အခန်း (၂၀၁၉-၂၀၂၀)

အခန်း (၂၀၁၉) လျှောက်လဲချက်အလိမ်အညာများ

ချီယန်သူတော်စင်သည် ဖန့်ချန်တစ်ယောက် လမ်းခရီးတစ်လျှောက်လုံးတွင် အလွန်တရာ တိတ်ဆိတ်ငြိမ်သက်နေသည်ကို သတိထားမိလိုက်သည်။ သို့သော်ငြားလည်း အတွင်းကမ္ဘာနယ်မြေ၏ အရှိန်အဟုန်မှာမူ အနည်းငယ်မျှ ကျဆင်းသွားခြင်း မရှိဘဲ စွမ်းအားအပြည့်ဖြင့် ရှေ့သို့ တဟုန်ထိုး ပြေးဝင်နေခဲ့ပေသည်။

"ဖန့်ငရဲမင်းကြီး… မင်းအတွက် တစ်ခုတည်းသော အသက်ရှင်ကျန်ရစ်နိုင်မယ့် လမ်းစကတော့ တကယ်တော့ နယ်မြေကိုးခုကနေ ထွက်ခွာသွားဖို့ပဲ။ ပြီးတော့ နယ်မြေကိုးခုလိုမျိုး ပုရွက်ဆိတ်အုံနဲ့ တူတဲ့ တခြားကမ္ဘာမြေတစ်ခုခုကို ထပ်မံရှာဖွေပြီး အခြေချနေထိုင်လိုက်မယ်ဆိုရင်… မင်းရဲ့ ဒီဘဝတစ်သက်တာမှာ ဟော်ဆွေ့မျိုးနွယ်စုရဲ့ အင်အားကြီး ပုဂ္ဂိုလ်တွေနဲ့ ထပ်ပြီး ဆုံတွေ့ရတော့မှာ မဟုတ်ဘူး"

ချီယန်သူတော်စင်က ရုတ်တရက် ပါးစပ်ဟလိုက်ပြီး စေတနာကောင်းဖြင့် သတိပေး စကားဆိုလာသည်။

"ဟင်းလင်းပြင် အမြင့်ဆုံး မဟာမိတ်အဖွဲ့ရဲ့ အုပ်ချုပ်မှုအောက်မှာ… နယ်မြေကိုးခုလိုမျိုး ကမ္ဘာမြေတွေက အတိုင်းအဆမရှိ များပြားလှတယ်။ ဟော်ဆွေ့မျိုးနွယ်စုလိုမျိုး အင်အားတောင့်တင်းလှတဲ့ ဂိုဏ်းကြီးတောင်မှ အဲဒီနေရာတွေ အားလုံးကို အသေးစိတ် လိုက်လံ စုံစမ်းထောက်လှမ်းဖို့ မဖြစ်နိုင်ဘူး။

ဒီနယ်မြေကိုးခုကိုပဲ ကြည့်လေ… တကယ်လို့ ဒီဒေသက နတ်ဆိုးမျိုးနွယ်စု တွေဘက်က သတင်းပေးပို့ပြီး သဲလွန်စအချို့ မချန်ထားခဲ့ဘူးဆိုရင်… ငါတို့လည်း ဒီနေရာကို ဘယ်လိုနည်းနဲ့မှ ရှာဖွေတွေ့ရှိနိုင်စရာ အကြောင်းမရှိဘူး"

"နတ်ဆိုးမျိုးနွယ်စုတွေရဲ့ သတင်းပေးပို့ချက်က အဓိက သော့ချက်မဟုတ်ပါဘူး"

ရက်အနည်းငယ်ကြာအောင် အတွေးနက်နေခဲ့သည့် ဖန့်ချန်က ရုတ်တရက် ပါးစပ်ဖွင့်၍ စကားဆိုလာသည်။

"စီနီယာတို့ဆီက အဲဒီ ဝူသူတော်စင်နဲ့ ဒီဒေသက ရှေးဟောင်းမိစ္ဆာကြီးတို့ကြားက ဆက်သွယ်မှုကသာ… စီနီယာတို့ ဒီနေရာကို ရှာတွေ့ဖို့ ဖြစ်လာခဲ့တဲ့ အဓိက သော့ချက်ပဲ"

"ဒီလိုမျိုး ပြောမယ်ဆိုရင်လည်း ဟုတ်တာပေါ့"

ချီယန်သူတော်စင်က ခေါင်းကို ဖြည်းညှင်းစွာ ညိတ်ပြလိုက်သည်။

"ရှေးဟောင်းမိစ္ဆာကြီးရဲ့ နယ်မြေကိုးခုက အပေါ်ယံ အင်အားစုက ရှေးဟောင်းမိစ္ဆာဂိုဏ်း ပဲ။ ဝမ်အိုကြီးက သူ့ကို စောင့်ကြည့်နေတာကို ခဏထားဦး… လန်တောက်ချွန်း နဲ့ ရှောက်မုန့်ယွမ် တို့လို လူတွေကပါ သူ့ကို သေချာပေါက် အမြဲတမ်း စောင့်ကြည့်နေခဲ့ကြတာ။

စီနီယာကြီးတွေ အနေနဲ့ ဒီလိုမျိုး အင်အားကြီး ပုဂ္ဂိုလ်တစ်ယောက်ကို လျစ်လျူရှုထားဖို့ဆိုတာ သဘာဝအတိုင်း ဘယ်လိုမှ မဖြစ်နိုင်ဘူး။ အဲဒီလိုဆိုရင်… သူက ဟော်ဆွေ့မျိုးနွယ်စုရဲ့ လူတွေနဲ့ အဆက်မပြတ် ဆက်သွယ်နေတာကို ဘာဖြစ်လို့ ဒီအတိုင်း လွှတ်ထားခဲ့ရတာလဲ"

ဖန့်ချန်၏ စိတ်ထဲ၌ အတွေးတစ်ခု ဖြတ်ခနဲ ပေါ်လာခဲ့ပြီးနောက်… ရုတ်တရက် ကောင်းကင်မျက်နှာပြင်ကြီး ရှိရာဘက်သို့ လှည့်ကြည့်လိုက်တော့သည်။

ချီယန်သူတော်စင်က ချက်ချင်းပင် နားလည်လိုက်သည်၊ ဤငရဲမင်းကြီးမှာ စစ်ရေးအခြေအနေ ကို ထပ်မံ၍ စုံစမ်းထောက်လှမ်းရန် ပြင်ဆင်နေပြန်ချေပြီ။

ကောင်းကင်မျက်နှာပြင်ကြီး၏ အတွင်း၌

ဝါ့ထျန်းဧကရာဇ် ၏ ပုံရိပ်က ရုတ်တရက် ထွက်ပေါ်လာခဲ့သည်။ သို့သော်ငြားလည်း သူ၏ အရှေ့တွင်မူ… ချင်ဝူဆန့် က မတ်တတ်ရပ်လျက် ရှိနေခဲ့ချေပြီ။

……

"ဝါ့ထျန်းဧကရာဇ်… စွမ်းအားစုစည်းခြင်း အစောပိုင်းအဆင့် ခွန်အား ရှိနေပြီပဲ"

ချင်ဝူဆန့်က ပြုံးလျက် အချက်ပြလိုက်ရင်း

"ထိုင်ပါ… အားမနာပါနဲ့"

ဝါ့ထျန်းဧကရာဇ်က ရိုသေကိုင်းညွတ်လှသော အမူအရာဖြင့် စကားဆိုလိုက်သည်။

"မျိုးဆက်သစ်ကျုပ်က ဘယ်လိုလုပ်ပြီး ဝံ့ရဲပါ့မလဲခင်ဗျာ"

သူက ထိုင်ချခြင်း မပြုဘဲ ချင်ဝူဆန့်၏ အရှေ့တွင် ဆက်လက်၍ ရိုသေစွာ မတ်တတ်ရပ်နေခဲ့သည်။

အနီးအနားရှိ သူတော်စင်များမှာမူ ဝါ့ထျန်းဧကရာဇ်ကို ပြုံးစိစိဖြင့် ကြည့်ရှုနေကြသည်။ ယခုအကြိမ် နယ်မြေကိုးခုသို့ ခေါ်ဆောင်လာခြင်း ခံရသည့် သူတော်စင်များထဲ၌… ကျင့်ကြံခြင်းအဆင့် အနိမ့်ဆုံးသူပင်လျှင် စွမ်းအားစုစည်းခြင်း အလယ်အလတ်အဆင့် ရှိကြပေသည်။ ထို့ကြောင့်ပင် စွမ်းအားစုစည်းခြင်း အစောပိုင်းအဆင့်မျှသာ ရှိသည့် ကောင်လေးတစ်ယောက်ကို သူတို့က ရင်ထဲကနေ လှိုက်လှိုက်လှဲလှဲ အထင်သေးနေကြခြင်း ဖြစ်ပေသည်။

