အခန်း ၈၈၆

အပိုင်း(၈၈၆) နောက်ဆုံးဝှက်ဖဲများ ထုတ်သုံးခြင်း

ဟိန်းဟောက်သံက မိုးခြိမ်းသံအလား ကျယ်လောင်သွားပြီး ထိုကြောက်မက်ဖွယ်ကောင်းသော အသံလှိုင်းများထဲတွင် အားကောင်းလှသည့် စိတ်စွမ်းအင် ရိုက်ခတ်မှုတစ်ခု ပါဝင်နေသည်။

၎င်းမှာ ရွှေမွေးခြင်္သေ့မိစ္ဆာ၏ မျိုးရိုးဗီဇအစွမ်း ဖြစ်သော ခြိမ်းခြောက်ခြင်း ပင်ဖြစ်သည်။

ဤအစွမ်းသည် အသံလှိုင်းနှင့် စိတ်စွမ်းအင်တို့ကို ပေါင်းစပ်ထားပြီး စိတ်ပိုင်းဆိုင်ရာရော၊ အာရုံခံစားမှုပိုင်းကိုပါ နှစ်ထပ်ကွမ်း ခြိမ်းခြောက်နိုင်သော စွမ်းရည်မျိုး ဖြစ်သည်။

ဤမျှနီးကပ်သော အကွာအဝေးတွင် ရှိနေသဖြင့် ကျင်းရှီရုံသည် ချက်ချင်းပင် ထိုအစွမ်း၏ သက်ရောက်မှုကို ခံလိုက်ရ၏။

သူ၏ မျက်ဝန်းများထဲတွင် ပြင်းထန်သော ကြောက်ရွံ့မှုများ ဖြတ်ပြေးသွားပြီး တစ်ကိုယ်လုံးလည်း တုန်ယင်လာတော့သည်။

လင်းယွမ်၏ စိတ်စွမ်းအင်က ကျင်းရှီရုံထက် များစွာ သာလွန်နေသည်။

ယင်းအချက်ကို ကျင်းရှီရုံ စိတ်အဝေးထိန်းအစွမ်း အသုံးပြုခဲ့စဉ်က လင်းယွမ် စမ်းသပ်သိရှိခဲ့ခြင်း ဖြစ်၏။

ထို့အပြင် ကျင်းရှီရုံ၌ အလွန်ကောင်းမွန်သော အဆင့်မြင့် ပြန်လည်ကုသခြင်း အစွမ်း ရှိနေသေးကြောင်း တွေ့ရှိပြီးနောက် လင်းယွမ်က တိုက်ခိုက်မှုပုံစံကို ချက်ချင်း ပြောင်းလဲလိုက်သည်။

ကျင်းရှီရုံ၏ ရုပ်ခန္ဓာကို သွားရောက်တိုက်ခိုက်နေခြင်းက အချိန်ကုန် လူပန်းဖြစ်ရုံသာ ရှိမည်။

သူ လုပ်ရမည့်အရာမှာ တစ်ဖက်လူ၏ စိတ်ဝိညာဉ် အသိစိတ်ကို တိုက်ခိုက်ရန်ပင် ဖြစ်သည်။

ထင်ထားသည့်အတိုင်းပင်၊ ခြိမ်းခြောက်ခြင်း အစွမ်းတစ်ကွက်တည်းနှင့် တစ်ဖက်လူ၏ စိတ်ပင်လယ်ကို ချက်ချင်း ထိတ်လန့်သွားစေခဲ့သည်။

လင်းယွမ်က အချိန်ဆွဲမနေဘဲ ကြောက်မက်ဖွယ်ကောင်းသော စိတ်ဝိညာဉ်ရိုက်ခတ်အစွမ်းကို ထပ်မံ စုစည်းလိုက်ပြန်သည်။

"ဘုန်း... ဘုန်း... ဘုန်း"

သူ၏ စိတ်စွမ်းအင်က မူလကတည်းက အားကောင်းနေပြီးဖြစ်ရာ ရိုင်းစိုင်းကြမ်းတမ်းလှသော စိတ်စွမ်းအင်များသည် ဧရာမလှိုင်းလုံးကြီးအလား ကျင်းရှီရုံ၏ စိတ်ပင်လယ်ကို ရူးသွပ်စွာ ဝင်တိုက်လေတော့သည်။

ကျင်းရှီရုံ၏ ဦးခေါင်းမှာ ဧရာမ သံတူကြီးဖြင့် အကြိမ်ကြိမ် အထုရိုက်ခံလိုက်ရသကဲ့သို့ ဖြစ်သွား၏။

သူ၏ မျက်နှာပေါက် ခုနစ်ပေါက်မှ သွေးများ ချက်ချင်း ပန်းထွက်လာပြီး ဦးနှောက်တစ်ခုလုံး ပေါက်ကွဲထွက်တော့မတတ် ခံစားလိုက်ရသည်။

