အခန်း ၂၀၆

အခန်း (၂၀၆)

ကျွန်မမှာ ကာကွယ်ရမယ့် အရေးကြီးတဲ့သူ ရှိတယ်

အေးစက်တည်ငြိမ်လှသည်ဟု ကျော်ကြားသော တပ်မှူးတစ်ဦးသည် ယခုအခါ အမျိုးသမီးငယ်တစ်ဦးအား ညင်သာစွာ ပြုံးပြနေသည်ကို စောင့်ကြည့်ရင်း ဝူလျန်သည် တုန်လှုပ်ဖွယ်ရာ အဖြစ်အပျက်တစ်ခုကို ကိုယ်တိုင် မြင်တွေ့နေရသကဲ့သို့ ခံစားလိုက်ရလေသည်။

ဝူလျန်အား ယောင်ရန်နှင့် မိတ်ဆက်ပေးပြီးနောက် လုံယုသည် ဝူလျန်ဘက်သို့ လှည့်ကာ မေးလိုက်လေသည်။

"တပ်မှူး ဝူ...၊ ကျွန်တော့်ရဲ့ ချစ်သူကို ဒီနေရာကို ဘာလို့ ဖိတ်ခေါ်ခဲ့တာလဲ...။"

ဤစကားကို ကြားသောအခါ ဝူလျန်၏ မျက်ဝန်းများမှာ အံ့အားသင့်မှုကြောင့် ပြူးကျယ်သွားခဲ့လေသည်။ ခေတ္တ မျှ တိတ်ဆိတ်သွားပြီးနောက် သူသည် သူ၏ အံ့အားသင့်မှုကို ဖုံးကွယ်ရန် ချောင်းဆိုးဟန်ဆောင်လိုက်ရင်း၊

"ဒီညီမလေးက ကျွန်တော့်ရဲ့ လက်အောက်ငယ်သားဆီကို မြေဩဇာအရည် ပံ့ပိုးပေးခဲ့သူလို့ ကြားသိခဲ့ရလို့ပါ...။"

ယောင်ရန်က ခေါင်းငြိမ့်ပြရာ ဝူလျန်က ဆက်၍ မေးမြန်းလိုက်လေသည်။

"ညီမလေး...၊ ဒီမြေဩဇာအရည်ကို ဘယ်နေရာကနေ ရရှိခဲ့လဲဆိုတာ ကျွန်တော့်ကို ပြောပြလို့ ရမလား...။"

ယောင်ရန်သည် သူမ၏ အစီအစဉ်ကို ရေးဆွဲစဉ်ကပင် သေတ္တာတော်မှ ဤကိစ္စကို စုံစမ်းစစ်ဆေးလာပါက အကာအကွယ်ဖြစ်စေရန် သူမ၏ အထောက်အထားကို လျှို့ဝှက်ထားရန် ဆုံးဖြတ်ခဲ့ပြီး ဖြစ်သောကြောင့် တည်ငြိမ်စွာပင် ပြန်လည်ဖြေခဲ့လေ၏။

"တောင်းပန်ပါတယ်...၊ ကျွန်မ ဒီအရင်းအမြစ်ကို ရှင့်ကို မပြောပြနိုင်ပါဘူး...။"

သူမ၏ တုံ့ပြန်မှုကို ကြားရသောအခါ ဝူလျန်သည် စိတ်ပျက်သွားမိလေသည်။

သူသည် လုံယုကို ခဏမျှ လှမ်းကြည့်လိုက်ပြီးနောက် ယောင်ရန်အား ကြည့်ကာ ပြောလိုက်၏။

"အမှန်အတိုင်း ပြောရရင် အထက်လူကြီးတွေက ဤမြေဩဇာအရည်ကို ပိုပြီး လိုချင်နေကြတယ်...။ ကျွန်တော် တို့ ညီမဆီကနေ ပိုပြီး ဝယ်ယူနိုင်မယ့် အခွင့်အရေးများ ရှိမလား...။"

