အခန်း (၈၀)

အခန်း (၈၀) အားလုံးကို ငါ လိုချင်တယ်၊ ဝိညာဉ်ဖြင့် သူတော်စင်ကို အတင်းအကျပ် ဖိနှိပ်ခြင်း

အမျိုးသမီးမှာ မှင်တက်သွားပြီး ချင်လော့ကို မယုံကြည်နိုင်စွာ ကြည့်လိုက်၏။

သူမကဲ့သို့ မိန်းမလှ တစ်ဦး ဖြစ်နေပါလျက် ချင်လော့က မိန်းမလှကို ကယ်တင်မည့် သူရဲကောင်းတစ်ယောက် မဟုတ်ဘူးလား။

အဲဒီအစား သူက ကြည့်ချင်နေသေးတယ် ဟုတ်လား။

"ဟားဟားဟား..." ရိုင်းစိုင်းသော ရယ်မောသံတစ်ခု ထွက်ပေါ်လာခဲ့သည်။

" ကောင်းလိုက်တဲ့ကောင်လေးပဲ... မင်းမှာ ဒီလို အထူးဝါသနာမျိုး ရှိနေသေးတာပဲ... မဆိုးဘူး... မဆိုးဘူး..."

လူအနည်းငယ်ထဲမှ အမာရွတ်နှင့် လူတစ်ယောက်က ချင်လော့ကို အနည်းငယ် ထူးဆန်းသော အမူအရာဖြင့် ကြည့်ကာ ရက်ရောစွာ ပြောဆိုလိုက်၏။

"ခဏနေ ဦးလေး သူမကို လုပ်တဲ့အခါ မင်းကို သေချာ ကြည့်ခွင့်ပေးမယ်..."

"ညီအစ်ကိုတွေ ကစားလို့ ပြီးသွားရင် မင်းကိုလည်း မြည်းစမ်းခွင့် ပေးမယ်... ဒီလို ထိပ်တန်း မိန်းမလှမျိုးက ရှားတယ်ကွ... မိန်းမလှလေး... မပြေးပါနဲ့တော့..."

လူအနည်းငယ်က အမျိုးသမီးကို ဝိုင်းရံလိုက်ကြပြီး အမျိုးသမီး၏ သနားစရာကောင်းသော မျက်လုံးများက ချင်လော့အပေါ်သို့ ထပ်မံ ကျရောက်သွားခဲ့သည်။

ချင်လော့ကမူ ကောင်းမွန်သော ကိုယ်ဟန်အနေအထားဖြင့် တုန်လှုပ်ခြင်း မရှိပေ။

"ဟင့်အင်း... သူ စောင့်နေတာ ဖြစ်ရမယ်... အရေးကြီးတဲ့ အချိန်ရောက်တဲ့အထိ စောင့်ပြီးမှ သူ လှုပ်ရှားလိမ့်မယ်..."

အမျိုးသမီးက သူမ၏ နှလုံးသားထဲတွင် ကိုယ့်ကိုယ်ကိုယ် နှစ်သိမ့်ကာ ဤသို့ တွေးတောလိုက်၏။

ဤသို့ဆိုလျှင် သူမက ပို၍ပင် သနားစရာ ကောင်းလာခဲ့သည်။

‘ဗြစ်…’

သူမ၏ အဝတ်အစားများ ဆုတ်ဖြဲခံလိုက်ရပြီး နွေဦးအလင်းရောင် အနည်းငယ် ပေါ်ထွက်လာရာ ထိုလူရိုင်းများ၏ လိုချင်တပ်မက်မှုကို များစွာ တိုးပွားလာစေခဲ့သည်။

ချင်လော့ကလည်း မှတ်ချက်ချလိုက်၏။

"တော်တော်လေး ဖြူတာပဲ..."

