အခန်း ၂

အခန်း (၂) - နဝမအဆင့် မြေစောင့်နတ်ဘုရားအဖြစ် ရာထူးတိုးမြှင့်ခြင်း

လီယွဲ့သည် သူ့ရှေ့မှ သတင်းအချက်အလက်များကို ကြောင်တောင်တောင်ဖြင့် ကြည့်နေမိသည်။ သူ တကယ်ကို ဝေခွဲမရ ဖြစ်သွားရ၏။ စောစောက သူ၏ စိတ်ထဲတွင် ပေါ်လာသော အချက်အလက်များအရ တစ်နှစ်လျှင် နှစ်ကြိမ် ပြုလုပ်သည့် ပူဇော်ပွဲကြီးများမှ ရရှိသော ပူဇော်သက္ကာများသည် ၂၀ ရာခိုင်နှုန်းသာ တိုးပွားမည်ဟု အတိအလင်း ဖော်ပြထားသည်။ ၎င်းမှာ ၁.၂ ဆ တိုးခြင်းသာ ဖြစ်၏။

သို့သော် ယခုမူ ဒီ အဆတစ်ရာ တိုးပွားသွားတာက ဘယ်လိုဖြစ်တာလဲ။

သူ ဒေသတွင်း စကားဝိုင်းကို ချက်ချင်း ဖွင့်ကြည့်လိုက်သည်။ သူသာ လူ့ခန္ဓာကိုယ် ရှိနေသေးလျှင် ယခုအချိန်တွင် သူ၏ နှလုံးခုန်သံမှာ အလွန် ပြင်းထန်နေမည်မှာ သေချာသည်။ ဒေသတွင်း စကားဝိုင်း အမျိုးအစားကို ဖွင့်လိုက်သည်နှင့် များပြားလှသော သတင်းစကားများမှာ မျက်စိတစ်မှိတ်အတွင်း တရစပ် တက်လာတော့၏။

"အမလေးဗျာ… ကျုပ်ရဲ့ ယုံကြည်သူတွေက ကျုပ်ကို ပထမအဆင့် မြေခွေးမီးတောက် အလောင်းကို ပူဇော်ကြတာ… ၂၀ ရာခိုင်နှုန်း တိုးသွားတာတောင် မဆိုးဘူးဗျ… တော်တော်လေး ပိုကြီးလာတယ်”

"ဆယ်နှစ်သက်တမ်းရှိတဲ့ အရိုးသန်မာပန်း က ဆယ့်နှစ်နှစ်သက်တမ်း ဖြစ်သွားတယ်ဟေ့" "လတ်လတ်ဆတ်ဆတ် လုပ်ထားတဲ့ အဆင့်မြင့် သွေးကြောအားဖြည့်ဆေး… ၂၀ ရာခိုင်နှုန်း တိုးသွားတာ… နတ်ဘုရားစွမ်းအား သုံးပင်ပဲ ပေးရမယ်"

"မဟုတ်သေးပါဘူး… မင်းတို့တွေက ဒီလောက်တောင် မြန်မြန် အသားကျနေကြပြီလား… ငါကတော့ အခုထိ ကြောင်တောင်တောင် ဖြစ်နေတုန်းပဲ"

"ကျွန်မကို နတ်ဘုရားစွမ်းအား နှစ်ပင်လောက် ချေးပေးမယ့် စိတ်ကောင်းရှိတဲ့ အစ်ကိုကြီးတွေ ရှိကြလားဟင်… ညီမလေး လူ့ခန္ဓာကိုယ် ပြန်ရတဲ့အခါ ကိုယ်သင်းရနံ့လေး လက်ဆောင်ပေးပါ့မယ်ရှင်”

"မိတ်ဆွေအဖော် ရှာနေပါတယ်… ကျွန်မက တောင်ပိုင်းက ချိုသာတဲ့ မိန်းကလေးတစ်ယောက်ပါ… အပြန်အလှန် နွေးထွေးမှုပေးဖို့ အဖော်ရှာနေတာပါ”

"ဘုရားရေ… ငါ့ရဲ့ ယုံကြည်သူတွေရှိတဲ့ ရွာအပြင်ဘက်မှာ ခွေးမိစ္ဆာတစ်ကောင် တွေ့လိုက်တယ်… ကြောက်စရာကြီးဗျာ"

"ပထမအဆင့် ဓားရှည် လိုချင်သူ ရှိလား… တစ်လက်ကို နတ်ဘုရားစွမ်းအား နှစ်ပင်ပဲ"

