အခန်း ၁၈၂

အခန်း ၁၈၂ - ခက်ခဲတဲ့ လမ်းခရီးကို ဖြတ်သန်းခြင်း... ဓားသုံးချက်က မင်းကို လွတ်လပ်ခွင့် ပေးလိမ့်မယ်

ချန်ရှန်းသည် ကောင်းကင်ဘုံ၏ အပြစ်ပေးမှု စွမ်းအားကို တောင့်ခံရင်း ရွာတစ်ရွာသို့ ရောက်ရှိလာခဲ့သည်။ ရွာမှာ ကပ်ရောဂါ ကျရောက်နေပြီး မည်သူမျှ မလွတ်မြောက်ဘဲ အားလုံး သေလုမျောပါး ဖြစ်နေကြသည်။ ချန်ရှန်းသည် အစပိုင်းတွင် ဝင်ရောက်စွက်ဖက်ရန် ရည်ရွယ်ချက် မရှိခဲ့သော်လည်း နောက်ဆုံးတွင် ရပ်တန့်သွားခဲ့သည်။

ချန်ရှန်း၏ အထက်တွင် သွေးရောင် မိုးကြိုးများ ယှက်နွယ်လျက် ရှိနေပြီး၊ သူသည် ရွာထဲသို့ ဝင်ရောက်လာရင်း ရေရွတ်လိုက်သည်။

"အကယ်၍ ချင်းယွီသာဆိုရင် သူတို့ကို အသက်ရှင်ဖို့ အခွင့်အရေး တစ်ခု ပေးချင်မှာ သေချာတယ်"

ထိုအခြေအနေကြောင့် ရွာသားများ အားလုံး ထိတ်လန့်တကြား ဝပ်တွားသွားကြသည်။

ချန်ရှန်းတွင် အချိန်များများ မရှိသဖြင့် တိုက်ရိုက်ပင် ပြောဆိုလိုက်သည် ။

"ငါ မင်းတို့ကို ကယ်နိုင်တယ်"

ရွာသားများက ထိုစကားကို ကြားသောအခါ မျှော်လင့်ချက်များ ပြည့်နှက်နေသော အမူအရာများ ပြသကာ တောင်းဆိုလိုက်ကြသည် ။

"ကျေးဇူးပြုပြီး အင်မော်တယ်... ငါတို့ အသက်ကို ကယ်ပါဦး"

ချန်ရှန်း က ပြောဆိုလိုက်သည်။

"ငါ့မှာ စည်းကမ်းချက် တစ်ခု ရှိတယ်"

ချန်ရှန်း သည် ခံစားချက် ကင်းမဲ့သူ ဖြစ်သည်။ သူတို့ကို ကယ်တင်ရန် ဆုံးဖြတ်ချက်မှာ ကြင်နာမှုကြောင့် မဟုတ်ဘဲ အရောင်းအဝယ် တစ်ခုသာ ဖြစ်သည်။ အနာဂတ် ဖြစ်ရပ်များအတွက် အကြောင်းရင်း တစ်ခုကို သူ ချန်ထားချင်ခဲ့ခြင်း ဖြစ်သည်။

ရွာသားများက ဦးညွှတ်ကာ ပြောဆိုလိုက်ကြသည် ။

"အင်မော်တယ် ရဲ့ အမိန့်ကို ငါတို့ နာခံပါ့မယ်"

ချန်ရှန်း က ဆက်ပြောသည် ။

"ဒီနေ့ ငါ မင်းတို့ကို ကယ်မယ်... အနာဂတ်မှာ ငါ အကူအညီ လိုအပ်လာရင် မင်းတို့ ဒါမှမဟုတ် မင်းတို့ရဲ့ မျိုးဆက်တွေက အသက်နဲ့ ပြန်ပေးဆပ်ရမယ်၊ ငါတို့ကြားမှာ ဘာအကြွေးမှ မကျန်စေရဘူး... သဘောတူတဲ့သူတွေ ဒီရေကို သောက်နိုင်တယ်... ဒီရေကို သောက်ပြီးတာနဲ့ ကတိပြုပြီးသား ဖြစ်သွားပြီ၊ ဖောက်ဖျက်လို့ မရဘူး"

ချန်ရှန်း သည် လက်ကို ပေါ့ပေါ့ပါးပါး ဝှေ့ယမ်းကာ ရွာထဲတွင် ဝိညာဉ် စမ်းရေ တစ်ခု ချန်ထားခဲ့ပြီးနောက် ထွက်ခွာသွားသည်။

ရွာ၏ အမည်မှာ နှင်းမြစ်ပင် ဖြစ်သည်။

ဖာတောင်သခင်သည် ရွာအဝင်ဝရှိ ဆိုင်းဘုတ်ကို ကြည့်ကာ အချိန်အတော်ကြာ တိတ်ဆိတ်နေခဲ့သည်။

နှင်းမြစ် ရွာ... နှင်းမြစ် ဂိုဏ်း...

