှာလဲ"

အင်မော်တယ်ဘုရင်နှစ်ပါးသည် ခေါင်းကိုမော့ကာ ကြေညာလိုက်သည်...

"အဲဒါက တကယ်ပဲ အဲဒီလူအုပ်စုဖြစ်နေမယ်ဆိုရင် မင်းတို့အနေနဲ့ သူတို့ကို ဖမ်းဆီးတဲ့နေရာမှာ ကူညီရမယ်"

"ပြီးတော့ သူတို့ကို စီရင်ချက်ချဖို့အတွက် အင်မော်တယ်လောကဆီကို ချက်ချင်းလွှဲပြောင်းပေးရမယ်"

"မင်းတို့ကိုကူညီရမယ် ဟုတ်လား"

ချီမုန်းက ဝင်ပြောလိုက်သည်...

"မင်းတို့က သူတို့ကို ခိုလှုံခွင့်ပေးထားတာဖြစ်တဲ့အတွက်... တာဝန်ကိုရှောင်ခွင့်မရှိဘူး။ ငါတို့ကို ကူညီခြင်းအားဖြင့် မင်းတို့ရဲ့အပြစ်တွေကို ဆေးကြောနိုင်ပြီး ကောင်းမှုကုသိုလ်ရရှိစေမှာဖြစ်တယ်"

အစ်ကိုကြီးချန်သည် ဒေါသမထွက်ခဲ့ချေ။ ထို့ပြင် သူက စူးစမ်းလိုစိတ်ဖြင့် မေးမြန်းလိုက်သည်...

"ဒါဆို... မင်းတို့က ပစ်မှတ်တွေကို ဘယ်လိုခွဲခြားမလဲ။ သူတို့ကို မင်းတို့ မှတ်မိလို့လား"

"ငါတို့က အဓိကတရားခံကို သေချာပေါက် မှတ်မိတာပေါ့"

"သူတို့က ဘယ်လိုပုံစံမျိုးလဲ... ငါတို့ကိုလည်း ပြပါဦး၊ မဟုတ်ဘူးလား"

ထိုစကားကို ကြားသောအခါ အင်မော်တယ်ဘုရင်နှစ်ပါးသည် သေးငယ်သော ပုံရိပ်ယောင် အင်မော်တယ်ရတနာတစ်ခုကို ထုတ်ဖော်လိုက်ကြသည်။

"အဲဒီနေ့က ဝူကျီဂူဗိမာန် ပျက်စီးသွားတဲ့အချိန်မှာ အင်မော်တယ်ဧကရာဇ်တွေက အတိတ်ကပုံရိပ်တွေကို ပြန်လည်ဖော်ထုတ်ခဲ့ကြတာ၊ ရာနှုန်းပြည့်မှန်ကန်တယ်"

"ဒီပစ္စည်းကို အင်မော်တယ်ဧကရာဇ်ကိုယ်တိုင် ဖန်တီးထားတာဖြစ်ပြီး ကြံရာပါ ၁၂ ယောက်နဲ့ လူတိုင်းမုန်းတီးကြတဲ့ အဓိကတရားခံရဲ့ပုံရိပ်ကို ပြသပေးမှာဖြစ်တယ်"

"အားလုံးပဲ... သေချာကြည့်လိုက်ကြ"

ပြောပြီးသည်နှင့် ပုံရိပ်ယောင် အင်မော်တယ်ရတနာသည် လေထဲတွင်လွင့်မျောလာကာ ပန်းချီကားချပ်တစ်ခုကို ဖြည်းညှင်းစွာ ဖြန့်ခင်းပြလိုက်သည်။ ပထမဆုံးပေါ်လာသောသူမှာ မိစ္ဆာဘုရင် ရှောင်ခွန်းဖြစ်၏။ အသက်ဝင်ကာ ထင်ရှားလှပေသည်။ သူ့ပုံရိပ်ကို မြင်လိုက်ရသောအခါ မိုးပြာနဂါးချိုင့်ဝှမ်းမှ နဂါးများ အံ့အားသင့်သွားကြ၏။

မဖြစ်နိုင်တာ... တကယ်ပဲ သူဖြစ်နေတာလား...

