အခန်း ၁၆၆

အခန်း (၁၆၆) ဇနီးသည်များအတွက် ဝယ်ယူခြင်း

"ကျောက်လင်... ကျွန်မ ရှင်နဲ့ စကားပြောစရာ ရှိတယ်..."

တန်ထိုက်ပေါင်ပေါင်က ကျောက်လင် ပြေးလာသည်ကို မြင်လိုက်ရသည့်အခါ တစ်ညလုံး ခရီးပန်းလာသည့် ပင်ပန်းနွမ်းနယ်မှုများ ချက်ချင်း ပျောက်ကွယ်သွားပြီး ပျော်ရွှင်စွာ ပြောလိုက်၏။

ကျောက်လင်က တန်ထိုက်ပေါင်ပေါင်၏ လက်နှစ်ဖက်ကို အမြန်ဆုပ်ကိုင်လိုက်ပြီး လမင်း၏ အလင်းရောင်အောက်တွင် သူမ၏ အလွန်တင့်တယ်လှပသော်လည်း အနည်းငယ် ချစ်စရာကောင်းသည့် မျက်နှာလေးကို စူးစိုက်ကြည့်လိုက်ရာ ပို၍ပင် သံယောဇဉ် တိုးပွားလာမိသည်။

"ဘာပဲဖြစ်ဖြစ်... ငါ သဘောတူပါတယ်..."

ကျောက်လင်က ရက်ရောစွာ ပြောလိုက်၏။

ဤကိုယ်ခံပညာကို ရူးသွပ်သော ဇနီးသည်၏ စိတ်သဘောထားက အလွန်ပင် စင်ကြယ်လှသည်။

ကျောက်လင်က သူမကို ကောင်းကောင်း ဆက်ဆံသရွေ့ သူမကလည်း ကျောက်လင်ကို အမြဲတမ်း ပြန်လည် ကောင်းမွန်စွာ ဆက်ဆံပေးလိမ့်မည်။

ကျောက်လင်က တန်ထိုက်ပေါင်ပေါင်အပေါ် ဘယ်သောအခါမှ အမြတ်အစွန်းကို မမျှော်ကိုးခဲ့ချေ။ သူမသာ တောင်းဆိုရန် ရဲဝံ့မည်ဆိုလျှင် သူက ချက်ချင်းပင် သဘောတူပေးလိမ့်မည်။

ကျောက်လင်၏ စကားကို ကြားလိုက်ရသောအခါ တန်ထိုက်ပေါင်ပေါင်က ချက်ချင်း ပြုံးလိုက်၏။

"ကျွန်မ ဘာပြောမလဲဆိုတာတောင် မသိသေးဘဲနဲ့ ရှင်က သဘောတူလိုက်ပြီပေါ့..."

"ရှင့်ကို မဟာချင်မင်းဆက်ကို ဖြိုချခိုင်းရင်ရော သဘောတူမှာလား..."

တန်ထိုက်ပေါင်ပေါင်က သရော်သော အမူအရာဖြင့် ရယ်မောကာ ပြောလိုက်၏...

"သေချာတာပေါ့... မင်း ဘာပဲခိုင်းခိုင်း ကိုယ် လုပ်ပေးမှာပါ... အချစ်ရဲ့..."

တန်ထိုက်ပေါင်ပေါင်က သူ့ကို တမင် စနောက်နေခြင်း ဖြစ်ကြောင်း ကျောက်လင် ကောင်းကောင်း သိသော်လည်း သူ့၏ ချစ်စရာ ဇနီးသည် ပြုံးနိုင်စေရန်အတွက် ဟန်ဆောင်ထားရပေဦးမည်။

"ဟုတ်ပါပြီ... ဟုတ်ပါပြီ... နောက်ထပ် မစနောက်တော့ပါဘူး..."

"ကျွန်မ ရှင့်ဆီလာတာက ပေနင်စီရင်စုက ဓားပြစခန်းတွေကို ဘယ်လို သိမ်းပိုက်ရမလဲဆိုတာ ရှင့်ရဲ့ အကြံဉာဏ်ကို တောင်းချင်လို့ပါ..."