"ဟိုက်… ငါတော့ အံ့သြလွန်းလို့ ထုံတောင် ထုံသွားပြီ… ငါ့ရဲ့ ယုံကြည်သူတွေ ပူဇော်တာက အတင်းအဓမ္မ ဖမ်းခေါ်လာတဲ့ အိမ်ထောင်သည် အမျိုးသမီးတစ်ယောက်တဲ့ဗျာ… ငါ့ယုံကြည်သူတွေက ဓားပြဂိုဏ်းကြီး ဖြစ်နေတာပဲ”

…

"ကြည့်ရတာ တခြားလူတွေက တကယ်ပဲ ၂၀ ရာခိုင်နှုန်းပဲ တိုးတာပေါ့…"

"ငါ့ရဲ့ ပူဇော်သက္ကာတွေကျမှ ဘာလို့ အဆတစ်ရာ တိုးနေတာလဲ"

လီယွဲ့၏ မျက်နှာတွင် ဝမ်းသာပီတိများ လွှမ်းမိုးသွားသည်။ အဆတစ်ရာ တိုးခြင်းနှင့် ၂၀ ရာခိုင်နှုန်း တိုးခြင်းကြားက ကွာခြားချက်မှာ အလွန်ပင် ကြီးမားလှသည်။ ၂၀ ရာခိုင်နှုန်း တိုးခြင်းက ပထမအဆင့် ပစ္စည်းတစ်ခုကို အနည်းငယ်သာ အရည်အသွေး မြှင့်တင်ပေးနိုင်သည်။

သို့သော် အဆတစ်ရာ တိုးခြင်းကမူ ပထမအဆင့် ပစ္စည်းတစ်ခုကို စတုတ္ထအဆင့် ပစ္စည်းအဖြစ်သို့ ခုန်တက်သွားစေနိုင်၏။ ဤအားသာချက်မှာ အလွန်အမင်းကို ကြီးမားလွန်းလှသည်။

ဒီလို လူအစုလိုက်အပြုံလိုက် ဘဝကူးပြောင်းလာတဲ့ ကြားထဲမှာ ငါကတော့ ထူးခြားတဲ့ အစွမ်းတစ်ခု ရထားတာပဲ။

သူသည် ဒေသတွင်း ကုန်သွယ်မှု အမျိုးအစားကို ဖွင့်လိုက်သည်။ ဤနေရာတွင် နယ်မြေတစ်ခုတည်းရှိ နတ်ဘုရားများအချင်းချင်း ကုန်သွယ်နိုင်ရုံသာမက တန်ဖိုးရှိသော မည်သည့်ပစ္စည်းကိုမဆို နတ်ဘုရားအရောင်းဆိုင်သို့ ရောင်းချနိုင်သည်။

သို့သော် နတ်ဘုရားအရောင်းဆိုင်၏ ဈေးနှုန်းများမှာ အလွန်မြင့်မားမည် မဟုတ်ချေ။ တစ်နည်းအားဖြင့် ပြောရလျှင် နတ်ဘုရားအရောင်းဆိုင်၏ အဓိက ရည်ရွယ်ချက်မှာ ပစ္စည်းတစ်ခု၏ ဈေးနှုန်းကို သတ်မှတ်ပေးရန် ဖြစ်သည်။

"စောစောက ဒေသတွင်း စကားဝိုင်းထဲမှာ တွေ့လိုက်တဲ့ အချက်အလက်တွေအရဆိုရင်…"

"ပထမအဆင့် ပစ္စည်းတစ်ခုရဲ့ ဈေးနှုန်းက နတ်ဘုရားအရောင်းဆိုင် မှာ အမွှေးတိုင် ဆန္ဒပေါင်း တစ်ထောင်လောက် ရှိတယ်… ဒါက နတ်ဘုရားစွမ်းအား တစ်ပင်နဲ့ ညီမျှတာပဲ"

"၂၀ ရာခိုင်နှုန်း တိုးသွားတဲ့ ပထမအဆင့် ပစ္စည်းဆိုရင်တော့ အမွှေးတိုင် ဆန္ဒပေါင်း တစ်ထောင့်ငါးရာ ဝန်းကျင် ရှိနိုင်တယ်"

"တန်ဖိုးက ၂၀ ရာခိုင်နှုန်းထက် ပိုသိသာတာပေါ့"

"ဒါဆို ငါ့ရဲ့ အဆတစ်ရာ တိုးသွားတဲ့ ပူဇော်သက္ကာကကော”