‘ဗြစ်…’

နောက်ထပ် တစ်ခု ထပ်မံ ဆုတ်ဖြဲခံလိုက်ရပြီး အရေးကြီးသော အစိတ်အပိုင်းများ ပေါ်လွင်တော့မည်ကို မြင်လိုက်ရသည်။

ချင်လော့မှာ တုန်လှုပ်ခြင်း မရှိသေးပေ။

အမျိုးသမီးသည် လုံးဝ နားလည်သွားခဲ့သည်။

“ဒီနဝမမင်းသားက ယောက်ျားတစ်ယောက် မဟုတ်ဘူး… သူက မစွမ်းဆောင်နိုင်ဘူး…”

သူမ၏ မျက်လုံးများ အနည်းငယ် အေးစက်သွားပြီး ထိုလူများကို ကြည့်လိုက်ချိန်၌ အေးစက်သော သတ်ဖြတ်လိုသည့် ရည်ရွယ်ချက်များ ရှိနေခဲ့သည်။

ချင်လော့က လှုပ်ရှားရန် ဆန္ဒမရှိမှတော့ သူမကိုယ်တိုင်သာ ကယ်တင်နိုင်တော့မည် ဖြစ်၏။

ဝက်များနှင့် ခွေးများထက်ပင် နိမ့်ကျသော ဤကောင်များကြောင့် သူမ၏ အပြစ်ကင်းစင်မှုက ညစ်ညမ်းခံ၍ မရနိုင်ချေ။

‘ဘုန်း…’

အလွန် နက်ရှိုင်းစွာ ဖုံးကွယ်ထားသော ကျင့်ကြံမှုများ ပေါက်ကွဲထွက်လာခဲ့သည်။

"ကျင့်ကြံမှုကို ချိတ်ပိတ် ဖုံးကွယ်ထားတာပဲ..."

စုချန်ချန်သည်လည်း အနည်းငယ် အံ့အားသင့်သွားခဲ့သည်။ ချိတ်ပိတ်ထားသော နည်းလမ်းက အလွန် အထူးဆန်းဖြစ်ပြီး သူက အမျိုးသမီး၏ ကျင့်ကြံမှုကို တစ်ခဏမျှ မမြင်တွေ့ခဲ့ရချေ။

ယခုလေးတင် သူက ချင်လော့တွင် ဤကိစ္စနှင့် ပတ်သက်၍ အထူးဝါသနာ ပါနေသည်ဟုပင် တစ်ခဏမျှ ခံစားလိုက်ရသေးသည်။

"ဖုံးကွယ်ထားလို့ မရတော့ဘူးပဲ..."

ချင်လော့က လှောင်ပြောင်လိုက်၏။

"ငါ ပြောသားပဲ... ကံကြမ္မာသားတော် ကြုံတွေ့နိုင်တဲ့ ဇာတ်ကွက်မျိုးကို ငါက ဘယ်လိုလုပ် ကြုံတွေ့ နိုင်မှာလဲ..."

ဗီလိန်တစ်ယောက်အနေဖြင့် အခြားတစ်ဖက်၏ ရည်ရွယ်ချက်ကို အကြီးမားဆုံးသော မကောင်းယုတ်မာမှုဖြင့် စဉ်းစားသင့်ပေသည်။

သူမ၏ ကျင့်ကြံမှုက မနိမ့်ကျချေ။

နတ်ဘုရားအသွင်ပြောင်းအဆင့် နောက်ပိုင်းအဆင့်တွင် ရှိနေပေ၏။

အမျိုးသမီးက လှုပ်ရှားလိုက်သည်နှင့် တစ်ပြိုင်နက် အခြားအမျိုးသားများ၏ မျက်နှာများပေါ်တွင် ကြောက်ရွံ့မှု အမူအရာများ ပေါ်လာခဲ့သည်။

သူတို့သည် ပင်လယ်ဖွင့်လှစ်ခြင်းအဆင့်မှ အမှိုက်သရိုက်လေးများသာ ဖြစ်ပြီး အမျိုးသမီး၏ လက်ထဲတွင် တစ်ချီမျှပင် မခံလိုက်ရချေ။ မျက်တောင်တစ်ခတ်အတွင်း အပိုင်းပိုင်းအစစ ဆုတ်ဖြဲခံလိုက်ရသည်။

‘ဖြန်း... ဖြန်း... ဖြန်း…’

ချင်လော့က လက်ခုပ်တီးလိုက်၏။

"ဒီပြဇာတ်ကောင်းလေးက ကြည့်ရတာ တကယ်ကို စိတ်လှုပ်ရှားစရာ ကောင်းတာပဲ..."

