စနစ်က တကယ့်ကို လူလည်ကျလွန်းတယ်

"အဘိုးကြီး မိုးပြာနဂါး... ဒီရေကန်က သိပ်ပြီးအစွမ်းမထက်ပါလား"

"ကျွန်တော် ပထမဆုံးဝင်လာတုန်းက ရေက အရမ်းနွေးပြီး သက်တောင့်သက်သာရှိလွန်းလို့ အိပ်ပျော်တော့မလို့"

ဝရဇိန်နဂါးအရိုးကို ရရှိပြီးနောက်တွင် ဤစိမ်းပြာရောင်ရေကန်သည် ကျန်းချန်ကို ထိခိုက်မှု ကြီးကြီးမားမား မပေးနိုင်တော့ချေ။ အနည်းငယ် ယားကျိကျိဖြစ်ရုံမှတစ်ပါး အစ်ကိုကြီးချန်သည် ထူးခြားသောခံစားချက်မျိုးမရှိတော့။

"ဟားဟားဟား... မျှော်လင့်ထားတဲ့အတိုင်း မိုးပြာနဂါးဧကရာဇ်ကြီးပဲ"

မိုးပြာနဂါးချိုင့်ဝှမ်းဘက်တွင်မူ ဆန်းကျိ၊ ယီခုန်းနှင့် အခြားသော အဆင့်မြင့်အဖွဲ့ဝင်များမှာ အလွန်ဝမ်းသာနေကြပြီး အစ်ကိုကြီးချန်အတွက် ရူးသွပ်မတတ် အောင်ပွဲခံ အော်ဟစ်နေကြတော့သည်။

"သူက ပထမဆုံးအကြိမ်ဝင်တာနဲ့ စိမ်းပြာရောင်ရေကန်ကို တိုက်ရိုက်ရွေးချယ်ပြီး အသက်ရှင် ကျန်ရစ်ခဲ့တာပဲ"

"ဒါပေါ့... အကယ်၍ နဂါးဧကရာဇ်က အခြားနဂါးတွေလို လမ်းဟောင်းအတိုင်း သွားနေမယ်ဆိုရင် ဒါက သူ့ရဲ့ဂုဏ်သိက္ခာကို ထိခိုက်စေမှာပေါ့"

"ကြည့်စမ်း... ဒါကိုမှ ဧကရာဇ်တစ်ပါးရဲ့ အရှိန်အဝါလို့ခေါ်တာ"

ဤမြှောက်ပင့်မှုများက အလွန်အမင်း ပြင်းထန်လှသဖြင့် နဂါးတစ်ကောင်ချင်းစီက သူတို့၏ လက်သည်းများတွင် မီးချောင်းနှစ်ချောင်းစီ ကိုင်ထားရန်သာ လိုတော့သည့်အလား။

အခြားတစ်ဖက်တွင်မူ ဖေးရှန်ဂိုဏ်းမှ တပည့်များဖြစ်ကြသော ရှောင်ကွန်း၊ ကျိယွန်းနှင့် အခြားသူများသည်လည်း အားကျမခံ နောက်ကျကျန်ရစ်ခြင်းမရှိကြချေ။

"မိုးပြာနဂါးဧကရာဇ်ကြီးက တကယ်ကို အစွမ်းထက်လှပါတယ်"

"ကျွန်မတို့ လူသားတွေ ဒီကိုလာပြီး ပထမဆုံးအကြိမ် နဂါးတစ်ကောင်ကို အလွန်အမင်း အထင်ကြီး လေးစားမိတာပဲ"

"မိုးပြာနဂါးဧကရာဇ်ကြီး တစ်ပါးတည်းသာ ဤမျှလောက် ထူးခြားပြောင်မြောက်တာ..."

