အခန်း ၆၄၇

အခန်း (၆၄၇) တာအိုနယ်ပယ် တိုးတက်ခြင်းနှင့် အသိစိတ် ပြန်လည် နိုးထလာခြင်း အပိုင်း (၂)

သို့သော်လည်း ထိုအသားနှင့် သွေးများက စုယွီကို ကြီးကြီးမားမား အထောက်အကူ မပြုနိုင်ပါချေ။ အဘယ်ကြောင့်ဆိုသော် ယခုအခါ သူသည် ယခင်က ‘မိကျောင်း မိစ္ဆာ (၁၀၈) ကွက် ခန္ဓာကိုယ် သန့်စင်ခြင်း ကျင့်စဉ် ’ ကို လေ့ကျင့်နေခြင်း မဟုတ်တော့ဘဲ... ‘အင်မော်တယ်ခန္ဓာကိုယ် သန့်စင်ခြင်း ကျင့်စဉ်’ သို့ ပြောင်းလဲ လေ့ကျင့်နေပြီ ဖြစ်သောကြောင့်ပင်။

မိကျောင်း မိစ္ဆာ (၁၀၈) ကွက် ခန္ဓာကိုယ် သန့်စင်ခြင်း ကျင့်စဉ် ကို လေ့ကျင့်စဉ်က... အရိုင်းနယ်မြေမှ သားရဲများ၏ အသားနှင့် သွေးများကို စားသုံးခြင်းက သိသာထင်ရှားသော အကျိုးသက်ရောက်မှုများ ရှိနိုင်သည်။

သို့သော် အင်မော်တယ်ခန္ဓာကိုယ် သန့်စင်ခြင်း ကျင့်စဉ် ၏ လေ့ကျင့်ပုံမှာမူ ကွာခြားလှသည်။ ၎င်းသည် ခန္ဓာကိုယ် အတွင်း၌ တာအို မန္တန် အမှတ်အသားများကို ရေးထွင်းရခြင်း ဖြစ်၏။

ဤတာအို မန္တန် အမှတ်အသားများကို အသုံးပြု၍ ‘အင်မော်တယ်ခန္ဓာကိုယ်’ တစ်ခုကို တည်ဆောက်ရခြင်း ဖြစ်သည်။

ထို့ကြောင့် အင်မော်တယ်ခန္ဓာကိုယ် သန့်စင်ခြင်း ကျင့်စဉ် အတွက် အများဆုံး အထောက်အကူ ပြုနိုင်သော အရင်းအမြစ်မှာ ဝိညာဉ်အရည် များသာ ဖြစ်သည်။

စုယွီ အတွက်မူ ချီသန့်စင်အိုး ရှိနေသဖြင့် ဝိညာဉ်အရည် ပြတ်လပ်မှု ပြဿနာ လုံးဝ မရှိခဲ့ပါချေ။

ထို့ကြောင့် အရသာ မြည်းစမ်းကြည့်ပြီးနောက် သူ၏ အတွက် များစွာ အသုံးမဝင်ကြောင်း သိလိုက်ရသဖြင့်... စုယွီသည် အနီရောင် မြွေဟောက် မိစ္ဆာဘုရင်ကြီး ၏ အသားနှင့် သွေး အများစုကို ဖန်ရှောင် ထံသို့ ပေးအပ်၏။

“မင်းအတွက် အသုံးဝင်မလား ကြည့်လိုက်... အကယ်လို့ အသုံးမဝင်ဘူး ဆိုရင် ဒေါ်လေး ဟွမ်ကျူး တို့ အဖွဲ့ကို ပေးလိုက်ပေါ့...”

ဖန်ရှောင်က အနီရောင် မြွေဟောက် မိစ္ဆာဘုရင်ကြီး ၏ အသားနှင့် သွေးများကို အံ့အားသင့်စွာ ကြည့်ရင်း မေးလိုက်၏။

“ဦးလေးငယ်... ဒါက ယွီလုံ နန်းတော် က လူတွေ အမဲလိုက်နေတဲ့ မိစ္ဆာသားရဲ ကြီး မဟုတ်လား... ဘယ်လို လုပ်ပြီး ဦးလေးငယ် ဆီကို ရောက်လာတာလဲ...”

