အခန်း ၄၈၀

အပိုင်း (၄၈၀)

ယွင်ကျုံးဟဲ့ သည် ဧကရာဇ်ဟောင်း၏ ထာဝရ အသက်ရှင်ရန်ကြိုးပမ်းသော နည်းလမ်းကို အတိအကျ မသိရှိချေ။

သို့ပေမည့် သူ၏ စောင့်ကြည့်မှုအရ နောက်ဆက်တွဲ ဆိုးကျိုး သို့မဟုတ် တန်ပြန် သက်ရောက်မှုမှာ အလွန် ကြောက်စရာကောင်းလေ၏။

အထင်ရှားဆုံး လက္ခဏာမှာ သွေးလည်ပတ်မှု အရှိန် အလွန် နှေးကွေးသွားပြီး သွေးများ ခဲသွားသကဲ့သို့ ဖြစ်နေသောကြောင့် နှလုံးခုန်သံ လုံးဝ မရှိတော့သလို အသက်ရှူသံလည်း လုံးဝ မရှိတော့ခြင်းပင် ဖြစ်သည်။

ဤသည်မှာ အဆိပ်မိခြင်းနှင့် အနည်းငယ် ဆင်တူနေသည်။ ကမ္ဘာမြေပေါ်ရှိ အချို့သော မြွေဆိပ်များသည် လူ၏ သွေးများကို ဂျယ်လီကဲ့သို့ ဖြစ်သွားစေနိုင်၏။

သို့ပေမည့် ဧကရာဇ်ဟောင်း၏ အခြေအနေမှာ မတူညီချေ။ သူ၏ သွေးများသည် ဂျယ်လီကဲ့သို့ မဖြစ်သွားခဲ့ချေ။ သွေးများသာမက တစ်ကိုယ်လုံးရှိ အာရုံကြောများပါ ထုံကျင်သွားသကဲ့သို့ ဖြစ်နေသည်။

ဤလက္ခဏာမှာ အပြင်းထန်ဆုံး မေ့ဆေး မိသွားသကဲ့သို့ ဖြစ်နေသောကြောင့် တစ်ကိုယ်လုံး လှုပ်ရှား၍ မရတော့ဘဲ အသက်ရှူခြင်းပင် ရပ်တန့်သွားရခြင်း ဖြစ်သည်။ သို့ပေမည့် မေ့ဆေး မိသွားလျှင်တောင် အနည်းဆုံးတော့ နှလုံးခုန်သံ ရှိနေရမှာဖြစ်၏။

အချုပ်အားဖြင့် အလွန် ထူးဆန်းလွန်းလေ၏။ မကြာမီမှာပဲ ယွင်ကျုံးဟဲ့သည် အခြား ထူးဆန်းသော အချက်တစ်ချက်ကို တွေ့ရှိသွားပြန်သည်။

ဧကရာဇ်ဟောင်း၏ မျက်နှာပေါ်တွင် အရေးအကြောင်းများ ပြည့်နှက်နေပြီး အလွန် အိုမင်းနေပုံ ရသော်လည်း သူ၏ ခန္ဓာကိုယ်မှာမူ ထင်မှတ်မထားလောက်အောင် နုပျိုနေ၏။

နှစ်အတော်ကြာ လေဖြတ်နေခဲ့သောကြောင့် သူ၏ ခြေလက်များမှာ အနည်းငယ်ကျုံ့ဝင်နေခဲ့သည်။ သို့ပေမည့် ဤအရွယ် အဘိုးအို တစ်ဦး၏ ခန္ဓာကိုယ်ပေါ်တွင် အရေးအကြောင်းများနှင့် အသက်ကြီး အစက်အပြောက်များ အများအပြား ရှိသင့်သော်လည်း လုံးဝ မရှိခဲ့ချေ။

