အရှင်သခင်၏ ကျဆုံးခြင်းနှင့် ဘုရင်သစ်၏ ဘိသိက်မင်္ဂလာ (၁)

ရေခဲဂူဗိမာန်ဘေးရှိ သတ်ဖြတ်ခြင်း လေထုသည် မပျယ်လွင့်သေးဘဲ လင်းထျန်းလုံ၏ စကားများသည် ရေခဲပြင်ကြီးထက်တွင် လောင်ကျွမ်းသွားသော မီးရှူးတိုင်တစ်ခုအလား ဖြစ်နေသည်။

“နောက်ထပ် ထိုးစစ်က အဆုံးသတ် ဖြစ်လိမ့်မယ်”

သူ လှည့်လိုက်ပြီး အဓိကအဖွဲ့ဝင်များကို ကြည့်လိုက်သည်။

ယွဲ့ရီ၏ ခရမ်းရောင်မျက်ဝန်းများထဲမှ ဝမ်းနည်းမှုများမှာ ပြတ်သားမှုများအဖြစ် ပြောင်းလဲသွားပြီး သူ၏ဘေးတွင် နီးကပ်စွာ ရပ်နေသည်။

ရန့်မြဲ့က သူ့ပတ်လည်ရှိ ကာကွယ်ရေးရုန်းများ စီးဆင်းမှုကို တိတ်ဆိတ်စွာ ချိန်ညှိနေသည်။

ယင်းဖုန်း၏ ပုံရိပ်သည် အမှောင်ထဲတွင် လင်းလက်နေသည်။ထျန်းပင်းနှင့် သွေးမိစ္ဆာတို့က သူတို့၏ အစွယ်များကို မာန်ဖီလိုက်ကြပြီး မျက်လုံးများတွင် ကလဲ့စားချေလိုသော မီးတောက်များ လောင်ကျွမ်းနေကြသည်။

“ပစ်မှတ်က မိစ္ဆာနဂါးရဲ့ ပြောင်းပြန်ကြေးခွံ အောက်က နယ်နိမိတ် အမှတ်အသား ချိတ်ဆက်တဲ့နေရာပဲ”

လင်းထျန်းလုံသည် ဘယ်ဘက်လက်သည်းဖြင့် ရေခဲပြင်ကို ပြင်းထန်စွာ ထိုးချလိုက်သည်။

“ထိုးစစ်ကို ငါ ဦးဆောင်မယ်၊ ရန့်မြဲ့၊ မင်းရဲ့ နယ်ပယ်က ငါ့လှုပ်ရှားမှုအတွက် အခြေခံပဲ”

“ယွဲ့ရီ ငါ့အတွက် ခဏတာ နေရာလွတ်လေး ဖြစ်လာအောင် ပုံရိပ်ယောင်တွေကို သုံးပေး”

“ယင်းဖုန်း ငါ ကာကွယ်ရေးကို ဆုတ်ဖြဲလိုက်တဲ့ အခိုက်အတန့်မှာ ချိတ်ဆက်တဲ့နေရာကို သေချာချိပ်ပိတ်ပေး”

“ထျန်းပင်းနဲ့ သွေးမိစ္ဆာ မင်းတို့နှစ်ယောက်က မိစ္ဆာနဂါးကို ထိန်းချုပ်ပေး… ငါ့တိုက်ခိုက်မှုကို စွမ်းအားအပြည့်နဲ့ တန်ပြန်မလုပ်နိုင်အောင် တားဆီးထိန်းချုပ်ဖို့ တာဝန်ယူရမယ်”

“နားလည်ပါပြီ”

ခိုင်မာပြတ်သားသော အသံများ ပြိုင်တူထွက်ပေါ်လာသည်။

အဓိကအဖွဲ့ဝင်ခြောက်ဦးသည် အလင်းတန်း ခြောက်ခုအဖြစ် ပြောင်းလဲကာ ထိုအရိုးပလ္လင်ဆီသို့ တစ်ဖန် ခုန်အုပ်သွားကြပြန်သည်။