သူတို့သည် ရှောင်ခွန်းကို သေချာပေါက်မြင်ဖူးသည်။ ထိုစဉ်က သူသည် မဟာဧကရာဇ်နှင့်အတူ ပြန်လာခဲ့သည် မဟုတ်ပါလော။

သူက အဆင့်ကိုး မိစ္ဆာဘုရင်တစ်ပါးပဲဟာ...

ဝူကျီဂူဗိမာန်နဲ့ ရင်ဆိုင်ရရင် တစ်ဖက်လူကို ဖျက်ဆီးပစ်ဖို့ နေနေသာသာ သူမသေရင်တောင် ကံကောင်းလှပြီ...

သူ့မှာ ဒီလောက်အထိ ကြီးမားတဲ့စွမ်းရည် ရှိနိုင်ပါ့မလား...

ထို့နောက် ချက်ချင်းပင် ရှာလီ၏ပုံရိပ်ကလည်း ပေါ်လာသည်။ နဂါးမျိုးနွယ်စုဝင်များ ပို၍ပင် အံ့အားသင့်သွားကြ၏။ မင်ချီ၊ လျိုယွန်း၊ ကျီယွန်း၊ ဝူကျူးနှင့် အခြားသူများ၏ ပုံရိပ်များ တစ်ခုပြီးတစ်ခု ပေါ်လာသည်ကို မြင်လိုက်ရသောအခါ သူတို့၏မျက်နှာပေးများမှာ တကယ့်ကို ကြည့်ကောင်းလှပေသည်။

ဒါဆို... အဲဒီလူတွေက သူတို့ပေါ့...

မဖြစ်နိုင်တာ...

တကယ်ပဲ သူတို့လုပ်ခဲ့တာလား...

သူတို့၏ အံ့အားသင့်နေသော မျက်နှာပေးများကို အင်မော်တယ် ဘုရင်နှစ်ပါးနှင့် ချီလင်မျိုးနွယ်စုမှ ကျွမ်းကျင်သူများက မြင်တွေ့သွားကြသဖြင့် သူတို့က မထိတထိ ပြုံးလိုက်ကြတော့သည်။

"မင်းတို့ မိုးပြာနဂါးမျိုးနွယ်စုက သူတို့ကို တကယ်သိနေတဲ့ပုံပဲ"

"ခန့်မှန်းနေဖို့တောင် မလိုတော့ဘူး... မိုးပြာနဂါးချိုင့်ဝှမ်းက သူတို့ပုန်းကွယ်တဲ့နေရာပဲ"

"သူတို့အားလုံး ဒီမှာပုန်းနေကြတာဆိုတော့... ဝူကျီဂူဗိမာန် ပျက်စီးသွားတဲ့နောက်ကွယ်မှာ မင်းတို့ရဲ့လက်ချက်လည်း ပါဝင်နေပုံပဲ"

"ချီမုန်း... မဟုတ်တာကို လျှောက်ပြီးပုံကြီးမချဲ့နဲ့"

ဆန်းကျိက ထိုကားချပ်ကိုကြည့်ကာ မျက်နှာထား တည်တံ့လေးနက်သွားသည်။ ဤဖြစ်ရပ်က တကယ်ကို ပြဿနာကြီး၏။

အင်မော်တယ်ဧကရာဇ်အနည်းငယ် ပါဝင်ပတ်သက်နေသဖြင့် ဤပြဿနာကို ဖြေရှင်းရန်ခက်ခဲလိမ့်မည်။ တစ်ဆယ့်နှစ်ယောက်မြောက်ဖြစ်သော အင်မော်တယ်ဘုရင် ဟွာယင်း၏ ပုံရိပ်ပေါ်လာပြီးနောက် မျက်နှာပြင်သည် ရုတ်တရက်ကြီးမားလာကာ နောက်ဆုံးလူသား၏ပုံရိပ်က ကောင်းကင်ယံထက်တွင်ပေါ်လာသည်။

"ဒီလူကတော့... တကယ့် လူသတ်သမား အစစ်အမှန်ပဲ"

"သူ့ရဲ့နည်းလမ်းတွေက အလွန် ရက်စက်ကြမ်းကြုတ်လှတယ်။ ဝူကျီဂူဗိမာန်ဟာ... သူတစ်ယောက်တည်းရဲ့လက်ချက်နဲ့ ပျက်စီးသွားခဲ့တာ"

ထိုအင်မော်တယ်ဘုရင်က တင်းမာစွာအော်ဟစ်လိုက်သည်...

