အခန်း ၁၉၁

အခန်း (၁၉၁) ယွီဝမ်ချန်ကို ဖမ်းဆီးခြင်းနှင့် ကံကြမ္မာနတ်ဘုရားကျောက်စာပြား

"မင်းတို့နှစ်ယောက် ထွက်သွားလို့ရပြီ..."

ကျောက်လင်က သူမ၏ အာကာသတဲအတွင်းသို့ ဝင်လာသည်ကို မြင်သောအခါ ယွီဝမ်ချန်က နောက်ထပ် ဘာဖြစ်လာမည်ကို အတိအကျ သိနေသောကြောင့် သူမ၏ အမျိုးသမီး အစေခံနှစ်ဦးကို ထွက်သွားခိုင်းလိုက်၏။ ဤအမျိုးသမီးနှစ်ဦးသည် ၎င်းတို့၏ ကျင့်ကြံခြင်းစွမ်းရည်များကို ဆုံးရှုံးသွားခဲ့ပြီ ဖြစ်သော်လည်း လင်းယုန်ပျံဂိုဏ်းတွင်ရှိစဉ်က သူမအပေါ် အလွန်သစ္စာရှိခဲ့ပြီး သူမ၏ အပျိုစင်ဘဝကို ကာကွယ်ပေးခဲ့သောကြောင့် ယွီဝမ်ချန်က သူတို့ကို သူမ၏ အနီးနားတွင် ဆက်ထားခဲ့ခြင်း ဖြစ်သည်။

"သခင်မလေး..."

ထိုအစေခံ နှစ်ဦးက ကျောက်လင်သည် ယွီဝမ်ချန်အပေါ် ဘာလုပ်ရန် ရည်ရွယ်ထားကြောင်းကို နားလည်ထားသောကြောင့် သူတို့မှာ စိုးရိမ်ပူပန်လာကြ၏။

"ထွက်သွားကြစမ်း..."

ယွီဝမ်ချန်က ဒေါသထွက်ဟန်ဆောင်ကာ အမိန့်ပေးလိုက်၏။

အမျိုးသမီးနှစ်ဦးက ကျောက်လင်ကို မုန်းတီးသော အကြည့်များဖြင့် စိုက်ကြည့်လိုက်ကြသော်လည်း နောက်ဆုံးတွင် အမိန့်ကို နာခံကာ တဲအတွင်းမှ ထွက်သွားကြသည်။ ကျောက်လင်က တဟဲဟဲ ရယ်မောလိုက်ပြီး သူတို့ထွက်သွားသည်နှင့် တံခါးကို သော့ခတ်လိုက်၏။

"မင်းက ရွှေခန္ဓာနယ်ပယ် စွမ်းအားကို ပြန်ရသွားပြီဆိုတော့ မင်းရဲ့ ကတိကို တည်ရမယ့် အချိန်ရောက်ပြီပေါ့..."

ကျောက်လင်က အနားသို့ လျှောက်သွားကာ ယွီဝမ်ချန်၏ ဘေးနားရှိ ကုတင်စွန်းတွင် ထိုင်လိုက်ပြီး သူမ၏ လက်ကို ရဲတင်းစွာ ဆုပ်ကိုင်လိုက်သည်။ သူတို့၏ သဘောတူညီချက်အရ ယွီဝမ်ချန်က ရွှေခန္ဓာနယ်ပယ်သို့ ရောက်ရှိသွားသည်နှင့် သူမက သူ့ကို လက်ထပ်ရမည်ဖြစ်၏။

ယွီဝမ်ချန်က ကျောက်လင်၏ ယောက်ျားပီသသော အငွေ့အသက်ကို ခံစားလိုက်ရပြီး အနည်းငယ် ထိတ်လန့်သွားခဲ့သည်။ သူမက သူ့ကို ယုံကြည်ရန် ဆုံးဖြတ်ထားခဲ့သော်လည်း ယခု အချိန်ကျရောက်လာသောအခါ သူမ၏ ရင်ထဲတွင် ပြင်းထန်သော စိုးရိမ်မှုများဖြင့် ပြည့်နှက်နေ၏။ မည်သို့ပင်ဆိုစေကာမူ ဤအချိန်သည် သူမ၏ ကံကြမ္မာတစ်ခုလုံးကို ပုံအောရမည့် အချိန်ပင် ဖြစ်သည်။

