အခန်း ၂၀၀၃
Vol. 201 Ch. 2003
အခန်း (၂၀၀၃) နယ်မြေကိုးခု၏ နယ်စပ်ဂိတ်
ဝတ်ရုံခရမ်းရောင် ဝတ်ဆင်ထားသည့် လူငယ်သည် အဝေးဆီမှ ရှေးဟောင်းတားမြစ်နယ်မြေ ဖြစ်သော ဟာလေယင်းကို စိုက်ကြည့်လိုက်ရင်း၊ မျက်နှာအမူအရာမှာ အေးစက်တည်ငြိမ်စွာဖြင့် ဆိုလိုက်သည်။
"ငါ အဲဒီပေါ်မှာ... အတွင်းနယ်မြေ ရဲ့ အရှိန်အဝါ အစအနလေးတစ်ခုကို ခံစားမိနေတယ်၊ ဒါက သေဆုံးသွားခဲ့ပြီဖြစ်တဲ့ အတွင်းနယ်မြေတစ်ခုကနေ ပြောင်းလဲဖြစ်ပေါ်လာတာ ဖြစ်ရမယ်"
သေဆုံးသွားခဲ့ပြီဖြစ်တဲ့ အတွင်းနယ်မြေကနေ ပြောင်းလဲဖြစ်ပေါ်လာတာ ဟုတ်လား...။
တပ်မကြီးခြောက်ခု၏ ခေါင်းဆောင်များအားလုံး၏ မျက်နှာတွင် အလွန်တရာ တုန်လှုပ်ခြောက်ခြားသွားသည့် အရိပ်အယောင်များ ချက်ချင်း ထင်ဟပ်သွားခဲ့ရတော့သည်။
သူတော်စင်အဆင့် တစ်ဦး သေဆုံးသွားခဲ့လျှင်ပင်၊ သူမသေဆုံးမီက သွန်းလုပ်ခဲ့သော အတွင်းနယ်မြေသည် ဤလောကထဲ၌ ဆက်လက်၍ တည်ရှိနေနိုင်ပါသေးသည်။
သို့သော်လည်း နှစ်ပေါင်းများစွာ ကုန်ဆုံးလာသည့်အခါတွင်မူ ထိုအတွင်းနယ်မြေသည်လည်း တစ်စချင်း သေဆုံးသွားခဲ့ရပြီး၊ ဟင်းလင်ပြင်လောကကြီးထဲ၌ လွင့်မျောနေတတ်သည့် နယ်မြေသေ တစ်ခုအဖြစ်သို့ ပြောင်းလဲသွားတတ်ပေသည်။
ထိုမှတစ်ဆင့် နောက်ထပ် နှစ်ပေါင်းများစွာ ကြာမြင့်လာသည့်အခါ၌ ထိုအတွင်းနယ်မြေသည် ဟင်းလင်ပြင်ထဲမှ ထွက်ပေါ်လာခဲ့ပြီး၊ ကြီးမားလှသော ကြယ်စုကြီးတစ်ခုအဖြစ်သို့ ပြောင်းလဲကာ... ဝင်ရောက်သူတိုင်း သေဆုံးရမည့် တားမြစ်နယ်မြေကြီးတစ်ခု ဖြစ်လာခဲ့တော့သည်။
ဤသည်မှာ အတွင်းနယ်မြေတစ်ခု၏ အရှင်သခင် သေဆုံးသွားပြီးနောက်တွင် ကြုံတွေ့ရမည့် အဆင့်ဆင့်သော ပြောင်းလဲမှု ဖြစ်စဉ်များပင် ဖြစ်ပေသည်။
အကယ်၍သာ လက်ရှိ ၎င်းတို့ရှေ့မှောက်တွင် ရှိနေသည့် ကြယ်စုကြီးသည် အမှန်တကယ်ပင် သေဆုံးသွားခဲ့ပြီဖြစ်သော အတွင်းနယ်မြေတစ်ခု ဖြစ်ခဲ့မည်ဆိုပါက... ၎င်း၏ အရှင်သခင်မှာ လွန်ခဲ့သော နှစ်ပေါင်းများစွာကတည်းက သေဆုံးသွားခဲ့ပြီဖြစ်ကြောင်း သက်သေပြနေခဲ့သည်။ ထိုသေဆုံးသွားခဲ့သည့် သက်တမ်းမှာ ထိုနေရာတွင် ရှိနေကြသည့် လူတိုင်း၏ သက်တမ်းထက်ပင် အဆမတန် များစွာ ပိုမိုမြင့်မားနေပေလိမ့်မည်။
