ချီလင်မျိုးနွယ်စု လာရောက်လည်ပတ်ခြင်း

အင်မော်တယ် လက်နက်များကို ဝေငှပေးပြီးနောက် အစ်ကိုကြီးချန်သည် သူအဆင့်ဖြင့် အနားယူရန်လုံးဝမလိုအပ်သော်လည်း ဘိုးဘွားပိုင်နယ်မြေသို့ပြန်ကာ တစ်ရေးတစ်မောအိပ်စက်ရန် စီစဉ်ထားခဲ့သည်။

"ချီလင်မျိုးနွယ်စု ဟုတ်လား"

"ဒီလိုမျိုး မျိုးနွယ်စုက တကယ်ပဲရှိနေတာလား"

သူသည် ချီလင်များနှင့်ပတ်သက်သည့် ဒဏ္ဍာရီများကိုကြားဖူးသော်လည်း ကျင့်ကြံခြင်းလောကတွင် သူကျင်လည်ခဲ့သည့်ကာလတစ်လျှောက်လုံး ချီလင်တစ်ကောင်ကိုမျှ မမြင်ဖူးခဲ့ချေ။ မိုးပြာနဂါးဧကရီ၏ အသံသည် အမှောင်ထုထဲမှ လွင့်မျောလာ၏...

"ရှိတာပေါ့။ ချီလင်တွေက တစ်ချိန်က ငါတို့ နဂါးမျိုးနွယ်စု၊ ဖီးနစ်မျိုးနွယ်စုတို့နဲ့ ရင်ဘောင်တန်းနိုင်ခဲ့တဲ့ ထိပ်တန်းမျိုးနွယ်စုကြီးတစ်ခုပဲ"

အစ်ကိုကြီးချန်သည် ရုတ်တရက်သဘောပေါက်သွားကာ...

"အို... ငါ နားလည်ပြီ၊ နားလည်ပြီ။ ဖီးနစ်မျိုးနွယ်စုက ငှက်တွေကိုအုပ်ချုပ်တယ်၊ နဂါးမျိုးနွယ်စုက ပင်လယ်ထဲက ရေနေမိစ္ဆာတွေကိုအုပ်ချုပ်တယ်၊ ပြီးတော့ ချီလင်တွေက ကုန်းပေါ်ကသားရဲတွေကို စီမံခန့်ခွဲတယ်... ဟုတ်တယ်မလား"

"ဖူး..."

ဆန်းလင်သည် တဟားဟား ရယ်မောလိုက်တော့သည်...

"မင်းလို မိစ္ဆာမျိုးနွယ်စုရဲ့ လူသစ်လေးက... ဘာမှမသိဘဲနဲ့ သိသလိုလိုလာမလုပ်နဲ့။ ငါတို့က ပင်လယ်ထဲက ရေနေမိစ္ဆာတွေကိုအုပ်ချုပ်တယ်လို့ မင်းကိုဘယ်သူပြောလဲ"

လူအများရှေ့တွင် ပေါ်တင်ဆရာကြီးလုပ်ရန် ကြိုးပမ်းမှုမှာ ရှားရှားပါးပါး ကျရှုံးသွားခဲ့သဖြင့် အစ်ကိုကြီးချန်သည် ထူးဆန်းသောအနေရခက်မှုကို ပြေဖျောက်ရန်အတွက် ပခုံးသာတွန့်ပြနိုင်တော့သည်...

"ငါကြားဖူးတဲ့ဒဏ္ဍာရီတွေက အဲဒီလိုပဲ"

"ရွှမ်းမင်က ရေနိယာမတွေကို ထိန်းချုပ်တာ။ အဲဒီတုန်းက သူ့ရဲ့ နဂါးပြာမျိုးနွယ်ခွဲက ပင်လယ်ထဲက ဧရာမမိစ္ဆာအချို့နဲ့ ဆက်ဆံရေးရှိခဲ့ပြီး... သူတို့ထဲက တစ်စိတ်တစ်ပိုင်းကို စေခိုင်းနိုင်ခဲ့တာ အမှန်ပဲ၊ ဒါပေမဲ့ အဲဒါက အတိတ်ကအကြောင်းအရာတွေပါ"

ဆန်းလင်က စိတ်ပျက်လက်ပျက်ဖြင့် ပြောလိုက်သည်...