သူသည် အဆတစ်ရာ တိုးပွားသွားသော နဂါးသွေး မီးတောက်မြက် ကို ကြည့်လိုက်၏။ နဂါးသွေး မီးတောက်မြက် တစ်ပင်လုံးသည် နီရဲတောက်ပသော အလင်းတန်းများ ထွက်ပေါ်နေပြီး နတ်ဘုရားနယ်မြေထဲတွင် လွင့်မျောနေသည်။ ၎င်း၏ ဘေးပတ်လည်တွင် နဂါးငယ်ပုံသဏ္ဌာန် မြူခိုးလေးများ ဝဲလည်နေသည်ကို မှိန်ပျပျ မြင်တွေ့နေရ၏။ အသွင်အပြင်အားဖြင့် ကြည့်မည်ဆိုလျှင် ၎င်းသည် စောစောက ပူဇော်စားပွဲပေါ်တွင် ရှိခဲ့သော ပထမအဆင့် ခန္ဓာကိုယ် အားဖြည့်မြက် ထက် မည်မျှပင် သာလွန်နေသည်ကို နှိုင်းယှဉ်၍ပင် မရနိုင်ချေ။

သူသည် လက်လှမ်း၍ နဂါးသွေး မီးတောက်မြက် ကို ဖမ်းယူလိုက်ပြီး စိတ်ထဲမှ အတွေးတစ်ခု ပေါ်လာသည်။ ချက်ချင်းပင် ဤ စတုတ္ထအဆင့် နဂါးသွေး မီးတောက်မြက် မှာ ပျောက်ကွယ်သွားပြီး နတ်ဘုရားအရောင်းဆိုင်ထဲသို့ ရောက်ရှိသွား၏။ ၎င်းနှင့်ပတ်သက်သော သတင်းအချက်အလက်များစွာလည်း ပေါ်လာသည်။

...

[အမည်] - နဂါးသွေး မီးတောက်မြက်

[အဆင့်] - စတုတ္ထအဆင့်

[အကျိုးအာနိသင်] - တတိယအဆင့် ယွမ်ဂန်းအဆင့် အထွတ်အထိပ်သို့ ရောက်ရှိနေသော လူသားသိုင်းပညာရှင်တစ်ဦး စားသုံးပါက ၅၀ ရာခိုင်နှုန်းသော အခွင့်အရေးဖြင့် စတုတ္ထအဆင့် ယင်ယန်အဆင့် သိုင်းပညာရှင်အဖြစ်သို့ တက်လှမ်းနိုင်မည်။

[ဈေးနှုန်း] - နတ်ဘုရားစွမ်းအား သုံးရာ့ခြောက်ဆယ်ပင်

…

"နတ်ဘုရားစွမ်းအား သုံးရာ့ခြောက်ဆယ်ပင်လား”

လီယွဲ့၏ မျက်နှာမှာ ဝမ်းသာအားရ ဖြစ်သွားသည်။ ၎င်းမှာ လက်ရှိ သူ၏ ယုံကြည်သူများထံမှ ရှစ်နှစ်စာလောက် ရမည့် အမွှေးတိုင် ဆန္ဒများနှင့် ညီမျှသည်။ ထို့အပြင် ဤပမာဏမှာ သူ၏ နတ်ဘုရားရာထူးကို အဆင့်မရှိ မှ နဝမအဆင့် သို့ မြှင့်တင်ရန်အတွက် လုံလောက်သည်ထက် ပိုနေလေ၏။

ရာထူးတိုးမြှင့်ပြီးသည်နှင့် သူသည် တောရိုင်းနတ်ဘုရား မဟုတ်တော့ဘဲ စစ်မှန်သော မြေစောင့်နတ်ဘုရား ဖြစ်လာမည်ဖြစ်သည်။ စတင်ခြင်းမှာပင် သူသည် အခြား ကမ္ဘာမြေမှ တောရိုင်းနတ်ဘုရားများထက် မသိမသာ ပိုမိုမြန်ဆန်နေခဲ့လေပြီ။ အခြားသူများမှာ နတ်ဘုရားစွမ်းအား တစ်ပင်၊ နှစ်ပင် ရရန်အတွက် ခေါင်းခြောက်နေချိန်တွင် သူကတော့ နတ်ဘုရားစွမ်းအား သုံးရ့ာခြောက်ဆယ်ကို အလွယ်တကူ ရရှိခဲ့သည်။

"ဒါက ဂိမ်းထဲမှာ ခိုးသုံး သုံးပြီး ဆော့နေရသလိုပဲ…"

"ဒီလို ခံစားချက်မျိုးက… တကယ်ကို စိတ်လှုပ်ရှားဖို့ ကောင်းတာပဲ"

သူသည် တိုးတိုးလေး ရေရွတ်လိုက်ပြီး သူ၏ နှုတ်ခမ်းပေါ်မှ ပြုံးရယ်သံကို မည်သည့်အရာနှင့်မျှ တားဆီး၍ မရနိုင်ချေ။