ဤခန္ဓာကိုယ်မှာ အလွန် ချောမွေ့နေသော်လည်း ဧကရာဇ်ဟောင်း၏ အလွန် အိုမင်းပြီး အရေးအကြောင်းများ ပြည့်နှက်နေသော မျက်နှာကြောင့်သာ လူအများက သူ၏ ခန္ဓာကိုယ်ကို သတိမပြုမိခဲ့ကြခြင်း ဖြစ်သည်။

သို့ပေမည့် ဧကရာဇ်ဟောင်း၏ ဤငယ်ရွယ်ချောမွေ့သော ခန္ဓာကိုယ်မှာ သဘာဝမကျဘဲ အလွန် တောင့်တင်းနေသကဲ့သို့ ဖြစ်နေသည်။

မည်ကဲ့သို့ ဖော်ပြရမည်နည်း ဆိုလျှင် တချို့ နာမည်ကြီး မင်းသား၊ မင်းသမီးများ မျက်နှာကို ဘိုတော့စ် အများကြီး ထိုးထားသောကြောင့် ကြည့်ရသည်မှာ ချောမွေ့ပြီး နုပျိုနေသော်ငြား တကယ်တမ်းတွင် အရမ်း တောင့်တင်းနေပြီး ကြီးမားတဲ့ လှုပ်ရှားမှုတွေ လုပ်လို့မရသလို၊ မျက်နှာ အမူအရာလည်း မရှိသည့် အခြေအနေမျိုး ကဲ့သို့ပင်။

ယွင်ကျုံးဟဲ့ အံ့ဩသွားရသည်။ ‘ဒါ... ဒါက နုပျိုမှုကို ထိန်းသိမ်းထားတဲ့ လျှို့ဝှက်ချက်လား။ ကမ္ဘာမြေပေါ်က ဘိုတော့စ် လိုမျိုးလား။ ဒါပေမဲ့ အသက်ရှည်အောင် လုပ်တာကရော ဘယ်လိုမျိုးလဲ။ မီတျဲ ချိုင့်ဝှမ်းက လူတွေ ပြောခဲ့တာက ဧကရာဇ်ဟောင်းက အဲဒီတုန်းက သူ သိပ်မကြာခင် သေတော့မယ် ဆိုတာကို သိလို့ မလွှဲမရှောင်သာဘဲ အသက်ရှည်စေတဲ့ မိစ္ဆာ နည်းလမ်းကို စွန့်စားပြီး အသုံးပြုခဲ့တာတဲ့။

ရလဒ်အနေနဲ့ တစ်ဝက်ပဲ အောင်မြင်ခဲ့တယ်။ သူ့ရဲ့ ခန္ဓာကိုယ်က တကယ်ပဲ နုပျိုတဲ့ အနေအထားကို ပြန်လည် ရောက်ရှိသွားပေမယ့် ဘိုတော့စ်တွေ အများကြီး ထိုးထားသလိုမျိုး တစ်ကိုယ်လုံး တောင့်တင်းပြီး လေဖြတ်သွားခဲ့ရတယ်။

ပြီးတော့ မကြာသေးခင်က ဘေးထွက်ဆိုးကျိုးတွေ ဖြစ်ပေါ်လာပြီး တစ်ကိုယ်လုံးက အာရုံကြောတွေ ထုံကျင်သွားကာ သွေးလည်ပတ်မှုတွေ အခြေခံအားဖြင့် ရပ်တန့်သွားပြီး အသက်ရှူတာလည်း ရပ်တန့်သွားကာ သေလုနီးပါး လူနာ တစ်ယောက် ဖြစ်သွားခဲ့တာပဲ။

ဒါပေမဲ့ ဧကရာဇ်ဟောင်းရဲ့ ခန္ဓာကိုယ်က နုပျိုလာပေမယ့် ဘာလို့ မျက်နှာကတော့ ဒီလောက်တောင် အိုမင်းပြီး အရေးအကြောင်းတွေ၊ အသက်ကြီး အစက်အပြောက်တွေ ပြည့်နှက်နေရတာလဲ။’