"မိုးပြာနဂါးဧကရာဇ်ကြီးရဲ့ ရှေ့မှောက်မှာ ဒူးထောက် အညံ့ခံပါတယ်"

အဆင့်မြင့် အဖွဲ့ဝင်အချို့မှလွဲ၍ မိုးပြာနဂါးချိုင့်ဝှမ်းရှိ အခြားသော နဂါးမျိုးနွယ်စုဝင်များသည် အစ်ကိုကြီးချန်က ဖေးရှန်ဂိုဏ်း၏ ဂိုဏ်းချုပ်ဖြစ်မှန်း မသိကြချေ။ ရွှေနဂါးချိုင့်ဝှမ်းနှင့် အခြားသော နဂါးပြာချိုင့်ဝှမ်းမှ လူများမှာမူ ပို၍ပင် သတင်းအမှောင်ချခံထားရသည်။ သူတို့ ဤမျှလောက် ကြွားဝါနေသည်ကို ကြားရသောအခါ အားလုံးမှာဆွံ့အသွားကြပြီး လှည့်စားခံလိုက်ရ၏။

သူတို့သည် တစ်စုံတစ်ရာ အကြောင်းပြချက်မရှိဘဲ ဤမိုးပြာနဂါးဧကရာဇ်က နဂါးမျိုးနွယ်စုတစ်ခုလုံးအတွက် ဂုဏ်ဆောင်ပေးခဲ့သည်ဟုပင် မသိစိတ်က ခံစားလိုက်ရ၏။ ဤမျှလောက် များပြားလှသော လူသား မိစ္ဆာဘုရင်များနှင့် အင်မော်တယ်ဘုရင်များကို သူ့အား ကိုးကွယ်ဆည်းကပ်အောင် ပြုလုပ်နိုင်ခြင်းမှာ ယခင် နဂါးဧကရာဇ်သုံးပါးပင် မအောင်မြင်ခဲ့သောအရာမျိုး ဖြစ်သည်။

"မင်းတို့တွေ ဝမ်းသာနေကြတာ စောလွန်းသေးတယ်"

ကောင်းကင်ထက်ရှိ နဂါးပြာဧကရာဇ်က အေးစက်စွာ ပြောလိုက်သည်...

"ငါတို့ရဲ့ သဘောတူညီချက်က အပြာရောင်ရေကန်ထဲမှာ အသက်ရှင်ဖို့ပဲ... မင်း အဲဒီနေရာကို မရောက်သေးဘူး"

အစ်ကိုကြီးချန်သည် ယခုအခါတွင် ယုံကြည်မှုအပြည့်ရှိနေသည်။ သူသည် ဝရဇိန်နဂါးအရိုးဖြင့် ပြန်လည်တည်ဆောက်ထားခြင်းဖြစ်ရာ ဘာကို ကြောက်နေရဦးမည်နည်း။

"အပြာရောင်ရေကန် ဟုတ်လား... အဲဒါက ဘယ်လောက်တောင် ခက်ခဲလို့လဲ"

ထိုသို့ပြောပြီးနောက် သူသည် စိမ်းပြာရောင်ရေကန်၏ အဆုံးဆီသို့ ကူးခတ်သွားရာ အထက်မှ ဆွဲငင်အားတစ်ခု သက်ရောက်လာသည်။ သူသည် မိမိကိုယ်ကို လျှော့ချလိုက်ပြီး ခန္ဓာကိုယ်ကို လှုပ်ရှားလိုက်ရာ တစ်ခဏအတွင်းမှာပင် အထက်အလွှာရှိ အပြာရောင်ရေကန်ထဲသို့ ရောက်ရှိသွား၏။

ထို့နောက်တွင်မူ ပြင်းထန်လှသော နာကျင်မှုက ထပ်မံထိုးနှက်လာပြန်သည်။ သူ၏ ဝရဇိန်နဂါးအရိုးက အတော်လေး အစွမ်းထက်လှသဖြင့် အမှန်တကယ်ပင် စက္ကန့် ၃၀ တိတိ တောင့်ခံနိုင်ခဲ့၏။ သို့သော်လည်း ထို့နောက်တွင် နဂါးအရိုးက အစိတ်စိတ်အမြွှာမြွှာ ကြေမွသွားပြီး သူသည် နောက်ထပ်တစ်ကြိမ် သေဆုံးသွားရပြန်သည်။

တောက်... ဒါက ဘယ်လို အခြေအနေကြီးလဲ...

