အခန်း ၂၄

အခန်း (၂၄) - ယင်လက်နက်များ ကို အဆက်မပြတ် ရောင်းချခြင်းနှင့် မိစ္ဆာနယ်မြေသို့ ကျူးကျော်ဝင်ရောက်ခြင်း

"ဒီလောက်တောင် မြန်မြန် ရောင်းထွက်သွားတာလား"

လီယွဲ့ အံ့သြစွာ ရေရွတ်လိုက်သည်။ သူသည် နတ်ဘုရား စွမ်းအား ၂၀ ထပ်တိုးလာသဖြင့် အလွန် ဝမ်းသာသွားသည်။ တစ်ခုရောင်းလျှင် အမြတ် ၁၀ ရသည်မှာ အလွန် ကောင်းမွန်သော အကျိုးအမြတ် ဖြစ်၏။ သူသည် အခြားနတ်ဘုရားများကို ကူညီနေခြင်းသာ ဖြစ်သည်ဟု မိမိကိုယ်ကိုယ် တွေးတောကာ စိတ်လှုပ်ရှားစွာဖြင့် နောက်ထပ် ယင်လက်နက်များကို ဆက်လက် ထုတ်လုပ်လိုက်သည်။ တစ်နေ့လျှင် ခြောက်ခု ထုတ်လုပ်နိုင်သဖြင့် တစ်လလျှင် အမြတ် စွမ်းအား ၁,၈၀၀ အထိ ရရှိနိုင်သည်။ သို့သော်လည်း အခြားနတ်ဘုရားများမှာ စွမ်းအား ၂၀ ပေး၍ ဝယ်ယူလိုစိတ် ရှိမရှိကတော့ စဉ်းစားစရာ ဖြစ်သည်။

"အရင်ဘဝတုန်းက သူဌေးအတွက် အလုပ်လုပ်ပေးရတာ… အခု နတ်ဘုရား ဖြစ်တော့လည်း ကိုယ့်အတွက်ကိုယ် အဆက်မပြတ် အလုပ်လုပ်နေရတာပဲ"

သူ ထူးဆန်းသော ခံစားချက်ဖြင့် တွေးလိုက်သည်။

လေးပြင်ကျယ်ရွာမှ မိုင် ၃၀ ခန့်အကွာရှိ တောင်တန်းကြီးများအတွင်း၌ မိစ္ဆာနယ်မြေ ဟု ခေါ်ဆိုသော နေရာတစ်ခု ရှိသည်။ ထိုနေရာရှိ ရွာများမှာ မိစ္ဆာများ၏ ပိုင်ဆိုင်မှု ဖြစ်ကြသည်။

"ဂေါပကကြီး… ကျွန်တော်တို့ရဲ့ ပန်းတိုင်က ဒီနယ်မြေထဲက ရွာသားတွေကို ကယ်ထုတ်ဖို့လား"

ကျန်းရုံကွေ့မှ မေးလိုက်သည်။

"ဒီနေရာက မိစ္ဆာတွေက ဝံပုလွေတောင်က မိစ္ဆာလောက် မသန်မာဘူး… ဒီရွာကို အုပ်ချုပ်နေတဲ့ မြေခွေးမိစ္ဆာကလည်း ဒုတိယအဆင့် အနိမ့်ဆုံးပဲ ရှိတာ… ငါ သူ့ကို သတ်နိုင်တယ်"

လီယူမင်မှ ပြောလိုက်သည်။

မိစ္ဆာများကို သတ်ဖြတ်ပြီး ရွာသားများကို ကယ်တင်ခြင်းဖြင့် သူတို့၏ ယုံကြည်မှုကို ရရှိရန် သူ ဆုံးဖြတ်ခဲ့ခြင်း ဖြစ်သည်။ ဤရွာသားများသည် မိစ္ဆာများ၏ နှိပ်စက်မှုကို အလွန်အမင်း ခံနေရသူများ ဖြစ်ပြီး မိစ္ဆာများမှာ စိတ်မထင်လျှင် လူသားများကို သတ်ဖြတ်စားသောက်ကြပြီး ဧည့်သည်လာလျှင်ပင် လူသားများကို ဟင်းလျာအဖြစ် တည်ခင်းကြသည်။

"ဒါပေမဲ့ ဒီနယ်မြေထဲမှာ ကြီးမားတဲ့ မိစ္ဆာတစ်ကောင် ရှိတယ်လို့ ကြားဖူးတယ်"

ကျန်းရုံကွေ့မှ စိုးရိမ်တကြီး ပြောလိုက်သည်။

"ကြီးမားတဲ့ မိစ္ဆာရှိလည်း ဘာဖြစ်လဲ… ငါတို့ရဲ့ နောက်ကွယ်မှာ အစွမ်းထက်လှတဲ့ အရှင် လီယွဲ့ ရှိနေတာပဲ… အဲဒီ မိစ္ဆာက အရှင် လီယွဲ့ရှေ့မှာ ပေါ်လာရင် အသတ်ခံရမှာပဲ"