ထိုသို့ ပြင်းထန်သော တိုက်ခိုက်မှုကြောင့် ကျင်းရှီရုံ၏ မူလကိုယ်ထည်မှာလည်း ခြိမ်းခြောက်ခံထားရသော အခြေအနေမှ နောက်ဆုံးတွင် သတိပြန်ဝင်လာခဲ့သည်။

သူက ခေါင်းကို ကိုင်ထားရင်း အချိန်မဆိုင်းဘဲ မျိုးရိုးဗီဇ ပြန်လည်ဖွဲ့စည်းခြင်း အစွမ်းကို ချက်ချင်း အသက်သွင်းလိုက်သည်။

"ဝှစ်"

သွေးမြူခိုးများ ပေါက်ကွဲထွက်သွားသည်ကို မြင်လိုက်ရပြီး သူ၏ ခန္ဓာကိုယ်မှာ ချက်ချင်း ပုံပျက်သွားကာ အလျင်အမြန် ကြီးထွားလာတော့သည်။

သို့သော် ဤမြေအောက်လမ်းကြောင်းက အလွန် ကျဉ်းမြောင်းလွန်းနေသဖြင့် သူ၏အရပ် (၁၃) ပေခန့်အထိ ကြီးထွားလာပြီးနောက် ဆက်လက် ကြီးထွား၍ မရတော့ပေ။

မည်သို့ပင်ဖြစ်စေ သူသည် မျိုးရိုးဗီဇ ပြန်လည်ဖွဲ့စည်းခြင်း ပုံစံသို့ ရောက်ရှိသွားပြီဖြစ်ရာ လူသားပုံစံ၏ ရုပ်ပိုင်းဆိုင်ရာ ကန့်သတ်ချက်များမှာ ချက်ချင်း ပျောက်ကွယ်သွားခဲ့ပြီ ဖြစ်သည်။

ထို့ကြောင့် မူလက (၁၂၀) မှတ်သာ ရှိသော သူ၏ စိတ်စွမ်းအင်မှာ ချက်ချင်း ထိုးတက်သွားလေသည်။

မျက်တောင်တစ်ခတ်အတွင်းမှာပင် သူ၏ ဦးနှောက်ထဲမှ ပြင်းထန်သော နာကျင်မှုများ ချက်ချင်း ပျောက်ကွယ်သွား၏။

တစ်ချိန်တည်းမှာပင် ကျင်းရှီရုံက ဒေါသတကြီး ဟိန်းဟောက်လိုက်ပြီး လင်းယွမ်ထံသို့ လက်သီးဖြင့် အပြင်းအထန် ထိုးချလိုက်သည်။

"ဘုန်း"

လင်းယွမ်၏ ခန္ဓာကိုယ်မှာ ရုတ်တရက် နေရာရွှေ့ပြောင်းပျောက်ကွယ်သွားပြီး ထိုလက်သီးချက်မှာ လေထုကို ဖောက်ခွဲသွားသော်လည်း မည်သည့်အရာကိုမျှ မထိလိုက်ပေ။

ကျင်းရှီရုံသည်လည်း တစ်ပြိုင်နက်တည်း နေရာရွှေ့ပြောင်းလိုက်ပြီး မြေအောက်မှ ချက်ချင်း ထွက်ပြေးကာ မြေကြီးအလွှာများဆီသို့ အလွန်မြန်သောအလျင်ဖြင့် ပျံသန်းသွားလေသည်။

လင်းယွမ်က ထိုမြင်ကွင်းကို မြင်လိုက်ရသောအခါ အနောက်မှ ချက်ချင်း ထပ်ကြပ်မကွာ လိုက်ပါသွား၏။

သူတို့နှစ်ဦးသည် မျက်တောင်တစ်ခတ်အတွင်းမှာပင် မြေကြီးအလွှာများကို ဖောက်ထွက်ကာ မင်ဟူကျွန်း၏ သစ်တောထဲသို့ ရောက်ရှိသွားကြသည်။

"ဘုန်း... ဘုန်း... ဘုန်း"

ကောင်းကင်ယံတွင် ပြင်းထန်သော ပေါက်ကွဲသံများ အဆက်မပြတ် ထွက်ပေါ်လာသည်။

သူတို့နှစ်ဦး၏ အလျင်က အမြင့်ဆုံးအဆင့်သို့ ရောက်ရှိနေသဖြင့် သာမန်မျက်စိဖြင့် သူတို့၏ လှုပ်ရှားမှုလမ်းကြောင်းကို ဖမ်းယူရန်ပင် မဖြစ်နိုင်တော့ပေ။

ပေါက်ကွဲမှု၏ ဂယက်လှိုင်းများသာ လေထဲတွင် ပဲ့တင်ထပ်နေတော့သည်။

သူတို့နှစ်ဦး လေထဲသို့ ရောက်ရှိသွားသည်နှင့်အမျှ ကျင်းရှီရုံက မျိုးရိုးဗီဇကို အပြည့်အဝ ဖွင့်ထုတ်လိုက်ပြီး မျိုးရိုးဗီဇ ပြန်လည်ဖွဲ့စည်းခြင်း အခြေအနေသို့ အပြည့်အဝ ဝင်ရောက်သွားခဲ့သည်။