နှင်းမြစ် ဂိုဏ်း၏ အခြေခံအုတ်မြစ်မှာ ဝိညာဉ် စမ်းရေ တစ်ခု ဖြစ်ကြောင်း ဖာတောင်သခင် သိထားသည်။ ထို စမ်းရေမှာ အံ့ဖွယ် အကျိုးသက်ရောက်မှုများ ရှိပြီး အဖိုးတန် ကုသရေး ဆေးလုံးများကို ဖော်စပ်ရာတွင် အသုံးပြုနိုင်ကြောင်း ပြောကြသည်။

ယခင်က ဖျက်ဆီးခံခဲ့ရသော နှင်းမြစ် ဂိုဏ်းသည် တာအိုကတိ ပြုထားခဲ့သော နှင်းမြစ်ရွာ ဖြစ်မည်မှာ သေချာသည်။ နှင်းမြစ် ရွာသည် ချန်ရှန်း၏ ကျေးဇူးကို ခံစားခဲ့ရပြီး ရွာကို ထိန်းသိမ်းထားနိုင်ရုံသာမက သာမန်အ‌ဆင့်မှ သူတော်စင် အဖြစ်သို့ ပြောင်းလဲကာ ကျင့်ကြံဂိုဏ်းတစ်ခု ဖြစ်လာခဲ့သည်။

လင်းရီက ထိုမြင်ကွင်းကို ကြည့်ရင်း စိတ်ထဲတွင် သက်ပြင်းချလိုက်သည်။ ချန်ရှန်း သည် ခံစားချက်ကင်းမဲ့ပြီး သက်ရှိအားလုံးအပေါ် ဂရုမစိုက်သော်လည်း သူ၏ လုပ်ရပ်များမှာ အမြဲတမ်း ဟန်ချက်ညီကာ အကြောင်းနှင့် အကျိုး ရှိသည်။ ဤနည်းအားဖြင့် သူ၏ ဆရာဘိုးဘေးကြီး မှာ ဒုက္ခရောက်ရတော့မည်မှာ သေချာလှပေသည်။

ချန်ရှန်း မရှိပါက နှင်းမြစ် ဂိုဏ်းလည်း ရှိလာမည် မဟုတ်ချေ။ ချန်ရှန်းသည် ကတိအတိုင်း နှင်းမြစ်ဂိုဏ်း ကို ပြန်လည်ပေးဆပ်မှုအဖြစ် ဖျက်ဆီးခဲ့သည်မှာ ယုတ္တိရှိပေသည်။ သို့သော် နှင်းမြစ်ဂိုဏ်း ဖျက်ဆီးခံရခြင်းမှာလည်း အမှန်တရားပင် ဖြစ်သည်။

ချန်ရှန်း သည် ကောင်းကင်ဘုံ၏ အပြစ်ပေးမှု စွမ်းအားကို တောင့်ခံရင်း သင့်တော်သော ရုပ်ခန္ဓာကို ရှာဖွေခဲ့သည်။ သွေးရောင် မိုးကြိုးများက သူ၏ အရိုးများကို တိုက်စားနေသဖြင့် နာကျင်မှုကို အဆက်မပြတ် ခံစားနေရသော်လည်း သူ့တွင် ညည်းညူမှု သို့မဟုတ် နောင်တရမှု မရှိခဲ့ချေ။

နောက်ဆုံးတွင် ချန်ရှန်းသည် ရေကန်တစ်ခုဘေး၌ ရပ်တန့်သွားခဲ့သည်။

ရေကန်ထဲတွင် ငါးနတ်ဆိုး တစ်ကောင်က သမီးလေး တစ်ယောက် မွေးဖွားနေသည်။ လူ့အသွင် ပြောင်းထားပြီး လူသားတစ်ယောက်နှင့် လက်ထပ်ထားသော ထိုငါးနတ်ဆိုးသည် ယခုအခါ မီးမွေးဖွားနေခဲ့ပြီ ဖြစ်သည်။ သူမ၏ ကျင့်ကြံခြင်းတာအို မှာ မပြည့်စုံသောကြောင့် သူမ၏ ဝမ်းဗိုက်ထဲရှိ သန္ဓေသားမှာ အသေမွေးဖွားလာခဲ့ပြီး ငါးနတ်ဆိုး၏ ကျင့်ကြံခြင်း အခြေခံမှာလည်း ပြန့်ကျဲသွားခဲ့သည်။

