အခန်း ၈၉၅

အပိုင်း(၈၉၅) ဝူမုန့်၏ မျိုးရိုးဗီဇသဏ္ဌာန်

လီထင်း စကားပြောပြီးသည်နှင့် ဘေးနားရှိ လျှိုရှီဆန်းက မနေနိုင်ဘဲ သတိပေးလိုက်သည်။ "လီရှောင်ကျွင်း... သတိထား... ဒီဝူမုန့်က သာမန်မဟုတ်ဘူး"

ထိုစကားကိုကြားသော် လီထင်းက ရေခူလက်တံများကို ဝှေ့ယမ်းရင်း ပြောလိုက်သည်။ "သာမန်မဟုတ်ဘူး ဟုတ်လား... သူက ကျင်းရှီရုံထက်တောင် ပိုပြီး ကိုင်တွယ်ရခက်နေလို့လား"

"ငါတို့နှစ်ယောက်ပေါင်း တိုက်ရင်တောင် သူ့ကို ရှုံးဦးမယ်လို့ မင်းထင်နေတာလား"

"ချမယ်"

သူမက အော်ဟစ်လိုက်ပြီး အရင်ဆုံး စတင်တိုက်ခိုက်လိုက်သည်။

ပုံသဏ္ဌာန်မဲ့သော စိတ်စွမ်းအင်များသည် မျက်စိတစ်မှိတ်အတွင်း ထိတ်လန့်ဖွယ်ရာ စိတ်အဝေးထိန်းအစွမ်းအဖြစ် ပြောင်းလဲသွားပြီး ဝူမုန့်ဆီသို့ ရူးသွပ်စွာ ဖိနှိပ်ဝင်ရောက်သွားလေသည်။

ဝူမုန့်၏ မျက်လုံးများ နက်ရှိုင်းသွားသည်။ သူက ရှေ့သို့ တစ်လှမ်းတိုးလိုက်ပြီး လေဟာနယ်ထဲတွင် ရပ်တန့်ကာ တစ်ကိုယ်လုံးမှ သွေးမြူခိုးများ အူထွက်လာပြီးနောက် ခန္ဓာကိုယ်ကြီးက လျင်မြန်စွာ ကြီးထွားလာတော့သည်။

"လူကောင်းပုံပေါက်နေရင် လူတွေ အနိုင်ကျင့်ကြတယ်ဆိုတာ တကယ်ပဲ... ငါ့အစွမ်းကို မပြရင် မင်းတို့က ငါ့ကို အလွယ်လေး အနိုင်ယူလို့ရမယ် ထင်နေကြတာလား"

ခက်ထန်သော ဒေါသတကြီး အော်ဟစ်သံနှင့်အတူ ဝူမုန့်၏ ခန္ဓာကိုယ်ကြီးမှာ အဆက်မပြတ် ကြီးထွားလာပြီး မျက်တောင်တစ်ခတ်အတွင်း ထူးဆန်းသော လူပုံစံ သတ္တဝါကြီးအဖြစ် ပြောင်းလဲသွားလေသည်။

ထိုလူပုံစံ သတ္တဝါကြီးသည် တုတ်ခိုင်သော ခြေလက်များရှိပြီး လေထဲတွင် မတ်တတ်ရပ်နေသည်။ တစ်ကိုယ်လုံးတွင် ကြွက်သားများ အဖုအထစ် ထနေပြီး အပြင်ဘက်၌ အရိုးချပ်ဝတ်တန်ဆာများ ထွက်ပေါ်လာသည်။ ကြီးမားတုတ်ခိုင်သော လက်နှစ်ဖက်တွင် ချွန်ထက်သော လက်သည်းများ ရှိနေပြီး သံကြိုးကဲ့သို့ လေးလံသော အမြီးကြီးမှာ အနက်ရောင်အလင်းတန်းများ ဖြာထွက်နေ၏။

၎င်း၏ ဦးခေါင်းပိုင်းသည် ကြောက်မက်ဖွယ်ကောင်းသော အရိုးခမောက်ကြီးအလား ဖြစ်နေပြီး အရေပြားနှင့် အသားများကို သိပ်မတွေ့ရတော့ဘဲ မျက်နှာပေါ်တွင် ဧရာမ သတ္တုမျက်နှာဖုံးကြီးတစ်ခု စွပ်ထားသကဲ့သို့ ဖြစ်နေသည်။

ဤအရာက သူ၏ မျိုးရိုးဗီဇသဏ္ဌာန် ဖြစ်သော "သတ်ဖြတ်ခြင်းစစ်သည်တော်" ပင်တည်း။

ဤကမ္ဘာဂြိုဟ်၏ ဇီဝမျိုးစိတ်များနှင့် လုံးဝမတူညီသော သဏ္ဌာန်က ၎င်း၏ အစွမ်းထက်သော စစ်ပွဲစက်ရုပ်ကြီးတစ်ခု၏ ပုံရိပ်ကို ထုတ်ဖော်ပြသနေသည်။

