အခန်း ၁၆၆

🍋 Chapter 166

အခန်းထဲတွင် သူတို့နှစ်ဦးတည်းသာ ကျန်ရှိတော့သည်။

ကျိုးထျန်းက စကားမပြောရဲဘဲ နေမိ၏။ ယခုမူ သူက တခြားလူများကို ခြောက်လှန့်ခဲ့စဉ်က ထိုလူများ မည်သို့ခံစားခဲ့ရမည်ကို ကောင်းစွာ သဘောပေါက်သွားခဲ့ပြီ ဖြစ်သည်။

အသက်လတ်ပိုင်း အမျိုးသားက ပြုံးလျက် သူ့အနားသို့ တိုးလာရန် လက်ဟန်ပြလိုက်၏။

ကျိုးထျန်းသည် ကုလားထိုင်ကို ဂရုတစိုက် ရွှေ့လိုက်ရာ သူတို့နှစ်ဦးအကြား အကွာအဝေးမှာ လေးပုံတစ်ပုံမီတာခန့်ပင် မရှိတော့ပေ။

"ကျိုးထျန်း မလား... အသက်က သိပ်မကြီးသေးပေမဲ့ တော်တော်လေး ပါးနပ်တာပဲ"

"မင်း အသက် ၁၈ နှစ်ပဲ ရှိသေးပေမဲ့ ဂိမ်းကုမ္ပဏီတစ်ခု၊ ဗီလာအိမ်ဟောင်းတစ်လုံးကို ပိုင်ဆိုင်ထားပြီး ရုပ်ရှင်တစ်ခုမှာတောင် ရင်းနှီးမြှုပ်နှံထားတယ်လို့ ကြားတယ်၊ ဟုတ်လား"

"ဒါက... ဟို..."

ထိုလူသည် သူ၏စီးပွားရေးလုပ်ငန်း အများစုကို အကုန်အစင် ပြောပြနေသဖြင့် ကျိုးထျန်းမှာ ပြန်လည်ဖြေကြားရန် ခက်ခဲသွားရသည်။

ခေတ္တမျှ စဉ်းစားပြီးနောက် သူက ဤမျှသာ ပြောနိုင်တော့၏။

"မှန်ပါတယ်၊ အားလုံးက တရားဝင်ပါပဲ"

"ဟားဟား... မထိတ်လန့်ပါနဲ့လို့ ငါပြောသားပဲ၊ မင်း ဘာအမှားမှ လုပ်ထားတာမှ မဟုတ်တာ"

"မင်းက အထက်တန်းကျောင်း အောင်ခါစလူငယ်လေးတစ်ယောက်ဖြစ်ပြီး ဒီလောက်တိုတောင်းတဲ့ အချိန်အတွင်းမှာ ဒီလိုလှိုင်းတံပိုးတွေ ထအောင် လုပ်နိုင်တာ တကယ်ကို အထင်ကြီးစရာပဲ"

"ချီးမွမ်းပေးတာ ကျေးဇူးတင်ပါတယ်၊ သာမန်ပါပဲဗျာ" ကျိုးထျန်းက နှိမ့်ချစွာဖြင့် ချက်ချင်း ပြန်ပြောလိုက်သည်။

"အမြတ်လည်းရသေးတယ်၊ လူမသိသူမသိလည်း ဟန်ဆောင်နိုင်သေးတယ်ပေါ့။ မင်းက ငယ်ငယ်လေးရှိသေးပေမဲ့ သတ္တိတော့ ရှိသားပဲ’

‘ဂိမ်းကုမ္ပဏီကို ရယူခဲ့တဲ့ မင်းရဲ့ နည်းလမ်းတွေက တကယ့်ကို အထင်ကြီးစရာပဲ။ သာမန်လူတွေဆိုရင် မင်းကို လုံးဝရိပ်မိမှာ မဟုတ်ဘူး"

အသက်လတ်ပိုင်း အမျိုးသားက ပြုံးလျက် ပြောလိုက်သော်လည်း ကျိုးထျန်း၏ ကျောပြင်တစ်ခုလုံး စိမ့်ခနဲ အေးတက်သွားရပြန်သည်။

‘ဒီလူက ငါလုပ်ခဲ့တာတွေကို အကုန်သိနေတာလား...’

‘သူက ဘာလုပ်တဲ့လူလဲ...’

‘ပထမဆုံးအနေနဲ့ သူက အစိုးရအရာရှိတစ်ဦး ဖြစ်တာ သေချာပြီး အဆင့်မြင့်အရာရှိကြီးလည်း ဖြစ်ရမယ်...’