ဤသို့သော ဖြစ်တည်မှုမျိုးသည် အချို့သော နယ်ပယ်အသေးလေးများတွင်မူ... သူတော်စင်အဆင့်သို့ ဘယ်လိုနည်းနဲ့မျှ မတက်လှမ်းနိုင်ကြတော့သည့် ကျင့်ကြံသူများ၏ နောက်ဆုံး မျှော်လင့်ချက်အဖြစ် တည်ရှိနေတတ်ပေသည်။ ၎င်းတို့သည် အခြားသူများ သေဆုံးသွားခဲ့သည့် အတွင်းကမ္ဘာနယ်မြေကို လုယူသန့်စင်ခြင်းဖြင့် သူတော်စင်အဆင့်၏ ခွန်အားကို မနည်း အနိုင်နိုင် ရယူကျင့်ကြံတတ်ကြ၍ ဖြစ်ပေသည်။
သို့သော်လည်း ဟင်းလင်ပြင် အဆင့်မြင့် မဟာမိတ်အဖွဲ့ ထဲတွင်မူ... ဤကဲ့သို့သော ကိစ္စရပ်များကို လုံးဝ ဥဿုံ ပြင်းထန်စွာ တားမြစ်ပိတ်ပင်ထားခဲ့သည်။
မည်သူမဆို ဤသို့ လုပ်ဆောင်ဝံ့ခဲ့ပါက... ခုံသမာဓိရုံး ၏ ပြင်းထန်လှသော ပြစ်ဒဏ်စီရင်ခြင်းကို ခံရမည်ဖြစ်ပြီး၊ မည်သည့်နေရာသို့မျှ ထွက်ပြေးလွတ်မြောက်နိုင်မည် မဟုတ်ပါချေ။
"အရိပ်တပ်မခေါင်းဆောင်... မင်း စောစောက ပြောခဲ့တဲ့ စကားအရဆိုရင်တော့၊ နယ်မြေကိုးခု ထဲမှာ သေဆုံးသွားခဲ့ပြီဖြစ်တဲ့ အတွင်းကမ္ဘာနယ်မြေကနေ ပြောင်းလဲဖြစ်ပေါ်လာတဲ့ ကြယ်စုပေါင်း ရာချီပြီး ရှိနေတာပေါ့ ဟုတ်လား"
ဝတ်ရုံခရမ်းရောင် ဝတ်ဆင်ထားသည့် လူငယ်က ရုတ်တရက် မေးမြန်းလိုက်သည်။
လူတိုင်း၏ မျက်ဝန်းအစုံက ဝူရှင်းလင် ၏ ခန္ဓာကိုယ်ပေါ်သို့ တပြိုင်နက်တည်း ကျရောက်သွားခဲ့ကြရ၏။
ဝူရှင်းလင်က ရှေ့သို့ တစ်လှမ်း တိုးလိုက်ရင်း အလွန်တရာ ရိုသေကိုင်းညွတ်စွာဖြင့် လျှောက်တင်လိုက်သည်။
"အမှန်တကယ် ရှိပါတယ် "
"ဒါဆိုရင်တော့... ငါတို့ အခု ရောက်နေတဲ့ နေရာက နယ်မြေကိုးခု ဖြစ်ဖို့ ရာခိုင်နှုန်း သေချာသလောက် ရှိနေပြီပဲ"
ဝတ်ရုံခရမ်းရောင်နှင့် လူငယ်၏ မျက်ဝန်းထဲတွင် ခပ်ဖျော့ဖျော့ ပြုံးရယ်ခြင်း အရိပ်အယောင်လေးတစ်ခု ပေါ်ထွက်လာခဲ့ရသည်။
"မင်းတို့တွေ အဲဒီကြယ်စုပေါ်ကို သွားပြီးတော့ တစ်ချက်လောက် စစ်ဆေးကြည့်လိုက်ကြဦး၊ အကယ်၍ အသက်ရှင်နေတဲ့သူတွေ ရှိနေသေးတယ်ဆိုရင်တော့... ဖမ်းဆီးပြီး စစ်ဆေးမေးမြန်းဖို့ ခေါ်လာခဲ့ကြ"
"မှန်လှပါ... သခင်လေး"