အပြင်ဘက်ပတ်လည်ရှိ မဟာမိတ် စစ်သည်များသည်လည်း ကောင်းကင်တုန် ဟိန်းဟောက်သံများကို ထုတ်လွှတ်လိုက်ကြပြီး ရေခဲအရိုးစု မိစ္ဆာနဂါးစစ်တပ်ကို ကာကွယ်ရေးမျဉ်း၏ အပြင်ဘက်တွင် ရူးသွပ်စွာ တိုက်ခိုက်ခြင်းဖြင့် ခိုင်မာစွာ ပိတ်ဆို့ထားကြသည်။

မိစ္ဆာနဂါးသည် သူတို့ ပြန်လာမည်ကို ကြိုတင်သိနေပုံရသည်။

၎င်း၏ ကြီးမားလှသော ခန္ဓာကိုယ်သည် ပလ္လင်ပေါ်မှ ထရပ်လိုက်ပြီး ရှေးဟောင်း ရေခဲအကျဉ်းထောင်နယ်ပယ်သည် ပိုမိုလေးလံသော ထိတွေ့ကိုင်တွယ်နိုင်သည့် သံကြိုးတစ်ခုအလား ဖိချလာသည်။

“တောင့်ထား”

ရန့်မြဲ့က ဟိန်းဟောက်လိုက်ရာ သူ၏ ငွေမင်‌ရောင် အမွေးအမျှင်များ ထောင်မတ်သွားသည်။

ထာဝရနှင်းခဲကာကွယ်မှု၏ အပြာရောင်ဖျော့ဖျော့ အလင်းဒိုင်းမှာ အကန့်အသတ်အထိ ကျုံ့ဝင်သွားပြီး ဒိုင်းမျက်နှာပြင်ပေါ်ရှိ ရုန်းများ ရူးသွပ်စွာ လင်းလက်လာ၏။

နယ်ပယ်၏ ဖိနှိပ်ချေမွမှုဒဏ်ကို အသက်လုခုခံရင်း လူတိုင်းအတွက် ခိုဝင်ရန် လုံလောက်သည့် နေရာလွတ်လေးတစ်ခုကို ဖန်တီးပေးထားသည်။

ယွဲ့ရီ၏ လက်သည်းများကြားတွင် ပုံရိပ်ယောင်လကြေးမုံရဲ့ လရောင်သည် တောက်ပစွာ ပေါက်ကွဲထွက်လာသည်။

သူမသည် မိစ္ဆာနဂါးကို တိုက်ခိုက်ရန် မကြိုးစားတော့ဘဲ ၎င်း၏ ဦးခေါင်းပတ်လည်တွင် ဟင်းလင်းပြင် ခေါက်ချိုး ပုံရိပ်‌ယောင်ကို ဖန်တီးပေးလိုက်ပြီး အကွာအဝေးနှင့် တိုက်ခိုက်မှု လမ်းကြောင်းများအပေါ် ၎င်း၏ အာရုံစိုက်မှုကို နှောင့်ယှက်လိုက်သည်။

“ဝူး“

မိစ္ဆာနဂါး ဒေါသထွက်သွားပြီး ၎င်း၏ ဧရာမနဂါးလက်သည်းဖြင့် ဟင်းလင်းပြင်ကို ဆုတ်ဖြဲမည့် အရှိန်အဟုန်ဖြင့် ရိုက်ချလိုက်သည်။

“မင်းရဲ့ ပြိုင်ဘက်က ငါတို့ပဲ”

ထျန်းပင်းနှင့် သွေးမိစ္ဆာတို့သည် ဘယ်နှင့်ညာမှ ပြေးထွက်လာကြသည်။

မိုးကြိုးအကျဉ်းထောင် အရူးနတ်ဘုရား၏ ရွှေအိုရောင်လျှပ်စီးနှင့် သွေးသတ်ဖြတ်ခြင်း ထာဝရခန္ဓာ၏ ဆူပွက်နေသော သွေးရောင် ရောင်ဝါတို့သည် ကြေးနီရောင် မုန်တိုင်းတစ်ခုအဖြစ် ပြောင်းလဲသွားပြီး နဂါးလက်သည်းနှင့် ပြင်းထန်စွာ ဝင်တိုက်မိကြသည်။