"ငါတို့ မိုးပြာနဂါးမျိုးနွယ်စုကတော့... အချိန်အတော်များများကို ကောင်းကင်ယံမှာပဲ ကုန်ဆုံးခဲ့ကြတာ။ ငါဆိုရင် မြေပြင်ကို ခြေဖဝါးနဲ့လုံးဝမထိဘဲ နှစ်ပေါင်းတစ်သန်းလောက်ဆက်တိုက် ကောင်းကင်မှာပျံသန်းဖူးတဲ့ အတွေ့အကြုံတောင်ရှိတယ်။ အဲဒီလိုအခြေအနေမှာ... ငါတို့က ရေနေမိစ္ဆာတွေကို ဘယ်လိုလုပ်ပြီး စီမံခန့်ခွဲနိုင်မှာလဲ"

အစ်ကိုကြီးချန် ဆွံ့အသွားသည်...

"နှစ်ပေါင်းတစ်သန်းလောက် ဆက်တိုက်ပျံသန်းတာ... မမောဘူးလား"

သူသည် ထိုမြင်ကွင်းကို စိတ်ကူးကြည့်ရန်ပင် အနည်းငယ်ခက်ခဲနေခဲ့သည်။

"မမောပါဘူး... တော်တော်လေး ပျင်းစရာကောင်းတာကလွဲရင်ပေါ့"

"ဒါဆိုရင်... မင်းက ဘာကိုလိုချင်လို့ အဲဒီလိုလုပ်ခဲ့တာလဲ"

"အဲဒါက... အဓိက အချက်လား"

ဆန်းလင်၏လေသံက ရုတ်တရက် ရိုင်းစိုင်းခက်ထန်သွားတော့သည်။

"ငါတို့ အခု ချီလင်မျိုးနွယ်စုအကြောင်း ပြောနေတာ... စကားလမ်းကြောင်း လာမလွှဲနဲ့"

"ဟုတ်ကဲ့ပါ... ဟုတ်ကဲ့ပါ..."

အစ်ကိုကြီးချန်သည် သူမအနေဖြင့် ထိုစဉ်က အထာကျကျ ပေါ်လွင်စေရန်အတွက်သာ ထိုသို့ လုပ်ဆောင်ခဲ့ခြင်း ဖြစ်နိုင်သည်ဟု ရင်ထဲတွင် တိတ်တဆိတ် တွေးဆလိုက်မိသည်။

ဆန်းလင်က ဆက်ပြောသည်...

"ကုန်းပေါ်ကသားရဲတွေနဲ့ ပတ်သက်ရင်တော့..."

"မိစ္ဆာဧကရာဇ်ရှိတာ ချီလင်မျိုးနွယ်စုတစ်ခုတည်း မဟုတ်ဘူး"

"ဒါပေမဲ့... သူတို့မျိုးနွယ်စုရဲ့ မိစ္ဆာဧကရာဇ်နှစ်ပါးကလည်း အင်မော်တယ်လောက စတင်ကတည်းက မွေးဖွားလာခဲ့ကြတာဖြစ်ပြီး... ရှေးဟောင်းခေတ်ကနေ အခုအချိန်အထိ အသက်ရှင်နေကြတုန်းပဲ"

"ဒါတင်မကသေးဘူး... အင်မော်တယ်လောကနဲ့ နတ်ဆိုးလောက စစ်ပွဲအတွင်းမှာ ချီလင်မျိုးနွယ်စုက ဘာထိခိုက်ဒဏ်ရာမှမရဘဲ နဂိုအတိုင်းကျန်ရစ်ခဲ့တယ်။ အခုအချိန်အထိ... သူတို့ဆီမှာ ဧကရာဇ်တစ်ပိုင်း ၇၀ ကျော် ရှိနေသေးတယ်"

အစ်ကိုကြီးချန် အံ့အားသင့်သွားသည်...