“လျှောက်ပြောမနေစမ်းပါနဲ့... ဒါက သာမန် မိစ္ဆာသားရဲ ရဲ့ အသားနဲ့ သွေးတွေပါ... ယွီလုံ နန်းတော် က ဘာလဲ... သူတို့ အမဲလိုက်နေတာကို ငါ တစ်ခါမှ မမြင်ဖူးပါဘူး...”

စုယွီက လက်ကို ဝှေ့ယမ်းကာ သူ၏ ဂူစံအိမ် အတွင်းသို့ ဝင်ရောက်ပြီး တံခါးပိတ် ကျင့်ကြံခြင်းကို ဆက်လက် ပြုလုပ်ရန် ထွက်ခွာသွားသည်။

အကြီးအကဲ ဟွမ်ရှီထောင် နှင့် အခြားသူများက ဖန်ရှောင် အား ဤနေရာတွင် မည်သို့ နေထိုင်ရမည်ကို သင်ကြား လမ်းညွှန်ပေးနေသော်ငြား... သူမသည် အရိုင်းနယ်မြေ အတွင်း၌ မိမိ၏ အဆင့်အတန်းကို မည်သို့ တည်ဆောက်ရမည် နှင့် ပတ်သက်၍ စုယွီထံသို့ လာရောက် အကြံဉာဏ် တောင်းခံလေ့ ရှိသည်။

“ရာထူး အဆင့်အတန်း ဆိုတာတွေက အယောင်ပြ သက်သက်တွေပါ... အရိုင်းနယ်မြေ က ဟေးယွီ အင်မော်တယ် မြို့တော် နဲ့ လုံးဝ မတူဘူး... ဒီနေရာက မြေကမ္ဘာအင်မော်တယ် နန်းတော် ရဲ့ စီရင်စု အောက်မှာ ရှိနေတာ မဟုတ်ဘူး... တာ့ချန် ကျင့်ကြံခြင်း ကမ္ဘာထက် အများကြီး ပိုပြီး ဖရိုဖရဲ ဖြစ်နေပြီး အန္တရာယ် များတဲ့ နေရာကြီးပဲ...”

“ဒီနေရာမှာ မြေကမ္ဘာအင်မော်တယ် နန်းတော် က ဘယ်လောက် အင်အား ကြီးတယ် ဆိုတာကို ဘယ်သူမှ ဂရုမစိုက်ဘူး... တစ်ခုတည်းသော စည်းမျဉ်းက အစွမ်းထက်သူသာ အရှင်သခင် ဆိုတာပဲ...”

“ဒါကြောင့် အများကြီး လျှောက်မတွေးပါနဲ့... အရိုင်းနယ်မြေ ထဲက အရင်းအမြစ်တွေကို စုဆောင်းပြီး မင်းကိုယ်မင်းနဲ့ အင်မော်တယ် တပ်မတော် ကို ပိုပြီး အစွမ်းထက်လာအောင် လုပ်ဖို့ကိုပဲ အာရုံစိုက်ပါ... အဲဒါက အခုချိန်မှာ မင်း လုပ်ရမယ့် အရေးကြီးဆုံး ကိစ္စပဲ...”

“ကျန်တဲ့ ကိစ္စတွေကို အကုန် မေ့ထားလိုက်... အပြင်ဘက်မှာ ဘယ်လောက်ပဲ ဖရိုဖရဲ ဖြစ်နေပါစေ... တခြား အင်အားစုတွေ တစ်ယောက်နဲ့ တစ်ယောက် သေလုမြောပါး တိုက်ခိုက်နေကြပါစေ... မင်းနဲ့ ဘာမှ မဆိုင်ဘူး... ဘာလို့လဲ ဆိုတော့ မင်းက အရမ်း အားနည်းနေသေးလို့ပဲ...”