သူ၏ ခန္ဓာကိုယ်ကြီးက အလျင်အမြန် ကြီးထွားလာပြီး မျက်တောင်တစ်ခတ်အတွင်းမှာပင် အရပ် (၂၈၂) ပေခန့်ရှိသော ဧရာမ မျိုးရိုးဗီဇ သားရဲကြီးအဖြစ် ပြောင်းလဲသွားလေတော့သည်။

"ဝုန်း"

နောက်ထပ် ပေါက်ကွဲမှုတစ်ခု ထပ်မံဖြစ်ပေါ်လာပြီး အရိပ်နှစ်ခုစလုံး ယိမ်းယိုင်ကာ နောက်သို့ဆုတ်သွားကြရာ ကောင်းကင်ပေါ်ရှိ ပုံစံမျိုးစုံ ပြောင်းလဲနေသော တိမ်တိုက်များကိုပင် တိုက်မိ၍ ပျက်စီးသွားစေသည်။

ဤတစ်ကြိမ်တွင်မူ ကျင်းရှီရုံ ပြောင်းလဲထားသော မျိုးရိုးဗီဇ သားရဲကြီးမှာ ပျောက်ကွယ်သွားပြီ ဖြစ်သည်။

သူက ကိုယ်ပျောက်အစွမ်းကို ထပ်မံ အသုံးပြုလိုက်ခြင်း ဖြစ်၏။

ထို့အပြင် သူသည် ဟင်းလင်းပြင် အစွမ်းကိုလည်း တစ်ပြိုင်နက်တည်း အသုံးပြုထားသေးသည်။

ထိုအစွမ်း နှစ်ထပ်ကွမ်း၏ ပံ့ပိုးမှုအောက်တွင် ပုံမှန်အားဖြင့် ရန်သူအနေဖြင့် သူ၏ ခြေရာကို ရှာဖွေတွေ့ရှိရန် လုံးဝ မဖြစ်နိုင်ပေ။

သို့သော် သူ ဘယ်ဘက်သို့ ပျံသန်းသွားပြီး လင်းယွမ်ကို တိုက်ခိုက်ရန် ပြင်လိုက်သည့် မျက်တောင်တစ်ခတ်အတွင်းမှာပင်...

လင်းယွမ်က ရုတ်တရက် အေးစက်စက် ရယ်မောလိုက်သည်။ ထို့နောက် လင်းယွမ် ရုတ်တရက် လှည့်လိုက်သည်ကို တွေ့လိုက်ရပြီး ရေခဲမြေရိုင်းဝက်ဝံ ပုံစံဖြင့် သူ၏ တစ်ကိုယ်လုံးက ရေခဲဘောလုံးအဖြစ် ပြောင်းလဲသွားကာ "ဝုန်း" ဟူသော အသံနှင့်အတူ ရိုင်းစိုင်းကြမ်းတမ်းလှသော အဟုန်ဖြင့် တရှိန်ထိုး ဝင်တိုက်လိုက်သည်။

"ဒုန်း"

ထိုဟင်းလင်းပြင် နေရာလေးမှာ ခဏချင်းမှာပင် ပြိုကျပျက်စီးသွားတော့သည်။

ထို့နောက် ကြောက်မက်ဖွယ်ကောင်းသော ရေခဲအငွေ့အသက်များက ထိုဧရိယာတစ်ခုလုံးကို အလျင်အမြန် အေးခဲသွားစေသည်။

သို့သော် ကျင်းရှီရုံ၏ ခန္ဓာကိုယ်ကမူ ကြိုတင်၍ မီးလောင်ကျွမ်းနေပြီး "ဝုန်း" ဟူသော အသံနှင့်အတူ ထိုရေခဲလွှာများကို ဖောက်ခွဲကာ ချက်ချင်း ထွက်ပြေးလွတ်မြောက်သွားသည်။

တစ်ချိန်တည်းမှာပင် သူက လက်နှစ်ဖက်ဖြင့် လေဟာနယ်ကို အားကုန် ဆွဲငင်လိုက်သည်။

"ကျွိ"

ထိုဟင်းလင်းပြင်မှာ ရုတ်တရက် ကွဲအက်သွားပြီး အက်ကွဲကြောင်းတစ်ခုက လင်းယွမ်ကို ချက်ချင်း ဝါးမျိုသွားလေသည်။

ကျင်းရှီရုံ၏ တုံ့ပြန်မှုက အလွန်တရာ မြန်ဆန်လွန်းလှပြီး အစွမ်းမျိုးစုံကို အသုံးပြုနိုင်မှုကလည်း အသွင်တစ်ထောင်၊ ပုံစံတစ်သောင်း ပြောင်းလဲနိုင်သည်ဟု ဆိုရမည် ဖြစ်သည်။