ဖျက်ဆီး၍မရနိုင်လောက်အောင် မာကျောသော အရိုးချပ်ဝတ်တန်ဆာ အလွှာက သူ့ကို ထိတ်လန့်ဖွယ်ရာ အကာအကွယ် စွမ်းအားများ ပေးစွမ်းနေလိမ့်မည်။

ချွန်ထက်သော အရိုးလက်သည်းများက သူ၏ လက်နှစ်ဖက်ကို ထက်မြက်သော လက်နက်များအဖြစ် ပြောင်းလဲပေးထားသည်။

သတ္တုနှင့်တူသော ဦးခေါင်းပိုင်းရှိ ပြင်ပအရိုးတည်ဆောက်ပုံကလည်း သူ့ကို ကြီးမားသော ကိုယ်ပိုင်ကာကွယ်ရေးစွမ်းအား ပိုင်ဆိုင်စေသည်။

ဤသဏ္ဌာန်နှင့် သူသည် မွေးရာပါ သတ်ဖြတ်ခြင်းအတွက် ဖြစ်တည်လာသူဟုပင် ဆိုနိုင်ပေသည်။

အလွန်စွမ်းအားကြီးမားသော ပြန်လည်ကုသနိုင်စွမ်းရှိသည့် "သွေးသားကြီးထွားခြင်းအစွမ်း" မှသည် ယခု "သတ်ဖြတ်ခြင်းစစ်သည်တော်" သဏ္ဌာန်အထိပင် ဖြစ်သည်။

ဤအရာများက ဝူမုန့်၏ စိတ်နှလုံးထဲတွင် အလိုချင်ဆုံးသော ဆင့်ကဲပြောင်းလဲမှု လမ်းကြောင်းကို သက်သေပြနေပေသည်။

တိုက်ခိုက်မည်။ တိုက်ခိုက်မည်။ တိုက်ခိုက်မည်။

ဤအရာသည် သူ အမြဲတမ်း တောင့်တခဲ့သော စွမ်းအားပင် ဖြစ်၏။

"ဝုန်း"

ပုံသဏ္ဌာန်မဲ့သော စိတ်စွမ်းအင်များက သူ၏ ရှေ့မှောက်သို့ ချက်ချင်း ရိုက်ခတ်လာသည်။

သို့သော် ထင်မှတ်မထားသည်မှာ ဝူမုန့်က မည်သည့် ကာကွယ်မှုမျိုးမှ မလုပ်ခြင်းပင် ဖြစ်သည်။

သူလုပ်ခဲ့သော တစ်ခုတည်းသောအရာမှာ အရိုးများဖုံးလွှမ်းနေသော မျက်နှာပေါ်သို့ ရွှေရောင်မျက်နှာဖုံးတစ်ခုကို တပ်ဆင်လိုက်ခြင်းပင်။

ယခုအချိန်တွင် သူ၏ ခန္ဓာကိုယ် အရွယ်အစားမှာ အမြင့် ပေ ၂၀၀ ခန့်အထိ ရှိနေကြောင်း သိထားရပေမည်။

သူ၏ ဦးခေါင်းကြီးသက်သက်ပင် ၃ ပေကျော် မြင့်မားနေရာ ထိုမျက်နှာဖုံးသည်လည်း ၃ ပေကျော်ခန့် ကြီးမားနေရပေမည်။

ကြယ်တံခွန်ကျွန်းကိုသာ မပိုင်စိုးထားပါက ဤကဲ့သို့သော မျက်နှာဖုံးတစ်ခု ဖန်တီးရန် ဤမျှများပြားသော ရွှေများကို သူ ဘယ်သောအခါမှ စုဆောင်းနိုင်မည် မဟုတ်ပေ။

ရွှေရောင်မျက်နှာဖုံးကို တပ်ဆင်လိုက်သည်နှင့် တစ်ဖက်မှ လီထင်း၏ စိတ်စွမ်းအင် တိုက်ခိုက်မှုများသည် သာမန် စိတ်အဝေးထိန်း တိုက်ခိုက်မှုအဆင့်သာ ဖြစ်သွားတော့သည်။

သူ၏ စိတ်ပင်လယ်ထဲသို့ ကျူးကျော်ဝင်ရောက်နိုင်ခြင်း မရှိတော့ဘဲ သူ့အပေါ် စိတ်စွမ်းအင်ဖြင့် ဖိနှိပ်နိုင်စွမ်းလည်း ကင်းမဲ့သွားလေသည်။

