အခန်း ၁၇၃

အခန်း (၁၇၃) ပထမဆုံးတိုက်ပွဲ၊ ဂိုဏ်း (၅) ခုကို သိမ်းပိုက်ခြင်း

"မင်းတို့ သွေးမုဆိုးဂိုဏ်းက ငါတို့ ဟေးလုံစခန်းနောက်ကို လိုက်ရတာ သိပ်ပျော်နေပုံပဲနော်..."

တန်ထိုက်ရှုံ့ရင်သည် သူ၏ ဓားကြီးကို တင်းကျပ်စွာဆုပ်ကိုင်၍ ပေချင်းရှန်းကို အေးစက်စက် အပြုံးဖြင့် ကြည့်လိုက်၏။

"မင်းတို့ခုနက ငါတို့ကိုသတ်ဖို့ သုံးလိုက်တဲ့ လျှို့ဝှက်လက်နက်က ဘာလဲ..."

ဟေးလုံစခန်းမှလူများ ပေါ်လာသည်ကို မြင်သောအခါ ပေချင်းရှန်းသည် သူ၏ သံသယကို ချက်ချင်း မေးမြန်းလိုက်သည်။ ပေချင်းရှန်းသည် ကျောက်စိမ်းနယ်ပယ် ကျင့်ကြံသူတစ်ယောက် ချောင်းမြောင်းတိုက်ခိုက်သည်ဟု ထင်ထားခဲ့သော်လည်း ယခုအခါ ဟေးလုံစခန်းက နောက်ကွယ်တွင် ရှိနေကြောင်း သိလိုက်ရသဖြင့် အတော်လေး အံ့အားသင့်သွားရသည်။

"သေတော့မယ့်လူက ဒါကို သိစရာမလိုတော့ဘူး..."

တန်ထိုက်ရှုံ့ရင်သည် သူ၏ ဓားကြီးကို မြှောက်လိုက်သည်။ သူတို့သည် သေရာပါ ရန်သူများ ဖြစ်နေကြသည်။ ဘာကြောင့်များ အချိန်ကုန်ခံပြီး အဓိပ္ပာယ်မရှိသော စကားများ ပြောနေရမည်နည်း။

"ခွေးကောင်... ငါတို့ သူတို့ကို တိုက်မယ်”

အနီးအနားရှိ အခြားဂိုဏ်းမှ ခေါင်းဆောင်တစ်ယောက်မှာ ဒေါသထွက်သွားသည်။ သူ၏ ခန္ဓာကိုယ်တွင် ကျည်ဆံရာများ ရှိနေသော်လည်း သူသည် အရှက်တကွဲ သေဆုံးခြင်းကို မလိုလားဘဲ သေခါနီးတွင် တစ်ယောက်ယောက်ကို ဆွဲခေါ်သွားလိုသည်။ ထိုခေါင်းဆောင်သည် တန်ထိုက်ရှုံ့ရင်ကို တိုက်ခိုက်ရန် ခုန်ထွက်လိုက်သည်နှင့် စနိုက်ပါကျည်ဆံ (၅) တောင့်က ရုတ်တရက် ထိမှန်သွား၏။ ခန္ဓာကိုယ်သည် အပေါ်သို့ တက်လာစဉ်မှာပင် ကျည်ဆံ (၅) တောင့်က ရင်ဘတ်ကို ထိမှန်သွားရာ နံရိုးများအားလုံး ကျိုးပဲ့သွားပြီး ကိုယ်တွင်းကလီစာများပင် ဖိမိသွားသည်။

"အား..."

ထိုခေါင်းဆောင်သည် ကျည်ဆံများ ထပ်မံပစ်ခတ်လိမ့်မည်ဟု လုံးဝ မထင်ထားခဲ့ပေ။ ထိုသူ ပစ်ခတ်ခံရသည်ကို မြင်သောအခါ ချန်ဖန်ဟိုင်သည် ဓားကိုချက်ချင်း ဝှေ့ယမ်းလိုက်ပြီး ထိုသူ တုံ့ပြန်နိုင်ခြင်းမရှိမီ လည်ချောင်းကို လှီးဖြတ်လိုက်သည်။

