အခန်း ၁၄၉

🍏 Chapter 149

ပြောပြီးသည်နှင့် မိမိပါးစပ်ကို မိမိ နှစ်ချက်ခန့် ရိုက်ချင်စိတ် ပေါက်သွားသည်။ မိမိတွင် အကူအညီတောင်းစရာရှိနေပြီး တစ်ဖက်လူက တိုက်တိုက်ဆိုင်ဆိုင် ဖုန်းခေါ်ဆိုလာခြင်း ဖြစ်ပါလျက်နှင့် ပါးစပ်ကမူ အနိုင်ပိုင်းချင်နေဆဲ ဖြစ်ချေသည်။

သို့သော် တစ်ဖက်လူ၏ တုံ့ပြန်မှုက သူမ၏ ဦးနှောက်ကို အလုပ်မလုပ်တော့အောင် လုပ်ဆောင်လိုက်သည်။

ခဏမျှ တိတ်ဆိတ်သွားပြီးနောက်မှ ပေးလာသော အဖြေမှာ သူက "မဟုတ်ရင် ဘာဖြစ်ရမှာလဲ" ဟု ပြောလိုက်ခြင်းပင် ဖြစ်သည်။

နှလုံးသားသည် ခဏတာနစ်ဝင်သွားပြီး လည်ချောင်းထဲတွင် တစ်ဆို့သွားကာ သူနှင့်အတူ ရန်ဖြစ်ငြင်းခုံချင်သော ပြက်လုံးများမှာ ထွက်ပေါ်လာစရာ နေရာမရှိတော့ပေ။

ဝမ်သိုက်၏ အသက်ရှူသံများပင် ရပ်တန့်သွားသကဲ့သို့ ဖြစ်ရပြီး ခဏမျှသာကြာမြင့်သွားခြင်း ဖြစ်ကာ ရုပ်မြင်သံကြားထဲမှ ကြော်ငြာစာတန်း အချိန်လောက်ပင် မရှိသော်လည်း သူမသည် မိမိ၏ နှလုံးသားကို သဲသဲကွဲကွဲ ခံစားလိုက်ရသည်။ လုံးဝငြိမ်သက်နေရာမှ သက်ရှိထင်ရှား အသက်ဝင်လာခြင်းဖြစ်ပေသည်။

ဒုတ်ဒုတ်ဒုတ်နှင့် ခုန်နှိုးနေသော အသံကြောင့် ဝမ်သိုက်သည် နှလုံးသားက ဗုံတီးသကဲ့သို့ ခုန်နေသည်ဟူသော စကားပုံမှာ အလကား ဖန်တီးထားခြင်း မဟုတ်ကြောင်း နားလည်သွားခဲ့ပြီ ဖြစ်သည်။

"ရှင်က ကျွန်မကို ဘာလို့ စိတ်ပူရတာလဲ၊ အဓိပ္ပာယ်မရှိတာ၊ ရှင့်က ကျွန်မအပေါ် မကောင်းတဲ့စိတ်ကူး ရှိနေတာတော့ မဟုတ်ပါဘူးနော်”

“ချန်စစ်ကျယ် ရှင် တော်တော် ကြောက်ဖို့ကောင်းတာပဲ၊ မြင်းကောင်းက နောက်ပြန်လှည့်ရမယ့် မြက်ကို မစားဘူး၊ ယုန်ကလည်း အသိုက်နားက မြက်ကို မစားဘူး၊ ရှင် လူမဟုတ်ဘူး"

ထိန်းချုပ်မရသော ပါးစပ်က အဓိပ္ပာယ်မရှိသော စကားများကို ထုတ်ဖော်နေပြီး ဝမ်သိုက်သည် မိမိ၏တွေးတောနိုင်စွမ်းတစ်ခုလုံး ရှုပ်ထွေးသွားသည်ကို သိရှိသဖြင့် စိတ်ပျက်မှုက ပိုမို ပြင်းထန် လာချေသည်။

သူမသည် ချန်စစ်ကျယ်၏အဖြေကို မစောင့်ဆိုင်းတော့ဘဲ မိမိဘာသာ ထပ်မံ၍ တောင်းပန်လိုက်သည်။

"စိတ်မရှိပါနဲ့"

ထို့နောက်တွင်တော့ ဖုန်းလိုင်း၏ ဤဘက်ခြမ်းနှင့် ဟိုဘက်ခြမ်း နှစ်ခုစလုံးတွင် ထပ်မံ၍ တိတ်ဆိတ်သွားပြန်သည်။

ဤလူဆိုး အမျိုးသားသည် ခဲခဲယဉ်ယဉ်ဖြင့် လူလိုသူလို ပြုမူလာပြီး အသံမှာ အလွန်နူးညံ့လွန်းလှရာ ဝမ်သိုက်၏အသက်ကို နုတ်ယူတော့မည့်အတိုင်း ရှိချေသည်။

