အခန်း (၉၈၁-၉၈၂)

အခန်း (၉၈၁) လူကို အနိုင်ကျင့်လွန်းလှချည်လား ၊ လောကကို တုန်လှုပ်စေသည့် တိုက်ပွဲကြီး

ရိုင်းစိုင်းရုန်းရင်းဆန်ခတ်ဖြစ်နေသော ထိုရှေးဦးလောကမြေရိုင်းပြင် မာန်ဟွန်းကမ္ဘာ အတွင်း၌ လေထုမှာ အနည်းငယ် လေးလံထိုင်းမှိုင်းနေသည်။

ထိုနတ်ဘုရား ၏ မျက်ဝန်းများက အရောင်အမျိုးမျိုး လင်းလက်လှုပ်ခတ်သွားပြီးနောက်

ခဏအကြာတွင် အေးစက်တည်ငြိမ်စွာဖြင့် ပြောဆိုလိုက်သည်။

"ဒီအရှင်က နတ်မင်းကြီးရဲ့ အမိန့်တော် ကို ခံယူပြီး လူ့ပြည်ကို ဆင်းသက်လာခဲ့တာ။ မင်းက မင်းရဲ့နောက်ခံကို မပြောပြချင်ဘူးဆိုတော့လည်း... မသိလို့ ကျူးလွန်မိတဲ့အပြစ်ကို ခွင့်လွှတ်ရမယ်ပဲ ဆိုပါစို့။ ဒါပေမဲ့ ဒီ ရွှေနဂါးကတ်ကြေး ကိုတော့ ငါ မဖြစ်ဖြစ်အောင် ယူမှာပဲ။"

လီယန်ချူသည် မျက်ခုံးကို ပင့်လိုက်မိသည်။ ဤနတ်ဘုရား၏ စကားပြောသံအရ နတ်လောက ၏ အင်အားစုများသည် လူ့လောကထက် အဆပေါင်းများစွာ ပိုမိုရှုပ်ထွေးပုံရကြောင်း သူ သဘောပေါက်လိုက်သည်။ မိမိက မဟာဝေ ဟူသော အမည်နာမတစ်ခုကို ဆွဲထုတ်သုံးလိုက်ရုံဖြင့် တစ်ဖက်လူအား ဤမျှအထိ တွန့်ဆုတ်သွားစေသည် မဟုတ်ပါလော။

သို့သော် အခြားတစ်ဖက်မှ ကြည့်လျှင်လည်း နတ်လောက ‌၏ အာဏာလုပွဲများသည် လူ့ပြည်ထက် များစွာ ပိုမိုပြင်းထန်ပုံရသည်ကို မြင်နိုင်သည်။

"လူရှိတဲ့နေရာမှာ လောကဓံ ဆိုတာ ရှိစမြဲပဲ"

လီယန်ချူ၏ စိတ်ထဲတွင် ဤအတွေးတစ်ချက် ဖြတ်ခနဲ ဝင်လာခဲ့သည်။

နတ်ဘုရားက စတင်လှုပ်ရှားလိုက်ရာ လက်ဝါးတစ်ချက်ကို ဝှေ့ယမ်းပြီး ရိုက်ချလိုက်လေသည်။

ထိုခဏခြင်းတွင်ပင် ကောင်းကင်မျက်နှာကြက်တစ်ခုလုံး အုပ်မှိုင်းသွားပြီး ရောင်စုံအလင်းတန်းများ ပျံ့လွင့်သွားကာ ပိတ်ဆို့သွားတော့သည်။

လီရးယန်ချူ တစ်ဦးတည်းသာမက၊ ထိုအနီးအနားရှိ ကျင့်ကြံသူအားလုံးပါ ထိုစွမ်းအင်အတွင်း၌ ချုပ်နှောင်ခြင်း ခံလိုက်ရသည်။

ဤကြောက်မက်ဖွယ်ကောင်းသော ဖိအားလှိုင်းကို ခံစားလိုက်ရသဖြင့် လူတိုင်း၏ စိတ်ဝိညာဉ်များ တုန်လှုပ်ချောက်ချားသွားကြရသည်။

"ဒါက မြေပြင်နတ်ဘုရား ရဲ့ စစ်မှန်တဲ့ စွမ်းအားလား"

ဤအရပ်ရှိ ဒြပ်စင်စွမ်းအင် အားလုံးသည် လုံးဝဥဿုံ ပိတ်ဆို့ခံလိုက်ရသဖြင့် လူတိုင်းကို ပျက်စီးခြင်းသို့ ဦးတည်နေသည့် အငွေ့အသက်မျိုး ပေးစွမ်းနေသည်။

ထို့နောက်တွင် လူတိုင်းက ထိုခန့်ညားထည်ဝါပြီး အရပ်မြင့်မားသော လူငယ်လေးကို မြင်တွေ့လိုက်ရသည်။ သူသည် မိမိ၏ လှံရှည်ကြီး ကို မြေပြင်ပေါ်သို့ အားပြင်းပြင်းဖြင့် စိုက်ချလိုက်လေသည်။

ဒေါင်...

ကျယ်လောင်လှသော သံမဏိသံကြီးတစ်ချက် ထွက်ပေါ်လာသည်။

မြေပြင်ကြီး တစ်စစီ ပြိုကွဲသွားပြီး ကြောက်မက်ဖွယ်ကောင်းသော အက်ကြောင်းကြီးများ ထင်ကျန်ရစ်ခဲ့သည်။

ကောင်းကင်ယံထက်တွင်မူ ထိုရောင်စုံအလင်းကာရံကြီးသည် လျှပ်ခနဲ ရပ်တန့်သွားတော့သည်။

လီယန်ချူက လှံရှည်ကြီးကို လွှဲယမ်းကာ ပိုင်းချလိုက်ရာ ရောင်စုံအလင်းကာရံကြီးသည် ချက်ချင်းပင် နှစ်ခြမ်းကွဲသွားခဲ့သည်။

သူသည် အထက်သို့ တိုက်ရိုက် တိုးဝင်သတ်ဖြတ်လိုက်ပြီး၊ သူ၏ ခန္ဓာကိုယ်ပေါ်တွင် စင်ကြယ်သော ယန်လျှပ်စီးမီးတောက် အငွေ့အသက်များ ထွက်ပေါ်လာကာ သွေးချီအင်အားမှာ သမုဒ္ဒရာကြီးပမာ သောင်းကျန်းနေတော့သည်။

တစ်ကိုယ်လုံးတွင် ရွှေရောင်နတ်ဘုရားအလင်းတန်းများ တဖျတ်ဖျတ် တောက်ပနေလျက်—

ဝုန်း...

လီယန်ချူက လက်သီးတစ်ချက်ကို ပြင်းထန်စွာ ထိုးနှက်လိုက်သည်။

ဤတိုက်ခိုက်မှုတွင် နှစ်ဦးစလုံးသည် အင်အားချင်း တူညီစွာဖြင့် အလဲအလှဲ ဖြစ်သွားကြသည်။

နတ်ဘုရားက မျက်မှောင်ကြုတ်လိုက်မိသည်။ ဤလူသည် လက်ရှိတွင် ကျင့်ကြံခြင်းအဆင့်အရ မြေပြင်နတ်ဘုရားအဆင့်သို့ မရောက်သေးပါဘဲလျက် ဤမျှ ကြောက်မက်ဖွယ်ကောင်းသော ဖိအားမျိုးကို မည်သို့ ထုတ်ဖော်နိုင်ရသနည်း။

"သူက ဘယ်လမ်းကြောင်းကနေတစ်ဆင့် လူ့ပြည်ကို ဆင်းသက်လာတာလဲ "

နတ်ဘုရားသည် လီယန်ချူ၏ ခန္ဓာကိုယ်ကြံ့ခိုင်မှု့ အပေါ် အနည်းငယ် အံ့ဩချီးကျူးမိသွားသည်။

ဝုန်း... ဝုန်း... ဝုန်း...

နှစ်ဦးစလုံးသည် မျက်စိတစ်မှိတ်အတွင်း၌ ပြင်းထန်သော တိုက်ကွက်ပေါင်းများစွာကို ထိပ်တိုက်ရင်ဆိုင်လိုက်ကြပြီးနောက် လင်းလက်သော အလင်းတန်းနှစ်ခုအဖြစ် နောက်သို့ ပြန်လည် ဆုတ်ခွာသွားကြပြန်သည်။

ဟင်းလင်းပြင်ကြီး တစ်ခုလုံး တုန်ခါသွားရသည်။

နတ်ဘုရားသည် မျက်မှောင်ကြုတ်လျက် မိမိ၏ အပိုင်းပိုင်းပြတ်လုနီးပါး ဖြစ်သွားသော လက်ချောင်းအချို့နှင့် သွေးသံရဲရဲ ဖြစ်နေသည့် လက်ဝါးပြင်ကို ကြည့်လိုက်မိရာ ဖြူဖွေးသော အရိုးဖြူဖြူများပင် မြင်နေရပြီ ဖြစ်သည်။

စောစောက အပြန်အလှန် တိုက်ခိုက်မှုအရ မိမိ၏ အင်အားက တစ်ဖက်လူထက် များစွာ ပိုမိုသန်မာကြောင်း ထင်ရှားစွာ ခံစားသိရှိနိုင်သည်။

သို့သော် အခြားတစ်ဖက်လူ၏ ရုပ်ကလပ်က အလွန်တရာ ကြံ့ခိုင်လွန်းလှပြီး၊ ခန္ဓာကိုယ်ပေါ်တွင်လည်း ကိုယ်အကာကွယ်ရတနာ ရှိနေသည်။ သို့သော် ထိုအရာများထက် ပို၍အရေးကြီးသည်မှာ သူ၏လက်ထဲရှိ လှံရှည်ကြီး၏ သတ်ဖြတ်ခြင်းအရှိန်အဝါက အလွန်ထက်မြက်လှသဖြင့် ရင်ဆိုင်ရ ခက်ခဲလွန်းခြင်းပင် ဖြစ်သည်။

နတ်ဘုရားက လက်ကို ဆန့်ထုတ်ကာ ရွှေနဂါးကတ်ကြေး ကို တိုက်ရိုက် လှမ်းဖမ်းလိုက်သည်။

ထိုအချိန်တွင် နတ်ဘုရားမ၏ စိတ်ဝိညာဉ် ထံမှ နတ်ဘုရားအလင်းတန်းများ ရုတ်တရက် ပေါက်ကွဲထွက်ပေါ်လာခဲ့သည်။

ရွှေနဂါးကတ်ကြေးသည် အလင်းရောင်များ အဆမတန် တောက်ပလာပြီး ရွှေရောင်နဂါးနှစ်ကောင် အဖြစ် ပြောင်းလဲသွားကာ ကောင်းကင်ယံတွင် ရစ်ပတ်ပြီး ပြင်းထန်စွာ တစ်ချက် ညှပ်ချလိုက်လေသည်။

နတ်ဘုရား၏ လက်မောင်းတစ်ဝက်ခန့် ပြတ်တောက်သွားပြီး၊ ခန္ဓာကိုယ်တွင်းမှ ရွှေရောင်သွေးများသည် မြေပြင်ပေါ်သို့ စီးကျလာရာ ချက်ချင်းပင် အတိုင်းအဆမရှိသော သက်စောင့်အသက်စွမ်းအင် များ ပေါက်ကွဲထွက်လာတော့သည်။

ခန္ဓာကိုယ် နှစ်ပိုင်းပြတ်နေသော်လည်း ချက်ချင်း သေဆုံးခြင်းမရှိသေးသည့် ကင်းခြေများကောင်ကြီး တစ်ကောင်သည် ဤသွေးစက်များနှင့် ထိတွေ့မိသွားရာ

၎င်း၏ ခန္ဓာကိုယ်ပေါ်က ဒဏ်ရာများ ချက်ချင်း ပြန်လည်ကောင်းမွန်လာပြီး၊ စက္ကန့်ပိုင်းအတွင်း ခေါင်းနှစ်လုံး ထွက်လာကာ ကိုယ်ပေါ်က အငွေ့အသက်များကလည်း အလွန် ထူးဆန်းဆန်းပြား ဖြစ်သွားတော့သည်။

ဖတ်... ဖတ်... ဖတ်...

၎င်း၏ ကိုယ်ပေါ်တွင် အက်ကြောင်းများ အဆက်မပြတ် ပွင့်ထွက်လာပြီး ခြေထောက်ပေါင်းများစွာမှာ ကိုယ်ပေါ်မှ တိုးထွက်လာကြရာ သိပ်သည်းဆဲဖြစ်ပြီး ရုတ်တရက်ဆိုသလို လွန်စွာ ထူးဆန်းပြီး သရဲသဘက်ဆန်သော ပုံစံသို့ ပြောင်းလဲသွားသည်။

လူတိုင်းက ဤသည်ကို မြင်လျှင် အလွန်အမင်း ထိတ်လန့်သွားကြပြီး ထိုနတ်လူသားကို လှမ်းကြည့်လိုက်ကြသည်။

လီယန်ချူကလည်း မျက်ခုံးပင့်မိသွားသည်။ နတ်ဘုရား၏ သွေးက ဤမျှအထိ ထူးဆန်းသော အာနိသင်ရှိလိမ့်မည်ဟု သူ မထင်မှတ်ထားခဲ့ပေ။

၎င်းက သက်ရှိသတ္တဝါများကို ထိန်းချုပ်ရခက်ခဲသော အခြေအနေသို့ ရောက်ရှိသွားစေပုံရသည်။

နတ်ဘုရားသည် အလွန်အမင်း အမျက်ဒေါသထွက်သွားပြီး အခြားလက်တစ်ဖက်ဖြင့် ထူးခြားဆန်းပြားသော နတ်ဘုရားအတတ် ကို ထိုနတ်ဘုရားမထံသို့ ပစ်လွှတ်လိုက်တော့သည်။

သို့သော် သူ၏ နတ်ဘုရားအတတ်က အပြည့်အဝ မရောက်ရှိသေးခင်မှာပင် နတ်ဘုရားမ၏ စိတ်ဝိညာဉ်သည် ဝုန်းခနဲ ကွယ်ပျောက်ပျက်စီးသွားခဲ့လေပြီ။

စိတ်ဝိညာဉ်ထဲမှ နတ်ဘုရားအလင်းအစက်အပြောက်လေးတစ်ခုသာ လွင့်မျောသွားပြီး မျက်စိတစ်မှိတ်အတွင်း အစအနရှာမရအောင် ပျောက်ကွယ်သွားခဲ့သည်။

နတ်ဘုရား၏ မျက်နှာသည် ချက်ချင်းပင် အေးစက်တင်းမာသွားပြီး အေးစက်လှသော မျက်ဝန်းအစုံတွင် သတ်ဖြတ်ခြင်းအငွေ့အသက်များ ပြည့်နှက်သွားတော့သည်။

ရွှေနဂါးကတ်ကြေးသည် အလင်းတန်းတစ်ခုအဖြစ် ပြောင်းလဲကာ လီယန်ချူ၏ ရှေ့မှောက်သို့ ပျံသန်းလာခဲ့သည်။

လီယန်ချူက လက်လှမ်း၍ ဖမ်းယူလိုက်ရာ ရွှေနဂါးကတ်ကြေးသည် သူ၏လက်ထဲသို့ ကျရောက်လာခဲ့သည်။

ဤရွှေရောင်ကတ်ကြေးသည် လွန်စွာ ဆန်းကြယ်နက်နဲပုံရပြီး လက်ထဲတွင် ဆုပ်ကိုင်ထားရုံဖြင့် ကောင်းကင်သို့ ထိုးတက်နေသော သတ်ဖြတ်ခြင်းအရှိန်အဝါကို ခံစားရစေသည်။

ရွှေနဂါးကတ်ကြေးက မိမိထံသို့ အလိုအလျောက် ပျံသန်းလာလိမ့်မည်ဟု လီယန်ချူ မထင်မှတ်ထားသဖြင့် အနည်းငယ် အံ့ဩသွားမိသည်။

နတ်ဘုရားက တည်ငြိမ်စွာ ပြောလိုက်သည်

"ဒီပစ္စည်းက ငါနဲ့ ရေစက်ရှိတယ်။ အဆွေတော်က ဒါကို ချန်မထားခဲ့ဘူးဆိုရင်တော့ ပြစ်မှားမိရတော့မှာပဲ "

သူသည် ဒဏ်ရာများ ဆက်တိုက်ရရှိခဲ့ပြီး ရွှေနဂါးကတ်ကြေးနှင့် လှံရှည်ကြီးကဲ့သို့သော နတ်လက်နက် များကြောင့် သူ၏ ခန္ဓာကိုယ် ထိခိုက်ခဲ့ရသော်လည်း ၎င်းမှာ ကိုယ်လက်အင်္ဂါအချို့ ပြတ်တောက်ရုံမျှသာ ဖြစ်ပြီး သူ့အတွက်မူ ထိခိုက်မှုမရှိလှပေ။

ထိုအချက်ကပင် သူ၏ အစွမ်းထက်မြက်မှုကို ဖော်ပြနေခြင်း ဖြစ်သည်။

စကားဆုံးသည်နှင့် ကောင်းကင်ယံတွင် ရွှေရောင်ကွန်ရက်ကြီးတစ်ခု ပေါ်လာပြီး မိုင်ရာချီသော ပတ်ဝန်းကျင်တစ်ခုလုံးကို လွှမ်းခြုံသွားခဲ့သည်။ ၎င်းမှာ လွန်စွာ ကြောက်မက်ဖွယ်ကောင်းသော နတ်ဘုရားအတတ် ဖြစ်သည်။