“တစ်ယောက် ရှင်းသွားပြီ…”

တောင်ခြေတွင် မှောက်လျက်ရှိသော စနိုက်ပါ (၅၀) သည် ဤနေရာကို အမြဲချိန်ထားသည်။ ထိုခေါင်းဆောင်သည် ခုန်ထွက်လာပြီး သူ့ကိုယ်သူ ဖော်ပြလိုက်သည်နှင့် စနိုက်ပါ (၅) ယောက်က တစ်ပြိုင်နက်တည်း ပစ်ခတ်လိုက်ခြင်း ဖြစ်သည်။

"မုန်းစရာကောင်းလိုက်တာ ”

"ဟေးလုံစခန်းမှာ ဒီလောက်အစွမ်းထက်တဲ့ အရန်အစီအစဉ် ရှိလိမ့်မယ်လို့ မထင်ထားဘူး"

အခြားဂိုဏ်းခေါင်းဆောင်တစ်ယောက်ဖြစ်သည်။ သူသည် ယခင်ခေါင်းဆောင် သေဆုံးသွားပုံကို မြင်သောအခါ ထိတ်လန့်သွားသည်။ ထိုသို့ ပြောပြီးနောက် ထိုခေါင်းဆောင်သည် တောအုပ်ထဲသို့ ပြေးဝင်ရန် ဘေးသို့ ထွက်ပြေးသည်။

"မင်းတို့ လွတ်မှာမဟုတ်ဘူး"

တုယွီထောက်က အေးစက်စွာ ရယ်မောပြီး သူတို့နောက်သို့ လိုက်သွား၏။ စနိုက်ပါကျည်ဆံ ထိမှန်ထားပြီး ကိုယ်ခန္ဓာတွင် ဒဏ်ရာများ ရှိနေသောကြောင့် ထိုခေါင်းဆောင်သည် ပြေးရသည်မှာ အလွန်နာကျင်နေသည်။ မကြာမီ တုယွီထောက်သည် နာကျင်မှုကြောင့် နှေးကွေးနေသော ထိုခေါင်းဆောင်ကို အမီလိုက်မိပြီး ဓားဖြင့် ခုတ်ပိုင်းလိုက်သည်။ တားဆီးရန် အစွမ်းကုန် ကြိုးစားသော်လည်း ထိုခေါင်းဆောင်သည် တုယွီထောက်၏ လက်ချက်ဖြင့် ခေါင်းပြတ်သွားရသည်။

"တန်ထိုက်ရှုံ့ရင်... ငါမင်းကို သေတဲ့အထိ တိုက်မယ်"

ပေချင်းရှန်းသည် ဟေးလုံစခန်းတွင် အလွန်အားကောင်းသည့် လျှို့ဝှက်လက်နက်ရှိနေပြီး လွတ်မြောက်နိုင်မည် မဟုတ်ကြောင်း သဘောပေါက်သွားသည်။ ဤအခြေအနေတွင် ပေချင်းရှန်းသည် ထွက်ပြေးရန် မကြိုးစားတော့ဘဲ တန်ထိုက်ရှုံ့ရင်နှင့် အပြန်အလှန် အသက်ပေး တိုက်ခိုက်ရန် ဆုံးဖြတ်လိုက်သည်။

"အချိန်ကိုက်ပဲ... ငါမင်းနဲ့ နည်းနည်းလောက် ကစားပေးမယ်"

တန်ထိုက်ရှုံ့ရင်သည်လည်း ရွှေခန္ဓာနယ်ပယ် အထွတ်အထိပ်တွင် ရှိနေသူဖြစ်ပြီး ပေချင်းရှန်းနှင့် တိုက်ပွဲကြီးတစ်ပွဲ ဆင်နွှဲလိုနေသည်။ ထို့ကြောင့် ရွှေခန္ဓာနယ်ပယ် အထွတ်အထိပ် ကျင့်ကြံသူ (၂) ဦးမှာ ပြင်းထန်စွာ တိုက်ခိုက်ကြတော့သည်။ တောင်ခြေရှိ စနိုက်ပါသမားများမှာလည်း မှန်ပြောင်းဖြင့်ကြည့်ရင်း ထိုသူ (၂) ဦးမှာ နေရာရွှေ့နေကြသဖြင့် မတော်တဆ ထိမှန်မည်ကို စိုးရိမ်ကာ ပစ်ခတ်ခြင်း မပြုကြပေ။