"ကျောက်လင် ငါက ငါ့ကတိကို မတည်ခင်မှာ ငါ့ရဲ့ နောက်ခံအကြောင်းကို နင့်ကို ပြောပြချင်တယ် အဲ့ဒီနောက်မှ နင်က ငါ့ကို လက်ထပ်ချင်သေးသလားဆိုတာ ဆုံးဖြတ်လို့ရတယ်..."

ယွီဝမ်ချန်က ရုတ်တရက် တည်ငြိမ်စွာဖြင့် ပြောလိုက်၏။ သူမ၏ နောက်ခံအကြောင်းများအားလုံးကို ကျောက်လင်က စနစ်ထံမှ သိရှိထားပြီးဖြစ်ကြောင်းကို သူမ မသိခဲ့ပေ။

"ကောင်းပြီ ဆက်ပြောလေ..."

ကျောက်လင်က စနစ်၏ လျှို့ဝှက်ချက်ကို ထုတ်မပြောဘဲ စိတ်ရှည်လက်ရှည် နားထောင်နေလိုက်၏။

"ငါက အရင်မင်းဆက်ရဲ့ မင်းသမီးတစ်ပါးပဲ..."

သူမက စတင်ပြောပြလေသည်။

"မဟာလီမင်းဆက် ပြိုလဲသွားတဲ့အခါ အိမ်ရှေ့စံမင်းသားက အလယ်ပိုင်းစစ်တပ်ကို ထိန်းချုပ်ပြီး နန်ယွဲ့တိုင်းပြည်ဆီကို တောင်ဘက်ကို ထွက်ပြေးသွားခဲ့တယ် ဒုတိယမင်းသားက အနောက်ပိုင်းဒေသစစ်တပ်ကို ခေါ်ပြီး ဂေါင်ဖန်တိုင်းပြည်ဆီကို သွားခဲ့တယ် ပြီးတော့ တတိယမင်းသားက မြောက်ပိုင်းတပ်စခန်းကို ဦးဆောင်ပြီး မြောက်ဘက် ကန္တာရမြက်ခင်းပြင်ဆီကို ထွက်သွားခဲ့တယ်..."

"ခမည်းတော်က တောင်ဘက်ကို ထွက်ပြေးတဲ့ လမ်းမှာတင် ကွယ်လွန်သွားခဲ့တယ် အဲ့ဒီအချိန်ကစပြီး မင်းသားသုံးပါးက တစ်ယောက်အမိန့်ကို တစ်ယောက် မနာခံကြတော့ဘဲ ကိုယ့်အသက်ရှင်သန်ရေးအတွက်ပဲ ကြိုးစားခဲ့ကြတယ် သူတို့က သူတို့ရဲ့ စစ်ရေးအင်အားကို အားကိုးပြီး အဲ့ဒီတိုင်းပြည်သုံးခုမှာ အခြေချဖို့နဲ့ ပြန်လည်ထကြွဖို့ အကြံအစည်တွေ ရှိနေကြတယ် ခမည်းတော်က မကွယ်လွန်ခင်မှာ ငါ့ကို သူ့အနား ခေါ်ပြီး မဟာလီမင်းဆက်ကို ပြန်လည်တည်ထောင်ဖို့ ငါ့ရဲ့ ဘဝပေးတာဝန်တစ်ခုအနေနဲ့ သတ်မှတ်ဖို့ အမိန့်ပေးခဲ့တယ်..."