ထို့အပြင် မျိုးရိုးဗီဇ ပြန်လည်ဖွဲ့စည်းခြင်း ၅၀% သာရှိသော လီထင်းအနေဖြင့် ၆၀% အထိ ရောက်ရှိနေပြီဖြစ်သော ဝူမုန့်ကို စိတ်အဝေးထိန်းအစွမ်းဖြင့် ထိခိုက်စေရန်ဆိုသည်မှာ လုံးဝ မဖြစ်နိုင်သလောက်ပင်။

ထိုအချိန်တွင် ဝူမုန့်က လေဟာနယ်ကို အားကုန် ဆောင့်နင်းလိုက်သည်ကို တွေ့လိုက်ရ၏။

"ဝှစ်"

မျက်စိတစ်မှိတ်အတွင်း လေဟာနယ်ထဲတွင် လှိုင်းဂယက်များ ပေါက်ကွဲထွက်လာပြီး သူ၏ ခန္ဓာကိုယ်မှာ အရိပ်တစ်ခုသဖွယ် ချက်ချင်း ပျောက်ကွယ်သွားလေသည်။

ငိုကြွေးသံကဲ့သို့ ကျယ်လောင်သော ပေါက်ကွဲသံကြီး ထွက်ပေါ်လာပြီး လီထင်း၏ ခေါင်းထက်တွင် အရိပ်တစ်ခု ချက်ချင်း ပေါ်လာသည်။

ထိုနောက် ချက်ချင်းပင် ချွန်ထက်သော လက်သည်းငါးချောင်းက လီထင်း၏ ရေခူခေါင်းဆီသို့ ပြင်းထန်စွာ စိုက်ဝင်လာတော့သည်။

လီထင်းက ထိတ်လန့်ဒေါသထွက်စွာ အော်လိုက်သည်။ "ဒီလောက်တောင် မြန်တာလား"

ဘေးပတ်လည်တွင် လွင့်မျောနေသော လက်တံများက အလျင်အမြန် ရိုက်ချလာကြသည်။

"ဘုန်း... ဘုန်း... ဘုန်း"

တစ်ချက် ထိခတ်မိရုံဖြင့် ဝူမုန့်၏ လက်သည်းများထံမှ ထိတ်လန့်ဖွယ်ရာ ခွန်အားများ ပေါက်ကွဲထွက်လာပြီး ထိုလက်တံများကို ချက်ချင်း ဆွဲဖြဲချေမွပစ်လိုက်သည်။

လေထဲရှိ စိတ်စွမ်းအင်များ စုစည်းထားသော စိတ်အဝေးထိန်းအစွမ်းကလည်း သူ၏ လှုပ်ရှားမှုကို အနည်းငယ်သာ နှေးကွေးသွားစေနိုင်၏။

သို့သော် သူက အတင်းအဓမ္မ ရုန်းထွက်လိုက်ပြီး လီထင်း၏ ဧရာမ ခန္ဓာကိုယ်ကြီးကို ခြေထောက်ဖြင့် အားကုန် ကန်ချလိုက်လေသည်။

"ဝုန်း"

လီထင်းမှာ ထိန်းချုပ်မရဘဲ နောက်သို့ လွင့်စင်သွားသည်။ ထိုအချိန်မှာပင် ဒိုင်းလွှားနှင့် သံတူကို ကိုင်ဆောင်ထားသော လျှိုရှီဆန်းကလည်း ဝင်ရောက် တိုက်ခိုက်လာ၏။

သူက ဝူမုန့်ရှေ့သို့ ခုန်အုပ်လာပြီး လက်ကိုမြှောက်ကာ သံတူကြီးဖြင့် အားကုန် ထုချလိုက်သည်။

သူသည် ခွန်အားအမျိုးအစား အစွမ်းပိုင်ရှင်တစ်ဦး ဖြစ်ပြီး ထိပ်တိုက် အနီးကပ် သတ်ဖြတ်ရခြင်းကို အနှစ်သက်ဆုံး ဖြစ်သည်။

သို့သော် တိုက်ခိုက်ရေးကို ရူးသွပ်သူ တစ်ယောက်အနေဖြင့် ဝူမုန့်ကလည်း ဤကဲ့သို့ သတ်ဖြတ်ရသည့် နည်းလမ်းကို အလွန် နှစ်သက်ပေသည်။

ဝူမုန့်က ရှောင်တိမ်းရန် အရိပ်အယောင်ပင် မပြဘဲ ဧရာမ ခန္ဓာကိုယ်ကြီးကို ရုတ်တရက် လှည့်လိုက်သည်။ လက်မောင်းနှစ်ဖက်ရှိ ပြင်ပအရိုးများထံမှ အသံများ ထွက်ပေါ်လာပြီး လက်ဖျံမှ ထူထဲသော အရိုးနှစ်ချပ်က ချက်ချင်း ပွင့်ထွက်လာသည်။

