အခန်း ၄၃၁

အခန်း(၄၃၁) အကုန်မကွာ…

ဖန်ကျင်းနယ်‌မြေ။

ချင်းယွန်ဘုံတွင် ဂိုဏ်းကြီးနှစ်ခု ထွက်ပေါ်လာတော့မည်ကို ချန်ဟွိုက်အန် မသိသေးပေ။ ထိုအချိန် သူ ဖန်ကျင်းမြင့်မြတ်နယ်မြေ၏ ဘဏ္ဍာတိုက်ကို လုယက်ရန် အလုပ်ရှုပ်နေဆဲပင်။

"ဗုဒ္ဓဘာသာကျင့်ကြံသူတွေရဲ့ ဓာတ်တော်တွေလား။ ယူမယ်။"

"ဝတ်ပြုသင်္ကန်းတွေ အဆင့်နိမ့်ပေမယ့်၊ သန့်ရှင်းရေးအဝတ်စအဖြစ် သုံးလို့ရတယ်။ ဒါမှမဟုတ် ခေတ်သစ် မိစ္ဆာနှိမ်နင်းရေး ပစ္စည်းတွေအတွက် ထုတ်ယူလို့ရတယ်..."

"ဝိညာဉ်ပုံဆောင်ခဲတွေ ဟဲဟဲဟဲ။ အခု အားလုံး ငါ့ဟာတွေချည်းပဲ။"

"ကာမရာဂအနုပညာစာအုပ်တွေ၊ ပြီးတော့ ယောကျ်ား-ယောကျ်ားပုံစံတွေ၊ ဒါ ဆရာတော်ဖန်ယဲ့… မင်း လုပ်နေတဲ့ အလုပ်တွေပေါ့။ ဒီလို ခက်ထန်တဲ့ပုံစံပေါက်တဲ့ ရဟန်းတစ်ပါးက ဒီလို အကြိုက်တွေ ရှိလိမ့်မယ်လို့ ဘယ်သူက ထင်မှာလဲ။"

ချန်ဟွိုက်အန်က ဆရာတော်ဖန်ယဲ့ စုဆောင်းထားသော စာအုပ်ခြင်းတောင်းတစ်ခုလုံးကို လက်တစ်ချက် တောက်၍ မီးရှို့လိုက်သည်။ ဤအရာများကို သူ၏ တန်ဖိုးထားရသော ချင်းရန် လုံးဝ မြင်တွေ့၍ မဖြစ်ပေ။ ၎င်းတို့က စိတ်ပိုင်းဆိုင်ရာ ညစ်ညမ်းမှု သက်သက်သာ ဖြစ်သည်။ ဆရာတော်ဖန်ယဲ့က ၎င်းတို့ ဆုံးရှုံးသွား၍ သေချာပေါက် ဝမ်းနည်းပူဆွေးရပေလိမ့်မည်။ အချို့မှာ အတော်လေး ဟောင်းနွမ်းနေပုံရပြီး နှစ်ပေါင်းများစွာ ခက်ခက်ခဲခဲ စုဆောင်းထားရသည့် ရှားပါးစုဆောင်းမှုများ ဖြစ်နိုင်သည်။ ယခုမူ အားလုံး ပျက်စီးသွားလေပြီ။

ယခုအထိ ဆရာတော်ဖန်ယဲ့ သေဆုံးခြင်းနှင့် ပတ်သက်၍ ဂိမ်းစနစ်ထံမှ မည်သည့် အသိပေးချက်မျှ သူ မရရှိသေးပေ။ ဆိုလိုသည်မှာ ဖန်ယဲ့က သေချာပေါက် အသက်ရှင်နေသေးပြီး တစ်နေရာရာတွင် ပုန်းကွယ်ကာ ဒဏ်ရာများကို ကုသနေခြင်း ဖြစ်နိုင်သည်။ သူ သက်သာမလာခင် ချန်ဟွိုက်အန်က ဖန်ကျင်းမြင့်မြတ်နယ်မြေကို အပြောင်ရှင်းပစ်ရန် လိုအပ်သည်။

...