ဖန်ရှောင်မှာ အချိန်အတော်ကြာအောင် တိတ်ဆိတ်သွားသည်။ စုယွီ၏ စကားများမှာ အကြီးအကဲ ဟွမ်ရှီထောင် တို့၏ စကားများနှင့် အနည်းငယ် ကွဲလွဲနေကြောင်း ဖန်ရှောင် သိရှိထား၏။

အကြီးအကဲ ဟွမ်ရှီထောင် ၏ အဆိုအရ... ဖန်ရှောင်သည် အင်မော်တယ် တပ်မတော် ကို ဦးဆောင်ကာ သွေးနှင့် မီးတောက်များ ကြားရှိ စမ်းသပ်မှုများတွင် ပါဝင် လေ့ကျင့်ပြီး... ခိုင်မာသော အုတ်မြစ် တစ်ခုကို ဖြည်းဖြည်းချင်း တည်ဆောက်ရမည် ဖြစ်သည်။ ထို့နောက် နောက်ဆုံးတွင် အသွင်ပြောင်းလဲ ကြီးထွားလာကာ ဘုန်းကံရှင် တစ်ဦး၏ သီးသန့် အောင်နိုင်သူ လမ်းစဉ်ကို လျှောက်လှမ်းရမည် ဟု ဆိုသည်။

ထိုလမ်းစဉ်တွင် အသေးစိတ် အချက်အလက်များနှင့် တည်ငြိမ်မှုများ များစွာ ပါဝင်နေသော်ငြား... စုယွီ၏ အစပိုင်းတွင် ခပ်လျိုလျို နေကာ ကိုယ်ပိုင် စွမ်းအားကို တိတ်တဆိတ် မြှင့်တင်ပြီးမှ... နောက်ဆုံးတွင် အရှိန်အဟုန်ဖြင့် ပေါက်ကွဲ ထွက်လာသည့် နည်းလမ်းနှင့်မူ များစွာ ကွာခြားလှသည်။

အချိန်အတော်ကြာ စဉ်းစားပြီးနောက် ဖန်ရှောင်သည် စုယွီ၏ အကြံပေးချက် အတိုင်း လိုက်နာရန် ဆုံးဖြတ်၏။ ခပ်လျိုလျို နေကာ အချိန်အတန်ကြာ ကျင့်ကြံရန် ဆုံးဖြတ်လိုက်ခြင်း ဖြစ်၏။

အမှန်တကယ်ပင် သူမ လက်ရှိ နေထိုင်နေသော စတုတ္ထမြောက် အင်မော်တယ် မြို့တော် ၏ အုတ်မြစ်မှာ... အခြားသော မြို့တော်များနှင့် နှိုင်းယှဉ်၍ လုံးဝ မရနိုင်သေးပါချေ။

ဂူစံအိမ် အတွင်း၌...စုယွီသည် အစိမ်းရောင် သစ်သား လက်စွပ် အတွင်းမှ နောက်ထပ် စတုတ္ထအဆင့် အဆင့်နိမ့် ဆေးဖော်စပ်ရန် ကုန်ကြမ်း တစ်စုံကို ထုတ်ယူလိုက်ပြီး... ၎င်း၏ ဆေးဖက်ဝင် အရည်အသွေးကို အာရုံခံ ကြည့်၏။ ထို့နောက် သူသည် ထိပ်တန်း အဆင့်နိမ့် ဆေးဖိုကြီး ၏ အပေါ်သို့ လက်ကို ဖိချလိုက်ရာ... အသံတစ်သံ ထွက်ပေါ်လာပြီး ကောင်းကင် မီးတောက်များ ဟုန်းခနဲ တောက်လောင်လာတော့၏။

ကောင်းကင် မီးတောက်များ၏ သန့်စင်မှု အောက်တွင် စုယွီသည် နောက်ထပ် စတုတ္ထအဆင့် အဆင့်နိမ့် သားရဲ မူလ ဆေးလုံး တစ်ဖိုကို အောင်မြင်စွာ ဖော်စပ်နိုင်ခဲ့သည်။

ဤတစ်ဖိုတွင် ဆေးလုံး ငါးလုံး ထွက်ရှိလာပြီး အားလုံးမှာ ပြီးပြည့်စုံသော အရည်အသွေးများ ဖြစ်ကြသည်။