တပ်မကြီးခြောက်ခု၏ ခေါင်းဆောင်များသည် ၎င်းတို့၏ လက်အောက်ငယ်သားများကို လုံးဝ ခေါ်ဆောင်သွားခြင်း မရှိဘဲ၊ ဟာလေးယင် ဆီသို့ တိုက်ရိုက် ပျံသန်းသွားခဲ့ကြတော့သည်။
ဤကဲ့သို့သော နေရာမျိုးကို စုံစမ်းစစ်ဆေးရာတွင်... လူအင်အား အလုံးအရင်းဖြင့် သွားရောက်ရန် လုံးဝ မလိုအပ်ပါချေ၊ မဟုတ်ပါက ရန်သူက လှုပ်ရှားမှုကို ရိပ်မိသွားပြီး မြွေကို တုတ်နဲ့ခြောက်သလိုမျိုး ဖြစ်သွားနိုင်၍ ဖြစ်ပေသည်။
……
ကျွယ်မင်နန်းတော် မှ လာခဲ့သည့် နယ်မြေသစ်ရှာဖွေရေး အဖွဲ့တစ်ဖွဲ့သည်... လက်ရှိအချိန်တွင် လဟာလေယင်းပေါ်၌ လှည့်ကင်း လှည့်လည်နေခဲ့ကြသည်။
ရွှမ်ဝမ် နယ်မြေသစ်ရှာဖွေရေးအဖွဲ့သည် ကျွယ်မင်နန်းတော်အတွင်းရှိ မျက်နှာသစ် အဖွဲ့အသစ်တစ်ခုဟု သတ်မှတ်နိုင်သော်လည်း၊ ၎င်းတို့၏ အတွေ့အကြုံမှာမူ သိပ်ပြီး နုနယ်လှသည်တော့ မဟုတ်ပါချေ၊ လွန်ခဲ့သော အချိန်က ဟာလေယင်းကို တိုက်ခိုက်သိမ်းပိုက်စဉ်အခါက တိုက်ပွဲတွင်လည်း ၎င်းတို့ ပါဝင်ဆင်နွှဲခဲ့ဖူးကြသည်။
ထို့နောက်ပိုင်းတွင်လည်း ထိုက်ချန်းနယ်မြေ ၏ တိုက်ပွဲတွင် ထပ်မံပါဝင်ခဲ့ကြပြီး၊ယင်လောက၏ တိုက်ပွဲကြီးတွင်လည်း ပါဝင်ဆင်နွှဲခဲ့ဖူးကြသေးသည်။
ပြောရမည်ဆိုပါက... မကြာသေးမီ နှစ်များအတွင်း ဖြစ်ပွားခဲ့သော ကြီးမားလှသည့် အဖြစ်အပျက်ကြီးများစွာကို ရွှမ်ဝမ်နယ်မြေသစ်ရှာဖွေရေးအဖွဲ့က အပြည့်အဝ ကြုံတွေ့ခဲ့ရခြင်းပင်။
အထူးသဖြင့် ဟာလေယင်း၏ ထိုတိုက်ပွဲတွင်မူ... ၎င်းတို့ နောက်ကနေ လိုက်ပါခဲ့ကြရသည့် အမာခံတပည့် မှာ... လက်ရှိ ယင်လောက၏ ငရဲမင်း ဖြစ်လာခဲ့သူ ဖန့်ချန် ပင် ဖြစ်ပေသည်။
ဤသို့သော အတွေ့အကြုံများနှင့် မှတ်တမ်းကောင်းများ ရှိနေခဲ့သဖြင့်၊ ရွှမ်ဝမ်နယ်မြေသစ်ရှာဖွေရေးအဖွဲ့မှ ကျင့်ကြံသူများသည် များပြားလှသော ဆုလာဘ်များကို ရရှိခဲ့ကြပြီး... ကျင့်ကြံခြင်းအဆင့်များမှာလည်း အဆက်မပြတ် တိုးတက်မြင့်မားနေခဲ့ကြသည်။
လက်ရှိအချိန်တွင်မူ... ရွှမ်ဝမ်နယ်မြေသစ်ရှာဖွေရေးအဖွဲ့သည် ဟာလေယင်းပေါ်၌ ကင်းလှည့်လည်နိုင်မည့် အခွင့်အရေးကို ရရှိထားခဲ့ကြရာ၊ ၎င်းထဲမှနေ၍ ရရှိနိုင်မည့် အကျိုးကျေးဇူးများနှင့် အဆီအနှစ်များမှာလည်း တိုင်းတာ၍မရနိုင်လောက်အောင်ပင် များပြားလှပေသည်။