‘သူ့ရဲ့ အပြုအမူကို ကြည့်ရတာ အရှိန်အဝါကြီးမားပြီး စစ်တပ်အတွေ့အကြုံ ရှိခဲ့ဖူးတဲ့ ပုံစံမျိုးပဲ...’

‘ဟုတ်တယ်... သူ့အသံက အားကောင်းပြီး စစ်သားတစ်ယောက်လို လမ်းလျှောက်တတ်တာမို့ သူက စစ်သားတစ်ယောက် ဖြစ်ရမယ်...’

သူက ခေါင်းငုံ့လျက် တိတ်ဆိတ်စွာဖြင့် အတွေးနက်နေသည်ကို မြင်သောအခါ အသက်လတ်ပိုင်း အမျိုးသားက စကားစလိုက်၏။

"ငါ့ရဲ့ အဆင့်အတန်းကို ခန့်မှန်းနေတာလား"

"ခန့်မှန်းချက်က ဘယ်လိုလဲ... ပြောပြပါဦး"

သူက စကားမပြောဘဲ နေဆဲဖြစ်သည်ကို မြင်လျှင်

"ရပါတယ်... စိတ်ထဲရှိတာသာ ပြော၊ မှားရင်လည်း ဘာမှမဖြစ်ဘူး"

ကျိုးထျန်း ခေတ္တမျှ စဉ်းစားလိုက်သည်။

မိမိထက် အစွမ်းထက်သော လူတစ်ဦး၏ရှေ့တွင် နှိမ့်ချလွန်းခြင်း သို့မဟုတ် မာန်တက်လွန်းခြင်း မရှိဘဲ နေထိုင်မှသာ လေးစားမှုကို ရရှိနိုင်မည် ဖြစ်၏။

အလွန်အမင်း ရိုသေကျိုးနွံပြနေခြင်းက သူ့ကို အသုံးမကျသော အမှိုက်တစ်စကဲ့သို့သာ ထင်မြင်သွားစေလိမ့်မည်။

ထိုသို့ တွေးမိသည်နှင့် သူက စိတ်ကို လျှော့ချလိုက်ပြီး ကုလားထိုင်ကို အနည်းငယ် မှီချလျက် ဘေးရှိ ရေနွေးကြမ်းကို တစ်ငုံ သောက်လိုက်တော့၏။

"အစ်ကိုကြီးက စစ်တပ်နောက်ခံက လာတာလို့ ကျွန်တော် ထင်တယ်"

အသက်လတ်ပိုင်း အမျိုးသားက ကျိုးထျန်း၏အပြုအမူ ပြောင်းလဲသွားသည်ကို သတိပြုမိပြီး ခေါင်းကို အနည်းငယ် ညိတ်လိုက်သည်။

"အရမ်းကောင်းတယ်၊ မင်း တကယ်ကို ဉာဏ်ပြေးတာပဲ"

"ဒါပေမဲ့ ဒီနေ့ ကျွန်တော့်ကို ဒီကို ခေါ်ရတဲ့ တကယ့်အကြောင်းရင်းက ဘာလဲခင်ဗျာ၊ အစ်ကိုကြီးက ရဲအရာရှိတစ်ယောက် မဟုတ်တာ သေချာပေမယ့် ရဲတွေကို သုံးပြီး ကျွန်တော့်ကို ဆင့်ခေါ်ခဲ့တာပဲ။ ဘာဖြစ်လို့လဲ"

ကျိုးထျန်း အချိန်ဆွဲမနေဘဲ တည့်တည့်သာ မေးလိုက်တော့၏။

"ငါ မင်းကို ခေါ်ခဲ့တာက ဝမ်ချောင်နည်းပညာကုမ္ပဏီရဲ့ တာဝန်ခံနှစ်ယောက်ကြောင့်ပဲ"

ကျိုးထျန်း လုံးဝမအံ့သြမိပေ။

မကြာသေးမီက ဖြစ်ပျက်ခဲ့သည့် ကိစ္စများတွင် ဤတစ်ခုသာ ရှိသောကြောင့် ဖြစ်၏။

ထို့အပြင် ထိုလူနှစ်ဦး စခန်းထဲ ရောက်သွားသော်လည်း Weibo နှင့် Toutiao တို့တွင် ဝမ်ချောင်နည်းပညာနှင့် ပတ်သက်၍ အဘယ်ကြောင့် သတင်းမတက်လာသလဲဆိုသည်ကို သူ နားလည်သွားခဲ့ပြီ ဖြစ်သည်။