ထိုသို့ဖြင့် သူ၏ လက်ဖျံသည် အသေးစား အရိုးဒိုင်းလွှား တစ်ခုအလား ဖြစ်သွားတော့သည်။

သူက ဘယ်ဘက်လက်မောင်းကို မြှောက်ကာ သံတူကို ကာကွယ်လိုက်သည်ကို တွေ့လိုက်ရ၏။

"ဝုန်း"

ကြီးမားသော ခွန်အားများ ပွတ်တိုက်မိမှုကြောင့် ဝူမုန့်၏ ခန္ဓာကိုယ်မှာ ယိုင်နဲ့သွားပြီး နောက်သို့ ဆုတ်သွားရသည်။

တစ်ဖက်ရှိ လျှိုရှီဆန်းမှာမူ မတုန်မလှုပ် ရပ်နေနိုင်၏။

ခွန်အားပိုင်းတွင် လျှိုရှီဆန်းက အသာစီး ရနေဆဲပင် ဖြစ်သည်။

သို့သော် လျှိုရှီဆန်း ထပ်မံ လိုက်လံတိုက်ခိုက်ရန် မစောင့်နိုင်မီမှာပင် ကျောဘက်မှ လေပြင်းများ တိုက်ခတ်လာပြီး ထိတ်လန့်ဖွယ်ရာ လေခွဲသံကြီး ထွက်ပေါ်လာသည်။

လျှိုရှီဆန်းက အလျင်အမြန် ဘေးသို့ ရှောင်တိမ်းလိုက်ပြီး ဘယ်ဘက်လက်ရှိ ဧရာမ ဒိုင်းလွှားကြီးကို သူ့ရှေ့တွင် ချက်ချင်း ကာကွယ်လိုက်သည်။

"ဘုန်း"

ထိတ်လန့်ဖွယ်ရာ ပြင်းထန်သော ရိုက်ချက်ကြီးတစ်ခုက ဒိုင်းလွှားပေါ်သို့ ကျရောက်လာသည်။

လျှိုရှီဆန်းက အားကုန် တွန်းကန်လိုက်ပြီး ဒိုင်းလွှားကို ဖယ်ရှားလိုက်သည်။

သူ့ကို တိုက်ခိုက်လာသည်မှာ မည်သည့်အရာဖြစ်ကြောင်း သေချာမစစ်ဆေးရသေးမီမှာပင် သူ့မျက်နှာဆီသို့ ခုန်အုပ်လာသော ချွန်ထက်သည့် လက်သည်းနှစ်ဖက်ကို တွေ့လိုက်ရလေသည်။

သူ ချက်ချင်း အလွန်အမင်း အံ့သြသွားသည်။ "ဘယ်လိုလုပ် ဒီလောက်မြန်ရတာလဲ"

ဝူမုန့်က သူ၏ ရှေ့မှောက်သို့ ရောက်ရှိနေပြီ ဖြစ်၏။

"ထန်... ထန်... ထန်"

သူတို့နှစ်ဦး လျင်မြန်စွာ ယှဉ်ပြိုင်တိုက်ခိုက်ကြရာ လက်နက်များ ထိခတ်သံများက နားထဲတွင် မပြတ် ထွက်ပေါ်နေသည်။

ရုတ်တရက် လျှိုရှီဆန်း၏ ဘယ်ဘက်ခြေထောက်ကို တစ်စုံတစ်ခုက ဖမ်းဆုပ်လိုက်သလို ခံစားလိုက်ရသည်။

သူ ငုံ့ကြည့်လိုက်သောအခါ ရင်ထဲတွင် ချက်ချင်း ထိတ်လန့်သွားတော့သည်။

နက်မှောင်နေသော အမြီးကြီးတစ်ခုက သူ၏ ဘယ်ဘက်ခြေထောက်ကို ရစ်ပတ်ထားသည်ကို တွေ့လိုက်ရသောကြောင့်ပင်။

ထိုအမြီးကြီးက အားကုန် ဆွဲချလိုက်သည်နှင့် တစ်ပြိုင်နက် သူ ချက်ချင်း ဟန်ချက်ပျက်သွားပြီး ခန္ဓာကိုယ်မှာ ယိုင်နဲ့သွားလေသည်။

ထိုအချိန်မှာပင် ဝူမုန့်၏ ချွန်ထက်သော လက်သည်းများက သူ၏ လည်ပင်းကို ချက်ချင်း လည်ဆွဲသိုင်းဖက်လိုက်တော့သည်။

နောက်တစ်ခဏတွင် သူတစ်ကိုယ်လုံးကို ဝူမုန့်က အပေါ်သို့ ဆွဲမလိုက်လေသည်။

"ဘာလို့ ငါ့ကို အတင်းဖိအားပေးနေကြတာလဲ"