“ဝုန်း“

စွမ်းအင်များ ပေါက်ကွဲသွားပြီး ထျန်းပင်းနှင့် သွေးမိစ္ဆာတို့ ပြင်းထန်စွာ ရိုက်ခတ်ခံလိုက်ရကာ တစ်ပြိုင်နက်တည်း နောက်သို့ လွင့်စင်သွားကြသည်။

သူတို့၏ ရွှေအိုရောင်နှင့် အနီရောင်ရင့်ရင့် အမွေးအမျှင်များတွင် သွေးများ စွန်းထင်းသွားပြီး သေလုမတတ် နာကျင်မှုကိုခံစားလိုက်ရသည်။

သူတို့သည် လေထဲတွင် ခန္ဓာကိုယ်များကို အတင်းအဓမ္မ ထိနိးညှိလိုက်ကြပြီး မိစ္ဆာနဂါးကို အသွေးအသားထဲက သတ်ပြစ်ချင်လောက်အောင် စူးရဲသည့်မျက်လုံးများဖြင့် စိုက်ကြည့်လိုက်သည်။

မိစ္ဆာနဂါး၏ အာရုံစိုက်မှုမှာ ဤအကြောက်အရွံ့မရှိသော ရန်စမှုကြောင့် တစ်ခဏမျှ ဆွဲဆောင်ခံလိုက်ရသည်မှာ သေချာသည်။

ဒီအချိန်ပဲ။

လင်းထျန်းလုံ လှုပ်ရှားလိုက်ပြီ။

ဗလာလေပြင်းထွက်ပြေးခြင်းက သူ့ကို ဟင်းလင်းပြင်ကို ဆုတ်ဖြဲမည့် ငွေဖြူရောင် လျှပ်စီးတစ်ခုအဖြစ် ပြောင်းလဲပေးလိုက်ပြီး မိစ္ဆာနဂါး၏ လည်ပင်းဆီသို့ တိုက်ရိုက် ဦးတည်သွားစေသည်။

နက်နဲရေခဲကောင်းကင်ဆုတ်ဖြဲလက်သည်းပေါ်တွင် စုစည်းထားသော အစွန်းရောက် အအေးဒဏ်နှင့် ဟင်းလင်းပြင် ဆုတ်ဖြဲခြင်း စွမ်းအားတို့သည် သူ ဖြတ်သန်းသွားရာ ဟင်းလင်းပြင်တစ်လျှောက် အမည်းရောင် ခြေရာများကို ချန်ထားခဲ့သည်။

မိစ္ဆာနဂါး၏ တုံ့ပြန်မှုမှာ အလွန်မြန်ဆန်လှသည်။

၎င်း၏ အမြီးသည် သံမဏိကြာပွတ်တစ်ခုအလား အမြင်အာရုံထက် ကျော်လွန်သော အမြန်နှုန်းဖြင့် ဝှေ့ယမ်းလာသည်။

“ဝီ“

ရန့်မြဲ့၏ ကာကွယ်ရေးဒိုင်း ပြင်းထန်စွာ တုန်ခါသွားပြီး အမြီး၏ လမ်းကြောင်းကို လမ်းလွှဲပေးလိုက်နိုင်သော်လည်း ဒိုင်း၏ အလင်းရောင်မှာလည်း ထက်ဝက်နီးပါး မှေးမှိန်သွားသည်။

ရန့်မြဲ့သည် တိုးညင်းစွာ ညည်းတွားလိုက်ပြီး နှုတ်ခမ်းထောင့်မှ သွေးအနည်းငယ် ယိုစိမ့်လာသည်။

လင်းထျန်းလုံသည် ထိုအမြီးကို ကျွမ်းကျင်စွာ ရှောင်တိမ်းနိုင်ခဲ့သည်။

သူ၏ ငွေပြာဧကရာဇ်မျက်ဝန်းသည် ပြောင်းလဲပြန်ကြေးခွံ ဧရိယာအပေါ် ပစ်မှတ်ထားသည်။

သူ၏ ညာဘက်လက်သည်းတွင် ပြင်းထန်သော ဝေဒနာများ ရှိနေသော်လည်း ကောင်းကင်ဘုံကိုးထပ် မိုးကြိုးအကျဉ်းထောင်၏ စွမ်းအားကို အတင်းအဓမ္မ စုစည်းခဲ့သည်။