"ဘာကိစ္စ ဖြစ်လို့လဲ"

"ရှင့်အသံက တော်တော် နားထောင်လို့ကောင်းတာပဲ၊ ကျွန်မမှာ ရှင့်ကို အကူအညီတောင်းစရာ တစ်ခု ရှိတယ်”

ယခင်က ရန်တွေ့ချင်သော လေသံလေး အနည်းငယ် ပြန်လည်ပါဝင်လာသော်လည်း နှမြောစရာကောင်းသည်မှာ လှည့်ပတ်ပြီးနောက် နူးညံ့မှုအဖြစ်သို့ ပြောင်းလဲသွားပြန်သည်။

"...ကိစ္စတွေကို ရင်ထဲမှာ အောင့်မထားပါနဲ့၊ ငါတို့ရဲ့ ပူးပေါင်းဆောင်ရွက်မှု ဆက်ဆံရေးက မပြီးဆုံးသေးဘူးလေ၊ ငါ့ပါတနာရဲ့ စိတ်ခံစားချက်ကို ထိန်းညှိပေးဖို့ ငါ့မှာ တာဝန်ရှိတယ်လို့ ပုဂ္ဂိုလ်ရေးအရ ထင်မြင်မိပါတယ်၊ တကယ်လို့ သူမက စိတ်ခံစားချက်ကြောင့် အလုပ်တွေကိုပေါ့ဆသွားရင် ငါ့မှာ ဆုံးရှုံးမှု ရှိနိုင်တယ် မဟုတ်လား"

သူမသည် ပါးစပ်ကို အနည်းငယ်ဟလိုက်မိသည်။

ဘာပြောရမည်နည်း။ ကျွန်မမှာ ရှင့်ကို အကူအညီတောင်းစရာ ရှိတယ်။ ရှင့်အနေနဲ့ ကျွန်မရဲ့ အကျိုးဆောင်ရှေ့နေ လုပ်ပေးလို့ ရမလား ဟု ပြောရမည်လော။

စကားက ပါးစပ်က ထွက်မလာပေ။

မြှောက်ထားသော လက်ဖဝါးသည် ဆံပင်ပုံပေါ်သို့ ရောက်ရှိသွားပြီး ကုတ်ခြစ်ချင်စိတ် ပေါက်လာသည်။ ဝမ်သိုက်သည် နှာခေါင်းရှုံ့ချင်လာပြီး ဝမ်းနည်းခြင်းကြောင့် မဟုတ်ဘဲ မိမိကိုယ်ကို အသုံးမကျဟု ထင်မှတ်ခြင်း ဖြစ်ကာ မိမိကိုယ်ကို အထင်သေးခြင်း ဖြစ်ပေသည်။ ဂုဏ်သိက္ခာ မရှိသင့်သော အချိန်တွင် မိမိ၏ဂုဏ်သိက္ခာကို တင်းကျပ်စွာ ဆုပ်ကိုင်ထားပြီး မလွှတ်တမ်း ဖြစ်နေချေသည်။

အ‌သေအချာအားဖြင့်မူ လွန်ခဲ့ကတည်းက ဂုဏ်သိက္ခာမရှိတော့ဘဲ ဂုဏ်သိက္ခာ မရှိသင့်တော့သော ဖြစ်တည်မှု ဖြစ်ပါလျက်နှင့် သူမ အရှက်မရှိ ပြုမူခဲ့သော အကြိမ်အရေအတွက်မှာ မည်မျှ ရှိခဲ့ပြီနည်း။

ဉာဏ်ဆင်ပြီး ချန်မိသားစု မိဘများကို မိမိအတွက် အသုံးချခဲ့စဉ်တုန်းက သူမ ဤကဲ့သို့ မဖြစ်ခဲ့ဖူးချေ။ ဂုဏ်သိက္ခာကို တစ်ကြိမ်ပြီးတစ်ကြိမ် စွန့်ပစ်ခဲ့ပြီးဖြစ်ကာ အားနည်းသူအဖြစ် ဟန်ဆောင်ခဲ့သော အကြိမ်အရေအတွက်မှာလည်း မနည်းလှပေ။ သို့သော် အဘယ်ကြောင့်ဆိုသော် အမြဲတမ်း သူ၏ ရှေ့မှောက်တွင်သာ အားမာန်ပြချင်မိပြီး ဂုဏ်သိက္ခာကို လိုချင်ကာ ခေါင်းမငုံ့ချင်ရခြင်း ဖြစ်ပေသည်။

သူမ စကားမပြောသလို တစ်ဖက်လူကလည်း တိတ်ဆိတ်နေသည်။ ဖုန်းမချသေးဘဲ သူက သူမအား စောင့်ဆိုင်းနေချေသည်။

စခရင်မှ ထွက်ပေါ်လာသော အလင်းရောင်မှာ အနည်းငယ် နူးညံ့ပြီး သူမ၏ မျက်နှာပေါ်သို့ ကျရောက်နေကာ မိမိကိုယ်တိုင် မိမိ၏မျက်မှောက်ပုံစံကို မသိရှိသော်လည်း စိုစွတ်နေသော မျက်ဝန်းများမှ မျက်ရည် အနည်းငယ်စီးကျလာချေပြီ။

ကိစ္စရပ်များမှာ အလွန် ဆိုးရွားသွားနိုင်ချေ ရှိပေသည်။

"ကျွန်မ... ချင်တယ်..."