"မင်းတို့လောက်နဲ့များ ငါ့ကို တားထားနိုင်မယ်လို့ တကယ်ပဲ ထင်နေကြတာလား"

"ငါသာ လင်းယွမ်ကို သွားတွေ့ချင်ရင် စောစောကတည်းက သွားတွေ့ပြီးပြီ"

"ငါ နောက်တစ်ခေါက် ထပ်ပြောမယ်... ငါ့ရှေ့ကထွက်သွားကြ"

"ဘုန်း"

သူက လျှိုရှီဆန်း၏ ခေါင်းကို လက်သီးဖြင့် တစ်ချက် ထိုးချလိုက်သည်။

ကြီးမားလှသော ခွန်အားကြောင့် လျှိုရှီဆန်းမှာ ချက်ချင်း သတိလစ်သွားတော့သည်။

အခြားတစ်ဖက်ရှိ လီထင်းမှာလည်း အလွန်အမင်း အံ့သြတုန်လှုပ်သွားပြီး အသက်ပြင်းပြင်း ရှူကာ သူ့ကို စူးစိုက်ကြည့်နေ၏။

သို့သော် ဝူမုန့်က သူမကို ဂရုမစိုက်ပေ။ အကြောင်းမှာ ဤမိန်းမသည် စိတ်စွမ်းအင် အစွမ်းပိုင်ရှင် ဖြစ်သော်လည်း မျိုးရိုးဗီဇ ပြန်လည်ဖွဲ့စည်းခြင်း ၅၀% သာရှိသဖြင့် သူ့ကို လုံးဝ ထိခိုက်အောင် မလုပ်နိုင်သောကြောင့်ပင်။

ထို့ကြောင့် သူ၏ အကြည့်များက မလှမ်းမကမ်းတွင် ဟုန်လိန်နှင့် လင်းချိုးယွဲ့တို့၏ ပြင်းထန်စွာ ဖိနှိပ်ခြင်းကို ခံထားရပြီဖြစ်သော ရှီလျန်ဟိုင်ထံသို့ ရောက်ရှိသွားသည်။

ယခုအချိန်တွင် ရှီလျန်ဟိုင်က အဆက်မပြတ် ဒေါသတကြီး အော်ဟစ်နေသော်လည်း လင်းချိုးယွဲ့၏ ရေတွက်၍မရနိုင်သော နွယ်ပင်များ၏ ရစ်ပတ်မှုမှ လုံးဝ ရုန်းထွက်နိုင်ခြင်း မရှိပေ။

တစ်ချိန်တည်းမှာပင် ဟုန်လိန်၏ လျှပ်စီးကြောင်းများက ရှီလျန်ဟိုင်၏ ခန္ဓာကိုယ်ပေါ်သို့ အဆက်မပြတ် ကျရောက်နေသည်။

သူသည် ကျောက်တုံးခန္ဓာကိုယ် ရှိနေလျှင်ပင် ဤမျှများပြားသော လျှပ်စီး ပေါက်ကွဲမှုများမှ ထွက်ပေါ်လာသည့် ထိတ်လန့်ဖွယ်ရာ ရိုက်ခတ်မှုများကြောင့် ယခုအခါ သူ၏ ခန္ဓာကိုယ်ထက်ဝက်ကျော်မှာ ဖျက်ဆီးခံလိုက်ရပြီ ဖြစ်သည်။

ထိုကျောက်တုံး ခန္ဓာကိုယ်ကြီးမှာ မီးလောင်ကျွမ်းကာ မည်းတူးနေပြီ ဖြစ်၏။

ဝူမုန့်က ဤမြင်ကွင်းကို တွေ့သောအခါ အေးစက်စွာ နှာခေါင်းရှုံ့လိုက်ပြီး ခြေထောက်ကို အားကုန် ဆောင့်နင်းလိုက်သည်။

"ဝှစ်"

သူ အရှိန်ပြင်းပြင်းဖြင့် ပြေးဝင်သွားလေပြီ။

လင်းချိုးယွဲ့က သူ လာနေသည်ကို အာရုံခံမိလိုက်သဖြင့် ဘာမှမပြောတော့ဘဲ စိတ်အာရုံကို အသက်သွင်းလိုက်ရာ နွယ်ပင်များစွာက သူ့ဆီသို့ လျင်မြန်စွာ ပစ်လွှတ်လာတော့သည်။

ဝူမုန့်၏ ခန္ဓာကိုယ်မှာ ရပ်တန့်သွားပြီး လက်သီးကို ရုတ်တရက် ဆုပ်လိုက်သည်။ မျက်စိတစ်မှိတ်အတွင်း သူ၏ လက်မောင်း၊ ပခုံး၊ ကျောနှင့် ပေါင်အပြင်ဘက်တို့မှ ရေတွက်၍မရနိုင်သော အရိုးဓားများ ချက်ချင်း ထွက်ပေါ်လာလေသည်။