"ဒီလူအုပ်စုက အလယ်ပိုင်းအင်မော်တယ်လောကကနေ လာကြတာဖြစ်ပြီး... တပည့်တွေနဲ့ မြေးတပည့်တွေအများကြီး ခေါ်လာခဲ့ကြတာ"

"မင်းတို့ မိုးပြာနဂါးချိုင့်ဝှမ်းက သူတို့အားလုံးကို တစ်ယောက်မှမချန်ထားဘဲ ဖမ်းဆီးဖို့အတွက် ငါတို့ကိုကူညီရမယ်"

သူ့အသံ ဆုံးသွားသည်နှင့် နေရာတစ်ခုလုံး တိတ်ဆိတ်သွား၏။ မိုးပြာနဂါးချိုင့်ဝှမ်းတစ်ခုလုံး ငြိမ်သက်သွားခဲ့ပြီး နဂါးမျိုးနွယ်စုဝင်အားလုံးသည် တစ်ပြိုင်နက်တည်းခေါင်းမော့ကာ အဓိကတရားခံ၏ပုံရိပ်ကို ဆွံ့အစွာစိုက်ကြည့်နေမိကြတော့သည်။

ထိုလူသည် အလွန်ပင် ခန့်ညားချောမောလှပြီး ထူးခြားဆန်းပြားသော စရိုက်လက္ခဏာရှိသဖြင့် သူ၏ရုပ်ရည်သွင်ပြင်ကို စကားလုံးများဖြင့်ဖော်ပြရန်ပင် ခက်ခဲလှပေသည်။ ပို၍မယုံနိုင်စရာကောင်းသည်မှာ ထိုကဲ့သို့သောလူတစ်ဦးက ဤသို့သောအမှုမျိုးကို ပြုလုပ်ခဲ့ခြင်းဖြစ်သည်။ မိုးပြာနဂါးချိုင့်ဝှမ်းမှလူတိုင်းသည် တကယ်ပင် မယုံနိုင်အောင် ဖြစ်နေကြ၏။

အကြောင်းမူကား... သူတို့သည် ဤလူကို မြင်ဖူးကြသောကြောင့်ပင်။

အချိန်က... မိုးပြာနဂါးချိုင့်ဝှမ်းက ဧကရာဇ်ဆန်းချန်ကို ပထမဆုံးအကြိမ် ကြိုဆိုခဲ့သည့်နေ့ကဖြစ်သည်။ ထိုနေ့က သူသည် အစပိုင်း၌ လူသားအသွင်သဏ္ဌာန်ကိုသာ ဇွတ်အတင်းထိန်းသိမ်းထားခဲ့ပြီး ဆန်းကျိက မတတ်သာသည့်အဆုံး ခန့်ချောကြီး ချန် ဟု ခေါ်ဆိုလိုက်မှသာ သူသည် မလိုမလားဖြင့် မိုးပြာနဂါးအသွင်သို့ ပြန်လည်ပြောင်းလဲခဲ့ခြင်းပင်။

ရောက်ရှိနေသော နဂါးမျိုးနွယ်စုဝင်များသည် ထိုအသွင်သဏ္ဌာန်ကို ကောင်းစွာမှတ်မိကြ၏။ မဟာဧကရာဇ်၏ လူသားအသွင်သဏ္ဌာန်သည် ထိုပန်းချီကားချပ်ထဲကပုံနှင့် ချွတ်စွပ်တူညီနေမှန်း သူတို့ သေသေချာချာမှတ်မိနေကြလေသည်။