သို့သော်လည်း တစ်ဖက်လူက လူမျိုးစုတစ်ခုလုံး၏ ပထမဆုံးသော သူတော်စင် အဖြစ် သတ်မှတ်ခြင်း ခံထားရသည်ကိုမူ သူတို့ ငြင်းပယ်၍ မရနိုင်ပါချေ။ ဤကဲ့သို့သော တည်ရှိမှုမျိုးမှာ နောင်အနာဂတ်တွင် ထူးထူးခြားခြား ကြီးပွားတိုးတက်မည့် လမ်းစ မရှိနိုင်သော်လည်း… အနည်းဆုံးတော့ သူ၏ ပါရမီနှင့် အသိဉာဏ်မှာ အခြားသူများ၏ အာရုံစိုက်မှုကို ခံယူရန် ထိုက်တန်ပေသည်။

အရေးကြီးဆုံး အချက်မှာမူ…ကျဆုံးမသေမျိုး မျိုးနွယ်စု သည် လူသားမျိုးနွယ်စုနှင့် လုံးဝ ခြားနားသွားခဲ့ပြီ ဖြစ်သော်လည်း၊ အတိတ်သမိုင်းကြောင်းကို ပြန်လည်ခြေရာခံကြည့်မည် ဆိုပါက… တစ်ဖက်လူသည်လည်း သေချာပေါက် ရှန်းဟုန်းမျိုးနွယ်စု၏ အကြွင်းအကျန် တစ်ခုသာ ဖြစ်ပေလိမ့်မည်။

"ငါ မင်းအကြောင်း ကြားဖူးပါတယ်၊ မင်းက နယ်မြေကိုးခုဆီကို အမြဲတမ်း ဆင်းသက်ချင်နေခဲ့တာ… ဒါပေမဲ့ နယ်မြေကိုးခုက ရှန်းဟုန်းအကြွင်းအကျန်တွေနဲ့ လွင့်ပါးနေထိုင်နေကြတဲ့ နတ်ဘုရားမျိုးနွယ်စုတွေက မင်းတို့ ကျဆုံးမသေမျိုးတွေရဲ့ စရိုက်ကို လုံးဝ မယုံကြည်ကြဘူး။ အခုအချိန်မှာတော့ မသေမျိုးလောကငယ် နဲ့ နတ်ဘုရားလောကကြီး ရဲ့ နယ်စပ်တံခါးဝတွေက လုံးဝ ပွင့်သွားခဲ့ပြီ ဖြစ်တာကြောင့်… မင်းတို့တွေလည်း အောက်ကမ္ဘာဆီကို အေးအေးဆေးဆေး ဆင်းသက်နိုင်ကြပြီပေါ့"

ချင်ဝူဆန့်က သာယာစွာ ပြုံးလျက် စကားဆိုလိုက်သည်။

"စီနီယာက မျိုးဆက်သစ်ကျုပ်ရဲ့ အကြောင်းကို ကြားဖူးတာလားခင်ဗျာ"

ဝါ့ထျန်းဧကရာဇ်၏ မျက်နှာထက်တွင် အံ့ဩတုန်လှုပ်သွားသည့် အရိပ်အယောင်တစ်ခု ထင်ဟပ်သွားခဲ့ရသည်။

ချင်ဝူဆန့်က တည်ငြိမ်စွာပင် ခေါင်းညိတ်ပြလိုက်ရင်း-

"အဲဒီအချိန်တုန်းက ငါတို့တွေ နယ်မြေကိုးခုဆီကို မရောက်သေးဘူး ဆိုပေမဲ့… ယင်လောကရဲ့ အဆုံးအဖြတ်ပေးတဲ့ တိုက်ပွဲကြီး အပါအဝင်၊ နယ်မြေကိုးခုရဲ့ ကိစ္စအဝဝကို အကုန်လုံးနီးပါး သေချာ စုံစမ်းသိရှိထားပြီးသားပါ"

သူက စကားကို ခေတ္တမျှ ရပ်တန့်လိုက်ပြီးနောက် ဝါ့ထျန်းဧကရာဇ်ကို တည်ငြိမ်စွာ စိုက်ကြည့်လိုက်ရင်း… ရုတ်တရက် ကြေးပြားဝိုင်းကြီး တစ်ခုကို ထုတ်ယူကာ တစ်ချက်မျှ ဝှေ့ယမ်း၍ စစ်ဆေးလိုက်တော့သည်။

၎င်းကြေးပြားဝိုင်းထက်တွင် မည်သည့် လှုပ်ရှားမှုမျှ ပေါ်ပေါက်မလာခဲ့သလို၊ အဖြူရောင် အလင်းတန်းများလည်း ထွက်ပေါ်လာခြင်း မရှိပါချေ။ ဤအချက်က ဖော်ပြနေသည်မှာမူ… သူ၏ အရှေ့တွင် ရှိနေသည့် လူသည် ရှန်းဟုန်းအကြွင်းအကျန်များနှင့် မည်သည့် ပတ်သက်မှုမျှ မရှိတော့ခြင်းပင် ဖြစ်ပေသည်။

"ကျဆုံးမသေမျိုး မျိုးနွယ်စုက… တကယ့်ကိုပဲ အသစ်တဖန် မွေးဖွားလာတဲ့ လူမျိုးစုအသစ်တစ်ခု ဖြစ်နေပြီပဲ"

ချင်ဝူဆန့်၏ မျက်နှာထက်ရှိ အပြုံးများက ပိုမို၍ ထင်ရှားသိသာလာခဲ့ပြီး-

"ဟင်းလင်းပြင် အမြင့်ဆုံး မဟာမိတ်အဖွဲ့ရဲ့ စည်းမျဉ်းစည်းကမ်းတွေအရ… မင်းက သူတော်စင်တစ်ဦး ဖြစ်တာကြောင့်၊ မင်းရဲ့ လူမျိုးစုကို ကာကွယ်စောင့်ရှောက်ပေးဖို့ အရည်အချင်း ရှိတယ်။ ငါတို့က သူတို့ကို ဖမ်းဆီးပြီး ကျွန်စစ်သည်တွေအဖြစ် အသုံးပြုမှာကို စိုးရိမ်စရာမလိုဘူး။ ပြီးတော့ ဒီနယ်မြေကိုးခုကိုလည်း… မင်းတို့တွေကိုပဲ ပေးအပ်ပြီး အုပ်ချုပ်ခွင့် ပေးမယ်"

သူက စကားကို ခေတ္တမျှ ဖြတ်လိုက်ရင်း-

"ဒါပေမဲ့… ဒါက ငါတို့တွေ ရှန်းဟုန်းအကြွင်းအကျန်တွေကို အကုန်လုံး အမြစ်ပြတ် သုတ်သင်ရှင်းလင်းပြီးတဲ့ နောက်ပိုင်းမှ ဖြစ်လိမ့်မယ်"

"စီနီယာ့ကို အလွန်တရာ ကျေးဇူးတင်ပါတယ်ခင်ဗျာ… မျိုးဆက်သစ်ကျုပ်က ရင်ထဲကနေ လှိုက်လှိုက်လှဲလှဲ ကျေးဇူးတင်မိပါတယ်"

ဝါ့ထျန်းဧကရာဇ်က ကိုယ်ကို ကိုင်းညွတ်လျက် အလေးအမြတ်ပြုလိုက်ပြီး၊ သူ၏ မျက်နှာထက်တွင် ကျေးဇူးတင်ဝမ်းမြောက်မှုများဖြင့် ပြည့်နှက်သွားခဲ့ရတော့သည်။

"ကဲ… အခု ချီယန်သူတော်စင်ရဲ့ ကိစ္စကို ပြောပြလို့ရပြီ။ သူက မင်းတို့ရဲ့ နတ်ဘုရားလောကထဲမှာ… ဘယ်သူ့ရဲ့ လက်ချက်နဲ့ သေဆုံးသွားခဲ့ရတာလဲ"