"ဘိုးဘေးကြီး၊ ဖန်ကျင်းမြင့်မြတ်နယ်မြေက အရင်းအမြစ်တွေ အားလုံးကို ကျွန်တော်တို့ စုဆောင်းပြီးပါပြီ။ ဘာမှ မကျန်တော့ပါဘူး။"

တပည့်များက လုယက်ရရှိလာသော ပစ္စည်းများကို မြင့်မြတ်နယ်မြေ၏ ဗဟိုရင်ပြင်တွင် စုပုံထားကြသည်။ မူလက ထိုနေရာသည် တပည့်များ တရားနာယူရာနေရာ ဖြစ်သည်။ ယခုအခါ အမျိုးအမည်စုံလင်သော ပစ္စည်းများက တောင်တစ်တောင်ကဲ့သို့ ပုံနေသည်။ အဂ္ဂိရတ်ဂိုဏ်း သို့မဟုတ် လင်းရှီးတောင်ကြားကဲ့သို့သော အခြားဂိုဏ်းများမှ တပည့်များက ကျင့်ကြံခြင်း အရင်းအမြစ်များကိုသာ ယူကြသော်လည်း၊ ဓားကျောင်းတော် တပည့်များကမူ ပန်းချီကားများ၊ လက်ရေးလှစာများ၊ အပင်များ၊ ပရိဘောဂများ အပါအဝင် ဘာတစ်ခုမျှ မချန်ထားခဲ့ပေ။ ထို့ကြောင့် ဤမျှ များပြားသော ပစ္စည်းပုံကြီး ဖြစ်ပေါ်လာခြင်းပင်။

"ဒါ အကုန်လုံးဆိုတာ သေချာပြီလား။"

ချန်ဟွိုက်အန်က ထို"ပစ္စည်းတောင်"ကြီးကို မျက်လုံးကျဉ်းကာကြည့်ပြီး အဝေးမှ ရွှေချထားသော ကျောက်စိမ်းဖြူ ဂိတ်တံခါးကြီးဆီသို့ လက်ညှိုးထိုးပြလိုက်၏။ "ဖန်ကျင်းမြင့်မြတ်နယ်မြေရဲ့ တောင်တံခါးကြီးက ခမ်းနားတယ် မဟုတ်ဘူးလား"

သူ့ကို သတင်းပို့နေသော ကျန့်ဝူမြင့်မြတ်နယ်မြေ တပည့်မှာ အေးခဲသွားသည်။ "အာ... ဒါဆိုရင်..."

"ငါ့အမိန့်က ဘာလဲ။ ငါ ဘာကို အလေးအနက် ပြောခဲ့တာလဲ။"

ထိုတပည့် တွန့်ဆုတ်သွားသောအခါ ချင်းရန်က ချက်ချင်း ဖြေလိုက်သည်။ "အားလုံးကို ရှင်းလင်းရမယ်လို့ ဆရာ အမိန့်ပေးထားတာလေ။"

"အတိအကျပဲ။ ရှင်းလင်းတယ် ဆိုတာ မျက်စိရှေ့မှာ မြင်သမျှ အရာအားလုံးကို ယူရမယ်လို့ ပြောတာ။"

ချန်ဟွိုက်အန်က ကြမ်းပြင်ရှိ အုတ်ကြွပ်ပြားများကို ခြေဖြင့် နင်းလိုက်ပြီ သူ၏ နှုတ်ခမ်းများက ရက်စက်သော အပြုံးတစ်ခုအဖြစ် ကွေးတက်သွားသည်။ "ငါတို့ ဓားကျောင်းတော်က မြေသားလမ်းတွေကို သုံးနေရတုန်း ဖန်ကျင်းမြင့်မြတ်နယ်မြေကတော့ ရွှေချထားတဲ့ ကျောက်စိမ်းဖြူအုတ်ကြွပ်ပြားတွေ သုံးနေတယ်။ ဘယ်လောက် ဇိမ်ကျလိုက်သလဲ။ ဘယ်လောက်တောင် ဖြုန်းတီးလိုက်သလဲ။ အကုန်လုံးကို တူးဖော်ပြီး ယူသွားကြ။"

တပည့်များ - "..."