ဤအချက်အလက်အားလုံးကို ခေတ္တဘေးဖယ်ထားလျှင်ပင် ဆေးပညာရှင်တစ်ဦးဖြစ်သည့် ယွင်ကျုံးဟဲ့သည် ဧကရာဇ်ဟောင်း၏ ခန္ဓာကိုယ်အတွင်းသို့ မည်သည့်အရာများကို ထိုးသွင်းလိုက်သောကြောင့် ယခုကဲ့သို့ ထူးဆန်းသော ပြောင်းလဲမှုများ ပေါ်ပေါက်လာရသနည်းဟူသော အချက်ကိုမူ အဖြေရှာနိုင်ခြင်း မရှိသေးပေ။

သို့ပေမည့် အဆိုပါဆေးဝါးက လူနာကို မည်သည့်သဘောတရားဖြင့် ကယ်တင်နိုင်သည်ကိုမူ ၎င်းသည် ရှင်းလင်းစွာ နားလည်သဘောပေါက်သွားပြီ ဖြစ်သည်။

ထိုဆေးဝါးသည် ရပ်တန့်လုနီးပါး ဖြစ်နေသော သွေးလည်ပတ်မှုကို ချက်ချင်း အရှိန်မြှင့်တင်ပေးပြီး၊ ထုံကျင်နေသော အာရုံကြောများနှင့် လုပ်ဆောင်ချက် ရပ်ဆိုင်းနေသည့် ဦးနှောက်အာရုံကြောစုများကိုပါ ပြန်လည်နိုးကြားလာစေရန် လှုံ့ဆော်ပေးခြင်း ဖြစ်၏။

ဆေးဝါး၏ အကျိုးသက်ရောက်မှု အချို့ကို ခေတ်သစ်ဆေးပညာဖြင့် တစ်စိတ်တစ်ပိုင်း ရှင်းပြနိုင်သော်လည်း၊ ကျန်ရှိသော အစိတ်အပိုင်းများကိုမူ သိပ္ပံနည်းကျ ရှင်းပြရန် ခဲယဉ်းလှသည်။

ယခုအခါ ယွင်ကျုံးဟဲ့ သိရှိသွားသည်မှာ မီတျဲချိုင့်ဝှမ်းမှ သုတေသနပြုနေသော ဤဆေးဝါးသည် အသက် ရှည်စေသည့် မိစ္ဆာနည်းလမ်း၏ ဘေးထွက်ဆိုးကျိုးများကို ကုသရန်သက်သက် မဟုတ်ဆိုသည့် အချက်ပင် ဖြစ်၏။

အတိတ်ကာလက နုဧကရာဇ်သည် ခန္ဓာကိုယ်ကို အသွင်ပြောင်းလဲခြင်း၊ အသက်ရှည်ခြင်းနှင့် နုပျိုမှုကို အမြဲ ထိန်းသိမ်းနိုင်ခြင်းဟူသော ပြည့်စုံသည့် မိစ္ဆာနည်းလမ်းကို ပိုင်ဆိုင်ခဲ့ဖူးသည်။

သို့သော်ငြား ထိုနည်းလမ်းသည် နောင်တွင် နှစ်ပိုင်းကွဲသွားခဲ့ပြီး အစိတ်အပိုင်းတစ်ခုကို လျှို့ဝှက် ဆန်းကြယ်သော အဖွဲ့အစည်းတစ်ခုက ရရှိသွားကာ ကျန်အစိတ်အပိုင်းတစ်ခုမှာ မီတျဲချိုင့်ဝှမ်းသို့ ရောက်ရှိသွားခဲ့၏။

ဤအစိတ်အပိုင်းနှစ်ခု ပေါင်းစပ်မိမှသာလျှင် ပြည့်စုံသော ခန္ဓာကိုယ်အသွင်ပြောင်းလဲမှု၊ အသက်ရှည်မှုနှင့် အံ့ဩဖွယ် ဆေးပညာရပ်ကို ရရှိနိုင်မှာ ဖြစ်သည်။