ချင်ဝူဆန့်က သာယာစွာ ပြုံးလိုက်ရင်း-

"နတ်ဘုရားလောက ဆိုတာက တည်ငြိမ်ခြင်းသူတော်စင် ချန်ထားခဲ့တဲ့ အတွင်းကမ္ဘာနယ်မြေ ဖြစ်တာကြောင့်… ချီယန်သူတော်စင် အဲဒီထဲကို ဝင်သွားရင် သူရဲ့ ကျင့်ကြံခြင်းအဆင့်က ဖိနှိပ်ချုပ်ချယ်ခြင်း ခံရလိမ့်မယ် ဆိုပေမဲ့၊ သူရဲ့ တစ်ပိုင်းသူတော်စင် နည်းလမ်းတွေက သာမန်လူတွေ ယှဉ်နိုင်တဲ့အထဲမှာ မဟုတ်ဘူး။ တကယ်လို့ မင်း ကိုယ်တိုင် ဝင်ရောက်တိုက်ခိုက်ခဲ့တာ မဟုတ်ဘူးဆိုရင်… နတ်ဘုရားလောကထဲမှာ ချီယန်ကို ဘယ်သူက ဖိနှိပ်သတ်ဖြတ်နိုင်ဦးမှာလဲ"

အနီးအနားရှိ သူတော်စင်အချို့၏ မျက်လုံးများက တဖြည်းဖြည်းနှင့် သွေးအေးခက်ထန်လာခဲ့ကြပြီး၊ ဝါ့ထျန်းဧကရာဇ်ကို စူးစိုက်ကြည့်ရှုလိုက်ကြတော့သည်။

တကယ်လို့သာ တစ်ဖက်လူ၏ အဖြေက ချင်ဝူဆန့်ကို စိတ်ကျေနပ်မှု မပေးနိုင်ခဲ့ပါက… သူတို့က ပထမဆုံးအချိန်မှာတင် ဝါ့ထျန်းဧကရာဇ်ကို လက်ဦးမှုယူပြီး ဖိနှိပ်ထိန်းချုပ်ပစ်ကြပေလိမ့်မည်။

"ဒီကိစ္စကလည်း… တကယ့်ကိုပဲ မျိုးဆက်သစ်ကျုပ်ရဲ့ ထင်မှတ်ချက်တွေကို ကျော်လွန်သွားခဲ့ရပါတယ်ခင်ဗျာ။ လက်ချက်ကျူးလွန်တဲ့လူရဲ့ အထောက်အထားကိုတော့ မျိုးဆက်သစ်ကျုပ် အတိအကျ မသိရှိရပေမဲ့… သေချာပေါက် အတည်ပြုနိုင်တဲ့ တစ်ခုတည်းသော အချက်ကတော့၊ အဲဒီလက်ချက်ကျူးလွန်သူက အမျိုးသမီး တစ်ယောက် ဖြစ်တယ်ဆိုတာပါပဲ"

ဝါ့ထျန်းဧကရာဇ်က လေးနက်တည်ငြိမ်လှသော အမူအရာဖြင့် စကားဆိုလိုက်သည်။

"အမျိုးသမီး တစ်ယောက် ဟုတ်လား……"

ချင်ဝူဆန့်က တစ်စုံတစ်ခုကို စဉ်းစားတွေးတောလိုက်မိရင်း-

"မင်း သေချာလို့လား"

"မျိုးဆက်သစ်ကျုပ် အဲဒီအချိန်တုန်းက သူမရဲ့နောက်ကို အတန်ကြာအောင် လိုက်လံဖမ်းဆီးခဲ့တာ ဖြစ်လို့… သေချာပေါက် အတည်ပြုနိုင်ပါတယ်ခင်ဗျာ"

ဝါ့ထျန်းဧကရာဇ်က ခေါင်းကို ညင်သာစွာ ညိတ်ပြလိုက်သည်။

"ဒါဆိုရင်တော့ မော်ထျန်းတီကျန့် ဖြစ်ဖို့ အလားအလာ များတာပေါ့။ ဒါကို ကြည့်ရသလောက်ဆိုရင်… သူမက တာအိုကို သက်သေမတည်ရသေးတဲ့ ပုံပဲ"

ချင်ဝူဆန့်က သာယာစွာ ပြုံးလိုက်မိသည်။

သူတို့ စုဆောင်းရရှိထားသည့် သတင်းအချက်အလက်များအရ… နယ်မြေကိုးခုအတွင်း၌ ဤကဲ့သို့သော စွမ်းအားမျိုး ရှိသည့် အမျိုးသမီး ကျင့်ကြံသူဟူ၍၊ မော်ထျန်းတီကျန့် ကလွဲပြီး အခြားသူ မရှိနိုင်ပါချေ။

ထိုငရဲမင်းကြီးနှင့် ပတ်သက်၍မူ… သူသည်လည်း တစ်ဖက်လူ၏ လက်ရှိ အခြေအနေကို အကုန်လုံးနီးပါး စုံစမ်းသိရှိထားပြီးသား ဖြစ်ပေသည်။

"မော်ထျန်းတီကျန့် က… ရှန်းဟုန်းအကြွင်းအကျန်တွေရဲ့ အဓိက သော့ချက်ပဲ။ အဲဒီငရဲမင်းကြီးကိုတော့ လောလောဆယ် ဂရုစိုက်နေဖို့ မလိုပါဘူး… သူက သူ့ရဲ့ မွေးဖွားရာ ဇာစ်မြစ်နောက်ခံကြောင့်သာ အဆင့်မြင့် ရာထူးနေရာကို ရရှိထားတာ ဖြစ်ပြီး၊ သူရဲ့ ကိုယ်ပိုင်အစွမ်းကတော့… လုံးဝ အားနည်းလွန်းပါတယ်"

ချင်ဝူဆန့်က တည်ငြိမ်စွာပင် စကားဆိုလိုက်သည်။

"စီနီယာခင်ဗျာ… မျိုးဆက်သစ်ကျုပ် အဲဒီအချိန်တုန်းက သူမကို မျက်ခြေပြတ်သွားခဲ့ရတယ် ဆိုပေမဲ့၊ သူမရဲ့နောက်ကို လိုက်လံနိုင်မယ့် လျှို့ဝှက်နည်းလမ်းတစ်ခု ချန်ထားခဲ့မိပါတယ်၊ အဲဒါကို အသုံးပြုပြီး နွယ်ပင်ကိုဆွဲပြီး စပျစ်သီးကို ရှာသလိုမျိုး…မော်ထျန်းတီကျန့် ရှိနေတဲ့ နေရာကို ရှာဖွေနိုင်လိမ့်မယ်လို့ ထင်ပါတယ်ခင်ဗျာ"

ဝါ့ထျန်းဧကရာဇ်က စကားဆိုလိုက်သည်။

"အို……"

ချင်ဝူဆန့်က ပြုံးရွှင်သော မျက်နှာအမူအရာဖြင့်-

"တကယ်လို့ မင်းရဲ့ သဲလွန်စက ငါတို့ကို မော်ထျန်းတီကျန့် ဆီကို တကယ် ခေါ်ဆောင်သွားပေးနိုင်မယ် ဆိုရင်တော့… မင်းတို့ ကျဆုံးမသေမျိုး မျိုးနွယ်စုတွေ နယ်မြေကိုးခုကို သိမ်းပိုက်ခွင့် ရရှိမှာတင်မကဘဲ၊ မင်းကိုယ်တိုင်လည်း ငါနဲ့အတူ ချန်းရွှေနတ်ဘုရားနယ်မြေ ဆီကို လိုက်ပါခွင့် ရမယ့် အခွင့်အရေး ရှိလိမ့်မယ်"

"စီနီယာ့ကို အလွန်တရာ ကျေးဇူးတင်ပါတယ်ခင်ဗျာ"

……

"ဒီကောင်က ဘာဖြစ်လို့ ဒီလောက်တောင် လျှောက်လဲချက်အလိမ်အညာတွေ ပြောနေရတာလဲ။ ဘာအမျိုးသမီးလဲ… သူက မင်းရဲ့နောက်ကို လိုက်လံဖမ်းဆီးခဲ့တယ် ဆိုမှတော့၊ မင်းက ယောက်ျားလား မိန်းမလား ဆိုတာကိုတောင်မှ ဘယ်လိုလုပ်ပြီး ခွဲခြားမသိနိုင်ဘဲ ရှိမှာလဲ"