ဘိုးဘေးကြီး စကားဆိုလိုက်ပြီဖြစ်ရာ သူတို့တွင် ရွေးချယ်စရာ မရှိတော့။ နေ့တစ်ဝက်ခန့် လုပ်အားပေးပြီးနောက် သူတို့က ဖန်ကျင်းမြင့်မြတ်နယ်မြေကို လုံးဝ အပြောင်ရှင်းပစ်လိုက်သည်။ အဆောက်အအုံ တစ်ခုမျှ မကျနဲ အားလုံးကို ချန်ဟွိုက်အန်၏ ကမ္ဘာငယ်လေးထဲသို့ သယ်ဆောင်သွားကြသည်။ ရွှေဗုဒ္ဓပင်လယ်ပေါ်တွင် ခြောက်သွေ့နေသော ကျွန်းတစ်ကျွန်းသာ ကျန်ရစ်ခဲ့ပြီး အနည်းငယ် ကြည့်ကောင်းသော စိတ်ဝိညာဉ် အပင်များကိုပင် နုတ်ယူသွားခဲ့သဖြင့် ပေါင်းပင်အချို့မှလွဲ၍ ဘာမျှမရှိတော့။ ယခုအခါ ဆရာတော်ဖန်ယဲ့သည် ချောင်ချိုချောင်ကြား တစ်နေရာမှ ထွက်လာလျှင်ပင် ဤကျွန်းက သူ၏ ယခင်မြင့်မြတ်နယ်မြေ ဖြစ်ကြောင်းကို လုံးဝ မှတ်မိတော့မည် မဟုတ်ပေ။

(၁၂)ဆင့်ရွှေကြာပန်း ဝိညာဉ်ရတနာနှင့် ပတ်သက်၍မူ ၎င်းသည်လည်း ကောင်းကင်ဘုံအတိဒုက္ခအတွင်း ပျက်စီးသွားခဲ့ပြီး ၎င်း၏ အသုံးအဆောင် ဝိညာဉ်မှာ နတ်မိုးကြိုးကြောင့် ပျက်သုဉ်းသွားကာ အခွံသာ ကျန်ရစ်ခဲ့သည်။ တစ်ချိန်က ကမ္ဘာငယ်များစွာကို ထည့်သွင်းနိုင်စွမ်းရှိခဲ့သော်လည်း ယခုအခါ မြင့်မြတ်နယ်မြေ တစ်ခုကိုပင် သယ်ဆောင်နိုင်ရန် ခက်ခဲနေပြီဖြစ်သည်။ ကြာပန်း၏ မူလလုပ်ဆောင်ချက်များက ချန်ဟွိုက်အန်အတွက် ဘာမှ အဓိပ္ပာယ်မရှိတော့ပေ။ ချင်းရန်အတွက် ကာကွယ်ရေး မှော်အသုံးအဆောင်များ ဖန်တီးရာတွင် ပစ္စည်းများအဖြစ် အရည်ကျိုရန် သူ စီစဉ်ထား၏။

မဟာတက်လှမ်းခြင်းအဆင့် ကျင့်ကြံသူတစ်ဦးအနေဖြင့် တပည့်ဖြစ်သူအား စုရွှမ်ဓားဆိုသည့် လက်နက် တစ်မျိုးတည်းသာ ပေးထားခဲ့ရခြင်းက သူ့ကို အရှက်ရစေသည်။ ချင်းရန်သည် ဘယ်သောအခါမျှ မကျေမနပ် မပြောခဲ့သော်လည်း ထိုအတွေးက သူ့ကိုယ်သူ စျေးပေါသည်ဟု ခံစားရစေသည်။

"ဘိုးဘေးကြီး၊ ကျွန်တော်တို့ ဖန်ကျင်းမြင့်မြတ်နယ်မြေကို ဖြိုချနိုင်ခဲ့ပါပြီ။" စုချီနျန်က ခြောက်သွေ့နေသော မြေပြင်ကို ကြည့်ရင်း ရင်ဘတ်မှာ ဂုဏ်ယူမှုဖြင့် ကော့တက်နေသည်။ "နောက်ထပ် ယောင်ချီမြင့်မြတ်နယ်မြေကို သွားတိုက်ကြမလား။"