သူ၏ ခန္ဓာကိုယ်မှာ အားကုန် လည်ပတ်သွားပြီး ဧရာမ ခန္ဓာကိုယ်ကြီးက အရိုးဓားများစွာကို သယ်ဆောင်လာကာ ထိတ်လန့်ဖွယ်ရာ အသားကြိတ်စက်ကြီးတစ်ခုအလား နွယ်ပင်များဆီသို့ လျင်မြန်စွာ ရစ်ပတ်ဝင်ရောက်သွားသည်ကို တွေ့လိုက်ရ၏။

"ဘုန်း... ဘုန်း... ဘုန်း... ဘုန်း"

သူ့ကို တားဆီးနေသော ထိုနွယ်ပင်များသည် ချက်ချင်း တစ်စစီ ပြတ်တောက်သွားပြီး အဆက်မပြတ် ပေါက်ကွဲထွက်လာကာ ကျိုးပဲ့နေသော သစ်ကိုင်းနှင့် သစ်ရွက်ဆွေးများအဖြစ် ပြောင်းလဲသွားတော့သည်။

သူက မျက်တောင်တစ်ခတ်အတွင်း နွယ်ပင်များကြားသို့ ဖြတ်ဝင်သွားပြီး နွယ်ပင်အားလုံးကို တိုက်ရိုက် ခုတ်ဖြတ်ပစ်လိုက်သည်။

လင်းချိုးယွဲ့မှာ ချက်ချင်း လန့်သွားပြီး နောက်သို့ အမြန်ဆုတ်ကာ ပါးစပ်မှ အော်လိုက်သည်။ "အဘိုးဟုန်"

"လျှပ်စီးကွန်ရက်"

ဟုန်လိန်က ထူးလိုက်ပြီး လက်နှစ်ဖက်ကို အောက်သို့ ပြင်းထန်စွာ ရိုက်ချလိုက်သည်။

မျက်စိတစ်မှိတ်အတွင်း ကောင်းကင်တစ်ခွင် လျှပ်စီးများ ဟိန်းထွက်လာပြီး ဧရာမ လျှပ်စီးကွန်ရက်ကြီးအဖြစ် ပြောင်းလဲကာ ပြင်းထန်စွာ လွှမ်းခြုံကျဆင်းလာလေသည်။

လျှပ်စီးကွန်ရက်ထဲတွင် ရှိနေသော ဝူမုန့်နှင့် ရှီလျန်ဟိုင်တို့က တစ်ပြိုင်နက် ခေါင်းမော့ကြည့်လိုက်ကြသည်။

ရှီလျန်ဟိုင်က ဝူမုန့်ကို တစ်ချက်ကြည့်လိုက်ပြီးနောက် ရုတ်တရက် လှည့်ကာ ထွက်ပြေးတော့သည်။

သူက ဝူမုန့်ကို လုံးဝ ဂရုမစိုက်ဘဲ တိုက်ရိုက် ထွက်ပြေးရန် ကြိုးစားနေခြင်းပင်။

စောစောက သူသည် လင်းချိုးယွဲ့၏ ပိတ်လှောင်မှုကို ခံထားရသော်လည်း ဝူမုန့်နှင့် လီထင်းတို့၏ စကားပြောသံကို ကြားခဲ့ရသည်မှာ ထင်ရှားပေသည်။

ဝူမုန့်က သူ့ကို ကယ်တင်ရန် အစီအစဉ်မရှိကြောင်း သူ သိနေ၏။

ထို့ကြောင့် ယခုအချိန်တွင် သူက အရင်ထွက်ပြေးပြီး ဝူမုန့်ကို ရန်သူများနှင့် ရင်ဆိုင်ရန် ချန်ထားရစ်ကာ သူ၏ အချိန်ဆွဲပေးရန် အသုံးချခြင်းက ပိုကောင်းပေမည်။

ဝူမုန့်က တစ်ချက်သာ ကြည့်လိုက်ပြီး ရှီလျန်ဟိုင်နောက်သို့ လိုက်မသွားပေ။

အကြောင်းမှာ အခြားသူများက လိုက်လံ သတ်ဖြတ်ရန် ထွက်သွားပြီကို သူ၏ မျက်လုံးထောင့်မှ မြင်လိုက်ရသောကြောင့်ပင်။

ရှီလျန်ဟိုင် ဤသို့ ထွက်ပြေးသွားခြင်းက တိုက်ခိုက်မှု တစ်စိတ်တစ်ပိုင်းကို ဆွဲခေါ်သွားသကဲ့သို့ ဖြစ်သွားသည်။