ငါ လှည့်ကွက်တစ်ခုကို သုံးထားပြီးပြီ မဟုတ်လား...

ဘာဖြစ်လို့ ထပ်ပြီးသေရပြန်တာလဲ...

အစ်ကိုကြီးချန်သည် နဂါးမျိုးနွယ်စုနှင့် ပတ်သက်သော ဗဟုသုတနည်းပါးမှုကြောင့် ကန့်သတ်ချက် ရှိနေခဲ့ခြင်းဖြစ်သည်။ ဝရဇိန်နဂါးအရိုးက အလွန်အမင်း အစွမ်းထက်သည်ဟု ထင်ရသော်လည်း လက်တွေ့တွင်မူ ၎င်းက နဂါးဘုရင်တစ်ကောင်၏ သာမန် ပျမ်းမျှအဆင့်သာ ရှိသေးသည်။ အပြာရောင် ရေကန်တွင်မူ အနည်းဆုံး ဧကရာဇ်တစ်ပိုင်းအဆင့်သို့ မရောက်ရှိပါက မည်သူမျှ အသက်ရှင် မကျန်ရစ်နိုင်ချေ။ ထို့ကြောင့်... သူ ဤနေရာတွင် သေဆုံးသွားခြင်းက လုံးဝ သဘာဝကျပေသည်။

သူ ရေထဲသို့ နစ်မြုပ်သွားပြီးနောက် ရေကန်၏ ရေပြင်မှာ ဘာအသံမျှ မထွက်တော့ဘဲ ပြန်လည် တည်ငြိမ်သွားပြန်သည်။ နဂါးမျိုးနွယ်စုဝင်များမှာ ဆွံ့အသွားကြ၏။ ကောင်းကင်ထက်ရှိ နဂါးပြာဧကရာဇ်၏ စိုးရိမ်ပူပန်နေသော နှလုံးသားမှာမူ နောက်ဆုံးတွင် အေးချမ်းသွားတော့သည်။ ရေကန်အတွင်း စက္ကန့်အနည်းငယ်မျှ စောင့်ဆိုင်းကြည့်ပြီးနောက် ဘာလှုပ်ရှားမှုမှ မရှိတော့သည်ကို မြင်သောအခါ သူက ကျယ်လောင်စွာ ထပ်မံရယ်မောလိုက်ပြန်သည်။

"ဆန်းလင်... ဘယ်လိုလဲ"

"ငါ သိသားပဲ... သူ အပြာရောင်ရေကန်ထဲမှာ အသက်ရှင်နိုင်မှာ မဟုတ်ဘူးဆိုတာ"

"ဝရဇိန်နဂါးအရိုးရဲ့အဆင့်က လုံးဝကိုမလုံလောက်ဘူး"

"ပုံစံကိုးမျိုး မိုးပြာနဂါးရဲ့ ပြီးပြည့်စုံတဲ့ သွေးမျိုးဆက်တစ်ခုအနေနဲ့ သူ့မှာ ဝရဇိန်နဂါးအရိုးပဲရှိတာကတင် သူက ပုံမှန်မဟုတ်တဲ့သူဆိုတာ သက်သေပြဖို့ လုံလောက်နေပြီ မဟုတ်လား"

"ဒီလိုလူမျိုးက မင်းတို့ရဲ့ နဂါးဧကရာဇ်ဖြစ်ဖို့ အရည်အချင်း ပြည့်မီပါ့မလား"

အကယ်၍ အစ်ကိုကြီးချန်သာ ဤစကားများကို ကြားရလျှင် သေချာပေါက် အလွန်စိတ်ပျက်မိပေလိမ့်မည်။

အစ်ကိုကြီးရာ... မင်းက ဒါတွေကို သိနေရင်လည်း စောစောစီးစီး ရှင်းပြရမှာပေါ့...