"သူတို့က ဘယ်လိုလုပ်ပြီး လွတ်မြောက်သွားတာလဲ။ အင်မော်တယ်သူတွေနဲ့ မိစ္ဆာတွေက... နတ်ဆိုးလောကကို စစ်ကြေညာပြီး ပုန်ကန်ထကြွတုန်းက သူတို့ကိုပစ်မှတ်မထားကြဘူးလား"

"တကယ်ကို ပစ်မှတ်မထားခဲ့ကြတာ"

"ဘာလို့လဲ"

"ချီလင်မျိုးနွယ်စုရဲ့ အဲဒီ မဟာဧကရာဇ်နှစ်ပါးက... ကံတရားနဲ့ ကပ်ဘေး နိယာမတွေကို အသီးသီးထိန်းချုပ်ထားကြတာ။ ဒါကြောင့် သူတို့က အခြေအနေကို သုံးသပ်အကဲဖြတ်တဲ့နေရာမှာ တော်တော်လေး ကျွမ်းကျင်ကြတယ်"

ဤနေရာသို့ ရောက်သောအခါ ဆန်းလင်၏လေသံက အနည်းငယ် လှောင်ပြောင်သရော်လိုသောပုံစံ ဖြစ်သွားသည်။

"သူတို့က လူသားတွေနဲ့ အစောကြီးကတည်းက ချစ်ကြည်ရင်းနှီးတဲ့ ဆက်ဆံရေးကို တည်ဆောက်ခဲ့ကြပြီးတော့ အင်မော်တယ်လောကနဲ့ နတ်ဆိုးလောက စစ်ပွဲအတွင်းမှာလည်း ကြားနေအဖြစ်ပဲ နေခဲ့ကြတယ်။ စစ်ပွဲပြီးသွားတဲ့အခါ လူသားတွေအတွက် စီးနင်းစရာ သားရဲတွေအဖြစ် အသုံးတော်ခံဖို့ မိစ္ဆာဘုရင် အနည်းငယ်ကိုတောင် စေလွှတ်ပေးခဲ့သေးတယ်။ ဒါကြောင့် သူတို့က တော်တော်လေး ကောင်းကောင်းမွန်မွန် ရှင်သန်နေကြတာ"

"သူတို့နဲ့ယှဉ်ရင်တော့ ရွှမ်းမင်ကို တိုက်ခိုက်ရေးသမားတစ်ယောက်လို့ သတ်မှတ်နိုင်တယ်။ သူက နောက်ဆုတ်ပြီး ပုန်းကွယ်ဖို့ အကြံပြုခဲ့ပေမယ့်... နဂါးချိုင့်ဝှမ်းကို အင်မော်တယ်တွေနဲ့ မိစ္ဆာတွေ ကျူးကျော်ဝင်ရောက်လာတာကို ခုခံဖို့အတွက် ခက်ခဲတဲ့တိုက်ပွဲကြီးပေါင်းများစွာကို ဆင်နွှဲခဲ့သေးတယ်"

"ဒါဆို... သူတို့က သစ္စာဖောက်တွေပေါ့"

အစ်ကိုကြီးချန်က နှုတ်ခမ်းမဲ့လိုက်သည်...

"ဒါဆိုရင်... သူတို့က မိစ္ဆာမျိုးနွယ်စုရဲ့ ရှင်းလင်းသုတ်သင်ခြင်းကို မခံရဘူးလား"

"မခံရဘူး။ သူတို့ရဲ့အင်အားက အကောင်းဆုံးအခြေအနေမှာ ရှိနေတာ... ပြီးတော့ မိစ္ဆာမျိုးနွယ်စုအချင်းချင်းသာ ပြည်တွင်းစစ်ထပ်ဖြစ်မယ်ဆိုရင် သူတို့ တကယ်ပဲ မျိုးတုံးသွားနိုင်လို့ပဲ"

"အခုအချိန်မှာတော့... သူတို့က နတ်ဆိုးလောကမှာ တော်တော်လေး အောင်မြင်နေကြပြီး ပြောရေးဆိုခွင့်အာဏာလည်း အများကြီးရှိတယ်"

ဤသင်ခန်းစာလေးကို ကြားနာပြီးနောက် အစ်ကိုကြီးချန်သည် ချီလင်မျိုးနွယ်စုနှင့် ပတ်သက်၍ အကြမ်းဖျင်းအားဖြင့် နားလည်သဘောပေါက်သွားသည်။ ထိုအချိန်တွင် သူသည် ဧည့်ခံခန်းမဆောင်သို့ ရောက်ရှိလာ၏။

"မဟာဧကရာဇ် ရောက်ရှိလာပါပြီ"

"မဟာဧကရာဇ်ကို ကြိုဆိုပါတယ်"