လက်ရှိလက္ခဏာများကို လေ့လာရလျှင် အဆိုပါ လျှို့ဝှက်အဖွဲ့အစည်းက ပိုင်ဆိုင်ထားသော မိစ္ဆာနည်းလမ်းမှာ ယင်(အအေး) သဘောဆောင်နေသည်။ ၎င်း၏ အကျိုးသက်ရောက်မှုမှာ ခန္ဓာကိုယ်ကို ရေခဲဖြင့် ပိတ်လှောင်ထားသကဲ့သို့ အေးခဲတောင့်တင်းစေပြီး အာရုံကြောများကို ထုံကျင်သွားစေသောကြောင့် ဖြစ်၏။

ဝူဝေ့ ဧကရာဇ်ဟောင်းသည် ထိုစဉ်က မိမိသက်တမ်း ကုန်ဆုံးတော့မည်ကို သိရှိသောကြောင့် စွန့်စားစမ်းသပ်ခဲ့ရာမှ ယခုကဲ့သို့ ကိုယ်လက်တောင့်တင်းပြီး လေဖြတ်သည့် ဝေဒနာကို ခံစားခဲ့ရခြင်း ဖြစ်သည်။

တစ်ဖက်တွင်မူ မီတျဲချိုင့်ဝှမ်း၏ ဆေးဖော်စပ်နည်းမှာ ယန်(အပူ) သဘောကို ဆောင်နေသည်။ ဤဆေး၏ အာနိသင်သည် အလွန်ပြင်းထန်လှပြီး အေးခဲနေသည့် အကျိုးသက်ရောက်မှုများကို ချေဖျက်ပစ်နိုင်စွမ်းရှိ၏။

ဤယင်နှင့်ယန် အင်အားစုနှစ်ခု ပေါင်းစပ်သွားသည့်အခါတွင်မူ မျှတမှုရှိသွားပြီး စစ်မှန်သော ခန္ဓာကိုယ် အသွင်ပြောင်းလဲမှုနှင့် အသက်ရှည်မှုကို ရရှိစေနိုင်တော့သည်။

ဤသည်မှာပင် အတိတ်က နုဧကရာဇ်သည် အစွမ်းထက်မြက်ကာ အစဉ်ထာဝရ နုပျိုနေခဲ့ရခြင်း၏ လျှို့ဝှက်ချက်ပင် ဖြစ်၏။

“ဒါပေမယ့် ဒါက ဘယ်လိုနည်းနဲ့ ဖြစ်နိုင်မှာလဲ။”

ခန္ဓာကိုယ်ကို အသွင်ပြောင်းလဲခြင်း၊ အသက်ရှည်ခြင်းနှင့် နုပျိုမှုကို ထိန်းသိမ်းနိုင်ခြင်းဟူသော ဤမိစ္ဆာနည်းလမ်းမှာ သန့်စင်သောကျောင်းတော်မှ ဆင်းသက်လာခြင်း ဖြစ်သည်။

ဤကမ္ဘာလောက၏ ဆေးပညာဖြင့်သာမက ခေတ်သစ်ကမ္ဘာ၏ ဆေးပညာနှင့်ပင်လျှင် ရရှိနိုင်ရန် မဖြစ်နိုင်ပေ။

သို့ရာတွင် ယွင်ကျုံးဟဲ့ကိုယ်တိုင် ဤလုပ်ငန်းစဉ်၏ အစိတ်အပိုင်းတစ်ခုတွင် ပါဝင်ခဲ့ရပြီး ဆေးဝါးကို စမ်းသပ်ဖူးသည့်အတွက် ဤသည်မှာ စိတ်ကူးယဉ်သက်သက် မဟုတ်ဘဲ သိပ္ပံပညာ၊ ဇီဝဗေဒနှင့် မျိုးဗီဇဆိုင်ရာ စွမ်းအင်တို့ ပေါင်းစပ်ထားခြင်းဖြစ်ကြောင်း ၎င်းသည် ရှင်းလင်းစွာ သိမြင်သွားခဲ့သည်။