ချီယန်သူတော်စင်က အလွန်တရာ ဆွံ့အမှင်တက်သွားသည့် မျက်နှာပေးဖြင့် ဖန့်ချန်ကို လှည့်ကြည့်လိုက်မိတော့သည်။

"သူက ကောင်းကောင်းကြီး အကျိုးအမြတ် လုယူချင်လို့ နေမှာပေါ့… စီနီယာတို့ ဒီတစ်ခေါက် လာခဲ့ကြတာကလည်း၊ အကျိုးအမြတ် ရရှိဖို့အတွက်ပဲ မဟုတ်ဘူးလား"

ဖန့်ချန်က တည်ငြိမ်စွာပင် စကားဆိုလိုက်သည်။

"ဒါဆိုရင်တော့ ဒီကောင်က သတ္တိ တော်တော်ကောင်းတာပဲ။ တကယ်လို့ သခင်လေးသာ ဒီအကြောင်းကို သိသွားရင်… သူ သေချာပေါက် အစအနမကျန် ပျက်စီးသွားလိမ့်မယ်။ သူတော်စင် အဆင့်အတန်း ရှိနေရင်တောင်မှ သူ့ကို ကယ်တင်နိုင်မှာ မဟုတ်ဘူး… သခင်လေးမှာ သူ့ရဲ့ လူမျိုးစုတစ်ခုလုံးကို အိုးမဲ့အိမ်မဲ့ လွင့်ပါးသွားအောင် လုပ်နိုင်တဲ့ နည်းလမ်းတွေ အများကြီး ရှိတယ်"

ချီယန်သူတော်စင်က ကောင်းကင်မျက်နှာပြင်ကြီးထက်ရှိ ဝါ့ထျန်းဧကရာဇ်ကို စူးစိုက်ကြည့်ရှုနေမိရင်း၊ ရင်ထဲ၌ အလွန်တရာ ဒေါသဖြစ်မိနေတော့သည်။

တကယ်လို့သာ တစ်ဖက်လူက မှန်ကန်တဲ့ သဲလွန်စကို ပေးအပ်ခဲ့မယ်ဆိုရင်… သူတို့ အုပ်စုတစ်စုလုံးအတွက် ပြန်လည်လွတ်မြောက်နိုင်မယ့် မျှော်လင့်ချက် ရှိကောင်းရှိနိုင်ပေလိမ့်မည်။ သို့သော်လည်း ယခုအချိန်တွင်မူ ချင်ဝူဆန့်တို့ အားလုံးမှာ ဝါ့ထျန်းဧကရာဇ်၏ လမ်းမှားပြသမှုကြောင့် အခြားသော လမ်းကြောင်းတစ်ခုဆီသို့ ဦးတည်သွားခဲ့ကြရချေပြီ။

'ဒီကောင်က ကြည့်ရတာ ကြောက်ရွံ့ပုံ မပေါ်ဘူးပဲ… သူက တကယ်ပဲ မော်ထျန်းတီကျန့် တာအိုသက်သေတည်မယ့် နေရာကို ကြိုတင်သိရှိနေတာများလား'

ဖန့်ချန်၏ ရင်ထဲ၌လည်း အနည်းငယ်မျှ စူးစမ်းလိုစိတ်များ ပေါ်ပေါက်လာခဲ့ရသည်။ သူသည် ဝါ့ထျန်းဧကရာဇ်တစ်ယောက် ချင်ဝူဆန့်တို့နှင့် နောက်ထပ် မည်ကဲ့သို့ ဆက်လက်၍ ပရိယာယ်ဆင် လှည့်စားဦးမလဲ ဆိုတာကို သိရှိလိုနေခဲ့ပေသည်။

ထို့ကြောင့်ပင် သူက တစ်ဖက်မှ ဝါ့ထျန်းဧကရာဇ်ကို အာရုံစိုက် စောင့်ကြည့်နေရင်း၊ အခြားတစ်ဖက်မှလည်း မိမိ၏ ယခုခရီးစဉ်၏ ဦးတည်ရာ ပန်းတိုင်ရှိရာဘက်သို့ အရှိန်အဟုန်ဖြင့် မောင်းနှင်သွားခဲ့တော့သည်။

မြေဝက်ဝံကြယ်တာရာ

ယခုအချိန်တွင်… ဟင်းလင်းပြင်ကြီး၏ အတွင်း၌ ကျင့်ကြံသူ အုပ်စုနှစ်စုမှာ တစ်ဖက်နှင့်တစ်ဖက် မျက်နှာချင်းဆိုင်လျက် တင်းမာစွာ အခြေအနေ စောင့်ကြည့်နေကြချေပြီ။

သို့သော်ငြားလည်း အုပ်စုတစ်စုမှာ အလွန်တရာ တည်ငြိမ်အေးဆေးလှသော အမူအရာ ရှိနေကြသော်လည်း၊ အခြားတစ်ဖက် အုပ်စုမှာမူ… မျက်နှာထက်တွင် လေးနက်ထိတ်လန့်မှုများဖြင့် ပြည့်နှက်နေခဲ့ကြရသည်။

"မင်းတို့ရဲ့ ကိုယ်ပေါ်က ရှန်းဟုန်းအငွေ့အသက်တွေက တခြားနေရာတွေထက်စာရင် အများကြီး ပိုပြီးတော့ ထူထပ်လွန်းနေတယ်။ ကြည့်ရတာ… ငါတို့တွေ ဒီတစ်ခေါက်တော့ တကယ့်ကိုပဲ ကြီးမားတဲ့ အကျိုးအမြတ်တစ်ခုကို ရရှိတော့မှာပဲ"

တည်ငြိမ်အေးဆေးလှသော အုပ်စုအတွင်းမှ… ငယ်ရွယ်သော တစ်ပိုင်းသူတော်စင်တစ်ဦးက၊ သူ၏ မျက်လုံးအစုံ၌ လောဘဇောများ တောက်လောင်လျက် အရှေ့တွင် ရှိနေသည့် ကျင့်ကြံသူ အုပ်စုကြီးကို စိုက်ကြည့်ရင်း စကားဆိုလိုက်သည်။

တောရိုင်းကျောင်းတော် က ရွှင်ကော်ကျူး ၊ ဓားဂိုဏ်း က ဝမ်ကျိလုံ အပြင်… မြေဝက်ဝံကြယ်တာရာ ပေါ်ရှိ ကြီးမားသေးငယ်လှသော အင်အားစုအသီးသီးက ထိပ်တန်းပုဂ္ဂိုလ်များ အားလုံးမှာ၊ အရေအတွက်အရ ဆိုလျှင်မူ တစ်ဖက်လူထက် အဆပေါင်းများစွာ ပိုမိုများပြားလှပေသည်။ သို့သော်လည်း နှစ်ဖက်စလုံး၏ စွမ်းအားအရှိန်အဝါချင်းမှာမူ… တစ်ဖက်သတ် ဖိနှိပ်ချုပ်ချယ်ခြင်း ခံနေရချေပြီ။

အိုရန်ရွှမ်ကျန်း သည် လူအုပ်ကြီး၏ အလယ်တွင် မတ်တတ်ရပ်နေမိရင်း… မိမိ၏အရှေ့တွင် ရှိနေသည့် ဤကျင့်ကြံသူများ၏ နက်ရှိုင်းလှပြီး အတိုင်းအဆမရှိသော စွမ်းအားအငွေသီးသီးကို ခံစားမိလိုက်ရသည့်အခါ၌၊ ရင်ထဲကနေ မအောင့်နိုင်ဘဲ ကျိန်ဆဲမိလိုက်တော့သည်။

ဘဝကောင်းလေးကို ဖြတ်သန်းရတာ မကြာသေးဘူး… ဘယ်သူက ထင်မှတ်ထားမှာလဲ၊ မြေဝက်ဝံကြယ်တာရာက ဒီနှစ်တွေအတွင်းမှာ ဘာဖြစ်လို့ ဒီလောက်တောင် မငြိမ်မသက် ဖြစ်ပွားနေရတာလဲ။

အခန်း (၂၀၂၀) အိမ်ပြန်လမ်း

"စီနီယာရွှင်… လာရမယ့်အရာကတော့ ဘယ်လိုပဲဖြစ်ဖြစ် ရောက်လာခဲ့ပြီပဲ၊ တိုက်ကြမလားဗျာ"

