အခန်း ၁၃၈
Vol. 14 Ch. 138
🍏 Chapter 138
အပြင်ဘက်တွင် စစ်ဆေးမေးမြန်းမှုများ ထပ်မံစတင်လာသည်။ စောစောက ဆောင့်ကြောင့် ထိုင်နေသော အရပ်ရှည်ရှည် အမျိုးသားနှင့် အရပ်ပုပု အမျိုးသားတို့ကို မတ်တတ်ရပ်ခိုင်းပြီး ဆေးလိပ်သောက်ခွင့်ကိုပါ ပိတ်ပင်လိုက်သည်။
ဦးဆောင်လာသော ရဲအရာရှိက သူတို့ကို ဒေသန္တရဘာသာစကားဖြင့် ဆူပူကြိမ်းမောင်းနေပြီး ရဲများကြားတွင် ရပ်နေသော ဝဖြိုးဖြိုး အမျိုးသားကတော့ ဘာမှဝင်မပြောဘဲ အေးစက်စွာသာ စိုက်ကြည့်နေသည်။
ချန်စစ်ကျယ်သည် ထိုလူထံမှ အကြည့်ကို တွေးတောစွာဖြင့် လွှဲလိုက်ပြီး အမြဲတမ်း တိတ်ဆိတ်နေတတ်သော သူ နှုတ်ခမ်းကို ဖွင့်ကာ ရုတ်တရက် ဆိုလိုက်သည်။
“ရဲတွေလည်း ရောက်လာပြီ၊ ဒီလူနှစ်ယောက်ကိုလည်း ရဲတွေ စောင့်ကြည့်နေတာဆိုတော့ ငါတို့တွေ ကားပေါ်မှာပဲ သွားစောင့်ကြရအောင်၊ ဒီအတိုင်း မတ်တတ်ရပ်နေရင် မညောင်းဘူးလား”
ဝမ်သိုက်သည် မသိစိတ်ဖြင့် လှည့်ကြည့်လိုက်ရာ ချန်စစ်ကျယ်၏ မြေခွေးမျက်လုံးများနှင့် ဆုံသွားပြီး ထိုနက်မှောင်သော မျက်ဝန်းများထဲမှ သူပေးလိုသော လျှို့ဝှက်အချက်ပြမှုကို ချက်ချင်း နားလည် လိုက်သည်။
သူမသည် လက်နှစ်ဖက်ဖြင့် ဝမ်ဝေ့ဝေ့နှင့် ရှောင်ဟွေ့တို့ကို ကားဆီသို့ တွန်းပေးလိုက်ပြီး ရွှမ်ရွှမ်လေးကတော့ ဝမ်ဝေ့ဝေ့၏ လက်ကို ကိုင်ကာ အတူတူ လျှောက်လာကြသည်။
“ဒါဆို ကျွန်မတို့ ကားပေါ်မှာပဲ အရင်သွားထိုင်ရအောင်၊ ကျန်တဲ့ကိစ္စတွေကိုတော့ ကျွမ်းကျင်သူတွေဆီပဲ အပ်ထားလိုက်ရအောင်”
ဝမ်သိုက်က ပေါ့ပါးသော လေသံဖြင့် ပြောလိုက်သော်လည်း နှုတ်ခမ်းထောင့်တွင်တော့ ဟန်ဆောင် အပြုံးတစ်ခု ရှိနေသည်။ သူမသည် မိန်းကလေးများကို ကာကွယ်ရင်း ချန်စစ်ကျယ်၏ နောက်ကနေ ကားပေါ်သို့ တက်ခဲ့သည်။
ကားရှေ့ခန်း ကားတံခါး ပိတ်သွားသည်နှင့် ဝမ်သိုက်က ချက်ချင်း မေးတော့သည်။
“ဟိုရဲတွေထဲမှာ ပြဿနာရှိလို့လား”
သူမသည် ထိုင်ခုံနောက်မှီကို အသာမှီရင်း လက်တစ်ဖက်ဖြင့် နှာခေါင်းဘေးကို ကုတ်ချင်ယောင်ဆောင် ကာ အပြင်ကလူများ မရိပ်မိစေရန် မျက်လုံးကိုပါ ချန်စစ်ကျယ်ဘက်သို့ လုံးဝ မလှည့်ဘဲ မေးခြင်း ဖြစ်သည်။