အမှန်စင်စစ် ဤ သန့်စင်သောကျောင်းတော် ဟူသည်မှာ အဘယ်နည်း။ ထိုကျောင်းတော်ထံမှ သင်ယူရရှိသော ပညာရပ်များမှာ အဘယ်ကြောင့် လျှို့ဝှက်ဆန်းကြယ်သော ဆေးပညာများနှင့် သိပ္ပံပညာရပ်များ ဖြစ်နေရသနည်း။

အတိတ်က နုဧကရာဇ်သည်လည်း သန့်စင်သောကျောင်းတော်သို့ ရောက်ရှိခဲ့ဖူးသောကြောင့် ခန္ဓာကိုယ် အသွင်ပြောင်းလဲခြင်းနှင့် နုပျိုမှုကို ထိန်းသိမ်းနိုင်သည့် နည်းလမ်းကို ရရှိခဲ့ခြင်း ဖြစ်သည်။

ထို့အပြင် အလွန်အဆင့်မြင့်သည့် လက်နက်ထုတ်လုပ်ရေး နည်းပညာကိုပါ ရရှိခဲ့ရာ သူထုတ်လုပ်ခဲ့သည့် လက်နက်များသည် နှစ်ပေါင်းထောင်ချီ ကြာမြင့်ခဲ့သော်လည်း ယနေ့တိုင် သံမဏိကိုပင် ဖြတ်တောက်နိုင်စွမ်း ရှိနေဆဲ ဖြစ်၏။

မီတျဲချိုင့်ဝှမ်းကို တည်ထောင်သူသည်လည်း သန့်စင်သောကျောင်းတော်သို့ သွားရောက် ဖူးမြော်ခဲ့သောကြောင့် အံ့ဩဖွယ်ရာ ဆေးပညာရပ်များကို သင်ယူနိုင်ခဲ့ခြင်းဖြစ်ပြီး ယခုအခါ ဤလောကတွင် ဆေးပညာအရာ၌ အထွတ်အထိပ်သို့ ရောက်ရှိလာခြင်း ဖြစ်သည်။

မီတျဲချိုင့်ဝှမ်းရှိ ဂူတွင်းမှာ လုံးဝမှောင်မည်းနေသောကြောင့် လူအများက ၎င်းကို သာမန်ဂူတစ်ခုဟုသာ ထင်မှတ်နေကြသော်လည်း၊ ယွင်ကျုံးဟဲ့ မြင်နိုင်စွမ်း ရလာသည့်အချိန်တွင်မူ ထိုနေရာမှာ ဂူတစ်ခု လုံးဝမဟုတ်ဘဲ လူနာခန်းများစွာ ပါဝင်သည့် ခေတ်မီဆေးရုံကြီးတစ်ခု ဖြစ်နေသည်ကို အံ့ဩဖွယ်ရာ မြင်တွေ့ခဲ့ရ၏။

ထို့အပြင် မီတျဲချိုင့်ဝှမ်းမှ ဆရာကြီးမှာလည်း ဆံပင်တိုတိုနှင့် ပညာရှင်ဆန်သော ဝတ်ရုံကို ဆင်ယင်ထား သေးသည်။ ဤအချက်များကို ကြည့်ရုံမျှဖြင့် ယွင်ကျုံးဟဲ့သည် ဤကမ္ဘာလောက၏ အမြင့်ဆုံးသော အမှန်တရားများနှင့် နီးကပ်လာပြီဟု ခံစားလိုက်ရသည်။

မီတျဲချိုင့်ဝှမ်းက ယွင်ကျုံးဟဲ့အား ဆေးစမ်းသပ်ခိုင်းပြီး ထျန်းယန်ဧကရာဇ်ဟောင်းကို ဆေးသွားပေးခိုင်းခြင်းမှာ သာမန်လုပ်ရပ်တစ်ခုကဲ့သို့ ထင်ရသော်လည်း လက်တွေ့တွင်မူ မဟာဗျူဟာမြောက်သော ရည်ရွယ်ချက်များ ရှိနေ၏။