စုယွီသည် ထိုဆေးလုံးများကို သိမ်းဆည်းလိုက်၏။ သူသည် တာ့ယွဲ့ နန်းတော် သို့ ပြန်သွားပြီး မြွေအိုကြီးနှင့် လိပ်အိုကြီး ကဲ့သို့သော မိစ္ဆာဘုရင် များကို စတုတ္ထအဆင့် မိစ္ဆာသားရဲ များ အဖြစ် ပြုစု ပျိုးထောင်ရန် ရည်ရွယ်ထားရာ... ဤပြီးပြည့်စုံသော အရည်အသွေးရှိ စတုတ္ထအဆင့် အဆင့်နိမ့် သားရဲ မူလ ဆေးလုံး များမှာ နောင်တစ်ချိန်တွင် များစွာ အသုံးဝင်လာပါမည်။

ဆေးဖိုကို သန့်ရှင်းရေး လုပ်ပြီးနောက် စုယွီသည် တင်ပျဉ်ခွေ ထိုင်လိုက်ပြီး... ဓာတ်ကြီး ငါးပါး ကျင့်စဉ် နှင့် ရွှေပုစဉ်းရင်ကွဲ ကျင့်စဉ် တို့ကို လည်ပတ်ကာ... သူ၏ မန္တန်စွမ်းအား နှင့် ဝိညာဉ် စွမ်းအင်များကို ပြန်လည် ဖြည့်တင်း၏။

နာရီဝက်ခန့် ကြာပြီးနောက် စုယွီသည် သူ၏ အထွတ်အထိပ် အခြေအနေသို့ ပြန်လည် ရောက်ရှိသွားခဲ့ချေပြီ။

သူသည် စတုတ္ထအဆင့် အလယ်အလတ် ဆေးဖော်စပ်ရန် ကုန်ကြမ်း တစ်မျိုးဖြစ်သော... တာအို မူလ ဆေးလုံး ကုန်ကြမ်းများကို ထုတ်ယူ၏။

ဤဆေးလုံးမှာ မူလဝိညာဉ် အဆင့် ကျင့်ကြံသူများ မန္တန်စွမ်းအား လေ့ကျင့်ရာတွင် အသုံးပြုရန် သင့်တော်သည်။ စုယွီ၏ လက်စွပ် အတွင်း၌ စတုတ္ထအဆင့် အလယ်အလတ် တာအို မူလ ဆေးလုံး ကုန်ကြမ်း အစုံ နှစ်ရာ နီးပါး ရှိနေသည်။ ၎င်း၏ ဖော်စပ်ရန် ခက်ခဲမှု အဆင့်မှာ စတုတ္ထအဆင့် အလယ်အလတ် ဆေးဖော်စပ်ရန် ကုန်ကြမ်းများ အနက် ရိုးရှင်းသော အဆင့်တွင် ပါဝင်သည်။

စတုတ္ထအဆင့် ဆေးဖော်စပ်ခြင်း ပညာရပ်ကို နှစ်ပေါင်းများစွာ လေ့ကျင့်ခဲ့ပြီးနောက်... စုယွီသည် စတုတ္ထအဆင့် အလယ်အလတ် ဆေးဖော်စပ်ခြင်းကို စမ်းသပ်ရန် ဆုံးဖြတ်၏။

“တာအို သစ်သီး တစ်လုံး... လင်လုံ ပန်း တစ်ပွင့်... နှစ်တစ်ထောင် ဝိညာဉ်မြက် တစ်ပင်...”