"ပြီးခဲ့တဲ့အကြိမ်က ငါက နန်ယွဲ့ကို သွားပြီး ငါ့ရဲ့ အစ်ကိုအကြီးဆုံးဖြစ်တဲ့ အိမ်ရှေ့စံမင်းသားကို စစ်တပ် ပြန်လည်တည်ဆောက်ဖို့နဲ့ ဒုတိယအစ်ကို တတိယအစ်ကိုတို့နဲ့ ပူးပေါင်းဖို့ ကြိုးစားဖျောင်းဖျခဲ့တယ် အဲ့ဒါမှ တပ်ဖွဲ့သုံးခုလုံးက မဟာချင်မင်းဆက်ကို ရုတ်တရက် ဝင်ရောက်တိုက်ခိုက်နိုင်မှာလေ ဒါပေမဲ့ ငါ့အစ်ကိုအကြီးဆုံးက ငါက မဟာလီမင်းဆက်ရဲ့ စစ်သူကြီးတွေအပေါ်မှာ လွှမ်းမိုးမှု အများကြီး ရှိနေမှာကို စိုးရိမ်ပြီး ငါ့ကို ယင်ရှာဆေးလုံးတွေနဲ့ တိတ်တဆိတ် အဆိပ်ခတ်ခဲ့တယ်..."

"ငါ နင့်ကို အခုလို ပြောပြရတာက ငါ နင့်ဘေးနားမှာ အကြာကြီး နေနိုင်မှာ မဟုတ်ဘူးဆိုတာကို နင် နားလည်အောင်လို့ပါ ငါက ခမည်းတော်ရဲ့ နောက်ဆုံးဆန္ဒအတိုင်း မင်းဆက်ကို ပြန်လည်တည်ထောင်ဖို့ လုပ်ဆောင်သွားမှာဖြစ်ပြီး အဲ့ဒီတိုက်ပွဲမှာ ငါ့ဘဝတစ်သက်တာလုံး အချိန်ကုန်သွားနိုင်တယ် ဒါ့အပြင် ငါက ယခင်မင်းဆက်ရဲ့ မင်းသမီးတစ်ပါးဆိုတဲ့ ကိုယ်ပိုင်လက္ခဏာ ပေါ်ပေါက်သွားရင် နင်က ကြီးမားတဲ့ ပြဿနာတွေနဲ့ ရင်ဆိုင်ရလိမ့်မယ်ဆိုတာကိုလည်း နင် သဘောပေါက်ရမယ် ကဲ အခု နင် ဆုံးဖြတ်ချက်ချလို့ရပြီ နင် ငါ့ကို လက်ထပ်ချင်သေးလား..."

ကျောက်လင်က တည်ငြိမ်စွာ ပြုံးလိုက်၏။ ယွီဝမ်ချန်က အတော်လေး ပွင့်လင်းလှသည်။ သူမ၏ ရည်ရွယ်ချက်ကို သူ နားလည်နေ၏။ ဤသို့ ပြောဆိုခြင်းဖြင့် သူမကို လက်ထပ်ခြင်းသည် မဟာလီမင်းဆက်၏ ရထားလုံးပေါ်သို့ ကိုယ်တိုင် တွယ်တက်သွားခြင်းဖြစ်ကြောင်း ကျောက်လင်ကို သူမက သတိပေးနေခြင်း ဖြစ်သည်။ အကျိုးအမြတ်က နည်းပါးလှပြီး အားနည်းချက်ကမူ မဟာချင်မင်းဆက်၏ လိုက်လံဖမ်းဆီးခြင်းကို ခံရနိုင်ခြေပင် ဖြစ်သည်။

သို့သော်လည်း ကျောက်လင်က အပြည့်အဝ တည်ငြိမ်နေဆဲ ဖြစ်သည်။ ဤကမ္ဘာတွင် စွမ်းအားကသာ အရာအားလုံးကို ဆုံးဖြတ်ပေသည်။ ကျောက်လင်က စနစ်၏ အကူအညီဖြင့် ဤကမ္ဘာကြီးတွင် ကြီးစိုးသူတစ်ဦး အသေအချာ ဖြစ်လာလိမ့်မည်ဟု အမြဲတမ်း ယုံကြည်ချက် ရှိနေခဲ့၏။