အသက်ရှည်စေသည့်၊ ခန္ဓာကိုယ်ကို ပြောင်းလဲစေသည့် ဤမိစ္ဆာနည်းလမ်းကို အဖွဲ့အစည်းနှစ်ခုက တစ်ဝက်စီ ပိုင်ဆိုင်ထားကြရာ ယခုအခါ မီတျဲချိုင့်ဝှမ်း၏ အစိတ်အပိုင်းမှာ ပြီးပြည့်စုံသွားပြီ ဖြစ်သည်။

ထို့ကြောင့် ဝူဝေ့ ဧကရာဇ်ဟောင်းမှာ ဤဆေးဝါး၏ ပထမဆုံးသော ဆေးစမ်းသပ်ခံ ပုဂ္ဂိုလ်ဖြစ်လာရတော့၏။

ယွင်ကျုံးဟဲ့သည် ယခုအခါ ဤကမ္ဘာလောက၏ နောက်ကွယ်မှ ကြိုးကိုင်သူများကို ဝေဝါးစွာ ခံစားသိရှိနေပြီ ဖြစ်သည်။

ဆေးအာနိသင်မှာ လွန်စွာမြန်ဆန်လှပြီး ဧကရာဇ်ဟောင်း၏ ခန္ဓာကိုယ်အတွင်း၌ ပေါက်ကွဲသွားသကဲ့သို့ ပြင်းထန်လှ၏။

ဖြူရော်နေသော သူ၏ခန္ဓာကိုယ်မှာ လျင်မြန်စွာပင် နီမြန်းလာပြီး နှလုံးခုန်သံများမှာလည်း တဖြည်းဖြည်း အားကောင်းလာသည်။

ဤသည်မှာ ဆေးအာနိသင်၏ ပထမဆုံးသော အကျိုးသက်ရောက်မှုဖြစ်သည့် သွေးလည်ပတ်မှုကို ပြင်းထန်စွာ လှုံ့ဆော်ပေးခြင်းပင် ဖြစ်၏။

သာမန်လူတစ်ဦးသာဆိုလျှင် ဤပြင်းထန်သော သွေးတိုးနှုန်းနှင့် လည်ပတ်မှုကို မခံနိုင်ဘဲ ခန္ဓာကိုယ် ပေါက်ကွဲ၍ သေဆုံးသွားနိုင်သော်လည်း ဧကရာဇ်ဟောင်း၏ သွေးများမှာ ရပ်တန့်လုနီးပါး ဖြစ်နေသောကြောင့် ဤတွန်းအားက အတိအကျ ကွက်တိဖြစ်သွားရခြင်း ဖြစ်သည်။

ထို့နောက် ဆေးအာနိသင်၏ ဒုတိယမြောက် အကျိုးသက်ရောက်မှုအဖြစ် အာရုံကြောများကို ပြင်းထန်စွာ လှုံ့ဆော်နိုးကြားလာစေသည်။ ဧကရာဇ်ဟောင်းမှာ ပြန်လည်အသက်ရှူလာပြီ ဖြစ်၏။

ယခင်က ဆေးစမ်းသပ်ခံရသူများသည် ဤဒုတိယအဆင့်သို့ပင် မရောက်နိုင်ဘဲ ဦးနှောက်အတွင်း သွေးကြောများ ပေါက်ကွဲကာ ချက်ချင်း သေဆုံးခဲ့ကြရသည်။

ယခုအခါ ဤဆေးဝါးသည် ဧကရာဇ်ဟောင်း၏ ခန္ဓာကိုယ်အတွင်း ဒုတိယမြောက် အန္တရာယ်အဆင့်ကို အောင်မြင်စွာ ကျော်ဖြတ်နိုင်ခဲ့လေပြီး နောက်ဆက်တွဲအနေဖြင့် ဆေးအာနိသင်၏ နောက်ဆုံးအဆင့်ဖြစ်သည့် ဦးနှောက်အာရုံကြောစုများကို လှုံ့ဆော်မှု စတင်လေ၏။