လီယူမင် တက်ကြွစွာ ပြောလိုက်သည်။

ကျန်းရုံကွေ့နှင့် အခြားသူများမှာလည်း သူတို့၏ နတ်ဘုရားမှာ ပြိုင်ဘက်ကင်းသည်ဟု ယုံကြည်ထားကြသဖြင့် ခေါင်းငြိမ့် ထောက်ခံကြသည်။

လီယူမင်သည် ကျန်းရုံကွေ့၊ လီရှို့ဝူး၊ လီရှို့လင်နှင့် သိုင်းပညာရှင် အဖွဲ့ကို ဦးဆောင်ကာ မြေခွေးရွာ၏ အဝင်ဝသို့ ရောက်ရှိလာခဲ့သည်။ မျက်လုံးစိမ်းစိမ်းနှင့် လူသန်ကြီး နှစ်ဦးမှ သူတို့ကို တားဆီးရန် ကြိုးစားသော်လည်း လီယူမင်၏ အမိန့်ဖြင့် ချက်ချင်းပင် အသတ်ခံလိုက်ရသည်။ ထို့နောက် သူတို့သည် ရွာအတွင်းသို့ ဝင်ရောက်သွားကြရာ မျက်လုံးစိမ်းစိမ်းနှင့် လူသန်ကြီး တစ်ဒါဇင်ခန့် သူတို့ကို ဝိုင်းရံလိုက်ကြသည်။

"ဘယ်က သိုးတွေက ငါတို့ မြေခွေးမိစ္ဆာကြီးအတွက် အစာအဖြစ် ကိုယ်တိုင် လာပေးနေတာလဲ… သူတို့ ခြေထောက်တွေကို ချိုးပြီး သိုးခြံထဲ ထည့်ထားလိုက်စမ်း"

ထိုလူအုပ်စု၏ ခေါင်းဆောင်မှ အော်ဟစ်လိုက်သည်။

"သူတို့က လူသားလို့ အခေါ်မခံထိုက်တော့ဘူး… အကုန် သတ်ပစ်ကြ"

လီယူမင် အေးစက်စွာ ပြောလိုက်သည်။

လူသားချင်း ပြန်စားသောကြောင့် သူတို့၏ မျက်လုံးများမှာ စိမ်းနေကြခြင်း ဖြစ်၏။ ခဏချင်းအတွင်းမှာပင် ထိုမိစ္ဆာလက်ပါးစေများမှာ အသတ်ခံလိုက်ရသည်။ အိမ်များအတွင်းမှ ရွာသားများမှာ ထိုအဖြစ်အပျက်ကို ချောင်းကြည့်ရင်း ဝမ်းသာမျက်ရည် ကျနေကြသည်။

"အမြန် ထွက်ပြေးကြပါတော့… မြေခွေးမိစ္ဆာ ရောက်လာရင် မင်းတို့ သေကုန်ကြလိမ့်မယ်"

အဘိုးအို တစ်ဦးမှ စိုးရိမ်တကြီး ထွက်ပြောလိုက်သည်။

လီယူမင်သည် ရွာသားများအားလုံးကို ကြည့်ကာ

"မိဘပြည်သူတို့… ကျွန်တော်က လေးပြင်ကျယ်ရွာရဲ့ မြေစောင့်နတ်မင်း အရှင် လီယွဲ့က တိုက်ရိုက် ခန့်အပ်ထားတဲ့ နတ်စင်ဂေါပက လီယူမင် ဖြစ်ပါတယ်… ကျွန်တော် ဒီကို လာတာဟာ ခင်ဗျားတို့ကို ကယ်တင်ဖို့နဲ့ မြေခွေးမိစ္ဆာကို သတ်ဖို့ ဖြစ်ပါတယ်"

သူ ဟိန်းဟောက် ပြောဆိုလိုက်သည်။

ရွာသားများမှာ မိစ္ဆာကို သတ်နိုင်လိမ့်မည်ဟု မယုံကြည်နိုင်ဘဲ ရှိနေကြစဉ်မှာပင် ပြင်းထန်သော လေပြင်းများ တိုက်ခတ်လာပြီး ဆယ်ပေကျော် မြင့်မားသော သွေးရောင်လွှမ်းနေသည့် မြေခွေးမိစ္ဆာကြီးမှာ ပေါ်ထွက်လာတော့သည်။ ရွာသားအားလုံးမှာ ကြောက်လန့်တကြားဖြင့် ပုန်းအောင်းနေကြပြီး အဘိုးအိုများမှာလည်း ထိတ်လန့်စွာဖြင့် မြေပြင်ပေါ် လဲကျသွားကြတော့၏။ မြေခွေးမိစ္ဆာကြီး ရောက်ရှိလာခဲ့ပြီ ဖြစ်သည်။