ချင်းယွီ…

ချန်ရှန်းသည် ရပ်တန့်လိုက်ပြီး ငါးနတ်ဆိုး၏ ရှေ့တွင် ပေါ်လာကာ ရေရွတ်လိုက်သည်။

"ချင်းယွီ မင်း ဒါကို သဘောကျမယ်လို့ ငါ ထင်တယ်"

ထိုစဉ် ချန်ရှန်း က ပြောဆိုလိုက်သည်။

"ငါ မင်းကို ကယ်နိုင်တယ်"

ငါးနတ်ဆိုး၏ မျက်နှာပေါ်တွင် ဝမ်းသာမှုများ ဖြစ်ပေါ်လာပြီး တောင်းဆိုလိုက်သည်။

"အင်မော်တယ်... ငါ့ကလေးကို ကယ်ပါဦး"

ချန်ရှန်းသည် အနည်းငယ် မျက်မှောင်ကြုတ်သွားပြီး အနည်းငယ် ဇဝေဇဝါ ဖြစ်သွားသည်။ သူမသည် သေလုမျောပါး ဖြစ်နေချိန်တွင် အဘယ့်ကြောင့် ကိုယ့်ကိုယ်ကိုယ် မကယ်တင်ဘဲ သူမ၏ဝမ်းဗိုက်ထဲက အသေမွေးလာသော သန္ဓေသားကို ကယ်တင်ချင်ရသနည်း။

ချန်ရှန်း က ထပ်မံ ပြောဆိုလိုက်သည်။

"ငါ မင်းကိုပဲ ကယ်နိုင်မယ်"

ချင်းယွီ၏ ခန္ဓာကိုယ်အတွက် လိုအပ်နေသည်မှာ ထိုအသေမွေးလာသော သန္ဓေသားပင် ဖြစ်သည်။ မွေးရာပါ ချီ မပြန့်ကျဲသေးသော်လည်း အသိစိတ်နှင့် စစ်မှန်ဝိညာဉ် မှာ လောကထဲသို့ ပျောက်ကွယ်သွားပြီဖြစ်သော အသေမွေးလာသည့် သန္ဓေသားပင်။

ထိုအခါမှသာ ချင်းယွီ၏ ဝိညာဉ်သည် ငါး၏ ခန္ဓာကိုယ်ထဲသို့ ဝင်ရောက်နိုင်ပြီး ပြီးပြည့်စုံသော ပေါင်းစပ်မှုကို ရရှိနိုင်မည် ဖြစ်သည်။

ငါးနတ်ဆိုး က တောင်းပန်သည် ။

"ငါ သေသွားရင်တောင် ကိစ္စမရှိပါဘူး... သူမ အသက်ရှင်ရမယ်"

ချန်ရှန်း က ဆုံးဖြတ်လိုက်သည် ။

"ငါ မင်းအသက်ကို ကယ်မယ်... ပြီးတော့ သူမကို ငါ ခေါ်သွားမယ်... အနာဂတ်မှာ သူမရဲ့ ကိုယ်ပိုင် ကံကြမ္မာ ရှိလာလိမ့်မယ်"

ဤအခိုက်အတန့်တွင် ချန်ရှန်းမှာ အလွန် ပင်ပန်းနွမ်းနယ်နေပြီဖြစ်ရာ စကားထပ်မပြောချင်တော့ချေ။ သူသည် ငါးနတ်ဆိုး၏ ခန္ဓာကိုယ်မှ အသေမွေးလာသော သန္ဓေသားကို ယူလိုက်ပြီး သန္ဓေသား၏ မွေးရာပါ ချီ ပြန့်ကျဲမသွားစေရန် သူ၏ ကိုယ်ပိုင် စွမ်းအားဖြင့် ကာကွယ်ပေးထားသည်။ ထို့နောက် ငါးနတ်ဆိုး၏ အသက်ကို သက်တမ်းတိုးပေးရန် သေခြင်းကင်းမဲ့ စွမ်းအားကို အသုံးပြုခဲ့သည်။