သို့သော် ဤမျှ တိုက်ခိုက်မှု လျော့ကျသွားခြင်းက မလုံလောက်သေးပေ။

ဝူမုန့်က ထိတ်လန့်ဖွယ်ရာ လျှပ်စီးကွန်ရက်ကို လျစ်လျူရှုကာ ရှေ့သို့ တစ်လှမ်း အားကုန် တိုးလိုက်သည်။

"ဝုန်း"

ထိတ်လန့်ဖွယ်ရာ လျှပ်စီးကြောင်းများက သူ၏ ခန္ဓာကိုယ်ပေါ်သို့ ပေါက်ကွဲကျရောက်လာသည်။

မျက်တောင်တစ်ခတ်အတွင်း သူ၏ အရေပြားပေါ်တွင် မီးလောင်ကျွမ်းထားသော အမည်းရောင် ဒဏ်ရာများ ထွက်ပေါ်လာသည်။

သို့သော် သူက မည်သည့် ခံစားချက်မျှ မရှိသကဲ့သို့ ခန္ဓာကိုယ်ပေါ်ရှိ မည်းတူးနေသော နေရာများကို ခပ်ဖွဖွ ပုတ်ခါလိုက်သည်ကို တွေ့လိုက်ရ၏။

ချက်ချင်းပင် ဧရိယာကျယ်ဝန်းလှသော ပြာမည်းများ ကျဆင်းလာပြီး မိုးရေနှင့် ဆေးကြောခံလိုက်ရကာ လုံးဝ သန့်စင်သွားတော့သည်။

စောစောက လျှပ်စီးထိမှန်၍ ကွဲအက်သွားသော ပြင်ပအရိုးများမှာလည်း မျက်စိဖြင့် မြင်တွေ့နိုင်သော အရှိန်နှုန်းဖြင့် လျင်မြန်စွာ ပြန်လည် ကောင်းမွန်လာသည်။

ဤမြင်ကွင်းကို တွေ့သောအခါ ဟုန်လိန်၏ သူငယ်အိမ်များ အနည်းငယ် ကျုံ့သွားတော့သည်။

"ပြန်လည်ကုသနိုင်တဲ့ အစွမ်းလား"

ဝူမုန့်က ဟုန်လိန်ကို ကြည့်ကာ အေးအေးဆေးဆေး ပြောလိုက်သည်။ "လျှပ်စီးဓာတ်က တကယ်ကို အစွမ်းထက်တယ်... ခင်ဗျားရဲ့ မျိုးရိုးဗီဇ ပြန်လည်ဖွဲ့စည်းမှု နှုန်းကလည်း ကျွန်တော့်ထက် မြင့်တယ်... တကယ်ကို အထင်ကြီးစရာပဲ"

"ဒါပေမဲ့ ခင်ဗျား ကျွန်တော့်ကို သတ်လို့မရဘူး... ကျွန်တော့်ကို ချက်ချင်း သုတ်သင်ပစ်နိုင်လောက်တဲ့အထိ ခင်ဗျား မစွမ်းသေးဘူး"

"အဲဒီလို မလုပ်နိုင်သရွေ့တော့ ခင်ဗျား ကျွန်တော့်ကို ဘယ်တော့မှ နိုင်မှာ မဟုတ်ဘူး"

ဟုန်လိန်၏ မျက်နှာအိုကြီး အနည်းငယ် မှုန်ကုပ်သွားပြီး အေးစက်စွာ ပြောလိုက်သည်။ "ဒါဆိုလည်း စမ်းကြည့်ကြတာပေါ့"

လေထဲတွင် သူ၏ ဧရာမ ခန္ဓာကိုယ်ကြီးက လျှပ်စီးများကို ခေါ်ယူလိုက်သည်။

အလွန်ပြင်းထန်သော လျှပ်စီးကြောင်းများ အဆက်မပြတ် စုစည်းသိပ်သည်းလာပြီး ထိတ်လန့်ဖွယ်ရာ လျှပ်စီးအလင်းတန်းများက လျှပ်စစ်ရည်များအဖြစ်ပင် ပြောင်းလဲလုမတတ် ဖြစ်နေသည်။

ဤမျှ ပြင်းထန်လှသော လျှပ်စီးမုန်တိုင်းကြောင့် ဝူမုန့်ပင်လျှင် မျက်နှာအနည်းငယ် ပျက်သွားရသည်။

သူက တစ်ဖက်လူကို လျှပ်စီးများ ဆက်လက် စုစည်းခွင့် မပြုတော့ဘဲ အပေါ်သို့ ခုန်တက်လိုက်သည်။

"ဝှစ်"

သူက ဟုန်လိန်ထံသို့ အရှိန်ပြင်းပြင်းဖြင့် ချဉ်းကပ်သွားလေသည်။

"ဒိုင်း"

လျှပ်စီးကြောင်းတစ်ခု ကျဆင်းလာပြီး ဝူမုန့်၏ ခန္ဓာကိုယ်ပေါ်သို့ တိုက်ရိုက် ကျရောက်သွားသည်။