သို့သော် လင်းယွမ်ကလည်း လူညံ့တစ်ယောက် မဟုတ်ပေ။

ဟင်းလင်းပြင် အစွမ်းကို သူလည်း ကျွမ်းကျင်ပေသည်။

"ဝှစ်"

ဟင်းလင်းပြင် ပိတ်သွားသည့် မျက်တောင်တစ်ခတ်အတွင်း လင်းယွမ်က နေရာရွှေ့ပြောင်းခြင်း တံခါးပေါက်တစ်ခုကို ဖွင့်လှစ်လိုက်ပြီး ထိုအထဲသို့ ချက်ချင်း တိုးဝင်သွားခဲ့သည်။

သူ ထပ်မံပေါ်လာချိန်တွင်မူ ကျင်းရှီရုံ၏ အရှေ့သို့ ရောက်ရှိနေပြီ ဖြစ်သည်။

ကျင်းရှီရုံ၏ မျက်နှာမှာ ကြည့်ရဆိုးနေပြီး သူ၏ မျက်ဝန်းအောက်ခြေတွင် ဆုတ်ခွာလိုသည့် အရိပ်အယောင်တစ်ခု ပေါ်လွင်နေပြီ ဖြစ်သည်။

'ဒီ လင်း ဆိုတဲ့ကောင်ရဲ့ မျိုးရိုးဗီဇ ပုံစံက ပေ ၃၀၀ နီးပါးလောက်အထိ ရောက်နေပါလား... ငါ့ထက်တောင် ပိုမြင့်နေသေးတယ်'

'ဒါက သူ့ရဲ့ မျိုးရိုးဗီဇ ပြန်လည်ဖွဲ့စည်းခြင်း တိုးတက်မှုက ၉၀ ရာခိုင်နှုန်း နီးပါး ရောက်နေပြီဆိုတာကို ပြနေတာ မဟုတ်ဘူးလား'

'ခွေးမသား... သူက ဒီရေဘေးကြီး မဖြစ်ခင်ကတည်းက လေ့ကျင့်နေခဲ့တာများလား... ဘယ်လိုလုပ်ပြီး ဒီလောက် မြန်နေရတာလဲ'

သူ ဤမျှ လျင်မြန်စွာ ကျင့်ကြံနိုင်ရခြင်းမှာ... ပထမအချက်အနေဖြင့် မုန်ယာကုမ္ပဏီ၏ အရင်းအမြစ်များ အားလုံးကို သူ့အပေါ် ပုံအောထားသောကြောင့် ဖြစ်သည်။

ဒုတိယအချက်မှာ သူ့တွင် ပုံတူကိုယ်ပွားများ မြောက်မြားစွာ ရှိနေပြီး ထိုပုံတူကိုယ်ပွားများက အတူတကွ ကျင့်ကြံကြကာ နောက်ဆုံးတွင် သေဆုံးသွားသည့်တိုင်အောင် ၎င်းတို့၏ ဝိညာဉ်များက သူ၏ ခန္ဓာကိုယ်ထဲသို့ ပြန်လည်ဝင်ရောက်လာပြီး မျိုးရိုးဗီဇ ပြန်လည်ဖွဲ့စည်းခြင်း အတွေ့အကြုံများ အားလုံးကို သူက စုပ်ယူပေါင်းစပ်နိုင်သောကြောင့် ဖြစ်သည်။

ထိုအရာက သူ လမ်းလွဲများစွာ လျှောက်ရခြင်းမှ သက်သာစေသည်ဟု ဆိုလိုခြင်းဖြစ်သည်။

ထို့ကြောင့်သာ ဤမျှ လျင်မြန်စွာ ကျင့်ကြံနိုင်ခဲ့ခြင်း ဖြစ်သည်။

သို့သော် လင်း ဆိုသည့်ကောင်ကရော ဘာကို အားကိုးပြီး ဒီလိုလုပ်နိုင်ရတာလဲ။

သူ ဘယ်လိုမှ တွေး၍မရပေ။

ထို့အပြင် လင်း ဆိုသည့်ကောင်၏ အစစ်အမှန် သန္ဓေပြောင်းအစွမ်းက အတိအကျ ဘာများလဲ။

သူက လေကို ပြင်းပြင်းတစ်ချက် ရှူသွင်းလိုက်ပြီး ခြေလှမ်းများကို အလျင်အမြန် နောက်ဆုတ်လိုက်သည်။

"ဝှစ်" ခနဲ အသံနှင့်အတူ အနောက်ဘက်ရှိ ဟင်းလင်းပြင်က လိမ်ကောက်သွား၏။

သူသည် ချက်ချင်း နေရာရွှေ့ပြောင်းပျောက်ကွယ်သွားသည်။

သို့သော် သူ အခြားတစ်နေရာ၌ ပေါ်လာသည်နှင့် တစ်ပြိုင်နက် မျက်နှာချင်းဆိုင်မှ လက်သီးတစ်လုံး တည့်တည့် ဝင်လာတော့သည်။

"ဘုန်း"