ငါက ဝရဇိန်နဂါးအရိုးက အစွမ်းထက်ပြီး အမြင့်ဆုံးအဆင့်လို့ ထင်နေတာ...

"ဒင်... လက်ခံသူ သေဆုံးသွားပါပြီ။ ရန်သူ့အင်အားကို ရှာဖွေတွေ့ရှိပြီးနောက် အသက်ပြန်သွင်းခြင်း အစီအစဉ်ကို ပြင်ဆင်နေပါသည်"

"ဒင်... လက်ခံသူသည် စိန်နဂါးအရိုးကို ရရှိသွားပါပြီ"

"ဒင်... လက်ခံသူ အသက်ပြန်ရှင်လာပါပြီ"

ယခုမှသာ အစ်ကိုကြီးချန် နားလည်သဘောပေါက်သွားတော့သည်။ စနစ်က သူ့ကို ပထမဆုံးအကြိမ်တုန်းက စိမ်းပြာရောင်ရေကန်တွင် သီသီလေး အသက်ရှင်နိုင်မည့် အစီအစဉ်မျိုးကိုသာပေးခဲ့၏။ နောက်ဆက်တွဲရှိလာမည့် အပြာရောင်နှင့် ခရမ်းရောင် ရေကန်များကိုမူ ၎င်းက ထည့်သွင်းစဉ်းစားပေးခဲ့ခြင်းမရှိချေ။ ဤအရာကို သိရှိလိုက်ရသည့်အခါ သူ့နှလုံးသားထဲတွင် နောင်တများဖြင့် ပြည့်နှက်သွားသည်။

စောစောစီးစီးသိခဲ့လျှင် အစကတည်းက အနက်ရောင် ရေကန်ထဲသို့ တိုက်ရိုက်ဝင်ပြီး တစ်ဆင့်တည်းနှင့် အပြီးသတ်လိုက်တာက ပိုကောင်းပေလိမ့်မည်။ ယခုအခါတွင် ဤနဂါးချိပ်ပိတ် ရေကန်ထဲသို့ ဝင်ရောက်ခြင်းက နောက်ပြန်လှည့်၍မရသော ဂူဗိမာန်တစ်ခုထဲသို့ ဝင်ရောက်ရသကဲ့သို့ ဖြစ်နေပြီး မိမိသဘောအလျောက် မထွက်ခွာပါက တစ်ဆင့်ပြီးတစ်ဆင့်သာ ရှေ့ဆက်သွားရတော့မည်။ အဆင့်များကိုကျော်သွား၍ မရတော့ချေ... သို့သော်လည်း ဤအသက်ပြန်ရှင်ခြင်း၏ သက်ရောက်မှုကမူ အလွန်သိသာလှပေသည်။

သူ၏ နဂါးအရိုးအင်အားက နောက်ထပ် အဆင့်တစ်ခုသို့ မြင့်တက်သွားခဲ့ပြီး အပြာရောင်ရေကန်က သူ့ကို မသတ်ဖြတ်နိုင်တော့ချေ။ ထို့ပြင် ၎င်းက ဖြစ်ပေါ်စေသည့် တုန်လှုပ်ချောက်ချားမှုကလည်း ထူးခြားပြောင်မြောက်လှသည်။

"သူ တကယ်ပဲ အသက်ရှင်နေသေးတာပဲ"

ဆန်းလင်က ပထမဆုံး အောင်ပွဲခံ အော်ဟစ်လိုက်သည်။

"ပြီးတော့ အဲဒါက စိန်နဂါးအရိုးအဖြစ် ပြောင်းလဲသွားပြီ"

"ဟားဟားဟား... မျှော်လင့်ထားတဲ့အတိုင်းပဲ"

"ဒါ... ဒါက မဖြစ်နိုင်တာ..."