ယောင်ရန်က ခေါင်းငြိမ့်ပြကာ ၊

"ရှင်တို့ လိုချင်ရင် ဒီမြေဩဇာအရည်ကို ကျွန်မ ကူညီပြီး ရရှိအောင် လုပ်ပေးနိုင်ပါတယ်...။ ဒါပေမယ့် ကျွန်မရဲ့ အထောက်အထားကိုတော့ မဖော်ပြချင်ဘူး...။ တကယ်လို့ ရှင်က ဒီကိစ္စမှာ ကျွန်မ ပါဝင်ပတ်သက်နေတာကို လျှို့ဝှက်ပေးနိုင်မယ်ဆိုရင် ပိုပြီး ရရှိအောင် ကျွန်မ ကူညီပေးပါ့မယ်...။"

ဤစကားကို ကြားသောအခါ ဝူလျန်၏ မျက်ဝန်းများမှာ လှုပ်ခတ်သွားခဲ့၏။

လူအများစုသည် ဤမြေဩဇာအရည်ကဲ့သို့ အရေးကြီးလှသောအရာကို ထိန်းချုပ်ကာ မိမိတို့၏ အင်အားကို တည်ဆောက်ရန် မျှော်လင့်ကြပေလိမ့်မည်။ သူမသည် ဤကိစ္စတွင် ပါဝင်ပတ်သက်မှုကို လျှို့ဝှက်ထားလိုသဖြင့် ဤမြေဩဇာအရည်၏ အရင်းအမြစ်မှာ မှောင်ခိုကုန်သည်များနှင့် ဆက်စပ်နေနိုင်သည်ဟု ဝူလျန်က သံသယ ဝင်မိလေသည်။

သူသည် ခဏမျှ စဉ်းစားပြီးနောက် ပြောလိုက်လေ၏။

"ကောင်းပါပြီ...၊ ကျွန်တော် ညီမရဲ့ ပါဝင်ပတ်သက်မှုကို လျှို့ဝှက်ပေးထားပါ့မယ်...။"

ယောင်ရန်က ကျေနပ်စွာ ခေါင်းငြိမ့်ပြရင်း မေးလိုက်သည်။

"ရှင်တို့ ဘယ်လောက်အထိ လိုအပ်လဲ...။"

ဝူလျန်က ပြန်လည်ဖြေကြားခဲ့၏။

"ညီမ ပံ့ပိုးပေးနိုင်သလောက်ပါပဲ...။"

ဝူလျန်၏ အဖြေကို ကြားသောအခါ ယောင်ရန်သည် မျက်ခုံးကို အနည်းငယ် ပင့်လိုက်ရင်း မေးလိုက်သည်။

"ဒါဆိုရင် ပေးချေမှုအနေနဲ့ ကျွန်မကို ဘာပြန်ပေးနိုင်မလဲ...။"

သူမ ဤသို့ မေးလိုက်သောအခါ ဝူလျန်သည် တိုက်ရိုက်ပြန်မဖြေခဲ့ချေ။ သူသည် ခဏမျှ စဉ်းစားကာ ပြန်မေး လိုက်လေ၏။

"ညီမ ဘာကို လိုချင်လို့လဲ...။"

ယောင်ရန်သည် အမှန်တကယ်တွင် မည်သည့်အရာကိုမျှ မလိုအပ်သော်လည်း သူမ၏ နေရာလွတ်ကို အဆင့်မြှင့် တင်ရန် လိုအပ်ပေသည်။ လင်းယိထက် စစ်တပ်က ရှေးဟောင်းပစ္စည်းများကို ပိုမိုရှာဖွေနိုင်လိမ့်မည်ဟု စဉ်းစား ကာ သူမက ပြောလိုက်လေ၏။

"ရှေးဟောင်းပစ္စည်းတွေ ဒါမှမဟုတ် ရွှေပါ...။"