သို့သော် ကျန်ရှိနေသော ရွှေခန္ဓာနယ်ပယ် ခေါင်းဆောင် (၂) ဦးမှာ ပေချင်းရှန်းက တန်ထိုက်ရှုံ့ရင်ကို ထိန်းထားနိုင်သည်ကို မြင်သောအခါ ရုတ်တရက် ထခုန်၍ တောအုပ်ထဲသို့ ထွက်ပြေးရန် ကြိုးစားကြသည်။

ဒိုင်း..ဒိုင်း…

အခြား စနိုက်ပါအဖွဲ့ (၂) ဖွဲ့မှာ ထိုသူ (၂) ဦးကို အနီးကပ် စောင့်ကြည့်နေသည်။ သူတို့ ထွက်ပြေးသည်ကို မြင်သည်နှင့် စနိုက်ပါ (၁၀) တောင့်ကို ချက်ချင်း ပစ်ခတ်လိုက်သည်။ ထိုသူ (၂) ဦးစလုံးမှာ ရွှေခန္ဓာနယ်ပယ် နောက်ဆုံးအဆင့်တွင် ရှိသဖြင့် ကိုယ်ခန္ဓာသန်မာသော်လည်း တစ်ပြိုင်နက်တည်း ကျည်ဆံ (၁၀) တောင့်နှင့် အတိုက်ခံရသောအခါ ခန္ဓာကိုယ် မခံနိုင်တော့ပေ။ သူတို့၏ ကိုယ်ခန္ဓာတွင် ဒဏ်ရာ (၂) ချက်စီ ဖြစ်ပေါ်သွားပြီး ကျည်ဆံ (၂) တောင့်သည် ခန္ဓာကိုယ်ကို ဖောက်ဝင်ကာ ကိုယ်တွင်းကလီစာများထဲ စိုက်ဝင်သွား၏။ သူတို့ (၂) ဦးမှာ အလွန်နာကျင်စွာ အော်ဟစ်လိုက်ကြသည်။

ထိုအခြေအနေကို မြင်သောအခါ တုယွီထောက်နှင့် ချန်ဖန်ဟိုင်တို့သည် ချက်ချင်းရောက်ရှိလာပြီး တစ်ယောက်တစ်ချက်စီ ဓားဖြင့် ခုတ်ပိုင်းကာ ခေါင်းဖြတ်လိုက်ကြသည်။

"မင်းတို့ ကြေးဝါအရေပြားနယ်ပယ်နဲ့ သံမဏိအရိုးနယ်ပယ်ကလူတွေ... မလှုပ်နဲ့"

"မင်းတို့သာ ငါတို့ ဟေးလုံစခန်းထဲကို ဝင်ဖို့ ဆန္ဒရှိရင် အသက်ရှင်ခွင့်ရမယ်"

ဤအခိုက်တွင် တုယွီထောက်သည် မြေပြင်တွင် မှောက်လျက်ရှိသော ဓားပြ (၆၀၀) နီးပါးကို ကြည့်၍ ကျယ်လောင်စွာ အော်ဟစ်လိုက်သည်။ ဂိုဏ်း (၅) ခုမှ အဆင့်နိမ့် ဓားပြများသည် ထိုစကားကို ကြားသောအခါ ချက်ချင်း စိတ်သက်သာရာ ရသွားကြသည်။ သူတို့မှာ မည်သို့ပင်ဖြစ်စေ ဓားပြများဖြစ်ကြပြီး မည်သည့်ဂိုဏ်းသို့ ဝင်ရသည်မှာ အရေးမကြီးပေ။

"အခု မင်းတစ်ယောက်ပဲ ကျန်တော့တယ်"