သူ တုံ့ဆိုင်းမှု မရှိဘဲ ဤ စတုတ္ထအဆင့် နဂါးသွေး မီးတောက်မြက် ကို နတ်ဘုရားအရောင်းဆိုင်သို့ တိုက်ရိုက် ရောင်းချလိုက်သည်။ ဤ နဂါးသွေး မီးတောက်မြက် ၏ အကျိုးအာနိသင်ကိုမူ သူ ဂရုမစိုက်ချေ။

အကြောင်းမှာ သူ၏ လက်ရှိ ယုံကြည်သူများထဲတွင် ပထမအဆင့် ခန္ဓာကိုယ် ပြုပြင်ခြင်းအဆင့် သိုင်းပညာရှင် နှစ်ဦးသာ ရှိပြီး ကျန်လူများမှာ သာမန်လူများသာ ဖြစ်၏။ သူတို့အတွက် ဤကဲ့သို့သော စတုတ္ထအဆင့် ရတနာမျိုးကို အသုံးပြုရန် လုံးဝ မဖြစ်နိုင်ချေ။ ရောင်းချမှု ပြီးဆုံးသွားသောအခါ လီယွဲ့သည် သူ၏ အတွင်း၌ အပိုဆောင်း နတ်ဘုရားစွမ်းအား သုံးရာ့ခြောက်ဆယ် ရှိလာသည်ကို ခံစားလိုက်ရသည်။ ဤ နတ်ဘုရားစွမ်းအား သုံးရာ့ခြောက်ဆယ်မှာ သူ့ကို အလွန် အစွမ်းထက်သည်ဟု ခံစားရစေ၏။

သူ ရွှေဓားအတတ် ကိုပင် ထပ်မံ စမ်းသပ်ကြည့်ချင်စိတ် ပေါ်လာသည်။

"စိတ်ကို ထိန်းစမ်း… စိတ်ကို ထိန်းစမ်း"

"အတတ်ပညာတစ်ခုကို စမ်းသပ်ဖို့အတွက်နဲ့ နတ်ဘုရားစွမ်းအားကို ဖြုန်းတီးတာက ရှက်စရာကောင်းတဲ့ အပြုအမူပဲ"

သူသည် စိတ်ထဲမှ စေ့ဆော်မှုကို နှိမ်နင်းလိုက်၏။

ထို့နောက် သူသည် နတ်ဘုရားစွမ်းအား တစ်ရာကို စုစည်းကာ သူ၏ နတ်ဘုရားရာထူးကို မြှင့်တင်ရန် စတင်လိုက်တော့သည်။

…

မြေစောင့်နတ်စင် အပြင်ဘက်တွင်မူ။ ဒူးထောက်နေကြသည့် ရွာသားများမှာ တဖြည်းဖြည်း ပြန်လည် ထရပ်လိုက်ကြသည်။ သူတို့သည် တစ်နှစ်လျှင် နှစ်ကြိမ် ပြုလုပ်သည့် ဤပူဇော်ပွဲကြီးကို အသားကျနေကြပြီ ဖြစ်၏။ ၎င်းမှာ ရိုးရာအစဉ်အလာတစ်ခု ဖြစ်သည်။ အရှင် လီယွဲ့ သည် မည်သည့်အခါမျှ ထူးခြားသော အစွမ်းပြခြင်း မရှိခဲ့သော်လည်း အရှင် လီယွဲ့ကို ပူဇော်ရခြင်းမှာ အချိန်ဖြုန်းခြင်း ဖြစ်သည်ဟု မည်သူမျှ မထင်ကြချေ။ မည်သို့ပင်ဖြစ်စေ နတ်ဘုရားတစ်ပါးကို ကိုးကွယ်ခြင်းမှာ စိတ်အေးချမ်းမှု ရရှိရန်အတွက်သာ မဟုတ်ပါလား။

ဤအချက်မှာ ရွာသားအများစု၏ အတွေးပင် ဖြစ်သည်။

သို့သော် သူတို့ထဲတွင် သက်ကြီးရွယ်အို ငါးဦးမှာမူ အရှင် လီယွဲ့အပေါ် အလွန်အမင်း ကြည်ညိုကြပြီး နှစ်စဉ် ပူဇော်ပွဲကြီးများကို ဦးဆောင်ပေးလေ့ ရှိကြသည်။

"ဟင်"

"ငါတို့ရဲ့ ခန္ဓာကိုယ် အားဖြည့်မြက် ဘယ်ရောက်သွားတာလဲ"