ဤလှံရှည်ကြီး၏ သတ်ဖြတ်ခြင်းအရှိန်အဝါက ပြင်းထန်လှသော်လည်း လီယန်ချူ လက်ရှိ ထုတ်ဖော်ပြသထားသော စွမ်းအားမှာ နတ်ဘုရား အဆင့်သို့ မရောက်သေးချေ။

အလွန်တရာ ပျော့ပျောင်းသော အရာဖြင့် အလွန်တရာ မာကျောသောအရာကို တိုက်ဖျက်ရန် နတ်ဘုရားသည် ချက်ချင်းပင် ဆုံးဖြတ်ချက်ချလိုက်ခြင်း ဖြစ်သည်။

သို့သော် သူသည်လည်း အနည်းငယ် တွန့်ဆုတ်နေမိသည်။ လီယန်ချူသည် ဤမျှ ငယ်ရွယ်နုပျိုသေးသော်လည်း နတ်လက်နက်ကို ပိုင်ဆိုင်ထားသဖြင့် သူ၏နောက်ကွယ်တွင် အစွမ်းထက်သော အင်အားစု ရှိနေရမည် ဖြစ်ရာ တစ်ဖက်လူကို လုံးဝဥဿုံ ရန်ငြိုးမဖွဲ့လိုပေ။

"ဒီလှံရှည်က တကယ့်ကို အစွမ်းထက်တာပဲ။ ဒီလူသာ မြေပြင်နတ်ဘုရားအဆင့်ကို ရောက်သွားရင် ငါ့ရဲ့ စစ်မှန်တဲ့ ခန္ဓာကိုယ် ဆင်းသက်လာရင်တောင် သူ့ရဲ့ ပြိုင်ဘက် ဖြစ်မှာ မဟုတ်ဘူး။"

"ကံကောင်းတာက ရွှေနဂါးကတ်ကြေးက သူ ခုမှ ရတာဆိုတော့ သုံးနိုင်ဦးမှာ မဟုတ်ဘူး။"

ရွှေရောင်ကွန်ရက်ကြီးသည် အတိုင်းအဆမရှိသော စွမ်းအားများကို သယ်ဆောင်လျက် ကျဆင်းလာခဲ့သည်။ ပျော့ပျောင်းမှုထဲတွင် မာကျောမှု ကိန်းဝပ်နေပြီး ဖျက်ဆီး၍ မရနိုင်ပုံရသည်။

ရုတ်တရက်ဆိုသလို

လီယန်ချူ၏ လက်ထဲရှိ ရွှေနဂါးကတ်ကြေးထံမှ နတ်ဘုရားအလင်းတန်းများ ပေါက်ကွဲထွက်လာပြီး ကောင်းကင်ယံတွင် ရွှေရောင်နဂါးနှစ်ကောင်အဖြစ် ပြောင်းလဲသွားသည်ကို မြင်လိုက်ရသည်။

လေထုထဲတွင် ခရက်ခရက် ဟူသော အသံနှင့်အတူ ရွှေရောင်ကွန်ရက်ကြီးသည် ချက်ချင်းပင် အပေါက်တစ်ခု ပွင့်ထွက်သွားခဲ့သည်။

လီယန်ချူသည် ထိုအပေါက်ထဲမှ တိုးထွက်လာပြီး လှံရှည်ကြီးကို လွှဲယမ်းလိုက်ရာ လှံရှည်ကြီးထံမှ အေးစက်သောအလင်းတန်းများနှင့်အတူ ကြောက်မက်ဖွယ်ကောင်းသော ဖိအားလှိုင်းများ ပေါက်ကွဲထွက်လာတော့သည်။

၎င်းမှာ လွန်စွာ အစွမ်းထက်သော နတ်လက်နက် ဖြစ်သဖြင့် နတ်ဘုရား၏ ခန္ဓာကိုယ်ကြံ့ခိုင်မှုက မည်မျှပင် သန်မာပါစေဦးတော့ ဒဏ်ရာတစ်ခု ထပ်မံ အပိုင်းခံလိုက်ရပြန်သည်။

"လက်နက်ရဲ့ အားသာချက်ကိုပဲ အမှီပြုနေတာက သူရဲကောင်းလို့ မခေါ်ထိုက်ဘူး။"

နတ်ဘုရား၏ အသံက တည်ငြိမ်စွာ ထွက်ပေါ်လာသည်။

လီရန်ချူက လှောင်ပြုံးပြုံးလိုက်ရင်း -

"ကြီးမြတ်လှတဲ့ နတ်ဘုရားဖြစ်ပြီးတော့ နတ်လက်နက် တစ်ခုတောင် မရှိဘူးဆိုတာကတော့ တကယ့်ကို ရယ်စရာကောင်းတာပေါ့။"

ပစ္စည်းကိရိယာအကောင်းစား ရှိနေတာကို ဘာဖြစ်လို့ မသုံးရမှာလဲ။

လီယန်ချူသည် သူ၏ တတိယအဆင့် စွမ်းအားဖြင့် လှံရှည်ကြီးကို လွှဲယမ်းကာ လောကသို့ ဆင်းသက်လာသော ဤနတ်ဘုရားကို ရင်ဆိုင်တိုက်ခိုက်လိုက်ရာ ကောင်းကင်နှင့်မြေပြင် တုန်ဟီးသွားပြီး တောင်တန်းများပါ လှုပ်ခတ်သွားတော့သည်။

နတ်ဘုရား၏ အေးစက်စက် အသံကြီးက အမျက်ဒေါသများ ထွက်ပေါ်လျက် ထွက်လာသည်။

"မင်းရဲ့ နောက်ခံက ဘာပဲဖြစ်ဖြစ်၊ ဒီနေ့ မင်းက ဒီလို ဇွတ်တရိုး လုပ်နေမှတော့ ငါ မင်းကို သတ်ပစ်ရတော့မှာပဲ။"

ထိုခဏခြင်းတွင်ပင် သူ၏ ကိုယ်ပေါ်က အငွေ့အသက်များက မြင့်တက်လာပြီး နတ်တောင်တန်းများ တစ်လုံးပြီးတစ်လုံး သူ၏ နောက်ကျောတွင် ပေါ်ပေါက်လာရာ မြင်ကွင်းက လွန်စွာ ထိတ်လန့်ဖွယ်ကောင်းလှသည်။

သူ ထုတ်ဖော်လိုက်သည်မှာ ဒြပ်စင်ငါးပါး ပျက်စီးခြင်း မဟာအခင်းအကျင်း ဖြစ်သည်။

၎င်းက နတ်ဘုရားကိုပင် သတ်ဖြတ်နိုင်သည်။

ဤဒြပ်စင်ငါးပါး ပျက်စီးခြင်း မဟာအခင်းအကျင်းသည် နတ်တောင်တန်းများကို အခြေခံထားသဖြင့် ဖျက်ဆီး၍မရနိုင်အောင် မာကျောလှပြီး၊ ၎င်း၏အတွင်း၌ ရှိနေပါက ခန္ဓာကိုယ် နှင့် စိတ်ဝိညာဉ်ကိုပါ ပျက်စီးစေနိုင်သော သိပ်သည်းလွန်းသည့် သတ်ဖြတ်ခြင်းအရှိန်အဝါကို ခံစားရစေသည်။

လီယန်ချူ၏ မျက်ဝန်းအစုံတွင် တိုက်ခိုက်လိုစိတ်များ ပြည့်နှက်နေပြီး မျက်နှာအမူအရာက အေးစက်တည်ကြည်နေသည်။

" မိုးကြိုးငါးပါး ယန်စင်ကြယ်ခြင်း၊ ကောင်းကင်နှင့်မြေပြင်၏ တရားမျှတသောဥပဒေ။ သတ်စေ "

လီယန်ချူ၏ အသံက မိုးကြိုးပမာ ဟိန်းထွက်သွားပြီး ဟင်းလင်းပြင်ကြီးထဲမှ မိုးကြိုးလျှပ်စီးများ ကျရောက်လာခဲ့သည်။

၎င်းမှာ ကုသိုလ်မှတ် ခုနစ်သိန်းအဆင့်ရှိသော မိုးကြိုးငါးပါး အဆောင် ဖြစ်သည်။

ခရက်...

မိုးကြိုးပစ်ချလိုက်ခြင်းပင်။

လင်းလက်တောက်ပသော အလင်းဖြူကြီးတစ်ခု ကျဆင်းလာပြီး ဤနတ်ဘုရား၏ ခန္ဓာကိုယ်ပေါ်သို့ တည့်တည့် ပစ်ချလိုက်လေသည်။

နတ်ဘုရားသည် ဤပြင်းထန်လှသော လျှပ်စီးအတတ်ကို ခံစားလိုက်ရသဖြင့် မျက်မှောင် အနည်းငယ် ကြုတ်သွားမိသည်။

သူ၏ ခန္ဓာကိုယ်ကို တစ်ချက် တုန်ခါလိုက်ပြီး လက်ကို မြှောက်ကာ အပေါ်သို့ ထိုးနှက်လိုက်သည်။

သို့သော် ၎င်းက မူလကပင် အသားအရေများ ကွာကျနေသော လက်မောင်းကို ပေါက်ကွဲပျက်စီးသွားစေခဲ့သော်လည်း ဤတိုက်ခိုက်မှုကိုမူ သူ ကြံ့ကြံ့ခံနိုင်ခဲ့ဆဲ ဖြစ်သည်။

"လက်တွင် ရွှေကျာ်းကို ကိုင်ဆောင်ကာ လောကကို ရှာဖွေစူးစမ်းသကဲ့သို့၊ ကိုယ်တွင် ရွှေချပ်ဝတ်ကို ဝတ်ဆင်ကာ နတ်ဘုရားတို့၏ စွမ်းအားကို ပြသသည်။"

လီရန်ချူက ဆက်လက်၍ အခြား အဆောင်တစ်ခုကို ထပ်မံ လှုံ့ဆော်လိုက်ပြန်သည်။

နောက်တစ်ခဏတွင် သူ၏ကိုယ်ပေါ်က အငွေ့အသက်များက အလွန်တရာ ကြီးမားခန့်ညားလာပြီး ဟင်းလင်းပြင်ကြီးထဲမှ စင်ကြယ်သော နတ်ဘုရားစွမ်းအားများ ကျဆင်းလာခဲ့တော့သည်။

ဝမ်လင်ကွမ်း သည် နတ်လောက၏ ငါးရာသော နတ်ဘုရားများထဲတွင် အကြီးအကဲ ဖြစ်သဖြင့် သူ၏ နတ်ဘုရားအရှိန်အဝါက လွန်စွာ ရက်စက်ကြမ်းကြုတ်လှသည်။

လီယန်ချူ၏ ကိုယ်ပေါ်က အငွေ့အသက်များသည် ကောင်းကင်နှင့်မြေပြင်ပမာ ပြောင်းလဲသွားခဲ့သည်။

ရွှေချပ်ဝတ်ဝတ်ဆင်ထားသော နတ်ဘုရားပုံရိပ်ကြီး တစ်ခုသည် သူ၏ရှေ့မှောက်တွင် ပေါ်လာပြီး လက်ထဲတွင် ရွှေတုတ်ကောက် ကို ကိုင်ဆောင်ထားသည်။

ရွှေချပ်ဝတ်နတ်ဘုရားသည် အရပ် တစ်လံနှင့် ခြောက်တောင် ခန့် မြင့်မားပြီး ရဲရင့်ထက်မြက်လှသည်။

၎င်းမှာ မျက်လုံးသုံးလုံးနှင့် နီမြန်းသောမျက်ဝန်းများ ရှိသည့် ပုံစံမျိုးမဟုတ်ဘဲ လီယန်ချူကိုယ်တိုင်၏ ရုပ်သွင်ကို ဆောင်ထားခြင်း ဖြစ်သည်။

၎င်းက မျက်ဝန်းအစုံကို ရုတ်တရက် ဖွင့်လိုက်ရာ မျက်ဝန်းထဲတွင် မိုးကြိုးလျှပ်စီးများ ဖြတ်ပြေးသွားသကဲ့သို့ ရွှေရောင်နတ်ဘုရားအလင်းတန်းများ ပါရှိနေပြီး—

တိုက်ရိုက် တိုးဝင်သတ်ဖြတ်လိုက်တော့သည်။

ဒေါင်...

ကြီးမားသော ခေါင်းလောင်းကြီးတစ်ချက် တီးလိုက်သကဲ့သို့ အသံကြီး ထွက်ပေါ်လာသည်။

နတ်ဘုရားသည် ပေတစ်ရာခန့် နောက်သို့ လွင့်စဉ်သွားပြီး မျက်ဝန်းအစုံက ရွှေရောင်ဖျော့ဖျော့ ပြောင်းလဲသွားကာ တစ်ကိုယ်လုံးတွင် စပါးအုံးမြွေကြီးပမာ ရွှေရောင်စွမ်းအင်များ ရစ်ပတ်နေတော့သည်။

ထိုမျှမက ခန္ဓာကိုယ်ပေါ်တွင်လည်း လူတို့၏ ကိုးကွယ်ဆုတောင်းခြင်း အမွှေးတိုင်အငွေ့အသက်များ ပေါ်ထွက်လာပြီး ပိတ်စများသဖွယ် ခန္ဓာကိုယ်ဘေးတွင် ရစ်ပတ်နေသည်။

ဤအချိန်တွင် သူ၏ အငွေ့အသက်က စောစောကထက် အဆပေါင်းများစွာ ပိုမို ကြောက်မက်ဖွယ်ကောင်းနေသည်။

ရွှေချပ်ဝတ်နတ်ဘုရားသည် ထပ်မံ တိုးဝင်သတ်ဖြတ်လိုက်ပြီး ရွှေတုတ်ကောက်ဖြင့် နောက်ထပ်တစ်ချက် ပြင်းထန်စွာ ရိုက်ချလိုက်ပြန်သည်။

နတ်ဘုရားက လက်သီးနှစ်ဖက်လုံးဖြင့် ထိုးနှက်လိုက်ရာ အမွှေးတိုင်အငွေ့အသက်များ တုန်ခါသွားပြီး ရွှေရောင်စွမ်းအင်များသည် လက်သီးနှစ်ဖက်ထံသို့ စုစည်းသွားတော့သည်။

ထိုနေရာတွင် ရပ်နေရုံမျှဖြင့် လွန်စွာ ဖိအားပေးနိုင်စွမ်း ရှိလှပြီး

ကြီးမားလှသော မျက်နှာကြီးတစ်ခုက သင့်ကို အထက်မှ ငုံ့ကြည့်နေသကဲ့သို့ ခံစားရစေကာ လူကို မိမိကိုယ်ကိုယ် သေးငယ်သိမ်ဖျဉ်းလှသည်ဟူသော အတွေးမျိုး ဝင်လာစေသည်။

သို့သော် ရွှေတုတ်ကောက် ကျရောက်လာသောအခါ နတ်လူသားသည် နောက်ထပ် ပေတစ်ရာခန့် ထပ်မံ လွင့်စဉ်သွားရပြန်သည်။

ထို့ပြင် သူ၏ ကိုယ်ပေါ်က အမွှေးတိုင်အငွေ့အသက်ပိတ်စများလည်း ရိုက်ခွဲခြင်း ခံလိုက်ရသည်။

ရွှေရောင်ဖျော့ဖျော့ မျက်ဝန်းအစုံတွင် ထူးဆန်းသော အရိပ်အယောင်များ ဖြတ်ပြေးသွားလျက်

သူ၏ အကြည့်က ရွှေချပ်ဝတ်နတ်ဘုရား လက်ထဲက ရွှေတုတ်ကောက်ပေါ်သို့ ကျရောက်သွားသည်။

ဤလက်နက်၏ စွမ်းအားက လွန်စွာ ထူးခြားလှသည်။ စောစောက တစ်ခဏအတွင်းမှာပင် မိမိ၏ ကိုယ်ပေါ်က အမွှေးတိုင်အငွေ့အသက်များကို ရိုက်ခွဲပစ်နိုင်ခဲ့သည် မဟုတ်ပါလော။

သူ တွေးတောရန် အချိန်မရခင်မှာပင် အရပ်မြင့်မားသော လူငယ်လေးက လှံရှည်ကြီးကို လွှဲယမ်းကာ ထပ်မံ သတ်ဖြတ်ရန် တိုးဝင်လာခဲ့ပြန်သည်။

ဝုန်း...