ချန်ဟွိုက်အန် စဉ်းစားလိုက်သည်။ ယောင်ချီမြင့်မြတ်နယ်မြေကို တစ်ဟုန်ထိုး တိုက်ခိုက်ခြင်းသည် ဖြစ်နိုင်ခြေ ရှိသော်လည်း ကောင်းကင်အတိဒုက္ခက ယခင်အတိုင်း ထပ်မံ ကျရောက်လာမည်လား။ သူတော်စင်ယွိယောင် အပေါ်တွင် ထိုနည်းလမ်းကို ထပ်မံ အသုံးပြုနိုင်ပါမည်လား။

စကားပုံတစ်ခုရှိသည်။ လှည့်ကွက်တစ်ခုက ကိစ္စရပ်အားလုံးအတွက် အသုံးဝင်သည် ဟူ၍ပင်။

သို့သော် ချင်းယွန်ဘုံ၏ ကောင်းကင်တာအိုစနစ်ကို ကျင့်ကြံမှုလိမ်လည်ပြီး လှည့်စားခြင်းက သူ့လို လူလိမ်လူညာ တစ်ယောက်အတွက်သာ အလုပ်ဖြစ်ပေလိမ့်မည်။

"ရလဒ်ကို ငါ တွက်ချက်ကြည့်ဦးမယ်။ စောင့်နေကြ။"

ချန်ဟွိုက်အန်က ပုံရိပ်ယောင်ကောင်မလေးဂိမ်းထဲမှ ကောင်းကင်နက္ခတ်တွက်ချက်မှုကို အသက်သွင်းလိုက်၏။

မဟာတက်လှမ်းခြင်းအဆင့် ရောက်ရှိပါက ဤစနစ်အပေါ် မှီခိုနေရခြင်းမှ ကင်းလွတ်လိမ့်မည်ဟု သူ တစ်ချိန်က ယုံကြည်ခဲ့ဖူးသည်။ ဤအဆင့်တွင်၊ ကောင်းကင်ဘုံလျှို့ဝှက်ချက်များကို ဖတ်ရှုခြင်းမှာ ကလေးကစားစရာကဲ့သို့ လွယ်ကူသင့်သည်။ သို့သော်လည်း အမှန်တကယ် မဟာတက်လှမ်းခြင်း အဆင့်သို့ ရောက်ရှိသောအခါ၊ အမှန်တရားသည် ထိုမျှလောက် မရိုးရှင်းကြောင်းကို သူ တွေ့ရှိခဲ့ရသည်။ ဤအဆင့်က ပိုမိုနက်ရှိုင်းသော ထိုးထွင်းသိမြင်မှုကို ပေးစွမ်းသော်လည်း သူ၏ "မှန်ဘီလူး"ကို "အဏုကြည့်မှန်ဘီလူး" သို့ အဆင့်မြှင့်ပေးရုံသာ ဖြစ်သည်။ ဂိမ်းစနစ်ကမူ တိကျသော ဇာဂနာတစ်လက်နှင့် ရှာဖွေရေးအင်ဂျင်တစ်ခုကဲ့သို့ အလုပ်လုပ်ပြီး ကောင်းကင်ဘုံလျှို့ဝှက်ချက်များကို တိုက်ရိုက် ဆွဲယူပေးနိုင်သည်။ သူ့ကို အမှန်တကယ် စိတ်အနှောင့်အယှက် ဖြစ်စေသည်မှာ အနာဂတ်၏ အပိုင်းအစများကို ဖမ်းဆုပ်နိုင်သည့်စနစ်၏ ထင်ရှားသော စွမ်းရည်ပင်။

"ကောင်းကင်နက္ခတ်တွက်ချက်မှု။ သူတော်စင်ယွိယောင်ကို ယှဉ်ပြိုင်နိုင်စွမ်းနဲ့ ယောင်ချီမြင့်မြတ်နယ်မြေကို သိမ်းပိုက်နိုင်ခြေ အခွင့်အလမ်းတွေကို တွက်ချက်ပေး။"

ဝုန်း…

ရွှေဗုဒ္ဓပင်လယ် အထက်တွင် မုန်တိုင်းတိမ်တိုက်များ စုရုံးလာပြီး ချန်ဟွိုက်အန်ထံသို့ စိတ်ဝိညာဉ် ချီစွမ်းအင်များ ဝဲလည် စီးဝင်လာသည်။ စုချီနျန်မှာမူ ရိုးအီနေပြီဖြစ်၍ ပျင်းရိစွာ ကြည့်နေပြီး သမ်းပင် သမ်းလိုက်သေးသည်။