၎င်းက သူတို့ အမှားမလုပ်ခဲ့၍ မဟုတ်ဘဲ သူတို့လုပ်ခဲ့သည့် အမှားက ကြီးမားလွန်းသဖြင့် သတင်းများကိုပါ ပိတ်ပင်တားဆီးထားခြင်း ဖြစ်ရမည်။

‘ငါ့အထင်တော့ ထိုလူနှစ်ဦးက သာမန်မဟုတ်တဲ့ လူတစ်ယောက်ကို သတ်ခဲ့တာဖြစ်ရမယ်၊ ဒီအကြောင်းပြချက်ပဲ ယုတ္တိရှိတယ်...’

‘ပြီးတော့ ဝေဖေးယွီရဲ့ အရင်က အပြုအမူတွေကို ကြည့်ရင် သူက သေဆုံးသူရဲ့ အဆင့်အတန်းကို သိထားပုံရတယ်၊ ဒါကြောင့်လည်း သူက ဒီလောက်အထိ ကြောက်လန့်နေခဲ့တာ...’

သူ့မျက်နှာအမူအရာက ပြောင်းလဲခြင်းမရှိသည်ကို မြင်ရသဖြင့် အသက်လတ်ပိုင်း အမျိုးသား၏ ကျိုးထျန်းအပေါ် အထင်ကြီးမှုက ပိုမိုတိုးတက်လာခဲ့သည်။

လူငယ်ဟူသည် စိတ်လိုက်မာန်ပါ ရှိတတ်ကြသော်လည်း ဤလူငယ်လေးကမူ အများစုထက် ပိုမိုတည်ငြိမ်လှရာ ကြီးပွားတိုးတက်မည့်သူ ဖြစ်မှန်း သိသာလှ၏။

"အဲ့လူနှစ်ယောက်က အခု အပေါ်ထပ်မှာ ရှိနေကြတယ်။ သူတို့က ဒုက္ခရောက်နေကြရပြီး ထောင်ချောက်ဆင်ခဲ့တဲ့ မင်းကတော့ အိမ်မှာ အေးအေးဆေးဆေး ပုန်းနေတယ်ပေါ့"

အသက်လတ်ပိုင်း အမျိုးသားက ခပ်ဖွဖွရယ်မောလျက် သူ့ကို လက်ညှိုးထိုးကာ စနောက်လိုက်၏။

ကျိုးထျန်း ရင်ဘတ်ထဲတွင် ဒိတ်ခနဲ ဖြစ်သွားရသည်။

‘ဒါဆို... သူက ဝေဖေးယွီကို နောက်ကွယ်ကနေ ဖော်ထုတ်ခဲ့တာ ငါဆိုတာကို သိနေတာပေါ့...’

‘မဖြစ်နိုင်တာ... သူ ငါ့ကို လာလှည့်တိုက်နေတာလား...’

‘မဖြစ်ဘူး၊ ငါ အကွက်ထဲ မဝင်ရဘူး...’

"အစ်ကိုကြီး ဘာတွေ ပြောနေတာလဲဗျာ။ ကျွန်တော် ဝေဖေးယွီကို သိတာတော့ မှန်ပေမဲ့ သူ့ဆီမှာ ဘာဖြစ်ခဲ့သလဲဆိုတာကိုတော့ ကျွန်တော် မသိပါဘူး"

"ကောင်လေး... မင်းကတော့ လူလည်လုပ်ဖို့ တော်တော် အကွက်စုံတာပဲ၊ ဒါဆို မော်ဟုန်တာရော"

ကျိုးထျန်း မေးစေ့ကို ပွတ်သပ်လိုက်မိတော့၏။

သူက မော်ဟုန်တာ၏ နာမည်ကိုပါ ထုတ်ပြောလာပြီဖြစ်ရာ မိမိလုပ်ခဲ့သမျှကို ထိုလူက အတိအကျ သိရှိနေပြီ ဖြစ်သည်။

'ကောင်းပြီ... ဒါဆိုရင် ဟန်ဆောင်နေစရာ မလိုတော့ဘူး'

"အစ်ကိုကြီး အတိအကျ ဘာကို မေးချင်တာလဲ"

"မင်း တကယ့်ကို ပွင့်လင်းတာပဲ။ မျက်နှာအတော်ပြောင်တာပဲ၊ အရှက်ခွဲခံရတာတောင် ဘာမှမဖြစ်သလိုပဲနော်"