ဧရာမ သားရဲကြီး အခြေအနေတွင်ပင် သူ၏ လည်ပင်းက ချက်ချင်း ကြိုးလိမ်သဖွယ် လိမ်ကောက်သွားပြီး ခန္ဓာကိုယ်ကြီး လွင့်စင်လူးလှိမ့်သွားလေသည်။

လင်းယွမ်က သူ ပေါ်လာမည့်နေရာကို ကြိုတင်ခန့်မှန်းပြီး ခြေတစ်လှမ်း ဦးသွားခဲ့ခြင်း ဖြစ်သည်။

ဤလက်သီးချက်က ကျင်းရှီရုံ၏ လည်ပင်းကို အသေအချာ ကျိုးသွားစေခဲ့သည်။

အကယ်၍ သာမန် အစွမ်းပိုင်ရှင် တစ်ယောက်သာဆိုလျှင် မျိုးရိုးဗီဇ ပြန်လည်ဖွဲ့စည်းခြင်း ပုံစံတွင် ရှိနေစေကာမူ လည်ပင်းကျိုးသွားပါက တကယ် သေဆုံးသွားမည်သာ ဖြစ်သည်။

သို့သော် ကျင်းရှီရုံက သာမန် အစွမ်းပိုင်ရှင် မဟုတ်ကြောင်း သိသာလှပေသည်။

သူ့တွင် အလွန် အားကောင်းသော ပြန်လည်ကုသခြင်း အစွမ်း ရှိနေသည်။

သူ၏ ခန္ဓာကိုယ် နောက်သို့ အလျင်အမြန် ဆုတ်သွားသည်နှင့် တစ်ချိန်တည်းမှာပင် သူ၏ လည်ပင်းကို အမြန် ပြန်တည့်လိုက်သည်ကို တွေ့လိုက်ရ၏။

"ဂျွတ်" ဟူသော အသံမြည်လာပြီး သူ၏ လည်ပင်းမှာ ချက်ချင်းပင် မူလအတိုင်း ပြန်လည် ကောင်းမွန်သွားတော့သည်။

သို့သော် သူ၏ ဤလုပ်ရပ်များက အချိန်များစွာကို နှောင့်နှေးသွားစေခဲ့ပြီ ဖြစ်သည်။

ထိပ်တန်း အစွမ်းပိုင်ရှင်များအကြား သေရေးရှင်ရေး တိုက်ပွဲတွင် အနည်းငယ်သော အမှားအယွင်းကိုပင် ခွင့်မလွှတ်နိုင်ပေ။

လင်းယွမ်က အလွန် မြန်ဆန်လှသော အလျင်ဖြင့် သူ၏ ဦးခေါင်းထက်သို့ ရောက်ရှိလာခဲ့သည်။

နောက်တစ်ခဏတွင်မူ ကြောက်မက်ဖွယ်ကောင်းသော စိတ်စွမ်းအင် အလွှာများက ရူးသွပ်စွာ စုစည်းသွားပြီး ဧရာမ စိတ်စွမ်းအင် ရိုက်ခတ်မှုလှိုင်းလုံးကြီး အဖြစ် ပြောင်းလဲသွားလေတော့သည်။

"ဝုန်း"

ထိုကြောက်မက်ဖွယ်ကောင်းသော စိတ်ဝိညာဉ်ရိုက်ခတ်မှုက ကျင်းရှီရုံ၏ ဦးခေါင်းကို တည့်တည့် ဝင်တိုက်လိုက်သည်။

"အား"

ကျင်းရှီရုံထံမှ သနားစဖွယ် စူးစူးဝါးဝါး အော်ဟစ်သံကြီး ထွက်ပေါ်လာ၏။

မျိုးရိုးဗီဇ ပြန်လည်ဖွဲ့စည်းခြင်း အခြေအနေသို့ ရောက်ရှိနေသည့်တိုင် သူ၏ စိတ်စွမ်းအင်က လင်းယွမ်ကို မယှဉ်နိုင်သေးပေ။

လင်းယွမ်က ယခုအချိန်တွင် သူ၏ စိတ်စွမ်းအင်များကို စုစည်းကာ တစ်ဖက်လူ၏ စိတ်ပင်လယ်ကို ရူးသွပ်စွာ တိုက်ခိုက်နေသည်။

လတ်တလောတွင် ကျင်းရှီရုံ၏ ရုပ်ခန္ဓာ ပြန်လည်ကုသနိုင်စွမ်းက အလွန် အားကောင်းလွန်းလှရာ စိတ်ပင်လယ်ကို တိုက်ခိုက်မှသာ တစ်ချက်တည်းဖြင့် အပြတ်ရှင်းနိုင်မည် ဖြစ်သည်။

ကျင်းရှီရုံက ခေါင်းကို ကိုင်ထားရင်း ပြင်းထန်သော နာကျင်မှုကို အံကြိတ်ခံကာ ဟင်းလင်းပြင် လက်စွပ်ထဲမှ ဧရာမ ရွှေခေါင်းဆောင်းကြီး တစ်ခုကို ရုတ်တရက် ထုတ်ယူလိုက်သည်ကို တွေ့လိုက်ရ၏။