ရွှမ်ဝမ်သည် မသေမျိုးလှေ၏ အရှေ့ဘက်စွန်းတွင် မတ်တတ်ရပ်နေခဲ့ပြီး၊ လက်နှစ်ဖက်ကို နောက်ပစ်လျက်... မျက်ဝန်းအစုံမှာ အေးဆေးတည်ငြိမ်စွာဖြင့် အဝေးဆီသို့ စိုက်ကြည့်နေခဲ့သည်။
သူ၏ ကျင့်ကြံခြင်းအဆင့်သည်လည်း ဤနှစ်များအတွင်း များစွာ တိုးတက်လာခဲ့ပြီးဖြစ်ရာ... အဆင့် ၃ မသေမျိုး သို့ ခိုင်မာစွာ ဝင်ရောက်နေခဲ့ချေပြီ၊ ခြေလှမ်းဝက်မျှသာ လိုတော့သဖြင့်... ချက်ချင်းပင် မသေမျိုးအရှင်သခင် အဆင့်အတန်းသို့ ရောက်ရှိနိုင်တော့မည် ဖြစ်သည်။
"ဖြစ်နိုင်ရင်... ဒီတစ်ခေါက် ပြန်ရောက်သွားတဲ့အခါကျရင်၊ အမာခံကတပည့် ဖြစ်လာနိုင်မလားဆိုတာကို စမ်းသပ်ကြည့်ရမယ်၊ နဂါးနက်လှေ ကို မောင်းနှင်ခွင့်ရပြီး... မိမိကိုယ်ပိုင် မသေမျိုးလှေအုပ်စုကြီးတစ်ခုကို ပိုင်ဆိုင်ခွင့်ရဖို့အတွက်ပေါ့"
ရွှမ်ဝမ်၏ စိတ်ကူးအာရုံများ အရပ်မျက်နှာအနှံ့သို့ ပျံ့လွင့်နေခဲ့သည်။
"ခေါင်းဆောင်... ကျွန်တော်တို့ ဒီနေရာမှာ ကင်း လှည့်နေတာ နှစ်ပေါင်းများစွာ ကြာနေပြီဖြစ်ပေမယ့်၊ ပြင်ပရန်သူ တွေရဲ့ အရိပ်အယောင်လေးတစ်ခုတောင် မတွေ့ရသေးဘူး၊ နန်းတော်ကြီးက အလွန်အမင်း သတိကြီးလွန်းနေတာ မဟုတ်ဘူးလား"
ကျင့်ကြံသူတစ်ဦးက ရှေ့သို့ လျှောက်လှမ်းလာရင်း၊ ရွှမ်ဝမ်နှင့် စတင်၍ စကားစမြည် ပြောဆိုလိုက်သည်။
"သတိကြီးတာကတော့ ဘယ်တော့မှ မမှားနိုင်ပါဘူး၊ အချိန်တိုင်းမှာ အဆင်သင့် ဖြစ်နေအောင် ပြင်ဆင်ထားရမယ်။
ငါတို့ရဲ့ တာဝန်ကတော့... ပြင်ပရန်သူတွေနဲ့ ကြုံတွေ့ရတဲ့အခါ၊ ပထမဆုံး စက္ကန့်မှာတင် သတင်းပေးပို့ဖို့ပဲ။
အသက်ရှင်ခြင်းနဲ့ သေဆုံးခြင်းကိုတော့... ထည့်သွင်းစဉ်းစားနေစရာ မလိုဘူး။
အကယ်၍ အသက်ဆုံးရှုံးသွားခဲ့ရင်တောင်မှ...ယင်လောကကို ရောက်သွားတဲ့အခါ အဆင့်မြင့် ဆုလာဘ်တွေကို ရရှိမှာဖြစ်ပြီး၊ ဝိညာဥ်နတ်ဘုရားလမ်းစဉ် ကို ဆက်လက်လျှောက်လှမ်းနိုင်ဦးမှာပဲ"
ရွှမ်ဝမ်က အေးဆေးစွာ ဆိုလိုက်၏။
"မသေနိုင်ရင်တော့... မသေချင်သေးတာ အမှန်ပဲ"