ဝမ်ကျိလုံက ရွှင်ကော်ကျူးကို တစ်ချက်မျှ လှည့်ကြည့်လိုက်ရင်း၊ ပြုံးလျက် စကားဆိုလိုက်သည်။

"အင်း… သဘာဝအတိုင်းပဲ၊ ငါတို့တွေ မတိုက်ခိုက်ရဘဲနဲ့တော့ အသေခံလို့မဖြစ်ဘူး"

ရွှင်ကော်ကျူးက ခေါင်းကို ညင်သာစွာ ညိတ်ပြလိုက်ပြီးနောက်… ထိုငယ်ရွယ်သော တစ်ပိုင်းသူတော်စင်အား လက်အုပ်ချီ အလေးပြုလိုက်ရင်း-

"မင်းမှာ ဘာနည်းလမ်းတွေ ရှိလဲ… စိတ်ကြိုက်သာ ထုတ်သုံးလိုက်ပါ"

ငယ်ရွယ်သော တစ်ပိုင်းသူတော်စင်က မအောင့်နိုင်ဘဲ ရယ်မောလိုက်မိရင်း-

"ငါသာ နည်းလမ်းတွေကို ထုတ်သုံးလိုက်ရင်… မျက်စိတစ်မှိတ်အတွင်းမှာတင် မင်းတို့အားလုံး ပြာအဖြစ် ပြောင်းလဲသွားလိမ့်မယ်"

အိုရန်ရွှမ်ကျန်းနှင့် အခြားသူများ အားလုံးမှာ… မိမိတို့အရှေ့တွင် ရှိနေသည့် လူပြောနေသော စကားမှာ ကြွားဝါခြင်း မဟုတ်သည်ကို ကောင်းကောင်းကြီး ရိပ်မိထားကြပေသည်။

သို့သော်လည်း သူတို့အနေဖြင့်ကော… အခြားမည်သည့် နည်းလမ်း ရှိနိုင်ပါဦးမည်နည်း။

"ဒါပေမဲ့ ငါကြားရသလောက်တော့… အဲဒီငရဲမင်းကြီးက ဒီနေရာမှာ မွေးဖွားကြီးပြင်းခဲ့တာဆို။ တကယ်လို့ ဒီနေရာက အန္တရာယ်ကြီးမားတဲ့ ဘေးဒုက္ခနဲ့ ကြုံတွေ့ရမယ်ဆိုရင်… သူကတော့ သေချာပေါက် ထွက်လာပြီး တားဆီးလိမ့်မယ် ထင်တာပဲ။

အဲဒီလိုဆိုရင်တော့ ငါတို့အတွက် အလုပ်ရှုပ်သက်သာတာပေါ့။ တကယ်လို့ အဲဒီငရဲမင်းကြီးကိုသာ ဖမ်းမိခဲ့မယ်ဆိုရင်… မင်းတို့အားလုံးလည်း ငါ့ကို ကူညီပေးခဲ့တယ်လို့ သတ်မှတ်လို့ရတယ်။ ဝိညာဉ်မျိုးနွယ်စု ဘက်ကိုလည်း… ငါ မင်းတို့အတွက် စကားကောင်း နည်းနည်းပါးပါး ပြောပေးပါ့မယ်"

ငယ်ရွယ်သော တစ်ပိုင်းသူတော်စင်က ပြုံးလျက် စကားဆိုလိုက်သည်။

"ဒါဆိုရင်တော့ မင်း စိတ်ပျက်ရလိမ့်မယ်၊ ဖန့်ငရဲမင်းကြီးက သူ့အလိုလို ပိုက်ကွန်ထဲ တိုးဝင်လာရလောက်အောင်အထိ မိုက်မဲတဲ့လူ မဟုတ်ဘူး။ တကယ်လို့ သူ တကယ်ပဲ ပေါ်လာခဲ့မယ်ဆိုရင်… အဲဒါက မင်းတို့တွေ ရှုံးနိမ့်တော့မယ်ဆိုတာကို သက်သေပြနေတာပဲ"

အိုရန်ရွှမ်ကျန်းက ရုတ်တရက် ပါးစပ်ဖွင့်၍ စကားဆိုလိုက်သည်။

"အတိုင်းအဆမရှိတဲ့ အကြွင်းမဲ့ စွမ်းအားရဲ့ အရှေ့မှာတော့…ဘယ်လိုပဲ များပြားလှတဲ့ လှည့်ကွက် ပရိယာယ်တွေ ရှိနေပါစေဦးတော့၊ ဘယ်လိုမှ ထုတ်သုံးလို့ ရမှာမဟုတ်ဘူး။ မင်းတို့ရဲ့ အဲဒီဖန့်ငရဲမင်းကြီးရဲ့ ကြီးပြားတိုးတက်လာတဲ့ သမိုင်းကြောင်းကိုလည်း ငါတို့တွေ အနည်းငယ်မျှ စုံစမ်းသိရှိထားပြီးသားပဲ၊ ဒါပေမဲ့ စာဖွဲ့နေဖို့ လိုအပ်လို့လား"

ငယ်ရွယ်သော တစ်ပိုင်းသူတော်စင်က ပြုံးလျက် ခေါင်းကို ခါယမ်းလိုက်ရင်း-

"မင်းတို့အားလုံးက ဒီနေရာရဲ့ အားအကောင်းဆုံး တိုက်ခိုက်ရေး စွမ်းအားတွေ ဖြစ်သလို၊ ဒီဒေသရဲ့ အထက်တန်းစား ပုဂ္ဂိုလ်ကြီးတွေလည်း ဖြစ်ကြတယ်၊ ပြီးတော့ အဲဒီဖန့်ငရဲမင်းကြီးနဲ့လည်း အနည်းငယ်မျှ ပတ်သက်မှု ရှိနေတာကြောင့်… မင်းတို့တွေကိုတော့ လောလောဆယ် သေဒဏ်ကနေ ချမ်းသာခွင့် ပေးထားနိုင်ပါတယ်။ ဒါပေမဲ့ ဒီနေရာမှာ ရှိနေတဲ့ တခြား ရှန်းဟုန်းအကြွင်းအကျန်တွေကတော့… မင်းတို့လိုမျိုး ကံကောင်းခြင်းတွေ ရှိကြမှာ မဟုတ်ဘူး"

ငယ်ရွယ်သော တစ်ပိုင်းသူတော်စင်က စကားဆုံးသည်နှင့် လက်ကို ညင်သာစွာ တစ်ချက် ဝှေ့ယမ်းလိုက်တော့သည်။

ထိုအခါ အတိုင်းအဆမရှိ ထိတ်လန့်ဖွယ်ကောင်းသော စွမ်းအား များက ဝုန်းခနဲ ထွက်ပေါ်လာခဲ့ပြီး… ဘေးဒုက္ခ ကပ်ဆိုးကြီးတစ်ခုအသွင် ပြောင်းလဲလျက်၊ လူအများအပြား၏ မျက်စိရှေ့မှောက်တွင်ပင် အရပ်လေးမျက်နှာ သို့ တဟုန်ထိုး လွှမ်းမိုးဝါးမြိုသွားခဲ့တော့သည်။

၎င်း၏ အရှိန်အဟုန်မှာ အလွန်တရာ မြန်ဆန်လွန်းလှသဖြင့် တုန်လှုပ်ဖွယ်ရာ ကောင်းလှပေသည်၊ စွမ်းအားများ ဖြတ်သန်းသွားသည့် နေရာတိုင်းရှိ သစ်ပင်ပန်းမာန်များ အားလုံးမှာ ပြာအဖြစ်သို့ လွင့်ပါးပျက်စီးသွားခဲ့ရချေပြီ။

တကယ်လို့သာ တစ်စုံတစ်ယောက်က ဝင်ရောက်မတားဆီးဘူး ဆိုပါက… ရက်အနည်းငယ်မျှသော အချိန်အတွင်းမှာတင်၊ မြေဝက်ဝံကြယ်တာရာ ပေါ်၌ မည်သည့် သက်ရှိသတ္တဝါမျှ ကျန်ရှိတော့မည် မဟုတ်ပါချေ။

"ရက်အနည်းငယ်အတွင်းမှာတင် ကြယ်တာရာတစ်ခုလုံးကို သတ်ဖြတ်ပစ်နိုင်တယ်…… ဒီလူရဲ့ နည်းလမ်းတွေက၊ တကယ့်ကိုပဲ ဒီလောက်အထိ တောင့်တင်းခိုင်မာနေခဲ့တာပဲ"