တန်ထိုက်ရှုံ့ရင်သည် ပေချင်းရှန်းနှင့် အကြိတ်အနယ် တိုက်ခိုက်နေပြီး မည်သူမျှ အသာမရသေးချေ။ သူသည် တုယွီထောက်နှင့် ချန်ဖန်ဟိုင်တို့က ဓားပြအားလုံးကို အောင်မြင်စွာ သိမ်းပိုက်လိုက်သည်ကို မြင်သောအခါ တမင်ရည်ရွယ်၍ အော်ဟစ်လိုက်သည်။ ပေချင်းရှန်း၏ စိတ်ကို တုန်လှုပ်စေရန်အတွက်သာ ဖြစ်သည်။ ကျင့်ကြံသူများ တိုက်ခိုက်ကြသောအခါ အနိုင်အရှုံးမှာ အသေးအဖွဲ ကွာခြားချက်လေးပေါ်တွင် မူတည်နေသည်။

ပေချင်းရှန်းသည် ထိုအသံကို ကြားသောအခါ စိတ်ထဲတွင် ဗလာဖြစ်သွားပြီး ဓားကို ကိုင်ထားသည့် လက်မှာ တစ်ခဏမျှ တွေဝေသွားသည်။ တန်ထိုက်ရှုံ့ရင်သည် ဤအခွင့်အရေးကို ဆုပ်ကိုင်လိုက်သည်။ မူလက ခုတ်ချလိုက်သော ဓားကြီးမှာ ရုတ်တရက် လေထဲတွင် လှပသော လခြမ်းပုံသဏ္ဍာန်ကို ရေးဆွဲသွားပြီး ပေချင်းရှန်း၏ ဝမ်းဗိုက်တွင် ရှည်လျားသော ဒဏ်ရာကို ဖြစ်ပေါ်စေသွား၏။ ပေချင်းရှန်း၏ သွေးများမှာ ဒဏ်ရာမှ လျင်မြန်စွာ စီးကျလာသည်။

"ယုတ်မာလိုက်တာ"

ပေချင်းရှန်းသည် နာကျင်မှုကြောင့် မျက်နှာရှုံ့မဲ့သွားပြီး တန်ထိုက်ရှုံ့ရင်က ခုနက အသံကို တမင်အော်ဟစ်ခဲ့ခြင်း ဖြစ်ကြောင်း သိလိုက်ရသည်။ "ယုတ်မာခြင်း" ဆိုသည်မှာ ဘာကိုဆိုလိုသနည်း။

"ငါတို့တွေက ဓားပြတွေပဲ... ဘယ်သူက ပိုမြင့်မြတ်သလဲ"

"နိုင်သူက ဘုရင်ဖြစ်ပြီး ရှုံးသူက သူခိုးပဲ... မင်း ဒီသဘောတရားကို နားမလည်ဘူးလား"

တန်ထိုက်ရှုံ့ရင်သည် မထီမဲ့မြင် ပြုံး၍ တိုက်ခိုက်မှုကို ပိုမိုပြင်းထန်စေသည်။ ပေချင်းရှန်းမှာ စနိုက်ပါကျည်ဆံ ထိမှန်ထားပြီးဖြစ်၍ ပြင်းထန်စွာ ဒဏ်ရာမရသော်လည်း ခန္ဓာကိုယ်တွင် ကျည်ဆံရာအချို့ ရှိနေသည်။ ယခုအခါ ဝမ်းဗိုက်တွင် (၁၀) စင်တီမီတာကျော် ရှည်လျားသော ဒဏ်ရာတစ်ခု ထပ်မံရရှိသွားသဖြင့် သွေးများ အဆက်မပြတ် စီးကျနေ၏။ ရုတ်တရက် ပေချင်းရှန်း၏ လှုပ်ရှားမှုများမှာ အလွန်နှေးကွေးသွားပြီး ခန္ဓာကိုယ်မှ နာကျင်မှုကြောင့် ဓားကိုပင် မကိုင်ထားနိုင်တော့ပေ။