ထိုကျင့်ကြံသူက တိုးညှင်းစွာဖြင့် ရေရွတ်ညည်းတွားလိုက်သည်။
ရွှမ်ဝမ်က ပြုံးလိုက်ရင်း ဆိုလိုက်မိသည်
"ငါတို့ကတော့... အဲဒီလောက်အထိ ကံဆိုးမှာ မဟုတ်ပါဘူး၊ ဒါပေမဲ့လည်း ဒီနှစ်အတွင်း နယ်မြေကိုးခုရဲ့ နေရာအနှံ့အပြားမှာ စစ်အုပ်ချုပ်ရေးတွေ ထုတ်ပြန်ထားခဲ့ပြီး၊ နယ်မြေကိုးခုရဲ့ နယ်စပ်ဂိတ် တွေကိုပါ တရားဝင် တည်ဆောက်ထားခဲ့တယ်ဆိုမှတော့... နယ်မြေကိုးခုရဲ့ အခြေအနေက အလွန်တရာ တင်းကြပ်နေပြီဆိုတာကို သက်သေပြနေတာပဲ။
ငါတို့အနေနဲ့ ယင်လောကဘက်နဲ့ ပူးပေါင်းပြီး... လျှို့ဝှက်စောင့်ရှောက်ရေးဌာန က လူတွေနဲ့အတူ ငါတို့ ပိုင်ဆိုင်တဲ့ နယ်စပ်ဂိတ်ကို သေသေချာချာ စောင့်ကြပ်ဖို့ပဲ လိုအပ်တယ်။
ငါတို့ရဲ့ တာဝန်သက်တမ်း ပြည့်လို့ နန်းတော်ကို ပြန်ရတဲ့အခါကျရင်... သေချာပေါက် ဆုလာဘ်တွေ ရရှိမှာပါ"
ရွှမ်ဝမ်နယ်မြေသစ်ရှာဖွေရေးအဖွဲ့မှ ကျင့်ကြံသူများသည် စဉ်းစားတွေးတောလျက် ခေါင်းညိတ်ပြလိုက်ကြတော့သည်၊ ထင်ရှားစွာပင် ရွှမ်ဝမ်၏ စကားများကို ၎င်းတို့ ရင်ထဲ၌ ကောင်းစွာ မှတ်သားလိုက်ကြပုံရ၏။
ရွှေချန့် က အနည်းငယ် မျှ သက်ပြင်းချလိုက်ရင်း ဆိုလိုက်မိသည်။
"နယ်စပ်ဂိတ်ချင်း တူတူတောင်မှ...မသေမျိုးလောကငယ် ဘက်မှာ တာဝန်ကျတဲ့ လုပ်ဖော်ကိုင်ဖက်တွေက ပိုပြီးတော့ သက်တောင့်သက်သာ ရှိကြတယ်နော်"
"ဟုတ်ပဗျာ... မသေမျိုးလောကငယ်က အခုဆိုရင် မြေနေရာ ကျယ်ပြန့်ပြီး လူဦးရေ နည်းပါးတာမို့၊ ဆေးဖက်ဝင် ပစ္စည်းများစွာကို စိတ်ကြိုက် ရှာဖွေရရှိနိုင်ကြတယ်၊ အဲဒီနေရာမှာ တာဝန်ကျတဲ့သူတွေက အကျိုးအမြတ် အများကြီး ရကြတာ၊ဟာလေယင်းက မသေမျိုးလောကငယ်နဲ့ နှိုင်းယှဉ်လိုက်ရင်တော့... နည်းနည်း ဆင်းရဲမွဲတေလွန်းတယ်လို့ ပြောရမယ်"
တစ်စုံတစ်ဦးကလည်း စကားထောက်၍ ပြောဆိုလိုက်သည်။
ရွှမ်ဝမ်က မျက်မှောင်ကြုတ်လိုက်ရင်း တိုးညှင်းစွာ ဆိုလိုက်၏။
"ကိုယ့်ရဲ့ တာဝန်ကိုပဲ သေသေချာချာ ထမ်းဆောင်ကြစမ်းပါ၊ ကျန်တဲ့အရာတွေကို လျှောက်ပြီး မတွေးတောကြနဲ့။
အခုအချိန်မှာ နယ်မြေကိုးခုရဲ့ စစ်ပွဲတွေ ငြိမ်သက်သွားခဲ့ပြီ၊ ပြင်ပက ရန်သူတွေကိုသာ အောင်မြင်စွာ ရင်ဆိုင်နိုင်မယ်ဆိုရင်... လက်ရှိ ခေတ်ကာလက ကျင့်ကြံသူတွေအတွက် အကောင်းဆုံးနဲ့ အချိုမြိန်ဆုံးသော ခေတ်ကာလကြီးတစ်ခု ဖြစ်လာလိမ့်မယ်"