လူအများစု၏ မျက်နှာထက်တွင် လေးနက်မှောင်မှောင် စိတ်ပျက်မှုများ ပြည့်နှက်သွားခဲ့ရပြီး၊ စကားတစ်ခွန်းမျှပင် မဆိုနိုင်တော့ပါချေ။

သို့သော်လည်း သူတို့အားလုံး သတိမမူမိကြသည့် အဝေးတစ်နေရာတွင်မူ… အတွင်းကမ္ဘာနယ်မြေ တစ်ခုက ဤနေရာ ရှိရာဘက်သို့ အရှိန်အဟုန်ဖြင့် ပြေးဝင်လာနေခဲ့ပေသည်။

လက်ဖက်ရည်တစ်ခွက်စာမျှသော အချိန်အတွင်းမှာတင်… မြေဝက်ဝံကြယ်တာရာသို့ ဆိုက်ဆိုက်မြိုက်မြိုက် ရောက်ရှိနိုင်တော့မည် ဖြစ်ပေသည်။

သို့သော်လည်း ရုတ်တရက်ပင်… ၎င်းအတွင်းကမ္ဘာနယ်မြေမှာ ထူးဆန်းသော စွမ်းအားတစ်ခု၏ ပိတ်ဆို့တားဆီးခြင်းကို ခံလိုက်ရတော့သည်။

ဖန့်ချန်တစ်ယောက် သတိပြန်ဝင်လာသည့် အချိန်၌မူ… အတွင်းကမ္ဘာနယ်မြေ၏ တံခါးဝအရှေ့တွင်၊ ပုံရိပ်ပေါင်း ရာနဲ့ချီ၍ မတ်တတ်ရပ်လျက် ရှိနေခဲ့ကြချေပြီ။

ချီယန်သူတော်စင်က မျက်လုံးကို အနည်းငယ် မျဉ်းလိုက်မိရင်း… သူက ထိုလူများထဲမှ အချို့ကို မှတ်မိလိုက်သည်။

ဥပမာအားဖြင့် ဝမ်သောက်မဟာမိတ်အဖွဲ့ က ဝမ်တောက်သူတော်စင် ပဲ ဖြစ်ပေသည်။

လွန်ခဲ့သော နှစ်ပေါင်းများစွာက… ဤပုဂ္ဂိုလ်က မီးနတ်ဘုရားမျိုးနွယ်စု အပေါ်တွင် သေးငယ်ခြင်းမရှိသော အတားအဆီးများ ပေးခဲ့ဖူးပြီး၊ သူကိုယ်တိုင်လည်း တစ်ဖက်လူနှင့် တိုက်ခိုက်ဖူးခဲ့ကာ၊ အကြိမ်အနည်းငယ်မျှ ရှုံးနိမ့်ဖူးခဲ့ချေသည်။

ဖန့်ချန်က အတန်ကြာအောင် မှင်တက်သွားခဲ့ရပြီးနောက်… ရှေ့သို့ အမြန်လှမ်းသွားလိုက်ရင်း ယွမ်ဟယ် နှင့် ဖန့်ကျန့်ထျန်း တို့ကို ဦးညွှတ် အလေးပြုလိုက်တော့သည်။

"ဆရာ… အဘိုးကြီး"

သူက ပတ်ဝန်းကျင်ကို တစ်ချက် မျက်စိဝေ့ကြည့်လိုက်သော်လည်း မိမိ၏ မိဘနှစ်ပါးကို မတွေ့ရသဖြင့်… စိတ်ထဲ၌ ထူးဆန်းအံ့ဩသွားမိသည်။

ဤမျှ များပြားလှသော ယန်နတ်ဘုရား များ အားလုံး ဤနေရာသို့ ရောက်ရှိနေကြပါလျက်နှင့်… ဘာဖြစ်လို့ မိမိရဲ့ မိဘနှစ်ပါးကို မတွေ့ရသေးတာလဲ။

"ဆရာ… အဘိုးကြီး ဟုတ်လား"

"ဒီလူက… တကယ်ပဲ သူတို့ရဲ့ တိုက်ရိုက်မျိုးဆက် ဖြစ်နေတာပဲ"

ချီယန်သူတော်စင်၏ မျက်လုံးထဲ၌ အလွန်တရာ တုန်လှုပ်ခြောက်ခြားသွားသည့် အရိပ်အယောင်တစ်ခု ဖြတ်ပြေးသွားခဲ့ရသည်။

သူ့အနေဖြင့် စိတ်ကူးကြည့်ရန်ပင် ခက်ခဲလှပေသည်၊ ဤလူနှစ်ယောက်က ထိုကဲ့သို့သော ဒေသမျိုး၌… ကောင်းကင်နိမိတ်ဖြစ်စဉ်အဆင့် အတွင်းကမ္ဘာနယ်မြေကို စုစည်းတည်ဆောက်နိုင်သည့် တည်ရှိမှုမျိုး ဖြစ်လာအောင် မည်ကဲ့သို့ ပြုစုပျိုးထောင်ပေးနိုင်ခဲ့ကြသနည်း။

"မင်းအနေနဲ့ ဟင်းလင်းပြင် အမြင့်ဆုံး မဟာမိတ်အဖွဲ့ ရှိရာဘက်ကို ရောက်သွားမှသာ အတွင်းကမ္ဘာနယ်မြေကို စုစည်းနိုင်လိမ့်မယ်လို့ ငါတို့ ထင်ထားခဲ့တာ… မင်းက ဒီကျင့်ကြံခြင်းအဆင့်ကို ကြိုတင်ပြီးတော့ ရောက်ရှိလာလိမ့်မယ်လို့ ထင်မထားခဲ့ဘူး။ ငါတို့တွေရဲ့ ကြိုတင်ပြင်ဆင်မှု အစီအစဉ် တော်တော်များများကိုတော့… နည်းနည်းပါးပါး ပြန်ပြီး ပြောင်းလဲရတော့မယ်"

ယွမ်ဟယ်က ဖန့်ချန်၏ လက်ရှိ ကျင့်ကြံခြင်းအဆင့်ကို ကြည့်ရှုလိုက်ရင်း… မျက်လုံးအစုံ၌ သာယာလှသော ကြည်နူးနှစ်သိမ့်မှု အရိပ်အယောင်များ ပေါ်ထွက်လာခဲ့သည်။

"ဒီအတွင်းကမ္ဘာနယ်မြေရဲ့ နောက်ခံအခြေခံက အလွန်တရာ ထုထည်ကြီးမားလွန်းတယ်၊ ငါတို့တွေတောင်မှ မင်းရှိနေတဲ့ နေရာကို အာရုံခံဖို့ တော်တော်လေး ခက်ခဲသွားခဲ့ရတယ်"

ဖန့်ကျန့်ထျန်းက လက်နှစ်ဖက်ကို နောက်ပစ်လျက် ခြေလှမ်းအနည်းငယ် လှမ်းလိုက်မိရင်း… ပတ်ဝန်းကျင် တည်ရှိမှုများကို တစ်ချက် ကြည့်ရှုလိုက်ပြီးနောက်၊ ခေါင်းကို ညင်သာစွာ ညိတ်ပြလိုက်သည်။

သူတို့ ခေါ်ဆောင်လာခဲ့သည့် ရာနဲ့ချီသော ယန်နတ်ဘုရားများ အားလုံးကလည်း… သာယာစွာ ပြုံးလျက်၊ ဘယ်ညာ ဝဲယာသို့ လိုက်လံကြည့်ရှုနေကြသည်။

"ဆရာ… အဲဒီစကားရဲ့ အဓိပ္ပာယ်က ဘာလဲ"

ဖန့်ချန်၏ စိတ်ထဲ၌ လှုပ်ရှားသွားခဲ့ရသည်။

"နယ်မြေကိုးခုရဲ့ ကိစ္စတွေကို… မင်း နောက်ထပ် ဝင်ရောက်စွက်ဖက်မနေပါနဲ့တော့။ ဟော်ဆွေ့မျိုးနွယ်စုက သတ်ချင်တယ်ဆိုရင်လည်း… သူတို့ကို စိတ်ကြိုက် သတ်ခွင့်ပေးလိုက်ပါ၊ အစအနမကျန် အကုန်လုံး သုတ်သင်ရှင်းလင်းပစ်နိုင်ရင် ပိုပြီးတော့တောင် ကောင်းသေးတယ်"