စကားလုံး အနည်းငယ်မျှသာ ဖြစ်သော်လည်း နောက်ဆုံးတွင် လည်ချောင်းထဲမှ ထွက်မလာခဲ့ဘဲ ဝမ်သိုက်သည် အခြားလက်တစ်ဖက်ဖြင့် စောင်ကိုလှမ်းဆွဲကာ လက်သည်းများဖြင့် ကုတ်ခြစ်နေမိသည်။

သူမသည် အခြားစကားများကို အသုံးချကာ အချိန်ဆွဲရင်း မိမိကိုယ်ကို စိတ်ပိုင်းဆိုင်ရာ ပြင်ဆင်မှု ပြုလုပ်သည်။

"ဒီနေ့ ကျွန်မနဲ့ ဦးလေးလိုင်တို့ သွားပြီး အချက်အလက်တွေ တင်ပြခဲ့တယ်၊ ဦးလေးက ကျွန်မအတွက် ပြန်လည် စစ်ဆေးခြင်း လုပ်ငန်းစဉ်ကို ပြန်စတင်ဖို့ ကူညီမယ်လို့ ပြောတယ်၊ ပြီးတော့ တတ်နိုင်သမျှ မြန်မြန် အရည်အချင်းရှိတဲ့ ရှေ့နေတစ်ယောက် ရှာဖို့လည်း ကျွန်မကို ပြောတယ်၊ အစ်မချင်ယန်နဲ့ အန်တီစွေ့လင်တို့ကလည်း သက်သေအဖြစ် ဗီဒီယိုတွေ ရိုက်ပေးထားကြတယ်၊ သူတို့ တရားခွင်မှာ တက်ရောက်ဖို့ သဘောတူကြတယ်"

"ကျွန်မကိုယ် ကျွန်မ တော်တော် အသုံးမကျဘူးလို့ ခံစားရတယ်၊ တစ်ခါတလေကျရင်"

"ကိစ္စတွေ အမှန်တကယ် မစတင်ခင်တုန်းကတော့ ကျွန်မကိုယ် ကျွန်မ ဘယ်လောက်တောင် သတ္တိရှိပြီး ဘယ်လောက်တောင် မာကျောသလဲဆိုတာ ပြသခဲ့ပေမယ့် အခု ကိစ္စတွေ တကယ် စတော့မယ့် အချိန်ကျတော့ ရလဒ်က မျှော်လင့်ထားတဲ့အတိုင်း ဖြစ်မလာမှာကို ပြန်ကြောက်နေပြန်ရော”

“နောက်ဆုံးမှာ အမှန်တရားက ရေပေါ် ပေါ်မလာမှာကို ကြောက်တယ်၊ ကျွန်မရဲ့ ကြိုးစားမှုတွေ၊ ကျွန်မရဲ့ ပေးဆပ်မှုတွေက အလဟဿ ဖြစ်သွားမှာကိုကြောက်တယ်၊ အဲ့လူတွေက အရင်အတိုင်း အာဏာလွှမ်းမိုးထားပြီး ကျွန်မနဲ့ ကျွန်မကို ကူညီချင်တဲ့သူတွေအားလုံးကို ဖျက်ဆီးပစ်မှာကို ကြောက်မိတယ်"

"လုပ်တော့ လုပ်ရဲပြီး ရလဒ်ကိုတော့ ရင်မဆိုင်ရဲဘူး၊ တော်တော် ရယ်စရာကောင်းတာပဲ"

ငိုသံပါသော လေသံလေးမှာ ဖြည်းည်းချင်း ပေါ်ပေါက်လာပြီး ဝမ်သိုက်၏မျက်ရည်များမှာ မသိစိတ်အရ မျက်နှာတစ်ခုလုံးတွင် စီးကျလာကာ စိုစွတ်မှုနှင့် လေထုထဲမှ အလင်းရောင်တို့ ထိတွေ့မိသည့်အခါ ခြောက်သွေ့သော အအေးဓာတ်ကို ပေးစွမ်းနေချေသည်။