ထို့နောက် သူက လင်းယွမ်၏ စိတ်စွမ်းအင် ရိုက်ခတ်မှုလှိုင်းကို ကာကွယ်ရန် ထိုခေါင်းဆောင်းကို သူ၏ ခေါင်းပေါ်တွင် စွပ်ချလိုက်သည်။

သို့သော် လင်းယွမ်က သူ့ကို အလိုကျ အဖြစ်ခံမည်လား။

လင်းယွမ်က လက်တစ်ချက် ဝှေ့ယမ်းလိုက်သည်ကို တွေ့လိုက်ရပြီး မျက်တောင်တစ်ခတ်အတွင်းမှာပင် သူက မိုးမြေနတ်ညောင်ပင် အဖြစ် ပြောင်းလဲသွားကာ မရေမတွက်နိုင်သော နွယ်ပင်များက ချက်ချင်း ပစ်ထွက်လာကြသည်။

"ဖောက်... ဖောက်... ဖောက်"

ကြောက်မက်ဖွယ်ကောင်းသော နွယ်ပင်များက ကျင်းရှီရုံ၏ ခန္ဓာကိုယ်ထဲသို့ တိုက်ရိုက် စိုက်ဝင်သွားပြီး သူ၏ ခြေလက်လေးဖက်လုံးကို တင်းကြပ်စွာ ဆွဲချည်ထားလိုက်သည်။

တစ်ချိန်တည်းမှာပင် မိုးမြေနတ်ညောင်ပင်က ကျင်းရှီရုံ၏ ခန္ဓာကိုယ်တွင်းရှိ အသက်ဓာတ်များကို ရူးသွပ်စွာ စုပ်ယူနေတော့သည်။

စိတ်စွမ်းအင်များကိုပါ မချန် တစ်ပါတည်း စုပ်ယူနေခြင်းပင်။

ဤတစ်ကြိမ်တွင်မူ ကျင်းရှီရုံ တစ်ယောက် ချက်ချင်း ပြာယာခတ် ထိတ်လန့်သွားတော့သည်။

သူ၏ အသက်စွမ်းအင်များ ယိုစိမ့်ထွက်ခွာသွားနေသည်ကို သူ တကယ်ကို ခံစားလိုက်ရသည်။

သူ၏ ပြန်လည်ကုသခြင်း အစွမ်းက ခန္ဓာကိုယ်ကို အဆက်မပြတ် ကုသပေးနေသည့်တိုင် တစ်ဖက်လူ၏ စုပ်ယူသည့်နှုန်းကို လုံးဝ မမီနိုင်တော့ပေ။

"ထွက်သွား... ငါ့အနားက ထွက်သွား"

ကျင်းရှီရုံက အဆက်မပြတ် ဟိန်းဟောက်နေပြီး ဟင်းလင်းပြင် အက်ကွဲကြောင်းများ အဆက်မပြတ် ထွက်ပေါ်လာသည်။

"ဝှစ်" ဟူသော အသံများ ထွက်ပေါ်လာပြီး ဟင်းလင်းပြင် အက်ကွဲကြောင်းများက မိုးမြေနတ်ညောင်ပင်၏ နွယ်ပင်များကို ချက်ချင်း ခုတ်ပိုင်းပစ်လိုက်သည်။

သို့သော် ယခုအချိန်တွင် လင်းယွမ်က သူ၏ စိတ်စွမ်းအင်များကို စုစည်းပြီးနေပြီ ဖြစ်သည်။

အားကောင်းလှသော စိတ်စွမ်းအင်များက မရေမတွက်နိုင်သော ကြိုးမျှင်များအဖြစ် ပြောင်းလဲသွားပြီး ကျင်းရှီရုံထံသို့ အပြင်းအထန် စိုက်ဝင်သွားတော့သည်။

ကြီးမားသော အန္တရာယ်ကြီး ဆိုက်ရောက်လာပြီဖြစ်ကြောင်း ကျင်းရှီရုံ ချက်ချင်း ခံစားလိုက်ရသည်။

သူ၏ သူငယ်အိမ်များ ကျဉ်းမြောင်းသွားသည့် မျက်တောင်တစ်ခတ်အတွင်း နေရာရွှေ့ပြောင်းခြင်း အခြေအနေသို့ အလျင်အမြန် ဝင်ရောက်လိုက်သည်။

သူ၏ ခန္ဓာကိုယ်က နေရာရွှေ့ပြောင်း ထွက်ပြေးရန် အမြန် ပြင်လိုက်၏။

သို့သော် နောက်တစ်ခဏတွင် သူ၏ ခန္ဓာကိုယ်က လင်းယွမ်၏ အရှေ့သို့ ရုတ်တရက် ရောက်ရှိလာသည်ကို တွေ့လိုက်ရသည်။