တန်ထိုက်ပေါင်ပေါင်က စနောက်ခြင်းကို ရပ်လိုက်ပြီး သူမ၏ ရည်ရွယ်ချက်ကို ချက်ချင်း ရှင်းပြလိုက်၏။

ထို့နောက် တန်ထိုက်ပေါင်ပေါင်က ဟေးလုံစခန်းကို လျန်ရှီးတောင်တန်းဆီ ခေါ်ဆောင်သွားခဲ့သည်။ အသက်ရှင်ရပ်တည်ရေး ပြဿနာကို ဖြေရှင်းရန်အတွက် သူမက ဒေသတွင်း ဓားပြစခန်းများကို တိုက်ခိုက်သိမ်းပိုက်ရပေမည်။ ထို့နောက် စန်းတျဲ့ရှီ (စစ်သူကြီးသုံးပါးတောင်ကြား) ၏ သစ္စာဖောက်မှုကြောင့် ပေနင်စီရင်စုရှိ ဓားပြစခန်းများက ပူးပေါင်းကာ ရှရွှယ်ချန်တောင်မှ ပြောင်းရွှေ့လာသော ဓားပြစခန်းအချို့ကို အတင်းအကျပ် မောင်းထုတ်ခဲ့ကြသည်။

ယခုအခါ ဟေးလုံစခန်းသည် ရှေ့မတိုးသာ နောက်မဆုတ်သာ ဖြစ်နေပြီး တောင်ကုန်းတစ်ခုပေါ်တွင်သာ ပုန်းအောင်းရင်း ဘာလုပ်ရမှန်း မသိဖြစ်နေရသည်။

ဤအကြောင်းအရာကို ကြားပြီးနောက် ကျောက်လင် အခြေအနေကို နားလည်သွား၏။

"မင်းကို ကူညီဖို့ နည်းလမ်း ကိုယ် သိပြီးပြီ..."

"မနက်ဖြန် မနက်ကျရင် ကိုယ် မင်းကို အဂ္ဂိရတ်လက်နက် အချို့ ပေးလိုက်မယ်... မင်း ဒါတွေကို ယူသွားပြီးရင် ပေနင်စီရင်စုက ဓားပြစခန်းအားလုံးကို သေချာပေါက် သိမ်းပိုက်နိုင်မှာပါ..."

ကျောက်လင်က အနည်းငယ် ပြုံးကာ ပြောလိုက်၏။

တန်ထိုက်ပေါင်ပေါင်မှာ ခဏမျှ မှင်တက်သွားသည်။

*ဒါလောက်တောင် လွယ်ကူတာလား…*

"အဲ့ဒါ ဘယ်လို လက်နက်မျိုးလဲ... မြန်မြန် ပြောပြပါဦး... မဟုတ်ရင် ဒီည ကျွန်မ အိပ်ပျော်မှာ မဟုတ်ဘူး..."

တန်ထိုက်ပေါင်ပေါင်က မေးခွန်းများဖြင့် ဆက်တိုက် မေးမြန်းလိုက်၏။

"အခုလောလောဆယ်တော့ လျှို့ဝှက်ထားပါဦးမယ်... မနက်ဖြန် မနက်ကျရင် မင်း သိလာမှာပါ..."