စုယွီသည် တာအို မူလ ဆေးလုံး အတွက် လိုအပ်သော ကုန်ကြမ်းများကို ပြင်ဆင်၏။ အားလုံး အဆင်သင့် ဖြစ်သွားသောအခါ... သူသည် ရွှေပုစဉ်းရင်ကွဲ ကျင့်စဉ် ကို ချက်ချင်း အသုံးပြုကာ အတွေးလွတ် ဝိညာဉ် အခြေအနေ သို့ ဝင်ရောက်သွားတော့၏။

ဤအတွေးလွတ် ဝိညာဉ် အခြေအနေ အောက်တွင် စုယွီ၏ ဆေးမီးတောက် အပေါ် ထိန်းချုပ်နိုင်စွမ်းမှာ ပြီးပြည့်စုံလုနီးပါး ဖြစ်ပြီး အလွန်တရာ သိမ်မွေ့လှသည်။

ပြီးပြည့်စုံသော ဆေးဖော်စပ်ခြင်း ပညာရပ်၏ အကူအညီဖြင့်... စတုတ္ထအဆင့် အလယ်အလတ် တာအို မူလ ဆေးလုံး တစ်ဖိုကို အောင်မြင်စွာ ဖော်စပ်နိုင်ခဲ့သည်။

ဤအောင်မြင်သော ဖော်စပ်မှုမှ ဆေးလုံး လေးလုံး ထွက်ရှိလာပြီး... နှစ်လုံးမှာ ထိပ်တန်း အရည်အသွေး ဖြစ်ကာ ကျန်နှစ်လုံးမှာ သာမန် အရည်အသွေး ဖြစ်၏။

ဤသည်မှာ သူ၏ ပထမဆုံး စတုတ္ထအဆင့် အလယ်အလတ် ဆေးဖော်စပ်ခြင်း ဖြစ်ပြီး... ပထမဆုံးအကြိမ် တာအို မူလ ဆေးလုံး ကို ဖန်တီးခြင်းလည်း ဖြစ်ပါသည်။

စုယွီသည် ဤရလဒ် အပေါ် များစွာ ကျေနပ် အားရမိပါ၏။

နောက်ရက်များတွင် စုယွီသည် တတိယအဆင့် ဆေးလုံး များကို ဖော်စပ်ရင်း သူ၏ စတုတ္ထအဆင့် အလယ်အလတ် ဆေးဖော်စပ်ခြင်း စွမ်းရည်များကို သွေးတိုးစမ်း စမ်းသပ်နေခဲ့သည်။ ထို့အပြင် သူ၏ တာအို မူလ ဆေးလုံး ဖော်စပ်ခြင်း အောင်မြင်နိုင်ခြေနှင့် ကျွမ်းကျင်မှု နှုန်းကိုလည်း မြှင့်တင်ရင်း... သူ၏ နေ့စဉ် ကျင့်ကြံခြင်းနှင့် ဓာတ်ကြီး ငါးပါး ကျင့်စဉ် ကို နားလည် သဘောပေါက်ရန် အားထုတ်မှုများကိုပါ ဆက်လက် ပြုလုပ်နေခဲ့၏။

တစ်နှစ်ကျော် ကုန်လွန်သွားခဲ့ချေပြီ။

ယနေ့တွင်...။

စုယွီသည် ဝိညာဉ်အရည် များကို သန့်စင် စုပ်ယူကာ ခန္ဓာကိုယ် သန့်စင်ခြင်း အမှတ်အသားများကို ရေးထွင်းနေသည်။ သူ၏ အင်မော်တယ်ခန္ဓာကိုယ် သန့်စင်ခြင်း လေ့ကျင့်မှု မပြီးဆုံးမီမှာပင်... သူ၏ ဓာတ်ကြီး ငါးပါး တာအိုနယ်ပယ် တွင် ကြီးမားသော အသွင်ပြောင်းလဲမှု တစ်ခု ဖြစ်ပေါ်လာတော့၏။

ဤခံစားချက်မှာ အလွန်ပင် လျှို့ဝှက်ဆန်းကြယ်လှသည်။ သူ၏ တာအိုနယ်ပယ် မှာ အခြေခံ အဆင့် သို့ ကူးပြောင်းသွားသည့် အခိုက်အတန့်တွင်... စုယွီသည် သူ၏ ပတ်ဝန်းကျင်ရှိ ဓာတ်ကြီးငါးပါး စွမ်းအားများမှာ ယခင်ကထက် များစွာ ပိုမို သွက်လက် လှုပ်ရှားလာကြောင်း ခံစားလိုက်ရသည်။