ဖြစ်နိုင်သည်မှာ ဉာဏ်ဆင်ခြင်းသည် ယခင်ကတည်းက သူမ၏ မသိစိတ်ထဲမှ လက်နက်တစ်ခု ဖြစ်နေခြင်းကြောင့် ဖြစ်နိုင်သည်။ ချန်စစ်ကျယ်၏ နောက်ထပ် ထွက်ပေါ်လာသော စကားမှာ သူမ၏ အလိုအတိုင်း ဖြစ်သွားခဲ့သည်။

"ငါ မင်းရဲ့ အကျိုးဆောင်ရှေ့နေ လုပ်ပေးလို့ရတယ်၊ ပြီးခဲ့တဲ့ နှစ်တွေက ပြစ်မှုဆိုင်ရာ အမှုတွဲအချို့ကို ကိုင်တွယ်ခဲ့ဖူးတယ်၊ ငါ့ကိုယ် ငါ အရည်အချင်းရှိတယ်လို့ ယူဆပါတယ်၊ ဘယ်ကဏ္ဍမှာမဆို ပါရမီနဲ့ အတွေ့အကြုံပေါ်မှာပဲ မူတည်တာပါ၊ ငါ့ရဲ့ ပါရမီနဲ့ ကျွမ်းကျင်မှုက လုံလောက်တယ်လို့ ငါ ထင်တယ်"

"ဒါပေမဲ့ မင်းမှာ အခြား အတွေးရှိရင်လည်း ငါ မင်းကို ပြစ်မှုဆိုင်ရာ ရှေ့နေတစ်ယောက်နဲ့ မိတ်ဆက်ပေးလို့ရတယ်၊ သူမရဲ့ အရည်အချင်းက တော်တော်မြင့်မားတယ်၊ ဒါပေမဲ့ ချေပငြင်းခုံတဲ့ နေရာမှာတော့ မကျွမ်းကျင်ဘူး"

"ငါ ဒီနေရာမှာပြောတဲ့ ချေပငြင်းခုံခြင်း ဆိုတာ အရပ်ထဲကလို အနုတ်လက္ခဏာဆောင်တဲ့ ချေပခြင်းမျိုး မဟုတ်ဘူး၊ အမှန်တရားနဲ့ ဥပဒေကို ဆန့်ကျင်တဲ့ အရာတွေကို ပြစ်မှုဆိုင်ရာရှေ့နေက လုပ်လို့မရဘူးလေ”

“ဒါပေမဲ့ ဒီရှေ့နေက ဟာကွက်တွေကို အလျင်အမြန် ဖမ်းဆွဲနိုင်ခြင်း မရှိတာနဲ့ တစ်ဖက်လူကို ချက်ကျလက်ကျပြန်ပြီး တိုက်ခိုက်တဲ့ နေရာမှာ အားနည်းတာကို ဆိုလိုတာပါ၊ လိုက်လျောညီထွေမှု မရှိဘဲ ဒိုင်းပုံစံ ရှေ့နေမျိုး ဖြစ်ဖို့ ပိုများတယ်၊ မင်း လိုအပ်တာကတော့ လှံသွားပုံစံမျိုးဖြစ်တယ်"

ဖုန်းနားကြပ်မှ ထွက်ပေါ်လာသော အသံမှာ အခန်းတစ်ခုလုံးတွင် ပြည့်နှက်သွားပြီး သူမ၏ နားဘေးတွင် ဝေ့ဝဲနေချေသည်။

"မင်း ဘယ်လို တွေးလဲဆိုတာပေါ်မှာပဲ မူတည်ပါတယ်၊ ဒိုင်းကာပုံစံကလည်း စိတ်ချရပါတယ်၊ ဒိုင်းကာပုံစံက ရေရှည် ဥပဒေရေးရာ တိုက်ပွဲတွေမှာ အားသာချက်ရှိတယ်"

ချန်စစ်ကျယ်သည် ယခုနှစ်တွင် အသက်နှစ်ဆယ့်ခုနစ်နှစ် ပြည့်ရုံမျှသာ ရှိဦးမည်ဟု ခန့်မှန်းရသည်။ အတွေ့အကြုံ အရဆိုပါက သူသည် အဆင့်မြင့် ရှေ့နေအများစုထက်နည်းပါးမည်မှာ သေချာလှပြီး သူ ဖော်ပြခဲ့သော ထိုရှေ့နေကိုလည်း မှီမည်မဟုတ်ချေ။

သို့သော် အတူရှိခဲ့သည့် ဤတစ်နှစ်နီးပါးကာလအတွင်း ဝမ်သိုက်သည် သူ့အပေါ်တွင် အကြောင်းပြချက်မရှိသော ယုံကြည်မှုများနှင့် သေးငယ်သော အားကိုးလိုစိတ်များ စတင်ဖြစ်ပေါ်နေခဲ့ပြီဖြစ်သည်။