နဂါးပြာဧကရာဇ်သည် ဤအရာက အစစ်အမှန် ဖြစ်နေသည်ကို လုံးဝမယုံကြည်နိုင်။ လူသားတစ်ယောက်အနေဖြင့် နဂါးအရိုး ရှိမနေသင့်သော်လည်း သူက အံ့ဖွယ်နည်းလမ်းဖြင့် ဝရဇိန်နဂါးအရိုးကို ပိုင်ဆိုင်ခဲ့သည်။ ခေတ္တမျှကြာပြီးနောက် ဝရဇိန်နဂါးအရိုးက စိန်နဂါးအရိုးအဖြစ် ပြောင်းလဲသွား၏။ ဤအခြေအနေမျိုးတွင် အခြားနဂါးများက ဘယ်လိုလုပ်ပြီး ယှဉ်နိုင်တော့မည်နည်း။ စိန်နဂါးအရိုးဟူသည် ဧကရာဇ်တစ်ပိုင်းအဆင့်ရှိသော အရည်အသွေးမျိုး ဖြစ်ပေသည်။

အောက်ခြေရှိ မိုးပြာနဂါးချိုင့်ဝှမ်းနှင့် ဖေးရှန်ဂိုဏ်းတို့က အလွန်အမင်း စိတ်လှုပ်ရှားစွာဖြင့် ထပ်မံအောင်ပွဲခံလိုက်ကြပြန်သည်။ တစ်ချိန်တည်းမှာပင် ရွှေနဂါးချိုင့်ဝှမ်းနှင့် အခြားသော နဂါးပြာချိုင့်ဝှမ်းမှ လူများမှာမူ ၎င်းက မယုံနိုင်စရာ ကောင်းလွန်းသည်ဟု ခံစားလိုက်ရ၏။ ဤအရာက တကယ်ကို နတ်ဘုရားဆန်လွန်းလှပေသည်။

သူ ဒါကို ဘယ်လိုလုပ်လိုက်တာလဲ...

နဂါးပြာဧကရာဇ် တကယ်ပဲ မှားသွားခဲ့တာ ဖြစ်နိုင်မလား...

အတိတ်ကာလက အပြာရောင်ရေကန်ထဲတွင် အသက်ရှင်နိုင်ခဲ့သူများမှာ နဂါးမျိုးနွယ်စု၏ ဧကရာဇ်တစ်ပိုင်းများသာ ဖြစ်ကြသည်။ ကျန်းချန်သည် နဂါးဘုရင် အဆင့်ဖြင့်သာ ဤအလွှာတွင် အသက်ရှင်နိုင်ခဲ့သဖြင့် သူက နဂါးမျိုးနွယ်စုဝင်ဖြစ်သည်ဟူသောအချက်မှာ ကျောက်ထက်အက္ခရာတင်ထားသကဲ့သို့ ခိုင်မာသွားလေပြီ။ ယခုအချိန်တွင် နဂါးပြာဧကရာဇ်သည် သူ၏ ယုံကြည်ကိုးစားမှုများမှာ အရှိန်အဟုန်ဖြင့် ကျဆင်းသွားသည်ကို သိသာစွာ ခံစားလိုက်ရ၏။

အဘယ်ကြောင့်ဆိုသော် သူ၏ ကိုယ်ပိုင် မိုးပြာနဂါးချိုင့်ဝှမ်းမှ နဂါးများပင်လျှင်... တကယ်တော့ ဧကရာဇ်ကြီးတစ်ပါးလည်း ရံဖန်ရံခါ မှားတတ်သည်ပဲဟု စတင်တွေးတောလာကြသောကြောင့် ဖြစ်သည်။ ၎င်းက သူ၏ မူလအထွတ်အထိပ် အာဏာစက်အပေါ် ပြင်းထန်သော ထိုးနှက်ချက်တစ်ခု ဖြစ်သွား၏။