သူ၏ ကျင့်ကြံခြင်း အဆင့်မှာ ပြောင်းလဲသွားခြင်း မရှိသော်ငြား... စုယွီသည် ဓာတ်ကြီး ငါးပါး မဟာတာအို အပေါ် ပိုမို နက်ရှိုင်းစွာ ထိန်းချုပ်နိုင်စွမ်း ရှိလာကြောင်း ခံစားမိ၏။

အခြေခံ အဆင့် ဆိုသည်ကို အထင်မသေးသင့်ပါချေ။ မူလဝိညာဉ် အဆင့် ရှိသော အရှင်သခင် များစွာမှာ သူတို့၏ သက်တမ်း တစ်ခုလုံး ကုန်ဆုံးသွားသည် အထိ အစပြု အဆင့် သို့သာ ရောက်ရှိနိုင်ကြသည် မဟုတ်ပါလော။

အခြေခံ အဆင့် သို့ ရောက်ရှိသွားသော ကျင့်ကြံသူ တစ်ဦးမှာ သူ၏ ဆရာ ဖြစ်သူ တာအိုဆရာ ထျန်းယွီ နှင့် တန်းတူပင် ဖြစ်သွားခဲ့ချေပြီ။

အကယ်၍ တစ်စုံတစ်ယောက်ကသာ အောင်မြင်ခြင်း အဆင့် သို့ ရောက်ရှိသွားမည် ဆိုပါက... ထိုသူသည် ဘီလီယံနှင့် ချီသော လူများ အကြားတွင် ဝိညာဉ်ခန္ဓာကိုယ် ပိုင်ရှင် ကဲ့သို့ ထူးခြား ပြောင်မြောက်သော ပါရမီရှင် တစ်ဦး ဖြစ်လာမည်မှာ အသေအချာပင်။

နောက်ဆုံး အဆင့် ဖြစ်သော ပြီးပြည့်စုံခြင်း အဆင့် မှာမူ ကောင်းကင် တာအို၏ ဖန်တီးနိုင်စွမ်း နှင့်ပင် ပိုမို နီးစပ်သွားမည်ပင်။

ယခုအခါ စုယွီ၏ ဓာတ်ကြီး ငါးပါး တာအိုနယ်ပယ် မှာ အခြေခံ အဆင့် သို့ တက်လှမ်းသွားပြီ ဖြစ်ရာ... အုတ်မြစ် ပိုင်းဆိုင်ရာ အရ သူသည် သူ၏ ဆရာ တာအိုဆရာ ထျန်းယွီ ကို မှီသွားခဲ့ပြီ ဖြစ်သည်။

စုယွီသည် ဝိညာဉ်အရည် များကို သန့်စင် စုပ်ယူကာ ခန္ဓာကိုယ် သန့်စင်ခြင်း အမှတ်အသားများကို ရေးထွင်းရင်း သူ၏ ကျင့်ကြံခြင်းကို ဆက်လက် ပြုလုပ်နေခဲ့သည်။

ကျင့်ကြံခြင်း ပြီးဆုံးသွားပြီးနောက် သူသည် သူ၏ ဓာတ်ကြီး ငါးပါး တာအိုနယ်ပယ် ၏ ပြောင်းလဲမှုများကို ခံစားကြည့်လိုက်ပြီး စိတ်ထဲမှ မှတ်ချက်ချမိ၏။

“ဝိညာဉ်အရည် ရဲ့ အကျိုးသက်ရောက်မှုက တကယ့်ကို သိသာလွန်းတယ်... ဒီအတိုင်း ဆိုရင် နှစ်တစ်ရာ အတွင်းမှာ ငါ အောင်မြင်ခြင်း အဆင့် ကို ရောက်သွားနိုင်တယ်...”