လှံရှည်ကြီး ပိုင်းချလိုက်ရာ ဟင်းလင်းပြင်ကြီး တုန်ခါသွားပြီး ကြောက်မက်ဖွယ်ကောင်းသော စွမ်းအားလှိုင်းတစ်ခုက ချက်ချင်းပင် မတ်စောက်လှသော နတ်တောင်ကြီးတစ်လုံးကို နှစ်ခြမ်းခွဲပစ်လိုက်တော့သည်။

ဤနတ်ဘုရားကိုယ်တိုင်ပင်လျှင် ၎င်း၏ ထက်မြက်မှုကို တည့်တည့်မရင်ဆိုင်ရဲချေ။

လီယန်ချူ၏ ခန္ဓာကိုယ်က တစ်ချက် လှုပ်ခတ်သွားပြီး တစ်ကိုယ်တည်းမှ နှစ်ကိုယ်အဖြစ် ကွဲပြားသွားခဲ့သည်။

တစ်ယောက်က လှံရှည်ကြီးကို ကိုင်ဆောင်ထားပြီး၊ အခြားတစ်ယောက်က ရွှေနဂါးကတ်ကြေးကို ကိုင်ဆောင်လျက် ထပ်မံ၍ သတ်ဖြတ်ရန် တိုးဝင်လာကြပြန်သည်။

"ကိုယ်ပွားအတတ်"

နတ်ဘုရားက မျက်မှောင်ကြုတ်လိုက်မိပြီး စိတ်ထဲတွင် လှိုင်းတံပိုးများပမာ သောင်းကျန်းသွားရသည်။

"ဒီလူက ဒီလောက် ကြောက်မက်ဖွယ်ကောင်းတဲ့ နတ်ဘုရားအတတ်ကို ကျင့်ကြံထားတာဆိုတော့ တကယ့်ကို နောက်ခံ အင်အားကြီးမားပုံရတယ် "

ရွှေချပ်ဝတ်နတ်ဘုရား လက်ထဲတွင် ကိုင်ဆောင်ထားသည်မှာ နတ်ဘုရားရိုက်နှက်တုတ် ဖြစ်သည်။

ဝမ်လင်ကွမ်း၏ နတ်ဘုရားစွမ်းအားကို ပင့်ဖိတ်ထားရုံမျှမက၊ နတ်ဘုရားရိုက်နှက်တုတ်ကို အသုံးပြု၍ နတ်ဘုရား၏ အမွှေးတိုင်အငွေ့အသက်စွမ်းအားကိုပါ နှိမ်နင်းလိုက်ခြင်း ဖြစ်သည်။

အမွှေးတိုင်ကိုးကွယ်မှုနတ်ဘုရားလမ်းစဉ် ကို ပိုင်ဆိုင်ထားသော နတ်ဘုရားများအတွက်မူ နတ်ဘုရားရိုက်နှက်တုတ်သည် အထူးတလည် နှိမ်နင်းနိုင်စွမ်း ရှိသည်။

ဝုန်း... ဝုန်း...

လင်းလက်တောက်ပပြီး မျက်စိကျိန်းမတတ် ဖြစ်ရသော နတ်ဘုရားအလင်းတန်းများ ကောင်းကင်ယံထက်တွင် ပေါက်ကွဲထွက်ပေါ်လာရာ၊ ၎င်းက စောစောက နတ်ဘုရားနှင့် နတ်ဘုရားမတို့ တိုက်ခိုက်စဉ်ကထက် အငွေ့အသက်များစွာ ပိုမို အစွမ်းထက်လှသည်။

နတ်ဘုရားမသည် မူလကပင် စိတ်ဆန္ဒစွဲတစ်ခုမျှသာ ဖြစ်ပြီး မိမိ၏ အနှစ်သာရကို လောင်ကျွမ်းစေကာ စွမ်းအားကို ထုတ်ဖော်ခဲ့ခြင်း ဖြစ်သည်။

လီယန်ချူကမူ ယခုအခါ တစ်ကိုယ်တည်းမှ သုံးကိုယ်အဖြစ် ပြောင်းလဲထားပြီး ခန္ဓာကိုယ်သုံးခုစလုံး၏ တာအိုအတတ်များက ဆန်းကြယ်လှကာ၊ ခန္ဓာကိုယ်က ကြံ့ခိုင်ပြီး အစွမ်းထက်သော နတ်လက်နက်များကိုလည်း ပိုင်ဆိုင်ထားသဖြင့် ပိုမို အစွမ်းထက်သော စွမ်းရည်များကို ထုတ်ဖော်ပြသနေခြင်းပင်။

နတ်ဘုရား၏ နတ်အတတ်များက ဆန်းကြယ်လှပြီး လက်ဝါးထဲမှ စွမ်းအားလှိုင်းများက ကန့်လန့်ဖြတ် စီးဆင်းနေကာ လက်ဝါးကို ဝှေ့ယမ်းကာ ပိုင်းချလိုက်ပုံမှာ ဧရာမ နတ်ဓားကြီးတစ်လက်ပမာ ဖြစ်သည်။

သို့သော် ရွှေနဂါးကတ်ကြေးကို ကိုင်ဆောင်ထားသော လီယန်ချူ၏ ခန္ဓာကိုယ်ပေါ်သို့ ပိုင်းချလိုက်သော်လည်း ဒဏ်ရာတစ်စုံတစ်ရာမျှ မရရှိခဲ့ပေ။

လီယန်ချူက ရွှေနဂါးကတ်ကြေးကို လှုံ့ဆော်ကာ အားပြင်းပြင်းဖြင့် တစ်ချက် ညှပ်ချလိုက်ရာ တစ်ဖက်လူ၏ ခေါင်းကိုပင် ပြတ်လုနီးပါး ဖြစ်သွားစေခဲ့သည်။

သူက လျင်မြန်စွာ ရှောင်တိမ်းနိုင်ခဲ့သော်လည်း လည်ပင်းပေါ်တွင်မူ ကြီးမားလှသော အသားစတစ်ခု ညှပ်ဖြတ်ခြင်း ခံလိုက်ရရုံမျှမက

ထိုအပေါက်ကြီးထဲမှ ရွှေရောင်အလင်းတန်းများ အဆက်မပြတ် ထွက်ပေါ်လာပြီး သွေးများ မြေပြင်ပေါ်သို့ စီးကျလာခဲ့သည်။ သို့သော် ယခုတစ်ကြိမ်တွင်မူ မည်သူမျှ အနားသို့ မချဉ်းကပ်ရဲကြတော့ပေ။

ဤအချိန်တွင် သူတို့၏ မိုင်ရာချီသော ပတ်ဝန်းကျင်၌ မည်သည့် သက်ရှိသတ္တဝါမျှ မရှိတော့ဘဲ အားလုံး ထွက်ပြေးတိမ်းရှောင်သွားကြပြီ ဖြစ်သည်။

"ဒီလူ့ရဲ့ ကိုယ်ပေါ်မှာ နောက်ထပ် နတ်လက်နက်တစ်ခု ရှိသေးတယ်တကား။"

နတ်ဘုရားသည် တိုက်ခိုက်ရင်း တိုက်ခိုက်ရင်းဖြင့် ပိုမို ထိတ်လန့်လာခဲ့ရသည်။

မိမိက မြေပြင်နတ်ဘုရားအဆင့် ဖြစ်သဖြင့် ဤ လူဘု ထက် အဆင့်ကြီးတစ်ခုလုံး ပိုမိုမြင့်မားသည်။

သို့သော် အခြားတစ်ဖက်လူ၏ ကိုယ်ပေါ်တွင် လက်ရှိ၌ နတ်လက်နက် သုံးခု ရှိနေသည် မဟုတ်ပါလော။

ရွှေနဂါးကတ်ကြေးအပြင် အခြားနှစ်ခု ရှိနေသေးပြီး တစ်ခုက တိုက်ခိုက်ရေး၊ အခြားတစ်ခုက ကာကွယ်ရေး ဖြစ်သည်။

"ဒီမဟာဝေက ဘယ်လို အင်အားစုမျိုးလဲ၊ ပြီးတော့ ဒီလူဘု က ဘယ်လို နောက်ခံမျိုး ရှိနေတာလဲ။"

သူကိုယ်တိုင်ပင်လျှင် အနည်းငယ် တုန်လှုပ်သွားရပြီး ဆုတ်ခွာလိုစိတ်များ ဝင်လာခဲ့သည်။

အချိန်အတော်ကြာအောင် မြေပြင်နတ်ဘုရားအဆင့် စွမ်းအားကို အသုံးပြုခဲ့ရသဖြင့် သူ၏ ခန္ဓာကိုယ်ပေါ်တွင် အက်ကြောင်းများ စတင် ပြည့်နှက်လာခဲ့ပြီ ဖြစ်သည်။

လီယန်ချူနှင့် ထပ်မံ ထိပ်တိုက်ရင်ဆိုင်လိုက်ရာ ပြင်းထန်လှသော တုန်ခါမှုကြီးတစ်ခု ဖြစ်ပွားပြီးနောက် သူ၏ ကိုယ်ပေါ်က အသားစတစ်ခုပင် တုန်ခါကာ ပြုတ်ကျသွားခဲ့ရသည်။

လီယန်ချူက လှောင်ပြုံးပြုံးရင်း -

" ခန္ဓာကိုယ်ကိုတောင် အပြည့်အဝ သယ်မလာနိုင်ဘဲနဲ့ တကယ့်ကို ရယ်စရာကောင်းလှချည်ကော။"

သူ၏ အသံက ယုံကြည်မှုအပြည့်နှင့် အစွမ်းထက်လှပြီး ဤကောင်းကင်နှင့်မြေပြင်အနှံ့ ဟိန်းထွက်သွားခဲ့သည်။

ထို့နောက် လှံရှည်ကြီးကို လွှဲယမ်းလိုက်ရာ ထက်မြက်လှသော စွမ်းအားလှိုင်းတစ်ခု ကန့်လန့်ဖြတ် ရိုက်ခတ်လာပြီး ကောင်းကင်ယံက တိမ်ပင်လယ်ပြင်ကြီးကို ချေဖျက်ပစ်လိုက်တော့သည်။

နတ်ဘုရားက လက်ဗလာဖြင့် တိုးဝင်ရင်ဆိုင်လိုက်ရာ

ဝုန်း... ဝုန်း... ဝုန်း...

ကြောက်မက်ဖွယ်ကောင်းသော စွမ်းအားလှိုင်းများ ပေါက်ကွဲထွက်လာခဲ့သည်။

သူသည် လီယန်ချူ၏ တိုက်ခိုက်မှုကို ခုခံနိုင်သော်လည်း သူ၏ ခန္ဓာကိုယ်ကမူ အမှန်တကယ် တောင့်မခံနိုင်တော့ချေ။

လက်ရှိတွင် လူ့ပြည်၏ ကန့်သတ်ချက်များက များပြားလွန်းလှသဖြင့် နတ်ဘုရား ဆင်းသက်လာရာတွင် မိမိ၏ စစ်မှန်သော ခန္ဓာကိုယ်ကို အသုံးပြု၍မရနိုင်ပေ။

သူသည် လီယန်ချူ၏ လှောင်ပြောင်မှုကို ပြန်လည် မချေပနိုင်ခဲ့ချေ။

သူလည်း ဤသို့ မဖြစ်ချင်ပါ၊ သို့သော် နတ်လောက ‌တွင် လူမရှိ၍ မဟုတ်ပါလော။

ဝေဝေဝါးဝါးဖြင့် ဤနတ်ဘုရားသည် နတ်ဘုရားမျိုးဆက်သစ် တစ်ဦးနှင့် ရင်ဆိုင်နေရသကဲ့သို့ ခံစားလိုက်ရသည်။

ဤခံစားချက်က သူ့ကို တကယ့်ကို အောင့်သက်သက် ဖြစ်စေသည်။

လီယန်ချူသည် အမှန်စင်စစ် နတ်ဘုရားအကြောင်းကို ဘာမျှမသိရှိပါချေ။ အနည်းငယ်မျှသော နားလည်မှုမှာလည်း ပိုင်ယန်တာအိုဆရာ ထံမှ ရရှိခဲ့ခြင်း ဖြစ်သည်။

နတ်လောက ၏ စည်းမျဉ်းများကို သူ လုံးဝ နားမလည်ဘဲ သက်သက်မဲ့ စကားလုံးများဖြင့် တိုက်ခိုက်နေခြင်းမျှသာ ဖြစ်သည်။

နတ်ဘုရားက လက်ကို ဝှေ့ယမ်းလိုက်ရာ ရွှေရောင်ခေါင်းလောင်းကြီး တစ်လုံးသည် ဟင်းလင်းပြင်ထဲမှ ပေါ်ထွက်လာပြီး နတ်ဘုရားအလင်းတန်းများ ကျဆင်းလာကာ လီယန်ချူကို ၎င်း၏ အတွင်း၌ ပိတ်ဆို့ထားလိုက်သည်။

လူတစ်ယောက်ကိုသာ ပိတ်ဆို့ထားနိုင်သော်လည်း အခြား အစွမ်းထက်လှသော ခန္ဓာကိုယ်ခွဲနှစ်ခုက တိုက်ရိုက် တိုးဝင်သတ်ဖြတ်လာကြပြန်သည်။

ဒေါင်... ဒေါင်... ဒေါင်...

မျက်စိတစ်မှိတ်အတွင်းမှာပင် ပြင်းထန်သော တိုက်ကွက်ပေါင်းများစွာကို ထိပ်တိုက်ရင်ဆိုင်လိုက်ကြပြီး ကောင်းကင်မျက်နှာကြက်တစ်ခုလုံးတွင် မိုးကြိုးလျှပ်စီးများ ပြည့်နှက်သွားတော့သည်။

သူ၏ ခန္ဓာကိုယ်က တဖြည်းဖြည်း ပျက်စီးလာခဲ့သည်။

သူသည် မကျေမနပ်ဖြစ်နေသော မျက်ဝန်းများဖြင့် လီယန်ချူ၏ လက်ထဲက ရွှေနဂါးကတ်ကြေးကို လှမ်းကြည့်လိုက်ပြီး—

ကျယ်လောင်စွာ ပြောလိုက်သည်

"မင်းရဲ့ နောက်ကွယ်မှာ ဘယ်လို အင်အားစုပဲ ရှိနေရှိနေ၊ ဒီကိစ္စကို ငါ သေချာပေါက် အထက်ကို တင်ပြမယ်။"

လီယန်ချူက လှောင်ပြုံးပြုံးရင်း -

"မင်းလိုကောင်မျိုးကလား၊ သွားတိုင်ချင်သလောက် သွားတိုင်စမ်းပါ။"

နတ်ဘုရား : "........................"

နောက်ကွယ်တွင် လူရှိနေခြင်းက တကယ့်ကို ရဲတင်းလွန်းလှသည်။ တစ်ဖက်လူ၏ ဤအခြေအနေကပင် သူ၏နောက်ကွယ်က လူသည် နောက်ခံ အလွန်တရာ နက်နဲကြောင်း သက်သေပြနေသည် မဟုတ်ပါလော။

" နောက်ခံကို အမှီပြုပြီး လူကို အနိုင်ကျင့်တာပဲ။"

နတ်ဘုရား၏ စိတ်ထဲတွင် ထိုစာလုံးငါးလုံး ပေါ်ထွက်လာခဲ့သည်။

ဤကိစ္စကို ဇွတ်အတင်း လုပ်၍မရနိုင်ကြောင်း မြင်လျှင် သူသည် ဤခန္ဓာကိုယ ်ကို စွန့်လွှတ်လိုက်တော့သည်။

ခန္ဓာကိုယ်သည် ဝုန်းခနဲ ပေါက်ကွဲပျက်စီးသွားပြီး ရွှေရောင်အလင်းတန်းများထဲတွင် ဝေဝါးလှသော ပုံရိပ်တစ်ခု ပေါ်ထွက်လာကာ

ထို့နောက်တွင် ပျောက်ကွယ်သွားခဲ့ပြန်သည်။

"ငါ ဒီတစ်ခေါက် လူ့ပြည်ကို ဆင်းသက်လာတာ ဘာအောင်မြင်မှုမျှ မရရှိခဲ့ဘဲ ဒီလိုမျိုး မရှုမလှ ပြန်သွားရတယ်ဆိုတော့... နောက်တစ်ခေါက် ပြန်လာနိုင်ဖို့က ဘယ်နှစ်၊ ဘယ်လောက် ကြာဦးမလဲ မသိတော့ဘူး။"

"မတရားလိုက်တာ။ ငါက အထက်လူကြီးတွေအတွက် စိတ်ရောကိုယ်ပါ အလုပ်အကျွေးပြုနေတာကို ဒီ‌ေလာက် အထိ ရဲတင်းရိုင်းစိုင်းလှတဲ့ ဒုတိယမျိုးဆက်နဲ့ လာတွေ့ပြီး နောက်ခံ ‌နဲ့ အနိုင်ကျင့်ခံရတယ်လို့။"

နတ်ဘုရားသည် မတတ်သာဘဲ နတ်လောက ‌သို့ ပြန်လည် ဆုတ်ခွာသွားခဲ့ရသည်။

ဤတိုက်ပွဲတွင် အနိုင်အရှုံး မပြတ်သေးသော်လည်း နတ်ဘုရားတစ်ဦးနှင့် ဤမျှအထိ တိုက်ခိုက်နိုင်ခြင်းကပင် လွန်စွာ ကြောက်မက်ဖွယ်ကောင်းလှချေပြီ။

နောက်ဆုံးတွင် ထိုနတ်ဘုရားသည် ခန္ဓာကိုယ်ပျက်စီးခြင်းကို တောင့်မခံနိုင်ဘဲ နတ်လောက သို့ ပြန်လည် ဆုတ်ခွာသွားခဲ့ရသည်။

လီယန်ချူက သူ၏ နတ်ဘုရားအတတ်ကို ပြန်လည် သိမ်းဆည်းလိုက်သည်။

ကောင်းကင်ယံထက်တွင်မူ ရဲရင့်ထက်မြက်ပြီး ရုပ်ရည်ခန့်ညားသော လူငယ်လေးတစ်ဦးက လှံရှည်ကြီးကို ကိုင်ဆောင်လျက် နတ်ဘုရားပမာ ခန့်ညားထည်ဝါစွာ ရပ်နေတော့သည်။

နတ်ဘုရားမပမာ ထူးခြားဆန်းပြားသော အငွေ့အသက် ရှိသည့် အပြာရောင်ဝတ်စုံဝတ် အမျိုးသမီးသည် ဤလူငယ်လေးကို ကြည့်ရင်း အသက်ရှူရန်ပင် မေ့လျော့နေမိသည်။

