အခန်း ၂၃၂

232

ကျိုရှို့၏ စိတ်ကူးမှာ ရုတ်တရက် ပေါက်ထွက်လာသော အကြံတစ်ခုမဟုတ်ဘဲ သေချာစွာ စဉ်းစားချင့်ချိန်ပြီးမှ ထွက်ပေါ်လာခြင်းဖြစ်သည်။ ကျိုရှို့သည် ယခင်က ကုမ္ပဏီတစ်ခုတွင် အလုပ်လုပ်ဖူးသဖြင့် ထုတ်ကုန်တစ်ခုအတွက် မူပိုင်ခွင့် မည်မျှအရေးကြီးကြောင်း နက်နက်ရှိုင်းရှိုင်း နားလည်ထား၏။ ထုတ်ကုန်ဖော်မြူလာတစ်ခု အနည်းငယ်အ‌ခြေကျလာသည်နှင့် ကုမ္ပဏီများသည် သူတို့၏ အကျိုးစီးပွားကို ကာကွယ်ရန်အတွက် ချက်ချင်းပင် မူပိုင်ခွင့် လျှောက်ထားလေ့ရှိကြသည်။ မူပိုင်ခွင့်ရှိခြင်းမှာ အခြားပြိုင်ဘက်ကုမ္ပဏီများ၏ ပုံတူကူးချမှုကို တားဆီးနိုင်ရုံသာမက ကုမ္ပဏီ၏ ဂုဏ်သိက္ခာကို မြင့်တက်စေပြီး ထုတ်ကုန်၏ စျေးကွက်ယှဉ်ပြိုင်နိုင်စွမ်းကိုလည်း အားကောင်းစေသည်။

"တကယ်လို့ ထုတ်ကုန်ရဲ့ ကြော်ငြာစာသားထဲမှာ နိုင်ငံတော်အဆင့် မူပိုင်ခွင့်တွေ အများကြီး ရထားတယ်လို့ ထည့်ရေးထားရင် အဲဒါက ပိုပြီးတော့ ယုံကြည်စိတ်ချရတယ်လို့ အထင်ခံရမှာ အသေအချာပဲ"

ဘေးနားမှ လီရှီးမှာလည်း ခေါင်းကို ညိတ်လိုက်သည်။ သူသည် ကျိုရှို့၏ အကြံပြုချက်ကို အပြည့်အဝ ထောက်ခံနေမိ၏။ သူတို့ အမြဲတမ်းဝန်ထမ်း ဖြစ်လာပြီးနောက် ရရှိသည့် လစာမှာ ယွမ် ခုနစ်ထောင်၊ ရှစ်ထောင် ခန့်သာ ရှိသော်လည်း သူတို့၏ ဓာတ်ခွဲခန်းမှာ လုပ်ငန်းစွမ်းဆောင်ရည် ဆုကြေးငွေများ ခွဲဝေပေးလေ့ရှိသည်။ တည်းခိုခန်း၏ အခြားဌာနများမှာ ဧည့်သည်များ၏ ပြန်လည်သုံးသပ်ချက် အပေါ်မူတည်၍ ဆုကြေးငွေ သတ်မှတ်သော်လည်း၊ သူတို့ ဓာတ်ခွဲခန်းမှာမူ ဧည့်သည်များနှင့် တိုက်ရိုက်မထိတွေ့ရသဖြင့် ထုတ်ကုန်ရောင်းအားမှာ ဧည့်သည်များ၏ ကျေနပ်မှုကို ဖော်ပြသည့် အကောင်းဆုံးညွှန်ပြချက် ဖြစ်နေသည်။ သူတို့၏ ဆုကြေးငွေများမှာ ဓာတ်ခွဲခန်း၏ ရောင်းအားနှင့် ဓာတ်ခွဲခန်းမှ ပေးစွမ်းနိုင်သော အကျိုးအမြတ်များအပေါ် တိုက်ရိုက် မူတည်နေ၏။ အားလပ်ချိန်များတွင် လီရှီး အနှစ်သက်ဆုံးအလုပ်မှာ တည်းခိုခန်း၏ အွန်လိုင်းစတိုးမှ ရောင်းအားများကို စစ်ဆေးခြင်းပင် ဖြစ်သည်။ လီရှီးသည် ဝက်ဘ်ဆိုက်မှ အချက်အလက်များကို အလိုအလျောက် စုဆောင်းသည့်စနစ်ကိုပင် အသုံးပြု၍ ရှေးဟောင်းနည်းသုံး အသားဖြူဆေးဖက်ဝင်ဆပ်ပြာနှင့် အသားဖြူရေချိုးရည်တို့၏ နေ့စဉ်ရောင်းအားများကို မှတ်တမ်းတင်ထားသည်။ ရောင်းအားများ တဖြည်းဖြည်း တက်လာသည်ကို ကြည့်ရင်း သူသည် အလုပ်လုပ်ရန် ပို၍ပင် အားအင်ရှိလာတော့၏။