စကားပြောနေစဉ်မှာတင်... အရှိန်အဟုန်ဖြင့် မောင်းနှင်နေခဲ့သည့် မသေမျိုးလှေကြီးက ရုတ်တရက် ချက်ချင်းဆိုသလို တန့်သွားခဲ့ရတော့သည်။
ပြင်းထန်လှသော နောက်ပြန်ဆွဲအားကြောင့် မသေမျိုးလှေပေါ်ရှိ ကျင့်ကြံသူများမှာ ရှေ့သို့ အရှိန်လွန်ကာ ခြေလှမ်းများစွာ ယိုင်နဲ့သွားခဲ့ရပြီး... အချို့သောသူများမှာမူ သတိမထားမိလိုက်ဘဲ ကြမ်းပြင်ပေါ်သို့ ဝုန်းခနဲ လဲကျသွားခဲ့ကြရရှာသည်။
၎င်းတို့၏ တုံ့ပြန်မှုမှာမူ အလွန်တရာ လျင်မြန်လှပေသည်၊ ပထမဆုံး စက္ကန့်မှာတင် ချက်ချင်း ခုန်ထလိုက်ကြရင်း အရပ်မျက်နှာအနှံ့သို့ သတိကြီးစွာဖြင့် စိုက်ကြည့်လိုက်ကြပြီး... လာရောက်တိုက်ခိုက်မည့် ရန်သူကို ရင်ဆိုင်ရန် ပြင်ဆင်လိုက်ကြတော့သည်။
ရွှမ်ဝမ်၏ ကျင့်ကြံခြင်းအဆင့်က အနည်းငယ် ပိုမိုမြင့်မားသဖြင့်... အစပိုင်းတွင် ပြင်းထန်လှသော ခေါင်းမူးနောက်ခြင်း ခံစားချက်မှလွဲ၍၊ အခြားသူများကဲ့သို့ ကြမ်းပြင်ပေါ်သို့ ရုပ်ပျက်ဆင်းပျက် လဲကျသွားခြင်းမျိုးတော့ မရှိခဲ့ချေ။
သို့သော်လည်း သူသည်လည်း အခြားသူများကဲ့သို့ပင်... မျက်နှာတွင် စိုးရိမ်ထိတ်လန့်ခြင်း အရိပ်အယောင်များ ထင်ဟပ်လျက်၊ ပတ်ဝန်းကျင်ကို သတိကြီးစွာဖြင့် စိုက်ကြည့်နေခဲ့မိသည်။
တစ်ချိန်တည်းမှာပင်... နယ်စပ်ဂိတ်၌ လှည့်ကင်း လှည့်လည်နေကြသည့် လျှို့ဝှက်စောင့်ရှောက်ရေးဌာနမှ ဝိညာဉ်အချို့ သည်လည်း ဤနေရာ၏ ထူးဆန်းမှုကို သတိပြုမိသွားခဲ့ကြရပြီး၊ ထိုနေရာနှင့် အနီးဆုံးတွင် ရှိနေသည့် အဖွဲ့တစ်ဖွဲ့က ချက်ချင်းပင် ဤနေရာဆီသို့ ဦးတည်ကာ ပျံသန်းလာခဲ့ကြချေပြီ။
"ခေါင်းဆောင်... ဘာတွေ ဖြစ်ကုန်တာလဲ"
ရွှေချန့်က အံ့ဩစွာဖြင့် မေးမြန်းလိုက်သည်။
သူမ ထင်မှတ်ထားသည်မှာ ရွှမ်ဝမ်ကိုယ်တိုင်က မသေမျိုးလှေကို ရပ်တန့်လိုက်ခြင်းဖြစ်ပြီး၊ တစ်စုံတစ်ရာသော အရာကို ရှာဖွေတွေ့ရှိသွားခဲ့ခြင်း ဖြစ်နိုင်သည်ဟူ၍ ဖြစ်ပေသည်။