အသက်လတ်ပိုင်း အမျိုးသားက ခပ်ဖွဖွရယ်မောလျက် စကားအချို့ ပြောလာခဲ့သည်။

"ငါ မင်းကို ခေါ်ခဲ့တာက အဲ့လူနှစ်ယောက် ဒါကိုလုပ်ခဲ့မှန်း မင်း ဘယ်လိုသိလဲဆိုတာကို မေးချင်လို့ပဲ"

ဤမေးခွန်းကို မေးလိုက်သည့်အချိန်တွင် ကျိုးထျန်းသည် ထိုလူ၏အသက်ရှူသံက ပြင်းထန်လာပြီး လေသံကလည်း ပိုမိုတည်ကြည်သွားကြောင်း ခံစားလိုက်ရသည်။

သူက ပေါ့ဆစွာ မဖြေရဲသလို တကယ့်အမှန်တရားကိုလည်း တိုက်ရိုက်မပြောရဲပေ။ ဂျက်ဆီ၏ အကြောင်းကို သူ ဝန်ခံ၍မရချင်ပါ။

သူသည် စိတ်ကို စုစည်းလိုက်ပြီး အမှန်တရားနှင့် နီးစပ်၍ ယုတ္တိရှိမည့် စကားလုံးများကို ရွေးချယ်ကာ ပြောလိုက်တော့သည်။

"သူတို့ အတိအကျ ဘာလုပ်ခဲ့လဲဆိုတာကိုတော့ ကျွန်တော် မသိပါဘူး၊ ဒါပေမဲ့ သူတို့ရဲ့ ၂၀၀၁ ခုနှစ်က အကြောင်းကို ပြောတော့ အပြုအမူတွေက ထူးဆန်းနေတာကို ကျွန်တော် တွေ့ခဲ့ရတယ်။

ဒါကြောင့် ကျွန်တော်က သူတို့ကို ရည်ရွယ်ချက်ရှိရှိလှည့်စားလိုက်တာ၊ သူတို့က တကယ်ပဲ ကျွန်တော်သိနေတယ်လို့ ထင်ပြီး အရမ်းပျာယာခတ်သွားကြတာလေ၊ ဒါကြောင့် ကျွန်တော်လည်း အမှန်တရားကို စုံစမ်းဖို့ လူတစ်ယောက်ကို လွှတ်လိုက်တာပါ"

"ဒီလူနှစ်ယောက်က ဒီလောက်အထိ အန္တရာယ်များတဲ့သူတွေ ဖြစ်နေမယ်လို့ ကျွန်တော် ဘယ်လိုလုပ် သိမှာလဲဗျာ"

သူ လက်ကို ဘေးသို့ဆန့်လျက် အနေခက်သယောင် လုပ်ပြလိုက်၏။

အသက်လတ်ပိုင်း အမျိုးသားက ခေါင်းညိတ်လိုက်သည်။

‘ဒီကောင်လေး ပြောတာက တော်တော်လေးတိကျပြီး မော်ဟုန်တာရဲ့ ထွက်ဆိုချက်နဲ့လည်း ကိုက်ညီမှု ရှိတယ်...’

‘ဒါဆိုရင် ဒါက ကံကောင်းလို့ဖြစ်သွားတာပဲ၊ သူနဲ့ တကယ့် ဆက်နွှယ်မှုမရှိဘူးပေါ့...’

အမှန်တကယ်တွင် သူသည် ကျိုးထျန်းကို အစကတည်းက သံသယရှိသူအဖြစ် မသတ်မှတ်ခဲ့ပေ။

ဘာကြောင့်လဲဆိုသော် ကျိုးထျန်းမှာ အသက် ၁၈ နှစ်သာရှိသေးပြီး ထိုလူ သေဆုံးခဲ့သည်မှာ ၁၉ နှစ် ရှိခဲ့ပြီ ဖြစ်သည်။

အမှုဖြစ်ပွားချိန်တွင် သူက မွေးပင်မမွေးသေးရာ ဤကိစ္စတွင် သူ မည်သို့ ပါဝင်ပတ်သက်နိုင်ပါမည်နည်း။

သို့သော် သူသည် သူ၏အထက်လူကြီးဟောင်းအတွက် ရောက်ရှိလာခြင်းဖြစ်သဖြင့် အသေးစိတ်အချက်တိုင်းကို စုံစမ်းစစ်ဆေးရခြင်း ဖြစ်၏။