[ ကောင်းကင်နက္ခတ်တွက်ချက်မှု ပြီးစီးပါပြီ ]

[ သူတော်စင်ယွိယောင်၏ အသေးစိတ် အချက်အလက်များကို တွက်ချက်ရန် ကစားသူ၏ ကျင့်ကြံမှု မလုံလောက်ပါ။ အတင်းအကျပ် တွက်ချက်ပါက တန်ပြန်သက်ရောက်မှု အန္တရာယ် ရှိပါသည်။ ယွိယောင်ကို အနိုင်ရနိုင်ခြေ ခန့်မှန်းချက် - သုည% ]

[ သို့သော် ယောင်ချီမြင့်မြတ်နယ်မြေကို တိုက်ခိုက် သိမ်းပိုက်နိုင်ခြေ - ၁၀၀% ]

[ ယနေ့အတွက် ပထမဆုံး တွက်ချက်မှုက အခမဲ့ ဖြစ်ပါသည် ]

ဤရှေ့နောက်မညီသော ရလဒ်များကို ကြည့်ပြီး ချန်ဟွိုက်အန်က မျက်မှောင်ကြုတ်သွားသည်။ ယွိယောင်ကို အနိုင်ရနိုင်ခြေ သုညရာခိုင်နှုန်း ဖြစ်သော်လည်း သူ၏ မြင့်မြတ်နယ်မြေကိုတော့ ကျိန်းသေပေါက် အောင်မြင်စွာ သိမ်းပိုက်နိုင်မည်လား။

ဒါက ယွိယောင် ယောင်ချီမြင့်မြတ်နယ်မြေကို ဒီအတိုင်း လက်လွှဲပေးလိုက်မယ်လို့ ဆိုလိုတာလား။

"အခုချက်ချင်း ယောင်ချီမြင့်မြတ်နယ်မြေကို သွားပြီးတော့ စုံစမ်းကြတာပေါ့။" အမှန်တရားကို ဖော်ထုတ်ရန် ဆုံးဖြတ်ချက်ချကာ သူ ချက်ချင်းပင် အမိန့်ပေးလိုက်သည်။

...

တစ်ချိန်တည်းမှာပင် ရွှမ်ဟဲတံခါးဂိုဏ်း၌။

တစ်နေကုန် အလုပ်လုပ်ပြီးနောက် သူတော်စင်ယွိယောင်က အခြေခံကျသော တောင်တံခါးတစ်ခုကို နောက်ဆုံးတွင် တည်ဆောက်နိုင်ခဲ့သော်လည် တစ်ခုခု လိုအပ်နေသေးသည်ဟု ခံစားနေရသည်။

"နောက်ထပ် မြင့်မြတ်နယ်မြေတစ်ခုကို မြန်မြန်ဆန်ဆန် ဖန်တီးဖို့ဆိုတာ မဖြစ်နိုင်ဘူး။ ဒီက အရင်းအမြစ်တွေက မလုံလောက်ဘူး။ တစ်ဝက်လောက်ပဲ တူးဖော်ရသေးတဲ့ အသေးစား စိတ်ဝိညာဉ်ကြောတစ်ခုပဲ ရှိတာ။ အစပိုင်း ဝိညာဉ်ပုံဆောင်ခဲ ထောက်ပံ့မှုကို ငါ့ဘာသာပဲ အကုန်အကျ ခံရလိမ့်မယ်။" တံခါးကို စစ်ဆေးနေရင်း သူက တွေးတောလိုက်သည်။

စိတ်ဝိညာဉ်ကြောပြဿနာက ဖြေရှင်း၍ ရနိုင်သည်။ ချင်းယွန်ဘုံ၏ စိတ်ဝိညာဉ်ကြောများကို ဂိုဏ်းများက ထိန်းချုပ်ထားခြင်း သို့မဟုတ် မိစ္ဆာများ ကျက်စားရာ တောရိုင်းများထဲတွင် တည်ရှိခြင်း ဖြစ်သည်။ မြင့်မြတ်နယ်မြေမဟုတ်သော ဂိုဏ်းတစ်ခုအနေဖြင့် မိစ္ဆာများထံမှ သွေးကြောများကို သိမ်းပိုက်ခြင်းက လုံလောက်ပေသည်။ သူ၏စွမ်းအားဖြင့် အသေးစား စိတ်ဝိညာဉ်ကြောများကို နေရာပြောင်းရွှေ့နိုင်ပြီး ကြီးမားသော စိတ်ဝိညာဉ်ကြောများကိုမူ တယ်လီပို့ အခင်းအကျင်းများဖြင့် ချိတ်ဆက်ကာ တူးဖော်ရေး စခန်းများအဖြစ် ဖန်တီးနိုင်၏။