ထိုအချိန်ရောက်လျှင် သူသည် ယခင်မင်းဆက်မှ မင်းသမီးတစ်ပါးကို လက်ထပ်ခဲ့သည်ဖြစ်စေ၊ မဟာချင်မင်းသမီးတစ်ပါးကို ပြဿနာရှာခဲ့သည်ဖြစ်စေ သူ့ကို မည်သူက တားဆီးနိုင်မည်နည်း။ သူသည် ယခင် စီရင်စုဝန်၏ သမီးဖြစ်သူ ရှန်ချန်းရွှယ်ကိုပင် လက်ထပ်ခဲ့ပြီးပြီဖြစ်ရာ ယခင်မင်းဆက်မှ မင်းသမီးတစ်ပါးကို လက်ထပ်ရန် အဘယ်ကြောင့် ကြောက်ရွံ့နေရမည်နည်း။

ထို့အပြင် ယွီဝမ်ချန်၏ ကိုယ်ပိုင်လက္ခဏာ ပေါ်ပေါက်သွားမည့် အချိန်ရောက်လျှင် သူ၏ စွမ်းအားများသည် အထွတ်အထိပ် နယ်ပယ်တစ်ခုသို့ ရောက်ရှိနေလိမ့်မည်ဟု ကျောက်လင်က အပြည့်အဝ ယုံကြည်ထားသည်။ မဟာချင်မင်းဆက်က သူနှင့် မိတ်ဆွေဖွဲ့ရန် ရွေးချယ်မည်လား သို့မဟုတ် လိုက်လံသတ်ဖြတ်မည်လား ဆိုသည်မှာ အဖြေမသေချာသော မေးခွန်းတစ်ခုသာ ဖြစ်ပေလိမ့်မည်။ အတိုချုပ်ပြောရလျှင် ကျောက်လင်က သူ၏ ကိုယ်ပိုင်စွမ်းအားကို တိုးမြှင့်ရန် အာရုံစိုက်ထားသရွေ့ အခြားသော ပြဿနာအားလုံးသည် အလိုလို ပြိုကွဲသွားမည်သာဖြစ်၏။

"လက်ထပ်မှာလား ဟုတ်တာပေါ့ ငါက မင်းကို လက်ထပ်ချင်တယ်..."

ကျောက်လင်က ညင်သာစွာ ပြောလိုက်သည်။

"အနာဂတ်မှာ မင်းက ဘယ်လောက်ပဲ ပြဿနာတွေရှာရှာ မင်းအသက်ရှင်အောင် ငါက ကာကွယ်ပေးနိုင်တယ်ဆိုတာကို မင်းရဲ့ ခင်ပွန်းက အာမခံတယ်..."

ထိုစကားများကို ကြားလိုက်ရသောအခါ ယွီဝမ်ချန်၏ ကြယ်ပွင့်ကဲ့သို့သော မျက်လုံးများတွင် မျက်ရည်များ ဝဲတက်လာခဲ့၏။ ယခုအခါ သူမတွင် နောက်ဆုံး ဆုတ်ခွာစရာ နေရာတစ်ခု ရှိသွားပြီ ဖြစ်သည်။ ယွီချီတောင်ထွတ်မှ မဟာလီမင်းဆက်၏ နိုင်ငံတော်တံဆိပ်တုံးကို ခိုးယူရမည် းဖြစ်ကြောင်းနှင့် နန်ယွဲ့ရှိ အိမ်ရှေ့စံမင်းသား၏ အလယ်ပိုင်းစစ်တပ်ကို ထိန်းချုပ်ပြီး ဂေါင်ဖန်သို့ ခရီးရှည်သွားကာ ဒုတိယမင်းသား၏ အနောက်ပိုင်းဒေသစစ်တပ်ကို အကြံအစည်ဖြင့် တိုက်ခိုက်ရန် လိုအပ်ကြောင်းကို သူမက မည်သူ့ထက်မဆို ပိုသိနေသည်။ ထို့အပြင် မြောက်ဘက် ကန္တာရမြက်ခင်းပြင်ဆီသို့ အပြေးအလွှားသွားကာ တတိယမင်းသား၏ မြောက်ပိုင်းတပ်စခန်းကို သူမ၏ လက်အောက်သို့ ရောက်ရှိစေရန် လုပ်ဆောင်ရမည် ဖြစ်ကြောင်းကိုလည်း သူမ ကောင်းစွာ သိရှိထား၏။