လွန်ခဲ့သော ၁၉ နှစ်က သူ့ အထက်လူကြီးဟောင်း၏မြေးဖြစ်သူသည် တက္ကသိုလ်မှ ဘွဲ့ရပြီးနောက် နန်ဟဲပြည်နယ်သို့ တစ်ဦးတည်း ခရီးထွက်ခဲ့ရာမှ ဘယ်တော့မှ ပြန်မလာတော့ပေ။

ထိုစဉ်က စုံစမ်းစစ်ဆေးရေး နည်းပညာများ အကန့်အသတ်ရှိသဖြင့် လိုက်လံရှာဖွေခြင်းက ပင်လယ်ထဲတွင် အပ်ရှာသကဲ့သို့ နှစ်နှစ်သုံးနှစ်ခန့် ကြာမြင့်ခဲ့ပြီးနောက် အထက်လူကြီးဟောင်းက စုံစမ်းစစ်ဆေးမှုကို လက်လျှော့ခဲ့ရသည်။

သို့သော် ထိုသက်ကြီးရွယ်အိုသည် ဤကိစ္စကို စိတ်ထဲမှမဖျောက်နိုင်ဘဲ နန်ဟဲ၏အခြေအနေကို အမြဲ စောင့်ကြည့်နေခဲ့၏။

လွန်ခဲ့သော ရက်အနည်းငယ်အထိ လူတစ်ယောက်က သူ့ထံသို့ အစီရင်ခံစာတစ်ခု ပေးပို့လာခဲ့သည်။

အထက်လူကြီးဟောင်းမှာ ယခုအခါ အသက်အရွယ်ကြီးရင့်နေပြီဖြစ်သဖြင့် ရုံးလုပ်ငန်းများကို မကိုင်တွယ်တော့သော်လည်း သူ၏တပည့်ဟောင်းတစ်ဦးအနေဖြင့် သူ ဤအမှုကို အမြဲ စောင့်ကြည့်ပေးနေခဲ့ခြင်း ဖြစ်သည်။

အစီရင်ခံစာကို ဖတ်ကြည့်သည့်အခါ အချိန်၊ တည်နေရာနှင့် အရိုးစု၏ ခန့်မှန်းခြေအသက်နှင့် အရပ်တို့က အားလုံးကိုက်ညီနေခဲ့သည်။ သူသည် ပျောက်ဆုံးနေသော မိမိ၏ညီငယ်ကို ရှာတွေ့ပြီ ဖြစ်ရမည်ဟု ချက်ချင်း ခံစားလိုက်ရ၏။

သူသည် အရာအားလုံးကို ပစ်ပယ်လျက် နန်ဟဲပြည်နယ်သို့ ချက်ချင်း တဟုန်ထိုးထွက်ခွာခဲ့တော့သည်။

ဒေသခံရဲတပ်ဖွဲ့၏ ခွဲခြမ်းစိတ်ဖြာမှုများအရ ထိုရုပ်ကြွင်းမှာ သူ ကြီးပြင်းလာသည်ကို စောင့်ကြည့်ခဲ့ရသည့် ညီငယ်၏ရုပ်ကြွင်းဖြစ်ကြောင်း ၉၉ ရာခိုင်နှုန်းကျော် သေချာသွားခဲ့ပြီ ဖြစ်၏။

၁၉ နှစ်တိုင်တိုင် သူ မျှော်လင့်ချက်အား လက်လျှော့ခဲ့ရသော်လည်း ယခုကဲ့သို့ ပြန်လည်ဖော်ထုတ်နိုင်မည့် အချိန် ရောက်လာလိမ့်မည်ဟု ထင်မထားခဲ့ပေ။

သူသည် အထက်လူကြီးဟောင်းထံသို့ ချက်ချင်းအကြောင်းကြားခဲ့ပြီးနောက် သူတို့၏ လုပ်ပိုင်ခွင့်အတွင်းမှ သက်ဆိုင်သူအားလုံးကို ဘက်စုံ စုံစမ်းစစ်ဆေးမှုများစတင်ခဲ့တော့သည်။

ဝေဖေးယွီနှင့် ဝမ်ရှောင်တို့ကလည်း သဘာဝကျစွာပင် ပါဝင်နေခဲ့ပြီး နာရီပိုင်းအတွင်းမှာပင် သူတို့နှစ်ဦးလုံးကို စောင့်ကြည့်မှုအောက်သို့ သွတ်သွင်းလိုက်၏။