ချန်ရှန်း က ထွက်ခွာသွားရင်း ပြောဆိုလိုက်သည် ။

"ငါတို့ ကျေပြီ"

ချန်ရှန်းသည် ခါးသီးခြင်းပင်လယ် သို့ ပြန်ရောက်လာချိန်တွင် သူ၏ အခြေအနေမှာလည်း အလွန် ဆိုးရွားသော အခြေအနေသို့ ရောက်ရှိနေပြီ ဖြစ်သည်။

ချင်းယွီသည် ချန်ရှန်း ကောင်းကင်ဘုံ၏ အပြစ်ပေးမှု ကြောင့် နာကျင်နေရသည်ကို မြင်သောအခါ သူမ၏ နှလုံးသားထဲတွင် အလွန် နာကျင်သွားပြီး အော်ဟစ်လိုက်သည်။

"အစ်ကို ချန်ရှန်း"

ချန်ရှန်း က ချင်းယွီ ၏ ခေါင်းကို ညင်သာစွာ ပွတ်သပ်ပေးရင်း ကြင်နာသော အမူအရာဖြင့် ပြောဆိုလိုက်သည်။

"ကိစ္စမရှိပါဘူး... ငါ တောင့်ခံနိုင်ပါတယ်"

ချန်ရှန်း က ဆက်ပြောသည်။

"အခု ငါ မင်းရဲ့ ရုပ်ခန္ဓာ ကို ဖြတ်တောက်ပေးမယ်"

ချင်းယွီက ခေါင်းခါယမ်းရင်း ပြောဆိုလိုက်သည် ။

"အစ်ကို ချန်ရှန်း... အစ်ကို အရင်ဆုံး ကောင်းကင်ဘုံရဲ့ အပြစ်ပေးမှု စွမ်းအားကို ဖိနှိပ်သင့်တယ်"

ချန်ရှန်း က ရှင်းပြသည်။

"အချိန်မရှိတော့ဘူး... ဒီသန္ဓေသားရဲ့ မွေးရာပါ ချီ ကို အကြာကြီး ထိန်းသိမ်းထားလို့ မရဘူး... ငါ အခုချက်ချင်း လှုပ်ရှားမှ ရမယ်"

ချင်းယွီက တွန့်ဆုတ်နေဆဲဖြစ်သည်။

"ဒါပေမဲ့..."

ချန်ရှန်း က ပြောဆိုလိုက်သည်။

"ချင်းယွီ... ခါးသီးခြင်းပင်လယ် ကနေ ထွက်သွားဖို့က မင်းရဲ့ ဆန္ဒလေ... အကယ်၍ ဒီနေ့မှ မလုပ်ဖြစ်ရင် မင်းကို ခါးသီးခြင်းပင်လယ် ကနေ အပြင်ပို့ဖို့ ခက်ခဲသွားမှာကို ငါ စိုးရိမ်တယ်"

ချန်ရှန်းသည် ပြောရင်းဖြင့် ချင်းယွီ၏ တုံ့ပြန်မှုကို မစောင့်တော့ဘဲ မြေကမ္ဘာအင်မော်တယ် စတုတ္ထနယ်ပယ် ၏ စွမ်းအားများကို အသက်သွင်းကာ ချင်းယွီ ကို လှုပ်ရှားမရအောင် ချုပ်နှောင်ထားလိုက်သည်။

ချလွင်...

ချန်ရှန်းသည် သူ၏ လက်ဝါးဖြင့် ခေါ်ယူလိုက်ရာ တာအို သတ်ဖြတ်ခြင်းဓား ပေါ်လာခဲ့သည်။

ချန်ရှန်း က ပြောဆိုလိုက်သည်။

"ချင်းယွီ... ဖြစ်စဉ်က နာကျင်လိမ့်မယ်... ကျေးဇူးပြုပြီး သည်းခံပါ"

ထို့နောက် သူ၏ လက်ထဲရှိ တာအို သတ်ဖြတ်ခြင်းဓားဖြင့် ချင်းယွီ ထံသို့ ပိုင်းချလိုက်သည်။ မျက်တောင်တစ်ခတ်အတွင်းမှာပင် ပြိုင်ဘက်ကင်း သွေးရောင် ဓားအလင်းတန်းတစ်ခုက ချင်းယွီ ထံသို့ ပိုင်းဖြတ်သွားလေသည်။ ကောင်းကင်နှင့် မြေကြီး၏ စွမ်းအားများ ပါဝင်သော ထိုဓားတစ်ချက်က ကောင်းကင် တံခါး ကိုပင် ဖွင့်နိုင်စွမ်း ရှိသည်။

ချလွင်...