သူမ ဤသို့ ပြောလိုက်သည့် အခိုက်အတန့်တွင် လုံယုသည် သူမက နေရာလွတ်ကို အဆင့်မြှင့်တင်လိုကြောင်း သဘောပေါက်လိုက်မိသည်။ ရောက်ရှိလာမည့် သဘာဝဘေးအန္တရာယ်များကို စဉ်းစားမိသောအခါ ထိုပစ္စည်းများ မပျက်စီးမီ ရှေးဟောင်းပစ္စည်းများကို တတ်နိုင်သမျှ စုဆောင်းရန် လိုအပ်ကြောင်း သူ နားလည်လိုက်၏။

ပြတိုက်အများစုမှာ အစိုးရပိုင် ဖြစ်သောကြောင့် ဤအရောင်းအဝယ်မှတစ်ဆင့် သူမသည် ရှေးဟောင်းပစ္စည်း များကို ပိုမိုရရှိနိုင်ပေသည်။ စစ်တပ်နှင့် ပူးပေါင်းလုပ်ဆောင်ခြင်း၏ ကောင်းကျိုးဆိုးကျိုးများကို လုံယု စဉ်းစား နေစဉ် ဝူလျန်သည် ယောင်ရန်အား စဉ်းစားတွေးတောဟန်ဖြင့် ကြည့်လိုက်လေသည်။

ခေတ္တမျှ တိတ်ဆိတ်သွားပြီးနောက် သူက ပြောလိုက်၏။

"ကောင်းပါပြီ...၊ ကျွန်တော် ညီမအတွက် ရှေးဟောင်းပစ္စည်းတွေကို ပြင်ဆင်ပေးပါ့မယ်...။ ရွှေကိစ္စကိုတော့ ကျွန်တော် အထက်လူကြီးဆီ အရင်ဆုံး တင်ပြရပါဦးမယ်...။"

ယောင်ရန်သည် သူ၏အဖြေကို ကျေနပ်သဖြင့် ခေါင်းငြိမ့်ပြလိုက်သည်။

"ဒါဆိုရင် ကျွန်မလည်း ရှင့်အတွက် ဘယ်လောက်အထိ ရနိုင်မလဲဆိုတာ ကြည့်ပေးပါ့မယ်...။"

ထိုသို့ပြောပြီးနောက် ယောင်ရန်သည် မတ်တပ်ရပ်လိုက်ပြီး လုံယုကလည်း သူမ၏နောက်မှ ထလိုက်ကာ သူမက ဆက်ပြောလေသည်။

"ပစ္စည်းတွေ ရပြီဆိုရင် ကျွန်မ ရှင့်ကို ဆက်သွယ်လိုက်ပါ့မယ်...။"

ဝူလျန်သည် သူမထံသို့ လက်ကမ်းပေးရင်း ပြောလိုက်၏။

"ဒါဆိုရင် ကျွန်တော် ညီမရဲ့ သတင်းကောင်းကို စောင့်မျှော်နေပါ့မယ်...။"

ယောင်ရန်က သူနှင့် လက်ဆွဲနှုတ်ဆက်လိုက်ပြီးနောက် လုံယုနှင့်အတူ ထွက်ခွာခဲ့ကြလေသည်။

လုံယု တံခါးမပိတ်မီ ဝူလျန်က လှမ်းမေးလိုက်၏။

"တပ်မှူး လုံ...၊ မင်း တကယ်ပဲ ပြန်မလာတော့ဘူးလား...။"

လုံယုသည် လျှောက်လှမ်းနေသော ခြေလှမ်းများကို ရပ်တန့်လိုက်သော်လည်း နောက်သို့လှည့်မကြည့်ဘဲ ပြန်လည်ဖြေလိုက်လေသည်။

"မလာတော့ဘူး...၊ ငါ့မှာ ကာကွယ်ရမယ့် အရေးကြီးတဲ့သူ ရှိနေလို့ပါ...။"