မော်ဟုန်တာကိုပင် ခေါင်းအစ ခြေအဆုံး စစ်ဆေးမေးမြန်းခြင်း ခံခဲ့ရသည်။

ဤမကောင်းမှုများတွင် ပါဝင်နေသည့်လူမှာ ထိုကဲ့သို့သော ကြီးမားသည့် စစ်ဆေးမေးမြန်းမှုကို မြင်သောအခါ ချက်ချင်းအကုန်အစင် ဝန်ခံလိုက်တော့၏။

ထို့ကြောင့် ကျိုးထျန်းသည် ထိုအသက်လတ်ပိုင်း အမျိုးသား၏မြင်ကွင်းထဲသို့ ရောက်ရှိလာခြင်း ဖြစ်သည်။

စုံစမ်းစစ်ဆေးပြီးနောက် သူ အံ့သြသွားခဲ့ရသည်။

သူ ရရှိထားသည့် အချက်အလက်များအရ ကျိုးထျန်းမှာ တကယ့်ကို ထူးခြားသော လူတစ်ယောက် ဖြစ်နေသောကြောင့်ပင်။

ထို့အပြင် ကျိုးထျန်းတွင် ရဲများထက်ပင် ပိုမိုများပြားသော အချက်အလက်များ ရှိနေခဲ့ပြီး ၎င်းက သူ့လုပ်ငန်းနှင့် သက်ဆိုင်နေခဲ့သည်။

ထို့ကြောင့် သေချာစွာ စဉ်းစားပြီးနောက် သူသည် ကျိုးထျန်းနှင့် လူချင်း တွေ့ဆုံကာ ဤလူငယ်လေးကို ကိုယ်တိုင် အကဲခတ်ရန်ဆုံးဖြတ်ခဲ့ခြင်း ဖြစ်၏။

ဝေဖေးယွီနှင့် ဝမ်ရှောင်တို့ကို တွေ့ဆုံရန် ရှန်ဟိုင်းသို့ လာရမည်ဖြစ်သဖြင့် လမ်းကြုံ၌ ကျိုးထျန်းနှင့် တွေ့ဆုံခြင်းက အချိန်အများကြီးပေးစရာမလိုပေ။

သူ့ကို တွေ့ဆုံပြီးနောက် ဤလူငယ်လေးက ပိုစိတ်ဝင်စားစရာကောင်းမှန်း သူ သိရှိသွားခဲ့ရသည်။

‘ဒီကောင်လေးရဲ့ ကံတရားက အမြဲတမ်း ဒီလောက်အထိကောင်းနေတာလား...’

‘သူက ငါတို့ကို ဆယ်စုနှစ်တစ်ခုကျော်ကြာ ခေါင်းခဲစေခဲ့တဲ့ ပြဿနာကို မတော်တဆ ကူညီဖြေရှင်းပေးလိုက်တာပဲ...’

‘ဒီကောင်လေးရဲ့ ရည်ရွယ်ချက်က မရိုးသားဘူးဆိုပေမဲ့... သူ့ရဲ့ စရိုက်အရ အမြတ်မရှိရင် ဘာမှလုပ်မယ့်လူ မဟုတ်တာ သေချာတယ်... ‘

‘သူ ဂိမ်းကုမ္ပဏီသူဌေးကို လှည့်စားခဲ့တာကလည်း အကျိုးအမြတ်တစ်ခုခု ရဖို့ စီစဉ်ခဲ့တာပဲ ဖြစ်ရမယ်...’

‘ဒါပေမဲ့ ဥပဒေအရရော ကိုယ်ကျင့်တရားအရရော သူလုပ်ခဲ့တာက ဘာမှမမှားဘူး။ ပြီးတော့ သူက အရမ်းပါးနပ်ပြီး လုံးဝ လူသိမခံချင်ဘဲ လျှို့ဝှက်စွာ လုပ်ဆောင်သွားခဲ့တာ တကယ့်ကိုမြေခွေးအိုကြီးလိုပဲ...’

အသက်လတ်ပိုင်း အမျိုးသားက သက်ပြင်းချလိုက်မိသည်။

‘ဒီကောင်လေးကတော့ သူ ဘယ်လောက်အထိ ကြီးမားတဲ့ကျေးဇူးပြုပေးခဲ့လဲဆိုတာကို ကိုယ်တိုင်တောင် သိမှာမဟုတ်ဘူးပဲ...’