ဆန်းကျိနှင့် ဆန်းချုံးတို့၏ ဦးဆောင်မှုအောက်တွင် မိုးပြာနဂါးမျိုးနွယ်စု၏ အမျိုးမျိုးသော နဂါးဘုရင်များသည် လေထဲတွင် ဘယ်ညာနှစ်ဖက်တန်းစီလျှက် ခေါင်းညွှတ်ကာ အရိုအသေပြု နှုတ်ဆက်လိုက်ကြ၏။ ထိုမြင်ကွင်းက တော်တော်လေး ခမ်းနားထည်ဝါလှသဖြင့် မိုးပြာနဂါးဧကရာဇ်ဖြစ်သူ သူ့အတွက် မျက်နှာပန်းလှစေခဲ့သည်။ အစ်ကိုကြီးချန်သည် သူတို့၏ အလိုက်သိတတ်မှုကို စိတ်ထဲမှ တိတ်တဆိတ် ချီးကျူးလိုက်မိသည်။

ထို့နောက်တွင် သူသည် ချီလင်မျိုးနွယ်စုမှ ရောက်ရှိလာသော ဧည့်သည်များကို မြင်တွေ့လိုက်ရ၏။ စုစုပေါင်း ဧကရာဇ်တစ်ပိုင်းနှစ်ပါးနှင့် အင်မော်တယ်ဘုရင်လေးပါး ဖြစ်သည်။ သူ့ကိုအံ့အားသင့်စေသည်မှာ ၎င်းတို့ထဲတွင် လူသားမျိုးနွယ်စုမှ အင်မော်တယ်ဘုရင်နှစ်ပါး အမှန်တကယ်ပါဝင်နေခြင်းဖြစ်၏။

ဦးဆောင်လာသော ချီလင်မျိုးနွယ်စုမှ ဧကရာဇ်တစ်ပိုင်းသည် သူ့ကို အထက်အောက် အကဲခတ် ကြည့်ရှုလိုက်ပြီးနောက် အေးစက်တည်ငြိမ်စွာဖြင့် ပြောလိုက်သည်...

"မင်းက အသစ်ခန့်အပ်ခံရတဲ့ မိုးပြာနဂါးဧကရာဇ်လား"

"ငါပဲလေ... ဘာကိစ္စရှိလို့လဲ"

ချီလင်မျိုးနွယ်စု၏ လုပ်ရပ်များကို ကြားသိရပြီးနောက် အစ်ကိုကြီးချန်သည် ဤမျိုးနွယ်စုအပေါ် ကောင်းမွန်သောအထင်အမြင် မရှိတော့ချေ။

ထိုဧကရာဇ်တစ်ပိုင်းက အမှတ်ပေးနေသော ဒိုင်လူကြီးတစ်ဦးကဲ့သို့လေသံဖြင့် အေးအေးလူလူ ပြောလိုက်သည်...

"မင်းတို့ မိုးပြာနဂါးမျိုးနွယ်စုကတော့ အချိန်တွေကြာလာတာနဲ့အမျှ တကယ်ကိုဆုတ်ယုတ်လာတာပဲ... နောက်ဆုံးတော့ နဂါးဘုရင်တစ်ကောင်ကိုပဲ မဟာဧကရာဇ်အဖြစ် ရွေးချယ်လိုက်ရတယ်ပေါ့"

"ပုံစံကိုးမျိုးရှိတဲ့ မိုးပြာနဂါးတစ်ကောင် ဖြစ်နေရင်တောင်မှ ဒီအင်အားက တော်တော်လေး နိမ့်ကျလွန်းနေတာ မဟုတ်ဘူးလား"

ဆန်းကျိ၏မျက်နှာက ချက်ချင်းပင် မည်းမှောင်သွားတော့သည်။

"ချီမုန်း... ငါတို့မျိုးနွယ်စုရဲ့ မဟာဧကရာဇ်က မကြာသေးခင်ကမှ နဂါးတံဆိပ်ခတ်နှိပ်ခြင်းရေကန်ရဲ့ စမ်းသပ်မှုကိုအောင်မြင်ခဲ့တာ။ အပြောအဆိုဆင်ခြင်ပြီး ရိုသေစမ်း"

"ဆန်းကျိ... မင်း လက်ရှိ မိုးပြာနဂါးချိုင့်ဝှမ်းရဲ့ အခြေအနေကို သေချာသဘောပေါက်ထားရင် ပိုကောင်းမယ်"

ဧကရာဇ်တစ်ပိုင်း ချီမုန်းက မာန်တက်သောအသံဖြင့် ပြောလိုက်သည်...