သူ အမှန်တကယ် စိုးရိမ်နေသည်မှာ အခြေခံ အဆောက်အအုံများပင်။ ကြမ်းခင်း အုတ်ကြွပ်ပြားများ၊ စိတ်ဝိညာဉ် ချီစွမ်းအင်များကို ထုတ်လွှတ်ပေးသော အလှဆင် စိတ်ဝိညာဉ်အပင်များ။ စိတ်ဝိညာဉ် အပင်များမှာ ပေါများပြီး အထူးသဖြင့် မိစ္ဆာနယ်မြေများတွင် များပြားသော်လည်း ၎င်းတို့ကို စုဆောင်းကာ အမျိုးအစား ခွဲခြားရခြင်းက ငြီးငွေ့စရာ ကောင်းလှသည်။ အုတ်ကြွပ်ပြားများကို အသုံးအဆောင်ပစ္စည်းဂိုဏ်းက ပြုလုပ်ပေးနိုင်သော်လည်း၊ ၎င်းအတွက် ငွေကြေးနှင့် အချိန် လိုအပ်သည်။ သူတို့၏ ဂိုဏ်းချုပ်အပေါ် လက်ရှိ သူ၏နာကြည်းမှုများအရ ထိုနေရာသို့ သွားရောက်ပါက သွေးထွက်သံယိုမှုဖြင့် အဆုံးသတ်သွားနိုင်၏။

"အသင့်သုံး အခြေခံအဆောက်အအုံတွေကို ဘယ်ကနေ သွားရယူရမလဲ။"

ယွိယောင်က အသံထွက် တွေးတောနေစဉ် အကြံတစ်ခု ရသွားသည်။ ဆရာတော်ဖန်ယဲ့ သေဆုံးသွားပြီဖြစ်ရာ၊ ဖန်ကျင်းမြင့်မြတ်နယ်မြေသည် ဟာလာဟင်းလင်း ဖြစ်နေမည်။ တပည့်များက အရင်းအမြစ်များကို လုယက်သွားခဲ့လျှင်ပင် အဆောက်အအုံ အစိတ်အပိုင်းများကိုတော့ ယူသွားမည် မဟုတ်ပေ။ အလှဆင် အပင်များကလည်း ရွှေ့ပြောင်းစိုက်ပျိုးဖို့ အသင့်ပင်။ ဖန်ကျင်းမြင့်မြတ်နယ်မြေက အရာအားလုံးကို ယူလာပြီး အနည်းငယ် ပြင်ဆင်လိုက်ရုံနှင့် အကုန်လုံး အဆင်ပြေသွားပေလိမ့်မည်။ လုံးဝကွက်တိပင်။ ယောင်ချီ မြင့်မြတ်နယ်မြေ၏ အဆောက်အအုံများမှာ ကောင်းမွန်သော်လည်း သူတို့၏ ထူးခြားသောပုံစံကြောင့် အတော်လေး ပြုပြင်မွမ်းမံရန် လိုအပ်သည်။ ဖန်ကျင်းမြင့်မြတ်နယ်မြေ၏ အကြွင်းအကျန်များက အကောင်းဆုံး ဖြေရှင်းချက်ပင်။

"အလှအပနဲ့ ဉာဏ်ပညာ ပေါင်းစပ်ထားတဲ့ ငါက ဘယ်လောက်တောင် ပါရမီရှင်ဆန်လိုက်လဲ။"

ယွိယောင်က လက်ခမောင်းခတ်လိုက်ပြီး နေရာလွတ်ကို ဆုတ်ဖြဲကာ ရွှေဗုဒ္ဓပင်လယ်ဆီသို့ ချက်ချင်း ထွက်ခွာသွားတော့သည်။

...