ပေချင်းရှန်းမှာ တန်ထိုက်ရှုံ့ရင်၏ မရပ်မနား တိုက်ခိုက်မှုများကို နောက်ဆုံးတွင် မခံနိုင်တော့ပေ။ တစ်ချက်တည်း ခုတ်ချလိုက်ခြင်းဖြင့် ပေချင်းရှန်း၏ ခေါင်းသည် လည်ပင်းမှ ပြုတ်ထွက်သွားလေသည်။ ကြေးဝါအရေပြားနယ်ပယ်နှင့် သံမဏိအရိုးနယ်ပယ်မှ ဓားပြများသည် ပေချင်းရှန်း၏ ခေါင်းပြတ်ကျသွားသည်ကို မြင်သောအခါ ပို၍ပင် တုန်လှုပ်သွားကြသည်။ ဤအချိန်တွင် ထိုဓားပြများမှာ တုံ့ပြန်ရန် စိတ်ကူးလုံးဝ မရှိတော့ပေ။

"ဟေးလုံစခန်းက ညီအစ်ကိုတွေ... ဒီကိုလာခဲ့ကြ"

တန်ထိုက်ရှုံ့ရင်သည် တောင်ခြေကို လက်ယက်ခေါ်လိုက်သည်။ စနိုက်ပါ (၅၀) တို့သည် မှန်ပြောင်းမှတစ်ဆင့် တန်ထိုက်ရှုံ့ရင် လက်ယက်ခေါ်နေသည်ကို မြင်ကြသည်။ ထို့ကြောင့် ဟေးလုံစခန်းမှ ဓားပြ (၃၀၀) သည် အားလုံး အနီးသို့ ရောက်ရှိလာသည်။ အညံ့ခံထားသော ဓားပြ (၆၀၀) မှာ စနိုက်ပါရိုင်ဖယ်များကို နောက်ဆုံးတွင် မြင်လိုက်ရပြီး ဂိုဏ်းခေါင်းဆောင်များ အပါအဝင် ရွှေခန္ဓာနယ်ပယ် ခေါင်းဆောင်များစွာမှာ ဤစနိုက်ပါများကြောင့် သေဆုံးခဲ့ရခြင်း ဖြစ်ကြောင်း သိလိုက်ရသည်။ စနိုက်ပါရိုင်ဖယ် (၅၀) သည် ရွှေခန္ဓာနယ်ပယ် ကျင့်ကြံသူ (၅၀) နှင့် ညီမျှပေသည်။

ထိုဓားပြများသည် တုံ့ပြန်ရန် သို့မဟုတ် ထွက်ပြေးရန် စိတ်ကူးပင် မရှိတော့ဘဲ လုံးဝ အညံ့ခံလိုက်ကြသည်။

"အခု မင်းတို့မှာရှိတဲ့ စားနပ်ရိက္ခာအားလုံးကို ပေးအပ်ကြ"

"ပြီးရင် မင်းတို့က လမ်းပြပေး... ဒီနေ့ ဟေးလုံစခန်းက မင်းတို့ ဂိုဏ်း (၅) ခုကို အမြစ်ပြတ် ချေမှုန်းပစ်မယ်"

"ဒီနေ့ကစပြီး ပေနင်စီရင်စုမှာ ဟေးလုံစခန်းပဲရှိရမယ်... တခြားဓားပြဂိုဏ်းအားလုံးကို ချေမှုန်းပစ်ရမယ်"

ဤအခိုက်တွင် တန်ထိုက်ရှုံ့ရင်က အညံ့ခံထားသော ဓားပြ (၆၀၀) ကို ပြောလိုက်သည်။

"ဟုတ်ကဲ့ပါ ခေါင်းဆောင်”

အညံ့ခံထားသော ဓားပြများသည် သစ္စာတရား မရှိကြသဖြင့် အားလုံးက ကျယ်လောင်စွာ ပြန်လည်ဖြေကြားကြသည်။ မကြာမီ ဟေးလုံစခန်းမှ ဓားပြများသည် အညံ့ခံသူ (၆၀၀) ကို သူတို့အဖွဲ့ထဲသို့ ပေါင်းထည့်လိုက်ပြီး စားနပ်ရိက္ခာများကို စုစည်းကာ တောင်ဂူတစ်ခုတွင် ဝှက်ထားလိုက်ကြသည်။ ထို့နောက် တန်ထိုက်ရှုံ့ရင်သည် ဓားပြ (၆၀၀) ကို လမ်းပြစေကာ ဂိုဏ်း (၅) ခုကို ချေမှုန်းရန် ဆက်လက်ချီတက်ကြတော့သည်။