ထို့နောက် သန့်စင်သည့် မိုးကြိုးလှံတစ်စင်းဖြင့် မိစ္ဆာနဂါး၏ မျက်လုံးအိမ်ကို ပစ်ခတ်လိုက်ပြီး ၎င်းကို ကာကွယ်ရန် ဖိအားပေးလိုက်သည်။

မျှော်လင့်ထားသည့်အတိုင်း မိစ္ဆာနဂါးသည် မသိစိတ်မှ မျက်လုံးများကိုမှိတ်ကာ ခေါင်းကို လှည့်လိုက်သဖြင့် ပြောင်းလဲပြန်ကြေးခွံ ဧရိယာမှာ ပိုမိုပွင့်ဟသွားသည်။

“အခုပဲ”

ယွဲ့ရီသည် အော်ဟစ်လိုက်ပြီး ပုံရိပ်ယောင်လကြေးမုံ၏ အလင်းရောင်သည် အမှတ်တစ်ခုတည်းသို့ စုစည်းသွားသည်။

အပ်ဖျားအရွယ်အစားသာရှိသော လရောင် အလင်းတန်းတစ်ခုသည် ထိတွေ့ကိုင်တွယ်နိုင်သည့် မမြင်နိုင်သော ဆူးချွန်တစ်ခုအလား ပြောင်းလဲပြန်ကြေးခွံအောက်ရှိ တိကျသော အမှတ်တစ်ခုသို့ “ထိုးစိုက်” လိုက်သည်။

၎င်းသည် ကြီးမားသော ပျက်စီးမှုကို မဖြစ်စေနိုင်သော်လည်း မိစ္ဆာနဂါး၏ ထိုအပိုင်းရှိ စွမ်းအင်စီးဆင်းမှုတွင် သေးငယ်သော အနှောင့်အယှက်တစ်ခုကို ဖြစ်ပေါ်စေခဲ့သည်။

ယင်းဖုန်း၏ ပုံရိပ်သည် ထိုအနှောင့်အယှက် ဖြစ်ပွားရာ နေရာတည့်တည့်တွင် တစ္ဆေတစ်ကောင်အလား ပေါ်လာသည်။

ဗလာအရိပ်က သူ့ကို ဟင်းလင်းပြင်နှင့် လုံးဝနီးပါး ပေါင်းစပ်သွားစေသည်။

သူ၏ လက်သည်းများဖြင့် လေထုကို ဖိချလိုက်ပြီး အရိပ်တိုက်စားခြင်း၏ စွမ်းအားက ထိုစွမ်းအင်အနှောင့်အယှက် အမှတ်ကို ချက်ချင်း ချိပ်ပိတ်ပေးလိုက်သည်။

ချိတ်ဆက်တဲ့နေရာ ပွင့်သွားပြီ။

မိစ္ဆာနဂါး လုံးဝဒေါသထွက်သွားပြီဖြစ်သည်။ ၎င်း သေစေနိုင်သော ခြိမ်းခြောက်မှုတစ်ခုကို ခံစားလိုက်ရသည်။

၎င်း၏ အကြွင်းမဲ့ အမှောင်ထုရှိ မျက်လုံးအိမ်များအတွင်း နိဗ္ဗာန်နဂါးအသက်ရှူခြင်း၏ အပြာရောင်ရင့်ရင့် အလင်းတန်းများ ရူးသွပ်စွာ စတင်စုစည်းလာသည်။

“မင်း စိတ်ကူးတောင် မယဉ်နဲ့”

လင်းထျန်းလုံ၏ မျက်လုံးများတွင် စူးရှသော အလင်းတန်းတစ်ခု ဖြတ်ပြေးသွားသည်။

သူ ရှေ့တိုးလိုက်ပြီး ဝိညာဉ်ကို တုန်လှုပ်စေသည့် ထိုအသက်ရှူခြင်းဆီသို့ ဦးတည်ကာ ခုန်အုပ်လိုက်သည်။ ငွေမင်ရောင် စောင့်ကြပ်သူသည် သူ၏ ဝိညာဉ်ထဲတွင် ဟိန်းဟောက်နေသည်။

“စောင့်ကြပ်သူရဲ့ ကတိကဝတ် ပွင့်စမ်း”