ယွမ်ဟယ်က သာယာစွာ ပြုံးလျက် စကားဆိုလိုက်သည်။

ချီယန်သူတော်စင်က စိတ်လှုပ်ရှားသွားမိရင်း… ရုတ်တရက် ရှေ့သို့ အမြန်တိုးလှမ်းသွားလိုက်ကာ၊ ယွမ်ဟယ်ကို ပြုံးလျက် လက်အုပ်ချီ နှုတ်ဆက်လိုက်သည်။

"ဝမ်တောက်သူတော်စင်… ငါတို့တွေ မဆုံတွေ့ဖြစ်တာ နှစ်ပေါင်းများစွာ ကြာသွားခဲ့ပြီပဲ"

"မင်းကိုး"

ယွမ်ဟယ်က ပြုံးရွှင်စွာဖြင့် ခေါင်းညိတ်ပြလိုက်ရင်း-

"မင်း ရှဲ့ကျစ်ဌာန ကို ဖျက်ဆီးပစ်ခဲ့တဲ့ အဲဒီအကျိုးအမြတ် သဲလွန်စက…ဘယ်လောက်အထိ တန်ဖိုးရှိလဲဆိုတာ ငါမသိဘူးနော်"

ချီယန်သူတော်စင်က မသိစိတ်အရ ဖန့်ကျန့်ထျန်းကို တစ်ချက် လှည့်ကြည့်လိုက်မိသော်လည်း… တစ်ဖက်လူထံမှ မည်သည့် တုံ့ပြန်မှုမျှ မတွေ့ရသဖြင့်၊ ရယ်မောလျက်ပင် ဤအကြောင်းအရာကို ကျော်ဖြတ်လိုက်ပြီး စကားဆိုလာသည်။

"စီနီယာတို့အားလုံး အခုအချိန်မှာ သေချာ ပေါက်ပေါက်မြောက်မြောက် စဉ်းစားမိသွားကြပြီ ထင်တယ်၊ သခင်လေးနဲ့ အတူတူ ထိုင်ပြီး ဆွေးနွေးတိုင်ပင်ဖို့ ပြင်ဆင်နေကြတာလား။ သခင်လေးက စိတ်နှလုံး ကောင်းမွန်လှတာမို့… ရှန်းဟုန်းမျိုးနွယ်စုအတွက် မျိုးဆက်သစ် အနည်းငယ် ချန်ထားခဲ့ဖို့ကို သဘောတူကောင်း တူနိုင်ပါလိမ့်မယ်"

"မင်းက ချင်ဝူဆန့်အတွက် စည်းရုံးရေးသမား လုပ်ပေးချင်နေသေးတာပဲ"

ဖန့်ကျန့်ထျန်းက နောက်ဆုံးတွင် ချီယန်သူတော်စင်ကို လှည့်ကြည့်လိုက်မိရင်း… မအောင့်နိုင်ဘဲ ရယ်မောဆဲဆိုလိုက်သည်။

"မင်းက ကောင်းကျိုးကို ခံစားနေရတုန်းမှာတင် ဆက်ပြီးတော့ မာနထောင်မနေပါနဲ့ဦး။ ငါတို့တွေက ဝူရှင်းလင်း ကို မင်းဆီ သတင်းပေးပို့ခိုင်းပြီး ရှဲ့ကျစ်ဌာနရဲ့ တည်နေရာကို ပေးခဲ့လို့သာ… မင်း အကျိုးအမြတ် ရရှိခဲ့တာ၊ ဒါက ငါနဲ့ မင်းနဲ့က လူဟောင်းတွေ ဖြစ်နေခဲ့ကြလို့ပဲ။

ဘယ်သူက ထင်မှတ်ထားမှာလဲ… မင်းက အဲဒီအခွင့်အရေးကို အနည်းငယ်မျှ တန်ဖိုးမထားခဲ့ဘဲ၊ နောက်ဆုံးမှာတော့ ခန္ဓာကိုယ်နဲ့ ဦးခေါင်း တခြားစီ ဖြစ်သွားခဲ့ရပြီး… ငါ့ရဲ့ မျိုးဆက်သစ်ကောင်လေးရဲ့ ထိန်းချုပ်ခြင်းကိုတောင် ခံလိုက်ရသေးတယ်။ မင်းက သူတော်စင်တစ်ဦး ဖြစ်နေတာကိုပဲ နှမြောဖို့ကောင်းတယ်"

"စီနီယာတို့က… ဝူသူတော်စင်ကို ငါ့ဆီ သတင်းပေးပို့ခိုင်းခဲ့တာ ဟုတ်လား"

ချီယန်သူတော်စင်က ချက်ချင်းပင် မှင်တက်အံ့ဩသွားခဲ့ရပြီးနောက်… ဟန်ကိုယ်ဖို့ကာ ပြုံးလိုက်ရင်း-

"ဖန့်သူတော်စင်… ဒီလိုမျိုး ဟာသကတော့ သိပ်ပြီး မရယ်ရဘူးနော်"

"ဟာသ ဟုတ်လား"

ဖန့်ကျန့်ထျန်းက မျက်မှောင်ကြုတ်လိုက်မိရင်း-

"နယ်မြေကိုးခုရဲ့ လက်ရှိ အခြေအနေကို ကြည့်လိုက်ဦး… ငါတို့တွေက နယ်မြေကိုးခုကို အသုံးချပြီး ဟာသလုပ်နေလိမ့်မယ်လို့ မင်း ထင်နေတာလား"

"ဒါပေမဲ့ ဒါက ဟာသမဟုတ်ဘူးဆိုရင် ဘာဖြစ်နိုင်ဦးမှာလဲ… စီနီယာတို့က ဘာဖြစ်လို့……"

ချီယန်သူတော်စင်က ဆွံ့အစွာ စကားဆိုလိုက်မိသည်။

"ဘာဖြစ်လို့ ကိုယ့်ဖတ်ကိုယ် သေတွင်းတူးခဲ့ရတာလဲ လို့ မင်းမေးချင်တာလား"

ယွမ်ဟယ်က ပြုံးလျက် စကားဆိုလိုက်သည်

"မင်းတို့ မီးနတ်ဘုရားမျိုးနွယ်စုက ကံကောင်းခြင်းတွေ အလွန်တရာ ကြီးမားလှတယ်၊ အတိတ်တုန်းက သာမန် သူတော်စင်မျိုးနွယ်စု ဘဝကနေ… အခုအချိန်မှာတော့ မီးနတ်ဘုရားနယ်မြေ ကို အုပ်ချုပ်ခွင့် ရရှိထားခဲ့ကြပြီး၊ အတိတ်က နတ်ဘုရားမျိုးနွယ်စုရဲ့ ရာထူးနေရာကိုပါ အစားထိုး သိမ်းပိုက်နိုင်ခဲ့ကြပြီ။

မင်းတို့တွေက လွင့်ပါးနေထိုင်နေကြရတဲ့ လူမျိုးစုတွေအကြောင်းကို ဘယ်လိုလုပ်ပြီး နားလည်နိုင်မှာလဲ…… သူတို့တွေ သေတွင်းထဲကနေ ပြန်လည်ရုန်းထွက်ပြီး အသစ်တဖန် မွေးဖွားလာနိုင်ဖို့အတွက် ၊ ဘယ်လောက်အထိ ထိတ်လန့်တုန်လှုပ်ဖွယ်ကောင်းတဲ့ အရာတွေကို လုပ်ဆောင်ဝံ့ကြမလဲ ဆိုတာကို မင်းတို့ သိပါ့မလား"

"သေတွင်းထဲကနေ ရုန်းထွက်ပြီး အသစ်တဖန် မွေးဖွားလာမယ် ဟုတ်လား……"

ဖန့်ချန်၏ စိတ်ထဲ၌ တစ်စုံတစ်ခုကို မရေမရာ ရိပ်မိလိုက်သည်။

"ချန်အာ… ငါတို့တွေ အတိတ်တုန်းက မိစ္ဆာမျိုးနွယ်စု ဘက်မှာ စိုက်ပျိုးထားခဲ့တဲ့ မျိုးစေ့လေးက၊ အခုအချိန်မှာတော့ အမြစ်တွယ်ပြီး အဖူးအပွင့်တွေ ဝေဆာနေခဲ့ပြီ။ ဝမ်ချင် ကလည်း ဝိညာဉ်မျိုးနွယ်စု ထဲမှာ အဆင့်မြင့် ရာထူးနေရာကို ပြန်လည်ရရှိထားခဲ့ပြီ။