ဧကရာဇ်ကြီးအနေဖြင့် ဤအရာကို လုံးဝ လက်မခံနိုင်ပေ။

"မင်းက ဒီလိုအရာမျိုးကို ဘယ်လိုမှ မလုပ်နိုင်ပါဘူး"

"ငါ မင်းကို အကဲဖြတ်တာ မမှားနိုင်ဘူး... မင်းက လူသားတစ်ယောက်ပဲ"

အစ်ကိုကြီးချန်သည် သူနှင့် စကားများနေရန် အချိန်မရှိချေ။ အသက်ပြန်ရှင်လာပြီးနောက် သူသည် သူ၏ တုန်လှုပ်ချောက်ချားမှု တန်ဖိုးများကို အရင်ဆုံး စစ်ဆေးလိုက်သည်။ စိမ်းပြာရောင်ရေကန်တွင် အသက်ပြန်ရှင်ခဲ့စဉ်တုန်းက တုန်လှုပ်ချောက်ချားမှု တန်ဖိုးများကို ကံကြမ္မာအမှတ် သန်း ၂၀ နှင့် လဲလှယ်နိုင်ခဲ့သည်။ ဤတစ်ကြိမ်တွင်မူ ၎င်းက သန်း ၃၀ ကျော်အထိ ရှိပေသည်။ အဓိကအားဖြင့် ဤနေရာတွင် အဆင့်မြင့် နဂါးမျိုးနွယ်စုဝင် အမြောက်အမြား ရှိနေကြပြီး သူတို့က သူ့ကို အလွန်အမင်း ထောက်ခံပေးနေကြ၏။ ဤသို့ တွက်ချက်ကြည့်လိုက်မည်ဆိုပါက သေခါနီး နာကျင်မှုများက တန်ဖိုးရှိလှပေသည်။

ထို့နောက် သူက ကောင်းကင်ထက်ရှိ ဧကရာဇ်ကြီးကို လက်ညှိုးထိုးပြကာ ထပ်ပြောလိုက်သည်...

"မင်း ငါ့ကိုပေးရမယ့် လောင်းကြေးတွေကို ပြင်ဆင်ထားဖို့ မမေ့နဲ့ဦး... ငါပြောတာက မိုးပြာနဂါးချိုင့်ဝှမ်းတစ်ခုလုံးရဲ့ အထက်ကနေ အောက်အထိ အကုန်လုံးကိုပြောတာနော်"

အပြာရောင်ရေကန်တွင် အသက်ရှင်နိုင်ခြင်းကပင် လောင်းကြေး၏ စမ်းသပ်ချက်ကို အောင်မြင်ပြီးသားဟု သတ်မှတ်၍ ရနေလေပြီ။

"မင်းက ဂုဏ်သိက္ခာရှိတဲ့ နဂါးဧကရာဇ်တစ်ပါးဖြစ်တာမို့ မင်းရဲ့စကားက တည်ကြည်ပြီး ကတိဖျက်မှာ မဟုတ်ဘူးလို့ ငါယုံကြည်ပါတယ်"

သူ့ဘေးနားရှိ ဆန်းလင်က ခနဲ့တဲ့တဲ့ဖြင့်...