သူသည် နေရာရွှေ့ပြောင်း ထွက်ပြေးသွားနိုင်ခြင်း မရှိသည့်အပြင် လင်းယွမ်နှင့် ပိုမိုနီးကပ်သော နေရာသို့ တည့်တည့်ကြီး ပြေးလာခဲ့မိသလို ဖြစ်သွားသည်။

ထိုအချိန်လေးအတွင်း ကျင်းရှီရုံကိုယ်တိုင်ပင် ဘာဖြစ်သွားမှန်း မသိလိုက်ပေ။

လင်းယွမ်၏ ဧရာမ ခြေသည်းကြီးများက ကျင်းရှီရုံ မူလကိုယ်ထည်၏ ဦးခေါင်းထက်သို့ ဖိချလိုက်ပြီး ဖြစ်သည်။

မရေမတွက်နိုင်သော ရုပ်သေးကြိုးမျှင်များက သူ၏ ဦးနှောက်ထဲသို့ ချက်ချင်း တိုးဝင်သွားလေတော့သည်။

ဤအခိုက်အတန့်တွင် ကျင်းရှီရုံ တစ်ကိုယ်လုံး တုန်ယင်သွား၏။

သူက စိတ်စွမ်းအင်များကို အဆက်မပြတ် လှုံ့ဆော်ကာ စိတ်ပင်လယ်ထဲတွင် အကာအကွယ်ဒိုင်းတစ်ခု ဖန်တီးလိုက်သည်။

၎င်းမှာ သူ အရင်က ပုံတူကူးချထားခဲ့သော စိတ်စွမ်းအင် ကာကွယ်ရေး သန္ဓေပြောင်းအစွမ်း တစ်မျိုးပင် ဖြစ်သည်။

သို့သော် သူ၏ စိတ်စွမ်းအင်က မူလကတည်းက လင်းယွမ်ကို မယှဉ်နိုင်ရာ စိတ်စွမ်းအင် ကာကွယ်ရေး အစွမ်းရှိနေသည့်တိုင် လုံးဝ အသုံးမဝင်ခဲ့ပေ။

သို့သော် လင်းယွမ်ကို မယှဉ်နိုင်တော့သည်ကို မြင်လိုက်ရသောအခါ ကျင်းရှီရုံက ရုတ်တရက် လက်တစ်ချက် ဝှေ့ယမ်းလိုက်သည်။

လက်စွပ်ထဲမှ လူရိပ်တစ်ခုက ချက်ချင်း ပစ်ထွက်လာ၏။

ထိုလူရိပ်မှာ လေထဲတွင် ရှိနေစဉ်မှာပင် ထူးဆန်းသော သန္ဓေပြောင်း သတ္တဝါတစ်ကောင် အဖြစ် ချက်ချင်း ပြောင်းလဲသွားသည်။

ထို့နောက် ထိုသန္ဓေပြောင်း သတ္တဝါက နားပိတ်ချိန်ပင် မရလိုက်လောက်အောင် မြန်ဆန်သော အလျင်ဖြင့် လင်းယွမ်၏ ခန္ဓာကိုယ်ဆီသို့ ရုတ်တရက် တိုးဝင်လာခဲ့သည်။

ဤသန္ဓေပြောင်း သတ္တဝါက သာမန် သန္ဓေပြောင်း သတ္တဝါများနှင့် မတူဘဲ ၎င်း၏ အရွယ်အစားမှာ အလွန် သေးငယ်လှသည်။

လင်းယွမ်၏ အမွေးအမှင် တစ်ချောင်းစာလောက်ပင် မထူပေ။

ယခုအချိန်တွင် ၎င်းက တိုးခနဲ အသံနှင့်အတူ လင်းယွမ်၏ နှာခေါင်းပေါက်ထဲသို့ပင် တွားသွား ဝင်ရောက်သွားလေသည်။

လင်းယွမ်လည်း ထိတ်လန့်သွားပြီး ကျင်းရှီရုံကို ရုပ်သေးကြိုးမျှင်များဖြင့် ထိန်းချုပ်ရန်ပင် အချိန်မရတော့ဘဲ ရုပ်သေးကြိုးမျှင် အားလုံးကို ချက်ချင်း နောက်လှည့်ကာ ထိုသန္ဓေပြောင်း သတ္တဝါဆီသို့ စိုက်ဝင်စေလိုက်သည်။

"ကျွီ... ကျွီ... ကျွီ"

သံကြိုးမျှင်ကောင်နှင့် တူသော ထိုထူးဆန်းသည့် သန္ဓေပြောင်း သတ္တဝါမှာ ချက်ချင်းပင် စူးစူးဝါးဝါး အော်ဟစ်ကာ ညည်းတွားသံများ ထွက်ပေါ်လာသည်။

အသက်ရှူကြိမ် အနည်းငယ် အကြာတွင်တော့ ၎င်းမှာ တောင့်တင်းသွားပြီး မလှုပ်ရှားနိုင်တော့ပေ။

ကျင်းရှီရုံက မည်သို့ပင် လှုံ့ဆော်စေကာမူ ၎င်းမှာ လုံးဝ လှုပ်ရှားနိုင်ခြင်း မရှိတော့ပေ။