"လူဘု၊ မဟာဝေ... မမျှော်လင့်ဘဲ နောက်ထပ် နတ်ဘုရားတစ်ပါး ဒီနေရာသို့ ရောက်ရှိလာပြန်ပြီလား"

လူငယ်လေးတစ်ဦးကလည်း ထပ်တူပင် ထိတ်လန့်သွားရသည်။

"ဒီကိစ္စကို ဂိုဏ်းကို သေချာပေါက် ပြန်လည် တင်ပြရမယ်။"

ခန္ဓာကိုယ်ကို သယ်ဆောင်လာနိုင်သော နတ်ဘုရားတစ်ပါး၏ နောက်ခံက မရိုးရှင်းလှဘဲ နတ်လောက တွင် ကြီးမားသော နောက်ခံ ရှိနေပုံရသည်။

လူ့လောကသို့ ဆင်းသက်လာသော ထိုနတ်ဘုရားကိုပင် ဆူပူကြိမ်းမောင်းကာ ဒေါသအိုးပေါက်ကွဲအောင် ဖိအားပေးနိုင်ခဲ့ပြီး တစ်ဖက်လူကလည်း ဘာမျှ မတတ်နိုင်ခဲ့ချေ။

ဤကဲ့သို့သော ပုဂ္ဂိုလ်မျိုးကို ယခုအချိန်တွင် မည်သူမျှ မပြစ်မှားရဲကြတော့သည်မှာ ဓမ္မတာပင်။

လီယန်ချူက နတ်ဘုရားအတတ်ကို သိမ်းဆည်းကာ အလင်းတန်းတစ်ခုအဖြစ် ပြောင်းလဲပြီး ကောင်းကင်ယံသို့ ပျံသန်းကွယ်ပျောက်သွားခဲ့သည်။

ဤတိုက်ပွဲကြီးက ကောင်းကင်နှင့်မြေပြင် တုန်ဟီးသွားစေပြီး တောင်တန်းနှင့်မြစ်ချောင်းများ ပျက်စီးသွားကာ ရိုင်းစိုင်းရုန်းရင်းဆန်ခတ်ဖြစ်နေသော ဤရှေးဦးလောကမြေရိုင်းပြင်ကြီးပင်လျှင် ဤကြောက်မက်ဖွယ်ကောင်းသော စွမ်းအားကို တောင့်မခံနိုင်တော့ပုံရသည်။

ကောင်းကင်ယံထက်က ဧရာမ အပေါက်ကြီးသည်လည်း အနည်းငယ် ထပ်မံ ကျယ်ပြန့်လာပုံရသည်။

မိုင်ရာချီသော ပတ်ဝန်းကျင်တစ်ခုလုံးသည် လုံးဝဥဿုံ ပျက်စီးခြင်းသို့ ရောက်ရှိသွားခဲ့ရပြီး မိုးကြိုးပစ်ခတ်မှုကြောင့် မည်းမှောင်နေသော တွင်းနက်ကြီးများ ဖြစ်သွားခဲ့ရုံမက

ကြောက်မက်ဖွယ်ကောင်းသော မီးတောက်မီးလျှံများလည်း ကျန်ရှိနေဆဲ ဖြစ်သည်။

ပတ်ဝန်းကျင်တစ်ခုလုံးသည် သေမင်း တမန်နယ်မြေ အဖြစ် ပြောင်းလဲသွားခဲ့သဖြင့် လူတိုင်းက အလျင်အမြန် ထွက်ပြေး တိမ်းရှောင်သွားကြတော့သည်။

ထိုနတ်ဘုရားမသည် လုံးဝဥဿုံ ကွယ်လွန်သွားခြင်း မရှိသေးပုံရဘဲ စိတ်ဝိညာဉ်စစ်လေးတစ်ခုသာ ထွက်ခွာသွားခဲ့ခြင်း ဖြစ်ပြီး မည်သည့်အရပ်သို့ ဦးတည်သွားသည်ကိုမူ မသိရချေ။

သူမက ရွှေနဂါးကတ်ကြေးကို လီယန်ချူအား လက်ဆောင်ပေးအပ်ခဲ့ပြီးနောက် လီယန်ချူသည် အချိန်အနည်းငယ်အတွင်းမှာပင် ၎င်းကို လုံးဝဥဿုံ ထိန်းချုပ်နိုင်ခဲ့ပြီ ဖြစ်သည်။

ရွှေနဂါးကတ်ကြေး၏ ပြင်းထန်လှသော သတ်ဖြတ်ခြင်းအရှိန်အဝါကို ခံစားရင်း လီယန်ချူကိုယ်တိုင်လည်း အနည်းငယ် တုန်လှုပ်သွားမိသည်။

"နောက်ထပ် အစွမ်းထက်လှတဲ့ သတ်ဖြတ်ခြင်း နတ်လက်နက်တစ်ခု ထပ်တိုးလာပြန်ပြီ။"

သူက ခဏမျှ ကြည့်ရှုကစားပြီးနောက် ရွှေနဂါးကတ်ကြေးကို သူ၏ ကမ္ဘာငယ် အတွင်းသို့ သိမ်းဆည်းလိုက်သည်။

ဤတိုက်ပွဲတွင် သူနှင့် လက်ထဲက လှံရှည်ကြီးအကြား ဆက်နွှယ်မှုမှာလည်း ပိုမို ရင်းနှီးသိပ်သည်းလာခဲ့သည်။

"ဒီလှံရှည်က တိုက်ပွဲဝင်ရတနာ ပဲ။ ကြည့်ရတာ ဒါကို အမြဲတမ်း တိုက်ပွဲတွေမှာ အသုံးပြုတာကမှ အမှန်ကန်ဆုံး လမ်းစဉ် ဖြစ်လိမ့်မယ်။"

လီယန်ချူက လျင်မြန်စွာ ဆုံးဖြတ်ချက်ချလိုက်ပြီး လှံရှည်ကြီးကို ၎င်း၏အတွင်းသို့ သိမ်းဆည်းလိုက်သည်။

ထို့နောက်တွင် ခန္ဓာကိုယ်ကို တစ်ချက် လှုပ်ခတ်လိုက်ပြီး မိမိ၏ မူလရုပ်သွင်သို့ ပြန်လည် ပြောင်းလဲလိုက်တော့သည်။

ခါးတွင် ရှေးဟောင်းဆန်းပြားသော ဓားရှည်ကြီးကို ချိတ်ဆွဲထားသော လူငယ်လမ်းစဉ်ကျင့်ကြံသူ တစ်ဦး ပေါ်ထွက်လာခဲ့သည်။

"ကြည့်ရတာ နတ်လောပ ရဲ့ ရေက ငါထင်ထားတာထက် ပိုပြီး နက်ရှိုင်းပုံရတယ်၊ ပြီးတော့ အလွန်တရာ ကြီးမားကျယ်ပြန့်ပုံပဲ။"

လီယန်ချူက စိတ်ထဲက တွေးလိုက်သည်။

စောစောက သူ၏ ရုပ်သွင်မှာ အလွန်တရာ ရဲတင်းရိုင်းစိုင်းပြီး နောက်ကွယ်တွင် ခိုင်မာသော နောက်ခံ ရှိသည့် နတ်ဘုရားတစ်ပါး ဖြစ်သော်လည်း တစ်ဖက်လူက ၎င်းကို အံ့ဩခြင်းမရှိဘဲ ပုံမှန်အခြေအနေကဲ့သို့ လက်ခံသွားသည် မဟုတ်ပါလော။

"နတ်လောက ရဲ့ အာဏာလုပွဲတွေက လူ့ပြည်ထက် တကယ့်ကို ပိုပြီး ရက်စက်ကြမ်းကြုတ်နိုင်တယ်။"

လီယန်ချူက ခေါင်းကို ခါယမ်းလိုက်မိသည်။

လက်ရှိအခြေအနေအရ ဤကိစ္စများသည် သူ့အတွက် အနည်းငယ် ဝေးကွာနေသေးပြီး၊ ထိုတိုက်ပွဲတွင် သူသည် မြေပြင်နတ်ဘုရားအဆင့်နှင့် ကွာဟချက်ကိုလည်း ထင်ရှားစွာ ခံစားလိုက်ရသည်။

အကယ်၍ နတ်လက်နက်၏ ကာကွယ်မှုကို အမှီမပြုခဲ့ပါက မိမိ၏ ခန္ဓာကိုယ်ကြံ့ခိုင်မှုဖြင့်ပင် ထိုနတ်ဘုရား၏ နတ်အတတ်အောက်တွင် ဒဏ်ရာရရှိသွားနိုင်ပြီး

လက်ထဲတွင် လှံရှည်ကြီး မရှိခဲ့ပါကလည်း နတ်ဘုရား၏ ခန္ဓာကိုယ်ကြံ့ခိုင်မှုကို ဖျက်ဆီးနိုင်မည် မဟုတ်ချေ။

"ဒါက နတ်စွမ်းအား ရဲ့ ပံ့ပိုးမှုကြောင့် ယာယီရရှိထားတဲ့ ခန္ဓာကိုယ်တစ်ခုမျှသာ ရှိသေးတာကို "

လီယန်ချူသည် ဤတိုက်ပွဲကို လွန်စွာ တည်ငြိမ်စွာဖြင့် သုံးသပ်လိုက်ပြီးနောက် နတ်ဘုရားအတတ်ကို လှုံ့ဆော်ကာ ရှေ့သို့ ဆက်လက် တိုးဝင်သွားတော့သည်။

မကြာမီမှာပင် သူသည် တောင်ထိပ်တစ်ခုပေါ်သို့ ရောက်ရှိလာပြီး ယွမ်ရှုး နှင့် ဇီရွှမ် ဆရာတပည့်နှစ်ဦးကို ရှာဖွေတွေ့ရှိခဲ့သည်။

ခဏမျှ စကားစမြည် ပြောဆိုပြီးနောက် ယွမ်ရှူးက သက်ပြင်းချလျက် ကောက်ချက်ချသည်။

"စောစောက နတ်ဘုရားနှစ်ပါး လှုပ်ရှားလိုက်တာ... အထူးသဖြင့် လူဘု လို့ ခေါ်တဲ့ နတ်ဘုရားကတော့ နတ် ဘုရားအတတ်တွေက ကျယ်ပြန့်လွန်းလှပြီး ဟိုနတ်ဘုရားကိုပါ ဆုတ်ခွာသွားအောင် ဖိအားပေးနိုင်ခဲ့တာ တကယ့်ကို အစွမ်းထက်လှတယ် "

ဇီရွှမ်က ဘေးမှနေ၍ အနည်းငယ် စိတ်လှုပ်ရှားစွာဖြင့် ပြောလိုက်သည်။

"ဟုတ်ပါ့၊ ဒီ လူဘု က တိုက်လည်းတိုက်နိုင်သလို ရုပ်ကလည်း ချောတယ်၊ ပြီးတော့ တကယ့်ကို ရဲရင့်ထက်မြက်တာပဲ။"

လီရန်ချူက အနည်းငယ် ပြုံးလိုက်မိသည်။

ဇီရွှမ်က လီရန်ချူ၏ ချောမောလှပသော မျက်နှာပြင်ကို မချင့်မရဲဖြင့် လှမ်းကြည့်လိုက်မိပြီး

စိတ်ထဲတွင် တိတ်တဆိတ် တွေးလိုက်မိသည်

"အို... ပုံစံနှစ်မျိုးလုံးကို ငါ တကယ် သဘောကျတာပဲ။ ဒါပေမဲ့ ဒီလီတာအိုဆရာ ကမှ ပိုပြီး ဆွဲဆောင်မှု ရှိပုံရတယ်။"

သူတို့ သုံးဦး ခဏမျှ စကားစမြည် ပြောဆိုနေစဉ်မှာပင် လေပြင်းနှင့် မိုးကြိုးသံများကို ရုတ်တရက် ကြားလိုက်ရသည်။

လီယန်ချူက လှည့်ကြည့်လိုက်ရာ ကြက်ဖကြီး တစ်ကောင်သည် တောင်ပံများကို တဖြတ်ဖြတ် ခတ်လျက် ပျံသန်းလာသည်ကို တွေ့ရှိလိုက်ရသည်။

ဤကြက်ကြီးသည် လွန်စွာ ခန့်ညားထည်ဝါလှပြီး ခေါင်းကို မော့လျက် ရပ်နေသည်။

လီယန်ချူက သူ့ကို မြင်လျှင် အနည်းငယ် ပြုံးပြလိုက်ရင်း -

"စောစောက ကြက်အစ်ကို ရဲ့ ကူညီမှုကြောင့် ကျေးဇူးတင်ရမှာပဲ။"

ကြက်ဖကြီးက ရုတ်တရက် လူစကား ပြောဆိုလိုက်သည်။

"မင်းနဲ့ငါက ညီအစ်ကိုလို မခေါ်ထိုက်ပါဘူး၊ ငါ မင်းကို သခင် လို့ပဲ ခေါ်ပါရစေ။"

လီယန်ချူက မူလက စနောက်၍ ပြောဆိုခဲ့ခြင်း ဖြစ်သော်လည်း ဤကြက်ဖကြီးက ရုတ်တရက် လူစကား ပြောဆိုလာလိမ့်မည်ဟု မထင်မှတ်ထားခဲ့ပေ။

သူ တစ်ဦးတည်းသာမက၊ ယွမ်ရှုးနှင့် ဇီရွှမ်တို့ပါ အလွန်တရာ ထိတ်လန့်တုန်လှုပ်စွာဖြင့် လှမ်းကြည့်လိုက်ကြတော့သည်။

လီယန်ချူက အံ့ဩတကြီးဖြင့် မေးလိုက်သည်

"မင်းက စကားပြောတတ်တာလား။"

ကြက်ဖကြီးက ခေါင်းကို မော့လိုက်ပြီးနောက် မိမိ၏ သဘောထားက အနည်းငယ် မောက်မာနေသည်ကို သတိပြုမိသွားသဖြင့် ပြုံးလျက် ပြောဆိုလိုက်သည်။

"ဒါပေါ့၊ ပြီးခဲ့တဲ့အကြိမ် မင်းလာတုန်းက ငါ မပြောတတ်သေးဘူး။ နောက်ပိုင်း ကျင့်ကြံခြင်းအဆင့် မြင့်တက်လာတော့မှ ဒီစွမ်းရည်ကို ရရှိခဲ့တာ။"

လီယန်ချူက သဘောပေါက်သွားပြီးနောက် ဆက်လက်၍ မေးမြန်းလိုက်သည်။

"စကားပြောတတ်ပြီဆိုမှတော့... ဒီအရပ်က အမှန်စင်စစ် ဘယ်လိုနေရာမျိုးလဲ၊ ပြီးတော့ ဟိုနတ်ဘုရားမက ဘယ်သူလဲ၊ ပြီးတော့ စောစောက မင်း ငါ့ကို ခေါ်သွားတဲ့ နတ်သစ်ပင် ကကော ဘယ်လိုနေရာမျိုးလဲ။"

ဤကြက်ဖကြီးက ရောင်စုံအဆင်းရှိပြီး လွန်စွာ ခန့်ညားထည်ဝါလှရာ စစ်သူကြီးကြီးတစ်ဦးပမာ ဖြစ်သည်။

၎င်းက စကားကို ကြားလျှင် လွန်စွာ စိတ်ရှည်လက်ရှည်ဖြင့် ရှင်းပြသည်။

"ဒီကိစ္စက ပြောရရင် ရှည်လျားလှပါတယ်။ ငါ မင်းကို ဖြည်းဖြည်းချင်း ပြောပြပါ့မယ်။"

ထိုကြက်ဖကြီးက လူစကား ပြောဆိုနိုင်လိမ့်မည်ဟု လီယန်ချူ မထင်မှတ်ထားခဲ့သဖြင့် သူ၏ စိတ်ခံစားမှုက အနည်းငယ် စိတ်လှုပ်ရှားနေမိသည်။

ဤသို့ဆိုလျှင် ဆန်းကြယ်လှသော လျှို့ဝှက်ချက်များစွာကို သူ နားလည်နိုင်တော့မည် မဟုတ်ပါလော။

ကြက်ဖကြီးက တည်ငြိမ်စွာ ပြောလိုက်သည်

"ဒီနေရာကို မာန်ဟွန်းကမ္ဘာ လို့ ခေါ်တယ်။ မူလက ဧရာမလူသားမျိုးနွယ်စုတွေ နေထိုင်ခဲ့ကြပြီး နတ်ဘုရားတွေကို ကိုးကွယ်ခဲ့ကြတာ။"

"ဒီအရှင်... အာ မဟုတ်ဘူး၊ ငါ့နာမည်က ကျိန်းဟွမ် လို့ ခေါ်တယ်။ မာန်ဟွန်းကမ္ဘာရဲ့ မူလသက်ရှိသတ္တဝါ မဟုတ်ဘဲ... မိစ္ဆာမျိုးနွယ်စုက လမ်းစဉ်ကျင့်ကြံသူ တစ်ဦး ဖြစ်တယ်။"

လူအမည်... လီယန်ချူက အံ့ဩတကြီးဖြင့် -

"မင်းက မိစ္ဆာမျိုးနွယ်စုက လမ်းစဉ်ကျင့်ကြံသူ ဟုတ်လား။"