"သူက သေချာပေါက် ကတိဖျက်ဝံ့မှာ မဟုတ်ပါဘူး... မဟုတ်ရင် သူက ဘယ်လိုမျက်နှာမျိုးနဲ့ နဂါးဧကရာဇ် ဆက်လုပ်ရဲတော့မှာလဲ" ဟု ဆိုသည်။

နဂါးပြာဧကရာဇ်သည် အလွန်အမင်း ဒေါသထွက်သွားသဖြင့် သူ၏ နဂါးအသက်ရှူသံများမှာ ပြင်းထန်လာပြီး သဘာဝ ဘေးအန္တရာယ်တစ်ခု ဖြစ်ပေါ်လုနီးပါး ဖြစ်သွား၏။ သို့သော်လည်း သူသည် ကတိဖျက်မည့်အကြောင်းကိုမူ ထုတ်ပြောရန် ခဲယဉ်းနေသည်။

ပိုမိုကောင်းမွန်သော နဂါးအရိုးကို ရရှိရန်အတွက် အစ်ကိုကြီးချန်သည် စိတ်ကိုတင်းထားပြီး နောက်ထပ် အလွှာတစ်ခုဆီသို့ ဆက်လက်လျှောက်လှမ်းရုံမှတစ်ပါး အခြားမရှိတော့ချေ။ လူတိုင်း သတိမပြုမိခင်မှာတင် သူက ခရမ်းရောင်ရေကန်ထဲသို့ ဝင်လိုက်တော့သည်။

ဤလုပ်ရပ်ကြောင့် တစ်ကွင်းလုံးတွင် ထပ်မံ၍ ဆူညံပွက်လောရိုက်သွားပြန်သည်။

"သူက နိုင်သွားပြီ မဟုတ်ဘူးလား"

"သူက ဘာလို့ ရှေ့ဆက်သွားနေသေးတာလဲ"

"နဂါးဘုရင် အဆင့်နဲ့ အပြာရောင် ရေကန်ထဲမှာ အသက်ရှင်နိုင်တာကတင် အံ့ဖွယ်တစ်ခု ဖြစ်နေပြီလေ"

"ခရမ်းရောင် ရေကန်ကတော့ ဧကရာဇ်တစ်ပိုင်း အဆင့်နှောင်းပိုင်းအောက်ကလူတွေအတွက် ဘယ်လိုမှ မဖြစ်နိုင်ဘူး..."

"မှန်တယ်... ပုံစံကိုးမျိုး သွေးမျိုးဆက် ရှိနေရင်တောင် အဲဒီနေရာမှာ အသက်ရှင်ဖို့ မလုံလောက်ဘူး"

"သူက မောက်မာလွန်းနေပြီ"

မိုးပြာနဂါးချိုင့်ဝှမ်းမှ နဂါးများ၏ အောင်ပွဲခံသံများမှာ ရပ်တန့်သွားခဲ့သည်။ ဆန်းကျိကမူ စိုးရိမ်စိတ်များဖြင့် မျက်လုံးများ ပြူးကျယ်နေခဲ့ပြီး ကျန်းချန်ကို အတင်းအဓမ္မ ပြန်ဆွဲထုတ်ချင်စိတ်များပင် ပေါက်နေ၏။ သူက အလွန်အမင်း စိတ်လိုက်မာန်ပါလုပ်လွန်းသည်။ အတိတ်ကာလက နဂါးရေကန်ထဲတွင် သေဆုံးခဲ့ကြသော စစ်မှန်သောနဂါးများသည် မိမိကိုယ်မိမိ အထင်ကြီးလွန်းပြီး မိမိနှင့် မထိုက်တန်သော အဆင့်များကို စိန်ခေါ်ခဲ့ကြသောကြောင့် ကျဆုံးခဲ့ရ၏။ ခေတ္တမျှအတွင်း မိုးပြာနဂါးချိုင့်ဝှမ်းဘက်မှ လူများမှာ စိုးရိမ်ပူပန်မှုများနှင့် မအေးချမ်းနိုင်ဘဲ ရှိနေကြတော့သည်။

ဖေးရှန်ဂိုဏ်းမှ လူများကမူ အားလုံး တည်ငြိမ်လျက် မတုန်မလှုပ်ရှိနေကြဆဲ။