"ငါတို့ ချီလင်မျိုးနွယ်စုရဲ့ ကြားဝင်စေ့စပ်ပေးမှုသာမရှိရင် မင်းတို့ရဲ့ မိုးပြာနဂါးချိုင့်ဝှမ်းက အင်မော်တယ်လောကနဲ့ နတ်ဆိုးလောကရဲ့ သိမ်းပိုက်ခြင်းကိုခံရတာကြာလှပြီ"

"နဂါးတံဆိပ်ခတ်နှိပ်ခြင်းရေကန်နဲ့ ပတ်သက်ရင်တော့ ငါတို့ကိုယ်တိုင်လည်း မစမ်းသပ်ဖူးဘူးဆိုတော့၊ မင်းတို့နဲ့ မိုးပြာနဂါးဧကရာဇ် ပူးပေါင်းပြီး ဇာတ်လမ်းဆင်ခဲ့တာလားဆိုတာ ဘယ်သူသိနိုင်မှာလဲ"

"တော်စမ်း... တော်စမ်း"

အစ်ကိုကြီးချန်သည် သိပ်စိတ်မရှည်တော့။ ဤကောင်က ဘယ်ကနေ ဘယ်လို ဘဝင်မြင့်နေရတာလဲ။

"ပြောစရာရှိတာကိုပြော... မရှိရင်လည်းလစ်တော့။ ငါအလုပ်များတယ်"

"မင်း"

"မင်းက ဧကရာဇ်တစ်ပါးဖြစ်ပြီး... ဒီလောက်အထိ ရိုင်းစိုင်းတဲ့စကားလုံးတွေကို ပြောထွက်တယ်ပေါ့"

သူသည် အစ်ကိုကြီးချန်ကို အထင်မကြီးသလို ပြောဆိုခဲ့သော်လည်း... ချီမုန်းသည် တစ်ဖက်လူက မျိုးနွယ်စုတစ်ခု၏ ဧကရာဇ်ဖြစ်မှန်း သိရှိပေသည်။ ထို့ကြောင့် သူက ဤမျှအထိ ပွင့်လင်းစွာ ပြောဆိုလာလိမ့်မည်ဟု လုံးဝထင်မထားခဲ့မိချေ။

အစ်ကိုကြီးချန်က နှုတ်ခမ်းမဲ့လိုက်သည်...

"ချီလင်မျိုးနွယ်စုရဲ့ အောက်ခြေလူတန်းစားတစ်ယောက်ဖြစ်တဲ့ မင်းအနေနဲ့ ငါလိုဧကရာဇ်တစ်ပါးကို အဆင့်ကျော်ပြီး တိုက်ရိုက်စကားပြောခွင့်ရနေတာကိုပဲ ဂုဏ်ယူသင့်နေပြီမဟုတ်ဘူးလား"

"ကျေးဇူးကန်းလိုက်တာ"

ဟားဟား...

အရိပ်ထဲတွင်ရှိသော မိုးပြာနဂါးဧကရီမှာ တဟားဟား အော်ရယ်မိတော့သည်။

ချီမုန်းမှာမူ ဒေါသကြောင့် ရူးသွပ်လုမတတ်ဖြစ်သွားရပြီး အတော်ကြာမှသာ စိတ်ပြန်ထိန်းနိုင်တော့သည်။

"မင်း နောင်တရစေရမယ်"

"ငါ ဒီနေ့ ဒီကိုလာတာက... မင်းတို့ရဲ့ မိုးပြာနဂါးချိုင့်ဝှမ်းထဲမှာ ပုန်းကွယ်နေတဲ့ လူသားတွေကို စုံစမ်းစစ်ဆေးဖို့ပဲ"

"ဘာကို ဆိုလိုတာလဲ"

အစ်ကိုကြီးချန် အနည်းငယ်နားမလည်နိုင်အောင် ဖြစ်သွားသည်။

မင်းရဲ့ နောက်ကွယ်မှာလည်း လူသားမျိုးနွယ်စုက အင်မော်တယ်ဘုရင်နှစ်ပါး ကပ်ပါလာတာပဲဟာ... ပြီးတော့ ဘယ်တုန်းကတည်းက မိုးပြာနဂါးချိုင့်ဝှမ်းကို စုံစမ်းစစ်ဆေးဖို့ မင်းတို့အလှည့် ရောက်သွားရတာလဲ...