ကျောက်လင်က အနည်းငယ် ပြုံးကာ ပြောလိုက်၏။

ယနေ့အတွက် စနစ်ဈေးဆိုင်မှ ဝယ်ယူမှုများ အကုန်လုံး ကုန်သွားပြီ ဖြစ်သည်။

ကျောက်လင်က အကျပ်အတည်းကို ဖြေရှင်းနိုင်မည့် နည်းလမ်းကို ရှာတွေ့ထားပြီး ဖြစ်သည်။ ဟေးလုံစခန်းအား ဘားရတ် စနိုက်ပါ ရိုင်ဖယ် (၅၀) ကို ပေးလိုက်မည်ဆိုလျှင် ငွေရောင်ရိုးတွင်းခြင်ဆီနယ်ပယ် ကျွမ်းကျင်သူများကိုပါ ပုန်းအောင်း သတ်ဖြတ်နိုင်ပြီး ပေနင်စီရင်စုမှ ဓားပြခေါင်းဆောင်များကို ဆက်တိုက် လုပ်ကြံနိုင်မည်ဖြစ်သည်။ ဤသို့ဆိုလျှင် ထိုဓားပြစခန်းများ၏ ယုံကြည်မှုမှာ သဘာဝအတိုင်း ပျက်ပြားသွားလိမ့်မည်။

“ရှင်... ရှင်က တကယ့်ကို လူဆိုးပဲ..."

“ရှင်က ကျွန်မကို ဒီမှာ ထိန်းထားချင်တာလား... ပြီးတော့ ကျွန်မကို တစ်ခုခု မကောင်းတာ လုပ်ဖို့ ကြိုးစားနေတာလား..."

တန်ထိုက်ပေါင်ပေါင်က ချက်ချင်းပင် အဓိပ္ပာယ် လွဲမှားသွားပြီး ဒေါသကြောင့် သူမ၏ မျက်နှာမှာ ရဲတက်သွား၏။

ကျောက်လင်က နှုတ်ခမ်းကို စူလိုက်သည်။

ရှင်းပြဖို့ကလည်း မဖြစ်နိုင်တော့ပေ။

သို့သော်လည်း ကျောက်လင်၏ ရင်ထဲတွင်မူ အနည်းငယ် လှုပ်ရှားသွားမိ၏။ ကိုယ်ခံပညာကို ရူးသွပ်သော ဇနီးသည်က ချစ်ခင်နှစ်သက်မိသည့်အခါ အလွန်တက်ကြွလာပြီး လုံးဝ ကွဲပြားခြားနားသော ဆွဲဆောင်မှုမျိုး ရှိလာတတ်သည်။

"ဟီးဟီး..."

ကျောက်လင်က လိမ္မာပါးနပ်စွာ ရယ်မောလိုက်ပြီး အောက်ဘက်ရှိ အာကာသတဲကို လက်ညှိုးထိုးပြလိုက်၏။

"မင်း ဒီည ဒီမှာ နားနေလို့ ရတယ်... ဒါက အာကာသတဲပဲ... အထဲက အိပ်ရာက အရမ်း နူးညံ့တယ်... မင်း သဘောကျမှာပါ..."

တန်ထိုက်ပေါင်ပေါင်ကလည်း အာကာသတဲကို သဘာဝအတိုင်း မြင်လိုက်ရသည်။

ကျောက်လင်က သူမကို ဆက်ပြီး စိတ်လှုပ်ရှားအောင် ထားထားသဖြင့် တန်ထိုက်ပေါင်ပေါင်မှာ နေရစ်ရန်သာ ရွေးချယ်လိုက်ရတော့သည်။

ချက်ချင်းပင် ကျောက်လင်က တန်ထိုက်ပေါင်ပေါင်ကို စားဖိုဆောင်ကြီးဆီ ခေါ်သွားပြီး အစားအစာများ ကျွေးကာ သူမ စားနေသည်ကို ပြုံး၍ ကြည့်နေလိုက်၏။

စုယောင်၊ ရှန်ချန်းရွှယ်နှင့် တခြားသော ဇနီးသည်များက ကျောက်လင်သည် နောက်ထပ် အလွန်တင့်တယ်လှပသော မိန်းမပျိုတစ်ဦးကို ခေါ်ဆောင်လာသည်ကို မြင်လိုက်ရသောအခါ သူတို့၏ မျက်လုံးများတွင် သတ်ဖြတ်လိုသော အငွေ့အသက်များ ဖြတ်ပြေးသွားသော်လည်း လက်ခံရုံမှတစ်ပါး အခြားရွေးချယ်စရာ မရှိကြပေ။