တစ်ချိန်တည်းမှာပင် ချင်းယွီ၏ ခန္ဓာကိုယ်တွင်းမှ သတ်ဖြတ်လိုစိတ်တစ်ခု ပေါက်ကွဲထွက်လာခဲ့သည်။ ၎င်းမှာ ချင်းယွီ ၏ မွေးရာပါ အမြင့်ဆုံး သတ်ဖြတ်ခြင်း လက်နက် ပင် ဖြစ်သည်။ တာအို သတ်ဖြတ်ခြင်းဓား၏ အရှိန်အဝါကို အာရုံခံမိပြီးနောက် ၎င်းသည် အလိုအလျောက် သခင်ကို ကာကွယ်ရန် ချန်ရှန်း ဝှေ့ယမ်းလိုက်သော ဓားဆီသို့ ပြေးဝင်သွားသည်။

ချလွင်...

အမြင့်ဆုံး သတ်ဖြတ်ခြင်း လက်နက် နှစ်ခု ထိပ်တိုက်တွေ့ဆုံကြပြီး သူတို့၏ ဓားအလင်းတန်းများက ကောင်းကင်နှင့် မြေကြီးကို ဖုံးလွှမ်းသွားကာ ခါးသီးခြင်းပင်လယ် ကို ဆူပွက်သွားစေခဲ့သည်။

ထိုနေ့တွင် ဝိညာဉ်ကုန်းမြေ ရှိ ကျင့်ကြံသူများသည် ထိုအဖြစ်အပျက်ကို မြင်တွေ့ခဲ့ပြီး ၊ ဓားနှစ်လက်၏ သတ်ဖြတ်လိုစိတ်မှာ အလွန် ပြင်းထန်လွန်းသဖြင့် ထိတ်လန့်ကြောက်ရွံ့ခဲ့ကြသည်။

ချန်ရှန်း၏ မျက်နှာပေါ်တွင် မခံမရပ်နိုင်လောက်အောင် နာကျင်နေသည့် အမူအရာများ ဖြစ်ပေါ်လာခဲ့သည်။ သို့သော် နောက်ဆုံးတွင် သူသည် ဓားကို ပိုင်းချလိုက်ဆဲ ပင် ဖြစ်သည်။ အကယ်၍ ဖြတ်တောက်ရမည်ဆိုပါက ပြီးပြည့်စုံစွာဖြင့် ဖြတ်တောက်ရမည် ဖြစ်သည်။

ဝုနိး...

ချန်ရှန်းသည် ဒုတိယမြောက် ဓားချက်ကို ထုတ်လွှတ်လိုက်သည်။ ဤတစ်ကြိမ်တွင် ချင်းယွီ၏ မွေးရာပါ လက်နက် သည် ခုခံရန်မဖြစ်နိုင်သော ဖိအားကြောင့် တုန်ယင်သော အသံ ထွက်ပေါ်လာပြီး၊ ချန်ရှန်း၏ ဓားကြောင့် ကွဲအက်ကာ ခါးသီးခြင်းပင်လယ် အတွင်းသို့ ပြုတ်ကျသွားသည်။

ချလွင်...

ဓားက နောက်တစ်ကြိမ် မြည်ဟည်းသွားပြန်သည်။

ချန်ရှန်း သည် မျက်လုံးများကို မှိတ်ကာ ချင်းယွီကို ဓားဖြင့် ခုတ်ပိုင်းလိုက်သည်။ ချင်းယွီသည် ချန်ရှန်း ၏ အမိန့်ကို နာခံကာ လုံးဝ မခုခံခဲ့ချေ။ ချင်းယွီ၏ ရုပ်ခန္ဓာ မှာ ချက်ချင်းပင် လေထဲသို့ ပျောက်ကွယ်သွားပြီး အင်မော်တယ် အလင်းတန်းများဖြင့် လင်းလက်နေသော စစ်မှန်ဝိညာဉ် တစ်ခုသာ ကျန်ရစ်ခဲ့ပြီး ကောင်းကင်သို့ ပျံတက်သွားသည်။

ဝုန်း...