"ဒါပေမဲ့ မင်းတို့ရဲ့ စီစဉ်သူက သေချာပေါက် အရူးတစ်ယောက်ပဲ... ဒီလို လုပ်ရိုးလုပ်စဉ်မျိုးကို ဘယ်သူက ယုံမှာလဲ... ဒါမှမဟုတ် သူတို့က မင်းရဲ့ စွမ်းရည်တွေကို အရမ်း ယုံကြည်နေတာလား... အရမ်း ယုံကြည်မှု လွန်ကဲနေတာလား..."

အမျိုးသမီး၏ မျက်နှာပေါ်ရှိ သတ်ဖြတ်လိုသော ရည်ရွယ်ချက်များ ပျောက်ကွယ်သွားပြီး ချင်လော့ထံသို့ ဆွဲဆောင်မှုရှိသော အပြုံးတစ်ခုဖြင့် လှည့်လာကာ ဖော်ထုတ်လိုက်ပြီး ပွင့်လင်းစွာ စတင်ပြောဆိုလိုက်သည်။

"မင်းသားက အစောကြီးကတည်းက သိနေခဲ့တာကိုး... ကျွန်မက မင်းသားက ကျွန်မကို သဘောမကျဘူးလို့တောင် ထင်နေခဲ့တာ..."

အချိန်တိုင်းတွင် ဆွဲဆောင်မှုရှိသော အငွေ့အသက်များကို ထုတ်လွှတ်ကာ ချင်လော့ကို လွှမ်းမိုးရန် ကြိုးစားနေသော်လည်း ချင်လော့က သူမ၏ အတွေးများကို နားလည်ထားသဖြင့် တုန်လှုပ်ခြင်း မရှိခဲ့ချေ။

"ပြောစမ်း... မင်းရဲ့ ရည်ရွယ်ချက်က ဘာလဲ... ဘယ်သူက မင်းကို လွှတ်လိုက်တာလဲ..."

ချင်လော့က မေးမြန်းလိုက်၏။

"မင်းသား... အရင်က လင်းရွှမ်ဆီကနေ တစ်ခုခုများ ရခဲ့သေးလား..."

အမျိုးသမီး၏ မျက်လုံးများက ချင်လော့ကို မျက်တောင်မခတ်ဘဲ စိုက်ကြည့်နေပြီး ဆွဲဆောင်မှုကို အသက်သွင်းလိုက်ရာ ချင်လော့၏ မျက်လုံးများထဲတွင် တစ်ခဏမျှ ဝေဝါးသွားမှုများ လင်းလက်သွားခဲ့သည်။

ချင်လော့က မျက်မှောင်ကြုတ်လိုက်ပြီး အငွေ့အသက်များကို အပြည့်အဝ ဖွင့်လှစ်ကာ အမျိုးသမီးကို ပြင်းထန်စွာ ရိုက်ခတ်လိုက်၏။

‘ဘုန်း…’

ဤအစွမ်းထက်သော အငွေ့အသက်က အမျိုးသမီး၏ ခန္ဓာကိုယ်ကို ချက်ချင်း ရိုက်ခတ်သွားခဲ့သည်။

"လိုဏ်ဂူကောင်းကင်အဆင့်..."