ထင်မှတ်မထားဘဲ ရွှမ်ဝမ်က ခေါင်းကို အသာအယာ ခါယမ်းပြလိုက်ရင်း... မျက်ဝန်းအစုံမှာ သတိကြီးစွာဖြင့်ပင် ဆိုလိုက်သည်။
"ငါလည်း ဘာဖြစ်သွားလဲ မသိဘူး... မသေမျိုးလှေက လုံးဝ ထိန်းချုပ်မှု ကင်းမဲ့သွားခဲ့ပြီ"
မသေမျိုးလှေက လုံးဝ ထိန်းချုပ်မှု ကင်းမဲ့သွားခဲ့ပြီ ဟုတ်လား...။
လူတိုင်း၏ မျက်ဝန်းထဲတွင် မှင်တက်အံ့ဩသွားသည့် အရိပ်အယောင်များ ထင်ဟပ်သွားခဲ့ရတော့သည်။
ရွှမ်ဝမ်၏ လက်ထဲမှနေ၍ မသေမျိုးလှေ၏ ထိန်းချုပ်မှုကို လုယူသွားနိုင်လောက်အောင်... မည်သူက ဤမျှလောက်အထိ အစွမ်းထက်လှသော စွမ်းရည်မျိုး ရှိနေရသနည်း။
နောက်ထပ် စက္ကန့်ပိုင်းမှာပင်... ပုံရိပ်ခြောက်ခုသည် မသေမျိုးလှေ၏ ပတ်ဝန်းကျင်တွင် ရုတ်တရက် ပေါ်ထွက်လာခဲ့ကြပြီး၊ ၎င်းတို့ကို ခပ်ပြုံးပြုံးဖြင့် စိုက်ကြည့်နေခဲ့ကြတော့သည်။
ရွှမ်ဝမ်၏ မျက်နှာမှာ တည်တံ့လေးနက်သွားခဲ့ရပြီး... ထိုပုဂ္ဂိုလ်ခြောက်ဦးထံသို့ လက်အုပ်ချီ၍ ဆိုလိုက်မိသည်။
"ဒီကို ကြွမြန်းလာကြတဲ့ စီနီယာကြီး ခြောက်ယောက်က... ဘယ်သူတွေလဲဆိုတာ ကျွန်တော်မျိုး မသိရပါဘူး၊ ဒီနေရာက နယ်မြေကိုးခုရဲ့ နယ်စပ်ဂိတ်တွေထဲက တစ်ခု ဖြစ်တာမို့... ခွင့်ပြုချက်မရှိဘဲ ဝင်ရောက်ခွင့် မရှိပါဘူး"
"နယ်မြေကိုးခုရဲ့ နယ်စပ်ဂိတ် ဟုတ်လား..."
"အားလုံးပဲ... ငါတို့ အမှန်တကယ်ပင် နေရာအမှန်ကို ရှာဖွေတွေ့ရှိသွားခဲ့ပြီ ထင်တယ်"
တစ်စုံတစ်ဦးက ခပ်ဖွဖွ ရယ်မောလိုက်မိရာ... မျက်ဝန်းထဲတွင် ကြီးမားလှသော အသီးအပွင့်များကို ဆွတ်ခူးလိုက်ရသည့်အလား ဝမ်းမြောက်ခြင်းများနှင့် ပြည့်နှက်နေခဲ့ပြီး၊ ဝန်ထုပ်ဝန်ပိုးကြီးတစ်ခု ကျသွားသည့်အလား စိတ်သက်သာရာရမှုများလည်း ထင်ဟပ်နေခဲ့သည်။
နေရာအမှန်ကို ရှာဖွေတွေ့ရှိသွားခဲ့ပြီ ဟုတ်လား...။
နောက်ထပ် စက္ကန့်ပိုင်းမှာပင်... ရွှမ်ဝမ်သည် ချက်ချင်းပင် မိမိကိုယ်ကိုယ် အဆုံးစီရင်ရန် ကြိုးစားလိုက်တော့သည်၊ ဘာပဲပြောပြော လက်ရှိအခြေအနေတွင် ယင်လောကသို့ ထွက်ပြေးရန် ကြိုးစားမည်ဆိုပါကလည်း... အချိန်မီနိုင်တော့မည် မဟုတ်ပါချေ။