ပြင်ပကနေ ကားထဲကို ကြည့်လျှင်တော့ သူမသည် အိမ်ရှေ့ခန်းတွင် ထိုင်ရင်း မျက်နှာကို သာမန်ကာလျှံကာ ပွတ်သပ်နေသည့် ပုံစံမျိုးသာ မြင်ရလိမ့်မည်။
“အင်း.... မင်းလည်း သတိထားမိတယ်ပေါ့”
ချန်စစ်ကျယ်သည်လည်း ဝမ်သိုက်ကဲ့သို့ပင် ရန်သူကို အာရုံလွှဲရန် လက်ဖြင့် ပါးစပ်ကို အုပ်ကာ စကားပြောသည်။
ဝမ်သိုက်အနေဖြင့် ချန်စစ်ကျယ်၏ အပြုအမူနှင့် ရဲတွေထဲမှာ ပြဿနာရှိနေခြင်း ကို ချက်ချင်း ဆက်စပ်မိသည်မှာ သူ၏စောစောက အမူအရာက အလွန် သိသာလွန်းသောကြောင့် ဖြစ်သည်။
“ကျွန်မ သူတို့ကို သေသေချာချာ မကြည့်မိပါဘူး၊ ဒါပေမဲ့ သူတို့ ရောက်လာတာနဲ့ ရှင်က ဘာမှလည်း မပြောဘဲ ကားပေါ်သွားထိုင်ဖို့ ချက်ချင်း နှိုးဆော်ခဲ့တာလေ၊ ရှောင်လွှဲဖို့ အချက်ပြတာက တကယ်ကို သိသာလွန်းပါတယ်”
ချန်စစ်ကျယ်က မျက်ခုံးကို အနည်းငယ် မြှောက်ကာ ခေါင်းကို မှီတိုင်ပေါ်သို့ မှီချလိုက်သည်။
“ဘယ်ဘက်ကနေ ရေတွက်ရင် တတိယမြောက်၊ ဝါကျင့်ကျင့် အသားအရေနဲ့ ဝဖြိုးဖြိုး ရဲအရာရှိပေါ့၊ သူက ဟိုလူနှစ်ယောက်နဲ့ မျက်လုံးချင်း အချက်ပြနေကြတာ၊ ဟိုလူနှစ်ယောက်က သူ့ကို ကြောက်နေတဲ့ ပုံစံရှိတယ်၊ သေချာပေါက် ပူးပေါင်းကြံစည်ထားတာ ဖြစ်ရမယ်”
သူက ကားရှေ့ခန်းက မိန်းမပျို၏ လှုပ်ရှားမှုကို မြင်လိုက်ရသဖြင့်
“...မင်း အဲဒီလောက်အထိ အတင်း စိုက်မကြည့်နဲ့လေ”
လည်ပင်းကို စောင်းပြီး ရဲအုပ်စုဆီသို့ အတင်း ချောင်းကြည့်နေသော ဝမ်သိုက်သည် ကိုယ်ကို ချက်ချင်း ပြန်မတ်လိုက်သည်။
သူမက ထိုင်ခုံနောက်သို့ မှီချကာ လက်နှစ်ဖက်ကို ရင်ဘတ်ပေါ်တွင် ပိုက်လိုက်ရင်း ဂရုမစိုက်ဟန်ဖြင့် ပြောသည်။
“ပူးပေါင်းကြံစည်ထားလည်း ဘာဖြစ်လဲ၊ သူက မြို့နယ်အဆင့် ရဲအသေးလေးပဲဥစ္စာ၊ အလွန်ဆုံးတော့ လက်ပါးစေပေါ့၊ ‘ဒုက္ခရောက်ရင် ကိုယ့်လမ်းကိုယ်သွားကြေး’ ဆိုတာ လင်မယားကြားတင် မဟုတ်ဘူး၊ ဒီလူကုန်ကူးအဖွဲ့ရဲ့ အနောက်က အကာအကွယ်ပေးသူ ကိုတောင် ဆွဲချတော့မှာ၊ သူကော ဘာတတ်နိုင်ဦးမှာလဲ”
ချန်စစ်ကျယ်က မျက်လုံးကို မှိတ်ထားပြီး ပျင်းရိသော လေသံဖြင့် ဆိုသည်။