အမျိုးသမီးက အံ့အားသင့်စွာ ပါးစပ်ဟသွားပြီး သူမ၏ မျက်လုံးများထဲတွင် တုန်လှုပ်မှုများ ပေါ်လွင်နေခဲ့သည်။

ယခင်က ချင်လော့၏ ကျင့်ကြံမှုက ဘာလဲ။

အလွန်ဆုံးမှ နတ်ဘုရားအသွင်ပြောင်းအဆင့်သာ ရှိခဲ့သည်။

ယခု အချိန်ခဏလေးအတွင်းမှာပင် လိုဏ်ဂူကောင်းကင်အဆင့်သို့ တက်လှမ်းသွားပြီဖြစ်သည်။ ဤသည်ကို ကြောက်မက်ဖွယ်ကောင်းသည်ဟုပင် ဖော်ပြ၍ မရနိုင်တော့ချေ။

ထိုအရာသည် ချင်လော့၏ လက်ထဲတွင် သေချာပေါက် ရှိနေရမည်ဖြစ်ပြီး ချင်လော့က ထိုအရာမှ အကျိုးအမြတ်များ ရရှိနိုင်သဖြင့် ချင်လော့၏ ယနေ့ ကျင့်ကြံမှုက ကောင်းကင်ကို ဆန့်ကျင်သည့် အတိုင်းအတာအထိ ကြီးထွားလာခဲ့ခြင်း ဖြစ်မည်ဟု သူမ သေချာသွားခဲ့သည်။

‘ဖူး…’

အမျိုးသမီးက အပြည့်အဝ ခြေခုနစ်လှမ်း နောက်ဆုတ်သွားပြီး သွေးတစ်လုတ် အန်ထုတ်လိုက်ရကာ အနည်းငယ် ငြိမ်သက်သွားခဲ့၏။

"မင်းက ဘာကောင်မမို့လို့လဲ... မင်းတို့ လျှို့ဝှက်နဂါးတပ်အဖွဲ့က ငါ့ကို ဆွဲဆောင်ဖို့ ဒီလို အဆင့်နိမ့်တဲ့ ပစ္စည်းမျိုးကိုပဲ လွှတ်လိုက်တာလား..."

"မင်းတို့က ငါ့ကို အရမ်း အထင်သေးလွန်းနေပြီ..."

အမျိုးသမီးမှာ တုန်လှုပ်သွားခဲ့သည်။

ချင်လော့က သူမ၏ နောက်ကွယ်ရှိ အင်အားစုဖြစ်သော လျှို့ဝှက်နဂါးတပ်အဖွဲ့ကို တစ်ချက်တည်းဖြင့် ဖော်ထုတ်နိုင်လိမ့်မည်ဟု သူမ မမျှော်လင့်ထားခဲ့ချေ။

"မင်း ဘယ်လိုလုပ် သိတာလဲ..."

အမျိုးသမီးက ထိတ်လန့်တကြား ပြောဆိုလိုက်၏။

"ငါ သိထားတာတွေက မင်း တွေးထင်ထားတာထက် အများကြီး ပိုတယ်..."

ချင်လော့က အမျိုးသမီး ရှိရာသို့ တစ်လှမ်းချင်း လျှောက်သွားလိုက်သည်။

သူ၏လက်ထဲရှိ ချင်းဖုန်းဓားဖြင့် အမျိုးသမီး၏ မေးစေ့ကို ပင့်တင်လိုက်၏။

"ဘယ်လောက်တောင် လှပတဲ့ မျက်နှာလေးလဲ... ကျွတ် ကျွတ်..."

အမျိုးသမီး၏ မျက်နှာပေါ်တွင် ဆွဲဆောင်မှုများ ပွင့်လန်းလာပြီး ပြုံးကာ ပြောဆိုလိုက်သည်။

"မင်းသား... မင်းသားကသာ အဲ့ဒီပစ္စည်းတွေကို ထုတ်ပေးဖို့ ဆန္ဒရှိတယ်ဆိုရင် ကျွန်မက မင်းသားရဲ့ အမျိုးသမီး လုပ်ပေးနိုင်ပါတယ်..."

"ကျွန်မက အပျိုစင်လေးတစ်ယောက် ဖြစ်သေးတယ်နော်... ပြီးတော့ ကျွန်မက လူတွေကို ပြုစုပေးတဲ့နေရာမှာ အရမ်း တော်ပါတယ်…”

"ငါ့ရဲ့ အမျိုးသမီး လုပ်ပေးမယ် ဟုတ်လား... ဟားဟား... လေ့ကျင့်သင်ကြားခံထားရတဲ့ မင်းလို အစေခံမလေးက ထိုက်တန်လို့လား..."