နယ်မြေကိုးခုက ကျင့်ကြံသူတွေ သေဆုံးသွားခဲ့ပြီးတဲ့နောက်ပိုင်း… လွတ်မြောက်မယ့် လမ်းစ မရှိမှာကို မင်း စိုးရိမ်မနေပါနဲ့။ လွတ်မြောက်မယ့် လမ်းစကို ငါတို့တွေ ကြိုတင်ပြီးတော့ အကုန်လုံး စီစဉ်ပေးထားပြီးသားပါ၊ ဟော်ဆွေ့မျိုးနွယ်စုက ငါတို့တွေကို အမြစ်ပြတ် သုတ်သင်ရှင်းလင်းပစ်ချင်ပြီး… ငါတို့တွေ နေထိုင်စရာ နေရာမရှိအောင် လုပ်ချင်နေခဲ့တာ။

အဲဒီလိုဆိုရင်လည်း… ငါတို့တွေက သူတို့နဲ့ အိမ်လဲလိုက်ရုံပေါ့၊ ဟင်းလင်းပြင် အမြင့်ဆုံး မဟာမိတ်အဖွဲ့ ရှိရာဘက်ကိုပဲ တိုက်ရိုက် ပြန်ကြတာပေါ့"

ယွမ်ဟယ်က ပြုံးရွှင်စွာဖြင့် စကားဆိုလိုက်သည်။

"ဝမ်ချင်သူတော်စင် ဟုတ်လား…… နေဦး… စီနီယာတို့က ဘာလုပ်ဖို့ စိတ်ကူးနေကြတာလဲ……"

ချီယန်သူတော်စင်သည်လည်း ယခုအချိန်တွင် ရိပ်မိသွားခဲ့ရပြီ ဖြစ်ကာ… ဤစကားအနည်းငယ်ထဲမှတင်၊ အလွန်တရာ ထိတ်လန့်တုန်လှုပ်ဖွယ်ကောင်းသော ခန့်မှန်းချက်တစ်ခု ပေါ်ပေါက်လာခဲ့ရပြီး၊ မိမိအရှေ့တွင် ရှိနေသည့် ရာနဲ့ချီသော ယန်နတ်ဘုရားများကို အရူးများကို ကြည့်သကဲ့သို့ စိုက်ကြည့်နေမိတော့သည်။

သူက ထိုလူအုပ်ကြီးထဲမှ အတိတ်တုန်းက နတ်ဘုရားမျိုးနွယ်စုထဲရှိ အင်အားကြီး ပုဂ္ဂိုလ်ကြီးအချို့၏ ရင်းနှီးလှသော မျက်နှာအချို့ကိုပါ ထပ်မံ၍ မြင်တွေ့လိုက်ရချေပြီ……

"အတိတ်တုန်းက လူသားမျိုးနွယ်စုနဲ့ မိစ္ဆာမျိုးနွယ်စုတို့ကြားက တိုက်ပွဲက… နတ်ဆိုးမျိုးနွယ်စုတွေကြောင့် ပေါ်ပေါက်လာခဲ့ရတာ ဆိုပေမဲ့၊ ငါတို့ အဘိုးကြီးအချို့ကတော့ ဒါကို အခွင့်အရေးတစ်ခုလို့ ထင်မြင်မိခဲ့ကြတယ်။

နတ်ဆိုးမျိုးနွယ်စုတွေက ငါတို့ကို မိစ္ဆာမျိုးနွယ်စု ရှိနေတဲ့ နေရာကို ရှာဖွေပေးခဲ့ကြတာ ဖြစ်သလို၊ အားလုံးကလည်း ဟော်ဆွေ့အဘိုးအို ရဲ့ နှိပ်စက်ညှဉ်းပန်းမှုကို တူတူ ခံစားခဲ့ကြရတာ ဖြစ်တာကြောင့်… သဘာဝအတိုင်းပဲ လက်တွဲပူးပေါင်းဖို့ တစ်ချက်တည်းနဲ့ သဘောတူညီမှု ရရှိခဲ့ကြတာပေါ့။

ဒါကြောင့်မို့လို့ပဲ ငါတို့တွေရဲ့ သံသရာမှန် က မိစ္ဆာမျိုးနွယ်စုတွေရဲ့ လုယူခြင်းကို ခံလိုက်ရတာ ဖြစ်သလို… သံသရာမှန် နဲ့ အတူတူ လိုက်ပါသွားခဲ့တဲ့ အခြားသော ယင်လောက ငရဲမင်းကြီး တစ်ပါးလည်း ရှိခဲ့တယ်၊ အဲဒါကတော့ ဝမ်ချင်သူတော်စင်ပဲ "

ဖန့်ကျန့်ထျန်းက ဖန့်ချန်၏ ပုခုံးကို ညင်သာစွာ ပုတ်လိုက်ရင်း-

"မိစ္ဆာမျိုးနွယ်စု ရှိနေတဲ့ နေရာက… ဟင်းလင်းပြင် အမြင့်ဆုံး မဟာမိတ်အဖွဲ့က တန်ခိုးရှင်ကြီးတွေရဲ့ စောင့်ကြည့်ခြင်းကို ခံထားရတာ ကြာပြီဖြစ်တာကြောင့်၊ သဘာဝအတိုင်းပဲ ဝိညာဉ်မျိုးနွယ်စုက အင်အားကြီး ပုဂ္ဂိုလ်တွေကလည်း ဝိညာဉ်ဖမ်းဖို့အတွက် ရောက်လာခဲ့ကြလိမ့်မယ်။

ဝမ်ချင်သူတော်စင်က ဒီနည်းလမ်းကို အသုံးပြုပြီး… သူတို့နဲ့ ဆက်သွယ်မှုကို ပြန်လည်ရရှိခဲ့တာ။ နယ်မြေကိုးခုက လူသားမျိုးနွယ်စုတွေ အကုန်လုံး သေဆုံးသွားခဲ့ပြီးတဲ့နောက်မှာ… ဝမ်ချင်သူတော်စင်က သဘာဝအတိုင်းပဲ ရွှမ်အယ်ဝိညာဉ်ဖမ်း တမန် တွေရဲ့ လက်ထဲကနေ နယ်မြေကိုးခု လူသားတွေရဲ့ ဝိညာဉ်တွေကို ခေါ်ဆောင်သွားပေးလိမ့်မယ်၊ အဲဒီနောက်ပိုင်း သံသရာလည်ပြီး လူပြန်ဝင်စားမယ့် ကိစ္စတွေကိုတော့… ဟော်ဆွေ့မျိုးနွယ်စုတွေ ဝင်ရောက်စွက်ဖက်ဖို့ စိတ်ကူးတောင် မယဉ်နိုင်တော့ဘူး။

ငါတို့တွေက သဘာဝအတိုင်းပဲ သေတွင်းထဲကနေ ပြန်လည်ရုန်းထွက်ပြီး… ဟင်းလင်းပြင် အမြင့်ဆုံး မဟာမိတ်အဖွဲ့ဆီကို အသစ်တဖန် ပြန်လည်ရောက်ရှိသွားနိုင်လိမ့်မယ်။

အဲဒီအချိန်ကျရင်တော့… ငါတို့တွေ အားလုံးက တစ်စစီ ခွဲဖြာပြီး ပုန်းအောင်းနေထိုင်ကြမှာ ဖြစ်လို့၊ ဟော်ဆွေ့မျိုးနွယ်စုတွေမှာ ငါတို့ ရှန်းဟုန်းမျိုးနွယ်စုရဲ့ မျိုးဆက်တွေကို သုတ်သင်ရှင်းလင်းပစ်ဖို့… နောက်ထပ် ဘာနည်းလမ်းတွေ ရှိနိုင်ဦးမလဲ ဆိုတာကို စောင့်ကြည့်ရသေးတာပေါ့"

သူက စကားကို ခေတ္တမျှ ဖြတ်လိုက်ရင်း-

"ဒါကြောင့်မို့လို့ပဲ… နယ်မြေကိုးခုရဲ့ ကိစ္စတွေကို၊ မင်း နောက်ထပ် ဝင်ရောက်စွက်ဖက်မနေပါနဲ့တော့၊ သူတို့ကို စိတ်ကြိုက် သတ်ခွင့်ပေးလိုက်ပါ…… ဒါက ငါတို့တွေရဲ့ အိမ်ပြန်လမ်းပဲ ဖြစ်တယ်"