ထုတ်ကုန်တစ်ခု ပိုရောင်းရလေ သူ၏ နှစ်ကုန်ဆုကြေးငွေမှာ အနည်းငယ်ပိုများလာလေ ဖြစ်ရာ ၎င်းမှာ အမှန်တကယ်ပင် ကြည်နူးစရာကောင်းသော ခံစားချက်မျိုးဖြစ်သည်။ ရံဖန်ရံခါတွင် လီရှီးသည် Douyin ၊ Weibo နှင့် 'စာအုပ်စိမ်းလေး' တို့သို့ ဝင်ရောက်ကာ လူများမှာ ဤထုတ်ကုန်များအကြောင်း မည်သို့ဆွေးနွေးနေကြသည်ကို ကြည့်လေ့ရှိ၏။ အထူးသဖြင့် နေထိုင်မှုပုံစံများ မျှဝေသည့် အက်ပ်ဖြစ်သော 'စာအုပ်စိမ်း‌လေး' တွင်လူအများအပြားမှာ ရှေးဟောင်းနည်းသုံး အသားဖြူဆပ်ပြာ၏ အာနိသင်များကို တုံ့ပြန်ပြောဆိုလေ့ရှိကြသည်။ လီရှီးသည် ထုတ်ကုန်အပေါ် လူများ၏ တုံ့ပြန်မှုကို သိရှိနိုင်ရန် Fan groups အချို့သို့ပင် ဝင်ရောက်ထားသေး၏။

ရှေးဟောင်းနည်းသုံး အသားဖြူဆပ်ပြာမှာ ယခင်က ဝူကျန်းကျန်း ပါဝင်ပတ်သက်ခဲ့သော လူထုဝေဖန်မှုမုန်တိုင်းကြောင့် ခေတ္တမျှ ရေပန်းစားခဲ့ဖူးသော်လည်း ထိုအချိန်တွင် ယွမ်ဒန်းချူးတစ်ဦးတည်းသာ ထုတ်လုပ်နေခြင်းဖြစ်သည်။ လူအများအပြားမှာ ထိုဆပ်ပြာကို လက်လှမ်းမမီနိုင်ခဲ့ကြဘဲ မုန်တိုင်းငြိမ်သက်သွားသည်နှင့်အမျှ ထုတ်ကုန်ကို ဝယ်ယူလိုသည့် ပြင်းပြသော ဆန္ဒများလည်း အေးစက်သွားခဲ့၏။ ယခုအခါ ဟဲယဲ့တည်းခိုခန်းမှ ထုတ်ကုန်များ၏ နေ့စဉ်ရောင်းအားပမာဏကို များစွာ မြှင့်တင်ပေးထားပြီဖြစ်ရာ ထုတ်ကုန်နှစ်ခုမှာ လူတစ်ဦးမှတစ်ဦးသို့ ပြောကြားသော ကောင်းသတင်း များမှတစ်ဆင့် တဖြည်းဖြည်း ပြန်လည်ရေပန်းစားလာနေသည်။ သို့သော်လည်း ဓာတ်ခွဲခန်းမှ နေ့စဉ်ထုတ်လုပ်သော ပစ္စည်းများထဲမှ တည်းခိုခန်းကိုယ်တိုင် အသုံးပြုမည့် ပမာဏကို အရင်နုတ်ယူရသဖြင့် အွန်လိုင်းစတိုးတွင် တင်ရောင်းနိုင်သည့် အရေအတွက်မှာ ကန့်သတ်ချက် ရှိနေဆဲဖြစ်သည်။ ထို့ကြောင့် ရှေးဟောင်းနည်းသုံး အသားဖြူဆပ်ပြာနှင့် ရေချိုးဆပ်ပြာရည်တို့မှာ လက်ရှိတွင် လူနည်းစုသာ ကြိုက်နှစ်သက်ကြသေးသော ပစ္စည်းများအဖြစ် ရှိနေသေး၏။ သို့သော်လည်း ထုတ်ကုန်များ၏ ထိရောက်မှုမှာ ငြင်းပယ်၍မရပေ။ ရွှေစစ်လျှင် အလိုလို အရောင်တောက်လာမည်သာ ဖြစ်သည်။ ဟဲယဲ့တည်းခိုခန်း၏ ထုတ်ကုန်များသည် သူတို့၏ ဂုဏ်သတင်းအပေါ် အခြေခံ၍ နောက်ဆုံးတွင် လူအများ၏ အာရုံစိုက်မှုကို ရရှိလာမည်မှာ သေချာသည်။