ချင်လော့၏ လေသံတွင် အထင်အမြင်သေးမှုများ ပြည့်နှက်နေပေသည်။

"ငါ ခန့်မှန်းရသလောက်ဆိုရင် အနီးအနားက အမှောင်ထဲမှာ ပုန်းအောင်းနေတဲ့ သူတော်စင်အဆင့် အစွမ်းထက်သူ တချို့ ရှိနေရမယ် မဟုတ်လား..."

စုချန်ချန်၏ စိတ်က လှုပ်ရှားသွားပြီး သူ၏ အာရုံခံနိုင်စွမ်းက ပတ်ဝန်းကျင်သို့ ပျံ့နှံ့သွားကာ အဝေးတစ်နေရာတွင် အနည်းငယ် ထူးခြားနေမှုကို အမှန်တကယ်ပင် ရှာဖွေတွေ့ရှိခဲ့၏။

သူ၏ ပုံရိပ်က မျက်တောင်တစ်ခတ်အတွင်း ပျောက်ကွယ်သွားပြီး ဟိန်းဟောက်သံတစ်ခုကို ကြားလိုက်ရကာ အချိန်ခဏလေးအတွင်းမှာပင် စုချန်ချန်က သူတော်စင်တစ်ပါးကို သယ်ဆောင်လာပြီး ပစ်ချလိုက်လေ၏။

ထိုသူတော်စင်က မြေပြင်ပေါ်သို့ ကျဆင်းသွားသည်နှင့် တစ်ပြိုင်နက် ပြောဆိုလိုက်သည်။

"နဝမမင်းသား... ကျွန်တော်တို့မှာ ဘာမကောင်းတဲ့ ရည်ရွယ်ချက်မှ မရှိပါဘူး..."

"ကျွန်တော်တို့က မင်းသားနဲ့ အရောင်းအဝယ်တစ်ခုပဲ လုပ်ချင်တာပါ... မင်းသားက လင်းရွှမ်ဆီကနေ ရခဲ့တဲ့ ပစ္စည်းတွေကို ကျွန်တော်တို့ကို ပေးလိုက်ပါ... မင်းသား ဘာလိုချင်လဲ... အရာအားလုံးကို ဆွေးနွေးလို့ ရပါတယ်..."

ချင်လော့က လှောင်ပြောင်စွာဖြင့် ပြောဆိုလိုက်၏။

"တကယ်လို့ ငါက နတ်နဂါးသွေးအဆီအနှစ်ကို လိုချင်တယ်လို့ ပြောရင်ရော... မင်းတို့က ပေးမှာလား..."

ထိုသူတော်စင်က တစ်ခဏမျှ တွန့်ဆုတ်သွားပြီးနောက် ခေါင်းညိတ်လိုက်သည်။

"ပေးပါ့မယ်..."

"ကျွန်တော်တို့ဆီမှာလည်း တစ်စက်ပဲ ရှိပါတယ်... တကယ်လို့ မင်းသားက အရောင်းအဝယ်ကို သဘောတူတယ်ဆိုရင် နတ်နဂါးသွေးအဆီအနှစ်ကို လက်နှစ်ဖက်နဲ့ ဆက်သပါ့မယ်..."

"ဒါပေမဲ့ အဲ့ဒီပစ္စည်းက မင်းသားရဲ့ လက်ထဲမှာ အမှန်တကယ် ရှိနေတယ်ဆိုတာကို ကျွန်တော်တို့ သေချာအောင် အရင်လုပ်ရပါမယ်..."