တိုင်းပြည်သုံးခုတွင် သူတို့၏ စစ်ရေးအင်အားကို ချဲ့ထွင်ရန်ဖြစ်စေ သို့မဟုတ် မဟာချင်မင်းဆက်ကို နေရာသုံးခုမှ ဝင်ရောက်တိုက်ခိုက်ရန်ဖြစ်စေ သူမသည် အမြဲတစေ အန္တရာယ်များနှင့် ရင်ဆိုင်ရမည်သာ ဖြစ်သည်။ သေဆုံးရန် အခွင့်အလမ်း ဆယ်ပုံကိုးပုံရှိသော စစ်ပွဲတစ်ခုတွင် သူမအတွက် ထွက်ပေါက်မရှိဘဲ အဆုံးတိုင်အောင် တိုက်ပွဲဝင်ရန်သာ ရှိသည်ဟု ယွီဝမ်ချန်က တွေးထင်ထားခဲ့၏။ သို့သော် ယခုအခါတွင်မူ ကွဲပြားသွားခဲ့ပြီ ဖြစ်သည်။ သူမက ကျောက်လင်ဟူသော ဆုတ်ခွာစရာ နေရာတစ်ခုကို ရှာတွေ့ခဲ့ပြီ ဖြစ်၏။ ထိုခံစားချက်က အလွန်ပင် နွေးထွေးလှသည်။

"ကျေးဇူးတင်ပါတယ် ကျောက်လင်..."

ယွီဝမ်ချန်က နောက်ဆုံးတွင် မျက်ရည်တစ်ပေါက် ကျဆင်းသွားစေလိုက်၏။ သူမ အချိန်ကြာမြင့်စွာ ဖိနှိပ်ထားခဲ့ရသော ဝမ်းနည်းမှုများအားလုံးက ထိုမျက်ရည်များနှင့်အတူ စီးဆင်းသွားခဲ့ပြီး သူမ၏ ရင်ထဲတွင် များစွာ ပေါ့ပါးသွားသလို ခံစားလိုက်ရသည်။

"အခု ငါက ခင်ပွန်းတစ်ယောက်ရဲ့ အခွင့်အရေးတွေကို ကျင့်သုံးရတော့မယ်..."

ကျောက်လင်က ရုတ်တရက် ပြောလိုက်ရာ ရှိနေသော အငွေ့အသက်များကို လုံးဝ ပျက်စီးသွားစေသည်။

"နင်ကတော့ တော်တော် စိတ်ညစ်ဖို့ကောင်းတာပဲ..."

ရှက်သွေးဖြာကာ ဒေါသထွက်နေသော ယွီဝမ်ချန်က သူမ၏ လက်သီးဆုပ်လေးများဖြင့် ကျောက်လင်၏ ရင်ဘတ်ကို သနားညှာတာမှု ကင်းမဲ့စွာ ထုရိုက်လိုက်၏။

“ဟားဟား “

ကျောက်လင်က ဆက်၍ မစောင့်ဆိုင်းနိုင်တော့ပေ။ သူသည် အက်စ်အဆင့် အလှပိုင်ရှင်တစ်ဦး၏ အရသာကို တောင့်တနေခဲ့သည်မှာ အလွန်ကြာမြင့်နေပြီ ဖြစ်၏။ ဤအချိန်တွင် မည်သူကများ ထိန်းချုပ်ထားနိုင်မည်နည်း။