အခန်း (၉၈၂) ရှေးဟောင်းလျှို့ဝှက်ချက်များနှင့် ခန္ဓာကိုယ်ဖြင့် နတ်ဘုရားဖြစ်ခြင်း

ထိုကြက်ဖကြီးက တည်ငြိမ်အေးဆေးစွာဖြင့် ပြောဆိုလိုက်သည်။

"မှန်ပါတယ်။ ငါ့ရဲ့ ဆရာသခင်ကတော့ ရှေးဦးက လှုပ်ရှားသွားခဲ့တဲ့ နတ်ဘုရားမ ပိယွန်းနတ်မိမယ် ပဲ ဖြစ်တယ်။ လွန်ခဲ့တဲ့ နှစ်နှစ်ထောင်က ငါသူမနဲ့အတူ ဒီနေရာကို ရောက်လာခဲ့တာ။ နောက်တော့ ပြင်းထန်တဲ့ ဒဏ်ရာရရှိပြီး သေလုမြောပါး ဖြစ်ခဲ့ရတယ်။ ဆရာသခင်က ကြီးမြတ်လှတဲ့ နတ်ဘုရားအတတ်နဲ့ ငါ့ရဲ့ စိတ်ဝိညာဉ်စစ်ကို ကာကွယ်ပေးခဲ့လို့သာ အခုအချိန်အထိ ဝေဝေဝါးဝါးနဲ့ အသက်ရှင်ကျန်ရစ်ခဲ့တာ။ ခုမှပဲ မှတ်ဉာဏ်တချို့ ပြန်ပွင့်လာတာပဲ"

လီယန်ချူသည် အနည်းငယ် အံ့ဩသွားမိသည်။

မူလက သူသည် ဤကြက်ဖကြီးကို ဤကမ္ဘာမြေ၌ အလိုအလျောက် အသိဉာဏ်ပွင့်လာသည့် သာမန် သက်ရှိသတ္တဝါတစ်ကောင်မျှသာဟု ထင်မှတ်ထားခဲ့ခြင်း ဖြစ်သည်။

သို့သော် ၎င်းက မိစ္ဆာမျိုးနွယ်စုမှ စစ်မှန်သော လမ်းစဉ်ကျင့်ကြံသူတစ်ဦး ဖြစ်နေရုံမျှမက၊ ထိုနတ်ဘုရားမ၏ တပည့်ပင် ဖြစ်နေလိမ့်မည်ဟု သူ မထင်မှတ်ထားခဲ့ပေ။

လီယန်ချူက ဆက်လက်၍ မေးမြန်းလိုက်သည်။

"အဲဒီတုန်းက အမှန်စင်စစ် ဘာတွေဖြစ်ခဲ့တာလဲ။ မင်းရဲ့ ဆရာသခင်က ဘာဖြစ်လို့ ပျက်စီးသွားရတာလဲ"

ကြက်ဖကြီး၏ အသံတွင် ဝမ်းနည်းကြေကွဲမှုများ ပြည့်နှက်သွားပြီး -

"ကောင်းကင်ထက်ကနေ ဧရာမ လက်ဝါးကြီးတစ်ချက် ကျဆင်းလာပြီး ဒီနေရာကို ဖျက်ဆီးဖို့ ကြံစည်ခဲ့တာပဲ ငါမှတ်မိတော့တယ်။ ဆရာသခင်က အဲဒီလက်ဝါးကြီးနဲ့ ထိပ်တိုက်ရင်ဆိုင် တိုက်ခိုက်ခဲ့ပေမဲ့ မယှဉ်နိုင်ခဲ့ဘဲ ခန္ဓာကိုယ် ပျက်စီးသွားခဲ့ရတယ်။ အဲဒီဧရာမလက်ဝါးကြီးရဲ့ နောက်ခံဇာစ်မြစ်ကိုတော့ ငါလည်း သဲသဲကွဲကွဲ မသိတော့ဘူး"

လီယန်ချူ သဘောပေါက်သွားပြီးနောက် လေးနက်သော အသံဖြင့် ပြောလိုက်သည်။

"ပြီးခဲ့တဲ့အကြိမ်က ပေါ်လာတဲ့ ဧရာမ လက်မည်းကြီးကို ပြောတာလား"

ကြက်ဖကြီးက ခေါင်းခါယမ်းလျက် -

"ငါလည်း သေချာမပြောနိုင်ဘူး။ ငါက အခုတလောမှ အသိစိတ် ပြန်ပွင့်လာတာမို့လို့ပါ"

လီယန်ချူက ဆိုသည်။

"ဒီလိုဆိုရင်... ပြီးခဲ့တဲ့အကြိမ်က မင်းငါ့ကို နတ်သစ်ပင်ဆီ ခေါ်သွားတုန်းက စကားမပြောနိုင်ရုံတင်မကဘူး၊ မှတ်ဉာဏ်တွေပါ ပြန်မပွင့်သေးတာပေါ့"

မိစ္ဆာမျိုးနွယ်စု လမ်းစဉ်ကျင့်ကြံသူ ကျိန်းဟွမ်က ခေါင်းကို အသာအယာ ညိတ်လိုက်ပြီး -

"ဟုတ်ပါတယ်။ အဲဒီတုန်းက ငါ့ရဲ့ အသိစိတ်က ဝေဝေဝါးဝါးပဲ ရှိသေးတာ။ ဒါပေမဲ့ မင်းက ငါ့ကို ကယ်တင်ခဲ့ဖူးတော့ မင်းကို ကျေးဇူးဆပ်ချင်တဲ့ စိတ်တစ်ခုတည်းနဲ့ လုပ်ခဲ့တာပါ"

လီယန်ချူ၏ စိတ်ထဲတွင် သိလိုသော မေးခွန်းများစွာ ရှိနေသော်လည်း စိတ်ကို ထိန်းချုပ်ကာ မေးမြန်းလိုက်သည်။

"ဒါဆို အဲဒီနတ်သစ်ပင်က အမှန်စင်စစ် ဘယ်လိုနေရာမျိုးလဲ။ ဘယ်လိုလူကို နှိမ်နင်းချုပ်နှောင်ထားတာလဲ။ ပြီးတော့ မင်းငါ့ကို ပေးခဲ့တဲ့ အိုးခြမ်းပဲ့ ကြေးညိုအိုးကကော အမှန်စင်စစ် ဘာပစ္စည်းလဲ"

မိစ္ဆာကျင့်ကြံသူ ကျိန်းဟွမ်က တည်ငြိမ်စွာ ရှင်းပြသည်။

"အဲဒီနတ်သစ်ပင်က မာန်ဟွန်းကမ္ဘာရဲ့ ရှေးအကျဆုံး အပင်ကြီးတစ်ပင်ပဲ။ ကြားဖူးတာကတော့ မူလက အဲဒီအပင်ပေါ်မှာ ကောင်းကင်နဲ့မြေပြင်ကို ဆက်သွယ်ပေးနိုင်တဲ့ ယဇ်ပလ္လင်တစ်ခု ရှိခဲ့ဖူးတယ်။ အဲဒီအပေါ်မှာ မာန်ဟွန်းကမ္ဘာရဲ့ အစွမ်းအထက်ဆုံး နတ်ဘုရားတစ်ပါးကို ပိတ်ဆို့နှိမ်နင်းထားတာ"

လီယန်ချူက အံ့ဩတကြီးဖြင့် -

"မာန်ဟွန်းကမ္ဘာရဲ့ နတ်ဘုရားကို ပိတ်ဆို့နှိမ်နင်းထားတာ ဟုတ်လား"

ကျိန်းဟွမ်က ဆိုသည်။

"မှန်ပါတယ်။ ဆရာသခင်နဲ့အတူ ဒီနေရာကို စရောက်တုန်းက မာန်ဟွန်းကမ္ဘာတစ်ခုလုံးက အလွန်တရာ ယုတ်မာကောက်ကျစ်တဲ့ မိစ္ဆာနတ်ဘုရားတွေကို ကိုးကွယ်နေကြတာကို တွေ့ခဲ့ရတယ်။ သက်ရှိသတ္တဝါတွေရဲ့ အသားနဲ့သွေးတွေကို ယဇ်ပူဇော်ပြီး ကျွေးမွေးရတာမို့လို့ ဧရာမလူသားမျိုးနွယ်စုတွေဟာ အလွန်တရာ ဆင်းရဲဒုက္ခ ရောက်ခဲ့ကြရတယ်"

"ဆရာသခင်က ဒီနေရာမှာ တရားဓမ္မတွေ ပြသပြီး၊ မာန်ဟွန်းကမ္ဘာရဲ့ ဧရာမလူသားတွေကို အဲဒီမိစ္ဆာနတ်ဘုရားတွေကို တိုက်ဖျက်ဖို့ ကူညီပေးခဲ့တယ်။ နောက်ဆုံးမှာတော့ အဲဒီနတ်ဘုရားတွေကို လုံးဝဥဿုံ ပိတ်ဆို့နှိမ်နင်းနိုင်ခဲ့တာပဲ"

"ဒါကြောင့်မို့လို့ နတ်ဘုရားကျောင်းဆောင်ရဲ့ ရှေ့မှာ မိစ္ဆာနတ်ဘုရားတွေကို နှိမ်နင်းဖို့အတွက် ဧရာမ ကြေးညိုထည် အသုံးအဆောင်ပစ္စည်းတွေ ရှိနေရတာကိုး"

လီယန်ချူ၏ စိတ်ထဲတွင် ထိုစဉ်က ဧရာမလူသားမျိုးနွယ်စုများနှင့် ထိုမိစ္ဆာနတ်ဘုရားများအကြား ပြင်းထန်သော စစ်ပွဲကြီးတစ်ခု ဖြစ်ပွားခဲ့လိမ့်မည်ဟု ခံစားမိခဲ့သော်လည်း၊ ၎င်းမှာ ထိုနတ်ဘုရားမ၏ ဦးဆောင်မှုအောက်တွင် ဖြစ်ပွားခဲ့လိမ့်မည်ဟု မထင်မှတ်ထားခဲ့ပေ။

လီယန်ချူက ထပ်မံ၍ အသေးစိတ် မေးမြန်းလိုက်သည်။

"မင်းရဲ့ ဆရာသခင်မှာ ကြီးမားတဲ့ နတ်ဘုရားအတတ် ရှိနေတာပဲကို ဘာဖြစ်လို့ အဲဒီနတ်ဘုရားတွေကို လုံးဝ ဥဿုံ အမှုန့်ချေပြီး မဖျက်ဆီးပစ်ခဲ့တာလဲ"

ကျိန်းဟွမ်က ရှင်းပြသည်။

"အဲဒီနတ်ဘုရားတွေက အသူရာလမ်းစဥ်ကနေ လာကြတာ။ ဒီအရပ်ရဲ့ ကိုးကွယ်ဆုတောင်းခြင်း အမွှေးတိုင်စွမ်းအားတွေကို ခံယူထားတာ နှစ်ပေါင်းများစွာ ကြာပြီဖြစ်လို့၊ အကယ်၍ သူတို့ကို အကုန်လုံး သတ်ပစ်လိုက်မယ်ဆိုရင် အသူရာလမ်းစဉ်က အင်အားစုတွေ အလုံးအရင်းနဲ့ ဆင်းသက်လာပြီး ကမ္ဘာပျက်ကိန်း ဆိုက်ရောက်သွားနိုင်တယ်။ ဒါကြောင့်မို့လို့ မတူညီတဲ့ နတ်ဘုရားတွေကို ခွဲခြားနှိမ်နင်းဖို့အတွက် ကြေးညိုထည်ပစ္စည်းတွေကို သွန်းလုပ်ခဲ့ရတာ ဖြစ်တယ်"

လီယန်ချူက အသက်ကို ပြင်းပြင်းရှူလိုက်ရင်း -

"အသူရာလမ်းစဉ် ဟုတ်လား"

ကျိန်းဟွမ်က တည်ငြိမ်စွာ ပြောဆိုသည်။

"မှန်ပါတယ်။ အသူရာလမ်းစဉ်က နတ်လောက လမ်းစဉ်နဲ့ အလားတူပဲ။ အသူရာရဲ့ သက်ရှိတွေက လွန်စွာ အစွမ်းထက်ကြပေမဲ့ ရုပ်ဆိုးအကျည်းတန်ပြီး လူနဲ့မတူကြဘူး။ သူတို့က လူသားမျိုးနွယ်စုတွေကို အစာအာဟာရလိုပဲ သဘောထားကြတာ"

လီယန်ချူက ဤစကားကို ကြားလျှင် ကျိန်းဟွမ်ကို တည်ငြိမ်စွာ စိုက်ကြည့်လိုက်ရာ၊ ကျိန်းဟွမ်က အလျင်အမြန် ရှင်းပြရှာသည်။

"သခင်... ငါ့ကို အဲဒီလို မကြည့်ပါနဲ့။ ငါက တကယ့် စစ်မှန်တဲ့ တာအိုကျင့်ကြံသူ၊ တရားသော ဂိုဏ်းဝင်တစ်ဦးမို့လို့ လူသားတွေကို မစားပါဘူး"

လီယန်ချူက အသာအယာ ပြုံးလိုက်ရင်း -

"ဆက်ပြောပါဦး၊ ဒီအသူရာလမ်းစဉ်နဲ့ နတ်လောကလမ်းစဉ်ဆိုတာ ဘာကို ပြောတာလဲ"

ဒဏ္ဍာရီပုံပြင်များတွင် မှားယွင်းမှုများစွာ ရှိနိုင်သဖြင့် သူသည် ကျိန်းဟွမ်ထံမှတစ်ဆင့် ဤနေရာ၏ စစ်မှန်သောအခြေအနေကို နားလည်လိုခြင်း ဖြစ်သည်။

ကျိန်းဟွမ်က ရှင်းပြသည်။

"စောစောက ဆင်းသက်လာတဲ့ နတ်လူသားကတော့ နတ်လောကလမ်းစဉ်က ဖြစ်တယ်။ နတ်လောကမျိုးနွယ်စုတွေက မွေးရာပါ အစွမ်းထက်ကြပြီး၊ နတ်ဗိမာန်ရဲ့ အုပ်ချုပ်မှုကို ခံယူကာ လောကအသီးသီးကို စီမံခန့်ခွဲကြတာ။ လူ့ပြည်နဲ့ အနီးဆုံးနေရာက နတ်ဗိမာန်မဟုတ်ဘဲ နတ်လောက ကောင်းကင်ဘုံ ဖြစ်ပြီး ရူပဘုံ လို့လည်း ခေါ်ကြတယ်"

လီယန်ချူ သဘောပေါက်သွားပြီး -

"နတ်လောကရဲ့ နတ်လူသားတွေက ဘယ်လောက်အထိ အစွမ်းထက်လဲ"

မိစ္ဆာကျင့်ကြံသူ ကျိန်းဟွမ်က ခေါင်းခါယမ်းလိုက်ရင်း -

"ဒါကိုတော့ ငါလည်း အသေအချာ မသိဘူး။ ဒါပေမဲ့ အားအနည်းဆုံး နတ်လူသားတစ်ဦးကတောင် မြေပြင်နတ်ဘုရားအဆင့်ရဲ့ စွမ်းအားနဲ့ ညီမျှတယ်"

ကျိန်းဟွမ်က ဆက်လက်၍ -

"နတ်လူသားတွေက အသူရာနတ်ဘုရားတွေလိုပဲ လူသားတွေနဲ့ မျိုးနွယ်စုမတူကြဘူး။ ငါတို့ မိစ္ဆာမျိုးနွယ်စုဆိုရင် သူတို့မျက်စိထဲမှာ ပိုပြီးတော့တောင် အဆင့်မရှိတဲ့အရာတွေလို့ သတ်မှတ်ခံရတာ"

လီယန်ချူက ဆိုသည်။

"ဒါဆို အဲဒီကြေးညိုအိုးက အမှန်စင်စစ် ဘာပစ္စည်းလဲ"

ကျိန်းဟွမ်က လီယန်ချူကို ကြည့်ကာ လေးနက်သော အသံဖြင့် ပြောလိုက်သည်။

"ဒါက ရှေးဟောင်းခေတ်က နတ်လက်နက်တစ်ခုဖြစ်တဲ့ 'မိစ္ဆာနှိမ်နင်းအိုး' ရဲ့ အိုးခြမ်းပဲ့ အပိုင်းအစပဲ"

လီယန်ချူ အနည်းငယ် စိတ်လှုပ်ရှားသွားပြီး အံ့ဩတကြီး မေးလိုက်သည်။

"မိစ္ဆာနှိမ်နင်းအိုး ဟုတ်လား"

ကျိန်းဟွမ်က ခေါင်းညိတ်လိုက်ပြီး -

"မှန်ပါတယ်။ ဒါပေမဲ့ တစ်ဝက်ပဲ ရှိတာ။ ကျန်တဲ့တစ်ဝက်ကတော့ ကြာလှပြီဖြစ်တဲ့အချိန်ကတည်းက ပျောက်ဆုံးသွားခဲ့တာ။ တစ်ဝက်တည်းနဲ့တော့ ဒါရဲ့ စွမ်းအားအပြည့်အဝကို ထုတ်ဖော်လို့ မရနိုင်ဘူး။ မိစ္ဆာနှိမ်နင်းအိုးထဲမှာ ဆန်းကြယ်တဲ့ အာကာသနယ်မြေ ရှိပြီး၊ အဲဒီအိုးကို ထိန်းချုပ်နိုင်ရင် အတိုင်းအဆမရှိတဲ့ စွမ်းအားတွေကို ပိုင်ဆိုင်နိုင်လိမ့်မယ်။ နတ်မိစ္ဆာတွေတောင် ထိတ်လန့်သွားရမယ့် အရာပဲ"

လီယန်ချူက ခေါင်းညိတ်လိုက်ရင်း -

"ဒီလိုကိုး"

ဤကြေးညိုအိုး၏ နောက်ခံဇာစ်မြစ်က ဤမျှအထိ ကြီးမားလိမ့်မည်ဟု လီယန်ချူ မထင်မှတ်ထားခဲ့ပေ။