ဤသည်က ချင်လော့ကို အမှန်တကယ် အံ့အားသင့်သွားစေခဲ့သည်။ တစ်ဖက်လူက အလွန် ရက်ရောပြီး သူတို့၏ လက်ထဲတွင် ကောင်းမွန်သော ပစ္စည်းများစွာ ရှိနေပေ၏။

ချင်လော့က တစ်ခဏမျှ တွေးတောလိုက်ပြီးနောက် ခေါင်းကို ဖြည်းညင်းစွာ ခါယမ်းလိုက်သည်။

"ငါ မင်းတို့ကို မယုံဘူး..."

"မင်းသား... ကျွန်တော်တို့က အရမ်း ရိုးသားပါတယ်... မင်းသား မယုံဘူးဆိုရင် မဟာတာအို သစ္စာဆိုလို့ ရပါတယ်..."

ချင်လော့က ပြုံးလိုက်၏။

"မဟာတာအို သစ္စာဆိုတာကိုလည်း ငါ မယုံဘူး..."

"မင်းတို့က ငါ့လူတွေ ဖြစ်လာရင်ရော ဘယ်လိုလဲ..."

"အမှန်အတိုင်း ပြောရရင်... လျှို့ဝှက်နဂါးတပ်အဖွဲ့ အားလုံးကို ငါ လိုချင်တယ်..."

ချင်လော့က လက်ကို ဝှေ့ယမ်းကာ လူသားဧကရာဇ်အလံကို ထုတ်လိုက်သည်။

သူက လျှို့ဝှက်နဂါးတပ်အဖွဲ့ထဲတွင် သံမှိုအနည်းငယ် မြှုပ်နှံထားရန် စီစဉ်ထားရာ သူ၏ရှေ့ရှိ ဤလူနှစ်ဦးက ရွေးချယ်မှုကောင်းတစ်ခု မဟုတ်ပါလား။

"ရှီးဟွမ်... သူတို့ရဲ့ ဝိညာဉ်ထဲမှာ အမှတ်အသား လုပ်ထားချင်တယ်..."

ချင်လော့၏ ငြင်းဆန်၍မရသော အသံ ထွက်ပေါ်လာခဲ့၏။

"မင်း ငါ့ကို ကူညီပေး..."

လူသားဧကရာဇ်အလံသည် ယခုအခါ ချင်လော့၏ ၁၀ ခ မြောက် လိုဏ်ဂူကောင်းကင်အဖြစ် သန့်စင်ခြင်း ခံထားရပြီးဖြစ်သည်။

ဝိညာဉ်သန့်စင်မီးဖိုမဟာကျင့်စဉ်၊ လူသားဧကရာဇ်အလံနှင့် ရှီးဟွမ်တို့ ပေါင်းစပ်လိုက်လျှင် သူ၏ ဝိညာဉ်က သူတော်စင်အစောပိုင်းအဆင့် တစ်ပါးကို မဖိနှိပ်နိုင်ဘဲ နေမည်လား။

အတင်းအကျပ် ဖိနှိပ်လိုက်သည်။

သေခြင်းရှင်ခြင်းတံဆိပ်တုံးကို ရိုက်နှိပ်လိုက်၏။

အမျိုးသမီးနှင့် ပတ်သက်၍မူ သေးငယ်သော နတ်ဘုရားအသွင်ပြောင်းအဆင့်သာ ဖြစ်ရာ ကိုင်တွယ်ရန် အလွန် လွယ်ကူလှပေသည်။

‘ဘုန်း…’

ကြီးမားသော ဝိညာဉ်လှိုင်းလုံးကြီးများက ထိုသူတော်စင်၏ ဝိညာဉ်ပင်လယ်ဆီသို့ ရိုက်ခတ်သွားခဲ့သည်။

"အရူးကောင်... မင်းက ငါ့ရဲ့ ဝိညာဉ်ကို တိုက်ခိုက်ချင်နေတာလား..."

သူတော်စင်က လှောင်ပြောင်လိုက်၏။

"ဒါဆိုရင် ဒီနေ့ ဒီသူတော်စင်က မင်းနဲ့ ကစားပေးမယ်... နဝမမင်းသား... ဒါက မင်းဘာသာ သေလမ်းရှာတာပဲ…”