စုယွီ အရိုင်းနယ်မြေ သို့ ရောက်ရှိလာပြီး ခုနစ်နှစ် ကြာပြီးနောက်... တာအို ရုပ်သေး သည် တိတ်တဆိတ် ရောက်ရှိလာခဲ့သည်။

သူ၏ ဂူစံအိမ် အတွင်း၌...စုယွီသည် တာအို ရုပ်သေး ထံမှ သူ၏ ဝိညာဉ် နှင့် ရုပ်သေး ဝိညာဉ် ကို ပြန်လည် ထုတ်ယူလိုက်၏။ ထို့နောက် သူသည် ရုပ်သေး ပညာရပ်ကို အသုံးပြုကာ ‘အနက်ရောင် ဒေါသ စစ်သည်တော်’ အား တာအို ရုပ်သေး အသစ် တစ်ခု အဖြစ် အသွင်ပြောင်းလဲလိုက်ပြီး... ရုပ်သေး ဝိညာဉ် ကို ၎င်း၏ အတွင်းသို့ ထည့်သွင်း ပေါင်းစပ်လိုက်တော့၏။

သို့သော် စုယွီက ရုပ်သေး ဝိညာဉ် ကို အနက်ရောင် ဒေါသ စစ်သည်တော် အတွင်းသို့ ထည့်သွင်းလိုက်သည့် အခိုက်အတန့်မှာပင်... ၎င်းမှာ အနက်ရောင် ဒေါသ စစ်သည်တော် ၏ ဦးခေါင်း အတွင်းရှိ အခင်းအကျင်း ထဲသို့ ချက်ချင်းပင် စုပ်ယူခြင်း ခံလိုက်ရသည်။

“ဝုန်း...”

ပြတ်တောက်နေသော မှတ်ဉာဏ်များမှာ ရုပ်သေး ဝိညာဉ် အတွင်းသို့ မျက်စိတစ်မှိတ် အတွင်း အဆက်မပြတ် ဝင်ရောက်လာတော့၏။

“ငါက အမှတ် ငါးဆယ့်ငါး အနက်ရောင် အစောင့်...”

“ငါ အင်မော်တယ် ယွဲ့ နန်းတော် ကို ကာကွယ်ရမယ်... နေပါဦး... အခု ငါ့မှာ သခင် အသစ် ရှိနေပြီလား...”

စုယွီသည် ရုပ်သေး ဝိညာဉ် တွင် အပြောင်းအလဲများ ဖြစ်ပေါ်လာပြီး... အသိစိတ် အသစ် တစ်ခု မွေးဖွားလာသကဲ့သို့ ခံစားလိုက်ရသည်။ သူ၏ မျက်နှာမှာ အနည်းငယ် ပြောင်းလဲသွားပြီး... သူ၏ ကိုယ်ပိုင် ဝိညာဉ် ကို အနက်ရောင် ဒေါသ စစ်သည်တော် အတွင်းမှ ချက်ချင်း ပြန်လည် ရုပ်သိမ်းလိုက်တော့၏။

နေ့တစ်ဝက်ခန့် ကြာပြီးနောက်… အနက်ရောင် ဒေါသ စစ်သည်တော် ၏ အပြောင်းအလဲများမှာ တဖြည်းဖြည်း ငြိမ်သက်သွားခဲ့သည်။ စုယွီ၏ ထိန်းချုပ်မှု မပါဘဲ အနက်ရောင် ဒေါသ စစ်သည်တော် သည် ၎င်း၏ အနက်ရောင် မျက်လုံးများကို အလိုအလျောက် ဖွင့်လာပြီး... ကြောက်မက်ဖွယ် ကောင်းသော အနက်ရောင် မျက်ဝန်းများဖြင့် သူ၏ ရှေ့မှောက်ရှိ စုယွီကို စိုက်ကြည့်နေတော့၏။

ခေတ္တမျှ ကြာပြီးနောက် အနက်ရောင် ဒေါသ စစ်သည်တော် သည် စုယွီ၏ ရှေ့မှောက်တွင် ဒူးတစ်ဖက် ထောက်ချလိုက်ပြီး... ခေါင်းငုံ့ အရိုအသေ ပေးကာ ဆိုလာသည်။

“အမှတ် ငါးဆယ့်ငါး အနက်ရောင် အစောင့် က သခင့်ရဲ့ အမိန့်ကို နာခံဖို့ အသင့်ပါပဲ ခင်ဗျာ...”