သို့သော်လည်း သူ၏ စိတ်အာရုံ လှုပ်ရှားလိုက်သည့် ထိုစက္ကန့်ပိုင်းမှာပင်... မိမိ၏ ခန္ဓာကိုယ်တစ်ခုလုံးမှာ လက်ညှိုးတစ်ချောင်းမျှပင် လှုပ်ရှား၍ မရနိုင်တော့ကြောင်း ရုတ်တရက် သတိပြုမိလိုက်ရသည်။
ကျန်ရှိသောသူများမှာလည်း ဤအတိုင်းပင် ဖြစ်ပေသည်။
၎င်းတို့သည် ချက်ချင်း နားလည်သဘောပေါက်လိုက်ကြရသည်မှာ... လက်ရှိ ၎င်းတို့ရှေ့မှောက်တွင် ရှိနေသည့် ဤပုဂ္ဂိုလ်ခြောက်ဦးသည် နယ်မြေကိုးခုက ရင်ဆိုင်ရတော့မည့် ပြင်ပမိစ္ဆာ ရန်သူဆိုးကြီးများ သေချာပေါက် ဖြစ်ပေလိမ့်မည်။
ပြင်ပမိစ္ဆာတွေ... အမှန်တကယ်ပဲ ရောက်လာခဲ့ကြပြီ
ရွှမ်ဝမ်၏ ရင်ထဲတွင်မူ မုန်တိုင်းတစ်ခု ပြင်းထန်စွာ တိုက်ခတ်သွားခဲ့ရတော့သည်။
သို့သော်လည်း သူက အတတ်နိုင်ဆုံး တည်ငြိမ်နေခဲ့သေးသည်၊ ဤနေရာတွင် ယင်လောကမှ ဝိညာဉ်များသည်လည်း လှည့်ကင်း လှည့်လည်နေကြသည် မဟုတ်ပါလား။
၎င်းတို့သည် လက်ရှိအချိန်တွင်... ဤနေရာ၏ မြင်ကွင်းကို သေချာပေါက် မြင်တွေ့သွားခဲ့ကြရပြီ ဖြစ်သည်။
"ရွှမ်အယ် ဝိညာဉ်ဖမ်းသမား .. ဒီနေရာမှာ ဝိညာဉ်တွေ အများကြီး ရှိနေတယ်မလား၊ အားလုံးကို ချုပ်နှောင်ပြီးပြီလား"
၎င်းတို့ထဲမှ တစ်ဦးက ရုတ်တရက် ဟင်းလင်ပြင်ဆီသို့ ဦးတည်ကာ လက်အုပ်ချီ၍ မေးမြန်းလိုက်သည်။
ရွှမ်အယ် ဝိညာဉ်ဖမ်းသမားသည် တရွေ့ရွေ့ဖြင့် ပေါ်ထွက်လာခဲ့သော်လည်း... ထိုသူ လက်အုပ်ချီရာ အရပ်မျက်နှာတွင် မဟုတ်ဘဲ၊ ထိုသူ၏ နောက်ကွယ်မှနေ၍ မျက်နှာမှာ အေးစက်တည်ငြိမ်စွာဖြင့် ဆိုလိုက်၏။
"ဝိညာဉ် လေးရာ... အားလုံးကို အပြည့်အဝ ဖမ်းဆီးချုပ်နှောင်ထားပြီးပြီ၊ သတင်းပြန်ပြီး ပို့ဆောင်နိုင်မယ့် အခွင့်အရေး လုံးဝ မရှိတော့ပါဘူး"
"ဒါက……"
ရွှမ်ဝမ်တို့တစ်သိုက် ထိုမြင်ကွင်းကို မြင်တွေ့လိုက်ရသည့်အခါတွင်မူ... မျက်ဝန်းထဲ၌ ပိုမိုပြင်းထန်လှသော ထိတ်လန့်တုန်လှုပ်ခြင်း အရိပ်အယောင်များ ထင်ဟပ်ပေါ်ပေါက်သွားခဲ့ရတော့သည်။
အဘယ်ကြောင့်ဆိုသော် တစ်ဖက်လူကလည်း ဝိညာဥ်နတ်ဘုရား များကို စေခိုင်းနိုင်စွမ်း ရှိနေရသနည်း...။
လက်ရှိအချိန်တွင် ယင်လောကကြီးတစ်ခုလုံးကို ထိုငရဲမင်းကြီးက အပြည့်အဝ စည်းလုံးညီညွတ်အောင် သိမ်းပိုက်ထားခဲ့ပြီးပြီ မဟုတ်ပါလား...။