၎င်းမှာ ကျင်းရှီရုံ၏ သားရဲထိန်းချုပ်အစွမ်းမှ သားရဲဖြစ်ကြောင်း လင်းယွမ် ချက်ချင်း နားလည်သွားသည်။

ကျင်းရှီရုံ၌ သားရဲထိန်းချုပ်အစွမ်း လည်း ရှိနေသေးခြင်းပင်။

ဤအချိန်တွင် ကျင်းရှီရုံ၏ နောက်ဆုံးလက်နက် တိုက်ကွက်ကြောင့် နောက်ဆုံးတွင် အသက်ရှူချောင်သွားမည့် အခွင့်အရေးကို ရရှိသွားခဲ့သည်။

သူက ရွှေခေါင်းဆောင်းကြီးကို ယူ၍ သူ၏ ခေါင်းပေါ်တွင် အလျင်အမြန် စွပ်ချလိုက်သည်။

ဧရာမ မျိုးရိုးဗီဇ ပုံစံအောက်တွင် သူ၏ ဦးခေါင်းမှာ အလျားရော အနံပါ (၂၃) ပေ မှ (၂၆) ပေခန့်အထိ ရှိနေသည်။

ဤမျှ ကြီးမားလှသော ခေါင်းဆောင်းကြီးကို ပြုလုပ်ရန် ရွှေမည်မျှ အသုံးပြုထားရမည်ကို တွေးကြည့်ရုံဖြင့် သိနိုင်သည်။

လင်းယွမ်က လေကို ပြင်းပြင်းတစ်ချက် ရှူသွင်းလိုက်ပြီး ယခုအချိန်တွင် ထိုသားရဲကို ဖမ်းဆုပ်ထားကာ ကျင်းရှီရုံကို စိုက်ကြည့်နေ၏။

သူ ထပ်မံ စမ်းသပ်ကြည့်လိုက်ရာ စိတ်စွမ်းအင်များက ကျင်းရှီရုံ၏ ဦးခေါင်းနှင့် ထိတွေ့သွားသည်နှင့် တစ်ပြိုင်နက် ရွှေခေါင်းဆောင်းကြီး၏ အားပျော့သွားအောင် လျှော့ချခြင်းကို ချက်ချင်း ခံလိုက်ရသည်။

ကျင်းရှီရုံထက် ပိုမို အားကောင်းသော သူ၏ စိတ်စွမ်းအင်မှာ တစ်ဖက်လူနှင့် တန်းတူအဆင့်အထိ ချက်ချင်း လျော့ကျသွားလေတော့သည်။

ထိုသို့ဖြစ်သွားရာ ကျင်းရှီရုံ၏ တစ်ခုတည်းသော အားနည်းချက်မှာလည်း ပျောက်ကွယ်သွားခဲ့ပြီ ဖြစ်သည်။

ကျင်းရှီရုံတွင် နောက်ဆုံးလက်နက်များ များပြားလွန်းပြီး သတ်ဖြတ်ရန် အလွန် ခက်ခဲလွန်းလှသည်ဟုသာ ဆိုရမည် ဖြစ်သည်။

ကျင်းရှီရုံသည်လည်း ယခုအချိန်တွင် ကြောက်ရွံ့တုန်လှုပ်နေဆဲဖြစ်ကာ လင်းယွမ်ကို စိုက်ကြည့်နေသည်။

သူ စက္ကန့်အနည်းငယ်ခန့် မောဟိုက်စွာ အသက်ရှူလိုက်ပြီး ခန္ဓာကိုယ်ရှိ ဒဏ်ရာများ အတော်လေး သက်သာသွားသည့် အချိန်ရောက်မှသာ ပြောလိုက်သည်။ "ငါ မင်းကို အထင်သေးမိသွားတာပဲ... လင်း ဆိုတဲ့ကောင်... မင်း တကယ်ကို ငါ့ကို ရှာတွေ့နိုင်ပြီး ဒီလောက် အစွမ်းရှိနေလိမ့်မယ်လို့ မထင်ထားမိဘူး"

"ဒါပေမဲ့ မင်း ဒီနေ့ ငါ့ကို သတ်ချင်တယ်ဆိုရင်တော့... မဖြစ်နိုင်တော့ဘူး"

"မင်းရဲ့ စိတ်စွမ်းအင်က ငါ့ထက် ပိုအားကောင်းတယ်ဆိုပေမဲ့ အားကောင်းတာကလည်း အတိုင်းအတာ တစ်ခုအထိပဲ ရှိမှာပေါ့"

"ရွှေခေါင်းဆောင်းကြီးရဲ့ အကာအကွယ်နဲ့ဆိုရင် ငါ့ရဲ့ တစ်ခုတည်းသော အားနည်းချက်က မရှိတော့ဘူး"

"အခု... ငါ့အလှည့်ပဲ"

စကားသံအဆုံးတွင် သူ ချက်ချင်း ပျောက်ကွယ်သွားလေတော့သည်။

ဆက်ရန်...