ကြီးကျယ်ခမ်းနားသော ငွေမင်ရောင် အလင်းတန်းသည် ကောင်းကင်သို့ ထိုးတက်သွားပြီး မရေမတွက်နိုင်သော ရုန်းများ စီးဆင်းနေသည့် ခိုင်မာသော အလင်း အကာအကွယ်တစ်ခုအဖြစ် ပြောင်းလဲကာ သူ့ကို လွှမ်းခြုံလိုက်သည်။

နောက်တစ်ခဏတွင် အပြာရောင်ရင့်ရင့် နိဗ္ဗာန်နဂါး အသက်ရှူခြင်း စွမ်းအားသည် ထိုအလင်းအကာအကွယ်ကို ပြင်းထန်စွာ ဝင်တိုက်မိသည်။

ကျယ်လောင်သော အသံမရှိဘဲ ဥပဒေသ အဆင့်ရှိ အကြမ်းတမ်းဆုံး ဖျက်ဆီးခြင်းသာ ရှိသည်။

အလင်းအကာအကွယ် ပြင်းထန်စွာ တုန်ခါသွားပြီး မျက်နှာပြင်ပေါ်တွင် နောက်တစ်ခဏ၌ ပြိုကွဲတော့မည့်အလား အက်ကွဲကြောင်းများ ချက်ချင်း ဖုံးလွှမ်းသွားသည်။

သွေးမျိုးဆက် အရင်းအမြစ်မှလာသော ထိုကာကွယ်ရေး စွမ်းအားက အရာအားလုံးကို ဖျက်ဆီးနိုင်စွမ်းရှိသည့် ဤအသက်ရှူခြင်းကို အတင်းအဓမ္မ ခုခံထားနိုင်ခဲ့သည်။

ထို့ပြင် စောင့်ကြပ်သူ၏ ကတိကဝတ် လက္ခဏာရပ် လှုံ့ဆော်ခံလိုက်ရသဖြင့် ဤဖျက်ဆီးနိုင်သော စွမ်းအင်များကို အတင်းအဓမ္မ စုပ်ယူပြီး ဖျက်ဆီးရန် စတင်ခဲ့သည်။

“အခုပဲ ငါ့ကို ကူညီကြ”

လင်းထျန်းလုံ အလင်း အကာအကွယ်အတွင်းမှနေ၍ ဟိန်းဟောက်လိုက်သည်။

ပြောင်းလဲထားသော ငွေမင်ရောင်လျှပ်စီးများကို သူ၏ကိုယ်ပိုင် စွမ်းအားအားလုံးနှင့် ပေါင်းစပ်ကာ ကမ္ဘာကြီးကို တုန်လှုပ်စေမည့် ရေစီးကြောင်းတစ်ခုအဖြစ် ယင်းဖုန်း ချိပ်ပိတ်ပေးထားသော အမှတ်ဆီသို့ ပြင်းထန်စွာ ရိုက်ချလိုက်သည်။

ယွဲ့ရီသည် သူမ၏ ပင်ပန်းနွမ်းနယ်မှုများကို လျစ်လျူရှုကာ မိစ္ဆာနဂါး လှုပ်ရှားခြင်း သို့မဟုတ် ဖုံးကွယ်ခြင်း မပြုနိုင်စေရန် ပုံရိပ်ယောင်လကြေးမုံ၏ လရောင်ကို ထိုချိတ်ဆက်သည့်နေရာပေါ်တွင် ချိပ်ပိတ်ထားသည်။

ရန့်မြဲ့က သူ၏ ကာကွယ်ရေးနယ်ပယ်ကို အကန့်အသတ်အထိ ကျုံ့လိုက်ပြီး လင်းထျန်းလုံ၏ ခန္ဓာကိုယ်ကို ကာကွယ်ရန် ဟိန်းဟောက်လိုက်သည်။

ထျန်းပင်းနှင့် သွေးမိစ္ဆာတို့ ရှေ့သို့ တစ်ဖန် ခုန်အုပ်သွားကြပြီး နာကျင်မှုကြောင့် ရူးသွပ်စွာ ဝှေ့ယမ်းနေသည့် မိစ္ဆာနဂါး၏ လက်သည်းများနှင့် အမြီးများကို သူတို့၏ ခန္ဓာကိုယ်များဖြင့် ခုခံရင်း လင်းထျန်းလုံအတွက် အချိန်ရစေရန် ဖန်တီးပေးခဲ့ကြသည်။