အလှကုန်နှင့် အရေပြားထိန်းသိမ်းမှုပစ္စည်းများမှာ အကျိုးအမြတ် အလွန်ကြီးမားလှသည်။ ယွမ် (၃၀၀) တန် တိုနာတစ်ပုလင်းအတွက် ထုပ်ပိုးမှုစရိတ်မှာ (၅) ယွမ်ခန့်သာရှိပြီး၊ ကုန်ကြမ်းစရိတ်မှာလည်း တစ်ကီလိုဂရမ်လျှင် ယွမ် (၁၀၀) ပေးရသည်ဆိုလျှင်ပင် အတော်လေး ရက်ရောလှပြီဟု ဆိုနိုင်သည်။ ထို့ပြင် ထုတ်ကုန်အမျိုးမျိုး၏ ဖော်မြူလာများမှာ အလွန်ဆင်တူကြ၏။ မည်သည့်ထုတ်ကုန်မှာ ရောင်းကောင်းသည်ဖြစ်စေ အခြားကုန်အမှတ်တံဆိပ်များမှာ ၎င်း၏ ဈေးသက်သာသော အစားထိုးပစ္စည်း အသွင်ဖြင့် ချက်ချင်းပင် စျေးကွက်ထဲ‌ရောက်လာတတ်ကြသည်။ ဟဲယဲ့တည်းခိုခန်း၏ ထုတ်ကုန်နှစ်ခုမှာလည်း အနှေးနှင့်အမြန် ပစ်မှတ်ထားခံရပေလိမ့်မည်။

ထို့ကြောင့် လီရှီးသည် ကျိုရှို့၏ အကြံဉာဏ်ကို အပြည့်အဝ ထောက်ခံခြင်းဖြစ်သည်။ သူ၏ ဆုကြေးငွေများကို ကာကွယ်ရန်အတွက် မူပိုင်ခွင့်လျှောက်ထားခြင်းကို သူ အားပေးနေခြင်းဖြစ်၏။

"ကျွန်တော်လည်း အရင်က နိုင်ငံတော်အဆင့် ပညာသင်ဆုရဖို့အတွက် မူပိုင်ခွင့်တစ်ခု လျှောက်ဖူးတယ်၊ လုပ်ငန်းစဉ်တွေကို ရင်းနှီးပြီးသားပါ"

လီရှီး သူ၏ရပ်တည်ချက်ကို ပြသရန် လက်မြှောက်လိုက်သည်။ အရင်က သူလျှောက်ခဲ့သော မူပိုင်ခွင့်မှာ ရိုးရှင်းသော ထုပ်ပိုးမှုဆိုင်ရာ မူပိုင်ခွင့်သာ ဖြစ်သော်လည်း အနည်းဆုံးတော့ သက်ဆိုင်ရာ အတွေ့အကြုံရှိ၏။ သူ အနည်းငယ် ကူညီနိုင်လိမ့်မည်ဟု ခံစားရသည်။ လျိုနနမှာမူ သူမ၏ လုပ်ဖော်ကိုင်ဖက်များမှာ ဘာကြောင့် ရုတ်တရက်ကြီး ဤမျှ ပြိုင်ဆိုင်မှု ပြင်းထန်လာကြသည်ကို နားမလည်နိုင်သော်လည်း မူပိုင်ခွင့်လျှောက်ထားခြင်းမှာ သူမအတွက် ထိခိုက်စရာမရှိပေ။ သူမ တိတ်ဆိတ်စွာ ခေါင်းညိတ်လိုက်သည်။

"ဆရာယွမ် ကျွန်မတို့ အခု ဆံပင်ပေါက်ဆေးအသစ်ရဲ့ အာနိသင်ကို အတည်ပြုရမှာ မဟုတ်လား၊ ဓာတ်ခွဲခန်းက ထုတ်ကုန်အားလုံးအတွက် မူပိုင်ခွင့်တွေကို တစ်ခါတည်း စုပေါင်းပြီး လျှောက်ထားလိုက်လို့ ရတာပဲ"

မကြာသေးမီက အချိန်ပိုင်း ပါရဂူဘွဲ့ တက်ရန်အတွက် ကိုယ်တိုင် လေ့လာပြင်ဆင်နေသော ကျိုရှို့မှာ အနည်းငယ် ရှက်ကိုးရှက်ကန်းဖြင့် ပြောလိုက်သည်။

"ကျွန်မတို့ အားလုံးပေါင်းပြီး စာတမ်းတစ်စောင်လောက်လည်း အတူတူ ရေးကြမလား"