“သူတို့က ငါတို့ကို ပြန်ပြီး မတရား စွပ်စွဲလာမှာ စိုးလို့ပါ၊ ဒီရွာရဲ့ ကိစ္စတွေကို ရဲအားလုံးက သိနေရက်နဲ့ သိသိသာသာ လျစ်လျူရှုထားကြတာလား ဆိုတာ ဘယ်သူမှ မပြောနိုင်ဘူးလေ”
တစ်ခါတရံတွင် ဝမ်သိုက်သည် ချန်စစ်ကျယ်ကို “ကျီးကန်းပါးစပ်” (နိမိတ်မကောင်းတာ ပြောတတ်သူ) ဟု တံဆိပ်ကပ်ချင်မိသည်။
တင်းမာနေခဲ့သော အာရုံကြောများသည် သူရှိနေခြင်းကြောင့် အနည်းငယ် လျော့ကျသွားပြီး တစ်စုံတစ်ယောက်က မိမိကိုယ်စား ရှေ့တန်းတွင် မတ်တတ်ရပ်ပေးနေသည်ကို မသိစိတ်က ခံစားမိသဖြင့် သူမ အိပ်ပျော်တော့မည့် အချိန်တွင်ပင် ကားမှန်ကို လာရောက် ခေါက်တော့သည်။
အပြင်ကလူက ကားတံခါးကို နှစ်ချက်ခန့် အရင်ဆွဲကြည့်ပြီး ဖွင့်မရသည့်အခါမှ မှန်ကို လာခေါက်ခြင်း ဖြစ်သည်။ ဝမ်သိုက် ထိုင်သည့်ဘက်ကို ခေါက်ခြင်း မဟုတ်သော်လည်း အိပ်မောကျခါနီး ဖြစ်နေသော သူမကိုတော့ လန့်နိုးသွားစေရန် လုံလောက်လှသည်။
ကားမှန်ကျသွားသည့်အခါ အပြင်တွင် ရပ်နေသော ဝါကျင့်ကျင့် မျက်နှာနှင့် ဝဖြိုးဖြိုး ရဲအရာရှိသည် မျက်မှောင်ကြုတ်ကာ ကားထဲကို တစ်ချက် ဝေ့ကြည့်ပြီးနောက် ဝမ်သိုက်၏ မျက်နှာပေါ်တွင် အကြည့်ကို ရပ်တန့်လိုက်သည်။
“မင်းပဲ ကျားဂူထဲကို ဝင်ပြီး ဟို လူကုန်ကူးခံရသူတွေကို ကယ်ထုတ်ခဲ့တာလား”
အိပ်ပျော်ခါနီးမှ အတင်း နှိုးခံလိုက်ရသည့် ခံစားချက်က အလွန် ဆိုးဝါးလှသည်။ ဝမ်သိုက်သည် မျက်လုံးကို ဖွင့်ကာ သူ့ကို ခဏမျှ စိုက်ကြည့်နေမိပြီး သူက မကျေမနပ်ဖြင့် ဒုတိယအကြိမ် ထပ်မေးမှပဲ ဖြည်းဖြည်းချင်း ဖြေလိုက်သည်။
“ဟုတ်တယ်လေ”
ထိုဝဖြိုးဖြိုး ရဲအရာရှိ၏ နှုတ်ခမ်းထောင့်က ကြွက်သားများ တုန်ယင်သွားပြီး ယူနီဖောင်းကို တင်းကျပ်နေအောင် ပင့်တင်ထားသော လက်နှစ်ဖက်ကို ရင်ဘတ်ပေါ်တွင် ပိုက်လိုက်ရင်း နှာခေါင်းရှုံ့ကာ လှောင်ရယ်လိုက်သည်။
“ဒီရွာက ရွာသားတွေရဲ့ စိတ်ဓာတ်ကို တို့မြို့နယ်ကလူတွေ အကုန်သိတယ်၊ သူတို့က ရိုးသားပြီး ကြင်နာတတ်ကြတာ... မင်းကမှ မြို့ပေါ်ကနေ ဒီနေရာအထိ အကြောင်းမဲ့ ရောက်လာတာလေ၊ လီကျိုးက ဒီလောက် ကျယ်ပြောတာကို မင်းက ဘာလို့ ဒီရွာကိုပဲ ကွက်တိ ရောက်လာရတာလဲ”