မည်သို့ပင်ဆိုစေကာမူ ဤဇနီးသည်များက ကျောက်လင် နောက်ထပ် ဇနီးတစ်ဦးကို လက်ထပ်လိုက်လျှင် သူက ပို၍ သန်မာလာစေမည့် လျှို့ဝှက်စွမ်းအားကို ရရှိလိမ့်မည်ဟု သိထားကြသည်။

သဘာဝကျစွာပင် ဤဇနီးသည်များထဲမှ မည်သူမျှ ကျောက်လင် ပို၍ သန်မာလာခြင်းကို မတားဆီးလိုကြပေ။ သူတို့သည် မိမိတို့၏ ခံစားချက်များကိုသာ ချုပ်တည်းပြီး ကျောက်လင်ကို အခြားဇနီးသည်များ ထပ်မံ လက်ထပ်ခွင့် ပေးလိုက်ရသည်။

အစားစားပြီးနောက် ကျောက်လင်က တန်ထိုက်ပေါင်ပေါင်၏ အရှက်အကြောက်ကြီးမှုကို ဂရုမစိုက်တော့ဘဲ သူမကို အာကာသတဲထဲသို့ အတင်းအကျပ် ဆွဲခေါ်သွားလိုက်၏။

ကျောက်လင်က မနက်စောစောတွင် နိုးလာသည်။

"မနေ့ညက တစ်ညလုံး ရူးသွပ်ခဲ့ပြန်ပြီ... ဒါပေမဲ့ ကံကောင်းတာက ငါက ငွေရောင်ရိုးတွင်းခြင်ဆီနယ်ပယ်ရဲ့ အထွတ်အထိပ်မှာ ရောက်နေလို့ ဒါကို ခံနိုင်ရည် ရှိနေတာ..."

ပင်ပန်းသော်လည်း ကျောက်လင်သည် တစ်ညအတွင်း သူ၏ ကျင့်ကြံမှုအဆင့်ကို +၇ တိုးတက်လာသည့် စိတ်လှုပ်ရှားမှုကို ခံစားနေရ၏။

စနစ်၏ မျက်နှာပြင်။

ကျင့်ကြံမှုအဆင့်: ၁၈+

နောက်ထပ် တစ်ရက်လောက် ကြိုးစားလိုက်လျှင် သူ၏ ကျင့်ကြံမှုကို အဆင့်မြှင့်တင်ရန် သို့မဟုတ် စိတ်စွမ်းအားကို တိုးတက်စေရန် အသုံးပြုနိုင်ပြီ ဖြစ်သည်။

ဤအချိန်တွင် ကျောက်လင်က အိပ်ရာမှ မထသေးပေ။

"ဒီနေ့ ငါ ပစ္စည်းတွေ အများကြီး ဝယ်ဦးမယ်..."

"အရင်ဆုံး ဇနီးသည်တစ်ယောက်ချင်းစီ လိုအပ်တဲ့ ပစ္စည်းတွေကို အကုန် ဝယ်လိုက်မယ်..."

ကျောက်လင်က မိမိကိုယ်ကို တွေးတောနေပြီး သူ၏ စိတ်အာရုံက စနစ်မျက်နှာပြင်ပေါ်တွင် ရှိနေ၏။

【ဘားရတ် စနိုက်ပါ ရိုင်ဖယ်: ၅၀,၀၀၀ အမှတ်】

“အခု (၁၀၀) ဝယ်မယ်”

【စနိုက်ပါ ကျည်ဆန်: ၅၀ အမှတ်】

“အခု (၁၀,၀၀၀) ဝယ်မယ်”

ဒါကိုတော့ တန်ထိုက်ပေါင်ပေါင်အတွက် ဝယ်လိုက်ခြင်း ဖြစ်သည်။

【မီးတောက်နဂါး အဂ္ဂိရတ်မီးဖို: ၈၀,၀၀၀ အမှတ်】

“(၅)ခုဝယ်မယ်”