လီယန်ချူက ထပ်မံ၍ မေးမြန်းလိုက်သည်။

"လွန်ခဲ့တဲ့ နှစ်နှစ်ထောင်က မင်းနဲ့ ဆရာသခင် ဒီနေရာကို ရောက်လာတုန်းက၊ တာအိုနယ်မြေ ဂူဗိမာန်တွေကို နယ်ပယ်ပြင်ပ ကောင်းကင်မိစ္ဆာတွေ သိမ်းပိုက်ထားတဲ့အကြောင်းကို သိခဲ့လား"

ကျိန်းဟွမ်က အံ့ဩတကြီးဖြင့် -

"ဘာနယ်ပယ်ပြင်ပ ကောင်းကင်မိစ္ဆာလဲ"

လီယန်ချူ မျက်ခုံးပင့်လိုက်မိပြီး -

"မင်းမသိဘူးလား"

ကျိန်းဟွမ်က ခေါင်းခါယမ်းလျက် -

"ငါ အဲဒီလို ဖြစ်တည်မှုကို တစ်ခါမှ မကြားဖူးဘူး။ ကောင်းကင်မိစ္ဆာဆိုတာကိုတော့ ငါသိပါတယ်။ ပုံသဏ္ဌာန်မရှိ၊ အဆင်းမရှိဘဲ လူတွေရဲ့ စိတ်နှလုံးကို သိမ်းပိုက်ပြီး လမ်းစဉ်ကျင့်ကြံသူတွေရဲ့ ကျင့်စဉ်ကို ဖျက်ဆီးတတ်ကြတာ။ ဒါပေမဲ့ အလွန်ပဲ တွေ့ရခဲပါတယ်"

လီယန်ချူ ဤစကားကို ကြားလျှင် တိတ်ဆိတ်သွားမိသည်။

ခဏမျှ တိတ်ဆိတ်သွားပြီးနောက်၊ သူသည် ကျန်းထင် ရှန်း ဂူဗိမာန်နှင့် အခြားတာအိုနယ်မြေများရှိ နယ်ပယ်ပြင်ပ ကောင်းကင်မိစ္ဆာများ၏ ပုံသဏ္ဌာန်နှင့် စွမ်းရည်များကို ဖြည်းဖြည်းချင်း ရှင်းပြလိုက်သည်။

ကျိန်းဟွမ်က ကြားလျှင် အလွန်အံ့ဩသွားပြီး -

"အသားစတွေ ကျန်ရစ်ပြီး စိတ်ဝိညာဉ်ကို ညစ်ညမ်းစေတယ် ဟုတ်လား... ဒါက နယ်ပယ်ပြင်ပ ကောင်းကင်မိစ္ဆာ မဟုတ်ဘူး"

လီယန်ချူက ကမန်းကတန်း မေးလိုက်သည်။

"ဒါက ဘာလဲဆိုတာ မင်းသိလို့လား"

မိစ္ဆာကျင့်ကြံသူ ကျိန်းဟွမ်က အံ့ဩဖွယ် စကားတစ်ခွန်းကို လေးနက်စွာ ပြောလိုက်သည်။

"နတ်လူသားတွေရဲ့ ခန္ဓာကိုယ်ဟာ ဒီလောကမှာ ကျန်ရစ်ခဲ့ရင်ပဲ အဲဒီလို အခြေအနေမျိုး ဖြစ်ပေါ်တတ်တာ"

ဤစကား ထွက်လာသည်နှင့် လီယန်ချူ ချက်ချင်းပင် မျက်မှောင်ကြုတ်သွားမိပြီး၊ ဘေးနားရှိ ယွမ်ရှူးနှင့် ဇီရွှမ်တို့ပါ တုန်လှုပ်ချောက်ချားသွားကြရသည်။

ဇီရွှမ်မှာ နယ်ပယ်ပြင်ပ ကောင်းကင်မိစ္ဆာကို မမြင်ဖူးသော်လည်း၊ ယွမ်ရှူးမှာမူ နတ်ဘုရားနယ်‌မြေ များသို့ ရောက်ရှိခဲ့ဖူးသဖြင့် ထိုကြောက်မက်ဖွယ်ကောင်းသော အသားစများကို မြင်တွေ့ဖူးသူ ဖြစ်သည်။

ကျိန်းဟွမ်က ရှင်းပြသည်။

"စောစောက ဆင်းသက်လာတဲ့ နတ်ဘုရားကတော့ ကျင့်ကြံသူတစ်ဦးရဲ့ ခန္ဓာကိုယ်ကို သိမ်းပိုက်ပြီး လူ့ခန္ဓာကိုယ်နဲ့ ဆင်းသက်လာတာ။ ဒါပေမဲ့ အမှန်စင်စစ် နတ်လူသားတိုင်းက အလွန်တရာ အရပ်မြင့်မားပြီး ဧရာမ ခန္ဓာကိုယ်ကြီးတွေ ရှိကြသလို ဆန်းကြယ်တဲ့ စွမ်းရည်အမျိုးမျိုးကိုလည်း ပိုင်ဆိုင်ကြတယ်။"

"နတ်ဗိမာန်နဲ့ နတ်လောက ကောင်းကင်ဘုံက အလွန်တရာ ထူးခြားမြင့်မြတ်လှတယ်။ သူတို့ လူ့ပြည်ကို ဆင်းသက်လာတဲ့အခါ အထပ်ထပ် ကန့်သတ်ချက်တွေကို ခံရပြီး စွမ်းအားတွေ လျော့နည်းသွားတတ်ကြတယ်။ သူတို့ရဲ့ ခန္ဓာကိုယ်တွေက သာမန်လမ်းစဉ်ကျင့်ကြံသူတွေနဲ့ မတူတော့ဘူး။ လူ့ပြည်ရဲ့ စွမ်းအင်က သူတို့အတွက် လွန်စွာ ပါးလွှာလွန်းလှသဖြင့်၊ အကယ်၍ နတ်လူသားမျိုးနွယ်စုတွေ လူ့ပြည်မှာ သေဆုံးသွားခဲ့ရင် အဲဒီလို ကြောက်မက်ဖွယ်ကောင်းတဲ့ အခြေအနေမျိုး ဖြစ်ကျန်ရစ်ခဲ့တာပဲ"

လီယန်ချူက သက်ပြင်းတစ်ချက် ချလိုက်ရင်း၊ စောစောက နတ်လူသား၏ သွေးစက်များ မြေပြင်ပေါ်သို့ ကျရောက်စဉ်က ကင်းခြေများကောင်ကြီး ပြောင်းလဲသွားသည့် ပုံစံကို တွေးမိကာ သဘောပေါက်သွားတော့သည်။

ဤအချက်ကို ရှင်းပြပြီးနောက်မှ ကျိန်းဟွမ်က အံ့ဩတကြီးဖြင့် ထပ်မံ မေးမြန်းလိုက်သည်။

"စောစောက မင်းပြောတာ တာအိုနယ်မြေ ဂူဗိမာန်တွေ အားလုံး ပျက်စီးကုန်ပြီ ဟုတ်လား"

လီယန်ချူက ခေါင်းညိတ်ပြလျက် -

"ကျန်းထင်ရှန်း ၊ ချင်ယွဲ့ထန်၊ ထောင်ယွမ်ရှန်း စတဲ့နေရာတွေ အားလုံး ပျက်စီးကုန်ပြီ။ ဆန်းကြယ်တဲ့ ထူးဆန်းမှုတွေ ပြည့်နှက်နေပြီး လူသဏ္ဌာန် မိစ္ဆာတွေနဲ့ ကြောက်မက်ဖွယ်ကောင်းတဲ့ အသားစတွေ ရှိနေကြတယ်။ တာအိုဂူဗိမာန်တွေတင်မကဘူး... စွမ်းအားကြီးမားတဲ့ လူ့ပြည်ရဲ့ လျှို့ဝှက်နယ်မြေတစ်ခုဖြစ်တဲ့ ယွမ်ရှောင်းလျှို့ဝှက်နယ်မြေမှာတောင် နယ်ပယ်ပြင်ပ ကောင်းကင်မိစ္ဆာတွေရဲ့ အစအနကို တွေ့ခဲ့ရတယ်"

ကျိန်းဟွမ် တိတ်ဆိတ်သွားပြီး ရေရွတ်လိုက်သည်။

"အမှန်စင်စစ် ဘာတွေဖြစ်ခဲ့တာလဲ။ တာအိုဂူဗိမာန်တွေထဲမှာ နေထိုင်ကြတာ မြေပြင်နတ်ဘုရားတွေချည်းပဲကို၊ ဘာဖြစ်လို့ နတ်လူသားတွေရဲ့ တိုက်ခိုက်မှုကို ခံလိုက်ရတာလဲ"

ကျိန်းဟွမ်သည် လွန်ခဲ့သော နှစ်နှစ်ထောင်ကတည်းက ဤနေရာသို့ ရောက်ရှိနေခြင်းဖြစ်သဖြင့် လက်ရှိလူ့ပြည်၏ အခြေအနေကို နားမလည်နိုင်ကြောင်း လီယန်ချူ သတိရလိုက်ပြီး တည်ငြိမ်စွာ ပြောလိုက်သည်။

"ခုခေတ်မှာတော့ ဒဏ္ဍာရီတွေ ပြတ်တောက်ကုန်ပြီ။ လောကမှာလည်း နတ်ဘုရာ တွေ အစွမ်းပြတာ မရှိတော့ဘူး။ နတ်ဘုရားလောကသို့ တက်လှမ်းမယ့် လမ်းကြောင်းလည်း ပြတ်တောက်သွားခဲ့ပြီ။ ဒါတင်မကသေးဘူး... အင်အားစုတွေ အာဏာလုပွဲ မရောက်ခင်ကဆိုရင် လူ့ပြည်မှာ အဆင့်သုံးဆင့် ကို ရောက်ဖို့တောင် အလွန်ခက်ခဲလှပြီး၊ ခန္ဓာကိုယ်ပေါ်မှာ သံခြေကျင်း အထပ်ထပ် ခတ်ထားသလိုမျိုး ဖြစ်နေခဲ့တာ"

မိစ္ဆာကျင့်ကြံသူ ကျိန်းဟွမ် အနည်းငယ် ထိတ်လန့်သွားပြီး အော်ဟစ်မိတော့သည်။

"ဘာ... နတ်လောကကို တက်လှမ်းမယ့် လမ်းကြောင်း ပြတ်တောက်သွားပြီး ဟုတ်လား"

သူသည် ကြီးမားသော တုန်လှုပ်မှုကို ခံလိုက်ရပုံရသည်။

သူသည် မိစ္ဆာမျိုးနွယ်စု လမ်းစဉ်ကျင့်ကြံသူတစ်ဦး ဖြစ်သော်လည်း၊ ကျင့်ကြံခြင်း၏ ရည်ရွယ်ချက်မှာ သေချာပေါက် နတ်လောကသို့ တက်လှမ်းရန်ဟု မဆိုလိုပေ။ အကယ်၍ မြေပြင်နတ်ဘုရားတစ်ဦး ဖြစ်လာနိုင်ပြီး လောက၌ လွတ်လပ်စွာ နေထိုင်နိုင်လျှင်လည်း အလွန်ကောင်းမွန်လှသည်။

ထို့ပြင် မိစ္ဆာမျိုးနွယ်စုများ နတ်လောကသို့ တက်လှမ်းလျှင်လည်း အဆင့်အတန်း မြင့်မားချင်မှ မြင့်မားမည်ဖြစ်ပြီး နတ်ဗိမာန်တွင် အပယ်ခံရရန် လွယ်ကူလှသည်။

သို့သော် နတ်လောကသို့ တက်လှမ်းမည့် လမ်းကြောင်း ပြတ်တောက်သွားပြီး နတ်လောကနှင့် လူ့ပြည် အပြီးတိုင် ကွာရှင်းသွားခဲ့သည်ဟူသော အချက်ကမူ သူ့အတွက် မယုံနိုင်စရာ ဖြစ်နေရသည်။

ကျိန်းဟွမ်တစ်ယောက် အတော်ကြာအောင် တိတ်ဆိတ်သွားပြီးမှ ဖြည်းဖြည်းချင်း မေးမြန်းလိုက်သည်။

"အဲဒီ အဆင့်သုံးဆင့် ဆိုတာ ဘာကို ပြောတာလဲ"

လီယန်ချူ အံ့ဩသွားပြီးမှ၊ တစ်ဖက်လူသည် ယခင်ခေတ်က ပထမအဆင့် ၊ ဒုတိယအဆင့် စသည့် ကျင့်ကြံခြင်းစနစ်ကိုသာ သိရှိထားဆဲ ဖြစ်ကြောင်း သတိရလိုက်သည်။ ထို့ကြောင့် သူသည် ချန်နိုင်ငံနောက်ပိုင်းတွင် သတ်မှတ်ခဲ့သည့် ကျင့်ကြံခြင်းစနစ်အဆင့်ဆင့်ကို ရှင်းပြပေးလိုက်သည်။

ကျိန်းဟွမ်က မျက်မှောင်ကြုတ်လိုက်ရင်း -

"နားထောင်ရတာတော့ ကိုးခုမြောက်အဆင့် ကျင့်ကြံခြင်းစနစ်နဲ့ ဆင်တူပါတယ်။ ဒါပေမဲ့ ဘာဖြစ်လို့ မဖြစ်မနေ ယန်ဝိညာဉ် ကို စုစည်းရမှာလဲ"

ယခုတစ်ကြိမ်တွင်မူ လီယန်ချူတစ်ယောက် အံ့ဩသွားရုံမျှမက၊ ယွမ်ရှူးနှင့် ဇီရွှမ်တို့ပါ ကျိန်းဟွမ်ကို လှမ်းကြည့်လိုက်ကြသည်။

လီယန်ချူက ထူးဆန်းစွာ မေးလိုက်သည်။

"ဒီစကားက ဘာကို ဆိုလိုတာလဲ"

ကျိန်းဟွမ်က ရှင်းပြသည်။

"စိတ်ကူးပုံဖော်ခြင်းအတတ် ဆိုတာ နတ်ဘုရားအတတ်တစ်ခုမျှသာ ရှိသေးတာ။ ယန်ဝိညာဉ် ဆိုတာလည်း အဆင့်တစ်ခုမျှသာပဲ။ ဘာဖြစ်လို့ လက်ရှိလူ့ပြည်ရဲ့ အဓိကကျင့်ကြံခြင်း စနစ်က ဒီလမ်းစဉ်တစ်ခုတည်းပဲ ရှိနေရတာလဲ"

လီယန်ချူ ဆွံ့အသွားရသည်။

ကျိန်းဟွမ်က ဆက်လက်၍ -

"ကောင်းကင်နဲ့မြေပြင်ကို ဆက်သွယ်ပြီး နတ်ဘုရားအတတ်ကို ဆင်ခြင်တာ... အရင်တုန်းက လမ်းစဉ်ကျင့်ကြံသူတွေဟာ မူလစိတ်ဝိညာဉ်ကျင့်စဉ် ကို ကျင့်ကြံကြတာ၊ ဒါမှမဟုတ် ယင်နှင့်ယန် စွမ်းအင်နှစ်ပါးကို ကျင့်ကြံကြတာ၊ ဒါမှမဟုတ် မိမိရဲ့ အသက်သခင် ဓားမြှောင်ကျင့်စဉ်ကို ကျင့်ကြံကြတာ စသဖြင့် အမျိုးအစား လွန်စွာ များပြားလှတယ်။ ခုမှပဲ မူလစိတ်ဝိညာဉ် စိတ်ကူးပုံဖော်ခြင်းအတတ်က အဓိက လမ်းစဉ်ကြီး ဖြစ်နေရတာကတော့ တကယ့်ကို အံ့ဩစရာပဲ"

လီယန်ချူ တိတ်ဆိတ်သွားပြီးမှ တည်ငြိမ်စွာ ပြောလိုက်သည်။

"ဒါက ကျင့်စဉ်စနစ်တွေ ပြောင်းလဲသွားလို့ နေမှာပါ"

ရုတ်တရက် သူသည် အချက်တစ်ခုကို တွေးမိသွားသဖြင့် ထပ်မံ မေးမြန်းလိုက်သည်။

"မင်း အဲဒီတုန်းက နေခဲ့တဲ့ မင်းဆက်အမည်က ဘာလဲ"

ကျိန်းဟွမ် အံ့ဩသွားပြီးနောက် အသာအယာ ပြုံးလျက် -

"သခင်က ကျင့်ကြံခြင်းကိုပဲ စိတ်နှစ်ထားပုံရတယ်။ ကြည့်ရတာ သမိုင်းကြောင်းကို သိပ်မသိရှာဘူးပဲ။ ငါက မဟာရှန်းမင်းဆက် က လမ်းစဉ်ကျင့်ကြံသူတစ်ဦးပါ"

မဟာရှန်းမင်းဆက်... လီယန်ချူ မျက်ခုံးပင့်လိုက်မိသည်။ ဤအမည်ကို သူ ကြားဖူးသည်မှာ ယခုတစ်ကြိမ်က ပထမဆုံး မဟုတ်ပေ။

"ငါ့ကို သခင်လို့ မခေါ်ပါနဲ့။ မင်းက မိစ္ဆာမျိုးနွယ်စု လမ်းစဉ်ကျင့်ကြံသူတစ်ဦး ဖြစ်တဲ့အတွက်၊ ငါတို့တွေ တာအိုမိတ်ဆွေ လို့ပဲ အပြန်အလှန် ခေါ်ကြရအောင်"