ထိုသို့ပြောပြီးနောက် လုံယုသည် တံခါးကို ပိတ်လိုက်တော့သည်။ ပိတ်သွားသော တံခါးကို စိုက်ကြည့်ရင်း ဝူလျန် သည် သက်ပြင်းချမိရုံမှတစ်ပါး အခြားမတတ်နိုင်ဘဲ သူ၏ အလုပ်များကို ဆက်လက်လုပ်ဆောင်ရန် စားပွဲဆီသို့ ပြန်သွားခဲ့လေတော့သည်။

စစ်တပ်နယ်မြေမှ ထွက်ခွာလာပြီးနောက် လုံယုနှင့် ယောင်ရန်တို့သည် အိမ်သို့ ပြန်လာခဲ့ကြသည်။ အထပ် (၂၀) သို့ ရောက်ရှိသောအခါ လုံယုက မေးလိုက်၏။

"မင်း ဝူလျန်ကို ဘယ်လောက်အထိ ပေးဖို့ စဉ်းစားထားလဲ...။"

ယောင်ရန်သည် တံခါးကို ဖွင့်လိုက်ပြီးနောက် သူတို့နှစ်ဦးသည် သူမ၏ တိုက်ခန်းအတွင်းသို့ ဝင်ရောက်ခဲ့ကြသည်။

တံခါးကို ပိတ်လိုက်ရင်း သူမက ပြောလိုက်၏။

"သူတို့က ဒီအာဟာရရည်ကို ဖန်တီးဖို့ ကျွန်မပေးခဲ့တဲ့ ရောစပ်ထားတဲ့ ရေကန်ရေကို သုံးနေကြတာလို့ ကျွန်မ ယုံကြည်တယ်...။ သူတို့က ပြည်သူတွေကို ဒီအာဟာရရည် ဝေမျှပေးနိုင်အောင် ကျွန်မ သူတို့ကို အများကြီး ပေး လိုက်မယ်...။ ဒီအရာက အလွန်အမင်း ပူပြင်းတဲ့ ရာသီဥတု မရောက်လာခင်မှာ လူတွေ ပိုပြီး ရိက္ခာစုဆောင်းနိုင်ဖို့ ကူညီပေးပါလိမ့်မယ်...။"

ထိုစကားကို ကြားသောအခါ လုံယုက မေးလိုက်၏။

"ရန်ရန်...၊ မင်း ဘာလို့ သူတို့ကို ရုတ်တရက် ကူညီချင်ရတာလဲ...။ မင်းက သေတ္တာတော်ကို တိုက်ခိုက်ဖို့ စစ်တပ်နဲ့ ပူးပေါင်းဖို့ ပြင်ဆင်နေတာလား...။"

ယောင်ရန်သည် သူ၏မေးခွန်းကြောင့် ခေတ္တမျှ တုံ့ဆိုင်းသွားခဲ့သည်။ ခေတ္တမျှ တိတ်ဆိတ်သွားပြီးနောက် ခေါင်းယမ်းပြကာ ရှင်းပြလိုက်၏။

"အဲ့ဒါတင် မကပါဘူး...၊ ကျွန်မ ကြောက်တာက သေတ္တာတော်တင် မဟုတ်ဘဲ အနာဂတ်မှာ ဖြစ်လာမယ့် မျိုးရိုးဗီဇ ပြောင်းလဲမှုတွေကိုပါ...။ ကျွန်မတို့ ဘယ်လောက်ပဲ အင်အားကြီးမားပါစေ တစ်ယောက်တည်းတော့ ရှင်သန်နိုင်မှာ မဟုတ်ဘူးလေ...။"