【ရွှေနွယ်ပင်: ၁၀၀ အမှတ်】

“အခု (၁၀,၀၀၀) ဝယ်မယ်”

【သွေးကြောနွယ်: ၁၂၀ အမှတ်】

“အခု (၁၀,၀၀၀) ဝယ်မယ်”

【ကျောက်စိမ်းလက်ဖက်ညွန့်: ၁၅၀ အမှတ်】

“အခု (၁၀,၀၀၀) ဝယ်မယ်”

【ရွှေဂျင်ဆင်း: ၂၀၀ အမှတ်】

“အခု (၁၀,၀၀၀) ဝယ်မယ်”

ဒါကိုတော့ ဇနီးသည် ချင်းလန်အာအတွက် ဝယ်လိုက်ခြင်း ဖြစ်သည်။

ပစ္စည်း (၇) မျိုးကို တစ်ပြိုင်နက်တည်း ဝယ်ယူလိုက်၏။

ယနေ့အတွက် နောက်ထပ် ဝယ်စရာ ပစ္စည်း တစ်မျိုးသာ ကျန်တော့သည်။

"ယွီဝမ်ချန်ကို အခန်းထဲမှာ ထားခဲ့တာ (၃) ရက်ရှိပြီ... သူမရဲ့ ခွန်အားတွေ ပြန်လည် ပြည့်ဝလာဖို့ ကူညီပေးနိုင်လိမ့်မယ်..."

ခဏမျှ တွေးတောပြီးနောက် ကျောက်လင် ဆုံးဖြတ်ချက် တစ်ခု ချလိုက်၏။

ကျောက်လင်က ဤ အက်စ်အဆင့် အလှမယ်ကို ပိုင်ဆိုင်ရန် သန္နိဋ္ဌာန် ချထားသည်။

【မွေးရာပါ စိတ်စွမ်းအား နိုးထခြင်းအသီး: ၁,၅၀၀,၀၀၀ အမှတ်】

“တစ်လုံး ဝယ်မယ်”

ခဏလေးအတွင်းမှာပင် ကျောက်လင်သည် ၁၃,၁၀၀,၀၀၀ အမှတ်ကို ထပ်မံ သုံးစွဲလိုက်၏။

စနစ်အမှတ်: ၃၄၂,၃၃၀,၆၆၀

အမှတ် သန်း (၃၀၀) ကျော် ကျန်ရှိနေသေးသဖြင့် သုံးစွဲဖို့ လုံလောက်သည်ထက် ပိုနေသည်ဟု ခံစားရ၏။

ချက်ချင်းပင် ကျောက်လင်က အာကာသတဲထဲမှ ထွက်လာပြီး အနီးရှိ ဂူထဲတွင် ရေချိုးလိုက်၏။

ကျောက်လင် ဂူထဲမှ ထွက်လာသောအခါ တန်ထိုက်ပေါင်ပေါင်သည် သူမ နေထိုင်သည့် အာကာသတဲ၏ တံခါးဝတွင် ပြုံးရွှင်စွာ ရပ်နေသည်ကို မြင်လိုက်ရပြီး သူမ၏ မျက်လုံးများက ကျောက်လင်အပေါ် စူးစိုက်နေကြ၏။

တန်ထိုက်ပေါင်ပေါင် ဘာကို ဆိုလိုသလဲဆိုတာကို သူမ မပြောခင်ကတည်းက ကျောက်လင် သိလိုက်သည်။

"ခဏလောက် စောင့်ပါဦး..."