"မင်းမှာ အဲဒီလိုလုပ်ပိုင်ခွင့်အာဏာ ရှိလို့လား"

"ငါက မိစ္ဆာနန်းတော်တစ်သောင်းရဲ့ ကိုယ်စားလှယ်အဖြစ်လာတာ"

"မိစ္ဆာနန်းတော်တစ်သောင်းက ဘာကြီးလဲ"

ချီမုန်းလည်း ဆွံ့အသွားကာ ဤစကားဝိုင်းကို ဆက်လက်ပြောဆိုရန် အလွန်ခက်ခဲနေသည်ဟု ခံစားလိုက်ရသည်။

"မင်းက မိုးပြာနဂါးဧကရာဇ်ဖြစ်ပြီးတော့ မိစ္ဆာနန်းတော်တစ်သောင်းအကြောင်းကိုတောင် မကြားဖူးဘူးလား"

သူ့ဘေးနားရှိ ဆန်းကျိနှင့် ယီခုန်းတို့သည် သူတို့၏နဖူးကို ရိုက်လိုက်မိကြသည်။ မဟာဧကရာဇ် ပြန်ရောက်လာသည်မှာ မကြာသေးသဖြင့် နတ်ဆိုးလောက၏ အခြေအနေကို လုံးဝနားမလည်သေးမှန်း သူတို့မေ့သွားခဲ့ကြခြင်းဖြစ်၏။

သူတို့က အလျင်အမြန်ပင် ရှင်းပြလိုက်ကြသည်...

"ဧကရာဇ်ကို တင်ပြပါရစေ... မိစ္ဆာနန်းတော်တစ်သောင်းဆိုတာက အင်မော်တယ်လောကနဲ့ နတ်ဆိုးလောကကို ပူးပေါင်းခုခံဖို့အတွက် မိစ္ဆာလောကရဲ့ အမျိုးမျိုးသော မျိုးနွယ်စုတွေ စုပေါင်းတည်ထောင်ထားတဲ့ မဟာမိတ်အဖွဲ့ကြီးဖြစ်ပါတယ်"

"ကျွန်တော်တို့ မိုးပြာနဂါးမျိုးနွယ်စုကလည်း အဲဒီအဖွဲ့ရဲ့အဖွဲ့ဝင် ဖြစ်ပါတယ်"

"ပုံမှန်အားဖြင့်တော့ မျိုးနွယ်စုတစ်ခုချင်းစီက သူ့ဘာသာသူ လွတ်လပ်စွာလှုပ်ရှားကြပေမယ့်... စစ်ဖြစ်ပွားချိန်မှာတော့ မိစ္ဆာနန်းတော်တစ်သောင်းရဲ့ တစ်စုတစ်စည်းတည်းစေခိုင်းမှုကို နာခံကြရပါတယ်"

ဤမဟာမိတ်အဖွဲ့သည် အင်မော်တယ်လောကဘက်မှ အင်မော်တယ်မဟာမိတ်အဖွဲ့နှင့် ဆင်တူပေသည်။

ဪ... အဲဒီလိုကိုး...

အစ်ကိုကြီးချန် ဆွံ့အသွားသည်...

၎င်းက အင်မော်တယ်လောကနှင့် နတ်ဆိုးလောကကို ခုခံရန်အတွက်ဆိုလျှင် ထိုစဉ်က စစ်ပွဲတွင် ပါဝင်တိုက်ခိုက်ခြင်းမရှိခဲ့သော ဤချီလင်မျိုးနွယ်စုသည် မိစ္ဆာနန်းတော်တစ်သောင်းထဲသို့ မည်သို့မည်ပုံ ဝင်ရောက်၍ စီမံခန့်ခွဲခွင့်ရရှိနေသနည်း။

"အခုတော့ မင်းသိပြီမလား"

ချီမုန်းသည် သူ၏ လည်ပင်းတွင် ဆင်မြန်းထားသော ပတ္တမြားပုတီးကြိုးကို ပေါ်လွင်စေရန်အတွက် သူ၏ခေါင်းကို မော့လိုက်သည်။