သူမသည် လုံယုဘက်သို့ လှည့်ကြည့်ကာ ဆက်ပြောလေသည်။

"တကယ်လို့ အခု လူတွေအများကြီး သေဆုံးသွားမယ်ဆိုရင် မျိုးဗီဇပြောင်းလဲမှု ရောက်ရှိလာတဲ့အခါ လူသား မျိုးနွယ်တွေ မျိုးသုဉ်းသွားလိမ့်မယ်...။ သာမန်လူတွေအနေနဲ့ မျိုးဗီဇပြောင်းလဲသူတွေကို တိုက်ခိုက်ဖို့ ဘယ်လောက်အထိ ခက်ခဲလဲဆိုတာ ရှင်လည်း သိတာပဲလေ...။"

"အသက်ရှင်ကျန်ရစ်သူ တစ်ထောင်မှာ စွမ်းအားရှင် တစ်ယောက်ပဲ ပေါ်ထွက်လာတာ...။ မျိုးဗီဇပြောင်းလဲမှု ဖြစ်စဉ်အတွင်းမှာ စွမ်းအားရှင်တွေ ရှင်သန်နိုင်ခြေ ရာခိုင်နှုန်းကလည်း နည်းပါးလွန်းတာကြောင့် စွမ်းအားရှင် အရေအတွက် တိုးပွားလာဖို့အတွက် အသက်ရှင်ကျန်ရစ်သူတွေ ပိုပြီး လိုအပ်တယ်...။ ကျွန်မ လုပ်ဆောင်နေ တာက ကလဲ့စားချေဖို့တင် မဟုတ်ဘဲ ကျွန်မတို့ရဲ့ အနာဂတ်အတွက်ပါ...။"

သူမ၏ ရှင်းပြချက်ကို နားထောင်ပြီးနောက် လုံယုသည် သူမ၏လက်ကို ဆွဲကိုင်ကာ ပြောလိုက်၏။

"ငါ မင်းကို ကူညီပါ့မယ်...။ ငါတို့တွေ အသက်ရှင်သန်ပြီး အတူတူ အိုမင်းသွားကြမယ်နော်...။"

ယောင်ရန်က ခေါင်းငြိမ့်ပြကာ ပြုံးပြလိုက်သည်။

"အင်း..."

ရိုးရှင်းသော နေ့လယ်စာကို သုံးဆောင်ပြီးနောက် ယောင်ရန်နှင့် လုံယုသည် သူမ၏ နေရာလွတ်အတွင်းသို့ ဝင်ရောက်ကာ ရောစပ်ထားသော ရေကန်ရေများကို စတင်ပြင်ဆင်ခဲ့ကြသည်။ သူတို့၏ ရည်ရွယ်ချက်မှာ အသက်ရှင်ကျန်ရစ်သူ တတ်နိုင်သမျှ များများကို ကူညီပေးရန်ဖြစ်သဖြင့် ယောင်ရန်သည် ဝူလျန်အား ရောစပ် ထားသော ရေကန်ရေ လီတာတစ်ထောင် ပေးရန် ဆုံးဖြတ်လိုက်၏။

ရေကန်ဘေးတွင် မတ်တပ်ရပ်နေရင်း ယောင်ရန်သည် သူမ၏ ကုန်လှောင်ရုံအတွင်းမှ ပလတ်စတစ်စည်ပိုင်းကြီး ငါးလုံးကို ရွှေ့ပြောင်းလိုက်လေသည်။ စည်ပိုင်းတစ်လုံးလျှင် ရေ လီတာနှစ်ရာခန့် ဆံ့ပေသည်။

သူမသည် စည်ပိုင်းအဖုံးများကို ဖွင့်လိုက်ပြီးနောက် ပြောလိုက်၏။

"လုံယု...၊ တစ်စည်ချင်းစီထဲကို ရေကန်ရေ နှစ်ပုံးစီ ထည့်ပေးဖို့ ကူညီပေးပါဦး...။"

လုံယုက ခေါင်းငြိမ့်ပြကာ ကြမ်းပြင်ပေါ်မှ ရေပုံးကို ယူ၍ ရေကန်ရေများကို စည်ပိုင်းအတွင်းသို့ စတင်ခပ်ထည့် လိုက်တော့သည်။