အသက် ၅၀ ကျော်ပြီး ကျောကုန်းကုန်း ဖြစ်နေသော လီယူမင်သည် ပူဇော်စားပွဲကို ရှင်းလင်းရန် ပြင်ဆင်နေရင်း တန်ဖိုးအကြီးဆုံး ဖြစ်သည့် ခန္ဓာကိုယ် အားဖြည့်မြက် ကို ဂရုတစိုက် သိမ်းဆည်းရန် ကြည့်လိုက်သည်။ သို့သော် သူ ကြည့်လိုက်သောအခါ စားပွဲပေါ်တွင် ရှိနေရမည့် ခန္ဓာကိုယ် အားဖြည့်မြက် မှာ မရှိတော့ချေ။ အခြေအနေမှာ သူ့ကို ချက်ချင်းပင် အံ့အားသင့်သွားစေသည်။

မြက်က ဘယ်ရောက်သွားတာလဲ။

ဒီလောက် ကြီးမားတဲ့ မြက်တစ်ပင်က ဘယ်လို ပျောက်သွားတာလဲ။

ဘေးပတ်လည်ရှိ အခြား လူကြီးများလည်း ဤစကားကို ကြားသောအခါ လှမ်းကြည့်ကြပြီး ခန္ဓာကိုယ် အားဖြည့်မြက် ပျောက်ဆုံးနေသည်ကို တွေ့သောအခါ အလွန် စိုးရိမ်သွားကြသည်။ ဘာပဲဖြစ်ဖြစ် ဤအရာမှာ ငွေပြား ကိုးဆယ်ခန့် တန်ဖိုးရှိသည့် ပထမအဆင့် ဝိညာဉ်မြက် ဖြစ်သည်။ ၎င်းသည် ရွာ၏ တန်ဖိုးအရှိဆုံး ပစ္စည်းလည်း ဖြစ်၏။ သူတို့သည် ပတ်ဝန်းကျင်ကို နှံ့နှံ့စပ်စပ် ရှာဖွေကြသော်လည်း ခန္ဓာကိုယ် အားဖြည့်မြက် ကို ဘယ်နေရာမှာမျှ ရှာမတွေ့ကြချေ။

"တတိယအကြိမ် ဦးမချခင်လေးတင်ပဲ စားပွဲပေါ်မှာ ရှိနေတာကို ငါ မြင်နေသေးတာ"

"ရုတ်တရက်ကြီး ဘယ်လို ပျောက်သွားရတာလဲ"

ရွာလူကြီး လီတီယန်မှ မျက်မှောင်ကြုတ်လိုက်သည်။ အခြား ရွာသားများလည်း လူစုခွဲကာ မြေစောင့်နတ်စင် ပတ်ဝန်းကျင်တွင် လိုက်လံရှာဖွေကြ၏။

"ငါတို့ ဦးချနေတဲ့အချိန်မှာ ငှက်တစ်ကောင်ကောင် လာသုတ်သွားတာများလား"

ရွာသားတစ်ဦးမှ မေးလိုက်သည်။

"မဖြစ်နိုင်ဘူး"

"ဒါက မြေစောင့်နတ်စင်ပဲ… ဘယ်ငှက်ကမှ နတ်ဘုရားရဲ့ ပူဇော်စားပွဲပေါ်က အစာကို လာလုဖို့ မရဲပါဘူး"

လီတီယန် ခေါင်းခါလိုက်သည်။

"ဒါဆိုရင်…"

အသက် ၇ နှစ်၊ ၈ နှစ်အရွယ် မိန်းကလေးငယ်တစ်ဦးမှ ကြောက်ကြောက်လန့်လန့်ဖြင့် ပြောလိုက်သည်။

"အရှင် လီယွဲ့ ကိုယ်တိုင် သုံးဆောင်သွားတာများလား…"

ဤစကားကို ကြားလိုက်ရသောအခါ ရွာလူကြီး လီတီယန် ကြောင်အသွားသည်။ ရွာသားများလည်း ကြောင်အသွားကြ၏။

အရှင် လီယွဲ့က သုံးဆောင်သွားတာ ဟုတ်လား။

ရှပ်၊ ရှပ်၊ ရှပ်—

မျက်လုံးပေါင်းများစွာမှာ မြေစောင့်နတ်စင် အတွင်းရှိ နတ်ရုပ်ဆီသို့ ချက်ချင်း ဝိုင်းကြည့်လိုက်ကြသည်။ ဝုန်း—

ရုတ်တရက် ကောင်းကင်ယံမှ မိုးခြိမ်းသံကြီး တစ်ချက် ပဲ့တင်ထပ်သွားတော့သည်။