ထို့ကြောင့် သားရဲတစ်ကောင်က သားရဲဆန်သော လုပ်ရပ်များကို ဆက်တိုက် ပြုလုပ်လေတော့သည်။

တစ်နာရီကြာပြီးနောက် ကျောက်လင်က သက်ပြင်းရှည်ကြီးတစ်ခုကို ချလိုက်၏။ သူ အတော်လေး ပင်ပန်းသွားခဲ့ပြီ ဖြစ်သည်။ အက်စ်အဆင့် အလှပိုင်ရှင်တစ်ဦးသည် အမှန်တကယ်ပင် ထူးခြားလှပေသည်။ အနားယူရန် မလှဲလျောင်းမီ ကျောက်လင်၏ အသိစိတ်က စနစ်မျက်နှာပြင်ဆီသို့ ချက်ချင်း ရောက်ရှိသွားခဲ့သည်။

[ ပိုင်ရှင်မှ ဇနီးဖြစ်သူ ယွီဝမ်ချန်နှင့် အိမ်ထောင်ရေးကိစ္စကို အောင်မြင်စွာ ပြီးမြောက်ခဲ့သည့်အတွက် ဂုဏ်ယူပါသည်။ စနစ်မှ ပိုင်ရှင်အား နှစ်တစ်ရာစာ ကျင့်ကြံခြင်းစွမ်းအားကို ဆုချီးမြှင့်လိုက်သည်။ ]

[ ပိုင်ရှင်၏ ဇနီးဖြစ်သူ ယွီဝမ်ချန် ကိုယ်ဝန်အောင်မြင်စွာ ရရှိသွားသည့်အတွက် ဂုဏ်ယူပါသည်။ စနစ်မှ ပိုင်ရှင်အား ကံကြမ္မာနတ်ဘုရားကျောက်စာပြားကို ဆုချီးမြှင့်လိုက်သည်။ ]

သောက်ကျိုးနည်း…သောက်ကျိုးနည်း ….သောက်ကျိုးနည်း….

ထိုသို့သော အံ့သြဖွယ်ရာအတွက် သူက သုံးကြိမ်တိုင်တိုင် ရေရွတ်လိုက်ရ၏။ နှစ်တစ်ရာစာ ကျင့်ကြံခြင်းစွမ်းအားတဲ့လား။

ကျောက်လင်က စိတ်ကို တည်ငြိမ်အောင်ထားလိုက်ပြီး စနစ်နေရာလွတ်ထဲရှိ ကံကြမ္မာနတ်ဘုရားကျောက်စာပြားအပေါ်သို့ သူ၏ အသိစိတ်ကို အာရုံစိုက်လိုက်သည်။ ဤဝိညာဉ်ရတနာ၏ လုပ်ဆောင်ချက်ကို သူ လျင်မြန်စွာ သိရှိသွားခဲ့၏။ ဝိညာဉ်ရတနာများဆိုသည်မှာ နဝမအဆင့်ရှိ ကျင့်ကြံသူများမှသာ ဖန်တီးနိုင်သော လက်နက်များဖြစ်ပြီး အလွန်ထူးခြားသော စွမ်းရည်များကို ပိုင်ဆိုင်ထားကြသည်။ ထို့ပြင် ဤကံကြမ္မာနတ်ဘုရားကျောက်စာပြားသည် ထိုကဲ့သို့သော ရတနာများထဲတွင် သေချာပေါက် အမြင့်ဆုံးအဆင့်တွင် ရှိနေပေသည်။

၎င်းက လူတစ်ယောက်၏ ကံကြမ္မာကို ထိန်းချုပ်နိုင်စွမ်း ရှိပေသည်။

ဆိုလိုသည်မှာ ကျောက်လင်အနေဖြင့် ပစ်မှတ်၏ သွေးတစ်စက်ကို ကျောက်စာပြားထဲသို့ ထည့်လိုက်ရုံဖြင့် ထိုအချိန်မှစ၍ သူတို့၏ ကံကြမ္မာကို သူ ခြယ်လှယ်နိုင်မည်ဖြစ်သည်။ သူတို့ အသက်ရှင်ခြင်း သို့မဟုတ် သေဆုံးခြင်းဆိုသည်မှာ ကျောက်လင်၏ ဆန္ဒအပေါ်တွင်သာ လုံးလုံးလျားလျား မူတည်နေ၏။ သို့သော်လည်း ကံကြမ္မာနတ်ဘုရားကျောက်စာပြားကို အသုံးပြုခြင်းအတွက် ပေးဆပ်ရမည့် တန်ဖိုးတစ်ခု ရှိနေကြောင်းကို ကျောက်လင် မကြာမီမှာပင် သိရှိသွားခဲ့သည်။