ဝမ်သိုက်တွင် အိပ်ချင်မူးတူးဖြင့် ရန်လုပ်တတ်သော အကျင့် မရှိသော်လည်း အိပ်နေရင်း အလန့်တကြား နှိုးခံရသည့်အတွက် စိတ်ကို တည်ငြိမ်အောင် ထိန်းရန် ခက်ခဲလှသည်။ သူမသည် ပါးစပ်အတွင်းပိုင်းကို ထောက်လိုက်ပြီး ခေါင်းကို စောင်းကာ ခက်ထန်သော အကြည့်ဖြင့် ထိုရဲကို ပြန်စိုက်ကြည့်လိုက်သည်။
“ကျွန်မ သွားချင်တဲ့နေရာ သွားတာပေါ့၊ ကျွန်မ ခရီးသွားတာကိုပါ လိုက်ချုပ်ချယ်ချင်တာလား၊ ရှင်က ဘာလို့ ဒီလောက်အထိ လိုက်ပတ်သက်နေရတာလဲ၊ ဘာလဲ... ကျွန်မက နိုင်ငံသားတစ်ယောက်အနေနဲ့ လွတ်လပ်စွာ သွားလာခွင့် မရှိတော့ဘူးလား၊ ရှင်က ကျွန်မကိုပဲ လူကုန်ကူးသူလို့ သံသယ ဝင်နေတာလား”
“ငါက သာမန်အတိုင်း စစ်ဆေးမေးမြန်းတာပဲ၊ မင်းက ဘာလို့ ဒီလောက်အထိ စိတ်လှုပ်ရှားနေရတာလဲ၊ ဖုံးကွယ်ထားတာ တစ်ခုခု ရှိနေလို့လား”
“ရှင်က ဟို သံသယရှိသူ နှစ်ယောက်ကို သွားမမေးဘဲ၊ အန္တရာယ်ကြားကနေ ကလေးတွေကို ကယ်ထုတ်လာတဲ့ နိုင်ငံသားတစ်ယောက်ကိုပဲ လာမေးနေတာဆိုတော့... ရှင်က သူတို့နဲ့ ပူးပေါင်းကြံစည်ထားတာ မဟုတ်လား”
ဝမ်သိုက်က လွယ်လွယ်ကူကူပင် ပြန်လည် ချေပလိုက်ပြီး ထိုင်ခုံပေါ်တွင် ကိုယ်ကို စောင်းလိုက်သည်။
သူမသည် ချန်စစ်ကျယ်ရှိရာ ဘက်သို့ ကိုယ်ကို အနည်းငယ် တိုးလိုက်ပြီး ပွင့်နေသော ကားမှန်မှ တစ်ဆင့် ထိုဝဖြိုးဖြိုး ရဲအရာရှိ၏ မည်းမှောင်သွားသော မျက်နှာကို ကြည့်ကာ စိတ်ဝင်တစားဖြင့် ထပ်မံ ဖိအားပေးသည်။
“ဘာလို့ စကားမပြောတော့တာလဲ၊ ကျွန်မပြောတာ မှန်သွားလို့လား၊ ရောက်ရောက်ချင်းပဲ ဒီက ရွာသားတွေက ရိုးသားပါတယ်လို့ လာပြောနေတာ... ရှင် သူတို့ကို ကာကွယ်ချင်လို့လား၊ အာဏာကို အလွဲသုံးစားလုပ်ပြီး ကိုယ်ကျိုးရှာချင်တာလား အရာရှိကြီး”
ဝမ်သိုက်နှင့် ထိုရဲအရာရှိကြားတွင် အကွာအဝေးတစ်ခု ရှိနေသဖြင့် သူမ သေချာမကြားရသော်လည်း ချန်စစ်ကျယ်ကတော့ ထိုရဲအရာရှိ၏ ရုတ်တရက် ပြင်းထန်လာသော အသက်ရှူသံကို အထင်အရှား ကြားလိုက်ရသည်။