ကျိန်းဟွမ် အံ့ဩသွားပြီး ကမန်းကတန်း ပြောရှာသည်။

"အဲဒီလို ဘယ်ဖြစ်ပါ့မလဲ"

လီယန်ချူက ဆိုသည်။

"တာအိုမိတ်ဆွေ ကျိန်းဟွမ်... အမှန်အတိုင်း ပြောရရင် မင်းနဲ့ငါက ရင်းနှီးမှု သိပ်မရှိလှသေးဘူး။ မင်းငါ့ကို မိစ္ဆာနှိမ်နင်းအိုးရဲ့ အပိုင်းအစ ပေးခဲ့တာနဲ့ပဲ ငါတို့အကြားက ကံရေစက်က ပြီးဆုံးသွားခဲ့ပြီ။ အခု မင်းငါ့နောက်ကို တကူးတက လိုက်လာတာက... မင်းရဲ့ နောက်ကွယ်မှာ တစ်စုံတစ်ဦးက ညွှန်ကြားလိုက်လို့လား"

ကျိန်းဟွမ် ကြောင်အသွားပြီးမှ ဝန်ခံလိုက်သည်။

"မှန်ပါတယ်။ ငါ့ရဲ့ ဆရာသခင်က စိတ်ဝိညာဉ် အကြွင်းအကျန်လေးတစ်ခုပဲ ကျန်ခဲ့တာ။ ဒါမှမဟုတ် စိတ်ဝိညာဉ်အကြွင်းအကျန်လို့တောင် မခေါ်နိုင်တော့ဘဲ ကြာလှပြီဖြစ်တဲ့အချိန်ကတည်းက ပျောက်ကွယ်သွားခဲ့ရမှာ။ ဒါပေမဲ့ ငါ့ရဲ့ အသိဉာဏ်ပွင့်လာပြီးတဲ့နောက် သူမက ငါ့ကို လမ်းညွှန်ပြီး မင်းရဲ့နောက်ကို လိုက်ဖို့ ညွှန်ကြားခဲ့တာပါ"

လီယန်ချူ မျက်ခုံးပင့်လိုက်မိသည်။ ၎င်းမှာ ထိုပိယွန်းနတ်မိမယ်၏ ညွှန်ကြားချက် ဖြစ်နေလိမ့်မည်ဟု မထင်မှတ်ထားခဲ့ပေ။

ခဏမျှ တိတ်ဆိတ်သွားပြီးနောက် လီယန်ချူက မေးလိုက်သည်။

"မင်းရဲ့ ဆရာသခင်က လုံးဝ ပျက်စီးသွားတာ မဟုတ်ဘူးလား"

ကျိန်းဟွမ်က ရှင်းပြသည်။

"ဒါကိုတော့ ငါလည်း အသေအချာ မသိဘူး။ ဒါပေမဲ့ ဆရာသခင်ကတော့ ရှင်သန်ခြင်းမျှော်လင့်ချက် တစ်စွန်းတစ်စ ရှိသေးတယ်လို့ ပြောခဲ့တယ်။ အဲဒီရှင်သန်ခြင်း မျှော်လင့်ချက်က ဘယ်ကနေ လာမလဲဆိုတာကိုတော့ ငါလည်း မသိဘူး"

လီယန်ချူ ဤစကားကို ကြားလျှင် မျက်ဝန်းအစုံကို အနည်းငယ် စေ့လိုက်မိသည်။

ပိယွန်းနတ်မိမယ်၏ ရှင်သန်ခြင်း မျှော်လင့်ချက်က မိမိကိုယ်တိုင် ဖြစ်နေသည် မဟုတ်ပါလော။

မူလက သာမန် ကြက်ဖကြီးတစ်ကောင်မျှသာ ထင်မှတ်ထားခဲ့သော်လည်း၊ စစ်မှန်သော လမ်းစဉ်ကျင့်ကြံသူတစ်ဦး ဖြစ်နေရုံမျှမက ဤမျှအထိ လျှို့ဝှက်ချက်များစွာကို သိရှိထားလိမ့်မည်ဟု မထင်မှတ်ထားခဲ့ပေ။

သူသည် ကျိန်းဟွမ်နှင့် စကားပြောဆိုခြင်းမှတစ်ဆင့် မာန်ဟွန်းကမ္ဘာ၏ စစ်မှန်သောအမှန်တရားများစွာကို နားလည်လိုက်ရသည်။

ဥပမာ - ထိုနတ်နွားကြီးမှာ သူ၏ ဆရာသခင်၏ စီးတော်ယာဉ် ဖြစ်ပြီး စစ်မှန်သော နတ်သားရဲတစ်ကောင် ဖြစ်ကြောင်း။ ထိုစဉ်က ဧရာမလက်ဝါးကြီးနှင့် တိုက်ခိုက်စဉ်က နတ်နွားကြီး၏ စိတ်ဝိညာဉ်စစ် ပျက်စီးသွားခဲ့ရသော်လည်း၊ နောက်ဆုံး ကျန်ရစ်ခဲ့သည့်စွဲလမ်းစိတ် လေးတစ်ခု မပျက်စီးသေးသဖြင့် ယခုတစ်ကြိမ်တွင် ရုတ်တရက် ပြန်လည် နိုးထလာခဲ့ခြင်း ဖြစ်ကြောင်း။

ထို့ပြင် ထိုရွှေအမြုတေ ‌မှာလည်း စစ်မှန်သော နတ်ဆေးလုံးတစ်လုံး ဖြစ်သော်လည်း ၎င်း၏အတွင်းက တာအိုအငွေ့အသက်များစွာ ပျောက်ဆုံးသွားခဲ့ပြီ ဖြစ်ကြောင်း။

ဤမာန်ဟွန်းကမ္ဘာအတွင်းက သက်ရှိသတ္တဝါများ ဤမျှအထိ အစွမ်းထက်ကြပါလျက် အသိဉာဏ် မပွင့်ကြရသည့် အကြောင်းရင်းကိုမူ ကျိန်းဟွမ်လည်း အသေအချာ မသိချေ။ သူ၏ ဆရာသခင် ပိယွန်းနတ်မိမယ်ကမူ နားလည်ပုံရသော်လည်း သူ့ကို အသေအချာ ရှင်းပြခဲ့ခြင်း မရှိဘဲ၊ ကောင်းကင်ယံထက်က ထိုလမင်းကြီးနှင့် ဆက်စပ်မှု ရှိပုံရကြောင်းသာ အနည်းငယ် ပြောခဲ့ဖူးသည်။

လီယန်ချူက မေးမြန်းလိုက်သည်။

"ဒီကမ္ဘာမြေက ကိုယ်ခံပညာ လမ်းစဉ်နဲ့ ဘာပတ်သက်မှု ရှိလဲ"

ကျိန်းဟွမ်က ရှင်းပြသည်။

"ဆရာသခင် ပြောဖူးတာကတော့... ဒီနေရာက သာမန် လောကအသီးသီးထဲက တစ်ခု မဟုတ်ဘဲ၊ သိုင်းနတ်ဘုရား တစ်ဦးက ဖန်တီးခဲ့တာ ဖြစ်တဲ့အတွက် ဒီကမ္ဘာမြေမှာ အဲဒီ သိုင်းနတ်ဘုရားရဲ့ အလိုဆန္ဒ တစ်ခု ကျန်ရစ်နေတာဖြစ်ပြီး ဒါက သူရဲ့ အမွေအနှစ်ပဲ"

လီယန်ချူ အံ့ဩတကြီးဖြင့် -

" သိုင်းနတ်ဘုရား ဟုတ်လား"

ကျိန်းဟွမ်က ခေါင်းညိတ်ပြလျက် -

"မှန်ပါတယ်။ ဝူတောက်ရန်ရှန်း လို့လည်း ခေါ်ကြပြီး မြေပြင်နတ်ဘုရားအဆင့်နဲ့ ညီမျှတယ်။ အဲဒီနောက်ပိုင်း လမ်းကြောင်းကတော့ ပြတ်တောက်သွားခဲ့ပေမဲ့၊ ဒီနေရာကို သိုင်းနတ်ဘုရားက ဖန်တီးခဲ့တာကတော့ အမှန်ပဲ"

လီယန်ချူ သဘောပေါက်သွားရသည်။ မိမိ၏ အသိစိတ်ပင်လယ်အတွင်းက ထိုကျောက်စာအပိုင်းအစမှာ ဤနေရာမှ လာခြင်း ဖြစ်နေရုံကိုး။

ခဏမျှ စဉ်းစားပြီးနောက် သူက လေးနက်သော အသံဖြင့် မေးလိုက်သည်။

"တာအိုအလိုဆန္ဒ ဆိုတာ ဘာကို ပြောတာလဲ"

ကျိန်းဟွမ်က တကယ့် အမှန်တရားဂိုဏ်းဝင် မဟာရှန်းမင်းဆက်ခေတ်က လမ်းစဉ်ကျင့်ကြံသူဖြစ်သဖြင့် သေချာစွာ ရှင်းပြပေးသည်။

"မြေပြင်နတ်ဘုရားတွေဟာ လျှို့ဝှက်နယ်မြေနဲ့ ဂူဗိမာန်တွေကို ဖန်တီးနိုင်ကြတယ်။ ဂူဗိမာန် လျှို့ဝှက်နယ်မြေတိုင်းမှာ သူတို့ရဲ့ မူလဘူတ စွမ်းအားတွေ ကျန်ရစ်နေတတ်ပြီး၊ ဒါက ဒီဂူဗိမာန်ကို တည်ဆောက်ထားတဲ့ အခြေခံအုတ်မြစ် ဖြစ်တဲ့အတွက် ဒါကို တာအိုအလိုဆန္ဒလို့ ခေါ်တာပဲ"

လီယန်ချူသည် အလွန်အမင်း ထက်မြက်သူဖြစ်သဖြင့် ချက်ချင်းပင် တုံ့ပြန်လိုက်သည်။

"ဒီလိုဆိုရင်... ဒီလောကအသီးသီးဟာလည်း လျှို့ဝှက်နယ်မြေ တစ်ခုချင်းစီနဲ့ အလားတူနေတာ မဟုတ်ဘူးလား"

ကျိန်းဟွမ် ကြောင်အသွားပြီးမှ ဖြည်းဖြည်းချင်း ပြောလိုက်သည်။

"ဒီအချက်ကိုတော့ ငါလည်း တစ်ခါမှ မတွေးမိခဲ့ဖူးဘူး"

လီယန်ချူသည် မိမိ၏ ခန္ဓာကိုယ်အတွင်းက မဟာတာအိုသံကြီးကို တွေးမိသွားသည်။ မိစ္ဆာများကို သတ်ဖြတ်၍ ရရှိသော ကုသိုလ်မှတ်များဖြင့် အရာခပ်သိမ်းကို အဆင့်မြှင့်တင်ပေးနိုင်ခြင်းက -

'ဒါကလည်း အလိုဆန္ဒ အပိုင်းအစတစ်ခု ဖြစ်နေမလား'

လီယန်ချူ စိတ်ထဲက တွေးလိုက်မိသည်။

၎င်းနောက် နှစ်ဦးသားသည် ဤနေရာက အရိုးစများပေါ်တွင် မှတ်တမ်းတင်ထားသည့် ကိုယ်ခန္ဓာကြံ့ခိုင်မှု ကျင့်စဉ်အကြောင်းကို ဆက်လက် ပြောဆိုကြသည်။

ရှန့်ရှန်းနန်းတော် မှ လူများသည်လည်း ဤနေရာက မူလအရိုးစများပေါ်တွင် ရေးထွင်းထားသည့် ကိုယ်ခန္ဓာကြံ့ခိုင်မှု ကျင့်စဉ်ကို လွန်စွာ စိတ်ဝင်စားကြခြင်း ဖြစ်သည်။

သို့သော် လူတိုင်းက အပိုင်းအစအချို့ကိုသာ ရရှိကြခြင်း ဖြစ်ပြီး၊ ယခုတစ်ကြိမ်တွင် ထိုမျက်ခုံးနီ လူငယ်လေးကို ဝိုင်းဝန်းတိုက်ခိုက်ကြခြင်းမှာလည်း ထိုကိုယ်ခန္ဓာကြံ့ခိုင်မှု ကျင့်စဉ်ကြောင့်ပင် ဖြစ်သည်။ သူသည် အရိုးစအပိုင်းအစ အချို့ကို ရရှိထားခြင်း ဖြစ်သည်။

လီယန်ချူသည်လည်း ထိုအရိုးစပေါ်က ကျင့်စဉ်ကို ကျင့်ကြံဖူးသဖြင့် ၎င်းမှာ လွန်စွာ အစွမ်းထက်မြက်ကြောင်း သိရှိထားသည်။

သို့သော် မေးမြန်းကြည့်လိုက်သည့်အခါတွင်မူ မိစ္ဆာကျင့်ကြံသူ ကျိန်းဟွမ်ကိုယ်တိုင်က ၎င်းကျင့်စဉ်ကို တတ်မြောက်ထားသည့်အပြင် ၎င်းမှာ ဗားရှင်းအပြည့်အစုံ ဖြစ်နေလိမ့်မည်ဟု မထင်မှတ်ထားခဲ့ပေ။

လီယန်ချူက မျက်ခုံးပင့်လိုက်မိရင်း -

"မင်းက အပြည့်အစုံကို တတ်တယ် ဟုတ်လား"

ကျိန်းဟွမ်က တည်ငြိမ်စွာ ပြုံးလိုက်ရင်း -

"ဒီနတ်ဘုရားအတတ်ကို ငါ့ရဲ့ ဆရာသခင်က ချန်ထားခဲ့တာ ဖြစ်တဲ့အတွက်၊ ငါလည်း သဘာဝအတိုင်း ကျင့်ကြံဖူးတာပေါ့"

လီယန်ချူ အနည်းငယ် အံ့ဩသွားသည်ကို မြင်လျှင် ကျိန်းဟွမ်က ပြုံးလျက် ဆိုသည်။

"တာအိုမိတ်ဆွေက ငါ့ကို သခင်လို့ မခေါ်ခိုင်းပေမဲ့၊ ငါကတော့ မင်းရဲ့ဘေးမှာပဲ ခြံရံပြီး လိုက်ပါချင်ပါတယ်။ ဒီကျင့်စဉ်ကို ငါ့ရဲ့ ကနဦး လက်ဆောင်အဖြစ် သတ်မှတ်ပေးပါ"

ထို့နောက်တွင် သူသည် ဘေးနားရှိ ယွမ်ရှူးနှင့် ဇီရွှမ်တို့ကို တည်ငြိမ်စွာ လှမ်းကြည့်လိုက်သည်။

ယွမ်ရှူးက ပြုံးလျက် ပြောဆိုလိုက်သည်။

"ဒီလောက် အထိ များပြားလှတဲ့ ရှေးဟောင်းလျှို့ဝှက်ချက်တွေကို နားထောင်ခွင့်ရတာကတင် လီတာအိုမိတ်ဆွေရဲ့ ကျေးဇူးကြောင့်ပါ။ ငါတို့တွေ ဘေးကနေ နားမထောင်တော့ပါဘူး"

ဆရာတပည့်နှစ်ဦးသည် လျင်မြန်စွာ ဆုတ်ခွာသွားကြတော့သည်။

၎င်းမှာ အလွန်တရာ ရှေးကျပြီး ဆန်းကြယ်လှသော အမွေအနှစ် နတ်ဘုရားအတတ် ဖြစ်သဖြင့် လူအများအပြား သတ်ဖြတ်လုယူကြမည့် အရာ ဖြစ်သည်။ ကျိန်းဟွမ်အနေဖြင့် ထိုလူနှစ်ဦးအား ဘေးမှ နားထောင်ခွင့်ပြုမည် မဟုတ်သည်မှာ ဓမ္မတာပင်။

သူသည် စိတ်ဝိညာဉ်ချင်း ဆက်သွယ်ကာ ၎င်းနတ်ဘုရားအတတ်ကို လီယန်ချူအား အသေးစိတ် ရှင်းပြလေသည်။

သူသည် ကျင့်စဉ်ကို မည်သို့ မည်ပုံ လှုံ့ဆော်ရမည်ကို စာလုံးရေ ထောင်ချီ၍ အလွန်တရာ သေချာစွာ ရှင်းပြပေးသည်။

ထို့နောက်မှ ကျိန်းဟွမ်က ပြောလိုက်သည်။

"ဒီနတ်ဘုရားအတတ်ရဲ့ အမည်က မပျက်စီးနိုင်သော ရွှေကိုယ်ထည် လို့ ခေါ်တယ်။ အောင်မြင်အောင် ကျင့်ကြံနိုင်ရင် ခန္ဓာကိုယ်က အလွန်တရာ ကြံ့ခိုင်လာပြီး ခန္ဓာကိုယ်နဲ့ နတ်ဘုရားဖြစ်ခြင်း လမ်းစဉ်ကို လျှောက်လှမ်းတာပဲ"

မပျက်စီးနိုင်သော ရွှေကိုယ်ထည်... လီယန်ချူ မျက်ခုံးပင့်လိုက်မိသည်။

ကျိန်းဟွမ်က ဆက်လက်၍ -

"မပျက်စီးနိုင်သော ရွှေကိုယ်ထည်မှာ အဆင့်သုံးဆင့် ရှိတယ်။ အထွတ်အထိပ်အဆင့်ကို ကျင့်ကြံနိုင်ရင် နတ်ဘုရားတွေတောင် ဒဏ်ရာရအောင် မလုပ်နိုင်တော့ဘူး။"