ဥပမာအားဖြင့် အကယ်၍ ကျောက်လင်က ကျောက်စာပြားကို အသုံးပြုပြီး ပစ်မှတ်တစ်ခု၏ စွမ်းအားကို တိုးမြှင့်ချင်ပါက သူ၏ ကိုယ်ပိုင် ဝိညာဉ်စွမ်းအားကို စုပ်ယူပြီး သူတို့ထံသို့ ပေးပို့ရမည် ဖြစ်သည်။ အကယ်၍ သူက သူ့ထက်ပို၍ အားကောင်းသော ပစ်မှတ်တစ်ခုကို စွမ်းအားမြှင့်တင်ပေးရန် ကြိုးစားပါက သူ၏ အသက်အန္တရာယ်ကို ထိခိုက်နိုင်ခြေရှိသောကြောင့် ၎င်းကို အသုံးပြုရန် သူ ရဲတင်းမည် မဟုတ်ပေ။

အကယ်၍ သူက ပစ်မှတ်ကို စွမ်းအားကြီးမားသော လက်နက်တစ်ခုကို မတော်တဆ ရှာတွေ့သွားစေချင်ပါက သူကိုယ်တိုင် ထိုလက်နက်ကို ထောက်ပံ့ပေးရမည်ဖြစ်သည်။ ကျောက်စာပြားက ပစ္စည်းများ ဖန်တီးပေးခြင်းကို မလုပ်ဆောင်ဘဲ နေရာပြောင်းရွှေ့ပေးခြင်းကိုသာ ကိုင်တွယ်ဆောင်ရွက်ပေးခြင်း ဖြစ်၏။

အနည်းငယ် စိတ်ပျက်သွားသလို ခံစားလိုက်ရသော်လည်း ကျောက်လင်က ကျောက်စာပြား၏ အခြားသော အသုံးဝင်မှုတစ်ခုကို မကြာမီ ရှာတွေ့သွားခဲ့ပြီး သူ၏ မျက်နှာပေါ်တွင် အံ့သြဝမ်းသာမှုများ လင်းလက်သွားခဲ့သည်။ ဥပမာအားဖြင့် ကံကြမ္မာနတ်ဘုရားကျောက်စာပြားထဲရှိ ပစ်မှတ်က ကျောက်လင်ထက် ပို၍ အားကောင်းနေပါက သူသည် ကျောက်စာပြားကို ထိန်းချုပ်ကာ ပစ်မှတ်၏ လက်နက်များ၊ ဝိညာဉ်စွမ်းအား သို့မဟုတ် ရတနာများကို စုပ်ယူနိုင်သည် သို့မဟုတ် ပစ်မှတ်ကို သတ်မှတ်ထားသော လုပ်ရပ်များ လုပ်ဆောင်စေရန်ပင် လမ်းညွှန်ပေးနိုင်ပေသည်။

သူ ၎င်းကို ပို၍ လေ့လာမိလေလေ ကံကြမ္မာနတ်ဘုရားကျောက်စာပြား၏ အံ့မခန်းဖွယ်ရာ သဘာဝကို ကျောက်လင်က ပို၍ တွေ့ရှိလာလေလေဖြစ်ပြီး သူ၏ စိတ်ထဲတွင် ၎င်းကို အသုံးပြု၍ ကစားနိုင်မည့် နည်းလမ်းမျိုးစုံကို စတင် စိတ်ကူးယဉ်လာတော့သည်။