သူမသည် ကျောင်းဆင်းခါစ ကျောင်းသားသစ်မဟုတ်တော့ဘဲ ဘွဲ့ရသည်မှာ နှစ်နှစ်ကျော်ပြီ ဖြစ်သည်။ တက္ကသိုလ်အများစုမှာ အချိန်ပိုင်း ပါရဂူဘွဲ့ သင်တန်းများအတွက် သူတို့၏ ကိုယ်ပိုင်ဆရာများ၊ ဝန်ထမ်းများ သို့မဟုတ် နာမည်ကျော် လူပုဂ္ဂိုလ်များကိုသာ ဦးစားပေးလေ့ရှိ၏။ သူမကဲ့သို့ သာမန်လူတစ်ဦးအဖို့ ကြီးကြပ်သူဆရာကို အထင်ကြီးစေရန် အလွန်ကောင်းမွန်သော ကိုယ်ရေးရာဇဝင် ရှိရန်လိုအပ်သည်။ အကယ်၍ သူမအနေဖြင့် စာတမ်းအချို့ ထုတ်ဝေနိုင်မည်ဆိုပါက ပါရဂူဘွဲ့ လျှောက်ထားရာတွင် များစွာ အထောက်အကူ ဖြစ်ပေလိမ့်မည်။ သူမ၏ ဓာတ်ခွဲခန်းထွက် ကုန်ပစ္စည်းများသည် အဓိကကျသော စာတမ်းအချို့ ထုတ်ဝေရန် လုံလောက်သည်ဟု ကျိုရှို့ ခံစားရ၏။

ယွမ်ဒန်းချူး၏ စိတ်ခံစားချက်မှာ အလွန်ပင် တည်ငြိမ်လှသည်။ သူသည် သူ၏လက်ထောက်များ၏ အကြံဉာဏ်များကို ကန့်ကွက်စရာ မရှိပေ။ စာတမ်းရေးသားခြင်းနှင့် မူပိုင်ခွင့် လျှောက်ထားခြင်းများမှာ သူနှင့် စိမ်းသက်သော အရာများဖြစ်ပြီး သူ ကူညီနိုင်မှုမှာ အလွန်ကန့်သတ်ချက် ရှိသည်။ ၎င်းကို လက်ထောက်များ ကိုယ်တိုင်သာ အပြီးသတ်ရမည်ဖြစ်၏။ သို့သော် သူ၏ လက်ထောက်များမှာ စိန်ခေါ်မှုကို ရင်ဆိုင်လိုစိတ် ရှိသည်ကို မြင်ရသည့်အတွက် သူ ဝမ်းမြောက်မိသည်။ ယွမ်ဒန်းချူး၏ တည်ငြိမ်မှုနှင့် ယုံကြည်မှုတို့မှာ လက်ထောက်များအတွက် များစွာအားတက်စေပြီး သူတို့၏ ယုံကြည်မှုကို မြှင့်တင်ပေးလိုက်သည်။

လီရှီးမှာ မူပိုင်ခွင့်လျှောက်ထားခြင်းကို အဓိက တာဝန်ယူမည်ဟု ကမ်းလှမ်းလိုက်ပြီး၊ ကျိုရှို့မှာ စာတမ်းရေးသားခြင်း တာဝန်ကို ယူလိုက်သည်။ ယွမ်ဒန်းချူး၏ ခွင့်ပြုချက် ရပြီးနောက် လျိုနနသည် ဆံပင်ပေါက်ဆေးကို အိမ်သို့ယူသွားကာ ထုတ်ကုန်ကို သေသေချာချာ စမ်းသပ်ရန်နှင့် စမ်းသပ်ချက် အချက်အလက်များကို အသေးစိတ် မှတ်တမ်းတင်ရန် ဆုံးဖြတ်လိုက်၏။ လျိုနနသည် အလုပ်များနေရင်းနှင့် တစ်ခုခု ထူးဆန်းနေသလို ခံစားနေရသည်။ သူမသည် ဟဲယဲ့တည်းခိုခန်းသို့ အနားယူရန် လာခဲ့သည်မဟုတ်ပါလား။ ဘာကြောင့် ရုတ်တရက်ကြီး အလုပ်လုပ်ချင်စိတ်တွေ ဤမျှ ပြင်းပြနေရတာလဲ။ သို့သော် သူမလက်ထဲရှိ ဆံပင်ပေါက်ဆေးကို ကြည့်ရင်း လျိုနန ပြန်ပြုံးလိုက်မိသည်။ အလုပ်များနေခြင်းမှာလည်း ကောင်းပါ၏။ အလုပ်များနေခြင်းမှာ ကောင်းသောလက္ခဏာပင် ဖြစ်သည်။