စုယွီ၏ မျက်လုံးအိမ်များ ကျဉ်းမြောင်းသွားပြီး ၎င်းကို စိုက်ကြည့်ကာ မေး၏။

“မင်းမှာ ကိုယ်ပိုင် အသိစိတ် ရှိလာပြီလား...”

အမှတ် ငါးဆယ့်ငါး အနက်ရောင် အစောင့် မှာ ခေတ္တမျှ ဇဝေဇဝါ ဖြစ်သွားပုံရပြီး... ထို့နောက် သဘောပေါက်သွားဟန်ဖြင့် ရိုသေစွာ ပြန်လည် သတင်းပို့သည်။

“သခင်... ဒါက ကျွန်တော့်ရဲ့ အရင် သခင် ဟောင်းက ဖန်တီးထားတဲ့ ဝိညာဉ် ပါ... ဒါက ကိုယ်ပိုင် အသိစိတ် ကို တကယ်ပဲ ဖွံ့ဖြိုးလာစေနိုင်ပါတယ်...”

“ဒါပေမဲ့ ကျွန်တော့်ရဲ့ ဝိညာဉ် က ကုန်ခမ်းသွားတာ ကြာလှပါပြီ... သခင် က သေးငယ်တဲ့ ရုပ်သေး ဝိညာဉ် တစ်ခုကို ကျွန်တော့် အတွင်းထဲ ထည့်သွင်း ပေါင်းစပ်ပေးလိုက်လို့သာ... ကျွန်တော့်ရဲ့ ကိုယ်ပိုင် အသိစိတ် အကြွင်းအကျန် လေး ပြန်လည် နိုးထလာတာပါ ခင်ဗျာ...”

စုယွီ၏ ရင်တွင်း၌ အနည်းငယ် လှုပ်ရှားသွားပြီး... သူသည် အနက်ရောင် ဒေါသ စစ်သည်တော် အား အင်မော်တယ် ယွဲ့ နန်းတော် အကြောင်း မေးမြန်း၏။

သို့သော် အနက်ရောင် ဒေါသ စစ်သည်တော် မှာ နားမလည်နိုင်အောင် ဇဝေဇဝါ ဖြစ်နေပုံ ရသည်။

အနက်ရောင် ဒေါသ စစ်သည်တော် သည် ခေါင်းယမ်းလိုက်ပြီး ဆိုသည်။

“သခင်... ကျွန်တော့်ရဲ့ မှတ်ဉာဏ်တွေ အများကြီး ပျောက်ဆုံးသွားပါပြီ...”

စုယွီ၏ စမ်းသပ်မှုများ အရ သိလိုက်ရသည်မှာ... ၎င်းမှာ ရုပ်သေး ဝိညာဉ် အတွင်းသို့ ပေါင်းစပ် ဝင်ရောက်လာသော အသိစိတ် အကြွင်းအကျန် လေး တစ်ခုမျှသာ ဖြစ်ပြီး... ထိုအရာက အနက်ရောင် ဒေါသ စစ်သည်တော် ကို မထင်မှတ်ဘဲ ပြန်လည် နိုးထလာစေခဲ့ခြင်း ဖြစ်၏။

သူ အရင်က ဤရုပ်သေး ထံမှ ရရှိခဲ့သော မှတ်ဉာဏ်များမှာ ယခုအခါ အနက်ရောင် ဒေါသ စစ်သည်တော် ၏ အသိစိတ် အကြွင်းအကျန် ထံတွင် မရှိတော့ပါချေ။

သို့သော် အရေးအကြီးဆုံး အချက်မှာ အနက်ရောင် ဒေါသ စစ်သည်တော် သည် ၎င်း၏ ရှေးဟောင်း ဓားသိုင်းများ ကို မှတ်မိနေဆဲ ဖြစ်ပြီး... ဤခန္ဓာကိုယ်ကို အားစိုက်ထုတ်စရာ မလိုဘဲ ထိန်းချုပ်ကာ ၎င်း၏ အစစ်အမှန် တိုက်ခိုက်ရေး စွမ်းအားများကို ထုတ်ဖော် အသုံးပြုနိုင်စွမ်း ရှိနေခြင်းပါပင်။