သူက ကားအပြင်ကလူကို လှည့်ကြည့်လိုက်ရာ ထိုဝါကျင့်ကျင့် မျက်နှာကြီးပေါ်က ကြွက်သားများမှာ တုန်ရီနေပြီး မူလကတည်းက သေးငယ်သော မျက်လုံးများမှာ လူကို အတင်းစိုက်ကြည့်နေသဖြင့် ပဲစေ့ဝက်ခန့်သာ ရှိတော့သည်။
“မင်း လျှောက်ပြီး မတရား မစွပ်စွဲနဲ့၊ မင်း မတရားစွပ်စွဲတာနဲ့ အသရေဖျက်တာက ဘာလဲဆိုတာ သိရဲ့လား”
ကားတံခါးတစ်ခုနှင့် လူတစ်ယောက် ခြားနေသော်လည်း ထိုဝဖြိုးဖြိုး ရဲအရာရှိသည် ဝမ်သိုက်ကို လက်ညှိုးဖြင့် အတင်းထိုးရန် ကြိုးစားနေသည်။
သူ၏တုတ်ခိုင်သော လက်ညှိုးမှာ အနည်းငယ် တုန်ယင်နေပြီး ထိုလက်ညှိုးကို သေနတ်တစ်လက်အဖြစ် ပြောင်းလဲကာ ကျည်ဆန်များသာ ပစ်ထုတ်ချင်နေပုံရသည်။
ထိုအချိန်တွင် ကားထဲကနေ ချန်စစ်ကျယ်က အေးစက်တိတ်ဆိတ်စွာဖြင့် နှုတ်ခမ်းကို ဖွင့်လိုက်သည်။ သူ၏ အက်ကွဲသော အသံမှာ ထိုရဲအရာရှိကို ပြင်းထန်သော ရိုက်ခတ်မှုတစ်ခု ပေးလိုက်သလိုပင်။
“မတရား စွပ်စွဲမှုရဲ့ အဓိပ္ပာယ်ကတော့... တမင်တကာ မဟုတ်မမှန် သက်သေများကို လုပ်ကြံဖန်တီးပြီး တရားစီရင်ရေး အဖွဲ့အစည်းများထံ တိုင်ကြားကာ အခြားသူကို ရာဇဝတ်မှုဖြင့် အရေးယူခံရအောင် ကြံစည်ခြင်းကို ဆိုလိုတာ ဖြစ်တယ်၊ စီမံခန့်ခွဲမှုဆိုင်ရာ ပြစ်ဒဏ်များတွင်လည်း မဟုတ်မမှန် လုပ်ကြံ၍ အခြားသူကို မတရားစွပ်စွဲခြင်း လို့ သတ်မှတ်ထားတယ်”
“အသရေဖျက်မှုရဲ့ အဓိပ္ပာယ်ကတော့... တမင်တကာ မဟုတ်မမှန်သော အချက်အလက်များကို လုပ်ကြံ ဖြန့်ဝေပြီး အခြားသူ၏ ဂုဏ်သိက္ခာနှင့် အမည်နာမကို ထိခိုက်ပျက်စီးစေကာ အခြေအနေ ပြင်းထန်သော အပြုအမူကို ဆိုလိုတာ ဖြစ်ပြီး ရာဇသတ်ကြီး ဥပဒေကို ကိုးကားနိုင်တယ်၊ ပုဂ္ဂလိက ဥပဒေအရလည်း မည်သည့် အဖွဲ့အစည်း သို့မဟုတ် လူပုဂ္ဂိုလ်ကမျှ စော်ကားခြင်း၊ အသရေဖျက်ခြင်း နည်းလမ်းများဖြင့် အခြားသူ၏ ဂုဏ်သိက္ခာကို ချိုးဖောက်ခွင့် မရှိဘူး”
“ပြီးတော့ စော်ကားမှုရဲ့ အဓိပ္ပာယ်ကတော့... အကြမ်းဖက်ခြင်း သို့မဟုတ် အခြားနည်းလမ်းများဖြင့် အများပြည်သူရှေ့တွင် အခြားသူ၏ဂုဏ်သိက္ခာကို နှိမ့်ချပြီး အမည်နာမကို ဖျက်ဆီးခြင်းဖြစ်တယ်”