"အပြည့်အစုံက မူလအရိုးစတွေပေါ်မှာ ရေးထားတာထက် များစွာ ပိုမို ဆန်းကြယ်နက်နဲတယ်။ အဲဒီတုန်းက ငါက ငါးနှစ်လောက် ကျင့်ကြံပြီးမှ အခြေခံကို ရခဲ့တာ။ တာအိုမိတ်ဆွေရဲ့ ခန္ဓာကိုယ်ကြံ့ခိုင်မှုက မူလကတည်းက သန်မာလှတာမို့လို့၊ ငါ့အမြင်အရတော့ တစ်နှစ်လောက်ဆိုရင် အခြေခံကို ရရှိပြီး ရွှေကိုယ်ထည်ကို အောင်မြင်နိုင်လိမ့်မယ်။ နောင်ပိုင်း ဖြည်းဖြည်းချင်း ဆက်ကျင့်သွားရင် ဒါရဲ့ စွမ်းအားအပြည့်ကို ထုတ်ဖော်နိုင်လိမ့်မယ်"

သူ၏ စကားပင် မဆုံးသေးခင်မှာပင် လီယန်ချူ၏ ခန္ဓာကိုယ်ပေါ်မှ နတ်ဘုရားအလင်းတန်းများ ပေါက်ကွဲထွက်လာပြီး၊ တစ်ကိုယ်လုံးမှာ လင်းလက်တောက်ပသော ရွှေရောင်အဖြစ် ပြောင်းလဲသွားကာ အငွေ့အသက်များမှာ အလွန်တရာ ထက်မြက်လာတော့သည်။

သူ၏ဘေးတွင် ရပ်နေရုံမျှဖြင့် ထိုကြောက်မက်ဖွယ်ကောင်းသော ဖိအားလှိုင်းကြီးကို အတိုင်းသား ခံစားနေရသည်။

ကျိန်းဟွမ် ဆွံ့အသွားပြီးနောက် အော်ဟစ်မိတော့သည်။

"တာအိုမိတ်ဆွေ... မင်း ဒါကို ကျင့်ဖူးတာလား"

လီယန်ချူသည် ဤရွှေကိုယ်ထည်ကြောင့် ရရှိလာသော စွမ်းအားကို ဆင်ခြင်ကြည့်လိုက်ရာ စောစောကထက် အဆပေါင်းများစွာ ပိုမို သန်မာလာကြောင်း ခံစားလိုက်ရသည်။

သူသည် နတ်ဘုရားအတတ်ကို ပြန်လည် ရုပ်သိမ်းလိုက်ပြီး ပြုံးလျက် ပြောလိုက်သည်။

"အရင်တုန်းက ရွာတစ်ရွာမှာ မင်းပြောတဲ့ မူလအရိုးစ အပိုင်းအစတစ်ခုကို ရှာတွေ့ဖူးလို့ ဒီကျင့်စဉ်ကို ကျင့်ကြံဖူးတာပါ"

ကျိန်းဟွမ်က အံ့ဩတကြီးဖြင့် -

"အပိုင်းအစ တစ်ခုတည်းလား"

လီယန်ချူက ခေါင်းညိတ်ပြလိုက်သည်။

ကျိန်းဟွမ် တစ်ယောက် အတော်ကြာအောင် ဆွံ့အသွားပြီး ဘာစကားမျှ မပြောနိုင်တော့ချေ။

နောက်ဆုံးတွင် အသက်ကို ပြင်းပြင်းရှူလိုက်ပြီးမှ ပြောနိုင်တော့သည်။

"မင်းရဲ့ ကျင့်ကြံခြင်း ပါရမီကတော့ ရှေးခေတ်ကတည်းက အခုအထိ အတုမရှိဘူး။ နောင်လာမယ့် အောင်မြင်မှုတွေက အတိုင်းအဆမရှိ ကြီးမားလိမ့်မယ်"

ဤအချိန်တွင်မှ ကျိန်းဟွမ်တစ်ယောက် လုံးဝဥဿုံ အလေးအမြတ်ပြု သွားတော့သည်။ သူ၏ ဆရာသခင်၏ ရွေးချယ်မှုက အလွန်တရာ အမျှော်အမြင် ကြီးမားလှပေစွ။

လီယန်ချူသည် မပျက်စီးနိုင်သော ရွှေကိုယ်ထည်ကို လှုံ့ဆော်လိုက်သည့်အခါ ခန္ဓာကိုယ်အတွင်း၌ အတိုင်းအဆမရှိသော စွမ်းအားများ စီးဆင်းနေပြီး၊ တစ်ကိုယ်လုံးမှာ ဆန်းကြယ်လှသော အခြေအနေတစ်ခုသို့ ရောက်ရှိသွားခဲ့သည်။

ကျိန်းဟွမ်မှာ စိတ်ဝိညာဉ် ဒဏ်ရာရရှိထားခြင်း ဖြစ်သဖြင့် လီယန်ချူသည် 'စိတ်ကြည်လင် ကျောက်စိမ်းပြား ကို အသုံးပြု၍ သူ့ကို ကုသပေးလိုက်သည်။

စိတ်ကြည်လင် ‌ကျောက်စိမ်းပြား သည် ကုသိုလ်မှတ် သိန်းဂဏန်းအဆင့်ရှိသော ရတနာဖြစ်သဖြင့် မူလစိတ်ဝိညာဉ်ကို တည်ငြိမ်စေရာတွင် ထူးခြားသော အာနိသင် ရှိသည်။

နတ်ဘုရားအလင်းတန်းများက သူ၏ စိတ်ဝိညာဉ်အတွင်းသို့ ဆက်တိုက် ကျရောက်သွားရာ၊ ကျိန်းဟွမ်၏ စိတ်ဝိညာဉ်အတွင်းက ဒဏ်ရာများမှာ ဖြည်းဖြည်းချင်း ပြန်လည် ကောင်းမွန်လာပြီး မျက်စိဖြင့် မြင်တွေ့နိုင်သော အက်ကြောင်းများမှာလည်း ပြန်လည် စေ့သွားခဲ့သည်။

ခဏအကြာတွင် ကျိန်းဟွမ်သည် မိမိ၏ ဒဏ်ရာများမှာ အများစု ပြန်လည် ကောင်းမွန်သွားပြီဖြစ်ကြောင်း အံ့ဩတကြီး သိရှိလိုက်ရသည်။

သူသည် ခေါင်းကို မော့ကာ လီယန်ချူကို ကြည့်ရင်း -

"တာအိုအစ်ကိုမှာ ဒီလောက်အထိ ထူးဆန်းတဲ့ နတ်ဘုရားအတတ် ရှိနေတာပဲ"

လီယန်ချူက အသာအယာ ပြုံးပြလိုက်သည်။

ဤကြောက်မက်ဖွယ်ကောင်းပြီး မောက်မာလှသော ကြက်ဖကြီး၏ ခန္ဓာကိုယ်ပေါ်မှ နတ်ဘုရားအလင်းတန်းများ ပေါက်ကွဲထွက်လာပြီး အငွေ့အသက်များမှာလည်း အလွန်တရာ သန်မာလာတော့သည်။

ခန္ဓာကိုယ်ကို တစ်ချက် လှုပ်ခတ်လိုက်ရာ အရွယ်ရောက်စ တစ်ဆယ့်ငါး၊ တစ်ဆယ့်ခြောက်နှစ်ခန့်ရှိသော လူငယ်လေးတစ်ဦးအဖြစ် ပြောင်းလဲသွားခဲ့သည်။ သူ၏ မျက်နှာပြင်မှာ စင်ကြယ်သန့်ရှင်းလှသည်။

ခန္ဓာကိုယ်ပေါ်က ကြောက်မက်ဖွယ်ကောင်းသော အငွေ့အသက်များမှလွဲ၍ သာမန် လူသားလူငယ်လေးတစ်ဦးနှင့် ဘာမျှ မခြားနားချေ။

ကျိန်းဟွမ်သည် အလွန်အမင်း ဝမ်းမြောက်ဝမ်းသာ ဖြစ်သွားပြီး လီယန်ချူအား အလျင်အမြန် အရိုအသေပြုလိုက်သည်။

"တာအိုအစ်ကိုရဲ့ ဒုတိယအကြိမ် ကယ်တင်ခြင်း ကျေးဇူးကို မှတ်ထားပါ့မယ်"

လီယန်ချူက ပြုံးလျက် -

"ဒီလိုမျိုး လုပ်နေဖို့ မလိုပါဘူး"

ကျိန်းဟွမ်၏ စိတ်နေစိတ်ထားမှာ လွတ်လပ်ပေါ့ပါးသူဖြစ်သဖြင့် ခြေဖဝါးအောက်တွင် နတ်တိမ်တိုက်များ ပေါ်ထွက်လာကာ ကောင်းကင်ယံသို့ ပျံသန်းသွားခဲ့သည်။

သူသည် ကောင်းကင်ယံထက်တွင် နတ်ဘုရားအတတ်အမျိုးမျိုးကို စမ်းသပ်ထုတ်ဖော်ကြည့်ရာ လွန်စွာ သွက်လက်ချက်ချာလှသည်။

သူ၏ အငွေ့အသက်မှာ လွန်စွာ ထူထဲလေးနက်ပြီး အလွန်တရာ တရားမျှတလှသည်။

'ကြက်ဖကြီး တစ်ချက်တွန်လျှင် လောကကြီး လင်းစေရမည်' ဆိုသကဲ့သို့ သူ၏ မူလရုပ်သွင်မှာ ရောင်စုံနတ်ကြက်ဖကြီး ဖြစ်သဖြင့် သွေးကြောများမှာ လွန်စွာ သန်မာလှသည်။

သူ့တွင် မိစ္ဆာများကို နှိမ်နင်းနိုင်သော နတ်ဘုရားအတတ် ရှိသည့်အပြင်၊ နောင်တွင် ပိယွန်းနတ်မိမယ်နောက်သို့ လိုက်ပါကာ လမ်းစဉ်ကျင့်ကြံမှုကို ကျင့်သုံးခဲ့ခြင်း ဖြစ်သည်။

ပြင်းထန်သော ဒဏ်ရာရရှိခဲ့ပြီး ယခုအချိန်အထိ အပြည့်အဝ ပြန်လည် မကောင်းမွန်သေးသော်လည်း အလွန်တရာ ထူးခြားလှသော နတ်ဘုရားအတတ်ကို ထုတ်ဖော်ပြသနေဆဲ ဖြစ်သည်။

ကျိန်းဟွမ်သည် ကောင်းကင်ယံမှ မြေပြင်ပေါ်သို့ ပြန်လည် ဆင်းသက်လာခဲ့ပြီး အလွန်အမင်း ပျော်ရွှင်စွာ ရယ်မောနေတော့သည်။

ယွမ်ရှူးနှင့် ဇီရွှမ်တို့ ပြန်လည် ရောက်ရှိလာကြသည့်အခါတွင်မူ ဆွံ့အသွားကြရသည်။

ထိုကြောက်မက်ဖွယ်ကောင်းပြီး မောက်မာလှသော ကြက်ဖကြီးမှာ စင်ကြယ်သန့်ရှင်းသော လူငယ်လေးတစ်ဦးအဖြစ် ပြောင်းလဲသွားလိမ့်မည်ဟု သူတို့ မထင်မှတ်ထားခဲ့သဖြင့် အလွန်တရာ အံ့ဩသွားကြရခြင်း ဖြစ်သည်။

လူတိုင်းက ဤနေရာမှ ထွက်ခွာခဲ့ကြပြီး၊ ကျိန်းဟွမ်၏ ဦးဆောင်မှုအောက်တွင် တောင်တန်းတစ်ခုဆီသို့ ဦးတည် လျှောက်လှမ်းခဲ့ကြသည်။

ကျိန်းဟွမ်က ပြုံးလျက် ပြောဆိုလိုက်သည်။

"တောင်ပေါ်မှာ ဆန်းကြယ်တဲ့ နတ်စမ်းရေတွင်းတစ်ခု ရှိတယ်။ စမ်းရေက အလွန်အမင်း ကြည်လင်ပြီး ကျင့်ကြံခြင်းကို ကူညီပံ့ပိုးပေးရာမှာ အလွန်ကောင်းမွန်တယ်"

သူ၏ မျက်ဝန်းအစုံမှာ ကြည်လင်တောက်ပနေပြီး လူငယ်တစ်ဦး၏ ရဲရင့်ထက်မြက်မှုများ ပြည့်နှက်နေသည်။

ဤအချက်ကပင် လွန်စွာ ရှားပါးလှပေသည်။ နှစ်ပေါင်းများစွာ ကျင့်ကြံခဲ့သော်လည်း ပြန်လည် ရောက်ရှိလာသည့်အခါတွင်မူ လူငယ်လေးတစ်ဦးအလား ဖြစ်နေဆဲပင်။

အဖွဲ့သားများက ထိုအရပ်သို့ လျှောက်လှမ်းနေကြစဉ် လီယန်ချူက စောစောက ချော်ရည်ကန်ကြီး၏ အခြေအနေကို မေးမြန်းလိုက်သည်။

ကျိန်းဟွမ်က ဆိုသည်။

"တာအိုအစ်ကိုက အဲဒီ မီးတောက်ဧရာမလူသားနဲ့ တွေ့ခဲ့တာလား"

လီယန်ချူက ခေါင်းညိတ်ပြလျက် -

"မှန်တယ်။ ဒါပေမဲ့ သူနဲ့ ထိပ်တိုက် မဆုံခဲ့ပါဘူး"

ကျိန်းဟွမ်က ခေါင်းညိတ်လိုက်ရင်း -

"အဲဒါက မွေးရာပါ မီးဒြပ်စင် စွမ်းအင်ကနေ ဖြစ်ပေါ်လာတဲ့ နတ်အလင်းကောင်ပဲ။ ချော်ရည်ကန်က မီးဒြပ်စင်စွမ်းအင်တွေ စုစည်းပြီး ဖြစ်ပေါ်လာတဲ့ အနှစ်သာရ ဖြစ်လို့၊ မီးဒြပ်စင်ကျင့်စဉ်ကို ကျင့်ကြံတဲ့သူတွေအတွက် အလွန်တရာ အကျိုးရှိတဲ့အရာပဲ"

"အဲဒီအောက်ခြေမှာ ကမ္ဘာမြေရဲ့ အမြုတေ မီးတောက် တစ်ခု ရှိပြီး သာမန်ကမ္ဘာမြေမီးတောက်ထက် အဆပေါင်း ရာချီ ပြင်းထန်လှတဲ့ နတ်ပစ္စည်းတစ်ခုပဲ"

လီယန်ချူ ခေါင်းညိတ်လိုက်မိသည်။ ကမ္ဘာမြေ၏ အမြုတေ မီးတောက်ကိုမူ သူ ရယူခဲ့ပြီးပြီ ဖြစ်သည်။

ကျိန်းဟွမ်၏ စကားကို ကြားမှသာ သူ သဘောပေါက်သွားပြီး ထိုချော်ရည်ကန်ကြီးမှာ အမှန်စင်စစ် ကောင်းမွန်သောအရာ ဖြစ်ကြောင်း သိရှိလိုက်ရသည်။

ကျိန်းဟွမ်မှာ ယခုအခါ ဤနေရာက ဒေသခံတစ်ဦး ဖြစ်နေပြီဖြစ်ရာ၊ လီယန်ချူက ထိုကန်ကြီးအတွင်းက ငါးနက်ကြီးများမှာ အမှန်စင်စစ် ဘာပစ္စည်းလဲဟု မေးမြန်းရန် ကြံရွယ်လိုက်စဉ်မှာပင် ရုတ်တရက် ကျယ်လောင်လှသော မိုးခြိမ်းသံကြီးတစ်ချက် ထွက်ပေါ်လာခဲ့သည်။

တစ်ကိုယ်လုံး မည်းမှောင်နေသော ဧရာမ ခြင်ကောင်ကြီးတစ်ကောင်သည် ခန္ဓာကိုယ်ဘေးတွင် အလွန်တရာ သိပ်သည်းလှသော သွေးအငွေ့အသက်များ ပြည့်နှက်နေလျက်

ယခုအခါတွင် အမျိုးသမီးကျင့်ကြံသူတစ်ဦးနှင့် ပြင်းထန်စွာ တိုက်ခိုက်နေတော့သည်။ ထိုအမျိုးသမီးကျင့်ကြံသူ၏ ရုပ်ရည်မှာ အလွန်တရာ ချောမောလှပပြီး ခြေဗလာဖြင့် ဖြစ်သည်။

ထိုအမျိုးသမီးကျင့်ကြံသူ၏ ဘေးတွင် ဧရာမ ခြင်္သေ့ကြီးတစ်ကောင် ရှိနေပြီး၊ ၎င်းမှာ နတ်သားရဲ ဆွန်းနီ ဖြစ်သည်။

လီယန်ချူ မျက်ခုံးပင့်လိုက်မိရင်း -

"ချင်းလော့ရွှမ်း "

သူ၏ အကြည့်က ထိုနတ်သားရဲ ဆွန်းနီပေါ်သို့ ကျရောက်သွားသည့်အခါ မဆိုင်းမတွ တုန့်ဆုတ်သွားမိသည်။

အကယ်၍ သူ မှတ်မိမမှားပါက၊ သူမ၏ နတ်သားရဲ ဆွန်းနီသည် မြေအောက်နန်းတော်အတွင်း၌ သေဆုံးသွားခဲ့ပြီ ဖြစ်ရာ၊ ယခုအချိန်တွင် ဘာဖြစ်လို့ ထပ်မံ ပေါ်ပေါက်လာရသနည်း။