ဤအရာက သူ့ကို ရပ်တန့်သွားစေရန် အတင်းအကျပ် လုပ်ဆောင်ခြင်းပင်။

သို့သော် အသုံးမဝင်ခဲ့ပေ။ ဝူမုန့်က လုံးဝ ဂရုမစိုက်ချေ။

ထိုကျဆင်းလာသော လျှပ်စီးက သူ၏ ခန္ဓာကိုယ် အစိတ်အပိုင်း အချို့ကိုသာ မီးလောင်ကျွမ်းစေခဲ့သော်လည်း မျက်တောင်တစ်ခတ်အတွင်း သူ၏ သွေးသားကြီးထွားခြင်းအစွမ်း ဖြစ်သော အဆင့်မြင့် ပြန်လည်ကုသနိုင်စွမ်းကြောင့် လျင်မြန်စွာ ပြန်လည် ကောင်းမွန်လာတော့သည်။

ဝူမုန့်က လက်မောင်းကို တစ်ချက် ဝှေ့ယမ်းလိုက်ရာ မျက်စိတစ်မှိတ်အတွင်း သူ၏ ပြင်ပအရိုးများက အထပ်ထပ် ကြီးထွားလာသည်။

အရိုးကြာပွတ်တစ်ခု ဖြစ်ပေါ်လာသည်။

"ဂျွတ်"

သူက လက်မောင်းကို တစ်ချက် ခါရမ်းလိုက်သည်နှင့် တစ်ပြိုင်နက် အရိုးကြာပွတ်မှာ အသံများ ထွက်ပေါ်လာပြီး ဟုန်လိန်ဆီသို့ ချက်ချင်း ရစ်ပတ်ဝင်ရောက်သွားလေသည်။

ဟုန်လိန်က အေးစက်စွာ နှာခေါင်းရှုံ့လိုက်သည်။

သူ၏ ခန္ဓာကိုယ်မှာ ပေါက်ကွဲထွက်သွားပြီး ရေတွက်၍မရနိုင်သော လျှပ်စီးအလင်းတန်းများအဖြစ် ချက်ချင်း ပြောင်းလဲကာ အရပ်လေးမျက်နှာသို့ လွင့်စင်သွားသည်။

လျှပ်စီးကိုယ်ပျောက်အစွမ်း

ဤအရာက သူ၏ ဒုတိယမြောက် အစွမ်းပင် ဖြစ်သည်။

ကုဋေကုဋာ လျှပ်စီးကွန်ရက်၏ ကြီးမားလှသော တိုက်ခိုက်မှုစွမ်းအားနှင့် နှိုင်းယှဉ်လျှင် ဤအစွမ်းသည်ကား ထွက်ပြေးလွတ်မြောက်ရေး အစွမ်းပင် ဖြစ်ပေသည်။

"ဂျွတ်... ဂျွတ်... ဂျွတ်"

ဝူမုန့်၏ ကြာပွတ်က အဆက်မပြတ် ရိုက်နှက်နေသော်လည်း ဟုန်လိန်၏ အလျင်က မြန်ဆန်လွန်းသဖြင့် လုံးဝ ထိမှန်အောင် မရိုက်နိုင်ပေ။

ထိုမျှ ခဏလေးအတွင်းမှာပင် ဟုန်လိန်က လေထဲတွင် စုစည်းထားသော လျှပ်စစ်ရည်များသည် လက်သီးဆုပ်အရွယ်အစားမှသည် အိမ်တစ်လုံးစာ အရွယ်အစားအထိ ကြီးမားလာလေပြီ။

ဤမျှ ထိတ်လန့်ဖွယ်ကောင်းသော လျှပ်စီးကြောင်းများကို စုစည်းရန် ဟုန်လိန်သည်လည်း အားအင်များစွာ အသုံးပြုခဲ့ရပေသည်။

သူက ထပ်မံ အော်ဟစ်လိုက်သံကို ကြားလိုက်ရ၏။ "ချာတိတ်... ကောင်းကင်နဲ့ မြေကြီးရဲ့ သဘာဝစွမ်းအားကို ငါမင်းကို ပြရသေးတာပေါ့"

"လျှပ်စီးကုဋေကုဋာ"

"ဂျိန်း"

အိမ်တစ်လုံးစာမျှ ကြီးမားသော လျှပ်စစ်ရည်များ စုစည်းထားသည့် လျှပ်စီးအလုံးကြီးက ဟိန်းဟောက်သံကြီးနှင့်အတူ ကျဆင်းလာတော့သည်။

ထိုအလျင်မှာ ဝူမုန့် လုံးဝ တုံ့ပြန်ချိန်မရလိုက်လောက်အောင် မြန်ဆန်လွန်းလှပေသည်။

ဆက်ရန်...