“ဂျွတ်“

ဝိညာဉ်ထဲတွင် ပဲ့တင်ထပ်သွားသော ကြည်လင်သည့် ပြိုကွဲသံတစ်ခု မိစ္ဆာနဂါး၏ ပြောင်းလဲပြန်ကြေးခွံအောက်မှ ထွက်ပေါ်လာသည်။

မိစ္ဆာနဂါး၏ ကြီးမားလှသော ခန္ဓာကိုယ် ရုတ်တရက် အေးခဲသွားပြီး ၎င်း၏ မှောင်မိုက်သော မျက်လုံးအိမ်များတွင် မယုံကြည်နိုင်မှုနှင့် အကြောက်တရားများ ပြည့်နှက်သွားသည်။

၎င်း၏ ခန္ဓာကိုယ်ပေါ်ရှိ အပြာရောင်ရင့်ရင့် စွမ်းအင်လမ်းကြောင်းများ ချက်ချင်း မှေးမှိန်ကာ ပြတ်တောက်သွားပြီး အက်ကွဲကြောင်းများသည် ပြောင်းလဲပြန်ကြေးခွံမှတစ်ဆင့် ခန္ဓာကိုယ်တစ်ခုလုံးဆီသို့ လျင်မြန်စွာ ပျံ့နှံ့သွားသည်။

“မဟုတ်ဘူး“

၎င်း၏ စိတ်ပျက်အားငယ်ဖွယ် ငိုကြွေးသံများနှင့်အတူ အရှင်သခင်အဆင့် ခန္ဓာကိုယ်သည် အတွင်းပိုင်းမှစတင်ပြိုကွဲလာပြီး လေထုထဲတွင် မိုးပြာရောင် အလင်းစက်များအဖြစ် လွင့်မျောပျောက်ကွယ်သွားသည်။

၎င်းအတွင်း၌ မိုးပြာရောင် ရေခဲစကြဝဠာငယ်လေးတစ်ခု ချိပ်ပိတ်ထားပုံရသည့် ကြိတ်ဆုံကျောက်အရွယ်အစားရှိသော ရေခဲအရိုးစုမိစ္ဆာနဂါး ဗဟိုချက် (အရှင်သခင်အဆင့်)သည် ‘ဒုန်း’ ဟူသော လေးလံသည့် အသံနှင့်အတူ ရေခဲပြင်ပေါ်သို့ ကျလာသည်။

၎င်းနှင့်အတူ ကျလာသည်မှာ တောက်ပနေသော အလင်းစက်လုံး သုံးခုဖြစ်ပြီး ၎င်းတို့အနက်မှ တစ်ခုတွင် ရေခဲဒြပ်စင်၏ သန့်စင်သော အနှစ်သာရများကို ထုတ်လွှတ်နေသည့် ထာဝရရေခဲနှလုံးသား အပိုင်းအစတစ်ခု ပါဝင်နေသည်။

စစ်မြေပြင်သည် တစ်ခဏမျှ တိတ်ဆိတ်သွားသည်။

ထို့နောက် ချက်ချင်းဆိုသလို အပြင်ဘက် ကာကွယ်ရေးမျဉ်းမှ ကောင်းကင်တုန် ဝမ်းမြောက်ဖွယ် အော်ဟစ်သံများ ပေါက်ကွဲထွက်လာသည်။

သူတို့ နိုင်ပြီ။

လင်းထျန်းလုံသည် လေထဲမှ ပြုတ်ကျလာပြီး ဒူးတစ်ဖက်ထောက်ကာ ပြင်းပြင်းထန်ထန် အသက်ရှူနေသည်။

သူ၏ ညာဘက်အရှေ့လက်၏ အခြေအနေမှာ အနည်းငယ် ပိုမိုဆိုးရွားလာပုံရပြီး သူ့နဖူးတွင် အေးစက်စက် ချွေးစေးများ ကျနေတော့သည်။