ထာဝရအသက်တံခါး ပြန်လည် ထွကိပေါ်လာခဲ့သည်။

သာမန် သက်ရှိများ သေဆုံးသောအခါ သူတို့၏ ဝိညာဉ်များမှာ သဘာဝကျကျပင် ကောင်းကင်နှင့် မြေကြီးဆီသို့ ပြန်သွားကြရသည်။ မွေးရာပါ ဝိညာဉ် သက်ရှိများ သေဆုံးသောအခါ သူတို့၏ ဝိညာဉ်များမှာ လျှို့ဝှက်ဆန်းကြယ်သော အမျိုးသမီး၏ တံခါးဆီသို့ ပြန်သွားကြရသည်။

ထာဝရအသက်တံခါး မြည်ဟည်းသွားသည်နှင့်အမျှ ချင်းယွီ၏ စစ်မှန် ဝိညာဉ မှာ ထာဝရအသက်တံခါး ရှိရာသို့ မသိစိတ်အရ ပျံသန်းသွားသည်။

ချန်ရှန်းက နောက်တစ်ကြိမ် တိုက်ခိုက်လိုက်ရာ ၊ ဓားအလင်းတန်းတစ်ခုက ထာဝရအသက်တံခါး ရှိရာသို့ တိုက်ရိုက် ဦးတည်သွားခဲ့သည်။

သူသည် အော်ဟစ်လိုက်သည်။

"ဆင်းလာခဲ့"

ဤအရာမှာ ချန်ရှန်း၏ အစွမ်းကုန် ဓားချက်ပင် ဖြစ်သည်။ ၎င်းသည် အလွန် တောက်ပပြီး အလွန် အစွမ်းထက်ကာ မယိမ်းယိုင်သော စွမ်းအားများဖြင့် ပြည့်နှက်နေသည်။ ထိုစွမ်းအားများသည် ထာဝရအသက်တံခါး ကို ပြင်းထန်စွာ ရိုက်ခတ်သွားကာ ထာဝရအသက်တံခါး နှင့် ချင်းယွီ ၏ စစ်မှန်ဝိညာဉ် ကြားရှိ ဆက်သွယ်မှုကို ဖြတ်တောက်လိုက်သည်။

ချန်ရှန်း က သူ၏ လက်ဝါးဖြင့် ဖမ်းဆွဲလိုက်ပြီး ချင်းယွီ၏ စစ်မှန်ဝိညာဉ် ကို ငါး၏ ခန္ဓာကိုယ်အတွင်းသို့ ပို့ဆောင်လိုက်ရင်း အော်ဟစ်လိုက်သည်။

"သွားတော့"

ဝုန်း...

ချန်ရှန်း၏ ဓားချက်က မဟာတာအိ ကို ဒေါသထွက်သွားစေခဲ့ပုံရသည်။ မျက်တောင်တစ်ခတ်အတွင်းမှာပင် မိုးမြေပိတ်လှောင်ခြင်း စွမ်းအားများ အရှိန်ပြင်းစွာ ထွက်ပေါ်လာပြီး ချန်ရှန်းကို ၎င်းအတွင်း၌ ပိတ်လှောင်လိုက်သည်။

မိုးမြေပိတ်လှောင်ခြင်း စွမ်းအားများကို ရင်ဆိုင်ရသောအခါ ချန်ရှန်း၏ မျက်နှာပေါ်တွင် အပြုံးတစ်ခု ပေါ်လာပြီး ပြောဆိုလိုက်သည်။

"နှုတ်ဆက်ပါတယ်"

မိုးမြေပိတ်လှောင်ခြင်း စွမ်းအားများ ထွက်ပေါ်လာသည်နှင့် ၊ သူသည် ထိုအရာကို ထိုးဖောက်နိုင်မည်ဆိုပါက ဤကိစ္စသည် ပြီးမြောက်သွားပြီဟု အဓိပ္ပာယ်ရသည်။

ထိုသို့ပြောပြီးနောက် ချန်ရှန်းသည် အားရပါးရ ရယ်မောလိုက်သည်။ သူသည် ဓားနှင့် တစ်သားတည်း ဖြစ်သွားကာ မဟာတာအို၏ ဒေါသကို ကိုယ်စားပြုသော မိုးမြေပိတ်လှောင်ခြင်း စွမ်းအားများကို ထိပ်တိုက် ဝင်တိုက်လိုက်တော့သည်။