ဤအာနိသင်မှာမူ အတန်ငယ် ပြင်းထန်လှသောကြောင့် ဧကရာဇ်ဟောင်း၏ ခန္ဓာကိုယ်မှာ သိသိသာသာပင် တုန်ခါလာတော့၏။ အချိန်အတော်ကြာပြီးမှသာ သူ ရုတ်တရက် မျက်လုံးဖွင့်လာတော့သည်။

‘နိုးလာပြီ... အသက်ပြန်ရှင်လာပြီ။’

ဧကရာဇ်ဟောင်း၏ မျက်ဝန်းအစုံတွင် အေးစက်သော အရောင်အဝါများ ဖြတ်သန်းသွားပြီး လူသတ်လိုသော စိတ်ဆန္ဒများ ပြည့်နှက်နေလေသည်။ သို့သော်ငြား ယွင်ကျုံးဟဲ့နှင့် ဟောက်ချန်တို့ကို မြင်တွေ့လိုက်ရသည့် ခဏတွင်မူ သူ၏ အကြည့်တို့မှာ ချက်ချင်းပဲ ပျော့ပျောင်းညင်သာသွားတော့၏။

“ကျုပ်ကို ထူပေးပါအုံး။” ဧကရာဇ်ဟောင်းက တိုးတိုးလေး ပြောလိုက်သည်။

ထို့နောက် ယွင်ကျုံးဟဲ့ တွေ့ရှိလိုက်ရသည်မှာ ဧကရာဇ်ဟောင်း စကားပြောသည့်အခါ ပါးစပ် မဟကြောင်းပင် ဖြစ်သည်။

မဟုတ်သေးချေ၊ ပါးစပ်ကို ပိတ်ထားရုံမျှမက သူ၏ မျက်နှာပြင်မှာလည်း လွန်စွာ ပုံမှန်မဟုတ်ဘဲ တစ်စုံတစ်ခု ကပ်ငြိထားသကဲ့သို့ ဖြစ်နေ၏။

အတိတ်ကာလက ယွင်ကျုံးဟဲ့သည် ဧကရာဇ်ဟောင်း၏ ခန္ဓာကိုယ်မှာ နုပျိုချောမွေ့နေပါလျက် မျက်နှာမှာမူ အဘယ်ကြောင့် ဤမျှအထိ အိုမင်းရင့်ရော်ကာ အရေးအကြောင်းများ ပြည့်နှက်နေရသနည်းဟု အံ့ဩတုန်လှုပ်စွာ စဉ်းစားခဲ့ဖူးလေသည်။

“အောက်ယွီ လား။” ဧကရာဇ်ဟောင်းက မေးလိုက်၏။

“ကျုပ် ပါ။” ယွင်ကျုံးဟဲ့က တိုးတိုးလေး ပြန်ဖြေလိုက်သည်။

“ခင်ဗျားရဲ့ ဒီဆေးက...”

ယွင်ကျုံးဟဲ့က ပြန်ဖြေလိုက်၏။ “မီတျဲ ချိုင့်ဝှမ်းကနေ တောင်းလာတာပါ။ ကျုပ် သူတို့အတွက် ဆေးစမ်းသပ်ပေးခဲ့ပါတယ်။”

“ခင်ဗျားက ဆေးစမ်းသပ်ခံခဲ့တာလား။” ဧကရာဇ်ဟောင်း၏ မျက်လုံးများတွင် အံ့ဩမှုများ ပြည့်နှက်သွားတော့၏။ ဤကိစ္စကို သူ အသိဆုံးပင် ဖြစ်သည်။

နုဧကရာဇ် သေဆုံးသွားပြီးနောက် သူ၏ ခန္ဓာကိုယ် ပြောင်းလဲမှု၊ အသက်ရှည်မှုနှင့် နုပျိုမှုကို ထိန်းသိမ်းနိုင်သော မိစ္ဆာ နည်းလမ်းသည် ပျောက်ဆုံးသွားခဲ့၏။