ပြောပြီးနောက် ကျောက်လင် လှည့်ထွက်လာပြီး ဂူထဲသို့ ပြန်ဝင်သွားလိုက်၏။ ထို့နောက် သူက အလွတ်အခန်း တစ်ခုသို့ သွားပြီး သစ်သားသေတ္တာ (၆) လုံးကို ထုတ်လိုက်သည်။

စနိုက်ပါ ရိုင်ဖယ် (၅၀) ကို ထုတ်ယူပြီး ကျောက်လင်က သစ်သားသေတ္တာ (၅) လုံးထဲတွင် ထည့်လိုက်၏။

စနိုက်ပါ ကျည်ဆန် (၁,၀၀၀) ကို ဆဋ္ဌမမြောက် သစ်သားသေတ္တာထဲတွင် ထည့်လိုက်၏။

ချက်ချင်းပင် ကျောက်လင်က သစ်သားသေတ္တာ နှစ်လုံးကို တစ်ဖက်တစ်ချက်စီ ကိုင်ပြီး ဂူထဲမှ ထွက်လာခဲ့သည်။

တန်ထိုက်ပေါင်ပေါင်က ကျောက်လင် သစ်သားသေတ္တာများကို သယ်လာသည်ကို မြင်လိုက်ရသောအခါ ချက်ချင်းပင် ပြေးလာပြီး သေတ္တာတစ်လုံးကို ဖက်ထားလိုက်၏။

"ငါနဲ့အတူ တောင်ပေါ် လိုက်ခဲ့ပါ... ဒီ အထူးအဂ္ဂိရတ်လက်နက်ကို ဘယ်လို သုံးရမလဲဆိုတာ ငါ ပြောပြမယ်..."

ကျောက်လင်က တည်ငြိမ်စွာ ပြောလိုက်၏။

တန်ထိုက်ပေါင်ပေါင် ခေါင်းညိတ်လိုက်ပြီး ကျောက်လင်နောက်သို့ ထင်းရှူးနက်တောင် ထိပ်ဆီ လိုက်ပါသွားသည်။

သစ်ပင်များ ထူထပ်သည့် နေရာသို့ ရောက်သောအခါ ထိုသူနှစ်ဦးက သစ်သားသေတ္တာကို ချလိုက်ကြသည်။

ကျောက်လင်က သူ၏ သစ်သားသေတ္တာကို ဖွင့်လိုက်ရာ စနိုက်ပါ ရိုင်ဖယ် (၁၀) လက် ပါဝင်နေသည်။

"အင်း... ဒီလက်နက်က ရင်းနှီးနေသလိုပဲ..."

အရင်တစ်ခါက ကျောက်လင်က တန်ထိုက်ပေါင်ပေါင်ကို ရိုင်ဖယ်နှင့် ပစ်ခဲ့ဖူးသဖြင့် သူမကို ကြောက်လန့်သွားစေခဲ့သည်။

စနိုက်ပါ ရိုင်ဖယ်နှင့် တိုက်ခိုက်ရေး ရိုင်ဖယ်တို့၏ အရွယ်အစားမှာ ကွဲပြားသော်လည်း သူတို့၏ ပုံစံမှာ အနည်းငယ် ဆင်တူနေသည်။

"ဒီစနိုက်ပါ ရိုင်ဖယ်က ငါ အရင်တစ်ခါ မင်းကို ပစ်ခဲ့တဲ့ ရိုင်ဖယ်ထက် အများကြီး ပိုပြီး ပြင်းအား ကောင်းတယ်..."

"ရိုးရိုးရှင်းရှင်း ပြောရရင် ဒီ စနိုက်ပါ ရိုင်ဖယ်က ငွေရောင်ရိုးတွင်းခြင်ဆီနယ်ပယ် ကျွမ်းကျင်သူကိုတောင် လုပ်ကြံနိုင်တယ်..."

ကျောက်လင်က ပြုံးကာ ပြောလိုက်၏။

ဤအကြောင်းကို ကြားလိုက်ရသောအခါ တန်ထိုက်ပေါင်ပေါင်က စိတ်လှုပ်ရှားစွာဖြင့် ခုန်ပေါက်လိုက်သည်။ ကျောက်လင် မနေ့ညက ပြောခဲ့သော ဖြေရှင်းချက်ကို သူမ နောက်ဆုံးတော့ နားလည်သွားပြီ ဖြစ်သည်။