"မိစ္ဆာနန်းတော်တစ်သောင်းက မကြာသေးခင်ကမှ မင်းတို့ရဲ့ မိုးပြာနဂါးချိုင့်ဝှမ်းထဲကို လူသားကျင့်ကြံသူ အမြောက်အမြား ပြောင်းရွှေ့အခြေချလာတာကို သိရှိသွားတယ်။ ဒါကြောင့် ငါတို့က မကြာသေးခင်ကဖြစ်ပွားခဲ့တဲ့ ကမ္ဘာပျက်မတတ်အဖြစ်အပျက်ကြီးနဲ့ ဆက်စပ်မှုရှိနေတယ်လို့ သံသယဝင်မိတယ်"

အစ်ကိုကြီးချန်မှာမူ သူ့စကားကြောင့် ရယ်ချင်စိတ်ကို အောင့်ထားရသည်...

"မိစ္ဆာနန်းတော်တစ်သောင်းက အမှုတွေကို လိုက်ပြီးစုံစမ်းစစ်ဆေးတဲ့တာဝန်ကိုပါ ယူထားတာလား။ ဒါနဲ့... ဘာ ကမ္ဘာပျက်မတတ် အဖြစ်အပျက်ကြီးလဲ"

"ဝူကျီဂူဗိမာန် ပျက်စီးသွားတဲ့ကိစ္စပဲ"

လူသားမျိုးနွယ်စုမှ အင်မော်တယ်ဘုရင်နှစ်ပါးသည် လူစုထဲမှ ရှေ့တက်လာခဲ့သည်။

သူတို့က အေးစက်စွာဖြင့်ပြောလိုက်၏...

"မကြာသေးခင်က... အင်မော်တယ်လောကထဲက ဝူကျီဂူဗိမာန်ဟာ လူဆိုးတစ်စုရဲ့ ရက်ရက်စက်စက် တိုက်ခိုက်ခြင်းကို ခံခဲ့ရတယ်။ ဂိုဏ်းချုပ်ဖြစ်သူ ဧကရာဇ်တစ်ပိုင်းဟန်ယွီ အပါအဝင်... ဧကရာဇ်တစ်ပိုင်း ငါးပါး၊ အင်မော်တယ် ဘုရင် ၂၀၅ ပါးနဲ့ အင်မော်တယ် အရှင်သခင် တစ်သိန်းတစ်သောင်းငါးထောင် ရက်ရက်စက်စက် သတ်ဖြတ်ခံခဲ့ရတယ်"

"ဝူကျီဂူဗိမာန်ရဲ့ ဂိုဏ်းတံခါးတစ်ခုလုံး လုံးဝပျက်စီးသွားခဲ့ရပြီး... သူတို့ရဲ့ အမွေအနှစ်လည်း ပြတ်တောက်လုနီးပါး ဖြစ်သွားခဲ့ရပြီ"

"ဒီကိစ္စကြောင့်... အင်မော်တယ်ဧကရာဇ်လေကျိ ဒေါသအမျက်ချောင်းချောင်း ထွက်နေတယ်... ခရမ်းရောင်လျှပ်စီး အင်မော်တယ်ဧကရာဇ်လည်း ဒေါသထွက်နေတယ်... အင်မော်တယ်ဧကရာဇ် ချန်ယွမ်လည်း ဒေါသထွက်နေတယ်"

"ချန်မင်း ခန်းမဆောင်ကြီးလည်း ဒေါသထွက်နေတယ်... ပိလော့ နှလုံးသားနန်းတော်လည်း ဒေါသထွက်နေတယ်... ကောင်းကင်ဓားနန်းတော်လည်း ဒေါသထွက်နေတယ်"

"အင်မော်တယ်လောကတစ်ခုလုံး ဆူပူလှုပ်ရှားနေပြီး အဲဒီ လူဆိုးတစ်စုကို ဖမ်းဆီးဖို့အတွက် ကြွေးကြော်နေကြပြီ"

"ငါတို့ နှစ်ယောက်ကတော့ မိစ္ဆာနန်းတော်တစ်သောင်း၊ မိစ္ဆာလောကတို့နဲ့ ဆွေးနွေးညှိနှိုင်းဖို့အတွက် အင်မော်တယ်မဟာမိတ်အဖွဲ့ရဲ့ ကိုယ်စားလှယ်တွေအဖြစ်လာခဲ့တာ"