လွန်ခဲ့သော နှစ်ရာချီခန့်က ဤ မိစ္ဆာ နည်းလမ်းသည် ကမ္ဘာလောကတွင် နောက်တစ်ကြိမ် ပြန်လည် ထွက်ပေါ်လာခဲ့သော်လည်း ပြီးပြည့်စုံခြင်း မရှိခဲ့ချေ။

မီတျဲ ချိုင့်ဝှမ်း ပိုင်ဆိုင်ထားသော အပိုင်းမှာလည်း မပြည့်စုံသောကြောင့် အမြဲတမ်း သုတေသန လုပ်နေပြီး ဆေးစမ်းသပ်မည့်သူကို ရှာဖွေနေခဲ့ရာ ဆယ်စုနှစ်ချီ အချိန်ယူခဲ့ရပြီး ကြီးမားသော တန်ဖိုးများ ပေးဆပ်ခဲ့ရကာ ဆေးစမ်းသပ်သည့် သေဒဏ်ကျ အကျဉ်းသားများ အားလုံး ရုတ်တရက် သေဆုံးခဲ့ကြသည်။

ယခုအခါ အမှန်တကယ်ပင် အောင်မြင်သွားပြီလား။ ထို့အပြင် အောက်ယွီသည် ကိုယ်တိုင် ဆေးစမ်းသပ် ခဲ့သည်လား။

ဤဆေးစမ်းသပ်မှု၏ သေဆုံးနိုင်ခြေမှာ ရာခိုင်နှုန်းပြည့်နီးပါး ရှိကြောင်း သိသိကြီးနှင့်ပင် စွန့်စားခဲ့သည်မှာ အသက်ကို ပဓာနမထားဘဲကြိုးပမ်းခဲ့ခြင်း ဖြစ်သည်။

သို့ပေမည့် အောက်ယွီသည် သူ့ကို ကယ်တင်ရန်အတွက် အသက်ကို ပဓာနမထားဘဲ ကြိုးပမ်းခဲ့ခြင်းလည်း ဖြစ်သည်။ ဤသည်မှာ မည်မျှလောက် ကြီးမားသော သစ္စာရှိမှုနည်း။ မည်မျှလောက် ကြီးမားသော ကျေးဇူးကြွေးနည်း။

ဧကရာဇ်ဟောင်း၏ အကြည့်များ တုန်ယင်သွားပြီး ပြောလိုက်၏။ “သား.. ငါ မင်းကို ကြီးမားတဲ့ ကျေးဇူးကြွေးကြီး တစ်ခု တင်သွားပြီ။ ဒီကျေးဇူးကို ငါ ဘယ်တော့မှ မေ့မှာ မဟုတ်ဘူး။”

ယွင်ကျုံးဟဲ့က ပြောလိုက်သည်။ “မီတျဲ ချိုင့်ဝှမ်းက အရင်က မျိုးဆက်ကိုးဆက်အထိ ဆေးဝါးတွေ ဖန်တီးခဲ့ပေမယ့် အားလုံး အလုပ် မဖြစ်ခဲ့ပါဘူး။ ကျုပ် သွားပြီး ဆေးစမ်းသပ်တော့မှ အကျိုးသက်ရောက်မှု ရှိသွားပြီး ရုတ်တရက် မသေသွားလို့ပါ။

ဒါကြောင့် သူတို့က ကျုပ်ရဲ့ သွေးထဲကနေ အရေးကြီးတဲ့ အရာတစ်ခုကို ထုတ်ယူပြီး ဆေးဖော်စပ်နည်းထဲကို ပေါင်းထည့်လိုက်တာပါ။ အဲဒါကြောင့် ဒသမမျိုးဆက် ဆေးဝါး ဖြစ်လာပြီး နောက်ဆုံးတော့ အကျိုးသက်ရောက်မှု ရှိသွားတာပါ။”